ཇོ་ནང་གིས་སྒྲུབ་པ་རང་དབང་བར་མི་འདོད་པ་སོགས་རང་སྟོང་གཞན་སྟོང་གནད་འདྲ་བ་ཡོད་པར་བསྟན་པ།
ཇོ་ནང་གིས་སྒྲུབ་པ་རང་དབང་བར་མི་འདོད་པ་སོགས་རང་སྟོང་གཞན་སྟོང་གནད་འདྲ་བ་ཡོད་པར་བསྟན་པ།
སྟོན་པ་ཐུགས་རྗེ་ཅན་ལ་ཕྱག་འཚལ་ལོ། །དེ་ལ་འདིར་རང་སྟོང་བ་དང་གཞན་སྟོང་བ་གཉིས་ཀྱིས་དོན་དམ་བདེན་པར་བདེན་པ་གྲུབ་པར་འདོད་པ་དངོས་སུ་ཁས་ལེན་མི་ལེན་སོགས་ཚིག་ཟིན་མི་མཐུན་ཀྱང་ལྟ་བའི་གནད་ལ་མི་འདྲ་བ་མེད་པར་སྣང་སྟེ། རང་སྟོང་བ་རྣམས་ཀྱིས་དོན་དམ་བདེན་པའམ་ཆོས་ཉིད་བདེན་པར་མེད་པར་གསུངས་པ་ནི་དགག་བྱའི་བདེན་གྲུབ་དང་སྤྲོས་པའི་བདེན་མེད་ཡིན་པར་དགོངས་ནས་གསུངས་པ་ལས་བདེན་པ་ཡིན་པར་ཁས་བླངས་བ་ཡིན་པ་གང་ཞིག གཞན་སྟོང་དབུ་མ་རྣམས་ཀྱིས། རྩ་ཤེས་ལས། མྱ་ངན་འདས་པ་བདེན་གཅིག་པུ། །ཞེས་གསུངས་པ་ལྟར་གྱི་སྣང་ཚུལ་དང་གནས་ཚུལ་མཐུན་པའི་བདེན་པར་གྲུབ་པ་ཁས་བླངས་བ་ལས་དགག་བྱའི་བདེན་གྲུབ་དང་ཆོས་བདག་ཏུ་གྲུབ་པར་མི་བཞེད་པའི་ཕྱིར། རྩ་རྟགས་དང་པོ་གྲུབ་སྟེ། འཇུག་ཊཱིཀ་དགོངས་པ་རབ་གསལ་ལས། དགག་བྱ་ལ་དོན་དམ་གྱི་ཁྱད་པར་སྦྱར་བའི་དོན་དམ་ལ་གཉིས་ཤེས་དགོས་ཏེ། ཐོས་བསམ་སྒོམ་གསུམ་གྱི་རིགས་ཤེས་ལ་དོན་དམ་དུ་བྱས་ནས་དེས་སྔར་བཤད་པ་ལྟར་མ་གྲུབ་པ་གཅིག་དང༌། བློའི་དབང་གིས་བཞག་པ་མིན་པར་དོན་གྱི་སྡོད་ལུགས་སུ་ཡོད་པ་ལ། དོན་དམ་དུ་ཡོད་པར་བཞག་པ་གཉིས་ཀྱི་དང་པོའི་དོན་དམ་དང༌། དེའི་ངོར་གྲུབ་པ་ཡང་ཡོད་ལ། ཕྱི་མའི་དོན་དམ་དང་དེར་ཡོད་པ་གཉིས་ཀ་མི་སྲིད་དོ། །དེས་ན་ཕྱི་མའི་དོན་དམ་དུ་ཡོད་པ་ལ་སྔ་མའི་དོན་དམ་དུ་ཡོད་པས་ཁྱབ་ཀྱང༌། སྔ་མའི་ཡོད་འཛིན་ནི་ལྷན་སྐྱེས་ཀྱི་བདེན་འཛིན་མིན་ལ། དེའི་བདེན་འཛིན་ལ་ནི་ཕྱི་མའི་ཡོད་འཛིན་དགོས་སོ།།འདི་མ་ཕྱེད་པར་དགག་བྱའི་ཚད་འཛིན་རིགས་པས་དཔྱད་བཟོད་དང༌། དཔྱད་བཟོད་ཀྱི་དངོས་པོ་ལ་འཛིན་པ་མང་དུ་བྱུང་ཞིང༌། ཞེས་གསུངས་སོ།། རྩ་རྟགས་གཉིས་པ་གྲུབ་སྟེ། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་རི་ཆོས་ལས། གལ་ཏེ་ཆོས་གང་ལ་ཡང་བདེན་པ་མེད་པས་དོན་དམ་པར་བདེན་པ་མི་སྲིད་དོ། །ཞེ་ན་མ་ཡིན་ཏེ། ཀུན་རྫོབ་ཏུ་མི་བདེན་ན་ཀུན་རྫོབ་ཀྱི་བདེན་པར་མི་རུང་བས་ཀུན་རྫོབ་བདེན་པ་གང་ཡིན་པ་དེ་ཀུན་རྫོབ་ཏུ་བདེན་གྱི། དོན་དམ་དུ་མི་བདེན་པ་ཇི་ལྟ་བ་དེ་བཞིན་དུ། དོན་དམ་དུ་མི་བདེན་ན་དོན་དམ་བདེན་པར་མི་རུང་བས་དོན་དམ་བདེན་པ་གང་ཡིན་པ་དེ་དོན་དམ་དུ་བདེན་གྱི་ཀུན་རྫོབ་ཏུ་བདེན་པ་མ་ཡིན་ནོ། །ཞེས་དང༌། བདེན་གཉིས་གསལ་བའི་ཉི་མ་ལས། དོན་དམ་པའི་བདེན་པ་ནི། འཕགས་པ་རྣམས་ཀྱི་ཕྱིན་ཅི་ལོག་ཐུགས་སུ་ཆུད་པས་ཆོས་རྣམས་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་བདེན་པའོ། །ཞེས་དང༌། འཕགས་པའི་ཤེས་ཡུལ་དུ་བདེན་པས་བདེན་པའོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། འདིར་གནས་ལུགས་མཐར་ཐུག་པའི་སྐུ་གཅིག་ཉིད་དུ་ཟད་པ་ནི་དོན་དམ་པའི་སྐུ་སྟེ། མྱ་ངན་འདས་པ་བདེན་གཅིག་པུ། །ཞེས་དང། གང་བྱང་ཆུབ་མ་ཡིན་པའི་ཆོས་དེ་གང་ཡང་མེད་དོ། །ཞེས་དང། ཆོས་ཀྱི་དབྱིངས་ལས་མ་གཏོགས་པ། །འདི་ལྟར་ཆོས་ཡོད་མ་ཡིན་ཏེ། །ཞེས་ཆོས་དབྱིངས་ཀྱི་སྐུ་མ་གཏོགས་པ་ཆོས་ཐམས་ཅད་གཤིས་ཀྱི་གནས་ལུགས་ལ་མེད་པར་གསུངས་པ་དང། གཅིག་པུ་སྲ་མཁྲེགས་རྡོ་རྗེའི་བདག །ཅེས་དང། བདེན་པ་གཅིག་སྟེ་གཉིས་པ་མེད། །ཅེས་དང། བདེན་པ་ནི་གཅིག་པུ་གཉིས་མ་ཡིན་པ་སྟེ། འདི་ལྟ་སྟེ། འགོག་པའི་བདེན་པའོ། །ཞེས་པ་ལ་སོགས་པས་གང་གསུངས་པ་མཐར་ཐུག་གི་གནས་ལུགས་ལ་བདེན་པ་གཅིག་པུ་དོན་དམ་པའི་བདེན་པ་ཆོས་ཉིད་ཀྱི་སྐུ། ཞེས་དང༌། རྒྱུད་བླ་མ་ལས། བདག་དང་བདག་མེད་སྤྲོས་པ་དང༌། །ཉེ་བར་ཞི་བའི་དམ་པའི་བདག །ཅེས་དང༌། རྗེ་ཏཱ་ར་ནཱ་ཐས། ཀུན་རྫོབ་སྤྲོས་པའི་བདེན་གྲུབ་ངེད་མི་འདོད། །སྤྲོས་པའི་བདེན་གྲུབ་ཡོད་ན་ཀུན་རྫོབ་སྟེ། །ཞེས་དང༌། དགག་བྱའི་མཚན་ཉིད་ནམ་ཡང་ཡོད་མ་ཡིན། །ཞེས་དང༌། ཐེག་མཆོག་དབུ་མ་ལས། ཆོས་རྣམས་བདག་མེད་གཉིས་ཀ་ཡིན་པའི་ཕྱིར། །ངོ་བོའི་སྒོ་ནས་དབྱེ་བ་ཡོད་མིན་ཏེ། །དགག་བྱ་ལོག་ཚུལ་སྒོ་ནས་ལྡོག་པས་ཕྱེ། །ཞེས་གསུངས་པས་སོ། །གཞན་ཡང་ཇོ་ནང་བས་དོན་དམ་བདེན་པའམ་བདེ་གཤེགས་སྙིང་པོ་དེ་སྒྲུབ་པ་རང་དབང་མ་ཡིན་པ་མ་ཟད་མ་ཡིན་དགག་ཡིན་པར་འདོད་དེ། ཟབ་དོན་ཉེར་གཅིག་ལས། དགག་པའི་རྟག་པ་བདེན་སྤྱི་ཙམ་དེ་ཡང་མིན། སྒྲུབ་པ་རང་དབང་ཅན་གྱི་རྟག་པ་དེ་འདྲར་འདོད་པའང་མིན། འདི་ནི་སྤྲོས་བྲལ་ཏེ། དངོས་པོ་སྒྲུབ་པ་མི་རྟག་པ་དང། དངོས་མེད་དགག་པ་རྟག་པ་གཉིས་ཀ་ལས་གྲོལ་བའི་དབྱིངས་འགྱུར་མེད་དེ་ཡིན། ཞེས་དང། རྒྱུ་འབྲས་དབུ་མའི་ཐིག་ལེ་ལས། དོན་དམ་རང་གི་ངོ་བོས་སྟོང་པར་ལྟ། །གསུངས་པའི་དགོངས་པ་དོན་དམ་ལ་དམིགས་ནས། །བློ་ཡིས་བཟུང་ལྟར་མ་གྲུབ་པ་ལ་དགོངས། །ཅེས་དང༌། ལམ་རིམ་བདུད་རྩིའི་ཉིང་ཁུ་ལས། ང་སྙམ་པ་ཤར་དུས་ཕྱི་ནང་གི་དངོས་པོ་གཞན་སུ་དང་ཡང་མ་འདྲེས་པའི་ཁོ་རང་གི་ངོ་བོ་ཚུགས་ཐུབ་ཅིག་ཡོད་པའི་ཁུངས་སུ་སྣང་བ་དེ་གཅིག་པུར་འཛིན་པ་ཡིན། ཇི་ལྟར་རིགས་པའི་ལོངས་སྤྱོད་དམ། རྫས་སམ་འཁོར་ལ་རང་ཉིད་བདག་པོའི་ཚུལ་དུ་ཡོད་པ་ལྟར་སྣང་བ་དེ་རང་དབང་ཅན་དུ་འཛིན་པ་ཞེས་བྱ་བ་ཡིན། འཛིན་སྟངས་ཀྱིས་དེ་ལྟར་བཟུང་ཡང་དེ་ལྟ་བུར་མ་གྲུབ། ཅེས་དང༌། ཏཱ་ར་ནཱ་ཐའི་ཟུང་འཇུག་རབ་གསལ་ལས། སྟོང་གཟུགས་དང་མི་འགྱུར་བའི་བདེ་བ་ཟུང་དུ་འཇུག་པ་དེ་ནི་དགག་སྒྲུབ་དང་དངོས་པོ་དངོས་མེད་དང་ཡོད་མེད་ཡིན་མིན་གྱི་མཐའ་ལས་འདས་པ་དོན་དམ་འདུས་མ་བྱས་པ་ཡིན་པའི་ཕྱིར། དངོས་པོ་སྒྲུབ་པ་རང་དབང་ཅན་མིན་མོད། རྒྱུ་མཚན་མེད་ཀྱང་དངོས་པོར་འགྱུར་རོ་ཞེས་ནན་གྱིས་འཕུར་བར་བྱེད་ན་ནི་ཧ་ཅང་ཐལ་བའི་དབང་གིས་སྤྱོད་པ་སྟེ། ཞེས་དང༌། རི་ཆོས་ངེས་དོན་རྒྱ་མཚོ་ལས། ཆོས་ཉིད་ནི་སྟོང་གཞི་དང་མ་ཡིན་དགག་ཡིན་གྱི་སྟོང་ཙམ་དང་མེད་དགག་མ་ཡིན་པའི་ཕྱིར་རོ། །ཞེས་དང༌། གནས་ལུགས་ཟབ་མོ་ལ་སྐྱོན་ཐམས་ཅད་རང་བཞིན་གྱིས་མེད་ཅིང་མ་གྲུབ་པས་རྣམ་གཅོད་དང་དགག་པ་དང་སྤངས་པ་རང་བཞིན་པ་ཚང་ཞིང། དེ་དག་གི་གཞི་ལ་ཆོས་ཉིད་ཀྱི་ཡོན་ཏན་ཐམས་ཅད་རང་བཞིན་གྱིས་ཚང་བས་ཡོངས་གཅོད་དང་སྒྲུབ་པ་དང་མ་ཡིན་དགག་ཏུ་གྱུར་པའི་རྟོགས་པ་རང་བཞིན་པ་གདོད་ནས་ཚང་བར་ཡང་ཡང་བཤད་ཅིང་འཆད་པར་འགྱུར་བའི་ཕྱིར་དང༌།དཀོན་མཆོག་གསུམ་གྱི་བསྟོད་པ་སློབ་དཔོན་མ་ཊི་ཙེ་ཊ(མའི་ཁོལ་པོ)ས་མཛད་པའི་འགྲེལ་པར་ཡང། དེ་ཕྱིར་མི་མངའ་ཞེས་བྱ་བའི་དགག་པ་འདི་ནི་མ་ཡིན་པར་དགག་པ་སྟེ་རྣམ་པར་རྟོག་པའི་རིགས་དེ་དག་ནི་ཡོད་པ་མ་ཡིན་ལ། དེས་དབེན་པའི་ཡེ་ཤེས་རང་བཞིན་གྱིས་འོད་གསལ་བ་ནི་མངའ་བས་སོ། །ཞེས་སློབ་དཔོན་མཁས་པ་ཆེན་པོ་རྒྱལ་བའི་སྲས་ཀྱིས་གསུངས་པའི་ཡང་ཕྱིར་རོ། །ཞེས་རི་ཆོས་ངེས་དོན་རྒྱ་མཚོ་ལས་གསུངས་སོ།། ཀུན་མཁྱེན་དོལ་པོ་པའི་སྟོང་ཉིད་ཀྱི་རབ་ཏུ་དབྱེ་བ་ཁྱད་འཕགས་ལས། ཡང་རྣམ་པ་གཉིས་ཏེ། སྟོང་གཞི་ཡོན་ཏན་མང་པོ་ཅན་མ་ཡིན་དགག་ཡིན་པའི་སྟོང་པ་ཉིད་དང༌། སྟོང་ཙམ་སྒྲུབ་ཆོས་ཙམ་གྱིས་དོར་བ་མེད་འགག་ཡིན་པའི་སྟོང་ཉིད་དོ། །ཞེས་དང༌། ཟབ་དོན་ཉེར་གཅིག་ལས། དགག་པའི་རྟག་པ་བདེན་སྤྱི་ཙམ་དེ་ཡང་མིན། སྒྲུབ་པ་རང་དབང་ཅན་གྱི་རྟག་པ་དེ་འདྲར་འདོད་པའང་མིན། འདི་ནི་སྤྲོས་བྲལ་ཏེ། དངོས་པོ་སྒྲུབ་པ་མི་རྟག་པ་དང། དངོས་མེད་དགག་པ་རྟག་པ་གཉིས་ཀ་ལས་གྲོལ་བའི་དབྱིངས་འགྱུར་མེད་དེ་ཡིན། ཞེས་གསུངས་སོ།།ཀུན་མཁྱེན་ཀློང་ཆེན་པའི་ཡིད་བཞིན་མཛོད་ལས། མི་བདེན་བསླུ་ཕྱིར་ཀུན་རྫོབ་བདེན་པ་ལགས། །ཞེས་དང༌། འགྱུར་མེད་དོན་དམ་བདེན་པའི་རང་བཞིན་ནི། །འོད་གསལ་བདེ་གཤེགས་སྙིང་པོ་ལྷུན་གྲུབ་སྟེ། །སྟོང་གསལ་རིག་པ་དབྱེར་མེད་ཆོས་ཉིད་དོ། །ཞེས་དང༌། ཚིག་དོན་མཛོད་ལས། སེང་གེ་རྩལ་རྫོགས་ལས། གཞི་ལ་གནས་པའི་རིག་པ་ནི། །ཡེ་ཤེས་དབྱིངས་ན་སྐུ་གསུམ་རྫོགས། །ཞེས་དང༌། རྒྱུད་བླ་མ་ལས། འོད་གསལ་བྱས་མིན་དབྱེར་མེད་པར། །འཇུག་ཅན་གང་གའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཉིད། །ཆོས་རྣམས་ཀུན་དང་ལྡན་པ་ཉིད། །ཅེས་དང༌། འཇམ་དཔལ་གྱི་ལྟ་བ་མདོར་བསྟན་ལས། ཕུང་པོ་རྣམ་དཔྱད་སྟོང་བ་ཉིད། །ཆུ་ཤིང་ཇི་བཞིན་སྙིང་པོ་མེད། །རྣམ་པ་ཐམས་ཅད་མཆོག་ལྡན་པའི།།སྟོང་ཉིད་དེ་ལྟར་གྱུར་མ་ཡིན། །ཞེས་གསུངས་སོ། །དེ་ལྟར་སྔ་འགྱུར་རྙིང་མའི་མཁས་དབང་འཇུ་མི་ཕམ་གྱི་གཞན་སྟོང་སེངྒེའི་ང་རོ་ལས། ངེད་འཁྲུལ་བ་ཀུན་རྫོབ་དང་མ་འཁྲུལ་བ་དོན་དམ་དུ་འདོད་པའི་ལུགས་ལའང་མ་འཁྲུལ་བའི་དོན་དམ་དང། དེ་མ་འཁྲུལ་བའི་བདེན་པར་གྲུབ་པ་དགག་མི་རུང་བར། ཞེས་དང། དམ་ཆོས་དོགས་སེལ་ལས། དོན་དམ་པར་གྲུབ་ན་བདེན་པར་གྲུབ་པ་ཡིན་ཏེ། དོན་དམ་དཔྱོད་བྱེད་ཀྱི་རིགས་པས་རྙེད་དོན་མཐར་ཐུག་ཡིན་པ་གང་ཞིག མཐར་ཐུག་དཔྱོད་པའི་རིག་ངོར་བདེན་ཞིང། དེ་ཡོངས་གཅོད་སྒྲུབ་པའི་ཚུལ་གྱིས་དེའི་ཡུལ་དུ་གྲུབ་པའི་ཕྱིར། ཞེས་དང༌། རྙིང་མའི་མཁས་དབང་དགེ་རྩེ་འགྱུར་མེད་ཚེ་དབང་མཆོག་གྲུབ་ཀྱི་གྲུབ་མཐའ་ངེས་དོན་གསལ་བྱེད་ལས། དེས་ན་བཀའ་མདོ་རྒྱུད་རྣམས་དང། ས་བཅུའི་བྱང་སེམས་འཕགས་པ་སངས་རྒྱས་གཉིས་པ་ལྟ་བུ་དེ་རྣམས་ཀྱིས་མདོའི་འགྲེལ་པ་བྱམས་ཆོས་ལྔ་དང༌། སྔགས་ཀྱི་སེམས་འགྲེལ། སྤྱན་རས་གཟིགས་ཀྱི་དྲི་མེད་འོད་དང། རྡོ་རྗེ་སྙིང་པོའི་དགྱེས་རྡོར་གྱི་འགྲེལ་པ། ཕྱག་ན་རྡོ་རྗེའི་བདེ་མཆོག་གི་འགྲེལ་པ་རྣམས་སུ་གསུངས་པའི་ངེས་དོན་དབུ་མ་ཆེན་པོ་དེ་ལ་བོད་ཀྱི་ལྗོངས་སུ་གཟུ་དགའ་རྡོར་དང་བཙན་ཁ་བོ་ཆེ་རྣམ་གཉིས་ཀྱིས་མཻ་ཏྲི་པའི་བརྒྱུད་འཛིན་ཁ་ཆེ་རིན་རྡོར་དང་ས་ཛྫ་ན་ལས་རྒྱུད་བླ་སོགས་བྱམས་ཆོས་མན་ངག་ལྟར་གྱི་བཤད་པ་གསན་ནས་སྤེལ་ཞིང། ཀུན་མཁྱེན་རང་བྱུང་རྡོ་རྗེས་དེ་ཉིད་རྩལ་དུ་བཏོན་ནས། རྣམ་ཤེས་ཡེ་ཤེས་དབྱེ་བ་དང། སྙིང་པོ་བསྟན་པ། ཟབ་མོ་ནང་དོན་སོགས་མཛད། དེ་ཉིད་ཀྱི་སློབ་མར་གྱུར་པ་ཀུན་མཁྱེན་ཀློང་ཆེན་པས་འཁོར་ལོ་ཐ་མའི་བདེ་གཤེགས་སྙིང་པོའི་རྣམ་བཞག་རྒྱས་པར་བཀྲལ་བས་དེ་ཉིད་ངེས་དོན་མཐར་ཐུག་ཏུ་བཞེད་ཅིང། རྫོགས་ཆེན་གྱི་གཞི་འབྲས་དང་མཐུན་པར་ཆོས་སྐད་ཅི་རིགས་པའི་སྒོ་ནས་རྫོགས་ཆེན་དང་མཚམས་སྦྱོར་བའི་ངེས་དོན་གྱི་དགོངས་པ་མ་ནོར་བར་བཀྲལ་བར་མཛད་ལ། གཞན་སྟོང་སེངྒེའི་སྒྲས་ས་སྟེང་ཁྱབ་པར་མཛད་པ་པོ་ནི་ཀུན་མཁྱེན་དོལ་པོ་པ་༼ཤེས་རབ་རྒྱལ་མཚན་༽སྟེ་ཐོག་མར་ཐལ་འགྱུར་བཞེད་པ། རང་བྱུང་ཞབས་ཀྱིས་ཁྱོད་ཀྱིས་ད་ལྟའི་འདི་མིན་པའི་ལྟ་བ་ཞིག་དང་འཕྲད་པར་འགྱུར་གསུངས་པ་བཞིན་བྱམས་ཆོས་མན་ངག་གི་བཤད་པ་གསན་ཞིང་སྦྱོར་བ་ཡན་ལག་དྲུག་པ་ཉམས་སུ་བཞེས་པས་ཐུགས་དམ་ན་འཕར་ནས་གཞན་སྟོང་གི་ལྟ་བ་ཐུགས་ལ་འཁྲུངས་ཤིང་བྱམས་ཆོས་ཀྱི་འགྲེལ་པ་དང། ངེས་དོན་རྒྱ་མཚོ་སོགས་དེ་སྟོན་པའི་བསྟན་བཅོས་མང་དུ་མཛད། གཞན་སྟོང་ཞེས་པ་གྲུབ་ཐོབ་ཡུ་མོ་པས་གསར་དུ་རྙེད་པ་ལས་ཁུངས་གཞན་མེད་ཚུལ་མཁས་པ་འགའ་ཞིག་གིས་གསུངས་ཀྱང་གཞན་སྟོང་གི་མཚན་གཞི། རྒྱལ་བ་བྱམས་པས། རྣམ་དབྱེར་བཅས་པའི་༼མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །༽སོགས་ཀྱིས་དངོས་སུ་བསྟན་པའི་ཕྱིར་དང། དེའང་སྟོང་ཉིད་མེད་དགག་ཏུ་སྨྲ་བའི་ལུགས་ལ་ཐུགས་ཞེན་ཆེ་བའི་རྣམ་འགྱུར་ཙམ་ཟད། ཞེས་གསུངས་ལ། དེ་ལྟར་བཀའ་བརྒྱུད་པའི་མཁས་དབང་ཀརྨ་པ་རང་བྱུང་རྡོ་རྗེའྀ་རྣམ་ཤེས་ཡེ་ཤེས་འབྱེད་པའི་བསྟན་བཅོས་ལས། ཆོས་དབྱིངས་སྤྲོས་བྲལ་དཀྱིལ་འཁོར་དུ། །རྫོགས་པ་འཁོར་འདས་ཐོག་མེད་ཀུན། །གཅིག་དང་ཐ་དད་བྲལ་བ་རུ། །བཞུགས་པ་ངོ་བོ་ཉིད་སྐུར་བཞེད། །ཅེས་དང༌། དེ་བཞིན་གཤེགས་པའི་སྙིང་པོ་བསྟན་པ་ལས། ཀྱེ་མ་ཆོས་སྐུ་ཡོན་ཏན་འདི། །བདེན་པའི་རྟོགས་ལ་བདེན་ཤེས་ཡིན། །ཞེས་དང༌། །དེ་བས་རྩ་རླུང་ཐིག་ལེ་རྣམས། །དག་པ་དག་པའི་གཟུགས་སྐུ་སྟེ། །མ་སྦྱང་མ་དག་གཟུགས་སྐུ་འདོད། །ཅེས་དང༌། དེ་བཞིན་གཤེགས་པའི་གནས་སྐབས་གསུམ། །བརྗོད་ཀྱང་སངས་རྒྱས་གསར་སྐྱེས་མིན། །ཇི་ལྟར་སྔ་བཞིན་ཕྱིས་དེ་བཞིན། །མི་འགྱུར་སངས་རྒྱས་སྙིང་པོ་ཡིན། །ཞེས་དང༌། རྒྱལ་བའི་ཡེ་ཤེས་སེམས་ཅན་ལ། །ཞུགས་ཀྱང་དེ་བཞིན་གོས་པ་མེད། །འདི་ལ་འཁྲུལ་བའི་མིང་མི་བརྗོད། །ཅེས་དང༌། བཀའ་བརྒྱུད་པའི་མཁས་པའི་དབང་ཕྱུག་ཀོང་སྤྲུལ་ཡོན་ཏན་རྒྱ་མཚོའི་རྒྱུད་བླའི་འགྲེལ་བ་ལས། ལོ་ཙཱ་གཟུ་བཙན་རྣམ་གཉིས་ལས་བརྒྱུད་པའི་བྱམས་ཆོས་སྒོམ་ལུགས་པ་རྣམས་དང༌། མངའ་བདག་མཻ་ཏྲི་ཞབས་ཀྱིས་བྲམ་ཟེ་ཆེན་པོ་ཡབ་སྲས་ཀྱི་གདམས་ངག་བརྙེས་ནས་སྔགས་དང་རྗེས་སུ་མཐུན་པའི་ཕར་ཕྱིན་གྱི་མན་ངག་དེ་ཁོ་ན་ཉིད་བཅུ་པ་སོགས་མཛད། དེ་ལས་རྗེ་མར་པས་གསན་ཏེ། ཐེག་པའི་མཐར་ཐུག་སྙིང་པོའི་དོན། །མཐའ་བྲལ་ཡིད་ལ་མི་བྱེད་པ། །ཆོས་ཕྱག་རྒྱ་ཆེ་ལ་ངོ་སྤྲོད་བགྱེས། །ཞེས་སོགས་གསུངས་པ་དང༌། རྗེ་སྒམ་པོ་པའི་ཞལ་ནས། འོ་སྐོལ་གྱི་ཕྱག་རྒྱ་ཆེན་པོ་འདིའི་གཞུང་ཉིད་བཅོམ་ལྡན་བྱམས་པའི་མཛད་པའི་ཐེག་པ་ཆེན་པོ་རྒྱུད་བླ་མའི་བསྟན་བཅོས་ཡིན་ནོ། །ཞེས་གསུངས་ཤིང༌། ཐར་པ་རིན་པོ་ཆེའི་རྒྱན་སོགས་དེ་ཉིད་ཀྱི་གསུང་རབ་རྣམས་སུའང་གསལ་བར་མཛད་པའི་རྗེས་སུ། དཔལ་ལྡན་ཕག་མོ་གྲུབ་ཡབ་སྲས། རྒྱལ་བ་གཉིས་པ་རང་བྱུང་ཞབས་སོགས་སྙིང་པའི་དོན་མངོན་སུམ་དུ་གཟིགས་པའི་ས་བཅུའི་དབང་ཕྱུག་རྣམས གཅིག་ཏུ་འབྲང་བར་མཛད་ཅིང༌། སྐྱོབ་པ་འཇིག་རྟེན་གསུམ་གྱི་མགོན་པོས་ཀྱང་སྙིང་པོ་དོན་འདི་ཉིད་ལས་བརྩམས་ཏེ་རྨད་དུ་བྱུང་བའི་ཆོས་ཀྱི་འཁོར་ལོ་བསྐོར་བ་དང༌། དེ་ཉིད་ཀྱི་སྐུའི་སྐྱེ་བ་ཕྱི་མ་ཀུན་མཁྱེན་དོལ་པོ་སངས་རྒྱས་ཀྱིས་ཀྱང་ངེས་དོན་སྙིང་པོའི་བཀའི་བསྡུ་བ་བཞི་བ་མཛད་པ་དང༌། ཟི་ལུང་པཎ་ཆེན། རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ། ཀུན་མཁྱེན་བསྟན་པའི་ཉིན་བྱེད་སོགས་ཀྱང་ཞལ་གྱིས་བཞེས་ཚུལ་ཕྲན་བུ་ཙམ་ལས་ལྟ་བའི་གནད་གཅིག་ཏུ་འབབ་པ་ཁོ་ན་ཡིན་ཅིང༌། གཞན་ཡང་མངའ་བདག་མཻ་ཏྲི་པའི་དངོས་སློབ་པཎྜི་ཏ་བཛྲ་པཱ་ཎིས་དེ་ཁོ་ན་ཉིད་བཅུ་པ་རྩ་འགྲེལ་སོགས་བོད་དུ་རྒྱ་ཆེར་བཤད་པ་རྣམས་ཀྱང་འདི་ཉིད་འདི་ཉིད་ཀྱི་དོན་སྟོན་པའི་ཕྱག་ཆེན་གྱི་བཀའ་སྲོལ་ཡིན་པ་དང༌། མཻ་ཏྲི་པའི་དངོས་སློབ་དམ་པ་སངས་རྒྱས་ཀྱིས་ཀྱང་ངོ་བོ་ཕ་རོལ་ཏུ་ཕྱིན་པ། གསང་སྔགས་དང་རྗེས་སུ་མཐུན་པའི་ཕྱག་རྒྱ་ཆེན་པོའི་ཆོས་ལ་དམ་ཆོས་སྡུག་བསྔལ་ཞི་བྱེད་ཅེས་བྱ་བའི་མཚན་གསོལ་ནས་བོད་དུ་སྔ་ཕྱིར་གསུང་པ་རྣམས་ཀྱང་དོན་སྔ་མ་དངཚུངས་པས། མདོར་ན་མངའ་བདག་མཻ་ཏྲི་གུབྟ་ནས་བརྒྱུད་པའི་བཤད་པ་དང་གདམས་ངག་གི་བཀའ་སྲོལ་ཐམས་ཅད་ནི་ཚིག་བརྗོད་ཙམ་ལས་དོན་གཅིག་ཏུ་འབབས་སོ། །ཞེས་གསུངས་སོ། །སྔོན་བྱོན་དམ་པས་གསུང་རྒྱུན་ལ་བུ་དོལ་རྣམ་གཉིས་ཚིག་གི་ར་ལ་རྩོད། །ཅེས་པས་ཚིག་ཙམ་ལས་དོན་ལ་གནད་འགག་ཆེར་མེད་པ་རིས་མེད་ཀྱི་གཏམ་ཡིན་ནོ། །དེ་དག་དགོངས་པ་གཅིག་ཏུ་འགྲོ་ཚུལ་ཡོད་པར་སྣང་སྟེ། པཎ་ཆེན་བློ་བཟང་ཆོས་རྒྱན་གྱིས། ལྷན་ཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང༌། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང༌། །ངེས་དོན་ལུང་རིགས་ལ་མཁས་ཤིང༌། །ཉམས་མྱོང་ཅན་གྱི་རྣལ་འབྱོར་བས། །དཔྱད་ན་དགོངས་པ་གཅིག་ཏུ་འདུས། །ཞེས་གསུངས་ལ། དེ་ལྟར་ཉམས་སུ་ལེན་ན་ལྟ་བ་མཐར་ཐུག་གནད་གཅིག་ཏུ་འགྲོ་བའི་ཆོས་ཚུལ་ནི། རྗེ་ཏཱ་ར་ནཱ་ཐའི་ཞལ་སྔ་ནས། དོན་དམ་གནས་ལུགས་འགྱུར་མེད་ཡོངས་གྲུབ་སྲ་བརྟན་གཡུང་དྲུང་དཔྱད་མི་བཟོད་པས་རང་གི་ངོ་བོས་སྟོང་མི་དགོས་པའི་དོན་དམ་སྟོང་ཉིད་ཅེས་གཞན་སྟོང་ལུགས་སུ་གྲགས་པ་འདི་ཉིད་ད་ལྟའི་སྐབས་སུ་བློའི་ཡུལ་ལམ་ཚིག་ཏུ་བརྗོད་པའི་སྐབས་སུ་དགག་སྒྲུབ་མི་མཐུན་པ་འདུག་ཀྱང། མཉམ་པར་བཞག་པའི་ཚེ་གཞན་སྟོང་ཇི་ལྟ་བ་བཞིན་དུ་གནས་ལུགས་བརྗོད་བྲལ་ལམ་སྤྲོས་བྲལ་ལ་མཐུན་འགྲོ་བས་མཉམ་པར་འཇོག་པའི་སྐབས་ཀྱང་བློའི་རི་མོ་ཐམས་ཅད་སྟོང་ཉིད་དུ་ཐག་བཅད། ཡོད་མེད་རྟག་ཆད་སྟོང་མི་སྟོང་ཐམས་ཅད་ལས་འདས་པའི་གསལ་སེང་ངེ་རྗེན་ནེ་ལྷན་ནེ་ལྷོད་དེ་ཤིག་གེ་བསྐྱང་བ་རང་རིག་རྗེན་པར་རྟོགས་པའི་འཇོག་བསྒོམས་སྐབས། ཉམས་སུ་བླངས་ན་ཐམས་ཅད་མཐུན་པས། དོན་དམ་ལ་ནི་ཁྱད་པར་མེད་དོ། །སྒོམས་ཞིང་རྟོགས་ན་མཐུན་འགྲོ། ཞེས་གསུངས་པ་ནི་ལེགས་བཤད་བླ་ན་མེད་པ་ཡིན་པར་སེམས་སོ། །འོན་ཀྱང་མེད་དགག་དང་མ་ཡིན་དགག་གཞི་གཅིག་ཏུ་འདུ་མི་ནུས་ཀྱང་གནད་འགག་གཅིག་ཏུ་འབབ་ཚུལ་དང༌། སྤྲོས་འཛིན་གྱི་གཉེན་པོ་འགྲོ་བ་གཅིག་མཚུངས་ཡིན་པར་སྣང་ངོ༌།། བོད་ཀྱི་གྲུབ་མཐའ་སྨྲ་བའི་ནང་ན་ལྟ་བ་མེད་དགག་དང་མ་ཡིན་དགག་འདོད་ཚུལ་གྱི་ཁྱད་པར་ནི། འཇུ་མི་ཕམ་གྱི་དབུ་མ་ངེས་ཤེས་སྒྲོན་མེ་ལས། དགེ་ལྡན་ལྟ་བ་མེད་དགག་འདོད། །གཞན་རྣམས་མ་ཡིན་དགག་ཏུ་འདོད། །ཅེས་དང༌། རི་ཆོས་ངེས་དོན་རྒྱ་མཚོ་ལས། ཆོས་ཉིད་ནི་སྟོང་གཞི་དང་མ་ཡིན་དགག་ཡིན་གྱི་སྟོང་ཙམ་དང་མེད་དགག་མ་ཡིན་པའི་ཕྱིར་རོ། །ཞེས་དང༌། གནས་ལུགས་ཟབ་མོ་ལ་སྐྱོན་ཐམས་ཅད་རང་བཞིན་གྱིས་མེད་ཅིང་མ་གྲུབ་པས་རྣམ་གཅོད་དང་དགག་པ་དང་སྤངས་པ་རང་བཞིན་པ་ཚང་ཞིང༌། དེ་དག་གི་གཞི་ལ་ཆོས་ཉིད་ཀྱི་ཡོན་ཏན་ཐམས་ཅད་རང་བཞིན་གྱིས་ཚང་བས་ཡོངས་གཅོད་དང་སྒྲུབ་པ་དང་མ་ཡིན་དགག་ཏུ་གྱུར་པའི་རྟོགས་པ་རང་བཞིན་པ་གདོད་ནས་ཚང་བར་ཡང་ཡང་བཤད་ཅིང་འཆད་པར་འགྱུར་བའི་ཕྱིར་དང༌། དཀོན་མཆོག་གསུམ་གྱི་བསྟོད་པ་སློབ་དཔོན་མ་ཊི་ཙེ་ཊས་མཛད་པའི་འགྲེལ་པར་ཡང༌། དེ་ཕྱིར་མི་མངའ་ཞེས་བྱ་བའི་དགག་པ་འདི་ནི་མ་ཡིན་པར་དགག་པ་སྟེ་རྣམ་པར་རྟོག་པའི་རིགས་དེ་དག་ནི་ཡོད་པ་མ་ཡིན་ལ། དེས་དབེན་པའི་ཡེ་ཤེས་རང་བཞིན་གྱིས་འོད་གསལ་བ་ནི་མངའ་བས་སོ། །ཞེས་སློབ་དཔོན་མཁས་པ་ཆེན་པོ་རྒྱལ་བའི་སྲས་ཀྱིས་གསུངས་པའི་ཡང་ཕྱིར་རོ། །ཞེས་དང༌། ཀུན་མཁྱེན་དོལ་པོ་པའི་སྟོང་ཉིད་ཀྱི་རབ་ཏུ་དབྱེ་བ་ཁྱད་འཕགས་ལས། ཡང་རྣམ་པ་གཉིས་ཏེ། སྟོང་གཞི་ཡོན་ཏན་མང་པོ་ཅན་མ་ཡིན་དགག་ཡིན་པའི་སྟོང་པ་ཉིད་དང༌། སྟོང་ཙམ་སྒྲུབ་ཆོས་ཙམ་གྱིས་དོར་བ་མེད་འགག་ཡིན་པའི་སྟོང་ཉིད་དོ། །ཞེས་གསུངས་སོ། །དེས་ན་གཞན་སྟོང་བ་རྣམས་ཀྱི་ཆོས་དབྱིངས་བདེན་པར་གྲུབ་ཅེས་པ་ནི་རྩ་ཤེས་ལས། མྱ་ངན་འདས་པ་བདེན་གཅིག་པུ། །ཞེས་གསུངས་པ་ལྟར་ཐེག་ཆེན་འཕགས་པའི་ཆོས་ཉིད་རྟོགས་པའི་ཉམས་བཞག་གིས་གཟིགས་པ་ལྟར་བདེན་པ་ཡིན་པ་དང༌། སྣང་ཚུལ་དང་གནས་ཚུལ་མཐུན་པས་བདེན་པར་གྲུབ་པ་ལས་དགག་བྱ་ཆོས་བདག་དང་ཕྱི་རོལ་བ་སོགས་ལྟར་སྤྲོས་པའི་བདེན་པར་གྲུབ་པ་མི་འདོད་པས་གྲུབ་པའི་གནད་མི་འདྲ་བ་མེད་ན་ཆགས་སྡང་གིས་ཕྱོགས་རིས་སུ་མི་འགྲོ་བར་རིས་མེད་ལ་འབད་ན་མ་འོངས་བོད་ཁ་བ་གངས་ཅན་པའི་བསྟན་སྲིད་འཕེལ་རྒྱས་སུ་འགྱུར་བའི་སྒོ་དམ་པ་ཡིན་ནོ། །འདིར་གོ་དོན་གཙོ་བོར་མ་བཤད་པར་ལུང་མང་པོར་བཀོད་པ་ནི་ཞིབ་འཇུག་པ་རྣམས་ཀྱི་དཔྱད་གཞིའི་ཆེད་དུ་བཀོད་པའོ། །གཞན་གྱིས་བསྐུལ་ངོར་སྤྲང་འཁྱམ་པ་ངག་དབང་དངོས་གྲུབ་དཔལ་གྱིས་བྲིས་པའོ། །