གཉིས་པ་ཡི་དྭགས་ཀྱི་སྡུག་བསྔལ་བསམ་པ།

གཉིས་པ་ཡི་དྭགས་ཀྱི་སྡུག་བསྔལ་བསམ་པ་ནི།

འཛམ་བུ་གླིང་གི་ས་འོག་དཔག་ཚད་ལྔ་བརྒྱ་ན་ཡི་དྭགས་ཀྱི་གྲོང་སེར་སྐྱ་ཞེས་བྱ་བ། སྤང་ལག་མཐིལ་ཙམ་ཡང་མེད་ཅིང་ས་གཞི་རིད་པ་གསེགས་མས་ཁྱབ་པ། བཏུང་བ་ཆུ་ཐིག་ཙམ་དང༌། ཟས་ཤིང་ཐོག་ཙམ་ཡང་མེད་པའི་གནས་སུ་ལས་ངན་གྱིས་འཕངས་ནས་གནས་པ་ཡོད་ལ། སྤྱིར་ཡི་དྭགས་ལ་ཕྱིའི་སྒྲིབ་པ་ཅན།  ནང་གི་སྒྲིབ་པ་ཅན ། ཟས་སྐོམ་གྱི་སྒྲིབ་པ་ཅན་གསུམ་ཡོད་ལ། དང་པོ་ཕྱིའི་སྒྲིབ་པ་ཅན་ནི། ལོ་མང་བོར་ཟས་སྐོམ་ཡེ་མི་རྙེད། རྒྱང་རིང་བོ་ནས་ཟས་ཀྱི་ཕུང་པོ་མཐོང་ཡང་དྲུང་དུ་ཕྱིན་ན་ཤུལ་ཙམ་ཡང་མེད་པར་སྟོང་བ་ལྟར་མཐོང་བ་དང༌། ཆུ་ཀླུང་ཆེན་པོའི་འགྲམ་དུ་ཕྱིན་ན། གསེག་མ་དང་བྱེ་མའི་གྲོག་པོར་འགྲོ་བ་དང༌། ལྗོན་ཤིང་འབྲས་བུ་རྒྱས་པའི་དྲུང་དུ་གཏུགས་ནའང༌། ཤིང་སྐམ་པོར་འགྱུར་བ་སོགས་ཡོད། འགའ་ཞིག་ལ་སྲིན་པོ་མང་པོས་བསྲུངས་ཏེ་མི་གཏོང་བ་ཡང་ཡོད་དོ། །