དྲི་བ་སོ་དྲུག་པ་ཉི་ཤུ་པ་དང་སུམ་ཅུ་པ།
དྲི་བ་སོ་དྲུག་པ་ཉི་ཤུ་པ་དང་སུམ་ཅུ་པ་སོགས་དང༌། ཀུན་བཏུས་ཚད་མ་རྣམ་འགྲེལ་སོགས་དབུ་མའི་གཞུང་ཡིན་པའི་སྒྲུབ་བྱེད་ཁོད་ཅེས་པའི་དྲིས་ལན།
ཉི་ཤུ་པ་དང་སུམ་ཅུ་པ་སོགས་དང༌། ཀུན་བཏུས་ཚད་མ་རྣམ་འགྲེལ་སོགས་དབུ་མའི་གཞུང་ཡིན་པའི་སྒྲུབ་བྱེད་ཁོད་ཅེས་པའོ། །དེའི་ལན་ནི། གཞུང་དེ་དག་སེམས་ཙམ་པའི་གཞུང་མ་ཡིན་ཞིང་དབུ་མའི་གཞུང་ཡིན་པའི་རྒྱུ་མཚན་ནི་རེ་ཞིག་འདི་ལྟར་བརྗོད་པར་བྱ་སྟེ། གཞུང་དེ་དག་གི་སྐབས་སུ་རྣམ་ཤེས་བདེན་གྲུབ་མེད་པར་ཡང་ཡང་བསྟན་པས་ན་སེམས་ཙམ་གྱི་རང་གཞུང་མ་ཡིན་པར་དབུ་མའི་གཞུང་ཡིན་པར་གྲུབ་པ་ཡིན་ནོ། །འོ་ན་དེ་དག་གིས་རྣམ་ཤེས་བདེན་མེད་དུ་བསྟན་ན་དེ་བསྟན་བྱེད་ཀྱི་ཚིག་གང་ཡིན་ཞེ་ན། དེ་དག་ནི་བརྗོད་པར་བྱ་སྟེ། ཉི་ཤུ་པ་ལས། འདི་དག་རྣམ་པར་རིག་ཙམ་ཉིད། །ཡོད་པ་མ་ཡིན་དོན་སྣང་ཕྱིར། །དཔེར་ན་རབ་རིབ་ཅན་དག་གིས། །སྐྲ་ཟླ་ལ་སོགས་ཡོད་མཐོང་བཞིན། །ཞེས་དང༌། དེའི་སྐབས་ཀྱི་རང་འགྲེལ་ལས། རྣམ་པར་ཤེས་པ་འདི་ཉིད་དོན་དུུ་སྣང་བ་འབྱུང་སྟེ། དཔེར་ན་རབ་རིབ་ཅན་རྣམས་ཀྱིས་སྐྲ་ཟླ་ལ་སོགས་པ་མེད་པར་མཐོང་བ་བཞིན་ཏེ། དོན་གང་ཡང་མེད་དོ། །ཞེས་བྱུང༌།དེའི་སྐབས་ཀྱི་དུལ་ལྷའི་འགྲེལ་བཤད་ལས། དོན་སྔོན་པོ་ལ་སོགས་པ་གུད་ན་གང་ཡང་མེད་དོ་ཞེས་བྱ་བ་ནི་མཇུག་བསྡུ་བའོ། །རབ་རིབ་དང་ལྡན་པ་ནི་རབ་རིབ་ཅན་ནོ། །དེ་ལྟར་རེ་ཞིག་བཟུང་བ་བཀག་གོ ། བཟུང་བ་བཀག་ན་འཛིན་པ་ཡང་བཀག་པར་དེ་ཉིད་ཀྱིས་གྲུབ་སྟེ། འདི་ལྟར་གཟུང་བ་མེད་ན་འཛིན་པ་ཡང་མེད་དོ། །ཞེས་རྩ་བ་ཉི་ཤུ་པའི་དགོངས་པ་འགྲེལ་བ་དང་འགྲེལ་བཤད་ཀྱིས་བཀྲལ་བ་ལྟར་འཛིན་པ་བདེན་མེད་དུ་བསྟན་པས་སེམས་ཙམ་གྱི་རང་གཞུང་ལས་འདས་སོ། །སུམ་ཅུ་པའི་རབ་ཏུ་བྱེད་པ་ལས། ནམ་ཞིག་ཤེས་པའི་དམིགས་པ་རྣམས། །མི་དམིགས་དེ་ཡི་ཚེ་ན་ནི། །རྣམ་པར་རིག་པ་ཙམ་ལ་གནས། །གཟུང་བ་མེད་པས་དེ་འཛིན་མེད། །དེ་ནི་སེམས་མེད་མི་དམིགས་པ། །འཇིག་རྟེན་འདས་པའི་ཡེ་ཤེས་ཏེ། །ཞེས་སེམས་ཙམ་ལས་འདས་པའི་རྣམ་བཞག་གསུངས་པ་དང༌། དེ་ལས། གྲུབ་ནི་དེ་ལ་སྔ་མ་བོ། །རྟག་ཏུ་མེད་པར་གྱུར་པ་གང༌། །ཞེས་རྣམ་ཤེས་ལས་འདས་པའི་གཉིས་མེད་ཡེ་ཤེས་བསྟན་པས་སེམས་ཙམ་པའི་གཞུང་མིན་ལ། ཆོས་མངོན་པ་ཀུན་བཏུས་ལས། བྱང་ཆུབ་སེམས་དཔའ་མཉམ་བཞག་པའི། །ཡིད་ཀྱི་གཟུགས་བརྙན་མཐོང་བས་ན། །དོན་གྱི་འདུ་ཤེས་ལྡོག་དེ་ནས། །རང་གི་འདུ་ཤེས་ངེས་པར་གཟུང༌། །དེ་ལྟར་ནང་གི་སེམས་གནས་ཤིང༌། །གཟུང་བ་མེད་པར་རྟོགས་པར་བྱ། །དེ་ཡི་འོག་ཏུ་འཛིན་མེད་པར། །དེ་ནས་མི་དམིགས་རིག་པར་བྱ། །ཞེས་སེམས་ཙམ་ལས་འདས་པའི་མདོ་དྲངས་པ་དང༌། ཐེག་པ་བསྡུས་པ་ལས།ཡོངས་སུ་གྲུབ་པའི་ངོ་བོ་ཉིད་ལ་ཇི་ལྟར་འཇུག་ཅེ་ན། རྣམ་པར་རིག་པ་ཙམ་གྱི་འདུ་ཤེས་ཀྱང་ཟློག་ནས་འཇུག་སྟེ། དེའི་ཚེ་བྱང་ཆུབ་སེམས་དཔའ་དོན་གྱི་འདུ་ཤེས་རྣམ་པར་བཤིགས་པ་དེ་ལ་ཡིད་ཀྱི་བརྗོད་པ་ཐོས་པའི་ཆོས་ཀྱི་བག་ཆགས་ཀྱི་རྒྱུ་ལས་བྱུང་བ་དེ་དག་ལ་དོན་དུ་སྣང་བ་ཐམས་ཅད་འབྱུང་བའི་སྐབས་མེད་པ་ཡིན་ནོ། །དེས་ན་རྣམ་པར་རིག་པ་ཙམ་དུ་ཡང་མི་འབྱུང་སྟེ། །ཞེས་དང༌། ཡེ་ཤེས་རྒྱུ་བ་རྟོགས་མེད་ལ། །དོན་རྣམས་ཐམས་ཅད་མི་སྣང་ཕྱིར། །དོན་མེད་ཁོང་དུ་ཆུད་པར་བྱ། །དེ་མེད་པ་ན་རྣམ་རིག་མེད། །ཅེས་དོན་ལ་རྣམ་རིག་མེད་པར་གསུངས་པ་དང༌། ཚད་མ་རྣམ་འགྲེལ་ལས། ཡོངས་གཅོད་ནང་ཡིན་ཕྱི་རོལ་ལྟར། །གནས་པ་འདི་ནི་ཆ་གཞན་ཡིན། །ཐ་དད་མེད་ཅན་ཤེས་པ་ཡི། །ཐ་དད་སྣང་བ་བསླད་པ་ཉིད། །དེ་ལ་གཅིག་ནི་མེད་པས་ཀྱང༌། །གཉིས་ལའང་ཉམས་པར་འགྱུར་བ་ཡིན། །དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡི་དེ་ཉིད་ཡིན། །ཞེས་པ་ལ་སོགས་པས་རྣམ་རིག་བདེན་པར་མེད་པར་གསུངས་པ་རྣམས་སེམས་ཙམ་པ་རྣམ་ཤེས་དོན་དམ་དུ་བདེན་པར་འདོད་པ་དང༌། ཤིན་ཏུ་འགལ་བ་ཡིན་པས་དབུ་མའི་གཞུང་ཡིན་པར་གྲུབ་པ་ཡིན་པའོ། །གཞན་ཡང་གཞུང་དེ་དག་གཞན་སྟོང་དབུ་མའི་རང་གཞུང་ཡིན་པར་གྲུབ་སྟེ། དེ་དག་གཞན་སྟོང་དབུ་མའི་ལྟ་གྲུབ་དང་མི་མཐུན་པ་ཅུང་ཟད་མེད་ཅིང་མཐུན་པ་ཁོ་ན་ཡིན་ལ། གཞན་སྟོང་བ་རྣམས་ཀྱི་རང་གཞུང་དུ་དགོངས་པ་བཀྲལ་བའི་ཕྱིར་རོ། །
སྨྲས་པ། གཞུང་འདིར་བཤད་པའི་གསུང་རབ་དགོངས་འགྲེལ་ལུང་དང་ནི། །ཀུན་རྫོབ་དོན་དམ་རྣམ་འབྱེད་རིགས་པ་ལ་བརྟེན་ནས། །བདག་ཉིད་དོན་དང་དོན་མིན་བླང་དོར་ལེགས་ཤེས་ཕྱིར། །གཟུར་གནས་བློ་ལྡན་དག་ལ་ལེགས་བཤད་སྤེལ་ཕྱིར་སྦྱར། །ཇི་ལྟར་ཟབ་ཅིང་ཡངས་བ་རྒྱ་ཆེའི་རྒྱ་མཚོ་ལས། །དེད་དཔོན་མཁས་པས་ཡིད་བཞིན་ནོར་བུ་ལེན་པ་བཞིན། །རྒྱལ་དང་རྒྱལ་སྲས་གསུང་རབ་རྒྱ་མཚོའི་དབུས་ནས་ཀྱང༌། །ངེས་དོན་དོན་དམ་རིན་ཆེན་མཆོག་འདི་བདག་གིས་བླངས། །རང་བློ་ཉེས་པས་འཁྲུལ་བའི་ཆ་མཆིས་ན། །དེ་ཉིད་རིག་པའི་མཁས་ལ་བཟོད་པར་གསོལ། །ལེགས་བཤད་མཆིས་ན་ལེགས་བཤད་དོན་གཉེར་བའི། །བློ་ལྡན་སྐལ་བ་ཅན་རྣམས་དགྱེས་པར་མཛོད། །བློ་གྲོས་དང་བའི་མཁའ་ལས་འོངས་བའི་ལེགས་བཤད་དགེ་བའི་ཉིན་བྱེད་འོད། །སྐྱེ་དགུ་རྣམས་ཀྱི་གླིང་དུ་ཤར་བས་མ་རིག་མུན་པའི་ཚོགས་བཅོམ་ནས། །རང་བྱུང་ཡེ་ཤེས་སྣང་བ་རབ་རྒྱས་ཡོན་ཏན་པད་མོའི་དཔལ་བསྐྱེད་དེ། །རྣམ་གྲོལ་དམ་པ་དགའ་བའི་ཚལ་ལ་ཟག་མེད་བདེ་ལ་སྤྱོད་གྱུར་ཅིག །ཅེས་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་གི་རྩོམ་གཞིའི་དྲིས་ལན་རབ་གསལ་སྣང་བ་ཞེས་བྱ་བ་འདི་ནི་འབྲས་རབ་འབྱམས་པའི་མིང་ཙམ་འཛིན་པ་དངོས་གྲུབ་དཔལ་ནས་རང་ལོ་སོ་ལྔ་པར་གཞན་སྟོང་བགྲོ་གླེང་ཐེངས་དང་པོའི་གྲ་སྒྲིག་ལྷན་ཚོགས་ནས་གཏན་འབེབས་བྱས་པའི་དྲིས་ལན་དུ་སྦྱར་བའོ། །འདིས་ཀྱང་ཀུན་མཁྱེན་རྒྱལ་བའི་བསྟན་པ་རྒྱས་པའི་རྒྱུ་གྱུར་ཅིག །མངྒ་ལམ།། །།