གསུང་འབུམ་པོད་བཅུ་གཅིག་པ། རྣམ་ཐར།

ཆོས་རྗེ་ཀུན་མཁྱེན་ཆེན་པོ་ཡབ་སྲས་བཅོ་ལྔའི་རྣམ་པར་ཐར་བ་ཚིགས་སུ་བཅད་པ་མདོར་བསྡུས་པ་ངོ་མཚར་རབ་གསལ།

ཆོས་རྗེ་ཀུན་མཁྱེན་ཆེན་པོ་ཡབ་སྲས་བཅོ་ལྔའི་རྣམ་པར་ཐར་བ་ཚིགས་སུ་བཅད་པ་མདོར་བསྡུས་པ་ངོ་མཚར་རབ་གསལ་ཞེས་བྱ་བ་བཞུགས་སོ། །

ན་མོ་གུ་རུ་ཀ་ཡ་རཏྣ་བྷྱཿ ཆོས་རྗེ་དཔལ་ལྡན་བླ་མ་ཀུན་མཁྱེན་ཡབ་སྲས་ཀྱི་རྣམ་ཐར་ཚིགས་སུ་བཅད་པ་ངོ་མཚར་རབ་གསལ་ཞེས་བྱ་བ། སྤྲུལ་སྐུ་ཆེན་པོ་ཆོས་རྗེ་མཚུངས་མེད་ཡབ་སྲས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཐུགས་བརྩེ་བ་ཆེན་པོས་དུས་ཀུན་ཏུ་རྗེས་སུ་བཟུང་དུ་གསོལ།རྒྱལ་བའི་རྣམ་འཕྲུལ་འཛམ་གླིང་རྒྱན་མཆོག་དཔལ། ། པད་མོའི་ཚལ་ལ་དམ་ཆོས་དགའ་སྟོན་འགྱེད། ། སྐལ་ལྡན་རྐང་དྲུག་ཚོགས་ཀུན་སྨིན་མཛད་པ། ། ཆོས་རྗེ་ཡབ་སྲས་བརྒྱུད་པའི་ཚོགས་ལ་འདུད། ། ཀུན་མཁྱེན་ཆོས་གྲགས་ལོ་ཙཱ་པནྚི་ཏ། ། ཕྱོགས་རྒྱལ་འབྲི་གུང་ཞིང་སྟོན་ཉ་དབོན་པ། ། ཐང་སྟོན་སྨན་ཆུ་རིན་ཚུལ་གྷ་རུང་བ། ། ཕུན་ཚོགས་བློ་གྲོས་བསོད་ནམས་བཟང་ལ་འདུད། །དད་ལྡན་རྐང་དྲུག་སྙན་པའི་གླུས་བསྐུལ་ནས། །དམ་ཆོས་སྦྲང་རྩིའི་དགའ་སྟོན་སྐུ་དྲིན་ཅན། ། ཆོས་རྗེ་ཡབ་སྲས་བཅོ་ལྔའི་རྣམ་པར་ཐར། ། ངོ་མཚར་རབ་གསལ་ཚིགས་སུ་བཅད་པར་བྱ། །འདྲེན་མཆོག་མཚུངས་མེད་རྒྱལ་བའི་ལུང་བསྟན་པ། །མཉམ་མེད་ཆོས་རྗེ་ཀུན་མཁྱེན་ཡབ་སྲས་ཀྱི། །ཁྱད་འཕགས་བཅོ་ལྔའི་རྣམ་ཐར་དཔག་མེད་ལས། །སོར་སྟེང་རྡུལ་ཙམ་བརྗོད་ལ་བདག་ཡིད་སྤྲོ།

ཆོས་རྗེ་ཀུན་མཁྱེན་ཆེན་པོའི་རྣམ་པར་ཐར་བ་མདོར་བསྡུས་པ།།

ཆོས་རྗེ་ཀུན་མཁྱེན་ཆེན་པོའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་ལོ་ཀེ་ཤྭ་ར་པྲཛྙཱ་དྷྭ་ཛ་སྭ་སྟི་སིདྡྷི་ཕ་ལ། དང་པོ་ཆོས་རྗེ་ཀུན་མཁྱེན་ཇོ་ནང་བ། །སྤྱན་རས་གཟིགས་མགོན་སྒྱུ་འཕྲུལ་རོལ་བའི་གར། །ཡུལ་ནི་མངའ་རིས་ཀ་ཡོ་རི་ཡི་གྲོང༌། །ཡེ་ཤེས་དབང་ཕྱུག་ལྷ་མོ་ཚུལ་ཁྲིམས་རྒྱན། །རྣམ་གཉིས་སྲས་སུ་ཆུ་ཕོ་འབྲུག་ལ་བལྟམས། །དེ་ལྟར་གཙུག་ཏོར་རྣམ་རྒྱལ་མ་ཡི་རྒྱུད། །བདེ་གཤེགས་མྱ་ངན་འདས་འོག་ཅེས་སོགས་ལྟར། །མདོ་རྒྱུད་དུ་མར་ཡང་ཡང་ལུང་བསྟན་པའི། །ཆོས་རྗེ་དགུང་ལོ་ལྔ་ནས་བཅུ་ཡི་བར། །སྐུ་ཞང་བྱང་ཆུབ་སེངྒེ་སོགས་བསྟེན་ནས། །གསང་སྔགས་རྙིང་མའི་ཆོས་ཀུན་ལེགས་བསླབ་ནས། །མཁས་པར་མཛད་དེ་གློ་བུ་སྟེང་ཤོད་དུ། །བྱོན་ནས་སྐྱི་སྟོན་འཇམ་དབྱངས་གྲགས་པ་ཡི། །དྲུང་དུ་བྱོན་ཏེ་ཟླ་གཅིག་ཙམ་ཉིད་ནས། །གོ་རྟོགས་བགྲོ་གླེང་མཁས་པའི་ཚད་ཕུལ་ཕྱིན། །མཁན་པོ་ཚུལ་ཁྲིམས་སྙིང་པོ་སོགས་ཀྱི་དྲུང༌། །དགུང་ལོ་བཅུ་གཅིག་དགེ་ཚུལ་སྡོམ་པ་བླངས། །མཚན་ནི་ཤེས་རབ་རྒྱལ་མཚན་དཔལ་བཟང་པོ། །གསོལ་ནས་ཀ་རི་ཀ་དང་གཞུང་འགྲེལ་སོགས། །བསླབ་ནས་སོ་ཐར་སྡོམ་ལྡན་མཆོག་ཏུ་གྱུར། །སྐྱི་སྟོན་ལ་སོགས་མཁས་མཆོག་དུ་མ་ལས། །ཕར་ཚད་མངོན་གསུམ་སོགས་ལ་མཁས་པར་གྱུར། །དགུང་ལོ་ཉེར་གཅིག་ས་སྐྱའི་ཆོས་གྲྭར་བྱོན། །སློབ་གཉེར་དཔག་མེད་མཛད་ནས་མཐར་ཕྱིན་གྱུར། །བླ་མ་བདག་ཆེན་པ་ལས་ཐོས་པ་མཛད། །བླ་མ་སེང་གེ་རིན་ཆེན་ཡེ་ཤེས་དང༌། །གླིང་སྟོན་ཤཱཀྱ་གཞོན་ནུ་གུང་ཐང་པ། །དོན་གྲུབ་བླ་མ་བསོད་ནམས་རིན་ཆེན་དང༌། །གནས་རྙིང་དཀའ་བཞི་ཞ་ལུ་བྱང་སྟོན་དང༌། །ཁྲོ་ཕུ་རིན་ཐིགས་བླ་མ་ཆོས་པ་དང༌། །ཟུར་ཆོས་བ་སོགས་མཁས་པ་བརྒྱ་ཕྲག་དང༌། །བགྲོ་གླེང་མཛད་པས་ཁོང་ཚོས་སྔ་རྒོལ་དང༌། །ཕྱི་རྒོལ་གང་བྱས་ཆོས་རྗེ་རིན་པོ་ཆེས། །ལུང་རིགས་ཆོས་སྐད་རྒྱ་མཚོ་རབ་ཕྱེ་བས། །བློ་གསལ་དེ་དག་ཐམས་ཅད་ཟིལ་མནན་ནས། །མཁས་པའི་གྲགས་སྙན་སྲིད་ཞིའི་ཕྱོགས་ཀུན་ཁྱབ། །དགུང་ལོ་ཉེར་ལྔར་ས་སྐྱར་ཆོས་ཁྲིར་བཞུགས། །དགེ་འདུན་སྟོང་ཕྲག་ཕར་ཚད་མངོན་འདུལ་བཞིའི། །བཤད་པ་ཕུན་སུམ་ཚོགས་པ་དུས་གཅིག་མཛད། །སྔོན་ཆད་བཤད་པ་འདི་འདྲ་མ་བྱུང་བས། །སྤྲུལ་བའི་སྐུ་གཅིག་ཡིན་ཞེས་ངོ་མཚར་གྱུར། །ཉེར་བཞིར་མཁན་ཆེན་བསོད་ནམས་གྲགས་པ་སོགས། །དགེ་སློང་བཞི་བཅུ་ཙམ་གྱི་སྐུ་དྲུང་དུ། །བསྙེན་རྫོགས་མཛད་ནས་འདུལ་བ་སྡེ་བཞི་གསན། །མཁས་པར་མཛད་ནས་དགུང་ལོ་ཉེར་བརྒྱད་ལ། །ཀྱཻ་རྡོར་བསྒྲུབ་པ་མཛད་པས་བུམ་ཆུ་ཁོལ། །ནམ་མཁར་ཀྱཻ་རྡོར་ལྷ་དགུའི་ཞལ་གཟིགས་ནས། །བསྒྲུབ་པ་མཛད་པས་ངོ་མཚར་ལྟས་བཟང་བྱུང༌། །དགུང་ལོ་ཉེར་དགུར་ས་སྐྱའི་གདན་ས་མཛད། །དབྱར་ཆོས་དགུན་ཆོས་བཙུགས་ནས་ཆོས་མང་གསུངས། །དེ་དུས་ཉམས་མྱོང་ཁྱད་པར་ཅན་ཡང་མཛད། །དེ་རྗེས་ཇོ་ནང་སྒོམ་ཆེན་མཆོག་རྣམས་ཀྱི། །ཉམས་མྱོང་ཁྱད་འཕགས་སྐྱེ་ཚུལ་གླེང་གསན་པས། །སྤྱན་ཆབ་འཁྲིགས་ནས་དགུང་ལོ་སོ་གཅིག་དུས། །ཇོ་ནང་དཔལ་དུ་རྟེན་འབྲེལ་ལེགས་པའི་ངང༌། །ཆོས་རྗེ་ཡོན་ཏན་རྒྱ་མཚོའི་དྲུང་དུ་ཕེབས། །སྦྱོར་དྲུག་ལ་སོགས་ཟབ་ཁྲིད་སྣ་ཚོགས་ཀྱི། །ཟབ་མོའི་ཆོས་སྐོར་ཐམས་ཅད་ལེགས་གསན་ནས། །ཉམས་མྱོང་ཁྱད་ཅན་ཐད་ཀར་རྒྱུད་ལ་འཁྲུངས། །རྒྱུད་འགྲེལ་ལ་སོགས་བཀའ་ཆོས་མཐའ་ཡས་གསན། །རྡོ་རྗེ་ཚིག་གི་མདུད་གྲོལ་དཀར་རྩིས་དང༌། །ལྷ་བྲི་ལ་སོགས་ཞོར་ལ་སྦྱང་བ་མཛད། །སྐྱིད་ཕུག་བཞུགས་ནས་ཆོས་གྲགས་དཔལ་གྱིས་ནི། །རྒྱུད་འགྲེལ་མཁྱེན་མཛད་དགུང་ལོ་སོ་གསུམ་ནས། །སོ་བཞིའི་བར་དུ་ཇོ་ནང་ཚོགས་པ་ལ། །དབྱར་ཆོས་དགུན་ཆོས་དབང་བཀའ་སྣ་ཚོགས་གསུངས། །དགུང་ལོ་སོ་ལྔར་གདན་ས་མཛད་ནས་ནི། །གདུལ་བྱ་ཐམས་ཅད་སྨིན་གྲོལ་ལམ་ལ་སྦྱར། །ལོ་གཉིས་རྗེས་ནས་ཆོས་རྗེ་རིན་པོ་ཆེ། །ཡོན་ཏན་རྒྱ་མཚོ་ཞི་བར་གཤེགས་རྫོངས་སུ། །སྐུ་འབུམ་ཆེན་པོ་འཛམ་གླིང་རྒྱན་བཞེངས་ཚེ། །རྡོ་གཏེར་ཤིང་གཏེར་རིན་པོ་ཆེ་ལ་སོགས། །དཔག་མེད་འདུས་ནས་ཉིན་མོ་ལྷ་མི་དང༌། །མཚན་མོར་ཀླུ་དང་མི་མ་ཡིན་རྣམས་ཀྱིས། །མིག་འཕྲུལ་ལྟ་བུར་བཞེངས་ཏེ་དེ་སྐབས་སུ། །ཆོས་རྗེ་ཉིད་ཀྱིས་སྐུ་ཡི་བཀོད་པ་ནི། །དུས་གཅིག་དཔག་མེད་ངོ་མཚར་མཛད་པ་བསྟན། །རབ་གནས་མཛད་ཚེ་དགེ་ལེགས་བཀྲ་ཤིས་ཀྱི། །ངོ་མཚར་དཔག་མེད་བྱུང་བ་བསམ་བརྗོད་བྲལ། །བྲེ་ནང་ཙནྡན་བདེ་མཆོག་ཀྱེ་རྡོར་དང༌། །དུས་འཁོར་རྟ་མགྲིན་སྐུ་དང་གདོང་འདེགས་ཀྱི། །པདྨའི་ནང་དུ་དུས་འཁོར་གཞལ་ཡས་ཁང༌། །གསེར་གྱི་རྒྱུད་སྡེ་ལ་སོགས་སྐུ་གསུང་ཐུགས། །བྱིན་རྟེན་རླབས་ཅན་མང་པོ་བཞེངས་པར་མཛད། །དེ་ནས་དུས་འཁོར་ཆ་ལག་བཅོ་བརྒྱད་དང༌། །ངེས་དོན་རྒྱ་མཚོ་ལ་སོགས་གྲུབ་མཐའ་ཡི། །ཆོས་སྐོར་བཅུ་དྲུག་ཡུམ་གྱི་མཆན་བུ་དང༌། །གསོལ་འདེབས་ཉེར་ལྔ་ཐུགས་རྗེ་ཆེན་པོ་ཡི། །ཆོས་སྐོར་ཉེར་གསུམ་བསྟོད་བསྐོར་བཅུ་བཞི་དང༌། །སྐུ་འབུམ་ཆེན་པོའི་ཆོས་སྐོར་ལྔ་དང་ནི། །རྡོར་ཕྲེང་དབང་སྐོར་གསུམ་དང་སྤྲིང་ཡིག་བརྒྱད། །སྨོན་ལམ་གསུམ་དང་བཀྲ་ཤིས་བཞི་རྣམས་ཏེ། །ཆོས་ཚན་དོན་ལྔས་ཐུབ་བསྟན་གསལ་བར་མཛད། །དེ་ནས་ལོ་ཙཱ་བློ་གྲོས་དཔལ་ལ་ནི། །གདན་ས་གཏད་ཅིང་འཕྲིན་ལས་རྒྱས་པར་མཛད། །ཆོས་རྗེས་སྐུ་མཚམས་གཙོར་མཛད་མཚན་སྙན་གྱིས། །ཕྱོགས་ཀུན་ཁྱབ་པས་དགུང་ལོ་ང་གསུམ་པར། །རྒྱ་ནག་རྒྱལ་པོས་གདན་འདྲེན་ཞུ་རུ་འོང༌། །རྟ་མགྲིན་བསྒྲུབ་པས་རྟ་སྐད་ལན་གསུམ་གྲགས། །གཟིམ་གཡོག་པས་ནི་ཐེངས་རེ་སྤྱན་རས་གཟིགས། །དུས་འཁོར་ལ་སོགས་མཐོང་སྣང་སྣ་ཚོགས་བྱུང༌། །ཐུགས་ཤེས་མཁྱེན་པ་ཆགས་ཐོགས་མེད་པར་མཛད། །ཆོས་རྗེ་དགུང་ལོ་རེ་གསུམ་ལོ་ཙཱ་བ། །ཞི་བར་གཤེགས་ནས་ཕྱོགས་ལས་རྣམ་རྒྱལ་ལ། །གདན་ས་གཏད་ཅིང་དགུང་ལོ་རེ་བདུན་ནས། །གྲྭ་མང་བཅས་ཏེ་ཁྱི་ལོར་ལྷ་སར་བྱོན། །ལམ་བར་དགེ་འདུན་མང་པོས་གདན་དྲངས་ནས། །རོལ་ཆ་སེར་འཕྲེང་ལེགས་པར་བསུས་བ་བྱས། །འགྲོ་དོན་རིམ་མཛད་ལྷ་སར་ལེགས་བྱོན་ནས། །རྟེན་ལ་མཆོད་པ་ཕུན་སུམ་ཚོགས་པར་མཛད། །ལོ་ངོ་གཉིས་ནས་སྨོན་ལམ་དཔལ་ལ་སོགས། །གདན་འདྲེན་འོངས་ནས་བྱི་བའི་ལོར་བྱོན་ཏེ། །སྟོན་ཁར་ཇོ་ནང་དཔལ་དུ་ཆགས་ཕེབས་ནས། །གཞི་བྱེས་དགེ་འདུན་ཐམས་ཅད་ཐུགས་དགྱེས་ཤིང༌། །ཆོས་དང་ཟང་ཟིང་གིས་ནི་ཐུགས་མཉེས་མཛད། །རྫུ་འཕྲུལ་གྲུབ་རྟགས་མཛད་པ་བརྗོད་མཐའ་བྲལ། །དེ་ནས་དགུང་ལོ་བདུན་ཅུར་ཐུགས་དགོངས་ཀྱི། །བཞེད་དོན་མཐའ་དག་རྫོགས་ནས་ལྕགས་གླང་ལོར། །ཞི་བར་གཤེགས་ཚུལ་བསྟན་ཚེ་ས་གཡོས་པ། །འཇའ་འོད་མེ་ཏོག་ཆར་བ་ལ་སོགས་ཀྱི། །ངོ་མཚར་དགེ་བའི་མཚན་ལེགས་དཔག་མེད་བྱུང༌། །དེ་ནས་ཚེས་བདུན་སྤུར་གྱི་དུས་མཆོད་སྐབས། །སངས་རྒྱས་ཀུན་གྱི་མཛོད་སྤུ་ཞེས་སོགས་ལྟར། །རྟགས་མཚན་ཁྱད་འཕགས་བྱུང་ནས་སྤུར་བཞུས་ཚེ། །དུ་བ་ཐམས་ཅད་འཇའ་འོད་ཁྱབ་པ་དང༌། །འོད་གསལ་རྫ་མ་ལྟ་བུའི་ཕྲེང་བ་ཡི། །ནམ་མཁར་ཁྱབ་པ་གཙང་པོའི་ཆུ་བོ་ནི། །གྱེན་དུ་བཟློག་དང་ནམ་མཁར་རོལ་མོ་སོགས། །སྙན་པའི་སྒྲ་དབྱངས་བྱུང་ནས་བར་སྣང་ལ། །མེ་ཏོག་སྣ་ཚོགས་ཆར་ཟིམ་དྲི་བཟང་སོགས། །ངོ་མཚར་ཁྱད་འཕགས་མཚན་ལེགས་དཔག་མེད་བྱུང༌། །གདུང་ཁང་ཕྱེ་ཚེ་སྒལ་ཚིགས་དུས་འཁོར་གྱི། །ཕྱག་མང་ཡབ་ཡུམ་དཔྲལ་བར་རྟ་མགྲིན་གྱི། །ཡང་གསང་འཁྲོས་པ་དཔུང་གཡས་མི་གཡོ་བ། །ལྟག་པར་སངས་རྒྱས་ཐོད་པ་ཡབ་ཡུམ་བྱུང༌། །ཕྱག་མཛུབ་སྤྱན་རས་གཟིགས་སོགས་སྐུ་དུ་མ། །སྟོང་ཆེན་ལྔ་དང་ཧྲཱིཿཡིག་ཨ་ལ་སོགས། །གསུང་རྟེན་མང་བྱོན་དུང་དཀར་གཡས་འཁྱིལ་དང༌། །རིང་བསྲེལ་མང་པོ་ཐུགས་རྟེན་དཔག་མེད་བྱུང༌། །དེ་ནས་གདུང་ཐལ་སྐུ་འདྲ་བཞེངས་པ་དང༌། །དུས་མཆོད་སྐབས་ཀུན་ངོ་མཚར་དཔག་མེད་བྱུང༌། །འགྲོ་མགོན་བཻཌཱུར་ས་གཞི་གཙང་མ་ལ། །ཆོས་རྗེ་ཐུབ་དབང་མིག་སྟོང་རྣམ་པར་ཤར། །དབྱིངས་ནས་གཟིགས་ཤིག་ཚད་མེད་ཐུགས་རྗེ་ཅན། །ཁྱེད་ཀྱི་ཞབས་དྲུང་འབྲལ་མེད་སྐྱེ་བར་ཤོག །ཅེས་ཆོས་རྗེ་ཀུན་མཁྱེན་ཆེན་པོའི་རྣམ་པར་ཐར་བ་མདོར་བསྡུས་པ་སྟེ་དང་པོའོ། །

བྱང་ཆུབ་སེམས་དཔའ་ཆོས་གྲགས་དཔལ་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་དྷརྨ་ཀིརྟི་ཤྲཱི སྭ་སྟི་སིདྡྷི་ཕ་ལ། དེ་ནས་རང་འདྲའི་བུ་ཆེན་བཅུ་གསུམ་གྱི། །རྣམ་ཐར་མདོར་བསྡུས་ཙམ་དུ་བརྗོད་པ་ལ། ། དཔལ་ལྡན་སྒྱུ་འཕྲུལ་དྲ་བའི་རྒྱུད་ལས་ནི། །རེ་ཞིག་དང་པོར་དངོས་གྲུབ་ཞེས་སོགས་ནས། །སློབ་དཔོན་མཚན་ཉིད་བཤད་པར་བྱ་ཞེས་ལྟར། །བྱང་སེམས་ནམ་མཁའི་སྙིང་པོའི་སྤྲུལ་པ་ནི། །ཀུན་སྤངས་ཆོས་གྲགས་དཔལ་བཟང་དེའི་འཁྲུངས་ཡུལ། །ར་ལུང་ཞེས་བྱ་ཡབ་ནི་བལ་པོ་ཡི། ། རཏྣ་མ་ཏི་ཞེས་བྱ་གཙང་ཉང་སྟོད། །ལྷ་བཟོར་བོས་ནས་སྲས་མོ་ཡེ་ཤེས་སྒྲོན། །བསྡེབ་ནས་ནོར་ཕྱུགས་མང་ཀྱང་བུ་མེད་པས། །ལོགས་སུ་བག་མ་ལེན་ཆས་བྱེད་པའི་ཚེ། །ཡེ་ཤེས་སྒྲོན་ལ་སྡུག་བསྔལ་མི་བཟོད་པས། །གཟིར་བ་རྒྱ་གར་ཞི་བ་བཟང་པོས་མཁྱེན། །དེ་ལ་བརྩེ་བས་གཤེགས་ནས་ར་ལུང་དུ། །ལྷུམས་སུ་ཞུགས་ནས་ཆུ་མོ་ལུག་ལ་ནི། །ངོ་མཚར་ལྟས་བཟང་དུ་མ་བཅས་པ་ཡི། །སྐུ་བལྟམས་དེའི་ཚེ་ཕ་མ་ཉེ་འབྲེལ་བཅས། །དགའ་ཚོར་སྐྱེས་ནས་བཙས་སྟོན་རྒྱ་ཆེར་བྱས། །ཕྱི་དུས་མིང་སྲིང་བདུན་སྐྱེས་དགའ་སྐྱིད་ཅིང༌། །དམ་པ་འདི་ནི་དགུང་ལོ་ལྔ་ལོན་ནས། །ལྷ་བཟོ་ཡིག་འབྲི་བླུག་མགར་ལ་སོགས་པའི། །ཤེས་བྱའི་གནས་ལ་བསླབས་པས་མཁས་པར་གྱུར། །གཟུགས་བཟང་བ་དང་ངག་སྙན་རིགས་བཙུན་པ། །ཤེས་རབ་ཆེ་བ་འདོད་ཆུང་ཡི་གེ་མཁས། །དགུང་ལོ་བདུན་ལོན་བྱང་ཆུབ་འོད་ཟེར་གྱི། །དྲུང་དུ་བྱོན་ནས་དགེ་བསྙེན་ཡང་དག་མཛད། ། བསླབ་པ་ཡང་དག་བསྲུངས་ཞིང་བྱམས་ཆོས་ལྔ། །བློ་ལ་ཟིན་ཅིང་བགྲོ་གླེང་ཆོས་མང་མཁྱེན། །དགུང་ལོ་བརྒྱད་པར་གུང་ཐང་ཞབས་བཅག་ནས། །མཁན་ཆེན་དོན་གྲུབ་དཔལ་སོགས་དགེ་འདུན་གྱི། །དྲུང་དུ་དགེ་ཚུལ་སྡོམ་བླངས་མཚན་ལ་ནི། །ཆོས་གྲགས་དཔལ་བཟང་ཞེས་གསོལ་ཐུགས་དགྱེས་མཛད། །མཁན་ཆེན་དེ་ལས་ཀ་རི་ཀ་ལྔ་བཅུ། །ཡུམ་བརྒྱའི་གཞུང་འགྲེལ་གསན་ནས་ཐུགས་སུ་ཆུད། །དགུང་ལོ་བཅུ་གཉིས་བར་དུ་རྣམ་འགྲེལ་དང༌། །རིགས་གཏེར་རྣམ་ངེས་མངོན་པ་རྣམས་གསན་ཅིང༌། །མཁས་པའི་གྲགས་སྙན་ཐོབ་ཅིང་ས་སྐྱར་བྱོན། །འདྲེན་མཆོག་འཇམ་དབྱངས་ཆོས་ཀྱི་རྒྱལ་མཚན་ལས། །ཕར་ཕྱིན་ཚད་མ་མངོན་པ་སྤྱོད་འཇུག་ཀུན། །གསན་བསམ་མཛད་ནས་བློ་གསལ་མང་པོ་ལ། །ཚད་མའི་གཞུང་བཤད་མཛད་པས་སྙན་གྲགས་ཀྱིས། །ཕྱོགས་ཀུན་ཁྱབ་ནས་དགུང་ལོ་ཉེར་གཅིག་པར། །དབུས་གཙང་དགོན་སྡེ་དུ་མར་གྲྭ་སྐོར་མཛད། །མཁས་པའི་སྐྱེས་བུ་མང་དུ་ལེགས་བསྟེན་ནས། །ཕྱི་ནང་ཆོས་སྐོར་གསན་བསམ་རྒྱ་ཆེན་མཛད། །ཞ་ལུར་བྱོན་ནས་བུ་སྟོན་ཁ་ཆེའི་དྲུང༌། །དབང་ནི་བརྒྱ་རྩ་མི་ཏྲ་བརྒྱ་རྩ་དང༌། །རྡོར་ཕྲེང་བརྟག་གཉིས་ཁྲིད་རིགས་མང་ཐོས་མཛད། །གསང་ཕུ་ནེའུ་ཐོག་ཐར་པ་ལོཙྪ་བ། །ཉི་མ་རྒྱལ་མཚན་དྲུང་དུ་སྒྲ་བསླབ་ཅིང༌། །ལཉྩའི་ཡི་གེ་སོགས་ལ་མཁས་པར་མཛད། །གསང་བ་སྤྱི་རྒྱུད་ཟླ་གསང་ཐིག་ལེ་དང༌། །འཇམ་དཔལ་རྩ་རྒྱུད་བདེ་མཆོག་འབུམ་ལྔ་གསན། །དགུང་ལོ་ཉེར་གསུམ་ཇོ་ནང་དཔལ་དུ་བྱོན། །ཆོས་རྗེ་ཡོན་ཏན་རྒྱ་མཚོ་སོགས་ཀྱི་དྲུང༌། །བསྙེན་རྫོགས་མཛད་ཅིང་འདུལ་ལུང་སྡེ་བཞི་ཡི། །ཆོས་སྐོར་ཞུས་ནས་ལེགས་པར་མཁྱེན་པ་ཡིས། །དགེ་སློང་རྡོ་རྗེ་འཛིན་པའི་མཆོག་ཏུ་གྱུར། །དེ་ནས་དུས་ཀྱི་འཁོར་ལོའི་དབང་རྒྱུད་འགྲེལ། །ཁྲིད་སྐོར་མང་གསན་ཉམས་རྟོགས་ཁྱད་པར་ཅན། །རྒྱུད་ལ་འཁྲུངས་ནས་འཛུམ་ཆོས་ལུང་དུ་བྱོན། །ཆོས་རྗེ་འཛུམ་པའི་དྲུང་དུ་དཔལ་མཁའ་འགྲོ །རྒྱ་མཚོའི་རྒྱུད་དང་སྦྱོང་རྒྱུད་བཅུ་གཉིས་དང༌། །དུས་ཞབས་མཚན་བརྗོད་འགྲེལ་བ་ནཱ་རོ་པའི། །དབང་མདོར་བཤད་པ་རྣམས་ལ་གསན་བསམ་མཛད། །དགུང་ལོ་ཉེར་ལྔར་ཆོས་རྗེ་ཀུན་མཁྱེན་དང༌། །ཞལ་མཇལ་ཆོས་ཀྱི་གསུང་གླེང་མཛད་པ་ཡིས། །མཁྱེན་པའི་ཡོན་ཏན་དཔག་མེད་མངའ་བ་ཡི། །སྐྱེས་བུ་དམ་པར་གཟིགས་ནས་སྐྱེ་མང་ལ། །པཎ་གྲུབ་ཡོན་ཏན་བཟང་པོ་ཡིན་པར་མཁྱེན། །སྤྱན་ཆབ་འཁྲིགས་ཤིང་ཆོས་གནང་གསོལ་བ་གདབས། །ཆོས་རྗེའི་ཞལ་ནས་ངེད་ནི་བྱ་བྲལ་བ། །ཡིན་པས་ཁྱེད་ཀྱི་བླ་མར་འོངས་བ་ཡི། །ལུགས་མེད་ཐོས་པ་ཤིན་ཏུ་རྒྱ་ཆེན་པོར། །སྣང་བས་ཐུགས་ལ་བཏགས་ཞེས་ཞལ་གསུངས་མཛད། །སླར་ཡང་ཕྱག་འཚལ་དབུས་གཙང་གང་ཕྱིན་ཀྱང༌། །ཁྱོད་ལྟའི་ཡོན་ཏན་ཆེ་བ་མ་མཐོང་བས། །དེ་རིང་ཕྱིན་ཆད་འབྲལ་མེད་ཆོས་སློབ་གསོལ། །ཞེས་ཞུས་ཆོས་རྗེས་འོ་ན་དུས་འཁོར་གྱི། །མཛུབ་ཁྲིད་འབུལ་གསུངས་གཞན་གྱིས་མ་ཚོར་བར། །སྐྱིད་ཕུག་ཆོས་ཀྱི་ཕོ་བྲང་བྱོན་ནས་ནི། །ལོ་གྲངས་བཅུ་གཉིས་འབྲལ་མེད་ལེགས་བསྟེན་ནས། །ལོ་གཅིག་རྒྱུད་འགྲེལ་གསན་ནས་མྱུར་མཁྱེན་ལ། །རྩིས་ཀྱི་རྒྱུ་མཚན་རྩིས་དཔེ་ཆེན་མོ་དང༌། །བསྟན་རྩིས་གཟའ་ལྔ་ལྔ་བསྡུས་ནམ་མཁའ་ལ། །གོ་ལ་འཁོར་ཚུལ་ཁྱིམ་ནི་བཅུ་གཉིས་ཀྱི། །བགྲོད་པའི་ངེས་པ་ས་གླིང་བཅུ་གཉིས་དང༌། །ཟླ་བ་བཅུ་གཉིས་འཆར་ཚུལ་ལ་སོགས་ལ། །ལེགས་པར་བསླབ་ཅིང་ཐུགས་ཆུད་སེམས་འགྲེལ་གྱི། །སྐོར་གསུམ་རྡོ་རྗེ་ཕྲེང་བ་ཕར་ཚད་མངོན། །འདུལ་བ་རྒྱུད་འབུམ་ཡུམ་སྐོར་ཁྲིད་རིགས་དང༌། །དབང་དང་སྦྱིན་སྲེག་ནཱ་རོ་ཆོས་དྲུག་དང༌། །དམར་ཁྲིད་ཕྱག་དྲུག་ཆོས་སྐོར་རྣམ་སྲས་ཀྱི། །ལས་ཚོགས་ལ་སོགས་མདོར་ན་ཆོས་རྗེ་ལ། །མངའ་བའི་ཕྱི་ནང་ཆོས་ཀུན་ལེགས་པར་ཞུས། །ལག་ལེན་དམར་ཁྲིད་བཞིན་དུ་ཡང་དག་པར། །གསན་ཅིང་ཆོས་རྗེས་རྟེན་བཞེངས་ཆ་རྐྱེན་ལ། །ནས་ཁལ་སུམ་བརྒྱ་གསེར་སྲང་དགུ་ཕུལ་ནས། །ཕྱི་ནང་ལས་ཀའི་དཔོན་མཛད་དེ་ནས་ནི། །འཇིག་རྟེན་བྱ་སྤངས་ཕ་ཞིང་བགོ་སྐལ་གྱི། །ཐོག་ཤས་ལུག་གསུམ་མ་གཏོགས་དད་ཟས་སྤངས། །སྐུ་མཚམས་གཙོར་མཛད་སྟོན་པ་ཡེ་ཤེས་ཀྱིས། །གདན་དྲངས་ཆུ་བཟང་དགོན་ཕུལ་ཐོག་མར་ལ། །ཚད་མ་རྣམ་ངེས་ལོ་གསུམ་འཆད་ཉན་བཙུགས། །རྒྱུད་འགྲེལ་ཆེན་མོ་དབྱར་དགུན་བཞིར་གསུངས་ལ། །དེ་ཡི་སྟོན་ལ་གསེར་འགྱུར་མཛད་གྱུར་ནས། །དགུན་སྟོད་ཆོས་རྗེ་ཆུ་བཟང་སྤྱན་དྲངས་ནས། །རྟེན་གསུམ་རབ་གནས་མཛད་ཚེ་ཁང་སྟེང་དུ། །འོད་ཟེར་དཀར་པོ་ཟུག་པ་ཀུན་གྱིས་མཐོང༌། །དེ་ནས་དབྱར་དགུན་སྐུ་མཚམས་བཞུགས་པའི་ཚེ། །ནུབ་ཕྱོགས་སྣང་བ་མཐའ་ཡས་སྐུ་དང་ཞིང༌། །མངོན་སུམ་གཟིགས་ནས་རང་ལུས་རྩ་འཁོར་ལ། །ཐིག་ལེ་འབར་འཛག་བྱེད་པ་མཐོང་བ་དང༌། །རླུང་ལྔའི་ཁ་དོག་གསལ་ཞིང་བདེ་ཉམས་ཀྱི། །ཉམས་རྟོགས་འཁྲུངས་ཤིང་སྤྱན་ལྔ་མངོན་ཤེས་དང༌། །ཡོན་ཏན་སྣ་ཚོགས་བརྟན་པར་ཐོབ་པ་དང༌། །བདེན་ཚིག་གྲུབ་ནས་འཛིན་པ་ཐོབ་པ་དང༌། །རྫུ་འཕྲུལ་ལ་སོགས་དཔལ་ལ་མངའ་དབང་བསྒྱུར། །ཆོས་རྗེ་རིན་པོ་ཆེ་ཡི་སྐུ་ཚབ་ཏུ། །རྒྱ་ནག་གིས་ནི་གདན་དྲངས་ཞབས་རྗེས་ཀུན། །ཙམ་པ་ཀ་ཡི་མེ་ཏོག་རེ་རེ་སྐྱེས། །ཕོ་བྲང་བྱོན་ནས་སྐུ་ཡི་འོད་ཟེར་གྱིས། །རིན་པོ་ཆེ་ཡི་ཁང་པ་འོད་འཚེར་སོགས། །ཐམས་ཅད་མོག་མོག་རྒྱལ་པོ་འཁོར་བཅས་ཀྱི། །ཇི་ལྟར་བསམ་པ་ཐམས་ཅད་ལེགས་ཤེས་པ། །མཁྱེན་པ་ཆགས་ཐོགས་མེད་པར་མཛད་ལ་གུས། །དེ་ནས་རྒྱ་ནག་ཟླ་བདུན་ཆོས་བསྟན་ནས། །རྒྱལ་པོས་ཆོས་རྗེའི་སྐུ་གདུང་ལ་བྱོན་པའི། །སངས་རྒྱས་ཐོད་པ་གནང་པའི་ཞུ་བ་ཕུལ། །ཆོས་རྗེ་ལོ་རྒྱུས་ཞུས་པས་སྐྱེ་རབས་ལྔ། །བརྒྱ་ཅུའི་སྡེ་བ་མཛད་དེ་སླར་བྱོན་ནས། །བྱང་ཕྱོགས་བར་དུ་སུ་གའི་དམག་ཟློག་ཅིང༌། །ཁྱི་ལོར་དབུས་གཙང་ཕེབས་ནས་རྒྱུད་འགྲེལ་བཙུགས། །དེ་ནས་འབྲི་གུང་སྟག་ལུང་ཚུན་ཆད་དང༌། །ཡར་ལུང་ཡན་ཆད་གདན་དྲངས་སེར་ཕྲེང་དང༌། །རོལ་ཆས་བསུས་ནས་འདོད་ཆོས་སྣ་ཚོགས་གསུངས། །དེའི་ཚེ་ནམ་མཁར་འཇའ་དང་མེ་ཏོག་ཆར། །གསུང་ཆོས་གཞི་ལམ་འབྲས་གསུམ་རྣམ་བཞག་དང༌། །རྒྱུད་སྡེའི་དབྱེ་བ་རྩིས་དཔེའི་རྒྱུ་མཚན་དང༌། །ཕྱག་དྲུག་ཆོས་སྐོར་རྣམ་སྲས་ཆོས་སྐོར་སོགས། །གསུང་རབ་དུ་མ་བསྟན་པའི་མཛེས་རྒྱན་བཀོད། །དེ་ནས་སྟོད་ལུང་མཚུར་ཕུའི་གནས་སུ་བྱོན། །རྟེན་ལ་ཕྱག་ནས་གཏོར་བས་འབྲུ་ཚུགས་མཛད། །ཕྱིན་ཆད་མར་མེ་འཛིན་པ་བྱུང་བ་དང༌། །མཁས་པ་སྟོང་ཕྲག་མང་པོར་ལུང་རིགས་ཀྱི། །བགྲོ་གླེང་མཛད་པས་རྣམ་པར་རྒྱལ་གྱུར་ནས། །ཆུ་བཟང་བྱོན་ཏེ་བཤད་སྒྲུབ་རྟག་ཏུ་བརྩོན། །དགུང་ལོ་གྱ་གཅིག་བཞེས་དུས་དཔལ་སྟེང་གི །དགོན་པར་བཤད་སྟོན་གདན་འདྲེན་འོང་བའི་ཚེ། །སྲོག་གི་བར་ཆད་འོང་བ་སྲིད་གྱུར་ཀྱང༌། །བསྟན་དང་འགྲོ་ལ་ཕན་པར་གྱུར་ནའང༌། །སྒྱུ་མའི་སྲོག་ལ་མི་ལྟ་ཞེས་གསུངས་ནས། །བྱོན་པའི་ལམ་གར་སྡིག་ཅན་གླང་དར་མའི། ། སྤྲུལ་བ་བྱང་པ་སིད་དྷི་དང་ཕྲད་པས། །རལ་གྲི་ངར་མ་ཤུབ་ནས་ཕྱུང་ནས་ནི། །བྱང་སེམས་རྡོ་རྗེ་ལྟ་བུའི་ཏིང་ངེ་འཛིན། །བཞུགས་ནས་ཇི་ལྟར་བརྒྱབ་ཀྱང་ཆོད་མ་ནུས། །གྲྭ་བ་ཀུན་བྲོས་གསོད་ཐབས་མ་རྙེད་ཚེ། །བྱང་ཆུབ་སེམས་དཔས་སྒྱུ་མའི་སྲོག་འདི་ནི། །ཅི་བྱ་ཁོང་གི་བསམ་པ་བཞིན་དུ་བགྱི། །སྙམ་ནས་སྒྱུ་མ་ལྟ་བུའི་ཏིང་འཛིན་ལ། །མཉམ་པར་བཞག་ནས་རལ་གྲིས་རྒྱོབ་ཅིག་གསུངས། ། མཆན་ཁུང་བརྒྱབ་པའི་ཁྲག་ནི་འོ་མར་གྱུར། །ལན་གསུམ་བརྒྱབ་པས་བྱང་སེམས་ཤངས་ཁུང་ནས། །དཀར་ལ་དྭངས་བ་ཤར་ཤར་བབ་པ་དང༌། །ས་གཞི་མི་བཟད་བཞིན་དུ་གཡོས་པ་ན། །སྡིག་ཅན་མ་དགའ་བྲོས་ནས་སོང་བའི་ཚེ། །གྲྭ་བ་ཐམས་ཅད་ངུ་འབོད་བཞིན་དུ་འདུས། །བལྟས་ཚེ་གསང་བའི་རྩེ་མོར་དམར་ཆ་བབ། །ནམ་མཁའི་ཁམས་སུ་འཇའ་ཚོན་སྣ་ཚོགས་ཀྱིས། །ཁྱབ་སྟེ་བར་སྣང་ཐམས་ཅད་ལྷའི་མེ་ཏོག །ཆུ་ཤོག་ཙམ་གྱིས་བུ་ཡུག་བབ་པ་དང༌། །ས་གཞིའི་ཁམས་སུ་དྲི་བཟང་ཁྱད་འཕགས་ལྡང༌། །སྐུ་གདུང་ཆུ་བཟང་གདན་དྲངས་ཕྱོགས་རྒྱལ་དང༌། །མ་ཏི་པཎ་ཆེན་ལ་སོགས་ཡོངས་འཛིན་དག །འདུས་ནས་སྤུར་སྦྱངས་གདུང་ཁང་ཞལ་ཕྱེ་བས། །དཔྲལ་བར་ཚེ་དཔག་མེད་དང་ཕྱག་ངར་གཉིས། །ཛཾ་ལྷ་སེར་ནག་དུང་དཀར་འབྲུ་ཙམ་གསུམ། །གྲུ་མོ་གཉིས་ལ་འཇམ་དཔལ་ཡིད་བཞིན་གྱི། །འཁོར་ལོ་རྣམས་བྱོན་རིང་བསྲེལ་ཁྱད་པར་ཅན། །དཔག་མེད་བྱུང་ནས་གཤེགས་རྫོགས་དུས་མཆོད་སྐབས། །གཤེགས་དང་གཤེགས་པའི་དུས་ཀུན་ནམ་མཁའ་ལ། །སྒྲ་ཆེན་འཇའ་འོད་རོལ་མོ་ལ་སོགས་པའི། །ངོ་མཚར་དཔག་མེད་དགེ་མཚན་རབ་འབར་བ། །འཕགས་པ་ནམ་མཁའི་སྙིང་པོའི་སྤྲུལ་པའི་སྐུ། །རྒྱལ་སྲས་ཚོགས་གཉིས་རྒྱ་མཚོའི་བསྡུས་ཙམ་ནས། །མ་དྲོས་ཀླུ་ཡི་རྟེན་གནས་གང་ལ་བགྱི། །མ་རུང་སྐྱེ་དགུ་འདྲེན་པར་བྱིན་གྱིས་རློབས། །ཞེས་བྱང་ཆུབ་སེམས་དཔའ་ཆོས་གྲགས་དཔལ་གྱི་རྣམ་པར་ཐར་བ་མདོར་བསྡུས་པ་སྟེ་གཉིས་པའོ།།

ལོ་ཙཱ་བ་ཆོས་ཀྱི་སྤྱན་ཅན་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་མ་ཏི་ཤྲཱི་སྭ་སྟི་སིདྡྷི་ཕ་ལ། འཕགས་པ་སྒྲིབ་པ་རྣམ་སེལ་སྤྲུལ་པ་ནི། །སྒྲ་བསྒྱུར་ཆོས་ཀྱི་རྒྱལ་པོ་བློ་གྲོས་དཔལ། །མདོ་སྨད་ཡབ་ནི་ཡེ་ཤེས་བཟང་པོ་དང༌། །ཡུམ་ནི་ལྷ་མོ་སྦྱིན་དགའ་གཉིས་ཀྱི་སྲས། །ཆུ་ཕོ་རྟ་ཡི་ལོ་ལ་སྐུ་འཁྲུངས་བ། །དེ་ཚེ་མཁའ་ལ་འཇའ་འོད་མེ་ཏོག་དང༌། །རོལ་མོ་ལ་སོགས་ངོ་མཚར་དཔག་མེད་བྱུང༌། །སྐུ་གཟུགས་མཚན་ལེགས་མཛེས་པ་ངག་སྙན་དང༌། །བློ་གསལ་སྙིང་རྗེ་ཡོན་ཏན་དཔག་ཏུ་མེད། །དགུང་ལོ་གཅིག་ནས་ལྔ་བར་མ་ཡི་ནི། །ནུ་ཞོ་མི་གསོལ་མ་ཎི་ཆོས་སྒྲ་གསུངས། །དགུང་ལོ་བདུན་ནས་བླ་མ་དབང་རྫོང་བའི། །མདུན་དུ་གདན་དྲངས་ཀློག་མཁས་སྡུད་པ་ནི། །བློ་ལ་ཟིན་ནས་བརྟག་གཉིས་གཤེད་སྐོར་ལ། །གོ་རྟོགས་བཟང་ཚན་སྐྱེ་བས་སྤྲུལ་སྐུར་གྲགས། །དགུང་ལོ་བརྒྱད་ནས་གུར་སཾ་པུ་ཊི་དང༌། །སྤྱོད་འཇུག་ཀ་རི་ཀ་ཡི་གཞུང་འགྲེལ་གསན། །མཁས་པ་ཐོས་མཆོག་པ་ཞེས་གྲགས་པར་གྱུར། །དགུང་ལོ་དགུ་ནས་རྟ་ནག་ཏུ་བྱོན་ནས། །མཁན་ཆེན་དྲུང་དུ་དགེ་ཚུལ་སྡོམ་པ་བཞེས། །བློ་གྲོས་དཔལ་བཟང་ཞེས་བྱ་མཚན་གསོལ་ཏེ། །སོ་ཐར་བསླབ་བྱ་གསན་ནས་སྡོམ་ལྡན་གྲགས། །གསང་ཕུར་བྱོན་ནས་མཁན་ཆེན་ཚུལ་ཁྲིམས་བཟང༌། །མདུན་དུ་ཕར་ཚད་མངོན་གསུམ་ཆོས་དྲིལ་བས། །དགུང་ལོ་བཅོ་ལྔར་མཁས་པའི་གྲགས་སྙན་བྱུང༌། །ས་སྐྱར་སྟོན་པ་ནམ་མཁའ་ཡེ་ཤེས་ཀྱི། །དྲུང་དུ་ཕེབས་ནས་འདུལ་བ་ལུང་སྡེ་བཞི། །ཆ་ལག་བཅས་པ་གསན་ཅིང་དགོངས་དོན་ནི། །ལེགས་པར་ཐུགས་ཆུད་མདོ་རྒྱུད་ཡུམ་སྐོར་གསན། །ཐོས་པ་རྒྱ་ཆེན་མཛད་ནས་ཆོས་སྤྱན་མངའ། །དབུས་གཙང་གྲྭ་སྐོར་མཛད་པས་རིགས་པའི་རྩལ། །སྦྱངས་པས་གཞོན་ནུ་ལོ་ཆུང་དེ་ཙམ་ལ། །མཁས་པ་ངོ་མཚར་གླེང་བ་མང་དུ་བྱུང༌། །མཁས་པ་བློ་གསལ་ཐམས་ཅད་སྐུ་དྲུང་དུ། །ཆོས་གཏམ་མི་ནུས་རང་བཞིན་སྐྲག་པར་གྱུར། །དགུང་ལོ་ཉེར་ལྔ་ལོན་ནས་བྲག་རམ་དུ། །བྱོན་ནས་དཔང་ལོ་ཙཱ་བ་བློ་བརྟན་ལས། །སྒྲ་དང་བརྡ་རིག་ལཉྩའི་ཡི་གེ་བསླབ། །མྱུར་མཁས་དཔང་གིས་ཁྱོད་ནི་ཐོས་པ་ལ། །རྒྱ་ཆེན་མཛད་པ་ལགས་ན་ད་ནས་བཟུང༌། །ཟབ་མོ་ནང་གི་ཆོས་སྐོར་འཇུག་དགོས་གསུངས། །དེ་ལྟའི་ཆོས་མཆོག་སུ་ལ་ཡོད་གསུངས་ནས། །དཔང་གིས་ཇོ་ནང་ཀུན་མཁྱེན་ལྟ་བུ་ནི། །རྒྱ་གར་དཀའ་བ་ཞེས་སོགས་སྐུའི་སྙན་པ། །རྒྱ་ཆེར་གསུངས་པ་གསན་ནས་ཨ་གར་གྱི། །ཡལ་ག་རླུང་གིས་བསྐྱོད་ལྟར་ཐུགས་གཡོ་ཞིང༌། །བ་སྤུ་ཟང་ཟིང་མཛད་ནས་དུང་དཀར་སོགས། །ཕྱག་རྟེན་མང་ཐོགས་ཇོ་ནང་དཔལ་དུ་བྱོན། །ཆོས་རྗེས་མཁས་མཆོག་བརྒྱ་ཕྲག་རྒྱུད་འགྲེལ་གསུང༌། །དུས་སུ་མཇལ་བས་སྐུ་མདུན་གདན་དྲངས་ནས། །གསུང་གླེང་མཛད་པས་ཁོང་ཀྱང་ལྷུན་པོ་ཡི། །སྔོན་ནས་མན་ར་ལྟ་བུར་གྱུར་བར་བཞེད། །དེ་ནས་བཟུང་སྟེ་ཆོས་རྗེ་ལེགས་བསྟེན་ནས། །དབང་ལུང་མན་ངག་ཐོག་མར་གསན་བསམ་མཛད། །ཉམས་མྱོང་ངོ་མཚར་རྨད་བྱུང་དུ་མ་སྐྱེས། །དེ་ནས་སེམས་འགྲེལ་སྐོར་གསུམ་རྒྱུད་བཀའ་དང༌། །དབང་བཀའ་བསྒྲུབ་བཀའ་ཕར་ཚད་མངོན་འདུལ་སོགས། །བོད་འགྱུར་གཞུང་འགྲེལ་ཆ་ལག་ལེགས་པར་ཞུས། །དགུང་ལོ་ཉེར་བདུན་ཆོས་རྗེ་རིན་པོ་ཆེའི། །དྲུང་དུ་བསྙེན་རྫོགས་མཛད་དེ་འདུལ་བ་ཡི། ། ལུང་སྡེ་བཞི་ཡི་དོན་ཀུན་ཚུལ་བཞིན་བསྒྲུབ། །སྐུ་དང་ན་བཟའ་ཚུལ་ཁྲིམས་ཕུན་སུམ་ཚོགས། །དྲི་བཟང་ཕྱོགས་ཀུན་ཐུལ་བའི་དཔལ་མངའ་བ། །དགེ་སློང་རྡོ་རྗེ་འཛིན་པ་མཆོག་ཏུ་གྱུར། །དེ་དུས་ཆོས་རྗེས་གསེར་གྱི་མཎྜལ་དང༌། །ཉིད་ཀྱི་ཆོས་དུང་རྒྱང་གྲགས་དར་འབོལ་གསུམ། །སྣ་དྲངས་དགུ་ཚན་གཅིག་གནང་སྨོན་ལམ་མཛད། །ཚོགས་ཆོས་གསུངས་པའི་ཞུ་བ་ནན་ཕུལ་བས། །ཇོ་ནང་དཔལ་དུ་མཁས་པ་སྟོང་ཕྲག་ལ། །ཕར་ཚད་མངོན་འདུལ་རྒྱུད་འགྲེལ་ཟབ་ཁྲིད་གསུངས། །དེ་ནས་དགུང་ལོ་ཞེ་གཅིག་བཞེས་པའི་ཚེ། །བཀའ་རྒྱུད་གོང་མའི་ཕྱག་དཔེ་ལྷ་ཆ་དང༌། །ལྷ་རྟེན་བཅས་ཕུལ་གདན་ས་དབང་བསྐུར་བས། །ལོ་ངོ་བཅུ་བདུན་ཆོས་ཀྱི་འཁོར་ལོ་བསྐོར། །ཕྲིན་ལས་དར་ཞིང་རྒྱས་པར་ཡང་དག་མཛད། །སྐུ་འབུམ་ཀླུ་ཁང་གནས་བརྟན་བཅུ་དྲུག་བཞེངས། ། བུམ་པར་མཚན་བཟང་སོ་གཉིས་ངོ་བོ་ལ། །ཀ་རིང་སོ་གཉིས་བྲེ་དང་གདུང་འདེགས་དང༌། །པདྨར་དཔེ་བྱད་བརྒྱད་ཅུའི་ངོ་བོ་ལ། །ཀ་ཐུང་བརྒྱད་ཅུས་བཏེགས་པར་མཛད་པའི་ཚེ། །ཆོས་རྗེའི་ཐུགས་དགྱེས་བསྔོ་བ་སྨོན་ལམ་མཛད། །འཇམ་དཔལ་ཤེས་རབ་བློ་འཕེལ་རབ་བསྒྲུབས་པས། །རྒྱ་སྲན་ལྗགས་ཞབས་བཅུག་པའི་མྱུ་གུ་ནི། །ཞལ་སྒོའི་གྲ་གཉིས་ཐོན་ཏེ་དབུས་རྒྱབ་ཏུ། །བསྣོལ་ནས་སླར་ལོག་དཔྲལ་བ་ནས་བསྣོལ་ནས། །སྤྱི་བོར་བསྣོལ་ཏེ་རྩེ་མོར་མེ་ཏོག་གཉིས། །དམར་པོ་ཁ་ཀྱེས་ལྟེ་བར་འཇམ་དཔལ་དང༌། །དབྱངས་ཅན་མ་གཉིས་བཞུགས་པར་གྱུར་བ་ལ། །རིལ་བུ་གང་བྱིན་རིགས་ཡང་བློ་རྣོ་ཞིང༌། །གཞུང་ལུགས་མཁས་པར་བྱེད་པར་གྱུར་བ་ཡིན། །ངོ་སྤྲོད་རྡོ་རྗེ་ཕྲེང་བའི་ཐིག་སྐོར་དང༌། །བཀའ་འགྲེལ་གཟའ་ཟིན་རྩིས་སོགས་སྐབས་སྐབས་གསུངས། །རྒྱུད་འབུམ་དག་ཐེར་མཛད་ནས་གླེགས་བམ་དུ། །བསྒྲིགས་ཤིང་ཟླ་བཞིར་བཤད་སྦྱར་རྒྱས་པར་གསུངས། །དགུང་ལོ་ལྔ་བཅུ་རྩ་ལྔ་བཞེས་པའི་ཚེ། །ཤིང་ཕོ་རྟ་ལོ་རྒྱལ་ཟླའི་ཚེས་བརྒྱད་ཀྱི། །ནམ་གྱི་གོང་ཡོལ་ཙམ་ན་ཞི་བར་གཤེགས། །ཞག་གསུམ་འོད་གསལ་མ་བུ་འཕྲོད་སྟོབས་ཀྱིས། །ཆོས་ཉིད་དེ་བཞིན་ཉིད་ཀྱི་ངང་ལ་བཞུགས། །ས་ཡི་དཀྱིལ་འཁོར་གཞི་ཡི་ཁྱོན་སོགས་ལྟར། །དཀར་པོ་སྟེང་དང་དམར་པོ་ཆུ་ལམ་བྱུང༌། ། སྤུར་སྦྱངས་སྐབས་སུ་སྤུར་ཁང་མཐའ་སྐོར་དུ། །མཆོད་རྫས་དུ་མས་བསྐོར་ཞིང་དགེ་འདུན་པ། །སྟོང་ཕྲག་དུ་མ་འདུས་ཚེ་སྤྲིན་གྱིས་ནི། །ས་གཞི་ཁེངས་ནས་གཅིག་གིས་གཅིག་མི་མཐོང༌། །སྤུར་ལ་མེ་སྦར་སྤྲིན་ཀུན་དུས་གཅིག་ཏུ། །སངས་ཀྱིས་སོང་ནས་ནམ་མཁའ་གཡའ་དག་པའི། །དཀྱིལ་དུ་འཇའ་འོད་སྣ་ལྔ་དར་ཡུག་བརྐྱངས། །ཤར་ནུབ་གང་ཞིང་ལྷ་ཡི་མེ་ཏོག་ལ། །དཀར་དམར་སྔོ་ལྗང་མང་པོ་ཆུ་ཤོག་ཙམ། །སྤུར་ཁང་སྟེང་དུ་གཅིག་རྒྱབ་གཅིག་ནོན་བབ། །སྤྲིན་མེད་འཇམ་པའི་ངང་ནས་དྲི་བཟང་གི །ངད་ལྡང་ནམ་མཁར་རོལ་མོ་གྲགས་པ་དང༌། །ས་གཡོས་སྤུར་སྦྱངས་ཚར་ནས་ནམ་མཁའ་ཡི། །འཇའ་འོད་ཡལ་ནས་ལྷོ་བྱང་མཁའ་ཡི་བར། །འོད་ཟེར་ཟླུམ་པོའི་ཕྲེང་བས་ཁྱབ་པར་གྱུར། །ཞག་བདུན་སྤུར་ཁང་ཞལ་ཕྱེ་ཕྱག་ངར་ལ། །ཁ་སར་པ་ཎི་དཔྲལ་བར་བཅོམ་ལྡན་འདས། །མགྲིན་པར་འཇམ་དཔལ་དུང་དཀར་ལྔ་རིང་བསྲེལ། །དཔག་མེད་ཁྱད་འཕགས་བྱོན་པ་ངོ་མཚར་གནས། །ལོ་ཙཱ་ཞི་བར་གཤེགས་ནས་ཆོས་རྗེ་ཡིས། །མཁན་ཆེན་ཕྱོགས་ལས་རྣམ་རྒྱལ་ལྷ་རྟེན་ཀུན། །གནང་ཞིང་རྒྱལ་ཚབ་གཏད་ནས་འཕྲིན་ལས་བསྐྱངས། །གང་སྐུ་འོད་ཀྱིས་འཇིག་རྟེན་མུན་པའི་ཚོགས། །འཇོམས་མཛད་དཔལ་ལྡན་བླ་མ་མཆོག་ལ་རྒྱལ། ། སྒྲིབ་པ་རྣམ་སེལ་བློ་གྲོས་དཔལ་འབྱོར་ཅན། །ཞབས་དྲུང་སྐྱེས་ནས་ཆོས་ལ་སྤྱོད་པར་ཤོག །ཅེས་ལོ་ཙཱ་བ་ཆོས་ཀྱི་སྤྱན་ཅན་གྱི་རྣམ་པར་ཐར་བ་མདོར་བསྡུས་པ་སྟེ་གསུམ་པའོ།།

ས་བཟང་མ་ཏི་པཎ་ཆེན་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་མ་ཏི་དྷྭ་ཛ་ སྭ་སྟི་སིདྡྷི་ཕ་ལ། རྒྱལ་བ་བྱམས་པ་མགོན་པོའི་རྣམ་འཕྲུལ་ནི། །ས་བཟང་མ་ཏི་པཎ་ཆེན་ཞེས་བྱ་བའི། །འཁྲུངས་ཡུལ་མངའ་རིས་ཡབ་ནི་བཟོད་པ་དཔལ། །ཡུམ་ནི་པདྨ་བཙུན་ཞེས་བྱ་བ་ཡི། །རིགས་རུས་བཟང་བའི་བསོད་ནམས་ཆེ་བའི་སྲས། །ངོ་མཚར་མཚན་ལྟས་བཅས་ཏེ་ཤིང་ཕོ་རྟའི། །ལོ་ལ་སྐུ་བལྟམས་བཙས་མ་ཐག་ཏུ་ནི། །གོམ་པ་གསུམ་བོར་བཞེངས་ཏེ་དགའ་ལྡན་གྱི། །ལྷ་དག་གིས་ཀྱང་ཁྲུས་ཆབ་ལེགས་གསོལ་ནས། །སྐུ་ལ་འཇའ་འོད་བསྐོར་ནས་ཚིག་འདི་སྨྲས། །དགའ་ལྡན་བྱམས་པའི་ཏིང་འཛིན་ངད་བསིལ་བས། །ཉོན་མོངས་ཚ་གདུང་འགྲོ་བ་ཀུན་སྐྱོབ་ཅིང༌། །མི་ལོ་བརྒྱ་ཕྲག་ལྷག་པར་བོད་ཁམས་སྐྱོང༌། །དེ་ནས་འཆི་ཚེ་དགའ་ལྡན་གནས་སུ་འགྲོ། །ཞེས་གསུངས་ཕྱོགས་བཅུའི་སངས་རྒྱས་ཞིང་ཐམས་ཅད། །གྲགས་ནས་བྱང་སེམས་ཀུན་གྱིས་མེ་ཏོག་གཏོར། །ཡུམ་གྱིས་པང་དུ་ལེན་ནས་གསང་ཐབས་སྐྱེད། །གཟུགས་བཟང་རིག་གསལ་བྱམས་ཆེན་དྲི་བཟང་གིས། །ཁང་ཁྱིམ་གང་བ་ཆོས་སྒྲ་གསུང་བ་སོགས། །ངོ་མཚར་བྱུང་བ་གྲུབ་ཐོབ་བྱ་རིན་པས། །བྱམས་པར་གཟིགས་ནས་བྱམས་པ་ཉིད་དུ་མཁྱེན། །ཞབས་རྡུལ་སྤྱི་བོར་གཏུགས་ཏེ་རྗེ་འདི་ཉིད། །རྗེས་ནས་ང་ལ་འབུལ་དགོས་གསུང་ནས་ནི། །ཐུགས་དགྱེས་རང་གནས་གཤེགས་ཤིང་ལོ་བཞིའི་ཚེ། །བྱམས་པའི་ཆོས་ལྔ་ཞལ་འདོན་མཛད་པར་བྱེད། །དགུང་ལོ་བདུན་ལོན་གྲུབ་ཐོབ་བྱ་རིན་པས། །ཡབ་ཡུམ་གཉིས་ལ་མཛོ་མོ་གཅིག་བྱིན་ཏེ། །རི་ཁྲོད་གདན་དྲངས་ཁྲིད་ལུང་མན་ངག་སོགས། །ཟབ་ཆོས་གསན་ཞིང་ཉམས་རྟོགས་རྒྱུད་ལ་སྐྱེས། །དགུང་ལོ་དགུ་ལོན་རྡོ་ར་དགོན་པར་བྱོན། །བླ་མ་རིན་བཟང་མདུན་དུ་བགྲོ་གླེང་དང༌། །ཕར་ཚད་ལོ་གཅིག་གསན་ནས་མཁྱེན་པར་གྱུར། །དགུང་ལོ་བཅོ་ལྔར་སྙེ་ཐང་དུ་བྱོན་ནས། །མཁན་ཆེན་བཀྲ་ཤིས་སེངྒེའི་སྐུ་དྲུང་དུ། །དགེ་ཚུལ་བསླབ་པ་བླངས་ནས་མཚན་ལ་ནི། །བློ་གྲོས་རྒྱལ་མཚན་དཔལ་བཟང་ཞེས་གསོལ་ནས། །ཀ་རི་ཀ་སོགས་སྡོམ་ཚིག་ཆ་ལག་བཅས། །གསན་ནས་ཐུགས་ཆུད་འདུལ་བ་མདོ་རྩ་སོགས། །ཆོས་སྣ་མང་པོ་གསན་ནས་མཁས་པར་གྲགས། །དེ་ནས་ར་ལུང་གནས་སུ་ཞབས་ཀྱིས་བཅག །བླ་མ་ཡེ་ཤེས་རྒྱལ་མཚན་ལེགས་བསྟེན་ཏེ། །འདུལ་བ་མངོན་པ་ཚད་མ་སྤྱོད་འཇུག་སོགས། །དཔག་མེད་སློབ་གཉེར་མཛད་ཅིང་ཚིག་དོན་ཀུན། །ཐུགས་ཆུད་སྟོན་པ་བཟང་བོའི་ཚད་རྡོར་གྱུར། །ས་སྐྱར་འཇམ་དབྱངས་ཆོས་ཀྱི་རྒྱལ་མཚན་ལས། །ཕར་ཚད་མངོན་གསུམ་གུར་སཾ་པུུ་ཊི་དང༌། །བརྟགས་གཉིས་སོགས་ལ་སློབ་གཉེར་དྲིལ་བས་ན། །མཁས་སྙན་ཐོབ་ཅིང་དགུང་ལོ་ཉེར་གཅིག་ཏུ། །སྐྱི་སྟོན་ཉི་མ་རྒྱལ་མཚན་མདུན་དྲུང་ནས། །དབང་ལུང་མན་ངག་གསན་ཅིང་བྲག་རམ་ལ། །གཤེགས་ཏེ་བླ་མ་བསོད་ནམས་བཟང་བོ་ལ། །འཇམ་དཔལ་རྩ་རྒྱུད་གཤེད་སྐོར་ཞི་བྱེད་དང༌། །ནཱ་རོ་ཆོས་དྲུག་དམར་ཁྲིད་སོགས་གསན་ནས། །ཐོས་པ་ཕུལ་བྱུང་དེ་ནས་བྱང་དགོན་དུ། །བྱོན་ཏེ་སྟོན་པ་སངས་རྒྱས་བཟང་པོ་ལས། །བདེ་ མཆོག་འབུམ་ལྔ་ལ་སོགས་ཆོས་མང་གསན། །སྟག་ལུང་བླ་མ་རིན་ཆེན་བཟང་པོ་ལས། །ཡུམ་སྐོར་སོགས་གསན་དཀའ་བཅུའི་གྲགས་པ་བྱུང༌། །དགུང་ལོ་ཉེར་ལྔར་ཞ་ལུར་བྱོན་ནས་ནི། །མཁན་ཆེན་རིན་ཆེན་གྲགས་པའི་སྐུ་དྲུང་ནས། །བསྙེན་རྫོགས་མཛད་ནས་ཚངས་སྤྱོད་དཔལ་གནས་ཏེ། །དགེ་སློང་རྡོ་རྗེ་འཛིན་པའི་མཆོག་ཏུ་གྱུར། །དབྱར་ཆོས་མཁའ་འགྲོ་རྒྱ་མཚོའི་རྒྱུད་གསུངས་པའི། །ཆོས་གྲྭར་ཆོས་རྗེ་ཀུན་མཁྱེན་རྣམ་ཐར་གསན། །དད་པས་སྤྱན་ཆབ་བབས་ནས་ཐལ་སྦྱར་ནས། །གང་སྐུ་མཇལ་བའི་སྨོན་ལམ་ཡང་ཡང་གདབ། །གྲྭ་བ་གཅིག་བཅས་ཇོ་ནང་དཔལ་དུ་བྱོན། །སྔ་དྲོ་ཞིག་སླེབས་ཆོས་རྗེ་ཐུགས་དམ་གྲོལ། །ཆོས་དུང་འབུད་དུས་ཕྲད་པའི་རྟེན་འབྲེལ་བཟང༌། །དགེ་འདུན་འདུས་པ་ཉིས་བརྒྱ་ལྷག་ཙམ་ལ། །རྒྱུད་འགྲེལ་གཞུང་བཤད་གྲྭ་ཟུར་མ་ཉམས་པར། །ཕར་ཚད་མངོན་འདུལ་སྦྲག་ནས་ཆོས་སྟོན་པ། །སྔོན་ཆད་གང་དུ་ཕྱིན་ཀྱང་འདི་ལྟ་བུའི། །བླ་མ་མ་རྙེད་ཐུགས་དགྱེས་ཆེན་པོའི་ངང༌། །སྤྱན་ཆབ་ཤོར་ནས་གྲལ་མཐར་བཞུགས་པའི་ཚེ། །ཆོས་རྗེས་མཁྱེན་ནས་ཆོས་སྟོན་ཕྱི་ཡོལ་གྲོལ། །སྐུ་མདུན་གདན་དྲངས་བསུ་བ་སྤོས་དང་ནི། །གདུགས་དང་འཁར་རྔ་བརྡུང་ནས་ནང་བྱོན་ཚེ། །ཆོས་རྗེས་དབུ་ཞྭ་བླང་ཞིང་ལྡང་བ་མཛད། །ཁོང་གིས་ཕྱག་ཕུལ་ཕྱག་རྟེན་ཅི་རིགས་ཕུལ། །ཇ་ཞུས་ལ་སོགས་ཞབས་ཏོག་ཕུན་ཚོགས་མཛད། །གསུང་གླེང་མཛད་པ་འབྱམས་ནས་མུན་རུབ་ཀྱང༌། །བྱོན་པར་མི་གནང་ཐུགས་རྩིས་ཆེན་པོ་མཛད། །དེ་ནས་བཟུང་སྟེ་ཆོས་རྗེའི་ཞབས་དྲུང་དུ། །འབྲལ་མེད་བཞུགས་པས་ཕྱི་ནང་ཆོས་སྐོར་སོགས། །ཆོས་རྗེ་མངའ་བ་ཀུན་ཞུས་མཁས་པར་གྱུར། །རྩ་བའི་བུ་ཆེན་གྱུར་ཏེ་དེའི་རྗེས་ནས། །ཀུན་སྤངས་ཆོས་གྲགས་དཔལ་དང་ལོ་ཙཱ་བའི། །སྐུ་མདུན་རྩིས་ཀྱི་རྒྱུ་མཚན་དབང་མདོར་སོགས། །ཟབ་ཆོས་མང་ཞུས་དགུང་ལོ་ཞེ་བརྒྱད་དུ། །ལོ་ཙཱ་བློ་གྲོས་བརྟན་ལས་སྒྲ་དོན་དང༌། །བརྡ་དང་བརྡ་ལན་མཆོད་གར་ལ་སོགས་གསན། །དེ་ནས་བླ་མ་ཟླ་བ་རྒྱལ་མཚན་གྱིས། །ས་བཟང་དགའ་ལྡན་འཚོགས་དཔོན་གདན་དྲངས་ནས། །ལོ་གཅིག་དབྱར་ཆོས་དགུན་ཆོས་གསུངས་པ་ཡིས། །རྒྱུད་འགྲེལ་ཤེས་པ་མང་དུ་བྱུང་བར་གྱུར། །དེ་ནས་དགོན་གནས་གཞི་རྟེན་ལེགས་ཕུལ་ནས། །དེར་བཞུགས་སྣར་ཐང་ནག་ཕུག་ཞ་ལུ་དང༌། ། རྭ་ལུང་སྙེ་ཐང་ས་སྐྱ་གསང་ཕུ་སོགས། །དབུས་གཙང་བླ་གྲྭ་མང་པོ་ཉན་པར་འདུས། །བྱམས་པ་གླིང་དུ་སྡེ་བ་དོལ་པ་བསྐུལ། །ཇོ་ནང་དཔལ་གྱི་མཆོད་རྟེན་ཚད་ལྡན་བཞེངས། ཚད་ནི་ལན་གསུམ་བཅད་ཀྱང་དེ་བཞིན་བྱུང༌། །པཎ་ཆེན་ཞུས་པས་རིགས་ལྡན་སྤྲུལ་བའི་སྐུ། །འགྲན་མི་ནུས་པས་གང་ནུས་ཀྱིས་ཤིག་གསུངས། །རྟེན་ཆེན་ཡོངས་སུ་རྫོགས་པ་ལེགས་བཞེངས་མཛད། །བུམ་ནང་པཎ་ཆེན་གསེར་སྐུ་དུས་འཁོར་གྱི། །ཕྱག་མང་མི་བགྲེང་ཚད་མཉམ་ལེགས་བཞེངས་ནས། །རབ་གནས་མཛད་པར་འབྲས་བུའི་མེ་ཏོག་གཏོར། །རྟེན་ལ་ཕོགས་པ་འབྲུ་ཚུགས་མིས་མངོན་སུམ། །ལོ་ཙཱ་བྱམས་པ་ང་ཉིད་ཡིན་གསུངས་ནས། །ཁྲོ་ཕུར་ང་ཡིས་རྒྱ་གར་ནས་འོངས་བའི། །ལྕགས་ཀྱི་སྤར་ཁྲི་ཀླུ་སྒྲུབ་སྒོམ་ཐག་དང༌། །ས་ར་ཧ་པའི་ཕྱག་འཁར་ཡོད་ཅེས་སོགས། །ངོས་བཟུང་ཐུགས་ཤེས་རྨད་བྱུང་མང་དུ་མཛད། །ཁྱད་པར་སྐུ་མཚམས་དམ་པོར་བཞུགས་པ་ཡི། །ནུབ་གཅིག་ཐོ་རེངས་ཙམ་ནས་བརྡ་མཛད་པས། །བྱང་ཆུབ་བཟང་པོ་ཞེས་བྱའི་སྐུ་གཡོག་གང༌། །སྐུ་མདུན་ཕྱིན་ནས་ཅི་ལགས་ཞུས་པ་ཡིས། །དལ་མོ་སོང་ལ་ཕ་རི་གཉའ་ཆད་ན། །ཡོད་པའི་འོབས་ནང་ཅིག་གིས་ནལ་ཕྲུག་ཞིག །བསྒྱུར་ནས་ཡོད་པ་ཁྱེར་ནས་འདིར་ཤོག་གསུངས། །ས་ཐག་རིང་བས་ཉི་མ་ཤར་ཙམ་སླེབས། ནལ་ཕྲུག་ཆོས་རྗེའི་ཐུགས་རྗེས་མ་ཤི་བས། །སྲོག་དང་མ་བྲལ་འགུལ་ནུས་བླང་ནས་འོང༌། ། ཆོས་རྗེའི་ཞལ་ནས་སྐྱེས་བུ་དམ་པ་འོང༌། །ཆོས་རྗེའི་སྲིང་མོ་བུ་རྒྱུད་མང་ལྡན་པ། །བཙན་ཕྱུག་ཡོད་པ་མཛོ་མོ་གསེར་སྲང་གཉིས༌། །བཅས་ནས་གཏད་དེ་ལོ་བདུན་ལོན་དུས་སུ། །བྱིན་ཆད་བྱས་ནས་ལོ་བདུན་ལོན་པའི་དུས། །ཆོས་རྗེའི་མདུན་དུ་གཏད་པས་ཆོས་སློབ་པ། །ད་ལྟ་ས་བཟང་བསོད་ནམས་དཔལ་བ་ཉིད། །གསུང་ཆོས་བཟང་ཞིང་གྱ་ནོམ་མང་དུ་མཆིས། །དེ་ནས་དགུང་ལོ་གྱ་གསུམ་བཞེས་དུས་སུ། །མེ་འབྲུག་ཐ་སྐར་ཟླ་བའི་ཚེས་བཅོ་ལྔར། །ངོ་མཚར་དུ་མ་བཅས་ཏེ་ཞི་བར་གཤེགས། །ཞག་བདུན་དཀར་པོ་སྟེང་དང་དམར་པོ་ནི། །འོག་ཏུ་བབས་ཤིང་སྤུར་སྦྱངས་མཛད་པའི་ཚེ། །ས་གཡོས་ནམ་མཁར་འཇའ་འོད་མེ་ཏོག་གི །ཆར་དང་རོལ་མོ་བཅས་ཏེ་དགའ་ལྡན་གྱི། །ལྷ་ཡིས་བསུས་ནས་དགའ་ལྡན་གནས་སུ་གཤེགས། ། གདུང་ཁང་ཕྱེ་ཚེ་དཔྲལ་བར་རྡོ་རྗེ་འཆང༌། །རྣ་ལྟག་གཉིས་སུ་མི་གཡོ་ཕག་མོ་དང༌། །རྗེ་ངར་གཉིས་ལ་ལྷ་མོ་མགོན་དཀར་དང༌། །དུང་དཀར་གཡས་འཁྱིལ་ལྔ་དང་རིང་བསྲེལ་ནི། །མང་དུ་བྱོན་པའི་ཕུལ་བྱུང་མཛད་ཆེན་གནས། །འཆི་མེད་རྡོ་རྗེ་ལྟ་བུའི་སྐུ་བརྙེས་ཀྱང༌། །ལེ་ལོ་ཅན་རྣམས་ཆོས་ལ་བསྐུལ་བའི་ཕྱིར། །ལྷ་ཡིས་བསུས་ནས་དགའ་ལྡན་གནས་སུ་གཤེགས། །ད་དུང་འདི་འབྲལ་མེད་པར་བྱིན་གྱིས་རློབས། ། ཞེས་པ་ས་བཟང་མ་ཏི་པཎ་ཆེན་གྱི་རྣམ་པར་ཐར་བ་མདོར་བསྡུས་པ་སྟེ་བཞི་པའོ། །

ཁམས་གསུམ་ཆོས་ཀྱི་རྒྱལ་པོ་ཕྱོགས་རྒྱལ་བའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་ཨནྟཿཛ་ཡཿསྭ་སྟི་སིདྡྷི་ཕ་ལ། འཕགས་པ་ས་ཡི་སྙིང་པོའི་སྤྲུལ་པ་དངོས། །ཕྱོགས་ལས་རྣམ་རྒྱལ་འཁྲུངས་ཡུལ་མངའ་རིས་དང༌། །ཡབ་ནི་སྦྱིན་པ་དཔལ་དང་ཡུམ་ཏིང་འཛིན། །སྒྲོལ་མ་ཞེས་བྱ་དབེན་པ་ཉམས་དགའ་བའི། །ནགས་ཚུལ་མེ་རྟའི་ས་གར་སྐུ་བལྟམས་ཚེ། །བྱ་ཚོགས་དུ་མས་བསུས་ནས་སྐད་སྙན་སྒྲོགས། །འཇའ་འོད་ས་གཡོས་ངོ་མཚར་དུ་མའི་གནས། །དགུང་ལོ་བཞི་ནས་རིན་ཆེན་རྡོ་རྗེ་ལས། །ཡི་གེ་སློབ་པས་ཀློག་ལ་མཁས་པར་གྱུར། ། སྤྱོད་འཇུག་གཟིགས་པས་གོ་དོན་ཡང་དག་སྐྱེས། །མཚོ་ཆེན་ཕང་འགྲམ་རི་བའི་བླ་མ་ལས། །པྲ་འབེབས་བརྒྱད་བསླབ་རཏྣ་བྷོ་ངྷི་ལས། །རྡོར་ཕྲེང་དབང་ཞུས་དེ་ནས་པཎྜི་ཏ། །ཨུ་མ་པ་ཏི་ལས་ནི་ལེགས་སྦྱར་གྱི། །སྒྲ་དང་སཾ་ཀྲི་ཏ་ཡི་སྐད་ལ་བསླབས། །དགུང་ལོ་བརྒྱད་ནས་ཆུ་མོ་གླང་གི་ལོར། །བླ་མ་བྱང་ཆུབ་དཔལ་གྱི་ཞབས་ཏོག་ཏུ། །གཙང་ཡུལ་གློ་བུ་སྟོང་ཆེན་དུ་བྱོན་ནས། །མཁས་པ་གཙང་ནག་ལས་ནི་རྩ་ཤེས་དང༌། །དེ་ཡི་འགྲེལ་བ་ཟླ་གྲགས་མཛད་པ་གསན། །དགུང་ལོ་བཅུ་གསུམ་ལོན་པའི་དུས་སུ་ནི། །རྩ་ཤེས་འགྲེལ་བ་ནག་འབྱམ་ཐུགས་ལ་འཆད། །སློབ་དཔོན་རིན་ཆེན་དཔལ་གྱིས་མཁན་པོ་མཛད། །བྱང་ཆུབ་དཔལ་གྱིས་ལས་ཀྱི་སློབ་དཔོན་མཛད། །དགེ་ཚུལ་བསླབ་བླངས་ཆོས་ཀྱི་རྒྱལ་པོ་གསོལ། །རྒྱ་རས་པ་ལས་བདེ་མཆོག་དྲིལ་བུའི་དབང༌། །སྒྲོལ་མ་ས་ལུགས་བདེ་མཆོག་སྙན་རྒྱུད་གསན། །བླ་མ་དང་ཤོད་རྣལ་འབྱོར་མ་ཡི་དབང༌། །སྒྲོལ་ཁྲིད་ཞུས་ནས་འཕན་ཡུལ་གྲགས་པ་ལས། །ཚད་མ་ཕར་ཕྱིན་བསླབ་ནས་མཁས་པར་གྲགས། །ཆུ་ཕུག་དགོན་པར་བླ་མ་བྱང་ཆུབ་དཔལ། །དེ་ཡི་གདན་ས་མཛད་ལ་ལོ་ངོ་གཉིས། །དབུ་མ་རྩ་ཤེས་འཆད་ནས་བསྟན་དོན་མཛད། །ཕར་ཚད་མངོན་འདུལ་སློབ་གཉེར་མཛད་ཕྱིར་དུ། །གུང་ཐང་སྐྱིད་རུང་ལ་སྟོད་ཐོལ་བུ་དང༌། །ཕག་སྐོར་སོགས་ལ་མཁས་པ་མང་པོའི་དྲུང༌། །ཐོས་པ་རྒྱ་ཆེན་མཛད་ནས་ཆུ་གླང་ལོར། །ས་སྐྱར་ཕེབས་ནས་བླ་མ་ཀུན་བློ་ལས། །ཕར་ཚད་གསན་ལ་སྟོན་ཁར་བྲག་རམ་དུ། །སློབ་དཔོན་དཀོན་བཟང་ཕར་ཚད་མངོན་གསུམ་གསན། །མཁས་པར་གྲགས་ལ་དེ་དུས་རང་སྟོང་ལ། །ཞེན་པ་མཛད་ནས་དགུང་ལོ་ཉེར་གཅིག་ནས། །གུང་ཐང་ཆོས་སྐོར་གླིང་དུ་ཞབས་བཅག་ནས། །མཁན་ཆེན་དོན་གྲུབ་དཔལ་ལས་བསྙེན་རྫོགས་མཛད། །དེ་ནས་གསང་ཕུ་ཞྭ་ལུ་སྣར་ཐང་དང༌། །དཔལ་སྟེང་ཁྲོ་ཕུ་ལ་སོགས་དགོན་སྡེ་ཀུན། །གྲྭ་སྐོར་མཛད་དེ་ཀུན་ལས་རྒྱལ་བས་ན། །ཕྱོགས་ལས་རྣམ་རྒྱལ་ཞེས་བྱའི་མཁས་སྙན་གྱིས། །གྲགས་པའི་རྔ་གསང་ཕྱོགས་བཅུར་ཁྱབ་པར་གྱུར། །ས་སྐྱར་བྱོན་ནས་འོད་ཟེར་སེངྒེ་ཡིས། །བླ་མ་ཀུན་དགའ་རྒྱལ་མཚན་ལ་གསོལ་བ། །གུང་ཐང་ཕྱོགས་ལས་རྣམ་རྒྱལ་ཞེས་བྱ་བའི། །ཐུགས་རྒྱལ་ཅན་གཅིག་གྲྭ་སྐོར་འོང་གི་ཞུས། །བླ་མ་མཉེས་ཏེ་ནང་བར་བྱང་ཆུབ་དཔལ། །སོགས་དང་བགྲོ་གླེང་མཛད་པས་རྒྱལ་བར་གྱུར། །ཞྭ་ལུར་བུ་སྟོན་ཕར་ཕྱིན་གསན་བསམ་མཛད། །འོན་ཀྱང་ཐུགས་བསྐྱེད་ལྷག་པོ་མ་བྱུང་གསུངས། །དེ་ནས་འཕན་ཡུལ་བཀྲ་ཤིས་སེངྒེ་ལས། །དབུ་མ་རྩ་ཤེར་ཤེར་འཇུག་བསྟོད་ཚོགས་དང༌། །རིགས་ཚོགས་རྣམས་གསན་ཡར་བོ་གྲ་ཐང་དུ། །བླ་མ་ར་ཀ་བ་ཞེས་གྲགས་པའི་མདུན། །དྲིལ་བུ་སྐོར་གསུམ་རྒྱུད་རྟོགས་བདུན་ལ་སོགས། །གཤེད་སྐོར་ཀྱཻ་རྡོར་ས་ལུགས་རྔོག་ལུགས་སོགས། །དབང་བཀའ་ཐམས་ཅད་ཞུས་ནས་གཙང་ལ་བྱོན། །བྲག་རམ་བཞུགས་དུས་ཆོས་རྗེ་ཀུན་མཁྱེན་གྱི། །གྲགས་པ་ཁྱད་ཅན་གཞན་དང་མི་འདྲ་བའི། །མཆོད་རྟེན་ཆེན་པོ་ངོ་མཚར་བཞེངས་བ་ཐོས། །ལུང་རིགས་བགྲོ་གླེང་གཏན་ལ་དབབ་དགོས་སྙམ། །ཇོ་ནང་ཀུན་མཁྱེན་སྔ་རབས་གྲུབ་མཐའ་དང༌། །མི་མཐུན་སྲོལ་གཏོད་དེ་ལ་ལུང་རིགས་ཀྱི། །བགྲོ་གླེང་བྱེད་པར་ཞག་འགའ་འགྲོ་དགོས་གསུངས། །དཀོན་བཟང་པས་ནི་མཚུངས་པ་མེད་པ་ཡི། ། སྐྱེས་ཆེན་དམ་པ་གངས་ཅན་ཁམས་ན་མེད། །དེར་བྱོན་བློ་སྐྱེད་འབྱུང་བ་སྲིད་པར་བཤད། །ཇོ་ནང་ཕྱིན་ནས་དགེ་འདུན་རྒྱ་མཚོ་ལ། །ཆོས་སྟོན་ཚར་ནས་སླེབས་པ་སྐུ་གཉེར་ལ། །འཕྲིན་བཅུག་སྐུ་དྲུང་ཞུས་ནས་ནང་ཕེབས་གསུངས། །གདན་དྲངས་ཡོལ་བ་ཕྱེས་ནས་སྐུ་ཡི་ནི། །གཟི་བརྗིད་མ་བཟོད་ཕྱག་འཚལ་ལུས་འདར་ཏེ། །ཚུལ་ཁྲིམས་དྲི་བཟང་ཕུན་སུམ་ཚོགས་པ་བྲོ། །མཚན་དཔེ་འབར་བ་མཐོང་ནས་དེ་བཞིན་དུ། །དེ་བཞིན་གཤེགས་པ་དངོས་ཀྱི་འདུ་ཤེས་བྱུང༌། །ཕྱག་རྟེན་ཕུལ་ནས་ཆོས་རྗེ་རིན་པོ་ཆེས། །མཁྱེན་བཞིན་སྟོན་པ་གང་ནས་རིགས་སུ་ཡིན། །གསུངས་པས་རང་དབང་མེད་པར་སྐད་འདར་ནས། །ཞུས་པ་ཁོ་བོ་མངའ་རིས་པ་ཞིག་ལགས། །དབུས་གཙང་གཉིས་སུ་སློབ་གཉེར་བྱེད་དུ་འོང༌། །སློབ་གཉེར་འཕེལ་བ་བྱུང་ལགས་ཞུས་པ་དང༌། །དེ་ནས་ཕན་ཚུན་གསུང་གླེང་ཞིབ་རྒྱས་མཛད། །དེ་ནས་ཆོས་རྗེ་ཕར་ཚད་མངོན་འདུལ་ཀྱི། །གཤག་རལ་མཛད་པས་སྔོན་ཐོས་མ་མྱོང་བའི། །གསུང་རབ་ལུང་འདྲེན་དཔག་མེད་གསུང་བ་ན། །ཁོང་ནི་གང་གཱའི་འགྲམ་དུ་བ་རྗེས་ཆུ། །གྱུར་བས་ཁོ་བོ་ཆོས་གོ་མ་རེད་སྙམ། །དུས་འཁོར་སློབ་གཉེར་བྱེད་པའི་ཞུ་བ་ཕུལ། །དུས་དང་བསྟུན་ནས་ཆུ་ཕོ་བྱི་བའི་ལོ། །ནག་པ་ཟླ་བར་དུས་འཁོར་དབང་ཆེན་གནང༌། །དེ་ནས་སྦྱོར་དྲུག་རྒྱུད་འགྲེལ་ཚར་གཅིག་གསན། །དེ་ལ་གོ་རྟོགས་སྐྱེ་དཀའ་གཅིག་བྱུང་བ། །དབྱར་ངོས་ཀུན་སྤངས་ཆོས་གྲགས་དཔལ་གྱི་དྲུང༌། །རྒྱུད་འགྲེལ་གསན་ཅིང་གྲུབ་མཐའི་གནད་འགག་བསླབ། །གོ་རྟོགས་དགའ་རབ་ཆགས་ནས་ཐུགས་མཉེས་མཛད། །ས་བཟང་མ་ཏིའི་མདུན་དུ་ཀཱ་ལཱ་པའི། །ལེའུ་དང་པོ་སྙན་ངག་མེ་ལོང་གི །རྒྱུད་འགྲེལ་གསན་ནས་ཆོས་རྗེ་རིན་པོ་ཆེའི། །སྐུ་མདུན་ཕྱི་ནང་ཆོས་སྐོར་ཐམས་ཅད་ཞུས། །དགུང་ལོ་ཉེར་བདུན་ཇོ་ནང་དཔལ་དུ་ཕེབས། །དགུང་ལོ་སོ་བཞིར་ལྷ་སར་ཇོ་ཤཱཀ་གཉིས། །གསེར་ཆབ་ཕུལ་ཞིང་སྨོན་ལམ་གསོལ་གདབ་གནང༌། །དེ་ནས་དགོན་སྡེ་མང་པོར་བཤད་སྟོན་དུ། །གདན་དྲངས་མ་བྱོན་ཇོ་ནང་ཉིད་དུ་བྱོན། །ཆོས་རྗེ་རིན་པོ་ཆེ་ཡི་ཞབས་དྲུང་ཕེབས། །ཆོས་གྲགས་དཔལ་བའི་དྲུང་དུ་འབུལ་ཆེན་བཀྱག །ལོ་ཙཱ་བ་ལས་ཨེ་ཝཾ་སྒྲ་སྒྲུབ་སོགས། །ཆོས་མང་ཞུས་ལ་དེ་ནས་ངམ་རིང་དུ། །གདན་དྲངས་རྒྱུད་འགྲེལ་བཙུགས་ནས་སོ་དགུ་ལ། །ངམ་རིང་གདན་ས་མཛད་དེ་བཀའ་འགྱུར་ནི། །ཆུ་མོ་སྦྲུལ་ལོ་བྱ་ཟླའི་ཚེས་གཅིག་ལ། །དབུ་བཙུགས་ཤིང་ཕོ་རྟ་ལ་ལེགས་གྲུབ་ནས། །ཆོས་རྗེ་ཉིད་ཀྱིས་ཇོ་ནང་ཕུག་ནས་ནི། །རབ་གནས་མཛད་པའི་ཉིན་བར་ངམ་རིང་དུ། །ཡི་གེ་རྣམས་ཀྱི་དབུ་ཕྱེས་དེར་ཡོད་པ། །ཀུན་གྱི་མིག་སྔར་ཕྱག་ནས་ཡི་གེའི་སྟེང༌། །བབས་པ་མཁའ་ལ་འཇའ་འོད་མེ་ཏོག་གི །ཆར་བབས་ངོ་མཚར་མཛད་པ་རྨད་བྱུང་བ། །ལོ་ཙཱ་གཤེགས་ནས་ཆོས་རྗེ་ཕྱོགས་རྒྱལ་བ། །གསོལ་འདེབས་བྱོན་ནས་ཇོ་ནང་གདན་ས་མཛད། །དབྱར་དུས་ངམ་རིང་བྱོན་ནས་གདན་ས་བ། །མཁན་ཆེན་འཕགས་པ་བཞག་ནས་ཇོ་ནང་བྱོན། །ལོ་བཞིར་གདན་ས་མཛད་ནས་སེ་མཁར་བཞུགས། །ཆོས་ཀྱིས་དུས་ཚོད་འདའ་བར་མཛད་པ་ལགས། །ཆོས་རྗེ་ཞི་བར་གཤེགས་ནས་ཇོ་ནང་བྱོན། །དུས་མཆོད་བཙུགས་ཏེ་དགུང་ལོ་དྲུག་ཅུ་ལ། །ཇོ་ནང་རྒྱུད་འགྲེལ་གསུངས་ནས་རྫོགས་ལྡན་བཞད། །དགུང་ལོ་དོན་གཉིས་ལྷ་སར་རྟེན་གསུམ་ལ། །མཆོད་པ་རྒྱ་ཆེར་ཕུལ་ཏེ་ལམ་བར་ནས། །དགོན་སྡེ་མང་པོས་སེར་ཕྲེང་རོལ་ཆས་བསུས། །སེམས་ཅན་རྣམས་ལ་ཆོས་ཀྱིས་ཆར་བ་ཕབ། །ཇོ་ནང་ཕྱག་འབབ་སུམ་ཆ་བསྒྲུབ་པ་བ། །རྣམས་ལ་བསྙེན་བཀུར་མཛད་ནས་ལྷ་རྩེ་དང༌། །བདེ་ཆེན་ས་སྐྱ་སོགས་ལ་མང་ཇ་བསྐོལ། །དེ་ཡི་ལྷག་མ་ཇ་སིག་སོ་གཉིས་དང༌། །ཐེར་འཕྲུག་གོས་དར་གསེར་དངུལ་རིན་ཆེན་སོགས། །ཆོས་རྗེའི་དུས་མཆོད་རྒྱུ་རུ་བཞག་པར་མཛད། །དེ་ནས་འཇམ་དབྱངས་ཤཱཀྱ་རྒྱལ་མཚན་གྱིས། །གདན་དྲངས་སེ་མཁར་ཆུང་དུ་བྱོན་ལམ་བར། །ཕེབས་ནས་མུན་རུབ་ཞབས་ཏོག་རྣམས་ན་རེ། །དོ་ནུབ་ཆུ་ལ་མི་ཐོན་བཞུགས་དགོས་ཟེར། །བདུད་བྱང་སིད་དྷིས་ལམ་སྒུག་ཡོད་པས་ན། །ད་ལྟ་ཕ་རོལ་ཐོན་དགོས་གསུངས་པའི་ཚེ། །གྲུ་མཁན་འབོད་ཟེར་ཆོས་རྗེས་དེ་མ་འབོད། །ཆུ་འགྲམ་ཚོལ་དང་གྲུ་རྙེད་གསུངས་པ་ལྟར། །གོ་བ་རྙེད་དེ་དཔོན་སློབ་ཕ་རོལ་ཐོན། །མཁར་ཆུང་སླེབས་ནས་ནམ་ལངས་ཆུ་འགྲམ་དུ། །དམག་གིས་གང་འདུག་ཐུགས་ཤེས་ཐོགས་པ་མེད། །ཕར་ཊཱིཀ་ལ་སོགས་གསུང་ཆོས་དཔག་མེད་མཛད། །དེ་ནས་དགུང་ལོ་གྱ་གཅིག་བཞེས་པའི་ཚེ། །ས་ཟླའི་ཚེས་ནི་བཅུ་གཅིག་ཉི་འོད་ཤར། །ཞི་བར་གཤེགས་ལ་འོད་ཟེར་དཀར་པོ་ཡི། །དར་ཡུག་བརྐྱངས་པ་ལྟ་བུ་ནམ་མཁའ་ནས། །གཟིམ་ཁང་སྟེང་དུ་ཚུགས་པ་ལ་སོགས་པ། །ནམ་མཁར་འཇའ་འོད་སྣ་ཚོགས་ཁྱབ་པར་གྱུར། །ཞག་བཞི་ལོན་ནས་ཁམས་དཀར་སྟེང་དང་ནི། །དམར་པོ་ཆུ་ལམ་ནས་འོངས་ཚེས་བཅུ་དྲུག །ཉིན་པར་སྤུར་སྦྱངས་ཉེར་ལྔ་གདུང་ཁང་བསིལ། །ལྟག་པར་རྡོ་རྗེ་འཇིག་བྱེད་ཕྱག་མང་དང༌། །ཕྱག་ངར་སྒྲོལ་མ་དཔྲལ་བར་དུས་འཁོར་དང༌། །ཐུགས་ལྗགས་སྤྱན་གསུམ་དུང་དཀར་ནས་འབྲུ་ཙམ། །དྲུག་དང་རིང་བསྲེལ་དཔག་མེད་དད་པའི་རྟེན། །དེ་ནས་གཤེགས་རྫོངས་ཡང་དག་གྲུབ་པར་བྱས། །དུས་གསུམ་མཁྱེན་པའི་རྣམ་ཐར་འདི་དག་ལ། །མཐོང་ཐོས་དད་པའི་སྤུ་ལོང་གྱུར་པ་རྣམས། །རྟག་པར་ཆོས་རྗེའི་ཞབས་དྲུང་སྐྱེ་བ་དང༌། །ལུང་རིགས་ཟབ་མོའི་ཆོས་ལ་དབང་འབྱོར་ཤོག །ཅེས་ཁམས་གསུམ་ཆོས་ཀྱི་རྒྱལ་པོ་ཕྱོགས་རྒྱལ་བའི་རྣམ་པར་ཐར་བ་མདོར་བསྡུས་པ་སྟེ་ལྔ་པའོ། །

མ་ཎི་ཀ་ཤྲཱི་ཛྙ་ནའི་རྣམ་པར་ཐར་བ་མདོར་བསྡུས་པ།།

མ་ཎི་ཀ་ཤྲཱི་ཛྙ་ནའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་མ་ཎི་ཀ་ཤྲཱི་ཛྙཱ་ན་སྭ་སྟི་སིདྡྷི་ཕ་ལ། འཕགས་པ་ཀུན་ཏུ་བཟང་པོའི་སྤྲུལ་པ་ནི། །འབྲི་གུང་ལོ་ཙྪ་འཁྲུངས་ཡུལ་གྱེར་ཕུ་དང༌། །ཡབ་ནི་ཕུ་རང་རྡོ་རྗེ་བློ་གྲོས་དང༌། །ཡུམ་ལྷ་བཙུན་མ་གཉིས་ཀྱི་སྲས་སུ་ནི། །ས་མོ་གླང་ལ་ངོ་མཚར་བཅས་ཏེ་འཁྲུངས། །དགུང་ལོ་གསུམ་ནས་བྱིས་པའི་ཚོགས་རྣམས་ལ། །སཾ་ཀྲི་ཏ་ཡིས་བཟང་སྤྱོད་ཐུགས་ལ་འཆད། །ཡུལ་མི་དག་གིས་མ་གོ་འཕགས་ཡུལ་གྱི། །ཡེ་ཤེས་བཟང་བོས་གསན་ལ་དགུང་ལོ་ནི། །བདུན་གྱི་བར་དུ་ཡབ་ཀྱི་ཡི་གེ་བསླབ། །ཀློག་མཁས་དགུང་ལོ་བཅུ་གཅིག་གསང་ཕུར་བྱོན། །བླ་མ་ཡེ་ཤེས་བཟང་ལས་དགེ་ཚུལ་གྱི། །སྡོམ་པ་བཞེས་ནས་མཚན་ལ་ནོར་བུ་དཔལ། །ཡེ་ཤེས་བཏགས་ནས་ཀ་རི་ཀ་གཞུང་འགྲེལ། །ཁོང་དུ་ཆུད་ནས་འཕན་ཡུལ་བྱོན་ནས་སུ། །ཡེ་ཤེས་སེང་གེར་ཚད་མ་རིག་རྒྱན་གསན། །ཟླ་གཉིས་བགྲོ་གླེང་ཐོག་གི་ཚྭལ་པར་གྱུར། །དེ་ནས་ཡར་ལུང་གྲ་ཐང་ལྷ་ས་དང༌། །བསམ་ཡས་ལ་སོགས་དབུས་ཀྱི་དགོན་སྡེར་བྱོན། །སློབ་གཉེར་རྒྱ་ཆེན་མཛད་ནས་གཙང་ལ་བྱོན། །ས་སྐྱར་འཇམ་དབྱངས་ཆོས་ཀྱི་རྒྱལ་མཚན་ལས། །ཕར་ཚད་མངོན་གསུམ་གསན་པས་མཁས་པར་གྲགས། །དེ་ནས་བྲག་རམ་མཁན་ཆེན་དཀོན་མཆོག་བཟང༌། །ལ་སོགས་དགེ་འདུན་དྲུང་ལས་བསྙེན་རྫོགས་མཛད། །འདུལ་ལུང་སྡེ་བཞི་གསན་པས་འདུལ་བ་ཡི། །ཆོས་སྐོར་མངའ་བརྙེས་ཞྭ་ལུར་བུ་སྟོན་ལས། །སྒྲ་དང་ལེགས་སྦྱར་སྙན་ངག་བསླབ་པ་དང༌། །དགུང་ལོ་བཅོ་ལྔར་འབྲི་གུང་ཡུལ་དུ་བྱོན། །མཁས་པ་དྭ་ཥྟ་ན་ཀ་ར་ལས་ནི། །རྒྱ་སྐད་སཾ་ཀྲི་ཏ་དང་ལེགས་སྦྱར་གྱི། །སྒྲ་དང་ལཉྩའི་ཡི་གེ་ཡང་དག་བསླབ། །འབྲི་གུང་ལོ་ཙྪ་བ་ཞེས་གྲགས་པ་ལ། །ཝ་ཏི་ཀ་ར་ལས་ནི་རྒྱ་གར་གྱི། །ཤར་ནུབ་ཡུལ་སྐད་སློབ་པས་སྐད་གཉིས་ཀྱི། །སྨྲ་བའི་མཆོག་གྱུར་འབྲི་གུང་གདན་ས་ལ། །ནཻ་གུ་ནཱ་རོ་ཕྱག་ཆེན་གཏུམ་མོ་ཡི། །ཞག་བདུན་སྦྱོང་རྒྱུད་དབང་དང་བཅས་པ་ཞུས། །བདེ་མཆོག་དྲིལ་བུ་ཆོས་གསུམ་འབུམ་ལྔ་དང༌། ། མཁའ་འགྲོ་རྒྱ་མཚོའི་རྒྱུད་སོགས་དཔག་མེད་གསན། །མཁས་པར་གྲགས་པས་དེ་ཡི་གདན་ས་གཏད། །གོང་མའི་ཕྱག་དཔེ་ལྷ་རྟེན་ཆོས་དུང་ཀུན། །ཕྱག་ཏུ་ཕུལ་ནས་ལོ་ངོ་ལྔ་ཡི་བར། །ཤར་གླིང་དགའ་ལྡན་གཟིམ་ཁང་བཞུགས་ནས་སུ། །ཚོགས་ཆོས་སྐྱེས་རབས་བྱམས་ཆོས་སྡེ་ལྔ་དང༌། །དབུ་མ་རྩ་ཤེས་ཚད་བསྡུས་ཕར་ཕྱིན་སོགས། །འདོད་ཆོས་དཔག་མེད་གསུངས་བའི་ནུབ་གཅིག་ལ། །ལྷོ་གླིང་དགེ་རྒན་གཅིག་གིས་ར་ཤད་གཅིག །བཤས་པ་གཟིགས་པས་དེ་ཡི་གྲི་ཆུང་ནི། །རྫུ་འཕྲུལ་གྱིས་བླངས་དབུ་སྔས་བཞག་ནས་སུ། །ནམ་ལངས་བོས་ནས་ཇ་དྲངས་མདང་གྲི་ཆུང༌། །མ་རྙེད་ཨི་ཡིན་གསུངས་ནས་དེའི་སྔོན་དུ། །གྲི་ཆུང་འཕང་ཞིང་ཞལ་ཏ་མཛད་པ་ཡིས། །ཕྱིན་ཆད་དགོན་དེར་ངན་སྤྱོད་ཁྲིམས་ངན་ཀུན། །བྱེད་པ་མི་སྲིད་ཆོས་རྗེ་ཀུན་མཁྱེན་པ། །སྒར་དང་བཅས་པ་སྙེ་ཐང་བྱོན་པ་གསན། །དགུང་ལོ་ཉེར་གཅིག་དེར་བྱོན་མཁས་དབང་དང༌། །དབུས་གཙང་དགེ་འདུན་རྣམས་འདུས་ཕྱག་རྡོར་གྱི། །དབང་བསྐུར་རྒྱུད་གསུངས་དུས་སུ་ཞལ་མཇལ་ནས། ། གསུང་གླེང་མཛད་པས་ཉིན་བྱེད་འོད་རབ་འབར། །དེ་དུས་ནས་བཟུང་ཆོས་རྗེ་རིན་པོ་ཆེ། །འབྲལ་མེད་འགྲོགས་ནས་དུས་ཀྱི་འཁོར་ལོའི་དབང༌། །སྦྱོར་དྲུག་ཅི་རིགས་གསན་ནས་རྒྱུད་འགྲེལ་ནི། །ཚར་གྲངས་བཅུ་དྲུག་ལ་སོགས་ཕྱི་ནང་གི །ཆོས་སྐོར་མ་ལུས་ལག་ལེན་དམར་ཁྲིད་སོགས། །ཐུགས་ནི་དགྱེས་པར་བརྩེ་བས་རྗེས་སུ་གནང༌། །དེ་ཡི་རྩ་བའི་བུ་ཆེན་གྱུར་བ་ལ། །དགུང་ལོ་རེ་གསུམ་བཞེས་ཚེ་ཆོས་རྗེ་ནི། །ཞི་བར་གཤེགས་ནས་བྲག་དཀར་ཆོས་སྟེང་བྱོན། །ཐུགས་དམ་གཙོ་ཆེར་མཛད་ཚེ་ནངས་བར་ཞིག །བྱ་རིགས་སྣ་ཚོགས་ཅ་ཅོའི་སྐད་འདོན་པས། །ཁྱེད་རྣམས་ང་ལ་མ་འཚེར་གསུངས་མ་ཐག །ཉན་པར་མཛད་སོགས་རྣམ་ཐར་རྨད་དུ་བྱུང༌། །ལོ་གསུམ་གནས་དེར་ཚད་མ་རྒྱུད་འགྲེལ་སོགས། །ཆོས་འཆད་མཁས་པའི་སློབ་མ་མང་རབ་བྱུང༌། །སེངྒེ་རྩེ་བའི་བསྐུལ་ནས་དགེ་འདུན་པ། །བརྒྱ་ཕྲག་གསུམ་ཙམ་དུས་འཁོར་འབྲོ་ལུགས་ཀྱི། །དབང་བསྐུར་ཚེ་ན་ནམ་མཁར་འཇའ་འོད་དང༌། །མེ་ཏོག་ཆར་བབས་རྡོར་དྲིལ་ནམ་མཁར་བཞག །ཞབས་གཉིས་ས་ལ་མ་རེག་ཀུན་གྱིས་མཐོང༌། །དེ་ནས་ཉང་སྟོད་ཆོས་གོང་གདན་དྲངས་ཏེ། །སེར་ཕྲེང་སྐྱ་བ་སྟོང་ཕྲག་རོལ་ཆས་བསུས། །བདེ་མཆོག་དབང་སྐུར་བདེ་མཆོག་སྒྲུབ་ཐབས་ཀྱི། །ཆེ་ཆུང་མང་མཛད་ཆོས་རྗེ་ཉ་དབོན་པས། །རྩེ་ཆེན་གདན་དྲངས་སེར་འཕྲེང་རོལ་ཆས་བསུས། །འབུལ་ནོད་བཀྱག་སྟེ་རྣམ་གཉིས་དབུ་གཏུགས་མཛད། །གསུང་གླེང་ཕན་ཚུན་མཉེས་མཉེས་ཞག་ལྔར་མཛད། །དེ་ནས་རྒྱ་མཁར་རྩེ་བས་གདན་དྲངས་ཚེ། །ཉ་དབོན་སྐྱེལ་ཐུང་མཛད་དེ་གཅིག་ལ་གཅིག །ཕྱག་འཇུས་མཛད་ནས་སྐུ་རིམ་ལ་འབད་པའི། །ཕན་ཚུན་ཞལ་ཏ་མཛད་དེ་འབྲལ་མི་ཕོད། །ཕྱི་ལྟས་གཉིས་ཀས་མཛད་ནས་ཕོ་བྲང་དུ། །སེར་ཕྲེང་རོལ་ཆས་བསུས་ནས་དགོན་དེར་ཕེབས། །སྐུ་འབུམ་མཐོང་གྲོལ་བཞེངས་པར་བསྐུལ་བའི་ཚེ། །ཉིད་ཀྱིས་རབ་གནས་མཛད་ན་བཞེང་ཞེས་གསུངས། །ལོ་ཙཱས་ཆོས་རྗེ་ཉ་དབོན་པས་མཛད་པའི། །ཞལ་ཏ་གནང་སྟེ་ཟླ་གཅིག་འདོད་ཆོས་གསུངས། །མཐར་ནི་མཁས་པར་གྲགས་པའི་རབ་བྱམས་པ། །ཉེར་ལྔ་ཙམ་དང་ཉིན་བཞིར་རྩོད་པ་མཛད། །ལུང་རིགས་བགྲོ་གླེང་གཏན་དབབ་རྩོད་ལས་རྒྱལ། །གཞན་སྟོང་བསྟན་པ་སྤེལ་ཞིང་ཇོ་ནང་དུ། །གདན་འདྲེན་འོངས་ནས་མཁས་པ་དེ་དག་གིས། །ལ་ཁའི་བར་དུ་བསྐྱེལ་ཐུང་བྱས་ནས་སུ། །ཇོ་ནང་དཔལ་དུ་བྱོན་ནས་བསུ་བ་བྱས། །ཀུན་དགའ་རྭ་བའི་ཁང་པར་སྤྱན་དྲངས་ཏེ། །ཆོས་རྗེ་རིན་པོ་ཆེ་ཉིད་རྗེས་སུ་དྲན། །སྤྱན་ཆབ་མཛད་ནས་དེ་ཡི་མཆོད་རྟེན་ལ། །དངོས་སུ་ཕྱག་སྟོང་སྤྱན་སྟོང་གསལ་བར་གཟིགས། །ཐུགས་ནི་ཏིང་ངེ་འཛིན་ལ་འབྱམས་ཀླས་ཏེ། །ལོ་བརྒྱད་བཞུགས་ནས་བླ་མ་གདན་ས་བའི། །སྔ་ཆོས་བཏང་ནས་མ་ཎི་ཀ་ཤྲཱི་ནས། །ཕྱི་ཆོས་རྒྱུད་འགྲེལ་ཚོགས་ཆོས་ལེགས་པར་གསུངས། །དགུང་ལོ་དོན་གཉིས་བཞེས་དུས་སྐུ་བགྲེས་ནས། །འགྲོ་འདུག་དཀའ་ཚེ་མཁའ་ལྡིང་ཕུང་པོ་ཡི། །རི་ཁྲོད་གདན་འདྲེན་ཞུས་ཚེ་བསྟན་པ་ལ། །དགོངས་ནས་དེར་བྱོན་དགེ་འདུན་མང་པོ་ལ། །རྒྱུད་འགྲེལ་ལོ་གཉིས་བཙུགས་ནས་མཚན་བརྗོད་ཀྱི། །འགྲེལ་བ་ལ་སོགས་གསུང་ཆོས་མང་དུ་མཛད། །དགུང་ལོ་དོན་ལྔ་བཞེས་ཚེ་བསྟན་པ་དང༌། །སེམས་ཅན་ཕན་ཐབས་ཞལ་ཏ་སྣ་ཚོགས་གནང༌། །ལྷ་ཆ་ཐམས་ཅད་ཇོ་ནང་དཔལ་དུ་ནི། །སྐུ་འབུམ་འཛམ་གླིང་རྒྱན་དུ་བསྐུར་ནས་སུ། །མེ་ཡོས་དཔྱིད་ཟླ་ར་བའི་ཚེས་བཅུ་ལ། །ཞི་བར་གཤེགས་ནས་ཞག་པོ་ཉེར་གཅིག་ཏུ། །རྣམ་སྣང་ཆོས་བདུན་ཚང་བར་མཛད་པ་ལ། །གཟི་མདངས་ཚུར་ཚུར་གསལ་ནས་ནངས་བར་དུ། །ཁམས་དཀར་ཤངས་ནས་འབབ་པའི་སར་འོད་ཀྱི། །པད་དཀར་ལག་མཐིལ་ཙམ་གཉིས་འབྱུང་བར་འདུག །དམར་པོ་གསང་བར་བྱོན་ནས་རྗེ་བཙུན་མ། །དམར་མོ་ཞལ་གཅིག་ཕྱག་གཉིས་མ་སྲ་ཞིང༌། །སྐྱེ་མཆེད་ཤིན་ཏུ་གསལ་བར་བྱོན་གྱུར་ལ། །སྤུར་སྦྱངས་དུ་བ་འཇའ་འོད་བཀྲ་ལེགས་གྱུར། །མངོན་དགའི་ཕྱོགས་སུ་སོང་ནས་དེར་བཞུགས་པའི། །དེ་བཞིན་གཤེགས་པ་འཁོར་བཅས་ཀྱིས་བསུས་ནས། །གནས་དེར་གཤེགས་ལ་སྤུར་ཁང་ཞལ་ཕྱེ་བས། །སྤྱི་བོར་ཤཱཀ་ཐུབ་དཔྲལ་བར་ཡུམ་ཆེན་མོ། །ཕྱག་ངར་བདེ་མཆོག་ཕྱག་མང་དུང་དཀར་གྱི། །ཆེ་ཆུང་གཉིས་དང་རིང་བསྲེལ་དཀར་འཇམ་པ། །མང་བྱོན་ཐམས་ཅད་ཇོ་ནང་གདན་དྲངས་ནས། །རྒྱལ་སྲས་ཚོགས་གཉིས་སྤེལ་བའི་གྲུ་གཟིང་གིས། །མར་གྱུར་འགྲོ་བའི་མཚོ་ལས་བདག་སྒྲོལ་ནས། །རྣམ་གྲོལ་ཐར་བའི་གླིང་དུ་ཕྱིན་པ་དང༌། །ཀུན་བཟང་བླ་མ་མཆོག་དང་མཇལ་བར་ཤོག །ཅེས་མ་ཎི་ཀ་ཤྲཱི་ཛྙ་ནའི་རྣམ་པར་ཐར་བ་མདོར་བསྡུས་པ་སྟེ་དྲུག་པའོ། །

ཞང་སྟོན་རིན་པོ་ཆེའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་པུཎྱ་ཀིརྟི་སྭ་སྟི་སིདྡྷི་ཕ་ལ། གསང་བའི་བདག་པོའི་རྣམ་འཕྲུལ་ཞང་སྟོན་པ། །ཡབ་ནི་ཆོས་རྒྱལ་དཔལ་དང་ཡུམ་ཆོས་སྒྲོན། །འཁྲུངས་ཡུལ་སྐྱི་ཤོད་ལྷུམས་སུ་ཞུགས་མ་ཐག །ཡུམ་གྱི་མཛེ་ནད་འཕྲོག་ཅིང་ལུས་མཛེས་ཤིང༌། །སེམས་ཀྱི་བདེ་སྟེར་ལྕགས་ཕོ་འབྲུག་གི་ལོ། །ས་ཀའི་བཅོ་ལྔར་སྐུ་བལྟམས་གཟུགས་སྤྱད་མཛེས། །སྟོབས་ཆེ་གསུང་སྙན་ཁམས་རིགས་བཙུན་པ་བྱུང༌། །དགུང་ལོ་དྲུག་ལོན་ཡར་པོ་གྲ་ཐང་ཕྱིན། །རྡོ་རྗེ་རྒྱལ་མཚན་ལས་ནི་ཆོས་བསླབ་པས། །ཟླ་བ་གཉིས་ནས་ཡོན་ཏན་འགའ་རབ་ཆགས། །དེ་ནས་རི་བོ་དགའ་ལྡན་ཕྱིན་ནས་ནི། །ཀུན་སེང་ལ་སོགས་རྩོད་ངར་ཆེ་བ་ཀུན། །མཉམ་དུ་ལུང་རིགས་བགྲོ་གླེང་བྱེད་པ་ལ། །ལན་མེད་ཕམ་པར་མཛད་ནས་ཁོང་ཚོ་ལ། །བཙུན་ཆུང་གཅིག་ལས་འཁོར་གསུམ་ཁུར་དུ་བཅུག །དེ་ནས་ལྷ་སར་བྱོན་ནས་ར་ས་ཡི། །བཅོམ་ལྡན་འདས་དྲུང་མཁན་ཆེན་གཞོན་ནུ་དཔལ། །མདུན་ལས་དགེ་ཚུལ་སྡོམ་པ་ནོད་པར་མཛད། །བསོད་ནམས་གྲགས་པ་དཔལ་བཟང་མཚན་གསོལ་ནས། །ཀ་རི་ཀ་སོགས་གསན་ཅིང་ཐུགས་སུ་ཆུད། །དེ་ལ་སྤྱོད་འཇུག་རྣམ་ངེས་རྣམ་འགྲེལ་གསན། །དེ་ནས་མཚལ་གྱི་གུང་ཐང་དུ་བྱོན་ནས། །བླ་མ་བཀྲ་ཤིས་སེང་གེའི་སྐུ་དྲུང་ནས། །ཕར་ཚད་མངོན་པ་གོང་འོག་ཀུན་ལ་བསླབ། །དགུང་ལོ་བཅུ་བཞིར་ལྕགས་པོ་རི་ལ་བྱོན། །མཚམས་སྦྱོར་ལྔ་བ་སྙན་ངག་མེ་ལོང་དང༌། །ཀླུུ་ཡི་ཟློས་གར་པྲ་འབེབས་ཨ་ཙ་ར། །ནག་པོ་ལས་ནི་གསན་སྦྱང་ལེགས་པར་བྱས། །ཁམས་དབུས་ཆོས་སྡེ་ཀུན་ལ་ཕྱོགས་མེད་འགྲིམས། །ཐོས་བསམ་མཛད་ནས་དགུང་ལོ་ཉེར་གཉིས་ལ། །གཙང་ཕྱོགས་བྱོན་ཏེ་ས་སྐྱའི་ཆོས་གྲྭར་ཕེབས། །མཁན་ཆེན་འཇིགས་མེད་གྲགས་པའི་སྐུ་དྲུང་དུ། །བསྙེན་རྫོགས་མཛད་ཅིང་འདུལ་བའི་ཆོས་སྐོར་བསླབ། །དགེ་སློང་རྡོ་རྗེ་འཛིན་པའི་མངའ་བདག་གྱུར། །དེ་ཉིད་ཕར་ཚད་མངོན་གསུམ་མཛོད་རང་འགྲེལ། །གསན་ནས་གློ་བུ་སྟོང་ཆེན་ལ་སྟོད་དང༌། །བྲག་རམ་ཞ་ལུ་སྣར་ཐང་སྟོད་ལུང་སོགས། །གྲྭ་བསྐོར་མཛད་ནས་མཚུར་ཕུའི་གནས་མཆོག་ཏུ། །རང་བྱུང་རྡོ་རྗེས་ཆོས་རྗེའི་མཛད་སྤྱོད་ཐོས། །སྐུ་ཡི་བ་སྤུ་གཡོས་ནས་སྐུ་དྲུང་དུ། །གདན་དྲངས་གསུང་གླེང་མཛད་པས་ལྷག་པར་གུས། །དེ་ནས་ཆོས་རྗེའི་མདུན་དུ་རྭ་འབྲོ་ཡི། །ལུགས་ཀྱི་དུས་འཁོར་དབང་ཆེན་རྡོར་ཕྲེང་དང༌། །མི་ཏྲ་བརྒྱ་རྩ་བདེ་མཆོག་དྲིལ་བུའི་དབང༌། །ཕྱག་རྡོར་འཁོར་ཆེན་རྟ་མགྲིན་ཡང་གསང་འཁྲོས། །འཇིགས་བྱེད་རྭ་ལུགས་ལ་སོགས་དབང་གསན་ཅིང༌། །སྦྱོར་དྲུག་རྣལ་འབྱོར་གསུམ་གྱི་སྙིང་བོ་དང༌། །ནེ་གུ་ནཱ་རོ་སྒྲུབ་ཐབས་རྒྱ་མཚོ་སོགས། །བཀའ་ཁྲིད་གསན་བསམ་ཉམས་རྟོགས་ཁྱད་འཕགས་སྐྱེས། །སེམས་འགྲེལ་སྐོར་གསུམ་གུར་བརྟག་སཾ་གསུམ་དང༌། །བདེ་མཆོག་འབུམ་ལྔ་གསང་འདུས་སྒྱུ་ཏྲ་དང༌། །མངོན་པ་ཀུན་བཏུས་ཚད་མ་རྣམ་འགྲེལ་སོགས། །ཟབ་མོ་བཀའ་ཆོས་ཐམས་ཅད་ཡང་དག་ཞུས། །མཁས་པའི་གཙུག་རྒྱན་སྐྱེས་བུ་དམ་པར་གྱུར། །དགུང་ལོ་སོ་ལྔར་ཆོས་རྗེ་རིན་པོ་ཆེ། །ཞལ་མཇལ་ནས་བཟུང་རེ་གསུམ་བར་དུ་བསྟེན། །དགུང་ལོ་རེ་བཞིར་མཁན་ཆེན་ལྷ་དབང་གིས། །གདན་དྲངས་དཔལ་སྟེང་དགོན་གཞི་བཅས་པ་ཕུལ། །གཙུག་ལག་ཁང་དང་ཆོས་རྗེ་ཀུན་མཁྱེན་པའི། །གསེར་སྐུ་མི་ཡི་ཚད་ཙམ་རྒྱུད་འབུམ་སོགས། །རྟེན་གསུམ་བཞེངས་ནས་བྱང་སེམས་ཆོས་གྲགས་དཔལ། །རབ་གནས་མཁན་པོར་གདན་དྲངས་ནམ་མཁའ་རུ། །འཇའ་རིས་སྣ་ཚོགས་གུར་ཕུབ་བར་སྣང་ལ། །མེ་ཏོག་དཀར་པོ་ལག་མཐིལ་ཚད་ཙམ་འབབ། །མཁན་ཆེན་ཆོས་གྲགས་དཔལ་བྱོན་སྐྱེལ་ཐུང་མཛད། །གཅིག་ལ་གཅིག་གིས་གུས་ཕྱག་ཡང་ཡང་འཚལ། །དཔལ་སྟེང་ལོ་གྲངས་བཅོ་ལྔར་རྒྱུད་འགྲེལ་ནི། །དབྱར་ཆོས་དགུན་ཆོས་མཛད་ནས་མཁས་མང་བྱུང༌། །དཀའ་འགྲེལ་ལ་སོགས་གསུང་ཆོས་དུ་མ་གསུངས། །ཐུགས་དམ་ངང་ནས་སངས་རྒྱས་སྐུ་དང་ནི། །ཞིང་ཁམས་དཔག་མེད་གཟིགས་པའི་ཐུགས་རྟོགས་སྐྱེས། །དེ་ལྟར་རྣམ་དཀར་ཐོས་བསམ་སྒོམ་གསུམ་སོགས། །ཡོངས་སུ་རྫོགས་ནས་དགུང་གྲངས་དོན་དགུ་ཚེ། །ཆུ་ལུག་དབྱར་ཟླ་ར་བའི་བཅོ་བརྒྱད་དུ། །བསྙུང་བ་མེད་པའི་རྣམ་པར་འདྲེན་པ་མཆོག །དམ་པ་གང་ཉིད་ཞི་བར་གཤེགས་མ་ཐག །ས་གཡོས་ནམ་མཁར་སྒྲ་དང་འཇའ་འོད་ཁྱབ། །སྤུར་གྱི་ལུས་གནད་ལྟ་སྟངས་ཡ་ཡོ་མེད། །ཞག་ལྔར་བཞུགས་ནས་དཀར་ཆ་སྟེང་དང་ནི། །དམར་ཆ་སྨད་ནས་ཅུང་ཟད་འབབ་པ་དང༌། །གདུང་བསྒུལ་ས་གཡོས་སྤུར་སྦྱངས་དུ་བ་ནི། །འཇའ་འོད་སྣ་ཚོགས་བཅས་ཏེ་གྲུ་འཛིན་གྱི། །གནས་སུ་མངོན་པར་འཕགས་པའི་མཛད་བཟང་ངོམ། །སྤྲིན་མེད་མཁའ་ལ་ཉིན་མོར་འཇའ་འོད་འཁྱིལ། །མཚན་མོར་འོད་གསལ་རྫ་མ་ལྟ་བུས་ཁྱབ། །ལྷ་ཡི་མེ་ཏོག་དཀར་དམར་ཆར་ཆེན་འཁྲིགས། །རོལ་མོ་སྤོས་བཟང་མཆོད་སྤྲིན་ཀུན་ནས་གཡོ། །གདུང་ཁང་ཞལ་ཕྱེ་དཔྲལ་བར་དུང་དཀར་དང༌། །ཨུ་ཙརྱ་དང་གཏུམ་ཆུང་རྡོ་རྗེ་འཆང༌། །རིང་བསྲེལ་ཁྱད་འཕགས་དཔག་མེད་བཞག་པ་རྣམས། །དད་ལྡན་མཆོད་པའི་ཞིང་དུ་སོ་སོར་དྲངས། །ཤེས་བྱ་ཀུན་གཟིགས་མཁན་ཆེན་བསོད་ནམས་གྲགས། །ཐུགས་རྗེས་ཚད་མེད་འགྲོ་ཀུན་རབ་གཟིགས་ནས། །ཇི་སྲིད་འཁོར་བའི་རྒྱ་མཚོ་མ་སྟོང་བར། །དེ་སྲིད་འགྲོ་དོན་འཕྲིན་ལས་འཇུག་པར་ཤོག །ཅེས་ཞང་སྟོན་རིན་པོ་ཆེའི་རྣམ་པར་ཐར་བ་མདོར་བསྡུས་པ་སྟེ་བདུན་པའོ། །

ཚད་མའི་སྐྱེས་ཆེན་ཉ་དབོན་པ་ཀུན་དགའ་དཔལ་བཟང་པོའི་རྣམ་པར་ཐར་བ་མདོར་བསྡུས་པ།

ཚད་མའི་སྐྱེས་ཆེན་ཉ་དབོན་པ་ཀུན་དགའ་དཔལ་བཟང་པོའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་ཨཱ་ནནྡ་ཤྲཱི་བྷ་དྲ་སྭ་སྟི་སིདྡྷི་ཕ་ལ། འཇམ་དཔལ་རྣམ་འཕྲུལ་ཆོས་རྗེ་ཉ་དབོན་པའི། །འཁྲུངས་ཡུལ་ཉང་པོ་ཡབ་ནི་རྣམ་རྒྱལ་དང༌། །ཡུམ་ནི་པདྨ་སྒྲོན་དང་ཤིང་མོ་བྱའི། །ཐ་སྐར་ཟླ་བའི་ཚེས་བརྒྱད་གཟུགས་སྐུ་འཁྲུངས། །འཁྲུངས་མ་ཐག་ཏུ་ཨ་ར་པ་ཙ་ནའི། །སྒྲ་སྒྲོགས་ས་གཡོས་འཇའ་དང་རོལ་མོའི་སྒྲ། །དེ་ནས་བཟུང་སྟེ་ཡུལ་དུ་ལོ་ལེགས་བྱུང༌། །དུས་འཁྲུགས་ཆད་ཅིང་ནད་ཡམས་ཞི་བ་སོགས། །ངོ་མཚར་དཔག་མེད་སྐྱེས་བུ་དམ་པའི་ཚུལ། །ལོ་གསུམ་ལོན་ནས་མཚན་བརྗོད་འདོན་པ་དང༌། །ཡུལ་མི་རྣམས་ཀྱིས་རིགས་བཟང་ཡིན་ཞེས་གླེང༌། །ལོ་བཞི་ལོན་ནས་ཇོ་ནང་དཔལ་དུ་བྱོན། །ཆོས་རྗེ་ཡོན་ཏན་རྒྱ་མཚོའི་མདུན་ས་རུ། །མི་སྡེ་ལྷ་སྡེ་འཚོགས་སྐབས་ཆོས་གྲྭ་ལ། །མ་བུ་གཉིས་ཕྱིན་ཆོས་རྗེས་སྤྱན་གྱིས་གཟིགས། །ཕྱག་འཛུབ་བསྟན་ནས་བཞད་ཅིང་ལུང་བསྟན་པ། །འཇམ་དབྱངས་གསར་མའི་སྐུ་སྐྱེས་ཡིན་ཞེས་གསུངས། །ས་སྐྱར་བྱོན་ནས་ཡི་གེའི་གྲྭར་འཇུག་ཅིང༌། །ཤེས་རབ་ཕུལ་ཕྱིན་ཡ་མཚན་ཆེ་བའི་གནས། །དགུང་ལོ་བདུན་ནས་ཚད་མ་རིག་པའི་རྒྱན། །ཁོང་དུ་ཆུད་དེ་དགོངས་དོན་ཞོར་ལ་མཁྱེན། །མངོན་པ་ལན་གཅིག་ཉན་པས་ཚིག་དོན་ཀུན། །ལེགས་པར་བློ་ཟིན་ལོ་ལྔའི་བར་དུ་ནི། །ཕར་ཚད་མངོན་འདུལ་གཞུང་འགྲེལ་སློབ་གཉེར་དྲིལ། །ཤིན་ཏུ་མཁས་པའི་གྲགས་སྙན་འོད་དཀར་བྱུང༌། །དགུང་ལོ་བཅུ་གཉིས་མཁན་ཆེན་དམ་པ་གང༌། །ཉི་མ་རྒྱལ་མཚན་ལས་ནི་དགེ་ཚུལ་མཛད། །མཚན་ནི་ཀུན་དགའ་དཔལ་བཟང་ཞེས་གསོལ་ཏེ། །དེ་ལས་དགེ་ཚུལ་སོ་ཐར་རིགས་བདུན་གྱི། །ཆོས་སྐོར་ལེགས་པར་གསན་ཅིང་མཁྱེན་པ་རྒྱས། །དེ་ནས་སྟག་ལུང་རིན་ཆེན་བཟང་པོ་ལས། །ཕར་ཚད་མངོན་འདུལ་གསན་ནས་སྣར་ཐང་དུ། །སློབ་དཔོན་བློ་བཟང་གྲགས་པར་མཛོད་འགྲེལ་དང༌། །སྤྱོད་འཇུག་རྡོར་ཕྲེང་བདེ་མཆོག་རྩ་རྒྱུད་དང༌། །མཁའ་འགྲོ་རྒྱ་མཚོའི་རྒྱུད་དང་རྒྱུད་ཕྱི་མ། །ཟླ་གསང་ཐིག་ལེ་སྤྱན་གཟིགས་པདྨ་ཅན། །འཕགས་པ་ཀླུ་སྒྲུབ་རིགས་ཚོགས་བསྟོད་ཚོགས་གསན། །ནག་ཕུག་བྱོན་ནས་མཁན་ཆེན་ཆོས་གྲགས་ལ། །སྦྱོང་རྒྱུད་དབང་དང་ཁྲག་འཐུང་མངོན་འབྱུང་དང༌། །ནཻ་གུ་ནཱ་རོ་རྟོགས་བདུན་ཡུམ་སྐོར་ལུང༌། ། གཤེད་དམར་དགྲ་ནག་གདོང་དྲུག་རྒྱུད་སྡེ་དང༌། །མཁའ་འགྲོ་ཀུན་སྤྱོད་རྒྱུད་སོགས་མང་པོ་གསན། །དགུང་ལོ་བཅུ་དགུར་སྙེ་ཐང་སྐུ་བྱོན་ནས། །མཁན་ཆེན་བཀྲ་ཤིས་སེང་གེའི་མདུན་དུ་ནི། །བསྙེན་རྫོགས་མཛད་པས་དགེ་སློང་རྡོ་རྗེ་ཡི། །འཛིན་པར་གྱུར་ནས་སྐུ་ལ་ཚུལ་ཁྲིམས་ཀྱི། །དྲི་བཟང་སྣོམ་པར་མངོན་ལ་ཞྭ་ལུ་དང༌། །གསང་ཕུ་གདན་ས་མཚུར་ཕུ་འབྲི་གུང་དང༌། །ལྷ་ས་བསམ་ཡས་འཆིང་ཕུག་ལ་སོགས་ཀྱི། །དབུས་གཙང་ཀུན་ལ་གྲྭ་སྐོར་མཛད་པའི་ཚེ། །འགྲན་ཟླ་བྲལ་བའི་རྩོད་རྒྱལ་བ་ཞེས་གྲགས། །ཆོས་རྗེ་ཀུན་མཁྱེན་ཆེན་པོ་བྱ་རྒོད་གཤོང༌། །བྱོན་པའི་དུས་སུ་ཞལ་མཇལ་གསུང་གླེང་པས། །ཆོས་རྗེ་མཉེས་ནས་གནང་སྦྱིན་དུ་མ་མཛད། །ཁོང་ཀྱང་ཆོས་རྗེའི་གསུང་ཐོས་ཙམ་གྱིས་ནི། །བློ་གྲོས་པད་མོའི་ཁ་ཕྱེས་མི་ཕྱེད་པའི། །དད་པ་སྐྱེས་ཏེ་ཇོ་ནང་དཔལ་དུ་བྱོན། །ཞབས་ཏོག་མཛད་ནས་དུས་ཀྱི་འཁོར་ལོའི་དབང༌། །རྡོར་ཕྲེང་ཞེ་བཞི་བཞི་བཅུར་ཕྱེ་བ་དང༌། །ཉེར་བརྒྱད་ཕྱེ་བ་གཤེད་དམར་ལྷ་ལྔ་དང༌། །སྒྲོལ་མ་རྔོག་ལུགས་རྟ་མགྲིན་ཕྱག་རྡོར་དང༌། །ཚེ་དཔག་མེད་པའི་ལྷ་དགུ་དེ་དག་གི །དབང་ལུང་ལམ་འབྲས་ས་ལུགས་ཞ་ལུགས་དང༌། །ཡེ་ཤེས་སྤྱན་སྒྲུབ་སྦས་པ་མིག་འབྱེད་དང༌། །སྦྱོར་དྲུག་ལ་སོགས་ཁྲིད་རིགས་ཐམས་ཅད་གསན། །སེམས་འགྲེལ་སྐོར་གསུམ་གུར་བརྟག་སཾ་གསུམ་དང༌། །ངེས་དོན་མདོ་བཅུ་ལ་སོགས་བོད་འགྱུར་ཀུན། །ལེགས་པར་ཞུས་ཏེ་དགུང་ལོ་ང་དྲུག་གི །བར་དུ་ཆོས་རྗེའི་ཞབས་དྲུང་ཉེ་བར་སྟེན། །ཉང་སྟོད་དཀའ་བཅུས་གདན་འདྲེན་ལེགས་མཛད་ནས། །རྩེ་ཆེན་དགོན་གཞི་ཕྱག་དཔེ་ལྷ་རྟེན་བཅས། །ཕུལ་ནས་དེར་བཞུགས་ཚད་མ་རྒྱུད་འགྲེལ་སོགས། །འཆད་ཉན་མཛད་པས་མཁས་པའི་སྐྱེས་ཐོབ་མང༌། །བློ་གསལ་དུ་མ་འདུས་ནས་དགོན་སྡེ་རྒྱས། །བསྟན་པ་སྤེལ་ཏེ་གསེར་འབུམ་གཙུག་ལག་ཁང༌། །རྒྱུད་འགྲེལ་བཞེངས་བའི་རབ་གནས་མཁན་པོ་ནི། །ས་བཟང་པཎ་ཆེན་གདན་དྲངས་ཆོ་ག་མཛད། །དེ་ཚེ་ནམ་མཁའ་སྒྲ་དང་འཇའ་འོད་དང༌། །མེ་ཏོག་ཆར་བབ་ས་གཡོས་ངོ་མཚར་ལྟས། །མ་ཏི་པཎ་ཆེན་བྱོན་དུས་སྐྱེལ་ཐུང་མཛད། །ཆོས་རྗེ་རིན་པོ་ཆེ་ཡི་སྐུ་རིམ་ལ། །བརྩོན་པའི་ཞལ་ཏ་སྦྲན་ཅིང་ཕྱི་མིག་བལྟས། །ཕྱི་དུས་རྟེན་འོག་མེ་ཤོར་རྟེན་མ་ཚིག །སྟོན་ཁར་སྟེང་དུ་ཆར་ཆུ་དྲག་ཏུ་བབས། །མ་རློན་བར་དུ་ས་རྡུལ་གྱིས་མ་གོས། །དཀར་མེ་འཛིན་ནུས་སློབ་མ་མཁས་མང་ནང༌། །རེད་མདའ་བ་ལ་དགའ་རབ་དབང་ཕྱུག་གིས། །བར་ཆད་མཁྱེན་ནས་ཉིན་མོར་མ་གཉིད་གསུངས། །རྟག་ཏུ་འཛེམ་ནས་ལན་གཅིག་གཉིད་ཤོར་བས། །ཉ་དབོན་ཆེན་པོ་ཏིང་འཛིན་བཞུགས་པའི་ངང༌། །རྒྱ་གར་ནས་འོངས་མི་ནག་རྭ་མཆུ་ཅན། །རྐང་ལག་བྱ་སྡེར་ཅན་གཅིག་ཚུར་འོངས་ནས། །རེད་མདའི་ཁང་པར་བསྐོར་པ་གཟིགས་པ་དང༌། །ཏིང་ངེ་འཛིན་ལས་ལངས་ཏེ་ཕྱག་རྡོར་སྤྲུལ། །ཁོང་ནི་སྦྲང་བུ་ཞིག་གྱུར་སྣ་སྒོར་འདུག །རྩེ་ཆེན་ནས་ནི་རེད་མདའ་ཕྱག་བརྐྱངས་ནས། །འཕྲེང་ལྕག་གདོང་ལ་བརྒྱབ་ཚེ་སྦྲང་བུ་ནང༌། །སོང་མ་ཐག་ནས་བསྟན་པའི་དགྲར་ལངས་ལ། །དུས་ཕྱིས་ཉ་དབོན་པ་ལ་མཇལ་འཕྲད་འོང༌། །ཀུན་མཁྱེན་འདས་ཁར་ཁོང་ལ་ལུང་བསྟན་ནི། །ངན་པ་མཛད་པས་ཞལ་འཇལ་མ་གནང་ལ། །དེ་ནས་མཁན་ཆེན་གཡག་དང་རྩོད་པ་མཛད། །མཇུག་མཐར་རང་སྟོང་གཞན་སྟོང་བགྲོ་གླེང་ནི། །ཉིན་གསུམ་མཛད་ཀྱང་ཤན་ཕྱེ་སུ་ཡང་མེད། །གང་སུས་རྫུན་གྱུར་དེ་ནི་འཆི་བའི་ཚེ། །གྲིར་ཤི་ས་རྡོ་ཆར་འབབ་བདེན་ཚིག་ཏུ། །གྱུར་པ་དེ་ནི་འཆི་ཚེ་རྡོ་རྗེ་འཆང༌། །ཕྱག་རྒྱ་བྱས་ནས་ཡུལ་འཇམ་འཇའ་འོད་དང༌། །མེ་ཏོག་གང་བར་ཤོག་ཅིག་སྨོན་ལམ་བཏབ། །རེ་ཞིག་དུས་ན་མཁན་ཆེན་གཡག་ཞོན་དེ། །གཡག་དང་བཅས་པ་འདྲིལ་ནས་ཤ་རུས་ནི། །སོ་སོར་འཐོར་ཞིང་རླུང་གཡུག་རྡོ་ཆར་འབབ། །ཆོས་རྗེ་འདིས་ཀྱང་བསྔོ་བ་ཡང་ཡང་མཛད། །བར་དོར་འདྲེན་པར་མཛད་པའི་ཐུགས་རྗེ་མངའ། །ཚད་མའི་འགྲེལ་ཆེན་ལ་སོགས་གསུང་ཆོས་ནི། །ཁྱད་པར་ཅན་ཡང་མང་དུ་བརྩམས་པར་མཛད། །ལྟ་སྒོམ་སྤྱོད་གསུམ་དགོངས་པ་རྫོགས་པའི་ཚེ། །དགུང་ལོ་གོ་ལྔ་ས་མོ་ལུག་གི་ལོ། །ཆུ་སྟོད་ཟླ་བའི་ཚེས་དྲུག་གཤེགས་པའི་ཚེ། །སྔོན་ཆད་གྲོགས་མཆེད་ཚིག་ཆེན་བཞགས་ཡོད་གསུངས། །ཆོས་གོས་ཤམ་ཐབས་ལེགས་པར་གསོལ་ནས་ནི། །ཞབས་གཉིས་སྐྱིལ་ཀྲུང་བཅས་པས་རྡོར་འཆང་གི །ཕྱག་རྒྱ་མཛད་དེ་གཡོ་མེད་ལྟ་སྟངས་ངང༌། །རེ་ཞིག་གཟུགས་སྐུ་བསྡུ་བའི་ཚུལ་བཅས་གཤེགས། །དེ་བཞིན་ཞག་བརྒྱད་ཆོས་ཉིད་འོད་གསལ་ངང༌། །བཞུགས་ནས་སྤུར་ལ་འོད་ཟེར་དུ་མ་འཕྲོ། །དྲི་བཟང་ངད་ལྡང་རྡུལ་གྱིས་མི་གོས་པ། །ལ་སོགས་ངོ་མཚར་མཚན་མ་མང་དུ་བྱུང༌། །དཀར་ཚེས་བཅུ་བཞིར་ཁམས་དཀར་སྟེང་ནས་འབབ། །ཤངས་སྒོར་ཐུགས་རྗེ་ཆེན་པོ་ནས་འབྲུ་ཙམ། །དཀར་ལ་འཁྲིགས་པ་སྐྱེ་མཆེད་གསལ་བ་བྱོན། །ནོར་བུའི་རྩེ་ནས་དམར་ཆ་ཅུང་ཟད་བྱུང༌། །པདྨ་མཁའ་འགྲོ་དམར་ནག་གྲི་ཐོད་ཅན། །བྱོན་ནས་སྤུར་བསྒུལ་ས་གཡོས་སྤུར་སྦྱངས་ཚེ། །ཡུལ་འཇམ་ནམ་མཁའ་གཡའ་དག་དཀྱིལ་དུ་ནི། །འཇའ་འོད་དྲ་བ་མིག་མང་རིས་སུ་ཁྱབ། །དྲྭ་མིག་ཐམས་ཅད་མཆོད་པའི་ལྷ་མོ་རེ། །རོལ་མོ་སྣ་ཚོགས་དཀྲོལ་ཏེ་མེ་ཏོག་ནི། །སྣ་ཚོགས་ཆར་འབེབ་ས་ལ་མི་རེག་གནས། །སྤུར་ཁང་ཞལ་ཕྱེ་དཔྲལ་བར་འཇམ་དཔལ་གྱི། །ཡེ་ཤེས་སེམས་དཔའ་རྣ་ལྟག་གཉིས་ལ་ནི། །སྒྲོལ་མ་ཚེ་དཔག་མེད་དང་སྤྱི་བོར་ནི། །རྡོར་འཆང་དཔུང་པར་ཧཱུཾ་མཛད་དེ་དག་ཀུན། །འབུར་དོད་སྐྱེ་མཆེད་གསལ་བའི་རི་མོ་བཀྲ །བྱམས་པའི་ཐུགས་དང་བདེན་པར་གསུངས་པའི་ལྗགས། །རིང་གཟིགས་སྤྱན་དང་ལྟག་པ་ཕྱག་ངར་གསུམ། །དུང་དཀར་རེ་རེར་རིང་བསྲེལ་རྐྱེན་ཐུབ་ཅན། །དཔག་མེད་བྱོན་ནས་དད་པའི་གསོས་སྨན་མཆོག །ཉིན་བྱེད་དཔལ་འཕྲོག་གསུང་གི་འོད་སྟོང་གིས། །ལྟ་ངན་མུན་སེལ་ཕན་བདེའི་ལམ་སྟོན་པ། །གསུང་རབ་མཛོད་འཛིན་དཔལ་ལྡན་ཀུན་དགའ་དཔལ། །ཞབས་དྲུང་བདག་སྐྱེས་གསུང་ཆོས་སྤྱོད་པར་ཤོག །ཅེས་ཚད་མའི་སྐྱེས་ཆེན་ཉ་དབོན་པ་ཀུན་དགའ་དཔལ་བཟང་པོའི་རྣམ་པར་ཐར་བ་མདོར་བསྡུས་པ་སྟེ་བརྒྱད་པའོ། །

ཐང་པོ་ཆེ་བ་ཀུན་དགའ་འབུམ་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་ཨཱ་ནནྡ་ལཀྵ་སྭ་སྟི་སིདྡྷི་ཕ་ལ། ལོ་ཙཱ་རིན་ཆེན་བཟང་པོའི་རྣམ་འཕྲུལ་ནི། །ཐང་པོ་ཆེ་བའི་འཁྲུངས་ཡུལ་གླིང་སྟོད་ཅེས། །ཡབ་ནི་ཚུལ་ཁྲིམས་རྒྱལ་དང་ཡུམ་ལྷ་ཟ། །འོད་ལྕམ་ལྕགས་མོ་ལུག་ལོར་སྐུ་བལྟམས་ནས། ། སྒྲ་དང་འཇའ་འོད་མེ་ཏོག་ཆར་བབས་ནས། །གཟུགས་བཟང་ཡན་ལག་མཛེས་པ་ཞབས་འཁོར་ལོ། །མཚན་པས་བརྒྱན་པ་གསུང་སྙན་ཡུལ་མི་ཀུན། །དགའ་དད་གནས་ལ་སྐྱབས་མཆོག་མཚུངས་མེད་སྐུ། །མཐོང་བ་ཙམ་གྱིས་ནད་དང་དབུལ་བ་ཀུན། །མེད་པར་གྱུར་བའི་མཐོང་ཐོས་དྲན་རགས་ཀུན། །ལོ་བདུན་ལོན་ནས་གསང་ཕུ་ཕྱིན་གྱུར་ཏེ། །བླ་མ་བཀྲ་ཤིས་བཟང་པོའི་སྐུ་དྲུང་ནས། །རབ་ཏུ་བྱུང་ནས་ཀུན་དགའ་འབུམ་ཞེས་མཚན། །གསོལ་ནས་བསྟན་གཞི་ཀ་རི་ཀ་ལྔ་བཅུ། །སུམ་བརྒྱ་བ་དང་དེ་ཡི་འགྲེལ་བ་བཅས། །གསན་ནས་འདུལ་བ་རྒྱ་མཚོའི་མངའ་བདག་གྱུར། །བགྲོ་གླེང་ཡང་དག་དགའ་རབ་ཆགས་པ་ཡི། །སྟོན་པ་བཟང་པོའི་ཚད་རྡོར་གྱུར་བ་ལ། །ཡབ་ཡུམ་གཉིས་དང་སྤུན་ཡ་ཕུ་ནུ་རྣམས། །དགའ་ཚོར་བྱེད་ནས་དགུང་ལོ་བཅུ་གཉིས་སུ། །གུང་ཐང་ཆོས་འཁོར་གླིང་དུ་དོན་གྲུབ་དཔལ། །ཕར་ཚད་གཉིས་ལ་ལོ་བཞིར་གསན་མཛད་ནས། །ཚིག་དོན་མ་ལུས་ཐུགས་སུ་ཆུད་པར་གྱུར། །ས་སྐྱར་ཕེབས་ནས་འཇམ་དབྱངས་གྲགས་པ་ལས། །ཕར་ཚད་མངོན་འདུལ་ལེགས་པར་ཞུ་བྱས་ལ། །རྩོད་པའི་ཕྱོགས་ལས་རྣམ་པར་རྒྱལ་བར་གྲགས། །ཁ་འུར་བྱོན་ནས་བླ་མ་ཡེ་ཤེས་དཔལ། །གུར་སཾ་བུ་ཊི་ལ་སོགས་མང་དུ་གསན། །ཞལ་བཞིའི་ཆོས་སྐོར་ནཻ་གུ་ནཱ་རོ་ཡི། །ཆོས་དྲུག་ར་ཁྲིད་དམར་ཁྲིད་ཚེ་ཁྲིད་དང༌། །སྒྲོལ་ཁྲིད་ལ་སོགས་མང་དུ་ཞུས་བྱས་ནས། །འཛུམ་ཆོས་ལུང་བྱོན་ཆོས་རྗེ་འཛུམ་པའི་དྲུང༌། །ཡུམ་གསུམ་འགྲེལ་དང་ཤེས་རབ་ཁྲི་པ་སོགས། །ཡུམ་སྐོར་མཛོད་འགྲེལ་ལ་སོགས་མང་དུ་གསན། །དཀའ་བཅུ་ཚད་ལྡན་མཁས་པའི་གོ་འཕང་མཉེས། །དེ་ཚེ་བསྟན་པ་སྤྱི་འགྲེལ་གསོལ་འདེབས་ཀྱི། །ཡི་གེར་གཟིགས་པས་པནྚི་ཏ་ཆེན་པོ། །ཡིན་པའི་མོས་གུས་ཆེན་པོ་སྐྱེས་ནས་སུ། །དགུང་ལོ་ཉེར་གཉིས་ཇོ་ནང་དཔལ་དུ་བྱོན། །ཆོས་རྗེ་རིན་པོ་ཆེ་ཡི་མདུན་དུ་མཇལ། །གསུང་གླེང་རིམ་པར་མཛད་པས་ཆོས་ཀྱི་གཏེར། །སྒོ་བརྒྱ་ཕྱེ་མཛད་རི་རྒྱལ་ལྷུན་པོ་བརྗིད། །ང་ཡང་ཆོས་མ་ཤེས་སྙམ་འབྲལ་མེད་དུ། །བཞུགས་པ་དང་བོར་སྨིན་བྱེད་རྒྱུའི་དབང་ལ། །ས་ལུག་ནག་ཟླར་དུས་འཁོར་དབང་མོ་ཆེ། །རྒྱུད་ཀྱི་དབང་དང་ཀྱཻ་རྡོར་ས་ལུགས་དང༌། །འཇིགས་བྱེད་རྭ་ལུགས་དབང་དང་རྡོར་ཕྲེང་དང༌། །མི་ཏྲ་བརྒྱ་རྩ་ལ་སོགས་དབང་ཀུན་ཞུས། །སྦྱོར་བ་ཡན་ལག་དྲུག་སོགས་ཁྲིད་མ་ལུས། །ཞུས་ནས་ཉམས་མྱོང་འབྲས་བུའི་ཡལ་ག་རྒྱས། །དེ་བཞིན་གཤེགས་པ་བརྒྱད་ཀྱི་སྐུ་དང་ཞིང༌། །ཡང་དག་གཟིགས་པ་ལ་སོགས་ལྷའི་ཞལ་གཟིགས། །གཞན་ཡང་རྡོ་རྗེ་འཇིགས་བྱེད་ལ་སོགས་པའི། །ཡི་དམ་དུ་མའི་ཞལ་གཟིགས་རི་ལུང་གི །དབྱིབས་ཀྱི་སྟོང་གཟུགས་རྣམ་ཀུན་མཆོག་ལྡན་ལ། །མཉམ་བཞག་ཐུགས་ནི་ཞག་ལྔར་འབྱམས་པར་གྱུར། །སེམས་འགྲེལ་སྐོར་གསུམ་གུར་བརྟག་སཾ་གསུམ་དང༌། །ཕར་ཚད་མངོན་གསུམ་སྡེ་སྣོད་སྐོར་གསུམ་སོགས། །གསུང་རབ་མཐའ་ཡས་ལག་ལེན་གནད་བསྣོན་གསན། །དགུང་ལོ་ཞེ་བརྒྱད་རྟ་ནག་གདན་དྲངས་ཏེ། །སློབ་དཔོན་རིན་ཆེན་བཟང་པོས་རྒྱལ་ཚབ་གཏད། །ལྷ་རྟེན་ཕྱག་དཔེ་འབུལ་ནོར་རྒྱ་ཆེར་བཀྱག །ལོ་དྲུག་རྒྱུད་འགྲེལ་ལ་སོགས་ཟབ་ཆོས་གསུངས། །གནས་དེར་སློབ་མ་མང་བྱུང་བསྟན་གཞི་བཙུག །དེ་ནས་དགུང་ལོ་ང་བདུན་བཞེས་དུས་སུ། །ཡར་ལུང་གདན་དྲངས་སློབ་དཔོན་ཡེ་ཤེས་དཔལ། །ཉིད་ཀྱིས་དགོན་པ་གཏད་ནས་རྟེན་གསུམ་བཞེངས། །རྒྱུད་འགྲེལ་རྟག་ཏུ་འཆད་ཉན་སྤེལ་མཛད་ནས། །རྡོ་རྗེ་ཕྲེང་པའི་ཐིག་རྩ་ལ་སོགས་གསུངས། །དགུང་ལོ་དོན་གཉིས་མེ་རྟ་ཟླ་བ་ལྔའི། །ཚེས་བརྒྱད་ཞི་བར་གཤེགས་ཚེ་ནམ་མཁའ་ལ། །སྒྲ་དང་རོལ་མོ་འཇའ་འོད་ཀྱིས་ཁྱབ་ཅིང༌། །ས་གཡོས་ངོ་མཚར་དགེ་མཚན་དུ་མ་བྱུང༌། །ཞག་ལྔར་གཟུགས་སྐུ་ཡ་ཡོ་མེད་པ་ལ། །འཆི་བ་འོད་གསལ་ངང་དུ་གཉིས་མེད་བཞུགས། །དཀར་ཆ་སྟེང་དང་དམར་ཆ་འོག་ཏུ་འབབ། །སྤུར་སྦྱངས་ཚེ་ན་དུ་བ་འཇའ་འོད་བཅས། །ནུབ་ཀྱི་ཕྱོགས་སུ་འཕགས་ནས་སོང་བར་གྱུར། །མེ་ཏོག་ལག་མཐིལ་ཙམ་ལ་འདབ་མ་དཀར། །ལྟེ་བ་དམར་པོ་འདབ་མ་དམར་པོ་ལ། །ལྟེ་བ་དཀར་པོ་སོགས་ཀྱི་ཆར་བ་བབས། །སྤུར་ཁང་ཞལ་ཕྱེ་ཚེ་ན་མི་གཡོ་བ། །མ་ཧཱ་མ་ཡ་དུས་འཁོར་ཨ་ཡིག་དང༌། །དུང་དཀར་རིང་བསྲེལ་རྟེན་གྱི་ཕུང་པོར་གྱུར། །ནམ་མཁའ་དྲྭ་ཅན་མུན་པའི་བོད་ཁམས་འདིར། །རྒྱལ་སྲས་རྟ་བདུན་དབང་པོའི་འོད་སྟོང་གིས། །གསལ་མཛད་ཐང་སྟོན་ཆོས་རྗེའི་ཞབས་དྲུང་དུ། ། སྐྱེས་ནས་ལུང་རིགས་ཆོས་ལ་བདག་སྤྱོད་ཤོག །ཅེས་ཐང་པོ་ཆེ་བ་ཀུན་དགའ་འབུམ་གྱི་རྣམ་པར་ཐར་བ་མདོར་བསྡུས་པ་སྟེ་དགུ་བའོ།།

ཆོས་རྗེ་སྨན་ཆུ་ཁ་བ་བློ་གྲོས་རྒྱལ་མཚན་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་མ་ཏི་དྷྭ་ཛ་སྭ་སྟི་སིདྡྷི་ཕ་ལ། འཇམ་དཔལ་རྣམ་འཕྲུལ་སྨན་ཆུ་ཁ་བ་ཡི། །འཁྲུངས་ཡུལ་སྐྱི་ཤོད་སྟོད་ལུང་ཞེས་བྱ་བ། །ཡབ་ཞང་ཀུན་བཟང་ཡུམ་ནི་ལུ་གུ་འཛུམ། །གཉིས་ཀྱི་སྲས་སུ་ས་ཕོ་སྟག་གི་ལོར། །ངོ་མཚར་དགེ་མཚན་བཅས་ཏེ་སྐུ་བལྟམས་ནས། །གཟུགས་བཟང་མཛེས་པ་རིག་གསལ་ཤེས་རབ་ཆེ། །དགུང་ལོ་ལྔ་ལ་ཟློས་གར་བཟོ་རིགས་དང༌། །སྒྱུ་རྩལ་མཁས་པའི་སྐྱེས་མཆོག་ཕུལ་བྱུང་བ། །དགུང་ལོ་བརྒྱད་དུ་ལྷ་བཟོ་ཡིག་བྲིས་དང༌། །ཀློག་ལ་མཁས་པར་མཛད་པ་ལེགས་པར་སྟོན། །དགུང་ལོ་བཅུ་གསུམ་ས་ཕོ་སྟག་གི་ལོར། །གསང་ཕུར་བྱོན་ནས་གླིང་སྨད་ཕྱོགས་རྒྱལ་གྱིས། །མཁན་པོ་མཛད་དེ་གཞོན་ནུ་སེངྒེ་ཡིས། །སློབ་དཔོན་མཛད་དེ་དགེ་ཚུལ་སྡོམ་པ་བླངས། །མཚན་ལ་བློ་གྲོས་རྒྱལ་མཚན་ཞེས་གསོལ་ནས། །དགེ་ཚུལ་ལེའུ་ལྔ་པ་སུམ་བརྒྱ་པ། །འདུལ་ལུང་སྡེ་བཞི་ལ་སོགས་གསན་པར་མཛད། །དགུང་ལོ་བཅུ་གསུམ་ཚད་མ་རྣམ་ངེས་ཀྱི། །ཚིག་དོན་མ་ལུས་ཐུགས་ཆུད་ཤེས་རབ་རྒྱས། །རྩོད་པའི་ཕྱོགས་ལས་རྒྱལ་བ་ཞེས་པ་བྱུང༌། །གླིང་སྟོད་ཤེས་རབ་བཟང་པོ་གླིང་སྨད་པ། །བློ་གྲོས་རྒྱལ་མཚན་གཉིས་ལ་རྩོད་ཟླ་མེད། །ཅེས་གྲགས་འོན་ཀྱང་གླིང་སྟོད་ཞན་འདུག་ཟེར། །ཕར་ཕྱིན་འོད་ཟེར་མགོན་པོའི་ཊཱི་ཀ་གསན། །ཐུགས་ཆུད་དགུང་ལོ་བཅུ་དགུ་ཤིང་སྤྲེལ་ལོར། །མཁན་ཆེན་བཟང་པོའི་དྲུང་ནས་བསྙེན་རྫོགས་མཛད། །དགེ་སློང་རྡོ་རྗེ་འཛིན་པའི་བདག་ཉིད་གྱུར། །དགུང་ལོ་ཉི་ཤུར་འདུལ་བ་མདོ་རྩ་དང༌། །སོ་ཐར་མདོ་དང་ལམ་རིམ་ཆོས་རྣམས་ཞུས། །དབུས་ཁམས་ལུང་དང་རིགས་པའི་གྲྭ་སྐོར་མཛད། །ས་སྐྱར་ཕེབས་ནས་འཇིགས་མེད་གྲགས་པའི་མདུན། །མཚམས་སྦྱོར་ལྔ་པ་སྙན་ངག་མེ་ལོང་དང༌། །སྡེབ་སྦྱོར་རིན་ཆེན་ཕྲེང་བ་ཀླུ་ཀུན་ཏུ། །དགའ་བའི་ཟློས་གར་ཚད་མ་རྣམ་འགྲེལ་དང༌། །མངོན་པ་གོང་འོག་མཛོད་ཀྱི་རང་འགྲེལ་དང༌། །འདུལ་བ་ཀརྨ་ཤ་ཏམ་བརྟག་གཉིས་དང༌། །གཤེད་དམར་ལ་སོགས་ཆོས་བཀའ་མང་དུ་གསན། །ལོ་ལྔར་བཞུགས་ནས་མཁས་པའི་དབང་པོར་གྱུར། །ཀུན་མཁྱེན་ཆེན་པོ་འཇམ་དབྱངས་གཞི་ཐོག་པས། །ས་སྐྱར་གདན་དྲངས་འོད་གསལ་རྨི་ལམ་དུ། །ནུབ་ཕྱོགས་ནམ་མཁར་འཇའ་འོད་འཁྱིལ་བའི་དཀྱིལ། །རྡོ་རྗེ་ཕག་མོ་བྱོན་ནས་རྔ་ཡི་སྒྲ །ཡུན་རིང་མཛད་ནས་དེ་ཡི་ སྒྲ་ཐོས་པ། །ཙམ་གྱིས་སྙིང་ལ་དགའ་བདེས་གང་བར་གྱུར། །དེ་ཡི་ཞལ་ནས་འདི་སྐད་དབྱངས་སུ་གསུངས། །རིགས་ལྡན་རྣམ་འཕྲུལ་དཔལ་ལྡན་ཇོ་ནང་བ། །ཚེ་རབས་དུ་མའི་བླ་མ་ཀུན་མཁྱེན་པ། །སང་ནས་ཕེབས་པའི་བུ་ཁྱོད་དེ་ལ་ཡང༌། །ཆོས་གསན་མཛོད་ཅིག་བློ་གྲོས་རྒྱལ་མཚན་དཔལ། །ཞེས་སོགས་ལུང་བསྟན་མཛད་ནས་སད་པའི་ཚེ། །ནམ་ལངས་འདུག་པ་སྔ་དྲོ་ཙམ་ནས་ནི། །མི་རྟ་ཁྲི་ཕྲག་དུ་མ་ཚོགས་པ་ལ། །སེར་ཕྲེང་སྟོང་ཕྲག་དུ་མ་བཅས་པ་ཡིས། །གདུགས་དང་རྒྱལ་མཚན་རོལ་ཆས་ཚུལ་བཞིན་དུ། །ཀུན་མཁྱེན་ཆོས་རྗེ་ལེགས་པར་བསུ་བྱས་ནས། །དགའ་ལྡན་ལྷ་ཁང་བཞུགས་ནས་ཆོས་རྗེ་མདུན། །དུས་འཁོར་སྒྱུ་འཕྲུལ་དྲ་བ་རིགས་གསུམ་དབང༌། །གསང་འདུས་རིགས་དྲུག་འཁོར་ལོ་སྡོམ་པའི་དབང༌། །སྦྱོར་དྲུག་ཐོག་མཐའ་བར་གསུམ་སེམས་འགྲེལ་གྱི། །སྐོར་གསུམ་ངེས་དོན་མདོ་བཅུ་རྒྱུད་ཕྱི་མ། །འཇམ་དཔལ་ལྟ་འདོད་དོན་དམ་བསྙེན་པ་དང༌། །མཚན་བརྗོད་ཚད་མ་རྣམ་འགྲེལ་དབང་མདོར་བསྟན། །ཨ་ནུ་རཀྴའི་ཏི་ཡྀ་སྦྱོར་དྲུག་དང༌། །གྱི་ཅོ་ཟླ་བའི་འོད་ཟེར་སྦྱོར་དྲུག་དང༌། །ཙ་མིའི་སྦྱོར་དྲུག་འབྲོ་ལོའི་སྦྱོར་དྲུག་དང༌། ཡུ་མོའི་སྦྱོར་དྲུག་འཇམ་དབྱངས་གསར་མ་ཡི། །སྦྱོར་དྲུག་རྗེ་བཙུན་རྒ་ལོའི་སྦྱོར་དྲུག་དང༌། །ཞང་གཡུ་བྲག་པའི་སྦྱོར་དྲུག་རྭ་ལོ་ཙཱའི། །སྦྱོར་དྲུག་གསང་འདུས་སྦྱོར་དྲུག་ཀྱཻ་རྡོ་རྗེའི། །སྦྱོར་དྲུག་གཉོས་ཁུང་སྦྱོར་དྲུག་རྣམས་ཞུས་ཚེ། །རྒྱུད་ལས་གསུང་བཞིན་ཉམས་རྟོགས་ཁྱད་པར་ཅན། །རྒྱུད་ལ་སྐྱེས་ནས་ཨ་མོའི་ཟིན་བྲིས་དང༌། །འབུམ་པ་ལ་སོགས་ཡུམ་སྐོར་བསྟོད་ཚོགས་དང༌། །རིགས་ཚོགས་གཏམ་ཚོགས་མདོ་མང་གཅོད་སྐོར་དང༌། །དོ་ཧ་ལ་སོགས་ཆོས་རྣམས་ལེགས་པར་ཞུས། །དགུང་ལོ་ཞེ་བརྒྱད་ཀུན་སྤངས་ཆོས་གྲགས་དཔལ། །མདུན་དུ་ཀྱཻ་རྡོར་ལྷ་མོ་བཅོ་ལྔའི་དབང༌། །རྩིས་ཀྱི་རྒྱུ་མཚན་བསྟན་རྩིས་ཆེན་མོ་དང༌། །ལམ་འབྲས་རྡོ་རྗེ་རྒྱུད་གསུམ་དྲི་མེད་འོད། །ལ་སོགས་ཟབ་ཆོས་མང་གསན་ཉམས་བཞེས་གནང༌། །དེ་ནས་ལོ་ཙཱ་ཆེན་པོའི་སྐུ་དྲུང་དུ། །འཕྲེང་བ་སྐོར་གསུམ་སེམས་འགྲེལ་སྐོར་གསུམ་དང༌། ། སྐྱེས་རབས་སོ་བཞི་དཔག་བསམ་འཁྲི་ཤིང་དང༌། །སྒྲོལ་མ་ཉེར་གཅིག་ཚེ་དཔག་མེད་ལྷ་དགུ །རྣམ་རྒྱལ་མ་ལ་སོགས་པའི་ཆོས་མང་ཞུས། །ཆོས་རྗེ་ཕྱོགས་རྒྱལ་དྲུང་ནས་གསང་འདུས་ཀྱི། །ཡེ་ཤེས་ཞབས་ལུགས་འཕགས་ལུགས་ཇོ་བོའི་ལུགས། །དབང་དང་བདེ་མཆོག་ལུ་ཧི་པ་ཡི་ལུགས། །དྲིལ་བུའི་ལུགས་དང་མེ་དྲི་པ་ཡི་ལུགས། །ཇོ་བོའི་ལུགས་ཀྱི་དབང་དང་རྒྱུད་འབུམ་དང༌། །རྣམ་བཤད་རིགས་པ་ལ་སོགས་མང་དུ་གསན། །ས་ཁྱིའི་ཟླ་ལྔར་ཆོས་རྗེ་ཕྱོགས་རྒྱལ་དང༌། །ལྷན་གཅིག་ལྷ་སར་བྱོན་ནས་བསྟན་པ་དང༌། །སེམས་ཅན་དོན་དུ་སྨོན་ལམ་རྒྱ་ཆེན་མཛད། །ས་མོ་བྱ་ཡི་ཟླ་བ་གཉིས་པ་ལ། །གཙང་ལ་བྱོན་པའི་དུས་སུ་དཔོན་ལྷུན་གྲུབ། །དཔལ་གྱིས་སྨན་ཆུའི་རི་ཁྲོད་ཕུལ་ནས་ཀྱང༌། །ཆོས་རྗེ་ཕྱོགས་རྒྱལ་ཞལ་ནས་ཐོས་པ་ཡི། །བྱ་བ་ལེགས་པར་རྫོགས་ནས་དབུས་ཕྱོགས་འདིར། །བཞུགས་ལ་འགྲོ་དོན་མཛོད་གསུངས་སྐྱེལ་ཐུང་མཛད། །ཕན་ཚུན་ཐུགས་སྣང་བརྩེ་བའི་མཛད་ཚུལ་གནང༌། །དེ་ནས་བཀྲ་ཤིས་སྨན་ཆུའི་རི་ཁྲོད་བཟུང༌། །འཆད་ཉན་བྱ་བས་བསྟན་པ་རྒྱས་མཛད་ཅིང༌། །ཐུགས་དམ་གཙོ་བོར་བསྐྱང་བའི་ནུབ་གཅིག་གི །རྨི་ལམ་སེང་དཀར་སྟེང་དུ་བྱམས་པ་དང༌། །གནས་བརྟན་བཅུ་དྲུག་བཅས་ལ་བྱམས་ཆོས་ལྔ། །གསན་པ་རྨིས་ནས་སད་ཚེ་འོད་གསལ་གྱི། །འཆར་སྣང་སྣ་ཚོགས་འགག་མེད་སྤྲོས་པ་བྲལ། །སྔ་དྲོའི་དུས་སུ་ལུང་ཕུག་དུང་སྒྲ་གཅིག །གྲགས་པས་ས་བཟང་མ་ཏི་པཎ་ཆེན་གྱིས། །མཛོ་དཀར་ཆིབས་ཏེ་དགེ་སློང་བཅུ་དྲུག་བཅས། །བྱོན་པ་སེར་ཕྲེང་རོལ་ཆས་བསུས་ནས་སུ། །སྨན་ཆུའི་རི་ཁྲོད་གདན་དྲངས་འབུལ་ནོར་ནི། །བཀྱག་ནས་རྨི་ལམ་ཇི་བཞིན་རྟེན་འབྲེལ་བཟང༌། །བྱམས་པ་དངོས་ཉིད་ཡིན་པའི་མོས་གུས་ནི། །བརྟན་པོར་སྐྱེས་ནས་བྱམས་ཆོས་ཞུ་བ་ཡི། །གསུང་བྱོན་པཎ་ཆེན་ཞལ་ནས་སྔར་གྱི་ཆོག །ཅེས་གསུངས་ཞུ་བ་སླར་བསྐྱར་ཟླ་གཅིག་ཏུ། །དགེ་འདུན་སྟོང་ཕྲག་ཙམ་ལ་བྱམས་ཆོས་ལྔ། །བཤད་སྦྱར་རྒྱས་པར་གསུངས་ནས་རྗེས་སུ་བཟུང༌། །གཞུང་དོན་རྟོགས་ཤིང་ཉམས་རྟོགས་མང་དུ་སྐྱེས། །གཟུངས་རྗཻ་ལྔ་དང་སྙིང་པོའི་མདོ་ལྔ་དང༌། །གསང་འདུས་རིམ་ལྔ་བདེ་མཆོག་རིམ་ལྔ་སོགས། །མང་ཐོས་གསན་པའི་རྒྱུད་ལ་ལེགས་པར་ཕྱུག །དེ་ནས་བྱ་ལོར་བསོད་ནམས་རྒྱལ་མཚན་པས། །སྙེ་ཐང་བྱོན་ནས་སེ་ར་ཆོས་སྟེང་སོགས། །རང་སྟོང་ལས་ལྷག་སྟོང་ཉིད་མེད་པར་གསུངས། །གཤིས་ལུགས་ཅང་མེད་འདོད་པ་བསྒྲགས་པར་བྱེད། །དེར་བྱོན་གསུང་རབ་ཚད་མ་དཔང་བཞག་ནས། །ལུང་རིགས་བགྲོ་གླེང་ཆེན་པོ་ཉིན་བདུན་དུ། །རྩོད་པ་མཛད་པས་ཐམས་ཅད་སྤོབས་པ་གཞོམ། །དེ་དག་གིས་ནི་འཇམ་དབྱངས་དངོས་ཡིན་ཟེར། །དེ་ནས་བླ་མ་བསོད་ནམས་རྒྱལ་མཚན་དང༌། །བཀྲ་ཤིས་སེངྒེ་གཡག་སྡེ་པཎ་ཆེན་སོགས། །གྲགས་ཅན་མང་པོས་དགྱེས་ཚོར་མཛད་ནས་སུ། །འབུལ་ནོར་རྒྱ་ཆེན་མཛད་ནས་གསོལ་བ་བཏབ། །ལྕགས་ཁྱི་ལོ་ལ་འབབ་རིམ་བྱོན་ནས་སུ། །རྒྱུད་འགྲེལ་ལ་སོགས་ཟབ་ཆོས་མང་དུ་གསུངས། །འགྲོ་མང་ཐོས་བསམ་བསྒོམ་གསུམ་ལ་བཀོད་དེ། །ཕག་ལོ་ཟླ་བ་དགུ་པར་སྨན་ཆུར་བྱོན། །དེ་བཞིན་འབྲི་གུང་རྫ་ར་རྒྱ་མ་དག །གདན་དྲངས་གང་འདུལ་ཆོས་འཁོར་བསྐོར་བར་མཛད། །སྨན་ཆུར་རྟེན་གསུམ་བཞེངས་ནས་བརྟག་གཉིས་ཀྱི། །འགྲེལ་བ་ལ་སོགས་ལེགས་བཤད་དུ་མ་མཛད། །ས་ཕོ་རྟ་ལོར་ཆོས་རྗེ་ཕྱོགས་རྒྱལ་པ། །གུང་ཐང་བྱོན་པ་གསན་ནས་དགྱེས་ཚོར་མཛད། །དེར་བྱོན་ཆོས་རྗེ་རྣམ་གཉིས་དབུ་གཏུགས་མཛད། །དགྱེས་པའི་གསུང་གླེང་མཉེས་མཉེས་ཡང་ཡང་མཛད། །སེར་གྲྭ་སྟོང་ཕྲག་ཚོགས་པར་མང་ཇ་བསྐོལ། །ཉིན་དེར་ཀུན་མཁྱེན་ཕྱོགས་ལས་རྣམ་རྒྱལ་གྱིས། །གྲུབ་མཐའི་གཤག་རལ་མཛོད་ཅེས་གསུང་པ་ལྟར། །གནས་དེར་བསྟན་པའི་གྲུབ་མཐའི་གཤག་རལ་གྱི། །བརྗོད་པ་གཙང་བ་སྙན་པས་ཕ་རོལ་གྱི། །ཡིད་འཕྲོག་གཞན་སྣང་ཟིལ་གྱིས་གནོན་པར་གྱུར། །བསྟན་འཛིན་ཐམས་ཅད་དགྱེས་པ་ཆེན་པོ་མཛད། །ཆོས་རྗེ་ཕྱོགས་རྒྱལ་གཙང་ལ་བྱོན་ཁར་ཡང༌། །ཡར་ལུང་སྣེའུ་ཐུང་བར་དུ་སྐྱེལ་ཐུང་མཛད། །ཆོས་རྗེ་ཕྱོགས་པས་རུས་རྒྱན་གཅིག་གིས་ནི། །སྣ་དྲངས་དགུ་ཚན་གཅིག་ཕུལ་སྐུ་རིམ་ལ། །འབད་པའི་ཞལ་ཏ་གནང་ནས་ཟླ་དགུ་པའི། །ཉེར་ལྔར་སྨན་ཆུར་ཕེབས་ནས་ཐུགས་དམ་མཛད། །གང་འདུལ་ཆོས་སྟོན་དུས་ལས་འདའ་བར་མཛད། །དེ་ནས་དགུང་ལོ་དོན་དྲུག་ཤིང་མོ་བྱའི། །ཚེས་བཅུའི་སྔ་དྲོ་ཞི་བར་གཤེགས་མ་ཐག །གཟིམ་ཁང་འཇའ་འོད་ཟུག་ཅིང་མེ་ཏོག་གི །ཆར་འབབ་ཞག་བདུན་དཀར་ཆ་སྟེང་དུ་བབས། །དམར་ཆ་གསང་ལམ་ནས་བྱོན་གདུང་བསྒུལ་ཚེ། །ས་གཡོས་ནམ་མཁར་སྒྲ་སྒྲོགས་སྤུར་སྦྱངས་ཚེ། །ནམ་མཁའ་གཡའ་དག་འཇའ་འོད་སྣ་ལྔའི་གུར། །དྲི་བཟང་རོལ་མོ་སྣ་ཚོགས་མེ་ཏོག་གི །ཆར་གཡོས་ སྤུར་ཁང་ཞལ་ཕྱེ་གདུང་རུས་ལ། །དཔྲལ་བར་འཇམ་དཔལ་འགྲམ་པ་གཡས་ཡོན་དུ། །མི་གཡོ་རྗེ་བཙུན་རྡོ་རྗེ་ཕག་མོ་དང༌། །གྲུ་མོར་ཨཱ་ཡིག་རྣ་ལྟག་གཉིས་སུ་ནི། །སྒྲོལ་མ་མི་གཡོ་སྔོན་པོ་དུང་དཀར་ནི། །ནས་འབྲུ་ཙམ་གསུམ་རིང་བསྲེལ་དཔག་མེད་དང༌། །ཨ་དང་རྡོ་རྗེ་རྗེ་ངར་ཕྱག་ངར་ལ། །ངོ་མཚར་དད་པའི་རྟེན་དུ་བྱོན་པར་གྱུར། །དཔལ་ལྡན་བླ་མ་འཇམ་དབྱངས་སྤྲུལ་བའི་སྐུ། །ཞབས་དྲུང་པད་མོའི་ཚལ་དུ་བདག་སྐྱེས་ཏེ། །གསུང་གི་བདུད་རྩིས་ཐོག་མར་རོ་མྱང་ནས། །ཁྱོད་བཞིན་འགྲོ་བ་མ་ལུས་འདྲེན་པར་ཤོག །ཅེས་ཆོས་རྗེ་སྨན་ཆུ་ཁ་བ་བློ་གྲོས་རྒྱལ་མཚན་གྱི་རྣམ་པར་ཐར་བ་མདོར་བསྡུས་པ་སྟེ་བཅུ་པའོ།།

ཆོས་རྗེ་རིན་ཚུལ་བའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་རཏྣ་ཤཱི་ལ་སྭ་སྟི་སིདྡྷི་ཕ་ལ། འཕགས་པ་ཐོགས་མེད་རྣམ་འཕྲུལ་རིན་ཚུལ་བའི། །འཁྲུངས་ཡུལ་བྱང་རྫིང་ཡབ་ནི་ལྷ་བཟང་དང༌། །ཡུམ་ནི་ལྷ་བཙུན་གཉིས་ཀྱི་སྲས་སུ་ནི། །ཤིང་མོ་བྱ་ཡི་ལོ་ལ་སྐུ་བལྟམས་ལ། །བལྟམས་མ་ཐག་ཏུ་ནམ་མཁར་སྒྲ་འདི་ལྟར། །ལྷ་བཟང་བུ་ནི་ཐོགས་མེད་དེ་འབྲེལ་གང༌། །འཁོར་བའི་གནས་གྲོལ་ཡེ་ཤེས་མཆོག་རྙེད་པ། །མི་གནས་ཞི་བའི་གནས་སུ་འགྲོ་བ་ཡིན། །ཞེས་སོགས་འཇའ་འོད་མེ་ཏོག་ཆར་བབས་ནས། །གཟུགས་བཟང་གསུང་སྙན་རིག་གསལ་སྐྱེས་མཆོག་བྱུང༌། །ཡི་གེ་ཀློག་འདོན་པ་ཡང་མཁས་པར་གྱུར། །དགུང་ལོ་བརྒྱད་པར་གནས་རྙིང་བྱོན་ནས་སུ། །མཁན་ཆེན་དཀའ་བཞི་བ་ལས་རབ་ཏུ་བྱུང༌། །མཚན་ལ་རིན་ཆེན་ཚུལ་ཁྲིམས་དཔལ་བཟང་པོ། །ཞེས་གསོལ་དེ་ལས་ཀ་རི་ཀ་ལྔ་བཅུ། །སུམ་བརྒྱ་པ་རྣམས་གསན་པས་མཁས་པར་གྱུར། །ཕར་ཚད་མངོན་གསུམ་ལ་སོགས་གཞུང་འགྲེལ་ཀུན། །སློབ་གཉེར་རྒྱ་ཆེར་མཛད་པའི་རྣམ་ཐར་བསྐྱང༌། ། ཞྭ་ལུར་བྱོན་ནས་བསོད་ནམས་བཟང་པོ་ལས། །ཕར་ཚད་མངོན་འདུལ་བདེ་མཆོག་འབུམ་ལྔ་དང༌། །ཡུམ་སྐོར་གསན་ལ་མཁས་པ་བྱང་གཞོན་ལས། །ཚད་མ་རིག་རྒྱན་མངོན་པ་གོང་འོག་སོགས། །མང་དུ་གསན་ནས་ཆོས་རྗེ་བུ་སྟོན་ལས། །བརྟག་གཉིས་སྤྱོད་འཇུག་རྡོར་ཕྲེང་བསླབ་བསྡུས་གསན། །གསང་ཕུར་བྱོན་ནས་བསོད་ནམས་བཟང་པོ་ལས། །ཕར་ཚད་མངོན་འདུལ་བདེ་མཆོག་འབུམ་ལྔ་དང༌། །ཡུམ་སྐོར་མདོ་མང་རྒྱུད་འབུམ་ལ་སོགས་པ། །གསན་བསམ་སྒོམ་པས་རང་རྒྱུད་སྨིན་པར་གྱུར། །དེ་ནས་ལྷ་ས་བསམ་ཡས་ལ་སོགས་པའི། །དབུས་ཀྱི་ཆོས་ སྡེ་ཐམས་ཅད་བྱོན་ནས་སུ། །མཁས་པའི་སྐྱེས་བུ་དུ་མའི་སྐུ་མདུན་དུ། །སློབ་གཉེར་རྒྱ་ཆེན་མཛད་པའི་ལག་རྗེས་ལ། །མཁས་པའི་གྲགས་སྙན་བ་དན་མཁའ་ལ་བསྒྲེངས། །དེ་ནས་རྟ་ནག་བྱོན་ནས་སློབ་དཔོན་ནི། །རིན་ཆེན་བཟང་ལས་མ་ཧཱ་མ་ཡའི་རྒྱུད། །བཤད་རྒྱུད་རྩ་རྒྱུད་ལེའུ་བཅུ་བདུན་མ། །ཕྱི་རྒྱུད་ལ་སོགས་གསང་འདུས་ཆོས་སྐོར་གསན། །དེ་ནས་སྟོད་ལུང་མཚུར་ཕུར་བྱོན་ནས་སུ། །རྟོགས་ལྡན་གྲགས་སེང་ལས་ནི་སངས་རྒྱས་ཀྱི། །ཐོད་པའི་རྒྱུད་དང་ན་རོ་ཆོས་དྲུག་དང༌། །དོ་ཧ་སྙན་རྒྱུད་དམར་ཁྲིད་ལ་སོགས་ཞུས། །རང་བྱུང་རྡོ་རྗེར་བརྟག་གཉིས་གཞུང་འགྲེལ་དང༌། །འཇིགས་བྱེད་རྭ་ལུགས་མཁའ་འགྲོ་རྒྱ་མཚོའི་རྒྱུད། །བདེ་མཆོག་དྲིལ་བུའི་དབང་ལ་སོགས་པ་ཞུས། །ཀརྨ་པ་ཡིས་འཕགས་པ་ཐོགས་མེད་ཡིན། །ལུང་བསྟན་མཛད་དེ་ཐུགས་དགྱེས་ཐུབ་པ་ཡི། །གསེར་སྐུ་བྱིན་ཅན་གནང་སྦྱིན་མཛད་ནས་སུ། །ཇོ་ནང་དཔལ་དུ་ཆོས་རྗེ་ཀུན་མཁྱེན་པའི། །མདུན་དུ་སོངས་དང་བསྟན་ལ་ཕན་ཐོགས་འོངས། །གསུངས་པས་བྱོན་པའི་ཞོར་ལ་སྣར་ཐང་དང༌། །ནག་ཕུག་ར་ལུང་སྙི་ཐང་ཉང་སྟོད་དང༌། །ཁྲོ་ཕུ་ནས་ནི་ས་སྐྱར་ཕེབས་པར་མཛད། །འཇིགས་མེད་གྲགས་པ་ལ་སོགས་མཁས་པ་ཡི། ། སྐྱེས་བུ་ཀུན་ལ་གུར་བརྟག་སཾ་གསུམ་དང༌། །ཕར་ཚད་མངོན་གསུམ་མདོ་རྒྱུད་ལེགས་པར་ཞུས། །ས་སྐྱར་ཆོས་སྟོན་མཛད་པའི་ཞུ་འབུལ་ཀྱང༌། །མ་གསན་འཛུམ་ཆོས་བྱོན་ནས་གྲུབ་ཐོབ་པ། །བྱ་རིན་པ་ཡིས་སེར་ཕྲེང་རོལ་ཆས་བསུས། །འཕགས་པ་ཐོགས་མེད་ཡིན་པར་ལུང་བསྟན་གནང༌། ། སྒྲོལ་ཁྲིད་ཚེ་ཁྲིད་ར་ཁྲིད་ངོ་སྤྲོད་སོགས། །གསན་ནས་ཇོ་ནང་དཔལ་དུ་བྱོན་ནས་སུ། །དགེ་འདུན་ཉིས་བརྒྱ་རྒྱུད་འགྲེལ་གསུངས་དུས་མཇལ། །དགུང་ལོ་ང་བརྒྱད་བར་དུ་ལེགས་པར་བསྟེན། །རྭ་འབྲོའི་ལུགས་ཀྱི་དུས་འཁོར་དབང་མོ་ཆེ། །དཔལ་ལྡན་རྒྱུ་སྐར་རྡོ་རྗེ་ཕྲེང་བ་དང༌། །མི་ཏྲ་བརྒྱ་རྩ་བདེ་མཆོག་སྙན་རྒྱུད་དང༌། །རྣལ་འབྱོར་གསུམ་གྱི་སྙིང་པོ་ཟབ་ཆོས་གསན། །ངོ་མཚར་ཁྱད་འཕགས་ཉམས་རྟོགས་ཕུལ་དུ་བྱུང༌། །དགུང་ལོ་སོ་བརྒྱད་ཆོས་རྗེ་རིན་པོ་ཆེའི། །མདུན་དུ་བསྙེན་རྫོགས་མཛད་ནས་སྐུ་ལུས་ལ། །ཚུལ་ཁྲིམས་དྲི་ངད་བྱུང་བ་ངུར་སྨྲིག་རྒྱན། །སེམས་འགྲེལ་སྐོར་གསུམ་ངེས་དོན་མདོ་བཅུ་དང༌། །ཀླུ་སྒྲུབ་ཆོས་སྡེ་ཉི་ཤུ་བྱམས་ཆོས་ལྔ། །བཤད་སྦྱར་མཛད་དེ་གུར་བརྟག་སཾ་གསུམ་དང༌། །གསང་བ་འདུས་པའི་རྒྱུད་དང་རྒྱུད་ཕྱི་མ། །ཕར་ཚད་མངོན་འདུལ་ལ་སོགས་ཕྱི་ནང་གི །ཆོས་སྐོར་ཐམས་ཅད་དགྱེས་བཞིན་གསན་བསམ་མཛད། །མཁས་པའི་དབང་པོར་གྱུར་ནས་ཀུན་སྤངས་བ། །ཆོས་གྲགས་དྲུང་དུ་རྒྱུད་འགྲེལ་ལ་སོགས་པའི། །ཆོས་མང་ཞུས་ལ་ཆོས་རྗེ་ལོ་ཙཱའི་དྲུང༌། །གསང་རྒྱུད་དོན་དམ་བསྙེན་པ་དབང་མདོར་བསྟན། །རྩིས་སྐོར་སྒྲ་སོགས་ཆོས་བཀའ་དུ་མ་ཞུས། །མ་ཏི་པནྚི་ཏ་ལས་འཇམ་དཔལ་གྱི། །ལྟ་འདོད་རྒྱུད་འགྲེལ་སྦྱོར་དྲུག་ཆོས་རྣམས་གསན། །ཆོས་རྗེ་ཕྱོགས་རྒྱལ་རྒྱུད་འགྲེལ་སེམས་ཁྲིད་དང༌། །རྣམ་བཤད་རིགས་པ་སྒྱུ་དྲྭ་འཕགས་སྐོར་གསན། །དགུང་ལོ་ང་བརྒྱད་མཁན་ཆེན་ནོར་བཟང་གིས། །སྟོད་ལུང་རྣམ་རྒྱལ་གདན་དྲངས་དགོན་གཞི་དང༌། །རྟེན་བཅས་ཕུལ་ནས་དབང་པོ་རབ་རྣམས་ལ། །རྒྱུད་འགྲེལ་དབྱར་ཆོས་དགུན་ཆོས་བཙུགས་ཏེ་གསུངས། །དབང་འབྲིང་རྣམས་ལ་དབང་ལུང་དུ་མ་གནང༌། །ཐ་མ་རྣམས་ལ་རྒྱུ་འབྲས་བློ་སྦྱོང་སྐོར། །གསུངས་ནས་སེམས་ཅན་མང་པོ་སྨིན་གྲོལ་བཀོད། །རྟེན་གསུམ་ཁྱད་འཕགས་བྱམས་མགོན་གསེར་སྐུ་བཞེངས། །མ་ཏི་པཎ་ཆེན་གདན་དྲངས་རབ་གནས་མཛད། །འདོད་གཟུགས་ལྷ་རྣམས་ནམ་མཁར་འཇའ་འོད་དང༌། །བར་སྣང་མེ་ཏོག་ཆར་ཕབས་དགེ་མཚན་བྱུང༌། །བྱོན་ཁར་སྐྱེལ་ཐུང་ཕན་ཚུན་སྐུ་རིམ་ལ། །འབད་པའི་ཞལ་ཏ་མཛད་ནས་གུང་ཐང་དུ། །གདན་དྲངས་སྦྱོར་དྲུག་ལ་སོགས་འདོད་ཆོས་ནི། །སྣ་ཚོགས་བསྟན་མཐར་མཚན་ཉིད་མཁས་པ་ཡི། །ཕར་ཚད་བགྲོ་གླེང་ཉིན་ལྔར་མཛད་ནས་སུ། །ཐམས་ཅད་ལན་མེད་ཕམ་པར་མཛད་པའི་ཚེ། །བློ་གསལ་དག་གིས་ཞབས་རྡུལ་སྤྱི་བོར་ལེན། །སྟོད་ལུང་རྣམ་རྒྱལ་རྒྱུད་འགྲེལ་ལོ་གསུམ་གསུངས། །ཚོགས་གཉིས་ལམ་འཇུག་བཤད་པ་ཆེ་ཆུང་གཉིས། །ལ་སོགས་གསུང་ཆོས་རྣམ་དག་མང་དུ་མཛད། །ཐོས་བསམ་སྒོམ་གསུམ་མཛད་སྤྱོད་ཡོངས་རྫོགས་ཚེ། །དགུང་ལོ་དོན་གཉིས་ལྕགས་ཕོ་འབྲུག་གི་ལོ། །ཟླ་བ་ལྔ་པའི་བཅུ་དྲུག་ཞི་བར་གཤེགས། །དེའི་ཚེ་ངོ་མཚར་བྱུང་བ་འདི་ལྟ་སྟེ། །སྤྲིན་བྲལ་ཆོས་སྐུའི་མཁའ་དབྱིངས་དག་པ་ལ། །ཡིད་འཕྲོག་འཇའ་འོད་སྣ་ཚོགས་གུར་ཆེན་བསྐོར། །འོད་གསལ་རྫ་མའི་ཕྲེང་བ་མཚན་མར་བྱུང༌། །ལྷ་ཡི་མེ་ཏོག་སྣ་ཚོགས་ལག་མཐིལ་ཙམ། །ཆར་བ་བཞིན་དུ་བུ་ཡུག་འཚུབས་པར་བབས། །ཞག་གསུམ་འོད་གསལ་ངང་དུ་མཉམ་པར་བཞག །དེ་ནས་དཀར་ཆ་སྟེང་དང་དམར་པོ་འོག །སྤུར་སྦྱངས་མེ་ལྕེ་དུ་བ་འཇའ་འོད་བཅས། །དགའ་ལྡན་ལྷ་ཡི་གནས་སུ་མངོན་པར་འཕགས། །དེར་བཞུགས་ལྷ་ཡིས་བསུ་བ་སྣ་ཚོགས་མཛད། །རྣམ་དག་རོལ་བའི་དྲི་བཟང་ས་གཞིར་ཁྱབ། །ལྷ་ཡི་རོལ་མོ་སྣ་ཚོགས་མཁའ་ལ་སྒྲོགས། །ས་གཡོས་འཇའ་འོད་མེ་ཏོག་སྣ་ཚོགས་ཆར། །དུས་རྣམས་ཀུན་ཏུ་བབས་ནས་དགེ་མཚན་བཀྲ །སྤུར་ཁང་ཞལ་ཕྱེ་རྟ་མགྲིན་རྗེ་བཙུན་མ། །འཇིགས་བྱེད་དཔའ་ཅིག་དུང་དཀར་གཡས་འཁྱིལ་དང༌། །ཨ་ཡིག་རིང་བསྲེལ་རྟེན་མཆོག་དཔག་མེད་བྱུང༌། །འཕགས་པ་ཐོགས་མེད་རྣམ་འཕྲུལ་ཆོས་ཀྱི་རྗེ། །མཚན་མཆོག་དོན་ལྡན་མཚུངས་མེད་རིན་ཚུལ་བའི། །ཞབས་དྲུང་བདག་སྐྱེས་སྒོ་གསུམ་གུས་པ་ཡིས། །མཉེས་པ་སྟོང་གིས་རྟག་ཏུ་སྤྱོད་པར་ཤོག །ཅེས་ཆོས་རྗེ་རིན་ཚུལ་བའི་རྣམ་པར་ཐར་བ་མདོར་བསྡུས་པ་སྟེ་བཅུ་གཅིག་པའོ།། །།

གྷ་རུང་བ་ལྷའི་རྒྱལ་མཚན་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་དེ་ཝ་ཏི་དྷྭ་ཛ་སྭ་སྟི་སིདྡྷི་ཕ་ལ། ཨརྱ་དེ་ཝའི་སྤྲུལ་པ་གྷ་རུང་བ། །ལྷ་ཡི་རྒྱལ་མཚན་འཁྲུངས་ཡུལ་སྡེ་ཐང་དུ། །ཡབ་ནི་ཡེ་ཤེས་བཟང་དང་ཡུམ་མཆོག་ནི། །དཔལ་བཙུན་མ་ཡི་སྲས་སུ་ས་ལུག་གི །ལོར་འཁྲུངས་གཟུགས་མཛེས་རིག་པ་རྣོ་བ་དང༌། ལུས་ལ་དྲི་བཟང་མཚན་བཟང་སྐྱེས་བུ་མཆོག །དེ་ནས་གྲུབ་ཐོབ་ཨ་ཙ་ལ་ན་ཐས། །དེ་རིང་སྡེ་ཐང་ཨརྱ་དེ་ཝ་བ་ནི། །བྱོན་ཡོད་གསུངས་ལ་དགུང་ལོ་ལྔ་བ་ཡི། །ཆུ་ཕག་སྐུ་འབུམ་ཐང་བྱོན་ངེས་འབྱུང་ལས། །བླ་མ་དོན་གྲུབ་དཔལ་ནས་རབ་ཏུ་བྱུང༌། །མཚན་ནི་ལྷ་ཡི་རྒྱལ་མཚན་དཔལ་བཟང་གསོལ། །འདུལ་བ་ཀ་རི་ཀ་ལ་སོགས་པ་གསན། །ཚིག་དོན་མ་ལུས་ཐུགས་ཆུད་ལོ་ངོ་གཉིས། །བགྲོ་གླེང་སྦྱངས་ནས་ཕར་ཚད་མངོན་གསུམ་དང༌། །ལེགས་པར་བསླབ་ནས་གསང་ཕུར་གླིང་སྟོད་སྨད། །མཚན་ཡང་དགོན་དང་གུང་ཐང་ལ་སོགས་ལ། །དབུས་ཀྱི་དགོན་གནས་དུ་མར་ཞབས་ཀྱིས་བཅག །མཁས་པའི་སྐྱེས་བུ་དམ་པ་རྣམས་ལས་ནི། །ཕར་ཚད་མངོན་འདུལ་སྤྱོད་འཇུག་བྱམས་ཆོས་དང༌། །རྡོར་ཕྲེང་ལ་སོགས་གསུང་རབ་དུ་མ་ལ། །ཐོས་པ་རྒྱ་ཆེར་མཛད་ནས་རྟ་ནག་དང༌། ། ཞྭ་ལུ་སྟོད་ལུང་མཚུར་ཕུར་དག་ལ་བྱོན། །རྟོགས་ལྡན་གྲགས་སེང་ཞེས་བྱ་མངོན་ཤེས་ཅན། །གང་གིས་ཨརྱ་དེ་ཝར་ལུང་བསྟན་ནས། །བདེ་མཆོག་འབུམ་ལྔ་འཇམ་དཔལ་རྩ་རྒྱུད་དང༌། །སྤྱོད་རྒྱུད་ཕྱི་མ་རྒྱུད་སོགས་མང་དུ་གསན། །དགུང་ལོ་ཉི་ཤུར་གཙང་བྱོན་བྲག་རམ་པ། །སློབ་དཔོན་ཀུན་བཟང་ཕར་ཚད་མངོན་འདུལ་གྱི། །འགྲེལ་བ་དང་བཅས་གསན་ནས་མཁས་པ་ཡི། །ཐུགས་རྒྱལ་སྐྱེས་ནས་གུང་ཐང་དུ་བྱོན་ནས། །མཁས་པ་དུ་མར་རྩོད་པ་མཛད་པ་ཡིས། །ཉིན་གསུམ་ལུང་རིགས་བགྲོ་གླེང་བྱས་པ་ཡིས། །འགྲན་ཟླ་ཐམས་ཅད་ཟིལ་གྱིས་གནོན་པར་མཛད། །ཐམས་ཅད་ཀྱིས་ནི་སློབ་དཔོན་འཛིན་པ་ལ། །ཚད་མ་རིགས་པའི་བཤད་སྦྱར་ཚར་གཅིག་གསུངས། །དེ་ནས་སྟག་ལུང་ཁྲོ་ཕུ་བདེ་ཆེན་དང༌། །རྩེ་ཆེན་ཆོས་ལུང་སོགས་ལ་སློབ་གཉེར་མཛད། །དེ་ནས་ས་སྐྱར་ཆོས་གྲྭ་ཕེབས་ནས་སུ། །འཇམ་དབྱངས་ཆོས་ཀྱི་རྒྱལ་མཚན་སྐུ་དྲུང་ནས། །ཕར་ཚད་མངོན་གསུམ་གུར་བརྟག་སཾ་གསུམ་དང༌། །སེམས་འགྲེལ་ཆ་ལག་བཅས་པ་གསན་བྱས་ནས། །དཔལ་སྟེང་བྱོན་ནས་རིན་ཆེན་བཟང་པོ་ལས། །ཆོས་སྐྱོང་སྐོར་དང་རྣམ་བཤད་རིགས་པ་དང༌། །དབུ་མ་རྩ་ཤེར་ཤེར་འཇུག་བདེ་མཆོག་གི །དྲིལ་བུ་སྐོར་དང་མདོ་མང་ཡུམ་རྣམས་གསན། །ར་ལུང་བྱོན་ནས་ཡེ་ཤེས་རྒྱལ་མཚན་ལས། །འཇིགས་བྱེད་དབང་བཀའ་ལུང་བཀའ་ཐམས་ཅད་དང༌། །ཀྱཻ་རྡོར་ས་ལུགས་རྔོག་ལུགས་དབང་དག་དང༌། །རྒྱུད་འབུམ་དོ་ཧ་སྐོར་གསུམ་དམར་ཁྲིད་སོགས། །ཆོས་མང་ལེགས་པར་གསན་བསམ་ལེགས་པར་མཛད། །དེའི་ཚེ་ཆོས་རྗེ་ཀུན་མཁྱེན་རིན་པོ་ཆེའི། །སྙན་པའི་གྲགས་པ་གསན་པས་ཨུདྤ་ལའི། །འདབ་མ་རླུང་གིས་བསྐྱོད་ལྟར་བ་སྤུ་གཡོས། །དད་པ་སྐྱེས་ནས་དགུང་ལོ་སོ་གཉིས་སུ། །ཇོ་ནང་དཔལ་དུ་ཆོས་རྗེ་ཞལ་མཇལ་ཞིང༌། །དུང་དཀར་ལ་སོགས་ཕྱག་རྟེན་ཕུལ་ནས་སུ། །དུས་དང་བསྟུན་ནས་དཔལ་ལྡན་དུས་འཁོར་དབང༌། །གསང་འདུས་རིགས་དྲུག་སྒྱུ་འཕྲུལ་རིགས་གསུམ་དང༌། །སྡོམ་པ་ཆེ་ཆུང་རྡོ་རྗེ་ཕྲེང་བ་དང༌། །མི་ཊ་བརྒྱ་རྩ་རྟ་མགྲིན་ཡང་གསང་དབང༌། །སྤྱོར་བ་ཡན་ལག་དྲུག་པ་ལ་སོགས་པའི། །ཁྲིད་རིགས་དུ་མ་གསན་ནས་ཉམས་མྱོང་གི །རྟགས་མཚན་ཁྱད་པར་བྱུང་བ་དེ་ཡི་ཚེ། །སྦྱན་རས་གཟིགས་ཀྱི་སྐུ་དང་ཞིང་ཁམས་གཟིགས། །རང་ཉིད་དེ་བཞིན་གཤེགས་པའི་སྐུར་གྱུར་པའི། །འོད་ཀྱིས་ཁམས་གསུམ་སྣང་བར་བྱས་པ་སོགས། །དག་སྣང་དཔག་མེད་བྱུང་ནས་གནས་འགྱུར་ཐོབ། །སེམས་འགྲེལ་སྐོར་གསུམ་ངེས་དོན་མདོ་བཅུ་དང༌། །ཡེ་ཤེས་སྤྱན་སྒྲུབ་ལ་སོགས་ལོ་དུ་མར། །ཟབ་ཆོས་མང་དུ་གསན་ནས་སྒོམ་སྒྲུབ་བྱས། །དེ་ནས་ཀུན་སྤངས་ཆོས་གྲགས་དཔལ་ལས་ནི། །ཕར་ཚད་མངོན་འདུལ་རྒྱུད་འགྲེལ་ཚར་བདུན་དང༌། །སྦྱོར་དྲུག་དབང་ཁྲིད་དུ་མ་དབང་མདོར་བསྟན། །ནཱ་རོའི་འགྲེལ་པ་དོན་དམ་བསྙེན་པ་སོགས། །མང་པོ་གསན་ནས་ལོ་ཙཱ་བ་ཡི་མདུན། །སྒྲོལ་མ་བརྒྱ་རྩ་ཕྱག་ན་རྡོ་རྗེའི་དབང༌། །མཁའ་འགྲོ་ཀུན་སྤྱོད་རྒྱུད་འགྲེལ་བསྟན་རྩིས་སོགས། །གསན་ལ་མ་ཏི་པཎ་ཆེན་སྐུ་དྲུང་ནས། །བྱམས་ཆོས་སྡེ་ལྔ་གཤེད་དམར་ལྷ་ལྔ་དང༌། །ལམ་འབྲས་སྙན་ངག་མེ་ལོང་ལ་སོགས་ཞུས། །ཆོས་རྗེ་ཕྱོགས་རྒྱལ་ཉ་དབོན་རྣམ་གཉིས་ལས། ། ལམ་འབྲས་ས་ལུགས་ཞ་ལུགས་གཉིས་ཀ་ཡི། །བསྡུས་བཤད་སེམས་འགྲེལ་ལ་སོགས་མང་དུ་གསན། །དེ་ནས་གྷ་རུང་ཆོས་སྡེར་བྱོན་ནས་སུ། །སློབ་དཔོན་ཆོས་གྲགས་དཔལ་གྱིས་གདན་ས་གཏད། །བཀའ་རྒྱུད་གོང་མ་རྣམས་ཀྱི་ཕྱག་དཔེ་དང༌། །ལྷ་རྟེན་ཐམས་ཅད་ཕུལ་ནས་ལོ་དུ་མར། །འཆད་ཉན་དར་རྒྱས་མཛད་དེ་གདན་ས་བསྐྱངས། །མཁན་ཆེན་བྱང་ཆུབ་བཟང་པོས་གདན་དྲངས་ནས། །གནས་ཆེན་ནམ་མཁའ་མཛོད་ཀྱི་དགོན་གཞི་བཅས། །ཕུལ་ནས་དེར་བཞུགས་ལྷ་ཁང་སྐུ་རྟེན་དང༌། །གསུང་རབ་བཅས་པ་བཞེངས་ནས་རྒྱུད་འགྲེལ་སོགས། །ཆོས་ཀྱི་ཆར་ཕབ་སེམས་ཅན་སྨིན་གྲོལ་སྦྱོར། །སྦྱོར་དྲུག་ཐོག་མཐའ་བར་གསུམ་ལ་སོགས་གསུངས། །ཆོས་ཟབ་མང་དུ་མཛད་ནས་ཐུགས་དགོངས་རྫོགས། །དགུང་ལོ་གྱ་གསུམ་བཞེས་དུས་མེ་ལུག་ལོའི། །ཟླ་བ་དྲུག་པའི་ཚེས་བརྒྱད་ཞི་བར་གཤེགས། །ནམ་མཁར་སྒྲ་དང་བར་སྣང་འཇའ་འོད་བཅས། །སྣ་ཚོགས་གཟིམ་ཁང་སྟེང་དུ་ཟུག་པ་དང༌། །ས་གཡོས་མེ་ཏོག་ཆར་བབས་དགེ་མཚན་བྱུང༌། །ཞག་ནི་བཅུ་དྲུག་རང་བཞིན་འགྱུར་མེད་ཀྱི། །བདེ་ཆེན་འོད་གསལ་ངང་ལ་གཡོ་མེད་བཞུགས། །སྤུར་ནི་རྣམ་སྣང་ཆོས་བདུན་ཚང་བར་མཛད། །གཟི་མདངས་ཆེ་བ་འོད་ཟེར་དུ་མ་འཕྲོ། །དྲི་བཟང་ངད་ལྡང་ཉེར་བཞིའི་སྔ་དྲོ་ལ། །དཀར་ཆ་སྟེང་དང་དམར་པོ་ཆུ་ལམ་ན། །སྤུར་ནི་བྲག་དུང་རྩ་བར་སྦྱངས་པའི་ཚེ། །ནམ་མཁའ་གཡའ་དག་འཇའ་འོད་སྣ་ཚོགས་ཁྱབ། །རི་རྩེ་ནས་ནི་སྤུར་ཁང་བར་དུ་ནི། །ལྷ་ཡི་མེ་ཏོག་དཀར་དམར་སྣ་ཚོགས་ཀྱིས། །ཆུ་ཤོག་ཙམ་ཞིག་བར་མ་ཆད་པར་བབས། །རོལ་མོ་སྣ་ཚོགས་སྤོས་ཀྱི་དྲི་བཟང་ཁྱབ། །སྤུར་ཁང་ཞལ་ཕྱེ་འདོད་མ་གཅིག་མ་གཏོགས། །དུས་འཁོར་ཡོངས་རྫོགས་ལྷ་ཚོགས་འཁོར་བཅས་བྱོན། །དུང་དཀར་ལྔ་དང་རིང་བསྲེལ་མཐའ་ཡས་བཞག །དགོན་སྡེ་དུ་མར་མང་ཇ་འབུལ་འགྱེད་དང༌། །ཆོ་ག་དང་བཅས་གཤེགས་རྫོགས་ཡང་དག་སྒྲུབ། །རྒྱལ་ཚབ་བསྟན་པའི་རྒྱལ་མཚན་མངའ་གསོལ་མཛད། །དཔལ་ལྡན་ཨརྱ་དེ་ཝའི་རྣམ་འཕྲུལ་གྱིས། །མ་དག་ཞིང་འདིར་འགྲོ་བ་འདྲེན་པའི་དཔལ། །ལྷ་ཡི་རྒྱལ་མཚན་ཆོས་ཀྱི་འོད་སྟོང་འབར། །ལྟ་ངན་མུན་པའི་གནས་ངན་བསལ་དུ་གསོལ། །ཞེས་གྷ་རུང་བ་ལྷའི་རྒྱལ་མཚན་གྱི་རྣམ་པར་ཐར་བ་མདོར་བསྡུས་པ་སྟེ་བཅུ་གཉིས་པའོ། །

ཕུན་ཚོགས་དཔལ་བཟང་པོའི་རྣམ་པར་ཐར་བ་མདོར་བསྡུས་པ།།

ཕུན་ཚོགས་དཔལ་བཟང་པོའི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་ལཀྵྨི་ཤྲཱི་བྷ་དྲ་སྭ་སྟི་སིདྡྷི་ཕ་ལ། ཤཱཀྱ་བཤེས་གཉེན་སྤྲུལ་པ་ཆོས་ཀྱི་རྗེ། ། ཕུན་ཚོགས་དཔལབཟང་འཁྲུངས་ཡུལ་འཕན་ཡུལ་ཡིན། །ཡབ་ནི་སྟོན་པ་དཔལ་དང་ཡུམ་དཔལ་འདྲེན། །གཉིས་ལ་སྲས་བཞི་ཡོད་པའི་ཐ་ཆུང་ཡིན། །ལྷུམས་སུ་ཞུགས་དང་བལྟམས་པའི་དུས་སྐབས་སུ། །དགེ་བའི་ལྟས་བཟང་སྣ་ཚོགས་བྱུང་བ་དང༌། །བྱིས་པའི་དུས་སུ་བྱམས་དང་སྙིང་རྗེ་དང༌། །སྔགས་དང་ཕར་ཕྱིན་མོས་ལ་ཆོས་མཛད་ཀུན། །གདུང་སེམས་ཆེ་བའི་མཛད་སྤྱོད་དཔལ་མངའ་བ། །དགུང་ལོ་བཅུ་བདུན་ལོན་ནས་སྟག་ལུང་བྱོན། །མཁན་ཆེན་རིན་ཆེན་བཟང་པོའི་སྐུ་མདུན་ནས། །དགེ་ཚུལ་སྡོམ་པ་བླངས་ནས་ངུར་སྨྲིག་བགོས། །མཚན་ལ་ཕུན་ཚོགས་དཔལ་བཟང་ཞེས་གསོལ་ཏེ། །ཀ་རི་ཀ་ཡི་གཞུང་འགྲེལ་ཡང་དག་གསན། །ཡི་གེ་རི་མོ་ལྷ་བྲིས་སོགས་ལ་མཁས། །སྟག་ལུང་སློབ་དཔོན་རཏྣ་གུ་རུ་དང༌། །རཏྣ་ཀ་རའི་དྲུང་དུ་ཕར་ཚད་དང༌། །མངོན་འདུལ་དམར་ཁྲིད་དབང་རིགས་དུ་མ་ཞུས། །བདེ་བ་ཅན་དུ་བཀྲ་ཤིས་སེངྒེ་ལ། །བྱམས་ཆོས་སྡེ་ལྔ་ཚད་མ་རིགས་རྒྱན་གསན། །བགྲོ་གླེང་བརྒལ་བརྟག་ལུང་རིགས་མཁས་པར་གྲགས། །སྟོད་ལུང་མཚུར་ཕུར་བྱོན་ནས་ཀརྨ་པ། །རང་བྱུང་རྡོ་རྗེར་གུར་བརྟག་སཾ་གསུམ་དང༌། །རྡོར་ཕྲེང་གཤེད་སྐོར་ལ་སོགས་མང་དུ་གསན། །རྟོགས་ལྡན་གྲགས་སེང་ལས་ནི་ནཻ་གུ་དང༌། །ནཱ་རོ་ཕག་སྐོར་བདེ་མཆོག་དྲིལ་བུ་པ། །ལུ་ཧི་པ་དང་ཏེ་ལོ་ནཱ་རོའི་ལུགས། །གསང་འདུས་འཕགས་ལུགས་ལ་སོགས་མང་དུ་གསན། །དེའི་ཚེ་ངེས་དོན་རྒྱ་མཚོའི་དཔེ་ཆ་གཟིགས། །དད་པས་སྤུ་ལོང་གདོང་ལ་སྤྱན་ཆབ་འཁྲིགས། །ཀྱེ་མ་བདག་ནི་སྐལ་པ་རབ་ཏུ་བཟང༌། །ཚེ་རབས་ཀུན་ཏུ་དམ་ཆོས་འདི་འདྲ་དང༌། །མཇལ་ནས་རྟོགས་ཤིང་གཞན་ལ་སྟོན་པར་ཤོག །ཅེས་སོགས་གསོལ་བཏབ་ སྣར་ཐང་བྱོན་པ་ན། །སེར་འཚོགས་སྟོང་ཕྲག་ཙམ་ལ་ཆོས་གསུངས་པའི། །དུས་སུ་མཇལ་ནས་དུས་འཁོར་དབང་དག་ཞུས། །སྦྱོར་དྲུག་གསན་པའི་དུས་སྐབས་ཉམས་མྱོང་ནི། །ཁྱད་འཕགས་བྱུང་བའི་ངང་ལས་སྐུའི་སྐྱེ་བ། །དྲན་པ་སྔོན་རོལ་སྐྱེ་བ་མང་པོའི་གོང༌། །ཡིད་འོང་རྒྱ་གར་ཤར་ཕྱོགས་གཙུག་ལག་ཁང༌། །དྷེ་ཝེའི་གནས་མཆོག་བྲམ་ཟེ་ཆེན་པོ་ཡི། །ས་ར་ཧ་ཡི་སྲས་ཀྱི་ཐུ་བོ་མཆོག །ད་ན་ཤཱི་ལ་བདེ་མཆོག་ལ་སོགས་ཀྱི། །ཡི་དམ་ཡིན་ལ་སྐྱེ་བ་འདི་སྔོན་དུ། །བཅུ་དྲུག་རྒྱ་གར་ཟངས་གླིང་གནས་མཆོག་ཏུ། །དྲི་མེད་འོད་ཅེས་སྙིང་པོའི་དོན་ཟབ་ཀྱི། །ལམ་དག་འབད་པ་ལ་སྟོད་སྙེ་ནམ་གྱི། །སེ་ཕུགས་མི་ལའི་སློབ་མ་འོད་ཟེར་དཔལ། །བྱམས་བརྩེ་ཟབ་མོ་ལམ་གྱིས་དབང་ཕྱུག་དཔལ། །བལ་ཡུལ་ཐང་གི་ཧ་ར་ན་ཞེས་པའི། །རྒྱལ་པོ་འོད་ཟེར་གོ་ཆའི་སྐུ་དྲུང་དུ། །ཤཱཀྱ་བཤེས་གཉེན་ཞེས་བྱ་ཡོངས་སུ་གྲགས། །རྡོ་རྗེ་ཐེག་པས་གཞན་ཕན་དུ་མ་བསྒྲུབས། །གཞན་ཡང་ཡུལ་ཕྱོགས་སྣ་ཚོགས་ཟབ་ལམ་གྱི། །བག་ཆགས་བཞག་ལ་སྒོ་སྐྱེས་དར་གྱི་བུ། །གསུམ་གྱི་ཆུང་ཤོས་དགེ་བཤེས་རིན་སེང་ཞེས། །ཀུན་སྤངས་དྲུང་དུ་ཟབ་ལམ་ཞུ་བ་སོགས། །ཇོ་ནང་ཉིད་དུ་ཡང་ཡང་དྲན་པ་བྱུང༌། །ད་ལྟ་འཕགས་པ་སྤྱན་རས་གཟིགས་དབང་ཕྱུག །གཉིས་མེད་ཆོས་རྗེ་སྤྲུལ་པའི་སྐུ་མཆོག་གིས། །རྗེས་བཟུང་བདག་གི་ཆོས་ཀྱི་མགུར་གླུ་ཡིན། །ཞེས་གསུངས་ཆོས་རྗེ་རིན་པོ་ཆེ་ཡི་མདུན། །རྒྱུད་འགྲེལ་གསང་འདུས་མཁའ་འགྲོ་རྒྱ་མཚོའི་རྒྱུད། །དབུ་མ་བསྟོད་ཚོགས་སོགས་དང་གསུང་འབུམ་དང༌། །རྒྱུད་འབུམ་ངེས་དོན་མདོ་བཅུ་ལ་སོགས་ཀྱི། །གསུང་རབ་ཚད་མ་མཐའ་དག་ལེགས་པར་ཞུས། །གསང་ཕུར་གདན་དྲངས་ཚེ་ན་ཆོས་ཀྱི་རྗེ། །རིན་པོ་ཆེ་ཡིས་ཞལ་ཏ་འདི་ལྟར་གནང༌། །སྔོན་ཚེ་འོད་སྲུང་སྤྲུལ་པས་ཤེས་རབ་ཀྱི། །ཕར་ཕྱིན་གླིང་དང་གླིང་ཕྲན་རྣམས་སུ་བསྟན། །ནུབ་ཕྱོགས་རྒྱལ་པོ་ས་བྷུ་དྲ་ཞེས་པས། །སྤྲུལ་བའི་ཞིང་མཆོག་བྱང་ཕྱོགས་ཤམ་བྷ་ལར། །ངྷརྨ་ཨརྱ་བྲམ་ཟེ་ཙན་དྲ་པས། །དེས་ཀྱང་རྒྱུད་འགྲེལ་རྒྱས་པར་བྱས་པ་ཡིན། །ཁྱེད་ཀྱང་ཟབ་ལམ་རྒྱ་མཚོའི་རྣལ་འབྱོར་ལ། །ཟབ་མོའི་ཆུ་རྒྱུན་ཡང་ཡང་འཐུང་བ་ཡིས། །ང་དང་མཇལ་ཏེ་རྫོགས་ལྡན་བསྟན་པ་ནི། །ཉམས་དམའི་དུས་སྐབས་གཅིག་གཉིས་བརྒྱ་སྟོང་སོགས། །སྐལ་ལྡན་ཀུན་ལ་རྒྱ་ཆེར་སྤེལ་བར་གྱིས། །སྐུ་བཞི་རིགས་ལྡན་བྱིན་རླབས་ལུས་ངག་དང༌། །སེམས་ཀྱི་ཉམས་བཟང་གནས་ལུགས་ཇི་བཞིན་ཤེས། །མ་བཀག་མ་བསྐྱིལ་རྒྱ་ཡན་ཐོངས་བར་གྱིས། །བཀག་ན་རིགས་ལྡན་ཐུགས་དང་འགལ་བས་ན། །རྣལ་འབྱོར་བར་ཆད་བདུད་ཀྱིས་ཁྱེར་བ་དང༌། །འགྲོ་མང་ལམ་གྱིས་གེགས་བྱེད་ཡིན་པས་ན། །ཁྱེད་ལ་ཇི་ལྟར་གདམས་པ་གོ་བར་མཛོད། །ཅེས་སོགས་གསུངས་ནས་བསྙེན་རྫོགས་སྡོམ་པ་གནང༌། །ལམ་ཞོར་ཞྭ་ལུར་བྱོན་ནས་བུ་སྟོན་ལ། །སྦྱོང་རྒྱུད་རྡོར་དབྱིངས་ཀ་ལ་ཙནྚ་ཡི། །སྙིང་པོ་བསླབས་ནས་རིམ་བྱོན་ཕྱོགས་རྒྱལ་དང༌། །བླ་མ་བློ་ལྡན་འོད་ཟེར་བླ་མ་དང༌། །ཆོས་རྗེ་བྱ་ཡུལ་ཚུལ་ཁྲིམས་རྒྱལ་པོ་སོགས། །རྡོ་རྗེ་ཕྲེང་བ་རྒྱུད་བླ་ལ་སོགས་གསན། །གསང་ཕུར་བྱོན་ནས་གླིང་སྟོད་གླིང་སྨད་དུ། །ཆོས་ཀྱིས་ཆར་ཕབ་དེ་ནས་རྭ་སྒྲེང་དང༌། ། ལུང་ཀར་ཐང་ཀ་དགོན་སྡེ་དུ་མ་ལ། །དབང་དང་སྦྱོར་དྲུག་ལ་སོགས་རྒྱ་ཆེར་གསུངས། །ཆུ་ཡོས་འབབ་རིམ་རྒྱུད་འགྲེལ་དུས་འཁོར་དབང༌། །སྦྱོར་དྲུག་ངེས་དོན་རྒྱ་མཚོ་ལ་སོགས་ཀྱི། །ཆོས་མང་གསུངས་ནས་ཤིང་སྦྲུལ་ལྷ་སར་བྱོན། །རྟེན་རྣམས་དྲུང་དུ་མཆོད་པ་རྒྱ་ཆེར་མཛད། །འདུས་ཚོགས་མང་པོར་བློ་སྦྱོང་གསུངས་དུས་སུ། །སེ་ར་འབྲས་སྤུངས་རང་སྟོང་ལྟ་བ་འཛིན། །དགེ་འདུན་བརྒྱ་སྟོང་མང་པོར་རྩོད་པ་མཛད། །ཐམས་ཅད་གུས་འདུད་དེ་ནས་འཕན་ཡུལ་དུ། །ཀ་ལ་པ་ཞེས་དབེན་པའི་རི་ཁྲོད་བཏབ། །རྟེན་གསུམ་བཞེངས་ནས་དབང་པོ་རབ་རྣམས་ལ། །སྦྱོར་དྲུག་རྒྱུད་འགྲེལ་རྡོ་རྗེའི་ཐེག་པ་ཡི། །ཆོས་སྐོར་གསུངས་ལ་དབང་འབྲིང་རྣམས་ལ་ནི། །ཡུམ་སྲས་བཅུ་བདུན་བཤད་སྦྱར་རྒྱས་པར་གནང༌། །དམན་པ་རྣམས་ལ་སྤྱོད་འཇུག་སྐྱེས་རབས་སོགས། །བསྟན་ནས་སྨིན་ཅིང་གྲོལ་བའི་ལམ་ལ་བཀོད། །རྣམ་འཇོམས་གཟུངས་ཀྱི་ཊཱི་ཀ་ལ་སོགས་པའི། །གསུང་ཆོས་མཛད་ནས་དགུང་ལོ་དོན་བཞི་པ། །མེ་སྦྲུལ་ཟླ་བ་དྲུག་པའི་ཚེས་དྲུག་ལ། །ཞི་བར་གཤེགས་ལ་མཁའ་འགྲོ་ཀུན་སྤྱོད་ལས། །རྣལ་འབྱོར་པ་ནི་ཚེ་འཕོས་ཞེས་སོགས་ནས། །མཁའ་སྤྱོད་གནས་སུ་ཁྲིད་ཅེས་གསུངས་པ་ལྟར། །ངོ་མཚར་དགེ་ལེགས་མཚན་མ་རྣམ་པར་བཀྲ །ཞག་བདུན་རང་བཞིན་འོད་གསལ་ཉིད་ལ་གནས། །དེ་ནས་དཀར་ཆ་སྟེང་དུ་གཤེགས་པ་དང༌། །ཉི་རྡུལ་ཆུ་ལམ་གནས་སུ་བྱོན་གྱུར་ཅིང༌། །སྤུར་སྦྱངས་དག་ལ་འཇའ་དང་འོད་སྣ་ཚོགས། །ས་གཡོས་ལ་སོགས་མཚན་ལེགས་དཔག་མེད་བྱུང༌། །སྤུར་ཁང་ཞལ་ཕྱེས་སངས་རྒྱས་བཅོམ་ལྡན་འདས།།རྡོ་རྗེ་འཇིགས་བྱེད་གསང་བ་འདུས་པ་དང༌།།རྟ་མགྲིན་རྣམ་རྒྱལ་དུང་དཀར་གཡས་འཁྱིལ་བཅས། །ཨ་ཡིག་ལ་སོགས་རིང་བསྲེལ་བསམ་མི་ཁྱབ། །དུས་མཆོད་གཤེགས་རྫོགས་རྒྱ་ཆེར་ལེགས་གྲུབ་བྱས། །ལུང་རིགས་འོད་སྟོང་ཕུན་སུམ་ཚོགས་པ་ཡིས། །བོད་ཁམས་བདེ་བའི་དགེ་ལེགས་དཔལ་ཀུན་སྟེར། །འགྲོ་ཀུན་མ་ལུས་དཔལ་ལྡན་བླ་མ་ཡི། །བརྩེ་བས་རྗེས་སུ་ཡང་དག་འཛིན་པར་ཤོག །ཅེས་ཕུན་ཚོགས་དཔལ་བཟང་པོའི་རྣམ་པར་ཐར་བ་མདོར་བསྡུས་པ་སྟེ་བཅུ་གསུམ་པའོ།།

ཐང་སྟོན་ཆུང་བ་བློ་གྲོས་དཔལ་གྱི་རྣམ་པར་ཐར་བ་མདོར་བསྡུས་པ།

ཨེ་མ་ཧོ་མ་ཏི་ཤྲཱི་སྭ་སྟི་སིདྡྷི་ཕ་ལ། གྲུབ་ཆེན་ཡུ་མོའི་སྤྲུལ་པ་ཐང་ཆུང་བའི། །འཁྲུངས་ཡུལ་དབུས་དང་ཡབ་ནི་རྡོ་རྗེ་རྒྱལ། །ཡུམ་ནི་ཆོས་བཟང་མ་ཡི་སྲས་མཆོག་ཏུ། །ཆུ་མོ་གླང་གི་ལོ་ལ་སྐུ་བལྟམས་ལ། །དེའི་ཚེ་གོམ་པ་གཅིག་བོར་ཁར་བཞེངས་ནས། །ལྷ་རྣམས་ཁྲུས་ཆབ་མེ་ཏོག་ཆར་གཏོར་བ། །ས་གཡོས་པཉྩ་ལི་ཀའི་ལྷ་ཡི་གོས། །གསོལ་བ་ལ་སོགས་ངོ་མཚར་སྣ་ཚོགས་བྱུང༌། །འདི་སྐད་གསོལ་ཏེ་ང་ནི་སྔོན་གྱི་དུས། །ཡུ་མོར་གྲགས་ལ་དེང་དུས་དོན་དགུའི་བར། །བོད་ཡུལ་གནས་སུ་འགྲོ་དོན་བྱེད་པར་གྱུར། །དེ་ནས་དགའ་ལྡན་ལྷ་ཡི་གནས་སུ་འགྲོ །ཞེས་གསུངས་ལོ་དྲུག་ལོན་ཚེ་སྟོད་ལུང་གི །རྣམ་རྒྱལ་གོང་མའི་མཁན་ཆེན་ཀུན་དགའ་འབུམ། །དེ་ལས་རབ་བྱུང་མཚན་ལ་བློ་གྲོས་དཔལ། །ཞེས་གསོལ་ཀ་རི་ཀ་ཡི་གཞུང་འགྲེལ་དང༌། །སྤྱོད་འཇུག་ཚད་བསྡུས་རྣམ་ངེས་ལ་སོགས་པ། །གསན་ཅིང་བགྲོ་གླེང་ཆོས་ཀྱི་གྲགས་པ་བྱུང༌། །དེ་ནས་ཞྭ་ལུ་གསང་ཕུ་གླིང་སྟོད་སྨད། །ཀུན་ལ་སྙན་གྲགས་མཛད་པ་འོད་དཀར་རྒྱས། །མཁས་པའི་གོ་འཕང་ཐོབ་ནས་མཚུར་ཕུ་ལ། །རང་བྱུང་རྡོ་རྗེར་གུར་བརྟག་སཾ་གསུམ་དང༌། །དོ་ཧ་ལ་སོགས་མང་གསན་གཙང་དུ་བྱོན། །བྲག་རམ་སྙི་ཐང་ཁྲོ་ཕུ་གུང་ཐང་དང༌། །ར་ལུང་རྣམས་སུ་ཕར་ཚད་མངོན་འདུལ་སོགས། །དྲིལ་བུ་སྐོར་གསུམ་དབང་ལུང་མན་ངག་ཀུན། །ལེགས་པར་ཞུས་ནས་ས་སྐྱར་ཞབས་ཀྱིས་བཅག །འཇིགས་མེད་གྲགས་པའི་དྲུང་དུ་ཐོས་པ་མཛད། །དོན་ཡོད་རྒྱལ་མཚན་དཔོན་སློབ་ཇོ་ནང་དུ། །ཆོས་རྗེ་ཀུན་མཁྱེན་པ་ལ་ཆོས་ཉན་དུ། །འགྲོ་བའི་རྒྱབ་ཏུ་ཇོ་ནང་དཔལ་བྱོན་ནས། །རིན་པོ་ཆེ་ཡིས་དགྱེས་སྙམ་མཛད་པ་གནང༌། །ས་མོ་གླང་ལོའི་ནག་པ་ཟླ་བའི་ཉ། །དུས་ཀྱི་འཁོར་ལོའི་དབང་དང་སྦྱོར་དྲུག་སོགས། །ཞུས་ནས་བདེ་སྟོང་ཉམས་རྟོགས་ཁྱད་འཕགས་བྱུང༌། །ཆོས་རྗེ་རིན་པོ་ཆེ་ལ་སྔོན་ཡུ་མོའི། །སྒོམ་ཐག་ཡོད་པ་ངོས་བཟུང་མཛད་པ་གནང༌། །ཆོས་རྗེ་རིན་པོ་ཆེ་ཡིས་ཡུ་མོ་དངོས། །ཡིན་པའི་ལུང་བསྟན་སེམས་འགྲེལ་སྐོར་གསུམ་སོགས། །ནང་གི་ཆོས་སྐོར་ཐམས་ཅད་ལེགས་པར་ཞུས། །བྱི་བ་ལོ་ཡི་སྟོན་དུ་ཆོས་ཀྱི་རྗེ། །རིན་པོ་ཆེ་དྲུང་བསྙེན་རྫོགས་སྡོམ་པ་བླངས། །དེ་ནས་ཀུན་སྤངས་ཆོས་གྲགས་ལོ་ཙཱ་བ། །མ་ཏི་པཎ་ཆེན་ཕྱོགས་ལས་རྣམ་རྒྱལ་སོགས། །ཡོངས་འཛིན་རྣམས་ལ་ཟབ་ཆོས་མང་དུ་ཞུས། །སྟོད་ལུང་རྣམ་རྒྱལ་གོང་མའི་རྒྱལ་ཚབ་བཟུང༌། །རྒྱུད་འགྲེལ་ལ་སོགས་ཕྱི་ནང་ཆོས་ཆར་ཕབས། །འཕྲིན་ལས་དར་རྒྱས་ཡང་དག་མཛད་པ་བསྟན། །དགུང་ལོ་དོན་དགུ་མེ་ཕོ་སྟག་གི་ལོ། །ཟླ་བ་གཉིས་པའི་ཚེས་བརྒྱད་ཞི་བར་གཤེགས། །ཞག་ནི་བཞི་བཅུ་ཞེ་དགུར་འོད་གསལ་དུ། །བཞུགས་ནས་དཀར་ཆ་སྟེང་དང་དམར་པོ་ནི། །གསང་བར་བྱོན་ལ་སྐུ་གཤེགས་སྤུར་སྦྱངས་དང༌། །དུས་མཆོད་ཟླ་མཆོད་དུས་སུ་ནམ་མཁའ་ལ། །འཇའ་འོད་སྣ་ཚོགས་སྒྲ་དབྱངས་རོལ་མོ་དང༌། །མེ་ཏོག་ཆར་དང་ས་གཡོས་ལ་སོགས་པ། །ངོ་མཚར་བསམ་གྱིས་མི་ཁྱབ་རྫོགས་ལྡན་དཔལ། །སྤུར་ཁང་ཞལ་ཕྱེ་ཚེ་ན་དཔྲལ་བ་ལ། །བདེ་མཆོག་ཕྱག་མང་སྒྲོལ་མ་རྟ་མགྲིན་དང༌། །ཕྱག་རྡོར་ཐུགས་རྗེ་ཆེན་པོ་ཕྱག་སྟོང་དང༌། །དུང་དཀར་རིང་བསྲེལ་དཔག་མེད་བྱོན་ལ་གུས། །རྡོ་རྗེ་འཆང་དངོས་ཡུ་མོའི་རྣམ་འཕྲུལ་ཉིད། །ཡེ་ཤེས་སྤྱན་ལྡན་ཐང་སྟོན་བློ་གྲོས་དཔལ། །མཚུངས་མེད་ཆོས་རྗེའི་ཡོན་ཏན་ཇི་སྙེད་ཀུན། །བདག་གིས་རབ་ཐོབ་འགྲོ་ཀུན་འདྲེན་པར་ཤོག །ཅེས་ཐང་སྟོན་ཆུང་བ་བློ་གྲོས་དཔལ་གྱི་རྣམ་པར་ཐར་བ་མདོར་བསྡུས་པ་སྟེ་བཅུ་བཞི་པའོ།། །།

རྣམ་ཐར་ཚིགས་སུ་བཅད་པ་ཉེ་བར་བསྡུས་པ་ངོ་མཚར་རབ་གསལ།

ཨེ་མ་ཧོ་པུཎེ་བྷ་དྲ་སྭ་སྟི་སིདྡྷི་ཕ་ལ། ཡབ་སྲས་དེ་དག་སློབ་མ་དམ་པ་མཆོག །དཔལ་ལྡན་བླ་མ་རྡོ་རྗེ་འཆང་ཆེན་པོ། །གནས་བརྟན་བ་ཀུ་ལ་ཡི་སྤྲུལ་བ་ནི། །མཚལ་མིན་འཁྲུངས་ཡུལ་ཀྱེར་ཕུ་ཡབ་ཐར་པ། །བཟང་བོ་ཡུམ་ནི་དཀོན་མཆོག་སྒྲོན་གཉིས་ཀྱི། །སྲས་སུ་ལྕགས་མོ་སྦྲུལ་གྱི་ལོ་ལ་བལྟམས། །དགུང་ལོ་ལྔ་ལ་རབ་བྱུང་མཚན་བསོད་ནམས། །བཟང་པོ་ཞེས་གསོལ་ཆོས་རྗེ་སངས་རྒྱས་བཟང༌། །འཇམ་དབྱངས་དོན་འགྲུབ་དཔལ་ལ་སོགས་པ་ལས། །མདོ་རྩའི་གཞུང་འགྲེལ་ཀརྨ་ཤ་དམ་སོགས། །དཔག་མེད་གསན་ནས་བྱང་སེང་བ་ལས་ནི། །འདུལ་ལུང་སྡེ་བཞི་གསན་བསམ་བྱང་ཆུབ་བྱས། །ལྷ་ས་པོ་ཏ་རི་ལ་ས་ཕོ་ཁྱིར། །མཁན་ཆེན་ཡོན་ཏན་རྒྱ་མཚོར་བསྙེན་རྫོགས་མཛད། །མཚན་ནི་ཀུན་དགའ་བསོད་ནམས་བཟང་པོ་གསོལ། །ཀུན་མཁྱེན་ཆོས་རྗེའི་ཞབས་རྡུལ་སྤྱི་བོས་བླང༌། །དགུང་ལོ་བཅུ་བདུན་སོ་དགུ་བར་དུ་ནི། །ཆོས་རྗེ་རིན་པོ་ཆེ་ཡི་ཉེ་གནས་མཛད། །སློབ་འབངས་གྲགས་ལ་ཆོས་རྗེ་ལ་མངའ་བའི། །ཆོས་རྣམས་ཉམས་སུ་བླངས་ནས་རྟོགས་པ་སྐྱེས། །ཆོས་རྗེ་རིན་པོ་ཆེ་ལས་གཞན་དོན་ལ། །བྱོན་དུས་འབྲལ་མེད་ཉེ་གནས་སང་རིན་དང༌། །མཉམ་པོར་གནས་ནས་ཆོས་རྗེ་ཞི་བར་གཤེགས། །ཉ་དབོན་བུ་སྟོན་རྒྱལ་སྲས་ཐོགས་མེད་དང༌། །མ་ཏི་པཎ་ཆེན་ཆོས་རྗེ་ཕྱོགས་རྒྱལ་སོགས། །ཡོངས་འཛིན་དམ་པ་རྣམས་ལས་བཀའ་མདོ་རྒྱུད། །བསྟན་ཆོས་མན་ངག་བཅས་པ་གསན་བསམ་མཛད། ། བཟང་ལྡན་དགེ་འཕེལ་གནས་སུ་འཆད་ཉན་མཛད། །དགུང་ལོ་ང་གསུམ་ལྕགས་ཕོ་སྤྲེའུའི་ལོར། །ལྷ་སྒང་གདན་དྲངས་ལོ་ནི་བཅུ་གཅིག་བར། །བཤད་སྟོན་མཛད་ནས་དགུང་ལོ་རེ་གསུམ་ལ། །ཆུ་ལུག་ཀརྨ་ཆོས་དཔལ་བཟང་པོ་ལས། །མཚལ་མིན་དགོན་ཕུལ་བཀའ་རྒྱུད་གོང་མ་ཡི། །བཤད་སྲོལ་བཙུག་ནས་དགུང་ལོ་དོན་ལྔ་ལ། །ཆོས་གསུངས་སྐབས་སུ་སྐུ་ཁམས་མི་བདེ་ཚེ། །ནོར་བཟང་ན་རེ་སྐུ་སྙུན་འོངས་དྲག་པས། །འཆད་ཉན་ཞོག་ལ་ཐུགས་དམ་མཛོད་ཞུས་པ། །ཁོ་བོས་དམ་ཆོས་ནམ་ཡང་མི་འདོར་གསུངས། །དགུང་ལོ་གྱ་གསུམ་ས་ཕོ་སྤྲེལ་ལོ་ལ། །སྐུ་ཁམས་ཤིན་ཏུ་དུབ་པ་གཅིག་བྱུང་ནས། །ཟླ་གཅིག་ཐུགས་དམ་བཞུགས་པའི་སྐུ་ཁམས་དྭངས། །དགུང་ལོ་དགུ་བཅུར་ཕར་ཕྱིན་ཊཱི་ཀ་མཛད། །གོ་གཉིས་ལོ་ལ་དུས་འཁོར་འགྲེལ་ཆེན་གསུངས། །བདེ་གླིང་རྡོ་རྗེ་ཕག་མོས་ཞལ་གཟིགས་ནས། །ཀརྨ་མྱ་ངན་འདས་ནས་ཀརྨ་པ། །མཐོང་བ་དོན་ལྡན་འཁྲུངས་མ་ཐག་ཏུ་ནི། །འདི་སྐད་ང་ཡི་མཁན་པོ་གནས་བརྟན་པ། །བ་ཀུ་ལི་ནི་མཚལ་མིན་བཞུགས་ཡོད་གསུངས། །བཅིབས་རྟ་གྲོ་སེར་ཤི་ནས་བདེ་བ་ཅན། །སྐྱེ་བར་ལུང་བསྟན་བླ་མ་རྗེ་ལ་ནི། །ང་ནི་བ་ཀུ་ལ་ཡིན་དུས་རེ་ཞིག །ཤྭ་རྒལ་བྱུང་བ་གཟིགས་པས་ཞི་བར་མཛད། །དགུང་ལོ་གོ་གསུམ་ཆུ་མོ་གླང་གི་ལོར། །ཧོར་ཟླ་དང་པོའི་ཚེས་བཅུར་ངའི་སྣམ་སྦྱར། །ཁྱེར་ཤོག་མཆོད་པ་གཙང་དག་ཤོམ་གྱིས་གསུངས། །རྣམ་སྣང་ཆོས་བདུན་མཛད་ནས་བདག་འདི་ནས། །སྐྱེ་བ་འདི་འོག་སྔགས་ཆས་བཟུང་བ་ཞིག །འགྲོ་དོན་མང་པོ་འོང་ནས་རྟག་བརྟན་གྱི། །ཆོས་གླིང་བཻ་རོ་ཆོས་བདུན་གྲགས་པ་ཡི། །ཆོས་བཤད་ལྷོ་ཕྱོགས་པདྨས་རྗེས་སུ་བཟུང༌། །དེ་འོག་ཐམས་ཅད་བཙུན་པའི་ལུས་གསུམ་སྟོན། །དེ་ནས་ཕལ་བ་བཙུན་པའི་ཚོགས་གཉིས་བསགས། །སྐྱེ་ཀུན་གཞན་དུ་ཐ་ཤལ་ཚུལ་བཟུང་བྱོན། །ཞེས་གསུངས་རྟག་འཛིན་འདུལ་ཕྱིར་ཞི་བར་གཤེགས། །དེ་མ་ཐག་ཏུ་འཇའ་འོད་གཟིམ་ཁང་གི །སྟེང་དུ་ཟུག་ནས་ལག་སོར་བཀྲམ་པ་བཞིན། །གདུགས་བསྐོར་བ་ལྟར་གྱུར་ནས་ཞག་གསུམ་པར། །སྤུར་གྱི་དཀར་ཆ་སྟེང་དང་དམར་པོ་ནི། །གསང་ལམ་དུ་འོངས་སྤུར་སྦྱངས་མེ་རང་འབར། །བྱུང་ནས་ཁ་ཏོག་ལྔ་ལྔ་རབ་གསལ་འབར། །འཇའ་དང་རོལ་མོ་མེ་ཏོག་ཆར་འབབ་པ། །དེ་སོགས་ངོ་མཚར་ཟླ་བ་བརྒྱད་བར་བྱུང༌། །སྤུར་ཁང་སྒོ་ཕྱེ་དཔྲལ་བར་བསྟན་པའི་གཙོ། །ཕྱག་ངར་རྡོ་རྗེ་ཕག་དཀར་སྤྱི་བོར་ནི། །རྡོ་རྗེ་འཆང་ཆེན་ལུང་བུར་ཆོས་སྐྱོང་ནི། །ཕྱག་དྲུག་མགོན་པོ་རྒལ་ཚིག་རྟ་མགྲིན་དང༌། །ལྟག་པར་དུས་འཁོར་ཨ་དང་དུང་དཀར་གསུམ། །རྟེན་ཀུན་འབུར་དོད་དངུལ་མདོག་རིང་བསྲེལ་བྱོན། །ངོ་མཚར་དད་པའི་ཆུ་གཏེར་རྒྱ་མཚོ་ལས། །བྱིན་རླབས་ཆུ་སྐྱེས་འོད་དཀར་ཕྲེང་བ་ཅན། །པདྨོ་ལེགས་བཤད་རེ་ཞིག་ཟུམ་ན་ཡང༌། །ཕྱི་ནས་མཇལ་བར་བྱིན་གྱིས་རླབས་ཏུ་གསོལ། །ཞེས་ཆོས་རྗེ་པུ་ཎེ་བྷ་ཏྲའི་རྣམ་པར་ཐར་བ་མདོར་བསྡུས་པ་སྟེ་བཅོ་ལྔ་པའོ། །རྒྱལ་དང་རྒྱས་སྲས་རྣམ་འཕྲུལ་ཆོས་ཀྱི་རྗེ། །མཁས་གྲུབ་ཀུན་མཁྱེན་ཡབ་སྲས་བཅོ་ལྔ་ཡི། །རྣམ་ཐར་ཆུ་གཏེར་གང་གཱའི་རྡུལ་ལས་འདས། །ལྕེ་བརྒྱ་ལྡན་པས་བསྐལ་པ་ཐེར་འབུམ་བརྒྱར། །དག་པར་བརྗོད་ཀྱང་ཡོན་ཏན་གྲངས་མི་ཆོད། །བདག་འདྲ་བླུན་པོས་ཆ་ཙམ་བརྗོད་པ་འདིར། །མ་འབྲེལ་འགལ་བའི་ཉེས་པའི་ཚོགས་མཆིས་ན། །མཁས་གྲུབ་བླ་མ་བརྒྱུད་པར་བཅས་ལ་བཤགས། །ལེགས་པའི་དགེ་བས་བདག་གིས་ཚེ་རབས་ཀུན། །དལ་འབྱོར་ལུས་ཐོབ་གཞོན་ནུར་རབ་བྱུང་ནས། །ཆོས་རྗེ་ཡབ་སྲས་དག་གི་ཞབས་བསྟེན་ཅིང༌། །ཐོས་བསམ་སྒོམ་གསུམ་རིགས་པའི་རྒྱུད་སྦྱངས་ནས། །དོན་གཉིས་མཐར་ཕྱིན་འགྲོ་བའི་དཔལ་གྱུར་ཅིག །ཅེས་ཆོས་ཀྱི་རྗེ་ཀུན་མཁྱེན་ཆེན་པོ་ཡབ་སྲས་བཅོ་ལྔའི་རྣམ་ཐར་ཚིགས་སུ་བཅད་པ་ཉེ་བར་བསྡུས་པ་ངོ་མཚར་རབ་གསལ་ཞེས་བྱ་བ་འདི་ནི་གཙང་བའི་དབུ་ཆོས་ངེས་ཕུན་དང་བསྟན་སྲུང་གཉིས་ཀྱིས་དངོས་རྫས་དར་བཅས་བསྐུལ་ངོར་ངག་དབང་དངོས་གྲུབ་དཔལ་གྱིས་རིགས་ལྡན་རྒྱལ་བ་ཇོ་བཟང་པས་མཛད་པའི་ཆོས་རྗེ་ཡབ་སྲས་བཅོ་ལྔའི་རྣམ་ཐར་གྱི་ཚིག་ཕལ་ཆེར་རང་སོར་བཞག་ནས་ཚིགས་བཅད་དུ་སྡེབ་པའོ། །དགེ་བ་འདི་ཡིས་འགྲོ་རྣམས་མ་ལུས་པ། །དལ་འབྱོར་ལུས་ཐོབ་བླ་མ་ལ་གུས་པས། །བླ་མའི་བྱིན་རླབས་ས་ལམ་རབ་རྫོགས་ནས། །ཚེ་གཅིག་རྡོ་རྗེ་འཆང་ཆེན་ཐོབ་པར་ཤོག །སརྦ་མངྒ་ལཾ།