དྲི་བ་བདུན་པ་རྣམ་པར་བཞག་པའི་བདེན་བཞིའི་མཚན་ཉིད་དང་དབྱེ་བ་གང་ཞེས་པའི་དྲིས་ལན།
དྲི་བ་བདུན་པ་རྣམ་པར་བཞག་པའི་བདེན་བཞིའི་མཚན་ཉིད་དང་དབྱེ་བ་གང་ཞེས་པའི་དྲིས་ལན།
རྣམ་པར་བཞག་པའི་བདེན་བཞིའི་མཚན་ཉིད་དང་དབྱེ་བ་གང་ཞེས་པ་དེའོ། །དེའི་ལན་ནི། དེ་ལ་དང་པོ་རྣམ་པར་བཞག་མ་བཞག་གི་བདེན་པ་བཞི་ལས། རྣམ་པར་མ་བཞག་པའི་བདེན་བཞི་ནི། དོན་དམ་པའི་བདེན་བཞི་སྟེ་ཆོས་ཀྱི་དབྱིངས་ལམ་བདེན་གྱི་རྣམ་པར་ཤར་བ་དོན་དམ་པའི་ལམ་བདེན་དང༌། སངས་རྒྱས་ཀྱི་ཆོས་སྐུ་དོན་དམ་པའི་སྲིད་པ་གསུམ་གྱི་རྣམ་པར་ཤར་བ་དོན་དམ་པའི་སྡུག་བསྔལ་གྱི་བདེན་པ་དང༌། ཆོས་སྐུ་དོན་དམ་པའི་ལས་ཉོན་གྱི་རྣམ་པར་ཤར་བ་ནི་དོན་དམ་པའི་ཀུན་འབྱུང་ཞེས་བྱ་སྟེ། དེ་དག་ནི་ཐུན་མོང་མ་ཡིན་པའི་འགོག་པའི་བདེན་པ་དངོས་ཡིན་ནོ། །རྣམ་པར་བཞག་པའི་བདེན་པ་བཞི་ནི། ཐེག་པ་ཀུན་ལ་གྲགས་པའི་སྒྲ་རྟོག་གིས་ཐ་སྙད་རྣམ་པར་བཞག་ཏུ་ཡོད་པའི་བདེན་པ་བཞི་ཡིན་ཏེ། ཐེག་མཆོག་དབུ་མའི་ཟིན་བྲིས་ལས།སྤྱིར་བདེན་པ་བཞི་ལ་རྣམ་པར་བཞག་པའི་བདེན་པ་བཞི་དང༌། རྣམ་པར་མ་བཞག་པའི་བདེན་བཞི་གཉིས་ལས། དང་པོ་ནི། ཐེག་པ་ཀུན་ལ་གྲགས་པ་སྟེ་དེ་ནི་སྒྲ་དང་རྟོག་པས་ཐ་སྙད་རྣམ་པར་བཞག་ཏུ་ཡོད་པས་ན་དེ་སྐད་ཅེས་བྱ་ལ། གཉིས་པ་ནི་སྒྲ་རྟོག་གིས་ཐ་སྙད་བཞག་ཏུ་མེད་པ་དོན་དམ་ཆོས་ཉིད་བདེན་བཞིའི་རྣམ་པར་སྣང་བ་དེའོ། །དེས་ན་རྒྱུ་མཚན་ལ་རྣམ་པར་བཞག་པའི་བདེན་པ་བཞི་ཆར་གྱི་ཆ་ཡོད་པ་ཡིན་ལ། ཞེས་གསུངས་སོ། །དེ་ལྟའི་རྣམ་པར་བཞག་པའི་བདེན་བཞི་བཤད་པ་ལ་བཞི་ལས། དང་པོ་སྡུག་བདེན་གྱི་མཚན་ཉིད་དང་དབྱེ་བ་ནི། ཉོན་མོངས་པའི་ཟག་པ་དང་བཅས་པའི་རང་རྒྱུ་ལས་ཉོན་གྱི་འབྲས་བུས་བསྡུས་པ་ནི། སྡུག་བདེན་གྱི་མཚན་ཉིད། མཚན་གཞི་དང་དབྱེ་བ་ནི། ལས་ཉོན་གྱིས་བསྐྱེད་པའི་སྣོད་བཅུད་གཉིས་ཡིན་ཏེ། ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་པའི་ཕྱིར་རོ། །གཉིས་པ་ཀུན་འབྱུང་བདེན་པའི་མཚན་ཉིད་དང་དབྱེ་བ་ནི། ཉོན་མོངས་པའི་ཟག་པ་དང་བཅས་པའི་རང་འབྲས་སྡུག་བདེན་གྱི་རྒྱུས་བསྡུས་པ་དེ།ཀུན་འབྱུང་བདེན་པའི་མཚན་ཉིད། མཚན་གཞི་དང་དབྱེ་བ་ནི། ཟག་བཅས་ཀྱི་ལས་དང་ཉོན་མོངས་པ་གཉིས་ཡིན་ཏེ། མངོན་པ་ཀུན་བཏུས་ལས། ཀུན་འབྱུང་བའི་བདེན་པ་གང་ཞེ་ན། ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ། །ཞེས་གསུངས་སོ། །གསུམ་པ་རྣམ་པར་བཞག་པའི་འགོག་བདེན་གྱི་མཚན་ཉིད་དང་དབྱེ་བ་ནི། ཉ་ཊཱིཀ་ལྟར་འགོག་བདེན་གྱི་མཚན་ཉིད་ནི། ཐུན་མོང་གི་དབང་དུ་བྱས་པའི་འདུས་མ་བྱས་གང་ཞིག རང་རྒྱུ་ལམ་བདེན་གྱི་བྲལ་འབྲས་ཡིན་པའོ། །དབྱེ་ན། རྗེས་མཐུན་དང་མཚན་ཉིད་པ་གཉིས་དང༌། སློབ་མི་སློབ་དང༌། དགྲ་བཅོམ་རྒྱན་བཅས་རྒྱན་མེད་དང༌། ལྷག་བཅས་ལྷག་མེད་གཉིས་དང༌། སངས་རྒྱས་བྱང་སེམས་ཀྱི་མྱང་འདས་གཉིས་སྟེ་ཚན་པ་ལྔའོ། །རྣམ་པར་མ་བཞག་པའམ་ཐུན་མོང་མ་ཡིན་པའི་འགོག་བདེན་གྱི་མཚན་ཉིད་སོགས་ནི། ཆོས་ཀྱི་དབྱིངས་གདོད་ནས་རང་བཞིན་གྱིས་རྣམ་པར་དག་པའི་དེ་བཞིན་ཉིད་དེ། འགོག་བདེན་གྱི་མཚན་ཉིད། མཚན་གཞི་དང་དབྱེ་བ་ནི། རང་བཞིན་རྣམ་དག་དང༌། གློ་བུར་རྣམ་དག་གི་དེ་བཞིན་ཉིད་དོ། །བཞི་བ་ལམ་བདེན་གྱི་མཚན་ཉིད་དང་དབྱེ་བ་ནི། ཚོགས་ཆོས་བདེན་བཞིའི་རྣམ་བཤད་ལྟར་ཐབས་དང་ཤེས་རབ་ཟུང་དུ་འབྲེལ་བའི་དགེ་བ་གང་ཞིག རྣམ་པར་གྲོལ་བའི་འཇུག་ངོགས་སུ་གྱུར་པ་དེ། ལམ་བདེན་གྱི་མཚན་ཉིད། ཡང་ན་ཉ་ཊཱིཀ་ལྟར་གཉེན་པོའི་སྒོ་ནས་ཟག་མེད་འདུས་བྱས་གང་ཞིག་འགོག་བདེན་གྱི་བྲལ་རྒྱུ་དེ། ལམ་བདེན་གྱི་མཚན་ཉིད། མཚན་གཞི་དང་དབྱེ་བ་ནི། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་རྣམས་ཡིན་ཏེ། ཀུན་བཏུས་ལས། ལམ་རྣམ་པ་ལྔ་སྟེ། ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། སྒོམ་པའི་ལམ་དང༌། མཐར་ཕྱིན་པའི་ལམ་མོ། །ཞེས་གསུངས་པའི་ཕྱིར་རོ། །