དྲི་བ་གསུམ་པ་བྱམས་ཆོས་སྡེ་ལྔ་དབུ་མའི་གཞུང་ཡིན་པའི་ཤེས་བྱེད་གང་ཡིན་ཞེས་པའི་དྲིས་ལན།།
དྲི་བ་གསུམ་པ་བྱམས་ཆོས་སྡེ་ལྔ་དབུ་མའི་གཞུང་ཡིན་པའི་ཤེས་བྱེད་གང་ཡིན་ཞེས་པའི་དྲིས་ལན།
བྱམས་ཆོས་སྡེ་ལྔ་དབུ་མའི་གཞུང་ཡིན་པའི་ཤེས་བྱེད་གང་ཡིན་ཞེས་པའོ། །དེའི་ལན་ནི། བྱམས་ཆོས་སྡེ་ལྔ་ལས་བསྟན་བཅོས་མངོན་རྟོགས་རྒྱན་དང་རྒྱུད་བླ་མ་གཉིས་དབུ་མའི་གཞུང་ཡིན་པར་ཡོངས་སུ་གྲགས་ཤིང་གྲུབ་ལ། དབུ་མའི་གཞུང་ཡིན་པ་མ་ཟད་གཞན་སྟོང་དབུ་མ་ཆེན་པོའི་གཞུང་ཡིན་པར་ཡང་གྲུབ་ཏེ། བསྟན་བཅོས་དེ་གཉིས་ཀར། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་དང༌། རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི ། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་སོགས་ཀྱིས་གཞན་སྟོང་དབུ་མའི་རྣམ་བཞག་གསལ་བར་ཡང་ཡང་གསུངས་ལ། དེའི་ཚུལ་གཞན་སྟོང་དབུ་མའི་རྒྱན་གྱི་ལུང་སྦྱོར་དུ་ཤེས་པར་བྱའོ། །ཁ་ཅིག་མདོ་སྡེ་རྒྱན་སེམས་ཙམ་པའི་གཞུང་ཡིན་ཏེ། མཐར་ཐུག་ཐེག་གསུམ་དང་རིགས་ཆད་དང་ཀུན་གཞི་དང་མཚན་ཉིད་གསུམ་བསྟན་པའི་ཕྱིར་ཟེར་ན། དེ་ལ་མཐར་ཐུག་ཐེག་གསུམ་བསྟན་པ་མ་གྲུབ་ཏེ། ཁྱོད་རང་གིས་མཐར་ཐུག་ཐེག་གསུམ་བསྟན་པར་འདོད་པའི་མདོ་སྡེ་རྒྱན་གྱི་ལུང༌། ཁ་ཅིག་དག་ནི་དྲང་ཕྱིར་དང༌། །གཞན་དག་ཡང་དག་གཟུང་བའི་ཕྱིར། །རྫོགས་པའི་སངས་རྒྱས་རྣམས་ཀྱིས་ནི། །མ་ངེས་རྣམས་ལ་ཐེག་གཅིག་བསྟན། །ཞེས་པའི་གཞུང་འདིས་མཐར་ཐུག་ཐེག་གཅིག་དྲང་དོན་དུ་བསྟན་པ་ཅུང་ཟད་ཀྱང་མེད་པར་མཐར་ཐུག་ཐེག་གཅིག་བསྟན་པའི་དགོས་པ་བསྟན་པ་ཡིན་ལ། དགོས་པ་བསྟན་པའི་དྲང་དོན་དུ་འགྱུར་ན་བཀའ་ཐམས་ཅད་དྲང་དོན་དུ་འགྱུར་རོ། །ཡང་སྐབས་འདིར་དཔྱད་པར་བྱ་བ་འདི་ཡོད་དེ། མདོ་སྡེ་རྒྱན་རྩ་འགྲེལ་ལས། ཐེག་པ་གཅིག་པ་ཉིད་ཡོངས་སུ་ཚོལ་བ་ལ་ཚིགས་སུ་བཅད་པ་བདུན་ཏེ། ཆོས་དང་བདག་མེད་གྲོལ་བ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །བསམ་གཉིས་ཐོབ་ཕྱིར་སྤྲུལ་བའི་ཕྱིར། །མཐར་ཐུག་ཕྱིར་ན་ཐེག་གཅིག་ཉིད། །ཉན་ཐོས་ལ་སོགས་པའི་ཆོས་ཀྱི་དབྱིངས་ཐ་མི་དད་པས་ན་ཆོས་ཀྱི་དབྱིངས་མཚུངས་པའི་ཕྱིར་ཐེག་པ་གཅིག་པ་ཉིད་དེ། བགྲོད་པར་བྱ་བས་ན་ཐེག་པ་གཅིག་པས་སོ། །ཞེས་པ་ནས། དེ་ལྟར་ན་བསམ་པ་གཅིག་པ་ཉིད་ཐོབ་པས་སངས་རྒྱས་དང༌། ཉན་ཐོས་རྣམས་གཅིག་པའི་ཕྱིར་ཐེག་པ་གཅིག་པ་ཉིད་དོ། །སྤྲུལ་བའི་ཕྱིར་ཐེག་པ་གཅིག་པ་ཉིད་དེ། ཇི་སྐད་དུ། ང་ནི་ལན་བརྒྱ་ཕྲག་དུ་མར་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདས་སོ། །ཞེས་གསུངས་པ་ལྟ་བུ་སྟེ། གདུལ་བྱ་རྣམས་ཀྱི་དོན་དུ་དེ་ལྟར་སྟོན་པའི་ཕྱིར། ཞེས་པ་ནས། དེ་ལྟ་བས་ན་མདོ་དེ་དང་དེ་ལས་ནི་དགོངས་པ་དེ་དང་དེས་ཐེག་པ་གཅིག་ཉིད་དུ་གསུངས་པར་རིག་པར་བྱའི། ཐེག་པ་གསུམ་མེད་པ་ནི་མ་ཡིན་ནོ། །ཡང་ཅིའི་ཕྱིར་སངས་རྒྱས་རྣམས་ཀྱིས་དགོངས་པ་དེ་དང་དེས་ཐེག་པ་གཅིག་པ་ཉིད་དུ་བཤད་ཅེ་ན། ཁ་ཅིག་དག་ནི་དྲང་ཕྱིར་དང༌། །གཞན་དག་ཡང་དག་གཟུང་བའི་ཕྱིར། །རྫོགས་པའི་སངས་རྒྱས་རྣམས་ཀྱིས་ནི། །མ་ངེས་རྣམས་ལ་ཐེག་གཅིག་བཤད། །ཁ་ཅིག་དྲང་བའི་ཕྱིར་ཞེས་བྱ་བ་ནི་ཉན་ཐོས་ཀྱི་རིགས་ཅན་མ་ངེས་པ་གང་དག་ཡིན་པའོ། །གཞན་དག་ཡང་དག་པར་གཟུང་བའི་ཕྱིར་ཞེས་བྱ་བ་ནི་བྱང་ཆུབ་སེམས་དཔའི་རིགས་ཅན་མ་ངེས་པ་གང་དག་ཡིན་པའོ། །ཞེས་མཐར་ཐུག་ཐེག་གཅིག་བཤད་པའི་དགོངས་གཞི་དང༌། ཐེག་གཅིག་བཤད་པ་དྲང་དོན་ཡིན་པར་བསྟན་མ་བསྟན་ལ་དཔྱད་དགོས་སོ། །ཡང་མཚན་ཉིད་གསུམ་བསྟན་ན་སེམས་ཙམ་པའི་རང་གཞུང་ཡིན་པས་མ་ཁྱབ་སྟེ། གལ་ཏེ་ཁྱབ་ན་ཤེར་ཕྱིན་བྱམས་ཞུས་ལེའུ་དང༌། ཤེར་ཕྱིན་ལྔ་བརྒྱ་བ་དང་བྱང་ཆུབ་སེམས་འགྲེལ་སོགས་དབུ་མའི་གཞུང་ལུགས་དུ་མ་སེམས་ཙམ་གྱི་གཞུང་དུ་འགྱུར་རོ། །དེ་ཡང་བྱམས་ཞུས་ལས། འདི་ནི་ཡོངས་སུ་བརྟགས་པའི་གཟུགས། འདི་ནི་རྣམ་པར་བརྟགས་པའི་གཟུགས། འདི་ནི་ཆོས་ཉིད་ཀྱི་གཟུགས་སོ། །ཞེས་སོགས་ནས་སངས་རྒྱས་ཀྱི་ཆོས་ཀྱི་བར་སྦྱར་ནས་གསུངས་པ་དང༌། བྱང་ཆུབ་སེམས་འགྲེལ་ལས།ཀུན་བརྟགས་དང་ནི་གཞན་དབང་དང༌། །ཡོངས་སུ་གྲུབ་པ་ཉིད་དག་ནི། །སྟོང་ཉིད་བདག་ཉིད་གཅིག་པུ་ཡི། །ངོ་བོ་སེམས་ལ་བརྟགས་པ་ཡིན། །ཞེས་མཚན་ཉིད་གསུམ་གསུངས་པའོ། །ཡང་མདོ་སྡེ་རྒྱན་དང༌། དབུས་མཐའ་རྣམ་འབྱེད་དང༌། ཆོས་ཉིད་རྣམ་འབྱེད་སེམས་ཙམ་པའི་རང་གཞུང་མ་ཡིན་ཏེ། དེ་དག་ལས་རྣམ་ཤེས་དོན་དམ་པར་མེད་པར་གསུངས་པ་གང་ཞིག སེམས་ཙམ་པས་རྣམ་ཤེས་དོན་དམ་དུ་ཡོད་པར་འདོད་པའི་ཕྱིར། དང་པོ་གྲུབ་སྟེ། མདོ་སྡེ་རྒྱན་ལས། སེམས་ལས་གཞན་མེད་པར་ཡང་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རིག ། བློ་དང་ལྡན་པའི་གཉིས་པོ་མེད་རིག་ན། །དེ་མི་ལྡན་པའི་ཆོས་ཀྱི་དབྱིངས་ལ་གནས། །ཞེས་དང༌། དབུས་མཐའ་རྣམ་འབྱེད་ལས། དོན་དང་སེམས་ཅན་བདག་རྣམ་རིག ། སྣང་བའི་རྣམ་པར་ཤེས་པ་ནི། །རབ་ཏུ་སྐྱེའོ་དེའི་དོན་མེད། །དེ་མེད་པས་ན་དེ་ཡང་མེད། །ཅེས་དང༌། ཆོས་ཉིད་རྣམ་འབྱེད་ལས། གཟུང་བར་སྣང་བ་མེད་གྲུབ་ན། །འཛིན་པར་སྣང་བ་མེད་གྲུབ་བོ། །ཞེས་སོགས་གསུངས་སོ། །རྟགས་གཉིས་པ་གྲུབ་སྟེ། རྗེ་སྤྱན་རས་གཟིགས་ཀྱི་རྒྱས་འགྲེལ་དྲི་མེདའོད་ལས། གཟུང་དང་འཛིན་ལས་རྣམ་གྲོལ་བའི། །རྣམ་པར་ཤེས་པ་དོན་དམ་ཡོད། །ཅེས་པ་རྣལ་འབྱོར་སྤྱོད་པའི་གཞུང༌། །རྒྱ་མཚོའི་ཕ་རོལ་ཕྱིན་རྣམས་སྒྲོགས། །ཞེས་གསུངས་པའི་ཕྱིར། གཞན་ཡང་མདོ་སྡེ་རྒྱན་དང་དབུས་མཐའ་སོགས་ལས་སྤྲོས་བྲལ་དང་དེ་བཞིན་ཉིད་སངས་རྒྱས་འགྱུར་མེད་ཡོངས་གྲུབ་གསུངས་པ་སོགས་ཀྱིས་གྲུབ་སྟེ།མདོ་སྡེ་རྒྱན་ལས། ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་འབྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམམ་པར་དག་འགྱུར་དེ་ནི་དོན་དམ་མཚན། །ཞེས་དང༌། དེ་བཞིན་ཉིད་ནི་སངས་རྒྱས་འདོད། །ཅེས་དང༌། དབུས་མཐའ་རྣམ་འབྱེད་ལས། སྟོང་བ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བཤད། །ཡོད་པས་མེད་པས་ཡོད་པས་ན། །དེ་ནི་དབུ་མའི་ལམ་ཡིན་ནོ། །ཞེས་གསུངས་པའི་ཕྱིར། གཞན་ཡང་བྱམས་ཆོས་དང་ས་སྡེ་སོགས་ཀྱིས་གནས་སྐབས་སེམས་ཙམ་སྟོན་པ་ཡོད་ཀྱང་སེམས་ཙམ་པའི་རང་གཞུང་དུ་མི་འགྱུར་ཏེ། དཔེར་ན་ཐེག་ཆེན་གྱི་སྡེ་སྣོད་དུ་ཐེག་དམན་གྱི་ལམ་སོགས་སྟོན་ཡང་ཐེག་དམན་གྱི་སྡེ་སྣོད་ཡིན་མི་དགོས་པ་བཞིན་ནོ། །དེ་སོགས་ལུང་རིགས་མང་མོད་ཀྱང་རེ་ཞིག་དེ་ཙམ་མོ། །