གསུམ་པ་འཁོར་བ་སྤྱིའི་སྡུག་བསྔལ་བསམ་པ།
གསུམ་པ་འཁོར་བ་སྤྱིའི་སྡུག་བསྔལ་བསམ་པ་ནི།
དམྱལ་བ་དང་ཡི་དྭགས་དང་དུད་འགྲོ་དང་མི་དང་ལྷ་མ་ཡིན་དང་འདོད་ཁམས་ཀྱི་ལྷ་དང་གཟུགས་དང་གཟུགས་མེད་བའི་ལྷའི་བར་དུ་སྡུག་བསྔལ་དེ་འདྲ་ན། ཁམས་གསུམ་འཁོར་བ་འདི་ཀུན་སྡུག་བསྔལ་གསུམ་མམ་དྲུག་གམ་བརྒྱད་ལ་སོགས་པ་སྡུག་བསྔལ་གྱི་རང་བཞིན་ཅན་དང༌། སྡུག་བསྔལ་གྱི་ཡོ་ལངས། སྡུག་བསྔལ་གྱི་འཁྲུལ་འཁོར། སྡུག་བསྔལ་གྱི་ཁོང་འཚངས་ཅན་དང༌། སྡུག་བསྔལ་གྱིས་ཀུན་ཏུ་བསྐོར་བ་ཡིན། སྡུག་བསྔལ་མེ་ལྟར་འབར། ཆུ་ལྟར་འཁྲུགས། རླུང་ལྟར་གཡེངས། རི་ལྟར་ནོན་པ་ཡིན་པ་ལས་མ་འདས་པས། མེའི་འོབས་ལྟ་བུ། སྲིན་མོའི་གླིང་ལྟ་བུ། རྒྱ་མཚོའི་ཀློང་ལྟ་བུ། མཚོ་ཆའི་རྩེ་ལྟ་བུ། མི་གཙང་བའི་འདམས་ལྟར་བདེ་བའི་གོ་སྐབས་ཅུང་ཟད་མེད་པར་གནས་གང་དུ་གནས་ཀྱང་སྡུག་བསྔལ་གྱི་གནས། ལུས་ཅི་འདྲ་བླངས་ཀྱང་སྡུག་བསྔལ་གྱི་ལུས། གྲོགས་སུ་དང་འགྲོགས་ཀྱང་སྡུག་བསྔལ་གྱི་གྲོགས། ལོངས་སྤྱོད་ཅི་ལ་ལོངས་སྤྱད་ཀྱང་སྡུག་བསྔལ་གྱི་ལོངས་སྤྱོད་ཡིན་ཏེ། མདོ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུས་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་མིན་འཐབ་ཤིང་རྩོད་པས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་མོ་ན། །བདེ་བ་ནམ་ཡང་ཡོད་མ་ཡིན། །ཞེས་དང༌། རྗེ་བཙུན་བྱམས་པས། འགྲོ་ལྔ་དག་ན་བདེ་བ་མེད། །མི་གཙང་ཁང་བར་དྲི་ཞིམ་མེད། །ཅེས་དང༌། ཨོ་རྒྱན་ཆེན་པོས། འཁོར་བ་འདི་ལ་ཁབ་གྱི་རྩེ་ཙམ་ཡང༌། །བདེ་བ་ནམ་ཡང་ཡོད་མ་ཡིན་ཞེས་གསུངས། །ཅུང་ཟད་བདེ་ཡང་འགྱུར་བའི་སྡུག་བསྔལ་ཡོད། །ཅེས་གསུངས་སོ། །སྡུག་བསྔལ་དེ་ཡང་རྣམ་པ་གསུམ་སྟེ། ༡ སྡུག་བསྔལ་གྱི་སྡུགབསྔལ་ཞེས་བྱ་བ། ཚ་གྲང་ནད་ལ་སོགས་པ་ཚོར་བ་སྡུག་བསྔལ་ཐམས་ཅད་ཡིན། ༢ འགྱུར་བའི་སྡུག་བསྔལ་ཞེས་བྱ་བ་ཚེ་དང་ལོངས་སྤྱོད་ལ་སོགས་པ་ཐ་ན་བསམ་གཏན་གྱི་བདེ་བ་ཚུན་ཆད་དེ་ཟག་བཅས་ཀྱི་ཚོར་བ་བདེ་བ་ཐམས་ཅད་ཡིན། དེ་ཡང་འཁོར་བསྒྱུར་གྱི་མངའ་ཐང་ལོངས་སྤྱོད་ཀྱི་བདེ་བ་ལ་སོགས་པ་མིའི་བདེ་བ་དང༌། བསམ་གཏན་གསུམ་པ་མན་ཆད་ཀྱི་ལྷའི་བདེ་བ་ལ་སོགས་པ་འཁོར་བའི་བདེ་བ་ཇི་སྙེད་མཆིས་པ་ཐམས་ཅད་ནི་སྡུག་བསྔལ་གྱི་རང་བཞིན་མ་ཡིན་པ་གཅིག་ཀྱང་མེད་དེ། གཟུགས་མཛེས་པ་ལ་སོགས་པ་ཚོར་བ་བདེ་བའི་དམིགས་པ་དང༌། ཚོར་བདེ་དང་མཚུངས་ལྡན་གྱི་སེམས་དང་འདུ་ཤེས་ལ་སོགས་པ་ཚོར་བ་བདེ་བའི་གྲོགས་དང༌། ཚོར་བདེའི་བདག་རྐྱེན་མིག་དབང་ལ་སོགས་པ་ཚོར་བ་བདེ་བའི་རྟེན་དང༌། ཟག་བཅས་ཀྱི་ཚོར་བ་བདེ་བ་རང་ཉིད་དང་བཅས་པ་རྣམས་ནི། དཔེར་ན་ནད་ཚབ་པོ་ཆེ་ཞིག་གིས་བཏབ་པའི་ཚེ་རེ་ཞིག་ན་ནད་ཀྱི་གདུང་བ་ཆེན་པོ་དེ་ཞི་ནས་ནད་ཆུང་ངུ་ཙམ་ལུས་པ་དེ་ལ་བདེ་བར་སྣང་བ་ལྟར། ཡུན་རིང་པོར་དམྱལ་བའི་སྡུག་བསྔལ་ལ་སོགས་པ་སྡུག་བསྔལ་ཤུགས་དྲག་པོས་མནར་མནར་བའི་རྗེས་སུ་ལྷ་མིའི་གནས་སུ་སྐྱེ་ཚེ་སྡུག་བསྔལ་དྲག་པོ་དེ་ཞི་བའི་སྡུག་བསྔལ་ཤུགས་ཆུང་ངུ་ཞིག་མངོན་དུ་གྱུར་པ་ལ་བདེ་བར་སྣང་བ་ཡིན་གྱི་ངོ་བོ་ཉིད་ཀྱིས་བདེ་བ་མ་ཡིན་པའི་ཕྱིར་ཏེ། འཁོར་བའི་བདེ་བ་དེ་དག་རང་གི་ངོ་བོའི་སྒོ་ནས་བདེ་བ་ཡིན་ན་སྡུག་བསྔལ་གྱི་རྒྱུ་ནད་སོགས་ཅི་ཙམ་ཆེ་བ་བཞིན་དུ་སྡུག་བསྔལ་ཆེས་ཆེར་འགྲོ་བ་བཞིན། བཀྲེས་པའི་ཚེ་ཟས་ཅི་ཙམ་ཟོས་བཞིན་བདེ་བ་ཆེར་འགྲོ་བ་དང༌། གྲང་བའི་ཚེ་མེ་དང་ཉི་འོད་བསྟེན་ཅི་ཙམ་དྲགས་པ་བཞིན་བདེ་བ་ཇེ་ཆེར་འགྲོ་དགོས་ཀྱང༌། ཟས་ཧ་ཅིང་ཟོས་དྲགས་པ་དང་མེ་དང་ཉི་མའི་འོད་ཧ་ཅང་བསྟེན་དྲགས་ན་སྡུག་བསྔལ་འབྱུང་བ་ལྟ་བུ་ཡིན་པའི་ཕྱིར་རོ། །འདི་ཟས་རང་གི་ངོ་བོས་བདེ་བའི་རང་བཞིན་ཡིན་ན་ཟས་བདེ་བ་བསྟེན་པ་ཅི་ཙམ་མང་བ་བཞིན་བདེ་བའི་ཚོར་བ་ཆེས་ཆེར་འགྲོ་དགོས་པ་དང༌། དེ་ལྟར་མ་ཡིན་པ་གཉིས་ལ་ངེས་པ་དྲངས་ནས་གཞན་ཐམས་ཅད་ལ་སྦྱར་བའོ། །གཞན་ཡང་ལུས་དང་ལོངས་སྤྱོད་སྙན་གྲགས་ལ་སོགས་པ་འཁོར་བའི་བདེ་འབྱོར་ཐམས་ཅད་ཀྱིས་ནི་རང་ཉིད་རྟག་པ་དང་བརྟན་པ་དང་སྙིང་པོ་ཡོད་པ་ལྟར་དུ་བསྟེན་ནས་རང་ཅག་སོ་སྐྱེས་རྣམས་དེ་དག་ལ་ཆགས་པ་དང༌། དེའི་ཆེད་དུ་སེར་སྣ་དང་འདོད་ཆགས་དང་ང་རྒྱལ་ལ་སོགས་པ་ཉོན་མོངས་པའི་ལས་དུ་མ་གསོག་བཅུག་པའི་སྒོ་ནས་བསླུས་བསླུས་ཏེ། མཐར་རང་ཉིད་རྟག་མི་ཐུབ་པས་འགག་ཅིང་ཟད་པར་འགྱུར་བའི་རྒྱུ་ལས་མི་བཟོད་པའི་སྡུག་བསྔལ་ལ་སྦྱོར་བ་དང༌། ཅི་ཙམ་ལོངས་སྤྱོད་ཀྱང་ནམ་ཡང་ཚིམ་པ་མེད་པ་མ་ཟད་ལྷག་པར་ཡང་འདོད་པ་ཆེས་ཆེར་འཕེལ་བ་ལས་སྙིང་པོ་ཅུང་ཟད་ཀྱང་མེད་པས་སྡུག་བསྔལ་ཁོ་ནའི་རང་བཞིན་ཡིན་སྙམ་དུ་ཡང་ཡང་བསམ་པས་འཁོར་བའི་བདེ་འབྱོར་ལ་སྡུག་བསྔལ་དུ་མཐོང་ནས་ཞེན་པ་ལོག་པར་བྱའོ། །འདུ་བྱེད་ཀྱི་སྡུག་བསྔལ་ཞེས་བྱ་བ་སྡུག་བསྔལ་དེ་གཉིས་ཀའི་གཞི་འདུ་བྱེད་ཉེ་བར་ལེན་པའི་ཕུང་པོ་ཙམ་འདི་སྡུག་བསྔལ་ཐམས་ཅད་ཀྱི་འབྱུང་གནས་དང་ཞིང་ས་ཡིན། འདི་ཟག་བཅས་ཀྱི་ཚོར་བ་བཏང་སྙོམས་ཁོ་ན་དང་ལྡན་པའི་ཚེ་འདུ་བྱེད་ཀྱི་སྡུག་བསྔལ་ཁོ་ནའི་མིང་ཐོགས་པ་ཡིན། ཁྱད་པར་དུ་སྤྱིར་འཁོར་བའི་སྡུག་བདེན་གྱི་དངོས་པོ་ཐམས་ཅད་དང༌། ལྷག་པར་ཡང་རང་རྒྱུད་ཀྱི་འཁོར་བ་ཉེར་ཕུང་འདི་ཁྱབ་པ་འདུ་བྱེད་ཀྱི་སྡུག་བསྔལ་དུ་སྒོམ་པར་བྱ་བ་ནི་ཤིན་ཏུ་གལ་ཆེ་བས་འདི་ལྟར་སྒོམ་པར་བྱ་སྟེ། འཁོར་བས་བསྡུས་པའི་དངོས་པོ་འདི་དག་ཐམས་ཅད་ནི་རྒྱུ་ལས་དང་ཉོན་མོངས་པས་བསྐྱེད་པ་ཁོ་ན་ཡིན་ལ་ལས་ཉོན་གཉིས་ཀྱིས་ནི་རང་གི་འབྲས་བུ་དེ་ཉོན་མོངས་པ་སྐྱེ་བའི་མཐུན་རྐྱེན་དུ་མ་གྱུར་པའི་དངོས་པོ་ཁོ་ནར་བསྐྱེད་པ་ཆོས་ཉིད་ཡིན་པས་ཉོན་མོངས་པ་སྐྱེ་བའི་རྒྱུ་མཐུན་དུ་མ་གྱུར་པའི་འཁོར་བའི་དངོས་པོ་གཅིག་ཀྱང་མེད་དེ། རང་ཅག་གི་རྒྱུད་ལ་ཉོན་མོངས་པ་མངོན་གྱུར་དུ་མེད་ཀྱང༌། གཟུགས་མཛེས་པ་དང་འཕྲད་པ་ན་དེས་འདོད་ཆགས་རང་དབང་མེད་པར་འདྲེན་པ་དང༌། མི་སྡུག་པས་ཁོང་ཁྲོ་འདྲེན་པ་དང༌། ལོངས་སྤྱོད་ཀྱིས་སེར་སྣ་དང་བརྣབ་སེམས་རང་དབང་མེད་པར་བསྐྱེད་པ་ལ་སོགས་པ་འཁོར་བའི་དངོས་པོ་ཐམས་ཅད་ནི་ཉོན་མོངས་པ་དབང་མེད་དུ་འདྲེན་པའི་མཐུན་རྐྱེན་མ་ཡིན་པ་གཅིག་ཀྱང་མེད། ཉོན་མོངས་པས་ནི་འཁོར་བའི་སྡུག་བསྔལ་མི་བཟད་པ་ཡང་ཡང་བསྐྱེད་ཅིང་འཁོར་བའི་སྡུག་བསྔལ་ལས་ནམ་ཡང་མི་ཐར་བ་དང༌། ཐར་བའི་སྲོག་རྩ་བཅད་དེ་བདེ་བའི་གོ་སྐབས་ནམ་ཡང་མེད་པར་བྱེད། དེས་ན་ལས་ཉོན་གྱིས་བསྐྱེད་པའི་སྡུག་བདེན་གྱི་དངོས་པོ་འདི་ནི་ཉོན་མོངས་པ་དང་མཐུན་པའི་སྒོ་ནས་སྡུག་བསྔལ་གྱི་རང་བཞིན་ཁོ་ན་ཡིན་སྙམ་དུ་བསམ། གཞན་ཡང་འདུས་བྱས་མི་རྟག་པ་ཡིན་ན་རང་ཉིད་མི་རྟག་པའི་སྒོ་ནས་སྡུག་བསྔལ་ཕྱི་མ་ལ་སྦྱོར་བས་ཁྱབ་པ་མེད་ཀྱང་ལས་ཉོན་གྱིས་བསྐྱེད་པའི་ཟག་བཅས་ཀྱི་དངོས་པོ་རྣམས་ནི་རང་རྒྱུ་ལས་ཉོན་གྱིས་སྐད་ཅིག་ནས་འཇིག་པའི་དངོས་པོར་ཡང་བསྐྱེད། རང་ཉིད་ཞིག་པའི་རྗེས་སུ་སྡུག་བསྔལ་ཕྱི་མ་སྐྱེད་བྱེད་དུ་ཡང་བསྐྱེད་པས་ཟག་བཅས་སྡུག་བདེན་གྱི་དངོས་པོ་འདི་དག་ནི། དཔེར་ན་མིའི་ཉེར་ཕུང་འདི་རྟག་ན་དམྱལ་བའི་སྡུགབསྔལ་སོགས་ཕྱི་མའི་སྡུག་བསྔལ་རྣམས་འབྱུང་མི་དགོས་ཀྱང་དེ་མི་རྟག་པའི་རྒྱུ་ལས་དམྱལ་བ་ལ་སོགས་པ་ཕྱི་མའི་སྡུག་བསྔལ་དུ་མ་རིམ་གྱིས་འབྱུང་བ་བཞིན་དུ་རང་ཉིད་ཀྱི་ངོ་བོ་རྟག་མི་ཐུབ་པའི་དབང་གིས་འཁོར་བ་ཐོག་མེད་ནས་ཐ་མའི་བར་དུ་སྡུག་བསྔལ་འདི་མ་མྱོང་བྱ་བ་གཅིག་ཀྱང་མེད་པར་མྱོང་བ་ཡིན་ལ། དེ་བཞིན་དུ་དཔེར་ན་ལོངས་སྤྱོད་དང་འདོད་ཡོན་གྱི་རྒྱུ་ལས་འདོད་ཆགས་ཀྱི་ལས་བསགས་པས་དམྱལ་བའམ་ཡི་དྭགས་སུ་སྐྱེ་བ་ལ་སོགས་པ་ཚེ་ཕྱི་མའི་སྡུག་བསྔལ་དུ་མ་དང༌། འདོད་ཡོན་དང་ལོངས་སྤྱོད་སྒྲུབ་པའི་སྡུག་བསྔལ། དེ་དང་བྲལ་བའི་སྡུག་བསྔལ། དེ་ལ་བརྟེན་ནས་དགྲས་བཅོམ་པ་དང༌། ནད་ཕོག་པ་ལ་སོགས་པ་ཚེ་འདིའི་སྡུག་བསྔལ་དཔག་ཏུ་མེད་པ་འབྱུང་བ་ལ་སོགས་པ་འདི་ཕྱིའི་སྡུག་བསྔལ་དུ་མའི་གནས་སུ་མ་གྱུར་པའི་འཁོར་བའི་ཆོས་གཅིག་ཀྱང་མེད་དེ། གཟུགས་མེད་ཀྱི་ཉེར་ཕུང་མི་རྟག་པའི་རྒྱུ་ལས་དམྱལ་བའི་སྡུག་བསྔལ་ལ་སོགས་པ་ཕྱི་མའི་སྡུག་བསྔལ་གྲངས་མེད་པ་འབྱུང་བ་བཞིན། རང་ཉིད་མི་རྟག་པའི་རྒྱུ་ལས་རྒྱུན་ཕྱི་མའི་སྡུག་བསྔལ་དུ་མས་མི་སྦྱོར་བའི་ཆོས་གཅིག་ཀྱང་མེད་པའི་ཕྱིར་རོ། །དེས་ན་ལས་ཉོན་གྱིས་བསྐྱེད་པའི་སྡུག་བདེན་འདི་དག་ནི་རང་གི་ངོ་བོ་མི་རྟག་པ་ཡིན་པའི་སྒོ་ནས་སྡུག་བསྔལ་བའི་རང་བཞིན་ཀྱང་ཡིན་སྙམ་དུ་བསམ། གཞན་ཡང་རང་ཅག་གི་ལུས་འདི་ལས་ཉོན་གྱིས་ནད་འབྱུང་བ་དང༌། རྒས་པར་འགྱུར་བ་དང༌། འཆི་བར་འགྱུར་བ་དང༌། བཀྲེས་སྐོམ་གྱི་སྡུག་བསྔལ་འབྱུང་བ་ཅན་སོགས་སུ་བསྐྱེད་པས་ནད་མི་འབྱུང་བ་དང༌། རྒས་པར་མི་འགྱུར་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ཡིན་པ་དང༌། རང་ཅག་གི་སེམས་འདི་ཡང་ལས་དང་ཉོན་མོངས་པས་ཆགས་སྡང་སོགས་ཉོན་མོངས་པའི་རྗེས་སུ་འཇུག་པ་ཅན་དང༌། ཚ་གྲང་ལ་སོགས་པའི་སྡུག་བསྔལ་མྱོང་བ་ཅན་དང༌། སྡུག་བསྔལ་མཐའ་དག་གི་རྩ་བ་ཉོན་མོངས་པའི་བག་ཆགས་མཐའ་དག་འཛིན་པ་ཅན་སོགས་སུ་བསྐྱེད་པས་སེམས་ཉོན་མོངས་པའི་རྗེས་སུ་མི་འཇུག་པ་དང༌། ཚ་གྲང་ལ་སོགས་པའི་སྡུལ་བསྔལ་མི་མྱོང་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ཡིན་པ་དང༌། ཕྱི་རོལ་གྱི་དངོས་པོ་རྣམས་ཀྱང་ལས་ཉོན་གྱིས་མཛེས་པ་ཐམས་ཅད་འདོད་ཆགས་དང༌། མི་སྡུག་པ་རྣམས་ཞེ་སྡང་དང༌། བར་མ་རྣམས་བདེན་འཛིན་བསྐྱེད་པའི་མཐུན་རྐྱེན་དུ་འགྱུར་བ་དང༌། ལོངས་སྤྱོད་རྣམས་སེར་སྣ་དང༌། གཡོ་སྒྱུ་ལ་སོགས་པ་དང༌། ཚ་རེག་གྲང་རེག་དག་ཚ་གྲང་གི་སྡུག་བསྔལ་སྐྱེད་བྱེད་དུ་བསྐྱེད་པ་ལ་སོགས་པ་ཉོན་མོངས་སྐྱེད་པའི་མཐུན་རྐྱེན་དུ་མ་བསྐྱེད་པ་གཅིག་ཀྱང་མེད་པས་མཛེས་པའི་དངོས་པོ་ཐམས་ཅད་འདོད་ཆགས་ཀྱི་རྒྱུར་མི་འགྱུར་བ་ལ་སོགས་པ་དང༌། ཚ་རེག་རྣམས་ཚ་བའི་སྡུག་བསྔལ་གྱི་རྒྱུར་མི་འགྱུར་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ནོ། །དེས་ན་ལས་ཉོན་གྱིས་བསྐྱེད་པའི་སྡུག་བདེན་འདི་དག་ནི་ལས་ཉོན་གྱི་གཞན་དབང་ཅན་ཡིན་པའི་སྒོ་ནས་ཀྱང་སྡུག་བསྔལ་བའོ་སྙམ་དུ་བསམ། ཁྱད་པར་དུ་རང་གི་ལུས་སེམས་གཉིས་ཀྱི་སྟེང་དུ་སྦྱར་ནས་བསམ་པར་བྱ་སྟེ། རང་རྒྱུད་ཀྱི་ཟག་བཅས་ཀྱི་ལུས་འདི་མེད་ན་ལུས་འདི་ལ་བརྟེན་ནས་བྱུང་བའི་འདི་ཕྱིའི་སྡུག་བསྔལ་གང་ཡང་མི་འབྱུང་བ་ཡིན་པ་ལ། ལུས་འདི་ལ་བརྟེན་ནས་ནད་སྣ་ཚོགས་ཀྱི་སྡུག་བསྔལ། ཚ་གྲང་དང་བཀྲེས་སྐོམ་གྱི་སྡུག་བསྔལ། རྒས་པའི་སྡུག་བསྔལ། འཆི་བའི་སྡུག་བསྔལ་ལ་སོགས་པ་ཚེ་འདིའི་སྡུག་བསྔལ་མཐའ་ཡས་པ་དང༌། ལུས་གསོ་བའི་ཆེད་དུ་སྲོག་གཅོད། མ་བྱིན་པ་ལེན་པ་ལ་སོགས་པ་མི་དགེ་བའི་ལས་དུ་མ་བསགས་པ་དང༌། ལུས་ལ་ཆགས་པའི་འདོད་ཆགས་དང༌། ལུས་ཀྱི་སྒོ་ནས་ང་རྒྱལ་དང༌། ལུས་འདི་ལ་གནོད་པ་ལ་ཁོང་ཁྲོ་བ་ལ་སོགས་པ་ལུས་ལ་བརྟེན་ནས་ཉོན་མོངས་པ་སྣ་ཚོགས་སྐྱེ། ཉོན་མོངས་པས་ལས་བསགས། ལས་ཉོན་གཉིས་ཀྱིས་ཚེ་ཕྱི་མའི་སྡུག་བསྔལ་མཐའ་ཡས་པ་བསྐྱེད་པ་དང༌།རང་གི་སེམས་འདིས་ནི་ནད་དང་བཀྲེས་སྐོམ་ལ་སོགས་པ་མི་འདོད་པའི་དངོས་པོ་ཐོག་ཏུ་བྱུང་བ་ན་དེ་ལ་ཉེར་ལེན་བྱེད་པའི་སྒོ་ནས་ཚེ་འདིར་ཡང་སྡུག་བསྔལ་དཔག་ཏུ་མེད་པ་མྱོང་བ་དང༌། སེམས་འདིས་ཉོན་མོངས་པ་དང་འཁོར་བར་འཕེན་པའི་ལས་བརྒྱ་ཕྲག་གི་བག་ཆགས་ཐམས་ཅད་མི་གཏོང་བར་དམ་དུ་འཛིན་པའི་སྒོ་ནས་ཚེ་ཕྱི་མའི་སྡུག་བསྔལ་མཐའ་ཡས་པ་ལ་སྦྱོར་བ་དང༌། ལྷག་པར་ཡང་རང་རྒྱུད་ཀྱི་ཟག་བཅས་ཀྱི་ཕུང་པོ་ལྔ་པོ་འདི་མེད་ན་ཕྱི་མའི་འཁོར་བའི་ཉེར་ལེན་མེད་པས་འཁོར་བར་གཏན་ནས་སྐྱེ་མི་དགོས་པ་ཡིན་པ་ལ། ད་ལྟའི་ཉེར་ཕུང་འདིས་ཚེ་ཕྱི་མའིའཁོར་བ་ཐམས་ཅད་ཀྱི་རྒྱུན་བཟུང་བ་དང་ཉེར་ལེན་གྱི་རྒྱུ་བྱེད་པའི་སྒོ་ནས་ཚེ་ཕྱི་མའི་འཁོར་བ་དང་འཁོར་བའི་སྡུག་བསྔལ་མཐའ་ཡས་པ་རྣམས་རིམ་པ་བཞིན་བསྐྱེད་པས་ན། རང་རྒྱུད་ཀྱི་འཁོར་བའམ་ལུས་སེམས་གཉིས་པོ་འདི་ནི་དམྱལ་བ་མནར་མེད་ཀྱི་སྡུག་བསྔལ་ལས་ཀྱང་གནོད་ཚབས་ཆེ་བའི་སྡུག་བསྔལ་གྱི་དངོས་པོ་ཡིན་ཏེ། དམྱལ་བ་མནར་མེད་ཀྱི་སྡུག་བསྔལ་གྱིས་ལན་འགའ་རེ་ལས་རྒྱུན་མི་ཆད་པར་སྡུག་བསྔལ་མྱོང་བར་མི་བྱེད། རང་རྒྱུད་ཀྱི་འཁོར་བ་འདིས་ནི་ཐོག་མ་མེད་པའི་དུས་ནས་མཐར་འཁོར་བ་འདི་མ་སྤང་བར་དུ་སྡུག་བསྔལ་ལ་མི་སྦྱོར་བའི་དུས་སྐབས་སྐད་ཅིག་ཀྱང་མེད་སྙམ་པ་སོགས་ཡང་ཡང་བསྒོམས་པས་སྤྱིར་འཁོར་བ་ཐམས་ཅད་དང༌།ཁྱད་པར་དུ་རང་རྒྱུད་ཀྱི་འཁོར་བ་འདི་སྡུག་བསྔལ་གྱི་རང་བཞིན་དུ་མཐོང་ནས་འཇིགས་སྐྲག་ཤུགས་དྲག་པོ་དང༌། ཞེན་ལོག་གི་བསམ་པ་བསྐྱེད་པར་བྱའོ། །འདུ་བྱེད་ཀྱི་སྡུག་བསྔལ་འདི་ལས་མ་ཐར་ན་གཞན་གཉིས་ལས་ཐར་བ་མེད་པས་ཅིས་ཀྱང་སྡུག་བསྔལ་གསུམ་ལས་ཐར་བར་བྱ་སྙམ་དུ་བསྒོམ་པར་བྱའོ། །གོང་དུ་བཤད་པ་ལྟར་༡སྐྱེ་བ་སྡུག་བསྔལ། ༢ རྒས་པ་སྡུག་བསྔལ། ༣ ན་བ་སྡུག་བསྔལ། ༤ འཆི་བ་སྡུག་བསྔལ། ༥ མི་སྡུག་པ་དང་ཕྲད་པས་སྡུག་བསྔལ། ༦ སྡུག་པ་དང་བྲལ་བས་སྡུག་བསྔལ། ༧ འདོད་པ་བཙལ་གྱིས་མ་རྙེད་པས་སྡུག་བསྔལ། ༨ ཕུང་པོ་རང་ཉིད་འདུ་བྱེད་ཀྱི་སྡུག་བསྔལ་ཡིན་པར་ཤེས་པར་བྱས་ནས། ཁམས་གསུམ་འཁོར་བ་ཐམས་ཅད་སྡུག་བསྔལ་བརྒྱད་ཀྱི་ངོ་བོ་ཡིན་སྙམ་དུ་བསྒོམ་པར་བྱའོ། །ཡང་འཁོར་བ་འདི་ལ་སྡུག་བསྔལ་རྣམ་གྲངས་དྲུག་ཅེས་བྱ་བ་ཡོད་དེ། དང་པོ་ངེས་པ་མེད་པས་སྡུག་བསྔལ་བའི་ཉེས་པ་ནི། དགྲ་གཉེན་དང་ཕ་བུ་དང༌། གནས་ལུས་ལོངས་སྤྱོད་ཐམས་ཅད་མ་ངེས་པ་ཁོ་ནར་འགྲོ་བ་སྟེ། ཇི་སྐད་དུ། ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་ཡང་བཤེས་ཉིད་དང༌། །ལྡོག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་གསུངས་པ་ལྟ་བུའོ། །