དྲི་བ་བཞི་བ་མདོ་སྡེ་རྒྱན་ལས་རིགས་ཆད་བསྟན་པས་སེམས་ཙམ་པའི་གཞུང་དུ་མི་འགྱུར་བའི་རྒྱུ་མཚན་གང་ཡིན་ཞེས་པ།
དྲི་བ་བཞི་བ་མདོ་སྡེ་རྒྱན་ལས་རིགས་ཆད་བསྟན་པས་སེམས་ཙམ་པའི་གཞུང་དུ་མི་འགྱུར་བའི་རྒྱུ་མཚན་གང་ཡིན་ཞེས་པའོ། །
དེའི་ལན་ནི། མདོ་སྡེ་རྒྱན་ལས་རིགས་ཆད་བསྟན་ཞེས་པ་གནས་སྐབས་རིགས་ཆད་བསྟན་པ་ལ་བྱེད་ན་གཞན་སྟོང་དབུ་མའི་རྒྱན་ལས། གནས་སྐབས་རིགས་ཆད་ཀྱང་ནི་མདོ་དེར་བཤད། །ཅེས་གསུངས་པ་ལྟར་ཤེར་མདོ་སོགས་ལས་གནས་སྐབས་རིགས་ཆད་བསྟན་པས་དེ་བསྟན་པ་ཙམ་གྱིས་སེམས་ཙམ་གྱི་གཞུང་ཡིན་པར་མ་ངེས་པ་ཡིན་ནོ། །རྒྱན་ལས་གཏན་ནས་རིགས་ཆད་བསྟན་ཟེར་ན། འདོད་མི་ནུས་ཏེ། རྒྱན་ལས་རང་བཞིན་གནས་རིགས་ལུས་ཅན་ཀུན་ལ་ཡོད་པར་གསུངས་པའི་ཕྱིར་ཏེ། དེ་ལས་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་པར་གསུངས་པའི་ཕྱིར་ཏེ། ཇི་སྐད་དུ། དེ་བཞིན་ཉིད་དེ་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་པ་ལ་སོགས་པ་རྒྱས་པར་གསུངས་སོ། །འོ་ན་མདོ་སྡེ་རྒྱན་ལས། ལ་ལ་གཅིག་ཏུ་ཉེས་པར་སྤྱོད་ངེས་ཡོད། །ལ་ལ་དཀར་བོའི་ཆོས་རྣམས་ཀུན་ཏུ་བཅོམ། །ལ་ལ་ཐར་བའི་ཆ་མཐུན་དགེ་བ་མེད། །དཀར་བོ་དམན་པ་ཡོད་པ་རྒྱུ་དང་བྲལ། །ཞེས་པའི་སྐབས་སུ་གཏན་ནས་རིགས་ཆད་བསྟན་པ་མ་ཡིན་ནམ་ཞེ་ན། མ་ཡིན་ཏེ། དེ་ནི་ཐེག་ཆེན་གྱི་ཆོས་ལ་སྡང་བ་བཟློག་པའི་ཆེད་དུ། ཡུན་རིང་པོར་རྒྱས་འགྱུར་གྱི་རིགས་ཆད་པ་ལ་དགོངས་ནས་གསུངས་པ་ཡིན་ཏེ། རྒྱུད་བླ་ཐོགས་འགྲེལ་ལས། ལོག་སྲེད་ཅན་གཏན་ཡོངས་སུ་མྱ་ངན་ལས་མི་འདའ་བའི་ཆོས་ཅན་ཞེས་གསུངས་པ་གང་ཡིན་པ་དེ་ནི།ཐེག་པ་ཆེན་པོའི་ཆོས་ལ་སྡང་བ་ལོག་སྲེད་ཅན་གྱི་རྒྱུ་ཡིན་པའི་ཕྱིར་ཐེག་པ་ཆེན་པོའི་ཆོས་ལ་སྡང་བ་བཟློག་པའི་དོན་དུ་དུས་གཞན་ལ་དགོངས་པ་ཡིན་ནོ། །རང་བཞིན་གྱིས་རྣམ་པར་དག་པའི་རིགས་ཡོད་པའི་ཕྱིར། འགའ་ཡང་གཏན་རྣམ་པར་དག་པར་མི་འགྱུར་བ་ནི་འོས་མ་ཡིན། ཞེས་འབྱུང་བ་ལྟར་རོ། །དེ་ལྟར་ཆོས་རྗེ་ཀུན་མཁྱེན་གྱི་རི་ཆོས་ངེས་དོན་རྒྱ་མཚོ་ལས་གསུངས་ཏེ། ཇི་སྐད་དུ། རང་བཞིན་གྱི་རིགས་ཆད་པ་ནི་སུ་ཡང་མི་སྲིད་ཅིང༌། རྒྱས་པའི་རིགས་ཆད་པ་ནི་མང་པོ་ཡོད་ལ། དེ་ལྟར་དོན་ལ་གནས་བཞིན་དུ་དབུ་མའི་གཞུང་ལུགས་མྱང་འདས་ཆེན་པོ་དང༌། སོར་མོའི་འཕྲེང་བ་ལ་ཕན་པ་དང༌། རྒྱུད་བླ་མ་ལ་སོགས་པ་རྣམས་སུ་ཡང༌། ལེགས་པར་གསུངས་པ་ཡིན་ནོ། །ཞེས་གསུངས་སོ། །