དྲི་བ་བཅུ་བ་ཀུན་རྫོབ་དང་རྟེན་འབྲེལ་དོན་གཅིག་ཏུ་འདོད་དམ་མི་འདོད་ཅེས་པའི་དྲིས་ལན།
དྲི་བ་བཅུ་བ་ཀུན་རྫོབ་དང་རྟེན་འབྲེལ་དོན་གཅིག་ཏུ་འདོད་དམ་མི་འདོད་ཅེས་པའི་དྲིས་ལན།
ཀུན་རྫོབ་དང་རྟེན་འབྲེལ་དོན་གཅིག་ཏུ་འདོད་དམ་མི་འདོད་ཅེས་པའོ། །དེའི་ལན་ནི། ཀུན་རྫོབ་ཀྱི་ཆོས་དང་རྟེན་འབྲེལ་དོན་གཅིག་པ་ཡིན་ཏེ། དོན་དམ་བདེན་པ་ནི་རྟེན་འབྲེལ་མ་ཡིན་པ་གང་ཞིག་འདུས་བྱས་རྣམས་རྟེན་འབྲེལ་ཡིན་པའི་ཕྱིར། རྟགས་དང་པོ་གྲུབ་སྟེ། རྩ་ཤེར་ལས། རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་དང༌། རི་ཆོས་ངེས་དོན་རྒྱ་མཚོ་ལས།དོན་དམ་སྟོང་ཉིད་རྟེན་འབྲེལ་ལས་འདས་ཀྱང་ཤིན་ཏུ་མཐར་ཐུག་པའི་སྟོང་ཉིད་ཟབ་མོ་ཡིན་པའི་ཕྱིར་རོ། །ཞེས་དང༌། ཐེག་མཆོག་དབུ་མ་ལས། དོན་དམ་ལ་ནི་རྟེན་འབྲེལ་ནམ་ཡང་མེད། །ཅེས་དང༌། དོན་དམ་རྟེན་འབྲེལ་དེ་ནི་རྟེན་འབྱུང་མིན། །ཞེས་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། དེས་ན་ངོ་བོ་ཉིད་སྐུ་སོགས་རྟེན་འབྲེལ་མ་ཡིན་པར་སྤྱན་རས་གཟིགས་ཀྱིས་གསུངས་སོ། །ཞེས་དང༌། ངག་དབང་ཚོགས་གཉིས་རྒྱ་མཚོའི་མཐར་འཛིན་གདོང་འཕྲོག་ལས། འོ་ན་ཐུན་མོང་གི་འཛིན་འཚམས་ལ། ཆོས་ཉིད་དེ་རྟེན་འབྲེལ་དུ་ཡང་ཁས་ལེན་རིགས་པར་ཐལ། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་སོགས་ལུང་དུ་མར་ཆོས་ཉིད་སོགས་ཤེས་བྱ་ཐམས་ཅད་རྟེན་འབྲེལ་ཡིན་པར་གསུངས་པའི་ཕྱིར་ཞེ་ན་འདི་ལ་མ་ཁྱབ་སྟེ། དེ་ནི་ཀུན་རྫོབ་ཀྱི་ཆོས་ཁོ་ན་ལ་དགོངས་པ་ཡིན་གྱི་ཆོས་ཉིད་རྟེན་འབྲེལ་དུ་ཁས་ལེན་མི་རིགས་པའི་ཕྱིར།ཞེས་གསུངས་ལ་རྒྱས་པར་སྔར་བདག་གིས་བཀའ་བསྡུ་བཞི་བའི་འགྲེལ་བར་བཤད་ཟིན་ཏོ། །རྩ་རྟགས་གཉིས་པ་གྲུབ་སྟེ། ཁྱེའུ་བཞིའི་ཏྀང་ངེ་འཛིན་ཅེས་བྱ་བའི་ཐེག་པ་ཆེན་པོའི་མདོ་ལས། གང་རྟེན་ཅིང་འབྲེལ་བར་འབྱུང་བ་དེ་ནི་མི་རྟག་པའོ། །གང་མི་རྟག་པ་དེ་སྡུག་བསྔལ་བའོ། །ཞེས་དང༌། རྩ་ཤེར་ལས། རྒྱུུ་དང་རྐྱེན་ལས་བྱུང་བ་ནི། །རང་བཞིན་བྱས་པ་ཅན་ཞེས་བྱ། །ཞེས་དང༌། རི་ཆོས་ལས། དོན་དམ་པའི་བདེན་པ་རྟེན་འབྲེལ་ལས་མ་འདས་ན། མཐར་ཐུག་འགོག་པའི་བདེན་པ་ཡང་རྟེན་འབྲེལ་ལས་མ་འདས་པར་འགྱུར་ལ། འདོད་ན་འདུས་བྱས་ལས་མ་འདས་པར་འགྱུར་ཞིང༌། ཞེས་པ་ནས།དེས་ན་འདུས་བྱས་རྟེན་འབྲེལ་གང་ཡིན་པ་སྟོང་ཉིད་ཡིན་པས་ཁྱབ་ཀྱང་སྟོང་ཉིད་གང་ཡིན་ཐམས་ཅད་རྟེན་འབྲེལ་དུ་འདོད་པ་ནི་འཁྲུལ་ཏེ། ཞེས་དང༌། ཐེག་མཆོག་དབུ་མ་ལས། ཀུན་བརྟགས་གཞན་དབང་རྟེན་འབྲེལ་ཉིད་དུ་བརྗོད། །ཅེས་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། རྟེན་ཅིང་འབྲེལ་འབྱུང་གི་ཆོས་ཡིན་ན་རྒྱུ་རྐྱེན་གྱིས་བསྐྱེད་དགོས་ཏེ། འདུས་བྱས་ཡིན་པས་སོ། །ཞེས་གསུངས་སོ། །