དྲི་བ་བཅུ་གསུམ་པ་ཟབ་དོན་ཉེར་གཅིག་ཏུ་ས་སྐྱའི་ཤཱཀྱ་མཆོག་ལྡན་གྱི་ལུགས་ལ་སྟོང་ཉིད་བདེན་པར་གྲུབ་ཟེར་བ་དང༌།
དྲི་བ་བཅུ་གསུམ་པ་ཟབ་དོན་ཉེར་གཅིག་ཏུ་ས་སྐྱའི་ཤཱཀྱ་མཆོག་ལྡན་གྱི་ལུགས་ལ་སྟོང་ཉིད་བདེན་པར་གྲུབ་ཟེར་བ་དང༌།
རིགས་པས་དཔྱད་བཟོད་མ་གྲུབ་ཟེར་བ་གཉིས་འགལ་ལམ་མི་འགལ་ཞེས་པའི་དྲིས་ལན།
ཟབ་དོན་ཉེར་གཅིག་ཏུ། ས་སྐྱའི་ཤཱཀྱ་མཆོག་ལྡན་གྱི་ལུགས་ལ་སྟོང་ཉིད་བདེན་པར་གྲུབ་ཟེར་བ་དང༌། རིགས་པས་དཔྱད་བཟོད་མ་གྲུབ་ཟེར་བ་གཉིས་འགལ་ལམ་མི་འགལ་ཞེས་པའོ། །དེའི་ལན་ནི། །རང་ལུགས་ཀྱིས་གཞལ་ན་བདེན་པར་གྲུབ་པ་དང་རིགས་པས་དཔྱད་བཟོད་མ་གྲུབ་ཟེར་བ་གཉིས་འགལ་བའོ། །ཤཱཀ་མཆོག་རང་གི་ལུགས་ལ་སྟོང་ཉིད་མཉམ་བཞག་ཡེ་ཤེས་ངོར་བདེན་པས་ན་བདེན་པར་གྲུབ་ཀྱང་གཅིག་དུ་བྲལ་སོགས་རིགས་པས་དཔྱད་ཚེ་གཅིག་དང་དུ་མ་སོགས་གང་དུུ་དཔྱད་མི་བཟོད་པས་ན་རིགས་པས་དཔྱད་བཟོད་མ་གྲུབ་ཅེས་བཞེད་པ་འདྲ་སྟེ། རྒྱ་མཚོ་སྤྲིན་གྱི་འབྲུག་སྒྲ་ལས། འོན་ཀྱང་ཐ་སྙད་རྣམ་པར་འཇོག་པའི་ཚེ། །རང་བཞིན་འོད་གསལ་བདེན་པར་ཁས་བླངས་ཀྱང༌། །མཉམ་བཞག་སྤྲོས་བྲལ་ནམ་མཁའི་ངང་ཉིད་ལས། །ཇི་སྙེད་སྤྲོས་པའི་ཚོགས་འགའ་ལུས་པ་མེད།། ཅེས་གསུངས་སོ། །