དྲི་བ་སོ་གསུམ་པ་ཕྱི་རོལ་བ་དང་མཚུངས་པའི་རྩོད་སྤོང་ཇི་ལྟར་བྱེད་ཅེས་པའི་དྲིས་ལན།
དྲི་བ་སོ་གསུམ་པ་ཕྱི་རོལ་བ་དང་མཚུངས་པའི་རྩོད་སྤོང་ཇི་ལྟར་བྱེད་ཅེས་པའི་དྲིས་ལན།
ཕྱི་རོལ་བ་དང་མཚུངས་པའི་རྩོད་སྤོང་ཇི་ལྟར་བྱེད་ཅེས་པ་དེའོ། །དེའི་ལན་ནི། ཕྱི་རོལ་བ་དང་འདྲ་བའི་དོགས་སེལ་ཀུན་མཁྱེན་རྟོན་པ་བཞི་ལྡན་དོལ་བོ་པ་དང༌། འཇམ་མགོན་ཏཱ་ར་ནཱ་ཐ་སོགས་ཀྱིས་ལུང་རིགས་རྣམ་དག་དུ་མས་རྒྱས་པར་བཀག་ཟིན་པས་བདག་གིས་བརྗོད་དགོས་པ་མེད་ཀྱང༌། འདིར་དྲིས་ལན་དུ་མདོར་བསྡུས་ཙམ་ཞིག་བརྗོད་ན། ཕྱོགས་འཛིན་གྱི་གདོན་གྱིས་ཡིད་དཀྲུགས་པའི་ཁ་ཅིག་ན་རེ། ངེས་གསང་གཞན་སྟོང་དབུ་མ་ཆེན་པོའི་ལུགས་དེ་ཕྱི་རོལ་གྲངས་ཅན་པ་དང་འདྲ་བས་གྲུབ་མཐའ་ཡང་དག་པ་མ་ཡིན་ནོ་ཞེས་ཟེར་ན། དེ་ལ་ཐོག་མར་འདི་འདྲི་བར་བྱ་སྟེ། དེ་གཉིས་ཕྱོགས་ཙམ་འདྲ་བས་དེ་གཉིས་འདྲ་ཞེས་པ་ཡིན་ནམ། གྲངས་ཅན་པའི་ལྟ་གྲུབ་དངོས་དང་ཁྱད་མེད་སྙམ་པ་ཡིན། དང་པོ་ལྟར་ན་ཁྱབ་པ་མ་ངེས་ཏེ། ཕྱོགས་རེ་འདྲ་བའི་ཕྱི་ནང་གི་གྲུབ་མཐའ་དུ་མ་ཡོད་པའི་ཕྱིར། དེ་ཡང་དཔེར་ན་ཐལ་འགྱུར་བ་དང་ཉན་ཐོས་སྡེ་གཉིས་ཕྱི་དོན་འདོད་པ་དང༌། བག་ཆགས་ཐམས་ཅད་པའི་ཀུན་གཞི་མི་འདོད་པ་སོགས་ཕྱོགས་རེ་འདྲ་བ་དུ་མ་ཡོད་ཀྱང་དེ་གཉིས་ཀྱི་ལྟ་གྲུབ་འདྲ་མི་དགོས་པ་བཞིན་ནོ། །གཉིས་པ་ལྟར་ན་འདི་ལ་བརྗོད་པར་བྱ་སྟེ། དོན་དམ་ཆོས་དབྱིངས་བདེ་གཤེགས་སྙིང་པོ་དེ་འཁོར་འདས་ཀུན་ལ་ཁྱབ་པའི་རྟག་བརྟན་ཡིན་ཡང་གྲངས་ཅན་པའི་སྒྲོ་བཏགས་པའི་བདག་དང་གཙོ་བོ་དང་འདྲ་བ་མ་ཡིན་ཏེ། སྤྲོས་བྲལ་ཆོས་དབྱིངས་དེ་ནི་མཉམ་བཞག་སོ་སོ་རང་རིག་པའི་ཡེ་ཤེས་ཀྱིས་སྤྲོས་པའི་མཚན་མ་ཀུན་དང་བྲལ་བའི་རྣམ་པ་ཀུན་དང་ལྡན་པ་ཡིན་པར་གཟིགས་པ་གང་ཞིག་གྲངས་ཅན་གྱི་ཞེ་འདོད་ཀྱི་བདག་གཙོའི་ཡིན་ཚུལ་ནི་སྒྲ་རྟོག་སྤྲོས་ཞེན་གྱིས་ཚུགས་ཐུབ་བདེན་པའི་རང་བཞིན་ཤེས་རིག་རྟག་རྫས་ཀྱི་བདག་དང༌། བེམ་སྟོང་རྟག་རྫས་ཀྱི་རང་བཞིན་གཙོ་བོ་དེ་ཞེན་རྟོག་གིས་ནན་གྱིས་བཟུང་ནས་བཏགས་དོན་བཙལ་ནས་ཞེན་འཛིན་དམ་པོས་ཆེད་དུ་འཆིང་བཞིན་འཇོག་པ་ཡིན་པས་འཕགས་པའི་མཉམ་བཞག་ཡེ་ཤེས་ཀྱིས་གནས་ལུགས་ཇི་ལྟ་བ་འཇོག་ཚུལ་དང༌། སྒྲ་རྟོག་ཞེན་འཛིན་གྱིས་ཕྱིན་ཅི་ལོག་ཏུ་སྒྲོ་བཏགས་པའི་ཚུལ་གཉིས་ཁྱད་པར་ཆེས་ཆེ་བ་ཡོད་དེ། མདོ་སྡེ་ལང་ཀར་གཤེགས་པ་ལས། བློ་གྲོས་ཆེན་པོ་འདི་ནི་མུ་སྟེགས་བྱེད་པ་རྟག་པ་དང་བསམ་གྱིས་མི་ཁྱབ་པར་སྨྲ་བ་དང་མཐུན་པ་མ་ཡིན་ནོ། །བློ་གྲོས་ཆེན་པོ་རྟག་པ་དང་བསམ་གྱིས་མི་ཁྱབ་པ་འདི་ནི་དེ་བཞིན་གཤེགས་པ་རྣམས་ཀྱི་འཕགས་པ་སོ་སོ་རང་གི་ཡེ་ཤེས་ཀྱིས་ཐུགས་སུ་ཆུད་པར་བྱ་བའི་དེ་བཞིན་ཉིད་དོ། །ཞེས་གསུངས་པའི་ཕྱིར་རོ། །ཡང་ཁ་ཅིག་དེ་བཞིན་གཤེགས་པའི་སྙིང་པོ་ནི་མུ་སྟེགས་པའི་བདག་དང་འདྲ་བ་ཡིན་པར་ལང་གཤེགས་ལས་བསྟན་ཟེར་ན། དེ་མི་འཐད་དེ། ལང་གཤེགས་ལས་དེ་བཞིན་གཤེགས་པའི་སྙིང་པོ་མུ་སྟེགས་ཀྱི་བདག་དང་མི་མཚུངས་པར་གསུངས་པའི་ཕྱིར་ཏེ། ཇི་སྐད་དུ། བཅོམ་ལྡན་འདས་ཀྱིས་བཀའ་སྩལ་བ། བློ་གྲོས་ཆེན་པོ་ངའི་དེ་བཞིན་གཤེགས་པའི་སྙིང་པོ་བསྟན་པ་ནི། མུ་སྟེགས་ཅན་གྱི་བདག་ཏུ་སྨྲ་བ་དང་མཚུངས་པ་མ་ཡིན་ཏེ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྟོང་བ་ཉིད་དང༌། ཡང་དག་པའི་མཐའ་དང༌། ཞེས་སོགས་གསུངས་སོ། །མདོར་ན་བདེ་གཤེགས་སྙིང་པོ་ནི་བདག་གཉིས་ཀྱིས་སྟོང་བའི་ཕྱིར་མུ་སྟེགས་པའི་བདག་དང་མི་འདྲ་བ་ཡིན་ཞེས་བཤད་དགོས་ཏེ། རི་ཆོས་ངེས་དོན་རྒྱ་མཚོ་ལས། དེ་ལ་བདེ་གཤེགས་སྙིང་པོ་བདག་གཉིས་ཀྱིས་སྟོང་བའི་ཕྱིར་མུ་སྟེགས་བྱེད་ཀྱི་བདག་དང་མི་མཚུངས་ཤིང༌། ཞེས་གསུངས་པའི་ཕྱིར་རོ། །