ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དྲུག་པའི་དྲིས་ལན་ལུང་རིགས་ཆོས་ཀྱི་དགའ་སྟོན་བློ་གསལ་ཀླུ་ཡི་རོལ་མཚོ།

ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དྲུག་པའི་དྲིས་ལན་ལུང་རིགས་ཆོས་ཀྱི་དགའ་སྟོན་བློ་གསལ་ཀླུ་ཡི་རོལ་མཚོ་ཞེས་བྱ་བ་བཞུགས་སོ། །

ཐོག་མེད་དུས་ནས་ཚོགས་གཉིས་རབ་བསགས་ནས། །རྒྱལ་ཡུམ་རྒྱན་བཅས་དོན་ཀུན༷་མཁྱེ༷ན་མངའ་བས། །མདོ༷་དོ༷ན་བདེ༷་བླ༷ག་རྟོ༷གས་ཕྱིར་མདོ༷་ལུ༷གས་སུ། །བརྩེ་བས་ལེགས་པར་འདོམས་མཛད་གཙུག་ན་རྒྱལ། །རྒྱལ་ཡུམ་མདོ་དང་རྒྱན་གྱི་དགོངས་དོན་བཞིན། །ལུང་རིགས་འབུམ་གྱི་འོད་སྣང་སྤྲོ་བར་བྱ། །རྒྱལ་དང་རྒྱལ་སྲས་གཤེགས་པའི་མངོན་རྟོགས་ལམ། །འཇུག་ངོགས་མཆོག་འདོད་བློ་ལྡན་དོན་གཉེར་ཉོན། །དེ་ལ་འདིར་སློབ་དཔོན་འཕགས་པ་ལྷའི་དབུ་མ་བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བ། །ཞེས་གསུངས་པ་ལྟར་ཆགས་སྡང་གི་རིས་སུ་མ་ཆད་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་གཞི་ལམ་འབྲས་གསུམ་གྱི་གྲུབ་པའི་མཐའ་ཀུན་ལུང་རིགས་རྣམ་དག་གི་སྒོ་ནས་གཏན་ལ་ཕབ་དགོས་ལ། དེ་ལྟར་གཏན་ལ་ཕབ་པ་ལ་གཞུང་ལུགས་རབ་འབྱམས་ལ་མཁྱེན་སྤྱན་ཡངས་པ། བསྟན་བཅོས་སྣ་རེའི་ལུང་ཙམ་ལ་མ་ཞེན་པ། རྨོངས་པ་ཁ་མཐུན་གྱི་དམག་དཔུང་ལ་མི་འཇིགས་པ། རང་བཟོས་དུག་ཆུས་བསྲེ་སླད་མེད་པ། གྲུབ་མཐའ་ལོག་པའི་སྐྱོ་མ་སྔ་བཙན་གྱི་དབང་དུ་མི་འགྲོ་བ། གཞན་གྱི་ཡོན་ཏན་ལ་ཕྲག་དོག་གི་དྲི་མས་མ་སྦགས་པ། གང་ཟག་གི་ཆགས་སྡང་ཆོས་ལ་མི་བསྲེ་བར། ལུང་རིགས་རྣམ་དག་གིས་བསྲེགས་བཅད་བརྡར་བའི་གསེར་བཞིན་དུ་ལེགས་པར་བརྟགས་ནས་ཆོས་འཁོར་གསུམ་གྱི་དགོངས་དོན་ལེགས་པར་བཀྲལ་ཏེ་གྲུབ་པའི་མཐའ་རྣམ་པར་བཞག་དགོས་ཏེ། མདོ་ལས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པའི་ཕྱིར་རོ། །དེ་ལྟར་ཕྱོགས་འཛིན་གྱིས་དབང་དུ་མ་སོང་བར་བཀའ་ཐ་མ་དང་དེའི་དགོངས་འགྲེལ་བྱམས་ཆོས་སོགས་གཙོ་བོར་བྱས་ཏེ་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དྲུག་པའི་དྲིས་ལན་རྣམས་བརྗོད་པར་བྱའོ། །

དང་པོ་དོན་བདུན་ཅུའི་གྲངས་འདྲེན་ཚུལ་མདོ་ལུགས་མ་དང་ཉ་ཊཱིཀ་གཉིས་གསུང་ཟིན་མི་མཐུན་པ་དུ་ཡོད།

དང་པོ་དོན་བདུན་ཅུའི་གྲངས་འདྲེན་ཚུལ་མདོ་ལུགས་མ་དང་ཉ་ཊཱིཀ་གཉིས་གསུང་ཟིན་མི་མཐུན་པ་དུ་ཡོད་དང༌།རང་ལུགས་འཐད་ལྡན་གྱི་དོན་བདུན་ཅུའི་གྲངས་འདྲེན་ཚུལ་ཇི་ལྟར་ཡིན་ཞེས་པའི་ལན།

དོན་བདུན་ཅུའི་གྲངས་འདྲེན་ཚུལ་མདོ་ལུགས་མ་དང་ཉ་ཊཱིཀ་གཉིས་གསུང་ཟིན་མི་མཐུན་པ་དུ་ཡོད་དང༌། རང་ལུགས་འཐད་ལྡན་གྱི་དོན་བདུན་ཅུའི་གྲངས་འདྲེན་ཚུལ་ཇི་ལྟར་ཡིན་ཞེས་པའོ། །དེ་ལན་ལ་གཉིས་ལས། དང་པོ་དོན་བདུན་བཅུའི་གྲངས་འདྲེན་ཚུལ་མདོ་ལུགས་མ་དང་ཉ་ཊཱིཀ་གཉིས་གསུང་ཟིན་མི་མཐུན་པ་དུ་ཡོད་ངོས་བཟུང་ནས་འགལ་མེད་དུ་བཤད་པ་ནི། ཉ་ཊཱིཀ་ལས། ལམ་ཤེས་ཀྱི་དངོས་པོ་བཅུ་གཅིག་ལ། ཞེས་དང༌། དེའི་སྐབས་གཉིས་པ་ལས། ལམ་ཤེས་ཀྱི་དངོས་པོ་བཅུ་གཅིག་བཤད། ཅེས་ལམ་ཤེས་ཀྱི་དངོས་པོ་བཅུ་གཅིག་གསུངས། དེ་ཡང་མོས་པ་སྒོམ་ལམ་དང་དེའི་ཕན་ཡོན་གཉིས་སོ་སོར་བཤད་དེ། ཉ་ཊཱིཀ་སྐབས་གཉིས་པ་ལས། མོས་པའི་ངོ་བོ། དེའི་ཕན་ཡོན་ནོ། །ཞེས་གསུངས་སོ། །མདོ་ལུགས་མ་ལས། ལམ་ཤེས་པ་ཉིད་ཀྱི་དངོས་པོ་བཅུ་ལས། ཞེས་ལམ་ཤེས་ཀྱི་དངོས་པོ་བཅུ་ལས་དངོས་སུ་མ་གསུངས་ལ། དེ་ཡང་མོས་པ་སྒོམ་ལམ་དང་དེའི་ཕན་ཡོན་གཉིས་གཅིག་ཏུ་བགྲང་ནས་བཤད་དེ། མདོ་ལུགས་མ་ལས། མོས་པ་བཤད་པ་ནི། དབུ་མ་མདོ་སྡེའི་རྒྱན་ལས་མོས་པའི་དབྱེ་བ། མོས་པའི་བར་གཅོད། མོས་པའི་ཕན་ཡོན་མོས་པའི་དཔེ། མོས་པ་ལ་མི་ཞུམ་པ་མོས་པའི་འབྲས་བུ་སྟེ་དྲུག་བསྟན་པ་ལས་སྐབས་འདིའི་མོས་པ་ནི། རྒྱ་ཆེན་པོ་དང་འཁོར་བ་ལས་རིང་དུ་སོང་བ་དང༌། རྒྱལ་པོ་ལྟ་བུའི་མོས་པ་དང༌། བསོད་ནམས་རྒྱ་ཆེན་པོ་རྒྱུན་མི་འཆད་པ་དང༌། དེ་འཕེལ་བ་དང་དེའི་རྒྱུས་མཐར་ཐུག་སངས་རྒྱས་ཀྱི་མཐར་ཐུག་གི་འབྲས་བུ་འཛིན་པའི་མོས་པ་ཡིན་ནོ། །མོས་པ་འདི་ཉིད་ཉི་ཁྲིའི་ལེའུ་བཅོ་བརྒྱད་པའི་སྔོན་ནས་བརྒྱ་བྱིན་གྱིས་ཤེར་ཕྱིན་གྱི་གླེགས་བམ་དང༌། སྐུ་གདུང་གི་མཆོད་རྟེན་ལ་མཆོད་པ་གཉིས་བསོད་ནམས་གང་ཆེ་ཞུས་པ་ནས་བརྩམས་ཏེ། ལེའུ་ཉེར་གསུམ་པ་ཡོངས་སུ་རྫོགས་པའི་མཚམས་ཀྱི་བར་གྱི་མདོས་སྟོན་ཏོ། །མདོ་འདི་རྣམས་ཀྱིས་ནི་ཤེར་ཕྱིན་ལ་མོས་པའི་རྟགས་ཤེར་ཕྱིན་ལ་བསྟོད་བཀུར་བསྔགས་པ་རྣམས་ཁོ་ན་སྟོན་གྱི། ཤེར་ཕྱིན་ལ་བསྟོད་བཀུར་བསྔགས་པ་ལས་མོས་པ་སྟོན་པའི་མདོ་གུད་དུ་བཙལ་པར་མི་བྱ་སྟེ། གང་དང་གང་ལ་མོས་པ་ནི་སེམས་ཀྱི་འགྱུ་བ་ཡིན་པས་དེ་དང་དེ་བསྟོད་སོགས་ཀྱི་སྒོ་ནས་དེ་དང་དེ་ལ་མོས་པར་གཞན་གྱིས་ཤེས་དགོས་པའི་ཕྱིར་རོ། །དཔེར་ན་འཇིག་རྟེན་ན་ཡང་སྟོད་ར་དང་བཀུར་བསྟི་ལ་སོགས་པའི་སྒོ་ནས་མོས་གུས་ཆེ་ཆུང་གཞན་གྱིས་རིག་པ་བཞིན་ནོ། །ཞེས་གསུངས་སོ། །འོན་ཀྱང་ཆོས་རྗེ་ཀུན་མཁྱེན་གྱི་དགོངས་པ་ཡང་མོས་པ་སྒོམ་ལམ་དང་དེའི་ཕན་ཡོན་གཉིས་གཅིག་ཏུ་བྱས་ནས་མདོ་ལུགས་མའི་སྐབས་སུ་བགྲང་ཡང་དོན་བདུན་ཅུ་བགྲང་ཚེ་དེ་གཉིས་སོ་སོར་བགྲང་བ་ཡིན་སྙམ་སྟེ། ཁྲི་བརྒྱད་སྟོང་བའི་བཤད་པ་ལས། དེ་རྣམས་ཀྱིས་ནི་མོས་པ་དང༌། ཞེས་པ་དོན་དྲུག་པ་གསུངས་ཟིན་ཏོ། །ཞེས་དང༌། དེ་རྣམས་ཀྱིས་ནི་བསྟོད་དང་བཀུར་དང་བསྔགས་པ་དང༌། ཞེས་པ་དོན་བདུན་པ་གསུངས་ཟིན་ཏོ། །ཞེས་དང༌། དོན་བཅུ་གཅིག་པ་གསུངས་ཟིན་ཏོ། །ཞེས་གསུངས་སོ། །དེ་ལྟར་འབུམ་ཀྱི་བཤད་པ་དང་ཉི་ཁྲི་ལྔ་སྟོང་བའི་བཤད་པ་གཉིས་ཀ་ལས་གསུངས་སོ། །དེ་ལ་ཡང་དཔྱད་པར་བྱ་བ་འདི་ཡོད་དེ། ཁྲི་བརྒྱད་སྟོང་བའི་བཤད་པ་ལས། གཞན་མུ་སྟེགས་བྱེད་ཀྱི་ལེའུ་ཞེས་བྱ་སྟེ་ཉི་ཤུ་རྩ་དགུ་པའོ། །བམ་པོ་ཉི་ཤུ་རྩ་གསུམ་པའོ། །རང་དང་གཞན་གྱི་དོན་ལ་མོས་པ་ཆུང་ངུའི་ཆེན་པོ་ནི། ཞེས་པ་ནས། དེ་རྣམས་ནི་མོས་པ་དང༌། ཞེས་པ་དོན་དྲུག་པ་གསུང་ཟིན་ཏོ། །ཞེས་པ་ནས། སུམ་བཅུ་རྩ་གཉིས་པའོ། །དེ་རྣམས་ཀྱིས་ནི་བསྟོད་དང་བཀུར་དང་བསྔགས་པ་དང༌། ཞེས་པ་དོན་བདུན་པ་གསུངས་ཟིན་ཏོ། །ཞེས་ལེའུ་སུམ་བཅུ་པ་ཆ་ཚང་དང་སོ་གཅིག་པའི་ཕལ་ཆེར་མོས་པ་སྒོམ་ལམ་སྟོན་བྱེད་དུ་བཤད། སོ་གཅིག་པ་མཇུག་ནས་ཤོག་གུ་གཉིས་དང་ཕྲེང་དགུ་དང་ལེའུ་སོ་གཉིས་པ་རིལ་བོ་མོས་པ་སྒོམ་ལམ་གྱི་ཕན་ཡོན་སྟོན་བྱེད་གསུངས་ལ། མདོ་ལུགས་མ་ལས། ཤེར་ཕྱིན་ལ་བསྟོད་བཀུར་བསྔགས་པ་ལས་མོས་པ་སྟོན་པའི་མདོ་གུད་དུ་བཙལ་པར་མི་བྱ་སྟེ། ཞེས་དེ་གཉིས་མདོ་ལོགས་སུ་མེད་པ་ལྟ་བུར་གསུངས་པའི་དགོངས་པ་ཚོལ་དགོས་སོ། །ཡང་རྣམ་རྫོགས་སྦྱོར་བའི་སྐབས་སུ་ཉ་ཊཱིཀ་ལས། རྣམ་ཀུན་གྱི་དངོས་པོ་བཅུ་གཅིག་གི་དང་པོ་རྣམ་པ་ནི། ཞེས་པ་ནས།ཐབས་མཁས་དང་བཅས་པའི་དངོས་པོ་བཅུ་གཅིག་པོ་འདིས་ནི་རྣམ་ཀུན་མངོན་རྫོགས་རྟོགས་པའི་སྐབས་བསྡུས་ནས་བསྟན་པ་ཡིན་ནོ། །ཞེས་རྣམ་རྫོགས་སྦྱོར་བ་ལ་དོན་བཅུ་གཅིག་བཤད་ལ། མདོ་ལུགས་མ་ལས། ད་ནི་རྣམ་པ་ཀུན་མངོན་པར་རྫོགས་པར་རྟོགས་པའི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པར་བྱ་སྟེ། འདི་ལ་བཅུ་ཡོད་པ་ལས། ཞེས་ཚིག་ཟིན་ལ་དོན་བཅུ་གསུངས་ཀྱང་མདོ་ལུགས་མ་རང་ལས་དོན་བཅུ་གཅིག་པ་ཐབས་ལ་མཁས་པ་ལོགས་སུ་གསུངས་ཏེ། དེ་ལས། དེ་རྣམས་ཀྱིས་འདི་ནི་ཐབས་མཁས་བཅས་པ་ཡིན་ཞེས་བཤད་ཟིན་ཏོ། །ཞེས་གསུངས་སོ། །དེ་མ་ཟད་ཆོས་རྗེ་ཀུན་མཁྱེན་གྱིས་ཁྲི་བརྒྱད་སྟོང་བའི་བཤད་པ་རྫོགས་ལྡན་ལས་རྣམ་རྫོགས་སྦྱོར་བ་ལ་དོན་བཅུ་གཅིག་གསུངས་ཏེ། དེ་ལས། གང་གའི་ལྷ་མོ་ལུང་བསྟན་པའི་ལེའུ་ཞེས་བྱ་སྟེ། ལྔ་བཅུ་རྩ་གསུམ་པའོ། །དེ་རྣམས་ཀྱིས་ནི། ཞིང་དག་བླ་ན་མེད་པ་ནི། ཞེས་པ་དོན་བཅུ་པ་གསུངས་ཟིན་ཏོ། །ཞེས་དང༌། ལེའུ་ཞེས་བྱ་སྟེ། ལྔ་བཅུ་རྩ་བཞི་པའོ། །དེ་རྣམས་ཀྱིས་ནི་རྣམ་ཀུན་མངོན་རྫོགས་རྟོགས་པ་དང༌། འདི་ནི་ཐབས་མཁས་བཅས་ཡིན། །ཞེས་པ་དོན་བཅུ་གཅིག་པ་གསུངས་ཟིན་ཏོ། །ཞེས་གསུངས་སོ། །མདོ་ལུགས་མ་ལས་དང་པོ་བཅུུ་ལས་ཐབས་ལ་མཁས་པ་ཟུར་དུ་གསུངས་པ་ནི་ཐོག་མར་བསྒོམས་པ་ནས་སྒོམ་པ་མཐར་ཐུག་བར་གྱི་སྦྱོར་བ་ལ་འདིའི་ལས་ལ་ཁྱབ་བྱེད་དུ་འཇུག་པ་ལ་དགོངས་པ་འདྲ་སྟེ། མདོ་ལུགས་མ་ལས། ད་ནི་ཐོག་མར་བསྒོམས་པ་ནས་ཅི་སྲིད་བསྒོམ་པ་མཐར་ཐུག་གི་པར་དུ་སྦྱོར་བ་འདིའི་ལས་ལ་ཁྱབ་བྱེད་དུ་འཇུག་པར་བྱང་ཆུབ་སེམས་དཔའི་ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པར་བྱའོ། །ཞེས་གསུངས་སོ། །ཡང་སྐབས་ལྔ་བའི་སྐབས་སུ། ཉ་ཊཱིཀ་ལས། ལྔ་བ་རྩེ་མོའི་དངོས་པོ་བརྒྱད་ལ།དང་པོ་ནི། སྔར་རྩེ་མོར་ཕྱིན་དང་ཞེས་བཤད་པའི་རྩེ་མོ་དེ་ཡི་རྟགས་སམ་རྟགས་ཀྱི་རྩེ་མོའི་མཚན་ཉིད། བསྡུས་བསྒོམ་རབ་ཏུ་གྱུར་བར་མཚོན་བྱེད་གང་ཞིག བྱང་སེའི་སྦྱོར་ལམ་དྲོད། ཅེས་དང༌། བརྒྱད་པ་བསལ་བྱ་ལོག་སྒྲུབ་ཀྱི་མཚན་ཉིད། བདེན་གཉིས་འགལ་བར་བསམ་ནས་རྩོད་པའི་རྩོད་པ། ཞེས་རྩེ་སྦྱོར་གྱི་དངོས་པོ་བརྒྱད་གསུངས་ལ། མདོ་ལུགས་མ་ལས། སྐབས་འདིའི་ཆོས་བཅུ་ལས། ཞེས་མདོ་ལུགས་མའི་གསུངས་ཟིན་ལ་བཅུ་གསུངས་ལ། འོན་ཀྱང་ཆོས་རྗེ་ཀུན་མཁྱེན་རིན་པོ་ཆེའི་དགོངས་པ་ནི་རྩེ་སྦྱོར་གྱི་དངོས་པོའམ་དོན་བརྒྱད་བཤད་པ་འཐད་དེ། ཡུམ་གསུམ་གྱི་བཤད་པ་གསུམ་གར་ཚིག་འདྲ་བར།དེ་རྣམས་ཀྱིས་ནི། མཐོང་ཞེས་བྱ་བ་དང༌། ཞེས་དང༌། དེ་རྣམས་ཀྱིས་ནི། བསྒོམ་པ་ཞེས། །བྱ་བའི་ལམ་ནི་སོ་སོ་ལ། རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དག་ནི། །ཞེས་དོན་ལྔ་པ་དང་དྲུག་པ་གསུངས་ཟིན་ཏོ། །ཞེས་དང༌། དེ་རྣམས་ཀྱིས་ནི། ལོག་པར་བསྒྲུབ་དང་བཅས་པ་ནི། །རྩེ་མོའི་མངོན་རྟོགས། ཞེས་པ་དོན་བརྒྱད་པ་གསུངས་ཟིན་ཏོ། །ཞེས་གསུངས་སོ། །དེ་གསུམ་གར་སྒོམ་ལམ་གྱི་སྐབས་སུ་དོན་ལྔ་པ་དང་དྲུག་པ་སྦྱར་བ་ལྟ་བུར་འདུག་པས་བརྟགས་པར་བྱ། མདོ་ལུགས་མར་དོན་བཅུ་བཤད་པའི་བཅུའི་གྲངས་ལ་རྟོག་པ་བཞིའི་གཉེན་པོ་བཞི་བགྲང་བ་ཡིན་ནམ་དཔྱད། ཡང་མདོ་ལུགས་མ་ལས། རྟགས་དང་རྣམ་འཕེལ་ལ་སོགས་པ་བཞི་པོ་འདི་རྩེ་སྦྱོར་ཐོབ་ནས་མཐར་ཐུག་གི་བར་གྱི་ཆོས་སུ་གསུངས་པའི་ཕྱིར། དྲོད་སོགས་བཞིར་འཆད་པ་ནི་ཤེས་བྱེད་ཡིད་ཆེས་པ་མི་སྣང་ངོ༌། །སྦྱོར་ལམ་བཏགས་པ་བར་བཤད་པ་ལ་ཡང་དགོས་པ་མེད་ཅིང་གནོད་བྱེད་དང་བཅས་སོ། །དེས་ན་རྩེ་མོ་དེའི་རྟགས་དང༌། རྩེ་མོ་དེའི་བསོད་ནམས་རྣམ་པར་འཕེལ་བ་དང༌། རྩེ་མོ་དེའི་བྱང་ཆུབ་ཀྱི་སེམས་བརྟན་པ་དང༌། རྩེ་མོ་དེའི་ཏིང་ངེ་འཛིན་གྱི་སེམས་ཀུན་ཏུ་གནས་པ་ཡིན་ནོ། །དེ་རྣམས་ཀྱིས་དེའི་རྟགས་དང་ཞེས་པ་དེ་བཤད་ཟིན་ཏོ། །ཞེས་གསུངས་སོ། །འོ་ན་ཉ་ཊཱིཀ་ལས།རྟགས་སོགས་བཞི་བཤད། དེ་བཞི་ངེས་འབྱེད་ཆ་མཐུན་དུ་བསྟན་པའོ། །ཞེས་རྟགས་སོགས་བཞི་སྦྱོར་ལམ་དྲོད་སོགས་བཞི་ལ་བཤད་པའི་དགོངས་པ་ཅི་ཞེ་ན། དེའི་དགོངས་པ་ནི་སློབ་དཔོན་སེང་བཟང་སོགས་ཀྱི་ལུགས་ཡིན་པ་འདྲ་སྟེ། ཉ་ཊཱིཀ་རང་ལས།༼འགྲེལ་ཆེན་ཨཱརྱ༽།རྟགས་ལ་སོགས་པ་བཞི་བོ་དེ་དག་ནི་གོ་རིམ་བཞིན་དུ་ངེས་པར་འབྱེད་པའི་ཆ་དང་མཐུན་པ་བཞིའི་ངོ་བོ་ཡིན་པར་ཁོང་དུ་ཆུད་པར་བྱའོ། །འདིས་འགྲེལ་ཆེན་འགྲེལ་ཆུང་གི་རང་ལུགས་འདིར་མངོན་ཞིང་སྔར་བཤད་པའི་རྣམ་གྲངས་སུ་གསལ་ལོ། །ཞེས་དང༌། འགྲེལ་ཆུང་དོན་གསལ་ལས། རྟགས་ལ་སོགས་པ་དེ་དག་ནི་གོ་རིམ་བཞིན་དུ་དྲོ་བ་ལ་སོགས་པ་ངེས་པར་འབྱེད་པའི་ཆ་དང་མཐུན་པ་བཞིའི་ངོ་བོ་ཡིན་པར་ཁོང་དུ་ཆུད་པར་བྱའོ། །ཞེས་གསུངས་སོ། །ཡང་སྐབས་བརྒྱད་པའི་སྐབས་སུ། མདོ་ལུགས་མ་ལས། སྐབས་འདིར་ཡང་ཐོག་མར་ངོ་བོ་ཉིད་ཀྱི་སྐུ་བསྟན་ནས་དེ་ལས་གྱེས་པ་སྐུ་གསུམ་མཛད་པ་དང་བཞིར་གསུངས་སོ། །ཞེས་དང༌། དེའི་ཕྱིར་སངས་རྒྱས་ཀྱི་ངོ་བོ་ཉིད་ཀྱི་སྐུ་ནི་སྐུ་གསུམ་མཛད་པ་དང་བཞིར་ཡང་དག་པར་བསྟན་ཏོ། །ཞེས་དང༌། ཉ་ཊཱིཀ་ལས། བཞི་བོ་གང་ན། ངོ་བོ་ཉིད་ལོངས་སྤྱོད་རྫོགས་སྐུ་སྤྲུལ་བ་མཛད་པ་བཞིར་ཨཱརྱ་སོགས་སོ། །ཞེས་དང༌། འོན་ཀྱང་འདིར་སྨོས་ཚིགས་བཅད་འདིའི་དོན་ནི་ཨཱརྱ་སོགས་ལྟར་ཡིན་གྱི་སློབ་དཔོན་གྱི་ལྟར་མིན་ཏེ། དུས་འཁོར་འགྲེལ་ཆེན་དུ། སྐུ་གསུམ་མཛད་པ་དང་བཞིར་ངེས་པར་བྱམས་པས་གསུངས་པ། ངོ་བོ་ཉིད་ལོངས་ཞེས་སོགས་ནས་བརྗོད་ཅེས་སོ། །ཞེས་པ་ལ་སོགས་པ་འདི་རྣམས་ཀྱི་དགོངས་པ་ལེགས་པར་བརྟགས་ནས་མདོ་ལུགས་མ་ལྟར་ན་ཆོས་སྐུའི་དངོས་པོ་བཞི་ག་ངོ་བོ་ཉིད་སྐུ་ཡིན་དགོས་པ་ཡིན་མིན་དང༌། དེ་བཞི་ལས་དང་པོ་ཆོས་སྐུ་དང་ངོ་བོ་ཉིད་སྐུ་གཉིས་གང་བཞག་དཔྱད་པར་བྱའོ། །འོན་ཀྱང་རྩ་བར། ངོ་བོ་ཉིད་ལོངས་རྫོགས་བཅས་དང༌། །དེ་བཞིན་གཞན་པ་སྤྲུལ་བ་ནི། ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་པའི་གསུངས་ཟིན་ལྟར་ན་ངོ་བོ་ཉིད་སྐུ་བགྲང་དགོས་པ་འདྲའོ། །གཉིས་པ་རང་ལུགས་འཐད་ལྡན་གྱི་དོན་བདུན་ཅུའི་གྲངས་འདྲེན་ཚུལ་ལ། སྡོམ་ནི། རྣམ་མཁྱེན་མཚོན་བྱེད་དངོས་པོ་རྣམ་བཅུ་ནི། །༡སེམས་བསྐྱེད་༢གདམས་ངག་༣ངེས་འབྱེད་ཡན་ལག་དང༌། །༤རང་བཞིན་རིགས་༥༥དམིགས༦་ཆེད་དུ་བྱ་བ་ཞེས། །༧གོ་ཆ་༨འཇུག་༩ཚོགས་༡༠ངེས་འབྱུང་སྒྲུབ་རྣམས་སོ། །ལམ་ཤེས་མཚོན་བྱེད་བཅུ་གཅིག་༡ལམ་ཡན་ལག ། ༢ཉན་༣རང་གི་ནི་ལམ་ཤེས་༤མཐོང་བའི་ལམ། །༥སྒོམ་ལམ་བྱེད་པ་༦མོས་སྒོམ་༧ཕན་ཡོན་༨སྔོ། །༩རྗེས་སུ་ཡི་རང་༡༠རྣམ་དག་༡༡སྒྲུབ་སྒོམ་ལམ། །གཞི་ཤེས་མཚོན་བྱེད་དངོས་པོ་རྣམ་དགུུ་ནི། །༡ཤེས་པས་སྲིད་དང་༢སྙིང་རྗེས་ཞི་མི་གནས། །༣འབྲས་ཡུམ་རིང་དང་༤ཉེ་བའི་གཞི་ཤེས་དང༌། །༥མྀ་མཐུན་༦གཉེན་པོའི་ཕྱོགས་དང་༧གཞི་ཤེས་སྦྱོར། །༨དེ་ཡི་མཉམ་ཉིད་༩མཐོང་བའི་ལམ་རྣམས་སོ། །རྣམ་རྫོགས་མཚོན་བྱེད་བཅུ་གཅིག་༡རྣམ་པ་དང༌། །༢སྦྱོར་བ་༣ཡོན་ཏན་༤སྐྱོན་དང་༥མཚན་ཉིད་ཅེས། །༦ཐར་དང་༧ངེས་འབྱེད་ཆ་མཐུན་༨ཕྱིར་མི་ལྡོག ། ༩སྲིད་ཞི་མཉམ་ཉིད་༡༠ཞིང་དག་༡༡ཐབས་མཁས་སྦྱོར། །༡རྩེ་མོའི་རྟགས་དང་༢རྣམ་འཕེལ་༣བརྟན་པ་དང༌། །༤སེམས་ཀུན་གནས་དང་༥མཐོང་༦སྒོམ་༧བར་ཆད་མེད། །༨བསལ་བྱ་ལོག་སྒྲུབ་མཐའ་སྦྱོར་བཅུ་གསུམ་ནི། །༡ཕྱིན་དྲུག་༧རྗེས་དྲན་དྲུག་དང་༡༣ངོ་བོ་ཉིད། །སྐད་ཅིག་སྦྱོར་བ་མཚོན་བྱེད་ཆོས་རྣམ་བཞི། །༡ཆོས་རྫོགས་རྟོགས་པ༢རྣམ་སྨིན་༣མཚན་ཉིད་མེད། །༤གཉིས་སུ་མེད་པའི་སྐད་ཅིག་སྦྱོར་རྣམས་སོ། །ཆོས་སྐུ་མཚོན་བྱེད་དངོས་པོ་རྣམ་པ་བཞི། །༡ངོ་བོ་ཉིད་༢ལོངས༤་སྤྲུལ་སྐུ་༤མཛད་པ་བཅས། །དོན་གྱི་རྣམ་པ་བདུན་ཅུའི་ཕྲེང་བའོ། །

གཉིས་པ་མཁྱེན་གསུམ་སོ་སོའི་མཚན་ཉིད། ས་མཚམས། རྫས་སྤྱི་ཆོད་ན་ཐེག་པ་གསུམ་གྱི་ལམ་ཐམས་ཅད་མཁྱེན་པ་གསུམ་པོ་གང་རུང་ཡིན་པས་ཁྱབ་བམ་ཅི་ཞེས་པའི་ལན།

གཉིས་པ་མཁྱེན་གསུམ་སོ་སོའི་མཚན་ཉིད། ས་མཚམས། རྫས་སྤྱི་ཆོད་ན་ཐེག་པ་གསུམ་གྱི་ལམ་ཐམས་ཅད་མཁྱེན་པ་གསུམ་པོ་གང་རུང་ཡིན་པས་ཁྱབ་བམ་ཅི་ཞེས་པའི་ལན།

དང་པོ་དྲི་བ་ནི། མཁྱེན་གསུམ་སོ་སོའི་མཚན་ཉིད། ས་མཚམས། རྫས་སྤྱི་ཆོད་ན་ཐེག་པ་གསུམ་གྱི་ལམ་ཐམས་ཅད་མཁྱེན་པ་གསུམ་པོ་གང་རུང་ཡིན་པས་ཁྱབ་བམ་ཅི་ཞེས་པའོ། །གཉིས་པ་ལན་ནི། ཇི་ལྟ་ཇི་སྙེད་མ་ལུས་པ་མཁྱེན་པའི་མཐར་ཐུག་གི་ཡེ་ཤེས་དེ། རྣམ་མཁྱེན་གྱི་མཚན་ཉིད་ཡིན་ཏེ། ཉ་ཊཱིཀ་ལས། ཇི་ལྟ་ཇི་སྙེད་མཁྱེན་པའི་ཡེ་ཤེས་མཐར་ཐུག་གམ་ཆོས་ཐམས་ཅད་བདེན་པའི་སྐྱེ་མེད་དུ་རྟོགས་ཤིང་དོན་གཉིས་མཐར་ཐུག་པ་སྟེ། ཞེས་གསུངས་པའི་ཕྱིར་རོ། །ཉ་ཊཱིཀ་གི་རྣམ་མཁྱེན་གྱི་མཚན་ཉིད་བཞག་པ་ལྟར་ན་སངས་རྒྱས་ཡིན་ན་དེ་ཡིན་པས་ཁྱབ་པ་ཡོད་མེད་དཔྱད། ཡང་རྣམ་མཁྱེན་ལ་ཀུན་རྫོབ་ཀྱི་ཆོས་སྣང་བར་ཐལ། ཉ་ཊཱིཀ་ལས། ཆོས་རྗེ་ཀུན་མཁྱེན་ཆེན་པོ་ནི། ཀུན་རྫོབ་སྣང་ནས་མི་མཁྱེན་ལ་མི་སྣང་བར་ལག་མཐིལ་དུ་སྐྱུ་རུ་ར་བཞག་པ་ལྟར་མཁྱེན་ཞེས་གསུང་ངོ༌། །འོན་ཀྱང་སོ་སོའི་སྐྱེ་བོ་ལ་ཇི་ལྟར་སྣང་བ་ལྟར་དུ་སྣང་ནས་མི་མཁྱེན་ཞིང་སོ་སྐྱེ་ལ་མི་སྣང་བ་ལྟར་སྣང་ནས་མཁྱེན་ཏེ་སོ་སྐྱེ་ལ་བདེན་བདེན་པོར་སྣང་ཞིང་སངས་རྒྱས་ལ་བདེན་མེད་སྒྱུ་མ་ལྟར་སྣང་ངོ་ཞེས་ཁས་བླང་ངོ༌། །རྒྱས་པར་ལོགས་སུ་སྟོན་པར་སྤྲོའོ། །ཞེས་དང༌། ཀུན་མཁྱེན་གྱི་སྟོན་པ་གྲུབ་བཟང་གི་དྲིས་ལན་དུ། ཇི་ལྟ་ཇི་སྙེད་ཆོས་ཀྱི་སྣང་བ་དང༌། །བདེ་སྟོང་ཡེ་ཤེས་གཉིས་མེད་སྣང་བ་རྒྱས། །ཞེས་གསུངས་པའི་ཕྱིར་ཟེར་ན། དེ་ལ་དཔྱད་པར་བྱ་བ་འདི་ཡོད་དེ། ཆོས་རྗེ་ཀུན་མཁྱེན་གྱི་བདེན་གཉིས་གསལ་བའི་ཉི་མ་དང༌། རི་ཆོས་ངེས་དོན་རྒྱ་མཚོ་སོགས་ལས་རྣམ་མཁྱེན་ལ་ཀུན་རྫོབ་མི་སྣང་བར་ཡང་ཡང་བཀའ་བསྩལ་ལ། དེ་ཡང་སོ་སྐྱེ་ལ་སྣང་བ་ལྟར་མི་སྣང་བའི་དོན་ཡིན་ཟེར་ན། དེ་ལ་སྔོན་མེད་ལེགས་བཤད་ལས་གནོད་བྱེད་འདི་ལྟར་གསུངས་ཏེ། དེ་ལས། ཁ་ཅིག་སངས་རྒྱས་ཀྱིས་མ་དག་པའི་སྣང་བ་ཐམས་ཅད་གཟིགས་ཀྱང༌། བདེན་འཛིན་མེད་པས་མ་འཁྲུལ་བ་ཡིན་ནོ་སྐད་ཟེར་བ་ནི། སྐྱེས་བུ་འདི་ནི་ཆོམ་པོས་བཟུང་བས་ཆོ་ངེས་འདེབས་མོད་ཀྱི། ནོར་འཕྲོག་རྒྱུ་མེད་པས་སྡུག་བསྔལ་མེད་དོ་ཞེས་ཟེར་བ་དང༌། སྒྱུ་མའི་ཆ་སྒྱུས་ཤེས་པའི་མི་འདིས་ནི། སྒྱུ་མ་སྤྲུལ་པའི་ཁང་པ་མཐོང་མོད་ཀྱི། སྒྱུ་མར་ཤེས་པའི་ཕྱིར་མ་འཁྲུལ་ལོ། །ཞེས་ཟེར་བ་དང་འདྲ་སྟེ། ཆོ་ངེས་འདེབས་པ་ཉིད་སྡུག་བསྔལ་ཐོབ་པའི་རྟགས་ཡིན་པ་དང༌། སྒྱུ་མའི་ཁང་བཟང་མཐོང་བ་ཉིད་དབང་པོ་བསླད་པའི་འཁྲུལ་བ་ཡིན་ན། འཁྲུལ་བའི་ངོས་འཛིན་བློས་བཅོས་མ་གཞན་ཞིག་གསར་དུ་རྣམ་པར་བཞག་ནས། དེ་མེད་པས་འཁྲུལ་བ་མེད་དོ་ཞེས་བརྗོད་ཀྱང་མི་མཛེས་པ་ལྟར། གང་མི་རྟག་པ་དང༌། སྡུག་བསྔལ་བ་དང༌། གཟུགས་སོགས་སུ་སྣང་བ་དེ་ཉིད་འཁྲུལ་བ་ཡིན་པས། དེ་ལ་བདེན་པར་མི་འཛིན་ནོ་ཞེས་སྨྲས་པས་ཅི་ཞིག་བྱ། དེ་ལྟར་ན་སངས་རྒྱས་ཀྱི་ཡེ་ཤེས་དེ་ནི། ཤེས་བྱ་ཐམས་ཅད་མཁྱེན་པའི་ཕྱིར་རྣམ་པ་ཐམས་ཅད་མཁྱེན་པ་ཉིད་ཡིན་ནོ། །སྤྲོས་པ་ཐམས་ཅད་ཉེ་བར་ཞི་བའི་ཡེ་ཤེས་ཡིན་པས་ཤེས་རབ་དང༌། ཆོས་ཐམས་ཅད་ཀྱི་གནས་ལུགས་མཐར་ཐུག་པའི་ཕྱིར། ཕ་རོལ་ཏུ་ཕྱིན་པ་ཡིན་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་གསུངས་པའི་ཕྱིར། ཡང་སངས་རྒྱས་ཀྱི་སའི་རང་རིག་གིས་རྣམ་མཁྱེན་དངོས་སུ་མ་རྟོགས་ན་དེ་ལ་རང་རིག་གི་དོན་ཚང་ཚུལ་གང་ཡིན་དང༌། རྣམ་མཁྱེན་ལ་ཀུན་རྫོབ་ཀྱི་ཆོས་མ་སྣང་ན་རྣལ་འབྱོར་མངོན་སུམ་སྒྲུབ་བྱེད་ཀྱི་རིགས་པ་རྣམ་འགྲེལ་ལས། ཡང་དག་ཡང་དག་མ་ཡིན་པའི། །གང་གང་ཤིན་ཏུ་གོམས་གྱུར་བ། །གོམས་པ་ཡོངས་སུ་རྫོགས་པ། །དེ་གསལ་མི་རྟོག་བློ་འབྲས་ཅན། །ཞེས་གསུངས་པ་སོགས་ཀྱིས་ཞིབ་པར་དཔྱད་པར་བྱའོ། །ལམ་གསུམ་བདེན་པའི་རང་བཞིན་མེད་པའམ་ལམ་གྱི་ངོ་བོ་དམིགས་རྣམ་ཕྱིན་ཅི་མ་ལོག་པར་སྒོམ་པའི་ཐེག་ཆེན་སློབ་ལམ་དེ། ལམ་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ལམ་གསུམ་བདེན་པའི་རང་བཞིན་མེད་པའམ་ལམ་གསུམ་གྱི་ངོ་བོ་དམིགས་རྣམ་སོགས་ཕྱིན་ཅི་མ་ལོག་པར་རྟོགས་པའི་ཐེག་ཆེན་སློབ་ལམ་ཞེས་པའོ། །ཞེས་གསུངས་སོ། །གཞི་གང་ཟག་གི་བདག་མེད་སོགས་ལམ་གྱི་དམིགས་རྣམ་སྒོམ་པའི་ཐེག་དམན་གྱི་ལམ་དེ། གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གཞི་གང་ཟག་གི་བདག་མེད་ཕྱིན་ཅི་མ་ལོག་པར་རྟོགས་པའི་མཚན་འཛིན་གྱི་བློའམ་གཞི་ཕུང་སྐྱེ་ཁམས་ཀྱི་ངོ་བོ་མཚན་ཉིད་དབྱེ་བ་སོཊ་ཇི་བཞིན་དུ་རྟོགས་པའི་མཚན་འཛིན་གྱི་བློ་གང་རུང་ཞེས་པ་ལ་རུང་མོད་ཀྱི་ད་ལྟ་གྲགས་པ་ལྟར་ན་མངོན་སུམ་གྱིས་རྟོགས་ཞེས་བསྣན་ནོ། །རབ་འབྱོར་ཐམས་ཅད་ཅེས་བྱ་བ་ནི་ཞེས་སོགས་སྔར་དྲངས་པ་ལྟར་དང་གཞི་ཐམས་ཅད་སྐྱེ་བ་མེད་པར་རྟོགས་པའི་ངོ་བོ་ཉིད་ཀྱིས་ཞེས་སོ། །ཞེས་གསུངས་པའི་ཕྱིར་རོ། །དེ་ལ་བྱང་སེམས་ཀྱི་རྒྱུད་ཀྱི་དེ་འདྲའི་མཚན་འཛིན་གྱི་བློ་ཆོས་ཅན། གཞི་ཤེས་ཡིན་པར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། བྱང་སེམས་ཀྱི་རྒྱུད་ལ་དེ་འདྲ་བ་ཡོད་པའི་ཕྱིར་ཏེ། མདོ་ལུགས་མ་ལས། མིང་དང་མཚན་མ་ལ་ཆགས་པའི་བྱང་ཆུབ་སེམས་དཔའ་དེ་ནི་ཤེར་ཕྱིན་ལ་མཚན་མར་དམིགས་པའི་སྒོ་ནས་ཐབས་ལ་མཁས་པ་མ་ཡིན་པས། དུས་གསུམ་མཉམ་ཉིད་ཀྱི་ཤེར་ཕྱིན་དེ་རིང་དུ་སྤོང་བ་སྟེ། ཤེར་ཕྱིན་དེའི་མི་མཐུན་ཕྱོགས་ལ་ཞུགས་པའི་ཕྱིར་རོ། །ཞེས་དང༌། སྔོན་མེད་ལེགས་བཤད་ལས། གཞུང་གི་དངོས་བསྟན་ལྟར་ན། མི་མཐུན་ཕྱོགས་ཀྱི་གཞི་ཤེས་ཀྱང་ཉན་རང་གི་དེ་གཙོ་མི་ཆེ་སྟེ། གཙོ་བོར་བྱང་ཆུབ་སེམས་དཔའ་སོ་སོ་སྐྱེ་བོ་དམིགས་པའི་ལྟ་བ་ཅན་རྣམས་ཡིན་ནོ། །ཞེས་གསུངས་པའི་ཕྱིར་ཟེར་ན་དཔྱད། ཡང་ཉན་རང་གི་རྒྱུད་ཀྱི་ཡུལ་མ་རྟོགས་པའི་མོས་སྒོམ་གྱི་ལམ་རྣམས་ཉ་ཊཱིཀ་ལས་བཤད་པའི་གཞི་ཤེས་ཀྱི་མཚན་ཉིད་ཚང་བ་ཡིན་མིན་བརྟགས་པར་བྱ། །ས་མཚམས་ལ། རྣམ་མཁྱེན་སངས་རྒྱས་ཀྱི་སས་བསྡུས་པ་ཁོ་ན་ཡིན་པར་ཐལ། ཉ་ཊཱིཀ་ལས། མཁྱེན་གསུམ་མཚན་ཉིད་པ་ངོ་བོ་གཅིག་ཅིང་རྣམ་མཁྱེན་མཚན་ཉིད་པ་ཉན་རང་བྱང་སེམས་ལའང་ཡོད་པར་བོད་སྔ་མ་ཕལ་ཆེར་བཞེད་པ་ནི་ཤིན་ཏུ་མི་འཐད་ཅིང༌། སངས་རྒྱས་ཀྱི་ས་ཁོ་ནར་ཡོད་དེ། མདོར། རྣམ་པ་ཐམས་ཅད་མཁྱེན་པ་ཉིད་ནི་དེ་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡིན་ནོ་ཞེས་སོགས་དང༌། རྣམ་པ་ཐམས་ཅད་མཁྱེན་པ་ཉིད་ཐོབ་ནས་ཆོས་ཀྱི་འཁོར་ལོ་བསྐོར་ཞེས་དང༌། རྣམ་པ་ཐམས་ཅད་མཁྱེན་པ་ཉིད་ཐོབ་པར་མ་བགྱིས་པར་ཆོས་ཀྱི་འཁོར་ལོ་བསྐོར་བར་མི་ནུས་སོ་ཞེས་སོ། །མདོ་སྡེ་རྒྱན་དུ། སྒྲིབ་པ་ཀུན་གྱི་དྲི་མེད་པ། །རྣམ་པ་ཐམས་ཅད་མཁྱེན་ཉིད་ཐོབ། །རིན་ཆེན་སྣོད་ནི་ཕྱེ་བ་ལྟར། །སངས་རྒྱས་ཉིད་ནི་ཡང་དག་བསྟན། །ཞེས་དང༌། འདིར་ཡང༌། གང་དང་ཡང་དག་ལྡན་པས་ཐུབ་རྣམས་སྣ་ཚོགས་འདི་གསུང་ཞེས་སོ། །ཞེས་གསུངས་པའི་ཕྱིར་ཟེར་ན། འོ་ན་སེམས་ཅན་གྱི་ས་ན་རྣམ་མཁྱེན་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། སེམས་ཅན་གྱི་ས་ན་དེ་བཞིན་གཤེགས་པའི་སྙིང་པོ་ཡོད་པའི་ཕྱིར་ཟེར་ན་དཔྱད། ལམ་ཤེས་ཀྱི་ས་མཚམས་བྱང་སེམས་འཕགས་རྒྱུད་ལ་འཇོག་དགོས་པར་ཐལ། ཉ་ཊཱིཀ་ལས། འོན་ཀྱང་མཚན་ཉིད་ལ་མངོན་སུམ་གྱིས་རྟོགས་ཞེས་བསྣན་ནས་སྔ་རབས་ལྟར་མོས་ནའང་དེ་ལྟར་བྱའོ། །ཞེས་དང༌། ཡུམ་གསུམ་གནོད་འཇོམས་ལས། བྱང་ཆུབ་སེམས་དཔའ་རྣམས་ཀྱི་སྒྲུབ་པའི་སར་གཏོགས་པ་ས་བཅུའི་རིམ་པས་ངེས་པར་འབྱུང་བས་ཕ་རོལ་ཏུ་ཕྱིན་པའི་སྤྱོད་པ་ལ་སོགས་པ་བྱང་ཆུབ་སེམས་དཔའི་ལམ་གྱི་བདག་ཉིད་ཀྱི་ཡེ་ཤེས་ལ་ལམ་གྱི་རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །ཞེས་དང༌། སྔོན་མེད་ལེགས་བཤད་ལས། བྱང་ཆུབ་སེམས་དཔའ་འཕགས་པའི་རྒྱུད་ཀྱི་ཡེ་ཤེས་ནི་ལམ་ཤེས། ཞེས་དང༌། ཕར་ཕྱིན་བསྡུས་དོན་ལས། ལམ་ཤེས་དངོས་ཀྱི་མཚན་ཉིད། ལམ་གསུམ་བདེན་པའི་རང་བཞིན་མེད་པར་མངོན་སུམ་དུ་ཤེས་ཤིང་སྨིན་རྫོགས་མ་སྦྱངས་པར་ཡང་དག་པའི་མཐའ་མཐར་ཐུག་མངོན་དུ་མི་བྱེད་པར་གཞན་དོན་བྱེད་པའི་སློབ་ལམ། ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། ཉ་ཊཱིཀ་ལས། ཐེག་ཆེན་ཚོགས་སྦྱོར་གྱི་སྐབས་ཀྱི་དེ་འདྲའི་རྟོགས་པ་ཡང་ལམ་ཤེས་ཡིན་ནོ། །འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས་ཐམས་ཅད་མཁྱེན་པ་ཉིད་གསུམ་གྱི་ཐུན་མོང་མ་ཡིན་པའི་ཡོན་ཏན་ཉེ་བར་དགོད་ཅེས་ཨཱརྱས་བཤད་པ་དང་འགལ་ཞེ་ན། དེ་ཡི་དོན་ནི་ཉེར་ཞི་དངོས་སུ་ཐོབ་པ་སོགས་ཀྱི་དབང་དུ་མཛད་པས་འགལ་བ་མེད་དོ། །དེས་ན་མཁྱེན་གསུམ་གྱིས་ཉན་རང་གཉིས་བྱང་སེམས་སངས་རྒྱས་ཀྱི་མངོན་རྟོགས་ཀུན་བསྡུས་ཞེས་པའང་ཡིན་པའི་ཚུལ་གྱིས་བསྡུས་པ་ཡིན་གྱི་དེ་མིན་དེར་བསྡུས་པ་མིན་ནོ། །ཞེས་དང༌། མདོ་ལུགས་མའི་སྐབས་གཉིས་པ་ལས། ལམ་ཤེས་དེའི་རང་བཞིན་ནམ། ངོ་བོ་ནི་ཉོན་མོངས་རྟགས་དང་མཚན་མ་དང༌། །མི་མཐུན་ཕྱོགས་དང་གཉེན་པོ་དག ། དབེན་དང་ཞེས་པ་ལ་སོགས་པའི་ངོ་བོ་ཉིད་དུ་བསྟན་པ་གང་ཡིན་ཏེ། སྐབས་འདི་ཉིད་དུ་ཡང་མོས་སྤྱོད་ཀྱི་ས་ནས་བཟུང་སྟེ་མཐོང་སྒོམ་གྱི་ལམ་རིམ་གྱིས་སྟོན་པར་འགྱུར་བ་དག་གོ ། ཞེས་གསུངས་པའི་ཕྱིར་རོ། །གཞི་ཤེས་ཀྱི་ས་མཚམས་ཉན་རང་ཁོ་ན་ལ་འཇོག་པ་མི་འཐད་པར་ཐལ། གཉེན་པོའི་གཞི་ཤེས་མ་ཟད་ཤེར་ཕྱིན་ལ་རིང་བའི་གཞི་ཤེས་བྱང་སེམས་ཀྱི་རྒྱུད་ལ་བཞག་པའི་ཕྱིར་ཏེ། སྔོན་མེད་ལེགས་བཤད་ལས། གཉེན་པོའི་གཞི་ཤེས་ནི། མཁྱེན་གསུམ་གྱིས་ཟླས་ཕྱེ་བའི་གཞི་ཤེས་དངོས་སམ་བཏགས་པ་བ་གང་དུ་བཞག་ན་ལེགས་ཞེས་དཔྱོད་ལྡན་རྣམས་ཀྱིས་རྣམ་པར་དཔྱོད་ཅིག་དང༌། གཞི་ཤེས་ཀྱི་སྐབས་ཀྱི་མདོ་དང་བསྟན་བཅོས་ཀྱི། གཞུང་དངོས་བསྟན་གྱི་བརྗོད་བྱའི་༼གཙོ་བོ་༽གཞི་ཤེས་ནི་གཉེན་པོའི་གཞི་ཤེས་འདི་ཁོ་ན་ཡིན་ལ། གཞུང་གི་དངོས་བསྟན་ལྟར་ན། མི་མཐུན་ཕྱོགས་ཀྱི་གཞི་ཤེས་ཀྱང་ཉན་རང་གི་དེ་གཙོ་མི་ཆེ་སྟེ། གཙོ་བོར་བྱང་ཆུབ་སེམས་དཔའ་སོ་སོ་སྐྱེ་བོ་དམིགས་པའི་ལྟ་བ་ཅན་རྣམས་ཡིན་ནོ། །ཞེས་དང༌། མདོ་ལུགས་མ་ལས། མིང་དང་མཚན་མ་ལ་ཆགས་པའི་བྱང་ཆུབ་སེམས་དཔའ་དེ་ནི་ཤེར་ཕྱིན་ལ་མཚན་མར་དམིགས་པའི་སྒོ་ནས་ཐབས་ལ་མཁས་པ་མ་ཡིན་པས། དུས་གསུམ་མཉམ་ཉིད་ཀྱི་ཤེར་ཕྱིན་དེ་རིང་དུ་སྤོང་བ་སྟེ། ཤེར་ཕྱིན་དེའི་མི་མཐུན་ཕྱོགས་ལ་ཞུགས་པའི་ཕྱིར་རོ། །ཞེས་གསུངས་པའི་ཕྱིར་ན་མ་ཁྱབ་སྟེ། གཞི་ཤེས་ཉན་རང་ཁོ་ནའི་རྒྱུད་ལ་འཇོག་དགོས་པའི་ཕྱིར། དེར་ཐལ། ཉ་ཊཱིཀ་ལས། སྔ་རབས་རྣམས་བྱང་སེམས་དང་སངས་རྒྱས་ཀྱི་རྒྱུད་ལའང་གཞི་ཤེས་མཚན་ཉིད་པ་ཡོད་པར་སྨྲ་བ་ནི་མི་འཐད་ཅིང་གཞི་ཤེས་མཚན་ཉིད་པ་ཉན་རང་ཁོ་ནའི་རྒྱུད་ལ་ཡོད་དེ། མདོར། ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ་ཞེས་སོགས་རྒྱ་ཆེར་འབྱུང་ཞིང༌། ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱིས་ཉེར་ཞིར་ཁྲིད་ཅེས་དང༌། སངས་རྒྱས་ཡེ་ཤེས་ཀྱིས་ད་ནི་འདི་མན་ཆད་བྱང་ཆུབ་གཞན་ཤེས་ནས་སྤང་བར་བྱ་དགོས་པས་ཐམས་ཅད་ཤེས་པ་ཉིད་ཀྱི་མཚན་ཉིད་ཅེས་པ་དང༌། ཆོས་བཤེས་ཀྱིས་སྤང་བྱ་གཞི་ཐམས་ཅད་ཤེས་པ་མེད་པར་གཉེན་པོ་ལམ་ཤེས་པ་མེད་ཅེས་སོགས་དང༌། མདོར། ཐམས་ཅད་ཤེས་པ་ཉིད་ལ་ཤེས་པ་དང་མཐོང་བས་བལྟས་ནས་འདའ་བར་འདོད་པས་ཡུམ་ལ་བསླབ་པར་བྱའོ། །ཞེས་སོགས་དུ་མ་ཡོད་དོ། །ཞེས་དང༌། དེ་ལས། ཉ་ཊཱིཀ་ལས། དེས་ན་ཉན་རང་གི་ལམ་ལྔའམ་ཉན་རང་འཕགས་པ་ཁོ་ན་ལ་ཡོད་ཅིང་གཉེན་པོ་གཞི་ཤེས་ཞེས་པ་ནི་སྤང་བྱའི་མིང་གིས་བཏགས་པ་སྟེ་འདོད་ཁམས་ཀྱི་ལམ་བདེན་བཞིན་ནོ། །དེས་ན་མཁྱེན་གསུམ་ངོ་བོ་ཐ་དད་དུ་རད་ཀིར་དང་ལོ་ཆེན་གྱིས་བཤད་ཅིང་བུ་སྟོན་རིན་པོ་ཆེ་བཞེད་དེ་མདོ་བསྟན་བཅོས་ཀྱི་དགོངས་པར་ངེས་སོ། །ཞེས་གསུངས་པའི་ཕྱིར་རོ། །ཐེག་པ་གསུམ་གྱི་ལམ་ཐམས་ཅད་རྫས་སྤྱི་སོགས་ཅོད་ན་མཁྱེན་པ་གསུམ་པོ་གང་རུང་ཡིན་པས་ཁྱབ་སྟེ། ཉ་ཊཱིཀ་ལས། གོ་རིམ་ཇི་ལྟ་བ་བཞིན་སྦྱར་ན། ཉན་ཐོས་དང་རང་སངས་རྒྱས་ཀྱི་མངོན་རྟོགས་མཐའ་དག་གཞི་ཤེས་ཀྱིས་བསྡུས། བྱང་ཆུབ་སེམས་དཔའི་མངོན་རྟོགས་མཐའ་དག་ལམ་ཤེས་ཀྱིས་བསྡུས། བླ་ན་མེད་པའི་སངས་རྒྱས་ཀྱི་མངོན་རྟོགས་མཐའ་དག་རྣམ་མཁྱེན་གྱིས་བསྡུས་པས་ན། ཐམས་ཅད་མཁྱེན་པ་ཉིད་གསུམ་གྱིས་འཕགས་བཞིའི་མངོན་པར་རྟོགས་པ་མཐའ་དག་བསྡུས་པས་ནའོ་ཞེས་སྦྱར་རོ། །ཞེས་དང༌། དེ་ལས། དེས་ན་མཁྱེན་གསུམ་གྱིས་ཉན་རང་གཉིས་བྱང་སེམས་སངས་རྒྱས་ཀྱི་མངོན་རྟོགས་ཀུན་བསྡུས་ཞེས་པའང་ཡིན་པའི་ཚུལ་གྱིས་བསྡུས་པ་ཡིན་གྱི་དེ་མིན་དེར་བསྡུས་པ་མིན་ནོ། །ཞེས་གསུངས་པའི་ཕྱིར་རོ། །

གསུམ་པ་ཆེན་པོ་གསུམ་གྱི་རང་བྱུང་གི།ཞེས་པའི་ཆེན་པོ་གསུམ་གྱི་དོན་དང༌།ཆེད་དུ་བྱ་བ་ཤེས་པ།

གསུམ་པ་ཆེན་པོ་གསུམ་གྱི་རང་བྱུང་གི།ཞེས་པའི་ཆེན་པོ་གསུམ་གྱི་དོན་དང༌།ཆེད་དུ་བྱ་བ་ཤེས་པར་བྱ།།ཞེས་པའི་ཆེད་དུ་བྱ་བའི་མཚན་ཉིད་དང༌།གང་གི་ཆེད་ཡིན་ཚུལ་ཇི་ལྟར་ཡིན་ཞེས་པའི་ལན།

དང་པོ་དྲི་བ་ནི། ཆེན་པོ་གསུམ་གྱི་རང་བྱུང་གི ། ཞེས་པའི་ཆེན་པོ་གསུམ་གྱི་དོན་དང༌། ཆེད་དུ་བྱ་བ་ཤེས་པར་བྱ། །ཞེས་པའི་ཆེད་དུ་བྱ་བའི་མཚན་ཉིད་དང༌། གང་གི་ཆེད་ཡིན་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ནི། ཟུར་དང་པོ་ཆེན་པོ་གསུམ་གྱི་དོན་ནི། སྔོན་མེད་ལེགས་བཤད་ལས། མདོ་ལས། བྱང་ཆུབ་སེམས་དཔའི་སྒྲ་བཤད་ཀྱི་དབང་དུ་མཛད་ནས། སེམས་དཔའ་དང་སེམས་དཔའ་ཆེན་པོའི་སྒྲ་བཤད་ཀྱིས་སེམས་ཆེན་པོ་དང༌། བྱང་བའི་སྒྲ་བཤད་ཀྱིས་སྤོང་བ་ཆེན་པོ་དང༌། ཆུབ་པའི་སྒྲ་བཤད་ཀྱིས་རྟོགས་པ་ཆེན་པོ་བསྟན་ཏེ། མདོ་རྒྱས་པ་ན། བཅོམ་ལྡན་འདས་ཀྱིས་སེམས་ཆེན་པོ་དང༌། ཤཱ་རིའི་བུས་སྤོང་བ་ཆེན་པོ་དང༌། རབ་འབྱོར་གྱིས་རྟོགས་པ་ཆེན་པོ་རྣམས་གསུངས་ལ། ཡོན་ཏན་རིན་པོ་ཆེ་སྡུད་པ་ལས། ཅི་ཕྱིར་དེ་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང༌། སེམས་ཅན་ཁམས་ཀྱི་ལྟ་རྣམས་ཆེན་པོ་གཅོད་པ་སྟེ། །དེ་ཕྱིར་འདི་ནི་སེམས་དཔའ་ཆེ་ཞེས་རབ་བརྗོད་དེ། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། །གོ་ཆ་ཆེན་པོ་བསྒོས་ཤིང་བདུད་ཀྱི་སྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་བརྗོད་པ་ཡིན། །ཅེས་གསུངས་ཏེ། འཇིག་རྟེན་པ་རྣམས་དང༌། ཉན་ཐོས་དང་རང་རྒྱལ་དང་བྱང་ཆུབ་སེམས་དཔའ་ཐམས་ཅད་ཀྱི། ཡོན་ཏན་གྱི་ཚོགས་རྣམས་ལས་ཇི་ལྟར་འོས་འོས་སུ་སྐད་ཅིག་རེ་རེ་བཞིན་མ་ཐོབ་པ་རྣམས་ཐོབ་པར་བྱེད། ཐོབ་པ་རྣམས་སྤེལ་བར་བྱེད་པའི་འཇུག་པ་སེམས་བསྐྱེད་དང་ལྡན་པས་སེམས་ཅན་གཞན་ཐམས་ཅད་ཀྱི་གཙོ་བོ་དང་མཆོག་ཏུ་གྱུར་པ་ནི་སེམས་ཆེན་པོའོ། །བདག་ཉིད་ཀྱིས་གཞན་ལ་ཆོས་བསྟན་པས། དེ་རྣམས་ཀྱི་བདག་ལྟ་དང་མཐར་ལྟ་ལ་སོགས་པ་ལྟ་སྨོས་ཀྱང་ཅི་དགོས། ལམ་དང་འབྲས་བུ་ལ་འཛིན་པའི་དམིགས་པའི་ལྟ་བ་ཐམས་ཅད་ཀྱང་སྤོང་བར་བྱེད་པ་ནི་སྤོང་བ་ཆེན་པོ་དང༌། སྦྱིན་པ་ཆེན་པོ་ལ་སོགས་པ་གཞན་ལ་མེད་པའི་ཁྱད་ཆོས་དཔག་ཏུ་མེད་པ་མངའ་བ་རྣམས་ལ་ཡང༌། ཆོས་དབྱིངས་ཀྱི་རང་བཞིན་རྟོགས་པའི་སྟོབས་ཀྱིས་མ་ཆགས་པ་ནི་རྟོགས་པ་ཆེན་པོ་སྟེ། རི་རབ་ལ་མངོན་པར་དམིགས་ན་ནྱ་གྲོ་དྷའི་སྡོང་པོ་ལ་ཆེ་བའི་བློ་མི་སྐྱེ་བ་བཞིན་ནོ། །ཞེས་དང༌། ཉ་ཊཱིཀ་ལས། །སེམས་ཅན་གྱི་ཕུང་བོ་ཆེན་པོ་དང་སེམས་ཅན་གྱི་སྡེ་ཆེན་པོ་ཀུན་གྱི་མཆོག་ཉིད་དུ་བྱེད་པར་འགྱུར་བའི་ཕྱིར་སེམས་ཆེན་པོ་ཞེས་བྱའོ། །ཞེས་སོ། །ལྟ་བ་ཐམས་ཅད་སྤང་བའི་ཕྱིར་ཆོས་སྟོན་པར་བྱེད་པ་ནི་སྤོང་བ་ཆེན་པོ་སྟེ། ཐབས་མཁས་པས་ལྟ་བའི་རྣམ་པ་དེ་དག་སྤང་བའི་ཕྱིར་མི་དམིགས་པའི་ཚུལ་གྱིས་ཆོས་སྟོན། ཞེས་སོ། །ཚོགས་ལམ་ནས་སངས་རྒྱས་ཉིད་ཀྱི་བར་དུ་ཆགས་པ་མེད་པར་ཆོས་ཐམས་ཅད་རྟོགས་པ་རྟོགས་པ་ཆེན་པོ་སྟེ། ཞེས་དང༌། ཆེན་པོ་གསུམ་སློབ་ལམ་ནའང་ཡོད་ཅིང༌། ཞེས་གསུངས་སོ། །འོན་ཀྱང་ལུང་དེ་གཉིས་ཀྱི་ཚིག་ཟིན་ཅུང་མི་འདྲ་བས་སེམས་ཆེན་པོ་ལ་ཡེ་ཤེས་ཀྱི་ཁྱབ་བ་ཡོད་མེད་དང༌། བྱང་སེམས་དེ་སེམས་ཆེན་པོ་ཡིན་མིན་དང༌། སྤོང་བ་ཆེན་པོ་ལ་ལྟ་བ་སྤང་ཕྱིར་ཆོས་སྟོན་པར་བྱེད་པ་དང། ལྟ་བ་སྤོང་བར་བྱེད་པ་གཉིས་གང་འཇོག་དང།རྟོགས་པ་ཆེན་པོ་ལ་ཆོས་དབྱིངས་རྟོགས་སྟོབས་ཀྱིས་མ་ཆགས་པ་དང༌། ཆགས་པ་མེད་པར་ཆོས་ཐམས་ཅད་རྟོགས་པ་གཉིས་གང་འཇོག་དཔྱད། དྲི་ཟུར་གཉིས་པ་ཆེད་དུ་བྱ་བའི་མཚན་ཉིད་ནི། བྱང་སེམས་ཀྱི་སྤྱད་པ་སྤྱོད་པའི་ཐོབ་བྱའི་འདོད་དོན་དུ་གྱུར་བའི་ཐེག་ཆེན་གྱི་ཡོན་ཏན། མཚན་གཞི་ནི། བྱང་སེམས་ཀྱི་མཐོང་སྒོམ་དང༌། མི་སློབ་ལམ་དང༌། སྐུ་བཞི་སོགས་སོ། །མཚན་ཉིད་དང་མཚན་གཞི་དེ་ལྟར་འཐད་དེ། མདོ་ལུགས་མ་ལས། དེ་ལ་ཆེད་ནི་གང༌། བྱ་བ་ནི་གང་ཞེ་ན། ཆེད་ནི་ཆེན་པོ་གསུམ་གྱི་ཆེད་ཡིན་ལ། །བྱ་བ་ནི་སེམས་དཔའ་ཆེན་པོ་ཞེས་པ་འདི་ཡིན་ནོ། །བྱང་ཆུབ་སེམས་དཔའ་ལ་དོན་གང་གིས་ཆེད་དུ་སེམས་དཔའ་ཆེན་པོ་ཞེས་ཟེར་བའི་རྒྱུ་ནི། སེ༷མས་ཅ༷ན་ཀུ༷ན་གྱི་མཆོ༷ག་ཉི༷ད་དུ་གྱུར་པའི་སེ༷མས་ཆེན་པོ་ད༷ང༌། སྤོ༷ང་བ་ཆེན་པོ་ད༷ང༌། རྟོ༷གས་པ༷་ཆེ༷ན་པོ༷་སྟེ། གསུ༷མ་དང་ལྡན་པའི་བྱང་ཆུབ་སེམས་དཔའ་ཆེ༷ན་པོ༷་གསུ༷མ་གྱི༷་ར༷ང་བྱུ༷ང་དེ། རང་བཞིན་གྱི་ཆེ༷ད་དུ༷་བྱ༷་བ༷། སེམས་དཔའ་ཆེན་པོ་ཞེས་སྨོས་པ་འདི༷་ཤེ༷ས་པར་བྱ༷འོ། །དེས་ན་ཅིའི་ཆེད་དུ་ཞེས་པ་དང༌། ཅིའི་སླད་དུ་ཞེས་པ་དང༌། ཅིའི་དོན་དུ་ཞེས་པ་དང༌། ཅིའི་ཕྱིར་དུ་ཞེས་པ་རྣམས་དོན་གཅིག་གོ ། གཅིག་པ་དེའི་ཕྱིར་སྐབས་འདིའི་ཆེད་དུ་བྱ་བའི་དགོས་པ་ནི་དེ་ཡིན་དེ་ཡོན་ཏན་རིན་ཆེན་སྡུད་པ་ལས། ཅི་ཕྱིར་དེ་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང༌། །སེམས་ཅན་ཁམས་ཀྱི་ལྷ་རྣམས་ཆེན་པོ་གཅོད་པ་སྟེ། །དེ་ཕྱིར་འདི་ནི་སེམས་དཔའ་ཆེ་ཞེས་བརྗོད་པ་ཡིན། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་བརྗོད་པ་ཡིན། །ཞེས་དང༌། མདོ་ལས་ཀྱང་བཅོམ་ལྡན་འདས་བྱང་ཆུབ་སེམས་དཔའ་ལ་སེམས་དཔའ་ཆེན་པོ་ཞེས་བགྱི་བ། ཅིའི་སླད་དུ། སེམས་དཔའ་ཆེན་པོ་ཞེས་བགྱི། བཀའ་སྩལ་པ། རབ་འབྱོར།སེམས་ཅན་གྱི་ཕུང་པོ་ཆེན་པོ་དང༌། སེམས་ཅན་གྱི་རིས་ཕལ་མོ་ཆེའམ་ཕལ་བྱེད་པར་འགྱུར་བས། དེའི་ཕྱིར་བྱང་ཆུབ་སེམས་དཔའ་ལ་སེམས་དཔའ་ཆེན་པོ་ཞེས་བྱའོ། །ཞེས་པ་ལ་སོགས་པས་བཅོམ་ལྡན་འདས་ཀྱིས་སེམས་དཔའ་ཆེན་པོ་ཞེས་པའི་རྒྱུ་མཚན་སེམས་ཆེན་པོ་གསུངས་ཤིང༌། ཤཱ་རིའི་བུས་སེམས་དཔའ་ཆེན་པོ་ཞེས་པའི་རྒྱུ་མཚན་སྤོང་བ་ཆེན་པོ་གསུངས་ལ། རབ་འབྱོར་གྱིས་སེམས་དཔའ་ཆེན་པོ་ཞེས་བརྗོད་པའི་རྒྱུ་མཚན་རྟོགས་པ་ཆེན་པོ་གསུངས་པ་དེ་ཉིད། རྗེ་བཙུན་བྱམས་པ་མགོན་པོས་སྐབས་འདིར་ཆེད་དུ་བྱ་བ་ཞེས་པའི་ཚིག་གིས་གསུངས་སོ། །དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས་ཀྱང༌། བྱང་ཆུབ་སེམས་དཔའ་ལ་ཅིའི་སླད་དུ་སེམས་དཔའ་ཆེན་པོ་ཞེས་བགྱི་ཞེས་བྱ་བ་ནི་ཅིའི་ཕྱིར་སེམས་དཔའ་ཆེན་པོའི་མིང་དུ་བརྗོད་ཅེས་བྱ་བའི་ཐ་ཚིག་གོ ། ཞེས་དང༌། །སྔོན་མེད་ལེགས་བཤད་ལས། ཆེད་དུ་བྱ་བ་ནི་སྒྲུབ་པ་བྱེད་པའི་སྐབས་ཀྱི་འདོད་དོན་ཏེ། འདི་ལ་རྒྱ་བོད་ཕལ་ཆེར་སངས་རྒྱས་ཀྱི་སས་བསྡུས་པའི་སྤངས་རྟོགས་འཕྲིན་ལས་གསུམ་མམ་སྐུ་བཞིའམ། མཁྱེན་གསུམ་སོགས་ཆེན་པོ་གསུམ་དང་སྦྱོར་བ་ཞིག་སྣང་ཡང༌། དེའི་ཐད་ཀྱི་མདོ་དང་མི་མཐུན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་སྒྲ་བཤད་སངས་རྒྱས་ལ་སྦྱོར་བ་ཡང༌། འཚམ་པ་ལས་འདས་པའི་བཤད་པ་ཡིན་པས། འདི་ནི་བྱང་ཆུབ་སེམས་དཔའ་ཉིད་ཀྱི་སྤྱད་པ་སྤྱོད་པའི་ཚེ། འཕྲལ་འཕྲལ་དུ་དགོས་པའི་འདོད་དོན་ཡིན་གྱི། མཐར་ཐུག་གི་ཆེད་དུ་བྱ་བ་ཁོ་ན་མ་ཡིན་ནོ། །ཞེས་པ་ནས། འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་གང་སྤྱོད་ཀྱང༌། འཕྲལ་འཕྲལ་དུ་ཆེད་གཏད་སྦྱོར་དགོས་པས། ཆེད་དུ་བྱ་བ་ཞེས་བྱ་སྟེ། འཕྲལ་འཕྲལ་དུ་བྱེད་དགོས་རྒྱུའི་དོན་ནོ། །ཞེས་གསུངས་སོ། །ཡང་ཉ་ཊཱིཀ་ལས། སྒྲུབ་པའི་ཆེད་དུ་བྱ་བ་དག་གི་མཚན་ཉིད་ནི། གང་གི་དོན་དུ་སྒྲུབ་པ་བྱེད་པའི་འབྲས་བུ་མཐར་ཐུག་སྟེ། སྡུད་འགྲེལ་དུ། སྐད་ཅིག་མ་བསྟན་ནས། དེའི་རྗེས་ལ་རྣམ་པ་ཐམས་ཅད་མངོན་དུ་བྱེད་པ་ཆེད་དུ་བྱ་བ་གསུམ་མངོན་སུམ་དུ་བྱས་ནས་རྟོགས་པ་དེ་ཉིད་ནི་སངས་རྒྱས་ཀྱི་ས་ཀུན་ཏུ་འོད་ལ་ཆོས་སྐུར་བྱང་ཆུབ་ཅེས་ཏེ་འོག་ཏུ་རྒྱས་པར་བྱའོ། །དབྱེ་ན། གཞན་དོན་སྤངས་རྟོགས་གསུམ་ཞེས་ཤེར་འབྱུང་ངོ༌། །ཞེས་དང༌། དེས་ན་འདིར་བཤད་ཆེད་དུ་བྱ་བ་ནི་ཆེན་པོ་གསུམ་གྱིས་སྒྲུབ་བྱ་ཡིན་ཞིང་སངས་རྒྱས་ཉིད་ལ་ཟེར་བས་ཆོས་སྐུའི་བདག་ཉིད་ཀྱི་འབྲས་བུ་ཆེད་དུ་བྱ་བ་ཞེས། ཤཱནྟི་གཞོན་ནུ་དཔལ་སོགས་ཟེར་བ་འཐད་ལ་ཆེན་པོ་གསུམ་སློབ་ལམ་ནའང་ཡོད་ཅིང༌། ཁ་ཅིག་དེ་ཡོད་པས་ཆེད་དུ་བྱ་བ་སློབ་ལམ་ན་ཡོད་ཅེས་གསུང་བ་ནི། གསུམ་དང་ཆེད་དུ་བྱ་བའི་ཁྱད་མ་ཕྱེད་པར་སྣང་ཞིང༌། ཁ་ཅིག་ཁྱད་མེད་དུ་བྱས་ནས་སངས་རྒྱས་ས་ཁོ་ནར་སྦྱོར་བའང་མདོ་མ་མཐོང་བར་ཟད་དོ། །ཞེས་གསུངས་པ་མི་འཐད་པར་ཐལ། སྐབས་འདིའི་ཆེད་དུ་བྱ་བ་ལ་མཐར་ཐུག་གི་ཡོན་ཏན་ཞིག་མི་དགོས་པའི་ཕྱིར། དེར་ཐལ། མདོ་ལུགས་མའི་ལུང་སྔར་བཀོད་པ་དེ་དག་དང༌། ཡང་དེ་ལས། སྐབས་དང་པོ་འདིར་ཆེད་དུ་བྱ་བ་མི་གཅིག་པ་གསུམ་བསྟན་པ་ལ། སྔར་ནི་ཆེན་པོ་གསུམ་གྱི་ཆེད་དུ་བྱ་བ་ནི་སེམས་དཔའ་ཆེན་པོ་ཡིན་ལ་འཇུག་སྒྲུབ་ཀྱི་སྐབས་སུ་བསྒོམ་པ་རྣམ་པར་གཞིག་པའི་ཆེད་དུ་བྱ་བ་ནི་ནང་སྟོང་པ་ཉིད་ལ་སོགས་པ་བསྒོམ་པ་ཡིན་ཞིང༌། འདིར་ནི་ཟིལ་གྱིས་མནན་ནས་ངེས་པར་འབྱུང་བའི་ཆེད་དུ་བྱ་བ་ནི་ངེས་འབྱུང་སྒྲུབ་པའི་ངོ་བོ་ཐེག་ཆེན་ལ་ཐེག་པ་ཆེན་པོ་ཞེས་པ་འདི་ཡིན་ནོ། །འདི་དག་གི་ཁྱད་པར་མ་ཕྱེ་ན་མདོ་དང་འགལ་བར་འགྱུར་རོ། །ཞེས་དང༌། ཉ་ཊཱིཀ་ལས། རྩ་བ་ནི། གང་གི་དོན་དུ་ཚོགས་གཉིས་བསྐྱེད་ཅིང་སོག་པ་ནི་ཆེད་དུ་བྱ་བ་སྟེ་འདི་ཤེས་པར་བྱའོ། །ཞེས་གསུངས་སོ། །དེས་ན་ཉ་ཊཱིཀ་ལས་ཆེད་དུ་བྱ་བའི་མཚན་ཉིད་གསུངས་པ་དེ་ནི་སྡུད་འགྲེལ་ལྟར་བཤད་པ་ཡིན་པར་སྣང་ངོ༌། །ཆེད་དུ་བྱ་བ་ལ་རྟག་དངོས་གཉིས་དང༌། དངོས་པོ་གྱུར་བའི་ཆེད་དུ་བྱ་བ་ལ་གཟུགས་ཤེས་ལྡན་མིན་གསུམ་ཡོད་དམ་བརྟགས་པར་བྱའོ། །གོང་དུ་བཀོད་པ་ལྟར་མདོ་ལུགས་མའི་ཚིག་ཟིན་ལ་ཆེད་དུ་བྱ་བ་ནི་སེམས་དཔའ་ཆེན་པོ་ལ་སྦྱར་བ་དང༌། སྔོན་མེད་ལེགས་བཤད་ལས། ཆེད་དུ་བྱ་བ་ནི་སྒྲུབ་པར་བྱེད་པའི་སྐབས་ཀྱི་འདོད་དོན་ལ་བཤད་པ་དང༌། ཉ་ཊཱིཀ་གི་ཚིག་ཟིན་ལ་འདིར་བཤད་ཆེད་དུ་བྱ་བ་ནི་ཆེན་པོ་གསུམ་གྱིས་སྒྲུབ་བྱ་ཡིན་ཞིང་སངས་རྒྱས་ཉིད་ལ་བཤད་པ་དེ་དག་གི་དགོངས་པ་འགལ་མེད་དུ་སྒྲུབ་པ་ལ་འབད་པར་བྱ་རྒྱུ་ཡོད་མེད་དཔྱད་པར་བྱའོ། །དྲི་ཟུར་གསུམ་པ་གང་གི་ཆེད་ཡིན་ཚུལ་ཇི་ལྟར་ཡིན་པ་ནི། ཆེན་པོ་གསུམ་མ་ཐོབ་པ་རྣམས་ཐོབ་པ་དང་ཐོབ་ཟིན་གནས་པའི་འདོད་དོན་ཡིན་པའོ། །འོན་ཀྱང་དཔྱད་རྒྱུ་དུ་མ་སྣང་ངོ༌། །

བཞི་བ་གོ་སྒྲུབ་ཀྱི་མཚན་ཉིད་དང༌།གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌།བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའི་ལན།

བཞི་བ་གོ་སྒྲུབ་ཀྱི་མཚན་ཉིད་དང༌།གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌།བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའི་ལན།

གོ་སྒྲུབ་ཀྱི་མཚན་ཉིད་དང༌། གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌། བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའོ། །གཉིས་པ་ལན་ནི། གོ་སྒྲུབ་ཀྱི་མཚན་ཉིད། ཕར་ཕྱིན་ཉམས་སུ་ལེན་པར་གོ་བགོས་པའི་སེམས་དཔའི་མངོན་རྟོགས། འདིར་དངོས་བསྟན་གྱི་གོ་སྒྲུབ་ཀྱི་མཚན་ཉིད། ཕར་ཕྱིན་དྲུག་ལྡན་དུ་ཉམས་སུ་ལེན་པར་གོ་བགོས་པའི་སེམས་པའི་མངོན་རྟོགས། མཚན་གཞི ཕར་ཕྱིན་དྲུག་གི་ཉམས་ལེན་གྱི་ལམ་ལྟ་བུའོ། །མཚན་ཉིད་འཇོག་ཚུལ་དེ་ལྟར་འཐད་དེ། ཉ་ཊཱིཀ་ལས། མི་མཐུན་ཕྱོགས་ཀྱིས་མི་ཚུགས་པའི་གོ་ཆའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག་བསམ་པའི་བྱ་བ་སྟེ། གནོད་འཇོམས་སུ། གོ་ཆ་ཆེན་པོ་བགོས་པ་ཞེས་བྱ་བ་ནི་སེམས་དང་པོ་ནས་གཟུང་སྟེ་བསམ་པ་རྒྱ་ཆེ་བར་བསྟན་པའོ་ཞེས་སོ། །ས་བཅུ་བའི་འགྲེལ་བར། དེ་ལ་གོ་ཆ་ནི་སྨོན་པའོ། །ཞེས་དབྱིག་གཉེན་གྱིས་སོ། །དབྱེ་ན་དྲུག་གམ་སོ་དྲུག་གོ ། འདིར་སྨོས་གོ་སྒྲུབ་ཀྱི་མཚན་ཉིད། གང་ཞིག་ཕྱིན་དྲུག་རེ་རེར་དྲུག་དྲུག་ཚང་བར་ཉམས་སུ་ལེན་པར་གོ་བགོས་པའོ། །ཞེས་གསུངས་སོ། །དེ་ལ་ཡང་མདོ་ལུགས་མ་ལས། གོ་ཆའི་སྒྲུབ་པ་འདི་ནི་སེམས་བསྐྱེད་པ་ཉིད་ནས་རྩོམ་སྟེ། བསམ་པ་རྒྱ་ཆེ་བ་ཉིད་གཙོ་བོར་བྱུང་ཞིང༌། མདོ་སྡེ་རྒྱན་ལས་ཀྱང༌།གནས་ཆེན་པོ་སེམས་བསྐྱེད་པ་ལ་གནས་ཞེས་གསུངས་པའི་ཕྱིར་རོ། །མདོ་ལས་ཀྱང་སེམས་ཅན་ཉུང་ཟད་ཉི་ཚེ་བའི་དོན་དུ་བྱང་ཆུབ་ཀྱི་ཕྱིར་མི་སྤྱོད་ཅིང་སེམས་ཅན་ཐམས་ཅད་ཀྱི་དོན་དུ་ཕར་ཕྱིན་དྲུག་ལ་སྤྱོད་ཅེས་བསམ་པ་རྒྱ་ཆེན་བསྟན་པའི་ཕྱིར་རོ། །འཇུག་པའི་བསྒྲུབ་པ་ནི། སྦྱོར་ལམ་ཉིད་ནས་རྩོམ་སྟེ། སྐབས་འདིར་ཚེ་དང་ལྡན་པ་གང་བོས་ཞུ་བ་གསུམ་གསོལ་བ་ལས་དང་པོ་པའི་ལམ་གྱིས་གོ་སྒྲུབ་དང༌། ཕྱི་མ་གཉིས་ཀྱིས་འཇུག་སྒྲུབ་བསྟན་ལ། ཞུ་བ་བར་བ་ནི་ཐེག་པ་ཆེན་པོ་ལ་ཡང་དག་པར་ཞུགས་པ་ལགས། ཞེས་པ་ལ་གནོད་འཇོམས་ལས། ཞེས་བྱ་བ་ནི་མོས་པ་སྤྱོད་པའི་ས་ནས་བཟུང་སྟེ། ས་བདུན་བའི་བར་དུ་རྩོལ་བ་དང་བཅས་པ་རྣམ་པ་རྟོག་པ་དང་བཅས་པའི་སྤྱོད་པའི་གནས་སྐབས་ཡིན་པར་བསྟན་ཏོ། །ཞེས་སོ། །ཚོགས་ཀྱི་བསྒྲུབ་པ་ནི་ས་བཅུ་ལ་ཞུགས་པ་ཉིད་ཡིན་པར་མདོ་ལས་བྱུང་ངོ༌། །ངེས་འབྱུང་བསྒྲུབ་པ་ནི། ལྷ་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་མནན་ནས་ཁམས་གསུམ་ནས་ངེས་པར་འབྱུང་ཞིང་རྣམ་མཁྱེན་དུ་གནས་ཞེས། མདོ་ལས་བྱུང་བའི་ཕྱིར། རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མའི་སྦྱོར་བའི་རང་བཞིན་ནོ། །ཞེས་དང༌། ཉ་ཊཱིཀ་ལས། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། དེ་ལ་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་བའི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། གཉིས་པ་ལ་སོགས་པའི་རང་བཞིན་ནི་སྒོམ་པའི་ལམ་གྱི་ངོ་བོ་ཉིད་ཡིན་ཞིང་གཉེན་པོའི་ཕྱོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་སོ། །ཞེས་དང༌། ས་བཟང་གི་རྒྱན་གྱི་རྣམ་བཤད་ལས། རྣམ་དབྱེ་ནི་ལས་དང་པོ་པའི་ས་དང༌། དད་པའི་ས་དང༌། ཐར་བ་ཆ་མཐུན་དང༌། གོ་ཆའི་སྒྲུབ་པ་ལ་སོགས་པའོ། །ཞེས་དང༌། རྣམ་དབྱེ་ནི་མོས་པས་སྤྱོད་པའི་ས་དང༌། སྒོམ་ལམ་ཟག་བཅས་དང༌། ངེས་འབྱེད་ཆ་མཐུན་དང༌། འཇུག་པའི་སྒྲུབ་པ་ལ་སོགས་པའོ། །ཞེས་སོགས་གསུངས་པ་ལ་གོ་སྒྲུབ་ཀྱི་ས་མཚམས་དང་ཉ་ཊཱིཀ་ལས་གོ་སྒྲུབ་ཀྱི་མཚན་ཉིད་བཞག་པ་སོགས་ཀྱི་སྒོ་ནས་དཔྱད་པར་བྱའོ། །གོ་སྒྲུབ་དྲུག་འཇོག་ཚུལ་མང་མོད་ཕན་ཚུན་ཡིན་ཁྱབ་མཉམ་ཡིན་པར་སྣང་སྟེ། མདོ་ལུགས་མ་ལས། སྔར་གོ་བསྒྲུབ་ཏུ་ནི་རང་རང་ལས་ཕྱེ་བ་དྲུག་དྲུག་རང་རང་ལ་སོ་སོར་བསྡུས་པ་ཡིན་ལ། འདིར་ནི་རང་རང་ལས་མ་ཕྱེ་བར་དྲུག་པོ་རེ་རེས་ལྔ་ལྔ་ཕན་ཚུན་བསྡུས་པའི་ཕྱིར་འདི་གཉིས་སྡུད་ཚུལ་གཅིག་ཏུ་འཆད་པ་མདོ་དང་འགལ་ལོ། །ཞེས་དང༌། དེ་ལས། སྦྱིན་པར་གཞན་ལྔ་པོ་བསྡུས་པ་དང༌། ཚུལ་ཁྲིམས་སུ་གཞན་ལྔ་པོ་བསྡུས་པ་ལ་སོགས་པར་ཕར་ཕྱིན་རེ་རེ་ནི་དྲུག་པོ་དེ་དག་རེ་རེས་ལྔ་ལྔ་བསྡུས་པའི་ཚུལ་ཀྱིས་ཕན་ཚུན་ཐམས་ཅད་ཀྱིས་ཐམས་ཅད་བསྡུས་པའི་ཡེ་ཤེས་གང་ཡིན་པ།མཐོང་ལམ་གྱི་སྐད་ཅིག་མ་གཅིག་སྡུག་བསྔལ་ལ་ཆོས་ཤེས་པའི་བཟོད་པ་ཡིས་བསྡུས་པ་སྟེ། ཞེས་གསུངས་པའི་ཕྱིར། ཕར་ཕྱིན་དྲུག་པོ་ཡང་ཕན་ཚུན་བསྡུས་པ་ཡིན་ཏེ། རྒྱན་གྱི་ས་འགྲེལ་ལས། རྣམ་པར་ངེས་པ་བསྟན་པ་ནི། ཕན་ཚུན་བསྡུས་ཕྱིར་རབ་དབྱེའི་ཕྱིར། །ཆོས་ཉིད་ཕྱིར་དང་རྒྱུ་མཚན་ཕྱིར། །ཕ་རོལ་ཕྱིན་དྲུག་རྣམ་ཀུན་ཏུ། །རྣམ་པར་ངེས་པར་ཤེས་པར་བྱ། །ཞེས་ཕན་ཚུན་བསྡུས་པའི་ཕྱིར་རྣམ་པར་ངེས་པ་ནི་མི་འཇིགས་པ་སྦྱིན་པས་ཚུལ་ཁྲིམས་དང་བཟོད་པ་བསྡུས་ཏེ་གནོད་པ་དང་གནོད་ལན་མི་བྱེད་པའི་ཕྱིར་དང༌།ཆོས་ཀྱི་སྦྱིན་པས་བསམ་གཏན་དང་ཤེས་རབ་བསྡུས་ཏེ་དེ་དག་ལ་བརྟེན་ནས་ཆོས་སྟོན་པའི་ཕྱིར་དང༌། དེ་གཉིས་ཀས་བརྩོན་འགྲུས་བསྡུས་ཏེ་དེས་ཆོས་དང་མི་འཇིགས་པ་གཉི་ག་སྦྱིན་པར་བྱེད་པའི་ཕྱིར་དང༌། དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་ཕ་རོལ་ཏུ་ཕྱིན་པ་ཐམས་ཅད་བསྡུས་པ་དང༌། གནོད་པ་ལ་ལན་མི་བྱེད་པའི་བཟོད་པས་མི་འཇིགས་པའི་སྦྱིན་པ་དང་ཚུལ་ཁྲིམས་བསྡུས་པ་ལ་སོགས་པའོ། །ཞེས་དང༌། ཉ་ཊཱིཀ་ལས། ཚུལ་ཁྲིམས་བཟོད་ཕར་གཉིས་མི་འཇིགས་པའི་སྦྱིན་པས་བསྡུས་ཏེ། གཞན་ལ་གནོད་པ་མི་བྱེད་པ་དང་གཞན་གྱིས་བྱས་པ་ལ་བཟོད་པས་ཕ་རོལ་གདུང་བར་མི་བྱེད་པས་སོ། །བརྩོན་འགྲུས་བསམ་གཏན་ཤེས་རབ་ཕར་ཕྱིན་ཆོས་སྦྱིན་གྱིས་བསྡུས་ཏེ། མི་སྐྱོ་བར་བསམ་གཏན་རྣམས་བསྐྱེད་ནས་ཕ་རོལ་ཀྱི་བསམ་པ་ཤེས་ཏེ་ཤེས་རབ་ཀྱིས་ཇི་བཞིན་རྟོགས་ནས་སྟོན་པས་སོ། །ཞེས་ཐུབ་དགོངས་དོན་ནོ། །དགེ་བ་ཆོས་སྡུད་ཀྱིས་ལྔ་བོ་ཐམས་ཅད་བསྡུས་ཏེ། རྒྱུ་མཚན་སླའོ། །སྦྱིན་ཕར་ནི་ཟང་ཟིང་གི་སྦྱིན་པ། གཞན་ལྔ་མི་འཇིགས་པའི་སྦྱིན་པའོ། །ཐམས་ཅད་ཆོས་ཀྱི་སྦྱིན་པ་སྟེ་གཞན་གྱི་སེམས་རྒྱུད་ལ་བསྐྱེད་པས་སོ། །ཞེས་དང༌། ཚུལ་ཕར་ནི་སྦྱིན་ཕར་ཡིན་ལ། སྦྱིན་ཕར་ཡིན་ལ་ཚུལ་ཕར་མིན་པ་ཡོད་དེ། ཚུལ་ཕར་གྱིས་མ་ཟིན་པའི་སྦྱིན་ཕར་རོ། །ཕྱི་མ་འདི་འོག་མ་རྣམས་ལའང་སྦྱར་རོ། །ཞེས་དང༌། སྦྱིན་པ་ཡིན་ལ་སྦྱིན་ཕར་མིན་པ་བྱང་ཆེན་དུ་མ་བསྔོས་པའི་སྦྱིན་པའོ། །གཉིས་ཡིན་བསྔོས་པའོ། །གཉིས་མིན་དེ་གཉིས་མ་གཏོགས་པའོ། །ཤེས་རབ་ཀྱི་བར་ལ་གསུམ་མོ། །ཞེས་པ་རྣམས་ཀུན་བཏུས་འགྲེལ་བར་རོ། །ཐེག་བསྡུས་སུ། སྦྱིན་པ་ཡང་ཡིན་ལ་ཕ་རོལ་ཕྱིན་པ་མིན་པའང་ཡོད་ཅེས་མུ་བཞིའོ་ཞེས་པ་ཙམ་གསུངས་པ་ལ། བཤད་སྦྱར་དུ།དང་པོ་དམ་པ་དྲུག་བྲལ་གྱི་སྦྱིན་པ། གཉིས་པ་དྲུག་ལྡན་གྱི་ཚུལ་ཁྲིམས་སོགས། གསུམ་པ་དྲུག་ལྡན་གྱི་སྦྱིན་པ། གཉིས་མིན་ནི་དྲུག་བྲལ་གྱི་ཚུལ་ཁྲིམས་སོགས་སོ་གཞན་ལ་སྦྱར་རོ། །འདིར་སྦྱིན་པ་དང་ཕར་ཕྱིན་ཞེས་སོགས་སྦྱར་གྱི་སྦྱིན་པའི་ཕར་ཕྱིན་སོགས་མ་སྦྱར་རོ། །ཞེས་དང༌། སྤྱོད་འཇུག་ས་འགྲེལ་ལས། ཕན་ཚུན་རྣམ་པར་ངེས་པ་ནི། ཆོས་དང་ཟང་ཟིང་དང་མི་འཇིགས་པ་གསུམ་གའི་དབང་དུ་བྱས་ན་དྲུག་ཀ་སྦྱིན་པ་ལྟ་བུར་འདུ་ཞིང་དགེ་བ་ཆོས་སྡུད་ཀྱི་ཚུལ་ཁྲིམས་སུའང་ཐམས་ཅད་འདུ་བ་ལྟ་བུ་ཕན་ཚུན་གཅིག་གིས་གཅིག་བསྡུས་པའི་ཕྱིར་དང༌། དྲུག་པོ་རེ་རེ་ཞིང་ཡང་རང་རང་གི་གཞན་རྒྱུད་ལ་འཇོག་པའི་གཏོང་བ་དང༌། མྀ་མཐུན་ཕྱོགས་ཀྱི་གནོད་པ་སྡོམ་པ་དང༌། དཀའ་སྤྱད་ལ་ཅི་མི་སྙམ་པ་དང༌། ཕྱིར་ཞིང་སྤྲོ་བས་འཇུག་པ་དང༌། སོ་སོ་ལ་སེམས་རྩེ་གཅིག་ཏུ་གནས་པ་དང༌། གནས་ལུགས་ཕྱིན་ཅི་མ་ལོག་པར་ཤེས་པ་སྟེ་དྲུག་དྲུག་ཏུ་དབྱེར་ཡོད་པའི་ཕྱིར་དང༌། ཞེས་དང༌། ཞེས་གསུངས་སོ། །ཡང་སྦྱིན་པའི་ཕར་ཕྱིན་དང་ཚུལ་ཁྲིམས་ཀྱི་ཕར་ཕྱིན་ལ་མུ་བཞི་མེད་པར་ཐལ། ཆོས་བཞི་ལྡན་གྱི་གཏོང་སེམས་དང་སྲུང་སེམས་གཉིས་འགལ་བའི་ཕྱིར་ཟེར་ན་དཔྱད། ཕར་ཕྱིན་དྲུག་པོ་ཕན་ཚུན་བསྡུས་ཚུལ་ཉམས་ལེན་དང༌། ཡིན་པའི་ཚུལ་དང༌། ཟིན་པའི་ཚུལ་དང༌། ཕྱོགས་སུ་གཏོགས་པ་དང༌། རྒྱུ་འབྲས་ཀྱི་བསྡུ་ཚུལ་གང་ཡིན་དཔྱད། ཡང་དེ་དྲུག་ཕན་ཚུན་བསྡུས་ན་ཕར་ཕྱིན་དྲུག་གི་གོ་རིམ་ལ། རྒྱན་ལས།སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་དང༌། ས་བཅུ་ལ་ཕར་ཕྱིན་ལྷག་ཚུལ་ལ། ཉ་ཊཱིཀ་ལས། ས་བཅུ་ལ་ཕར་ཕྱིན་བཅུ་རེ་རེ་གཙོ་ཆེར་སྤྱོད་ཅིང་གཞན་ཕལ་བའི་ཚུལ་གྱིས་སྤྱོད་དེ། དབུས་མཐར། ཁྱད་པར་ཅན་དང་ཁྱད་མེད་ནི། །ས་བཅུ་དག་ཏུ་ཤེས་པར་བྱ། །ཞེས་གསུངས་པ་དག་གི་འགྲེལ་ཚུལ་ཇི་ལྟར་ཡིན་དཔྱད་པར་བྱའོ། །སྦྱིན་པའི་ཤེས་རབ་ཀྱི་གོ་སྒྲུབ་དང༌། ཤེས་རབ་ཀྱི་གོ་སྒྲུབ་གཉིས་མི་འགལ་བར་ཐལ།སྦྱིན་པའི་འཁོར་གསུམ་མི་དམིགས་པར་རྟོགས་པའི་ཤེས་རབ་དེ་དེ་གཉིས་ཀ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེ་གཉིས་ཀ་ཡིན་པར་ཐལ། སྦྱིན་པའི་ཤེས་རབ་ཀྱི་གོ་སྒྲུབ་གང་ཞིག ཤེས་རབ་ཀྱི་གོ་སྒྲུབ་ཡིན་པའི་ཕྱིར། ཕྱི་མ་སླ། དང་པོ་གྲུབ་སྟེ། ཉི་ཁྲི་ལས།སྦྱིན་པ་ཡོངས་སུ་གཏོང་བའི་ཚེ་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས། ཆོས་ཐམས་ཅད་ཆོས་ཐམས་ཅད་སྒྱུ་མར་བྱས་པའི་འདུ་ཤེས་ཉེ་བར་གནས་ཏེ། སྦྱིན་པའང་མི་དམིགས། གཏོང་བའང་མི་དམིགས། ལེན་པའང་མི་དམིགས་པར་དགེ་བའི་རྩ་བ་དེའང་སེམས་ཅན་དང་ཐུན་མོང་དུ་བྱས་ཤིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་དམིགས་པའི་ཚུལ་གྱིས་ཡོངས་སུ་བསྔོ་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། སྦྱིན་པ་ཡོངས་སུ་གཏོང་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་གོ་ཆ་སྟེ། ཞེས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས། སྦྱིན་པ་གང་ཡོངས་སུ་གཏོང་བ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱས་ཤིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་དམིགས་པའི་ཚུལ་གྱིས་ཡོངས་སུ་བསྔོ་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་སྦྱིན་པའི་ཕ་རོལ་ཏུ་ཕྱིན་པའི་གོ་ཆའོ། ཞེས་གསུངས་པའི་ཕྱིར་རོ། །འདོད་ན། དེ་ཆོས་ཅན། སྦྱིན་པའི་གོ་སྒྲུབ་ཡིན་པར་ཐལ། སྦྱིན་པའི་ཤེས་རབ་ཀྱི་གོ་སྒྲུབ་ཡིན་པའི་ཕྱིར། ཁྱབ་སྟེ། སྦྱིན་པའི་གོ་སྒྲུབ་དྲུག་སྦྱིན་པའི་གོ་སྒྲུབ་ལ་ཕྱེ་བ་ཡིན་པར་མདོ་ལུགས་མ་ལས་བཤད་པ་ལྟར་རོ། །དེ་དག་གིས་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་མ་ཡིན་པ་ཤེས་པར་བྱའོ། །

ལྔ་བ་བསམ་གཏན་གཟུགས་མེད་སྦྱིན་སོགས་དང༌།།ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌།ཡུལ་གང་ལ་འཇུག་པ།

ལྔ་བ་བསམ་གཏན་གཟུགས་མེད་སྦྱིན་སོགས་དང༌།།ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌།ཡུལ་གང་ལ་འཇུག་པ་དང༌། དེའི་བྱེད་ལས་བསྟན་ཚུལ་ཇི་ལྟར་ཡིན་ཞེས་པའི་ལན།

བསམ་གཏན་གཟུགས་མེད་སྦྱིན་སོགས་དང༌། །ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌། ཡུལ་གང་ལ་འཇུག་པ་དང༌། དེའི་བྱེད་ལས་བསྟན་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ལ་འཇུག་སྒྲུབ་གྱི་ངོ་བོའམ་འཇུག་སྒྲུབ་གྱི་མཚན་ཉིད། ཐེག་ཆེན་སྦྱོར་ལམ་ཡན་གྱི་སྒོམ་བྱུང་གི་རྟོགས་པ་ལ་གནས་པའི་སྐབས་ཀྱི་བྱང་སེམས་ཀྱི་སྒྲུབ་པ་དེ་ཡིན་ཏེ། ཉ་ཊཱིཀ་ལས། འཇུག་པའི་སྒྲུབ་པ་ནི། བྱང་སེའི་སྒྲུབ་པ་གང་ཞིག་སྦྱོར་བའི་བྱ་བ། འདིར་སྨོས་འཇུག་སྒྲུབ་ཀྱི་མཚན་ཉིད། འཇུག་ཡུལ་ཐེག་ཆེན་དགུ་ཆར་རམ་གང་རུང་ལ་འཇུག་ཅིང་འཛེག་པའི་སྒྲུབ་པའོ། །དབྱེ་ན་དགུའོ། །ཞེས་གསུངས་སོ། །འཇུག་ཡུལ་ནི་མདོ་ལུགས་མ་ལས། འཇུག་པའི་བསྒྲུབ་པ་ཞེས་པའི་རྒྱུ་ཅི་ཞེ་ན། རྣམ་ཀུན་མཁྱེན་པའི་ཚུལ་དེ་ཆོས་ཐམས་ཅད་དངོས་པོའི་ངོ་བོ་ཉིད་མེད་པ་ལ་སློབ་ཅིང་འཇུག་པའི་བསྒྲུབ་པ་ཡིན་པའི་ཕྱིར་རོ། །ཞེས་གསུངས་ལ། ཉ་ཊཱིཀ་ལས། དབྱེ་ན་དུ་ཞེ་ན། བསམ་གཏན་གཟུགས་མེད་ནས། རྣམ་ཀུན་མཁྱེན་པའི་ཚུལ་ལ་འཇུག་པའི་སྒྲུབ་པ་ཞེས་དགུའོ། །ཞེས་གསུངས་པ་ལྟར་འཇུག་ཡུལ་དགུ་ཡོད་ན་མདོ་ལུགས་མ་ལས། བསམ་གཏན་གཟུགས་མེད་སྦྱིན་སོགས་དང༌། །ཞེས་པ་ནས། ཆེད་དུ་བྱ་དང་མངོན་ཤེས་དྲུག །ཅེས་པ་རྣམས་ཀྱིས་སྒྲུབ་པའི་ངོ་བོ་སྟོན་ཏོ། །རྣམ་ཀུན་མཁྱེན་པའི་ཚུལ་ལ་ནི། །འཇུག་པའི་བསྒྲུབ་པ་ཞེས་པས་ཡུལ་གང་ལ་འཇུག་པ་སྟོན་ནོ། །ཞེས་འཇུག་ཡུལ་རྣམ་ཀུན་མཁྱེན་པའི་ཚུལ་ལས་གཞན་མ་གསུངས་པའི་རྒྱུ་མཚན་གང་ཡིན་བརྟག་པར་བྱའོ། །འཇུག་ཡུལ་རྣམ་ཀུན་མཁྱེན་པའི་ཚུལ་ལ། ཉ་ཊཱིཀ་ལས། དེ་ནས་འཚང་རྒྱ་བར་སྤྲོ་བས་འབྲས་བུ་རྣམ་པ་ཐམས་ཅད་མཁྱེན་པའི་ཚུལ་ལ་ཡང་དག་པར་གནས་པའི་མཚན་ཉིད་ཀྱི་སྒྲུབ་པ་སྟེ། རྣམ་མཁྱེན་ཉིད་ཐོབ་ནས་ཀྱང་ཆོས་ཀྱི་འཁོར་ལོ་བསྐོར་བར་བྱེད་དོ། །ཞེས་སོ། །ཞེས་གསུངས་མོད་རང་ལུགས་ལ་འཐད་མིན་དཔྱད། ཡང་ཉ་ཊཱིཀ་ལས། ཆེན་པོ་བདུན་དང་ལྡན་པས་འདི་ཐེག་ཆེན་ནོ། །མཚན་གཞི་ནི། དེ་བདུན་ཡང་དེ་ཡིན་ཞིང༌། ཞེས་པ་ནས། ཐེག་ཆེན་གྱི་ས་བཅུ་ལམ་ལྔ་སོགས་མཐའ་ཡས་སོ། །ཞེས་ཆེན་པོ་བདུན་དང་ལམ་ལྔ་ཐེག་ཆེན་ཡིན་པར་གསུངས་པ་ལ་མདོ་ལུགས་མ་ལས། རིགས་པས་དཔྱད་ན་ཅིར་ཡང་མ་གྲུབ་ཙམ་གྱི་སྟོང་ཉིད་ནི་སྙིང་པོ་མེད་པའི་ཕྱིར། ཡེ་ཤེས་དང་ཐེག་ཆེན་མ་ཡིན་ཏེ། ཞེས་དང༌། དེས་ན་སྐབས་འདིའི་སྟོང་ཉིད་ཀྱི་ངོ་བོ་ནི་ཐེག་ཆེན་དང༌། ཡེ་ཤེས་ཡིན་པའི་ཕྱིར་གཞན་སྟོང་ཟབ་མོ་ཡིན་གྱི། དཔྱད་ན་མ་གྲུབ་ཙམ་གྱི་རང་སྟོང་ནི་མ་ཡིན་ཏེ། ཞེས་གསུངས་པས་ཐེག་ཆེན་ཡིན་པ་ལ་ཆེན་པོ་བདུན་ལྡན་དང༌། རང་སྟོང་མ་ཡིན་པ་དགོས་པ་ཡིན་མིན་ཅུང་ཟད་དཔྱད་རྒྱུ་སྣང༌། ཡང་བྱང་སེམས་ཚོགས་ལམ་འཇུག་སྒྲུབ་ཡིན་པར་ཐལ། དེ་བྱང་སེམས་ཀྱི་སྒྲུབ་པ་གང་ཞིག་སྦྱོར་བའི་བྱ་བ་ཡིན་པའི་ཕྱིར། ཁྱབ་སྟེ། ཉ་ཊཱིཀ་ལས། འཇུག་པའི་སྒྲུབ་པ་ནི། བྱང་སེའི་སྒྲུབ་པ་གང་ཞིགསྦྱོར་བའི་བྱ་བ། དབྱེ་ན་དགུའོ། །ཞེས་གསུངས་པས་སོ་ཞེ་ན། ཚོགས་ལམ་ལ་འཇུག་སྒྲུབ་ཡོད་པ་མི་འཐད་དེ། འཇུག་སྒྲུབ་ཀྱི་ས་མཚམས་ཉ་ཊཱིཀ་ལས། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། དེ་ལ་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཞེས་དང༌། མདོ་ལུགས་མ་ལས། འཇུག་པའི་བསྒྲུབ་པ་ནི། སྦྱོར་ལམ་ཉིད་ནས་རྩོམ་སྟེ། སྐབས་འདིར་ཚེ་དང་ལྡན་པ་གང་བོས་ཞུ་བ་གསུམ་གསོལ་བ་ལས་དང་པོ་པའི་ལམ་གྱིས་གོ་སྒྲུབ་དང༌། ཞེས་དང༌། ཕར་ཕྱིན་དོན་བསྡུས་ལས། འཇུག་སྒྲུབ་ཀྱི་མཚན་ཉིད། གང་ཞིག སྦྱོར་བའི་བརྩོན་འགྲུས་ཅན་གྱི་བྱ་བ། དབྱེ་ན་དགུ། ས་མཚམས་དྲོད་ནས་རྒྱུན་མཐའི་བར་ན་ཡོད།ཅེས་སོགས་ཚོགས་ལམ་ན་འཇུག་སྒྲུབ་ཡོད་པར་གཞུང་ཚད་ཐུབ་གང་ལས་མ་བཤད་པས་སོ། །རྩ་བར། ཐེག་ཆེན་ལ། །འཛེག་པ་ཡིན་པར་ཤེས་པར་བྱ། །ཞེས་པས་འཇུག་སྒྲུབ་ཀྱི་བྱེད་ལས་བསྟན་ཚུལ་ནི། མདོ་ལུགས་མ་ལས། ལས་ཅི་ཞིག་བྱེད་པར་ཤེས་པར་བྱ་ཞེ་ན། ཐེག་ཆེན་ལ་འཛེག་པ་ཡིན་པར་ཤེས་པར་བྱའོ། །ཁྲི་བརྒྱད་སྟོང་པ་ལས་དེ་ཐེག་པ་ཆེན་པོ་དེ་ལ་ཞོན་ཏེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སངས་རྒྱས་ཀྱི་ཞིང་དག་པར་བྱེད། སེམས་ཅན་ཡོངས་སུ་སྨིན་པར་བྱེད་ཅེས་གསུངས་སོ། །མདོ་ལས་ཞོན་ཞེས་པར་འབྱུང་ཞིང་འདིར་འཛེགས་ཅེས་པར་འབྱུང་ངོ༌། །ཞེས་དང༌། ཉ་ཊཱིཀ་ལས། གང་དུ་ན། ཐེག་ཆེན་ལ་དང་པོར་འཇུག་ཅིང་ཕྱིས་གོང་ནས་གོང་དུ་ཁྱད་པར་རྟོགས་པས་འཛེག་པ་ཡིན་པར་རོ། །ཞེས་གསུངས་པའི་ཕྱིར་རོ། །

དྲུག་པ་བསམ་གཏན་གྱི་དངོས་གཞི་བཞི་པོ་སོ་སོ་ལ་ཡན་ལག་གང་དང་གང་ལྡན་ཚུལ་དང༌།བསམ་གཏན་གྱི་དངོས་གཞི་ཐོབ་པ་ལ་འོག་ས་ལ་ཆགས་བྲལ་དགོས་སམ་ཇི་ལྟར་ཡིན་ཞེས་པ་ལན།

དྲུག་པ་བསམ་གཏན་གྱི་དངོས་གཞི་བཞི་པོ་སོ་སོ་ལ་ཡན་ལག་གང་དང་གང་ལྡན་ཚུལ་དང༌།བསམ་གཏན་གྱི་དངོས་གཞི་ཐོབ་པ་ལ་འོག་ས་ལ་ཆགས་བྲལ་དགོས་སམ་ཇི་ལྟར་ཡིན་ཞེས་པ་ལན།

བསམ་གཏན་གྱི་དངོས་གཞི་བཞི་པོ་སོ་སོ་ལ་ཡན་ལག་གང་དང་གང་ལྡན་ཚུལ་དང༌། བསམ་གཏན་གྱི་དངོས་གཞི་ཐོབ་པ་ལ་འོག་ས་ལ་ཆགས་བྲལ་དགོས་སམ་ཇི་ལྟར་ཡིན་ཞེས་པའོ། །གཉིས་པ་ལན་ནི། བསམ་གཏན་གྱི་དངོས་གཞི་བཞི་པོ་སོ་སོ་ལ་ཡན་ལག་གང་དང་གང་ལྡན་པ་ལ། མཛོད་ལས། དང་པོ་ལ་ལྔ་རྟོག་དཔྱོད་དང༌། །དགའ་དང་བདེ་དང་ཏིང་འཛིན་རྣམས། །ཞེས་གསུངས་པ་ལྟར་བསམ་གཏན་དང་པོ་ལ་ཡན་ལག་ལྔ་ལས་༡རྟོག་༢དཔྱོད་གཉིས་ཀྱིས་བསམ་གཏན་དང་པོའི་མི་མཐུན་ཕྱོགས་འདོད་པའི་འདོད་ཆགས་དང་གནོད་སེམས་དང་འཚེ་བའི་རྟོག་པ་དང་སྡུག་བསྔལ་དང་ཡིད་མི་བདེ་སོགས་སྤོང་བར་བྱེད་པས་ན་དེ་གཉིས་གཉེན་པོའི་ཡན་ལག་དང༌། ༣དགའ་༤བདེ་གཉིས་ཕན་ཡོན་གྱི་ཡན་ལག་དང༌། ༥རྩེ་གཅིག་པ་གནས་ཀྱི་ཡན་ལག་ཡིན་ཏེ། དེ་ལ་བརྟེན་ནས་རྟོག་དཔྱོད་སོགས་གཉེན་པོ་འཇུག་ཅིང་ཕན་ཡོན་དགའ་བདེ་འབྱུང་བས་སོ། །བསམ་གཏན་གཉིས་པ་ལ། མཛོད་ལས། གཉིས་པ་ལ་ནི་ཡན་ལག་བཞི། །རབ་དང་དང་ནི་དགའ་ལ་སོགས། །ཞེསགསུངས་པ་ལྟར་ཡན་ལག་བཞི་ཡོད་དེ། ༡ནང་ཡོངས་སུ་དང་བས་རྟོག་དཔྱོད་སྤོང་བར་བྱེད་པས་དེ་ནི་གཉེན་པོའི་ཡན་ལག ༢དགའ་༣བདེ་གཉིས་ཕན་ཡོན་གྱི་ཡན་ལག ༤རྩེ་གཅིག་པ་གནས་ཀྱི་ཡན་ལག་ཡིན་ནོ། །བསམ་གཏན་གསུམ་པ་ལ། མཛོད་ལས། གསུམ་པ་ལ་ལྔ་བཏང་སྙོམས་དང༌། །དྲན་དང་ཤེས་བཞིན་བདེ་དང་གནས། །ཞེས་གསུངས་པ་ལྟར་ཡན་ལག་ལྔ་ཡོད་དེ། དྲན་ཤེས་བཞིན་བཏང་སྙོམས་གསུམ་གྱིས་དགའ་བ་སྤོང་བར་བྱེད་པས་ན་དེ་གསུམ་གཉེན་པོའི་ཡན་ལག་དང༌། བདེ་བ་ཕན་ཡོན་གྱི་ཡན་ལག ཏིང་ངེ་འཛིན་ནམ་རྩེ་གཅིག་པ་གནས་ཀྱི་ཡན་ལག་ཡིན་ནོ། །བསམ་གཏན་བཞི་བ་ལ། མཛོད་ལས། མཐའ་ན་བཞི་དྲན་བཏང་སྙོམས་དང༌། །བདེ་མིན་སྡུག་མིན་ཏིང་འཛིན་རྣམས། །ཞེས་གསུངས་པ་ལྟར་ཡན་ལག་བཞི་ཡོད་དེ། དྲན་པ་དང་བཏང་སྙོམས་ཀྱིས་བདེ་བ་སྤོང་བར་བྱེད་པས་དེ་གཉིས་ནི་གཡོ་བའི་སྐྱོན་བརྒྱད་ཀྱི་ཡོངས་སུ་དག་པ་གཉེན་པོའི་ཡན་ལག་དང༌། ཚོར་བ་བཏང་སྙོམས་ཕན་ཡོནགྱི་ཡན་ལག་རྩེ་གཅིག་པ་གནས་ཀྱི་ཡན་ལག་ཡིན་ནོ། །འདིར་གསུམ་པ་དང་བཞི་བའི་གཉེན་པོའི་ཡན་ལག་བཏང་སྙོམས་ནི། སེམས་བྱུང་འདུ་བྱེད་ཀྱི་བཏང་སྙོམས་ཡིན་ལ། སྤྱིར་བཏང་སྙོམས་ལ། འདུ་བྱེད། ཚོར་བ། ཚད་མེད་ཀྱི་གསུམ་ཡོད་དོ། །བསྡུ་བར། བསམ་གཏན་དང་པོ་ལ་དྲན་ཤེས་བཞིན་བཏང་སྙོམས་གསུམ་ཡོད་ཀྱང་རྟོག་དཔྱོད་ཀྱིས་བསྒྲིབས་པས་མ་སྨོས་སོ། །གཉིས་པ་ལའང་ཡོད་ཀྱང་དགའ་བའི་ཉོན་མོངས་པས་ཀུན་ནས་དཀྲིས་པས་མ་སྨོས་པར་ནང་ཡོངས་སུ་དང་བའི་མིང་གིས་བསྟན། གསུམ་པར་རྟོག་དཔྱོད་དགའ་བ་དེ་དག་དང་བྲལ་བས་རང་མིང་གིས་སྨོས་སོ། །ཞེས་སོ། །གཟུགས་མེད་རྣམས་ཡན་ལག་མི་འདྲ་བས་འདའ་བ་མིན་ཏེ། ཐམས་ཅད་ཡན་ལག་བཏང་སྙོམས་དང་རྩེ་གཅིག་པར་འདྲ་བས་སོ། །འོན་ཀྱང་དམིགས་པ་ལས་ཡང་དག་པར་འདའ་བ་ཡིན་ལ་ཞི་རགས་ཀྱི་ཁྱད་ཡོད་དེ། རས་ཡུག་ཆུ་ཞེང་མཉམ་ཡང་སྦོམ་ཕྲའི་ཁྱད་ཡོད་པ་བཞིན་ནོ། །ཞེས་ཨཱརྱའོ། །ཞེས་ཉ་ཊཱིཀ་ལས་གསུངས་སོ། །བསམ་གཏན་གྱི་ཡན་ལག་དགའ་བདེའི་དངོས་འཛིན་ནི་ཀུན་བཏུས་ས་འགྲེལ་གྱི་མཆན་ལས། མཛོད་དུ་རབ་ཏུ་དང་བ་དད་པ་ཡིན་པས་རྫས་སུ་བཅུ་གཅིག་ཅེས་ནང་དང་བ་དད་པ་བྱས་ནས་རྫས་བཅུ་གཅིག་ཏུ་འཆད་ཀྱང༌། འདིར་ནང་དང་བ་དྲན་ཤེས་བཞིན་བཏང་སྙོམས་ཡིན་ལ་དེ་དང་པོར་ཡོད་ཀྱང་རྟོག་དཔྱོད་ཀྱི་སྒོས་བསྒྲུབས་པས་མ་སྨོས། གཉིས་པར་དགའ་བའི་ཀུན་ནས་དཀྲིས་པས་རང་མིང་གིས་མ་སྨོས། གསུམ་པར་དེ་དང་བྲལ་བས་རང་མིང་གིས་སྨོས་པར་བཤད་པས་རྫས་བཅུ་གཅིག་མེད་དོ། །ཅིའི་ཕྱིར་བསམ་གཏན་གསུམ་པ་ན་ཡོད་པའི་བདེ་བ་རྫས་གཞན་དུ་བརྗོད་ཅེ་ན། འདི་ལྟར། དེའི་བདེ་བ་ནི་ཚོར་བ་ཡིན་ལ། བསམ་གཏན་དང་པོ་གཉིས་པ་ན་ནི་ཤིན་ཏུ་སྦྱངས་པ་ལ་བདེ་བ་ཞེས་བཤད་དོ། །སྙོམས་པར་འཇུག་པའི་བསམ་གཏན་གཉིས་ན་བདེ་བའི་དབང་བོ་མི་ལྡན་པའི་ཕྱིར་ཏེ།དེ་གཉིས་དེ་ལུས་ཀྱི་ཡིན་པར་ནི་མི་རུང་སྟེ། སྙོམས་པར་ཞུགས་པ་ལ་རྣམ་པར་ཤེས་པ་ཚོགས་ལྔ་མེད་པའི་ཕྱིར་རོ། །སེམས་ཀྱི་ཡང་མིན་ཏེ་དགའ་ཞེས་འབྱུང་བའི་ཕྱིར་རོ། །དགའ་བ་ནི་བདེ་བ་ཡིན་ན་དེ་གཉིས་གཅིག་ཅར་འབྱུང་བ་ནི་མེད་དོ། །ཞེས་རང་འགྲེལ་དུའོ། །ཞེས་བསམ་གཏན་གསུམ་པའི་ཡན་ལག་གི་བདེ་བ་ཚོར་བ་ཡིན་པ་དང༌། བསམ་གཏན་དང་པོ་གཉིས་པ་གཉིས་ཀྱི་ཡན་ལག་བདེ་བ་ནི་ཤིན་སྦྱངས་ཡིན་པར་གསུངས་ལ། མདོ་ལུགས་མ་ལས། རྟོག་དཔྱོད་བྲལ་བས་ནང་ཡོངས་སུ་དང་ཞིང་སེམས་ཀྱི་རྒྱུད་གཅིག་ཏུ་གྱུར་བས་རྟོག་དཔྱོད་མེད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་དང༌། དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ། །ཞེས་བརྗོད་པ་སྟེ་དགའ་བ་མེད་པའི་བསམ་གཏན་གསུམ་པ་དང༌། ཞེས་པ་ནས། བསམ་གཏན་གསུམ་པར་སེམས་གཡེང་བར་བྱེད་པའི་དགའ་བའི་ཚོར་བ་སྤངས་ཤིང་བཏང་སྙོམས་ལ་གནས་པ་དགའ་བའི་ཚོར་བ་མི་བསྐྱེད་པའི་ཕྱིར་ཤེས་རབ་ཀྱིས་གནས་པས་དྲན་ཤེས་བཞིན་ཅན་ཞི་བའི་ཚོར་བ་འབྱུང་སྟེ། དེའི་ཚེ་གཟུགས་ཀྱི་ལུས་དང་ཡིད་ཀྱི་ལུས་ཀྱིས་ཚོར་བའི་བདེ་བ་དང༌། ཤིན་ཏུ་སྦྱངས་པའི་བདེ་བ་མྱོང་བར་བྱེད་དོ། །ཞེས་གསུངས་པ་ལྟར་ན་བསམ་གཏན་དང་པོ་གཉིས་པ་གཉིས་ཀྱི་ཡན་ལག་བདེ་བ་ནི་ཤིན་སྦྱངས་མ་ཡིན་པར་ཚོར་བ་ལ་སྦྱར་བ་ཡིན་མིན་དཔྱད། ཡན་ལག་དེ་དག་གྲངས་ངེས་པའི་རྒྱུ་མཚན་ནི། ཀུན་བཏུས་ས་འགྲེལ་ལས། གྲངས་ངེས་པའི་རྒྱུ་མཚན་ནི། དེ་རྣམས་ལ་སེམས་སེམས་བྱུང་གཞན་ཡང་མང་བོ་ཡོད་བཞིན་དུ་དེ་དག་ཁོ་ན་ཡན་ལག་ཏུ་འཇོག་པ་ནི་རང་རང་གི་མི་མཐུན་ཕྱོགས་སྤོང་བ་གཉེན་པོའི་ཡན་ལག་དང༌། ལུས་སེམས་ལ་ཕན་འདོགས་པ་ཕན་ཡོན་གྱི་ཡན་ལག་དང༌། དེ་དག་གང་ལས་འབྱུང་བའི་གཞིའམ་རྟེན་དུ་གྱུར་པ་དེ་གཉིས་ཀའི་གནས་ཀྱི་རང་བཞིན་གྱི་ཡན་ལག་རྣམས་བཅོ་བརྒྱད་པོ་དེ་དག་གིས་ཡོངས་སུ་རྫོགས་པའི་ཕྱིར་རོ། །གཟུགས་མེད་ཀྱི་དམིགས་བསལ་ནི། ཆ་ཤས་སམ་རོ་དུ་མ་ཚོགས་པ་ལ་ཡན་ལག་རྣམ་པར་འཇོག་ནུས་པ་ཡིན་པ་ལ་གཟུགས་མེད་པ་བཞི་པོ་རྣམས་ན་ནི་ཐམས་ཅད་ཀྱང་ཞི་གནས་སུ་རོ་གཅིག་པ་ཉིད་ཀྱི་ཕྱིར་ཡན་ལག་མི་འདྲ་བ་རྣམ་པར་གཞག་པ་ནི་མེད་དོ། །འོན་ཀྱང་དེ་དག་དམིགས་པ་ཐ་དད་ལས་འཇོག་སྟེ། ནམ་མཁའ་མཐའ་ཡས་སོ་རྣམ་ཤེས་མཐའ་ཡས་སོ་ཅི་ཡང་མེད་དོ་འདུ་ཤེས་གསལ་བ་ནི་མེད་ཅིང་མི་གསལ་བ་ནི་མེད་པ་ཡང་མིན་ནོ་ཞེས་འཇུག་པས་སོ། །ཞེས་གསུངས་སོ། །ཡང་གཟུགས་མེད་དངོས་གཞིའི་སྙོམས་འཇུག་ལ་ཡན་ལག་མེད་པར་ཐལ། ཉ་ཊཱིཀ་ལས། གཟུགས་མེད་རྣམས་ཡན་ལག་མི་འདྲ་བས་འདའ་བ་མིན་ཏེ། ཐམས་ཅད་ཡན་ལག་བཏང་སྙོམས་དང་རྩེ་གཅིག་པར་འདྲ་བས་སོ། །ཞེས་དང༌། ཀུན་བཏུས་ལས། གཟུགས་མེད་པ་རྣམས་ནི་ཞི་གནས་སུ་རོ་གཅིག་པའི་ཕྱིར་ཡན་ལག་རྣམ་པར་བཞག་པ་མེད་དོ། །ཞེས་དང༌། ཉ་ཊཱིཀ་མཆན་ལས།ཀུན་བཏུས་དང་ཐུབ་དགོངས་སུ་གཟུགས་མེད་ལ་ཡན་ལག་མེད་པར་བཤད་དོ། །ཞེས་གསུངས་པའི་ཕྱིར། འདོད་ན། དེ་ལ་ཆ་ཤས་དང༌། ཚོར་བ་བཏང་སྙོམས་མེད་པར་ཐལ།དེ་ལ་ཡན་ལག་མེད་པའི་ཕྱིར། ཁྱབ་སྟེ། ཀུན་བཏུས་ས་འགྲེལ་ལས། ཡན་ལག་གམ་ཆ་ཤས་རྣམ་པར་གཞག་པ། ཞེས་དང༌། བསམ་གཏན་བཞི་བའི་དངོས་གཞིའི་ཡན་ལག་ལ་ཚོར་བ་བཏང་སྙོམས་བཞག་པ་དང་འདྲ་དགོས་པའི་ཕྱིར་ཟེར་ན་དཔྱད་དོ། །བསམ་གཏན་གྱི་ཡན་ལག་དང་ལམ་ཤེས་ཀྱི་ཡན་ལག་དང༌། སྤྱིར་ཆོས་དེ་དང་དེའི་ཡན་ལག་རྣམས་ཀྱི་དོན་གང་ཡིན་དཔྱད། ཡང་འོག་ས་ལ་ཆགས་བྲལ་མ་བྱས་པར་གོང་མའི་དངོས་གཞི་ཐོབ་པ་ཡོད་པར་ཐལ། ཀུན་བཏུས་ས་འགྲེལ་ལས། ཁ་ཅིག་འོག་ས་ལས་འདོད་ཆགས་དང་མ་བྲལ་བར་གོང་མའི་དངོས་གཞི་ཐོབ་པ་ནི་མི་རིགས་སོ་ཞེས་ཀྱང་གསུངས་མོད། བྱིས་པ་ལ་དེ་ལྟར་ཡིན་ཡང་འཕགས་པ་ལ་བསམ་གྱི་མི་ཁྱབ་བོ། །ཡང་ན་མཛོད་འགྲེལ་དུ་སྔར་སྲིད་རྩེའི་སེམས་ཐོབ་པ་ལས་ཉམས་ནས་གཟུགས་ཁམས་སུ་སྐྱེས་པ་ཞིག་གི་སླར་ཡང་བསྐྱེད་དེ་སྙོམས་པར་འཇུག་པར་གསུངས་པ་ལྟར་རོ། །ཞེས་དང༌། ཉ་ཊཱིཀ་སྐབས་བཞི་བ་ལས། ཅི་ཡང་མེད་ལས་ཆགས་བྲལ་གཟུགས་སུ་སྐྱེ་བར་འགལ་ཞེ་ན། ཉན་ཐོས་ལྟར་ན། མ་ཉམས་ན་མིསྐྱེ་ཡང་ཉམས་ན་གཟུགས་སུ་སྐྱེས་ནས་དེར་སྲིད་རྩེའི་སེམས་བསྒྲུབས་ནས་འཇུག་གོ ། ཐེག་ཆེན་ལྟར་ན། བསམ་གཏན་དང་གཟུགས་མེད་ཀྱི་སེམས་ཐོབ་ལ་མ་ཉམས་བཞིན་དུ་རིམ་བཞིན་འདོད་པ་དང་གཟུགས་སུ་སྐྱེ་བས་སྐྱོན་མེད་དོ། །ཀུན་བཏུས་འགྲེལ་བར། མུ་བཞི་བཤད་དེ། མི་ལྕོགས་མེད་ལ་བརྟེན་ནས་གཟུགས་ལ་ཆགས་བྲལ་ནི།གཟུགས་ལ་ཆགས་བྲལ་ཡིན་ལ་གཟུགས་མེད་ལ་འཇུག་མི་ནུས་པའི་མུ།བསམ་གཏན་བཞི་བ་ཐོབ་པའི་འཕགས་པ་གཟུགས་མེད་པར་སྐྱེ་བ་དོན་དུ་མི་གཉེར་ལ་སྤོང་བའི་ལམ་བསལ་ནས་ཁྱད་པར་ཅན་གྱི་ལམ་ལ་གནས་ཏེ་གཟུགས་མེད་པར་འཇུག་པ་གཟུགས་མེད་ལ་འཇུག་ལ་གཟུགས་ལ་ཆགས་བྲལ་མིན་པའི་མུ། དེ་ཉིད་འདོད་ཆགས་དང་བྲལ་བ་དོན་དུ་གཉེར་ཞིང་སྤོང་ལམ་ལ་གནས་ཏེ་གཟུགས་མེད་ལ་འཇུག་པ་གཉིས་ཀ་ཡིན་པ། དེ་དག་མ་གཏོགས་པ་མུ་བཞི་བ། ཞེས་སོ། །ས་འོག་མ་ལ་འདོད་ཆགས་དང་མ་བྲལ་བར་གོང་མའི་དངོས་གཞི་ཐོབ་པར་འདོད་པ་མངོན་པའི་སྤྱི་གཞུང་དང་མི་མཐུན་གསུང་ངོ༌། །མངོན་པ་གོང་འོག་གི་ཆོས་སྐད་དང་མི་མཐུན་ལ། དཔལ་ཆོས་གྲགས་ཀྱི་ལུགས་ལ་ཤིན་ཏུ་རུང་སྟེ། གཟུགས་མེད་ཀྱི་སོ་སྐྱེ་ཐམས་ཅད་ཡང་དེ་ཡིན་ཏེ། གལ་ཏེ་དེ་གཟུགས་ལ་ཆགས་པ་དང་བྲལ་ན། སླར་ཡང་གཟུགས་ཀྱི་སོ་སྐྱེར་སྐྱེ་མི་སྲིད་པར་འགྱུར་བ་ལས་ཤིན་ཏུ་ཡང་སྲིད་དོ། །ཞེས་གསུངས་པའི་ཕྱིར་ཟེར་ན། དེ་མི་འཐད་དེ། ཉ་ཊཱིཀ་ལས། མ་ཉམས་ན་གནས་གཙང་མ་ལྔར་སྐྱེ་མོད། དང་པོའི་རོ་མྱངས་པས་གོང་མ་གསུམ་ལས་ཉམས་ཤིང་འདོད་པར་ཚེ་འཕོས་ཏེ་ཚངས་རིས་སུ་སྐྱེས། ཞེས་དང༌། ལྷན་ཐབས་འོད་བརྒྱ་འབར་བ་ལས། བྱམས་སོགས་སྒོམ་པ་ཙམ་གྱིས་འདོད་པ་ལ་ཆགས་བྲལ་མི་ནུས་པས། ཚངས་པར་སྐྱེ་བ་མི་འཐད་གཞུང་རྣམས་ལས་དེར་སྐྱེ་བར་གསུངས་པ་ནི། བསམ་གཏན་དང་པོའི་ཉེ་བསྡོགས་ཞི་རགས་ཀྱི་རྣམ་པ་ཅན་གྱིས་འདོད་པ་ལ་ཆགས་བྲལ་བྱས་པའི་འོག་ཏུ་ཉེར་བསྡོགས་ཉིད་ལ་བརྟེན་པའམ་བསམ་གཏན་དངོས་གཞི་བསྒྲུབས་ཏེ་དེ་ལ་བརྟེན་ནས་ཚད་མེད་བཞི་བསྒོམས་པའི་འབྲས་བུ་ཚངས་པར་སྐྱེ་བའོ་སྙམ་ན། དེ་འདྲ་གཞུང་གི་དགོངས་པ་མ་ཡིན་ཏེ། ཚད་མེད་བཞི་མེད་ཀྱང་ཉེར་བསྡོགས་རྫོགས་པར་ཐོབ་ལ་མ་ཉམས་པ་ཡོད་ན་ཚངས་པར་སྐྱེ་ངེས་པའི་ཕྱིར། ཚད་མེད་བཞི་སྨོས་པ་དོན་མེད་པར་འགྱུར་བའི་ཕྱིར་རོ། །དེས་ན་འདོད་ཡོན་མ་སྤངས་བསམ་གཏན་དང་པོའི་ཏིང་ངེ་འཛིན་རྒྱུད་ལ་མ་སྐྱེས་པར་ཚངས་གནས་སུ་སྐྱེ་བ་མིན་ཡང༌། འདོད་པའི་ཏིང་ངེ་འཛིན་ལ་བརྟེན་ནས་ཚད་མེད་བཞི་བསྒོམས་པས། འདོད་ཉོན་སྲབས་ཏེ། ཚད་མེད་བཞི་པོ་ཉིད་ཉེར་བསྡོགས་སུ་འགྱུར་ཏེ་དེ་ལས་དངོས་གཞི་སྐྱེ་ལ། འབྲས་བུ་རྒྱུའི་རྗེས་སུ་འཇུག་པ་ཉིད་ཀྱི་ཕྱིར། དངོས་གཞི་ཡང་ཚད་མེད་དང་མཚུངས་པར་ལྡན་པ་ཁོ་ན་འབྱུང་ངོ༌། །ཞེས་གསུངས་པའི་ཕྱིར་ཟེར་ན་དཔྱད་དོ། །

བདུན་པ་ཚོགས་སྒྲུབ་ཀྱི་མཚན་ཉིད།ས་མཚམས།ཚོགས་བཅུ་བདུན་དང༌།ཚོགས་སྒྲུབ་བཅུ་བདུན་གཉིས་ཀྱི་ཁྱད་པར་ཇི་ལྟར་ཡིན་ཞེས་པའི་ལན།

བདུན་པ་ཚོགས་སྒྲུབ་ཀྱི་མཚན་ཉིད།ས་མཚམས།ཚོགས་བཅུ་བདུན་དང༌།ཚོགས་སྒྲུབ་བཅུ་བདུན་གཉིས་ཀྱི་ཁྱད་པར་ཇི་ལྟར་ཡིན་ཞེས་པའི་ལན།

ཚོགས་སྒྲུབ་ཀྱི་མཚན་ཉིད། ས་མཚམས། ཚོགས་བཅུ་བདུན་དང༌། ཚོགས་སྒྲུབ་བཅུ་བདུན་གཉིས་ཀྱི་ཁྱད་པར་ཇི་ལྟར་ཡིན་ཞེས་པའོ། །གཉིས་པ་ལན་ནི། ཚོགས་སྒྲུབ་གྱི་མཚན་ཉིད། རང་འབྲས་བྱང་ཆེན་དངོས་སུ་ཐོབ་བྱེད་དང་ཐེག་ཆེན་སྦྱོར་ལམ་ཆོས་མཆོག་ཆེན་པོའི་རྟོགས་པ་ཐོབ་ཟིན་པའི་སྒྲུབ་པའི་གཞི་མཐུན་པ་དེ་ཡིན་ཏེ། ཉ་ཊཱིཀ་ལས། ཞུགས་ཏེ་དཔུང་གི་ཚོགས་གསོག་པའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག རང་འབྲས་སློབ་ལམ་མམ་མི་སློབ་པའི་བྱང་ཆེན་གྱི་རྒྱུའི་མཐར་ཐུག་པའི་ཚོགས་སྒྲུབ་པའམ་ཐོབ་པར་བྱེད་པ་སྟེ། ཞེས་གསུངས་པས་སོ། །དབྱེ་བ་ནི། ཉ་ཊཱིཀ་ལས། དབྱེ་ན་བཅུ་བདུན་ནོ། །དག་ལྡན་དུ། གང་གིས་རྒྱུའི་མཐར་ཐུག་པ་ཐོབ་པར་བྱེད་པ་དེ་ནི་ཚོགས་ཀྱི་སྒྲུབ་པ་བཅུ་བདུན་ནོ། །ཞེས་པ་ལྟར་ན། བརྩེ་བའི་ཚོགས་སྒྲུབདང༌། སྦྱིན་ལ་སོགས་པའི་ཕར་ཕྱིན་དྲུག་གི་ཚོགས་སྒྲུབ་དྲུག་དང༌། ཞི་གནས་དང༌། ལྷག་མཐོང་དང༌། ཟུང་འབྲེལ་གྱི་ལམ་དང༌།ཐབས་མཁས་དང༌། ཡེ་ཤེས་དང༌། བསོད་ནམས་དང༌། ལམ་དང༌། གཟུངས་དང༌། ས་བཅུ་དང༌། གཉེན་པོའི་ཚོགས་སྒྲུབ་དང་བཅུ་བདུན་ནོ། །སྤྱིར་ཚོགས་སྒྲུབ་བཅུ་བདུན་ཡོད་ཀྱང་མདོ་ལུགས་མ་ལྟར་ན་རྩ་བས་ཚོགས་སྒྲུབ་བཅུ་བདུན་ལ་སྦྱར་ནས་བསྟན་པར་མ་གསུངས་སོ། །ས་མཚམས་ནི། སྦྱོར་ལམ་ཆོས་མཆོག་ཆེན་པོ་ནས་རྒྱུན་མཐའི་བར་ཏུ་ཡོད་དེ། ཐོགས་མེད་ཀྱི་གསུངས་འགྲེལ་ཆེན་དང་ཐུབ་དགོངས་སུ་དྲངས་པ་ལས། ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་བའི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། གཉིས་པ་ལ་སོགས་པའི་རང་བཞིན་ནི་སྒོམ་པའི་ལམ་གྱི་ངོ་བོ་ཉིད་ཡིན་ཞིང་གཉེན་པོའི་ཕྱོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ཞེས་གསུངས་པས་སོ། །ཡང་ཉ་ཊཱིཀ་ལས། བྱང་སེའི་སྒྲུབ་པ་གང་ཞིག རང་འབྲས་སློབ་ལམ་མམ་མི་སློབ་པའི་བྱང་ཆེན་གྱི་རྒྱུའི་མཐར་ཐུག་པའི་ཚོགས་སྒྲུབ་པའམ་ཐོབ་པར་བྱེད་པ་སྟེ། ཞེས་གསུངས་པ་ལ། ཐེག་ཆེན་སྦྱོར་ལམ་ཆོས་མཆོག་ཆེན་པོ་ཆོས་ཅན། མཚན་ཉིད་དེ་ཡིན་པར་ཐལ། མཚོན་བྱ་དེ་ཡིན་པའི་ཕྱིར། འདོད་ན། ཐེག་ཆེན་སྦྱོར་ལམ་ཆོས་མཆོག་ཆེན་པོ་ཡིན་ན་དེ་ཡིན་པས་ཁྱབ་པར་ཐལ། འདོད་པའི་ཕྱིར་ཟེར་ན་དཔྱད། ཡང་ཐེག་ཆེན་ཚོགས་ལམ་ཆོས་ཅན། མཚོན་བྱ་དེ་ཡིན་པར་ཐལ། མཚན་ཉིད་དེ་ཡིན་པའི་ཕྱིར་ཟེར་ན་དཔྱད། ཡང་ཚོགས་བཅུ་བདུན་དང༌། ཚོགས་སྒྲུབ་བཅུ་བདུན་གཉིས་ཀྱི་ཁྱད་པར་ལ། ཉ་ཊཱིཀ་ལས། སྒྲུབ་རྒྱུའི་ཚོགས་བཅུ་བདུན། དེ་སྒྲུབ་པའི་ཚོགས་སྒྲུབ་བཅུ་བདུན་ཡོད་པས་ན་སྔ་རབས་རྣམས་ཀྱིས་དེ་མ་ཕྱེད་པར་ཚོགས་བཅུ་བདུན་ཉིད་ཚོགས་སྒྲུབ་བཅུ་བདུན་དུ་འཆད་པ་ནི་དོན་སྤྱི་མ་ཤར་རོ། །ཞེས་དང༌། སྒྲུབ་རྒྱུའི་ཚོགས་བཅུ་བདུན་ཡོད་པས་དེ་སྒྲུབ་པའི་ཚོགས་ཀྱི་སྒྲུབ་པའང་རྣམ་པ་བཅུ་བདུན་ནོ། །དེ་ལྟར་འཆད་མ་ཤེས་ན་ལམ་གྱི་ཚོགས་ནི་དྲན་པ་ཉེར་བཞགས་ནས་སངས་རྒྱས་ཀྱི་བར་བཤད་པ་ཆོས་མཆོག་ཆེན་པོ་ན་ཡོད་དམ་སོམས་ཤིག་ཚོགས་ཞེས་པ་ཆོས་དུ་མའི་དོན་ནོ། །ཞེས་གསུངས་པ་ལ་ཚོགས་སྒྲུབ་ཀྱི་སྒྲུབ་རྒྱུའི་ཚོགས་ཡིན་པ་ལ་ཚོགས་སྒྲུབ་ཐོབ་རྗེས་སུ་བྱུང་བ་དགོས་ལ། ཚོགས་ སྒྲུབ་སྦྱོར་ལམ་ཆོས་མཆོག་ཡན་ཆོད་ན་འཇོག་དགོས་ལ། དེ་ལྟར་ན་སྒྲུབ་རྒྱུའི་ཚོགས་བཅུ་བདུན་གང་ཡང་ཚོགས་ལམ་ལ་མེད་དགོས་པ་ལས་དེ་མི་འཐད་པར་ཐལ། ལམ་ཀྱི་ཚོགས་སོགས་ཚོགས་ལམ་ན་ཡོད་པའི་ཕྱིར། དེར་ཐལ། ལམ་གྱི་ཚོགས་ཀྱི་སྐབས་ཉ་ཊཱིཀ་ལས། ཚོགས་སྦྱོར་མཐོང་དང་སྒོམ་པའི་ལམ་སོགས་ཏེ། ཐེག་ཆེན་པོ་ནི། དྲན་པ་ཉེ་བར་བཞག་པ་བཞི་དང༌། ཞེས་སོགས་ནས། བཅོ་བརྒྱད་ཀྱི་བར་རྒྱ་ཆེར་ངོས་འཛིན་དང་བཅས་པ་གསུངས་སོ། །ཞེས་གསུངས་པས་ཕྱིར་ཟེར་ན་དཔྱད་དོ། །ཚོགས་སྒྲུབ་ཀྱི་ས་མཚམས་ཐེག་ཆེན་སྦྱོར་ལམ་ཆོས་མཆོག་ཆེན་པོ་ནས་བཞག་མི་རིགས་པར་ཐལ། མདོ་ལུགས་མ་ལས། ཚོགས་ཀྱི་བསྒྲུབ་པ་ནི་ས་བཅུ་ལ་ཞུགས་པ་ཉིད་ཡིན་པར་མདོ་ལས་བྱུང་ངོ༌། །ཞེས་དང༌། ས་བཅུ་དང་ཞེས་པས་ཚོགས་བསྒྲུབ་ལ་ཞུགས་པ་བསྟན་ཏོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །

བརྒྱད་པ་ཚད་མེད་བཞི་སོ་སོའི་མཚན་ཉིད་དང་ས་མཚམས་གང་ཡིན་ཞེས་པའི་ལན།

བརྒྱད་པ་ཚད་མེད་བཞི་སོ་སོའི་མཚན་ཉིད་དང་ས་མཚམས་གང་ཡིན་ཞེས་པའི་ལན།

ཚད་མེད་བཞི་སོ་སོའི་མཚན་ཉིད་དང་ས་མཚམས་གང་ཡིན་ཞེས་པའོ། །གཉིས་པ་ལན་ནི། ཚད་མེད་བཞྀའི་མཚན་ཉིད་རིམ་བཞིན། སེམས་ཅན་ཚད་མེད་པ་བདེ་བ་དང་ཕྲད་པར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ། སེམས་ཅན་ཚད་མེད་པ་སྡུག་བསྔལ་དང་བྲལ་བར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ། སེམས་ཅན་ཚད་མེད་པ་བདེ་བ་དང་མི་འབྲལ་བར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ།སེམས་ཅན་ཚད་མེད་པ་ཆགས་སྡང་གི་ཉོན་མོངས་པ་མེད་པར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློའོ། །དག་ཟླ་ཐུབ་གསུམ་དང་མདོ་རྒྱན་བཤད་སྦྱར་དུ་བཏང་སྙོམས་ནི་སེམས་ཅན་རྣམས་རྗེས་ཆགས་ཁོང་ཁྲོ་མེད་པར་སྨོན་པ་ལ་བཤད་གཞན་དུ་རང་ཉིད་སེམས་ཅན་ལ་ཉེ་རིང་ཆགས་སྡང་མེད་པར་སྙོམས་པ་ལ་བཤད་པར་ཉ་ཊཱིཀ་ལས་བཤད་དོ། །དེ་བཞིའི་མཚན་ཉིད་ལྷན་ཐབས་འོད་བརྒྱ་འབར་བ་ལས། ཚད་མེད་པར་འགྱུར་བ་ལ་ཡུལ་སེམས་ཅན་དཔག་ཏུ་མེད་པ་ལ་དམིགས་ཤིང༌། རྣམ་པ་བདེ་བ་དཔག་ཏུ་མེད་པ་ལ་འགོད་པ་དང༌། སྡུག་བསྔལ་དཔག་ཏུ་མེད་པ་འབྲལ་བར་འདོད་པ་སོགས་དང༌། ཡུལ་སེམས་ཅན་དཔག་མེད་ཀྱི་བདེ་བ་དཔག་མེད་ལ་དམིགས་ནས་དགའ་ཞིང་ཡིད་རང་པས་དྲངས་པའི་ཡིད་བདེ་དང༌། ངོ་བོ་དགྲ་གཉེན་བར་མའི་བྱེ་བྲག་མེད་པ་ཐམས་ཅད་མཉམ་སྙོམས་པར་བདེ་བ་འདོད་པ་སོགས་དགོས་སོ། །དེ་ལྟར་ན་བྱམས་པ་ཚད་མེད་སོགས་ཀྱི་མཚན་ཉིད་དེ་འདྲ་ཡིན་ལ། ཞེས་གསུངས་པའི་ཕྱིར་རོ། །སྒྲ་བཤད་ནི། ལྷ་ཚངས་པར་སྐྱེ་བའི་རྒྱུ་ཡིན་པས་ཚངས་པའི་གནས་དང༌། གནོད་འཇོམས་གཉིས་སུ། སེམས་ཅན་ཚད་མེད་པ་ལ་དམིགས་ཚོགས་ཚད་མེད་པའི་རྒྱུར་གྱུར་སྟོབས་བཅུ་སོགས་སངས་རྒྱས་ཀྱི་ཆོས་ཚད་མེད་པ་ཐོབ་པའི་རྒྱུར་གྱུར་བ་དང༌། ཡེ་ཤེས་ཚད་མེད་པའི་སྤྱོད་ཡུལ་དུ་གྱུར་པའི་ཕྱིར་ཚད་མེད་ཅེས་བྱས་སོ། །ཞེས་དང༌། མདོ་ལུགས་མ་ལས། སེམས་ཅན་ཚད་མེད་པ་ལ་དམིགས་པ་དང༌། ཚོགས་ཚད་མེད་པའི་རྒྱུ་དང་ཆོས་ཚད་མེད་པ་འཐོབ་པའི་རྒྱུ་དང༌། ཡེ་ཤེས་ཚད་མེད་པའི་སྤྱོད་ཡུལ་ཡིན་པའི་ཕྱིར་ཚད་མེད་པའོ། །ཞེས་གསུངས་སོ། །དབྱེ་བ་ལ། སྤྱི་དང༌། བྱེ་བྲག་གི་དབྱེ་བ་གཉིས་སོ། །དང་པོ་ལ། དམིགས་ཡུལ། ས་མཚམས། བསམ་པའི་སྒོ་ནས་དབྱེ་བའོ། །དང་པོ་ནི། དམིགས་པ་སེམས་ཅན་དང༌། ཆོས་དང༌། དམིགས་པ་མེད་པ་ལ་འཇུག་པ་གསུམ་མོ། །གཉིས་པ་ནི། བློ་གྲོས་མི་ཟད་པའི་མདོའི་དོན་གནོད་འཇོམས་གཉིས་སོགས་སུ་མོས་སྤྱོད་ཀྱི་ས་ལ་སེམས་ཅན་ལ་དམིགས་པ། ས་དང་པོ་ནས་བདུན་པའི་བར་ལ་ཆོས་དེ་བཞིན་ཉིད་ལ་དམིགས་པ། ས་བརྒྱད་པ་ཡན་ནི་དམིགས་མེད་དོ་ཞེས་སོ། །སོ་སྐྱེའི་སེམས་ཅན་ལ། ཉན་རང་འཕགས་པའི་ཆོས་ལ། ཐེག་ཆེན་འཕགས་པའི་དམིགས་མེད་དུ་ཆོས་མཆོག་ཏུ་བཤད་དོ། །ཞེས་ཉ་ཊཱིཀ་ལས་སོ། །གསུམ་པ་ནི། ཀྱེ་མ་སེམས་ཅན་བདེ་བ་དང་ལྡན་ན་རེ་དགའ། ལྡན་པར་གྱུར་གཅིག ། ལྡན་པར་བྱའོ་སྙམ་པ་སོགས་ཡི་རང་སྨོན་ལམ་གོ་ཆའི་ངོ་བོ་གསུམ་གསུམ་མོ། །གཉིས་པ་ནི། གནོད་འཇོམས་ཆེ་བར། བྱམས་པ་གསུམ་སྟེ། མོས་སྤྱོད་དུ་སེམས་ཅན་ལ། ས་བདུན་པའི་བར་དེ་བཞིན་ཉིད་ལ། བརྒྱད་པ་ཡན་དམིགས་མེད་ལའོ། །སྙིང་རྗེ་གསུམ། སེམས་ཅན་སྡུག་བསྔལ་ཅན། ཉེས་སྤྱོད་མང་བ། རྐྱེན་མི་ལྡན་པས་རྣམ་པར་མ་གྲོལ་བའི་སེམས་ཅན་ལ་དམིགས་སོ། །དགའ་བ་གསུམ། བདེ་བའི་སེམས་ཅན། བདག་གི་ཚོགས་རྫོགས་པ། དམ་པའི་ཆོས་ཀྱི་རོ་མྱང་བ་ལ་དམིགས་པའོ། །བཏང་སྙོམས་གསུམ་ནི། སེམས་ཅན་གྱི་དོན་དཔྱད་པ་ལ་སྐལ་བ་ཡོད་མེད་ལ། རྙེད་མ་རྙེད་སོགས་འཇིག་རྟེན་གྱི་ཆོས་བརྒྱད་སོགས་ལ་མཉམ་པ་ཉིད་དུ་ཚོགས་རྫོགས་པར་བྱ་བ་ལ་དུས་དང་དུས་མ་ཡིན་པ་ལ་དམིགས་པའོ། །ཞེས་དང༌། མདོ་ལུགས་མ་ལས། དེ་ལ་བྱམས་པ་ནི་གསུམ་སྟེ་མོས་སྤྱོད་ཀྱི་ས་ལ་སེམས་ཅན་ལ་དམིགས་པའོ། །ས་བདུན་པའི་བར་ལ་དེ་བཞིན་ཉིད་ལ་དམིགས་པའོ། །ས་བརྒྱད་པ་ཡན་ཆད་ནི་དམིགས་པ་མེད་པའོ། །སྙིང་རྗེ་ཡང་གསུམ་སྟེ། སེམས་ཅན་སྡུག་བསྔལ་བ་ལ་དམིགས་པ་དང་ཉེས་པར་སྤྱོད་པ་མང་བའི་སེམས་ཅན་ལ་དམིགས་པ་དང༌། རྐྱེན་དང་མི་ལྡན་པར་རྣམ་པར་གྲོལ་བའི་སེམས་ཅན་ལ་དམིགས་པའོ། །དགའ་བ་ཡང་གསུམ་སྟེ། བདེ་བའི་སེམས་ཅན་ལ་དམིགས་པ་དང༌། བདག་གི་ཚོགས་རྫོགས་ལ་དམིགས་པ་དང༌། དམ་པའི་ཆོས་ཀྱི་རོ་མྱང་བ་ལ་དམིགས་པའོ། །བཏང་སྙོམས་ཀྱང་གསུམ་སྟེ། སེམས་ཅན་གྱི་དོན་དཔྱད་པ་ལ་སྐལ་པ་ཡོད་པ་དང་མེད་པ་ལ་དམིགས་པ་དང༌། རྙེད་མ་རྙེད་ལ་སོགས་འཇིག་རྟེན་གྱི་ཆོས་ལ་མཉམ་ཉིད་དུ་དམིགས་པ་དང༌། ཚོགས་ཡོངས་སུ་རྫོགས་པར་བྱ་བ་ལ་དུས་དང་དུས་མ་ཡིན་པ་ལ་དམིགས་པའོ། །ཞེས་གསུངས་སོ། །ཐེག་ཆེན་གྱི་ཚད་མེད་ཡིན་ན་གཉེན་པོ་མི་རྟོག་དང་ལྡན་པའི་ཁྱབ་སྟེ། ཉ་ཊཱིཀ་ལས། གནོད་སེམས་སོགས་མི་མཐུན་ཕྱོགས་སྤངས་པ། གཉེན་པོ་མི་རྟོག་ཡེ་ཤེས་དང་ལྡན་པ། དམིགས་པ་སེམས་ཅན་དང་ཆོས་དང་དམིགས་པ་མེད་པ་ལ་འཇུག་པ། བྱེད་ལས་སེམས་ཅན་སྨིན་པར་བྱེད་པ་ནི་ཐེག་ཆེན་གྱི་ཚད་མེད་སྤྱིའི་མཚན་ཉིད་དོ། །ཞེས་གསུངས་པའི་ཕྱིར། འདོད་ན། བྱང་སེམས་སྟོང་ཉིད་མ་རྟོགས་པའི་རྒྱུད་ཀྱི་ཚད་མེད་བཞི་ཆོས་ཅན། དེར་ཐལ། དེའི་ཕྱིར་ཟེར་ན་དཔྱད་དོ། །ཡང་བྱམས་པ་ཚད་མེད་སོགས་ཚད་མེད་ལ་རང་གི་བདག་རྐྱེན་བསམ་གཏན་ལ་བརྟེན་པའི་ཁྱབ་པར་ཐལ། ཀུན་བཏུས་ལས། བསམ་གཏན་ལ་བརྟེན་ཏེ། སེམས་ཅན་རྣམས་ལ་བདེ་བ་དང་ཕྲད་པར་ཤོག་ཤིག་པར་བསམ་པའི་གནས་པ་ཡང་དག་པར་འབྱོར་པའི་ཏིང་ངེ་འཛིན་དང་ཤེས་རབ་གང་ཡིན་པ་དང༌། དེ་དག་དང་མཚུངས་པར་ལྡན་པའི་སེམས་དང་སེམས་ལས་བྱུང་པའི་ཆོས་རྣམས་སོ། །ཞེས་དང༌། ཉ་ཊཱིཀ་ལས། བྱེ་བྲག་ཏུ་ཐེག་ཆེན་གྱི་བྱམས་པ་ཚད་མེད་པ་སོགས་བཞིའི་རིམ་བཞིན་དུ། རང་གི་བདག་རྐྱེན་བསམ་གཏན་ལ་བརྟེན་ནས་སེམས་ཅན་ཚད་མེད་པ་བདེ་བ་དང་ཕྲད་པར་འདོད་པའི་ཏིང་ངེ་འཛིན་དང་ཤེས་རབ་མཚུངས་ལྡན། ཞེས་གསུངས་པའི་ཕྱིར་ཟེར་ན། འདོད་མི་ནུས་ཏེ། ལྷན་ཐབས་འོད་བརྒྱ་འབར་བ་ལས། ཚད་མེད་འདི་དག་བསམ་གཏན་ལ་བརྟེན་དགོས་པར་འདོད་པ། ཉན་ཐོས་བྱེ་བྲག་སྨྲ་བའི་རྣམ་རྟོག་ཡིན། མདོ་སྡེ་པ་ཡན་ཆད་འདོད་ཁམས་ནའང་ཡོད་པར་འདོད་པ་ལྟར། འདི་ཡང་སྨྲ་མོད། ཅེས་དང༌། ཀུན་བཏུས་ས་འགྲེལ་ལས། དེ་རྣམས་བསམ་གཏན་ལ་བརྟེན་པ་ནི་ཕལ་ཆེ་བའི་དབང་དུ་བྱས་པ་ཡིན་གྱི། བསམ་གཏན་མ་ཐོབ་པས་བསྒོམ་པའང་ཡོད་ལ། གནས་སྐབས་ཚངས་པར་སྐྱེ་བའི་རྒྱུ་ཡིན་པས་ཚངས་པའི་གནས་པ་ཞེས་ཀྱང་བྱ་ཞིང༌། དམིགས་ཡུལ་སེམས་ཅན་ཚད་མེད་པ་ལ་དམིགས་པས་ན་ཚད་མེད་པ་སྟེ། ཞེས་གསུངས་པས་སོ་ཞེ་ན་དཔྱད་པར་བྱའོ། །ཡང་ཉ་ཊཱིཀ་ལས། ལྷ་ཚངས་པར་སྐྱེ་བའི་རྒྱུ་ཡིན་པས་ཚངས་པའི་གནས། ཞེས་དང༌། ལྷན་ཐབས་ལས། ཚད་མེད་བཞི་མེད་ཀྱང་ཉེར་བསྡོགས་རྫོགས་པར་ཐོབ་ལ་མ་ཉམས་པ་ཡོད་ན་ཚངས་པར་སྐྱེ་ངེས་པའི་ཕྱིར། ཚད་མེད་བཞི་སྨོས་པ་དོན་མེད་པར་འགྱུར་བའི་ཕྱིར་རོ། །ཞེས་དང༌།དཻས་ན་མངོན་པ་ལས་ཞི་རགས་ཀྱི་དམིགས་རྣམ་ཅན་གཙོ་བོར་བཤད་ཀྱང༌། དེར་ཁྱབ་མཐའ་འཆའ་བ་མིན་ལ། ཞེས་སོགས་ཀྱི་དོན་ལ་དཔྱད་ཚུལ་སྔར་བདག་གིས་གཞན་སྟོང་བགྲོ་གླེང་ཐེངས་གཉིས་པའི་དྲིས་ལན་དུ་བཤད་ཟིན་པས་དེར་བལྟ་བར་བྱའོ། །ཡང་ཉ་ཊཱིཀ་ལས། རྟག་གཅིག་རང་དབང་ཅན་གྱི་སེམས་ཅན་ལ། གཟུང་འཛིན་གཉིས་བདེན་གྱི་སེམས་ཅན་ལ། སྒྱུ་མ་ལྟ་བུའི་སེམས་ཅན་ལ་དམིགས་པ། སེམས་ཅན། ཆོས། དམིགས་མེད་ལ་དམིགས་པའི་བྱམས་སོགས་གསུམ་དུ་སློབ་དཔོན་རབ་ཏུ་འགྱིང་བའི་རྡོ་རྗེས་བཤད་དོ། །དང་པོ་མུ་སྟེགས་པའི། གཉིས་པ་ཉན་ཐོས་པའི། གསུམ་པ་ཐེག་ཆེན་པའིའོ། །ཞེས་དང༌། བློ་གྲོས་མི་ཟད་པའི་མདོའི་དོན་གནོད་འཇོམས་གཉིས་སོགས་སུ་མོས་སྤྱོད་ཀྱི་ས་ལ་སེམས་ཅན་ལ་དམིགས་པ། ས་དང་པོ་ནས་བདུན་པའི་བར་ལ་ཆོས་དེ་བཞིན་ཉིད་ལ་དམིགས་པ། ས་བརྒྱད་པ་ཡན་ནི་དམིགས་མེད་དོ་ཞེས་སོ། །ཞེས་དང༌། གནོད་འཇོམས་ཆེ་བར། བྱམས་པ་གསུམ་སྟེ། མོས་སྤྱོད་དུ་སེམས་ཅན་ལ། ས་བདུན་པའི་བར་དེ་བཞིན་ཉིད་ལ། བརྒྱད་པ་ཡན་དམིགས་མེད་ལའོ། །ཞེས་དང༌། ལྷན་ཐབས་འོད་བརྒྱ་འབར་བ་ལས། ཚད་མེད་བཞི་པོ་རེ་རེ་ཡང་སེམས་ཅན་ལ་དམིགས་པ་དང༌། ཆོས་ལ་དམིགས་པ་དང༌། དམིགས་པ་མེད་པ་གསུམ་གསུམ་དུ་དབྱེའོ། །ཉོན་མོངས་ཅན་དང་ཞེས་པ་ཡན་ཆད་སེམས་ཅན་ལ་དམིགས་པའི་དབང་དུ་བྱས་པ་སྟེ། བདག་དང་སེམས་ཅན་དང་གང་ཟག་ཏུ་འཛིན་པ་ཆེད་དུ་བཀག་པ་མ་ཡིན་པར། སེམས་ཅན་རྣམས་བདེ་བར་འདོད་པ་ནས། སེམས་ཅན་ཆགས་སྡང་གི་ཉོན་མོངས་ཅན་རྣམས་ཉོན་མོངས་མེད་པ་ལ་འགོད་པར་འདོད་པའི་བར། སེམས་ཅན་ལ་དམིགས་པའི་བྱམས་སོགས་བཞི་སྟེ། འདི་ལ་ཁ་ཅིག་སེམས་ཅན་བདེན་པར་འཛིན་པ་དགོས་པར་འདོད་པ་ནི་མི་འཐད་དོ། །ཞེས་སོགས་ཀྱི་ལུང་དེ་དག་ལས་བསྟན་པའི་སེམས་ཅན་ཆོས་དམིགས་མེད་ལ་དམིགས་པའི་བྱམས་སོགས་ཀྱི་དོན་དང་ས་མཚམས་ལ་དཔྱད་པར་བྱའོ། །

དགུ་པ་ས་ལམ་གཉིས་སུ་ཕྱེ་བའི་སའི་མཚན་ཉིད་དང༌།ས་བཅུའི་སྤང་བྱ་སྐོར་ཇི་ལྟར་བྱས་པ།

དགུ་པ་ས་ལམ་གཉིས་སུ་ཕྱེ་བའི་སའི་མཚན་ཉིད་དང༌།ས་བཅུའི་སྤང་བྱ་སྐོར་ཇི་ལྟར་བྱས་པ་དང༌། ས་དང་པོའི་སྒོམ་ལམ་ཡོད་མེད་དང༌། ས་ནས་སར་འཕོ་ཚུལ་དང༌།ས་བཅུར་ཆོས་ཉིད་ལ་ངེས་པ་འདྲེན་ཚུལ་ཇི་ལྟར་ཡིན་ཞེས་པའི་ལན།

ས་ལམ་གཉིས་སུ་ཕྱེ་བའི་སའི་མཚན་ཉིད་དང༌། ས་བཅུའི་སྤང་བྱ་སྐོར་ཇི་ལྟར་བྱས་པ་དང༌། ས་དང་པོའི་སྒོམ་ལམ་ཡོད་མེད་དང༌།ས་ནས་སར་འཕོ་ཚུལ་དང༌། ས་བཅུར་ཆོས་ཉིད་ལ་ངེས་པ་འདྲེན་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ནི། ཡོན་ཏན་དུ་མའི་རྟེན་དུ་གྱུར་བའི་ལམ་དེ། ས་ལམ་གཉིས་སུ་ཕྱེ་བའི་སའི་མཚན་ཉིད། མཚན་གཞི་ནི། ཚོགས་ལམ་ལྟ་བུའོ། །ཡོན་ཏན་དུ་མའི་རྟེན་དུ་གྱུར་བའི་ཐེག་ཆེན་གྱི་ལམ་དེ། ཐེག་ཆེན་གྱི་སའི་མཚན་ཉིད། །ཡོན་ཏན་དུ་མའི་རྟེན་དུ་གྱུར་བའི་ཐེག་ཆེན་འཕགས་རྒྱུད་ཀྱི་ལམ་དེ། ཐེག་ཆེན་འཕགས་པའི་སའི་མཚན་ཉིད།ཡོན་ཏན་དུ་མའི་རྟེན་དུ་གྱུར་བའི་བྱང་འཕགས་ཀྱི་རྒྱུད་ཀྱི་ལམ་དེ། བྱང་འཕགས་ཀྱི་སའི་མཚན་ཉིད། མཚན་ཉིད་དེ་དག་འཐད་དེ། བླང་དོར་རབ་གསལ་ལས། ས་ཡི་དོན་ནི་ཡོན་ཏན་རྣམས་ཀྱི་རྟེན། །ཞེས་དང༌། བླང་དོར་རབ་གསལ་རྩ་འགྲེལ་ལས། ས་བཅུའི་མཚན་ཉིད་ནི། ཁྱད་པར་བྱང་ཆུབ་སེམས་དཔའི་ས་བཅུ་ནི། །འཕགས་པ་སློབ་པའི་ཡེ་ཤེས་མཚུངས་ལྡན་དང༌། །བཅས་པའི་ཡོན་ཏན་ཀུན་གྱི་རྟེན་ཡིན་ཏེ། །ཡོན་ཏན་གནས་པས་གནས་པ་ཞེས་ཀྱང་བསྟན། །དེ་ཡང༌། དབུ་མ་འཇུག་པར་བྱང་ཆུབ་སེམས་དཔའ་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ནར་ཕྱེ་བ་ལ་ནི་སའི་མིང་ཐོབ་སྟེ། ཡོན་ཏན་གྱི་རྟེན་དུ་གྱུར་པའི་ཕྱིར། ཞེས་པ་དང༌། དབུས་མཐའི་ཊཱི་ཀར་ཡང༌། ཀུན་ཏུ་འགྲོ་བ་ལེགས་པའི་དོན་ཁོང་དུ་ཆུད་པའི་གནས་སྐབས་རྣམས་ནི་དེ་ལས་སྐྱེས་པའི་ཡོན་ཏན་གྱི་གཞིའི་ཚུལ་གྱི་ས་རྣམས་སོ། །ཞེས་གསུངས་པ་ལྟར། བྱང་ཆུབ་སེམས་དཔའ་འཕགས་པ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་རྣམས་ཀྱི་རྟེན་དུ་གྱུར་པའོ། །དེ་ཉིད་དགེ་བ་བསྒྲུབ་པ་རྣམ་པ་སྣ་ཚོགས་པ་རྣམས་ལ་དགའ་བས་རྟག་པར་ཐམས་ཅད་དུ་གནས་པའི་གཞིའི་རྟེན་དུ་གྱུར་པའི་ཕྱིར་གནས་པ་ཞེས་ཀྱང་བྱ་སྟེ། རྒྱན་ལས། དགེ་བ་སྒྲུབ་པ་སྣ་ཚོགས་ལ། །དགའ་བས་རྟག་པར་ཐམས་ཅད་དུ། །གནས་ཕྱིར་བྱང་ཆུབ་སེམས་དཔའ་ཡི། ས་རྣམས་གནས་པ་ཡིན་པར་འདོད། །ཅེས་གསུངས་པ་ལྟར། ཞེས་གསུངས་པས་སོ། །ཡང་རྒྱན་གྱི་ས་འགྲེལ་ལས། མཚན་ཉིད་ནི། བྱང་ཆུབ་སེམས་དཔའ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་གྱི་རྟེན་དུ་གྱུར་པ་སྟེ། དབུ་མ་འཇུག་པའི་རང་འགྲེལ་པར། བྱང་ཆུབ་སེམས་དཔའི་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ན་ཆར་ཕྱེ་བ་ལ་ནི་སའི་མིང་འཐོབ་སྟེ།ཡོན་ཏན་གྱི་རྟེན་དུ་གྱུར་པའི་ཕྱིར་རོ་ཞེས་པ་དང༌། ཞེས་ཚིག་ཟིན་ལ་འཕགས་པ་ལ་མ་སྦྱར་བ་དང༌། གོང་དུ་བཀོད་པ་ལྟར་བླང་དོར་རབ་གསལ་ལས་བྱང་འཕགས་ལ་སྦྱར་བ་དང༌། ཉ་ཊཱིཀ་ལས། མཚན་ཉིད་ནི། ཐེག་ཆེན་གྱི་སྙིང་རྗེ་ཆེན་པོ་སོགས་ཀྱིས་ཟིན་པའི་ཟག་མེད་ཡེ་ཤེས་གང་ཞིག ཐེག་ཆེན་གྱི་སྤངས་རྟོགས་ཡོན་ཏན་གྱི་རྟེན་དུ་གྱུར་པའོ། །འཇུག་པའི་བཤད་པར། བྱང་པ་རྣམས་ཀྱི་སྙིང་རྗེ། ལ་སོགས་པའི་བཟུང་བའི་ཟག་པ་མེད་པའི་ཡེ་ཤེས་ཁོ་ན་ཆར་རྣམ་པར་ཕྱེ་བ་ནི་སའི་མིང་འཐོབ་སྟེ། ཡོན་ཏན་གྱི་རྟེན་དུ་གྱུར་པའི་ཕྱིར་རོ། །ཞེས་སོགས་གསུངས་པ་རྣམས་ཀྱི་དོན་ལ་དཔྱད་པར་བྱའོ། །ཡང་རྒྱན་ལས། ཡོན་ཏན་དཔག་མེད། ཅེས་དང༌། དེའི་ས་འགྲེལ་ལས། ས་རེ་རེའང་ཡོན་ཏན་དཔག་ཏུ་མེད་པ་དང་ལྡན་པ། ཞེས་དང༌། །ཉ་་ཊཱིཀ་ལས། ཡོན་ཏན་དཔག་ཏུ་མེད་པ་དང་ལྡན་པའི་ས་དེ་དག་ལ་ཡང་ཡང་ས་གོང་མ་གོང་མར་འགྲོ་བ་དང་ལྡན་པས་སའོ། །ཞེས་དང༌། གཟུང་འཇུག་རབ་གསལ་ལས། ཏིང་ངེ་འཛིན་གྱི་ས་རྣམས་ནི་འཕགས་པའི་ས་མ་ཡིན་ཏེ། འཕགས་པའི་ས་དང་པོ་ཐོབ་ནས་ཡིད་ཀྱི་རང་བཞིན་གྱི་ལུས་ལེན་པར་དཔལ་གྱི་མགུར་ནས་གསུངས་པའི་ཕྱིར་རོ། །གཞན་ཡང་འཕགས་པའི་ས་བཅུ་པའི་ཡོན་ཏན་གཞལ་དུ་མེད་པར་གསུངས་ན་བཅུ་གཅིག་པའི་ཡོན་ཏན་གཞལ་དུ་ཡོད་པར་གསུངས་པ་དང་འགལ་བའི་ཕྱིར་འདི་དག་ནི་སྦྱོར་ལམ་གྱི་ནང་ཚན་ཞིག་ལས་ཕྱེ་བ་ཁོ་ནའོ། །ཞེས་དང༌། ཏིང་ངེ་འཛིན་གྱི་སྐད་ཅིག་ཐ་མ་ནི་མཐོང་ལམ་ཡིན་པས། ཞེས་གསུངས་པས་ས་དང་པོ་སོགས་ཀྱི་ཡོན་ཏན་དཔག་མེད་ཡིན་མིན་བརྟག་པར་བྱའོ། །འོན་ཀྱང་ཀུན་སྤངས་པའི་སྦྱོར་དྲུག་ལས། གཙུག་ཏོར་གྱི་འཁོར་ལོའི་བར་བྱང་སེམས་བརྟན་པས་ས་བཅུ་གཉིས་པ་རྡོ་རྗེ་འཆང་གི་ས་ཚེ་འདི་ཉིད་ལ་ཐོབ་པ། ཞེས་དང༌། ས་བཅུ་བའི་མདོ་ལས། ས་དང་པོ་ལ་ཡོན་ཏན་བརྒྱ་ཕྲག་བཅུུ་གཉིས། ས་གཉིས་པ་ལ་ཡོན་ཏན་སྟོང་ཕྲག་བཅུ་གཉིས་སོགས་གསུངས་པས་དཔྱད། ས་བཅུའི་སྤང་བྱ་སྐོར་ཇི་ལྟར་བྱས་ནས་སྤངས་ཚུལ་ནི། མཐོང་སྤང་སྐོར་བཞི་བྱས་ནས་སྤངས་པ་དང་སྒོམ་སྤང་སྐོར་བཅུ་གཅིག་བྱས་ནས་སྤངས་པ་ཡིན་ལ།དེ་ཡང་བདེན་བཞིའི་མཐོང་སྤང་བཞི་རིམ་གྱིས་སྤོང་པ་ཡིན་ཏེ། རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་དང་རྒྱུད་བླ་ས་འགྲེལ་གཉིས་ལས། ཆོས་ཀྱི་དབྱིངས་དོན་དམ་པའི་དེ་ཁོ་ན་ཉིད་རིམ་གྱིས་མཐོང་བ་ཡིས། མཐོང་བས་སྤང་བར་བྱ་བའི་ཉོན་མོངས་པ་རྣམས་ནི་རིམ་གྱིས་ལྡོག་པར་འགྱུར་རོ་ཞེས་པས་མཐོང་སྤང་རྣམས་ནི་འབྲས་ཤུན་ལྟ་བུ་དང༌། ཞེས་དང༌། ཞང་སྟོན་པའི་རྒྱུད་བླའི་འགྲེལ་བ་ལས། ཇི་ལྟར་ཤིང་གི་འབྲས་བུ་ལས་མྱུ་གུ་དང་སྡོང་བོ་ལ་སོགས་པ་རིམ་གྱིས་སྐྱེས་པས་ས་བོན་གྱི་ཤུན་པ་རིམ་གྱིས་གཅོད་པ་ལྟར། དེ་བཞིན་དུ་དེ་ཁོ་ན་ཉིད་མངོན་སུམ་དུ་མཐོང་བའི་ལམ་རིམ་གྱིས་སྐྱེས་པ་ཡིས་མཐོང་སྤང་གི་དྲི་མ་རྣམས་ནི་རིམ་གྱིས་ལྡོག་པར་འགྱུར་རོ། །ཞེས་དང༌། ཉ་ཊཱིཀ་ལས།དེས་ན་མཐོང་སྤང་བཞི་རྣམས་ཀྱང་རིམ་གྱིས་སྤོང་སྟེ། ཆོས་བཟོད་བཞི་རིམ་གྱིས་སྐྱེ་བར་བཤད་པས་སོ། །རྒྱུད་བླར། ཇི་ལྟར་མྱུག་སོགས་རིམ་སྐྱེ་བས། །ས་བོན་ཤུན་པ་གཅོད་པ་ལྟར། །དེ་བཞིན་དེ་ཉིད་མཐོང་བ་ཡིས། །མཐོང་སྤང་རྣམས་ནི་ལྡོག་པར་འགྱུར། །ཞེས་སོ། །བསྡུ་བར། མཐོང་བས་སྤང་བར་བྱ་བ་ནི་གཅིག་ཅར་སྤོང༌། ཞེས་སོགས་ནི།སྡུག་བསྔལ་ཆོས་བཟོད་སྐྱེས་པ་དང་སྡུག་བསྔལ་མཐོང་སྤང་གཅིག་ཅར་སྤོང་བ་ལྟ་བུ་ལ་དགོངས་ཀྱི་ཐམས་ཅད་མིན་ཏེ། ཞེས་གསུངས་པའི་ཕྱིར་རོ། །དེ་མི་རིགས་པར་ཐལ།སྡུལ་བསྔལ་ཆོས་བཟོད་ཀྱིས་སྡུག་བསྔལ་མཐོང་སྤང་སྤངས་ནུས་ལ་ཀུན་འབྱུང་མཐོང་སྤང་སྤངས་མི་ནུས་པའི་རྒྱུ་མཚན་མེད་པའི་ཕྱིར་དང༌། སྔོན་མེད་ལེགས་བཤད་ལས། མཐོང་བའི་སྤང་བར་བྱ་བ་རྣམས་ནི་དུས་གཅིག་ཏུ་སྤོང་པ་ཡིན་ལ། སྒོམ་པས་སྤང་བར་བྱ་བ་རྣམས་ནི་རིམ་གྱིས་སྤོང་ཞིང༌། ཞེས་གསུངས་པའི་ཕྱིར་ན་དེའི་དགོངས་པ་གཞན་དུ་ཚོལ་དགོས་སོ། །ཡང་རྒྱན་ལས། ལུས་ལ་གནས་ངན་ལེན་པ་ཀུན། །སྐད་ཅིག་རེ་རེ་ལ་ཟད་འགྱུར། །ཞེས་དང༌། ཉ་ཊཱིཀ་ལས། སྐད་ཅིག་རེ་རེ་གནས་ངན་ལེན་ཟད་པར་བྱེད་དེ། །ཞེས་སྐད་ཅིག་རེ་རེ་ལ་སྤང་བྱ་སྤངས་ན་སྤང་བྱ་སྐོར་མཐའ་ཡས་པ་བཅས་ནས་སྤངས་པ་ཡིན་མིན་དཔྱད། རང་ལུགས་ལ་ས་དང་པོའི་སྒོམ་ལམ་ཡོད་དེ། སྔོན་མེད་ལེགས་བཤད་ལས། མཐོང་ལམ་རྗེས་ཐོབ་དང་བཅས་པས་ས་དང་པོའི་ཕྱེད་འཁྱེར་ཞིང༌།དང་པོའི་ཕྱེད་ཕྱི་མ་ནི་སྒོམ་ལམ་ཡིན་ནོ། །ཞེས་དང༌། རྒྱན་གྱི་ས་འགྲེལ་ལས། མདོར་ན་ས་དང་པོའི་སྟོད་ཀྱི་ཆ་ལ་མཐོང་སྤང་སྤངས་ཏེ་མཐོང་ལམ་ཡོངས་སུ་རྫོགས་པར་ཐོབ་ནས། སྨད་ཀྱི་ཆ་ནས་ས་བཅུ་བའི་བར་ལ་སྒོམ་ལམ་གྱིས་ཤེས་བྱའི་སྒྲིབ་པ་གཙོ་བོར་སྤོང་ཞིང༌། ཞེས་གསུངས་པའི་ཕྱིར་རོ། །ཡང་ས་དང་པོའི་སྒོམ་ལམ་མེད་བར་ཐལ། སྒོམ་ལམ་ལ་སའི་སྒོ་ནས་དབྱེ་བ་དྲི་མ་མེད་པའི་ས་སོགས་དགུ་ལས་མེད་པ་དང༌། ཨཱརྱས།འཇུག་སྒྲུབ་ས་བཅུ་ཅར་ན་ཡོད་པར་བཤད་པ་དེ་འཕགས་པ་ཐོགས་མེད་དང་འགལ་ཚུལ་ཡོད་པའི་ཕྱིར་ཏེ། ཉ་ཊཱིཀ་ལས། སའི་སྒོ་ནས་དྲི་མ་མེད་པ་སོགས་དགུ ཞེས་དང༌། དེ་ལས། ཨཱརྱས། ས་བཅུ་ཅར་ན་ཡོད་པར་བཤད་པར་མངོན་ཅིང་དེ་ལྟར་བཞེད་པ་ནི་ནོར་བར་མངོན་ཏེ། འཕགས་པ་ཐོགས་མེད་དང་འགལ་བས་སོ། །ཞེས་འཕགས་པ་ཐོགས་མེད་དང་འགལ་སའི་ལུང་ནི། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་དེ་ཡིན་པའི་ཕྱིར་ཟེར་ན་བརྟག་པར་བྱའོ། །ཡང་ས་གོང་མར་འཕོ་ཚུལ་ནི་ཇི་སྲིད་དུ་རང་རང་གི་ཡོངས་སྦྱོང་མ་རྫོགས་ཀྱི་བར་དེ་སྲིད་དུ་ས་དེ་དང་དེ་ཡིན་ཞིང་རྫོགས་ནས་གོང་མ་གོང་མར་འཕོ་བ་སྟེ་བརྒྱད་སྟོང་འགྲེལ་པར། ས་གང་གི་ཡོངས་སུ་སྦྱོང་བར་འགྱུར་བའི་ཆོས་གང་ཡིན་པ་དེ་དག་མ་རྫོགས་ཀྱི་བར་དུ་ནི་ས་དེ་ཡིན་ལ། ཡོངས་སུ་རྫོགས་ནས་ནི་ས་གཞན་ཡིན་པར་ཤེས་པར་བྱའོ་ཞེས་གསུངས་པ་ལྟར་རྒྱན་གྱི་ས་འགྲེལ་ལས་གསུངས་ལ། དེ་ལྟརབཞག་པ་དེ་ཉ་ཊཱིཀ་ལས། མདོ་དང་མཐུན་ནོ། །ཞེས་མདོ་དང་མཐུན་པར་གསུངས་སོ། །ཉ་ཊཱིཀ་ལས། ས་དང་པོ་ནི་རྫོགས་པར་ཐོབ་པར་འགྱུར་རོ། །ཞེས་སོགས་ཀྱིས་ས་དེ་དང་དེའི་ཡོངས་སྦྱོང་གིས་ས་དེ་དང་དེ་མ་ཐོབ་པ་ཐོབ་བྱེད་མ་ཡིན་པར་རྫོགས་པར་ཐོབ་བྱེད་ཡིན་གསུངས་པ་མི་རིགས་པར་ཐལ། མདོ་ལུགས་མ་ལས། ཡོངས་སུ་སྦྱོང་བའི་ཆོས་དུ་ཞིག་གིས་ས་དང་པོ་འཐོབ་པར་འགྱུར་ཞེ་ན། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་འཐོབ་འགྱུར་ཏེ། །ཞེས་གསུངས་པའི་ཕྱིར་ཟེར་ན་མ་ཁྱབ་སྙམ་མོ། །ས་བཅུར་ཆོས་ཉིད་ལ་ངེས་པ་འདྲེན་ཚུལ་ནི། མཉམ་གཞག་ཏུ་ཆོས་ཉིད་ཙམ་རྟོགས་པ་ལ་ཁྱད་མེད་དུ་བསྟན་པ་དང༌། ཆོས་ཉིད་བཅུ་ལ་སྒྲིབ་པ་བཅུ་སྤངས་པའི་རིམ་གྱིས་ངེས་པ་འདྲེན་ཚུལ་ལ་ཁྱད་ཡོད་པར་བསྟན་པ་དང་གཉིས། དང་པོ་ནི། ས་བཅུ་གཅིག་གི་མཉམ་བཞག་ན་ཆོས་ཉིད་ཙམ་མངོན་གསུམ་དུ་རྟོགས་པར་ཁྱད་པར་མེད་དེ། ཆོས་ཐམས་ཅད་ཀྱི་ཆོས་དབྱིངས་གཅིག་ཉིད་ཡིན་པའི་ཕྱིར་ཏེ། མདོ་ལས། འཇམ་དཔལ་ཆོས་ཀྱི་དབྱིངས་གཅིག་ཡང་དག་པའི་མཐའ་གཅིག་ཡིན་ན་སྣོད་དང་སྣོད་མིན་པར་ཇི་ལྟར་བརྟགས། ཞེས་དང༌། ཨཱརྱ་དེ་བས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང༌། །ཞེས་སོགས་མཐའ་ཡས་སོ། །གཉིས་པ་ནི། དེ་ལྟར་ཡིན་ཀྱང་ཆོས་དབྱིངས་བཅུས་སྒྲིབ་པ་བཅུ་སྤངས་པའི་སྒོ་ནས་རྗེས་ཐོབ་ཀྱི་ཡང་དག་པའི་ངེས་པ་འདྲེན་པའི་སྒོ་ནས་རྟོགས་པ་ལ་ཁྱད་པར་ཡོད་དེ། ཐམས་ཅད་ཀྱིས་ཀྱང་མཉམ་གཞག་ཏུ་ཆོས་ཉིད་དོན་དམ་པ་ཇི་ལྟ་བའི་ཚུལ་སྤྲོས་པའི་མཐའ་དང་བྲལ་བ་ན་ནམ་མཁའ་ལྟ་བུར་རྟོགས་ཤིང༌། རྗེས་ཐོབ་ཏུ་ཆོས་ཅན་ཀུན་རྫོབ་ཇི་སྙེད་པའི་ཚུལ་སྣང་ལ་རང་བཞིན་མེད་པ་སྒྱུ་མ་ལྟ་བུར་རྟོགས་ཏེ། རྣམ་པར་མི་རྟོག་པ་ལ་འཇུག་པའི་གཟུངས་ལས། རྣམ་པར་མི་རྟོག་པའི་ཡེ་ཤེས་ཀྱིས་ནི་ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་མཐོང་ངོ༌། །དེའི་རྗེས་ལས་ཐོབ་པའི་ཡེ་ཤེས་ཀྱིས་ནི་ཆོས་ཐམས་ཅད་དང་སྒྱུ་མ་ལ་སོགས་པ་བརྒྱད་དང་མཚུངས་པར་མཐོང་ངོ་ཞེས་གསུངས་པ་ལྟར་རོ། །སོ་སོས་ནི་ས་དང་པོར་ཆོས་ཀྱི་དབྱིངས་རང་གཞན་ཐམས་ཅད་ཀྱི་བདག་ཉིད་དུ་ཀུན་ཏུ་འགྲོ་བའི་ཚུལ་དུ་རྟོགས་ཤིང་དེ་བཞིན་དུ་ས་གཉིས་པར་རང་བཞིན་གྱིས་འོད་གསལ་བར་མཐོང་བས་མཆོག་གི་དོན་དང༌། གསུམ་པར་བསྟན་པ་ཆོས་ཐམས་ཅད་རྟོགས་པའི་རྒྱུ་མཐུན་པའི་དོན་དང༌། བཞི་པར་གང་ལ་ཡང་བདག་གི་བར་ཡོངས་སུ་འཛིན་པ་མེད་པའི་དོན་དང༌། ལྔ་པར་རྣམ་པར་དག་པའི་དབྱིངས་སུ་རང་གཞན་གྱི་རྒྱུད་རྣམས་ཐ་དད་མེད་པའི་དོན་དང༌།དྲུག་པར་ཉོན་མོངས་རྣམས་ནི་གློ་བུར་བ་ཡིན་གྱི་རང་བཞིན་མ་ཡིན་ལ། རང་བཞིན་གྱིས་རྣམ་པར་དག་པས་གསར་དུ་རྣམ་པར་དག་པ་མིན་པའི་དོན་དང༌། བདུན་པར་མདོ་ལ་སོགས་པའི་ཆོས་ཀྱི་མཚན་མ་ཐ་དད་མེད་པའི་དོན་དང༌། བརྒྱད་པར་མི་སྐྱེ་བའི་ཆོས་ལ་བཟོད་པ་ཐོབ་པས་ཉོན་མོངས་པ་བྲི་བ་དང་རྣམ་པར་བྱང་བ་འཕེལ་བ་མེད་པའི་དོན་དང༌།ཉོན་ཡིད་གནས་གྱུར་པས་རྣམ་པར་མི་རྟོག་པ་ལ་དབང་བའི་དོན་དང༌། དབང་ཤེས་གནས་གྱུར་པས་ཞིང་དག་པ་ལ་དབང་བའི་དོན་དང༌། དགུ་པར་ཡིད་ཤེས་གནས་གྱུར་པ་ལས་སོ་སོ་ཡང་དག་པར་རིག་པའི་ཡེ་ཤེས་ལ་དབང་བའི་དོན་དང༌། བཅུ་པར་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་པའི་འཕྲིན་ལས་ལ་དབང་བའི་གནས་ཀྱི་དོན་དུ་རྟོགས་ཏེ། དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང༌། །ཡོངས་སུ་འཛིན་པ་མེད་དོན་དང༌། །རྒྱུད་རྣམས་ཐ་དད་མེད་པ་དང༌། །ཉོན་མོངས་རྣམ་དག་མིན་དོན་དང༌། །ཐ་དད་མེད་པའི་དོན་ཉིད་དང༌། །བྲི་མེད་འཕེལ་བ་མེད་དོན་དང༌།༼བརྒྱད་པ་ལ)མི་རྟོག་དང་ཞིང་དང་(དགུ་བ་ལ)ཡེ་ཤེས་(བཅུ་བ་ལ)ལས་དག་པ། །༽དབང་ནི་རྣམ་པ་བཞི་ཡི་གནས། །ཞེས་གསུངས་པ་ལྟར་རོ། །ཁ་ཅིག་སྒྲོ་འདོགས་གཅོད་ཚུལ་ལ་ཁྱད་ཡོད་ཀྱང་རྟོགས་བྱའི་དོན་ལ་ཁྱད་པར་མེད་པའི་ཕྱིར་ཆོས་ཀྱི་དབྱིངས་རྟོགས་པ་ལ་ཁྱད་པར་མེད་དོ་ཞེས་ཀྱང་གསུངས་མོད་ཀྱི། གློ་བུར་གྱི་དྲི་མ་རིམ་གྱིས་སྤངས་པ་ལས་ཆོས་ཀྱི་དབྱིངས་རྟོགས་པའང་གོང་ནས་གོང་དུ་འཕེལ་བར་འགྱུར་ཏེ། ཆོས་དབྱིངས་བསྟོད་པ་ལས། ཇི་ལྟར་ཚེས་པའི་ཟླ་བ་ནི། །སྐད་ཅིག་སྐད་ཅིག་རྒྱས་པར་མཐོང༌། །དེ་བཞིན་ས་ལ་ཞུགས་རྣམས་ཀྱིས། །རིམ་གྱིས་རིམ་གྱིས་འཕེལ་བར་མཐོང༌། །ཞེས་གསུངས་པ་ལྟར་རོ། །སྤངས་རྟོགས་དེ་དག་རྒྱན་གྱི་ས་འགྲེལ་ལྟར་བཤད་པའོ། །ཉ་ཊཱིཀ་ལས་ཀྱང་ཆོས་ཉིད་ཀྱི་ངོ་བོ་རྟོགས་པ་ལ་ཁྱད་མེད་ཅིང་ཇི་སྙེད་པ་རྟོགས་པ་སོགས་ནི་ཁྱད་ཤིན་ཏུ་ཆེ་ལ་ཆོས་དབྱིངས་བཅུའི་སྒྲིབ་པ་སྤངས་པའི་སྒོ་ནས་རྟོགས་མ་རྟོགས་ཀྱི་ཁྱད་ཡོད་པར་བཤད་དོ། །ཡང་ཉ་ཊཱིཀ་ལས། ཁ་ཅིག་ཆོས་ཉིད་ལ་ལྡོག་པའི་ཆ་ཤས་ཡོད་ཀྱི་རྫས་ཀྱི་ཆ་མེད་པའོ་ཞེ་ན། ཆོས་ཐམས་ཅད་ཀྱི་ཆོས་ཉིད་དེ་སྤྱིའི་མཚན་ཉིད་ཀྱིས་སོ་སོར་གཅད་དུ་མེད་པར་བཤད་པ་དང་འགལ་ཞིང་གཅིག་ཏུ་བཤད་པ་དང་ཡང་འགལ་ལོ། །ཡང་སྒྲོ་བཏགས་སུ་ཡང་འགྱུར་ཏེ། ལྡོག་པ་ཐ་དད་པའི་ཐ་དད་དེ་ཡིན་པས་སོ། །ཞེས་པའི་ཁྱབ་པ་སྡེ་བདུན་མདོ་དང་བཅས་པར་བཤད་དོ། །ཞེས་གསུངས་པ་ལ་ཆོས་ཉིད་ལྡོག་ཆ་སོ་སོར་ཡོད་མེད་དང༌། ཐ་དད་ཡིན་ན་སྒྲོ་བཏགས་ཡིན་དགོས་མིན་དཔྱད། ཡང་ཉ་ཊཱིཀ་ལས། ཡང་མཐོང་ལམ་པ་ཆོས་ཅན། མཆོག་གི་དོན་ལ་སོགས་པ་ལ་སྒྲིབ་པ་སྤངས་པར་ཐལ། དེ་འདྲའི་ཆོས་ཉིད་མངོན་སུམ་དུ་རྟོགས་པས་སོ་ཞེ་ན། ཁྱབ་པ་མེད་དེ། དེ་ལ་ཆོས་གོམས་པ་གསལ་བས་རང་སྟོབས་ཀྱིས་ངེས་པ་དངོས་སུ་འདྲེན་པའི་སྒོ་ནས་མངོན་སུམ་དུ་རྟོགས་ན་དེར་འགྱུར་གྱི་མངོན་སུམ་དུ་མཐོང་བ་ཙམ་གྱིས་དེར་མི་འགྱུར་ཏེ། ཞེས་གསུངས་པ་ལ། འོ་ན་ཆོས་ཉིད་དང་ཆོས་ཉིད་མཆོག་གི་དོན་སོགས་མངོན་སུམ་དུ་མཐོང་བ་ལ་གེགས་བྱེད་ཀྱི་སྒྲིབ་པ་མེད་པར་ཐལ་བར་འགྱུར་རོ་ཞེ་ན་ཅུང་ཟད་དཔྱད་རྒྱུ་སྣང་ངོ༌། །ཡང་དབུ་མ་ཡིད་བཞིན་ནོར་བུ་ལས། ཉན་ཐོས་སོགས་ཀྱིས་དད་པས་རྟོགས་བྱ་ཙམ། །ས་བདུན་གནས་པའི་ཀྱང་ནི་མངོན་སུམ་མིན། །མཛོད་ནང་ནོར་བཞིན་ཕྱོགས་མགོ་མཐོང་བ་ཙམ། །དག་སར་གནས་པའི་ཟུར་ཙམ་འོལ་སྤྱི་ཙམ། །མཐའ་དག་མ་ལུས་གཟིགས་པ་སངས་རྒྱས་ཉིད། །ཅེས་དང༌། ལྷན་ཐབས་འོད་བརྒྱ་འབར་བ་ལས། སེམས་འདིའི་རང་བཞིན་གནས་ལུགས་བདེ་གཤེགས་སྙིང་པོ་དེ་ཡིན། འདི་རྫོགས་པའི་སངས་རྒྱས་ཀྱིས་ཇི་ལྟ་བ་རང་དེ་མཁྱེན། བྱང་སེམས་ས་བཅུ་པ་པས་གསལ་བར་མཐོང༌། བརྒྱད་པ་དགུ་པ་གཉིས་ཀྱི་འོལ་སྤྱི་ཙམ་མཐོང༌། མ་དག་ས་བདུན་ལ་གནས་པས་ཟུར་ཙམ་མཐོང༌། ཉན་རང་འཕགས་པ་དང༌། གསང་སྔགས་ཀྱི་ཐབས་ཟབ་མེད་ན་བྱང་སེམས་སོ་སྐྱེ་རྣམས་ཀྱིས་དད་པས་རྟོགས་བྱ་ཡིན་གྱི་དངོས་སུ་མཐོང་བ་མེད། སོ་སོ་སྐྱེ་བོ་ཕལ་པ་རྣམས་ཀྱིས་དད་པས་ཀྱང་མི་རྟོགས་ཏེ། ཞེས་གསུངས་པའི་ཕྱིར་རོ། །

བཅུ་བ་ངེས་འབྱུང་སྒྲུབ་པའི་མཚན་ཉིད།ས་མཚམས།འབྱུང་ས་བརྒྱད་དང༌།

བཅུ་བ་ངེས་འབྱུང་སྒྲུབ་པའི་མཚན་ཉིད།ས་མཚམས།འབྱུང་ས་བརྒྱད་དང༌།

ངེས་འབྱུང་སྒྲུབ་པའི་མཚན་ཉིད། ས་མཚམས། འབྱུང་ས་བརྒྱད་དང༌། འབྱུང་བྱེད་བརྒྱད་རྣམས་གང་ཡིན་ཞེས་པའོ། །གཉིས་པ་ལན་ནི། རང་གི་ཉེར་འབྲས་རྣམ་མཁྱེན་དུ་ངེས་པར་འབྱིན་བྱེད་ཀྱི་རྒྱུན་མཐའི་ཡེ་ཤེས་དེ། ངེས་འབྱུང་སྒྲུབ་པའི་མཚན་ཉིད་ཡིན་ཏེ། མདོ་ལུགས་མ་ལས། ངེས་འབྱུང་བསྒྲུབ་པ་ནི། ལྷ་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་མནན་ནས་ཁམས་གསུམ་ནས་ངེས་པར་འབྱུང་ཞིང་རྣམ་མཁྱེན་དུ་གནས་ཞེས། མདོ་ལས་བྱུང་བའི་ཕྱིར། རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མའི་སྦྱོར་བའི་རང་བཞིན་ནོ། །ཞེས་དང༌། སྒྲུབ་པ་འདི་ནི་སྐད་ཅིག་མའི་སྦྱོར་བ་གནས་སྐབས་ཡིན་པས། དེར་དཀར་པོའི་ཆོས་ཐམས་ཅད་རབ་ཏུ་སྨིན་ཅིང་རྫོགས་པའོ། །ཞེས་གསུངས་སོ། །ས་མཚམས་རྒྱུན་མཐའ་ཁོ་ན་ལ་ཡོད། གཉིས་པ་དབྱེ་བ་ནིེ། ཀུན་རྫོབ་རྣམ་ཅན་དང༌། དོན་དམ་རྣམ་ཅན་གཉིས་ཡོད། ལྡོག་ཆའི་ཕྱེ་ན་འཇིག་རྟེན་ཟིལ་གྱིས་གནོན་པའི་ཆེ་བའི་བདག་ཉིད་ཀྱི་ངེས་འབྱུང་སྒྲུབ་པ་སོགས་བརྒྱད་ཡོད་དེ། མདོ་ལུགས་མ་ལས།དེས་ན་འཇིག་རྟེན་ཟིལ་གྱིས་གནོན་པའི་ཆེ་བ་དང༌། ཆོས་ཐམས་ཅད་མཉམ་པ་ཉིད་ཀྱི་ཆེ་བ་དང༌། སེམས་ཅན་གྱི་དོན་བྱེད་པའི་ཆེ་བ་དང༌། ལྷུན་གྱིས་གྲུབ་པ་འབད་པ་མེད་པའི་ཆེ་བ་དང༌། མཐའ་ཐམས་ཅད་ལས་འདས་པའི་ཆེ་བ་དང༌། རྣམ་མཁྱེན་ཐོབ་པའི་ཆེ་བ་དང༌། གཟུགས་སོགས་ཆོས་ཐམས་ཅད་ཀྱི་རྣམ་པ་ཐམས་ཅད་ཤེས་པའི་ཆེ་བ་དང༌། ལམ་གྱི་ཡུལ་ཅན་འཁོར་གསུམ་དུ་མི་རྟོག་པའི་ཡེ་ཤེས་ཀྱིས་ཡུལ་བྱང་ཆུབ་ཀྱི་ལམ་སྦྱོང་ཞིང་དག་པར་བྱེད་པའི་ཆེ་བ་སྟེ། ཆེ་བའི་ཡོན་ཏན་རྣམ་པ་བརྒྱད་ཀྱི་བདག་ཉིད་དུ་གྱུར་པའི་ཐེག་པ་ཆེན་པོ་འདི་ངེས་པར་འབྱུང་བའི་སྒྲུབ་པ་ཡིན་པར་ཤེས་པར་བྱའོ། །ཞེས་གསུངས་པས་སོ། །ཡང་ཉ་ཊཱིཀ་ལས། དབྱེ་ངོ༌། །ཆེད་དུ་བྱ་བའི་ངེས་འབྱུང་སྒྲུབ་པ་སོགས་རྣམ་པ་བརྒྱད་དོ། །ཞེས་སོ། །དེ་ཡང་ཉ་ཊཱིཀ་གསུངས་ཟིན་ལྟར་ན་འབྱུང་ས་བརྒྱད་ཀྱི་སྒོ་ནས་བརྒྱད་ཡོད་པར་བཤད་དོ། །ཉ་ཊཱིཀ་ལས། དཔུང་ཚོགས་བསགས་པས་མ་རྒྱལ་བ་ལས་རྒྱལ་བ་ཐོབ་པས་ངེས་པར་འབྱུང་བའི་སྒྲུབ་པའི་མཚན་ཉིད། དེ་གང་ཞིག་ངེས་པར་འབྱུང་ས་བརྒྱད་པོ་གང་རུང་དུ་དངོས་སུ་ངེས་པར་འབྱིན་པ། དབྱེ་ན་བརྒྱད་དོ། །ཞེས་གསུངས་པ་ལྟར་ན་དེ་འདྲ་བའི་ལམ་དེ་ཚོགས་སྦྱོར་དང་མཐོང་ལམ་དང་མ་དག་ས་བདུན་སོགས་ལ་ཡོད་མེད་དཔྱད། མདོ་ལུགས་མ་ལས། དེས་ན་ངེས་འབྱུང་སྒྲུབ་པའི་རང་བཞིན་ཐེག་པ་ཆེན་པོའི་ངོ་བོ་དང་དེའི་ཆེ་བའི་ཡོན་ཏན་གཉིས་ཏེ། དེ་ལ་དང་པོ་ནི་མདོ་ལས། ཕར་ཕྱིན་དྲུག་དང་གཟུངས་ཀྱི་སྒོ་དང་ཏིང་ངེ་འཛིན་ཐམས་ཅད་དང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་སྟོབས་བཅུ་དང་མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། མ་འདྲེས་པ་བཅོ་བརྒྱད་རྣམས་དེ་རྣམ་པར་སྨིན་པའི་བདག་ཉིད་དུ་གྱུར་པའི་ཆོས་ཀྱི་སྐུས་བསྡུས་པ་ཉིད་དོ། །གནོད་འཇོམས་ལས། ཕ་རོལ་ཏུུ་ཕྱིན་པ་ལ་སོགས་པའི་ཆོས་རྣམས་རྣམ་པར་སྨིན་པའི་བདག་ཉིད་དུ་གྱུར་པའི་ཆོས་ཀྱི་སྐུས་བསྡུས་པ། ཕ་རོལ་ཏུུ་ཕྱིན་པ་དྲུག་ལ་སོགས་པ་དེ་དག་ཐེག་པ་ཆེན་པོ་ཉིད་དུ་བསྟན་ཏོ། །ཞེས་གསུངས་སོ། །རྣམ་པར་སྨིན་པའི་དོན་ནི། ལྷུན་གྱིས་གྲུབ་ཅིང་རབ་ཏུ་རྒྱས་པ་སྟེ། སྒྲུབ་པ་འདི་ནི་སྐད་ཅིག་མའི་སྦྱོར་བ་གནས་སྐབས་ཡིན་པས། དེར་དཀར་པོའི་ཆོས་ཐམས་ཅད་རབ་ཏུ་སྨིན་ཅིང་རྫོགས་པའོ། །ཞེས་མདོ་ལས་ཆོས་ཀྱི་སྐུས་བསྡུས་ཞེས་པའི་བསྡུས་ཚུལ་ལ་དཔྱད། ཡང་ཉ་ཊཱིཀ་ལས། གྲངས་ངེས་ནི། ངེས་པར་འབྱུང་བའི་ས་རྣམ་པ་བརྒྱད་དུ་ཡོད་པ་ཡིན་པས་དེར་འབྱུང་བྱེད་བརྒྱད་དོ། །ཞེས་ངེས་པར་འབྱུང་ས་བརྒྱད་ཅེས་པ་མི་རིགས་ཏེ། མདོ་ལུགས་མ་ལས། དེ་ལ་ཆེ་བའི་ཡོན་ཏན་རྣམ་པ་བརྒྱད་ཀྱིས་བདག་ཉིད་ངེས་འབྱུང་སྒྲུབ་པ་ཡིན་པར་སྟོན་པ་འདི་ལྟ་སྟེ། ཞེས་ཆེ་བའི་ཡོན་ཏན་ལས་ངེས་པར་འབྱུང་ས་ལ་མ་སྦྱར་པའི་ཕྱིར་ཟེར་ན་དཔྱད། རྩ་བར། ཆེད་དུ་བྱ་དང༌། ཞེས་པའི་ཆེད་དུ་བྱ་ནི། ཉ་ཊཱིཀ་ལས། འབྱུང་ས་བརྒྱད་གང་ན། ཐོག་མར་གཙོ་བོ་ཡིན་པས་ཆེད་དུ་བྱ་བ་ཇི་སྐད་བཤད་པའི་ཆེན་པོ་གསུམ་དང༌། ཞེས་ཆེན་པོ་གསུམ་ལ་བཤད་མོད་མདོ་ལུགས་མའི་གསུང་ཟིན་ལྟར་ན་མི་རིགས་ཏེ། དེ་ལས། སྐབས་དང་པོ་འདིར་ཆེད་དུ་བྱ་བ་མི་གཅིག་པ་གསུམ་བསྟན་པ་ལ། སྔར་ནི་ཆེན་པོ་གསུམ་གྱི་ཆེད་དུ་བྱ་བ་ནི་སེམས་དཔའ་ཆེན་པོ་ཡིན་ལ་འཇུག་སྒྲུབ་ཀྱི་སྐབས་སུ་བསྒོམ་པ་རྣམ་པར་གཞིག་པའི་ཆེད་དུ་བྱ་བ་ནི་ནང་སྟོང་པ་ཉིད་ལ་སོགས་པ་བསྒོམ་པ་ཡིན་ཞིང༌། འདིར་ནི་ཟིལ་གྱིས་མནན་ནས་ངེས་པར་འབྱུང་བའི་ཆེད་དུ་བྱ་བ་ནི་ངེས་འབྱུང་སྒྲུབ་པའི་ངོ་བོ་ཐེག་ཆེན་ལ་ཐེག་པ་ཆེན་པོ་ཞེས་པ་འདི་ཡིན་ནོ། །འདི་དག་གི་ཁྱད་པར་མ་ཕྱེ་ན་མདོ་དང་འགལ་བར་འགྱུར་རོ། །ཞེས་གསུངས་པའི་ཕྱིར་རོ། །ཡང་ཉ་ཊཱིཀ་ལས། ཨཱརྱས། ས་བཅུ་ཅར་ན་ཡོད་པར་བཤད་པར་མངོན་ཅིང་དེ་ལྟར་བཞེད་པ་ནི་ནོར་བར་མངོན་ཏེ། འཕགས་པ་ཐོགས་མེད་དང་འགལ་བས་སོ། །ཞེས་འཕགས་པ་ཐོགས་མེད་དང་འགལ་སའི་ལུང་ནི། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་པ་དེ་ཡིན་པས་དེ་དང་འགལ་ཚུལ་བརྟག་པར་བྱའོ། །ཡང་རྩ་བར། རྣམ་པ་ཐམས་ཅད་མཁྱེན་ཉིད་དང༌། །ཞེས་པའི་དོན་ཉ་ཊཱིཀ་ལས། དེ་ཡང་རྣམ་མཁྱེན་རྟོགས་པ་མེད་པར་མི་འབྱུང་བས་སྔར་གཉེན་ཚོགས་ཀྱི་མཐར་ཐུག་པའི་སྐབས་དང་པོ་འདིར་ཇི་སྐད་བཤད་པའི་རྣམ་པ་ཐམས་ཅད་མཁྱེན་པ་ཉིད་དང༌། ཞེས་ཆོས་བཤེས་ཏེ། འོན་ཀྱང་གང་དང་ཡང་དག་ལྡན་པས་ཞེས་དང༌། སེམས་བསྐྱེད་ཉེར་གཅིག་གཉིས་པ་སོགས་སོ། །སེམས་ཅན་ཉིད་བྱང་ཆུབ་ཡིན་པ་དེའི་ཕྱིར་བྱང་སེམས་ཞེས་བྱའོ། །བྱང་ཆུབ་དེས་ཀྱང་ཆོས་ཐམས་ཅད་ཀྱི་རྣམ་པ་ཤེས་ཏེ། ཞེས་སོགས། ཞེས་གསུངས་པ་དང༌། མདོ་ལུགས་མ་ལས། ངེས་འབྱུང་སྒྲུབ་པའི་ངོ་བོ་ཐེག་པ་ཆེན་པོའི་བདག་ཉིད་ཀྱི་བྱང་ཆུབ་ཀྱི་རྣམ་པ་ཐམས་ཅད་ཤེས་པ་ནི་གཟུགས་སོགས་ཀྱི་རྣམ་པ་ཐམས་ཅད་མཁྱེན་པ་ཉིད་ཡིན་ནོ། །མདོ་ལས། བྱང་ཆུབ་གང་ཡིན་པ་ཉིད་སེམས་དཔའ་ཡིན་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །བྱང་ཆུབ་དེས་ཀྱང་ཆོས་ཐམས་ཅད་ཀྱི་རྣམ་པར་ཤེས་ཏེ། ཆོས་དེ་དག་ལ་མངོན་པར་ཞེན་པ་ཡང་མེད་དོ། །ཞེས་དང༌། རྣམ་མཁྱེན་ཐོབ་པའི་ཆེ་བ་དང༌། གཟུགས་སོགས་ཆོས་ཐམས་ཅད་ཀྱི་རྣམ་པ་ཐམས་ཅད་ཤེས་པའི་ཆེ་བ་དང༌། ཞེས་གསུངས་པ་ལ་དཔྱད་པར་བྱའོ། །

བཅུ་གཅིག་པ་ལམ་ཤེས་ཀྱི་ཡན་ལག་ཡུལ་ངེས་པ་དང་ཁྱབ་པའི་དོན་ཅི་ཡིན་ཞེས་པའི་ལན།

བཅུ་གཅིག་པ་ལམ་ཤེས་ཀྱི་ཡན་ལག་ཡུལ་ངེས་པ་དང་ཁྱབ་པའི་དོན་ཅི་ཡིན་ཞེས་པའི་ལན།

ལམ་ཤེས་ཀྱི་ཡན་ལག་ཡུལ་ངེས་པ་དང་ཁྱབ་པའི་དོན་ཅི་ཡིན་ཞེས་པའོ། །གཉིས་པ་ལན་ནི། མཚན་འཛིན་གྱི་གཉེན་པོའི་ཡན་ལག་ཏུ་གྱུར་བའི་ལམ་ཤེས་རྫོགས་བྱེད་གྱི་ཡོན་ཏན་དེ། འདིར་བསྟན་ལམ་ཤེས་ཀྱི་ཡན་ལག་གི་མཚན་ཉིད་ཡིན་ཏེ། ཉ་ཊཱིཀ་ལས། མཚན་ཉིད་ནི། མཚན་འཛིན་གྱི་གཉེན་པོའི་ཡན་ལག་སྟེ། ཤེར་འབྱུང་གིས་གཉེན་པོའི་ཡན་ལག་ནི་ལམ་ཤེས་ཀྱི་ཡན་ལག་གོ་ཞེས་གསུངས་སོ། །གཉིས་པ་དབྱེ་བ་ནི། རྟེན་དང༌། ཡུལ་ངེས་པ་དང༌། ཁྱབ་པ་དང༌། རང་བཞིན་དང༌། དེ་ཡི་ལས་དང་ལྔའོ། །སྐབས་འདིའི་ངེས་པའི་དོན་ཤེར་ཕྱིན་བསྟན་པའི་སྣོད་རུང་ཁྱད་པར་ཅན་དང་ལམ་ཤེས་དངོས་སུ་སྐྱེ་བའི་སྣོད་རུང་ལ་བྱང་ཆུབ་དུ་སེམས་བསྐྱེད་པ་ཉིད་དུ་ངེས་ཏེ། མདོ་ལུགས་མ་ལས། །ལམ་ཤེས་ཀྱི་ངོ་བོ་བྱང་ཆུབ་སེམས་དཔའི་ཤེར་ཕྱིན་བསྟན་གྱིས་ལྷའི་བུ་སེམས་མ་བསྐྱེད་པ་དག་གི་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་གྱིས་ཤིག་ཅེས་གསུངས་པའི་ཕྱིར་བྱང་ཆུབ་སེམས་དཔའི་ལམ་ཤེས་ཀྱི་བདག་ཉིད་དུ་གྱུར་པའི་ཤེར་ཕྱིན་བསྟན་པའི་སྣོད་དུ་རུང་བའི་ཡུལ་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ཉིད་དུ་ངེས་པའོ། །ཞེས་གསུངས་པའི་ཕྱིར་རོ། །ཁྱབ་པའི་་དོན་ཡང་ལམ་ཤེས་ཀྱིས་ཐེག་པ་གསུམ་གྱི་ཡོན་ཏན་ཡར་ལྡན་ནམ་རྟོགས་རིགས་ཀྱྀས་བསྡུས་པ་ཡིན་ཏེ། མདོ་ལུགས་མ་ལས། །ལམ་ཤེས་ཉིད་ཀྱིས་ཐེག་པ་གསུམ་ཆར་གྱི་ཡོན་ཏན་བསྡུས་པའི་ཕྱིར་ཐེག་པ་སུམ་ཆར་ལ་ཁྱབ་པ་ཡིན་ཏེ། གནོད་འཇོམས་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཉན་ཐོས་དང་རང་སངས་རྒྱས་ཀྱི་ས་ལ་ཐམས་ཅད་ཤེས་པ་ཉིད་ཀྱི་ཕྱོགས་དང་མཐུན་པ་དང༌། བྱང་ཆུབ་སེམས་དཔའི་ས་ལ་ལམ་གྱི་རྣམ་པར་ཤེས་པའི་ཕྱོགས་དང་མཐུན་པ་སྟེ། གཉིས་ཀ་ཡང་འདི་བྱང་ཆུབ་སེམས་དཔའ་རྣམ་པ་ཐམས་ཅད་མཁྱེན་པ་ཉིད་ཐོབ་པ་འདོད་པ་ལ། ལམ་གྱི་རྣམ་པར་ཤེས་པ་ཉིད་དུ་བསྟན་པར་བྱའོ། །ཞེས་གསུངས་སོ། །ལམ་ཤེས་དེའི་རང་བཞིན་ནམ་ངོ་བོ་ནི། ཉོན་མོངས་རྟགས་དང་མཚན་མ་དང༌། །མི་མཐུན་ཕྱོགས་དང་གཉེན་པོ་དང༌། །དབེན་དང༌། ཞེས་པ་ལ་སོགས་པས་ངོ་བོ་ཉིད་དུ་བསྟན་པ་གང་ཡིན་པ་སྟེ། སྐབས་འདི་ཉིད་དུ་ཡང་མོས་སྤྱོད་ཀྱི་ས་ནས་བཟུང་སྟེ་མཐོང་སྒོམ་གྱི་ལམ་རིམ་གྱིས་སྟོན་པར་གྱུར་པ་ཡིན་ནོ། །ཞེས་གསུངས་སོ། །འོན་ཀྱང་ཉ་ཊཱིཀ་ལས། འགལ་རྐྱེན་སྤངས་པའི་རྟེན། མཐུན་རྐྱེན་ཚང་བའི་ཡུལ། རྒྱུའི་རྐྱེན་རིགས་ཀྱིས་ཁྱབ་པ། ཉོན་མོངས་མི་སྤོང་བའི་རང་བཞིན། གཞན་དོན་བྱེད་པའི་ལས་ཏེ་ལྔའོ། །ཞེས་པ་དང༌། ཁམས་གསུམ་ལ་འདོད་ཆགས་དང་བྲལ་བ་ཉན་རང་དགྲ་བཅོམ་དང༌། དེ་ལས་ཅིག་ཤོས་ཀྱི་རྣལ་འབྱོར་བ་བྱང་སེམས་ཆོས་ཅན། སངས་རྒྱས་ཉིད་ཐོབ་བྱའི་ཕྱིར་ལམ་ཤེས་པ་ཉིད་བསྒོམ་པར་བྱ་བ་ཡིན་པས་ཁྱབ་པ་ཡིན་ནོ། །རྒྱས་པའི་རིགས་ཡོད་པའི་སྐྱེ་བོ་ཐམས་ཅད་མཐར་ཐུག་བླ་མེད་རྫོགས་ཆུབ་ཀྱི་མཐར་ཐུག་པར་འགྲོ་བ་ཅན་ཡིན་པ་དེའི་ཕྱིར་རོ། །ཞེས་དང༌། མདོར་ན་ཁྱབ་པའི་དོན་ནི་མཐའ་མེད་ལྟར་ནའང་སངས་རྒྱས་ཀྱི་རང་བཞིན་རིགས་ཀྱིས་ཁྱབ། མཐའ་ཡོད་ལྟར་ན་ལམ་ཤེས་བསྒོམས་པས་སམ་རད་ཀིར་ནི་བྱང་ཆུབ་ཏུ་སེམས་བསྐྱེད་པས་འདི་རྣམས་ཐམས་ཅད་ལ་ཁྱབ་པའོ་ཞེས་པ་ལྟར་གཟུང་ངོ༌། །ཞེས་ལུང་སྔ་མས་རིགས་ཀྱིས་ཁྱབ་པ་དང༌། བར་བས་རྒྱས་རིགས་ཀྱིས་ཁྱབ་པ་དང༌། ཕྱི་མས་མཐའ་མེད་ལྟར་ན་རང་བཞིན་རིགས་ཀྱིས་ཁྱབ་ཅེས་བཤད་པས་དཔྱད་པར་བྱ། ཡང་ཉ་ཊཱིཀ་ལས།ལམ་ཤེས་དེ་ཆོས་ཅན། དངོས་སུ་སྐྱེ་བའི་ཡུལ་སོ་སོར་ངེས་པ་ཡིན་ནོ། །སྟོང་ཉིད་སྙིང་རྗེའི་སྙིང་བོ་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པ་ཁོ་ནའི་རྒྱུད་ལ་སྐྱེ་བ་ཡིན་པས་སོ། །ཞེས་གསུངས་པ་སེམས་བསྐྱེད་རྒྱུད་ལ་སྐྱེས་ན་སྟོང་ཉིད་སྙིང་རྗེས་སྙིང་པོ་ཅན་གྱི་སེམས་བསྐྱེད་སྐྱེས་པའི་ཁྱབ་བ་ཡོད་མེད་དཔྱད། ཉ་ཊཱིཀ་དུ་མདོ་དྲངས་པ་ལས། ལྷའི་བུ་གང་དག་གིས་བླ་མེད་རྫོགས་བྱང་དུ་སེམས་མ་བསྐྱེད་པ་དེ་དག་གིས་ཀྱང་བླ་མེད་བྱང་ཆུབ་ཏུ་སེམས་བསྐྱེད་པར་བྱའོ། །གང་ཡང་དག་པའི་སྐྱོན་མེད་པར་ཞུགས་པར་གྱུར་དེ་དག་ལ་ནི་བླ་མེད་རྫོགས་བྱང་དུ་སེམས་བསྐྱེད་པའི་མཐུ་མེད་དོ། །དེ་དག་གིས་འཁོར་བའི་རྒྱུད་ཀྱི་མཚམས་བཅད་པའི་ཕྱིར་རོ། །ཞེས་གསུངས་པའི་ཡང་དག་པའི་སྐྱོན་མེད་དུ་ཞུགས་པ་དམན་པའི་མཐོང་ལམ་ལ་བྱེད་ན། རྒྱུན་ཞུགས་དང་ཕྱིར་འོང་སོགས་ནས་ཐེག་ཆེན་དུ་ཞུགས་པ་མེད་པར་ཐལ། འདོད་པའི་ཕྱིར། འདོད་ན། མདོ་སྡེ་རྒྱན་ལས།ཉན་ཐོས་མ་ངེས་རྣམ་གཉིས་ཏེ། །ཐེག་དོན་མཐོང་དང་མ་མཐོང་བའོ། །དོན་མཐོང་འདོད་ཆགས་བྲལ་བ་དང༌། །འདོད་ཆགས་བྲལ་མིན་འདི་དམན་པའོ། །ཞེས་དང༌།དེའི་ས་འགྲེལ་ལས། ཉན་ཐོས་རིགས་མ་ངེས་པ་ཐེག་ཆེན་དུ་དྲང་བར་བྱ་བ་ནི་རྣམ་པ་གཉིས་ཏེ། ཉན་ཐོས་ཀྱི་ཐེག་པ་ལ་ཞུགས་ནས་དེར་གསུངས་པའི་བདེན་པ་བཞིའི་དོན་མཐོང་བ་ཐེག་ཆེན་ལ་འཇུག་པ་དང༌། བདེན་བཞིའི་དོན་མ་མཐོང་བའི་སོ་སོ་སྐྱེ་བོ་ཐེག་ཆེན་དུ་འཇུག་པའོ། །བདེན་པའི་དོན་མཐོང་བའི་འཕགས་པ་ལའང་འདོད་པ་ལ་འདོད་ཆགས་དང་བྲལ་བ་ཕྱིར་མི་འོང་ཐོབ་ནས་ཐེག་ཆེན་གྱིས་ངེས་པར་འབྱུང་བ་དང༌། འདོད་ཆགས་དང་བྲལ་བ་མིན་པ་རྒྱུན་ཞུགས་དང་ལན་ཅིག་ཕྱིར་འོང་ཐོབ་ནས་ཐེག་ཆེན་གྱིས་ངེས་པར་འབྱུང་བ་དག་སྟེ། ཞེས་གསུངས་པའི་ཕྱིར། དེས་ན་དམན་པའི་རིགས་ངེས་ཀྱི་མཐོང་ལམ་ལ་བྱེད་དགོས་སམ། དེ་ལྟ་ན་དེའི་ཚོགས་ལམ་སོགས་ལ་མ་བཤད་པར་མཐོང་ལམ་བཤད་པའི་རྒྱུ་མཚན་ལ་དཔྱད། འཁོར་བ་མཐའ་ཡོད་མེད་ཀྱི་བཞེད་ཚུལ་རྒྱས་པར་ཉ་ཊཱིཀ་ལས་གསུངས་པའི་ཚུལ་འདི་ལྟ་སྟེ། དེ་ལས། འདིར་འཁོར་བ་མཐའ་ཡོད་མེད་དུ་བཞེད་ཚུལ་གཉིས་ཏེ། ཐུབ་དགོངས་སུ། འཁོར་བ་ལ་ཐོག་མ་མེད་དེ་སྔར་མེད་པའི་སེམས་ཅན་སྐྱེ་བ་མེད་པའི་ཕྱིར་རོ། །ཐོག་མ་དང་ལྡན་ན་རྒྱུ་མེད་པ་ཉིད་དུ་ཐལ་བའི་ཕྱིར་རོ། །སྐྱེ་བ་རྒྱུ་ལ་རག་ལས་པའི་ཕྱིར་རྒྱུ་ཟད་པ་ལས་ཐ་མ་ནི་རིགས་ཏེ་ས་བོན་ཟད་པ་ལས་མྱུ་གུ་བཞིན་ནོ། །སངས་རྒྱས་འབྱུང་བ་སོ་སོས་སེམས་ཅན་གྲངས་མེད་པ་མྱ་ངན་ལས་ཟློ་བའི་ཕྱིར་རོ། །གང་གཉེན་པོ་དང་ཕྲད་པ་ན་འབྲི་བའི་ཆོས་ཅན་དེ་རྣམས་གཉེན་པོའི་ཕྱོགས་དེ་ཤིན་ཏུ་འཕེལ་བ་ན་ཤིན་ཏུ་མཛད་པའི་ཆོས་སྲིད་པ་ཡིན་ཏེ་གསེར་གྱི་དྲི་མ་ལ་སོགས་པ་བཞིན་ནོ། །འཁོར་བ་ཡང་བདག་མེད་པ་ཉིད་ལ་སོགས་པའི་མཚན་ཉིད་ཀྱི་གཉེན་པོའི་ཕྱོགས་ལ་མངོན་དུ་ཕྱོགས་པ་ཡོད་ན་འབྲི་བའི་ཆོས་ཅན་ཡིན་ནོ་ཞེས་པའི་ཚད་མ་ལས་འཁོར་བ་རྒྱུན་ཆད་པ་ཡོད་དོ། །ཏིང་འཛིན་རྒྱལ་པོ་ལས། འགྲོ་བ་འདི་དག་ཐམས་ཅད་སངས་རྒྱས་འགྱུར། །ཞེས་པ་ལ་སོགས་པའི་ལུང་ལས་ཀྱང་ངོ་ཞེས་སོ། །ཐུབ་དགོངས་ཀྱི་འགོར། འདིར་ངེས་པར་སེམས་ཅན་ཐམས་ཅད་སྒྲིབ་པ་གཉིས་སྤོང་བའི་སྐལ་བ་ལས་མ་འདས་པ་ཁོ་ནར་ཡོད་དེ་ཞེས་སོ། །རྒྱུད་བླའི་འགྲེལ་བར།རང་བཞིན་ཀྱིས་རྣམ་པར་དག་པའི་རིགས་ཡོད་པའི་ཕྱིར་འགའ་ཡང་གཏན་རྣམ་པར་དག་པར་མི་འགྱུར་བ་ནི་འོས་པ་མ་ཡིན་ཏེ། གང་གི་ཕྱིར་བཅོམ་ལྡན་འདས་ཀྱིས་ཁྱད་པར་མེད་པར་སེམས་ཅན་ཐམས་ཅད་ལ་རྣམ་པར་དག་པར་རུང་བ་ཉིད་ཡོད་པ་ལ་དགོངས་ནས། ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་ཕྱི་སྒྲིབས་མི་མཐོང་སྟེ། །ཇི་ལྟར་གསེར་གྱི་གཟུགས་ནི་སྒྲིབས་པ་བཞིན། །ཞེས་སོ། །འགའ་ཞིག་ནི་མཐའ་མེད་པར་བཞེད་དེ། འགྲེལ་ཆེན་གྱི་ཁྱད་མཚན་ཐད་དུ། ཁ་ཅིག་ན་རེ། གང་འདི་སངས་རྒྱས་ཀྱི་རིགས་ནི་ཐོག་མ་མེད་པ་ཡིན་པའམ་སངས་རྒྱས་རེ་རེ་འབྱུང་བ་ན་སེམས་ཅན་གྲངས་མེད་པ་གཅིག་ཡོངས་སུ་མྱ་ངན་ལས་འདའ་མོད་ཀྱི་དེ་ལྟ་ན་ཡང་འཁོར་བ་ལ་ཟད་པ་མེད་པས་མཐའ་ཡས་པའི་ཕྱིར་ནམ་མཁའ་དང་འདྲ་སྟེ་རི་བོ་ལ་སོགས་པའི་སྒྲིབས་གཡོགས་དུ་མ་ཡོད་ན་ཡང་ནམ་མཁའ་ཡོངས་སུ་ཟད་པ་མེད་དོ་ཞེས་ཟེར་རོ་ཞེས་སོ། །དེར་མཐའ་ཡོད་ཀྱི་ལུགས་ཀྱང་བཀོད་པ་ནི་སྔར་ཨ་བྷ་ཡའི་སྦྱོར་ངག་ལྟར་ཡོད་དོ། །གལ་ཏེ་མཐའ་ཡོད་ན་སངས་རྒྱས་ཀྱི་འཕྲིན་ལས་རྒྱུན་ཆད་པ་སྲིད་པར་འགྱུར་རོ། །མཐའ་ཡོད་བཤད་པ་ནི་བྱེ་བྲག་འགའ་ལ་དགོངས་ལ་སངས་རྒྱས་རེ་རེས་སེམས་ཅན་གྲངས་མེད་སྒྲོལ་ཡང་སངས་རྒྱས་འབྱུང་བ་ཨུ་དུམ་ཝ་རའི་མེ་ཏོག་ལྟར་དཀོན་པས་ཟད་མི་ནུས་སོ། །མདོ་ཀུན་བཏུས་འགྲེལ་བར། བྲི་བ་དང་གང་བ་མེད་པ་ནི་སེམས་ཅན་གྱི་ཁམས་མི་ཟད་པའི་ཕྱིར་ལ། མི་ཟད་པ་ཡང་སྤྱིའི་དབང་དུ་བྱས་པའི་ཕྱིར་ཏེ། སོ་སོའི་དབང་དུ་བྱས་ནས་གྲོལ་བའི་ཕྱིར་ཟད་པ་ཁོ་ནའོ། །སྤྱི་ནི་སོ་སོ་བ་འདུས་པ་མིན་ནམ། སོ་སོར་གྲོལ་བ་ཉིད་ཀྱིས་སྤྱི་ཇི་ལྟར་མི་གྲོལ། གང་ཞིག་སྣོན་པ་མེད་ལ་འབྲི་བ་ཡོད་པ་དེ་ནི་ཟད་པའི་ཆོས་ཅན་ཏེ། དཔེར་ན་འབྲུའི་ཕུང་བོ་ལྟ་བུ་ཞེ་ན། མ་ཡིན་ཏེ་རིས་སུ་ཆད་པ་མེད་པའི་ཕྱིར་དཔེ་འདྲ་བ་མིན་ནོ། །གང་ཞིག་ཕ་མཐའ་ཡོད་པ་དེ་ནི་ཟད་པར་རིགས་པ་ལས། སེམས་ཅན་གྱི་ཁམས་ནི་ནམ་མཁའི་ཁམས་དང་མཉམ་པས་ཕ་མཐའ་མེད་པས་ཇི་ལྟར་ཟད་པར་རིགས་ཞེས་ཤཱནྟིས་སོ། །དེ་ལྟར་ གཉིས་ལས་སྤྱིར་མཐའ་མེད་བྱེ་བྲག་འགའ་ལ་མཐའ་ཡོད་པ་འཐད་དེ། མ་རིག་འཁྲུལ་འཁོར་འདི་ནི་ཟད་མེད་འཕེལ་བ་མེད། །ཅེས་སྡུད་པ་དང༌། ཐོག་མ་དང་ཐ་མ་མེད་པའི་སྟོང་གཞི་འཁོར་བ་ལ་བཤད་པ་ལ་སོགས་པ་མཐའ་ཡས་སོ། །མང་བོ་གྲོལ་ཡང་འཁོར་བ་ལ་བྲི་གང་མེད་དེ་རྒྱ་མཚོ་ལ་རྩ་རྩེས་ཆུ་འགའ་གཏོར་ཡང་བྲི་གང་མེད་པ་དང་ནམ་མཁའ་ལ་འདོམ་གྱིས་གཅལ་ཡང་བྲི་གང་མེད་པ་བཞིན་ཞེས་གསུངས་སོ། །གལ་ཏེ་རྒྱས་པའི་རིགས་ཡོད་ཐམས་ཅད་སངས་རྒྱས་འཐོབ་ན། དགོངས་འགྲེལ་ལས། ཉན་ཐོས་ཀྱི་རིགས་ཀྱི་གང་ཟག་ཞི་བར་བགྲོད་པ་གཅིག་པུ་བ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་ཀྱི་སྙིང་བོ་ལ་བཞག་སྟེ་བླ་མེད་རྫོགས་ཆུབ་ཐོབ་པར་བྱ་བར་མི་ནུས་སོ། །ཞེས་པ་དང་འགལ་ཞེ་ན། དེ་ནི་རེ་ཤིག་པ་ལ་དགོངས་ཀྱི་མཐར་ཐུག་སངས་རྒྱས་སུ་འགྱུར་ཏེ། ལང་གཤེགས་ལས། བློ་གྲོས་ཆེན་པོ་ཉན་ཐོས་ཀྱི་ཐེག་པ་བ་རྣམས་ཉན་ཐོས་ཀྱི་ཐེག་པ་ལས་གྲོལ་བ་མིན་གྱི་འོན་ཀྱང་དེ་དག་ནི་ཐེག་ཆེན་པོའི་མཐར་ཐུག་པ་ཡིན་ནོ། །ཞེས་སོ། །བྱང་ཆུབ་སེམས་འགྲེལ་ལས། བྱང་ཆུབ་དམ་པ་ལྷག་བཅས་ལྷག་མེད་གཉིས་ཐོབ་ནས། །སྲིད་པས་སྐྲག་ཡིད་དེ་དག་ནི། །ཚེ་ཟད་ལ་དགའ་མྱ་ངན་ལས། །འདས་ཐོབ་འདུ་ཤེས་ཅན་དུ་འགྱུར། །དེ་ལ་མྱ་ངན་འདས་ཡོད་མིན། །འོན་ཀྱང་སྲིད་གསུམ་ཁམས་སུ་ནི། །སྐྱེ་བའང་དེ་ལ་ཡོད་མ་ཡིན། །ཟག་མེད་དབྱིངས་གནས་དེ་དག་ཀྱང༌། །མི་ཤེས་ཉོན་མོངས་མིན་སྤང་ཕྱིར། །ཕྱིས་ནི་སངས་རྒྱས་ཀྱིས་བསྐུལ་ནས། །བྱང་ཆུབ་ཏུ་ནི་ཚོགས་བསགས་ཏེ། །དེ་ཡང་འཇིག་རྟེན་འདྲེན་པར་འགྱུར། །ཞེས་སོ། །ཞེས་གསུངས་པའི་ཕྱིར་དང༌། རྒྱན་གྱི་ས་འགྲེལ་ལས། རྒྱུ་དང་བྲལ་ཞེས་པ་ཀུན་གཞིའི་རྣམ་པར་ཤེས་པ་ལ་ཐར་པ་ཆ་མཐུན་གྱི་དགེ་བའི་བག་ཆགས་མ་བཞག་པས་རྒྱས་འགྱུར་གྱི་རིགས་ཆད་ནས་འཁོར་བ་མཐའ་མེད་པར་གནས་པ་རྣམས་སོ། །ཞེས་དང༌། རང་བཞིན་གྱི་རིགས་ཆད་པ་ནི་མི་སྲིད་ཅིང་འཁོར་བ་མཐའ་མེད་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཡོད་ལ། མཐའ་ཅན་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཀྱང་མེད་པར་ཤེས་པར་བྱའོ། །ཞེས་ཉ་ཊཱིཀ་དང་རྒྱན་གྱི་ས་འགྲེལ་གཉིས་ན་འཁོར་བ་མཐའ་མེད་འདོད་པ་ལྟར་གསུངས་སོ། །འཁོར་བ་མཐའ་ཡོད་འདོད་པའི་རིགས་པ་སྤྲོ་ཚུལ་ནི། འཁོར་བ་མཐའ་མེད་འདོད་པ་དག་གིས་འཁོར་བ་མཐའ་ཡོད་པ་ཡིན་ན་འཁོར་བ་ཐོག་མ་དང་ཐ་མ་མེད་པའི་སྟོང་གཞི་མ་ཡིན་པར་ཐལ།དེ་ལ་ཐ་མ་ཡོད་པའི་ཕྱིར། རྟགས་ཁས་ཟེར་ལ། འོ་ན་ཁྱོད་རང་ལ་དབང་རྟེན་ཁོག་པ་ཆོས་ཅན། ཕྱི་ནང་གཉིས་ཀ་ཡིན་པར་ཐལ། ཕྱི་ནང་སྟོང་བ་ཉིད་ཀྱི་སྟོང་གཞི་ཆོས་ཅན་ཡིན་པའི་ཕྱིར། ཁྱབ་པ་དོན་གྱི་ཁས། ཡང་དུས་གསུམ་ཆོས་ཅན། མི་དམིགས་པར་ཐལ།མི་དམིགས་པར་སྟོང་བ་ཉིད་ཀྱི་སྟོང་གཞི་ཆོས་ཅན་ཡིན་པའི་ཕྱིར། རྟགས་ཡུམ་གསུམ་གནོད་འཇོམས་ཀྱིས་གྲུབ་ལ། འདོད་མི་ནུས་ཏེ། དམིགས་པ་ཡིན་པའི་ཕྱིར། དེར་ཐལ། ཚད་མས་དམིགས་པ་ཡིན་པའི་ཕྱིར། གཞན་ཡང་འཁོར་བ་ལ་ཐོག་མ་མེད་ཀྱང་ཕྱི་མཐའ་ཡོད་པར་ཐལ། ས་བོན་ལ་ཐོག་མ་མེད་ཀྱང་ས་བོན་མེས་སྲེགས་པ་ཡོད་པས་ཕྱི་མཐའ་ཡོད་པ་བཞིན་ཡིན་པའི་ཕྱིར་ཏེ། བཞི་བརྒྱ་བ་ལས། ཇི་ལྟར་ས་བོན་མཐའ་མཐོང་ཞིང༌། །དེ་ལ་ཐོག་མ་ཡོད་མིན་ལྟར། །དེ་བཞིན་རྒྱུ་ནི་མ་ཚང་ཕྱིར། །སྐྱེ་བའང་འབྱུང་བར་མི་འགྱུར་རོ། །ཞེས་གསུངས་པ་ལྟར་རོ། །ཡང་འཁོར་བ་ལ་མཐའ་ཡོད་པར་ཐལ།སེམས་ཅན་ཐམས་ཅད་ཀྱི་རྒྱུད་ཀྱི་སྒྲིབ་པ་སྤང་རུང་ཡིན་པའི་ཕྱིར། དེར་ཐལ། དེ་དག་གི་རྒྱུད་ཀྱི་སྒྲིབ་པ་རྟག་པ་ཡིན་པས་སྤངས་མི་རུང་བ་ཡང་མ་ཡིན། མི་རྟག་པ་ཡིན་ཀྱང་སྤོང་བྱེད་ཀྱི་ཐབས་མེད་པའང་མ་ཡིན། གཉེན་པོ་ཡོད་ཀྱང་ཤེས་མཁན་མེད་པ་ཡང་མ་ཡིན། ཤེས་མཁན་ཡོད་ཀྱང་སྟོན་པ་མི་སྲིད་པ་ཡང་མ་ཡིན། གདུལ་བྱ་དོན་གཉེར་མི་སྲིད་པ་ཡང་མ་ཡིན་པའི་ཕྱིར། དེ་སྐད་དུ། རྣམ་འགྲེལ་ལས། ཁ་ཅིག་སྨྲ་སོགས་ཕྱིར་ན་སྐྱོན། །ཟད་མིན་ཞེས་ཟེར་འདི་ལྡོག་ལ། །ཐེ་ཚོམ་ཟ་བ་དེ་ཕྱིར་འཁྲུལ། །རྟག་ཉིད་ཕྱིར་རམ་ཐབས་མེད་ཕྱིར། །ཡང་ན་ཐབས་ནི་མི་ཤེས་ཕྱིར། །སྐྱོན་རྣམས་མི་ཟད་པ་ཉིད་ཅེས། །བྱ་བར་ཡོངས་སུ་རྟོགས་གྲང་ན། །ཞེས་གསུངས་པའི་ཕྱིར། རྟགས་རིམ་བཞིན་གྲུབ་སྟེ། རྣམ་འགྲེལ་ལས། རྒྱུ་ཡིས་ནི། །གཉེན་པོ་གོམས་པས་ཟད་ཕྱིར་དང༌། །དེ་ཤེས་པ་ཡང་གྲུབ་པ་ཡིན། །ཐུགས་བརྩེ་ལྡན་ཕྱིར་རྩོམ་ཀུན་ཡང༌། །གཞན་གྱི་དོན་དུ་སྦྱོར་ཕྱིར་རོ། །ཞེས་དང༌། སྤྱོད་འཇུག་ལས། དེ་བཞིན་སངས་རྒྱས་མཐུ་ཡིས་རྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་གསུངས་པའི་ཕྱིར་ཟེར་ན་དཔྱད། ཡང་མདོ་ཏིང་འཛིན་ལས། འགྲོ་བ་འདི་དག་ཐམས་ཅད་སངས་རྒྱས་འགྱུར། །ཞེས་དང༌། རྒྱུད་བླ་ཐོགས་འགྲེལ་ལས། རང་བཞིན་ཀྱིས་རྣམ་པར་དག་པའི་རིགས་ཡོད་པའི་ཕྱིར་འགའ་ཡང་གཏན་རྣམ་པར་དག་པར་མི་འགྱུར་བ་ནི་འོས་པ་མ་ཡིན་ཏེ། ཞེས་པའི་དོན་སེམས་ཅན་ཐམས་ཅད་སངས་རྒྱ་ངེས་ཡིན། ཞེས་པ་ལ། འོ་ན་སེམས་ཅན་དེ་དག་ཆོས་ཅན། འཚང་རྒྱ་བ་ལ་འགལ་རྐྱེན་གྱི་གེགས་མེད་པར་ཐལ། འཚང་རྒྱ་ངེས་ཡིན་པའི་ཕྱིར། རྟགས་ཁས། ཁྱབ་སྟེ། རྣམ་འགྲེལ་ལས། མ་ངེས་པ་ནི་ཉིད་ཡིན་ཏེ། །གེགས་བྱེད་པ་དག་སྲིད་ཕྱིར་རོ། །ཞེས་གསུངས་པའི་ཕྱིར་དང༌། དེ་མ་ཟད་སྐྱེ་རུང་བ་ལ་རྒྱུ་ཚོགས་ཚང་དགོས་ཏེ། རྣམ་འགྲེལ་རང་འགྲེལ་ལས། རུང་བ་ཉིད་ཀྱང་རྒྱུ་ཚོགས་པ་དག་ཁོ་ནས་རྗེས་སུ་དཔོག་པར་བྱེད་དེ། མ་ཚོགས་པ་ལ་ཤིན་ཏུ་ནུས་པ་མེད་པའི་ཕྱིར། ཞེས་གསུངས་པའི་ཕྱིར་ཟེར་ན། མྱུ་གུ་སྐྱེ་རུང་ཞེས་པ་དང་འཚང་རྒྱ་རུང་ཞེས་པ་གཉིས་ཅུང་མི་འདྲ་བར་སྣང་ངོ༌། །མཐར་ཐུག་ཐེག་གཅིག་སྒྲུབ་ཚུལ་ནི། ཉ་ཊཱིཀ་ལས། ཐེག་པ་གསུམ་དུ་རྣམ་པར་བཞག་པ་ནི་མཐར་ཐུག་གི་དབང་དུ་བྱས་ནས་དགོངས་པ་ཅན་ཡིན་ཏེ། དགོངས་གཞི་གནས་སྐབས་སུ་རང་བཞིན་གྱིས་དབང་བོ་རྟུལ་འབྲིང་རྣོ་གསུམ་གྱི་ལམ་ཡོད་པ་ལ་དགོངས། དགོས་པ་རེ་ཞིག་བསྟི་བའམ་ངལ་གསོ་བའི་དོན་དུ་གསུངས་ཀྱི་མཐར་ཐུག་གི་ངེས་དོན་མཚན་ཉིད་པ་ནི་མ་ཡིན་ནོ། །ཞེས་དབུ་མའི་ལུགས་ལས་འབྱུང་བའི་ཕྱིར། ལང་གཤེགས་ལས། སེམས་ནི་ཡོངས་སུ་གྱུར་པ་ན། །ཐེག་པ་གསུམ་དུ་ངེས་བསྟན་ཏེ། །ཐེག་པ་གཞན་རྣམས་ཡོད་མ་ཡིན། །བྱིས་པ་རྣམས་ནི་ཡོངས་དྲངས་ཕྱིར། །ཐེག་པ་ཐ་དད་ངས་བཤད་དོ། །ཞེས་དང༌། པད་དཀར་གྱི་མདོར། དྲང་སྲོང་ཆེན་པོས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱི་ཐབས་ལ་མཁས་པ་སྟེ། །ཐེག་པ་གཅིག་སྟེ་གཉིས་སུ་ཡོད་མ་ཡིན། །བསྟི་བའི་དོན་དུ་ཐེག་པ་གསུམ་བསྟན་ཏོ། །ཞེས་སོ། །དཔལ་ཕྲེང་གི་མདོར། ཐེག་པ་གསུམ་པོ་ཐམས་ཅད་ཀྱང་ཐེག་པ་གཅིག་ཁོ་ནས་གྲངས་སུ་འགྲོ་སྟེ། ཐེག་པ་གཅིག་ཁོང་དུ་ཆུད་པས་བླ་མེད་ཡང་དག་བྱང་ཆུབ་ཁོང་དུ་ཆུད་དོ། །ཞེས་སོ། །སེམས་འགྲེལ་ལས། ཐེག་པ་གཉིས་པོ་དག་ཀྱང་ནི། །ཐེག་པ་ཆེན་པོས་འབྱུང་བས་ན། །སྲིད་པའི་ལམ་གྱིས་དུབ་རྣམས་ལ། །ངལ་གསོའི་དོན་ཏེ་དེ་ཉིད་མིན། །ཞེས་དང༌། མཚན་བརྗོད་དུ། ཐེག་པ་གསུམ་གྱིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོགས་རྒྱ་ཆེར་ཤེས་པར་བྱའོ། །ཐེག་པ་གཅིག་ཚོལ་ཚུལ་ནི། རྒྱན་དང་དེའི་ས་འགྲེལ་ལས། མཐར་ཐུག་གི་ཐེག་པ་གཅིག་ཏུ་ཚོལ་བ་ལ་དོན་དངོས་བསྟན་པ་དང༌། དགོས་པ་བཤད་པའོ། །དངོས་ནི། ཆོས་དང་བདག་མེད་གྲོལ་བ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །བསམ་གཉིས་ཐོབ་ཕྱིར་སྤྲུལ་པའི་ཕྱིར། །མཐར་ཐུག་ཕྱིར་ནི་ཐེག་གཅིག་ཉིད། །ཅེས་ཡུམ་ལས། འཇིག་རྟེན་དེ་བཞིན་ཉིད་དང་དགྲ་བཅོམ་དེ་བཞིན་ཉིད། །རང་རྒྱལ་དེ་བཞིན་ཉིད་དང་རྒྱལ་སྲས་དེ་བཞིན་ཉིད། །གཅིག་པ་ཉིད་དེ་དངོས་བྲལ་གཞན་མིན་དེ་བཞིན་ཉིད། །ཅེས་པ་ལ་སོགས་པ་གསུངས་པ་ལྟར་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་དབྱིངས་དེ་བཞིན་ཉིད་མཚུངས་ཤིང་གཅིག་པའི་ཕྱིར་བགྲོད་པར་བྱ་བའི་ཐེག་པ་གཅིག་པ་ཉིད་དང༌། ཉན་ཐོས་ལ་སོགས་པ་རྣམས་གང་ཟག་གི་བདག་མེད་པར་རྟོགས་པར་མཚུངས་པའི་ཕྱིར་བགྲོད་པ་པོའི་ཐེག་པ་གཅིག་པ་ཉིད་དང༌། ཉན་ཐོས་དང་རང་སངས་རྒྱས་དང་དེ་བཞིན་གཤེགས་པ་རྣམས་འབྲས་བུ་ཐོབ་པ་ན་ཉོན་མོངས་པའི་སྒྲིབ་པ་ལས་རྣམ་པར་གྲོལ་བ་རྣམས་མཚུངས་པའི་ཕྱིར་བགྲོད་བྱ་གནས་ཀྱི་ཐེག་པ་གཅིག་པ་ཉིད་དང༌། ཉན་ཐོས་རིགས་མ་ངེས་པ་རྣམས་སྔར་བྱང་ཆུབ་སེམས་དཔའ་དང་རིགས་ནི་ཐ་དད་པ་ཡིན་ཡང་ཕྱིས་དགེ་བའི་བཤེས་གཉེན་གྱིས་བསྐུལ་ནས་ཐེག་པ་ཆེན་པོའི་ལམ་དུ་ཞུགས་ཏེ་ངེས་པར་འབྱུང་བའི་ཕྱིར་འདིས་འགྲོ་བའི་ཐེག་པ་གཅིག་པ་ཉིད་དང༌། སངས་རྒྱས་རྣམས་ཀྱིས་ནི་ས་དང་པོ་ནས་བརྩམས་ཏེ་སེམས་ཅན་ཐམས་ཅད་དང་བདག་ཉིད་རང་བཞིན་མཉམ་པ་ཉིད་ཀྱི་དགོངས་པ་བརྙེས་ཤིང༌། ཉན་ཐོས་དེའི་རིགས་སུ་ངེས་པ་སྔོན་བྱང་ཆུབ་ཀྱི་ཚོགས་སྤྱད་པ་རྣམས་ཀྱིས་ཀྱང༌། སངས་རྒྱས་ཀྱི་མཐུས་རྗེས་སུ་གཟུང་བའི་ཁྱད་པར་ཕྱོགས་ཙམ་ཐོབ་པ་ཡིན་པའི་ཕྱིར། རྒྱུད་ཐ་དད་མེད་པར་མོས་པའི་སྒོ་ནས་སངས་རྒྱས་ཀྱི་དགོངས་པ་ལྟ་བུ་ཐོབ་པ་ན། བསམ་པ་ཁྱད་པར་ཅན་གཉིས་པོ་དེ་མཚུངས་པར་ཐོབ་པའི་ཕྱིར་དགོངས་བའི་ཆ་ནས་ཀྱང་ཐེག་པ་གཅིག་པ་ཉིད་དང༌། ང་ནི་ལན་བརྒྱ་ཕྲག་དུ་མར་ཉན་ཐོས་ཀྱི་ཐེག་པས་མྱ་ངན་ལས་འདས་སོ་ཞེས་གསུངས་པ་ནི་གདུལ་བྱ་རྣམས་ཀྱི་དོན་དུ་སྤྲུལ་པ་སྟོན་པ་ཙམ་ཡིན་གྱི། མི་གནས་པའི་མྱང་འདས་ལས་གཡོ་བ་མེད་པའི་ཕྱིར་ཡང་ཐེག་པ་གཅིག་པ་ཉིད་དང༌།རྒྱུའི་ཆོས་ཐེག་པ་ཆེན་པོ་ཉིད་ཀྱང་ཐེག་པ་གཞན་ལས་ཁྱད་པར་དུ་འཕགས་ཤིང་ཕུལ་དུ་ཕྱིན་པ་དང༌། འབྲས་བུའི་ཆོས་སངས་རྒྱས་ཉིད་ནི་ཐོབ་པར་བྱ་བ་ཕུལ་དུ་ཕྱིན་པ་ཡིན་པས། དེ་དག་ལས་ལྷག་པའི་མཆོག་གཞན་མེད་པས་བགྲོད་པར་བྱ་བ་མཐར་ཐུག་ཡིན་པའི་ཕྱིར་ན་ངེས་པའི་དོན་གྱི་ཐེག་པ་ནི་གཅིག་པ་ཉིད་དུ་ཤེས་པར་བྱའོ། །དགོངས་པ་དེ་དང་དེ་དག་ལ་བརྟེན་ནས་མཐར་ཐུག་ཐེག་པ་གཅིག་གི་འབྲས་བུར་གནས་པར་རིག་པར་བྱའོ། །གནས་སྐབས་ཐེག་པ་གསུམ་གྱི་ངེས་པར་འབྱུང་བ་མེད་པ་ནི་མ་ཡིན་ནོ། །དེ་ལ་ཁ་ཅིག་མདོ་དེ་དང་དེ་ལས་ནི་དགོངས་པ་དེ་དང་དེས་ཐེག་པ་གཅིག་ཉིད་དུ་གསུངས་ཞེས་དགོངས་པ་བསྟན་པས་ཐེག་པ་གཅིག་ཏུ་བསྟན་པ་ནི་དྲང་དོན་ཡིན་ལ། གསུམ་དུ་བསྟན་པ་ནི་ངེས་དོན་ཡིན་ནོ་ཞེས་འདོད་པ་དེ་དག་ནི་རིགས་པ་མ་ཡིན་ཏེ། དགོངས་པ་བསྟན་པས་དྲང་དོན་དུ་འགྱུར་ན་ངེས་དོན་ཐམས་ཅད་ཀྱང་དགོངས་པ་ཟབ་མོ་སྟོན་པས་དྲང་དོན་དུ་ཐལ་བར་འགྱུར་བའི་ཕྱིར་དང༌། མདོ་ལས་ཀྱང༌། ང་ཡི་མྱ་ངན་འདས་གཅིག་ཐེག་པ་གཅིག ། ང་ཡི་ཐེག་པ་ཐ་དད་མེད་པ་སྟེ། །ཡང་དག་ཏུ་ན་ཐེག་པ་གཅིག་ཏུ་བསྟན། །ཞེས་པ་དང་ང་ལ་ནི་ཉན་ཐོས་དང་རང་སངས་རྒྱས་ཀྱི་ཐེག་པ་རྣམ་པར་འཇོག་པ་མེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་འདུ་ཤེས་ཐ་དད་པ་དང་བྲལ་བའི་ཕྱིར་རོ་ཞེས་པ་ལ་སོགས་པ་དང༌། དཔེ་མེད་པར་བསྟོད་པར་ཡང༌། ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོ་ཐེག་དབྱེར་མ་མཆིས་སོ། །ཁྱོད་ཀྱིས་ཐེག་པ་གསུམ་བསྟན་པ། །སེམས་ཅན་གཞུག་པའི་ཆེད་དུ་ལགས། །ཞེས་པ་ལ་སོགས་པས་ཐེག་པ་གཅིག་ཏུ་བསྟན་པ་ནི་ངེས་པའི་དོན་དང་གསུམ་དུ་བསྟན་པ་ནི་དྲང་བའི་དོན་དུ་གསུངས་པའི་ཕྱིར་རོ། །དགོས་པ་ལ་གདུལ་བྱ་འདྲེན་ཚུལ་ཐུན་མོང་དུ་བསྟན་པ་དང༌། དྲང་བྱའི་ཉན་ཐོས་ཁྱད་པར་དུ་བཤད་པའོ། །དང་པོ་ནི། ཁ་ཅིག་དག་ནི་དྲང་ཕྱིར་དང༌། །གཞན་དག་ཡང་དག་གཟུང་བའི་ཕྱིར། །རྫོགས་པའི་སངས་རྒྱས་རྣམས་ཀྱིས་ནི། །མ་ངེས་རྣམས་ལ་ཐེག་གཅིག་བསྟན། །ཐེག་དམན་དུ་རིགས་ངེས་པ་རྣམས་རེ་ཤིག་དྲང་བར་མི་ནུས་པས་བཏང་སྙོམས་སུ་བཞག་སྟེ། ཉན་ཐོས་དགྲ་བཅོམ་དུ་རིགས་མ་ངེས་པ་ཁ་ཅིག་དག་ནི་ཐེག་ཆེན་ལ་བཅུག་ནས་བྱང་ཆུབ་སེམས་དཔའི་སྤྱོད་པ་ལ་བཀོད་དེ་རྫོགས་པའི་སངས་རྒྱས་ཀྱི་གོ་འཕང་དུ་དྲང་བར་བྱ་བའི་ཕྱིར་དང༌། ཐེག་ཆེན་དུ་རིགས་ངེས་པ་རྣམས་དྲང་མི་དགོས་པས་བྱང་ཆུབ་སེམས་དཔའ་སངས་རྒྱས་སུ་རིགས་མ་ངེས་ཐེག་ཆེན་གྱི་སྤྱོད་པས་སྐྱོ་ནས་ཐེག་དམན་དུ་ལྟུང་སྲིད་པ་གཞན་དག་ཡང་དག་པར་རྗེས་སུ་གཟུང་བའི་ཕྱིར། རྫོགས་པའི་སངས་རྒྱས་རྣམས་ཀྱིས་ནི་ཉན་ཐོས་དང་བྱང་ཆུབ་སེམས་དཔའ་རང་རང་གི་འབྲས་བུར་རིགས་མ་ངེས་པ་རྣམས་ལ། ངེས་པའི་དོན་དུ་མཐར་ཐུག་གི་མྱང་འདས་ཀྱང་གཅིག་ཡིན་ལ། དེར་བགྲོད་པའི་ཐེག་པ་ཡང་གཅིག་ཁོ་ན་ཡིན་ནོ་ཞེས་བསྟན་ཏེ། ཇི་སྐད་དུ། དམ་ཆོས་པདྨ་དཀར་པོ་ལས། དེ་བཞིན་ཉན་ཐོས་ཐམས་ཅད་ཀྱང༌། །མྱ་ངན་འདས་ཐོབ་འདུ་ཤེས་ཏེ། །རྒྱལ་བས་བཤད་པ་དེ་དག་ལ། །མྱ་ངན་མ་འདས་དེ་ངལ་བའོ། །ཞེས་པ་དང་ཤཱ་རིའི་བུ་ཐེག་པ་ནི་གཅིག་སྟེ། འདི་ལྟར་སངས་རྒྱས་ཀྱི་ཐེག་པའོ། །ཞེས་པ་དང༌། འདི་ལྟར་མྱ་ངན་འདས་པར་གང་བརྗོད་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཡང༌། །ཁྱེད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་འདི་ནི་བཙལ་བར་གྱིས། །ཞེས་པ་ལ་སོགས་པས་སོ། །འདི་དག་ལའང༌། ཁ་ཅིག་དག་ནི་དྲང་ཕྱིར་དང༌། །ཞེས་པ་དང་ཐེག་པ་གཅིག་ཏུ་བསྟན་པའི་དགོས་པ་གསུངས་པས་དྲང་བའི་དོན་ཡིན་ནོ་ཞེས་འདོད་པ་ནི་རིགས་པ་མ་ཡིན་ཏེ། དེ་ལྟ་ན་ངེས་དོན་གྱི་གསུང་རབ་ཐམས་ཅད་གདུལ་བྱ་རྣམས་དམན་པའི་གནས་ནས་དྲངས་ཏེ་མཆོག་ལ་སྦྱར་བའི་དོན་དུ་གསུངས་པ་དང༌། དགོས་པ་ཕུན་སུམ་ཚོགས་པ་དང་ལྡན་པར་གསུངས་པས་དྲང་བའི་དོན་ཡིན་པར་ཧ་ཅང་ཐལ་བར་འགྱུར་བའི་ཕྱིར་རོ། །ཞེས་གསུངས་སོ། །མཁས་པ་ཁ་ཅིག་གིས་མདོ་སྡེ་རྒྱན་གྱི་ལུང་འདི་དག་གིས་མཐར་ཐུག་ཐེག་གསུམ་དུ་བསྟན་པར་བཤད་དོ། །དེ་མི་འཐད་པ་ནི། མདོ་རྒྱན་ལས།དེ་བཞིན་ཉིད་དེ་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་པའི་ཕྱིར་རོ། །

བཅུ་གཉིས་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་དང་ས་མཚམས་གང་ཡིན་ཞེས་པའི་ལན།

བཅུ་གཉིས་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་དང་ས་མཚམས་གང་ཡིན་ཞེས་པའི་ལན།

ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་དང་ས་མཚམས་གང་ཡིན་ཞེས་པའོ། །གཉིས་པ་ལན་ནི། ཉན་ཐོས་ཀྱི་ལམ་ཤེས་པའི་ལམ་ཤེས་དངོས་བཤད་པ་ལ། ཉན་ཐོས་ཀྱི་ཡོན་ཏན་ཡར་ལྡན་ནམ་དེ་ལས་ལྷག་པའི་ཐེག་དམན་རྟོགས་རིགས་སུ་གནས་པའི་སྦྱོར་དངོས་རྗེས་གསུམ་ཚང་བའི་བྱང་སེམས་ཀྱི་མངོན་རྟོགས་དེ། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ཉན་ཐོས་ཀྱི་ལམ་ཤེས་པའི་ལམ་ཤེས་ནི། བྱང་ཆུབ་ཐོབ་པ་ངེས་པར་སློབ་དཔོན་ལ་ལྟོས་པས་སློབ་མ་སྟེ་ཉན་ཐོས་ཀྱི་ལམ་ཡོན་ཏན་ཡར་ལྡན་དུ་བྱས་ཏེ་སྦྱོར་དངོས་རྗེས་གསུམ་ཚང་བའི་སྒོ་ནས་ཕྱིན་ཅི་མ་ལོག་པར་ཤེས་པའི་བློ། ཞེས་གསུངས་པའི་ཕྱིར་རོ། །དངོས་གཞི་ལ་བདག་མེད་གཉིས་ཅི་རིགས་རྟོགས་པ་ཡོད་པར་སྣང་ངོ༌། །དབྱེ་ན་བྱང་སེམས་ཀྱི་མི་རྟག་སོགས་བཅུ་དྲུག་རྟོགས་པའི་བློ་སོགས་ཡོད་དོ། །ས་མཚམས།བྱང་སེམས་ཚོགས་ལམ་ནས་རྒྱུན་མཐའི་བར་ཏུ་ཡོད་དོ། །སྐབས་འདིར་མདོ་ལུགས་མ་ལས། བྱང་ཆུབ་སེམས་དཔའ་ལམ་ཤེས་པ་ཉིད་ཀྱིས་ཉན་ཐོས་ཀྱི་ལམ་གྱི་སྤངས་རྟོགས་ཀྱི་ཡོན་ཏན་བསྡུས་པ་སྟོན་ཏོ། །དེ་ལ་ལམ་ཤེས་ཀྱི་ངང་ཚུལ་ལམ་རང་བཞིན་ལ་གང་གི་སྒོ་ནས་ཉན་ཐོས་ཀྱི་ལམ་བསྡུས་པར་འགྱུར་ན། ཞེས་གསུངས་པ་ལྟར་ཉན་ཐོས་ཀྱི་ལམ་ཐམས་ཅད་བྱང་སེམས་ཀྱི་ལམ་གྱི་རྟོགས་རིགས་ཀྱི་སྒོ་ནས་བསྡུས་པ་ཡིན་པའོ། །ཡང་ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ན་མི་དམིགས་པའམ་སྟོང་ཉིད་རྟོགས་པས་ཟིན་པས་ཁྱབ་བར་ཐལ། ཉ་ཊཱིཀ་ལས། ལམ་ཤེས་ནི། སྦྱོར་བ་སེམས་བསྐྱེད་ཀྱིས་ཀུན་ནས་བསླང༌། དངོས་གཞི་ཅིར་ཡང་མི་དམིགས་པར་རྟོགས་པའི་ཤེས་རབ་ཀྱིས་ཟིན། རྗེས་བྱང་ཆེན་དུ་བསྔོ་བ་དང་བཅས་པས་ཉན་ཐོས་ཀྱི་ལམ་ཡོན་ཏན་ཡར་ལྡན་དུ་ཤེས་པ་སྟེ།ཞེས་གསུངས་པའི་ཕྱིར། འདོད་ན། བྱེ་སྨྲ་གྱུར་བའི་བྱང་སེམས་ཀྱི་རྒྱུད་ཀྱི་མི་རྟག་པ་རྟོགས་པའི་ཤེས་རབ་ཆོས་ཅན། དེར་ཐལ། དེའི་ཕྱིར། མ་གྲུབ་ན། འོ་ན་ལམ་ཤེས་ཡིན་ན་སྟོང་ཉིད་རྟོགས་པས་ཤེས་རབ་ཀྱིས་ཟིན་པས་ཁྱབ་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ལ་དེའི་ཕྱིར། ཁྱབ་སྟེ། དེ་གཉིས་ལ་དེས་ཟིན་དགོས་མི་དགོས་རིགས་པ་མཚུངས་པའི་ཕྱིར་ཟེར་དཔྱད། ཡང་ཉ་ཊཱིཀ་ལས། དེས་ན། འདིར་བསྟན་བཅོས་སུ་ཉན་རང་གི་ལམ་དང་དེ་ཤེས་པའི་ལམ་ཤེས་གཉིས་ཀ་དངོས་སུ་བསྟན་ཏེ། འཕགས་པའི་བདེན་པ་བཞི་དག་གི ། རྣམ་པ། ཉན་ཐོས་ལམ་འདི། ཞེས་དང༌། མི་དམིགས་སྒོ་ནས་ཤེས་པར་བྱ་ཞེས་དང༌། འཕགས་པ་ཉན་ཐོས་ལམ། ཞེས་དང༌། འཛིན་པ་མི་སྤོང༌། བསེ་རུའི་ལམ་དང༌། ཤེས་པར་བྱ། ཞེས་པས་སོ། །མདོར། ལམ་ཤེས་དངོས་སུ་གསུངས་ཤིང་ལམ་སྦས་ཏེ་གསུངས་པ་མན་ངག་གིས་གསལ་བོར་ཕྱུང་བའོ། །ཞེས་གསུངས་པ་ལ། འོ་ན་ཉན་ཐོས་ཀྱི་ལམ་མི་དམིགས་པར་ཤེས་པར་བྱ་བ་ཡིན་པར་དངོས་སུ་བསྟན་ན་ཉན་ཐོས་ཀྱི་ལམ་དངོས་སུ་བསྟན་དགོས་པར་ཐལ། སྐབས་འདིར་ཉན་ཐོས་ཀྱི་ལམ་དངོས་སུ་བསྟན་པའི་ཕྱིར། རྟགས་ཁས། འདོད་ན་གཟུགས་ཀྱི་ཆོས་ཉིད་དངོས་སུ་བསྟན་ན་གཟུགས་དགོས་སུ་བསྟན་དགོས་ཐལ། འདོད་པའི་ཕྱིར་ཟེར་ན་དཔྱད། ཡང་ཉ་ཊཱིཀ་ལས། རྣམ་པ་རྣམས་གང་ན། སྡུག་ཀུན་སོ་སོ་བའི་རྣམ་པ་བརྒྱད། ཐུན་མོང་གི་བདུན། འགོག་བདེན་གྱི་བདུན། ལམ་གྱི་བཞིའོ། །ཞེས་སྡུག་ཀུན་ཐུན་མོང་གི་རྣམ་པ་བདུན་ཙམ་དང༌། སྐབས་འདིར་ལམ་བདེན་གྱི་རྣམ་པ་བཞི་བསྟན་པ་མི་རིགས་པར་ཐལ། སྡུག་ཀུན་ཐུན་མོང་གི་རྣམ་པ་བཅོ་ལྔ་དང༌། སྐབས་འདིར་ལམ་བདེན་མདོ་དང་མདོ་ལུགས་མ་གཉིས་ཀར་དྲན་ཉེ་སོགས་ལ་བཤད་པ་ལས་རྣམ་པ་བཞི་ཞེས་མ་གསུངས་པའི་ཕྱིར་ཏེ། མདོ་ལུགས་མ་ལས། སྡུག་བསྔལ་དང་ཀུན་འབྱུང་གི་བདེན་པའི་ངོ་བོ་ཕུང་ཁམས་སྐྱེ་མཆེད་རྣམས་མི་རྟག་པ་དང༌།སྡུག་བསྔལ་བ་དང༌། བདག་མེད་པ་དང༌། སྟོང་པ་དང༌། ནད་ལྟ་བུ་དང༌། འབྲས་དང༌། ཟུག་རྔུ་དང༌། སྡིག་པ་དང༌། གཞན་ལ་རགས་ལས་པ་དང༌། འཇིག་པའི་ཆོས་ཅན་དང༌། མི་བརྟན་པ་དང༌། རབ་ཏུ་འཇིག་པའི་ངང་ཚུལ་ཅན་དང༌། འཇིགས་པ་དང༌། འཚེ་བ་དང༌།འགོ་བའི་ནད་ལྟ་བུར་ཡིད་ལ་བྱེད་པ་བཅོ་ལྔ་སྟེ། དེ་ཡང་མི་དམིགས་པའི་ཚུལ་གྱིས་ཡིད་ལ་བྱེད་དོ། །འགོག་པའི་བདེན་པ་རྣམ་པ་འདི་ལྟར་ཡིད་ལ་བྱེད་དེ། རྒྱུ་ཀུན་འབྱུང་དང་འབྲས་བུ་སྡུག་བསྔལ་གྱི་རང་བཞིན་རྟེན་འབྲེལ་ཡན་ལག་བཅུ་གཉིས་ནི། ཇི་ལྟར་འབྱུང་ཞིང་ཇི་ལྟར་འགག་ན་མ་རིག་པའི་རྐྱེན་གྱིས་འདུ་བྱེད་རྣམས་འབྱུང་ཞེས་པ་ནས་སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་ཡིད་མི་བདེ་བ་དང་འཁྲུག་བ་རྣམས་འབྱུང་ཞེས་པའི་བར་སྡུག་བསྔལ་གྱི་ཕུང་པོ་འབའ་ཞིག་པ་འདི་འབྱུང་བ་དང༌། མ་རིག་པ་འགགས་པས་འདུ་བྱེད་འགག་ཅེས་པ་ནས་སྐྱེ་བ་འགགས་པས་རྒ་ཤི་ལ་སོགས་པའི་བར་འགག་པ་དེ་ལྟར་སྡུག་བསྔལ་གྱི་ཕུང་པོ་འབའ་ཞིག་པ་འདི་འགག་སྟེ། དེ་ཡང་བདག་མེད་པ་དང༌། ཞི་བ་དང༌། དབེན་པ་དང༌། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱ་བ་མེད་པར་མི་དམིགས་པའི་ཚུལ་གྱིས་ཡིད་ལ་བྱེད་དོ། །ལམ་གྱི་བདེན་པ་འདི་ལྟར་བསྒོམ་སྟེ། དྲན་པ་ཉེར་བཞག་ནས་མ་འདྲེས་བཅོ་བརྒྱད་ཀྱི་བར་མི་དམིགས་པའི་ཚུལ་གྱིས་བསྒོམ་པར་མདོ་ལས་གསུངས་སོ། །དེ་ལྟར་བདེན་པ་བཞིའི་རྣམ་པ་མི་དམིགས་བའི་ཚུལ་གྱིས་ཡིད་ལ་བྱེད་པ་དང་སྒོམ་པའི་སྒོ་ནས་ཉན་ཐོས་ཀྱི་ལམ་བསྡུས་པ་ཡིན་ནོ། །ཞེས་གསུངས་པས་སོ། །ཞེ་ན་ཅུང་ཟད་བརྟག་པར་བྱའོ། །

བཅུ་གསུམ་པ་རང་རྒྱལ་གྱི་མཚན་ཉིད་དང༌། ཚོགས་སྤྱོད་ཆེ་ཆུང་བསེ་རུ་གསུམ་གྱི་ཁྱད་པར་གང་ཡིན་ཞེས་པའི་ལན།

བཅུ་གསུམ་པ་རང་རྒྱལ་གྱི་མཚན་ཉིད་དང༌། ཚོགས་སྤྱོད་ཆེ་ཆུང་བསེ་རུ་གསུམ་གྱི་ཁྱད་པར་གང་ཡིན་ཞེས་པའི་ལན།

རང་རྒྱལ་གྱི་མཚན་ཉིད་དང༌། ཚོགས་སྤྱོད་ཆེ་ཆུང་བསེ་རུ་གསུམ་གྱི་ཁྱད་པར་གང་ཡིན་ཞེས་པའོ། །གཉིས་པ་དེའི་ལན་ནི། ལམ་ལ་གནས་པའི་རང་བཞིན་གྱིས་དབང་འབྲིང་དུ་གྱུར་བའི་གང་ཟག་རང་རྒྱལ་གྱི་མཚན་ཉིད། རང་རྒྱལ་གྱི་བྱང་ཆུབ་བགྲོད་པའི་གོ་སྐབས་ཕྱེ་ཤུལ་དུ་གྱུར་པའི་མངོན་རྟོགས། རང་རྒྱལ་གྱི་ལམ་གྱི་མཚན་ཉིད། ཡོན་ཏན་དུ་མའི་རྟེན་དུ་གྱུར་བའི་རང་རྒྱལ་གྱི་ཡེ་ཤེས། རང་རྒྱལ་གྱི་སའི་མཚན་ཉིད། རང་རྒྱལ་གྱི་རྣམ་གྲོལ་ལ་ཕྱིན་པའི་རང་རྒྱལ་གྱི་མངོན་རྟོགས། རང་རྒྱལ་གྱི་ཐེག་པའི་མཚན་ཉིད་ཡིན་ཏེ། ཉ་ཊཱིཀ་ལས། མཚན་ཉིད་ནི། ཐེག་པ་གསུམ་ལས་རང་བཞིན་གྱིས་དབང་བོ་འབྲིང་དུ་གྱུར་པའི་གང་ཟག་ནི། རང་རྒྱལ་གང་ཟག་གི་མཚན་ཉིད། རང་སངས་རྒྱས་ཀྱི་ས་ལ་བརྟེན་ནས་རང་བྱང་ཆུབ་ཏུ་བགྲོད་པའི་གོ་སྐབས་ཕྱེ་ཤུལ་དུ་གྱུར་པ། དེའི་ལམ་གྱི་མཚན་ཉིད་དོ། །ཞེས་དང༌། འདི་ལ་བདག་མེད་རྟོགས་པའི་བློ་གང་ཞིག་ཉན་ཐོས་ཀྱི་ལམ་གྱི་རྟེན་བྱེད་པ་ཉན་ཐོས་ཀྱི་ས། གང་ཞིག་རང་རྒྱལ་ལམ་གྱི་རྟེན་བྱེད་པ་རང་རྒྱལ་གྱི་སའོ། །ཞེས་དང༌། རང་རྒྱལ་ཐེག་པའི་མཚན་ཉིད་ནི། བློ་གྲོས་མི་ཟད་པས་བསྟན་པའི་མདོ་འགྲེལ་དུ། དབྱིག་གཉེན། རང་སངས་རྒྱས་དེ་དག་རྣམ་པར་གྲོལ་བའི་སར་ཕྱིན་པར་བྱེད་པའི་ཐེག་པ་ནི་རང་སངས་རྒྱས་ཀྱི་ཐེག་པ་སྟེ། ཞེས་པ་ལྟར་རོ། །ཞེས་གསུངས་པའི་ཕྱིར། ཀུན་བཏུས་ས་འགྲེལ་ལས།དབང་པོ་ནི་ནང་ཚན་ལ་རྣོ་བརྟུལ་ཡོད་ཀྱང་གོང་འོག་གཉིས་ལ་ལྟོས་ཏེ་རང་བཞིན་གྱིས་ཤེས་རབ་ལ་སོགས་པའི་དབང་པོ་ལྔ་འབྲིང་པོར་གྱུར་པ་དང༌། ཞེས་དང༌། ཉ་ཊཱིཀ་ལས།ཐེག་པ་གསུམ་ལས་རང་བཞིན་གྱིས་དབང་བོ་འབྲིང་དུ་གྱུར་པའི་གང་ཟག་ནི། རང་རྒྱལ་གང་ཟག་གི་མཚན་ཉིད། ཅེས་སོགས་ཀྱིས་རང་བཞིན་གྱི་དབང་འབྲིང་ཡིན་ཚུལ་ལ་དཔྱད། རང་རྒྱལ་གསུམ་གྱི་ཁྱད་པར་ནི། ཀུན་བཏུས་ལས། ཉན་ཐོས་ཀྱི་སྡེ་སྣོད་ལ་དམིགས་ནས་ཆོས་ཀྱི་རྗེས་སུ་མཐུན་པའི་ཆོས་སྒྲུབ་པ་དང༌། ཞེས་སོགས་དང༌། ས་བཟང་མངོན་པ་ཀུན་བཏུས་འགྲེལ་བ་ལས། གཉིས་པར་རང་སངས་རྒྱས་ཀྱི་ཐེག་པ་པ་གང་ཞེ་ན། དབུ་མ་རྩ་བར། རྫོགས་སངས་རྒྱས་རྣམས་མ་བྱོན་ཞིང༌། ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །རྟེན་པ་མེད་ལས་རབ་ཏུ་སྐྱེ། །ཞེས་པ་ལྟར་གཞན་གྱི་སྒྲ་ལ་མ་བརྟེན་པར་རང་ཉིད་སོ་སོ་གཅིག་པུར་བྱང་ཆུབ་པ་སྟེ། རིགས་ནི་བསེ་རུ་ལྟ་བུ་རང་བྱང་ཆུབ་ཏུ་ཅིས་ཀྱང་འགྱུར་བ་རང་སངས་རྒྱས་ཀྱི་ཆོས་ཉིད་དུ་ངེས་པའམ། ཚོགས་སྤྱོད་པ་བྱང་ཆུབ་གཞན་དུའང་འགྱུར་སྲིད་པ་མ་ངེས་པ་ལ་གནས་པ་དང༌། ཞེས་པ་སྟེ། དེ་དག་ནི་ཉོན་མོངས་པ་ཆུང་བས་འདུ་འཛི་ལ་མི་འཇུག་ཅིང་གཅིག་པུ་དབེན་པ་ལ་དགའ་བ་དང༌། སྙིང་རྗེ་ཆུང་བས་གཞན་དོན་དུ་ཆོས་སྟོན་པ་ལ་མི་འཇུག་ཅིང་སེམས་ལས་ཆུང་ངུར་གནས་པ་དང༌། ང་རྒྱལ་ཆེ་བས་སློབ་དཔོན་དང་འགྲན་ཟླ་མེད་པར་བྱང་ཆུབ་འདོད་པའི་རིགས་ཅན་ནོ། །དབང་པོ་ནི་ནང་ཚན་ལ་རྣོ་བརྟུལ་ཡོད་ཀྱང་གོང་འོག་གཉིས་ལ་ལྟོས་ཏེ་རང་བཞིན་གྱིས་ཤེས་རབ་ལ་སོགས་པའི་དབང་པོ་ལྔ་འབྲིང་པོར་གྱུར་པ་དང༌། སྨོན་པ་ནི་བདག་ཉིད་གཅིག་པུ་འཁོར་བ་ལས་རྣམ་པར་ཐར་པར་བྱ་བའི་ཕྱིར་སྨོན་ལམ་བཏབ་ཅིང་སེམས་བསྐྱེད་པ་དང༌། བསམ་པ་ནི། ཐུན་མོང་དུ། སྡུག་བསྔལ་ལས་ཡིད་འབྱུང་བ། ཀུན་འབྱུང་ལ་འདོད་ཆགས་དང་བྲལ་བ་དང༌། རྣམ་པར་གྲོལ་བ་འགོག་པ་ཐོབ་པར་བྱ་བའི་ཕྱིར་ལམ་སྒོམ་པར་འདོད་པའི་བསམ་པ་ཅན་དང༌། ཁྱད་པར་དུ་འདྲེན་པ་གཞན་ལ་མི་ལྟོས་པར་བདག་ཉིད་འབའ་ཞིག་མངོན་པར་རྫོགས་པར་བྱང་ཆུབ་པར་བྱ་བའི་དད་མོས་ཀྱི་བསམ་པ་ཅན་དང༌། དམིགས་པ་ནི་འདི་ལ་དངོས་སུ་གསུངས་པའི་སྡེ་སྣོད་ལ་སོགས་པ་མེད་ཅིང་ལམ་གྱི་དམིགས་རྣམ་འདྲ་བས་ཉན་ཐོས་ཀྱི་སྡེ་སྣོད་གསུམ་ལ་དམིགས་ནས་སྒྲུབ་པ་ནི་ཐུན་མོང་དུ་ཆོས་མྱང་འདས་ཀྱི་རྗེས་སུ་མཐུན་པའི་ཆོས་དེའི་ལམ་སྒྲུབ་ཅིང་ཉམས་སུ་ལེན་པ་དང༌། ཁྱད་པར་དུ། དབང་བོ་རྣོན་པོ་བསེ་རུ་ལྟ་བུ་ནི། །བསེ་རུ་བསྐལ་པ་བརྒྱ་ཡི་རྒྱུས། །ཞེས་པ་ལྟར་ཚོགས་བསགས་ནས་རྒྱུད་སྨིན་པར་བྱེད་ཅིང་བདེན་པ་དང་བཅས་པའི་གནས་དྲུག་ལ་མཁས་པར་བྱས་ཏེ། ངེས་པར་འབྱེད་པའི་ཆ་དང་མཐུན་པའི་སྦྱོར་ལམ་ཡན་ཆད་རང་གིས་མངོན་དུ་བྱ་བར་ནུས་པས་སྔོན་སློབ་དཔོན་ལ་ལྟོས་ནས་མ་སྐྱེས་པའམ།དབང་པོའི་འབྲིང་པོ་ཚོགས་སྤྱོད་ཆེན་པོ་པ་ནི་ཚོགས་ཀྱང་ཅི་རིགས་པར་སོག་ཅིང་གནས་དྲུག་ལ་མཁས་པར་བྱས་ཏེ། ངེས་པར་འབྱེད་པའི་ཆ་དང་མཐུན་པ་མན་ཆད་སྔོན་སློབ་དཔོན་གྱི་དྲུང་དུ་བསྐྱེད་པ་ཡིན་ལ། མཐོང་ལམ་ཡན་ཆད་རང་གིས་མངོན་དུ་བྱ་བར་ནུས་པས་སྔོན་སློབ་དཔོན་ལ་ལྟོས་ནས་དགེ་སྦྱོང་གི་འབྲས་བུ་མ་ཐོབ་པའམ། དབང་པོ་བརྟུལ་བོ་ཚོགས་སྤྱོད་ཆུང་ངུ་བ་ནི་ཚོགས་ཀྱང་སྔ་མ་དག་ལས་ཉུང་བར་སོག་ཅིང་གནས་དྲུག་ལ་མཁས་པར་བྱས་ཏེ། སྔོན་སློབ་དཔོན་ལ་ལྟོས་ནས་དགེ་སྦྱོང་གི་ཚུལ་གྱི་འབྲས་བུ་མཐོང་ལམ་ལ་སོགས་པ་ཐོབ་པ་ཡང་རུང༌། གསུམ་ཀའང་སྨོན་ལམ་གྱི་དབང་གིས་སངས་རྒྱས་འབྱུང་བ་མེད་པའི་ཞིང་ཁམས་སྟོང་པར་སྐྱེས་ཏེ་གཞན་གྱི་སྒྲ་ལ་མ་ལྟོས་པར་བདག་ཉིད་ཀྱིས་རང་རང་གི་ལམ་ལྷག་མ་རྣམས་མངོན་དུ་བྱས་ནས་ཞེས་པའོ། །འབྲས་བུ་ནི་དབང་བོ་རྣོན་པོ་བསེ་རུ་ལྟ་བུར་ཟླ་མེད་པར་གྱུར་ཏེ་གཅིག་པུར་གནས་པས་རང་བྱང་ཆུབ་ཐོབ་པའམ། ཕྱི་མ་དག་ཀྱང་སྡིག་པའི་ཆོས་ལས་རང་རྒྱལ་བར་གྱུར་ཏེ་ཚོགས་དང་ལྷན་ཅིག་སྤྱོད་པས་གང་སྡུག་བསྔལ་གྱི་དངོས་པོ་ཟད་ཅིང་མཐར་ཕྱིན་པའི་མྱ་ངན་ལས་འདས་པ་ཐོབ་པ་སྟེ། དབུ་མ་སྙིང་པོར། དང་པོ་གཅིག་པུར་གནས་པ་སྟེ། ཟབ་མོ་ལ་ནི་རྟོག་པ་ཡི། །མོས་པ་དང་ལྡན་ལྷག་མ་གཉིས། །ཚོགས་དང་ལྷན་ཅིག་གནས་པ་ཡིན། །ཞེས་པ་ལྟ་བུའོ། །ས་སྡེར། གསུམ་གས་ཀྱང་ཉན་ཐོས་དང་འདྲ་བར་གང་ཟག་གི་བདག་མེད་ཙམ་རྟོགས་པར་བཤད་ལ། ཡུམ་གྱི་རྒྱན་དུ། བསེ་རུ་ལྟ་བུའི་ཆོས་ཀྱི་བདག་གི་ཕྱོགས་གཅིག་གཟུང་བ་མེད་པའང་རྟོགས་པར་གསུངས་ཏེ། གཟུང་དོན་རྟོག་པ་སྤང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་པའོ། །ཐམས་ཅད་ཀྱང་རྟེན་འབྲེལ་ཟབ་མོ་དང་རྣམ་ཐར་སྒོ་གསུམ་ཡིད་ལ་བྱེད་ཅིང༌། གཞན་མ་དད་པ་བཟློག་པའི་ཆེད་དུ་རྫུ་འཕྲུལ་ཡང་ཇི་རིགས་པར་སྟོན་ལ། ཞི་བ་དང་དུལ་བས་བསོད་སྙོམས་ལ་འཇུག་པས་ན་སྒྲ་མེད་པར་ལུས་ཀྱི་སྒོ་ནས་ཆོས་སྟོན་པར་ཡང་བྱེད་དེ། གང་གང་དོན་ནི་གང་གང་ལ། །ཇི་ལྟ་ཇི་ལྟར་ཉན་འདོད་པ། །དེ་དེ་ལ་དོན་དེ་དང་དེ། །སྒྲ་མེད་ཀྱང་དེ་དེ་ལྟར་སྣང༌། །ཞེས་པ་ལྟར་རོ། །ཞེས་དང༌།ཉ་ཊཱིཀ་ལས། བསེ་རུ་ལྟ་བུ་ནི། བསྐལ་བ་བརྒྱའི་བར་དུ་སངས་རྒྱས་མཆོད་ཅིང་ཚོགས་བསགས་ཏེ་ཉན་ཐོས་ཀྱི་སྡེ་སྣོད་ལ་དམིགས་ནས་ཆོས་༼ཀུན་བཏུས་༽བསྒྲུབ་ཅིང་ཚོགས་ལམ་བསྐྱེད་ནས་ད་དུང་སྐྱེ་བ་ལེན་པར་ཤེས་ཏེ་སྡེ་སྣོད་གསུམ་གྱི་དོན་༼ས་སྡེའི་རང་རྒྱལ་སར།༽ ཕུང་སྐྱེ་ཁམས་གསུམ། རྟེན་འབྲེལ། ༼ས་སྡེར།༽གནས་གནས་མིན། སར། བདེན་པ། སར། སྟེ་མཁས་བྱའི་གནས་དྲུག་ལ་མཁས་པར་སྦྱངས་ཤིང་འཆི་འཕོ་ཁར་སངས་རྒྱས་མེད་པའི་ཞིང་དུ་སྐྱེ་བར་དང༌། དེར་གཞན་ལ་མ་ལྟོས་པར་རང་གིས་ཐོབ་པའི་ཤེས་རབ་ཀྱིས་ལམ་བགྲོད་པ་དང༌། བྱང་ཆུབ་ཐོབ་པ་ན་གདུལ་བྱ་ལ་ལུས་ཀྱིས་ཆོས་སྟོན་གྱི་ངག་གིས་མིན་པར་སྨོན་ལམ་འདེབས་སོ། །དེ་ནས་ཕྱི་མར་སངས་རྒྱས་ཀྱི་བསྟན་པ་མེད་པའི་ཞིང་སྟོང་བར་གླིང་གསུམ་གྱི་སྐྱེས་པ་དམངས་རིགས་མིན་པ་གཅིག་ཏུ་སྐྱེས་ཏེ་རང་བྱུང་གིས་རབ་ཏུ་བྱུང་ཞིང་བསྙེན་པར་རྫོགས་ནས་དུར་ཁྲོད་དུ་ཕྱིན་ཏེ་རུས་པ་འདི་ཅི་ལས་བྱུང་བསམས་པས་མ་རིག་པ་ནས་རྒ་ཤིའི་བར་རྟེན་འབྲེལ་ལུགས་འབྱུང་ལུགས་བཟློག་ཏུ་རྟོགས་པའི་དོན་བསམ་གཏན་བཞི་བའི་དངོས་གཞི་ལ་བརྟེན་ནས་བསྒོམས་པས་ཚོགས་ལམ་གྱི་དབུགས་འབྱུང་རྔུབ་ནས་གཟུང་སྟེ་ལམ་ལྔ་སྟན་གཅིག་ལ་མངོན་དུ་བྱེད་དོ། །སྟོན་དང་བསེ་རུ་བྱང་ཆུབ་པར། །བསམ་གཏན་མཐའ་རྟེན་གཅིག་ལ་ཀུན། །ཞེས་སོ། །དེ་ཡང་མཐོང་སྤང་ཉོན་སྒྲིབ་དང་ཤེས་སྒྲིབ་གཟུང་རྟོག་སྤོང་ངོ༌། །སྒོམ་སྤང་ཁམས་གསུམ་གྱི་ཤེས་སྒྲིབ་གཟུང་རྟོག་དང་བསམ་གཏན་བཞི་བ་ཡན་ཁམས་གོང་གི་ཉོན་སྒྲིབ་དགུར་དྲིལ་ཏེ་སྤོང་ངོ༌། །འདོད་པ་དང་བསམ་གཏན་དང་པོ་གཉིས་པ་གསུམ་པའི་སྒོམ་སྤང་གི་ཉོན་མོངས་མཐོང་ལམ་གྱི་སྔར་འཇིག་རྟེན་པའི་སྒོམ་ལམ་གྱིས་སྤངས་ཟིན་ཏེ། དེའི་སྔར་བསམ་གཏན་བཞི་བ་ཐོབ་ལ་མ་ཉམས་པས་སོ། །དེས་ན་འདི་ལ་ཕྱིར་མི་འོང་ཆགས་བྲལ་སྔོན་སོང་གི་ཞུགས་འབྲས་གཉིས་དང་མཐར་དགྲ་བཅོམ་སྟེ་རྫས་གསུམ་དུ་འགྱུར་རོ། །ཚོགས་དང་སྤྱོད་པ་ཆེ་བ་ནི། དྲོད་རྩེ་བཟོད་པ་རྣམས་བསྐྱེད་ཅིང་ཚེ་དེ་ལ་དགེ་སྦྱོང་གི་འབྲས་བུ་གང་ཡང་མ་ཐོབ་པ་ཞིག་དང༌། ཚོགས་སྤྱོད་ཆུང་བ་ནི། དགྲ་བཅོམ་མ་གཏོགས་པའི་དགེ་སྦྱོང་གི་འབྲས་བུ་གང་རུང་ཐོབ་ནས་གནས་དྲུག་ལ་མཁས་པར་བྱེད། ཅེས་སོགས་ས་སྡེའི་རང་སངས་རྒྱས་ཀྱི་སར་བཤད་ཅིང༌། ཀུན་བཏུས་སུ་ཡང༌། ངེས་པར་འབྱེད་པའི་ཆ་དང་མཐུན་པ་སྔོན་མ་བསྐྱེད་པའམ་སྔོན་བསྐྱེད་པ། སྔོན་འབྲས་བུ་མ་ཐོབ་པའམ་འབྲས་བུ་ཐོབ་པའང་རུང༌། ཞེས་དང༌། དབུ་མ་སྙིང་བོར། འགའ་ཞིག་བསྐལ་བ་བརྒྱར་སངས་རྒྱས། །འབྱུང་བ་རྣམས་ལ་ལེགས་མཆོད་ཅིང༌། །རང་རྒྱལ་བྱང་ཆུབ་ཕྱིར་བརྩམས་ནས། །སྨིན་པར་བྱེད་དོ་གཞན་དག་ནི། །སངས་རྒྱས་མཉེས་བྱས་ངེས་འབྱེད་ཀྱི། །ཆ་མཐུན་བསྐྱེད་ པ་རྫོགས་བྱེད་དོ། །གཞན་ནི་སངས་རྒྱས་འབྱུང་ལ་འབྲས། །ཐོབ་བྱེད་དགྲ་བཅོམ་མངོན་མི་བྱེད། །ཅེས་སོ། །༼མཆན་ལུང་འདི་རྟོག་གེ་འབར་བའི་ལེའུ་བཞི་བའི་དབུར་ཡོད་ལ་སྡེ་དགེའི་ཤིང་པར༡༤༦དབུ་མ་སྙིང་པོའི་ལུང་ཡིན་མིན་དཔྱད། ༽དེ་གཉིས་ཀ་ཡང་ཕྱི་མ་ལ་བསམ་གཏན་བཞི་བའི་སེམས་ལ་བརྟེན་ནས་ལམ་ལྷག་མ་ཚེ་དེ་ལ་མངོན་དུ་བྱེད་དོ། །ཞེས་བོད་དག་འཆད་དོ། །གཉིས་པ་ནི། བསེ་རུ་ལྟ་བུ་ནི་སྐུ་གཅིག་པུར་གནས་ལ་ཐུགས་རྟེན་འབྲེལ་དང༌། སྒོ་གསུམ་ལ་ལྷུར་ལེན་པར་ས་སྡེར་བཤད། གསུང་སྨྲ་བཅད་དམ་པོ་ཞེས་སོ། །བོད། གསུམ་པ་ནི། འདོད་པའི་རྟེན་ཅན་ཁམ་ཟས་ཀྱིས་འཚོ་དགོས་པས་ལུས་ཤིན་ཏུ་བསྲུངས། དབང་བོ་རྣམས་ཤིན་ཏུ་བསྡམས། དྲན་པ་ལ་ཤིན་ཏུ་གནས་པས། གྲོང་ངམ་གྲོང་བརྡལ་དུ་བསོད་སྙོམས་ལ་འཇུག་ཕ་རོལ་དམན་པ་རྣམས་ལ་ལུས་ཀྱིས་སྙིང་བརྩེ་བར་བྱེད་ཀྱི་ངག་གིས་མིན་ཏེ། ལུས་ཀྱིས་ཆོས་སྟོན་གྱི་ངག་གིས་མིན་པའི་ཕྱིར། ཞེ་འགྲས་པ་རྣམས་བཟློག་པའི་ཕྱིར་རྫུ་འཕྲུལ་དུ་མ་སྟོན་པར་བྱེད་དོ། །ཚོགས་སྤྱོད་གཉིས་ནི། ཚོགས་དང་སྤྱོད་ཀྱི་གཅིག་པུར་མིན་ནོ། །གཞན་རྒྱུ་སོགས་སྔར་ལྟར་རོ་ཞེས་པ་རྣམས་ས་སྡེའི་རང་རྒྱལ་གྱི་སར་རོ། །སྔོན་འབྲས་བུ་ཐོབ་པའི་ཚོགས་སྤྱོད་ལ་རྒྱུན་ཞུགས་དང་ཕྱིར་མི་འོང་ངེས་པར་ཡོད་ཅིང་ཕྱིར་འོང་ཡང་མི་ཁེགས་པས་འབྲས་བུ་བཞི་ག་ཡོད་ལ། སྔོན་འབྲས་བུ་མ་ཐོབ་པའི་ཚོགས་སྤྱོད་ལ་མ་ངེས་ཏེ། སྲིད་པ་ཐ་མ་པའི་ཚེ་བཟོད་ཆེན་དང་ཆོས་མཆོག་བསམ་གཏན་གྱི་ཉེར་བསྡོགས་ཙམ་ལ་བརྟེན་ན་རྒྱུན་ཞུགས་དང་ཕྱིར་འོང་དུ་འགྱུར། དངོས་གཞི་ལ་བརྟེན་ན་ཕྱིར་མི་འོང་དུ་འགྱུར་རོ་གསུང་ངོ༌། །ཞེས་གསུངས་སོ། །ཀུན་བཏུས་ས་འགྲེལ་དང་ཉ་ཊཱིཀ་གི་ལུང་གཉིས་ལས་གསལ་བར་བསྟན་པས་དེ་གཉིས་ཀྱི་ལུང་ཇི་ལྟ་བར་བཀོད་པ་ལས་ཚིག་ལོགས་སུ་བྲི་བའི་ངལ་བ་མ་བྱས་པའོ། །སྐབས་དུ་མར་དེ་ལྟར་ཤེས་དགོས་སོ། །རང་རྒྱལ་གྱིས་ཉན་ཐོས་ཀྱི་སྡེ་སྣོད་ལ་དམིགས་པ་ལས་རང་རྒྱལ་ཀྱི་སྡེ་སྣོད་ལ་དམིགས་པར་གོང་དུ་བཀོད་པའི་ཀུན་བཏུས་ས་འགྲེལ་དང་ཉ་ཊཱིཀ་གཉིས་ཀར་མ་བཤད་པའི་རྒྱུ་མཚན་ཉན་ཐོས་ཀྱི་སྡེ་སྣོད་ལས་རང་རྒྱལ་གྱི་སྡེ་སྣོད་ལོགས་སུ་མེད་པའི་རྒྱུ་མཚན་གྱིས་ཡིན་ན། དེ་མི་འཐད་པར་ཐལ། བཟུང་བ་བདེན་མེད་གསུངས་བའི་རང་རྒྱལ་གྱི་སྡེ་སྣོད་ཡོད་པ་གང་ཞིག་དེ་ཉན་ཐོས་ཀྱི་སྡེ་སྣོད་ཡིན་དོན་མེད་པའི་ཕྱིར་དང༌། སྤྱོད་འཇུག་ས་འགྲེལ་ལས། མཆོག་དམན་གྱིས་ཕྱེ་ན་ཐེག་པ་གསུམ་དང༌། ཞེས་གསུངས་པའི་ཕྱིར་ཟེར་ན་དཔྱད། རང་རྒྱལ་གྱིས་བཟུང་བ་བདེན་མེད་རྟོགས་ནས་གཟུང་རྟོག་སྤོང་བ་ཡིན་ཏེ། རྩ་བར། གཟུང་དོན་རྟོག་པ་སྤོང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུུ་ལྟ་བུའི་ལམ། །ཡང་དག་པར་བསྡུས་པར་ཤེས་པར་བྱ། །ཞེས་དང༌། ཉ་ཊཱིཀ་ལས། རྩ་བ་ལ། རང་རྒྱལ་འཕགས་པའི་མཉམ་གཞག་གི་ཡེ་ཤེས་ཆོས་ཅན། ཕྱིའི་གཟུང་བ་བདེན་པར་རྟོག་པ་སྤོང་བར་ནུས་ཏེ། ཕྱི་གཟུང་བ་བདེན་པའི་རང་བཞིན་མེད་པར་མངོན་སུམ་དུ་རྟོགས་པའི་ཕྱིར།ཞེས་དང༌། དེས་ན་ཉན་ཐོས་ལས་རྟོགས་པ་ལྷག་པོ་ཆོས་ཅན། དེས་འཛིན་པ་ནང་གི་སེམས་བདེན་པར་རྟོག་པ་མིན་སྤོང་བ་སྟེ་སྤོང་མི་ནུས་ཏེ། དེ་རང་བཞིན་མེད་པར་མ་རྟོགས་པས་སོ། །དེས་ཐེག་ཆེན་ལས་དམན་པར་བསྟན་ནོ། །ཞེས་དང༌། རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་ལས། ཉན་ཐོས་འཕགས་པ་གང་ཟག་གི་བདག་མེད་པ་རྟོགས་པ་རྣམས་དང༌། ཞི་བ་མཐའ་གཅིག་ཏུ་སྤྱོད་པའི་རང་སངས་རྒྱས་གང་ཟག་དང་ཆོས་ཀྱི་ཕྱེད་གཟུང་བ་བདག་མེད་པར་རྟོགས་པ་རྣམས་དང༌། བྱང་ཆུབ་སེམས་དཔའ་གང་ཟག་དང་ཆོས་ཀྱི་བདག་གཉིས་ཀ་མེད་པར་རྟོགས་པ་རྣམས་དང༌། ཞེས་དང༌། ཀུན་བཏུས་ས་འགྲེལ་ལས། ས་སྡེར། གསུམ་གས་ཀྱང་ཉན་ཐོས་དང་འདྲ་བར་གང་ཟག་གི་བདག་མེད་ཙམ་རྟོགས་པར་བཤད་ལ། ཡུམ་གྱི་རྒྱུན་དུ། བསེ་རུ་ལྟ་བུའི་ཆོས་ཀྱི་བདག་གི་ཕྱོགས་གཅིག་གཟུང་བ་མེད་པའང་རྟོགས་པར་གསུངས་ཏེ། གཟུང་དོན་རྟོག་པ་སྤང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་པའོ། །ཞེས་དང༌། རྩ་བར། ཉོན་མོངས་ཤེས་བྱ་ལམ་གསུམ་གྱི། །ཉམས་ཕྱིར་སློབ་མ་བསེ་རུ་དང༌། རྒྱལ་སྲས་རྣམས་ཀྱི་དག་པ་སྟེ། །ཞེས་དང༌། མདོ་ལུགས་མ་ལས། སློབ་མ་རྒྱུན་ཞུགས་ནས་དགྲ་བཅོམ་པར་གྱི་ཆོས་ཉིད་དེ་རང་རང་གི་ངོ་སྐལ་གྱིས་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱི་སྤང་བྱའི་ཉོན་མོངས་ཉམས་ཤིང་མེད་པའི་ཕྱིར་རོ། །བསེ་རུ་ལྟ་བུ་རང་སངས་རྒྱས་ཀྱི་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱིས་སྤང་བྱ་ཉོན་མོངས་དང༌། ཤེས་བྱའི་སྒྲིབ་པ་ཉམས་ཤིང་སྤངས་པའི་ཕྱིར་རོ། །སར་གནས་ཀྱི་རྒྱལ་སྲས་རྣམས་ཀྱི་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱི་སྤང་བྱ་ལམ་གསུམ་གྱི་སྒྲུབ་པ་ཉམས་ཤིང་དག་པའི་ཕྱིར་རོ། །ཞེས་དང༌། གཞི་ལམ་འབྲས་བུའི་ངོ་སྤྲོད་ཡང་དག་དོན་གསལ་ལས། རང་སངས་རྒྱས་ཀྱི་ལམ་ནི། ཞེས་པ་ནས། ཉོན་མོངས་པའི་སྒྲིབ་པ་དང་ཤེས་སྒྲིབ་ཀྱི་ཕྱོགས་གཅིག་གཟུང་བ་ཕྱི་རོལ་ཀྱི་དོན་དུ་རྟོག་པའི་རྣམ་པར་རྟོག་པ་སྤོང་ཞིང་འཛིན་པའི་རྣམ་པར་རྟོག་པ་མི་སྤོང་བའི་ལམ་ཚོགས་སྦྱོར་ལ་སོགས་པ་ལྔའོ། །ཞེསགསུངས་པའི་ཕྱིར། འདོད་ན། དེ་མི་འཐད་པར་ཐལ། ཤེར་འགྲེལ་སྔོན་མེད་ལེགས་བཤད་ལས། རང་རྒྱལ་གྱིས་གཟུང་བ་ཆོས་ཀྱི་བདག་མེད་མངོན་སུམ་རྟོགས་སམ་མ་རྟོགས་ཞེ་ན། མ་རྟོགས་ཞེས་བྱའོ། །འོ་ན་ཇི་སྐད་དུ། གཟུང་དོན་རྟོག་པ་སྤོང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པ་ཤེས་པར་བྱ། །ཞེས་གསུངས་པ་མ་ཡིན་ནམ་ཞེ་ན། རང་རྒྱལ་རྣམས་ནི་རྟེན་འབྲེལ་ཡུན་རིང་དུུ་གོམས་པ་ལས། འཇིག་རྟེན་མ་རིག་པའྀ་རྐྱེན་ཅན་དུ་ཤེས་པས་ན། དེའི་ཤུགས་ཀྱིས་གཟུང་བའི་རྣམ་རྟོག་ཤིན་ཏུ་ཉམས་སྨད་པ་ཡིན་པས། དེ་ལྟ་བུའི་རྟོགས་པ་དེ་ཡང་བྱང་ཆུབ་སེམས་དཔའི་ལམ་ཤེས་ཀྱི་རྟོགས་རིགས་ཀྱི་ནང་དུ་འདུས་ཏེ། དེ་ཡང་བྱང་ཆུབ་སེམས་དཔའ་སྐབས་འགའ་ཞིག་ཏུ་ཆོས་ཐམས་ཅད་སེམས་ཀྱི་སྣང་བ་ཙམ་དུ་རྟོགས་པས། ང་བདག་དང་ཕྱི་རོལ་གྱི་དོན་གདོད་ནས་མ་གྲུབ་པར་རྟོགས་ཤིང༌། དེ་ཉིད་ཀྱང་སྤྲོས་པ་ཐམས་ཅད་དང་གདོད་ནས་བྲལ་བའི་རྣམ་པ་ཅན་ཡིན་མོད་ཀྱི། འཛིན་པ་ལ་ཆེད་གཏད་ཤུགས་ཕྱུང་ནས་སྟོང་བ་སྒོམ་པ་མེད་པས། གཟུང་དོན་གྱི་རྟོག་པ་སྤོང༌།འཛིན་པའི་རྟོག་པ་མི་སྤོང་ཞེས་ཐ་སྙད་མཛད་པ་ཡིན་གྱི། འཛིན་པའི་མངོན་ཞེན་དང་བཅས་པ་ནི་མ་ཡིན་ནོ། །དེ་ལྟ་བུའི་ཡེ་ཤེས་དེས། རང་རྒྱལ་གྱི་རྟོགས་པ་གང་ཡིན་པ་དེ། རིགས་མཐུན་གྱི་ཚུལ་གྱིསབསྡུས་པ་ཡིན་པས་རང་རྒྱལ་གྱི་ལམ་གྱི་མིང་བཏགས་པ་ཙམ་མོ། །ཞེས་གསུངས་པའི་ཕྱིར་ཟེར་ན་སྔར་བདག་གིས་གཞན་སྟོང་བགྲོ་གླེང་ཐེངས་དང་པོའི་སྐབས་སུ་སྔོན་མེད་ལེགས་བཤད་ཀྱི་སྒྲས་ཟིན་གཙོ་བོར་བྱས་ཏེ་བཤད་མོད་ཕྱིས་སུ་གཞུང་ཆེན་རྣམས་ཀྱི་དགོངས་པ་བརྟག་ན་དེ་ལྟར་ཡིན་མིན་ཅུང་ཟད་དོགས་པའི་གནས་སུ་སྣང་བས་ཟུར་གནས་བློ་ལྡན་རྣམས་ཀྱིས་སླར་དཔྱད་པར་བྱའོ། །སྐབས་འདིར་མདོ་ལུགས་མ་ལས་གཟུང་དོན་རྟོག་པ་སྤང་ཕྱིར་དང༌། །ཞེས་སོགས་ཀྱི་དོན་བྱང་སེམས་ལ་སྦྱར་ནས་བཤད་དེ། མདོ་ལུགས་མ་ལས། བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་ཤེར་ཕྱིན་ནི་དོན་དམ་པ་དང༌། གཟུགས་སོགས་སྟོང་ཞེས་བྱ་བར་གཟུང་བར་མི་རྟོགས་པས་གཟུང་དོན་རྟོག་པ་སྤོང་ཕྱིར་དང༌། ཀུན་རྫོབ་ཏུ་ཐེག་པ་གསུམ་ལ་སོགས་པ་བསྟན་ཅིང་ཐོབ་པའི་སྒོ་ནས་བྱེད་པ་པོའི་ཆོས་སུ་འཛིན་པ་ཡོད་པས་འཛིན་པ་མི་སྤོང་ཕྱིར་དང་ནི། རྟེན་བྱང་ཆུབ་སེམས་དཔའི་ལམ་གྱིས་བསེ་རུུ་ལྟ་བུའི་ལམ་མི་དམིགས་པའི་ཚུལ་གྱིས་ཡང་དག་པར་བསྡུས་པར་ཤེས་པར་བྱའོ། །ཞེས་གསུངས་པས་སོ། །

བཅུ་བཞི་པ་རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའི་ལན།

བཅུ་བཞི་པ་རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའི་ལན།

རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའོ། །གཉིས་པ་ལན་ནི། ཡང་རང་རྒྱལ་དགྲ་བཅོམ་པ་དག་གིས་ངག་གིས་ཆོས་མི་སྟོན་པར་ལུས་ཀྱིས་ཆོས་སྟོན་པ་ཡིན་པར་ཐལ། ཉ་ཊཱིཀ་ལས། རང་སངས་རྒྱས་དགྲ་བཅོམ་དེ་དག་ནི་ཆོས་ཅན། ཁྱོད་ཀྱིས་ངག་གི་སྒྲར་བརྗོད་པའི་ཆོས་སྟོན་པའི་ཚིག་གི་འབྲས་རྟགས་ལས་དེ་དག་གི་ཡེ་ཤེས་མི་རྟོགས་ཏེ། ངག་གི་སྒྲ་མེད་ལུས་ཀྱིས་ཆོས་སྟོན་པ་དེའི་ཕྱིར། རྟགས་གྲུབ་སྟེ། རང་རྒྱལ་དགྲ་བཅོམ་རང་གིས་ཐོབ་པའི་བདག་མེད་ཕྱེད་དང་གཉིས་རྟོགས་པའི་ཡེ་ཤེས་དང་སྔར་བཤད་སྨོན་ལམ་ལ་སོགས་པའི་མཐུས་ངག་གི་སྒྲ་མེད་པའི་ལུས་ཀྱིས་ཆོས་བསྟན་ནས་གདུལ་བྱ་གཞན་དག་དགེ་བ་བཅུ་དང་ཐོས་བསམ་བསྒོམ་པ་ལ་སོགས་པ་ལ་འཇུག་པར་བྱེད་པ་དེའི་ཕྱིར། རང་རྒྱལ་གྱིས་ཆོས་བསྟན་པས་དྲོད་ཡན་གྱི་རྟོགས་པ་བསྐྱེད་མི་སྲིད་པར་མྱང་འདས་ཆེན་པོར་གསུངས་སོ། །ཞེས་དང༌། མ་དག་པའི་རྟོག་དཔྱོད་ཀྱིས་ཀུན་ནས་བསླང་ནས་ཚིག་བརྗོད་པ་ནི་རྣམ་གཡེང་ཡིན་ལ། དེ་ཡང་ཏིང་ངེ་འཛིན་ཅན་གྱི་སེམས་རྒྱུད་འཁྲུག་པར་བྱེད་པ་ཡིན་པས་ཏིང་ངེ་འཛིན་གྱི་གེགས་ཡིན་པའི་ཕྱིར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། རང་རྒྱལ་དེ་དག་གི་ངག་གིས་ཆོས་བསྟན་ན་ཀུན་སློང་ལ་རྟོག་དཔྱོད་ཀྱི་གཡེང་བ་འགྲོ་དགོས་པ་ལྟར་ལུས་ཀྱིས་ཆོས་བསྟན་ན་ཡང་དེ་སྔོན་དུ་འགྲོ་དགོས་པ་གང་ཞིག་མདོ་ལུགས་མ་ལས་ཀྱང་ལུས་ཀྱིས་ཆོས་སྟོན་པར་མ་གསུངས་པའི་ཕྱིར། དང་པོ་གྲུབ་སྟེ། མཛོད་ལས། རྟོག་དང་དཔྱོད་དང་བཅས་པ་ནི། །རྣམ་པར་ཤེས་པའི་ཁམས་ལྔ་ཡིན། །ཞེས་གསུངས་པའི་ཕྱིར། རྟགས་ཕྱི་མ་གྲུབ་སྟེ། མདོ་ལུགས་མ་ལས། དྲན་པ་ཉེར་བཞག་ལ་སོགས་བ་གང་དང་གང་ཡིན་པའི་ཆོས་ཀྱི་དོན་ནི། རྨི་ལམ་བཞིན་དུ་སྟོན་པ་པོ་སྣང་བའི་གང་ཟག་གང་དང་གང་ལ། དཔེ་ཇི་ལྟ་ཇི་ལྟ་བུར་ཉན་པ་པོའི་གང་ཟག་ཏུ་འདོད་པར་བྱ་བ་ནི། སྟོན་པ་པོར་སྣང་བའི་གང་ཟག་དེ་དང་དེ་ལ་ཆོས་ཀྱི་དོན་དེ་དང༌། དེ་སྟོན་པའི་སྒྲའི་དངོས་པོ་མེད་ཀྱང་སྟོན་པ་དང་ཉན་པར་སྣང་པ་དེ་སྒྱུ་མའི་སྐྱེས་བུ་དང་སྤྲུལ་པ་དེ་ལྟ་བུར་བསེ་རུ་ལྟ་བུའི་ཡེ་ཤེས་ལ་སྣང་བའི་ཚུལ་གྱིས་རྟོགས་སོ། །ཞེས་པ་ལས་ལུས་ཀྱིས་བསྟན་པར་མ་བཤད་པའི་ཕྱིར་ཟེར་ན་དཔྱད་པར་བྱའོ། །རང་རྒྱལ་གསུམ་ལས་བསེ་རུ་རང་རྒྱལ་གྱིས་བསྐལ་བ་བརྒྱར་ཚོགས་བསགས་པ་ལས་གཞན་གཉིས་ཀྱིས་བསྐལ་བ་བརྒྱར་ཚོགས་བསགས་མི་དགོས་པ་མི་རིགས་ཏེ། དེ་གསུམ་གས་བསྐལ་བ་བརྒྱར་ཚོགས་བསགས་དགོས་པའི་ཕྱིར། དེར་ཐལ། ཉ་ཊཱིཀ་ལས། དེ་གསུམ་ཅར་ཡང་བསྐལ་བ་བརྒྱར་ཚོགས་བསགས་དགོས་ཏེ། མདོ་དྲིན་ལན་བསབ་པར། རང་སངས་རྒྱས་རྣམས་ནི་བསྐལ་བ་ཆེན་པོ་བརྒྱས་ཚར་ཕྱིན་པར་འགྱུར་རོ། །ཞེས་ཏེ། བར་བསྐལ་བརྒྱད་བཅུ་ལ་བསྐལ་བ་ཆེན་པོར་མཛོད་དུ་བཤད་ལ། བསེ་རུ་བསྐལ་བ་བརྒྱ་ཡི་རྒྱུས། །ཞེས་སོ། །ཆོས་བཤེས་ཀྱིས་ཀྱང༌། སྔོན་ཞེས་བྱ་བ་ནི་བསྐལ་བ་བརྒྱའི་བར་དུ་སྟེ། ཞེས་སོ། །ས་སྡེའི་རང་སངས་རྒྱས་ཀྱི་སར། བསྐལ་བ་བརྒྱར་སངས་རྒྱས་འབྱུང་བ་མཉེས་པར་བྱེད་པ། ཞེས་དང༌། རང་སངས་རྒྱས་ཀྱི་ལམ་དང་པོ་བསྐལ་བ་བརྒྱ་ཚང་བར་ཚོགས་བསགས་ནས་བསྐལ་བ་བརྒྱ་འདས་པའི་འོག་ཏུ་སངས་རྒྱས་འབྱུང་བ་མེད་པ་ན་སློབ་དཔོན་མེད་པར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམས། རང་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཉོན་མོངས་པ་ཐམས་ཅད་སྤོང་བའི་དགྲ་བཅོམ་པ་ཉིད་མངོན་དུ་བྱེད་དོ། །ཞེས་ཏེ། གསུམ་ག་འདྲ་བར་བཤད་དོ། །ཞེས་གསུངས་པའི་ཕྱིར་ཟེར་ན་ཅུང་ཟད་བརྟག་པར་བྱ་བ་འདི་ཡོད་དེ། ཉ་ཊཱིཀ་དགེ་འདུན་ཉི་ཤུའི་སྐབས་སུ། འདི་སངས་རྒྱས་དང་མ་ཕྲད་ན་རང་རྒྱལ་དགྲ་བཅོམ་ཚོགས་སྤྱོད་དུ་འགྱུར་བར་སློབ་དཔོན་ཐོགས་མེད་ཀྱིས་དགོངས་འགྲེལ་འགྲེལ་བར་གསུངས་སོ། །ཞེས་དང༌། ཀུན་བཏུས་སུ། ཅིག་ཅར་ངེས་པར་འབྱིན་པ་ནི་གང་བདེན་པ་རྣམས་མངོན་པར་རྟོགས་པར་བྱས་ནས་མི་ལྕོགས་པ་མེད་པ་ལ་བརྟེན་ཏེ། འཇིག་རྟེན་ལས་འདས་པའི་ལམ་གྱིས་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་གཅིག་ཅར་སྤོང་སྟེ། འདི་ནི་རྒྱུན་དུ་ཞུགས་པའི་འབྲས་བུ་དང་དགྲ་བཅོམ་པའི་འབྲས་བུ་སྟེ་འབྲས་བུ་གཉིས་ལ་གདགས་སོ། །ཕལ་ཆེར་ནི་མཐོང་བའི་ཆོས་སམ། འཆི་བའི་ཚེ་ཀུན་ཤེས་པ་ཐོབ་པར་བྱེད་དོ། །གལ་ཏེ་མི་བྱེད་ན་ཡང་དེ་སྨོན་ལམ་གྱི་སྟོབས་ཅན་ཡིན་ཏེ། སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེས་ཏེ། སངས་རྒྱས་འབྱུང་བ་མེད་པ་ན་རང་རྒྱལ་ཚོགས་སྤྱོད་པར་འགྱུར་རོ། །ཞེས་སོགས་ཀྱིས་རྒྱུན་ཞུགས་སྲིད་པ་ལན་བདུན་པ་དང་ཅིག་ཆར་བ་སོགས་སྲིད་པ་ཐ་མའི་ཚེ་སློབ་དཔོན་གཞན་དང་མ་ཕྲད་ན་རང་རྒྱལ་གྱི་བྱང་ཆུབ་མངོན་དུ་བྱེད་པར་གསུངས་པ་དང་འགལ་བས་སོ་ཞེ་ན་དཔྱད།

བཅོ་ལྔ་པ་མཐོང་ལམ་གྱི་མཚན་ཉིད།མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ།དེ་དག་གི་སྤང་བྱའི་ཁྱད་པར།དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའི་ལན།

བཅོ་ལྔ་པ་མཐོང་ལམ་གྱི་མཚན་ཉིད།མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ།དེ་དག་གི་སྤང་བྱའི་ཁྱད་པར།དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའི་ལན།

མཐོང་ལམ་གྱི་མཚན་ཉིད། མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ། དེ་དག་གི་སྤང་བྱའི་ཁྱད་པར། དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའོ། །གཉིས་པ་ལན་ནི། བདེན་པ་མངོན་རྟོགས། མཐོང་ལམ་གྱི་མཚན་ཉིད། ཡང་ན་བདེན་པ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་ཡེ་ཤེས། མཐོང་ལམ་གྱི་མཚན་ཉིད། ཐེག་ཆེན་གྱི་བདེན་པ་མངོན་རྟོགས། ཐེག་ཆེན་མཐོང་ལམ་གྱི་མཚན་ཉིད། ཐེག་ཆེན་གྱི་བདེན་པ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་ཡེ་ཤེས། ཐེག་ཆེན་མཐོང་ལམ་གྱི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། མཚན་ཉིད་ནི་མྱ་ངན་ལས་འདས་པར་བགྲོད་པའི་གཞི་གང་ཞིག་དེ་ཁོ་ན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། །ཞེས་དང༌། རྒྱན་གྱི་ས་འགྲེལ་ལས། མཐོང་ལམ་གྱི་མཚན་ཉིད་ནི། ཆོས་མཆོག་རྫོགས་ནས་སྒོམ་ལམ་མ་སྐྱེས་པར་གྱི་དགེ་བ་གང་ཞིག མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་དང༌། ཉ་ཊཱིཀ་ལས། སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཅིར་ཡང་མི་དམིགས་པའི་ཏིང་ངེ་འཛིན་དང་མཚུངས་ལྡན་ཅན་གྱི་འཇིག་རྟེན་ལས་འདས་པའི་ཡེ་ཤེས་གང་ཞིག ཟག་མེད་ཀྱི་ལམ་གསུམ་གྱི་ཐོག་མར་གྱུར་པའོ། །དེ་ནས་དེ་ནི་འཇིག་རྟེན་ལས། །འདས་པའི་ཡེ་ཤེས་བླ་མེད་པ། །རྣམ་པར་མི་རྟོག་དྲི་མ་མེད། །འཛིན་པ་གཉིས་དང་བྲལ་བ་ཐོབ། །ཅེས་དང༌། ཀུན་བཏུས་སུ། མདོར་བསྡུ་ན་འཇིག་རྟེན་པའི་ཆོས་ཀྱི་མཆོག་གི་མཇུག་ཐོགས་སུ་མི་དམིགས་པའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པ་སྟེ། ཞེས་སོགས་བཤད་དོ། །གང་ཞིག་ཆོས་ཉིད་མཐོང་བ་དང་ཆོས་ཅན་མཐོང་བ་རིམ་བཞིན་ཇི་ལྟ་ཇི་སྙེད་མཁྱེན་པའི་བྱང་སེའི་མཐོང་ལམ་གྱི་མཚན་ཉིད་དོ། །ཞེས་གསུངས་པའི་ཕྱིར་རོ། །ཡང་ཐེག་ཆེན་མཐོང་ལམ་གྱི་མཚན་ཉིད་ལ། ཉ་ཊཱིཀ་ལས། མཚན། མཚོན། གཞི་གསུམ་ལས། དང་པོ་ནི། སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཅིར་ཡང་མི་དམིགས་པའི་ཏིང་ངེ་འཛིན་དང་མཚུངས་ལྡན་ཅན་གྱི་འཇིག་རྟེན་ལས་འདས་པའི་ཡེ་ཤེས་གང་ཞིག ཟག་མེད་ཀྱི་ལམ་གསུམ་གྱི་ཐོག་མར་གྱུར་པའོ། །ཞེས་གསུངས་པ་ལ། ཐེག་ཆེན་མཐོང་ལམ་ལ་སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཁྱབ་བར་ཐལ། མཚན་ཉིད་དེའི་ཕྱིར། འདོད་ན། ཐེག་ཆེན་སྦྱོར་ལམ་གྱི་རྒྱུར་གྱུར་བའི་ཐེག་ཆེན་མཐོང་ལམ་ཆོས་ཅན། དེར་ཐལ། དེའི་ཕྱིར། དེར་ཐལ།དེ་ཡོད་པའི་ཕྱིར་ཟེར་ན་དཔྱད། ཡང་མཐོང་ལམ་སྐྱེ་བའི་ལུས་རྟེན་ལ་འདོད་པ་ཁོ་ནས་ཁྱབ་པར་ཐལ། ཉ་ཊཱིཀ་ལས། འདོད་པའི་རྟེན་ཁོ་ན་ལ་དང་པོ་སྐྱེའོ། །ཞེས་གསུངས་པའི་ཕྱིར་ཟེར་ན་འདོད་མི་ནུས་ཏེ། ལྷའི་བུ་བློ་གྲོས་རབ་གནོན་གྱིས་ཞུས་པའི་མདོ་ལས།འདོད་པ་དང་གཟུགས་ན་སྤྱོད་པའི་ལྷའི་བུ་བྱེ་བ་ཕྲག་བརྒྱས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་ཐོབ་བོ། །ཞེས་གསུངས་པའི་ཕྱིར། ཁྱབ་སྟེ། ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་ཅེས་པ་མཐོང་ལམ་ཆོས་བཟོད་ཆོས་ཤེས་ལ་བཤད་དགོས་པའི་ཕྱིར། ཀུན་བཏུས་ལས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །ཞེས་དང༌། དེའི་ས་འགྲེལ་ལས། གདུལ་བྱ་མང་བོས་མཐོང་ལམ་ཐོབ་པའི་དུས་སུ་ཆོས་བདེན་པ་བཞི་བོ་རྣམས་ཀྱི་དེ་བཞིན་ཉིད་ལ་ལྟ་བའི་ཆོས་ཀྱི་མིག་འཕགས་པའི་ཤེས་རབ་ཀྱི་རང་བཞིན་ཉོན་མོངས་པའི་རྡུལ་མེད་ཅིང་གཟུང་འཛིན་གྱི་དྲི་མ་དང་བྲལ་བ་སྐྱེས་སོ་ཞེས་བཅོམ་ལྡན་འདས་ཀྱིས་གང་གསུངས་པ་དེ་ནི་མཐོང་བའི་ལམ་གྱི་ངེས་ཚིག་གི་དབང་དུ་མཛད་ནས་གསུངས་པ་སྟེ། ཆོས་ལ་བཟོད་པ་བཞི་བོ་རྣམས་ཀྱིས་ནི་མཐོང་སྤང་ཉོན་མོངས་པའི་སྒྲིབ་པ་སྤངས་པས་རྡུལ་མེད་པའོ། །ཆོས་ཤེས་པ་བཞི་བོ་རྣམས་ཀྱིས་ནི་སྤངས་པའི་གནས་གྱུར་ཉམས་སུ་མྱོང་བས་དྲི་མ་དང་བྲལ་བའོ། །ཡང་བཟོད་པ་བཞིས་བདེན་བཞིའི་ཆོས་ཉིད་མངོན་སུམ་དུ་ཡོངས་སུ་ཤེས་པ་དང༌། ཤེས་པ་བཞིས་རྣམ་གྲོལ་ཉམས་སུ་མྱོང་ཞིང་སྤང་བྱ་ཐག་བསྲིངས་ཏེ་སྤང་བས་ཀྱང་མཐོང་ལམ་རྣམ་པར་དག་པའི་ཕྱིར། རྡུལ་མེད་ཅིང་དྲི་མ་དང་བྲལ་བར་འགྱུར་རོ། །ཞེས་གསུངས་པའི་ཕྱིར་རོ། །ཡང་ཐེག་ཆེན་མཐོང་ལམ་གྱི་སེམས་བརྟེན་ལ་བསམ་གཏན་བཞི་བའི་དངོས་གཞིའི་ཁྱབ་པར་ཐལ། ཉ་ཊཱིཀ་ལས། འདིར་བསམ་གཏན་བཞི་བའི་རབ་མཐའ་ཞེས་པ་འདོད་པ་ནས་སྲིད་རྩེའི་བར་ཕྱིན་ནས་སྲིད་རྩེ་ནས་འདོད་པའི་བར་དུ་ལོག་སྟེ་ཡང་བསམ་གཏན་བཞི་བའི་བར་རྫོགས་པར་བྱས་པ་སྟེ་དེ་ལ་བརྟེན་ནོ་ཞེས་སོ། །ཞེས་གསུངས་པའི་ཕྱིར་ཟེར་ན། དེ་མི་འཐད་པར་ཐལ། དེའི་སེམས་རྟེན་ལ་བསམ་གཏན་ས་དྲུག་ཡོད་པའི་ཕྱིར་ཏེ། རྒྱུད་བླའི་འགྲེལ་བ་བཀའ་འཁོར་ལོ་ཐ་མའི་གསལ་བྱེད་ལས།སེམས་ཀྱི་རྟེན་ནི། ཚོགས་ལམ་ཐོས་བསམ་གཙོ་ཆེ་བས་འདོད་སེམས་ལ་བརྟེན་པ་གཙོ་ཆེ་ཞིང༌། སྦྱོར་མཐོང་གཉིས་ནི་སྒོམ་བྱུང་ཡིན་པས་བསམ་གཏན་དང་པོའི་ཉེར་བསྡོགས་དང་དངོས་གཞི་ཙམ་པོ་དང་དངོས་གཞི་ཁྱད་པར་ཅན་དང་བསམ་གཏན་ལྷག་མ་གསུམ་སྟེ་དྲུག་ལ་རྟེན་ནོ། །འདོད་སེམས་རྣམ་གཡེང་ཆེ་བ་དང་གཟུགས་མེད་ལྷག་མཐོང་ཆུང་བས་མི་རྟེན་ནོ། །སྒོམ་ལམ་ནི་བསམ་གཏན་ས་དྲུག་དང་གཟུགས་མེད་དང་པོ་གསུམ་ལ་རྟེན་གྱི། འདོད་པ་དང་སྲིད་རྩེ་ལ་མི་རྟེན་པར་འཕགས་པ་གྲོལ་སྡེ་བཞེད་པ་འཐད་པར་མངོན་ནོ། །རྟེན་འདི་དག་ནི་ཐེག་པ་གཉིས་ཀྱི་ལུགས་བསྡོམས་ནས་འཐད་པ་རྣམས་བཀོད་དོ། །ཞེས་གསུངས་པའི་ཕྱིར་རོ། །སྒྲ་བཤད་པ་ནི། བདེན་པ་སྔར་མ་མཐོང་གསར་དུ་མངོན་སུམ་དུ་མཐོང་བས་མཐོང༌། བྱང་ཆུབ་ཏུ་བགྲོད་པར་བྱེད་པས་ན་ལམ་མོ། །མ་མཐོང་མཐོང་ཕྱིར་མཐོང་བའི་ལམ། །ཞེས་མཛོད་ལས་སོ། །མཐོང་ལམ་སྐད་ཅིག་བཅུ་དྲུག་སྐྱེ་རིམ་ནི། ཉ་ཊཱིཀ་ལས། དེ་ལ་སྐད་ཅིག་བཅུ་དྲུག་ནི། ཆོས་མཆོག་གི་མཇུག་ཐོགས་སུ་སྡུག་བདེན་མངོན་སུམ་དུ་གྱུར་པའི་ཟག་མེད་ཀྱི་ཤེས་རབ་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་དེ་སྡུག་བསྔལ་ཆོས་བཟོད། དེའི་མཇུག་ཐོགས་སུ་སྡུག་བསྔལ་མཐོང་སྤང་གིས་རྣམ་གྲོལ་མངོན་དུ་བྱེད་པའི་ཟག་མེད་ཀྱི་ཡེ་ཤེས་ཆོས་ཤེས། དེའི་མཇུག་ཐོགས་སུ་དེ་གཉིས་འཕགས་ཆོས་རྣམས་ཀྱི་རྒྱུར་རྟོགས་པའི་ཟག་མེད་ཡེ་ཤེས་རྗེས་བཟོད།དེའི་མཇུག་ཐོགས་སུ་དེ་ངེས་པར་འཛིན་པ་རྗེས་ཤེས་ཏེ། བདེན་པ་གཞན་གསུམ་ལ་དེ་བཞིན་ནོ། །ཞེས་དང༌། ཀུན་བཏུས་ས་འགྲེལ་ལས། གཞུང་འདིའི་དགོངས་པས་ནི། སྐད་ཅིག་མ་བཅུ་དྲུག་རིམ་པ་བཞིན་བར་མ་ཆད་དུ་སྐྱེ་བར་གསལ་ཏེ། ཞེས་དང༌། རྒྱན་གྱི་ས་འགྲེལ་ལས། སྐད་ཅིག་མ་བཅུ་དྲུག་སྟན་ཐོག་གཅིག་ཏུ་མཉམ་བཞག་གི་རྒྱུན་གཅིག་ལ་རིམ་པ་བཞིན་བར་མ་ཆད་པར་སྐྱེ་སྟེ། ཞེས་དང༌། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ཅེས་གསུངས་པའི་ཕྱིར་རོ། །རང་ལུགས་ལ་མཐོང་ལམ་ཤེས་བཟོད་སྐད་ཅིག་བཅུ་དྲུག་རིམ་གྱིས་སྐྱེ་བར་འདོད་པ་ལ། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ལྡོག་ཆའི་སྒོ་ནས་སྐད་ཅིག་ཐ་དད་འདོད། །སྒོམ་སྤང་མི་སྤོང་བར་ཏུ་དེ་ཡིན་ཞིང༌། །ཞེས་པས་བརྟག་པར་བྱའོ། །ཡང་མཐོང་ལམ་སྐད་ཅིག་བཅུ་དྲུག་གིས་སྤང་བྱ་སྤོང་ཚུལ་ལ། གོང་དུ་དྲིས་ལན་དགུ་བའི་སྐབས་སུ་བཤད་ཟིན་པ་ལྟར་རོ། །ཡང་མཐོང་ལམ་ལ་རྗེས་ཐོབ་ཡེ་ཤེས་མེད་པར་ཐལ། མཐོང་ལམ་སྐད་ཅིག་བཅུ་དྲུག་རྫོགས་ནས་སྒོམ་ལམ་དུ་འཕོ་བ་ཡིན་པའི་ཕྱིར་ཏེ། ཀུན་བཏུས་ས་འགྲེལ་ལས། རང་རང་གི་བྱང་ཆུབ་ཏུ་སེམས་བསྐྱེད་ནས་དྲོད་མ་ཐོབ་ཀྱི་བར་དུ་ཚོགས་གཉིས་སོག་པ་ཚོགས་ཀྱི་ལམ་དང༌། དེ་བཞིན་དྲོད་ཐོབ་ནས་བདེན་བཞིའི་ཆོས་ཉིད་མངོན་སུམ་དུ་མ་མཐོང་བའི་བར་སྦྱོར་བའི་ལམ་དང༌། དེ་མཐོང་ནས་སྐད་ཅིག་རྣམས་ཡོངས་སུ་མ་རྫོགས་ཀྱི་བར་མཐོང་བའི་ལམ་དང༌། ཡོངས་སུ་རྫོགས་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྒོམ་པའི་ལམ་དང༌། རང་རང་གི་བསླབ་པ་ཡོངས་སུ་རྫོགས་པ་མཐར་ཕྱིན་པའི་ལམ་མོ། །ཞེས་གསུངས་པའི་ཕྱིར་ཟེར་ན་དེ་ཡང་བརྟག་དགོས་ཏེ། ཉ་ཊཱིཀ་ལས། བྱེ་བྲག་སྨྲ་བ། མཐོང་ལམ་ལ་རྗེས་ཐོབ་མེད་པར་འདོད་ཀྱང༌། ཐེག་པ་ཐུན་མོང་བའམ་ཆེན་པོ་ལྟར་ན། རྗེས་ཐོབ་ཡོད་པར་བཤད་དེ་གཞུང་དུ་སྟོན་ནོ། །འོ་ན་དུས་ཇི་ཙམ་ཞེ་ན། ངེས་པ་མེད་དེ། འཕགས་པ་ཀླུ་སྒྲུབ་ས་དང་པོ་བསྒྲུབས་ནས་བདེ་བ་ཅན་དུ་གཤེགས་པར་བཤད་པས་ལོ་མང་བོར་ཡང་བཞུགས་པའི་ཕྱིར་དང༌། མྱུར་བར་དེ་ལས་འདས་ནས་ས་གོང་མར་འཇུག་པའང་ཡོད་དེ། ཞེས་དང༌། རྩབར། དེར་གནས་གཟུགས་ལ་སོགས་པ་ལ། །སངས་རྒྱས་ཉིད་དུ་ངེས་འཛིན་དང༌། །ཞེས་པའི་ཀུན་འབྱུང་ཆོས་ཤེས་ཀྱི་སྐབས་སུ་ཉ་ཊཱིཀ་ལས། མདོར་ཤེར་ཕྱིན་འདི་དང་བྲལ་བར་མ་གྱུར་བ་ནི་དེ་པ་ཉིད་དུ་གཟུང་བར་བགྱིའོ། །ཞེས་སོགས་ཏེ། འདོད་གཟུགས་ཀྱི་ལྷས་ཡུམ་དང་མ་བྲལ་བའི་བྱང་སེའི་དེ་པར་འཛིན་པར་བཤད་དེ་དེ་ནི་ཕན་ཡོན་གྱི་རྣམ་པའོ། །གཞུང་ཚིག་ལྟར་ན་རྗེས་ཐོབ་ཀྱི་རྣམ་པར་འོང་ངོ༌། །ཞེས་གསུངས་པའི་ཕྱིར། ཡང་ཉ་ཊཱིཀ་ལས།ཨ་བྷ་ཡས། འཇིག་རྟེན་ལས་འདས་པའི་ཡེ་ཤེས་ཀྱི་རྗེས་ལ་ཐོབ་པ་རང་གི་རྟོགས་པ་གཅོད་པ། ཞེས་ཆོས་ཤེས་རྣམས་རྗེས་ཐོབ་ཏུ་བཤད་ཅིང༌། ཀུན་བཏུས་དང་མི་འགལ་ཏེ། ཆོས་བཟོད་རྟོགས་པའི་ཆ་ནས་རྗེས་ཐོབ་དང་སྡུག་བསྔལ་མཐོང་སྤང་སོགས་ཀྱི་རྣམ་པར་གྲོལ་བའི་དེ་བཞིན་ཉིད་དག་པ་རྟོགས་པའི་ཆ་ནས་མཚན་མ་མེད་པའི་རྣལ་འབྱོར་ཅན་དུ་གསུངས་པ་ཡིན་ནོ། །ཞེས་ཆོས་ཤེས་རྣམས་རྗེས་ཐོབ་ཏུ་བཤད་པ་ཀུན་བཏུས་དང་མི་འགལ་གསུངས་པའི་དགོངས་པ་ཚོལ་དགོས་སོ། །ཡང་མཐོང་ལམ་སྐད་ཅིག་བཅུ་དྲུག་གི་དམིགས་རྣམ་ལ། ཐེག་ཆེན་མཐོང་ལམ་ཤེས་བཟོད་སྐད་ཅིག་བཅུ་དྲུག་པོ་ཆོས་ཉིད་ལ་རྩེ་གཅིག་པའི་མཉམ་བཞག་ཐུན་གཅིག་པ་ཡིན་ཏེ། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ཅེས་དང༌། རྒྱན་གྱི་ས་འགྲེལ་ལས། སྐད་ཅིག་མ་བཅུ་དྲུག་སྟན་ཐོག་གཅིག་ཏུ་མཉམ་བཞག་གི་རྒྱུན་གཅིག་ལ་རིམ་པ་བཞིན་བར་མ་ཆད་པར་སྐྱེ་སྟེ། མདོ་ལས་ཀྱང༌། གང་བརྒྱད་པ་འབྲས་བུ་མ་ཐོབ་པར་ལྡང་བ་་འདི་ནི་གནས་མེད་དོ། །ཞེས་གསུངས་པའི་ཕྱིར་རོ། །དེ་མ་ཡིན་པར་ཐལ། རྗེས་བཟོད་དང་རྗེས་ཤེས་ཀྱིས་འཛིན་པ་རྟོགས་པ་ཡིན་པའི་ཕྱིར། དེར་ཐལ། ཀུན་བཏུས་ལས། དེ་ལ་ཆོས་ཤེས་པའི་བཟོད་པ་དང་ཆོས་ཤེས་པ་རྣམས་ཀྱིས་ནི་གཟུང་བ་རྟོགས་སོ། །རྗེས་སུ་རྟོགས་པའི་བཟོད་པ་དང་ཤེས་པ་རྣམས་ཀྱིས་ནི་འཛིན་པ་རྟོགས་སོ། །བཟོད་པ་དང་ཤེས་པ་ཐམས་ཅད་ལ་ཡང་མཚན་མ་མེད་པར་གནས་པའི་རྣལ་འབྱོར་ཅན་དུ་རིག་པར་བྱའོ། །སེམས་ཀྱི་སྐད་ཅིག་མ་བཅུ་དྲུག་པོ་འདི་དག་ནི་མཐོང་བའི་ལམ་མོ། །ཞེས་གསུངས་པའི་ཕྱིར་ཟེར་དེའི་ཚིག་ཟིན་ལ་དེ་ལྟར་ཡིན་ཀྱང་རྗེས་ཐོབ་ཀྱི་སྐབས་སུ་ངེས་ཤེས་འདྲེན་ཚུལ་གྱི་ཁྱད་ཡིན་པར་སྣང་སྟེ། ཉ་ཊཱིཀ་ལས། དེ་ལྟ་བུའི་ཆོས་ཉིད་བཞི་བོ་ནི་སྡུག་བསྔལ་གྱི་བདེན་པའི་རྣམ་པ་ཡིན་ཅིང༌། དེ་རྟོགས་བཞི་སྡུག་བདེན་གྱི་ཤེས་བཟོད་བཞི་དག་ཡིན་ནོ། །ཞེས་གསུངས་པའི་ཕྱིར་རོ། །ཡང་ཀུན་བཏུས་ས་འགྲེལ་ལས། དེས་རང་གི་ཡུལ་རྟོགས་ཚུལ་ནི། འཇིག་རྟེན་ལས་འདས་པའི་ལམ་གྱི་ཡུལ་ནི་དེ་བཞིན་ཉིད་དང་ཡང་དག་པའི་ཡེ་ཤེས་གཉིས་ཡིན་པས། སེམས་བཅུ་དྲུག་པོ་དེ་ལ་ཆོས་ཤེས་པའི་བཟོད་པ་བཞི་དང་ཆོས་ཤེས་པ་བཞི་བོ་རྣམས་ཀྱི་གཟུང་བ་གནས་གྱུར་པ་བདེན་པའི་ཆོས་ཉིད་དེ་བཞིན་ཉིད་མཐོང་སྤང་ལས་གྲོལ་བ་མངོན་སུམ་དུ་རྟོགས་སོ། །རྗེས་སུ་རྟོགས་པའི་བཟོད་པ་བཞི་དང་རྗེས་སུ་ཤེས་པ་བཞི་པོ་རྣམས་ཀྱིས་ནི་འཛིན་པ་གནས་གྱུར་པ་ཡང་དག་པའི་ཡེ་ཤེས་ཀྱི་གནས་ལུགས་རང་རིག་པའི་ཚུལ་གྱིས་ཇི་ལྟ་བ་རྟོགས་སོ། །དེ་དག་གཟུང་འཛིན་རང་བཞིན་མེད་པ་ལ་སྦྱོར་བ་ནི་མི་འཐད་དེ། ཐམས་ཅད་ཀྱིས་དེ་ལྟར་རྟོགས་པའི་ཕྱིར་རོ། །གནས་གྱུར་པའི་གཟུང་འཛིན་རྟོགས་ཀྱང་མཚན་འཛིན་དུ་མི་འགྱུར་ཏེ། བཟོད་པ་དང་ཤེས་པའི་ཡེ་ཤེས་བཅུ་དྲུག་པོ་ཐམས་ཅད་ལ་ཡང་གཟུགས་སོགས་སྤྲོས་པའི་མཚན་མ་ཐམས་ཅད་མི་དམིགས་པས། དེ་དག་ལ་གནས་པའི་གང་ཟག་ནི་མཚན་མ་མེད་པར་གནས་པའི་རྣལ་འབྱོར་ཅན་དུ་རིག་པར་བྱའོ། །ཞེས་གསུངས་པ་ལ་ཞིབ་ཏུ་དཔྱད་པར་བྱའོ། །

བཅུ་དྲུག་པ་ཐེག་ཆེན་སྒོམ་ལམ་བྱེད་པའི་མཚན་ཉིད།ས་མཚམས།དབྱེ་བ་གང་ཡིན་ཞེས་པའི་ལན།

བཅུ་དྲུག་པ་ཐེག་ཆེན་སྒོམ་ལམ་བྱེད་པའི་མཚན་ཉིད།ས་མཚམས།དབྱེ་བ་གང་ཡིན་ཞེས་པའི་ལན།

ཐེག་ཆེན་སྒོམ་ལམ་བྱེད་པའི་མཚན་ཉིད། ས་མཚམས། དབྱེ་བ་གང་ཡིན་ཞེས་པའོ། །གཉིས་པ་ལན་ནི། ཐེག་ཆེན་སྒོམ་ལམ་བློའི་ངོ་བོར་བསྐྱེད་ནས་བསྒོམ་སྟོབས་ཀྱིས་ཐོབ་པའི་འབྲས་བུ་ཁྱད་པར་བ། སྒོམ་ལམ་གྱི་བྱེད་པའི་མཚན་ཉིད་ཡིན་ཏེ། ཉ་ཊཱིཀ་ལས། སྒོམ་ལམ་གྱི་བྱེད་པའི་མཚན་ཉིད་ནི། སྒོམ་ལམ་གྱི་འབྲས་བུ་ཁྱད་པར་བ་སྟེ་བྱ་བ་དེ་བྱེད་པ་ལ་བྱེད་པ་ཞེས་བཞག་གོ ། ཡང་ན་སེམས་དུལ་བ་ལ་སོགས་པའི་འབྲས་བུ་ཁྱད་པར་བ་བྱེད་པའོ། །ཞེས་དང༌། ཕར་ཕྱིན་བསྡུས་དོན་ལས། སྒོམ་ལམ་བྱེད་པའི་མཚན་ཉིད། རང་རྒྱུ་སྒོམ་ལམ་ལས་བྱུང་ཞིང་བྱང་སེམས་སྒོམ་ལམ་པའི་ཉོན་མོངས་པ་སེལ་ཞིང༌། ཡོན་ཏན་སྒྲུབ་པ། དབྱེ་ན་དྲུག ས་མཚམས་ས་གཉིས་པ་ནས་སངས་རྒྱས་ཀྱི་བར་ན་ཡོད་དོ། །ཞེས་གསུངས་པའི་ཕྱིར་རོ། །ས་མཚམས་ནི། སྒོམ་ལམ་ཐོབ་པའི་སྐད་ཅིག་གཉིས་པ་ནས་སངས་རྒྱས་ཀྱི་སའི་བར་ཏུ་ཡོད་དོ། །དབྱེ་བ་ནི་དྲུག་སྟེ། མདོ་ལས། ཤེར་ཕྱིན་ནི་བྱང་ཆུབ་སེམས་དཔའ་རྣམས་ཡོངས་སུ་དུལ་བ་དང༌། ང་རྒྱལ་མེད་པའི་དོན་དུ་ཉེ་བར་གནས་པ་ཤེར་ཕྱིན་བསྒོམས་པས་རང་བཞིན་གྱི་འདོད་ཆགས་ལ་སོགས་པའི་ཉོན་མོངས་པ་བཅོམ་པ་དང༌། དུག་དང་བྱད་དང་མེ་ལ་སོགས་པས་མི་གནོད་པ་དང༌། བླ་ན་མེད་པའི་བྱང་ཆུབ་འཐོབ་པ་དང༌། ཤེར་ཕྱིན་གྱི་སྙིང་པོ་རྡོ་རྗེ་གདན་གྱི་ས་ཕྱོགས་མཆོད་རྟེན་དུ་བྱས་ཞེས་སྒོམ་ལམ་གྱིས་ཤེར་ཕྱིན་སྒོམ་པས་༡བྱང་ཆུབ་སེམས་དཔའ་ཀུ༷ན་ན༷ས་ཞི༷་ཞིང་དུལ་བ་ད༷ང༌། ༢ཐ༷མས་ཅ༷ད་དུ་གཞན་ལ༷་འདུ༷ད་ཅིང་ང་རྒྱལ་དང་རློམ་སེམས་མེད་པ་ད༷ང༌། ༣ཆགས་སོགས་ཉོ༷ན་མོ༷ངས་ལ༷ས་རྒྱ༷ལ་བ་ད༷ང༌། ༤དུག་དང་མཚོན་ལ་སོགས་པའི་གནོ༷ད་པ༷ས་རྫི༷་བ༷་མེ༷ད་པ་ཉི༷ད་ད༷ང༌། ༥བྱ༷ང་ཆུ༷བ་འཐོབ་པར་བྱེད་པ་ད༷ང༌། ༦ཤེར་ཕྱིན་སྒོམ་པའི་ལམ་ཡོངས་སུ་རྫོགས་པའི་ཚེ་སྙིང་པོ་རྡོ་རྗེ་གདན་དུ་བཞུགས་ནས་མངོན་པར་རྫོགས་པར་སངས་རྒྱས་པའི་ས་ཕྱོགས་དེ་སེམས་ཅན་ཐམས་ཅད་ཀྱི་མཆོ༷ད་རྟེ༷ན་ཉི༷ད་དུ་བྱས་པས་མེ་ཏོག་ལ་སོགས་པས་མཆོད་པར་གྱུར་བའི་ཡོན་ཏན་་དང་དྲུག་གོ ། ཁ་ཅིག་ཐེག་ཆེན་སྒོམ་ལམ་སྒོམ་སྟོབས་གྱིས་ཐོབ་པའི་ཡོན་ཏན་དེ། ཐེག་ཆེན་སྒོམ་ལམ་བྱེད་པའི་མཚན་ཉིད་ཡིན་ཟེར་ན། ལམ་མ་ཞུགས་དང་ཚོགས་སྦྱོར་གྱིས་ཐེག་ཆེན་སྒོམ་ལམ་སྒོམ་སྟོབས་ཀྱིས་ཐོབ་པའི་ཡོན་ཏན་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དེ་སྒོམ་ལམ་མ་ཐོབ་པའི་སྔ་རོལ་ནས་ཡོད་པའི་ཕྱིར། ཡང་ཉ་ཊཱིཀ་ལས།དེ་བཞི་བྲལ་འབྲས་སོ། །ཆོས་ཅན། ཡང་དག་རྫོགས་པའི་བྱང་ཆུབ་སྒྲུབ་པ་སྟེ་ཐོབ་པར་འགྱུར་ཏེ། ཐེག་ཆེན་གྱི་ཚོགས་གཉིས་རྫོགས་པའི་འཕགས་པ་སློབ་པ་ཡིན་པས་སོ། །བླ་མེད་རྫོགས་བྱང་ཐོབ་ནས་སེམས་ཅན་ཐམས་ཅད་ཀྱི་སེམས་ལ་བལྟ་བར་འགྱུར་རོ། །ཞེས་སོགས་སོ། །དེ་རྣམ་སྨིན་གྱི་འབྲས་བུའོ། །ཞེས་བྱེད་པ་དྲུག་ལས་དང་པོ་བཞི་བྲལ་འབྲས་དང༌། ལྔ་བ་རྣམ་སྨིན་གྱི་འབྲས་བུ་ཡིན་ཚུལ་ལ་ཅུང་ཟད་དཔྱད། ཡང་ཉ་ཊཱིཀ་ལས། ཆོས་ཅན། ཁྱེད་བརྟེན་ཅིང་བཞུགས་པའི་ཡུལ་ཏེ་ས་ཕྱོགས་ལྷ་མི་སོགས་ཀྱིས་མཆོད་པར་བྱ་བའི་རྟེན་ཉིད་དུ་བྱེད་པར་རིགས་ཏེ། ཐེག་ཆེན་གྱི་ཟག་མེད་སྒོམ་ལམ་ཐོབ་པས་སོ། །ཁ་ཅིག་མཆོད་རྟེན་དང་འདྲ་བས་མཆོད་རྟེན་དུ་བརྗོད་ཅེས་པ་མི་རིགས་ཤིང༌། མཆོད་རྟེན་ཉིད་དུ་གྱུར་ཅེས་བཙུན་པ་ཟླ་བ་འཆད་དོ། །ཞེས་འགྲེལ་ཆེན་ནོ། །ཞེས་པ་ལ་དེ་འདྲའི་ས་ཕྱོགས་ཡིན་ན་མཆོད་རྟེན་ཡིན་པས་ཁྱབ་པ་ཡོད་མེད་དང་ས་ཕྱོགས་ཡིན་ན་དེ་ཡིན་པས་ཁྱབ་པ་ཡོད་མེད་ཀྱི་ཚིག་གི་རོལ་རྩེད་སྤྲོ་བར་བྱའོ། །

བཅུ་བདུན་པ་ཟག་བཅས་སྒོམ་ལམ་དང་ཟག་མེད་སྒོམ་ལམ་གྱི་ཁྱད་པར་གང་ཡིན་ཞེས་པ།

བཅུ་བདུན་པ་ཟག་བཅས་སྒོམ་ལམ་དང་ཟག་མེད་སྒོམ་ལམ་གྱི་ཁྱད་པར་གང་ཡིན་ཞེས་པའི་ལན།

ཟག་བཅས་སྒོམ་ལམ་དང་ཟག་མེད་སྒོམ་ལམ་གྱི་ཁྱད་པར་གང་ཡིན་ཞེས་པའོ། །གཉིས་པ་ལན་ནི། སྐབས་འདྀའི་ཟག་བཅས་སྒོམ་ལམ་དང་ཟག་མེད་སྒོམ་ལམ་གྱི་དོན་རིམ་བཞིན་གཟུང་འཛིན་དུ་སྣང་བའི་རྟོག་པར་གྱུར་བའི་སྒོམ་ལམ་དང་དེ་འདྲའི་རྟོག་པ་མ་ཡིན་པའི་སྒོམ་ལམ་དེ་ཡིན་ཏེ། ཉ་ཊཱིཀ་ལས། གཟུང་འཛིན་དུ་སྣང་བའི་རྟོག་པའི་ཟག་བཅས་དང་དེ་མེད་པ་ཟག་པ་མེད་པའི་བྱེ་བྲག་གིས་རྣམ་པ་གཉིས་སོ། །ཞེས་གསུངས་པའི་ཕྱིར་རོ། །ཁ་ཅིག་མོས་པ་སྒོམ་ལམ་དང་སྔོ་བ་སྒོམ་ལམ་རྗེས་སུ་ཡི་རང་སྒོམ་ལམ་གསུམ་ལ་སྒོམ་ལམ་ཟག་བཅས་དགོས་པར་ཐལ། ཉ་ཊཱིཀ་ལས། དགེ་བ་གསོག་བྱེད་ཀྱི་ཐེག་ཆེན་སྒོམ་ལམ་མོས་པའི་མཚན་ཉིད། འཕགས་པའི་སྒོམ་ལམ་ཟག་བཅས་གང་ཞིག་ཡུམ་ཤེར་ཕྱིན་ཡོན་ཏན་ཅན་ལ་ཡོན་ཏན་ཅན་དུ་ངེས་ནས་འཛིན་པ་སྟེ། ཞེས་སོགས་ཀྱིས་མོས་བསྔོ་སོགས་ཀྱི་མཚན་ཉིད་ཀྱི་ཟུར་ལ་སྒོམ་ལམ་ཟག་བཅས་ཞེས་བཤད་པའི་ཕྱིར་ཟེར་ན། དེ་དག་ལ་ཟག་བཅས་དགོས་པ་མི་རིགས་ཏེ། མདོ་ལུགས་མ་ལས། མོས་བསྔོ་དང་རྗེས་སུ་ཡི་རང་འདི་དག་ཟག་བཅས་སུ་འཆད་པ་ནི་མདོ་དང་འགལ་ཞིང་ཟག་བཅས་བཏགས་པ་པར་བཤད་པ་ལ་ཡང་དགོས་པ་མེད་དོ། །མདོ་ལས་མོས་སོགས་འདི་དག་ཟག་པ་མེད་པ་དང༌། མཚན་མ་མེད་པ་དང༌། དམིགས་པ་མེད་པ་དང༌། ཁམས་གསུམ་ལས་འདས་པར་གསུངས་པའི་ཕྱིར་རོ། །ཞེས་དང༌། ཉ་ཊཱིཀ་སྐབས་བཞི་བ་ལས། སྤྱིར་འཕགས་སེང་གཉིས་ཀྱིས་འཕགས་པའི་རྗེས་ཐོབ་དག་པ་འཇིག་རྟེན་པའི་ཡེ་ཤེས་ཟག་བཅས་སུ་བཤད་པའི་བརྡ་ཆད་མ་ལེགས་སོ། །ཞེས་གསུངས་པའི་ཕྱིར་ཟེར་ན། དེ་དག་གི་མཚན་ཉིད་ཀྱི་ཟུར་གྱི་ཟག་བཅས་དང་སྤྱིར་ཟག་བཅས་འདྲ་བ་ཡིན་མིན་དང༌། དེ་དག་ལ་གཟུང་འཛིན་དུ་སྣང་བའི་རྟོག་པའི་ཁྱབ་པ་ཡོད་མེད་དང༌། དེ་དག་མཉམ་བཞག་ན་ཡོད་མེད་དང༌། མོས་པ་སྒོམ་ལམ་གྱི་ཡུལ་ལ་ཡུམ་གྱི་ཁྱབ་པ་ཡོད་མེད་རྣམས་ལེགས་པར་དཔྱད་པར་བྱའོ། །སྤྱིར་ཟག་བཅས་ནི། ཀུན་བཏུས་སུ། ཟག་པ་དེའི་བདག་ཉིད་དང༌། ཟག་པ་དང་འབྲེལ་བ་དང༌། ཟག་པས་བཅིངས་པ་དང༌། ཟག་པའི་རྗེས་སུ་འབྲེལ་བ་དང༌། ཟག་པའི་རྗེས་སུ་མཐུན་པ་དང༌། ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་པའི་དོན་ནི། ཀུན་བཏུས་ས་འགྲེལ་ལས། ཇི་ལྟར་དུ་ཞིག་ཅིའི་ཕྱིར་སྤང་བྱ་ཟག་པ་དང་བཅས་བར་བརྟག་ཅེ་ན། མཛོད་ལས། ལམ་མ་གཏོགས་པའི་འདུས་བྱས་རྣམས། །ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། །ཞེས་གང་ལ་དམིགས་ནས་ཟག་པ་རྒྱས་པར་འགྱུར་བས་ཟག་བཅས་སུ་འཇོག་མོད། འདིར་ནི་ཟག་པ་དང་སྒོ་དྲུག་གིས་འབྲེལ་བས་ཟག་བཅས་ཏེ། དེའང་ཉོན་མོངས་པ་དང་ཉེ་བའི་ཉོན་མོངས་པ་རྣམས་ནི་ཟག་པ་དེའི་བདག་ཉིད་དམ། རང་བཞིན་ཡིན་པས་ཟག་པ་དང་བཅས་པར་བལྟའོ། །ཞེས་པ་དང༌། དེ་བཞིན་དུ་སྦྱར་ཏེ། ཉོན་མོངས་པ་དང་མཚུངས་པར་ལྡན་པའི་སེམས་སེམས་བྱུང་དང༌། དེ་དག་གི་གནས་མིག་ལ་སོགས་པ་ནི་ཟག་པ་དང་འབྲེལ་བ་དང༌། དགེ་བ་ཟག་བཅས་དེ་རྣམས་ཀྱང་ཡང་སྲིད་འགྲུབ་བྱེད་དུ་གྱུར་པའི་ཆ་ནས་ཟག་པས་བཅིངས་པ་དང༌། ས་གཞན་གྱི་ཀུན་གཞི་ལའང་ས་གཞན་གྱི་ཉོན་མོངས་པའི་གནས་ངན་ལེན་ལྡན་པ་ཟག་པའི་རྗེས་སུ་འབྲེལ་བ་དང༌། ངེས་འབྱེད་ཆ་མཐུན་ནི་ཉོན་མོངས་པའི་ས་བོན་དང་ལྡན་ཡང༌། སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག་ལ། དེ་ལས་གཞན་པའི་ཉོན་མོངས་པའི་ས་བོན་ཐམས་ཅད་དམ། ཡང་ལམ་ལས་གཞན་པའི་འདུས་བྱས་ཐམས་ཅད་ཉོན་མོངས་པ་འཕེལ་བའི་རྐྱེན་བྱེད་པས་ཟག་པའི་རྗེས་སུ་མཐུན་པ་དང༌། སོ་སོའི་སྐྱེ་བོ་དང་འཕགས་པ་སློབ་པའི་ཕུང་པོ་ཟག་པའི་རྒྱུ་ལས་བྱུང་བར་མ་ཟད། དགྲ་བཅོམ་པའི་ཕུང་པོའང་སྔར་གྱི་ཉོན་མོངས་ཀྱིས་འཕངས་ཤིང་མཚམས་སྦྱོར་བའི་རྒྱུ་ཡིན་པས་ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་དང༌། མཛོད་དུ། །ལམ་མ་གཏོགས་པའི་འདུས་བྱས་རྣམས། །ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར།ཞེས་དམིགས་པའམ་མཚུངས་ལྡན་ཅི་རིགས་པའི་སྒོ་ནས་ཟག་པ་རྒྱས་སུ་རུང་བ་ལ་ཟག་བཅས་སུ་བཤད་དོ། །ཟག་མེད་ནི། ཀུན་བཏུས་ས་འགྲེལ་ལས། ཇི་ལྟར་དུ་ཞིག་ཅིའི་ཕྱིར་གཉེན་པོ་ཟག་པ་མེད་པར་བརྟག་ཅེ་ན། ཟག་མེད་ལམ་གྱི་བདེན་པ་དང༌། འདུས་མ་བྱས་རྣམ་གསུམ། ཞེས་པ་ལྟར། སྤང་བྱ་ཟག་པ་དང་བཅས་པ་ལས་ལྡོག་པ། ཟག་པའི་སྒོ་དྲུག་དང་མ་འབྲེལ་པ་ནི་ཟག་པ་མེད་པར་བལྟའོ། །ཞེས་གསུངས་སོ། །ཡང་ཟག་བཅས་ཟག་མེད་ཀྱི་སྐབས་སུ་ཀུན་བཏུས་ས་འགྲེལ་ལས། ངེས་འབྱེད་ཆ་མཐུན་ནི་ཉོན་མོངས་པའི་ས་བོན་དང་ལྡན་ཡང༌། སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག་ལ། ཞེས་དང༌། ལམ་བདེན་གྱི་མཚན་ཉིད། ཟག་མེད་འདུས་བྱས་གང་ཞིག་འགོག་བདེན་གྱི་བྲལ་རྒྱུ་ཡིན་པའོ། །ཞེས་ངེས་འབྱེད་ཆ་མཐུན་ཟག་མེད་དུ་བཤད་པ་ལ་བརྟག་པར་བྱ་བ་འདི་ཡོད་དེ། ཀུན་བཏུས་ས་འགྲེལ་ལས། སྔར་ངེས་འབྱེད་ཆ་མཐུན་ཟག་མེད་དང་རྗེས་སུ་ཐུན་པས་ཟག་མེད་དུ་བཤད་ཀྱང་འདིར་ནི་ཟག་པའི་ས་བོན་རྗེས་སུ་འབྲེལ་བའི་ཆ་ནས་ཟག་བཅས་སུ་བསྡུའོ། །ཞེས་གསུངས་པས་སོ། །

བཅོ་བརྒྱད་པ་མོས་བསྔོ་ཡི་རང་གི་སྒོམ་ལམ་གསུམ་གྱི་ཁྱད་པར་ཇི་ལྟར་ཡིན་ཞེས་པའི་ལན།

བཅོ་བརྒྱད་པ་མོས་བསྔོ་ཡི་རང་གི་སྒོམ་ལམ་གསུམ་གྱི་ཁྱད་པར་ཇི་ལྟར་ཡིན་ཞེས་པའི་ལན།

མོས་བསྔོ་ཡི་རང་གི་སྒོམ་ལམ་གསུམ་གྱི་ཁྱད་པར་ཇི་ལྟར་ཡིན་ཞེས་པའོ། །གཉིས་པ་ལན་ནི། ཡུམ་ཤེར་ཕྱིན་སོགས་ཡོན་ཏན་ཅན་དུ་ངེས་ཟིན་པའི་ཆོས་ལ་དམིགས་ནས་དེ་ཁོ་ན་ལྟར་ཡིན་པར་འཛིན་པའི་ཐེག་ཆེན་སྒོམ་ལམ་དེ། ཐེག་ཆེན་མོས་པ་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། དགེ་བ་གསོག་བྱེད་ཀྱི་ཐེག་ཆེན་སྒོམ་ལམ་མོས་པའི་མཚན་ཉིད། འཕགས་པའི་སྒོམ་ལམ་ཟག་བཅས་གང་ཞིག་ཡུམ་ཤེར་ཕྱིན་ཡོན་ཏན་ཅན་ལ་ཡོན་ཏན་ཅན་དུ་ངེས་ནས་འཛིན་པ་སྟེ། ཞེས་དང༌། ངོ་བོ་ནི། ཟག་བཅས་ཀྱི་སྒོམ་ལམ་གང་ཞིག་ཡུམ་ཡོན་ཏན་ཅན་དུ་ངེས་པར་བྱས་པའི་དངོས་པོ་ལ་དེ་ཁོ་ན་ལྟར་ངེས་པར་འཛིན་པའོ། །ཞེས་གསུངས་པའི་ཕྱིར་རོ། །ཡུལ་ངེས་ལྔའི་མོས་པ་ནི། ཀུན་བཏུས་ས་འགྲེལ་ལས། མོས་པ་གང་ཞེ་ན། ཐེ་ཚོམ་ཅན་ལ་མོས་པ་མེད་པས། དམིགས་ཡུལ་ལུང་དང་རིགས་པས་དཔྱད་ན་ཐེ་ཚོམ་མེད་པས་ངེས་པའི་དངོས་པོ་ལ་དམིགས་ནས། རྣམ་པ་སྟོང་ཉིད་དང་བདག་མེད་ལ་སོགས་པ་འདི་ནི་འདི་ཁོ་ན་བཞིན་ཡིན་གྱི་གཞན་དུ་ནི་མ་ཡིན་ནོ་ཞེས་ཇི་ལྟར་ངེས་པ་བཞིན་མཐའ་གཅིག་ཏུ་འཛིན་པ་སྟེ། དེ་གཅེས་སུ་བྱེད་པ་ནི་རང་གི་གྲུབ་མཐའ་ལས་མི་འཕྲོགས་ཤིང་ཕས་རྒོལ་གྱིས་གཞན་དུ་དྲང་བར་མི་ནུས་པ་ཉིད་ཀྱི་ལས་ཅན་ནོ། །ཞེས་གསུངས་པའི་ཕྱིར་རོ། །ཡང་ཉ་ཊཱིཀ་ལས། རྩ་བ་ལ། ཤེར་པ་ལ་མོས་པའི་གནས་སྐབས་རང་དོན་མོས་པ་དགུ་བོ་རྣམས་ལ་བསྟོད་པ་ཙམ་དགུ། གཉིས་དོན་མོས་པ་དགུ་ལ་བཀུར་བ་ཙམ་དགུ། གཞན་དོན་མོས་པ་དགུ་ལ་བསྔགས་པ་ཙམ་དགུ་སྟེ་དགུ་ཚན་གསུམ་གྱིས་བསྟོད་བཀུར་བསྔགས་པ་བྱས་པར་མདོ་ལས་འདོད་དེ་བཤད་དོ། །ཞེས་བསྟོད་པ་རང་དོན་གནས་སྐབས་དང་བཀུར་བ་གཉིས་དོན་མོས་པའི་གནས་སྐབས་དང་བསྔགས་པ་གཞན་དོན་གནས་སྐབས་ལ་བཞག་པ་མི་འཐད་པར་ཐལ། རད་ཀིར་གྱིས་བསྟོད་པ་ཆུང་འབྲིང་ཆེ་གསུམ་ལ་བསྟོད་བཀུར་བསྔགས་གསུམ་བཞག་པ་དེའི་སྒོ་ནས་ཉ་ཊཱིཀ་ལས་བཅོམ་རལ་སོགས་ཀྱི་འདོད་པ་དགག་ཚུལ་ཡོད་པའི་ཕྱིར་ཏེ། ཉ་ཊཱིཀ་ལས།བསྟོད་བཀུར་བསྔགས་གསུམ་རྟོག་པ་ཡིན་གྱི་སྒྲ་ཡིན་པ་མི་སྲིད་ཅེས་བཅོམ་རལ་སོགས་འཆད་དོ། །དེའི་དགོངས་པ་དེ་མིན་ཏེ་སྒྲར་གཏོགས་པ་ཞེས་པ་བརྗོད་བྱ་དོན་ལ་མེད་པའི་སྒྲ་ཙམ་དུ་འགྱུར་ཞེས་པར་དགོངས་སོ། །དེས་ན་ཡོན་ཏན་ཇི་ལྟ་བ་བཞིན་རྟོགས་ནས་སྟོན་པའི་ངག་ཚིག་གི་རིག་བྱེད་ཡང་བསྟོད་བཀུར་སོགས་ཡིན་ཏེ། ཨཱརྱས་ལེགས་སོ་ལེགས་སོ་ཞེས་བསྔགས་པ་བརྗོད་པས་བསྔགས་པའི་དོན་གསལ་བར་བྱེད་དོ། །ཞེས་དང༌། རད་ཀིར་གྱིས། བསྟོད་པ་ནི་བསྟོད་པ་ཙམ་མོ། །བཀུར་བ་ནི་འབྲིང་དུ་བསྟོད་པའོ། །བསྔགས་པ་ནི་ཆེར་བསྟོད་པའོ། །ཞེས་དང༌། གསེར་གྱིས་ཡང་ཆུང་འབྲིང་ཆེན་པོ་བཤད་དོ། །སངས་རྒྱས་ཐུགས་དགེས་པ་ཁོ་ན་བསྟོད་སོགས་ཡིན་ན་བསྟོད་སོགས་ལ་ཆུང་འབྲིང་ཆེན་པོ་མི་འཐད་དེ། སངས་རྒྱས་ཐུགས་དགེས་པའི་རྟོགས་པ་ལ་ཆེ་ཆུང་སོགས་མེད་པའི་ཕྱིར། ཞེས་གསུངས་པའི་ཕྱིར་རོ། །ཐེག་ཆེན་བསྔོ་བ་སྒོམ་ལམ་གྱི་ཁྱད་པར་ལ། དགེ་རྩ་གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་ཕྱིར་དུ་སྟོབ་པའི་ཐེག་ཆེན་སྒོམ་ལམ་དེ། ཐེག་ཆེན་བསྔོ་བ་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། དགེ་བ་མི་ཟད་པར་བྱེད་པའི་ཐེག་ཆེན་འཕགས་པའི་སྒོམ་ལམ་བསྔོ་བ་ཡིད་ལ་བྱེད་པའི་མཚན་ཉིད། ཟུར་དང་བོ་འདྲ། དགེ་བ་རྣམས་གཞན་དོན་དུ་རྫོགས་པའི་སངས་རྒྱས་ཀྱི་རྒྱུར་སྟོབ་པའོ། །ཞེས་གསུངས་པས་སོ། །ཡང་མདོ་ལུགས་མ་ལས། བསྔོ་བ་དེ་ནི་དམིགས་པ་མེད་པའི་རྣམ་པ་ཅན་ནོ། །ཞེས་པ་ལྟར་ན་དོན་དམ་བདེན་པའི་རྣམ་པ་ཅན་ཡིན་དགོས་སམ་དཔྱད། ཡང་ཉ་ཊཱིཀ་ལས། ཆོས་རྗེ་བུ་རིན་ནི། ཆོས་དབྱིངས་སོགས་འདུས་བྱས་མ་བྱས་ཀྱི་དགེ་བ་ཐམས་ཅད་བསྔོ་རྒྱུ་ཡིན་གསུངས་ལ། མཁས་པ་ཆེན་པོ་བཅོམ་རལ་དང་ཆོས་རྗེ་ཀུན་མཁྱེན་ཆེན་པོ་ནི། ཆོས་དབྱིངས་སོགས་བསྔོ་རྒྱུ་མིན་ཞེས་དང༌། ཁྱད་པར་དུ་ཆོས་རྗེ་ཀུན་མཁྱེན་ཆེན་པོ་ནི། ཆོས་དབྱིངས་ནི་བསྔོ་ས་ཡིན་གསུངས་པས་གང་མོས་པ་ལྟར་བྱའོ། །ཞེས་དང༌།ཕུང་པོ་གསུམ་པའི་རྒྱུན་བཤགས་ཀྱི་འགྲེལ་བ་ལས། དེ་ཉིད་ཀྱི་ཡུལ་དུ་དམིགས་པའི་ཆོས་དབྱིངས་དེ་ཡང་སྤྱི་ལྡོག་ནས་བསྔོ་བར་བྱ་བ་ནི་ཡིན་ཏེ། དགེ་བ་ཐམས་ཅད་ཆོས་ཀྱི་དབྱིངས་སུ་རོ་གཅིག་པར་དམིགས་ནས་གནས་ལུགས་མཐར་ཐུག་པའི་ཆོས་ཀྱི་སྐུར་སྨོན་པར་བྱེད་དགོས་པའི་ཕྱིར་རོ། །ཆོས་དབྱིངས་བསྔོ་རྒྱུར་བྱས་ན་དེ་ལ་མཚན་མར་བལྟ་བར་འགྱུར་སྙམ་ན། བསྔོ་བ་ནི་ཀུན་རྫོབ་ལ་བརྟེན་ནས་བཞག་དགོས་པ་བསོད་ནམས་བསྔོ་བྱར་བྱེད་པ་དང་ཁྱད་པར་མེད་པས་མཚན་ལྟར་མི་འགྲོའོ། །ཆོས་དབྱིངས་བསྔོ་བྱར་བྱེད་པ་ཡང་ཀུན་རྫོབ་ཀྱི་བློ་ངོར་ཡིན་ལ། དོན་དམ་པར་ནི་བསྔོ་བ་ཉིད་ཀྱང་མ་གྲུབ་ན། ཆོས་དབྱིངས་བསྔོ་བྱ་ཡིན་མིན་གྱི་དཔྱད་པ་མི་འཇུག་གོ ། ཞེས་སོགས་ཀྱིས་ཆོས་དབྱིངས་བསྔོ་རྒྱུ་ཡིན་མིན་དཔྱད་པར་བྱའོ། །རྗེས་སུ་ཡི་རང་སྒོམ་ལམ་གྱི་ཁྱད་པར་ལ། རང་གཞན་དེ་དགེ་རྩ་ཅི་རིགས་ལ་རབ་ཏུ་དགའ་བ་ཡིད་ལ་བྱེད་པའི་ཐེག་ཆེན་སྒོམ་ལམ་དེ། ཐེག་ཆེན་རྗེས་སུ་ཡི་རང་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་པ་དགེ་བ་འཕེལ་བྱེད་ཐེག་ཆེན་འཕགས་པའི་སྒོམ་ལམ་རྗེས་སུ་ཡི་རང་བ་ཡིད་ལ་བྱེད་པ་བླ་མེད་ཀྱི་མཚན་ཉིད། དང་བོ་འདྲ། རང་གཞན་གྱི་དགེ་རྩ་ལ་རབ་ཏུ་དགའ་བ་ཡིད་ལ་བྱེད་པའོ། །ཞེས་གསུངས་པས་སོ། །ཡང་ཉ་ཊཱིཀ་ལས། རྗེས་སུ་ཡི་རང་ཡིད་ལ་བྱེད་པས་ནི། རང་བྱའི་ཡུལ་གཞན་གྱི་བསོད་ནམས་བྱས་པ་དེ་ལ་ཡི་རང་བ་རང་གི་བསོད་ནམས་གཉིས་བློ་མཉམ་ན་མཉམ་པ་ཉིད་དང་རང་བྱེད་བློ་དམའ་ན་ཆུང་ལ། མཐོ་ན་ཆེ་བར་འཐོབ་པོ་ཞེས་བྱ་བ་འདི་ཡིན་ནོ། །ཡང་ན་བསོད་ནམས་ཆེན་པོ་ཐོབ་པར་མཉམ་ཞེས་སྟོན་པ་ཡིན་ནོ། །ཞེས་གསུངས་པ་ལ། དཔེར་ན་གཞན་གྱི་བསྐལ་ཆེན་གྲངས་མེད་གཅིག་ཚོགས་པའི་ཡི་རང་དང་བྱང་སེམས་ས་དང་པོ་བས་རང་གི་ཡི་རང་གཉིས་བློ་མཉམ་ན་བསྐལ་ཆེན་གྲངས་མེད་གཅིག་གི་ཚོགས་ཀྱི་དགེ་རྩ་གསར་དུ་ཐོབ་བམ་ཅི། ཐོབ་ན་དེའི་བསྐལ་ཆེན་གྲངས་མེད་གསུམ་གྱི་ཚོགས་རིམ་གྱིས་བསགས་དགོས་པ་ཡིན་མིན་དཔྱད། ཡང་སྔོན་མེད་ལེགས་བཤད་ལས། འདི་ནི་མཉམ་བཞག་སྒྲུབ་པ་སྒོམ་ལམ་ཞེས་བྱ་ཞིང༌། རྗེས་ཐོབ་ཏུ་མོས་པ་དང༌། བསྔོ་བ་དང་རྗེས་སུ་ཡི་རང་གསུམ་ལ་སློབ་དགོས་པ་དེ་ནི་མཚོན་བྱེད་དེ་ཐབས་མཁས་ཀྱི་སྒོ་ཐམས་ཅད་ལ་ཡང་བསླབ་པར་བྱའོ། །ཞེས་གསུངས་པ་ལྟར་མོས་བསྔོ་རྗེས་སུ་ཡི་རང་སྒོམ་ལམ་ལ་རྗེས་ཐོབ་གྱི་ཁྱབ་པ་ཡོད་མེད་ཞིབ་པར་དཔྱད་དགོས་སོ། །ཞིབ་པར་མདོ་ལུགས་མ་དང་ཉ་ཊཱིཀ་ལས་ཤེས་པར་བྱའོ། །

བཅུ་དགུ་པ་སྒྲུབ་དང་ཤིན་ཏུ་དག་པ་ཞེས། བྱ་བ་འདི་ནི་སྒོམ་པའི་ལམ།

བཅུ་དགུ་པ་སྒྲུབ་དང་ཤིན་ཏུ་དག་པ་ཞེས། བྱ་བ་འདི་ནི་སྒོམ་པའི་ལམ།།

སྒྲུབ་དང་ཤིན་ཏུ་དག་པ་ཞེས། །བྱ་བ་འདི་ནི་སྒོམ་པའི་ལམ། །ཞེས་པའི་ལམ་ཤེས་མཚོན་བྱེད་ཀྱི་དོན་གཉིས་ཀྱི་གོ་དོན་གང་ཡིན་ཞེས་པའོ། །གཉིས་པ་ལན་ལ། སྒོམ་ལམ་གྱི་སྤང་བྱ་ཅི་རིགས་དག་པའི་སྤངས་པ་དེ། སྐབས་འདིའི་རྣམ་དག་གི་མཚན་ཉིད་ཡིན་ཏེ། མདོ་ལུགས་མ་ལས། ད་ནི་དག་པ་བཤད་པར་བྱའོ། །མདོ་ལས། གཟུགས་རྣམ་པར་དག་པ་གང་ཡིན་པ་དེ་ནི་འབྲས་བུ་རྣམ་པར་དག་པའོ། །ཞེས་པ་ལ་སོགས་པ་ཉི་ཁྲིའི་ལེའུར་ཉེར་དྲུག་པའི་ཕྱེད་ཕྱི་མ་ལ་སོགས་པ་རྣམས་སོ། །དག་པའི་ངོ་བོ་གང་ཞེ་ན། །དེ་ནི་དེ་བཞིན་ཉིད་ཡིན་ཏེ། །ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཅེས་སངས་རྒྱས་ཉིད་ཀྱིས་གསུངས་པའི་ཕྱིར་རོ། །ཞེས་དང༌། ཉ་ཊཱིཀ་ལས།གཉིས་པ་ཐེག་ཆེན་འཕགས་པའི་ཤིན་ཏུ་དག་པའི་སྒོམ་ལམ་གྱི་མཚན་ཉིད། ཟུར་དང་པོ་འདྲ། རྣམ་གྲོལ་ལམ་དུ་གྱུར་པ་ཞེས་བྱ་བ་སྟེ། མོས་པ་དང་བཅས་པ་ལྔ་བོ་འདི་ནི་སྒོམ་པའི་ལམ་མོ་ཞེས་གསེར་རོ། །འོན་ཀྱང་འདི་གཉིས་ཀྱི་སྔ་མ་རྟོགས་པ་ལམ་བདེན། ཕྱི་མ་སྤངས་པ་འགོག་བདེན་ཏེ་དེ་ལྟར་ཡིན་ཅིང་ཞེས་བྱ་བ་ནི་སྒོམ་པའི་ལམ་སྤངས་རྟོགས་དང་བཅས་པའོ་ཞེས་ཏེ་འོག་ཏུ་འཆད་དོ། །ཞེས་དང༌། ཉ་ཊཱིཀ་ལས། འོན་ཀྱང་སྒྲུབ་པ་ནི་ས་དགུའི་མཉམ་གཞག་དང༌། རྣམ་དག་ནི་ས་བཅུ་གཅིག་གི་སྤངས་པ་འགོག་བདེན་ཡིན་གྱི་སྒོམ་ལམ་དངོས་མིན་ཞེས་པ། མདོ་དང་རྗེ་བཙུན་གྱི་དགོངས་པའོ། །ཞེས་གསུངས་པའི་ཕྱིར་རོ། །དབྱེ་ན། ཉ་ཊཱིཀ་ལས། རང་བཞིན་རྣམ་དག་དང་གློ་བུར་རྣམ་དག་གཉིས་ཡོད་དེ། རྩ་བར་བཤད་པ་ལྟར་རང་བཞིན་རྣམ་དག་དང༌། འགྲེལ་བ་ལྟར་གློ་བུར་རྣམ་དག་གཉིས་ཀ་བཤད་དུ་རུང་ངོ༌། །འོན་ཀྱང་ཤླཽ་ཀ་འདིས་རང་བཞིན་རྣམ་དག་དང༌། འོག་མས་གློ་བུར་རྣམ་དག་སྟོན་པར་སྣང་ངོ༌། །ཞེས་གསུངས་པའི་ཕྱིར་རོ། །གཞི་འབྲས་ཀྱི་ཆོས་ཉིད་ངོ་བོ་གཅིག་པའི་རང་བཞིན་རྣམ་དག་ནི། མདོ་ལུགས་མ་ལས། འབྲས་བུ་དག་པ་གཟུགས་ལ་སོགས། །དག་པ་ཉིད་དེ་གང་གི་ཕྱིར། །དེ་གཉིས་ཐ་དད་མ་ཡིན་ཞིང༌། །གཅད་དུ་མེད་པས་དག་པར་བརྗོད། །ཅེས་པས་འདིས་གཞི་འབྲས་ཀྱི་ཆོས་ཉིད་ངོ་བོ་གཅིག་པའི་རང་བཞིན་རྣམ་དག་སྟོན་ཏོ། །ཞེས་གསུངས་པ་ལྟར་འབྲ༷ས་བུ༷་མྱང་འདས་ཀྱི་ཆོས་ཉིད་རང་བཞིན་གྱིས་ད༷ག་པ༷་དེ་ཆོས་ཉིད་ཀྱི་གཟུ༷གས་ལ༷་སོ༷གས་རང་བཞིན་གྱིས་ད༷ག་པ༷་དེ་ཉི༷ད་ཡིན་ཏེ༷། ག༷ང་གི༷་ཕྱི༷ར། གཅིག་པའི་ཕྱིར་གཉིས་སུ་མེད་དེ་ཐ་དད་དུ་དབྱེ་བར་མི་ནུས་པའི་ཕྱིར་གཉིས་སུ་བྱར་མེད་བྱེ་བྲག་མེད་པའི་ཕྱིར་སོ་སོ་མ་ཡིན་པར་མ་ཆད་ཅིང་རྟག་པའི་ཕྱིར་ཐ་མི་དད་པའི་སྒོ་ནས་དེ༷་གཉི༷ས་ཐ༷་ད༷ད་མ༷་ཡི༷ན་ཞི༷ང་གཅ༷ད་དུ༷་མེད། གཞོམ་དུ་མེད། བཤིག་ཏུ་མེ༷ད་པ༷ས་དེའི་ཕྱིར་ད༷ག་པའི་ཆོས་ཉིད་དེ་གཉིས་ངོ་བོ་གཅིག་ཡིན་པ༷ར་བརྗོ༷ད་པའོ། །མདོ་ལས། གཟུགས་རྣམ་པར་དག་པ་གང་ཡིན་པ་དེ་ནི། འབྲས་བུ་རྣམ་པར་དག་པ། འབྲས་བུ་རྣམ་པར་དག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་སྟེ། ནས། གཉིས་སུ་མེད་ཅིང་གཉིས་སུ་བྱར་མེད་དེ་སོ་སོ་མ་ཡིན་ཐ་མི་དད་དོ། །ཞེས་སོགས་གསུངས་སོ། །ལམ་བདེན་གྱི་ཆོས་ཉིད་གློ་བུར་དྲི་མས་དག་པ་ནི། མདོ་ལུགས་མ་ལས། ཉོན་མོངས་ཤེས་བྱ་ལམ་གསུམ་གྱི། །ཉམས་ཕྱིར་སློབ་མ་བསེ་རུ་དང༌། རྒྱལ་སྲས་རྣམས་ཀྱི་དག་པ་སྟེ། །སངས་རྒྱས་རྣམ་ཀུན་ཤིན་ཏུ་བ། །ཞེས་པ་འདིས་ལམ་བདེན་གྱི་ཆོས་ཉིད་གློ་བུར་གྱི་དྲི་མས་ཀྱང་དག་པར་སྟོན་ཏོ། །ཞེས་གསུངས་པ་ལྟར་སློ༷བ་མ༷་རྒྱུན་ཞུགས་ནས་དགྲ་བཅོམ་པར་གྱི་ཆོས་ཉིད་དེ་རང་རང་གི་ངོ་སྐལ་གྱིས་སྤང་བྱས་ད༷ག་པ༷་ཡིན་ཏེ། རང་རང་གི་ངོ་སྐལ་གྱི་སྤང་བྱའི་ཉོ༷ན་མོ༷ངས་ཉ༷མས་ཤིང་མེད་པའི་ཕྱི༷ར་རོ། །བསེ༷་རུ༷་ལྟ་བུ་རང་སངས་རྒྱས་ཀྱི་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་ད༷ག་པ༷་ཡིན་ཏེ། རང་རང་གི་ངོ་སྐལ་གྱིས་སྤང་བྱ་ཉོ༷ན་མོ༷ངས་དང༌། ཤེ༷ས་བྱ༷འི་སྒྲིབ་པ་ཉམས་ཤིང་སྤངས་པའི་ཕྱིར་རོ། །སར་གནས་ཀྱི་རྒྱ༷ལ་སྲ༷ས་རྣ༷མས་ཀྱི༷་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་ད༷ག་པ༷་ཡིན་ཏེ༷། རང་རང་གི་ངོ་སྐལ་གྱི་སྤང་བྱ་ལ༷མ་གསུ༷མ་གྱི༷་སྒྲུབ་པ་ཉ༷མས་ཤིང་དག་པའི་ཕྱི༷ར་རོ། །ས༷ངས་རྒྱ༷ས་ཀྱི་དེ་བཞིན་དེ་དུས་དང་རྣ༷མ་པ་ཀུ༷ན་ཏུ་ཤི༷ན་ཏུ༷་རྣམ་པར་དག་པ༷་ཡིན་ཏེ། སྒྲིབ་པ་གཉིས་བག་ཆགས་དང་བཅས་པ་གཏན་ནས་སྤངས་པའི་ཕྱིར་རོ། །ཞེས་གསུངས་པའི་ཕྱིར་རོ། །སྒོམ་ལམ་དགུའི་ཆོས་ཉིད་རང་རང་གི་སྤང་བྱའི་ངོ་སྐལ་གྱིས་དག་པ་ནི། མདོ་ལུགས་མ་ལས། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་པ་འདིས་བསྒོམ་ལམ་ཆུང་འབྲིང་ལ་སོགས་དགུའི་ཆོས་ཉིད་རང་རང་གི་སྤང་བྱའི་ངོ་སྐལ་གྱིས་དག་པ་སྟོན་ནོ། །ཞེས་དང༌། ཁམས་གསུམ་ས༷་དགུ༷་ནི། སྒོམ་སྤང་ཆེ༷ན་པོ༷འི༷་ཆེ༷ན་པོ༷་ལ༷་སོ༷གས་པའི་དྲི༷་མ༷འི༷་གཉེ༷ན་པོ༷་ཆུ༷ང་ངུ༷འི་ཆུ༷ང་ངུ༷་ལ༷་སོ༷གས་པ༷འི་བསྒོམ་ལ༷མ་གྱི་ཆོས་ཉིད་ནི༷་རང་རང་གི་ངོ་སྐལ་གྱི་ཆོས་ནི་རང་རང་གི་ངོ་སྐལ་གྱི་སྤང་བྱའི་དྲི་མས་ད༷ག་པ༷་ཡི༷ན་ཏེ། རང་རང་གི་སྤང་བྱའི་གཉེན་པོ་དག་ཅིང་གསལ་བ་ཡིན་པའི་ཕྱིར་རོ། །ཞེས་གསུངས་སོ། །སྐབས་འདིར་འཕགས་བཞིའི་རྣམ་དག་ལ་ཤིན་ཏུ་བ་ཡིན་མིན་གྱི་ཁྱད་པར་ཡོད་པར་ཐལ། ཉ་ཊཱིཀ་ལས། ལམ་ཤེས་པ་ཉིད་ཀྱི་སྐབས་སུ་བྱང་སེའི་སྤངས་རྟོགས་གཙོ་ཆེར་སྟོན་པས་བྱང་སེའི་རྣམ་དག་གཙོ་བོར་སྨོས་པ་ཡིན་ལ་དེའི་ཞར་ལ་གོ་རིམ་བཞིན་དུ་སངས་རྒྱས་ཀྱི་རྣམ་དག་ཤིན་ཏུ་བ་དང༌། ཉན་ཐོས་དང་སོགས་རང་རྒྱལ་གྱི་རྣམ་དག་ཅིག་ཤོས་ཏེ་ཤིན་ཏུ་བ་མིན་པར་བཤད་པ་ཡིན་ནོ། །ཞེས་དང༌། ཉན་ཐོས་ཀྱི་རྣམ་དག་ཆོས་ཅན། ཅིག་ཤོས་ཏེ་རྣམ་དག་ཤིན་ཏུ་བ་མིན་ཞེས་བྱའོ། །ཞེས་གསུངས་པའི་ཕྱིར་ཟེར་ན། འདོད་མི་ནུས་ཏེ། སྐབས་འདིའི་འཕགས་བཞིའི་རྣམ་དག་ལ་ཆོས་ཉིད་བཞག་དགོས་པའི་ཕྱིར། དེར་ཐལ། མདོ་ལུགས་མ་ལས། སློ༷བ་མ༷་རྒྱུན་ཞུགས་ནས་དགྲ་བཅོམ་པར་གྱི་ཆོས་ཉིད་དེ་རང་རང་གི་ངོ་སྐལ་གྱིས་སྤང་བྱས་ད༷ག་པ༷་ཡིན་ཏེ། ཞེས་སོགས་དང༌། ཉ་ཊཱིཀ་ལས། རྒྱུན་ཞུགས་སོགས་ཀྱི་གཟུགས་ལ་སོགས་པའི་ཆོས་ཉིད་ཡང་ཁྱོད་ཀྱི་སྤང་བྱ་གློ་བུར་དྲི་མས་རྣམ་པར་དག་པའི་རྣམ་དག་ཡིན་ཏེ། ཞེས་སོགས་གསུངས་པའི་ཕྱིར་ཞེ་ན་དཔྱད། ཡང་ཉ་ཊཱིཀ་ལས། རྩ་བར་བཤད་པ་ལྟར་རང་བཞིན་རྣམ་དག་དང༌། འགྲེལ་བ་ལྟར་གློ་བུར་རྣམ་དག་གཉིས་ཀ་བཤད་དུ་རུང་ངོ༌། །འོན་ཀྱང་ཤླཽ་ཀ་འདིས་རང་བཞིན་རྣམ་དག་དང༌། འོག་མས་གློ་བུར་རྣམ་དག་སྟོན་པར་སྣང་ངོ༌། །ཞེས་པའི་གློ་བུར་རྣམ་དག་ལ་ཀུན་རྫོབ་དོན་དམ་གང་འཇོག་དཔྱད། ཡང་ཉ་ཊཱིཀ་ལས། སྒྲུབ་པ་རྟོགས་པ་ལམ་བདེན། རྣམ་དག་སྤངས་པ་འགོག་བདེན་ཡིན་ལ། ཁ་ཅིག་སྤངས་རྟོགས་ཡིན་ཡང་གཉིས་ཀ་ལམ་བདེན་དུ་འདོད་པ་ནི་ནོར་བ་སྟེ། ཐེག་ཆེན་གྱི་སྤངས་རྟོགས་གཉིས་སུ་ཕྱེ་བའི་སྤངས་པ་ནི་འགོག་བདེན་ཉིད་ལ་བཤད་དོ། །ཞེས་པ་ལྟར་སྐབས་འདིའི་རྣམ་དག་སྤངས་པ་འགོག་བདེན་ལ་བྱེད་དགོས་སོ། །དེ་མི་རིགས་པར་ཐལ། སྐབས་འདིའི་སྒྲུབ་པ་དང་རྣམ་དག་གཉིས་ཀ་སྒོམ་ལམ་ཡིན་པའི་ཕྱིར། དེར་ཐལ། རྩ་བར། སྒྲུབ་དང་ཤིན་ཏུ་དག་པ་ཞེས། །བྱ་བ་འདི་ནི་སྒོམ་པའི་ལམ། །ཞེས་གསུངས་པའི་ཕྱིར་ཟེར་ན། ལུང་དེའི་དོན་དེ་ལྟར་མ་ཡིན་པར་སྒོམ་ལམ་གྱི་སྤངས་རྟོགས་ཡིན་པའི་དོན་ཡིན་པའི་ཕྱིར་ཏེ། ཉ་ཊཱིཀ་ལས། འདི་གཉིས་ཀྱི་སྔ་མ་རྟོགས་པ་ལམ་བདེན། ཕྱི་མ་སྤངས་པ་འགོག་བདེན་ཏེ་དེ་ལྟར་ཡིན་ཅིང་ཞེས་བྱ་བ་ནི་སྒོམ་པའི་ལམ་སྤངས་རྟོགས་དང་བཅས་པའོ་ཞེས་ཏེ། ཞེས་གསུངས་པའི་ཕྱིར་རོ། །སྐབས་འདིའི་རྣམ་དག་དང་རྣམ་དག་སྒོམ་ལམ་གཉིས་ལ་ཁྱད་མེད་པར་ཐལ། སྔོན་མེད་ལེགས་བཤད་ལས།རྣམ་དག་སྒོམ་ལམ་ཞེས་བྱ་བ་ནི། ཉེར་ལྔ་བའི་མདོ་འདིར་དངོས་སུ་མེད་ཀྱང་འཕྲོས་དོན་ཙམ་དུ་ཞོར་ལ་འཕངས་པ་ཡིན་ཏེ། སྒོམ་ལམ་གྱིས་ཐོབ་པའི་རྣམ་དག་གི་མིང་ངོ༌། །ཞེས་གསུངས་པའི་ཕྱིར་ཟེར་ན། རང་མིང་གིས་མ་བཏགས་པའི་དགོས་པ་རྒྱུ་མཚན་ལ་དཔྱད་པར་བྱའོ། །

ཉི་ཤུ་པ་ཤེས་པས་སྲིད་ལ་མི་གནས་པའི་དང༌།སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌།སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའི་ལན།

ཉི་ཤུ་པ་ཤེས་པས་སྲིད་ལ་མི་གནས་པའི་དང༌།སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌།སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའི་ལན།

ཤེས་པས་སྲིད་ལ་མི་གནས་པའི་དང༌། སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌། སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའོ། །གཉིས་པ་ལན་ནི། ཐབས་ཁྱད་པར་ཅན་གྱིས་ཟིན་པའི་ཤེས་རབ་ཀྱིས་ཚུར་རོལ་ཀྱི་མཐར་མི་གནས་པའི་གཞི་ཤེས་དེ། ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད། དུས་གསུམ་མཉམ་པ་ཉིད་དུ་རྟོགས་པས་ཚུར་རོལ་གྱི་མཐའ་ལ་མི་གནས་པའི་གཞི་ཤེས་དེ། འདིར་དངོས་བསྟན་གྱི་ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། དུས་གསུམ་མཉམ་ཉིད་དུ་ཤེས་པས་སྲིད་པ་ལ་མི་གནས་པའི་གཞི་ཤེས་ཀྱི་མཚན་ཉིད། ཆོས་ཀུན་བདེན་པའི་རང་བཞིན་མེད་པར་རྟོགས་པས་ཚུར་རོལ་ཀྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །ཤེས་རབ་ཁྱད་པར་ཅན་གྱི་ཟིན་པའི་གཞན་དོན་ཁུར་ཁྱེར་གྱིས་བསམ་པས་ཕ་རོལ་གྱི་མཐར་ལ་མི་གནས་པའི་གཞི་ཤེས་དེ། སྙིང་རྗེས་ཞི་ལ་མི་གནས་པའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གཉིས་པ་སྙིང་རྗེ་ཆེན་པོས་ཞི་བ་ལ་མི་གནས་པའི་གཞི་ཤེས་ཀྱི་མཚན་ཉིད། མཁའ་མཉམ་སེམས་ཅན་གྱི་དོན་བྱེད་པའི་བསམ་པས་ཕ་རོལ་གྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །གཉིས་པ་དབྱེ་བ་ནི། ཤེས་པས་སྲིད་ལ་མི་གནས་པའི་གཞི་ཤེས་ལ་རང་ཡིན་གྱི་མི་རྟག་བཅུ་དྲུག་རྟོགས་པའི་ཡེ་ཤེས་དང་སྟོང་ཉིད་རྟོགས་པའི་ཡེ་ཤེས་སོགས་ཡོད།སྙིང་རྗེས་ཞི་ལ་མི་གནས་པའི་གཞི་ཤེས་ལ་རང་ཡིན་གྱི་དམིགས་མེད་ལ་དམིགས་པའི་སྙིང་རྗེ་སོགས་གསུམ་ཡོད་དོ། །གསུམ་པ་ས་མཚམས་ནི། དམན་ལམ་སྔོན་སོང་གི་དྲུག་པ་ལྷག་བསམ་ནས་སངས་རྒྱས་ཀྱི་སའི་བར་ཏུ་ཡོད་དོ། །བཞི་བ་སྲིད་ཞིའི་མཐའ་ལྟུང་བ་འགོག་ཚུལ་ནི། ཉ་ཊཱིཀ་ལས། བྱང་འཕགས་མཉམ་གཞག་གི་ཤེར་ཕྱིན་པ་ཆོས་ཅན།ཚུ༷ར་རོ༷ལ་འཁོར་བ་ཕ༷་རོ༷ལ་མྱང་འདས་ཀྱི་མཐ༷འ་གཉིས་ལ༷་སྟེ་གཉིས་སུ་གནས་པ་མི༷ན་འཁོར་འདས་དེ་དག་གི་བར་ན་ཡང་མཚན་མར་གཟུང་ནས་གནས་པ་མིན་ཏེ། དུ༷ས་གསུམ་གྱིས་ཆོས་མདོ་རྣ༷མས་དོན་དམ་པར་སྐྱེ་བ་སོགས་མེད་པར་མཉ༷མ་པ༷་ཉི༷ད་དུ་མངོན་སུམ་དུ་ཤེ༷ས་པའི་ཡེ་ཤེས་སྙིང་རྗེ་ཆེན་པོ་ཅན་ཡིན་པའི་ཕྱི༷ར་ཞེས་མདོ་ལས་འདོ༷ད་དོ། །བྱང་སེའི་ཤེར་པ་ནི་ཚུར་རོལ་གྱི་འགྲམ་མམ། ཕ་རོལ་གྱི་འགྲམ་མམ། གཉིས་ཀའི་དབུས་ན་མི་དམིགས་ཏེ། ཞེས་ནས། རབ་འབྱོར་དུས་གསུམ་མཉམ་པ་ཉིད་ཀྱི་ཕྱིར་རོ་ཞེས་སོ། །ཞེས་དང༌། རྒྱན་གྱི་ས་འགྲེལ་ལས། མདོ་ལས། འདི་ལྟར་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ། །ཞེས་གསུངས་པ་ལྟར་མ་ཤེས་པར་སྡུག་བསྔལ་ལ་བདེ་བར་འཛིན་པ་འཁྲུལ་བ་སྟེ་དེ་རྣམས་ནི་སྲིད་པའི་མཐར་ལྷུང་བའོ། །རང་ཉིད་གཅིག་པུ་ཞི་བའི་མྱ་ངན་ལས་འདས་པ་ལ་དགའ་བ་ཉན་ཐོས་དང་རང་སངས་རྒྱས་རྣམས་ཀྱི་སྒྲུབ་པ་ནི་རང་རང་གི་སྡུག་བསྔལ་ཉེ་བར་ལེན་པའི་རྒྱུ་ཉོན་མོངས་པ་རབ་ཏུ་ཞི་བ་ཙམ་ལ་འཇུག་པ་སྟེ། ཞི་བའི་མཐར་ལྷུང་བའོ། །སྙིང་རྗེའི་བདག་ཉིད་ཅན་བྱང་ཆུབ་སེམས་དཔའ་རྣམས་ཀྱི་སྒྲུབ་པ་ནི་ཤེས་རབ་ཀྱིས་རང་གཞན་གྱི་ཉེ་བར་ལེན་པ་ཀུན་ཞི་བར་བྱེད་པས་སྲིད་པའི་མཐའ་ལ་མི་གནས་ལ། སྙིང་རྗེ་ཆེན་པོས་ཕུང་པོ་ལྷག་མེད་དུའང་མི་ཟད་ཅིང་རྟག་པའི་སྒོ་ནས་གཞན་དོན་རྒྱུན་མི་འཆད་པས་ཞི་བའི་མཐའ་ལའང་མི་གནས་པའི་ཕྱིར་སྔ་མ་དག་ལས་མཆོག་ཏུ་གྱུར་བའོ། །ཞེས་དང༌། རྒྱུད་བླ་ཐོགས་འགྲེལ་གྱི་དོལ་མཆན་ལས། འདི་ནི་༼འཁོར་འདས་ལ་རྟོག་པས་༽མི་གནས་པའི་རང་བཞིན་ཡང་དག་པར་རྫོགས་པའི་བྱང་ཆུབ་རྗེས་སུ་ཐོབ་པའི་ཐབས་ཏེ། ཤེས་རབ་ཀྱིས་ནི་བྱང་ཆུབ་སེམས་དཔའ་སྲིད་པ་ལ་སྲེད་པའི་བག་ལ་ཉལ་མཐའ་དག་སྤངས་པས་ན། ༼བྱང་ཆུབ་སེམས་དཔའ་༽བདག་ལ་ཕན་པའི་ཕྱིར་༼ཤེས་རབ་ཀྱིས་༽མྱ་ངན་ལས་འདས་པ་ལ་བརྟེན་པའི་བསམ་པ་ཅན་ཡིན་པས་ཡོངས་སུ་མྱ་ངན་ལས་མི་འདའ་བའི་རིགས་ཅན་བཞིན་དུ་འཁོར་བ་ལ་སྲེད་པས་མི་གནས་ལ། སྙིང་རྗེ་ཆེན་པོས་སྡུག་བསྔལ་བའི་སེམས་ཅན་ཡོངས་སུ་མ་བཏང་པས་ནི། གཞན་ལ་ཕན་པའི་ཕྱིར་སྙིང་རྗེས་འཁོར་བ་ལ་བརྟེན་པའི་སྦྱོར་བ་ཅན་ཡིན་པས། ཞི་བ་བགྲོད་པ་གཅིག་པའི་རིགས་ཅན་༼གྱི་ཉན་ཐོས་༽བཞིན་དུ་མྱ་ངན་ལས་འདས་པ་ལ་༼ཡོན་ཏན་དུ་རྟོག་པས་༽མི་གནས་སོ། །དེ་ལྟར་ན་༼ཤེས་རབ་དང་སྙིང་རྗེའི་༽ཆོས་འདི་གཉིས་ནི་བླ་ན་མེད་པའི་བྱང་ཆུབ་ཀྱི་རྩ་བའི་གནས་སུ་བསྟན་པ་ནི། བདག་ལ་སྲེད་པ་མ་ལུས་པ་ཤེས་རབ་ཀྱིས་རྒྱུན་བཅད་དེ། སེམས་ཅན་གྱི་དོན་ལ་སྲེད་ཕྱིར་བརྩེ་ལྡན་རང་གཅིག་པུ་ཞི་བ་འཐོབ་པ་ཡིན། དེ་ལྟར་བློ་དང་བརྩེ་བ་སྟེ་བྱང་ཆུབ་ཐོབ་པའི་ཐབས་དེ་གཉིས་ལ་བསྟེན་ནས། ཐེག་ཆེན་གྱི་འཕགས་པ་འཁོར་བ་འམ་མྱ་ངན་ལས་འདས་༼པ་སྲིད་ཞི་ལ་གནས་པར་གློ་བུར་གྱི་དྲི་མ་དག་པར་བྱ་རྒྱུ་༽མི་འགྱུར་རོ། །ཞེས་དང༌། རྒྱུད་བླ་ས་འགྲེལ་ལས། མཐའ་གཉིས་ལས་གྲོལ་ཚུལ་ནི། བདག་སྲེད་མ་ལུས་ཤེས་རབ་ཀྱིས་བཅད་དེ། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བརྟེན་ནས། །འཕགས་པ་འཁོར་བའམ་མྱ་ངན་མི་འདའ་འགྱུར། །ཞེས་པ་སྟེ། ཕུང་པོ་ལ་བདག་ཏུ་སྲེད་ཅིང་ཆགས་པ་བག་ལ་ཉལ་དང་བཅས་པ་མ་ལུས་པ་བདག་མེད་རྟོགས་པའི་ཤེས་རབ་ཀྱིས་བཅད་དེ་སྤངས་པའི་ཕྱིར་འདོད་ཆེན་པ་བཞིན་དུ་སྲིད་པའི་མཐར་ལྷུང་བ་མ་ཡིན་ལ། སྙིང་རྗེ་ཆེན་པོས་སེམས་ཅན་ཐམས་ཅད་ལ་སྲེད་ཅིང་ཆགས་པས་དེ་དག་གི་དོན་སྒྲུབ་པའི་ཕྱིར་བརྩེ་ལྡན་བྱང་ཆུབ་སེམས་དཔའ་རྣམས་ཉན་ཐོས་དང་རང་སངས་རྒྱས་བཞིན་དུ་སྡུག་བསྔལ་ཞི་བ་ཙམ་ཐོབ་པའི་མཐར་ལྷུང་བ་ཡང་མིན་པ་དེ་ལྟར་ན། བདག་མེད་རྟོགས་པའི་ཤེས་རབ་ཀྱི་བློ་དང་སེམས་ཅན་ལ་དམིགས་པའི་བརྩེ་བ་སྙིང་རྗེ་ཆེན་པོ་སྟེ། བླ་ན་མེད་པའི་བྱང་ཆུབ་ཐོབ་པའི་ཐབས་ཁྱད་པར་ཅན་གཉིས་པོ་དེ་དག་ལ་བརྟེན་ནས་གོམས་པར་བྱས་པའི་རྒྱལ་སྲས་འཕགས་པ་རྣམས་ནི། སྲིད་པ་འཁོར་བའམ་ཞི་བ་མྱ་ངན་ལས་འདས་པ་གང་རུང་གི་མཐའ་ལས་གནས་པར་མི་འགྱུར་ཞིང༌། མི་གནས་པའི་མྱ་ངན་ལས་འདས་པ་མངོན་དུ་བྱེད་དོ་ཞེས་བྱ་བའི་དོན་ནོ། །ཇི་སྐད་དུ་འཕགས་པ་ཀླུ་སྒྲུབ་ཀྱིས། ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་མི་གནས་ཏེ། །མྱ་ངན་འདས་དང་འཁོར་མི་གནས། །མི་གནས་ཁྱོད་ལ་ཕྱག་འཚལ་བསྟོད། །ཅེས་གསུངས་པ་ལྟར་རོ། །ཞེས་གསུངས་པའི་ཕྱིར་རོ། །རིགས་ངེས་ཉན་རང་གཉིས་ཡང་དག་པའི་ཤེར་ཕྱིན་ལས་རིང་ཚུལ་ནི། ཉ་ཊཱིཀ་སྐབས་ལྔ་བ་ལས། གནས་སྐབས་ཉན་ཐོས་སུ་རིགས་ངེས་པའི་སྦྱོར་ལམ་པ་ཆོས་ཅན། རྟོགས་པ་དམན་པ་ཅན་ཡིན་ཏེ། སྲི༷ད་པ་འཁོར་བ་དང་ཞི་བ་མྱང་འདས་གང་རུང་ཞིག་ཏུ་ལྟུ༷ང་བ༷འི་རྟོགས་པ་ཅན་ཉིད་ཀྱིས་ཕྱིར་རོ། །ཞེས་དང༌། མདོ་ལུགས་མ་ལས། ཐབས་མེད་ཤེས་རབ་བྲལ་བས་སྲི༷ད་ད༷ང་ཞི༷་བ༷ར་རྟོ༷གས་པ༷འི་མཚན་འཛིན་དུ་ལྟུང་བའི་ཕྱི༷ར། ཉན་རང་གི་རྟོ༷གས་པ༷་དམ༷ན་པ༷་ཉི༷ད་ད༷ང༌། ཞེས་དང༌། ཉ་ཊཱིཀ་ལས། གནས་སྐབས་རིགས་ངེས་པའི་ཉན་ཐོས་དང་སོགས་པ་རང་རྒྱལ་འཕགས་པ་ཆོས་ཅན། ཡང་དག་པའི་ཤེར་པ་མཚན་ཉིད་པ་རང་རྒྱུད་ལ་ཡོད་པ་དང་རིང་བར་གྱུར་པ་ཡིན་ཏེ། དུས་གསུམ་བདེན་མེད་དུ་མཉམ་པ་ཉིད་ཤེས་པ་རང་རྒྱུད་ལ་མེད་པའི་ཕྱིར། དེས་ན་དེ་ཆོས་ཅན། འཁོར་འདས་གང་རུང་ལ་གནས་པ་ཡིན་པར་ཤེས་པར་བྱའོ། །སེམས་ཅན་ཀུན་ལ་སྙིང་བརྩེ་བའི་སེམས་དང༌། རང་བཞིན་མེད་རྟོགས་ཀྱི་ཤེས་རབ་ཟབ་མོ་དང་བྲལ་བའི་རང་གི་རྟོགས་པ་ཙམ་གྱི་ཤེར་པ་སྟེ་གཞི་ཤེས་ཅན་དུ་གནས་སྐབས་རིགས་ངེས་པ་ཡིན་པའི་ཕྱིར། རྟཊ་གྲུབ་སྟེ། དེ་འདྲའི་ཤེས་རབ་དང་བྲལ་ཏེ། མྱང་འདས་རྟག་པའི་དངོས་པོ་དང་འཁོར་བ་མི་རྟག་སྡུག་བསྔལ་ལ་སོགས་པའི་ཚུལ་གྱིས་ སྤང་བྱ་ཡིན་པས་དངོས་པོ་མེད་པར་རམ། གཟུགས་སོགས་དོན་དམ་གྱི་དངོས་པོ། ལྷག་མེད་ཕུང་བོའི་དངོས་པོ་མེད་པར་དམིགས་ཤིང་ཞེན་པ་ཉིད་ཀྱིས་སོ། །དེ་འདྲའི་ལམ་མདོ་བསྟན་བཅོས་སུ་བཤད་པ་མེད་དོ་ཞེ་ན། དེ་འདྲའི་ཤེས་རབ་སྙིང་རྗེ་དང་བྲལ་བས་འཁོར་འདས་ལ་གནས་པའི་ལམ་ཆོས་ཅན། སྐབས་འདིར་མདོ་བསྟན་བཅོས་ལས་མ་བསྟན་པ་མིན་ཏེ། ཀུན་ཤེས་པ་ཉིད་ཀྱི་སྐབས་སུ་གཉེན་པོ་ཀུན་ཤེས་དུས་གསུམ་མཉམ་ཉིད་དུ་ཤེས་པས་འཁོར་འདས་བར་གསུམ་ལ་མི་གནས་པར་དངོས་སུ་བསྟན་པ་ལས་བཟློག་སྟེ་ཤུགས་ལ་བསྟན་པའི་ཕྱིར་རོ། །ཞེས་ཁ་ཆེ་གཞོན་ནུ་དཔལ་ལོ། །ཞེས་གསུངས་སོ། །གཞི་ཤེས་སྤང་བྱ་ཡིན་པར་ཐལ། ཉ་ཊཱིཀ་ལས། སྤང་བྱ་གཞི་ཐམས་ཅད་ཡོངས་སུ་ཤེས་པའི་གཞི་ཤེས་ཁོང་དུ་ཆུད་པ་མེད་པར་དེའི་གཉེན་པོ་ལམ་ལེགས་པར་ཡོངས་སུ་ཤེས་པ་མེད་དེ། གཉེན་པོ་ནི་སྤང་བྱ་ལ་ལྟོས་ནས་བཞག་པས་སོ། །ཞེས་དང༌། སྤང་བྱར་མི་འཐད་དེ་གཉེན་པོར་འགྱུར་བས་སོ། །ཞེ་ན། ཆོས་ཅན། མ་དད་པ་ལ་སོགས་པའི་གཉེན་པོ་ཡིན་ཏེ། སངས་རྒྱས་ལ་དམིགས་པའི་བསོད་ནམས་ཀྱི་ཚོགས་ཀྱི་རྒྱུ་ཡིན་པ་ཉིད་ཀྱིས་སོ། །དེ་ལྟ་མོད་ཀྱི་སྤང་བྱ་རྣམ་པ་ཐམས་ཅད་དུ་སྟེ་དྲུངས་འབྱིན་བྱེད་མིན་པས་སམ་གཉེན་པོ་ཁོ་ན་མ་ཡིན་པས་སྤང་བྱར་ཡང་འགྱུར་བ་ལ་འགལ་བ་མེད་དོ། །ཞེས་གསུངས་པའི་ཕྱིར་ཟེར་ན། དེ་ལ་སྤང་བྱ་དང་གཉེན་པོ་གཉིས་ཀྱི་ཡིན་པ་མེད་པར་ཐལ། རྣམ་འགྲེལ་ལས། གང་གི་སྐྱོན་མཐོང་རྣམ་པར་སུན་འབྱིན་གཉེན། །ཞེས་དང༌། གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བར་ཤེས་པ་ཡིན། །ཞེས་གསུངས་པའི་ཕྱིར་ཟེར་ན་དཔྱད་དོ། དབུ་མ་བཞི་བརྒྱ་བ་ལས། ཡུལ་ནི་དགེ་བས་ཡིད་འོང་ན། །དེ་ཡང་ངན་པར་བརྩི་བ་ཡིན། །ཞེས་སོགས་ཀྱིས་ཀུན་འབྱུང་དུ་གྱུར་བའི་དགེ་བ་ཟག་བཅས་རྣམས་གཉེན་པོ་ཡིན་མིན་དཔྱད། བྱང་སེམས་ཀྱི་རྒྱུད་ཀྱི་དུས་གསུམ་མཉམ་ཉིད་དུ་རྟོགས་པའི་བློ་ཆོས་ཅན། འཁོར་བའི་སྐྱོན་མཐོང་བའི་བློ་ཡིན་པར་ཐལ། སྲིད་མཐའ་འགོག་བྱེད་ཡིན་པའི་ཕྱིར། མ་ཁྱབ་སྙམ། ཁྱབ་སྟེ། སྲིད་མཐའ་འགོག་བྱེད་ལ་འཁོར་བའི་སྐྱོན་མཐོང་བའི་བློ་ཞིག་དགོས་པའི་ཕྱིར་ཏེ། དབུ་མ་སྙིང་པོ་ལས། སྐྱོན་མཐོང་ཕྱིར་ན་སྲིད་པ་མིན། །ཞེས་གསུངས་པའི་ཕྱིར་ཟེར་ན་འཁོར་བའི་སྐྱོན་མཐོང་ཚུལ་ལ་དཔྱད་པར་བྱའོ། །སྲིད་མཐའ་ལ་མི་གནས་པའི་གང་ཟག་ལ་འཁོར་བའི་སྐྱོན་མཐོང་བའི་ཁྱབ་པ་ཡོད་མེད་དཔྱད་པར་བྱའོ། །

ཉེར་གཅིག་པ་ཚུ་རོལ་ཕ་རོལ་མཐའ་ལ་མིན།།ཞེས་སོགས་ཀྱིས་བསྟན་པའི་ཐམས་བཅད་ཤེས་པ་ཉིད་ཀྱི་དངོས་པོ་གཉིས་སོ་སོའི་དོན་གང་ཡིན་ཞེས་པའི་ལན།

ཉེར་གཅིག་པ་ཚུ་རོལ་ཕ་རོལ་མཐའ་ལ་མིན།།ཞེས་སོགས་ཀྱིས་བསྟན་པའི་ཐམས་བཅད་ཤེས་པ་ཉིད་ཀྱི་དངོས་པོ་གཉིས་སོ་སོའི་དོན་གང་ཡིན་ཞེས་པའི་ལན།

ཚུ་རོལ་ཕ་རོལ་མཐའ་ལ་མིན། །ཞེས་སོགས་ཀྱིས་བསྟན་པའི་ཐམས་ཅད་ཤེས་པ་ཉིད་ཀྱི་དངོས་པོ་གཉིས་སོ་སོའི་དོན་གང་ཡིན་ཞེས་པའོ། །གཉིས་པ་ལན་ནི། དྲི་བ་སྔ་མའི་ཟུར་དང་པོ་ལས་ལོགས་སུ་མེད་མོད། མཁས་པ་གཞན་གྱིས་ཤེས་པའི་སྲིད་ལ་མི་གནས་པའི་ལམ་ཤེས་དང༌། སྙིང་རྗེའི་ཞི་ལ་མི་གནས་པའི་ལམ་ཤེས་ཞེས་བརྗོད་པ་ལས། ཐེག་དམན་རྟོགས་རིགས་མ་ཡིན་པའི་རྒྱུ་མཚན་གྱིས་ཤེས་པའི་སྲིད་ལ་མི་གནས་པའི་གཞི་ཤེས་ཞེས་སོགས་མི་བརྗོད་ལ། རང་ལུགས་ལ་དེ་གཉིས་ལ་སྐབས་ཀྱི་སྤང་བྱའི་གཉེན་པོ་ཡིན་པས་སྤང་བྱའི་མིང་གིས་གཞི་ཤེས་བརྗོད་པ་ལས། གཞི་ཤེས་མཚན་ཉིད་པ་དང༌། ཐེག་དམན་རྟོགས་རིགས་ཞིག་མི་དགོས་པས་སོ། །

ཉེར་གཉིས་པ་ཐབས་མ་ཡིན་པས་རིང་བའི་གཞི་ཤེས་དང་ཐབས་ཀྱིས་རིང་བ་མ་ཡིན་པའི་གཞི་ཤེས་གཉིས་སོ་སོའི་དོན་གང་ཡིན་ཞེས་པའི་ལན།

ཉེར་གཉིས་པ་ཐབས་མ་ཡིན་པས་རིང་བའི་གཞི་ཤེས་དང་ཐབས་ཀྱིས་རིང་བ་མ་ཡིན་པའི་གཞི་ཤེས་གཉིས་སོ་སོའི་དོན་གང་ཡིན་ཞེས་པའི་ལན།

ཐབས་མ་ཡིན་པས་རིང་བའི་གཞི་ཤེས་དང་ཐབས་ཀྱིས་རིང་བ་མ་ཡིན་པའི་གཞི་ཤེས་གཉིས་སོ་སོའི་དོན་གང་ཡིན་ཞེས་པའོ། །གཉིས་པ་ལན་ནི། མཚན་འཛིན་གྱིས་བཅིང་བའི་ཐེག་དམན་གྱི་གཞི་ཤེས་དེ། ཤེར་ཕྱིན་ལ་རིང་བའི་གཞི་ཤེས་ཀྱི་དོན་ནམ་མཚན་ཉིད། ཐེག་ཆེན་གྱི་ཐབས་ཤེས་ཁྱད་པར་ཅན་གྱི་གཞི་ཤེས་དེ། ཤེར་ཕྱིན་ལ་ཉེ་བའི་གཞི་ཤེས་ཀྱི་དོན་ནམ་མཚན་ཉིད་ཡིན་ཏེ། ཉ་ཊཱིཀ་ལས། གསུམ་པ་འབྲས་ཡུམ་བསྐྱེད་བའི་ཐབས་མ་ཡིན་པས་འབྲས་ཡུམ་ལ་རིང་བའི་གཞི་ཤེས་ཀྱི་མཚན་ཉིད། མིང་དང་དངོས་པོའི་མཚན་མར་འཛིན་པའི་གཞི་ཤེས། བཞི་བ་འབྲས་ཡུམ་བསྐྱེད་པའི་ཐབས་སུ་གྱུར་བ་ཉིད་ཀྱིས་འབྲས་ཡུམ་ལ་རིང་བ་མིན་པའི་མཚན་ཉིད། ཐེག་ཆེན་གྱི་ཐབས་ཤེས་རབ་ཁྱད་པར་ཅན་གྱི་གཞི་ཤེས། ཞེས་གསུངས་པའི་ཕྱིར་རོ། །ཤེར་ཕྱིན་ལ་རིང་བའི་གཞི་ཤེས་ཉན་རང་ཁོ་ནའི་རྒྱུད་ལ་ཡོད་པ་མི་འཐད་པར་ཐལ། དེ་བྱང་སེམས་ཀྱི་རྒྱུད་ལ་ཡོད་པའི་ཕྱིར་ཏེ། མདོ་ལུགས་མ་ལས། མིང་དང་མཚན་མ་ལ་ཆགས་པའི་བྱང་ཆུབ་སེམས་དཔའ་དེ༷་ནི༷་ཤེར་ཕྱིན་ལ་མཚ༷ན་མ༷ར་དམི༷གས་པའི་སྒོ༷་ན༷ས་ཐ༷བས་ལ་མཁས་པ་མ༷་ཡི༷ན་པ༷ས། དུས་གསུམ་མཉམ་ཉིད་ཀྱི་ཤེར་ཕྱིན་དེ་རི༷ང་དུ་སྤོང་བ༷་སྟེ༷། ཤེར་ཕྱིན་དེའི་མི་མཐུན་ཕྱོགས་ལ་ཞུགས་པའི་ཕྱིར་རོ། །ཅིར་ཡང་མི་ཞེན་ཅིང་མི་རྟོག་པའི་ཚུལ་གྱིས་དུས་གསུམ་གཅིག་ཆར་ཤེས་པའི་བྱང་ཆུབ་སེམས་དཔའ་དེ༷་ནི༷་སྲིད་ཞི་དང་དུས་གསུམ་པ་མཉམ་པ་ཉིད་ཤེས་པའི་ཤེར་ཕྱིན་དང༌། ཉེ་བའི་ཐ༷བས་ལ༷་མཁ༷ས་པ༷་ཡི༷ས། ཤེར་ཕྱིན་དེ་དང་ཡ༷ང་ད༷ག་པར་ཉེ༷་བ༷་ཉི༷ད་དུ༷་བཤ༷ད་དོ། །ཞེས་དང༌། སྔོན་མེད་ལེགས་བཤད་ལས། གཉེན་པོའི་གཞི་ཤེས་ནི། མཁྱེན་གསུམ་གྱིས་ཟླས་ཕྱེ་བའི་གཞི་ཤེས་དངོས་སམ་བཏགས་པ་བ་གང་དུ་བཞག་ན་ལེགས་ཞེས་དཔྱོད་ལྡན་རྣམས་ཀྱིས་རྣམ་པར་དཔྱོད་ཅིག་དང༌། གཞི་ཤེས་ཀྱི་སྐབས་ཀྱི་མདོ་དང་བསྟན་བཅོས་ཀྱི། གཞུང་གི་དངོས་བསྟན་གྱི་བརྗོད་བྱའི་གཙོ་བོ་གཞི་ཤེས་ནི་གཉེན་པོའི་གཞི་ཤེས་འདི་ཁོ་ན་ཡིན་ལ། གཞུང་གི་དངོས་བསྟན་ལྟར་ན། མི་མཐུན་ཕྱོགས་ཀྱི་གཞི་ཤེས་ཀྱང་ཉན་རང་གི་དེ་གཙོ་མི་ཆེ་སྟེ།གཙོ་བོར་བྱང་ཆུབ་སེམས་དཔའ་སོ་སོ་སྐྱེ་བོ་དམིགས་པའི་ལྟ་བ་ཅན་རྣམས་ཡིན་ནོ། །ཞེས་གསུངས་པའི་ཕྱིར་ཟེར་ན། མ་ཁྱབ་པ་འདྲ་སྟེ། མི་མཐུན་ཕྱོགས་ཀྱི་གཞི་ཤེས་དངོས་བྱང་སེམས་གྱི་རྒྱུད་ལ་མེད་མོད་བྱང་སེམས་ཀྱི་རྒྱུད་ཀྱི་མཚན་འཛིན་གྱིས་བཅིང་བའམ་མཚན་མར་དམིགས་པའི་ལྟ་བ་ནི་ཐབས་ལ་མི་མཁས་པས་ཤེར་ཕྱིན་ལ་རིང་བ་ཡིན་པར་བསྟན་ཏོ། །སྐབས་འདི་དག་ཏུ་འབྲས་ཡུམ་ལ་ཉེ་བའི་གཞི་ཤེས་དང་གཉེན་པོའི་གཞི་ཤེས་ལ་གཞི་ཤེས་མཚན་ཉིད་པ་མི་དགོས་ཏེ། མཁས་པ་འགའ་ཞིག་ལྟར་གཞི་ཤེས་མཚན་ཉིད་པ་དང་ཐེག་དམན་གྱི་རྟོགས་རིགས་ཞིག་མི་དགོས་པར་ལམ་རང་གི་གོལ་སའི་གཞི་ཤེས་ཀྱིས་མིང་གིས་དེ་དག་ལ་བཏགས་པའི་ཕྱིར་ཏེ། ཉ་ཊཱིཀ་ལས། གཉེན་པོ་གཞི་ཤེས་ཞེས་པ་ནི་སྤང་བྱའི་མིང་གིས་བཏགས་པ་སྟེ་འདོད་ཁམས་ཀྱི་ལམ་བདེན་བཞིན་ནོ། །ཞེས་གསུངས་སོ། །

ཉེར་གསུམ་པ་མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད་དང༌།སྐབས་འདིའི་མཚན་འཛིན་གྱི་བློ་དང་སྤྱིར་མཚན་འཛིན་གྱི་བློ་གཉིས་འདྲ་བ་ཡིན་ནམ་ཅི་ཞེས་པའི་ལན།

ཉེར་གསུམ་པ་མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད་དང༌།སྐབས་འདིའི་མཚན་འཛིན་གྱི་བློ་དང་སྤྱིར་མཚན་འཛིན་གྱི་བློ་གཉིས་འདྲ་བ་ཡིན་ནམ་ཅི་ཞེས་པའི་ལན།

མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད་དང༌། སྐབས་འདིའི་མཚན་འཛིན་གྱི་བློ་དང་སྤྱིར་མཚན་འཛིན་གྱི་བློ་གཉིས་འདྲ་བ་ཡིན་ནམ་ཅི་ཞེས་པའོ། །གཉིས་པ་ལན་ནི། བྱང་སེམས་ཀྱིས་རང་རྒྱུད་ལ་བསྐྱེད་པར་བྱེད་པ་ལ་འདའ་བྱའི་དམན་པའི་གཞི་ཤེས་དེ། མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། ཉ་ཊཱིཀ་ལས། ལྔ་བ་མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། བྱང་སེའི་མཉམ་བཞག་གི་རྟོགས་པའི་སྤང་བྱར་གྱུར་བའི་གཞི་ཤེས། དེ་ལ་གཞི་ལམ་འབྲས་བུ་ལ་མཚན་འཛིན་གསུམ་མོ། །ཞེས་གསུངས་པས་སོ། །ཉ་ཊཱིཀ་ལས། གཞི་ལམ་ལ། འབྲས་བུ་ལ་མཚན་འཛིན་གྱི་སྤང་གཉེན། ཞེས་པ་ནས། གཉིས་པ་ལ། སྤང་གཉེན་གཉིས་ལས། དང་པོ་ལ། ཆགས་པ་ཕྲ་མོ་མི་མཐུན་ཕྱོགས་སུ་བསྟན། དེའི་སྒྲུབ་བྱེད་བསྟན་པའོ། །དང་པོ་ལ། རྩ་བ་ནི། རྒྱལ་བ་ལ་མཚན་མར་འཛིན་པ་དང་སོགས་པ་དགེ་བ་ཐམས་ཅད་མཚན་མར་གཟུང་མདོ་སྟེ་རྫོགས་བྱང་དུ་བསྔོ་བ་ཆོས་ཅན། བྱང་པའི་མཉམ་གཞག་གི་མི་མཐུན་ཕྱོགས་ཏེ། ཆགས་པ་ཕྲ་མོ་ཡིན་པས་སོ། །རྫོགས་པའི་སངས་རྒྱས་མཚན་མར་ཡིད་ལ་བྱེད་ན། ཇི་ཙམ་དུ་མཚན་མར་གྱུར་པ་དེ་ཙམ་དུ་ཆགས་པའོ། །ཞེས་སོགས་སོ། །ཞེས་རྒྱལ་ལ་སོགས་པ་ཆགས་པ་ཕྲ། །ཞེས་པ་འདི་མི་མཐུན་ཕྱོགས་ཀྱི་གཞི་ཤེས་སྟོན་བྱེད་དུ་བཞག་པ་མི་འཐད་དེ། རྩ་བར། སྤྱོད་པའི་འདུ་ཤེས་མི་མཐུན་ཕྱོགས། །ཞེས་པ་ཡན་གྱིས་མི་མཐུན་ཕྱོགས་གྱི་གཞི་ཤེས་བཤད་ཟིན་པའི་ཕྱིར་ཏེ། མདོ་ལུགས་མ་ལས། གཟུགས་སོགས་ཕུང་པོ་སྟོང་ཉིད་དང༌། དུས་གསུམ་གཏོགས་པའི་ཆོས་རྣམས་དང། །སྦྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པ་ནས། དེ་རྣམས་ཀྱིས་མི་མཐུན་ཞེས་པ་དེ་བཤད་ཟིན་ཏོ། །ད་ནི་མཚན་མར་འཛིན་པའི་འདུ་ཤེས་དེའི་གཉེན་པོའི་ཕྱོགས་བཤད་པར་བྱ་སྟེ། ཞེས་གསུངས་པའི་ཕྱིར་རོ། །ཡང་བདེན་པའི་རང་བཞིན་མེད་རྟོགས་ཀྱི་བློ་ཡིན་ན་སྐབས་འདིའི་གཉེན་པོའི་ཕྱོགས་ཡིན་པའི་ཁྱབ་པར་ཐལ། ཉ་ཊཱིཀ་ལས། རྩ་འགྲེལ་ནི། ཉན་ཐོས་དང་སོགས་པ་རང་རྒྱལ་གྱི་ལམ་ཆོས་ཅན། མི་མཐུན་པའི་ཕྱོགས་ཡིན་ཏེ། མཚན་འཛིན་ཡིན་པའི་ཕྱིར། བྱང་པ་འཕགས་པའི་མཉམ་བཞག་ཡེ་ཤེས་དང་སོགས་པ་སངས་རྒྱས་ཀྱི་རྟོགས་པ་ཆོས་ཅན། མཚན་འཛིན་གྱི་གཉེན་པོའི་ཕྱོགས་ཡིན་ཏེ། ཆོས་ཐམས་ཅད་དོན་དམ་པར་བདེན་མེད་དུ་མངོན་སུམ་དུ་རྟོགས་པའི་ཡེ་ཤེས་ཡིན་པས་སོ། །ཞེས། གོ་རིམ་བཞིན་དུ་སྦྱར་བ་སྟེ། སྤྱིར་མངོན་པར་ཞེན་པའི་བློ་ཐམས་ཅད་འདིར་མི་མཐུན་ཕྱོགས་དང༌། ཞེན་མེད་ཀྱི་བློ་བདེན་པའི་རང་བཞིན་མེད་རྟོགས་ཐམས་ཅད་གཉེན་ཕྱོགས་སོ་ཞེས་པའི་རབ་དུ་དབྱེ་བ་མ་ལུས་པ། མདོ་ལས་ཇི་སྐད་བཤད་པ་བཞིན་དུ་བསྟན་བཅོས་འདིར་བཤད་པའི་ཚུལ་དེ་ལྟར་གྱི་སྒོ་ནས་ཐམས་ཅད་ཤེས་པ་ཉིད་ཀྱི་སྐབས་སུ་ཤེས་པར་བྱའོ། །ཞེས་གསུངས་པའི་ཕྱིར་ཟེར་ན་ཉན་རང་གི་རྒྱུད་ཀྱི་རང་བཞིན་མེད་རྟོགས་ཀྱི་བློ་སོགས་སྐབས་འདིའི་གཉེན་པོའི་ཕྱོགས་ཡིན་མིན་དང་གཞི་ཤེས་ཡིན་ན་མི་མཐུན་ཕྱོགས་ཀྱི་གཞི་ཤེས་ཡིན་པས་ཁྱབ་པ་ཡོད་མེད་དཔྱད་པར་བྱའོ། །འབྲས་ཡུམ་ལ་རིང་བའི་གཞི་ཤེས་ཡིན་ན་བློ་དོན་མི་མཐུན་ཡིན་དགོས་པར་ཐལ། མཚན་འཛིན་གྱི་བློ་ཡིན་དགོས་པའི་ཕྱིར། ཉ་ཊཱིཀ་ལས།གཟུང་འཛིན་གྱིའམ་མིང་དང་དངོས་པོའི་མཚན་མར་དམིགས་པ་ཡིན་པའི་སྒོ་ནས་སོ། །མིང་ལས་ཀྱང་ཆགས་སོ། །མཚན་མ་ལས་ཀྱང་ཆགས་སོ། །ཞེས་སོ། །ཞེས་དང༌། རྒྱུ་མཚན་ནི། དེའི་སྤང་བར་བྱ་བ་ཡིན་པའི་ཕྱིར། དེར་ཐལ། ཅི་རིགས་པར་བདག་འཛིན་སོགས་དང་སེར་སྣ་ལ་སོགས་པ་དེ་དག་གི་གཉེན་པོར་འགྱུར་སྲིད་པ་ཡིན་ན་ཡང་དེ་ལས་འཛིན་སྟངས་ཕྱིན་ཅི་ལོག་ཏུ་ཞུགས་པའི་འཛིན་པ་ཡིན་པ་ཉིད་ཀྱིས་སོ། །དེའི་རྒྱུ་མཚན་མཚན་མར་འཛིན་པའི་བློ་ཡིན་པས་སོ། །ཁྱབ་སྟེ། བྱང་པའི་ལམ་སྤྲོས་པ་དང་མཚན་མ་ཐམས་ཅད་མི་དམིགས་པའི་ཕྱིར་རོ། །ཞེས་དང༌། གཞི་ཤེས་ཀྱི་མཚན་ཉིད་ཀྱི་ཟུར་ལ་ཉ་ཊཱིཀ་ལས། མཚན་འཛིན་གྱི་བློ། ཞེས་གསུངས་པའི་ཕྱིར་ཟེར་ན་གཞི་ཤེས་ཀྱི་མཚན་ཉིད་ཀྱི་ཟུར་ལ་མཚན་འཛིན་གྱི་བློ་ཞེས་པ་དང༌།སྤྱིར་མཚན་འཛིན་གྱི་བློ་གཉིས་མི་འདྲ་བར་སྣང་སྟེ། སྤྱིར་མཚན་འཛིན་གྱི་བློ་ནི་བློ་དོན་མི་མཐུན་ཆོས་ཀྱི་བདག་འཛིན་ཞིག་དགོས་ལ། སྐབས་འདི་དག་ཏུ་མཚན་འཛིན་གྱི་བློ་ནི་སྔ་མའི་མཚན་འཛིན་གྱི་དབང་གིས་ཡུལ་མཚན་མར་སྣང་བ་དང་དེའི་རྩིས་ཟིན་པའི་བློ་ལ་བྱེད་པ་འདྲ་ལ། དཔེར་ན་དོན་སྤྱི་སྣང་བའི་རྟོག་པ་ལ་སྤྱི་འཛིན་རྟོག་པ་དང༌། སྒྲ་དོན་འཛིན་པའི་རྟོག་པ་ཞེས་བརྗོད་པ་བཞིན་ནོ། །འོན་ཀྱང་གཞི་ཤེས་ལ་སྐབས་འདིའི་མཚན་འཛིན་གྱི་བློས་མ་ཁྱབ་བམ་དཔྱད་པར་བྱའོ། །ཐེག་མཆོག་དབུ་མ་ལས། ཆོས་ཀྱི་བདག་འཛིན་དངོས་པོར་ཞེན་པ་དང༌། །བདེན་འཛིན་དངོས་འཛིན་མིང་གི་རྣམ་གྲངས་སོ། །ཞེས་དང༌། །དོན་དམ་བདེན་འཛིན་མཉམ་བཞག་དུས་ན་སྤངས། །གཞན་དུ་མ་ཡིན་གནས་ཚུལ་ལ་ཞུགས་ཕྱིར། །ཞེས་དང༌།དེའི་ཟིན་བྲིས་ལས། དེ་ལྟ་བུའི་ཆོས་ཀྱི་བདག་འཛིན་དེ་ལ་དབྱེ་ན། ཞེན་པའི་རྟོག་པ་དང༌། ཞེན་པར་མི་རྟོག་པ་གཉིས་ལས། དང་པོ་ནི། སྒྲ་དོན་འདྲེས་འཛིན་ཡིན་སྙམ་གྱི་རྣམ་པར་རྟོག་པ་ཉིད་ཡིན་ལ། ཞེས་པ་ནས།ཞེན་པའི་རྣམ་པར་རྟོག་པར་དེ་ལ་ཡང་དབྱེ་ན། ངོ་བོ་ཉིད་དུ་རྟོག་པ་དང༌། ཁྱད་པར་དུ་རྟོག་པ་དང༌། བསྡུས་ཏེ་རྟོག་པ་དང༌། དབྱེ་བར་རྟོག་པ་དང་བཞིར་འདོད་པ་ཡིན་ནོ། །དང་པོ་ནི། དཔེར་ན། བུམ་པའོ་སྙམ་དུ་འཛིན་པ་ལྟ་བུ་དང༌། གཉིས་པ་ནི། དེའི་ཁྱད་པར་ཆེ་ཆུང་དང༌། བཟང་ངན་སོགས་སུ་འཛིན་པའོ། །ཞེས་སོགས་ཀྱིས་མཚན་འཛིན་གྱི་བློ་ཡིན་པའི་ཚད་ལ་དཔྱད་པར་བྱའོ། །

ཉེར་བཞི་པ་སྐབས་གསུམ་པའི་སྐབས་འདིར་བསྟན་པའི་སྦྱོར་བ་བཅུ་འགལ་བ་ཡིན་མིན་དང་ས་མཚམས་དང་སྦྱོར་བའི་མཉམ་ཉིད་ཀྱི་མཚན་ཉིད་ཇི་ལྟར་ཡིན་ཞེས་པའི་ལན།

ཉེར་བཞི་པ་སྐབས་གསུམ་པའི་སྐབས་འདིར་བསྟན་པའི་སྦྱོར་བ་བཅུ་འགལ་བ་ཡིན་མིན་དང་ས་མཚམས་དང་སྦྱོར་བའི་མཉམ་ཉིད་ཀྱི་མཚན་ཉིད་ཇི་ལྟར་ཡིན་ཞེས་པའི་ལན།

སྐབས་གསུམ་པའི་སྐབས་འདིར་བསྟན་པའི་སྦྱོར་བ་བཅུ་འགལ་བ་ཡིན་མིན་དང་ས་མཚམས་དང་སྦྱོར་བའི་མཉམ་ཉིད་ཀྱི་མཚན་ཉིད་ཇི་ལྟར་ཡིན་ཞེས་པའོ། །གཉིས་པ་ལན་ནི། གཟུགས་སོགས་ལ་མངོན་ཞེན་བཀག་ནས་བསྒོམ་པའི་བྱང་སེམས་ཀྱི་སྦྱོར་བ་དེ། ཤེར་ཕྱིན་ཟབ་མོའི་རྣལ་འབྱོར་གྱི་མཚན་ཉིད་ཡིན་ཏེ། མདོ་ལུགས་མ་ལས་ཤེར་ཕྱིན་ཟབ་མོའི་རྣལ་འབྱོར་ལ་སྦྱར་ནས་དེ་ལྟར་བཤད་པ་ལས་སྦྱོར་ལམ་ཁོ་ན་ལ་སྦྱར་ནས་མ་བཤད་པས་སོ། །གཉིས་པ་དབྱེ་བ་ནི། ཤེར་ཕྱིན་ཟབ་མོའི་རྣལ་འབྱོར་དུ་གྱུར་བའི་ཚོགས་སྦྱོར་མཐོང་སྒོམ་བཞི་ཡོད། ཉ་ཊཱིཀ་གི་གསུང་ཟིན་ལྟར་ན་དབྱེ་ན་བཅུ་ཡོད་དེ། གཟུགས་ལ་སོགས་པའི་ཆོས་ཐམས་ཅད་ལ་གནས་པ་བཀག་པའི་སྦྱོར་བ་དང༌། གཟུགས་སོགས་དེ་མི་རྟག་སོགས་ཀྱི་སྦྱོར་བ་དང༌། གཟུགས་སོགས་མ་རྫོགས་པ་དང་རྫོགས་པའི་སྦྱོར་བ་སོགས་བཅུ་ཡོད་དོ། །གསུམ་པ་ས་མཚམས་ནི། ཐེག་ཆེན་ཚོགས་ལམ་ནས། རྒྱུན་མཐའི་བར་དུ་ཡོད་དོ། །གཉིས་པ་རྣལ་འབྱོར་རྣམ་པར་སྦྱོར་བའི་ཡན་ལག་ཕན་ཡོན་ཆོས་ཐམས་ཅད་མཉམ་པ་ཉིད་བཤད་པ་ལ། མདོ་ལས་ཤེར་ཕྱིན་ལ་སྤྱོད་པས་རྨི་ལམ་དང་སྒྱུ་མ་ལྟ་བུའི་ཆོས་རྣམས་ཡོངས་སུ་ཤེས་ཞེས་སོགས་དང༌། གཟུགས་དང་གཟུགས་བདག་གི་དང༌། གཟུགས་ལ་སོགས་དང་གཟུགས་ཀྱི་མཚན་མར་རློམ་སེམས་སུ་མི་བྱེད་ཞེས་སོགས་ཀྱི་དོན། རྩ་བར། གཟུགས་ལ་སོགས་ལ་རློམ་མེད་པ། རྣམ་བཞི་དེ་ཡི་མཉམ་པ་ཉིད། །ཅེས་སོ། །དེ་ལ་མཚན་ཉིད། དབྱེ་བ། ས་མཚམས་གསུམ། དང་པོ་ནི། གཟུགས་སོགས་བྱེད་པའི་མཚན་ཉིད་སོགས་དངོས་པོར་རློམ་སེམས་སུ་མེད་པའི་མཉམ་ཉིད་དུ་ཡོངས་སུ་ཤེས་པ་དེ། ཤེར་ཕྱིན་ཟབ་མོའི་རྣལ་འབྱོར་གྱི་ཕན་ཡོན་མཉམ་ཉིད་ཀྱི་མཚན་ཉིད་ཡིན་ཏེ། མདོ་ལུགས་མ་ལས། དེ་ལ་གཟུགས་སོགས་བྱེད་པའི་མཚན་ཉིད་ལ་སོགས་པའི་དངོས་པོར་རློམ་སེམས་སུ་མེད་པ་དང༌། གཟུགས་སོགས་བདག་གི་ཞེས་བྱ་བ་རྗེ་ཁོལ་གྱི་དངོས་པོར་རློམ་སེམས་མེད་པ་དང༌། གཟུགས་སོགས་ཞེས་བྱ་བ་ལ་རྟེན་དང་བརྟེན་པའི་དངོས་པོར་རློམ་སེམས་མེད་པ་དང༌། གཟུགས་སོགས་ཀྱི་མཚན་མར་ཞེས་བྱ་བ་བརྡར་བརྟག་པའི་དངོས་པོར་རློམ་སེམས་མེད་པ་སྟེ། རྣམ་པ་བཞི་པོ་དེ་ནི་སྦྱོར་བ་དེའི་ཕན་ཡོན་ཆོས་ཐམས་ཅད་རྨི་ལམ་དང་སྒྱུ་མ་དང༌། སྨིག་རྒྱུ་དང༌།སྒྲ་བརྙན་དང༌། མིག་ཡོར་དང༌། ཆུ་ཟླ་དང༌། སྤྲུལ་པ་ལྟ་བུར་མཉམ་པ་ཉིད་དུ་ཡོངས་སུ་ཤེས་པ་ཡིན་ནོ། །ཞེས་གསུངས་པའི་ཕྱིར་རོ། གཉིས་པ་དབྱེ་བ་ནི། ལྡོག་ཆས་དབྱེ་ན་བཞི་སྟེ། སྔར་མདོ་ལུགས་མའི་ལུང་བཀོད་པ་ལྟར་རོ། །གཉིས་པ་ས་མཚམས་ནི། ཚོགས་ལམ་ནས་སངས་རྒྱས་ཀྱི་བར་རོ། །སྐབས་འདིའི་གཞི་ཤེས་སྦྱོར་བ་དེ་སྦྱོར་ལམ་ཁོ་ན་ཡིན་པར་ཐལ། ཉ་ཊཱིཀ་ལས། བདུན་པ་གཞི་ཤེས་དངོས་བསྟན་གྱི་སྦྱོར་བའི་མཚན་ཉིད། གཟུགས་སོགས་ལ་མངོན་ཞེན་བཀག་ནས་བསྒོམ་པའི་བྱང་སེའི་སྦྱོར་ལམ། དབྱེ་ན་བཅུའོ། །བོད་རྣམས་ཐེག་ཆེན་སློབ་ལམ་བཞི་ན་ཡོད་ལོ། །ཞེས་དང༌། རྩ་བ་དང་འགྲེལ་བ་ལྷན་ཅིག་བཤད་པ་ལ། བྱང་སེམས་སྦྱོར་ལམ་པ་དབང་རྣོན་གྱི་མཉམ་བཞག་གི་ཡུམ་སྦྱོར་ཆོས་ཅན། གཞིའི་ངོ་བོ་གཟུགས་ལ་སོགས་པའི་ཆོས་ཐམས་ཅད་ལ་གནས་པ་བཀག་པའི་སྦྱོར་བ་ཡིན་ཏེ། དེ་ལ་མངོན་ཞེན་གྱིས་སྤྱོད་པ་ཉམས་ལེན་བཀག་པའི་རྟོག་མེད་ཀྱིས་ཡུམ་བསྒོམ་པའི་སྦྱོར་བ་ཡིན་པས་སོ། །བྱང་ཆེན་པོ་ཤེར་པ་ལ་སྤྱོད་ཚེ་གལ་ཏེ་གཟུགས་ལ་མི་སྤྱོད་ན་ཤེར་པ་ལ་སྤྱོད། ཅེས་སོགས་རྣམ་མཁྱེན་བར་རོ། །ཞེས་དང༌།ས་མཚམས་ནི། གཞོན་ནུ་དཔལ་ནི། སྦྱོར་བ་བཅུ་དྲོད་རྩེ། མཉམ་ཉིད་བཟོད་མཆོག་ནའོ། །ཞེས་པ་ནི། མཉམ་ཉིད་ཀྱི་སྔ་འགྲེལ་དང༌། ཤེར་འབྱུང་གིས་སྦྱོར་བ་རྣམ་པ་བཅུ་ནི་རེ་རེ་ལ་ཡང་གཟུགས་ལ་སོགས་པའི་མངོན་ཞེན་མེད་པ་ལ་སོགས་པ་རློམ་པ་མེད་པ། རྣམ་པ་བཞིས་རྟོགས་པར་བྱའོ། །ཞེས་པ་དང་འགལ་ལོ། །བོད་བོ་དོང་བ་སོགས་ཕལ་ཆེར། སློབ་ལམ་བཞིར་ཡོད་ཅེས་དང༌། འབུམ་ཕྲག་གསུམ་པ། ས་བདུན་མན་ན་ཡོད་ཟེར་བའང་སློབ་དཔོན་སོགས་ལྟར་ན་མི་འཐད་དེ། སྦྱོར་བའི་མཉམ་པ་ཉིད་སོ་སོར་རྟོགས་ནས་མཐོང་བའི་ལམ་སྒོམ་དགོས་པས། ཞེས་དང༌། སྔར་སྦྱོར་ལམ་ཞེས་སྨོས་ནས་འདིར་མཐོང་ལམ་འཆད་ཅེས་དང༌། ཤེར་འབྱུང་གིས། ནུས་པའི་རྒྱུ་སྦྱོར་བ་རྣམ་པ་བཅུ་ཡོད་ན་འབྲས་བུ་མཐོང་བའི་ལམ་འབྱུང༌། ཞེས་སོ། །དེས་ན་སྦྱོར་ལམ་ན་ཡོད་དོ། །འོན་ཀྱང་དཔྱད་དོ། །ཞེས་གསུངས་པའི་ཕྱིར་ཟེར་ན་ཅུང་ཟད་དཔྱད་རྒྱུ་སྣང་ངོ༌། །ཡང་རྩ་བར། གཟུགས་སོགས་དེ་མི་རྟག་སོགས་དང༌། །ཞེས་སོགས་ཀྱིས་གཞི་ཤེས་ཀྱི་སྦྱོར་བ་བཅུ་སོ་སོར་བསྟན་པར་ཐལ། ཉ་ཊཱིཀ་ལས། སྦྱོར་བ་ཡུལ་གྱི་དབྱེ་བས་རྣམ་པ་བཅུར་ཡོད་པ་བསྟན་བཅོས་འདིར་རྗེས་སུ་འགྲོ་བས་ཏེ་ཡོངས་གཅོད་དུ་བསྟན་པས། དེའི་ཤུགས་ཀྱིས་ན་ཉན་ཐོས་ལ་སོགས་པའི་སྦྱོར་བ་བཅུ་ནི་ཇི་སྐད་བཤད་པའི་ཞེན་སྤྱོད་བཀག་པ་སོགས་དེ་དང་དེ་ལས་བཟློག་སྟེ་སྦྱོར་བ་ཡིན་ནོ། །ཞེས་གསེར་རོ། །ཞེས་གསུངས་པའི་ཕྱིར་ཟེར་ན། དེ་མི་འཐད་པར་ཐལ། མདོ་ལུགས་མ་ལས། འདི་ཐམས་ཅད་སྦྱོར་བར་འཆད་པ་ནི་མི་རིགས་ཏེ།སྦྱོར་བ་ནི་རྣལ་འབྱོར་ཡིན་ལ་འདིར་རྣལ་འབྱོར་མ་ཡིན་པས་དེའི་ཚན་པ་དྲུག་ཡོད་པའི་ཕྱིར་རོ། །སྦྱོར་བ་མ་ཡིན་པ་སྦྱོར་བའི་སྐབས་སུ་སྟོན་པར་མི་འོས་པ་ནི་མ་ཡིན་ཏེ། དོན་གྱི་གཙོ་བོ་མ་ཡིན་ཀྱང་གཙོ་བོ་བསྟན་པའི་ཞར་ལ་སྐབས་སུ་བབ་པའི་དོན་དུ་མ་སྟོན་པ་ནི་ཐམས་ཅད་ལ་མཐུན་སྣང་དུ་གྲུབ་པོ། །ཞེས་གསུངས་པའི་ཕྱིར་རོ། །ཡང་མདོ་ལུགས་མ་སྐབས་བཞི་བ་ལས། འོ་ན་སྐབས་གསུམ་པ་དང་འདིར་བཤད་པའི་ཁྱད་པར་ཅི་ཞེ་ན།དེ་ནི་དགོངས་པ་དང༌། གདུལ་བྱ་གཞན་དང་གཞན་ལ་བརྟེན་ནས་སྦྱོར་བའི་དོན་གཅིག་ཉིད་ཟློས་ནས་གསུངས་པ་ཡིན་ཏེ། ཞེས་གསུངས་པས་སྐབས་གསུམ་པ་དང་བཞི་བའི་སྦྱོར་བ་འདྲ་བ་ཡིན་མིན་དཔྱད། ཡང་སྐབས་འདིའི་རྫོགས་མ་རྫོགས་ནི། རིམ་བཞིན་ཀུན་བཏགས་དང་ཡོངས་གྲུབ་ལ་བྱེད་པར་ཐལ། ཉ་ཊཱིཀ་ལས། མ་རྫོགས་པ་ནི་བརྟགས་པའི་གཟུགས་ཏེ། བརྟགས་པ་ལྟར་ངོ་བོ་མེད་པས་མཚན་ཉིད་ཀྱིས་སྟོང་བའི་ཕྱིར་ཡོན་ཏན་གྱི་རྟེན་དུ་མ་རྫོགས་པའོ། །རྫོགས་པ་ནི་ཆོས་ཉིད་ཀྱི་གཟུགས་ཏེ། ཡོན་ཏན་མཐའ་ཡས་པ་དང་ལྡན་པས་སོ། །ཞེས་འགྲེལ་ཆེན་ནོ། །རྫོགས་མ་རྫོགས་ཀུན་བརྟགས་ཀྱི་གཟུགས་དང་ཡོངས་གྲུབ་ལ་འབུམ་ཊཱིཀ་ཏུ་ཡང་བཤད་དོ། །ཞེསགསུངས་པའི་ཕྱིར་ཟེར་ན། དེ་ལ་ཡང་བརྟག་པར་བྱ་བ་འདི་ཡོད་དེ། མདོ་ལུགས་མ་ལས། དེས་ན་གཟུགས་སོགས་རྟག་པ་དང༌། མི་རྟག་པ་ལ་སོགས་པ་དང༌། སློབ་པའི་ཚེ་ཆོས་ཉིད་ཀྱི་གཟུགས་སོགས་མ་རྫོགས་པ་དང༌། མི་སློབ་པ་འབྲས་བུའི་ཚེ་རྫོགས་པ་དང༌། གཟུགས་དེ་ལ་ཆགས་པ་དང༌། ཆགས་པ་མེད་པ་ཉིད་ལ་དམིགས་པའི་ཚུལ་གྱིས་སྤྱོད་ཅིང་རྣལ་འབྱོར་དུ་བྱེད་པ་བཀག་པས། མི་དམིགས་པའི་ཚུལ་གྱི་ཆོས་ཉིད་ཡོངས་གྲུབ་ཀྱི་གཟུགས་སོགས་རྣལ་འབྱོར་དུ་བྱེད་ཅིང་སྦྱོར་བ་དང་སྤྱོད་པ་ནི་ཤེར་ཕྱིན་ཟབ་མོའི་རྣལ་འབྱོར་ཡིན་ནོ། །ཞེས་རྫོགས་མ་རྫོགས་གཉིས་ཀ་ཆོས་ཉིད་ཀྱི་གཟུགས་ལས་ཀུན་བརྟགས་ཀྱི་གཟུགས་ལ་མ་གསུངས་པས་སོ། །ཡང་བྱ་དཀའ་རྣམ་གསུམ་མཁྱེན་གསུམ་ལ་སོ་སོར་བཞག་དགོས་ཏེ། ཉ་ཊཱིཀ་ལས། ཆོས་ཅན། བྱ་དཀའ་རྣམ་གསུམ་གྱི་སྦྱོར་བ་སྟེ་གོ་རིམ་བཞིན་དུ་ཆེད་དུ་བྱ་དཀའ་བ་རྣམ་མཁྱེན།སྦྱོར་བ་བྱ་དཀའ་བ་ལམ་ཤེས། བྱེད་པའམ་ལས་བྱ་དཀའ་བ་གཞི་ཤེས་གསུམ་ལ་ཞེས་སོགས་ཏེ། གོ་རིམ་བཞིན་དུ་ཐམས་ཅད་མཁྱེན་པ་ཉིད་གསུམ་གྱི་བདག་ཉིད་ཀྱི་ཞེས་པའི་དོན་དེའོ། །ཞེས་གསུངས་པའི་ཕྱིར་ཟེར་ན། དེ་མི་རིགས་པར་ཐལ། མདོ་ལུགས་མ་ལས།ནམ་མཁའ་ལྟ་བུའི་ཤེར་ཕྱིན་དེ་བསྟན་པའི་ཚེ་སེམས་མ་ཞུམ་པ་བྱ་དཀའ་བ་དང༌། ནམ་མཁའ་ལྟ་བུ་དེ་ལ་བརྩོན་པ་བྱ་དཀའ་བ་དང༌། ནམ་མཁའ་ལྟ་བུའི་བྱང་ཆུབ་ལས་མི་ལྡོག་པ་བྱ་དཀའ་བ་སྟེ། བྱ་དཀའ་བ་གསུམ་པོ་དེ་ལ་བྱང་ཆུབ་དེ་སྦྱོར་ཞིང་གོ་ཆ་བགོས་པའོ། །མདོ་ལས། བྱང་ཆུབ་སེམས་དཔའ་ཤེར་ཕྱིན་བསྟན་པའི་ཚེ་མི་ཞུམ་པ་དང་དེ་ལ་བརྩོན་པ་དང༌། བླ་མེད་བྱང་ཆུབ་ལས་མི་ལྡོག་པ་ནི་དཀའ་བ་བགྱིད་པའོ། །ཞེས་གསུངས་པའི་དོན་ཏོ། །དེ་ནས་དེ་ཅིའི་སླད་དུ་ཞེ་ན། ཤེར་ཕྱིན་བསྒོམ་པ་ནི་ནམ་མཁའ་བསྒོམ་པ་སྟེ་ཞེས་སོགས་ཀྱིས་བྱ་དཀའ་བ་གསུམ་པོ་དེ་དཀའ་བའི་རྒྱུ་མཚན་འབའ་ཞིག་མདོ་ལས་བྱུང་ངོ༌། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །ཡང་ཉ་ཊཱིཀ་ལས། བརྒྱད་པ་བཀག་ནས་བསྒོམ་པ་གང་ཞིག་དངོས་བསྟན་གྱི་སྦྱོར་བ་བཅུའི་མཚུངས་ཆོས་ཏེ། ལྡོག་ཆས་ཕྱེ་ན་བཞིའོ། །ཞེས་གསུངས་མོད་མདོ་ལུགས་མར་སྦྱོར་བའི་མཉམ་ཉིད་སྦྱོར་བའི་ཕན་ཡོན་ལ་བཤད་དོ། །ཡང་ཉ་ཊྭིཀ་ལས༌། ཕྱི་མ་འདི་རྗེས་ཐོབ་ཀྱི་སྒོམ་པ་གཙོ་ཆེ། བརྒྱད་སྟོང་བ་ལྟར་ན་གཟུང་འཛིན་གྱི་རྣམ་རྟོག་བརྒྱད་ནི་སྦྱོར་བའི་མཉམ་ཉིད་དེ། ༼རྣམ་བརྒྱད་དེ་ཡི་མཉམ་པ་ཉིད་ཅེས་བྱ་ཞེས་སྙིང་ཟླའོ། །༽ ཞེས་སོགས་གསུངས་པ་ལ་ཞིབ་པར་དཔྱད་པར་བྱའོ། །

ཉེར་ལྔ་བ་རྣམ་རྫོགས་སྦྱོར་བའི་དངོས་པོ་དང་པོ་རྣམ་པའི་མཚན་ཉིད་དང༌། མཁྱེན་གསུམ་སོ་སོའི་རྣམ་པ་ཡིན་པའི་ཚད་ཇི་ལྟར་ཡིན་ཞེས་པའི་ལན།

ཉེར་ལྔ་བ་རྣམ་རྫོགས་སྦྱོར་བའི་དངོས་པོ་དང་པོ་རྣམ་པའི་མཚན་ཉིད་དང༌། མཁྱེན་གསུམ་སོ་སོའི་རྣམ་པ་ཡིན་པའི་ཚད་ཇི་ལྟར་ཡིན་ཞེས་པའི་ལན།

རྣམ་རྫོགས་སྦྱོར་བའི་དངོས་པོ་དང་པོ་རྣམ་པའི་མཚན་ཉིད་དང༌། མཁྱེན་གསུམ་སོ་སོའི་རྣམ་པ་ཡིན་པའི་ཚད་ཇི་ལྟར་ཡིན་ཞེས་པའོ། །གཉིས་པ་ལན་ནི། སྐབས་འདིའི་རྣམ་པའི་མཚན་ཉིད་ནི། ཉ་ཊཱྀཀ་ལས། རྣམ་པ་ནི། ཡུལ་གཞིའམ་ཡུལ་ཅན་ཡེ་ཤེས་ཀྱི་བྱེ་བྲག་ཐེག་ཆེན་སྦྱོར་བའི་བསྒོམ་བྱར་གྱུར་པ། དེ་ལ་བསྡུ་ན་གསུམ། ཕྱེ་ན་བརྒྱ་བདུན་ཅུ་རྩ་གསུམ་མོ། །ཞེས་དང༌། ཉ་ཊཱིཀ་ལས། རྣམ་པ་ལ་གསུམ་ལས། མཚན་ཉིད་ནི། བདེན་པའི་ཆོས་ཀྱི་རང་བཞིན་དུ་གྱུར་པའི་ཆོས་ཞིག་སྟེ། མི་རྟག་པ་འདུས་བྱས་ཀྱི་མཚན་ཉིད་དུ་བཤད་པ་བཞིན་ནོ། །མཚོན་བྱའི་སྒྲ་དོན་ནི། བདེན་པའི་ཆོས་ཀྱི་བྱེ་བྲག་ཏུ་གྱུར་པས་དེའི་རྣམ་པ་སྟེ། ཆོས་བཤེས་ཀྱིས། རྣམ་པ་ནི་བྱེ་བྲག་སྟེ་སངས་རྒྱས་ཀྱི་ས་ལ་སོགས་པ་ལ་ཆོས་ཀྱི་བྱེ་བྲག་ཇི་སྙེད་ཡོད་པའོ་ཞེས་སོ། །མཚན་གཞིའི་དབྱེ་བ་ནི། དོན་རྣམ། ཤེས་རྣམ་གཉིས་ཏེ། དང་པོ་ལ། བདེན་བཞི་ལ་རིམ་བཞིན་དགུ་བཅུ་གཉིས་ཉི་ཤུ་བརྒྱ་སོ་གཉིས་སོ། །གཉིས་པ་ལ། གཞི་ཤེས་ཀྱི་ཉེར་བདུན། ལམ་ཤེས་ཀྱི་སོ་དྲུག་རྣམ་མཁྱེན་གྱི་བརྒྱ་དང་བཅུའོ། །༼ལུང་གི་སྙེ་མར་རྣམ་པའི་གཅིག་དང་ཐ་དད་དཔྱད་པ་ནི་ཅུང་ནོར་རོ། །༽ ཡང་ན་ཆོས་ཅན་གྱི་རྣམ་པ། ཆོས་ཉིད་ཀྱི་རྣམ་པ་གཉིས་སུ་ཡང་འདུས་སོ། །ཞེས་གསུངས་པ་ལྟར་རོ། །སྤྱིར་མཁྱེན་པ་གསུམ་པོ་རང་རང་གི་རྣམ་པ་ལ་རང་རང་ཡིན་དགོས་ཀྱང་སྐབས་འདིའི་གཞི་ཤེས་ཀྱི་རྣམ་པའི་ཚད་དམ་དོན་ནི། གཞི་ཤེས་སམ་དེའི་སྦྱོར་བའི་སྒོམ་བྱར་གྱུར་བ། ལམ་ཤེས་ཀྱི་རྣམ་པའི་ཚད་དམ་དོན་ནི། ལམ་ཤེས་སམ་ལམ་ཤེས་ཀྱི་སྦྱོར་བའི་སྒོམ་བྱར་གྱུར་བ། རྣམ་མཁྱེན་གྱི་རྣམ་པའི་ཚད་དམ་དོན་ནི། རྣམ་མཁྱེན་ནམ་དེའི་སྦྱོར་བའི་སྒོམ་བྱར་གྱུར་པའོ། །དེ་ལྟར་འཐད་དེ། ཉ་ཊཱིཀ་ལས། རད་ཀིར་ནི། གཞིའི་རྣམ་པ་མི་རྟག་སོགས་དང༌། ཡེ་ཤེས་ཀྱི་རྣམ་པ་མི་རྟག་པར་རྟོགས་པ། ཞེས་འཆད་དེ་ལེགས་སོ། །ཞེས་དང༌། དེ་ལས། གཞི་ཤེས་ཀྱི་རྣམ་པ་ཉེར་བདུན་ཆོས་ཅན། གཞི་ཤེས་ཀྱི་བྱེ་བྲག་གམ་ཆོས་སུ་བསྟན་པས་གཞི་ཤེས་ལས་རྫས་ཐ་དད་པ་མིན་ཏེ། ཉན་དངོས་རང་རྣམས་ཀྱི་གང་ཟག་དངོས་གི་བདག་མེད་རྟོགས་པའི་ཡེ་ཤེས་མཚན་གཞི་དེའི་མཚན་ཉིད་དམ་རང་བཞིན་དུ་གྱུར་པའི་ཆོས་ཞིག་ཡིན་པས་སོ། །ལམ་ཤེས་ཀྱི་སོ་དྲུག་ལམ་ཤེས་ཀྱི་བྱེ་བྲག་གམ་ཆོས་སོགས་དང༌། བྱང་སེའི་བདག་མེད་གཉིས་ཀ་རྟོགས་པའི་ཡེ་ཤེས་ཞེས་སོགས་དང༌། བརྒྱ་རྩ་བཅུ་རྣམ་མཁྱེན་གྱི་ཆོས་སུ་བཤད་པ་སོགས་དང༌། སངས་རྒྱས་ཀྱི་ཡེ་ཤེས་ཤེས་བྱའི་དཀྱིལ་འཁོར་མ་ལུས་པ་སྐད་ཅིག་གིས་མཁྱེན་པའི་རྟོགས་པ་དེའི་ཞེས་སོགས་སོ། །ཞེས་གསུངས་པའི་ཕྱིར་རོ། །སྐབས་འདིའི་གཞི་ཤེས་ཀྱི་རྣམ་པ་ལ་མདོ་དངོས་བསྟན་ལ་ཆོས་ཉིད་དང༌། སྦས་དོན་ལ་མངོན་རྟོགས་དང༌། དོན་རྣམ་དུ་གྱུར་བའི་མི་རྟག་པ་སོགས་ཡོད་པར་སྣང་ངོ༌། །ཡང་སྔོན་མེད་ལེགས་བཤད་ལས། རྣམ་རྫོགས་སྦྱོར་བའི་རྣམ་པ་ཞེས་བྱ་བ་ནི། ཆོས་ཉིད་དོན་དམ་པ་རྣམ་པ་ཐམས་ཅད་པར་གནས་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་འགྲོ་རྒྱུ་རྣམས་ནི། ཡུལ་གྱི་རྣམ་པ་སྟེ། དེང་སང་དོན་རྣམ་ཞེས་གྲགས་པ་དམིགས་ཡུལ་ཡིན་པས། རྣམ་ཀུན་དངོས་མ་ཡིན་ལ། དམིགས་ཡུལ་དེ་རྣམས་ལ་བསྒོམས་པས། མེ་ལོང་ལ་གཟུགས་བརྙན་ཤར་པ་ལྟར་རང་གི་ཤེས་པ་ཡང༌།རྣམ་པ་དེ་དག་དང་མཚུངས་པར་ཤར་བ་ནི། ཡུལ་ཅན་གྱི་རྣམ་པ་སྟེ། དེང་སང་ཤེས་རྣམ་དུ་གྲགས་པ་ཡིན་པས། དེ་ནི་རྣམ་རྫོགས་ཉིད་དང་ངོ་བོ་གཅིག་གོ ། དེ་ལ་བསྟན་བཅོས་དང་མདོ་རྒྱས་པ་ལས། གཞི་ཤེས་ལ་བདེན་བཞིའི་རྣམ་པ་ཉེར་བདུན་དང༌། ལམ་ཤེས་ལ་བདེན་བཞིའི་རྣམ་པ་སོ་དྲུག་དང༌། རྣམ་མཁྱེན་ལ་སྣ་ཚོགས་པའི་རྣམ་པ་བརྒྱ་དང་བཅུ་བཤད་པ་ལས། མཁྱེན་པ་དང་པོ་གཉིས་ཀྱི་རྣམ་པ་རྣམས་བདེན་བཞིའི་རྣམ་པར་འདུས་སོ། །དེ་ཡང་བདེན་པ་བཞི་ལ་དམིགས་ནས་ཀུན་རྫོབ་སྒྱུ་མ་ཙམ་གྱི་རྒྱུ་འབྲས་རྟེན་འབྲེལ་འགག་པ་མེད་ཀྱང༌། རང་བཞིན་སྤྲོས་པ་ཐམས་ཅད་དང་བྲལ་བས་ཁྱད་པར་དུ་བྱས་པ་ཉིད་ལས་ང་བདག་མ་དམིགས་པ་ནི། གཞི་ཤེས་ཀྱི་རྣམ་པ་དང༌། བདེན་བཞིས་བསྡུས་པའི་ཀུན་རྫོབ་ཀྱི་ཆོས་ཐམས་ཅད་རྟེན་འབྲེལ་སྒྱུ་མ་ལྟ་བུ་ལ། དོན་དམ་པར་ཅི་ཡང་མ་ཡིན་པ་ནམ་མཁའ་ལྟ་བུ་སྟེ་སྤྲོས་བྲལ་དང༌། རང་གི་ཉམས་སུ་སྟར་བའི་དགེ་ཆོས་ཐམས་ཅད་ཀྱང༌། སྤྲོས་པ་དང་བྲལ་བའི་རང་བཞིན་ཉིད་དུ་གནས་པ་ནི། ལམ་ཤེས་ཀྱི་རྣམ་པ་དང༌།དོན་དམ་པའི་དབྱིངས་དེ་ནི་ནམ་མཁའ་ལྟར་སྤྲོས་པ་ཐམས་ཅད་དང་བྲལ་ཞིང༌། སྤྲོས་བྲལ་དེ་ཉིད་རྣམ་པ་ཐམས་ཅད་པར་གདོད་ནས་ཤར་བ་དང༌། ཁྱད་པར་དུ་ཡང་བྱང་ཕྱོགས་དང་ཕར་ཕྱྀན་དང་སྟོབས་བཅུ་སོགས་དགེ་ཆོས་ཐམས་ཅད་ཀྱི་རྣམ་པར་གནས་པ་ནི་རྣམ་མཁྱེན་གྱི་རྣམ་པ་ཡིན་ནོ། །ཞེས་གསུངས་པ་ནི་བྱང་སེམས་ཀྱི་མཁྱེན་གསུམ་ཉམས་ལེན་གྱི་དབང་དུ་བྱས་སམ་དཔྱད་པར་བྱའོ། །

ཉེར་དྲུག་པ་གཞི་ཤེས་ཀྱི་རྣམ་པ་ལ་བདེན་པ་གཉིས་ཡོད་མེད་དང་ལོ་ཙྪ་བས་ཉན་རང་གི་གཞི་ཤེས་ཀྱི་དམིགས་པར་གྱུར་བའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པ་དེ་རང་ལུགས་ཀྱིས་འགོག་ཚུལ་གང་ཡིན་ཞེས་པའི་ལན།

ཉེར་དྲུག་པ་གཞི་ཤེས་ཀྱི་རྣམ་པ་ལ་བདེན་པ་གཉིས་ཡོད་མེད་དང་ལོ་ཙྪ་བས་ཉན་རང་གི་གཞི་ཤེས་ཀྱི་དམིགས་པར་གྱུར་བའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པ་དེ་རང་ལུགས་ཀྱིས་འགོག་ཚུལ་གང་ཡིན་ཞེས་པའི་ལན།

གཞི་ཤེས་ཀྱི་རྣམ་པ་ལ་བདེན་པ་གཉིས་ཡོད་མེད་དང་ལོ་ཙྪ་བས་ཉན་རང་གི་གཞི་ཤེས་ཀྱི་དམིགས་པར་གྱུར་བའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པ་དེ་རང་ལུགས་ཀྱིས་འགོག་ཚུལ་གང་ཡིན་ཞེས་པའོ། །གཉིས་པ་ལན་ནི། གཞི་ཤེས་ཀྱི་རྣམ་པ་ལ་ཀུན་རྫོབ་ཀྱིས་ཁྱབ་ཀྱང་སྐབས་འདིའི་གཞི་ཤེས་ཀྱི་རྣམ་པ་ལ་བདེན་པ་གཉིས་ཡོད་པར་སྣང་སྟེ། མདོ་ལུགས་མ་ལས། རྣམ་པ་འདི་རྣམས་སྦྱོར་བ་བཞིས་གང་ལ་བསླབ་པར་བྱ་བའི་ཡུལ་མཁྱེན་པ་གསུམ་གྱི་བདག་ཉིད། གཞི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་དབྱིངས་ཟབ་མོ་གཅིག་གི་རྣམ་པ་ཡིན་པའི་ཕྱིར། ལམ་ཆོས་སུ་འཆད་པ་དང་བཟང་ངན་དུ་མར་འབྱེད་པ་དང༌། སྒོམ་ཚུལ་སྣ་ཚོགས་ཀྱི་ཆོས་སུ་འཆད་པ་ནི་མདོ་དང་མི་མཐུན་ནོ། །མདོ་ལས། རབ་འབྱོར་ཀྱི་དམ་བཅས་པ་དང་བཅོམ་ལྡན་འདས་ཀྱིས་གཏན་ཚིགས་གསུངས་པའི་སྒོ་ནས་ཤེར་ཕྱིན་གཅིག་འབའ་ཞིག་གི་རྣམ་པ་བསྟན་པའི་ཕྱིར་རོ། །བསྟན་བཅོས་སུ་དམ་བཅར་གསུངས་པ་རྣམས་བྱུང་ངོ༌། །སྐབས་འདི་ཉི་ཁྲིའི་ལེའུ་ཉེར་དགུ་པ་ནས་འབྱུང་ངོ༌། །ཞེས་དང༌། ཉ་ཊཱིཀ་ལས། གཞི་ཤེས་ཀྱི་རྣམ་པ་ཉེར་བདུན་ཆོས་ཅན། གཞི་ཤེས་ཀྱི་བྱེ་བྲག་གམ་ཆོས་སུ་བསྟན་པས་གཞི་ཤེས་ལས་རྫས་ཐ་དད་པ་མིན་ཏེ། ཉན་དངོས་རང་རྣམས་ཀྱི་གང་ཟག་དངོས་གི་བདག་མེད་རྟོགས་པའི་ཡེ་ཤེས་མཚན་གཞི་དེའི་མཚན་ཉིད་དམ་རང་བཞིན་དུ་གྱུར་པའི་ཆོས་ཞིག་ཡིན་པས་སོ། །ཞེས་གསུངས་པའི་ཕྱིར་རོ། །སྐབས་འདིའི་གཞི་ཤེས་ཀྱི་རྣམ་པ་ལ་དོན་རྣམ་ཤེས་རྣམ་གཉིས་སོགས་ཡོད་དེ། ཉ་ཊཱིཀ་ལས། མཚན་གཞིའི་དབྱེ་བ་ནི། དོན་རྣམ། ཤེས་རྣམ་གཉིས་ཏེ། དང་པོ་ལ། བདེན་བཞི་ལ་རིམ་བཞིན་དགུ་བཅུ་གཉིས་ཉི་ཤུ་བརྒྱ་སོ་གཉིས་སོ། །ཞེས་གསུངས་པའི་ཕྱིར་རོ། །ཡང་ཉ་ཊཱིཀ་ལས། ལོཙྪ་བ། འདིར་བཤད་ཉན་རང་གི་གཞི་ཤེས་ཀྱི་དམིགས་པར་གྱུར་པའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པའང་ནོར་ཏེ། ཉན་རང་དག་གིས་རང་རྒྱུད་དུ་གཏོགས་པའི་ལམ་ལ་དམིགས་ཀྱི་གཞན་ལ་མི་དམིགས་པར་དབུས་མཐར་གསུངས་སོ། །ཞེས་པས་ལོ་ཙྪ་བས་ཉན་རང་གི་གཞི་ཤེས་ཀྱི་དམིགས་པར་གྱུར་བའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པ་དེ་རང་ལུགས་ཀྱིས་འགོག་པ་ཙམ་མ་ཡིན་པར་ལོ་ཙྪ་བས་ཉན་རང་གི་གཞི་ཤེས་ཀྱི་དམིགས་པའི་གཙོ་བོའི་ལམ་བདེན་ཉན་རང་གི་གཞི་ཤེས་སུ་མ་འདུས་པར་བཞེད་པ་དེ་རང་ལུགས་ཀྱི་དགག་པ་ལས་དེའི་དམིགས་པ་ཙམ་གྱི་ལམ་བདེན་ལ་ཉན་རང་གི་གཞི་ཤེས་སུ་འདུས་པར་བཤད་པ་ནི་མ་ཡིན་ནོ། །དེ་བཞིན་དུ་རྒྱན་གྱི་ས་འགྲེལ་༤༢༧ལས།ཉན་རང་རྣམས་ནི་རང་གི་ལུས་ལ་སོགས་པ་ལ་དམིགས་པ་ཙམ་ཡིན་ལ། བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ཀྱི་ལུས་དང་ཚོར་བ་དང་སེམས་དང་ཆོས་ལ་དམིགས་ནས་སྒོམ་པས་ཁྱད་པར་འཕགས་པ་དང༌། ཞེས་གསུངས་པ་ཡང་དམིགས་པའི་གཙོ་བོའི་ལུས་ལ་དགོངས་པ་འདྲའོ། །ཡང་འབུམ་གྱི་གནོད་འཇོམས་ལས། འཇིག་རྟེན་པ་དང་ཉན་ཐོས་དང་རང་སངས་རྒྱས་རྣམས་ཀྱི་མངོན་པར་ཤེས་པ་ནི། བདག་པས་དམའ་བ་རྣམས་ཀྱི་སེམས་ལ་སོགས་པ་ཤེས་པ་ཙམ་དུ་ཟད་ཀྱི། ཞེས་དང༌། བྱང་ཆུབ་སེམས་པ་ཡོངས་སུ་དག་པ་རྣམས་ཀྱི་མངོན་པར་ཤེས་པ་ནི། སངས་རྒྱས་བཅོམ་ལྡན་འདས་ལ་སོགས་པ་གོང་མ་རྣམས་ཀྱི་མཐུ་ལ་སོགས་པ་ཤེས་པ་ལ་ཐོག་པ་མེད། ཅེས་གསུངས་པས་ཉན་རང་གིས་ཐེག་ཆེན་ལམ་མངོན་སུམ་དུ་རྟོགས་པ་ཡོད་མེད་དཔྱད་པར་བྱའོ། །

ཉེར་བདུན་པ་ལམ་བདེན་གྱི་རྣམ་པའི་མདོར་ངེས་འབྱེད་ཀྱི་རྣམ་པ་ལ་དམ་བཅའ་དང་འཐད་པ་ཡོད་མེད་དང་ལམ་ཤེས་ཀྱི་རྣམ་པའི་སྐབས་ཀྱི་འགོག་བདེན་གྱི་རྣམ་པ་ལ་འགོག་བདེན་དགོས་སམ་ཅི་ཞེས་པའི་ལན།

ཉེར་བདུན་པ་ལམ་བདེན་གྱི་རྣམ་པའི་མདོར་ངེས་འབྱེད་ཀྱི་རྣམ་པ་ལ་དམ་བཅའ་དང་འཐད་པ་ཡོད་མེད་དང་ལམ་ཤེས་ཀྱི་རྣམ་པའི་སྐབས་ཀྱི་འགོག་བདེན་གྱི་རྣམ་པ་ལ་འགོག་བདེན་དགོས་སམ་ཅི་ཞེས་པའི་ལན།

ལམ་བདེན་གྱི་རྣམ་པའི་མདོར་ངེས་འབྱེད་ཀྱི་རྣམ་པ་ལ་དམ་བཅའ་དང་འཐད་པ་ཡོད་མེད་དང་ལམ་ཤེས་ཀྱི་རྣམ་པའི་སྐབས་ཀྱི་འགོག་བདེན་གྱི་རྣམ་པ་ལ་འགོག་བདེན་དགོས་སམ་ཅི་ཞེས་པའོ། །གཉིས་པ་ལན་ནི། ལམ་བདེན་གྱི་རྣམ་པའི་མདོར་ངེས་འབྱེད་ཀྱི་རྣམ་པ་ལ་དམ་བཅའ་དང་འཐད་པ་ཡོད་དེ། ཉི་ཁྲི་༼ཁ་པོད༢༩༥༽ལས། གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་རབ་ཏུ་སྤངས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། ཆོས་ཐམས་ཅད་ཀུན་ནས་ལྡང་བ་མེད་པའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་མཐའ་གཉིས་སུ་མི་འགྱུར་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། མཐའ་རྣམ་པར་དག་པར་སྤོང་བའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཐ་མི་དད་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། ཆོས་ཐམས་ཅད་འདྲེས་པ་མེད་པའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཉམས་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། ཉན་ཐོས་དང༌། རང་སངས་རྒྱས་ཀྱི་ས་ལས་འདའ་བར་བྱེད་པའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་རྣམ་པར་རྟོག་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། རྣམ་པར་རྟོག་པ་ཐམས་ཅད་དམིགས་སུ་མེད་པའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཚད་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ།ཆོས་ཐམས་ཅད་ཀྱི་ཚད་དམིགས་སུ་མེད་པའི་ཕྱིར་རོ། །གསོལ་བ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ནམ་མཁའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱི་བཀའ་སྩལ་པ། ཆོས་ཐམས་ཅད་ཆགས་པ་མེད་པའི་ཕྱིར་རོ། །ཞེས་དང༌། བརྒྱད་སྟོང་བ་ལས། ཆགས་པ་མ་མཆིས་པའི་སླད་དུ་ཆགས་མེད་དེ་ཆགས་པ་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་དང༌། སྟོང་ཕྲག་ཉི་ཤུ་ལྔ་པའི་མདོའི་བཤད་པ་༡༣༡ལས།དེ་དག་བརྒྱད་དང༌། གསོལ་བ་བཅོམ་ལྡན་འདས་འདི་ལྟ་སྟེ། ཕྲེང་དགུ་ལྷག་ན། སེམས་ཅན་མེད་པའི་ཕྱིར་རོ། །བདུན་དང་ནི། གསོལ་བ། ཕྲེང་དགུ་ན། གྱུར་པའི་ཕྱིར་རོ། ལྔ་དང༌། གསོལ་པ། ཕྲེང་དྲུག་ན། གྲུབ་པ་མེད་པའི་ཕྱིར་རོ། །ཞེས་དང། མདོ་ལུགས་མ་ལས། ཆོས་ཐམས་ཅད་ཀུན་ནས་ལྡང་བ་མེད་པའི་ཕྱིར། ཤེར་ཕྱིན་འདི་ནི་སྤངས་པའི་དང༌།མཐའ་རྣམ་པར་སྤོང་བའི་ཕྱིར། ཤེར་ཕྱིན་འདི་ནི་མཐའ་གཉིས་སུ་མི་འགྱུར་བའི་དང༌། ཆོས་ཐམས་ཅད་འདྲེས་པ་མེད་པའི་ཕྱིར། ཤེར་ཕྱིན་འདི་ནི་ཐ་མི་དད་པའི་དང༌། ཉན་རང་གི་ས་ལ་འདའ་བར་བྱེད་པའི་ཕྱིར། ཤེར་ཕྱིན་འདི་ནི་ཉམས་པ་མེད་པའི་དང༌། རྟོགས་པ་ཐམས་ཅད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་རྟོག་པ་མེད་པའི་དང༌། ཆོས་ཐམས་ཅད་ཀྱི་ཚད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཚད་མེད་པའི་དང༌། ཆོས་ཐམས་ཅད་དམིགས་སུ་མེད་པའི་ཕྱིར༌། ཤེར་ཕྱིན་འདི་ནི་ནམ་མཁའི་ཕ་རོལ་ཏུ་ཕྱིན་པ་སྟེ། བདུན་ནི་ལམ་གྱི་རྣམ་པའོ། །ཞེས་དང༌། ཉ་ཊཱིཀ་ལས། ཡང་ན་སྦྱོར་ཊཱིཀ་ལྟར་ཏེ་མདོ་དང་མཐུན་ཏེ། སྔ་མ་གསུམ་ལ་དམ་བཅའ་སྔ་ཕྱི་གཉིས་རེ་དང་རྟགས་གཉིས་རེ་སྣང་ལ། ངེས་འབྱིན་གྱི་ཐད་དུ་དམ་བཅའ་གཅིག་དང་རྟགས་གཅིག་སྣང་ངོ༌། །ཁ་ཅིག་གི་ལྟར་ན། ཕྱི་མ་ལ་རྟགས་མི་ཐོབ་པར་འགྱུར་རོ། །ཞེས་གསུངས་པའི་ཕྱིར་རོ། །ཡང་འཕགས་སེང་ལྟར་ན་ཉ་ཊཱིཀ་ལས། ལམ་བདེན་གྱི་རྣམ་པའི་དབང་དུ་མཛད་ནས་ཤེར་པ་འདི་ནི་ཚད་གནོད་འཇོམས་སུ་འདོན།མེད་པའི་ཕ་རོལ་ཏུ་ཕྱིན་པའོ། །ཞེས་པའི་དོན་ནི། ཨཱརྱ། སེམས་ཅན་ཚད་མེད་པ་ཐམས་ཅད་ལ་སངས་རྒྱས་ཀྱི་གོ་སྐབས་འབྱེད་པའི་ལམ་གྱི་རྣམ་པ་ཡིན་ལ། མཐའ་རྣམ་པར་སྤོང་བའི་ཕྱིར་རོ། །ཞེས་འཁོར་འདས་ཀྱི་མཐའ་གཉིས་དང་མ་འབྲེལ་བས་མཐའ་གཉིས་མ་དམིགས་པའི་རྟོགས་པ་ཡིན་པའི་ཤེས་རྣམ་ནི། ཇི་ལྟར་སེམས་ཅན་ཐམས་ཅད་ལ་གོ་སྐབས་འབྱེད་པ་ཡིན་པའི་རྒྱུ་མཚན་ནོ། །ཐ་མི་དད་པའི་ཕ་རོལ་ཏུ་ཕྱིན་པའོ། །ཞེས་ཆོས་ཐམས་ཅད་ཀྱི་ཆོས་དབྱིངས་ཐ་མི་དད་པ་མངོན་སུམ་དུ་རྟོགས་པའི་ཤེས་རྣམ་ནི། གཉེན་པོ་མ་ལུས་པར་རྟོགས་པའི་རིག་པའི་རྣམ་པ་གང་ཡིན་པ་དེ་ཡིན་ནོ། །ཉན་རང་གི་ས་ལས་འདའ་བར་བྱེད་པའི་ཕྱིར་རོ། །ཞེས་ཉན་རང་གི་ས་ལ་མཆོག་ཏུ་འཛིན་པ་མེད་པར་དེ་ལས་འདའ་བར་བྱེད་པའི་ཟག་མེད་ཡེ་ཤེས་ཡིན་པའི་ཕྱིར་ཞེས་པ་ནི། ཇི་ལྟར་རིག་པ་ཡིན་པའི་རྒྱུ་མཚན་ནོ། །རྣམ་རྟོག་ཐམས་ཅད་དམིགས་སུ་མེད་པའི་ཕར་ཕྱིན་ནོ། །ཞེས་ཆོས་གང་ལ་ཡང་ཅིར་ཡང་མི་རྟོག་པའི་ཟག་མེད་ཡེ་ཤེས་ནི། རྟོགས་བྱའི་ཡུལ་ཇི་བཞིན་རྟོགས་པར་བྱེད་པའི་སྒྲུབ་པའི་རྣམ་པ་གང་ཡིན་པ་དེའོ། །ཆོས་ཐམས་ཅད་ཀྱི་ཚད་མ་དམིགས་སུ་མེད་པའི་ཕྱིར་རོ། །ཞེས་དོན་དམ་པར་ཆོས་ཐམས་ཅད་འབུམ་ཊཱིཀ་ནས་ཚད་མས་གཞལ་དུ་མེད་པར་རྟོགས་པའི་ཟག་མེད་ཡིན་པས་སོ་ཞེས་པ་ཇི་ལྟར་སྒྲུབ་པ་ཡིན་པའི་རྒྱུ་མཚན་ནོ། །ཆོས་ཐམས་ཅད་ལ་ཆགས་པ་མེད་པའི་ཕྱིར་རོ། །ཞེས་རྟོགས་པ་དེ་དང་དེ་ལ་ནམ་མཁའ་ལྟར་ཆགས་པ་མེད་པའི་ཟག་མེད་ཀྱི་ཤེས་རྣམ་ནི། མྱང་འདས་སུ་ངེས་པར་འབྱིན་པ་གང་ཡིན་པ་དེའི་ངོ་བོ་ཉིད་ཏེ་རྣམ་པའོ། །འཕགས་སེང་གི་ཚིག་ཟིན་ལྟར་ཏེ་བྱང་འཕགས་ཀྱི་མཉམ་བཞག་ཤེར་ཕྱིན་ཆོས་ཅན་དུ་བྱའོ། །དེ་ལྟར་ལམ་གྱི་རྣམ་པ་གཉིས་དང༌། རིག་པའི་གཉིས་དང༌། སྒྲུབ་པའི་གཉིས་དང༌། ངེས་འབྱིན་གྱི་གཅིག་སྟེ། དེ་ལྟར་ན་ལམ་གྱི་བདེན་པའི་རྣམ་པ་བདུན་ཡིན་ནོ། །ཞེས་གསུངས་པ་ལྟར་རོ། །ངེས་འབྱིན་གྱི་རྣམ་པ་ལ་གཉིས་མ་གསུངས་པའི་རྒྱུ་མཚན་གང་ཡིན་དཔྱད། གསེར་ཕྲེང་དང་རྣམ་བཤད་གཉིས་ལས་ངེས་འབྱིན་གྱི་རྣམ་པ་ལ་དམ་བཅའ་ལས་འཐད་པ་མ་གསུངས་པ་ནི། གདུལ་བྱ་ཉེ་བའི་བསམ་པ་ལ་ལྟོས་པར་བཤད། མཁས་གྲུབ་རྗེའི་རྟོག་སྣང་ལས།ངེས་པར་འབྱིན་པའི་རྣམ་པ་ཡིན་ཏེ། ཇི་སྐད་བཤད་པའི་ཚུལ་གྱི་ལམ་རིག་པ་སྒྲུབ་པ་ཡིན་པའི་ཕྱིར། དེས་ན་སྔ་མ་རྣམས་ཕྱི་མ་འདིའི་སྒྲུབ་བྱེད་དུ་འགྱུར་བ་ལ་དགོངས་ནས་འདི་ལ་སྒྲུབ་བྱེད་ལོགས་པ་མ་གསུངས་པ་ཡིན་ནོ། །ཞེས་གསུངས་སོ། །ལམ་ཤེས་ཀྱི་རྣམ་པའི་སྐབས་ཀྱི་འགོག་བདེན་གྱི་རྣམ་པ་ལ་འགོག་བདེན་དགོས་ཏེ། མདོ་ལུགས་མ་ལས། ནང་སྟོང་པ་ཉིད་ལ་སོགས་པ་སྟོང་པ་ཉིད་བཅུ་དྲུག་དམིགས་སུ་མེད་པ་དང༌། དབེན་པ་དང༌། དངོས་པོ་མེད་པའི་ཆོས་ཉིད་ཀྱི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ནང་སྟོང་པ་ཉིད་ལ་སོགས་པའི་ཕ་རོལ་ཏུ་ཕྱིན་པ་བཅུ་དྲུག་ནི་འགོག་པའི་རྣམ་པའོ། །ཞེས་དང༌། ཉ་ཊཱིཀ་ལས། བཞི་བ་ནི། འགོག་བདེན་གྱི་རྣམ་པ་བཞིའི་འགོག་པའི་རྣམ་པའི་ངོ་བོ་ཉིད་ལ། དངོས་པོ་ཨཱརྱ་འགོག་པ་གསུམ་དངོས་གསུངས་པ་ནི་ཐེག་ཆེན་གྱི་འགོག་བདེན་ཆོས་ཅན། དོན་དམ་པར་ནང་སྟོང་བ་ཉིད་ཀྱི་རྣམ་པ་ཡིན་ཏེ། དོན་དམ་པར་ནང་གི་དངོས་པོ་བདེན་པ་བཀག་པའམ་མི་དམིགས་མདོ་པའི་ཆོས་ཉིད་ཡིན་པས་སོ། །ཕྱི་སྟོང་གཉིས་ཀའི་སྟོང་བ་ཉིད་ཀྱི་རྣམ་པ་སྟེ། ཕྱི་དང༌། གཉིས་ཀའི་དངོས་པོ་བདེན་པ་དགག་པས་སོགས་འདོན་པ་བསྒྱུར་རོ། །སྟོང་ཉིད་དེ་གསུམ་ཆོས་ཅན། འགོག་པའི་རྣམ་པ་ཡིན་ཏེ། ཕྱི་ནང་གཉིས་ཀའི་བདེན་དངོས་བཀག་པའི་སྟོང་ཉིད་ཡིན་པས་སོ། །བྱང་འཕགས་ཀྱི་ལམ་ཤེས་དངོས་ཆོས་ཅན། ནང་ཕྱི་གཉིས་ཀའི་སྟོང་ཉིད་ཀྱི་རྣམ་པ་ཅན་ཡིན་ཏེ། དོན་དམ་པར་དེ་གསུམ་གྱི་བདེན་དངོས་མེད་རྟོགས་ཀྱི་ཟག་མེད་ཡེ་ཤེས་ཡིན་པས་སོ། །ཞེས་པ་ནས། སྟོང་ཉིད་ཐ་མ་ཆོས་ཅན། གང་ངེས་པར་འབྱུང་བའི་རྣམ་པར་གནས་ཏེ། ངེས་འབྱུང་གི་རྣམ་པ་ཁོ་ན་བདེན་པའི་ངོ་བོ་བཀག་པའི་སྟོང་ཉིད་ཟབ་མོ་ཡིན་པས་སོ། །ལམ་ཤེས་ཆོས་ཅན། སྟོང་ཉིད་ཐ་མ་དེའི་རྣམ་པ་ཅན་ཏེ། ངེས་འབྱུང་གི་རྣམ་པ་ཉིད་བདེན་པའི་ངོ་བོ་མེད་པར་མངོན་སུམ་དུ་རྟོགས་པའི་ཡེ་ཤེས་ཡིན་པས་སོ། །སྟོང་ཉིད་ཀྱི་རྣམ་པ་ཐ་མ་གཅིག་སྟེ། དེ་ལྟར་ན་འགོག་པའི་བདེན་པའི་རྣམ་པ་བཅུ་དྲུག་ཡོད་པ་ཡིན་ནོ། །ཞེས་གསུངས་པའི་ཕྱིར་རོ། །སྨྲས་པ། རྒྱལ་གསུང་གསུང་རབ་ཀུན་གྱི་སྙིང་པོ་མཆོག ། རྒྱ་ཆེ་ཆེ་བའི་དཔལ་མངའ་ཡུམ་མདོ་ཡི། །དགོངས་འགྲེལ་འགྲེལ་བཤད་ལེགས་བཤད་པད་ཚལ་བཀྲ ། དེ་སྙིང་སྙིང་པོ་བླངས་ནས་འདིར་བཤད་དོ། །དེ་འབྲས་རྣམ་དཀར་ཆོས་ཀྱི་འོད་སྣང་གིས། །མཐའ་ཡས་འགྲོ་བའི་རྨོངས་པ་རབ་བསལ་ནས། །ཤེར་ཕྱིན་ཟབ་མོའི་རྣལ་འབྱོར་ལྷུར་ལེན་པས། །སྐུ་བཞིའི་གྲོང་ཁྱེར་མཆོག་ཏུ་བགྲོད་པར་ཤོག ། བདག་ཀྱང་སྐྱེ་ཀུན་ཤེར་ཕྱིན་ལམ་གྱི་མཆོག ། འདི་དང་མི་འབྲལ་སྒྲུབ་ལ་རབ་བརྩོན་པས། །རྟག་ཏུ་མཚན་ལྡན་བླ་མ་མཉེས་པ་དང༌། །འགྲོ་ཀུན་ཆོས་ཚུལ་ཟབ་མོས་ཚིམ་པར་ཤོག །ཅེས་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དྲུག་པའི་དྲིས་ལན་ལུང་རིགས་ཆོས་ཀྱི་དགའ་སྟོན་བློ་གསལ་ཀླུ་ཡི་རོལ་མཚོ་འདི་ནི་རབ་གནས་ལྕགས་ཡོས་ལོའི་མཆུ་ཟླ་ལ་ལྕམ་མདའ་དགོན་ནས་དཔེ་ཁྲིད་ཀྱི་ཞར་ལ་ཅུང་ཟད་བྲིས་ནས་མཇུག་ཛ་མགོའི་རི་ཁྲོད་ཀྱི་བཤད་གྲྭ་ཇོ་ནང་བརྩེ་ཆེན་མཐོ་སློབ་ནས་བྲིས་པའོ། །འདིས་ཀྱང་རྒྱལ་བསྟན་ཡུན་རིང་དུ་གནས་པར་གྱུར་ཅིག སརྦ་མངྒ་མཾ། འཁྱམས་པ་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །སརྦ་མངྒ་ལཾ། །