དྲི་བ་བཅུ་གཉིས་པ་ཀུན་གཞིའི་བག་ཆགས་ཀྱི་དབང་གིས་གཟུགས་སྒྲ་སོགས་ཀྱི་སྣང་བ་སྣ་ཚོགས་སུ་ཤར་བ།
དྲི་བ་བཅུ་གཉིས་པ་ཀུན་གཞིའི་བག་ཆགས་ཀྱི་དབང་གིས་གཟུགས་སྒྲ་སོགས་ཀྱི་སྣང་བ་སྣ་ཚོགས་སུ་ཤར་བ་དེ་སེམས་ཡིན་ནམ་མིན་ཞེས་པའི་དྲིས་ལན།
ཀུན་གཞིའི་བག་ཆགས་ཀྱི་དབང་གིས་གཟུགས་སྒྲ་སོགས་ཀྱི་སྣང་བ་སྣ་ཚོགས་སུ་ཤར་བ་དེ་སེམས་ཡིན་ནམ་མིན་ཞེས་པའོ། །དེའི་ལན་ནི། ཀུན་གཞིའི་སྟེང་གི་བག་ཆགས་ཀྱི་དབང་གིས་གནས་དོན་ལུས་གསུམ་གྱི་སྣང་བ་སྣ་ཚོགས་པ་སྣང་བ་སེམས་ཡིན་མིན་ལ། རང་ལུགས་ཀྱི་གཞུང་རྣམས་སུ་འདི་ལྟར་འབྱུང་སྟེ། གཞན་སྟོང་སྙིང་པོ་ལས་སེམས་ཙམ་པའི་འདོད་པ་བརྗོད་པའི་སྐབས་སུ། སེམས་ཙམ་པ་ནི་གཟུགས་སོགས་ཕྱི་རོལ་གྱི་ཡུལ་རྣམས་རྨི་ལམ་གྱི་གཟུགས་སོགས་ལྟར་ཤེས་པ་ཉིད་དེ་དང་དེར་སྣང་བ་ཡིན་གྱི། ཕྱི་རོལ་ན་དེ་ལྟར་སྣང་བ་མེད་དེ་དཔེར་ན་གཟུགས་ལ་མཚོན་ན། མིག་གི་དབང་བོར་གྲགས་པ་ཡང༌། མིག་གི་རྣམ་པར་སྣང་བའི་སེམས་ཡིན་པས། མིག་རང་མཚན་པ་ཞིག་མེད་ལ། གཟུགས་སུ་གྲགས་པ་ཡང་གཟུགས་ཀྱི་རྣམ་པར་སྣང་བའི་སེམས་ཡིན། ཞེས་པ་ནས། མིག་གིས་གཟུགས་མཐོང་བ་ནི། རང་གིས་རང་ཉིད་མཐོང་བ་ཡིན་ཞིང༌། ཞེས་པ་ནས། དེ་ལྟར་ན་འདིས་འདོད་པའི་གཟུགས་སོགས་ཕྱི་དོན་སྣང་བའི་རྣམ་རིག་བདེན་གྲུབ་དང༌། རྣམ་ཤེས་ཀྱི་ངོ་ལྡོག་ཙམ་གཟུང་འཛིན་གཉིས་མིན་གྱི་ཡེ་ཤེས་སུ་འདོད་པ་དང༌། འཛིན་པའི་ངོ་བོ་རྣམ་ཤེས་ཉིད་ལ་མི་འདོད་པར་ཡུལ་དུ་སྣང་བའི་རྣམ་རིག་ལས་ཐ་དད་པར་སྣང་བའི་ཆ་ཙམ་ལ་འདོད་པ་ནི་འཁྲུལ་བ་ཡིན་ལ་གཞན་རྣམས་མ་ནོར་བའོ། །ཞེས་གཞན་རྣམས་མ་ནོར་གསུངས་པས་མིག་དང་གཟུགས་སོགས་སེམས་ཡིན་གསུངས་པ་མ་ནོར་བ་ཡིན་པ་ལྟ་བུར་གསུངས་ལ། ཐེག་མཆོག་དབུ་མ་ལས། ཅི་ཙམ་སྣང་བ་གསལ་བའི་སེམས་ཡིན་ཏེ། །རྨི་ལམ་ལ་སོགས་དག་དང་མཚུངས་ཕྱིར་དང༌། །བློ་དང་ལྷན་ཅིག་ཁོ་ནར་དམིགས་པས་ཀྱང༌། །སེམས་སྣང་ཙམ་ཡིན་གཞན་དུ་མེད་པར་གྲུབ།། ཅེས་སོགས་དང༌། དེའི་སྐབས་ཀྱི་ཟིན་བྲིས་ལས། སྣང་བ་སེམས་སུ་སྒྲུབ་པ་ལ་བརྟེན་ནས་ཕྱི་དོན་འགོག་པ་དང༌། ཕྱི་དོན་འགོག་བྱེད་ཀྱི་རིགས་པ་བཤད་པ་གཉིས། དང་པོ་སྣང་ཞིང་སྲིད་པས་བསྡུས་པའི་ཆོས་འདི་དག་ཐམས་ཅད་རང་གི་སེམས་ཀྱི་སྣང་བ་ཙམ་ཡིན་གྱི། སེམས་ལས་ལོགས་སུ་གྲུབ་པ་ཅུང་ཟད་ཀྱང་ཡོད་པ་མ་ཡིན་ཏེ།ཇི༷་ཙ༷མ་སྣ༷ང་བ༷་གས༷ལ་བ༷འི་སེ༷མས་ཀྱི་བདག་ཉིད་ཡི༷ན་པའི་ཕྱིར། དཔེར་ན། རྨི༷་ལ༷མ་དང་སྒྱུ་མ་ལ༷་སོ༷གས་པ་ད༷ག་ད༷ང་མཚུང༷ས་བའི་ཕྱི༷ར། ཞེས་པ་ནས། སྣང་བ་སེམས་སུ་སྒྲུབ་པའི་རིགས་པ་འཕགས་པ་ཐོགས་མེད་ཀྱི་ཐེག་པ་ཆེན་པོ་བསྡུས་པར་གསུངས་པ། ཞེས་གསུངས་པ་དང༌། ཚད་མ་རྣམ་ངེས་ལས། ལྷན་ཅིག་དམིགས་པར་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་དང༌། ཐེག་བསྡུས་སུ། དམྱལ་བ་ཡི་དྭགས་དུད་འགྲོ་དང༌། །ལྷ་རྣམས་ཇི་ལྟར་རིགས་རིགས་སུ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཞེས་སོགས་ཀྱི་དགོངས་པ་དང༌། རང་ལུགས་ཀྱི་གཞི་ཐུན་མོང་བ་སྤྱིའི་རྣམ་བཞག་དང་མཐུན་པར་བཤད་ན། ཐེག་མཆོག་དབུ་མའི་ཟིན་བྲིས་ལྟར་སེམས་ཀྱི་སྣང་བ་རྣམས་སེམས་ཀྱི་བདག་ཉིད་དུ་གྲུབ་པ་དང༌། སེམས་ཀྱི་སྣང་བ་ཙམ་ཡིན་པ་ལས་ཕྱི་དོན་དུ་མ་གྲུབ་པ་ཡིན་ཏེ། ཀུན་བཏུས་འགྲེལ་བ་ལས། དབུ་མ་པ་ནི་ནོར་བུ་ཚོན་གྱི་རྣམ་པ་བརྟེན་པ་བཞིན་རྣམ་ཤེས་ཀྱང་ཡུལ་ཉེ་བར་བྱུང་བས་ཡུལ་གྱི་རྣམ་པ་ཡོངས་སུ་གཅོད་པ་ནི། ཡུལ་གྱི་རྣམ་པ་ནི་རྣམ་ཤེས་ཀྱང་མིན་རྣམ་ཤེས་ལས་གཞན་ཡང་མིན། ཞེས་དང༌། ཐེག་མཆོག་དབུ་མ་ལས། ཆོས་ཀུན་སེམས་འདིའི་མཐུ་ལས་སྣང་མོད་ཀྱི། །དེ་དག་འདི་དང་གཅིག་པ་མིན་པའི་ཕྱིར། །ཞེས་གསུངས་པའི་ཕྱིར། དེས་སྔར་གྱི་ལུང་དེ་དག་གི་དོན་ཡང་ཡུལ་གཟུགས་སྒྲ་སོགས་སེམས་ཀྱི་བདག་ཉིད་ཡིན་པའི་དོན་དུ་སྣང་ལ། སྤྱིར་ཆོས་དེ་དང་དེའི་བདག་ཉིད་ཡིན་ན་ཆོས་དེ་ཡིན་མི་དགོས་ཏེ། གཟུགས་མི་རྟག་པ་དང་གཟུགས་བདག་མེད་སོགས་གཟུགས་ཀྱི་བདག་ཉིད་དུ་གྲུབ་ཀྱང་གཟུགས་ཡིན་མི་དགོས་པ་དེ་བཞིན་ནོ། །སྣང་བ་རྣམས་སེམས་ཡིན་པར་འདོད་མི་ནུས་ཏེ། ཕུང་པོ་ལྔ་དང་སྐྱེ་མཆེད་བཅུ་གཉིས་དང་དངོས་དངོས་མེད་དང་བེམ་ཤེས་སོགས་ཀྱི་རྣམ་བཞག་རྣམས་འཇིག་པར་འགྱུར་ལ། དེ་ཡང་རང་ལུགས་ལ་བེམ་ཤེས་གཉིས་ཀྱི་རྣམ་བཞག་འཇོག་དགོས་སྟེ། བཀའ་བསྡུ་བཞི་བ་ལས། ཐམས་ཅད་བེམ་རིག་གཉིས་སུ་ཁ་ཚོན་ཆོད། །དེ་ཕྱིར་དེ་ལ་ཕུང་པོ་གསུམ་པ་མེད། །ཅེས་པ་འདི་ནི་རྫོགས་ལྡན་ཆོས་ལུགས་ཡིན། །ཞེས་དང༌། ཤེས་བྱ་ལ་ནི་འདུས་བྱས་འདུས་མ་བྱས། །བེམ་རིག་གཉིས་སུ་འབྱེད་པ་རྫོགས་ལྡན་ལུགས། །ཞེས་གསུངས་ཞིང༌། བེམ་རིག་གཉིས་ཀྱི་གཞི་མཐུན་ནི་འཇོག་མི་རུང་སྟེ། །ཐེག་མཆོག་དབུ་མའི་ཟིན་བྲིས་ལས། དཔེར་ན་ཕྱི་ནང་གི་ཆོས་ཐམས་ཅད་སེམས་ཀྱི་མཐུ་ལས་བྱུང་མོད་ཀྱི་ཆོས་དེ་རྣམས་དང་སེམས་གཉིས་གཅིག་པ་མ་ཡིན་ཏེ།སེམས་ཀྱི་མཚན་ཉིད་གསལ་ཞིང་རིག་པ་ལ་སོགས་པ་བེམ་པོར་གྱུར་བའི་ཆོས་རྣམས་ལ་མེད་པའི་ཕྱིར་རོ། །ཞེས་གསུངས་སོ། །གལ་ཏེ་སྣང་བ་རྣམས་སེམས་ཡིན་ན་གཟུགས་སྒྲ་སོགས་དེ་འཛིན་པའི་ཤེས་པ་ཡིན་དགོས་ལ། དེ་འདོད་ན་བུམ་པ་ལ་ཤེས་པ་ལྡན་པས་སྐྱེས་བུ་ཡིན་པར་འགྱུར་བ་མ་ཡིན་ནམ། ཡང་མི་གཅིག་ལ་དགྲ་གཉེན་གཉིས་ཀྱིས་ལྟ་བའི་ཚེ་དེའི་དབྱིབས་གཟུགས་དེ་དེ་གཉིས་ཀྱི་མིག་ཤེས་ཡིན་མིན་དང༌། ལོང་བའི་རྒྱུད་ཀྱི་གཟུགས་ཀྱི་སྐྱེ་མཆེད་དེ་མིག་ཤེས་ཡིན་མིན་དང༌། དེ་ཡིན་ན་ལོང་བ་ལ་མིག་ཤེས་དང་འོན་པ་ལ་རྣ་ཤེས་ཡོད་པར་འགྱུར་བ་དང༌། འགོག་སྙོམས་པ་ལ་དབང་ཤེས་ཡོད་པར་ཐལ་བ་སོགས་མི་འགྱུར་རམ་ཕྱོགས་འཛིན་གྱི་གདོན་དང་བྲལ་བའི་བློ་ལྡན་རྣམས་ཀྱིསདཔྱད་པར་བྱའོ། །