གསུམ་པ་དུད་འགྲོའི་སྡུག་བསྔལ་བསམ་པ།
གསུམ་པ་དུད་འགྲོའི་སྡུག་བསྔལ་བསམ་པ་ནི།
དེ་ལ་དུད་འགྲོ་བྱིངས་ན་གནས་པ་དང་ཁ་འཐོར་བ་དང་གཉིས་ལས། དང་པོ་ནི། རྒྱ་མཚོའི་ནང་དུ་ཀླུ་དང་ཆུ་སྲིན་ལ་སོགས་པ་རྒྱ་མཚོའི་ནང་ཐམས་ཅད་གང་བར་ཡོད་པ་རྣམས་ཏེ། བདེ་བ་སྒྲུབ་པའི་ཐབས་མི་ཤེས། སྡུག་བསྔལ་དང་མི་འདོད་པ་བསལ་བའི་ཐབས་མི་ཤེས་པའི་རྨོངས་པ་ནི་སྡུག་བསྔལ་མཐའ་ཡས་པ་འབྱུང་བའི་རྒྱུ་ཡིན་པས་བླུན་རྨོངས་ཀྱི་སྡུག་བསྔལ་ནི་དུད་འགྲོ་རྣམས་ཀྱི་སྡུག་བསྔལ་གྱི་གཙོ་བོ་དང་ཐུན་མོང་བ་ཡིན་ཞིང༌། དེའི་སྟེང་དུ་ཆུ་སྲིན་སོགས་སྲོག་ཆགས་ཆེན་པོ་རྣམས་ཀྱིས་ཆུང་ངུ་དུ་མ་ཅིག་ཆར་དུ་ཟ་བ་དང༌། དུང་འབུ་སོགས་ཆུང་ངུ་དུ་མས་ཆེན་པོ་རྣམས་ཕུག་སྟེ་ཟ་བ་དང༌། རྒྱ་མཚོའི་རླབས་ཀྱིས་བསྐྱོད་དེ་གནས་གཅིག་ཏུ་སྡོད་པའི་དབང་མེད་པས་ཕྱོགས་ཐམས་ཅད་དུ་འཁྱམས་དགོས་བ་དང༌། དེ་སྐབས་སུ་འཇིགས་པ་སྣ་ཚོགས་དང་འཕྲད་པ་དང༌། གཞན་ཡང་སྐྱེ་རྒ་ན་འཆི་སོགས་སྡུག་བསྔལ་བསམ་ལས་འདས་པ་ཡོད་དོ། ། གཉིས་པ་དུད་འགྲོ་ཁ་འཐོར་བ་ནི། མི་དང་ལྷའི་ཡུལ་ན་ཡོད་པ་འདི་རྣམས་ཡིན། མིས་བདག་ཏུ་མ་བཟུང་བ་རྣམས་ནི་ཕན་ཚུན་གཅིག་གིས་གཅིག་ཟ་བ། རྔོན་པས་གསོད་པ། དགྲ་བྱུང་གི་དོགས་པ་དང༌། ཚ་གྲང་དང་བཀྲེས་སྐོམ་གྱིས་ཆེས་གདུང་བ་ལ་སོགས་པ་སྡུག་བསྔལ་འདི་མེད་བསམ་པ་གཅིག་མེད་པས་རྟག་ཏུ་སེམས་ལ་བདེ་བ་མེད། མིས་བདག་ཏུ་བཟུང་བ་རྣམས་ཀྱང་སྤུ་འཛིང་པ་དང༌། སྣ་འབིགས་པ་དང༌། བརྡེག་པ་དང༌། ཁུར་ལྕི་བས་ངལ་བ་སོགས་དང༌། ཤ་དང་ཁྲག་དང་པགས་པ་དང་རུས་པའི་ཕྱིར་གསོད་པ་སོགས་གསོད་གཅོད་བཀོལ་སྤྱད་ཀྱི་སྡུག་བསྔལ་མང་པོ་ཡོད་ལ། གཙོ་བོར་སྡུག་བསྔལ་གྱི་གཙོ་བོ་ཤིན་ཏུ་རྨོངས་བས་གཅིག་ལ་གཅིག་ཟ་བ་ཡིན་ཏེ། མི་ཤ་ཆགས་པའི་དགྲ་ལ་ཟོན་བྱེད་པ་ལྟར་རྟག་ཏུ་གནས་དགོས་པ་ཡིན་ནོ། །དེ་རྣམས་ཀྱི་གནད་བསྡུས་ཏེ་བསམ་པ་ལ། དེ་ལྟར་ངན་སོང་གསུམ་གྱི་སྡུག་བསྔལ་བསམ་ཙ་ན་བཟོད་པའི་ཐབས་མི་འདུག དེ་ལས་སྐྱོབ་པའི་སྐྱབས་ཤིག་དགོས་པར་འདུག སྐྱབས་སུས་ཐུབ་ན། ཚངས་པའམ། བརྒྱ་བྱིན་ནམ་འཁོར་ལོས་སྒྱུར་བའི་རྒྱལ་པོས་ཀྱང་སྐྱོབ་མི་ཐུབ་ན། གཞན་འདི་བ་ཀུན་གྱིས་ག་ལ་ཐུབ། འོ་ན་སུས་ཐུབ་ན་དཀོན་མཆོག་གསུམ་གྱིས་ཐུབ། བདག་ལྷ་ཇོ་བོ་དཀོན་མཆོག་རིན་པོ་ཆེ་གསུམ་ལ་སྐྱབས་སུ་འགྲོ། སངས་རྒྱས་ལ་སྟོན་པ་ཞུ། ཆོས་ལ་ནི་ཉམས་ལེན་ཞུ། དགེ་འདུན་ལ་ནི་དེ་སྒྲུབ་པའི་གྲོགས་ཞུ་བ་ཡིན་སྙམ་དུ་བསམ། ཡང་སྐྱབས་པ་སངས་རྒྱས་ལ་བསྐྱབས་ཀྱང༌། སྐྱོབ་པ་ཆོས་ཀྱིས་སྐྱོབ་བྱ་བ་ཡིན། ཇི་སྐད་དུ། ཐུབ་རྣམས་སྡིག་པ་ཆུ་ཡིས་འཁྲུ་བར་མི་མཛད་ལ། །འགྲོ་བའི་སྡུག་བསྔལ་ཕྱག་གིས་ཀྱང་ནི་སེལ་མི་མཛད། །ཉིད་ཀྱི་རྟོགས་པ་གཞན་ལ་སྤོ་བར་མཛད་པ་མིན། །ཆོས་ཉིད་བདེན་པ་བསྟན་པས་གྲོལ་བར་མཛད་པ་ཡིན། །ཞེས་གསུངས་པ་ལྟར་སངས་རྒྱས་ཀྱིས་ཀྱང་མི་ཆུས་ཁྱེར་བ་སྐྲ་ནས་འཛིན་པ་ལྟར་སྐྱབ་ཏུ་མི་བཏུབ། ཆོས་བཤད་ཆོས་བཞིན་བྱེད་དུ་བཅུག་ནས་སྐྱོབ་པ་ཡིན། སངས་རྒྱས་ལ་དད་པ་བསྒོམས་ཏེ། དེས་གསུངས་པའི་ཆོས་ནས་ཇི་སྐད་བཤད་པ་བཞིན་བྱ། འཕགས་པའི་དགེ་འདུན་རྣམས་ཀྱིས་ཇི་འདྲ་མཛད་འདུག་པ་དེ་བཞིན་དུ་རང་རེ་ཡང་དེའི་ལད་མོ་བཟློས་ཏེ་བྱེད་སྙམ་པ་རྒྱུན་དུ་བསྒོམ་མོ། །