དྲི་བ་བཅུ་བདུན་པ་ཆོས་ཐམས་ཅད་གཞན་སྟོང་ཡིན་ནམ་མིན་ཞེས་པའི་དྲིས་ལན།
དྲི་བ་བཅུ་བདུན་པ་ཆོས་ཐམས་ཅད་གཞན་སྟོང་ཡིན་ནམ་མིན་ཞེས་པའི་དྲིས་ལན།
ཆོས་ཐམས་ཅད་གཞན་སྟོང་ཡིན་ནམ་མིན་ཞེས་པའོ། །དེའི་ལན་ནི། བདེན་གཉིས་ཀྱིས་བསྡུས་པའི་ཆོས་ཐམས་ཅད་གཞན་སྟོང་མ་ཡིན་ཏེ། ཀུན་རྫོབ་བདེན་པ་གཞན་སྟོང་མ་ཡིན་པའི་ཕྱིར་ཏེ། བཀའ་བསྡུ་བཞི་བ་ལས། བདེ་གཤེགས་སྙིང་པོ་གཞན་སྟོང་ཡིན་པ་ལྟར། །གློ་བུར་དྲི་མ་གཞན་སྟོང་ཡིན་ནམ་ཅི། །ཞེས་དང༌། རྣམ་ཤེས་ཡིན་ན་གཞན་སྟོང་ཟབ་མོ་མིན། །ཞེས་སོགས་གཞན་སྟོང་སྟོན་བྱེད་ཀྱི་མདོ་རྒྱུད་དུ་མ་དང༌། ཀུན་མཁྱེན་དང་རྗེ་སྒྲོལ་མགོན་ཞབས་གཉིས་ཀྱིས་སྐབས་དུ་མར་གཞན་སྟོང་ནི་དོན་དམ་ཁོ་ན་ལ་གསུངས་པའི་ཕྱིར་ཏེ། རྒྱུད་བླ་ཐོགས་འགྲེལ་དུ་མདོ་དྲངས་པ་ལས། གང་ཞིག་གང་ན་གང་མེད་པ་དེ་ནི་དེས་སྟོང་ངོ༌། །གང་ཞིག་ལྷག་མར་གྱུར་པ་དེ་ནི་དེ་ལ་རྟག་ཏུ་ཡོད་དོ། །ཞེས་སྟོང་བའི་གཞི་གཞན་སྟོང་དུ་གསུངས་བ་ལས་དེ་ལས་གཞན་གཞན་སྟོང་དུ་མ་གསུངས་པ་དང༌། རི་ཆོས་ངེས་དོན་རྒྱ་མཚོ་ལས། གནས་ལུགས་ལ་ཡོད་པ་ནི་གཞན་སྟོང་དང་མེད་པ་ནི་རང་སྟོང་ངོ༌། །ཞེས་དང༌། དེ་ལྟར་སྟོང་བའི་ཆོས་རང་སྟོང་དང༌། སྟོང་བའི་གཞི་གཞན་སྟོང་དུ་རྟོགས་པ་འདི་ནི་སྟོང་བ་ཉིད་ལ་འཇུག་པ་ཡང་དག་པ་ཇི་ལྟ་བ་སྟེ་ཕྱིན་ཅི་མ་ལོག་པ་ཞེས་བྱའོ། །ཞེས་དང༌། བདེན་གཉིས་གསལ་བའི་ཉི་མ་ལས། ཀུན་རྫོབ་ནི་དོན་ལ་མེད་པས་རང་སྟོང་དང༌། རྣམ་ཤེས་ལ་སྣང་གི་ཡེ་ཤེས་ལ་མི་སྣང་བ་དང༌། དོན་དམ་ནི་དོན་ལ་ཡོད་པས་རང་གིས་མི་སྟོང་བའི་གཞན་སྟོང་དང༌། །ཡེ་ཤེས་ལ་སྣང་གི་རྣམ་ཤེས་ལ་གཏན་མི་སྣང་བ་དང༌། ཞེས་དང༌། གྲུབ་མཐའ་དོན་གསལ་ལས། ཀུན་རྫོབ་བདེན་པ་རང་གིས་སྟོང༌། དོན་དམ་བདེན་པ་གཞན་སྟོང་སྟེ། །སྟོང་ཚུལ་དེ་ལྟར་མ་ཤེས་ན། །རྒྱལ་བའི་བཀའ་ལ་རྨོངས་པ་ཡིན། །ཞེས་དང༌། ཚུལ་གཉིས་རྣམ་འབྱེད་ལས། ཀུན་རྫོབ་ཀྱི་ཆོས་ཐམས་ཅད་བདེན་མེད་རང་གི་ངོ་བོས་སྟོང་བའི་རང་སྟོང་ཡིན་ཡང༌། དོན་དམ་དབྱིངས་ནི་བདེན་པར་གྲུབ་པའི་ཕྱིར་རང་གི་ངོ་བོས་མི་སྟོང་ལ། འོན་ཀྱང་སྟོང་ཉིད་ནི་ཡིན་ཏེ། གཞན་གཟུང་འཛིན་སོགས་སྤྲོས་པ་ཐམས་ཅད་ཀྱིས་སྟོང་བའི་ཕྱིར་དོན་དམ་ནི་གཞན་སྟོང་ཡིན་ནོ། །ཞེས་སོགས་དོན་དམ་ཁོ་ན་གཞན་སྟོང་ཡིན་པར་གསུངས་སོ། །འོ་ན་གཞན་སྟོང་དབུ་མའི་རྒྱན་ལས། གང་ཟག་བདག་མེད་རྟག་ཏུ་གཞན་སྟོང་སྟེ། །འོན་ཀྱང་ཐ་ཤལ་སྟོང་ཉིད་མིན་པ་བཞིན། །ཞེས་དང༌། ཉ་དབོན་པའི་བསྟན་པ་སྤྱི་འགྲེལ་གྱི་རྣམ་བཤད་ལས། སྔར་གྱི་སྟོང་ཚུལ་དེ་ཉིད་གཞན་སྟོང་གི་སྟོང་ཚུལ་དངོས་ཡིན་པའི་ཕྱིར་རོ། །དེས་ན་དོན་དམ་ཐམས་ཅད་གཞན་སྟོང་ཡིན་གྱི་རང་སྟོང་མིན་ལ། ཀུན་རྫོབ་ཐམས་ཅད་སྔ་རབས་པའི་འཆད་ཚུལ་དང་བསྟུན་ནས་རང་སྟོང་དང་དོན་ལ་གཞན་སྟོང་སྟེ་གཉིས་ཀའོ། །ཞེས་ཀུན་རྫོབ་ཐམས་ཅད་གཞན་སྟོང་ཡིན་པར་བསྟན་པ་མ་ཡིན་ནམ་ཞེ་ན། མ་ཡིན་པར་སྣང་སྟེ། དེ་ནི་ཀུན་རྫོབ་རྣམས་གཞན་གྱིས་སྟོང་བ་ཙམ་ཡིན་པས་གཞན་སྟོང་གི་སྟོང་ཚུལ་ལམ་སྒྲ་བཤད་ཙམ་ཚང་བའི་དོན་ཡིན་ཞེས་བཤད་ན་རང་ལུགས་ཀྱི་དམ་པ་རྣམས་ཀྱི་དགོངས་པ་འགལ་མེད་དུ་འགྲོའོ། །དེ་ལྟ་མ་ཡིན་ན་གཞན་གྱིས་སྟོང་ན་གཞན་སྟོང་ཡིན་དགོས་ལ། དེ་འདོད་ན་སྐྱེ་བ་མེད་ན་སྐྱེ་མེད་དུ་འགྱུར་ལ། འདོད་ན། ཆོས་ཀྱི་ཤན་འབྱེད་ལས། རང་སྟོང་གིས་དོན་དམ་སྟོང་ཉིད་ཀྱི་གོ་མི་ཆོད་པ་ཇི་ལྟ་བ་དེ་བཞིན་དུ་གཞན་སྟོང་གིས་ཀྱང་ཀུན་རྫོབ་སྟོང་ཉིད་ཀྱི་གོ་མི་ཆོད་དོ། །ཞེས་དང༌། རྒྱལ་བའི་ཡུམ་ལས། སྐྱེ་བ་མེད་པ་གང་ཡིན་པ་དེ་ནི་དེ་བཞིན་གཤེགས་པའོ། །ཞེས་དང༌། ཐེག་མཆོག་དབུ་མའི་ཟིན་བྲིས་ལས། དེ་ལ་སྐྱེ་འགག་མེད་ཀྱང་ཅི་ཡང་མེད་པ་ལ་སྐྱེ་རྒྱུ་དང་འགག་རྒྱུ་མེད་པས་སྐྱེ་བ་མེད་ཅེས་བཤད་པ་ཡིན་གྱི་སྐྱེ་མེད་ཀྱི་དོན་མ་ཡིན་ནོ། །ཞེས་གསུངས་པ་སོགས་དང་འགལ་བར་འགྱུར་རོ། །ཡང་ཀུན་རྫོབ་ཀྱི་ཆོས་རྣམས་གཞན་སྟོང་ཡིན་ན་སྟོང་ཉིད་ཉི་ཤུའི་གཞན་གྱི་ངོ་བོ་སྟོང་བ་ཉིད་རང་སྟོང་ལ་བཤད་དགོས་ཀྱང་དེ་ལྟར་ཀུན་མཁྱེན་དང་རྗེ་སྒྲོལ་མགོན་གཉིས་ཀྱིས་མ་གསུངས་ཏེ། རི་ཆོས་ངེས་དོན་རྒྱ་མཚོ་ལས། སྟོང་ཉིད་ཉི་ཤུ་བོ་ཐམས་ཅད་རང་སྟོང་ཉིད་དུ་སྨྲ་བ་ནི། རྒྱལ་བ་རྣམས་ཀྱི་དགོངས་པ་ཆེན་པོའི་དོན་མ་ཡིན་ཏེ། དོན་དམ་པའི་བདེན་པ་དང་རང་བཞིན་གྱི་རིགས་དང་ཆོས་སྐུའི་ཡོན་ཏན་གྱི་ཆོས་ཐམས་ཅད་དང་ངོ་བོ་ཉིད་དང་དངོས་པོ་མེད་པའི་ངོ་བོ་ཉིད་དང་གཞན་གྱི་དངོས་པོ་སྟོང་པ་ཉིད་རྣམས་སྟོང་ཉིད་ཡིན་ཀྱང་རང་སྟོང་མ་ཡིན་པའི་ཕྱིར་རོ། །ཞེས་དང༌། ཤེར་འགྲེལ་སྔོན་མེད་ལེགས་བཤད་ལས། རང་གི་ངོ་བོ་སྟོང་བ་ཉིད་ནི། དངོས་མེད་སྟོང་ཉིད་དང་གཅིག་ལ། གཞན་གྱི་ངོ་བོ་སྟོང་བ་ཉིད་ནི། དངོས་མེད་ངོ་བོ་ཉིད་དང་གཅིག་གོ ། རྣམ་བཞག་འདི་ནི་ཤིན་ཏུ་གསལ་བར་སྔགས་ཀྱི་ཐེག་པ་བླ་ན་མེད་པའི་རྒྱུད་གཉིས་ལས་འབྱུང་བ་དང༌། མདོ་ལུགས་ཀྱི་དབུས་མཐའ་རྣམ་འབྱེད་རྩ་འགྲེལ་དང༌། ཡུམ་གསུམ་གནོད་འཇོམས་དང༌། བརྒྱད་སྟོང་དོན་བསྡུ་སོགས་ལས་ཤེས་པར་བྱའོ། །ཞེས་གསུངས་སོ། །ཡང་ཁ་ཅིག་གཞན་སྟོང་སྙིང་པོ་ལས། ཀུན་རྫོབ་རྣམས་གཞན་གྱི་ངོ་བོས་སྟོང་བའི་སྟེང་དུ་རང་གི་ངོ་བོས་ཀྱང་སྟོང་བ་དང༌། ཞེས་སོགས་ཀྱིས་ཀུན་རྫོབ་རྣམས་གཞན་སྟོང་དུ་གྲུབ་པོ་ཞེ་ན། ཁྱོད་རང་ལ་ཀུན་རྫོབ་ཀྱི་ཆོས་གཞན་གྱིས་སྟོང་བར་གསུངས་པས་གཞན་སྟོང་ཡིན་པར་གྲུབ་ན་གཞན་གྱིས་སྟོང་ན་གཞན་སྟོང་དུ་ཁས་བླངས་དགོས་པས་རི་བོང་གི་རྭ་ཡང་གཞན་སྟོང་དུ་འགྱུར་རོ། །ཡང་བཀའ་བསྡུ་བཞི་བར། རྣམ་ཤེས་འདི་མིན་གཞན་སྟོང་ཟབ་མོ་མིན། །ཞེས་གཞན་སྟོང་ཟབ་མོ་ཞེས་པས་ཤུགས་ལ་གཞན་སྟོང་མི་ཟབ་པ་ཡོད་པར་བསྟན་ཏོ་ཞེ་ན་མ་ཡིན་ཏེ། ལུང་དེས་ཤུགས་ལ་རང་སྟོང་མི་ཟབ་པ་ཡིན་པར་སྟོན་ལ། དེ་ལྟར་མ་ཡིན་ན་དོན་དམ་ཟབ་མོ་ཞེས་བརྗོད་ན་དོན་དམ་ལ་མི་ཟབ་པ་ཞིག་ཡོད་པར་བསྟན་པར་ཐལ་ལོ། །ཤེས་རབ་སྙིང་པོའི་ཚིག་འགྲེལ་རྨད་དུ་བྱུང་བ་ལས། མདོ་འདིའི་དངོས་བསྟན་ལ་གཞན་སྟོང་ཐུན་མོང་པ་ནི་གསལ་བར་སྟོན་ཞིང༌། ཐུན་མོང་མ་ཡིན་པ་བདེ་བར་གཤེགས་པའི་སྙིང་པོའི་དོན། རྟག་བརྟན་གཡུང་དྲུང་རྣམ་པ་ཐམས་ཅད་པ་དེ་སྦས་དོན་གྱི་ཚུལ་དུ་འཆད་པ་ཡིན་ནོ། །ཞེས་གཞུང་འདིས་གཞན་སྟོང་ཐུན་མོང་བ་གསལ་བར་སྟོན་ཚུལ་ནི། བདེ་བར་གཤེགས་པའི་སྙིང་པོའི་དོན། རྟག་བརྟན་གཡུང་དྲུང་རྣམ་པ་ཐམས་ཅད་པ་གསལ་བར་མ་བསྟན་པར་རང་གིས་མི་སྟོང་བའི་ཤེར་ཕྱིན་ཟབ་མོའམ་དེ་བཞིན་ཉིད་སོགས་གསལ་བར་སྟོན་པ་དེ་ཡིན་ཏེ། ཤེར་སྙིང་ཚིག་འགྲེལ་དེ་ལས། ཤེར་ཕྱིན་ཟབ་མོ་ནི་རང་གི་ངོ་བོས་མི་སྟོང་བར་གྲུབ་པའི་ཕྱིར། འདི་ནི་གཞན་སྟོང་དབུ་མ་གསལ་བར་སྟོན་པའི་ཚིག་དང་པོའོ། །ཞེས་དང༌། ཡོངས་གྲུབ་དོན་དམ་གྱི་ཡེ་ཤེས་དེ་འཁོར་འདས་ཀུན་ཁྱབ་ཡིན་ཡང་འཁོར་འདས་སོ་སོས་གོས་པ་མེད་ལ། དེ་མེད་པས་འཕོ་འགྱུར་མེད་པའི་ཕྱིར་རྟག་པར་བསྟན་ཏོ། །འདི་ནི་གཞན་སྟོང་དབུ་མ་གསལ་བར་བསྟན་པའི་ཚིག་གསུམ་པའོ། །ཞེས་གསུངས་པ་སོགས་ལས་ཀུན་རྫོབ་ལ་མ་སྦྱར་བར་དོན་དམ་ལ་སྦྱར་བའི་ཕྱིར། ཐུན་མོང་བའི་གཞན་སྟོང་ཞེས་པ་ཀུན་རྫོབ་ཀྱི་ཆོས་ལ་གོ་བའི་གནས་མེད་པ་གཞུང་དེར་བལྟས་པ་ཙམ་གྱིས་ཤེས་ཐུབ་ལ། གཞན་དོགས་པ་ཆེར་མེད་པས་དེ་ཙམ་ལས་མ་སྤྲོས་སོ། །ངག་དབང་ཚོགས་གཉིས་རྒྱ་མཚོ་དང་ངག་དབང་བློ་གྲོས་གྲགས་པས་བདེན་པ་གཉིས་ཀ་གཞན་སྟོང་ཡིན་པ་ལྟ་བུར་གསུངས་སོ། །