དྲི་བ་སོ་ལྔ་བ་དགག་བྱ་ལ་དོན་དམ་གྱི་ཁྱད་པར་སྦྱར་དགོས་སམ་ཞེས་པའི་དྲིས་ལན།
དྲི་བ་སོ་ལྔ་བ་དགག་བྱ་ལ་དོན་དམ་གྱི་ཁྱད་པར་སྦྱར་དགོས་སམ་ཞེས་པའི་དྲིས་ལན།
དགག་བྱ་ལ་དོན་དམ་གྱི་ཁྱད་པར་སྦྱར་དགོས་སམ་ཞེས་པ་དེའོ། །དེའི་ལན་ནི། དགག་བྱ་ལ་དོན་དམ་གྱི་ཁྱད་པར་སྦྱར་དགོས་པ་ལྟ་བུ་ཆོས་རྗེ་ཉ་དབོན་པས་གསུངས་ཏེ། གཞི་ལམ་འབྲས་གསུམ་ལས་བརྩམས་པའི་དྲིས་ལན་ཡིད་ཀྱི་མུན་སེལ་ལས། དྲི་མ་མེད་པའི་མདོ་བསྟན་བཅོས་ལ་བརྟེན་ནས་གཟུ་བོའི་བློས་དཔྱད་ན་ཕྱི་ནང་གི་ཆོས་ཀུན་དང་དེའི་སྟོང་ཉིད་དེ་བཞིན་ཉིད་སོགས་ཡང་སྟོང་ངོ་མེད་དོ་ཞེས་སོགས་ཡང་དྲང་དོན་དགོངས་པ་ཅན་ཡིན་གྱི་སྒྲ་ཇི་བཞིན་པ་མིན་ཏེ། བརྟགས་ཞིང་དཔྱད་ན་བདེན་པའི་རྫས་ཅིར་ཡང་གྲུབ་པ་མེད་པ་ལ་དགོངས་ཀྱི། སྒྲ་ཇི་བཞིན་དུ་དེ་དག་གཏན་མེད་པ་མ་ཡིན་ཏེ། དགེ་སྡིག་སོགས་ལས་རྒྱུ་འབྲས་ལ་བསྐུར་བ་བཏབ་པར་འགྱུར་བའོ། །ཞེས་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། རང་སྟོང་སྟོང་ཉིད་མཆོག་ཏུ་སྨྲ་བ་རྣམས་ཀྱིས་ནི་དགེ་བ་དགེ་བས་སྟོང༌། སྡིག་པ་སྡིག་པས་སྟོང་ཞེས་སོགས་སྒྲ་ཇི་བཞིན་པར་ཆོས་ཐམས་ཅད་རང་གིས་སྟོང་བར་ཁས་བླངས་སོ། །དེ་ལྟར་ཁས་ལེན་ན་ཆད་ལྟ་ལས་ཀྱང་ཆེས་ཆད་ལྟར་འགྱུར་རོ། །ཞེས་དགག་བྱའི་ཁྱད་པར་མ་སྦྱར་བར་ཆོས་རང་རང་གིས་སྟོང་བ་ཁས་ལེན་ན་ཆད་ལྟ་ཡིན་པར་གསུངས་པ་དང༌། །ཡང་དེ་ལས། གལ་ཏེ་ཆོས་ཐམས་ཅད་རང་རང་ངོ་བོས་སྟོང་ཞེས་ཁྱད་པར་གྱི་ཚིག་གང་ཡང་མ་སྦྱར་བར་སྤྱིར་དེ་སྐད་འདོད་དམ་བརྟགས་ཤིང་དཔྱད་པའི་དེ་ཁོ་ན་ཉིད་ཀྱི་དོན་དམ་པར་ཞེས་དེ་སྐད་འདོད། དང་པོ་ལྟར་ན་བདེན་པ་གཉིས་སུ་རྣམ་དབྱེ་བྱས་པའི་བཀའ་བསྟན་བཅོས་ཐམས་ཅད་ནོར་བ་ཁོ་ནར་འགྱུར་ཞིང༌། གཞི་གྲུབ་ཅུང་ཟད་ཀྱང་མེད་པར་འགྱུར་རོ། །ཞེས་དགག་བྱ་ལ་ཁྱད་པར་གང་ཡང་མ་སྦྱར་ན་སྐྱོན་དུ་མ་ཡོད་པ་ལྟ་བུར་གསུངས་ལ། རང་ལུགས་ཀྱི་གཞུང་རྣམས་སུ་སྐབས་རེ་དོན་དམ་གནས་ལུགས་གཏན་ལ་ཕབ་པའི་དབང་དུ་བྱས་ནས། ཀུན་རྫོབ་ཀྱི་ཆོས་རྣམས་དགག་བྱ་དངོས་སུ་མ་སྦྱར་བར་རང་གི་ངོ་བོས་སྟོང་ཞེས་གསུངས་ལ། སྐབས་རེ་སྤྱིར་བཏང་གི་དབང་དུ་བྱས་ནས་ཀུན་རྫོབ་ཀྱི་ཆོས་རྣམས་དོན་ལ་མེད་ཅེས་དང༌། གནས་ལུགས་ལ་མེད་ཅེས་དང༌། ཡིན་ལུགས་ལ་མེད་ཅེས་དང༌། དོན་དམ་ལ་མེད་ཅེས་སོགས་དགག་བྱའི་ཁྱད་པར་སྦྱར་ནས་གསུངས་བ་ཡིན་ཞིང༌། དེ་ཡང་མདོར་ན་ཀུན་རྫོབ་ཏུ་ཡང་མེད་ཅེས་པ་ལ་སྐབས་ཀྱི་གོ་བའི་སྐྱོན་མེད་ན་དགག་བྱ་ལ་ཁྱད་པར་མ་སྦྱར་ན་ཆོག དེ་འདྲའི་སྐྱོན་ཡོད་ན་དགག་བྱ་ལ་དོན་དམ་སོགས་ཀྱིས་ཁྱད་པར་སྦྱར་དགོས་ཏེ། རྟོན་པ་བཞི་ལྡན་གྱི་བཀའ་བསྡུ་བཞི་བ་ལས། སྣང་གྲགས་འདི་ཀུན་གཤིས་ཀྱི་གནས་ལུགས་ལ། །རི་བོང་རྭ་བཞིན་གཏན་ནས་མ་གྲུབ་ཀྱང༌། །ཐ་སྙད་འཁྲུལ་ངོར་རྨི་ལམ་སྒྱུ་མ་བཞིན། །ཞེས་དང༌། རི་ཆོས་ངེས་དོན་རྒྱ་མཚོ་ལས། ཆོས་ཐམས་ཅད་གནས་ལུགས་ལ་རི་བོང་གི་རྭ་དང༌། མོ་གཤམ་གྱི་བུ་ལྟར་ཅི་ཡང་མ་རེད་ཅིང་གང་དུ་ཡང་མ་གྲུབ་པས་ནམ་མཁའི་མེ་ཏོག་ལྟ་བུར་ཐག་ཆོད་དགོས། ཞེས་གནས་ལུགས་དང་གཤིས་ལུགས་ཞེས་ཁྱད་པར་གྱི་སྒྲ་སྦྱར་ནས་གསུངས་སོ། །