གསུམ་པ་དལ་འབྱོར་གྱི་མི་ལུས་འདི་རྒྱུའི་སྒོ་ནས་རྙེད་དཀའ་བ་སྒོམ་པ།
གསུམ་པ་དལ་འབྱོར་གྱི་མི་ལུས་འདི་རྒྱུའི་སྒོ་ནས་རྙེད་དཀའ་བ་སྒོམ་པ་ནི།
བླང་དོར་རབ་གསལ་ལས། འཇིག་རྟེན་དགེ་བ་སྤྱོད་པ་དཀོན་པའི་ཕྱིར། །དགེ་འབྲས་མི་ལུས་ཐོབ་པ་ཤིན་ཏུ་དཀོན། །ཞེས་གསུངས་པ་ལྟར་དལ་འབྱོར་གྱི་མི་ལུས་ཐོབ་པ་ལ་ཚུལ་ཁྲིམས་རྣམ་པར་དག་པའི་གཞི་བཟུང༌། སྦྱིན་སོགས་དགེ་བ་མང་པོས་གྲོགས་བྱས། སྨོན་ལམ་དྲི་མ་མེད་པས་མཚམས་སྦྱར་བ་དགོས་ཀྱང༌། སེམས་ཅན་གྱི་ནང་ན་སྡིག་པའི་ལས་བྱེད་པ་ནི་ཆེས་མང་སྟེ་མཐའ་མེད། དགེ་བའི་ལས་བྱེད་པ་ནི་སྤྱི་ཙམ་ནས་ཀྱང་ཤིན་ཏུ་ཉུང་བ་ཡིན་ལ། དགེ་བའི་ནང་ནས་ཀྱང་མི་ལུས་འཕེན་ཐུབ་པའི་ཚུལ་ཁྲིམས་སྲུང་བ་ནི་ཆེས་ཤིན་ཏུ་དཀོན་པས་དེའི་ཕྱིར་མི་ལུས་རྙེད་དཀའ་བ་ཡིན། དེའི་སྟེང་དུ་ཡང་འབྱོར་བ་བཅུ་ཚང་ཞིང་ཆོས་དང་མཇལ་བ་ལ་བསོད་ནམས་མང་པོ་གསོག་དགོས་པས་འདི་འདྲ་ཤིན་ཏུ་རྙེད་དཀའ་བ་ཡིན་ཡང་སྔོན་སྟེས་དབང་གིས་དགེ་བ་ཆེ་རབ་ཅིག་ལན་གཅིག་བསགས་ཡོད་འདུག་པས་ད་རེས་དལ་འབྱོར་གྱི་ལུས་འདི་ཐོབ་འདུག ད་འདི་ནས་རྡོག་སྣ་ཞིག་འགྲེད་ནས་ངན་སོང་དུ་ལྷུང་ཕྱིན་ཆད་དེ་ནས་ཐར་བ་དང་ཐམས་ཅད་མཁྱེན་པ་མི་ཐོབ་པ་མ་ཟད་བདེ་འགྲོའི་སྒྲ་ཙམ་ཡང་བསྐལ་བ་མུ་མཐའ་ཡས་པར་ཐོས་དཀའ་བའི་ངན་སོང་གི་སྡུག་བསྔལ་བརྒྱུད་མར་མྱོང་དགོས་པ་ཡིན་པས་ན་ད་ནི་ཕྱི་བཤོལ་ཀྱི་ལེ་ལོའི་དབང་དུ་མི་གཏོང་བར་ཉི་མ་དེ་རིང་ནས་བཟུང་སྟེ་དཀོན་མཆོག་གསུམ་གྱི་ཞབས་ལ་འཇུས་ནས་ཆོས་ལ་འབད་པར་བྱ་སྙམ་དུ་ཐག་བཅད་པའི་སྒོ་ནས་བསྒོམ་པར་བྱའོ། །