དྲི་བ་སོ་གཉིས་པ་རིགས་པའི་རྒྱལ་པོ་གང་ཞེས་པའི་དྲིས་ལན།།

དྲི་བ་སོ་གཉིས་པ་རིགས་པའི་རྒྱལ་པོ་གང་ཞེས་པའི་དྲིས་ལན།

རིགས་པའི་རྒྱལ་པོ་གང་ཞེས་པ་དེའོ། །དེའི་ལན་ནི། རང་ལུགས་ལ་རིགས་པའི་རྒྱལ་པོ་ཞེས་པའི་ཐ་སྙད་གསུངས་པ་སྔར་བདག་གིས་མ་མཐོང་ཡང་ངོ་བོ་ལ་དཔྱོད་པ་གཅིག་དུ་བྲལ་གྱི་རིགས་པ་དང་ཁྱད་པར་ལ་དཔྱོད་པ་མཐའ་བཞི་སྐྱེ་འགོག་གི་རིགས་པ་གཉིས་རིགས་པའི་གཙོ་བོ་དང་རྩ་བ་ལྟ་བུ་ཡིན་པར་གསུངས་ཏེ། ཐེག་མཆོག་དབུ་མ་ལས། བདག་མེད་གཏན་ཚིགས་གཙོ་བོ་གཉིས་སུ་མཐོང༌།ཞེས་དང༌། དེའི་ཟིན་བྲིས་ལས། ངོ་བོ་འགོག་པ་གཅིག་དུ་བྲལ་དང་ཁྱད་པར་འགོག་པ་མཐའ་བཞི་སྐྱེ་འགོག་གཉིས་སུ་མཐོང་ཞེས་གཏན་ཚིགས་ཀྱི་གཙོ་བོ་གཉིས་སུ་བཞེད་པ་ཡིན། ཞེས་གསུངས་སོ། །དེས་ན་ཚིག་ལ་མི་རྟོན་དོན་ལ་རྟོན་པ་ཡིན་པས་རིགས་པའི་རྒྱལ་བོ་ཡིན་བྱས་ན་འགལ་བ་མེད་པར་སྣང༌། རང་ལུགས་ལ་ནི་རྟེན་འབྲེལ་གྱི་རིགས་པ་གཙོ་བོ་མ་ཡིན་ཏེ། ཐེག་མཆོག་ཟིན་བྲིས་ལས། མུ་བཞི་སྐྱེ་འགོག་དང༌། རྟེན་འབྲེལ་རིགས་པ་གཉིས་ནི་འོག་ཏུ་འཆད་པར་འགྱུར་བ་ལྟར་རྣམ་གྲངས་ཙམ་ཡིནུ་གྱི། བདག་མེད་པར་སྒྲུབ་པའི་གཏན་ཚིགས་གཙོ་བོ་མིན། ཞེས་གསུངས་པའོ། །རང་ལུགས་ལ་རྟེན་འབྲེལ་དེ་རིགས་པའི་གཙོ་བོ་མིན་པའི་རྒྱུ་མཚན་ཐེག་མཆོག་དབུ་མའི་ཟིན་བྲིས་ལས་ཤེས་པར་བྱའོ། །གཅིག་དུ་བྲལ་གྱི་རིགས་པའི་རྩ་སྦྱོར་འགོད་ཚུལ་དང་ཕྱོགས་ཆོས་དང་ཁྱབ་པ་སྒྲུབ་ཚུལ་རྣམས་མདོར་བསྡུས་ཙམ་བརྗོད་ན་འདི་ལྟར། དང་པོ་རྩ་སྦྱོར་ནི། ཕྱི་ནང་གི་དངོས་པོ་འདི་རྣམས་ཆོས་ཅན། རང་གི་ངོ་བོ་བདེན་པར་གྲུབ་པ་མ་ཡིན་ཏེ། སྣང་ གྲགས་ཀྱི་ཆོས་གང་ཞིག་བདེན་པའི་གཅིག་དང་དུ་མ་གང་དུ་ཡང་མ་གྲུབ་པའི་ཕྱིར། ཞེས་པ་དེ་ཡིན་ཏེ། ཐེག་མཆོག་དབུ་མ་ལས། དངོས་རྣམས་ངོ་བོས་མ་གྲུབ་གང་ཕྱིར་འདི། །ཆོས་ཡིན་གཅིག་དང་དུ་མར་མ་གྲུབ་ཕྱིར། །དེ་ལྟར་གཏན་ཚིགས་རྩ་སྦྱོར་འགོད་བྱ་སྟེ། །ཞེས་དང༌། དེའི་ཟིན་བྲིས་ལས། ཕྱི་ནང་གི་དངོས་པོ་འདི་རྣམས་ཆོས་ཅན། རང་གི་ངོ་བོས་གྲུབ་པ་མ་ཡིན་ཏེ། རྒྱུ་མཚན་གང་གི་ཕྱིར་སྙམ་ན། དངོས་པོ་འདི་ཀུན་རྣམ་པར་ཤེས་པའི་ཡུལ་སྣང་གྲགས་ཀྱི་ཆོས་ཡིན་པ་གང་ཞིག གཅིག་དང་དུ་མ་གང་རུང་དུ་མ་གྲུབ་པའི་ཕྱིར་ཞེས་དེ་ལྟར་གཏན་ཚིགས་སུ་རྩ་སྦྱོར་འགོད་པར་བྱེད་པ། ཞེས་གསུངས་པའི་ཕྱིར་རོ། །གཉིས་པ་ཕྱོགས་ཆོས་སྒྲུབ་པ་ནི། ཕྱི་ནང་གི་དངོས་པོ་འདི་རྣམས་ཆོས་ཅན། སྣང་གྲགས་ཀྱི་ཆོས་ཡིན་པ་གང་ཞིག བདེན་པའི་གཅིག་དང་དུ་མ་གང་རུང་དུ་མ་གྲུབ་སྟེ། དང་པོ་གང་ཞིག་ཕྱི་མ་གྲུབ་པའི་ཕྱིར། དང་པོ་གྲུབ་སྟེ། རྣམ་ཤེས་ལ་སྣང་ཞིང་སྒྲ་རྟོག་ལ་གྲགས་པའི་ཡུལ་ཡིན་པའི་ཕྱིར། རྩ་རྟགས་གཉིས་པ་གྲུབ་སྟེ། བདེན་པའྀ་གཅིག་ཏུ་མ་གྲུབ་པ་གང་ཞིག བདེན་པའི་དུ་མར་མ་གྲུབ་པའི་ཕྱིར། དང་པོ་གྲུབ་སྟེ། ཆ་བཅས་ཡིན་པའི་ཕྱིར་ཏེ། སྣང་གྲགས་ཀྱི་ཆོས་ལ་ཐོག་མཐའ་དབུས་སོགས་མདོར་ན་རང་ཉིད་ཡིན་པའི་ཆ་དང་རང་གི་དོན་སྤྱི་ཡོད་པ་ཅན་ཡིན་པའི་ཆ་དང་རང་གི་ངོ་བོའི་ཡོན་ཏན་གྱི་ཆ་གསུམ་རེ་ངེས་ལྡན་ཡིན་པའི་ཕྱིར། དེས་ན་ཆ་བཅས་ལ་གཅིག་ཏུ་བདེན་པར་གྲུབ་པ་འགལ་བ་ཡིན་ནོ། །གོང་གི་རྟགས་གཉིས་པ་དུ་མར་བདེན་པར་མ་གྲུབ་སྟེ། གཅིག་བདེན་པར་མ་གྲུབ་པའི་ཕྱིར། ཁྱབ་སྟེ། དུ་མ་ནི་གཅིག་ཚོགས་པའི་ངོ་བོ་ཡིན་པའི་ཕྱིར། རྟགས་དབུ་མ་རྒྱན་སོགས་ལུང་རིགས་དུ་མས་གྲུབ་པོ། །གསུམ་པ་ཁྱབ་པ་སྒྲུབ་པ་ནི། སྣང་གྲགས་ཀྱི་ཆོས་ལ་བདེན་པའི་གཅིག་དང་དུ་མ་གང་རུང་དུ་མ་གྲུབ་ན་དེ་ལ་རང་བཞིན་གྱིས་གྲུབ་པ་མེད་པས་ཁྱབ་སྟེ། སྣང་གྲགས་ཀྱི་ཆོས་ཀྱི་སྟེང་དུ་ཕན་ཚུན་སྤངས་འགལ་དུ་གནས་པའི་ཕྱིར། དེས་ན་གཅིག་ཡིན་ན་དུ་མ་མ་ཡིན་དགོས་དུ་མ་ཡིན་ན་གཅིག་མ་ཡིན་དགོས་པའི་ཕྱིར་རོ། །ཐེག་མཆོག་དབུ་མའི་ཟིན་བྲིས་ལས། དེའི་ངོར་ཁྱབ་པ་སྒྲུབ་པ་ནི། གཅིག་དང་དུ་མ་གང་རུང་དུ་མ་གྲུབ་ན་རང་བཞིན་གྱིས་མ་གྲུབ་པས་ཁྱབ་སྟེ། ཕན་ཚུན་དངོས་འགལ་གྱི་སྤྱོད་ཡུལ་དུ་གྱུར་པ་ལས་ཕུང་པོ་གསུམ་པ་ནམ་ཡང་ཡོད་པ་མ་ཡིན་ཏེ། གཅིག་ཡིན་ན་དུ་མ་མ་ཡིན་དགོས་ལ། དུ་མ་ཡིན་ན་གཅིག་མ་ཡིན་དགོས་པས་གཅིག་ཀྱང་ཡིན་དུ་མའང་ཡིན་པའི་མུ་གསུམ་པ་མི་སྲིད་པའི་ཕྱིར་རོ། །ཞེས་གསུངས་སོ། །རྒྱས་པར་ཐེག་མཆོག་དབུ་མའི་ཟིན་བྲིས་སོགས་ལས་ཤེས་པར་བྱའོ། །མཁས་པའི་དབང་པོ་རྗེ་ཙོང་ཁ་བ་ཡབ་སྲས་ཀྱི་རང་ལུགས་ལ་རིགས་པའི་རྒྱལ་པོ་ནི་རྟེན་འབྲེལ་གྱི་རིགས་པ་ཡིན་ཏེ། མཐའ་གཉིས་གཅིག་ཆར་སེལ་བ་དང་བདེན་མེད་སྒྲུབ་བྱེད་ཀྱི་རིགས་པ་གཅིག་དུ་བྲལ་གྱི་རིགས་པ་དང༌། མཐའ་བཞི་སྐྱེ་འགོག་གི་རིགས་པ་སོགས་རྟེན་འབྲེལ་གྱི་རིགས་པ་འདི་ལ་བརྟེན་དགོས་པའི་ཕྱིར། དེ་ཡང་འདི་ལྟར་གསུངས་ཏེ། བུམ་པ་བདེན་གྲུབ་ཀྱི་གཅིག་ཡིན་ན་བུམ་པ་དེ་ཆ་གཅིག་ལས་ཆ་གཞན་གང་ཡང་མེད་པ་ཞིག་ཡིན་དགོས་པར་བློ་ངོར་འཆར་བ་ལྟར་ཡིན་ཀྱང་བུམ་པ་ལ་ཡུལ་ཡིན་པའི་ཆ་དང་རང་ལ་སྤྱི་ཡིན་པའི་ཆ་སོགས་དུ་མ་ཡོད་པ་ལ་ལྟོས་ནས་གྲུབ་པ་ཡིན་པས་བདེན་གྲུབ་ཀྱི་གཅིག་མ་ཡིན་པ་དང༌། བུམ་པ་བདེན་གྲུབ་ཀྱི་དུ་མ་ཡོད་ན་གཞི་གཅིག་ལ་བུམ་པ་དུ་མར་ཡིན་དགོས་པར་སྣང་བ་ལྟར་ཡིན་ཀྱང་བུམ་པ་ནི་བློ་ངོར་གཅིག་ལས་དུ་མར་མི་སྣང་བ་ལྟར་དུ་མ་ལ་ལྟོས་ནས་གཅིག་ཏུ་གྲུབ་པའི་རྒྱུ་མཚན་གྱིས་བདེན་གྲུབ་ཀྱི་དུ་མར་མ་ཡིན་པར་རྟོགས་དགོས་པས་ན་གཅིག་དུ་བྲལ་གྱི་རྟགས་དང་དཔེ་སྒྲུབ་བྱ་ངེས་པ་ཡང་རྟེན་འབྲེལ་ལ་ལྟོས་དགོས་པ་དང༌། གང་ཟག་དེ་ཕུང་པོ་ལ་བརྟེན་པ་བདེན་པར་མེད་པ་ཡང་ཕུང་པོ་བདེན་གྲུབ་ལ་གང་ཟག་བདེན་གྲུབ་ཞིག་བརྟེན་ནས་གནས་ན་བློ་ངོར་འཆར་བ་ལྟར་ངོ་བོ་ཐ་དད་ཡིན་དགོས་ཀྱང་དེ་ལྟར་མེད་པས་ན། གང་ཟག་ནི་ཕུང་པོ་ཚོགས་ཙམ་ཡིན་ལ་དེ་ནི་ཕུང་པོ་ལ་ལྟོས་ནས་ཡོད་ཀྱི་མ་ལྟོས་པར་མེད་པས་བདེན་པར་མེད་དོ་སྙམ་དུ་ངེས་དགོས་པས་རིགས་འགྲེ་བ་ལྟར་རྣམ་ལྔ་རྣམ་བདུན་གྱི་རིགས་པ་རྣམས་ཀྱང་མཐར་རྟེན་འབྲེལ་ལ་ཐུག་པ་དང༌། རང་ལས་སྐྱེ་བ་མེད་པ་ཡང་འབྲས་བུ་རྒྱུའི་བདག་ཉིད་དུ་ཡོད་ན་རྒྱུས་བསྐྱེད་མི་དགོས་ཀྱང་རྒྱུ་ལ་མ་ལྟོས་པར་འབྲས་བུ་སྐྱེ་བ་མེད་ལ། རྒྱུ་ལ་ལྟོས་ནས་སྐྱེ་དགོས་པས་རང་ལས་སྐྱེ་བ་མེད་པ་དང༌། དོན་དམ་པར་གཞན་སྐྱེ་མེད་པའང་བདེན་གྲུབ་ཀྱི་རྒྱུ་ལས་འབྲས་བུ་བདེན་གྲུབ་སྐྱེས་ན་འབྲས་བུ་རྒྱུས་མ་བསྐྱེད་པར་ཡོད་དགོས་པར་སྣང་བ་ལྟར་ཡིན་ཀྱང་རྒྱུ་ལ་ལྟོས་ནས་སྐྱེ་དགོས་པས་འབྲས་བུ་བདེན་མེད་དང༌། རྒྱུ་བདེན་གྲུབ་ཡིན་ན་རང་གི་འབྲས་བུ་ལ་མ་ལྟོས་པར་རང་གི་ངོ་བོའི་སྒོ་ནས་རྒྱུ་ཡིན་དགོས་ཀྱང་རང་གི་འབྲས་བུ་ལ་མ་ལྟོས་པར་རྒྱུ་མ་ཡིན་པར་ལྟོས་ནས་རྒྱུ་ཡིན་པས་ན་རྒྱུ་བདེན་མེད་དང༌། གཉིས་ཀ་ལས་མ་སྐྱེས་བ་ཡང་དེ་གཉིས་ཀ་ལྟར་དང༌། རྒྱུ་མེད་ལས་མི་སྐྱེ་བ་ཡང་དངོས་པོ་ཐམས་ཅད་རྒྱུ་ལ་ལྟོས་ནས་སྐྱེས་པ་ཁོ་ན་ཡིན་པས་རྒྱུ་མེད་ལས་སྐྱེ་བ་མེད་པར་རྟོགས་དགོས་པས་ན་རྡོ་རྗེ་གཟེགས་མའི་གཏན་ཚིགས་དང་དཔེ་ཁྱབ་པ་ངེས་པ་ཡང་རྟེན་འབྲེལ་ལ་ཐུག་པ་དང༌། མྱུ་གུ་བདེན་གྲུབ་ཅན་ཡོད་ན་རྒྱུ་དུས་ནས་ཡོད་དགོས་ཀྱང་རྒྱུ་དུས་ནས་མེད་པར་རྒྱུས་བསྐྱེད་པ་ལ་ལྟོས་ནས་གྲུབ་པ་ཡིན་པས་རྒྱུ་དུས་སུ་ཡོད་པའི་མྱུ་གུ་མི་སྐྱེ་བ་དང༌། རྒྱུ་དུས་སུུ་མེད་པའི་མྱུ་གུ་བདེན་གྲུབ་སྐྱེ་ན་མེད་ཆ་བདེན་གྲུབ་དེ་ནམ་ཡང་འདོར་མི་རུང་བས་མྱུ་གུ་སྐྱེ་བ་མི་འཐད་ཀྱང་རྒྱུ་དུས་ན་མེད་པའི་མྱུ་གུ་དེ་རང་གི་རྒྱུ་ལ་ལྟོས་ནས་དེ་སྐྱེ་བས་ན། རྒྱུ་དུས་སུ་མེད་པའི་མྱུ་གུ་བདེན་གྲུབ་མི་སྐྱེ་བར་རྟོགས་པ་ཡིན་པས་ཡོད་མེད་སྐྱེ་འགོག་གི་གཏན་ཚིགས་ཀྱང་རྟེན་འབྲེལ་ལ་ཐུག་པ་དང༌། མྱུ་གུ་བདེན་པར་སྐྱེས་ན་རྒྱུ་དུ་མས་འབྲས་བུ་གཅིག་ཁོ་ན་བསྐྱེད་པ་སོགས་བཞི་པོ་གང་རུང་ཡོད་དགོས་ཀྱང་རྒྱུ་དུ་མས་འབྲས་བུ་གཅིག་བསྐྱེད་ཅེས་པ་ནི་རྒྱུ་རེ་རེས་ཀྱང་འབྲས་བུ་དུ་མ་མི་བསྐྱེད་པ་མེད་ཀྱང་དཔེར་ན་རྐྱེན་གསུམ་གྱིས་མིག་ཤེས་ཀྱི་ལྡོག་པ་གཅིག་བསྐྱེད་པ་ལ་ལྟོས་ནས་བཞག་པ་ཙམ་ཡིན་གྱི་སྤྱིར་རྐྱེན་གསུམ་གྱིས་འབྲས་བུ་དུ་མ་བསྐྱེད་པས་རྟེན་འབྲེལ་གྱི་རྟགས་ཀྱིས་མྱུ་གུ་བདེན་པར་རྒྱུ་དུ་མས་འབྲས་བུ་གཅིག་ཁོ་ན་བསྐྱེད་པ་མེད་པར་རྟོགས་དགོས་པ་སོགས་ལྷག་མ་རྣམས་ཀྱང་མེད་པ་ལྟོས་གྲུབ་ཀྱིས་རྟོགས་དགོས་པས་མུ་བཞི་སྐྱེ་འགོག་གི་རིགས་པ་ཡང་རྟེན་འབྲེལ་ལ་ཐུག་པ་དང༌།ས་སོགས་དོན་དམ་པར་འབྱུང་བའི་ངོ་བོར་གྲུབ་ན་རྒྱུ་ལ་མ་ལྟོས་པར་གྲུབ་དགོས་ཀྱང་ས་སོགས་ནི་རྒྱུ་ལ་ལྟོས་ནས་འབྱུང་བའི་ངོ་བོར་གྲུབ་པ་ཡིན་པས་དོན་དམ་པར་འབྱུང་བའི་ངོ་བོར་མེད་པར་རྟོགས་པ་དང༌། བུམ་པའི་ལྡོག་པ་དང་བུམ་པ་ཤེས་བྱ་ཡིན་པ་སོགས་བདེན་པར་གྲུབ་ན་བུམ་པ་ལ་མ་ལྟོས་པར་གྲུབ་དགོས་ཀྱང་དེ་དག་བུམ་པ་ལ་ལྟོས་ནས་གྲུབ་པ་ཡིན་པས་བདེན་མེད་ཡིན་པར་རྟོགས་པ་ཡིན་པས་འགལ་ཟླ་དམིགས་པའི་རྟགས་ཀྱིས་ཁྱབ་འབྲེལ་ངེས་པ་ཡང་རྟེན་འབྲེལ་ལ་ཐུག་པས་ན་རྟེན་འབྲེལ་གྱི་རིགས་པ་ནི་རིགས་པའི་རྒྱལ་བོ་ཡིན་ནོ། །བློན་པོ་ཐམས་ཅད་ཀྱི་བྱ་བཞག་ཐམས་ཅད་ཀྱི་ཕུགས་རྒྱལ་བོ་ལ་གཏུགས་དགོས་པ་ལྟ་བུ་ཡིན་པས་འདི་ལ་རིགས་པའི་རྒྱལ་བོ་ཞེས་བརྗོད་པའི་ཕྱིར་རོ། །ཡང་རྟེན་འབྲེལ་ཞེས་པ་འདིས་ནི་ལྟོས་ནས་གྲུབ་པ་ལ་བདེན་མེད་ཀྱིས་ཁྱབ་པ་ངེས་ནས་ལྟོས་མེད་དུ་གྲུབ་པའམ་བདེན་པར་གྲུབ་པའི་རྟག་མཐའ་དང་ལྟོས་གྲུབ་ཙམ་རྟོགས་པས་ལྟོས་གྲུབ་ཙམ་དུ་མེད་པའི་ཆད་མཐའ་གཉིས་ཀ་རྟེན་འབྲེལ་ཞེས་པའི་ཚིག་གི་ནུས་པས་གཅིག་ཆར་སེལ་བ་ཡིན་ནོ། །དེ་ལྟར་ན་རྟེན་འབྲེལ་གྱི་རིགས་པ་འདི་ནི་མཐའ་གཉིས་གཅིག་ཆར་སེལ་བའི་རིགས་པའི་རྒྱལ་བོ་ཡིན་ཏེ། དབུ་མ་འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་གསུངས་པའི་ཕྱིར་རོ། །