དྲི་བ་ཉེར་གསུམ་པ་རང་ལུགས་ལ་དོན་དམ་བདེན་པ་རྟེན་འབྲེལ་མ་ཡིན་པའི་ཤེས་བྱེད་ལུང་རིགས་གང་དག་ལ་རྟེན་པ་ཡིན་ཞེས་པའི་དྲིས་ལན།
དྲི་བ་ཉེར་གསུམ་པ་རང་ལུགས་ལ་དོན་དམ་བདེན་པ་རྟེན་འབྲེལ་མ་ཡིན་པའི་ཤེས་བྱེད་ལུང་རིགས་གང་དག་ལ་རྟེན་པ་ཡིན་ཞེས་པའི་དྲིས་ལན།
རང་ལུགས་ལ་དོན་དམ་བདེན་པ་རྟེན་འབྲེལ་མ་ཡིན་པའི་ཤེས་བྱེད་ལུང་རིགས་གང་དག་ལ་བརྟེན་པ་ཡིན་ཞེས་པའོ། །དེའི་ལན་ནི།དོན་དམ་བདེན་པ་རྟེན་འབྲེལ་མ་ཡིན་པར་སྒྲུབ་བྱེད་ཀྱི་ལུང་རིགས་གཉིས་ལས། དང་པོ་ལུང་ལ་མདོ་བསྟན་བཅོས་གཉིས་ལས། དང་པོ་མདོ་ནི། མདོ་སྡེ་དགོངས་པ་ངེས་འགྲེལ་ལས། ཡོན་ཏན་འབྱུང་གནས་ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཞེ་ན། གང་ཆོས་རྣམས་ཀྱི་རྟེན་ཅིང་འབྲེལ་བར་འབྱུང་བ་དེ་ཉིད་དེ་འདི་ལྟར། འདི་ཡོད་པས་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་བ་སྟེ། ཞེས་སོགས་དང༌། མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་བར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང༌། མདོ་ལས། བཅོམ་ལྡན་འདས་ཀྱིས་དེ་ལ་ཆོས་ཀྱི་བརྡ་ནི་འདི་ཡིན་ཏེ། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པའི་འདི་སྐྱེ་སྟེ། གང་འདི་མ་རིག་པའི་རྐྱེན་གྱིས་འདུ་བྱེད། ཅེས་སོགས་དང༌། ཁྱེའུ་བཞིའི་ཏིང་ངེ་འཛིན་ཅེས་བྱ་བའི་ཐེག་པ་ཆེན་པོའི་མདོ་ལས།གང་རྟེན་ཅིང་འབྲེལ་པ་ལས་བྱུང་བ་དེ་ནི་མི་རྟག་པའོ། །ཞེས་པ་ནས། ཡང་དག་པ་མ་ཡིན་པ་དེ་བརྫུན་པ་བསླུ་བའི་ཆོས་སོ། །གང་བརྫུན་པ་བསླུ་བའི་ཆོས་དེ་མི་བདེན་པའོ། །གང་མི་བདེན་པ་དེ་བཞིན་ཉིད་མ་ཡིན་ནོ། །གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །དེ་བཞིན་གཤེགས་པ་ནི་བདེན་པ་ཡང་དག་པ་དེ་བཞིན་ཉིད་མ་ནོར་བ་དེ་བཞིན་ཉིད་གཞན་མ་ཡིན་པ་དེ་བཞིན་ཉིད། ཅེས་སོགས་སོ། །དེ་དག་གི་སྐབས་སུ་དོན་དམ་བདེན་པ་རྟེན་འབྲེལ་མ་ཡིན་པར་བསྟན་ཚུལ་ནི། མདོ་དེ་དག་གིས་རྟེན་འབྲེལ་ནི། རྒྱུ་ལས་བྱུང་བ་དང་མི་རྟག་པ་དང་རྫུན་པ་སླུ་བའི་ཆོས་ཡིན་པར་བསྟན་ལ། དེ་བཞིན་ཉིད་དམ་དོན་དམ་བདེན་པ་ནི་རྟག་པ་འདུས་མ་བྱས་དང་བདེན་པ་ཡིན་པས་ན་རྟེན་འབྲེལ་མ་ཡིན་པར་གྲུབ་པ་ཡིན་ནོ། །གཉིས་པ་བསྟན་བཅོས་ཀྱི་ལུང་ནི།དབུ་མ་རྩ་བ་ཤེས་རབ་ལས། རང་བཞིན་རྒྱུ་དང་རྐྱེན་ལས་ནི། །འབྱུང་བར་རིགས་པ་མ་ཡིན་ནོ། །རྒྱུ་དང་རྐྱེན་ལས་བྱུང་བ་ཡི། །རང་བཞིན་བྱས་པ་ཅན་དུ་འགྱུར། །རང་བཞིན་བྱས་པ་ཅན་ཞེས་བྱར། །ཇི་ལྟ་བུར་ན་རུང་བར་འགྱུར། །རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་རང་བཞིན་དོན་དམ་བདེན་པ་དེ་གཞན་གང་ལ་མ་ལྟོས་པ་ཡིན་ལ། གལ་ཏེ་ལྟོས་ན་རྒྱུ་རྐྱེན་ལ་ལྟོས་དགོས་པ་དང༌།དེ་ལ་ལྟོས་ན་རང་བཞིན་བཅོས་མ་དང་བྱས་པ་ཡིན་པར་འགྱུར་བར་གསུངས་པས་རང་བཞིན་དོན་དམ་རྟེན་འབྲེལ་མ་ཡིན་པར་གྲུབ་བོ། །དེ་བཞིན་དུ་བུདྡྷ་པཱ་ལི་ཏ་ལས། ངོ་བོ་ཉིད་ནི་བཅོས་མིན་ཡང༌། །གཞན་ལ་ལྟོས་པ་མེད་པ་ཡི། །གང་བྱ་བས་སྒྲུབ་པར་མི་འགྱུར་བ་དང༌། རྒྱུ་དང་རྐྱེན་ལ་ཡང་ལྟོས་པར་མི་འགྱུར་བ་དང༌། ཞེས་སོགས་དང༌། ཚིག་གསལ་ལས། གང་གི་ཕྱིར་དེ་ལྟར་བཅོས་མ་དང༌། གཞན་ལ་ལྟོས་པ་ནི། རང་བཞིན་ཉིད་དུ་མི་འདོད་པ་དེ་ཉིད་ཀྱི་ཕྱིར་ཚ་བ་ཉིད་མེ་ཡི་རང་བཞིན་ཉིད་ཡིན་ནོ། །ཞེས་བྱ་བ་འདི་མི་རིགས་ཏེ་རྒྱུ་དང་རྐྱེན་ལ་རག་ལས་པའི་ཕྱིར་དང༌། སྔར་མ་བྱུང་བ་ལས་ཕྱིས་འབྱུང་བས་བྱས་པ་ཡིན་པའི་ཕྱིར་རོ། །ཞེས་དང༌། སྤྱོད་བསྡུས་སྒྲོན་མེ་ལས། དོན་དམ་པའི་བདེན་པ་དེ་ཡང་མ་བཅོས་པ་ནམ་མཁའ་དང་མཉམ་པ་དྲི་མ་མེད་པའི་ངོ་བོ་ཉིད་དོ། །ཞེས་དང༌། ཡང་རྩ་ཤེར་ལས། རྟེན་ཅིང་འབྲེལ་བར་འབྱུང་བ་གང༌། །དེ་ནི་སྟོང་བ་ཉིད་དུ་བཤད། །དེ་ནི་རྒྱུ་བྱས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་དང༌།དབུ་མ་རིན་ཆེན་ཕྲེང་བ་ལས། འདི་ཡོད་པས་ན་འདི་འབྱུང་དཔེར། །རིང་བོ་ཡོད་པས་ཐུང་ངུ་བཞིན། །འདི་སྐྱེས་པས་ན་འདི་སྐྱེ་དཔེར། །མར་མེ་འབྱུང་བས་འོད་བཞིན་ནོ། །ཞེས་སོགས་ཀྱིས་རྟེན་འབྲེལ་རྒྱུ་རྐྱེན་གྱིས་བྱུང་བའི་འདུས་བྱས་ལ་བྱས་ནས་དོན་དམ་རྟེན་འབྲེལ་ལས་འདས་པར་གསུངས། གཞན་ཡང་མཁས་མཆོག་ཉ་དབོན་པའི་བསྟན་པ་སྤྱི་འགྲེལ་གྱི་རྣམ་བཤད་ལས། རྩ་ཤེར། གང་གི་རྟེན་ཅིང་འབྲེལ་བར་འབྱུང༌། །ཞེས་འཆད་པའི་དབུ་མ་ཚིག་གསལ་གྱི་སྐབས་སུ་ཡང་རྟེན་ཅིང་འབྲེལ་བར་འབྱུང་བའི་དོན་འདུས་བྱས་ཉིད་ལ་བཤད་ཅིང༌། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་ཀླུ་སྒྲུབ་ཀྱིས་གསུངས་པ་ཡང་འདུས་བྱས་ཀྱི་ཆོས་ལ་དགོངས་ཏེ་བདེན་དངོས་དགག་པའི་སྐབས་ཡིན་གྱི་འདུས་མ་བྱས་ཀྱི་ཆོས་བདེན་པ་དགག་པའི་སྐབས་མ་ཡིན་ནོ། །རྟེན་ཅིང་འབྲེལ་འབྱུང་གི་ཆོས་ཡིན་ན་རྒྱུ་རྐྱེན་གྱིས་བསྐྱེད་དགོས་ཏེ། འདུས་བྱས་ཡིན་པས་སོ། །དེས་ན་ངོ་བོ་ཉིད་སྐུ་སོགས་རྟེན་འབྲེལ་མ་ཡིན་པར་སྤྱན་རས་གཟིགས་ཀྱིས་གསུངས་སོ། །ཞེས་གསུངས་སོ། །གཉིས་པ་རིགས་པ་ནི། རང་བཞིན་དོན་དམ་བདེན་པ་ཆོས་ཅན། རྟེན་འབྲེལ་མ་ཡིན་པར་ཐལ། འདུས་བྱས་མ་ཡིན་པའི་ཕྱིར། ཁྱབ་སྟེ། རྟེན་འབྲེལ་ཡིན་ན་འདུས་བྱས་དང་མི་རྟག་པ་དང་རྒྱུ་ལ་བརྟེན་དགོས་པ་སྔར་གྱི་ལུང་དེ་དག་གིས་གྲུབ་པ་ཡིན་ནོ། །རྩ་རྟགས་མ་གྲུབ་ན། འོ་ན་འདུས་བྱས་ཡིན་པར་ཐལ། རྟགས་མ་གྲུབ་པ་དེའི་ཕྱིར། འདོད་ན། མི་རྟག་པ་དང་རྫུན་པ་བསླུ་བའི་ཆོས་སུ་འགྱུར་ཏེ། དཔལ་ཕྲེང་གི་མདོ་ལས། བཅོམ་ལྡན་འདས་གང་འདུས་བྱས་ཀྱི་མཚན་ཉིད་དུ་གཏོགས་པ་དེ་ནི་མི་རྟག་པ་ལགས་སོ། །གང་མི་རྟག་པ་དེ་ནི་རྫུན་པ་སླུ་བའི་ཆོས་ཅན་ལགས་སོ། །བཅོམ་ལྡན་འདས་གང་རྫུན་པ་སླུ་བའི་ཆོས་ཅན་དེ་ནི་མི་བདེན་པ་དང་མི་རྟག་པ་ལགས་ཏེ་སྐྱབས་མ་ལགས་སོ། །ཞེས་དང༌། རྩ་ཤེར་ལས། བཅོམ་ལྡན་འདས་ཀྱི་ཆོས་གང་ཞིག ། སླུ་བ་དེ་ནི་རྫུན་ཞེས་གསུངས། །འདུས་བྱས་ཐམས་ཅད་སླུ་བའི་ཆོས། །དེས་ན་དེ་དག་རྫུན་པ་ཡིན། །ཞེས་གསུངས་སོ། །