དྲི་བ་བཅུ་དྲུག་པ་ཉན་རང་དགྲ་བཅོམ་པས་སྡུག་བདེན་སྤངས་བ་ཡོད་དམ་མེད།
དྲི་བ་བཅུ་དྲུག་པ་ཉན་རང་དགྲ་བཅོམ་པས་སྡུག་བདེན་སྤངས་བ་ཡོད་དམ་མེད། ཡོད་ན་ཀུན་གཞི་སྡུག་བདེན་ཨེ་ཡིན་ཞེས་པའི་དྲིས་ལན།
ཉན་རང་དགྲ་བཅོམ་པའི་སྡུག་བདེན་སྤངས་བ་ཡོད་དམ་མེད། ཡོད་ན་ཀུན་གཞི་སྡུག་བདེན་ཨེ་ཡིན་ཞེས་པའོ།། དེའི་ལན་ནི། ཉན་རང་དགྲ་བཅོམ་ལྷག་མེད་པའི་སྡུག་བདེན་སྤངས་པ་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས།དེ་ཡང་ཕྱི་མའི་ཕུང་པོའི་རྒྱུ་ཉོན་མོངས་པའི་ཀུན་འབྱུང་སྤངས་ཀྱང་སྔ་མའི་ལས་ཉོན་གྱི་འབྲས་བུ་ཚེ་འདིའི་སྡུག་བསྔལ་གྱི་ཕུང་པོ་མ་སྤངས་པའི་མྱང་འདས་དེ་ཐེག་དམན་གྱི་ལྷག་བཅས་མྱང་འདས། ཞེས་པ་ནས། ཐེག་དམན་དགྲ་བཅོམ་དེ་ཉིད་ཚེའི་དུས་བྱས་པ་ན་སྔ་མའི་ལས་ཉོན་གྱི་འབྲས་བུ་སྡུག་བསྔལ་ཡང་སྤངས་པའི་མྱང་འདས་ནི་ཐེག་དམན་གྱི་ལྷག་མེད་མྱང་འདས་ཏེ། ཞེས་གསུངས་པའི་ཕྱིར། 
ཀུན་གཞི་སྡུག་བདེན་ཨེ་ཡིན་ཞེས་པ་ཀུནགཞི་རྣམ་ཤེས 
་དང་ཡེ་ཤེས་གཉིས་མ་ཕྱེ་བར་སྤྱིར་སྡུག་བདེན་ཨེ་ཡིན་ཞེས་དྲི་བ་ཡིན་ན་སྡུག་བདེན་མིན་ཞེས་ལན་འདེབས་པར་བྱ་ལ། ཀུན་གཞི་རྣམ་ཤེས ་སྡུག་བདེན་ཡིན་ནམ་ཞེས་དྲིས་པ་ཡིན་ན། སྡུག་བདེན་ཡིན་ཞེས་བྱ་སྟེ། ཆོས་ཀྱི་ཤན་འབྱེད་ལས། ཀུན་གཞི་རྣམ་ཤེས ་ནི་སྦྱང་བྱ་དྲི་མ་ལས་མ་འདས་ཏེ་ལེན་པའི་རྣམ་ཤེས་ཡིན་པའི་ཕྱིར་དང༌། སྲིད་པའི་ཡན་ལག་གི་རྣམ་ཤེས་ཡིན་པའི་ཕྱིར་དང༌། རྣམ་པར་སྨིན་པའི་རྣམ་ཤེས་ཡིན་པའི་ཕྱིར། འཁོར་བ་ཇི་སྲིད་པའི་ཕུང་པོ་ཡིན་པའི་ཕྱིར། རྩ་བའི་རྣམ་ཤེས་དང་ས་བོན་ཐམས་ཅད་པའི་རྣམ་ཤེས་ཡིན་པའི་ཕྱིར། ཞེས་སོ། །གཞན་ཡང་ཉན་རང་དགྲ་བཅོམ་པ་ལྷག་མེད་དུ་གྱུར་པ་དང་ ཀུན་གཞི་རྣམ་ཤེས ་ཀྱི་མཚན་ཉིད་ལྡོག་ནས་རྣམ་སྨིན་གྱི་ཆ་སྤངས་པ་ཡིན་ལ། དེ་རིགས་རྒྱུན་ཙམ་ཞིག་ནི་ཡོད་ཅིང་དེ་དུས་གནས་འགྱུར་མཐར་ཐུག་མ་ཐོབ་པའི་ཕྱིར་རོ། །ས་བཟང་གི་མངོན་པ་ཀུན་བཏུས་ཀྱི་འགྲེལ་བ་ལས། འགའ་ཞིག་འཁོར་བ་ཇི་སྲིད་པར་འཇུག་པའི་ རྣམ་ཤེས་ཞེས་གསུངས་པ་ནི་མི་འཐད་དེ། དགྲ་བཅོམ་པའི་ཀུན་གཞི ་ལ་མ་ཁྱབ་པའི་ཕྱིར་རོ། །ཞེས་གསུངས་ཀྱང་དེའི་འོག་ཏུ་དུས་འཁོར་བ་ཇི་སྲིད་དུ་རྒྱུན་མི་ཆད་པར་འབྱུང་བ་སྟེ། ཞེས་གསུངས་པས་གོང་མ་རང་ལུགས་ཡིན་མིན་ལ་དཔྱད་པར་བྱའོ། །