ད་ནི་ལས་འབྲས་བསམས་པའི་ཆོས་སྐོར་རྣམས་ཀྱི་སྙིང་བོའི་གྲུབ་དོན།
ད་ནི་ལས་འབྲས་བསམས་པའི་ཆོས་སྐོར་རྣམས་ཀྱི་སྙིང་བོའི་གྲུབ་དོན་ནི།
སྔར་ཇི་སྐད་བསྟན་པའི་དཀར་ནག་གི་ལས་འབྲས་བསམ། སྡིག་པ་མི་དགེ་བའི་ལས་སྔར་བྱས་ཟིན་ལ། སྟོབས་བཞི་ཚང་བའི་བཤགས་པ་འབུལ་བ་གལ་ཆེ། རྟེན་གྱི་སྟོབས་སྐྱབས་འགྲོ་དང་སེམས་བསྐྱེད་དང༌། གཉེན་པོ་ཀུན་ཏུ་སྤྱོད་པའི་སྟོབས་སྡིག་སྦྱོང་གི་དགེ་བ་གང་འགྲུབ་པ་དང༌། སུན་འབྱིན་པའི་སྟོབས་སྔར་བྱས་ལ་དུག་ཁོངས་སུ་སོང་བ་ལྟ་བུའི་འགྱོད་སེམས་དང༌། སླར་ལྡོག་པའི་སྟོབས་ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་ཏེ། དེ་བཞི་ཚང་བར་བྱའོ། །མཁན་པོ་སློབ་དཔོན་བླ་མ་རྟེན་གསུམ་དགེ་འདུན་ལ་སོགས་པའི་དྲུང་དུ་མཐོལ་བཤགས་ཡང་ཡང་འབུལ་བ་དང༌། དེ་དག་མ་འཛོམས་ཀྱང༌། རྒྱལ་བ་སྲས་བཅས་མཁའ་དབྱིངས་གང་བ་ལ་དམིགས་ཏེ་བཤགས་པ་འབུལ། བཤགས་ཚིག་ཕུང་བོ་གསུམ་པའི་མདོ་སོགས་དང༌། རང་གིས་སྡིག་པ་བགྱིས་པ་གང་ཡིན་པ་དེ་འདི་ལྟར་བགྱིས་སོ་ཞེས་མ་སྦས་མ་གསང་བར་བརྗོད་པ་ཉིད་གནད་ཆེ་བ་ཡིན་ནོ། །མི་དགེ་བཅུར་མ་ཟད་སྡིག་པ་མི་དགེ་པའི་ལས་སུ་གཏོགས་པ་ཆེ་ཆུང་ཐམས་ཅད་རང་ཡང་མི་བྱེད། གཞན་ཡང་བྱེད་དུ་མི་འཇུག སྡིག་པ་ལ་ཡི་རང་བའམ་དགའ་བར་མི་བྱ། བསྟོད་ཅིང་བསྔགས་པར་ཡང་མི་བྱ་སྙམ་དུ་བསྒོམ། དཀར་པོ་དགེ་བའི་ལས་ནི་ལས་ལམ་བཅུ་བོ་དེར་མ་ཟད་གཞན་གྱི་སྲོག་བསྐྱབས་པ་དང༌། འཚོ་བ་སྟེར་བ་དང༌། ཡོ་བྱད་སྤྱིན་པ་དང༌། ཚུལ་ཁྲིམས་སྲུང་བ་དང༌། དཀོན་མཆོག་མཆོད་པ་དང༌། དད་པ་ལ་སོགས་པའི་དགེ་བར་གཏོགས་སོ་ཅོག་རང་གིས་ཀྱང་ཅི་ལྕོགས་སུ་སྒྲུབ་གཞན་ཡང་བྱེད་དུ་འཇུག རང་གཞན་གྱིས་དགེ་བ་བྱས་པ་ལ་ཡི་རང་བྱ། བསྔགས་པ་ཡང་བརྗོད་པར་བྱའོ་སྙམ་དུ་བསམ། ཡང་དགེ་སྡིག་གཉིས་མ་ཡིན་པའི་ལས་ལུང་མ་བསྟན་ཞེས་བྱ་བ་འགྲོ་འཆག་ཉལ་འདུག་སོགས་ངེས་མེད་སྣ་ཚོགས་པ་ཞིག་འདུག་པ། དེ་དག་ལ་རྣམ་པར་སྨིན་པའི་འབྲས་བུ་མེད་ཀྱང་དོན་མེད་དུ་དུས་འདའ་བར་འདུག ལེ་ལོ་དང་རྣམ་གཡེང་གི་རྒྱུ་ལས་དེ་དག་གི་དབང་དུ་འགྲོ་ཡིན་འདུག་པ་ལ། ཕྱིན་ཆད་ལེ་ལོ་རྣམ་གཡེང་གི་དབང་དུ་མི་བཏང༌། ལས་ལུང་མ་བསྟན་འབྱུང་བའི་དོད་དུ་ཡང་དགེ་བ་འབའ་ཞིག་ལ་བློ་དང་བྱ་སྤྱོད་བསྒྱུར་བར་བྱའོ་སྙམ་དུ་བསྒོམ་པར་བྱ་དགོས་སོ། །ཟག་བཅས་ཀྱི་ལས་དེ་དག་ནི་ཉོན་མོངས་པ་ལས་བྱུང་ལ། ཉོན་མོངས་པ་ལ་དབྱེ་ན་རྩ་ཉོན་དྲུག་སོགས་མང་ན་ཡང་རྩ་བ་འདོད་ཆགས་ཞེ་སྡང་གཏི་མུག་གསུམ་ཡིན་ཏེ། བཤེས་སྤྲིངས་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བའོ། །ཞེས་གསུངས་པའི་ཕྱིར། དེ་དག་གི་རྩ་བ་མ་རིག་པ་ཡིན་པས་དེའི་གཉེན་པོ་རིག་པ་ཡེ་ཤེས་བདག་མེད་རྟོགས་པའི་ཤེས་རབ་བསྐྱེད་དགོས་ལ། གང་ཟག་གི་བདག་མེད་རྟོགས་པའི་ཤེས་རབ་མེད་ན་སྲིད་པ་འཁོར་བ་ལས་གྲོལ་བ་མེད་དེ། ཐེག་མཆོག་དབུ་མ་ལས། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་པའི་ཕྱིར་རོ། །སྤྱིར་ནང་བསྟན་ལ་འཇུག་པའི་སྒོ་སྐྱབས་འགྲོ་ཡིན་ན། དེ་ཡང་བརྒྱུད་ལ་སྐྱེས་པ་ལ་དད་པ་གལ་ཆེ་བ་ཡིན་ལ། དེ་ལ་ཡང་དཀོན་མཆོག་གསུམ་གྱི་ཡོན་ཏན་ཤེས་དགོས་པ་ཡིན་ཏེ། རྗེ་ཏཱ་ར་ནཱ་ཐའི་ཞལ་སྔ་ནས། ཆོས་ཀྱི་རྩ་བ་སྐྱབས་འགྲོ་དང༌། སྐྱབས་འགྲོའི་རྩ་བ་དད་པ་ཡིན་ཞིང༌། དད་པའི་རྩ་བ་སྟོན་པ་བཅོམ་ལྡན་འདས་ཀྱི་རྣམ་ཐར་གོ་བ་ལ་རག་ལས། ཞེས་གསུངས་པས་སོ། །སྐྱབས་འགྲོ་རྒྱུད་ལ་སྐྱེ་བ་ལ་སྡུག་བསྔལ་ཅི་རིགས་ལ་འཇིགས་སྐྲག་སྐྱེས་ནས་དཀོན་མཆོག་ལ་དེ་ལས་སྐྱོབས་པའི་ནུས་པ་ཡོད་པར་ཤེས་དགོས་པ་ཡིན་ནོ། །ངེས་འབྱུང་གི་བསམ་པ་རྒྱུད་ལ་མ་སྐྱེས་ན་ཞི་བ་ཐར་བ་ཐོབ་པ་མེད་པ་ཡིན་པར་འཕགས་པ་ལྷས། གང་ལ་འདི་སྐྱོ་ཡོད་མིན་ན། །དེ་ལ་ཞི་གུས་ག་ལ་ཡོད། །ཅེས་གསུངས་ལ། ངེས་འབྱུང་གི་བསམ་པ་རྒྱུད་ལ་སྐྱེ་བ་ལ་འཁོར་བ་སྡུག་བསྔལ་ལམ་སྡུག་བདེན་ཤེས་དགོས་པ་ཡིན། དེ་ཤེས་པ་ལ་བློ་ལྡོག་རྣམ་བཞི་ཤེས་དགོས་ཏེ། རྗེ་བདག་ཉིད་ཆེན་པོས། དལ་འབྱོར་རྙེད་དཀའ་ཚེ་ལ་ལོང་མེད་པ། །ཡིད་ལ་གོམས་པས་ཚེ་འདིའི་སྣང་ཤས་ལོག །ལས་འབྲས་མི་བསླུ་འཁོར་བའི་སྡུག་བསྔལ་རྣམས། །ཡང་ཡང་བསམ་ན་ཕྱི་མའི་སྣང་ཤས་ལྡོག །དེ་ལྟར་གོམས་པས་འཁོར་བའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང༌། །ཉིན་མཚན་ཀུན་ཏུ་ཐར་བ་དོན་གཉེར་བློ། །བྱུང་ན་དེ་ཚེ་ངེས་འབྱུང་སྐྱེས་པ་ལགས། །ཞེས་གསུངས་སོ། །མདོར་ན་སྐྱེས་བུ་ཆུང་འབྲིང་ཆེ་གསུམ་གང་གི་ལམ་རྒྱུད་ལ་སྐྱེ་བ་ལ་བློ་ལྡོག་རྣམ་བཞི་འདི་གལ་ཆེ་བ་ཡིན་ནོ། །ཆོས་ཆོས་བཞིན་དུ་འགྲོ་བ་ལ་འདི་བསྒོམ་དགོས། དེང་སང་རྫོགས་ཆེན་ཕྱག་ཆེན། ཟབ་ལམ་རྡོ་རྗེའི་རྣལ་འབྱོར་སོགས་ལ་མཐོ་སྙེག་བྱེད་ཀྱང་སྐྱབས་འགྲོ་མེད་ན་ནང་བསྟན་གྱི་སྒོར་མི་ཆུད། ངེས་འབྱུང་གི་བསམ་པ་མེད་ན་ཆོས་གང་བསྒྲུབ་ཁུལ་བྱེད་ནའང་ཐར་བའི་རྒྱུར་མི་འགྲོ། བྱང་ཆུབ་མཆོག་ཏུ་སེམས་བསྐྱེད་པ་མེད་ན་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུར་མི་འགྱུར་བའམ་ཐེག་ཆེན་གྱི་ཆོས་སུ་མི་འགྱུར་བ་ཡིན་པས་རང་བློ་དང་འཚམས་པའི་ཆོས་དང༌། ལམ་གྱི་གོ་རིམ་ཡོད་པ་དང༌། ཚིག་འདོན་པ་ཙམ་མ་ཡིན་པར་དོན་བསམ་པ་སོགས་ཡན་ལག་ཚང་བར་བྱས་ནས་ཉམས་སུ་ལེན་དགོས་སོ། །
སྨྲས་པ། དལ་འབྱོར་རྙེད་དཀའ་འཆི་བ་མི་རྟག་པ། །འཁོར་བ་སྡུག་བསྔལ་ལས་འབྲས་བསླུ་མེད་པའི། །ཆོས་ཚུལ་གནས་ལ་ཐོས་བསམ་སྒོམ་པ་ཡིས། །རྣམ་གྲོལ་ཆོས་ཀྱི་གོ་འཕང་ཐོབ་པར་སྨོན། །དེ་ལྟར་བློ་ལྡོག་རྣམ་བཞིའི་བཤད་པ་གཞན་ཕན་ཉི་མ་ཞེས་བྱ་བ་འདི་ནི་རྒྱལ་རོང་པཱ་ལ་དགོན་གྱི་གྲྭ་བཙུན་ལྷག་བསམ་པ་གསལ་སྟོང་གིས་སྟོན་པའི་གསེར་སྐུ་དར་བཅས་བསྐུལ་ངོར་དངོས་གྲུབ་དཔལ་གྱིས་བྲིས་པའོ། །འདིས་གཞན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །སརྦ་མངྒ་ལཾ།