དྲི་བ་ཉེར་བདུན་པ་དོན་དམ་བདེན་པ་དགག་བྱ་མ་ཡིན་པའི་སྒྲུབ་བྱེད་ཁོད་ཅེས་པའི་དྲིས་ལན།
དྲི་བ་ཉེར་བདུན་པ་དོན་དམ་བདེན་པ་དགག་བྱ་མ་ཡིན་པའི་སྒྲུབ་བྱེད་ཁོད་ཅེས་པའི་དྲིས་ལན།
དོན་དམ་བདེན་པ་དགག་བྱ་མ་ཡིན་པའི་སྒྲུབ་བྱེད་ཁོད་ཅེས་པའོ། །དེའི་ལན་ནི། དོན་དམ་བདེན་པ་དགག་བྱ་མ་ཡིན་པར་སྒྲུབ་བྱེད་ཀྱི་རིགས་པ་དང་ལུང་གཉིས་ལས། དང་པོ་རིགས་པ་ནི། དོན་དམ་བདེན་པ་ཆོས་ཅན།དོན་དམ་དཔྱོད་པའི་རིགས་པའི་དགག་བྱ་མ་ཡིན་ཏེ། མ་འཁྲུལ་བ་འཕགས་པའི་མཉམ་བཞག་སོ་སཽ་རང་རིག་པའི་ཡེ་ཤེས་ཀྱི་ངོར་གྲུབ་པའི་ཕྱིར། ཁྱབ་སྟེ། མ་འཁྲུལ་བ་འཕགས་པའི་མཉམ་བཞག་གི་ངོར་གྲུབ་ན་གནས་ལུགས་སམ་དོན་དམ་པ་ཡིན་པར་གྲུབ་དགོས་པའི་ཕྱིར། དོན་དམ་དུ་གྲུབ་ན་དོན་དམ་དུ་དགག་མི་ནུས་པ་ནི། དཔེར་ན་ཀུན་རྫོབ་ཏུ་གྲུབ་ན་ཀུན་རྫོབ་ཏུ་དགག་མི་ནུས་པ་བཞིན་ནོ། །ཡང་དེ་ཆོས་ཅན། དགག་བྱ་མ་ཡིན་ཏེ། སྒྲ་རྟོག་གིས་དགག་སྒྲུབ་ཀྱི་ཡུལ་ལས་འདས་པའི་ཕྱིར་ཏེ། ཐེག་མཆོག་དབུ་མ་ལས།འདི་ནི་སྒྲ་རྟོག་དགག་སྒྲུབ་ཡུལ་ལས་འདས། །ཞེས་གསུངས་པའི་ཕྱིར། ཡང་དེ་ཆོས་ཅན། དགག་བྱ་མ་ཡིན་ཏེ། རིགས་པའི་དཔྱད་བཟོད་དུ་གྲུབ་པའི་ཕྱིར་ཏེ། ཀུན་མཁྱེན་དོལ་བོ་བ་ཤེས་རབ་རྒྱལ་མཚན་གྱིས་མཛད་པའི་གཤག་འབྱེད་བསྡུས་པ་ལས། ཆོས་ཉིད་དོན་དམ་གཞན་སྟོང་སྟེ། ནམ་ཡང་མེད་པ་མ་ཡིན་ཞིང་དཔྱད་བཟོད་པའོ། །ཞེས་དང༌། རྗེ་ཏཱ་ར་ནཱ་ཐས་མཛད་པའི་ཚུལ་གཉིས་རྣམ་འབྱེད་ལས། དེས་ན་དཔྱད་པའི་ཡུལ་མ་ཡིན་པའི་ཕྱིར། རིགས་པའི་དཔྱད་བཟོད་བདེན་གྲུབ་པོ། །ཞེས་དང༌། གཞན་སྟོང་སྙིང་པོ་ལས། དབྱིངས་དང་གཉིས་སུ་མེད་པའི་ཡེ་ཤེས་རང་རིག་རང་གསལ་ནི་དོན་དམ་བདེན་པ་ཆོས་ཉིད་འདུས་མ་བྱས་ཞེས་བྱ་སྟེ། འདི་ནི་རིགས་པའི་དཔྱད་བཟོད་བདེན་གྲུབ་ཁོ་ན་ཡིན་ནོ། །ཞེས་གསུངས་པའི་ཕྱིར་རོ། །དེས་ན་གཞན་གྱིས་དོན་དམ་ཡིན་ཡང་དོན་དམ་པར་མ་གྲུབ་ཅེས་འདོད་པ་དང༌། བདེན་པ་ཡིན་ཀྱང་བདེན་པར་མ་གྲུབ་པར་འདོད་པ་ནི་ནང་འགལ་བ་ཡིན་ཏེ། དཔེར་ན་ཡོད་པ་ཡིན་ཡང་ཡོད་པར་མ་གྲུབ་ཅེས་པ་དང༌། མི་ཡིན་ཡང་མི་ཡིན་པར་མ་གྲུབ་ཅེས་ཟེར་པ་དང་ཞེན་འདོད་ཙམ་ལས་ཁྱད་མེད་དོ། །གཉིས་པ་ལུང་ནི། སོར་ཕྲེང་གི་མདོ་ལས། ཐར་བ་ཐམས་ཅད་ཀྱིས་སྟོང་བ་མ་ཡིན།ཞེས་པ་དང༌། སངས་རྒྱས་བཅོམ་ལྡན་འདས་ནི་སྟོང་བ་མ་ཡིན། ཞེས་པ་དང༌། སྟོང་བ་མ་ཡིན་པའི་ཆོས་རྣམས་ཀྱང་གཞན་ཏེ། ཞེས་དང༌། ཤིན་ཏུ་སྟོང་བ་ཉིད་ལ་བསྒོམས་ཤིང་སྟོང་བ་ཟབ་ཏུ་བསམ་པས་ཆོས་ཐམས་ཅད་ཞིག་པ་མི་བཟོད་པར་མཐོང་ངོ། །ཐར་བ་སྟོང་བ་མ་ཡིན་པ་ཡང་སྟོང་བར་མཐོང་ཞིང་རྟོག་གོ ། ཞེས་དང༌། མྱང་འདས་ཆེན་པོའི་མདོ་ལས། རྣམ་པར་གྲོལ་བ་ནི་མི་སྟོང་བའི་སྟོང་བའོ། །སྟོང་བའི་སྟོང་བ་ཞེས་བྱ་བ་ནི་ཅི་ཡང་མེད་པའོ། །ཞེས་སོགས་དང༌། དེ་ལས། དེ་ལྟར་རྟག་པ་དང་བདེ་བ་དང་བདག་དང་ཡོངས་སུ་དག་པ་དང་ཆོས་རྣམ་པ་བཞི་བོ་འདི་དག་ནི་སྟོང་བ་ཉིད་ཅེས་མི་བྱ་སྟེ། ཞེས་དང༌། བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས། བདེན་པ་ནི་གཅིག་པུ་གཉིས་མ་ཡིན་པ་སྟེ། འདི་ལྟ་སྟེ། འགོག་པའི་བདེན་པའོ། །ཞེས་དང༌། དཔལ་ཕྲེང་གི་མདོ་ལས། སྡུག་བསྔལ་འགོག་པའི་བདེན་པ་འདི་ནི་ཡང་དག་པར་ན་བདེན་པ་དང་རྟག་པ་དང་སྐྱབས་ལགས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་རང་འགྲེལ་ག་ལས་འཇིགས་མེད་ལས།དོན་དམ་པའི་བདེན་པ་ནི། འཕགས་པ་རྣམས་ཀྱིས་ཕྱིན་ཅི་མ་ལོག་པར་ཐུགས་སུ་ཆུད་པས་ཆོས་ཐམས་ཅད་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་པའི་བདེན་པའོ། །ཞེས་དང༌། དགེ་སློང་དག་འདི་ལྟ་སྟེ་མི་བསླུ་བའི་ཆོས་མྱ་ངན་ལས་འདས་པ་དེ་ནི་བདེན་པའི་མཆོག་གོ ། ཞེས་དང༌། རིགས་པ་དྲུག་ཅུ་པ་ལས། མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱི་གང་གསུངས་པ། །དེ་ཚེ་ལྷག་མ་ལོག་མིན་ཞེས། །མཁས་པ་སུ་ཞིག་རྟོགས་པར་བྱེད། །ཅེས་ལུང་དེ་དག་གིས་དོན་དམ་བདེན་པ་བདེན་པ་ཡིན་པར་ཡང་ཡང་གསུངས་པས་བདེན་པ་ཡིན་ན་བདེན་པ་དཔྱོད་བྱེད་ཀྱི་རིགས་པས་དགག་མི་ནུས་སོ། །