རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་ཐར་འདོད་འཇོའི་བུམ་བཟང༌དད་པའི་འཇུག་ངོགས་འདོད་འཇོའི་བུམ་བཟང་།
མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་བཞུགས་སོ། །
རྩོམ་པ་པོ་འབྲས་རབ་འབྱམས་པ་དངོས་གྲུབ་དཔལ། ན་མོ་གུ་རུ་བཛྲ་དྷ་ར་ཝ་ཀིཎྡྲྲ་བིརྻཱ་ཡ། སྟོབས་བཅུའི་གསང་བའི་མཛོ༷ད་འཛི༷ན་སྟོན་པ་རྫོགས་སངས་རྒྱས། །ཞི་བསིལ་ཆོས་ཀྱི་མཛོ༷ད་འཛི༷ན་ལུང་རྟོགས་དམ་པའི་ཆོས། །རྒྱལ་བསྟན་རིན་ཆེན་མཛོ༷ད་འཛི༷ན་རིག་གྲོལ་དགེ་འདུན་ཚོགས། །ཤུགས་དྲག་དད་བརྒྱས་ཚེ་རབས་ཕྲེང་བར་སྐྱབས་སུ་འཛིན། །ཐུབ་བསྟན་ལུང་རྟོགས་རྫོ༷གས་ལྡ༷ན་དམ་ཆོས་དཔྱིད། །འཆད་རྩོད་རྩོམ་པའི་རྫོ༷གས་ལྡ༷ན་རྗེས་འགྲོ་བ། །ཡོན་ཏན་མཚམས་སྤྲིན་རྫོ༷གས་ལྡ༷ན་མཛེས་སྡུག་ལས། །བརྩེ་ཆེན་གདམས་ངག་རྫོ༷གས་ལྡ༷ན་ཆོས་ཆར་འཇོ། །རྒྱལ་ཀུན་བརྩེ་ཆེན་ངུར་སྨྲིག་འཛིན་པའི་གར། །གཞུང་བརྒྱ་སྨྲ་བའི་ང༷ག་གི་དབ༷ང་ཕྱུག་དཔལ། །གུས་རྟག་བརྩོ༷ན་འགྲུ༷ས་ཆུ་བོའི་དཔལ་མངའ་བ། །མཚུངས་མེད་དཔལ་ལྡན་བླ་མས་རྣམ་ཀུན་སྐྱོངས། །ང༷ག་གི་དབ༷ང་ཕྱུག་ཆོས་སྦྱིན་བརྩོ༷ན་པའི་གཏེར། །ངང་བའི་བུ་མོ་སྒྱུ་མའི་གར་མཁན་འགྲུ༷ས། །སྨྲ་བའི་འབབ་སྟེགས་དྲི་ཟའི་དགའ་ཚལ་ནས། །མདོ་སྔགས་ཆོས་ཀྱི་རྒྱུད་མང་ཅིར་ཡང་རྩེན། །ཚོགས་གཉིས་ཆུ་གཏེར་ལན་བརྒྱར་བསྲུབས་པ་ལས། །སྨྲ་བའི་ཟླ་བ་མཁས་གྲུབ་གཙུག་གི་རྒྱན། །འགྲོ་བློའི་མུན་པ་སེལ་བའི་སྒྲོན་མེ་མཆོག །བྱམས་བརྩེའི་འོད་སྣང་རྩེ་དགའ་ཡང་ཡང་འགྱེད། །རྒྱལ་ཀུན་ཐུགས་གསང་གཞན་སྟོང་སྙིང་པོ་ཡི། །ལྟ་གྲུབ་རྣམ་དག་གསེར་རིའི་ཕྲེང་བ་ལས། །བརྒྱུད་པའི་བཤད་སྲོལ་ཐང་མལ་བརྡལ་བའི་གཏེར། །ངེས་དོན་བསྟན་པའི་རྩ་ལག་སྤྱི་བོའི་རྒྱན། །རྗེ་བཙུན་བླ་མའི་སྒྱུ་འཕྲུལ་དྲྭ་བའི་ཆུ་གཏེར་ལས། །ཆུ་ཐིགས་ཙམ་ཞིག་བརྗོད་པའི་བསོད་ནམས་དཔག་མེད་འབྲས། །ཐོབ་པར་འགྱུར་ཅེས་དུས་གསུམ་རྒྱལ་དང་རྒྱལ་སྲས་ཀྱིས། །ཡང་ཡང་བསྔགས་པའི་ཆུ་འཛིན་གླལ་བའི་སྒྲ་དབྱངས་སྙན། །དེ་སླད་སྐ༷ལ་བཟ༷ང་ད༷ད་པ༷འི་འཇུ༷ག་ངོ༷གས་མཐོང་ཐོས་རྣམས། །མཆོག་ཐུན་དངོས་གྲུབ་སྟེར་བའི་འདོ༷ད་འཇོ༷འི་བུ༷མ་བཟ༷ང་བཞིན། །རྗེ་བཙུན་བླ་མའི་མཛད་བཟང་རྡུལ་གྲངས་འདས་པ་ལས། །རྡུལ་ཕྲན་ཙམ་ཞིག་སྐལ་བཟང་དད་པའི་གསོས་སུ་སྤེལ། ། རྣམ་གྲོལ་ཐར་འདོད་དད་པ་རབ་ཡངས་དག ། མཆོག་ཐུན་དངོས་གྲུབ་གཏེར་ཁ་འབྱེད་པའི་ཕྱིར། །རབ་སྙན་རིན་ཆེན་གཏམ་གྱི་ཕྲེང་བ་འདི། །གཞན་ཕན་སེམས་ཀྱིས་ལེགས་པར་བསྙད་པར་བྱ། །ཡིད་ཆེས་དད་པའི་ལུས་སྟོབས་རྩལ་རྫོགས་པའི། །བློ་ལྡན་དོན་གཉེར་སྐལ་བཟང་ཚོགས་རྣམས་ཀྱེ། །ཨེ་མ་ངོ་མཚར་གཏམ་ཚོགས་དགའ་བའི་ཚལ། །རྐང་དྲུག་ཡིད་ཀྱི་རྒྱན་དུ་འདི་ལོངས་ཤིག །དེ་ལ་འདིར་བདག་ཅག་གི་སྟོན་པ་མཉམ་མེད་ཐུབ་པའི་དབང་པོའི་རྗེས་སུ་འབྲང་བའི་རང་ལུགས་པ་ཆེན་པོ། ལྷ་དང་བཅས་པའི་འགྲོ་བ་མཐའ་དག་ལ་ཕན་པ་དང་བདེ་བའི་གཞིར་གྱུར་པ། ངེས་དོན་བསྟན་པའི་རྩ་ལག་མཐའ་བྲལ་དབུ་མ་ཆེན་པོའི་ཚུལ་ལས་བརྩམས་ཏེ་འཇིགས་མེད་སྨྲ་བའི་གད་རྒྱངས་མངོན་པར་བསྒྲགས་པས་ཕས་ཀྱི་རྒོལ་བ་ཝ་སྐྱེས་ཚོགས་རྣམས་སྐྲག་པར་མཛད་པའི་སྨྲ་བའི་སེང་གེ་ཐུབ་བསྟན་ཕྱོགས་བཅུར་སྤེལ་པའི་བཤད་སྒྲུབ་ཀྱི་གསོས་སྨན། སྡེ་སྣོད་རྒྱུད་སྡེ་རྒྱ་མཚོའི་མངའ་བདག ངུར་སྨྲིག་རིན་པོ་ཆེའི་རྒྱལ་མཚན་འཛིན་པ་རྣམས་ཀྱི་མཛེས་རྒྱན། བསླབ་གསུམ་ནོར་གྱི་དབང་ཕྱུག འཇིག་རྟེན་ཆོས་བརྒྱད་ཐམས་ཅད་མཆིལ་མའི་ཐལ་བ་བཞིན་དུ་དོར་བའི་རྗེ་བཙུན་མི་ལ་རས་པ་དང་གཉིས་སུ་མ་མཆིས་པའི་ཀུན་སྤངས་བྱ་བྲལ་བ་ཆེན་པོ། རིམ་གཉིས་ལམ་གྱི་ཉམས་རྟོགས་ཀྱི་འབྲས་བཟང་སྨིན་པའི་སྲིད་ཞིའི་ཁམས་ན་ཉི་ཟླ་ལྟར་གསལ་བའི་མཁས་གྲུབ་བྱེ་བའི་གཙུག་རྒྱན། འགྲོ་བ་རྣམས་ལ་ཆོས་དང་ཟང་ཟིང་གི་སྦྱིན་པས་ཚིམ་པར་མཛད་པའི་དགོས་འདོད་མ་ལུས་པ་འབྱུང་བའི་ཡིད་བཞིན་གྱི་ནོར་བུ། མདོ་སྔགས་གཞུང་ལུགས་མཐའ་དག་ལ་རྣམ་དཔྱོད་ཀྱི་ལོ་འདབ་རབ་ཏུ་རྒྱས་པའི་ཕན་བདེའི་དྲི་ངད་ལྡང་བའི་དཔག་བསམ་གྱི་ལྗོན་པ། འགྲོ་བ་རྣམས་ཀྱི་མ་རིག་པའི་མུན་པ་སེལ་ཞིང་བློ་གྲོས་ཀྱི་པད་མོ་རྣམ་པར་འབྱེད་པའི་ཉིན་བྱེད་འོད་སྟོང་འབར་བའི་ཉི་མ། སྐལ་བཟང་གདུལ་བྱའི་ཞིང་སར་ཐར་བའི་ལམ་བཟང་གི་འབྲས་བུ་སྨིན་པར་བྱེད་པའི་ཐེག་གསུམ་ཆོས་ཀྱི་སྦྲང་ཆར་འཇོ་བའི་ལྷ་ཡི་རྒྱལ་པོ། བྱམས་དང་སྙིང་རྗེས་རྒྱུད་བརླན་ཞིང་ཚུལ་ཁྲིམས་ཀྱི་དྲི་ངད་ལྡང་བའི་འཇིག་རྟེན་གྱི་མ་འདྲིས་པའི་མཛའ་བཤེས་ཆེན་པོ། རྒྱལ་བ་ཀུན་གྱི་སྐུ་གསུང་ཐུགས་ཀྱི་གསང་བ་བསམ་མི་ཁྱབ་པའི་འཕྲིན་ལས་ཀྱི་རྣམ་པར་ངོ་མཚར་མཚན་དཔེའི་ཟ་མ་ཏོག་སྤུངས་པའི་ཚོམ་བུ། རང་ཅག་རྣམས་ལ་བཀའ་དྲིན་འཁོར་མཐའ་དང་བྲལ་བ་རིགས་དང་དཀྱིལ་འཁོར་རྒྱ་མཚོའི་མངའ་བདག བཀའ་དྲིན་གསུམ་ལྡན་གྱི་མཚུངས་མེད་དགེ་བའི་བཤེས་གཉེན་ཆེན་པོ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན། ཁྱབ་བདག་རྡོ་རྗེ་འཆང་ཆེན་པོ་མཚུངས་མེད་མཁན་རིན་པོ་ཆེ་རྗེ་བཙུན་བླ་མ་དམ་པ་༧ ངག་དབང་བརྩོན་འགྲུས་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་དཔལ་བཟང་པོ་མཆོག་གི་ཕྱི་ནང་གསང་གསུམ་གྱི་རྣམ་པར་ཐར་བ་ཀུན་གསལ་གྱི་མཐའ་དང་མཉམ་པ་རྣམས་བདག་ལྟ་བུའི་ཚུར་མཐོང་གི་སོ་སོའི་སྐྱེ་བོ་ཕལ་བ་ཞིག་གིས་བརྗོད་པར་ག་ལ་སྤོབས་ཏེ། ཇི་སྐད་དུ། དེ་ཕྱིར་བདག་འདྲས་ཁྱོད་ཡོན་འདི་དག་ཅི། །ཤེས་པ་དང་ནི་བརྗོད་པར་ནུས་འགྱུར་རམ། །ཞེས་གསུངས་པ་ལྟར་ཡིན་ལ། དེས་ན་དམ་པ་གང་གི་ཐུན་མོང་དང་ཐུན་མོང་མ་ཡིན་པའི་སྐུ་གསུང་ཐུགས་ཀྱི་མཛད་པ་རྒྱ་མཚོ་ལྟ་བུ་ལས་སྐྲ་རྩེས་བླངས་བའི་ཆ་ཤས་ཙམ་ཞིག་རང་གཞན་རྣམ་གྲོལ་ཞི་བ་དོན་གཉེར་རྣམས་ཀྱི་དད་པའི་གསོས་སུ་བརྗོད་པ་ལ་ཀུན་ནས་སྤྲོ་བས་བརྗོད་པར་བྱའོ། །དེ་ཡང་རྣམ་པར་ཐར་བ་འདོད་འཇོའི་བུམ་བཟང་ལྟ་བུའི་རྟོགས་པ་བརྗོད་པ་ལ་ཐོག་མར་དཔལ་ལྡན་བླ་མ་དག་གི་མཚན་ཉིད་སོགས་མདོ་ཙམ་བཤད་པའི་སྒོ་ནས་གླེང་བསླངས་བ་དང༌།
སྔོན་གྱི་སྐྱེ་རབས་ཀྱིས་སྐབས་ཕྱེ་བ།
སྔོན་གྱི་སྐྱེ་རབས་ཀྱིས་སྐབས་ཕྱེ་བ།
སྔོན་གྱི་སྐྱེ་རབས་ཀྱིས་སྐབས་ཕྱེ་བ་དང༌། ད་ལྟར་བྱུང་བའི་སྤྲུལ་བའི་རྟོགས་པ་བརྗོད་པ་དང༌། དཔལ་ལྡན་བླ་མའི་རྣམ་ཐར་བརྗོད་པའི་ཕན་ཡོན་བཤད་པའི་སྒོ་ནས་མཇུག་བསྡུ་བ་དང་བཞི། དང་པོ་ནི། དེ་ལ་སྤྱིར་རྗེ་བཙུན་དཔལ་ལྡན་བླ་མ་སོགས་ཀྱི་རྣམ་པར་ཐར་བ་ཞེས་པ་ནི་སྐྱེ་རབས་ཀྱི་ཕྲེང་བ་སྔོན་མའམ། སྐུའི་སྐྱེ་བ་འདི་ཉིད་གང་ཡིན་ཡང་རུང་སོ་སྐྱེ་ཕལ་བ་ཞིག་ལས་ཁྱད་པར་དུ་འཕགས་པའི་མཛད་བཟང་ངོ་མཚར་བའི་སྐུ་གསུང་ཐུགས་གསུམ་གྱི་ཡོན་ཏན་སྤྱི་དང༌། ཁྱད་པར་དུ་མདོ་རྒྱུད་རབ་འབྱམས་ལ་ཐོས་བསམ་སྒོམ་གསུམ་རྣམ་པར་དག་པ་མཛད་པའི་ཚུལ་དང༌། དེས་ལེགས་འབྲས་མཁས་པའི་ཡོན་ཏན་འཆད་རྩོད་རྩོམ་གསུམ་དང༌། བཙུན་པའི་ཡོན་ཏན་སྡོམ་གསུམ་གྱི་བསླབ་བྱ་རྣམས་མིག་འབྲས་བཞིན་དུ་བསྲུངས་ནས་བཅས་པའི་མཚམས་ལས་མི་འདའ་བ་དང༌། གྲུབ་པའི་ཡོན་ཏན་བསླབ་པ་གསུམ་སོགས་ས་ལམ་གྱི་རྟོགས་པ་ཁྱད་པར་ཅན་ཐུགས་ལ་འཁྲུངས་ཚུལ་དང༌། བཟང་པོའི་ཡོན་ཏན་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་དང་འགྲོ་བ་ཀུན་ལ་སྨན་པའི་མཛད་བཟང་རླབས་པོ་ཆེ་རྣམས་ངག་ཚིག་གི་རི་མོ་སྤེལ་བ་ལ་བརྟེན་ནས། མཐོང་ཐོས་ཀྱི་གདུལ་བྱ་གང་གི་རྒྱུད་ལ་བཅོས་མིན་གྱི་དད་གུས་སྐྱེ་བ་དང༌། དེ་ལ་བརྟེན་ནས་རྣམ་གྲོལ་ཐར་བའི་ལམ་བཟང་བསྐྲུན་པའི་ཐབས་སུ་གྱུར་བའི་ལེགས་པར་བཤད་པ་ཞིག་ལ་རྗོད་བྱེད་ཀྱི་རྣམ་པར་ཐར་བ་ཞེས་བརྗོད་རིགས་པ་ཡིན་གྱི། དེ་ལས་གཞན་སོ་སྐྱེ་རང་ག་བ་ཞིག་གིས་དགྲ་འདུལ་གཉེན་སྐྱོང་ཚོང་ཁེ་སྤོགས་སོགས་ཀྱིས་ཟས་ནོར་སྒྲུབ་པ་དང༌། དགེ་བ་ལྟར་སྣང་འགའ་ཙམ་བྱས་ཚུལ་སོགས་ལ་རབ་བཏགས་ཀྱི་ངག་ཚིག་གིས་བརྒྱན་ནས་འཇིག་རྟེན་པ་རྣམས་ཡ་མཚན་ཙམ་སྐྱེ་བའི་ཐབས་སུ་སྤེལ་བ་དག་ནི་གཏམ་རྒྱུད་ཀྱི་གྲངས་སུ་གཏོགས་པ་ལས་སྐྱེས་བུ་དམ་པའི་རྣམ་ཐར་གྱི་གྲངས་སུ་མི་འགྲོའོ། །ཡང་འདི་ནས་འདིར་ཕེབས་དང༌། འདི་ནས་འདིར་བཞུགས། མཇལ་ཁ་འདི་གནང༌། ནོར་གྱི་འབུལ་བ་འདི་བྱུང་ཞེས་བརྗོད་པ་ནི་སྐལ་བཟང་གདུལ་བྱའི་རྒྱུད་ལ་དད་གུས་བསྐྱེད་པའི་ཐབས་སུ་མི་འགྱུར་རོ། །དེས་ན་རྣམ་པར་ཐར་བ་དེ་ལ་བརྟེན་ནས་མཐོང་ཐོས་ཀྱི་གདུལ་བྱ་རྣམས་ཐར་བ་དང་ཐམས་ཅད་མཁྱེན་པའི་རྒྱུར་འགྱུར་བ་ཞིག་དགོས་པས་རྣམ་པར་ཐར་བ་འབྲི་འདོད་པ་རྣམས་ཀྱིས་ཀྱང་དེ་ལྟར་བསླབ་པར་བྱའོ། །དེ་ལྟར་རྣམ་པར་ཐར་བ་འབྲི་ཡུལ་གྱི་སྐྱེས་བུ་ནི་མདོ་རྒྱུད་སོགས་ལས་བསྟན་པའི་བླ་མའི་མཚན་ཉིད་ཚང་བ་ཞིག་དགོས་པས་དེའི་མཚན་ཉིད་མདོ་ཙམ་བརྗོད་པར་བྱའོ། །དེ་ཡང་ཐེག་པ་ཆེ་ཆུང་གི་སྐབས་སུ། སུམ་བརྒྱ་པ་ལས། ཁྲིམས་དང་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང༌། །ཆོས་དང་ཟང་ཟིང་ཕན་འདོགས་ལ་བརྩོན་པ། །དུས་སུ་འདོམས་པ་དེ་ལྟར་བླ་མར་བསྔགས། །ཞེས་གསུངས་པ་ལྟར་དང༌། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་དང༌། དུས་འཁོར་རྩ་རྒྱུད་ལས། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་འབྲི་བའི་ལས་ལ་མཁས། །གསང་སྔགས་འཆད་བྱེད་སློབ་དཔོན་ཏེ། །དང་བའི་བདག་ཉིད་དབང་བོ་དུལ། །ཞེས་བླ་མའི་མཚན་ཉིད་ཐེག་པ་ཆེ་ཆུང་དང་མདོ་སྔགས་ཀྱི་སྐབས་སོ་སོར་གསུངས་སོ། །དེ་ལྟ་བུའི་མཚན་ཉིད་དང་ལྡན་པའི་བླ་མ་ནི་ཡོན་ཏན་ཚད་མེད་པ་དང་ལྡན་ཞིང་ཉེས་སྐྱོན་མཐའ་དག་ལས་གྲོལ་བ། རྒྱལ་ཀུན་མ་ལུས་པ་འདུས་པའི་བདག་ཉིད། ཞི་བསིལ་ཆོས་ཀྱི་འབྱུང་གནས། འཕགས་ཚོགས་དགེ་འདུན་རྒྱ་མཚོའི་མངའ་བདག་ནི་རྗེ་བཙུན་དཔལ་ལྡན་བླ་མ་ཉིད་ཡིན་ཏེ། དཔལ་དུས་ཀྱི་འཁོར་ལོའི་རྒྱུད་ཕྱི་མ་ལས། སློབ་དཔོན་དེ་ནི་སངས་རྒྱས་ཉིད་དེ་རབ་མཆོག་ས་གཞིའི་སྟེང་ན་ཆོས་ནི་དེ་ཡིས་སྟོན་པའོ། །དགེ་འདུན་གང་ཞིག་དེར་གནས་རབ་ཏུ་དགའ་བའི་ཐུགས་ལྡན་སེམས་ཅན་ཀུན་ལ་རྗེས་སུ་བརྩེ་བ་སྟེ། །ཞེས་དང༌། ཡེ་ཤེས་གྲུབ་པའི་རྒྱུད་ལས། བླ་མ་སངས་རྒྱས་ཆོས་འགྱུར་ཞིང༌། །དགེ་འདུན་ཡང་ནི་དེ་སྙེད་དེ། །དེ་འདྲ་ཉིད་ཀྱི་ཤེས་གྱུར་བས། །དེ་བས་དཀོན་མཆོག་གསུམ་ཡིན་ནོ། །ཞེས་དང༌། སྡོམ་པ་འབྱུང་བའི་རྒྱུད་ལས། བླ་མ་སངས་རྒྱས་བླ་མ་ཆོས། །བླ་མ་དེ་བཞིན་དགེ་འདུན་ཏེ། །སངས་རྒྱས་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲྭ་བ་སྡོམ། །ཞེས་དང༌། བདེ་མཆོག་རྩ་རྒྱུད་ལས། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །ཞེས་དང༌། མཁའ་འགྲོ་ཀུན་སྤྱོད་ཀྱི་རྒྱུད་ལས། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །ཞེས་དང༌། སྒྱུ་འཕྲུལ་དྲྭ་བའི་རྒྱུད་ལས། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །ཞེས་དང༌། དུས་འཁོར་བསྡུས་པའི་རྒྱུད་ལས། མི་ཡི་འཇིག་རྟེན་རྣམས་སུ་ཉོན་མོངས་རྣམ་བྲལ་བླ་མ་གང་དག་རྡོ་རྗེ་འཛིན་བདག་ཉིད། །སེམས་ཅན་རྣམས་ལ་དེ་ཡི་བདེ་མཉམ་འབྲས་བུ་ཐར་བ་སྟེར་བས་ཕྱག་བྱ་མཆོད་བྱ་སྲས་རྣམས་ཀྱིས། །ཞེས་གསུངས་པ་དང༌། བཤད་རྒྱུད་རྡོ་རྗེའི་འཕྲེང་བ་ལས། བླ་མ་དང་ནི་རྡོ་རྗེ་འཆང༌། །ཐ་དད་པར་ནི་མི་བརྟག་གོ །ཞེས་དང༌། རྡོ་རྗེ་གུར་ལས། ཇི་ལྟར་ནམ་མཁའ་མཛོད་ཆེན་དུ། །ཐུབ་པ་རྡོ་རྗེ་ཆོས་འཛིན་བཞིན། །མགོན་པོ་རྟ་བདུན་རྒྱལ་པོ་ལྟར། །དེ་བཞིན་སློབ་དཔོན་རབ་ཏུ་གྲགས། །ཞེས་དང༌། བྲམ་ཟེ་བསོད་སྙོམས་པའི་རྒྱུད་ལས། དབང་བསྐུར་བླ་མ་མིག་དང་འདྲ། །མན་ངག་སྟོན་པ་སྙིང་དང་འདྲ། །རྒྱུད་སྟོན་པ་ནི་ལུས་དང་འདྲ། །དེ་ལ་དམ་ཚིག་མ་ཉམས་ན། །འདུལ་ཁྲིམས་ཉིས་བརྒྱ་ལྔ་བཅུ་དང༌། བྱང་སེམས་སྡོམ་པ་ཉི་ཤུ་སོགས། །ཉམས་ཀྱང་རྡོ་རྗེ་འཛིན་པ་ཐོབ། །ཅེས་དང༌། ཡེ་ཤེས་ཐིག་ལེའི་རྒྱུད་ལས། བླ་མ་མཐོ་རིས་ཐར་བའི་བླ། །བླ་མ་ཡེ་ཤེས་བླ་ན་མེད། །བླ་མ་ཡོན་ཏན་བླ་མ་མགོན། །བླ་མ་རྡོ་རྗེ་འཛིན་པ་ཉིད། །ཅེས་དང༌། ཡོན་ཏན་ཡོངས་བཟུང་གི་རྒྱུད་ལས། བླ་མ་མེད་པའི་གོང་རོལ་ན། །སངས་རྒྱས་བྱ་བ་མིང་ཡང་མེད། །འདས་དང་མ་འོངས་སངས་རྒྱས་རྣམས། །བླ་མ་དག་ལ་བརྟེན་ནས་བྱུང༌། ཞེས་དང༌། རྩ་རྒྱུད་ལས། བླ་མའི་ཞལ་ལ་མ་བརྟེན་དང༌། དེ་ཡི་མན་ངག་མ་ཐོབ་པར། །འཁོར་བ་རྒྱ་ཆེ་རྒྱ་མཚོ་ལས། །ཕ་རོལ་ཕྱིན་པར་མི་འགྱུར་རོ། །ཞེས་གསུངས་པ་ལྟར་དཔལ་ལྡན་བླ་མའི་ཡོན་ཏན་དཔག་ཏུ་མེད་པ་རྒྱུད་སྡེ་དུ་མར་གསུངས་སོ། །དེ་ལྟར་སྐུའི་ཆ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཞུགས་པར་ཡང་གསུངས་ཏེ། དཔལ་གསང་བ་འདུས་པའི་རྒྱུད་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །དེ་ཡི་གཟུགས་ཀྱི་ཕུང་བོ་ནི། །སངས་རྒྱས་རྣམ་པར་སྣང་མཛད་ཡིན། །ཞེས་སོགས་དང༌། བླ་མ་ལྔ་བཅུ་པ་ལས། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་རྣམས། །དུས་གསུམ་ལ་ནི་མངོན་ཕྱག་འཚལ། །ཞེས་གསུངས་པ་ལྟར་བླ་མ་སངས་རྒྱས་ཉིད་ཡིན་ལ་ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་རྣམས་འདུས་ཏེ་ཉིན་ལན་གསུམ་མཚན་ལན་གསུམ་དུ་ཕྱག་འཚལ་བར་གསུངས་སོ། །དེས་ན་འཕགས་པའི་དགེ་འདུན་རྒྱ་མཚོའི་མངའ་བདག་ནི་རྡོ་རྗེ་སློབ་དཔོན་ཡིན་ལ་ཐམས་ཅད་ཀྱི་སྔོན་དུ་དད་པ་བྱ་དགོས་ཏེ། ཏ་ལ་ལའི་མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །མི་དགེ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་བའི་གྲོང་ཁྱེར་མཚོན་པ་ཡིན། །དད་པའི་རྟོགས་པ་སེལ་ཞིང་སེམས་དད་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་གཏེར་དང་ནོར་དང་རྐང་བའི་མཆོག །ལག་པ་བཞིན་དུ་དགེ་བའི་སྡུད་རྩ་ཡིན། །དད་པའི་ཡོངས་སུ་གཏོང་ལ་དགའ་བར་བྱེད། །དད་པའི་རྒྱལ་བའི་ཆོས་ལ་རབ་དགའ་བྱེད། །དད་པའི་ཡོན་ཏན་ཡེ་ཤེས་ཁྱད་པར་འཕགས། །སངས་རྒྱས་གོ་འཕང་ཐོབ་ཅིང་ཐོབ་པར་བྱེད། །ཅེས་དང༌། ཆོས་བཅུ་བའི་མདོ་ལས། དད་པ་ཐེག་པའི་མཆོག་ཡིན་ཏེ། །དེས་ནི་འདྲེན་པ་ངེས་པར་འབྱུང༌། །དེ་ཕྱིར་བློ་དང་ལྡན་པའི་མི། །དད་པའི་རྗེས་སུ་འབྲང་ལ་བརྟེན། །དད་པ་མེད་པའི་མི་དག་ལ། །དཀར་བོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། མདོ་སྡེ་རྒྱ་ཆེར་རོལ་བ་ལས། ཀུན་དགའ་བོ་དད་པ་ལ་བརྩོན་པར་གྱིས་ཤིག ཅེས་དང༌། སེང་གེས་ཞུས་པའི་མདོ་ལས། དད་པས་མི་ཁོམ་སྤོང་བར་འགྱུར། །ཞེས་དང༌། འོད་དཔག་མེད་ཞིང་གི་བཀོད་པའི་མདོ་ལས། སངས་རྒྱས་དང་ཆོས་དང་དགེ་འདུན་དང་སློབ་དཔོན་དང་མཁན་པོ་དང་དགེ་བའི་བཤེས་གཉེན་ལ་གུས་པ་དང་བཅས་པ་སྔོན་དུ་འགྲོའོ། །ཞེས་དང༌། འཕགས་པ་སྡོང་བོ་བཀོད་པའི་མདོ་ལས། དད་པ་ཡིད་བཞིན་ནོར་བུ་བུམ་པ་བཟང༌། །འདོད་དགུ་འཇོ་བའི་བཞོན་མཚུངས་པ། །བླ་མ་དང་ནི་སངས་རྒྱས་ལ། །དེ་ལྟ་བས་ན་མགུ་བར་བྱ། །སངས་རྒྱས་དད་པས་བསོད་ནམས་གང༌། །སངས་རྒྱས་ཞིང་དུ་སྐྱེ་བར་འགྱུར། །ཞེས་དང༌། འཕགས་པ་ཡན་ལག་མེ་ཏོག་མཆོག་གི་མདོར། སངས་རྒྱས་འཕྲད་ན་ཤིན་ཏུ་དད། །དད་ནས་ཤིན་ཏུ་གུས་པར་འགྱུར། །གུས་པས་ནན་ཏན་བྱེད་པས་ན། །མྱུར་ཏུ་བྱང་ཆུབ་ཐོབ་པར་འགྱུར། །ཞེས་སོགས་མང་དུ་གསུངས་བའི་ཕྱིར་རོ། །ད་ནི་བླ་མ་ལ་མོས་གུས་ཇི་ལྟར་བསྒོམ་པའི་ཚུལ་ནི། དངོས་པོའི་མཚན་ཉིད་ཀྱི་དབང་དུ་བྱས་ན། བླ་མ་དེ་སངས་རྒྱས་བྱང་སེམས་ཀྱི་རྣམ་སྤྲུལ་ཡིན་པ་ཡང་སྲིད། དེ་མ་ཡིན་པར་ཐ་མལ་པ་ཡིན་དུ་ཆུག་ཀྱང༌། རྡོ་རྗེ་སློབ་དཔོན་དེའི་སྐུ་གསུང་ཐུགས་ལ་ཡི་དམ་གྱི་ལྷ་རྣམས་རྗེས་སུ་ཞུགས་པའི་ཚུལ་གྱིས་འགྲོ་དོན་མཛད་པ་ཡིན་པས་སངས་རྒྱས་དངོས་དང་ཁྱད་པར་མེད་པ་ལྟ་བུ་ཡིན་ལ། དེ་མཉེས་ན་སངས་རྒྱས་མཉེས། དེ་ལ་སྡིག་བསགས་ན་སངས་རྒྱས་ལ་སྡིག་བསགས་པར་འགྲོ་ལ། དེ་ལ་མཆོད་པ་ཕུལ་བས་སངས་རྒྱས་ཐམས་ཅད་ལ་མཆོད་པའི་ཕྱིར་སློབ་མའི་སྒྲིབ་པ་ཐམས་ཅད་ཟད་པར་འགྱུར་ཏེ། འཇམ་དཔལ་ཞལ་ལུང་ལས། དེ་ལ་བརྙས་བྱེད་སེམས་ཅན་གང༌། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང༌། །ཞེས་དང༌། འདི་ཡི་དོན་ལྡན་དགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་གསུངས་པའི་ཕྱིར་རོ། །དཔལ་ལྡན་བླ་མ་ལ་མོས་གུས་བསྒོམ་པའི་ཚུལ་ནི་བླ་མ་དེ་ཉིད་དོན་དངོས་པོ་ལ་སུ་གང་ཡིན་རུང་སོ་སོའི་སྐྱེ་བོའམ་འཕགས་པ་སློབ་པ་ལྟ་བུ་དང༌། དགེ་བའི་བཤེས་གཉེན་ཕལ་བ་སོགས་སུ་བལྟ་བ་མ་ཡིན་པར་སངས་རྒྱས་དངོས་སུ་བསྒོམ་དགོས་དོན་ལ་སངས་རྒྱས་གཅིག་དང་མང་བོ་ཁྱད་མེད་ཀྱང༌། མོས་གུས་འཇུག་ཚུལ་ཁྱད་ཡོད་པས་ཕྱོགས་བཅུ་དུས་གསུམ་གྱི་སངས་རྒྱས་ཀུན་འདུས་པའི་ངོ་བོ་ཡིན། དེས་ན་ཆོས་དང་དགེ་འདུན་ཀུན་ཀྱང་ཡིན་པས། བདག་གི་བླ་མ་འདི་ཉིད་དངོས་གནས་ལ་དཀོན་མཆོག་ཀུན་འདུས། བླ་མ་ཉིད་དཀོན་མཆོག་གསུམ། དཀོན་མཆོག་གསུམ་ཉིད་བླ་མ་ཡིན། སངས་རྒྱས་ཡི་དམ་བྱང་སེམས་མཁའ་འགྲོ་ཆོས་སྐྱོང་སོགས། དངོས་སུ་བྱོན་ཡང་རུང༌། བདག་ལ་དཔལ་ལྡན་བླ་མའི་མཛད་པ་ལས། ལྷག་པོ་མཛད་རྒྱུ་དང་སྟོན་རྒྱུ་མེད། དེ་དག་དངོས་སུ་མཇལ་བའི་སྐལ་བ་མེད་དུས་འདིར། དེ་རྣམས་ཀྱི་མཛད་རྒྱུ་ཐམས་ཅད་བླ་མའི་མཛད་པ་ཡིན་པས་བཀའ་དྲིན་རང་ཆེའོ་སྙམ། བླ་མ་སངས་རྒྱས་ཀུན་འདུས་སུ་ཤེས་ནས་ཡོན་ཏན་མཐའ་མེད་པས་དད་པ་དང༌། བཀའ་དྲིན་ཤིན་ཏུ་ཆེ་བར་ཤེས་པ་གཉིས་འཛོམ་ན་མོས་གུས་ཚུལ་བཞིན་བསྒོམ་ལུགས་ཡིན་ནོ། །བཀའ་དྲིན་དྲན་པ་མེད་ན་སྤྱིར་བྱས་པ་མི་གཟོ་ཞིང༌། ངོ་ཚ་ཁྲེལ་མེད་དེ་བྱུར་ཆགས་ཉེས་པ་ཐམས་ཅད་ཀྱི་རྩ་བ་ཡིན། བསོད་ནམས་དང་དཔལ་དང་དགེ་ལེགས་ཐམས་ཅད་ཕྱག་མ་བཏབ་པ་བཞིན་ཉམས་འགྲོའོ། །དེས་ན་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ་སློབ་མ་དམ་ཚིག་དང་ལྡན་པས་མོས་གུས་དེ་ལྟར་བྱས་ནས་བླ་མ་བསྒོམས་ཤིང་གསོལ་བ་བཏབ་ན་ཐབས་གཞན་མེད་ཀྱང༌། མཆོག་ཐུན་མོང་གི་འདོད་དོན་ཐམས་ཅད་འགྲུབ་པར་འགྱུར་རོ། །དེ་ལྟར་མོས་གུས་སོགས་བྱས་ན་ཕན་ཡོན་དུ་མ་འབྱུང་བར་གསུངས་ཏེ། དགྱེས་པ་རྡོ་རྗེའི་རྒྱུད་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང༌། །བདག་གི་བསོད་ནམས་ལས་ཤེས་བྱ། །ཞེས་དང༌། སྒྱུ་འཕྲུལ་དྲྭ་བ་ལས། སློབ་དཔོན་ཇི་ལྟར་ལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །དེ་བཞིན་གཤེགས་པ་རིན་ཆེན་ཏོག །དེ་ཉིད་ཡེ་ཤེས་རྒྱ་མཚོ་སྟེ། །ཡིད་བཞིན་ནོར་བུ་རིན་ཆེན་བཞིན། །སློབ་དཔོན་གྱི་ནི་ཡོན་ཏན་བཟུང༌། །སྐྱོན་ནི་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང༌། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང༌། རྡོ་རྗེ་གུར་ལས། སློབ་དཔོན་སྟོན་པར་གྱུར་བ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །ཞེས་དང༌། རྡོ་རྗེ་སེམས་དཔའ་ཇི་ལྟ་བུས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་གཟུང་དམིགས་ནས། །ཕལ་བའི་གཟུགས་སུ་གནས་པའོ། །ཞེས་དང༌། དཔལ་དྲི་མ་མེད་པའི་འོད་ལས། དུས་ཀྱི་འཁོར་ལོའི་རྒྱུད་སྟོན་པ་པོ་རྡོ་རྗེ་སློབ་དཔོན་ནི་བཅོམ་ལྡན་འདས་འཇམ་དཔལ་ཇི་ལྟ་བ་དང༌། དུས་ཀྱི་འཁོར་ལོ་དང་པོའི་སངས་རྒྱས་ཇི་ལྟ་བ་བཞིན་དུ་ཐར་བ་དོན་དུ་གཉེར་བ་རྣམས་ཀྱིས་བལྟ་བར་བྱའོ། །ཞེས་དང༌། སློབ་དཔོན་ཀླུ་སྒྲུབ་ཀྱི་རིམ་ལྔ་ལས། བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འདོད་ཀྱང་ནི་གྲོལ་བར་འགྱུར། །ཞེས་དང༌། སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོའི་འཇིངས་ལས་སྒྲོལ་བར་འགྱུར། །ཞེས་དང༌། །དཔལ་ས་ར་ཧའི་ཞལ་ནས། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་དང༌། ཡེ་ཤེས་གྲུབ་པ་ལས། སྐྱ་བ་འཛིན་པ་མེད་པར་ནི། །གྲུ་ཡི་ཕ་རོལ་འགྲོ་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་པར་སྲིད་མཐར་མིན། །ཞེས་དང༌། མཐུ་སྟོབས་དབང་ཕྱུག་བིརྺ་པས་ཀྱང༌། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པའི། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང༌། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་པ་ལ་སོགས་པ་སྟེ་དངོས་གྲུབ་ཐམས་ཅད་ཀྱི་རྩ་བ་བླ་མ་ཡིན་པར་གསུངས་པས་ལུང་ཁུངས་མཐའ་ཡས་སོ། །ད་ལྟ་མངོན་སུམ་གྱིས་གྲུབ་པ་ཡང་རྩ་བའི་བླ་མ་ལ་དད་པ་མེད་པ་རྣམས་ལ་མི་འདོད་པ་དུ་མ་ཐོག་ཏུ་འབབ་པ་དང༌། བླ་མ་གུས་པས་བསྟེན་པ་རྣམས་ལ་བདེ་སྐྱིད་སྙན་གསུམ་རང་ཤུགས་ཀྱིས་འབྱུང་བ་མཐོང་ངོ། །གཞན་ཡང་བླ་མ་དམ་པ་རྣམས་ཀྱི་གསུང་ལས་འདི་སྐད་ཅེས། བླ་མ་སངས་རྒྱས་སུ་མཐོང་ན་སངས་རྒྱས་ཀྱི་བྱིན་རླབས་འཇུག །བྱང་ཆུབ་སེམས་དཔར་མཐོང་ན་བྱང་ཆུབ་སེམས་དཔའི་བྱིན་རླབས་དང༌། གྲུབ་ཐོབ་ཏུ་མཐོང་ན་གྲུབ་ཐོབ་ཀྱི་བྱིན་རླབས། སོ་སོའི་སྐྱེ་བོའི་དགེ་བའི་བཤེས་གཉེན་དུ་མཐོང་ན་དེ་དང་མཐུན་པར་བྱིན་རླབས་འཇུག་སྟེ། མོས་གུས་མེད་ན་བྱིན་རླབས་ཡེ་མི་འཇུག་པར་ཐམས་ཅད་མཁྱེན་པ་ཏཱ་ར་ནཱ་ཐ་སོགས་ཀྱིས་གསུངས་སོ། །དེ་ལྟར་དད་པའི་ཞིང་ནི་དཔལ་ལྡན་བླ་མ་དམ་པ་ཉིད་དུ་ངེས་པས། སློབ་དཔོན་གྱི་རྣམ་པར་ཐར་བ་བཤད་པར་བྱ་ཞེས་མདོ་རྒྱུད་དུ་མ་ནས་གསུངས་ཏེ། དྲི་མེད་གྲགས་པའི་ཞུས་པའི་མདོ་ལས། རབ་འབྱོར་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར། རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སྦྱིན་པ་བྱིན་ན་བསོད་ནམས་མང་དུ་བསྐྱེད་དམ་རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་བ། རབ་འབྱོར་གང་ལ་ལ་ཞིག་གིས་བླ་མའི་རྣམ་ཐར་གྱི་ཚིག་བཞི་བའི་ཕྱེད་ཙམ་སྟོན་ན་དེ་བས་བསོད་ནམས་མང་དུ་བསྐྱེད་པར་འགྱུར་རོ། །ཞེས་དང༌། གཞོན་ནུ་ལུང་བསྟན་པའི་མདོ་ལས། གཞོན་ནུ་སློབ་དཔོན་གྱི་མཚན་ཉིད་བཤད་པར་བྱའོ། །མཁན་པོའི་ཡོན་ཏན་གྱི་བཤད་པ་ལ་བརྩོན་ཅིག ཅེས་དང༌། འཕགས་པ་གཎྜི་རྒྱས་པའི་མདོ་ལས། སློབ་དཔོན་མཚན་ཉིད་སུས་བཤད་པ། །བསོད་ནམས་མཐའ་ཡས་དཔག་མེད་ཐོབ། །ལྷ་ཡི་བསྲུང་ལ་བར་ཆད་མེད། །དེ་ཕྱིར་བླ་མ་ལ་གུས་ཤིག །ཅེས་དང༌། ཚུལ་ཁྲིམས་དྲི་མེད་བསལ་བའི་མདོ་ལས། ཀུན་དགའ་བོ་ཚུལ་ཁྲིམས་དང་ལྡན་པའི་བྱང་ཆུབ་སེམས་དཔའ་ནི་བླ་མའི་མཚན་ཉིད་ལ་རྟོགས་པར་བྱའོ། །མོས་པར་བྱའོ། །ཞེས་སོགས་མདོ་དུ་མ་དང༌། རྒྱུད་ཡང་སྒྱུ་འཕྲུལ་དྲྭ་བའི་རྒྱུད་ལས། སློབ་དཔོན་མེད་པར་གྱུར་ནས་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཞེས་དང༌། ཡེ་ཤེས་གསལ་བའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་བ་སྟོང་དུ་བསྒོམ་པ་བས། །བླ་མ་དྲན་པའི་བསོད་ནམས་ཆེ། །ཞེས་དང༌། དམ་ཚིག་བཀོད་པའི་རྒྱུད་ལས། རྫོགས་པའི་རིམ་པ་བསྐལ་བའི་བར་དུ་ནི། །འདུ་འཛི་གཡེང་བ་སྤངས་ནས་བསྒོམས་པ་བས། །བླ་མ་སེམས་ཀྱི་དཀྱིལ་དུ་དར་ཅིག་ཤར་བ་ཙམ། །འབུམ་ཕྲག་ཉི་ཤུའི་ཆར་ཡང་མི་ཕོད་དོ། །ཞེས་དང༌། འཇམ་དཔལ་རྩ་རྒྱུད་དུ། སློབ་དཔོན་བླ་མ་མཚན་ཉིད་ལྡན། །སློབ་མས་སློབ་དཔོན་མཐོང་བར་སྤྲོ། །དེ་ལྟ་བུ་ཡིས་རྟག་ཏུ་ནི། །དངོས་གྲུབ་ཡང་དག་འབྱོར་བ་ཉིད། །ཅེས་སོགས་མདོ་རྒྱུད་དུ་མ་ནས་བླ་མ་ལ་དད་མོས་དང་རྣམ་ཐར་བརྗོད་ཅིང་རྗེས་སུ་དྲན་པར་བྱས་ན་ཕན་ཡོན་དཔག་ཏུ་མེད་པ་ཡོད་པར་གསུངས་པས་འདི་རྩོམ་པ་ལ་སྤྲོ་བ་སྐྱེས་པས་ཅུང་ཟད་འབྲི་བར་འཚལ་ལོ། །སྨྲས་པ། བླ་མའི་མཚན་ཉིད་མདོར་བསྡུས་ན། །ཁྲིམས་ལྡན་འདུལ་ཞིང་ཆོ་ག་ཤེས། །ནད་པར་སྙིང་བརྩེ་འཁོར་ནི་དག ། ཆོས་དང་ཟང་ཟིང་ཕན་འདོགས་བརྩོན། ། དུས་སུ་འདོམས་པ་ལ་སོགས་པ། །བླ་མའི་མཚན་ཉིད་དུ་མར་གསུངས། །སྐུ་གསུང་ཐུགས་ཀྱི་གསང་བའི་མཚོ་ཆེན་ལ། །སྐལ་ལྡན་འཇུག་ངོགས་ཀླུ་དབང་རོལ་བའི་གནས། ། དཔག་ཡས་ཡོན་ཏན་རིན་ཆེན་གཏེར་དུ་གྲུབ། །དེ་ཡི་རྣམ་ཐར་ཚིགས་བཅད་གཅིག་བརྗོད་པའི། །བསོད་ནམས་ཀུན་གསལ་མཐའ་ལ་འགྲན་བཟོད་པར། །དུས་གསུམ་རྒྱལ་རྣམས་མགྲིན་པའི་རྫ་རྔ་ཁྲོལ། ། ཞེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་དཔལ་ལྡན་བླ་མ་དག་གི་མཚན་ཉིད་སོགས་མདོ་ཙམ་བཤད་པའི་སྒོ་ནས་གླེང་བསླངས་བའི་སྐབས་རྣམ་པར་བཤད་ཟིན་ཏོ།། །། ༈ ཐུགས་རྗེའི་རྣམ་སྤྲུལ་བྱེ་བ་ཕྲག་བརྒྱ་ཡི། །ཞིང་ཁམས་རབ་འབྱམས་ཆུ་ཀླུང་ཟླ་བརྙན་བཞིན། །གང་ལ་གང་འདུལ་སྤྲུལ་བའི་འོད་སྟོང་འབར། །བསྟན་འགྲོའི་དོན་ཆེན་མཛད་རྣམས་གུས་ཕྱག་འཚལ། །གཉིས་པ་སྔོན་གྱི་སྐྱེ་རབས་ཀྱི་སྐབས་ཕྱེ་བ་ལ། རྗེ་བཙུན་དཔལ་ལྡན་བླ་མ་དམ་པ་ངག་དབང་བརྩོན་འགྲུས་དཔལ་བཟང་པོ་མཆོག་ཉིད་ལ་ཞབས་དཀར་གྱི་དགོན་པའི་ཁྲི་རབས་བཞི་བ་རྒྱལ་བོ་རིགས་འཛིན་དཔལ་ལྡན་བཀྲ་ཤིས་ཀྱི་ཡང་སྤྲུལ་བླ་མ་ཤེས་རབ་ཀྱིས་རྗེ་འདི་ནི་བདག་གི་བླ་མ་ཞབས་དཀར་བའི་ཡང་སྤྲུལ་འཁྲུལ་མེད་རེད་ཅེས་གསུངས་པ་དང༌། ཞབས་དཀར་གྱི་ལུང་བསྟན་ལ་མ་འོངས་པ་ཤིང་སྡོང་འདི་ལ་རྒྱབ་ཀྱི་ས་འདི་ཐུག་ཚེ་ཁོང་སླར་ས་འདིར་ཕེབས་ཞེས་གསུངས་པ་སོགས་རྟེན་འབྲེལ་གྱི་སྒོ་ཆེན་མང་པོ་འགྲིགས་པས་དམ་པ་འདི་ཉིད་ཞབས་དཀར་ཚོགས་དྲུག་རང་གྲོལ་གྱི་སྐྱེ་ཕྲེང་དུ་གྲགས་པ་ལྟར་བརྗོད་པར་བྱ་སྟེ། དེ་ཡང་དམ་པ་འདིའི་སྐྱེ་རབས་གསེར་གྱི་ཕྲེང་བ་རིམ་པར་བྱོན་པ་བགྲང་ལས་འདས་ཀྱང་སྐབས་འདིར་རྗེ་མི་ལ་བཞད་པ་རྡོ་རྗེ་དང༌། ཞབས་དཀར་ཚོགས་དྲུག་རང་གྲོལ་གཉིས་ཀྱི་སྐྱེས་པའི་རབས་ཏེ་མདོར་བསྡུས་པ་ཙམ་བརྗོད་ན། གྲུབ་ཐོབ་འཁོར་ལོའི་བསྒྱུར་བའི་གཙུག་རྒྱན་རྗེ་བཙུན་མི་ལ་རས་པ་ཞེས་སྙན་པའི་གྲགས་པ་ཕྱོགས་ཀུན་ན་ཆེས་ཆེར་གཡོ་བ་དེ་ཉིད་ཐོག་མར་སྐུ་འཁྲུངས་བའི་མཛད་པ་ནི། གདུང་ཁྱུང་པོ། རིགས་ཇོ་སྲས་ཡབ་མི་ལ་ཤེས་རབ་རྒྱལ་མཚན་དང༌། ཡུམ་མྱང་ཚ་དཀར་རྒྱན་དུ་གྲགས་པ་གཉིས་ཀྱི་སྲས་སུ་ཆུ་ཕོ་འབྲུག་གི་སྟོན་ཟླ་ར་བའི་ཚེས་ཉེར་ལྔ་སྐར་མ་རྒྱལ་ལ་བབ་པའི་དུས་བཟང་ལ་སྐུ་འཁྲུངས། མཚན་ལ་ཐོས་པ་དགའ་ཞེས་གསོལ། དགུང་ལོ་བདུན་པ་སླེབས་ཚེ་ཡབ་མྱ་ངན་ལས་འདས་ནས་ཨ་ཁུ་དང་ཨ་ནེ་གཉིས་ཀྱི་ཞིང་ནོར་རྣམས་འཕྲོག མ་བུ་རྣམས་ལྟོ་སྐྱ་གོས་ཧྲུལ་བ་ཉམ་ཐག་པ་ཡིད་འཕམ་པ་བྱུང༌། དེ་ནས་བླ་མ་གཡུང་སྟོན་ཁྲོ་རྒྱལ་གྱི་བཀའ་ལྟར་བླ་མ་ཁུ་ལུང་བ་ཡོན་ཏན་རྒྱ་མཚོའི་དྲུང་ནས་མཐུའི་གདམས་ངག་ཞུས་ནས་མཐུ་བྱས་ནས་མི་སུམ་ཅུ་སོ་ལྔ་བསད། བླ་མ་གཡུང་སྟོན་ཁྲོ་རྒྱལ་ལས་སེར་བ་མཛུབ་ཁྲིད་ཀྱི་གདམས་པ་ཞུས་ནས་སེར་བ་གྱང་རིམ་གསུམ་ཙམ་བབས་པར་བྱས་ནས་དགྲ་འཐབ་ཚར་གཅོད་དེ་སྡིག་མང་པོ་བསགས། དེ་དག་ཐུན་མོང་འཇིག་རྟེན་གྱི་མཛད་པའོ། །དེ་ནས་མཆོག་གྱུར་ཞི་བ་མྱ་ངན་ལས་འདས་པའི་མཛད་པ་ལའང་སྐྱོ་ཤས་དང་ངེས་འབྱུང་གི་སྒོ་ནས་མཚན་ལྡན་གྱི་བླ་མ་བཙལ་བའི་མཛད་པ་ནི། སྡིག་བསགས་པ་ལ་འགྱོད་པ་སྐྱེས། འཁོར་བ་ལ་སྐྱོ་ཤས་ཚད་མེད་སྐྱེས་ནས་བླ་མ་གཡུང་སྟོན་ཁྲོ་རྒྱལ་གྱི་གསུང་ལྟར་བླ་མ་རོང་སྟོན་ལྷ་དགའི་མདུན་དུ་སོང་ནས་རྫོགས་ཆེན་གྱི་ཆོས་ཞུས། དེ་ནས་བླ་མས་ངས་ཁྱོད་མི་འདྲོངས་པར་འདུག་པས། ལྷོ་ཕྱོགས་གྲོ་བོ་ལུང་ན་རྒྱ་གར་གྱི་གྲུབ་ཆེན་ནཱ་རོ་པའི་དངོས་སློབ། སྐྱེས་མཆོག་སྒྲ་བསྒྱུར་གྱི་རྒྱལ་པོ་མར་བ་ལོ་ཙཱ་ཞེས་བྱ་བ་བཞུགས་པས་དེར་སོང་ལ་ཆོས་ཞུ་བར་གྱིས་གསུངས། དེའི་ཚེ་རྗེ་བཙུན་ལ་སྒྲ་བསྒྱུར་སྨྲ་བའི་མཚན་ཐོས་པ་ཙམ་གྱིས་སེམས་ལ་སྨྲ་མི་ཤེས་པའི་དགའ་བ་དང༌། དད་གུས་ཚད་མེད་པ་ཞིག་སྐྱེས་ནས་སྒྲ་བསྒྱུར་མར་བའི་མདུན་དུ་བྱོན། བླ་མ་དང་མཇལ་ནས་མཁར་ལས་སོགས་དཀའ་སྤྱད་སྡུག་རུས་ཀྱི་སྒོ་ནས་སྡུག་བསྔལ་ཡི་ཆད་ཆེན་པོ་བརྒྱད་དང་གནང་ཆུང་མང་བོའི་སྒོ་ནས་སྡིག་སྒྲིབ་སྦྱང་པའི་མཛད་པ་མཛད་པའོ། །དེ་ནས་བླ་མས་ཐུགས་བརྩེ་བས་རྗེས་སུ་བཟུང་སྟེ་སོ་ཐར་དང་བྱང་སྡོམ་གཉིས་གནང༌། དེ་ནས་དཔལ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་རྒྱས་པ་བཞེངས་ནས་དབང་བསྐུར། དཀྱིལ་འཁོར་གྱི་རྟེན་བརྟེན་པའི་ལྷ་ཚོགས་ཀུན་ཁྲ་ལམ་མེར་དངོས་སུ་མཐོང༌། དེའི་ཚེ་བླ་མ་དང་ཡི་དམ་ལྷས་མགྲིན་གཅིག་ཏུ་གསང་མཚན་དཔལ་བཞད་པ་རྡོ་རྗེར་གསོལ། དེ་ནས་སྒྲུབ་པ་ཉམས་ལེན་ལ་བརྩོན་པར་མཛད། དེའི་སྐབས་སུ་སྒྲ་བསྒྱུར་མར་བ་རྒྱ་གར་དུ་བྱོན་ཚེ་པཎ་ཆེན་ནཱ་རོ་པའི་ཕྱག་གཉིས་སྤྱི་བོར་ཐལ་མོ་སྦྱར་ནས། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་ཕྱག་འཚལ་ལོ། །ཞེས་གསུངས་སོ། །ཡང་རྗེ་འདི་ཉིད་ལ་རྗེ་མར་བས་རྨི་ལམ་བརྡ་གྲོལ་གྱི་ལུང་བསྟན་གནང་བ་ནི། ཇི་སྐད་དུ། འདིར་ཚོགས་གྲྭ་བ་བུ་སློབ་ཀུན། །བྱང་དུ་ཀ་ཆེན་བཙུགས་པ་དེ། །གུང་ཐང་གི་མི་ལ་རས་པ་ཡིན། །ཀ་ཐོག་ཏུ་རྒོད་པོ་ལྡིང་བ་དེ། །ཁོ་མི་བཞི་རྒོད་དང་འདྲ་བ་སྟེ། །རྒོད་རྩེ་སྒྲོ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །རྒོད་ཚང་བྲག་ལ་བཅས་པ་སྟེ། །ཚེ་སྲོག་བྲག་ལས་སྲ་བ་ཡིན། །རྒོད་དེ་ལ་བུ་གཅིག་བྱུང་བ་དེ། །འགྲན་གྱི་དོ་མེད་ཅིག་ཡོང་བ་ཡིན། །བྱ་བྲན་གྱིས་ནམ་མཁའ་གང་བ་དེ། །བཀའ་བརྒྱུད་ཀྱི་བསྟན་པ་དར་བ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །རྒོད་ནམ་མཁའི་མཐོངས་སུ་འཕུར་བ་དེ། །ཐར་བའི་གླིང་དུ་གཤེགས་པ་ཡིན། །བྱང་རྨི་ལམ་མི་ངན་རྨི་ལམ་བཟང༌། །ཁྱེད་འདིར་ཚོགས་རྣམས་ལ་བཤད་པ་ཡིན། ། ཞེས་གསུངས་སོ། །དེ་ནས་བླ་མས་བུ་ཆེན་རྣམས་ལ་ཆོས་དང་གདམས་ངག་གི་དཀོར་མཛོད་རྣམས་ཁ་ཕྱེ་སྟེ། ཉིན་འཆད་ཅིང༌། མཚན་སྒོམ་དུ་བཅུག་ནས་ཉམས་རྟོགས་ཀྱི་མྱུ་གུ་འཁྲུངས། རྗེ་མར་བས་མི་ལ་རས་པ་གཏུམ་མོ་བཀའ་བབ་དང་འཕྲིན་ལས་ཡོད་པར་མཁྱེན་ནས་རྗེ་མི་ལ་རས་པ་ལ་གཏུམ་མོའི་ཁྱད་ཆོས་ཤིང་ལ་མེ་སྦར་བ་ལྟ་བུ་དང༌། མཻ་ཏྲི་པའི་དབུ་ཞྭ། ནཱ་རོའི་ན་བཟའ་རྣམས་གནང་ནས། གཡའ་ཁྲོད་དང་གངས་ཁྲོད་འགྲིམས་ལ་ལྟ་བསྒོམ་ཉམས་སུ་ལོངས་ཤིག་གསུངས། དེ་ནས་གདམས་ངག་ལ་རང་བྱན་ཚུད་ནས་མནལ་ལམ་གྱི་བརྡས་བསྐུལ་བས་ཚིག་བརྒྱུད་ཀྱི་གདམས་ངག་ཐོབ་སྟེ་བླ་མའི་དྲུང་ནས་བྱིན་པའི་མཛད་པ་མཛད། དེ་ནས་སླར་ཡང་རྐྱེན་གྱིས་འཁོར་བ་ལ་སྙིང་པོ་མེད་པར་གསལ་ཐེབས་པས་སྒྲུབ་པ་ལ་ཡིད་ཀྱིས་དམ་བཅའ་མཛད་ནས་བླ་མའི་བཀའ་སྒྲུབ་ཕྱིར་ཚེ་འདི་བློས་བཏང་སྟེ་སྙིང་རུས་དཀའ་སྤྱད་དྲག་པོས་གཡེང་མེད་དུ་རི་ལ་བསྒོམ་པར་མཛད་པ་དང༌། དེ་ལྟར་བསྒོམས་པས་ཉམས་རྟོགས་གོང་འཕེལ་དུ་སོང་ནས་མཐར་ཕྱིན་ཏེ་སྒྲུབ་འབྲས་ཀྱིས་བསྟན་པ་དང་སེམས་ཅན་ལ་ཕན་གདགས་པའོ། །དེ་ཡང་རྗེ་བཙུན་མི་ལ་རས་པའི་སྒྲུབ་པ་ཉམས་ལེན་བྱེད་པའི་དབེན་གནས་རྣམས་འདི་ལྟ་སྟེ། ཡོངས་སུ་གྲགས་པ་ཕྱིའི་རྫོང་དྲུག་ནི། བྲག་དཀར་རྟ་སོ་དབུ་མ་རྫོང༌། སྨིན་ཁྱུགས་གྲིབ་མ་རྫོང༌། ལིང་བ་བྲག་དམར་རྫོང༌། རག་མ་བྱང་ཆུབ་རྫོང༌། སྐྱང་ཕན་ནམ་མཁའ་རྫོང༌། བྲག་སྐྱ་རྡོ་རྗེ་རྫོང་རྣམས་སོ། །མ་གྲགས་པ་ནང་གི་རྫོང་དྲུག་ནི། མཆོང་ལུང་ཁྱུང་གི་རྫོང༌། སྐྱིད་པ་ཉི་མ་རྫོང༌། ཁུ་བྱུག་དབེན་པ་རྫོང༌། ཤེལ་ཕུག་ཆུ་ཤིང་རྫོང༌། བེ་རྩེ་འདོད་ཡོན་རྫོང༌། རྩིག་པ་རྐང་མཐིལ་རྫོང་རྣམས་སོ། །གསང་བའི་རྫོང་དྲུག་ནི། རྒྱ་བྲག་ནམ་མཁའ་རྫོང༌། སྟག་ཕུག་སེང་གེ་རྫོང༌། སྦས་ཕུག་མ་མོ་རྫོང༌། ལ་ཕུག་པད་མ་རྫོང༌། གླང་སྒོ་ཀླུ་བདུད་རྫོང༌། ཁྲོ་རྒྱལ་རྡོ་རྗེ་རྫོང་རྣམས་སོ། །ཡང་རྫོང་གཉིས་ནི་སྐྱིད་ཕུག་ཉི་མ་རྫོང་དང༌། སྤོ་མཐོ་ནམ་མཁའ་རྫོང་གཉིས་སོ། །ཡོངས་སུ་གྲགས་པའི་ཕུག་ཆེན་བཞི་ནི། གཉའ་ནང་གི་གྲོད་པ་ཕུག ལ་ཕྱིའི་བདུད་འདུལ་ཕུག བྲིན་གྱི་འབྲི་ལྕེ་ཕུག ཏི་སེའི་རྫུ་འཕྲུལ་ཕུག་རྣམས་སོ། །མ་གྲགས་པ་བཞི་ནི། རྩའི་རྐང་ཙུགས་ཕུག རོན་གྱི་འོད་གསལ་ཕུག ར་ལའི་ཟ་འོག་ཕུག ཀུ་ཐང་གི་ཕུག་རུན་ཕུག་རྣམས་སོ། །དེ་རྣམས་སུ་བསྒོམ་པ་བྱུང་ན་དབེན་ལ་མཐུན་རྐྱེན་འཛོམ་པ་ཡང་ཡོད་ཅིང་བརྒྱུད་པའི་བྱིན་རླབས་འཇུག་པ་ཡིན་པས་རྗེ་བཙུན་མི་ལ་ངས་ཀྱང་ཉམས་ལེན་སྒོམ་སྒྲུབ་མཛད་ལ། སྐལ་ལྡན་གྱི་གདུལ་བྱ་ཁྱེད་རྣམས་ཀྱིས་སྒོམ་སྒྲུབ་ཀྱིས་ཤིག་གསུངས། དེ་ནས་ས་གསུམ་ན་འགྲན་ཟླ་དང་བྲལ་བ་རྣལ་འབྱོར་གྱི་དབང་ཕྱུག་ཆེན་པོ་རྗེ་མི་ལ་བཞད་པ་རྡོ་རྗེ་མཆོག་ཉིད་དགུང་ལོ་བརྒྱད་ཅུ་རྩ་བཞིར་ཕེབས་པ། ཤིང་མོ་ཡོས་ཀྱི་ལོའི་དགུན་ཟླ་ཐ་ཆུང་གི་ཚེས་བཅུ་བཞྀ་ལ་གཟུགས་སྐུ་ཆོས་དབྱིངས་སུ་བསྡུ་བའི་ཚུལ་བསྟན་ཏོ། ། རྗེ་བཙུན་མི་ལའི་དངོས་སློབ་ནི། ཉི་མ་ལྟ་བུའི་མཉམ་མེད་དྭགས་པོ་རིན་པོ་ཆེ། ཟླ་བ་ལྟ་བུའི་གོང་ཐང་གི་རས་ཆུང་རྡོ་རྗེ་གྲགས་པ། རྒྱུ་སྐར་ལྟ་བུའི་གཤེན་ལུང་གི་ངན་རྫོང་སྟོན་པ་བྱང་ཆུབ་རྒྱལ་པོ། རྒྱལ་ཁྲུམ་སྨད་ཀྱི་རས་པ་ཞི་བ་འོད། འདོ་བཀྲའི་སེ་བན་རས་པ། གཉི་ཤང་གི་ཁྱི་ར་རས་པ། མུས་ཀྱི་འབྲི་སྒོམ་རས་པ། རག་མའི་རས་པ་སངས་རྒྱས་སྐྱབས་ཏེ་ཐུགས་ཀྱི་སྲས་བརྒྱད། གཤེན་སྒོམ་རས་པ། གླན་སྒོམ་རས་པ། མེས་སྒོམ་རས་པ། རྩ་ཕུ་རས་པ། མཁར་ཆུང་རས་པ། རོང་ཆུང་རས་པ། སྟག་སྒོམ་རས་པ་རྡོ་རྗེ་དབང་ཕྱུག ཇོ་སྒོམ་རས་པ་དར་མ་དབང་ཕྱུག དམ་པ་རྒྱགས་ཕུ་བ། ལི་སྐོར་ཆ་རུ་པ། ལོ་སྟོན་དགེ་འདུན། སྐྱོ་སྟོན་ཤཱཀྱ་གུ་ན། འདྲེ་སྟོན་བཀྲ་ཤིས་འབར་ཏེ་ཉེ་བའི་སྲས་བཅུ་གསུམ། ཐུགས་སྲས་དྭགས་པོ་རིན་པོ་ཆེ་དང༌། ཉེ་བའི་སྲས་ཕྱི་མ་ལྔ་ནི་སྟོན་སྒོམ་སོ་ཐར་གྱི་ཆ་ལུགས་ཅན་ཡིན་ནོ། །མཚོ་ལྔའི་རས་ཆུང་མ། གཉའ་ནང་གི་ས་ལེ་འོད། གཅུང་གི་དཔལ་དར་འབུམ། ལྕམ་མོ་པེ་ཏ་མགོན་སྐྱིད་རྣམས་ནི་སྲས་རྣམས་ཀྱི་སྲིང་བཞི་སྟེ། ས་ལམ་མཐར་ཕྱིན་པའི་རྣལ་འབྱོར་ཕོ་མོ་ཉེར་ལྔ། རྫི་བོ་རས་པ་ལ་སོགས་ཏེ་སྐར་ཕྲན་ལྟ་བུའི་གནས་ལུགས་རང་བཞིན་མཐོང་བའི་རྟོགས་ལྡན་ཕྱིར་མི་ལྡོག་པ་བརྒྱ། རང་བྱུང་གི་སྒོམ་ཉམས་བཟང་པོ་འཁྲུངས་པ་གོང་འཕེལ་དུ་གྱུར་ཅིང༌། ལམ་ལ་དྲོད་ཐོབ་པའི་སྐྱེས་ཆེན་བརྒྱ་རྩ་བརྒྱད། འཇིག་རྟེན་འདིའི་བྱ་བ་བཏང་བའི་ཆོས་དང་མཐུན་ངེས་ཀྱི་སྒོམ་ཆེན་ཕོ་མོ་ལམ་སྣ་ཟིན་པ་སྟོང་རྩ་གཅིག ཆོས་འབྲེལ་ཐོབ་པས་ངན་སོང་གི་ལམ་རྒྱུན་ཆད་པའི་གདུལ་བྱ་སྐལ་ལྡན་སྐྱེ་བོ་ཕལ་བ་རྩིས་ལས་འདས་པ་མིའི་བུ་སློབ་རྣམས་དང༌། ཚེ་རིང་མཆེད་ལྔ་དང༌། ལིང་བ་བྲག་སྲིན་མ་ལ་སོགས་ཏེ་དཀར་ཕྱོགས་སྐྱོང་བའི་མི་མ་ཡིན་གྱི་བུ་སློབ་དཔག་གིས་མི་ལང་བ་རྣམས་བྱུང་བ་ཡིན་ནོ། །དེ་ལྟར་ཡ་མཚན་ཞིང་ངོ་མཚར་བའི་མཛད་པ་མཛད་པའི་སྒོ་ནས་ཚེ་གཅིག་དང་ལུས་གཅིག་གིས་སྐུ་བཞིའི་ཡེ་ཤེས་ལྔའི་བདག་ཉིད་ཁྱབ་བདག་རྡོ་རྗེ་འཆང་ཆེན་པོའི་གོ་འཕང་བརྙེས་ཏེ་སངས་རྒྱས་ཀྱི་ཞིང་གི་ཚོགས་བསགས་ཤིང་དག་པ་དང༌། སེམས་ཅན་རྣམས་སྨིན་ཅིང་གྲོལ་བར་མཛད་པའི་སྐྱེས་བུ་མཆོག་རབ་དམ་པ་མི་ལ་བཞད་པ་རྡོ་རྗེའི་རྣམ་པར་ཐར་བ་དང་ཐམས་ཅད་མཁྱེན་པའི་ལམ་སྟོན་མཁའ་ཁྱབ་ཀྱི་སེམས་ཅན་རྣམས་ལ་སྲིད་ཞིའི་དཔལ་འབྱོར་རྒྱུན་མི་ཆད་དུ་སྩོལ་བར་མཛད་པའི་དགེ་ལེགས་ཀྱི་དགའ་སྟོན་ཆེན་པོ་འདི་ཉིད་དགེ་ཞིང་བཀྲ་ཤིས་པ་དགེ་ལེགས་འཕེལ་བར་གྱུར་ཏོ། ། རྗེ་བཙུན་དམ་པ་གང་གི་སྐྱེ་ཕྲེང་དུ་གྱུར་བ་སྐྱབས་མགོན་ཞབས་དཀར་རྡོ་རྗེ་འཆང་ཆེན་པོ་གང་ཉིད་སྐུ་འཁྲུངས་བའི་ཡུལ་མདོ་སྨད་གཉན་རྒྱ་ཞེས་བྱ་བའི་གྲོང་སྡེ་དེར། ཡུམ་བཀྲ་ཤིས་བརྩེགས་དང༌། ཡབ་སྔགས་འཆང་རྡོ་རྗེ་རྣམ་རྒྱལ་གཉིས་ཀྱི་སྲས་སུ་ལྕགས་མོ་གླིང་གི་ལོ་ལ་ངོ་མཚར་བའི་དགེ་མཚན་དང་བཅས་ཏེ་སྐུ་བལྟམས། ལྕགས་མོ་བྱའི་ལོ་སྣྲོན་ཟླའི་དཀར་ཕྱོགས་ཀྱི་ཚེས་བརྒྱད་ཀྱི་སྔ་དྲོའི་ཆ་ལ། གནས་བརྟན་འདུལ་བ་འཛིན་པ་ཆེན་པོ་བྱམས་པ་དགེ་ལེགས་རྒྱལ་མཚན་དཔལ་བཟང་པོས་མཁན་པོ་མཛད་དེ་བསྟན་པའི་གོ་རིམ་དང་མཐུན་པར་རབ་བྱུང་དགེ་ཚུལ་བསྙེན་རྫོགས་ཀྱི་སྡོམ་པ་ཡང་དག་པར་ནོས། མཚན་ལ་བྱམས་པ་ཆོས་དར་གསོལ། དེ་ནས་ཕ་ཡུལ་རྒྱབ་ཏུ་སྤངས་ནས་ཆོས་རྒྱལ་ངག་གི་དབང་པོའི་ཞབས་པད་བསྟེན་ཚུལ་ནི། ཆོས་རྒྱལ་ངག་གི་དབང་པོ་བསམ་སྦྱོར་གཉིས་ཀས་ཚུལ་བཞིན་དུ་བསྟེན། ཆོས་རྒྱལ་ངག་གི་དབང་པོའི་ཐུགས་བརྩེ་བས་རྗེས་སུ་བཟུང་ནས་སྐྱེས་བུ་ཆུང་འབྲིང་དང་ཐུན་མོང་དུ་བློ་སྦྱང་བར་བྱས། དེ་ནས་བཅོམ་ལྡན་འདས་རྟ་ཕག་ཡིད་བཞིན་ནོར་བུའི་དབང་གནང་ནས་དམ་པ་འདི་ཉིད་ཀྱི་མཚན་ལ་ཚོགས་དྲུག་རང་གྲོལ་ཞེས་བཏགས། དེ་ནས་ཉིན་རེ་བཞིན་བུམ་དབང་དང་འབྲེལ་བ་བསྐྱེད་རིམ་ལྷའི་ཁྲིད། གསང་དབང་དང་འབྲེལ་བ་རྩ་རླུང་གཏུམ་མོའི་ཁྲིད། ཤེས་རབ་ཡེ་ཤེས་ཀྱི་དབང་དང་འབྲེལ་བ་བདེ་སྟོང་ཕྱག་རྒྱའི་ཁྲིད། ཚིག་དབང་དང་འབྲེལ་བ་ཁྲེགས་གཅོད་ཐོད་རྒལ་གྱི་ཁྲིད་དང་དེའི་བཀའ་སྲུང་རྣམས་ཀྱི་རྗེས་གནང་ཡོངས་རྫོགས་གནང་བ་དང༌། ཕྱག་རྡོར་བདུད་རྩི་ཐིག་པའི་དབང་དང༌། ཕྱག་ཆེན་གྱི་ཁྲིད། རྫོགས་ཆེན་ཡེ་ཤེས་བླ་མ། ཉི་མ་གྲགས་པའི་རྫོགས་ཆེན། མཁའ་འགྲོའི་སྙིང་ཐིག་ལ་སོགས་པའི་སྨིན་བྱེད་ཀྱི་དབང་དང༌། གྲོལ་བྱེད་ཀྱི་ཁྲིད། རྒྱབ་རྟེན་གྱི་ལུང་དང་བཅས་བསྩལ་ནས་ཉམས་བཞེས་གནད་དུ་བསྣུན་པ་བྱས། དེ་ནས་ཀུན་མཁྱེན་ཀློང་ཆེན་རབ་འབྱམས་པས་མཛོད་བདུན་སོགས་གཞུང་ཆེན་རྣམས་ལ་དཔེ་གཟིགས་གནང༌། དཀའ་གནད་རྣམས་ཆོས་རྒྱལ་རིན་པོ་ཆེ་ལ་ཞུས་ཤིང་གནད་ལ་ཕབ། དེ་ནས་རྩེ་གཞུང་དབེན་པའི་དགའ་ཚལ་དུ་ཟབ་མོའི་སྒྲུབ་པ་ལ་གཞོལ་བར་མཛད། དེ་ནས་དབེན་ནས་སྟག་མོ་རྫོང་དང༌། རྒོད་པོ་རྫོང་དང༌། མཚོ་སྙིང་མ་ཧཱ་དེ་ཝ་དང་རྨ་ཆེན་སྤོམ་ར་བྲག་དཀར་སྤྲེལ་རྫོང་ཐུགས་རྗེ་ཆེན་པོའི་གནས་སོགས་མདོ་སྨད་ཀྱི་དབེན་པའི་རི་ཁྲོད་དུ་མར་སྒྲུབ་པ་ཚུལ་བཞིན་དུ་བྱས། དེ་ནས་དབུས་གཙང་ཕྱོགས་སུ་ཕེབས་ནས་གནས་མཆོག་ཙཱ་རི་ཕག་གདོང་མ་ནག་མོའི་ཐུགས་ཀྱི་གནས་ལ་རིང་སྐོར་བརྒྱབ་ནས་སྒྲུབ་པ་བྱས། དེ་ནས་གངས་དཀར་ཏེ་སེ་གདོང་མ་དཀར་མོའི་སྐུ་ཡི་གནས་ནས་ཉམས་ལེན་བྱས། དེ་ནས་བལ་ཡུལ་མཆོད་རྟེན་རྣམ་གཉིས་ལ་མཇལ་ནས་མཆོད་འབུལ་རྒྱ་ཆེར་བྱས། དེ་ནས་ལ་ཕྱི་སྟག་གདོང་མ་ཁྲ་མོ་གསུང་གི་གནས་ནས་སྒྲུབ་པ་བྱས། དེ་ནས་དབུསུ་གཙང་གི་ཞིང་དུ་ཚུལ་བྱོན་ནས་ཕྱོགས་མེད་འགྲོ་དོན་མཛད། དེ་ནས་མདོ་ཁམས་སྨད་འདིར་འོངས་ནས་བསྟན་པ་དང་འགྲོ་བའི་དོན་རྒྱ་ཆེར་བསྒྲུབས་པར་བྱས་པའོ། །དེ་ཡང་མདོར་བསྡུས་སྔོན་བསགས་བསོད་ནམས་ཀྱི་མཐུས་ཚེ་འདིར་དལ་འབྱོར་གྱི་མི་ལུས་གཙང་མ་ཐོབ། ཆུང་ནས་ད་ལྟའི་བར་དུ། བླ་མ་དགེ་བའི་བཤེས་གཉེན་བརྒྱ་ཕྲག་དུ་མའི་ཞབས་རྡུལ་སྤྱི་བོར་བསྟེན་ནས། མདོ་སྔགས་ཟུང་དུ་འབྲེལ་བའི་ཟབ་ཅིང་རྒྱ་ཆེ་བའི་གདམས་པ་མང་པོ་ཡང་དང་ཡང་དུ་ཞུས། སྟོད་ཀྱི་གངས་དཀར་ཏེ་སེ་མན་ཆད་ནས་སྨད་ཀྱི་མཚོ་སྙིང་མ་ཧཱ་དེ་ཝ་ཡན་ཆད་ཀྱི་རི་ཁྲོད་དབེན་པ་བརྒྱ་ཕྲག་དུ་མ་འགྲིམས་ནས་མདོ་སྔགས་གཉིས་ཀྱི་སྙིང་པོ་བྱང་ཆུབ་སེམས་གཉིས། གསང་སྔགས་ཀྱི་རིམ་གཉིས། འོད་གསལ་རྫོགས་པ་ཆེན་པོའི་ཁྲེགས་ཆོད་ཐོད་རྒལ་གཉིས་ལ་ལོ་དུ་མའི་བར་ཏུ་ཉམས་ལེན་བྱས་པས། དེ་དག་དང་མཐུན་པའི་ཡོན་ཏན་མང་བོ་རྒྱུད་ལ་སྐྱེས་པ་བྱུང༌། བྱ་བ་ལས་ཀྱི་འཁོར་ལོ་ལ་སྒྲུབ་འབྲས་ཀྱིས་བསྟན་འགྲོ་ཡོངས་ལ་ཕན་ཕྱིར་དུ་སྐུ་རྟེན་དུ་སྔར་ལྷ་ཁང་བརྒྱ་དང་རྩ་བརྒྱད་བཞེངས་བའི་ཁར། གསུང་རྟེན་ལ་དགོན་པ་གྲོང་ཡུལ་ཆུ་ཁ་རྣམས་སུ་མ་ཎི་ཆོས་འཁོར་ལན་གཅིག་བསྐོར་ན་མ་ཎི་དུང་ཕྱུར་རེ་འགྲོ་བ་དང༌། ལན་ལྔ་དང་བཅུ་བསྐོར་ན་མ་ཎི་དུང་ཕྱུར་ལོངས་པས་ཆོས་འཁོར་ཆེ་ཆུང་བརྒྱ་ཕྲག ཐུགས་རྟེན་དུ་རྡོ་དང་གྱོ་མོག་གིས་བརྩིགས་པའི་མཆོད་རྟེན་ཆེན་པོ་རྨང་གཞི་ལ་ཕྱོགས་རེར་འདོམ་པ་བཅུ་དང་བརྒྱད་ཡོད་པ་དང༌། ལྔ་ཡན་ཆད་ལོངས་པའི་མཆོད་རྟེན་བརྒྱ་ཕྲག་དང༌། རང་དང་གྲྭ་བཙུན་ཡོན་བདག་རྣམས་ལ་སྐུ་འདྲ་དང་ས་ཚ་འདེབས་སུ་བཅུག་ནས་འབུམ་ཁང་ཁོ་ན་སྟོང་ཕྲག་གཅིག་དང༌། རྒྱལ་བའི་གསུང་རབ་ཀྱི་གནད་རྣམས་བསྡུས་པའི་ལེགས་བཤད་གླེགས་བམ་པོ་ཏི་བཅོ་ལྔ་བརྩམས་པ་སོགས་བྱ་བ་ལས་ཀྱི་འཁོར་ལོ་རྒྱ་ཆེན་པོ་བྱས། གཞན་ཡང་རང་གི་སྔོན་གྱི་སེམས་བསྐྱེད་དང་སྨོན་ལམ། དེ་ནས་གྲོང་དགོན་བརྒྱ་ཕྲག་དུ་མར་སོང་ནས། བསྟན་པ་དང་འགྲོ་བ་ཡོངས་ལ་གང་ཕན་བྱས་ཏེ། དེ་ཡང་ལོ་ཉི་ཤུ་རྩ་གཅིག་ནས་བཞི་བཅུའི་བར་ཏུ་གུང་ཚིགས་འཆག་མེད་བྱས། སྨྱུང་གནས་སུམ་བརྒྱ་ལྷག་ཙམ་བསྲུང༌། ཡིག་བརྒྱ་བྱེ་བ་གཅིག་དང༌། མ་ཎི་ས་ཡ་གཅིག་གིས་གཙོ་བྱས་ཁ་ཏོན་བཟླས་བརྗོད་ཀྱང་མང་པོ་བཏོན། ལོ་ཉི་ཤུ་ནས་སུམ་བཅུའི་བར་དུ་རང་དོན་སྒྲུབ་པ་གཙོ་བོ་བྱས། སུམ་ཅུ་ནས་ལྔ་བཅུའི་བར་དུ་གཞན་དོན་གཙོ་བོར་བྱས། སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་གསུམ་ནས། མི་ལོ་དགུ་རེ་ཙམ་བསྡད་ནས་སྐྱོ་ངལ་མེད་པར་འགྲོ་དོན་བྱས། དུས་རྒྱུན་དུ་སྡོམ་གསུམ་གཙང་མ་བྱས་ནས་བསྲུངས། ཤ་ཆང་སྒོག་ཙོང་དུ་བ་རྣམས་གཏན་དུ་སྤངས། ཟས་དཀར་གསུམ་མངར་གསུམ་ཇ་མར་རྩམ་གསུམ་ལ་བརྟེན་ནས། སྟོད་སྨད་བར་གསུམ་ལ་སོང་ཚེ་སྐྱེས་པ་ཕོ་མོ་ཐམས་ཅད་ལ་ནམ་འཆི་ཆ་མེད་ཡིན། དོ་ནུབ་སང་གནངས་ཙམ་ལ་ཡང་ཤི་འགྲོ་ནའང་ཐང་མོད། ལས་རྒྱུུ་འབྲས་རྩི་དགོས། མ་བརྩིས་པར་གློ་བུར་དུ་ཤི་ན་སྡིག་ཅན་རྣམས་དམྱལ་བར་སྐྱེ་ཞིང༌། དགེ་བ་བྱས་པ་རྣམས་མཐོ་རིས་སུ་སྐྱེ་བས་ན། དེའི་ཕྱིར་སྡིག་ལ་འཛེམས་ཤིང་དགེ་ལ་འབད་དགོས་གསུངས། ཁྱད་པར་དུས་དང་རྣམ་པ་ཐམས་ཅད་དུ་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་དགོས། སྡིག་ཟས་ཕ་མ་སེམས་ཅན་གྱི་ཤ་འདི་ཟོས་ན་ཉེས་པ་ཆེ་བས་སྤོང་དགོས་གསུངས། གལ་ཏེ་སྤོང་མ་ཐུབ་ན་རྣམ་གསུམ་དག་པའི་ཤ་མ་གཏོགས། ཤའི་ཆེད་དུ་སྲོག་གཅོད་གཏན་ནས་བྱེད་མི་རུང༌། སྡོམ་པ་དང་དམ་ཚིག་གཙང་མ་ཚུལ་བཞིན་དུ་བསྲུངས་ནས་མདོ་སྔགས་ཟུང་དུ་འབྲེལ་བའི་ཟབ་རྒྱས་ཆོས་ལ་ཐོས་བསམ་སྒོམ་གསུམ་ཚུལ་བཞིན་བྱེད་དགོས་ཞེས་ནན་ཏན་གྱིས་བཤད་པས་ལག་རྗེས་སུ། ཡུལ་སྟོད་སྨད་བར་གསུམ་ནས་ལས་འབྲས་བརྩི་ཞིང་ཚུལ་ཁྲིམས་དང་ལྡན་པ། བསམ་པ་བཟང་ཞིང་གནས་ལུགས་ཀྱི་དོན་རྟོགས་པ། བསྐྱེད་རྫོགས་ཀྱི་ཉམས་ལེན་ལ་རང་བྱན་ཚུད་ཅིང་ཡི་དམ་ལྷའི་ཞལ་མཐོང་བ། གཞན་གྱི་སྐྱིད་སྡུག་ལེགས་ཉེས་ཤེས་ཤིང༌། ཚེ་འདིར་ཐབས་མཁས་བསྡུ་བཞིའི་སྒོ་ནས་འགྲོ་བའི་དོན་བྱས་པས། འཁོར་སྐལ་བཟང་གདུལ་བྱ་མཆོག་དམན་འབྲིང་གསུམ་འདུས་པའི་གྲངས་ལ་བསྟན་འགྲོའི་དོན་ཡོང་བའི་སློབ་མ་བུ་ཆེན་མཁས་ཤིང་གྲུབ་པ་བརྙེས་པ་བརྒྱ་ཕྲག་ལྷག་དང༌། སྔོན་སྦྱངས་ལས་འཕྲོ་ཅན་གྱི་བླ་མ་སྐུ་སྐྱེས་བུ་ཆེན་སློབ་མ་རང་དོན་ཚགས་སུ་ཆུད་ནས། གཞན་བསྟན་འགྲོ་ཡོངས་ལ་ཕན་ཐོགས་པ་བརྒྱ་ཕྲག་དང༌། ནམ་ཡང་ཤ་མི་ཟ་བའི་ཆོས་པ་སྙིང་རྗེ་ཅན་བདག་པས་གཞན་གཅེས་ཀྱི་བྱང་ཆུབ་ཀྱི་སེམས་ལ་བློ་འབྱུང་པ་སུམ་བརྒྱ་ལྷག་དང༌། ཕ་ཡུལ་མི་གཅིག་པ་ཕྱོགས་ཕྱོགས་ནས་འདུས་པའི་ཚེ་བློས་བཏང་གི་སློབ་མ་གྲྭ་བཙུན་རི་ཁྲོད་ཟིན་པ་སྡོམ་པ་དམ་ཚིག་གཙང་བ་སྟོང་དང་བརྒྱད་བརྒྱ་བྱུང༌། གཞན་ཡང་ཕྱག་མཆོད་སྐོར་བ་བཟླས་བརྗོད་ལ་བརྩོན་པའི་དགོན་པའི་དགེ་འདུན་པ་དང༌། ཡི་དམ་ལྷའི་དངོས་གྲུབ་ལ་བརྩོན་པའི་གྲོང་སྔགས་དང༌། བསྙེན་གནས་སྨྱུང་གནས་བསྲུང་ཞིང་མ་ཎི་འདོན་པའི་ཁྱིམ་པ་ཕོ་མོ་བགྲང་ལས་འདས་པ་བྱུང༌། ར་ལུག་གཡག་དང་བྱ་རི་དྭགས་ཁྲི་ཕྲག་འབུམ་ཕྲག་མང་པོ་ཚེ་ཐར་བཏང་བ་དང༌། སྤྲང་སློང་དང་གནས་སྐོར་བ་བཤུལ་རིང་མགྲོན་པོ། ཡུན་རིང་ནད་པ། ནག་ཅན་བཙོན་དུ་བཟུང་བ། ཕན་ཚུན་འཐབ་ནས་གསོད་པ་སོགས། འཆི་ལ་ཉེ་བ་ལྔ་བརྒྱ་ལྷག་ཙམ་གྱི་མི་ཡི་སྲོག་སྐྱོབ་རྒྱུའི་སྐལ་བ་བྱུང༌། མདོ་སྨད་འདིར་འོངས་ནས་ཀྱང༌། ཆོས་འཇིག་རྟེན་རྒྱུ་ནོམ་པ་ཐབས་དུ་མའི་སྒོ་ནས་མི་མང་པོ་གསོད་པའི་སྡེ་འཁྲུག་ཆེན་པོ་བཅོ་བརྒྱད་ཀྱི་དམྱལ་བའི་བང་ཁ་གཏན་པ་སོགས། མདོར་ན་དངོས་སམ་བརྒྱུད་ནས་བསྟན་འགྲོ་ལ་ཕན་ཐོགས་རྒྱ་ཆེན་པོ་བྱུང༌། འགྲོ་དོན་ལ་གང་དུ་འགྲོ་ཡང་ཡིད་ཀྱིས་ཡུལ་ཕྱོགས་མཐོང་ཚད་ལ་བཀྲ་ཤིས་བྱས། རི་ཁྲོད་མཐོང་ཚད་ལ་བྱིན་ཕེབས་བྱས། རྟེན་མཐོང་ཚད་ལ་རབ་གནས་བྱས། མི་མཐོང་ཚད་ལ་དབང་བསྐུར་བྱས། སེམས་ཅན་ཤི་ཚད་ལ་སྨོན་ལམ་བཏབ། གཞན་ཡང་སེམས་ཅན་བདེ་བ་མེད་པ་མཐོང་ན་བྱམས་པ། སྡུག་བསྔལ་ཅན་མཐོང་ན་སྙིང་རྗེ། སྡུག་བསྔལ་མེད་པའི་བདེ་བ་མཐོང་ན་དགའ་བ། ཉེ་རིང་ཆགས་སྡང་ཅན་མཐོང་ན་བཏང་སྙོམས་བསྒོམས་ནས་ངག་ཏུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག ཅེས་བརྗོད་བཞིན་དུ་བྱོན། ཆོས་ལྡན་གྱི་བྱ་བ་གང་བྱས་རྣམས་ཀྱི་མཇུག་ཏུ། ཕན་བདེ་འབྱུང་གནས་སངས་རྒྱས་ཀྱི་བསྟན་པ་དར་ཞིང་སེམས་ཅན་ཐམས་ཅད་ལ་བདེ་སྐྱིད་ཉི་མ་བཞིན་དུ་འཆར་བའི་བསྔོ་བ་སྨོན་ལམ་བཏབ་པའི་མཐུ་ལས། སྤྱྀར་རྒྱལ་ཁམས་ཐམས་ཅད་སྒོས་རང་ཉིད་སོང་བའི་ཡུལ་ཁམས་ཀུན་ལ་ཆར་ཆུ་དུས་སུ་བབས། ལོ་ཕྱུག་རྟག་ཏུ་ལེགས། མི་ནད་ཕྱུགས་ནད་ཆད། ཚེ་དང་བསོད་ནམས་རྒྱས། གནས་སྐབས་ཚེ་འདིར་བདེ་ཞིང་ཕྱི་མར་སྐྱིད་ལ། ནམ་ཕུག་དག་པའི་ཞིང་ནས་མཇལ་ཏེ། སངས་ཡང་མཉམ་པོར་རྒྱ་བའི་སྐལ་བ་བཟང་པོ་བྱུང་བ་ལེགས་སོ། །དེ་ནས་དམ་པ་འདི་ཉིད་དགུང་གྲངས་དོན་གཅིག་པ་རབ་ཡིད་ལྕགས་ཕག་ལོའི་དཔལ་ལྡན་དུས་ཀྱི་འཁོར་ལོའི་ལུགས་ཀྱི་ས་ག་ཟླ་བའི་མར་ངོ་ལ་སྐུ་ལ་སྐྱེ་འཆི་མེད་ན་ཡང་ཐུན་མོང་སྣང་ངོར་གཟུགས་སྐུའི་བཀོད་པ་ཆོས་དབྱིངས་སུ་བསྡུ་བའི་ཚུལ་མཛད་དེ་ཆོས་དབྱིངས་གདོད་མའི་ཀློང་དུ་མནལ་བར་གྱུར་ཏོ། །སྨྲས་པ། སྐྱེས་བུ་མཆོག་རབ་ཕུལ་བྱུང་གང་རྣམས་ཀྱི། །རྟོགས་བརྗོད་ནོར་བུའི་འཕྲིན་ལས་འོད་འཕྲོ་བས། །སངས་རྒྱས་ཀུན་གྱི་བསྟན་པ་ཉིན་མོར་མཛད། །འགྲོ་བ་ཀུན་གྱི་དགོས་འདོད་རེ་བ་བསྐངས། །རྒྱལ་དང་རྒྱལ་སྲས་མཉེས་པའི་ཀུན་བཟང་གི ། མཆོད་སྤྲིན་འདི་ཉིད་དད་ལྡན་སྒྲ་འཛིན་ཡུལ། །ཐོས་པས་སྐལ་ལྡན་དད་གུས་སྤུ་ལོང་གཡོ། །རྣམ་གྲོལ་ཐར་འདོད་དགའ་བའི་གཟིགས་མོར་མཛོད། །བྱ་བཏང་དབེན་པའི་གནས་ལ་ཟབ་ལམ་སྒྲུབ། །ངོ་མཚར་ཚེ་གཅིག་སྐུ་བཞི་རྫོགས་པ་ཡི། །རྣམ་ཐར་ཐོས་པས་བྱ་བཏང་རི་སུལ་ལ། །ཀུན་མཁྱེན་ཚེ་འདིར་བསྒྲུབ་པའི་དགའ་སྟོན་མཛོད། །ཅེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་སྔོན་གྱི་སྐྱེ་རབས་ཀྱི་སྐབས་རྣམ་པར་བཤད་པ་རྫོགས་སོ།། །། ༈ ཕུལ་བྱུང་ཐུགས་བསྐྱེད་དུས་ལས་ཡོལ་མེད་པར། །གང་ལ་གང་འདུལ་བྱེ་བ་ཕྲག་བརྒྱའི་ཞིང༌། །སྤྲུལ་བའི་ཟློས་གར་རྒྱུན་མི་ཆད་པ་ཡི། །བརྩེ་ཆེན་དཔལ་ལྡན་བླ་མས་རྣམ་ཀུན་སྐྱོངས། །
གསུམ་པ་ད་ལྟར་བྱུང་བའི་སྤྲུལ་བའི་རྟོགས་པ་བརྗོད་པ།
གསུམ་པ་ད་ལྟར་བྱུང་བའི་སྤྲུལ་བའི་རྟོགས་པ་བརྗོད་པ་ལ་ལྔ།
གསུམ་པ་ད་ལྟར་བྱུང་བའི་སྤྲུལ་བའི་རྟོགས་པ་བརྗོད་པ་ལ། །དམ་པ་འདི་ཉིད་གཟུགས་སྐུའི་སྐྱེ་བ་མངོན་པར་བཞེས་པའི་ཚུལ། ཤེས་བྱ་ཡོན་ཏན་རྒྱ་མཚོའི་མིང་གཞི་བཙུགས་ཏེ་རབ་ཏུ་བྱུང་ཚུལ། མདོ་སྔགས་རབ་འབྱམས་ལ་ཐོས་བསམ་བྱས་ཏེ་ཐོས་དོན་ཉམས་བཞེས་མཛད་པ། གནས་ངེས་མེད་ལ་སྒྲུབ་པ་གཙོ་བོར་མཛད་ཅིང་སྐལ་ལྡན་གྱི་གདུལ་བྱ་རྗེས་སུ་བཟུང་བའི་སྐབས། རྣམ་བྱང་གི་མཛད་འཕྲིན་རྣམས་རྫོགས་ནས་འགྲོ་རྣམས་ཆོས་ལ་བསྐུལ་ཕྱིར་གཟུགས་སྐུ་ཆོས་དབྱིངས་སུ་བསྡུ་ཚུལ་བཤད་པ་དང་ལྔ། དང་པོ་དམ་པ་འདི་ཉིད་གཟུགས་སྐུའི་སྐྱེ་བ་མངོན་པར་བཞེས་པའི་ཚུལ་ནི། བསྟན་བཅོས་རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ལྷུམས་སུ་འཇུག་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་བ་དང༌། །ངེས་འབྱུང་དཀའ་བ་སྤྱོད་པ་དང༌། །བྱང་ཆུབ་སྙིང་པོར་གཤེགས་པ་དང༌། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་དང༌། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་སྣང༌། །ཞེས་དང༌། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང༌། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་ཏུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་གསུངས་པ་ལྟར་དག་པ་དང་མ་དག་པའི་ཞིང་ཁམས་རབ་འབྱམས་སུ་གཟུགས་སྐུའི་བཀོད་པ་སྒྱུ་མ་དང་མིག་འཕྲུལ་བཞིན་གང་ལ་གང་འདུལ་གྱི་རོལ་གར་ཞིང་ཁམས་ཀྱི་རྡུལ་གྲངས་ལས་འདས་པའི་རྣམ་པར་ཐར་བ་བསམ་གྱིས་མི་ཁྱབ་པ་ཡོད་མོད་ཀྱང༌། སྐབས་འདིར་མི་མཇེད་ཀྱི་ཞིང་འདིར་རྗེ་བཙུན་བླ་མ་དམ་པ་གང་གི་འཕྲིན་ལས་ཀྱི་རོལ་བ་ཚུར་མཐོང་གི་མཐོང་ཐོས་སུ་གྱུར་བ་དག་བརྗོད་པར་བྱ་བའོ། །དེ་ཡང་ཨོ་རྒྱན་འགྲོ་འདུལ་གླིང་བའི་ཞལ་ནས། ཚུལ་ཁྲིམས་ཀྱི་ལྗོན་པའི་ཡལ་འདབ་རྒྱས། །མདོ་སྔགས་ཀྱི་ཆོས་ལ་སྦྱངས་བ་ཐོབ། །ལས་སྤྱོད་པ་མི་དམན་འགྲོ་དོན་འབྱུང༌། །ཚེའི་ཚད་ཀྱང་བརྒྱད་ཅུ་མཐོང་ཙམ་འདུས། །རྫ་རྨ་རྒྱལ་སྒང་དུ་རིག་འཛིན་འགྱུར། །ལས་དབང་བཞི་འཁྱུད་ལ་ཅི་ཆ་ཡོད། །ཅེས་གསུངས་པ་ལྟར་བདག་ཅག་སྐལ་བ་དང་ལྡན་པའི་གདུལ་བྱ་རྣམས་ཀྱིས་མེ་ཏོག་གང་ལ་ཕོག་པའི་ལྷ་སྐལ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་ ༧ རྗེ་བཙུན་བླ་མ་དམ་པ་ངག་དབང་བརྩོན་འགྲུས་དཔལ་བཟང་པོ་མཆོག་ཆོས་ཀྱི་དབྱིངས་ཀྱི་སྐུ་ལས་མ་གཡོས་པར་སྤྲུལ་པའི་ཟློས་གར་འགག་མེད་དུ་གདུལ་བྱ་འདྲེན་པའི་དཔལ་དུ་གཟུགས་སྐུ་མཚན་དཔེའི་ཟླ་བ་མི་ཡི་རྣམ་རོལ་ཏུ་སྒྱུ་འཕྲུལ་དྲྭ་བའི་སྐྱེ་བ་བཞེས་པའི་ཡུལ་ཕུན་སུམ་ཚོགས་པ་ནི། མི་མཇེད་འཇིག་རྟེན་གྱི་ཞིང་ཁམས། འཛམ་གླིང་ཆེན་པོ་དང་ཆུང་ངུ་གཉིས་ལས་ལྷོ་འཛམ་བུ་གླིང༌། སྐལ་བ་བཟང་པོའི་སངས་རྒྱས་སྟོང་གི་ཞབས་ཀྱིས་བཅགས་པའི་གནས་མཆོག་རྡོ་རྗེ་གདན་གྱི་བྱང་ཕྱོགས། བསིལ་ལྗོངས་ནོར་འཛིན་མཆོག་གི་ཐིག་ལེ་རབ་དཀར་ཁ་བ་འཁྲིགས་པའི་ཀེ་ལ་ཤའི་ས་འཛིན་གྱི་ཕྲེང་བ་ཆུ་ཤེལ་ཞུན་མའི་གངས་རིའི་ར་བས་ཀུན་ནས་བསྐོར་བ། འཕགས་མཆོག་ཕྱག་ན་པད་མོའི་གདུལ་ཞིང༌། མདོ་ཁམས་སྨད་ཀྱི་ཆར་གཏོགས། མགོ་ལོག་ཨ་སྐྱོང་འབུམ་གྱི་ས་ཆ། ད་ལྟ་དགའ་བདེ་རྫོང་གི་ཆར་གཏོགས། ཨ་མྱེ་རྨ་རྒྱལ་སྤོམ་རའི་ཤར་ཕྱོགས། གཉན་པོ་གཡུ་རྩེའི་ནུབ་བྱང༌། རྨ་ཀླུང་དལ་གྱིས་འབབ་པའི་བྱང་གི་ཕྱོགས། གླིང་རྗེ་གེ་སར་རྒྱལ་བོའི་སའི་ཆར་གཏོགས་པ། ཨ་ཁུ་ཁྲོ་ཐུང་གི་མཁར་དུ་གྲགས་པའི་ཉེ་བའི་སར་ཁོ་ཁོག་ར་གཉིས་བྲག་དཀར་ཞེས་པའི་དགེ་བཅུ་མ་ལུས་པར་ཚང་བ། དེའི་ཕྱོགས་དང་ཕྱོགས་མཚམས་རྣམས་སུ་དགའ་ཞིང་ཉམས་དགའི་སྐྱེད་མོའི་ཚལ་དང༌། མེ་ཏོག་དང་སྤང་ལྗོངས་སྣ་ཚོགས་པའི་ཁ་དོག་གི་བྱེ་བྲག་རྣམ་པར་བཀྲ་བའི་མཛེས་ལྗོངས། ཉེ་བར་གནས་པའི་འདབ་ཆགས་སྣ་ཚོགས་ཀྱིས་གྲེ་འགྱུར་སྙན་དབྱངས་ཀྱི་རོལ་མོ་བར་མེད་དུ་འཁྲོལ་བ། ཁྲུས་ཀྱི་རྫིང་བུ་དང༌། མཚོ་དང༌། མཚེའུ་སོགས་ཡན་ལག་བརྒྱད་ལྡན་གྱི་ཆུས་ཕྱོགས་དང་ཕྱོགས་མཚམས་རྣམས་སུ་ཉེ་བར་མཛེས་པ། དེར་གནས་པའི་སྐྱེ་འགྲོ་རྣམས་སྡེ་བཞིའི་དཔལ་གྱི་ཡོན་ཏན་གྱི་རྩེ་དགའ་ལ་རོལ་བའི་གནས་མཆོག་དེར། རིགས་རུས་ཕུན་སུམ་ཚོགས་པ་ནི། སྤྱིར་ནང་བ་སངས་རྒྱས་པ་ལ་རིགས་རུས་མི་གཙོ་བར་བསླབ་པ་རིན་པོ་ཆེ་གཙོ་བ་ཡིན་ལ། འོན་ཀྱང་བསྟན་བཅོས་མངོན་རྟོགས་རྒྱན་ལས། མངལ་དུ་འཇུག་པ་མཆོག་དང་ནི། །རིགས་དང་རུས་དང་ཆོ་འབྲང་དང༌། །འཁོར་དང་སྐྱེ་བ་དག་དང་ནི། །ངེས་འབྱུང་བྱང་ཆུབ་ཤིང་རྣམས་དང༌། །ཡོན་ཏན་ཕུན་སུམ་ཚོགས་པ་ཡིན། །ཞེས་གསུངས་པ་བཞིན་བདག་ཅག་སྟོན་པ་མཉམ་མེད་ཐུབ་པའི་དབང་པོ་ཡང་རིགས་རུས་ཕུན་སུམ་ཚོགས་པར་སྐྱེ་བ་བཞེས་པ་བཞིན་རྗེ་བཙུན་བླ་མ་འདི་ཉིད་ཨ་སྐྱོང་གོང་མའི་བློན་ཀ་བཞི་གདོང་བརྒྱད་ཡོད་པའི་ནང་ཚན་ཨ་ལྕགས་འབྲིའི་རིགས་བརྒྱུད་ལས་ཆད་པའི་སྒང་བའི་རིགས་རྒྱུད་དུ་གཏོགས་པ། དཔའ་མཛངས་སྟོབས་རྩལ་རྫོགས་པ། མི་ཆོས་ལ་བློ་མིག་རྒྱས་པ། ལྷ་ཆོས་ལ་གུས་འདུད་ཆེ་བའི་ཡབ་སྒང་བ་ཀར་དགེ་ཞེས་པ་དང༌། ཡུམ་གཡོ་སྒྱུ་སོགས་བུད་མེད་ཀྱི་སྐྱོན་ལས་གྲོལ་བ། དད་པ་དང་བྱམས་བརྩེ་ལྡན་པའི་རྣམ་དཀར་དགེ་བའི་ལས་ལ་གཞོལ་བའི་རྒྱུག་ཟ་མཛེས་དགའ་ཞེས་པ་གཉིས་ལ་སྲས་ཁྱད་པར་དུ་འཕགས་པ་གསུམ་འཁྲུངས་པའི་ཆེ་བ་ཉིད་དུུ༌། རབ་རྒྱལ་མེ་ཡོས་ལོ། སྤྱི་ལོ་༡༩༢༧ ལོ། ཕུག་ལུགས་ལྟར་ན་རིགས་ལྡན་ཉེར་གཅིག་པ་མ་འགགས་པ་ཁྲིར་འགོད་པའི་ལོ། གཟའ་སྐར་ཕུན་སུམ་ཚོགས་པའི་ཉིན་ལ། འགྲོ་བ་ཀུན་གྱི་མ་འདྲིས་པའི་མཛའ་བཤེས་ཆེན་པོ་ཀུན་སྤངས་བྱ་བཏང་བ་རྣལ་འབྱོར་གྱི་དབང་ཕྱུག་ཆེན་པོ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་བརྗོད་ན་ ༧ རྗེ་བཙུན་བླ་མ་བློ་བཟང་ཐུབ་བསྟན་ཉི་མའམ་ངག་དབང་བརྩོན་འགྲུས་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་དཔལ་བཟང་པོ་མཆོག་ཉིད་གཟུགས་སྐུ་མཚན་དཔེའི་མྱུ་གུ་གསར་བ་དགེ་ལེགས་ཀྱི་མཚན་མ་དང་བཅས་ཏེ་མངོན་པར་བཞད་ལ། དེའི་ཚེ་སྐལ་བ་དང་ལྡན་པའི་གདུལ་བྱ་རྣམས་ཀྱི་ཐར་བའི་ལམ་བཟང་གསལ་བའི་སྒྲོན་མེའི་མཚན་དཔེའི་ལང་ཚོ་རབ་ཏུ་རྒྱས་པའི་འོད་སྣང་གིས་དཀར་བོའི་ཕྱོགས་ལ་གནས་པའི་ལྷ་རྣམས་ཀྱིས་མེ་ཏོག་སིལ་མའི་ཆར་བསྙིལ་ཞིང་བསྔགས་བརྗོད་ཀྱི་རོལ་མོ་འབུམ་དུ་ཁྲོལ་ཏེ་དེ་དག་གི་ཡིད་ལ་བདེ་བ་སྟེར་བའི་སྨན་མཆོག་བདུད་རྩིའི་གཟི་འོད་རྒྱས་པར་གྱུར། དམ་པ་འདི་ཉིད་སྐུ་འཁྲུངས་བ་ལ་ཉེ་བའི་ཆར་ཡུམ་གྱི་གཟིམ་ལམ་དུ་མཛེས་སྡུག་དང་ལྡན་པའི་རི་བོ་ཆེན་པོ་ཞིག་གི་རྩེ་མོ་ལས་འོད་སྟོང་དང་ལྡན་པའི་ཉི་མ་གསུམ་རིམ་གྱིས་ཤར་བ་སོགས་རྨི་ལམ་གྱི་མཚན་ལྟས་ཡ་མཚན་དུ་མ་བྱུང་ལ། དེ་ཡང་རྨི་ལྟས་འདི་ནི་སྲས་ཆེ་བ་རྗེ་བཙུན་བླ་མ་འདི་ཉིད་དང༌། འབྲིང་བ་རྣལ་འབྱོར་བ་རིན་ཆེན་གྲགས་དང༌། ཆུང་བ་ཀུན་སྤངས་བ་འདྲེན་མཆོག་གསུམ་གྱི་སྐྱེ་བའི་ལང་ཚོ་མངོན་པར་བཞད་པའི་དགེ་ལེགས་ཀྱི་མཚན་མ་ཡིན་པར་སྣང་ངོ༌། །རྗེ་བཙུན་བླ་མ་འདི་ཉིད་ནི། ཇི་སྐད་དུ། ཆོས་བཅུ་བའི་མདོ་ལས། བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་དང༌། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང༌། །མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་པར་བྱ། །ཞེས་གསུངས་པ་ལྟར་བྱིས་པ་གཞན་ལས་ཁྱད་པར་དུ་འཕགས་པ། མཆོག་གསུམ་ལ་དད་གུས་དང༌། ཉམ་ཆུང་ལ་བྱམས་བརྩེ་དང༌། འགྲོ་བ་སྡུག་བསྔལ་ཅན་མཐོང་ཚེ་སྤྱན་ཆབ་བསིལ་བ། བླ་མ་དང་དགེ་འདུན་ལ་ལྷག་པར་དགའ་དད་ལྡན་པ་སོགས་བྱང་ཆུབ་སེམས་དཔའི་རྟགས་མཚན་ཁྱད་པར་ཅན་དང་ལྡན་པ་ཀུན་ལ་ཐུན་མོང་དུ་གྲགས་ཤིང་གྲུབ་པའི་སྐྱེས་བུ་ཞིག་ལགས་སོ། །སྨྲས་པ།མི་མཇེད་འཇིག་རྟེན་འཛམ་གླིང་ཆུང་ངུ་ཡི། །སྐལ་བཟང་སངས་རྒྱས་བྱོན་པའི་བྱང་གི་ཕྱོགས། །འཕགས་མཆོག་མིག་མི་འཛུམ་གྱི་གདུལ་བྱའི་ཞིང༌། །མདོ་སྨད་གསེར་ལྡན་འཛིན་མའི་ཡིད་དགའི་གནས། ། རིགས་རུས་ཕུན་སུམ་ཚོགས་པའི་མངལ་བཟུང་ནས། །སྲིད་པའི་རྟེན་བཟང་ལྷ་ལས་ཕུལ་བྱུང་བའི། །ངོ་མཚར་མཚན་དཔེའི་ལང་ཚོའི་གཟི་དཔལ་བཞད། །སྤྲུལ་བའི་ཟློས་གར་རོལ་བ་བགྲང་ལས་འདས། ། དཀར་ཕྱོགས་ལྷ་རྣམས་ཡིད་ཀྱི་དགའ་བའི་ཚལ། །སྐལ་བཟང་སྙིང་གི་ཚ་གདུང་འཇོམས་པའི་གཉེན། །བློ་ལྡན་རིགས་བཟང་མཐོང་ན་དགའ་བ་ཡི། །སྒྱུ་འཕྲུལ་ཕ་མཐའ་སུ་ཡིས་གཞལ་བར་ནུས། །ཞེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་གཟུགས་སྐུ་སྐྱེ་བའི་སྐབས་རྣམ་པར་བཤད་པ་རྫོགས་སོ།། །། ༈ སྒོ་གསུམ་ཉེས་སྤྱོད་སྡོམ་པའི་ཁྲིམས་ལྡན་ཞིང༌། །ཕ་རོལ་ཕྱིན་དྲུག་བདུད་རྩིའི་ཆུ་གཏེར་ལ། །འགྲོ་རྣམས་ཚ་གདུང་ཞི་ཕྱིར་རབ་འཇུག་པའི། །རྒྱལ་སྲས་སྙིང་སྟོབས་ལྡན་པ་ཕྱག་གི་ཡུལ། །གཉིས་པ་ཤེས་བྱ་ཡོན་ཏན་རྒྱ་མཚོའི་རྨང་གཞི་བཙུགས་ཏེ་རབ་ཏུ་བྱུང་ཚུལ་བཤད་པ། དེ་ནས་དགུང་ལོ་བརྒྱད་པར་སྤྱི་ལོ༡༩༣༤ལོ། རབ་རྒྱལ་དངོས་པོ་ཞེས་པ་ཤིང་ཁྱི་ལོར་རྣམ་དཀར་དགེ་ལེགས་ཐམས་ཅད་ཀྱི་དབུ་ཚུགས་པའི་རྟེན་འབྲེལ་གྱི་ཐོག་མ་ལ། མ་ཧཱ་གུ་རུའི་ཐུགས་སྤྲུལ་དུ་གྲགས་པ་གཙང་སྐོར་གྲུབ་ཐོབ་བྱམས་པ་ཆོས་འཛིན་གྱི་དངོས་སློབ་རྗེ་བཙུན་དམ་པ་འདི་ཉིད་ཀྱི་ཁུ་བོ་སྒང་བ་བླ་མ་བསོད་ནམས་རིག་འཛིན་མཆོག་གི་སྐུ་དྲུང་ནས་བློ་གྲོས་ཡོན་ཏན་ཀུན་གྱི་གཞི་རྟེན་དབྱངས་དང་གསལ་བྱེད་སྦྱོར་ཀློག་དང་རང་ཡུལ་གྱི་སྲོལ་དང་མཐུན་པར་འདོན་ཆ་དུ་མ་དང༌། སྒྲ་སྙན་ངག་སོགས་ལ་དཀའ་ཚེགས་མེད་པར་ཐུགས་ལ་བྱང་ཆུབ་པར་མཛད་དེ་བྱིས་པ་སློབ་གྲོགས་གཞན་རྣམས་ལས་ཁྱད་པར་དུ་འཕགས་པའི་རྣམ་དཔྱོད་དང་ལྡན་པར་རྩོད་མེད་དུ་གྲགས་པ་བྱུང༌། དེ་ཡང་དཔེར་ན་ཨ་སྐྱོང་གོང་མ་ཚང་གི་སྤྱིའི་རིམ་གྲོ་ཚོགས་དུས་སུ་བྱང་འདྲེན་པ་པད་ནག་མགར་སྐོར་རྐང་དོན་གྱིས་བཀའ་བརྒྱད་གསང་བ་ཡོངས་རྫོགས་ཀྱི་ཆོ་གའི་འདོན་རིམ་ནོར་ནས་འདོན་པ་ཆད་ཚེ་རྗེ་བཙུན་དམ་པ་འདི་ཉིད་ཀྱིས་གསུང་གདངས་མཐོན་པོས་ཏིང་འཛིན་རྒྱལ་པོ་རྣམ་གསུམ་རོལ་བ་ལས། ཞེས་གཞལ་ཡས་ཁང་བསྟོད་པ་ཐུགས་ཐོག་ནས་ཤར་མར་གསུངས་པས་གཞོན་ནུ་སྐྱེས་སྟོབས་ཀྱི་ཤེས་རབ་ཕུལ་བྱུང་དང་ལྡན་ཞེས་ཀུན་གྱིས་བསྔགས་བརྗོད་ཀྱི་རོལ་མོ་འཁྲོལ། དེ་ནས་དགུང་ལོ་བཅུ་བཞི་པ་ལ་འཁོར་བ་ལ་ངེས་པར་འབྱུང་བའི་བསམ་པ་དང༌། གཞན་ཕན་བྱང་ཆུབ་སེམས་ཀྱིས་ཀུན་ནས་བསླངས་ཏེ། ཁྲག་འཐུང་བདུདའཇོམས་རྡོ་རྗེའི་དངོས་སློབ་རྟོགས་པའི་དབང་ཕྱུག་ཝ་ཤུལ་བསོད་ནམས་མཁས་གྲུབ་ནོར་བུ་མཆོག་གི་ཞབས་ཀྱི་པད་མོ་སྤྱི་བོའི་མཛེས་རྒྱན་དུ་བཀོད་ནས། འོད་གསལ་རྫོགས་པ་ཆེན་པོའི་སྔོན་འགྲོ་སྐྱབས་འགྲོ་འབུམ་དང༌། སེམས་བསྐྱེད། ཡིག་བརྒྱ་འབུམ་དང༌། མཎྜལ། བླ་མའི་རྣལ་འབྱོར་སོགས་ལ་ལོ་གཅིག་ཉམས་བཞེས་མཛད། དེ་ནས་དགུང་ལོ་བཅོ་ལྔ་བ་ལ་ཟབ་ཆོས་ཞི་ཁྲོ་དགོངས་པ་རང་གྲོལ་ལས་རྫོགས་རིམ་བར་དོ་དྲུག་ཁྲིད་ལ་ཉམས་ལེན་གནད་སྨིན་མཛད་ལ། དེའི་བརྒྱུད་རིམ་ནི། ཐོག་མའི་མགོན་པོ་ཆོས་སྐུ་ཀུན་ཏུ་བཟང་པོ་ནས། བཀའ་བབས་བདུན་ལྡན་པད་མ་མདོ་སྔགས་གླིང༌། ངག་གི་དབང་བོ་པད་མ་བསྟན་འཛིན་དང༌། རྟོགས་པའི་དབང་ཕྱུག་ཝ་ཤུལ་བསོད་ནམས་མཁས་གྲུབ་ནོར་བུ་མཆོག་གི་བར་དང༌། དེས་རྗེ་བཙུན་བླ་མ་འདི་ཉིད་ལ་གནང་བའོ། །དེ་ནས་ལོ་བཅུ་དྲུག་པ་ལ། རྫོགས་ཆེན་རྩ་རླུང་རྒྱབ་ཆོས་བཅས་གསན་ནས་ཐུན་བཞིའི་སྒོ་ནས་རིག་པ་སྐྱེ་མེད་ཀྱི་དོན་ལ་མཉམ་པར་བཞག་སྟེ་བསྒོམས་ནས་ཉམས་རྟོགས་ཀྱིས་ཀློང་བརྡོལ་བར་གྱུར་ཏོ། །དཔལ་ལྡན་བླ་མ་དམ་པ་ཝ་ཤུལ་བསོད་ནམས་མཁས་གྲུབ་མཆོག་གིས་བུ་ཆུང་འདི་བློ་གྲོས་ཆེ་ཞིང་བརྩོན་འགྲུས་དང་ལྡན་པས་གཞན་ལས་ཁྱད་དུ་འཕགས་པ་ཞིག་ཡིན་པས་གྲྭ་ས་ཆེན་པོ་ཞིག་ལ་སོང་ན་བསྟན་པ་དང་སེམས་ཅན་ལ་ཕན་ཐོགས་ངེས་ཞིག་འདུག་ཅེས་གསུངས་པ་ལྟར་རྗེ་ཉིད་ཀྱི་ཁུ་བོ་བླ་མ་བསོད་ནམས་རིག་འཛིན་གྱི་ཐུགས་བཞེད་ལྟར། སྤྱི་ལོ༡༩༤༣། རབ་རྒྱལ་ཆུ་ལུག་ལོ། དམ་པ་འདི་ཉིད་དགུང་ལོ་བཅུ་བདུན་པ་ལ་འབྲང་ངམ་རྡོ་ཀར་མའི་མདར་མཚམས་པ་བ་སྨོན་ལམ་དཔལ་བཟང་པོ་མཆོག་གི་ཆོས་སྡེ་ཆེན་པོ་དེར་བྱོན་ནས་རྣལ་འབྱོར་གྱི་དབང་ཕྱུག་ཆེན་པོ་མཚམས་པ་བ་སྨོན་ལམ་བཟང་པོ་དང་མཇལ་ཏེ་བླ་མ་དམ་པ་དེས་ཐུགས་དགྱེས་པའི་སྒོ་ནས་སྐལ་ལྡན་གྱི་སློབ་མར་དགོངས་ཏེ་རྗེས་སུ་བཟུང་བར་མཛད། དེ་ནས་ཇི་སྐད་དུ། མདོ་ལས། གང་དག་ཁྱིམ་ན་གནས་པར་བྱེད་བཞིན་དུ། །བྱང་ཆུབ་དམ་པ་མཆོག་ནི་ཐོབ་པ་ཡི། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པ་ན་མི་འབྱུང་གནས་པ་མེད། །ཞེས་དང༌། ཇི་སྐད་དུ། བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་དང༌། ཇི་སྐད་དུ། ཚུལ་གནས་ཐོས་དང་བསམ་ལྡན་པའི། །སྒོམ་པ་ལ་ནི་རབ་ཏུ་སྦྱོར། །ཞེས་དང༌། ཆོ་འཕྲུལ་ཆེན་པོའི་མདོ་ལས། ཁྱིམ་གྱིས་སྐྲག་སྟེ་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །ཞེས་དང༌། སྐྱེས་རབས་ལས། གལ་ཏེ་ཆོས་སྤྱོད་ཁྱིམ་པའི་བསོད་ནམས་འཆོར། །ཁྱིམ་ལ་ཕྱོགས་པ་ཆོས་ཀྱང་ག་ལ་འགྲུབ། །དེ་བས་ཆོས་དང་འགལ་བའི་སྐྱོན་མེད་ཕྱིར། །བདག་ལ་ཕན་འདོད་སུ་ཞིག་ཁྱིམ་ན་གནས། །ཞེས་དང༌། ཚུལ་ཁྲིམས་ཡང་དག་པར་ལྡན་པའི་མདོ་ལས། ཚུལ་ཁྲིམས་ལྡན་པ་སངས་རྒྱས་འབྱུང་དང་འཕྲད། །ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག །ཅེས་གསུངས་པ་ལྟར་རྒྱལ་བ་སྲས་དང་བཅས་པའི་བསྟོད་བསྔགས་པད་མ་དཀར་བོ་རྣམ་པར་འཐོར་བའི་གཞི་རྟེན། ཡོན་ཏན་མ་ལུས་པའི་གཞི་རྟེན་དུ་གྱུར་བ། རྒྱལ་བསྟན་ལ་འཇུག་པའི་འཇུག་ངོགས་དམ་པ་ནི་སོ་སོར་ཐར་བའི་ཚུལ་ཁྲིམས་ཀྱི་སྡོམ་པ་ཉིད་ཡིན་ལ། དེ་ཡང་ཇི་སྐད་དུ། འདུལ་བ་མདོ་རྩ་ལས། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་གསུངས་པ་བཞིན་དུ་འཁོར་བའི་བཙོན་རར་འཆང་བའི་ཁྱིམ་གྱི་བདེ་བ་སོགས་ལ་མེ་མ་མུར་གྱི་འོབས་ལྟར་མཐོང་ནས་དེ་ལས་ཐར་འདོད་ཀྱི་ངེས་འབྱུང་གི་བསམ་པས་ཟིན་པར་བྱས་ནས། ཇི་སྐད་དུ། སུམ་བརྒྱ་པ་ལས། ཁྲིམས་དང་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང༌། །ཆོས་དང་ཟང་ཟིང་ཕན་འདོགས་ལ་བརྩོན་པ། །དུས་སུ་འདོམས་པ་དེ་ལྟར་བླ་མར་བསྔགས། །ཞེས་གསུངས་པ་ལྟར་ཆོས་འདུལ་བ་ལས་བླ་མའི་མཚན་ཉིད་བསྟན་པ་ལྟར་བརྟན་མཁས་ཀྱི་ཡོན་ཏན་གཉིས་དང་ལྡན་པ་སོགས་ཡོན་ཏན་རིན་པོ་ཆེས་ཐུགས་རྒྱུད་ཕྱུར་བུར་གཏམས་པ། འཕགས་པ་ཉེ་བར་འཁོར་དང་གཉིས་སུ་མ་མཆིས་པ་མཚམས་པ་བ་སྨོན་ལམ་དཔལ་བཟང་པོ་མཆོག་གི་མདུན་ནས་མཐུན་རྐྱེན་སྡོམ་པ་སྐྱེ་གནས་མཛེས་པ་སོགས་ཀྱི་བར་ཆད་དང་བྲལ་ཞིང༌། བསམ་པ་ཕུན་ཚོགས་སྡོམ་པ་ལེན་འདོད་དང་ངེས་འབྱུང་གི་བསམ་པ་དང་ངེས་པ་ལྔ་དང་བྲལ་བའི་སྒོ་ནས་རབ་བྱུང་དང་དགེ་ཚུལ་གྱི་སྡོམ་པ་ལེགས་པར་མནོས་ནས་ཆོས་འདུལ་བའི་བགོ་སྐལ་དུ་ཐོབ་པའི་སྐལ་བ་དང་ལྡན་པ་ཅན་དུ་གྱུར་ཏོ། །མཚན་ལ་ངག་དབང་བརྩོན་འགྲུས་ཞེས་གསོལ། དེ་ནས་ཇི་སྐད་དུ། ཁམས་གསུམ་ཀུན་ཏུ་ཡིད་འོང་དྲི་བསུང་སྟེ། །རབ་ཏུ་བྱུང་དང་མི་འགལ་བྱུག་པ་ཡིན། །ཆ་ལུགས་མཐུན་ཡང་ཚུལ་ཁྲིམས་ལྡན་གྱུར་ན། །མི་ཡི་ནང་ན་དེ་ནི་འཕགས་པར་འགྱུར། །ཞེས་དང༌། ཇི་སྐད་དུ། ཚུལ་ཁྲིམས་ཉེས་སྐྱོན་དྲི་མ་འཁྲུད་པའི་ཆུ། །ཉོན་མོངས་ཚ་གདུང་སེལ་བའི་ཟླ་བའི་འོད། །སྐྱེ་དགུའི་དབུས་ན་ལྷུན་པོ་ལྟ་བུར་བརྗིད། །སྟོབས་ཀྱིས་སྡིག་པ་མེད་ཅིང་འགྲོ་ཀུན་འདུད། །དེ་ལྟར་ཤེས་ནས་ཡང་དག་བླང་བའི་ཁྲིམས། །དམ་པ་རྣམས་ཀྱི་མིག་བཞིན་སྲུང་བར་མཛད། །ཅེས་གསུངས་པ་ལྟར་ཚུལ་ཁྲིམས་སྲུང་བའི་ཕན་ཡོན་ཐུགས་ལ་འཆང་སྟེ་ཕྱིའི་རྐྱེན་གནས་ཀྱི་བླ་མ་ཚུལ་བཞིན་དུ་བསྟེན་ནས་ཆོས་འདུལ་བའི་བསླབ་བྱ་རྣམས་ཞིབ་པར་དྲིས་ཏེ་ཚུལ་བཞིན་དུ་སྲུང་བ་དང༌། ཆོས་འདུལ་བའི་བསླབ་བྱ་རྣམས་དྲན་ཤེས་བག་ཡོད་ཀྱི་ནང་གི་རྐྱེན་བསམ་པ་ཕུན་སུམ་ཚོགས་པ་ལ་བརྟེན་ནས་སྲུང་བ་དང༌། མི་མཐུན་ཕྱོགས་ངོ་ཤེས་པས་སྒོ་ནས་སྡོམ་པ་མིག་འབྲས་བཞིན་སྲུང་བར་བྱས་སོ། །སྨྲས་པ། སྐྱེས་སྟོབས་མི་དམན་བློ་གྲོས་འདབ་གཤོག་གིས། །མིང་ཚིག་སྦྱོར་བ་སྒྲ་སྙན་སྡེབ་སྦྱོར་སོགས། །ཀུན་གསལ་མཐའ་ལ་བགྲོད་པའི་རྩལ་རྫོགས་ནས། །ཀུན་གྱིས་བསྔགས་བརྗོད་རོལ་མོ་བྱེ་བས་མཛེས། ། ཀུན་ཏུ་བཟང་པོའི་དགོངས་བའི་སྙིང་པོ་མཆོག ། སྔ་འགྱུར་ཐེག་པ་རིམ་དགུ་ཨ་ཏི་ལས། །རྫོགས་པ་ཆེན་པོའི་དལ་འབབ་ཆུ་ཀླུང་ཆེ། །མ་ལུས་ཧུབ་ཀྱིས་འཐུང་བའི་འདྲེན་པ་མཆོག ། ངེས་འབྱུང་བྱང་ཆུབ་སེམས་ཀྱི་རླུང་གཡོས་ནས། །རྣམ་གྲོལ་བ་དན་སྲིད་པའི་རྩེ་མོར་བསྒྲེངས། །རྣམ་དག་ཚུལ་ཁྲིམས་ཙན་དན་ལྗོན་པ་ཡི། །དྲི་ངད་ལྡང་བའི་ངུར་སྨྲིག་འཛིན་པའི་རྒྱན། ། ཞེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་ཤེས་བྱ་ཡོན་ཏན་རྒྱ་མཚོའི་རྨང་གཞི་བཙུགས་ཏེ་རབ་ཏུ་བྱུང་ཚུལ་བཤད་པའི་སྐབས་རྣམ་པར་བཤད་པ་རྫོགས་སོ།། །། ༈ རྒྱུད་ཀྱི་མཐར་ཐུག་གཉིས་མེད་རྒྱུད་རྒྱལ་མཆོག ། དེ་ཡི་དགོངས་དོན་རིམ་གཉིས་རྣལ་འབྱོར་ལམ། །ལེགས་པར་འདོམས་མཛད་བཤེས་གཉེན་དམ་པ་ལ། །བྱང་ཆུབ་བར་དུ་འབྲལ་མེད་གཙུག་ན་རྒྱལ། །གསུམ་པ་མདོ་སྔགས་རབ་འབྱམས་ལ་ཐོས་བསམ་བྱས་ཏེ་ཐོས་དོན་ཉམས་བཞེས་མཛད་པ་ལ། རྡོ་རྗེ་ཐེག་པའི་ཚུལ་སོགས་ལ་སློབ་པ་དང༌། བསྙེན་པར་རྫོགས་པ་དགེ་སློང་གི་དངོས་པོ་ལེགས་པར་བཞེས་ཤིང༌། དམ་པ་རྣམས་ལས་ཟབ་རྒྱས་ཆོས་ཀྱི་བདུད་རྩི་མནོས་ཏེ་ཐོས་པའི་དོན་རྣམས་རང་གིས་རྩེ་གཅིག་ཉམས་སུ་བཞེས་ཤིང་གདུལ་བྱ་གཞན་དག་ལ་ཡང་འདོམས་པར་མཛད་ཚུལ་སོགས་ལས་བརྩམས་ཏེ་བརྗོད་པ་ལ་ཐོག་མར་སྤྱི་ལོ༡༩༤༣། རབ་རྒྱལ་ཆུ་ལུག་ལོ། དམ་པ་འདི་ཉིད་དགུང་ལོ་བཅུ་བདུན་པའི་ལོ་དེར་དཔལ་ལྡན་བླ་མ་དེ་ཉིད་ཀྱིས་དཔལ་ལྡན་རྒྱལ་བ་ཇོ་ནང་བའི་མེ་ཏོག་གང་ལ་ཕོག་པའི་ལྷ་སྐལ་དང་བོའི་སངས་རྒྱས་དཔལ་དུས་ཀྱི་འཁོར་ལོའི་གསང་ཆེན་རྡོ་རྗེ་ཐེག་པའི་རིམ་གཉིས་ཟབ་མོའི་ཉེ་ལམ་མཐར་ཐུག་པའི་གསང་ཆེན་ཆོས་ཀྱི་མཛོད་ཀློང་གི་སྒོ་ཕར་ཕྱེ་བར་དགོངས་ཏེ་སྐལ་བ་དང་ལྡན་པའི་སློབ་མར་གཟིགས་ནས་ཐོག་མར་སེམས་རྒྱུད་སྦྱོང་བའི་ཐབས་སྔོན་དུ་འགྲོ་བའི་ཆོས་རྣམ་པ་ལྔའི་དམིགས་ཁྲིད་ལེགས་པར་གསུངས་ཏེ། རྗེ་བཙུན་བླ་མ་འདི་ཉིད་ཀྱིས་གསན་བསམ་ཚུལ་བཞིན་དུ་བྱས་ལ། དེ་ཡང་དང་པོར་སྐྱབས་འགྲོ་ནི་ནང་བ་སངས་རྒྱས་པའི་བསྟན་པ་ལ་འཇུག་པའི་སྒོ་གཅིག་པུར་གྱུར་པ་ཡིན་པས། དེ་རྒྱུད་ལ་སྐྱེས་ན་ནང་བ་སངས་རྒྱས་པའི་བསྟན་པའི་སྒོར་ཆུད་པ་དང༌། དེ་རྒྱུད་ལ་མ་སྐྱེས་ན་བསྟན་པའི་སྒོར་མི་ཆུད་པར་དགོངས་ནས་སྐྱབས་འགྲོ་ལ་ཚུལ་བཞིན་དུ་འཇུག་ལ། དེ་ཡང་ཇི་སྐད་དུ། སྐྱབས་འགྲོའི་ངོ་བོ་ཨི་ཐི་བ། །བདག་ཉིད་ལྷག་པར་འཇིགས་པ་དང༌། །དཀོན་མཆོག་སྐྱོབ་པའི་ནུས་ལྡན་དུ། །ཤེས་ལས་བྱུང་བའི་སྐྱབས་འགྲོ་ལ། །ཐམས་ཅད་མཁྱེན་པ་ཁྱོད་ཉིད་བཞེད། །ཅེས་གསུངས་པ་ལྟར་རང་གཞན་གྱི་འཁོར་བའི་སྡུག་བསྔལ་ལ་འཇིཊ་པ་དང༌། སྡུག་བསྔལ་དེ་ལས་སྐྱོབ་པའི་ནུས་པ་དཀོན་མཆོག་རིན་པོ་ཆེ་རྣམ་པ་གསུམ་ལ་ཡོད་པར་ཡིད་ཆེས་པའི་སྐྱབས་འགྲོའི་རྒྱུ་གཉིས་སྔོན་དུ་སོང་བར་བྱས་ནས། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་བ་འདོད་པ་རྣམས་ཀྱི་སྐྱབས། །ཞེས་པ་ལྟར་འཇིག་རྟེན་པའི་ལྷ་སོགས་ནི་རང་ཉིད་འཁོར་བའི་འཆིང་བ་ལས་མ་གྲོལ་བས་གཞན་འཁོར་བའི་འཇིགས་པ་ལས་ག་ལ་སྐྱོབ་ནུས། དེས་ན་ཐར་བ་འདོད་པ་རྣམས་ཀྱི་སྐྱབས་ནི་མཆོག་གསུམ་ཉིད་དུ་ངེས་པས་སྐྱབས་འགྲོའི་ངག་ཚིག་དང་ལུས་ཀྱི་ཕྱག་རེ་སྦྲགས་ནས་ཕྱག་གྲངས་འབུམ་ལྷག་བཅས་དཀའ་ངལ་སོགས་ཁྱད་དུ་བསད་ནས་ལམ་གྱི་ཡོན་ཏན་ཐམས་ཅད་སྐྱེ་བའི་གཞི་རྩ་སྐྱབས་འགྲོ་རྣམ་དག་གིས་རྒྱུད་ལེགས་པར་སྦྱང་བར་བྱས་པའོ། །དེ་ནས་ཐེག་པ་ཆེན་པོའི་འཇུག་སྒོ་བྱང་ཆུབ་སེམས་བསྐྱེད་རང་རྒྱུད་ལ་ཡོད་ན་རང་ཉིད་ཐེག་པ་ཆེན་པོ་པ་ཡིན་པ་དང༌། དེས་ཟིན་པའི་དགེ་རྩ་རྣམས་བླ་མེད་བྱང་ཆུབ་ཀྱི་རྒྱུར་འགྲོ་ལ། སེམས་དེ་མེད་ན་དེ་དག་ལས་ལྡོག་པར་འགྱུར་བར་གཟིགས་ནས་སེམས་བསྐྱེད་བསྒོམ་བཟླས་ལ་འཇུག་པར་བྱས་ལ། དེ་ཡང་ཇི་སྐད་དུ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང༌། ཐེག་པ་ཆེན་པོ་མདོ་སྡེ་རྒྱན་ལས། བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་གསུངས་པ་ལྟར་རྒྱལ་བོ་ལྟ་བུའི་སེམས་བསྐྱེདསེམས་ཅན་གཞན་དོན་དུ་བླ་མེད་བྱང་ཆུབ་ཐོབ་འདོད་ཀྱི་འདུན་པ་བཅོས་མིན་བསྐྱེད་པ་དང༌། སེམས་བསྐྱེད་དེ་ལ་ཡང་རྒྱལ་སྲས་ཞི་བ་ལྷས། བྱང་ཆུབ་སེམས་དེ་མདོར་བསྡུས་ན། །རྣམ་པ་གཉིས་སུ་ཤེས་པར་བྱ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པའི་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པ་ལྟར་སྨོན་འཇུག་གི་སེམས་ལ་མྱོང་བ་ཐོན་པར་བྱས་ལ། དེ་ཡང་མདོ་སྡེ་རྒྱན་ལས། ཉེས་པ་འདི་ཀུན་བྱམས་སོགས་ལ། །ལེགས་པར་གནས་ལ་མི་འབྱུང་སྟེ། །ཉོན་མོངས་ཅན་མིན་སེམས་ཅན་གྱི། །དོན་དུ་འཁོར་བ་ཡོངས་མི་གཏོང༌། །ཞེས་པ་ལྟར་སེམས་བསྐྱེད་མ་སྐྱེས་པ་སྐྱེ་བའི་རྒྱུ་དང་སྐྱེས་པ་བརྟན་པར་བྱེད་པ་དང༌། འཕེལ་བར་བྱེད་པའི་ཐབས་ལ་ཚད་མེད་བཞི་སེམས་བསྐྱེད་དང་སྦྲགས་ནས་དམ་པ་གོང་མའི་ཕྱག་བཞེས་ལྟར་ལེགས་པར་བསྒོམ་པར་མཛད་དོ། །དེ་ཕན་ཆད་དུ་ཇི་སྐད་དུ། སྐྱེས་བུ་དམ་པ་ཁུར་ལྗི་ཁུར་བ་དག །ཉམ་ངའི་གནས་སུ་ནམ་ཡང་འདོར་མི་སྲིད། །ཅེས་གསུངས་པ་བཞིན་གཞན་དོན་ཁོ་ན་སྒྲུབ་པ་ལ་གཞོལ་བ་ཡིན་ནོ། །དེ་ནས་རིམ་གཉིས་ཀྱི་རྣལ་འབྱོར་གྱི་ལམ་རྒྱུད་ལ་སྐྱེ་བ་ལ་གེགས་སུ་གྱུར་བའི་སྡིག་སྒྲིབ་ཉེས་ལྟུང་གི་དྲི་མ་རྣམས་སྦྱོང་བའི་ཐབས་དཔལ་ཧེ་རུ་ཀ་རྡོ་རྗེ་སེམས་དཔའི་ཡི་གེ་བརྒྱ་བའི་བསྒོམ་བཟླས་རྣམས་དཔལ་ལྡན་བླ་མ་ལས་ལེགས་པར་གསན་ནས་དམིགས་ཁྲིད་ལེགས་པར་བྱང་ཆུབ་པར་བྱས་ཏེ། རིགས་ཀུན་འདུས་པའི་ངོ་བོ་ཁྱབ་བདག་རྡོ་རྗེ་སེམས་དཔའ་སྤྱི་བོར་མོས་གུས་དང་བཅས་པའི་སྒོ་ནས་བསྒོམ་ཞིང་ཡི་གེ་བརྒྱ་བའི་སྔགས་བཟླས་པ་དང་བདུད་རྩི་འབེབས་སྦྱོང་དང་མཐོལ་བཤགས་ཚུལ་བཞིན་བྱས་ལ། མཐོལ་བཤགས་དེ་ཡང༌། ཆོས་བཞི་བསྟན་པའི་མདོ་ལས། བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སྡིག་བྱས་ཤིང་བསཊ་པ་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང༌། གཉེན་པོ་ཀུན་ཏུ་སྤྱོད་པ་དང༌། ཉེས་པ་ལས་ལྡོག་པའི་སྟོབས་དང༌། རྟེན་གྱི་སྟོབས་སོ། །ཞེས་གསུངས་པ་ལྟར་སྔར་བྱས་ཀྱི་སྡིག་སྡུག་ལ་དུག་འཐུང་བ་ལྟ་བུའི་འགྱོད་སེམས་དྲག་པོ་སུན་འབྱིན་པའི་སྟོབས་དང༌། ཕྱིན་ཆད་སྲོག་ལ་བབ་ཀྱང་མི་བགྱིད་པའི་སྡོམ་སེམས་དྲག་པོ་སླར་ལྡོག་པའི་སྟོབས་དང༌། སྐྱབས་སུ་འགྲོ་བ་དང༌། སེམས་བསྐྱེད་པ་རང་རྒྱུད་ཀྱི་རྟེན་དང༌། ཕྱག་ཡུལ་གྱི་རྟེན་གཉིས་རྟེན་གྱི་སྟོབས་དང༌། སྡིག་པའི་ལས་བྱས་པ་དེ་དང་དེའི་གཉེན་པོར་ཆེད་དུ་དམིགས་ནས་སྒྲུབ་པའི་དགེ་བ་རྣམས་གཉེན་པོ་ཀུན་ཏུ་སྤྱོད་པ་ཡིན་ལ། དེ་ལྟ་བུའི་སྟོབས་བཞི་ཚང་བའི་སྒོ་ནས་ཧེ་རུ་ཀའི་ཡིག་བརྒྱ་འབུམ་ལྷག་གིས་སྒྲིབ་པ་སྦྱོང་བའི་ཐབས་སྒོ་དུ་མ་ནས་འབད་པར་བྱས་ལ། རྟགས་མཚན་ཡང་ཁྲུས་བྱས་པ་དང་ཆུ་བོ་ཆེན་པོ་ལས་བརྒལ་བ་དང་ལུས་ལས་རྣག་ཁྲག་ཟག་པ་སོགས་ཉམས་ཀྱི་ཚུལ་དུ་བྱུང་བའོ། །དེ་ནས་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བར། །ཞེས་གསུངས་པ་ལྟར་རྒྱུ་ཚོགས་མ་ཚང་ན་འབྲས་བུ་མི་སྐྱེ་ལ། ཚང་ན་སྐྱེ་བས་རིམ་གཉིས་ཀྱི་རྣལ་འབྱོར་སྐྱེ་བས་ན། རྒྱུ་ཚོགས་ཚང་བ་ལ་ཚོགས་བསགས་དགོས་པར་གཟིགས་ནས་རིམ་གཉིས་ཀྱི་ཡེ་ཤེས་སྐྱེ་བའི་རྒྱུ་མཎྜལ་གྱི་ཚོགས་བསགས་ཏེ། དེ་ཡང་རྣམ་དཀར་དགེ་ཚོགས་ཉེ་བར་བསྐྲུན་ཆེད་དཔལ་དུས་ཀྱི་འཁོར་ལོའི་རྒྱུད་ལས་སྟོན་པའི་འཇིག་རྟེན་ཁམས་ཀྱི་རྣམ་བཞག་རྣམས་ལ་མཁས་པར་བྱས་ནས་རི་རབ་གླིང་བཞི་སོགས་ལྷ་མིའི་དཔལ་འབྱོར་མ་ཚང་བ་མེད་པའི་ཡིད་སྤྲུལ་དང༌། འབྲུ་སྣ་སོགས་དངོས་སུ་འབྱོར་བའི་མཆོད་པ་སོགས་ཀུན་ཏུ་བཟང་བོའི་མཆོད་པ་དེ་ཉིད་མཆོད་ཡུལ་བླ་མ་ཡི་དམ་སངས་རྒྱས་ཆོས་ཚོགས་སོགས་ལ་འབུལ་བ་སོགས་མདོར་ན། མདོ་སྡེ་རྒྱན་ལས། བྱང་ཆུབ་སེམས་དཔའ་རྣམས་ཀྱིས་ཚོགས། །བསོད་ནམས་ཡེ་ཤེས་མཚུངས་པ་མེད། །གཅིག་ནི་འཁོར་བར་མངོན་མཐོ་བྱེད། །གཞན་གྱི་ཉོན་མོངས་མེད་པར་འཁོར། །སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །རྒྱུན་དུ་བསྒོམ་པ་ཐོབ་ནས་ནི། །དགེ་བ་ཡང་ནས་ཡང་དུ་སྒྲུབ། །བསྟན་པའི་ཚོགས་གང་ཡིན་པ་དེ། །དོན་ཀུན་སྒྲུབ་པར་བྱེད་པའང་ཡིན། །ཞེས་གསུངས་པ་ལྟར་སྒོ་དུ་མ་ནས་ཚོགས་བསགས་ཏེ་ཐུགས་དགྱེས་པ་བསྐྱེད་པའི་ལེགས་བྱས་མི་དམན་པའི་བསོད་ནམས་ཀྱི་ཚོགས་ཆེན་བསགས་པའི་མཆོད་ཚིག་ངག་འདོན་དམིགས་གནད་དང་བཅས་དེང་དུས་ཕྱག་ལེན་ལྟར་ཞག་བདུན་ཕྲག་གསུམ་ལྷག་ལ་གསང་ཆེན་ལམ་གྱི་མངོན་རྟོགས་ལེགས་པར་འཁྲུང་བྱེད་ཀྱི་དགེ་རྩ་བསྐྲུན་པར་བྱས་སོ། །དེ་ནས་བྱིན་བརླབས་ཀྱི་རྩ་བ་བླ་མའི་རྣལ་འབྱོར་ཉིད་ལམ་རིམ་གཉིས་ཀྱི་ཡེ་ཤེས་ཉེ་བར་སྐྱེད་བྱེད་ཡིན་པར་ཐུགས་ལ་དགོངས་ནས་བླ་མའི་རྣལ་འབྱོར་གྱི་དམིགས་པའི་རིམ་པ་ཚུལ་བཞིན་དུ་བསླབས་ཏེ། ཇི་སྐད་དུ། རྗེ་བཙུན་ཏཱ་ར་ནཱ་ཐའི་ཞལ་སྔ་ནས། རྡོ་རྗེ་སློབ་དཔོན་མཚན་ཉིད་དང་ལྡན་པ་ལ་སློབ་མ་དམ་ཚིག་དང་ལྡན་པའི་མོས་གུས་དེ་ལྟ་བུའི་སྒོ་ནས་བླ་མ་བསྒོམས་ཤིང༌། གསོལ་བ་བཏབ་ན་ཐབས་གཞན་མེད་ཀྱང༌། མཆོག་ཐུན་མོང་གི་འདོད་དོན་ཐམས་ཅད་འགྲུབ་པར་འགྱུར་བ་ཡིན་ནོ། །ཞེས་གསུངས་པ་བཞིན་བཀའ་དྲིན་གསུམ་ལྡན་གྱི་སྔགས་ཀྱི་རྡོ་རྗེ་སློབ་དཔོན་ཉིད་བླ་མ་ཡི་དམ་སངས་རྒྱས་བྱང་སེམས་ཆོས་ཚོགས་མཁའ་འགྲོ་ཆོས་སྐྱོང་ཀུན་འདུས་པའི་བདག་ཉིད་དུ་མོས་ནས་བྱིན་རླབས་དངོས་སུ་འབེབ་བྱེད་དབང་བཞི་བླངས། སྒྲིབ་བཞི་དག་པར་བྱེད་པ་དང༌། འབྲས་བུ་སྐུ་བཞི་ཐོབ་པར་བྱེད་པས་དམིགས་པའི་གནད་དང་མ་བྲལ་བར་བླ་མ་སངས་རྒྱས་དངོས་མཐོང་གི་གུས་འདུན་ཉམས་པ་མེད་པའི་ཟབ་ལམ་བླ་མའི་རྣལ་འབྱོར་འདོན་བསྒོམ་སྦྲགས་མའི་སྒོ་ནས་དེང་སང་གི་དམ་པ་གོང་མའི་ཕྱག་བཞེས་ལྟར་ཞག་བདུན་གསུམ་ལྷག་ལ་ལག་ལེན་གནད་མིན་བགྱིས་ཏེ། ཐུན་མོང་གི་སྔོན་འགྲོ་འབུམ་ལྔ་དམ་པ་གོང་མའི་ཕྱག་བཞེས་ལྟར་གུས་སྦྱོར་དང་རྟག་སྦྱོར་གྱི་བརྩོན་འགྲུས་ཀྱི་ཉམས་ལེན་གནད་དུ་འགྲོ་བར་མཛད་གྲུབ་འབྲས་ཀྱང་ཉམས་དང་རྨི་ལམ་གྱི་རྟགས་མཚན་དུ་མ་ཤར་བ་ཡིན་ནོ། །དེ་ནས་དབང་གོང་མ་གསུམ་གྱིས་སེམས་རྒྱུད་ལ་རྫོགས་རིམ་གྱི་ཡེ་ཤེས་སྐྱེ་རུང་གི་ས་བོན་ལེགས་པར་བཞག་ཀྱང་བསྐྱེད་རིམ་གྱིས་ཀྱང་རྫོགས་རིམ་སྐྱེ་རུང་གི་ནུས་པ་གསོས་བཏབ་ནས་ནུས་པ་མཐུ་ཅན་དུ་མ་བྱས་པར་རྫོགས་རིམ་གྱི་ལམ་དངོས་སྐྱེ་བ་མེད་པས་ན་རྫོགས་རིམ་གྱི་ཐུན་མོང་མ་ཡིན་པའི་སྔོན་འགྲོ་ལ་མོས་སྒོམ་བསྐྱེད་རིམ་གྱི་ལྷའི་རྣལ་འབྱོར་བསྡུས་པ་དཔལ་དུས་ཀྱི་འཁོར་ལོ་ལྷན་སྐྱེས་ཀྱི་རྣལ་འབྱོར་བཟླས་པ་དང་བཅས་ཀྱི་དམིགས་ཁྲིད་བླ་མའི་ཚུལ་ཇི་ལྟར་གདམས་པ་དེའི་དོན་ངེས་པར་བྱས་ནས་བསྐྱེད་རིམ་གྱི་སྤང་བྱའི་གཙོ་བོ་ཡང་རྡོ་རྗེ་གུར་གྱི་རྒྱུད་ལས། ཐ་མལ་རྣམ་པ་གཞོམ་དོན་དུ། །ཡང་དག་བསྒོམ་པ་རབ་བསྒྲགས་བགྱི། །ཞེས་གསུངས་པ་ལྟར་སྣོད་བཅུད་ཐ་མལ་གྱི་སྣང་ཞེན་སྟོང་བའི་དབྱིངས་སུ་སྦྱངས་ཏེ་རང་གི་ལུས་ངག་ཡིད་གསུམ་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཀྱི་རྣམ་པར་བསྐྱེད་ནས་དུས་འཁོར་གྱི་རྟེན་དང་བརྟེན་པའི་སྙིང་པོ་རྣམ་བཅུ་དབང་ལྡན་གྱི་སྔགས་བྱེ་བ་བཟླས་ནས་མོས་བསྒོམ་དག་པ་ལྷའི་གསལ་སྣང་སྔགས་བླ་མེད་ཀྱི་དག་རྫོགས་སྨིན་གསུམ་གྱི་གནད་ཚང་བའི་སྒོ་ནས་རྫོགས་རིམ་གྱི་ལམ་སྐྱེ་བའི་གཞི་རྟེན་བསྐྱེད་པའི་རིམ་པའི་རྣལ་འབྱོར་ལ་བརྩོན་པའི་དག་གསལ་ལྷའི་ང་རྒྱལ་གསུམ་ལ་ཆེས་བརྟན་པ་ཐོབ་ཅིང་ལྷའི་གསལ་སྣང་ལ་ཐུགས་ངེས་ཆེན་པོ་སྐྱེས་ཏེ། རྫོགས་རིམ་གྱི་ཡེ་ཤེས་སྐྱེ་བའི་ནུས་པ་ཁྱད་པར་ཅན་བཞག་པར་བྱས་སོ། །དེ་ནས་རྗེ་བཙུན་དཔལ་ལྡན་བླ་མ་མཚམས་པ་སྨོན་ལམ་བཟང་པོ་མཆོག་གི་ཡེ་ཤེས་ཀྱི་དཀྱིལ་འཁོར་ཉེ་བར་བཞེངས་ཏེ་སློབ་མ་དམ་པ་གང་ལ་རྫོགས་རིམ་གྱི་ཡེ་ཤེས་སྨིན་བྱེད་ཀྱི་ཐབས་མཆོག་གཟུགས་བརྙན་གྱི་དཀྱིལ་འཁོར་དུ་བྱིན་རླབས་འབེབས་པ་དང་བཅས་ཏེ། མཆོག་དབང་གོང་མ་བཞི་ཡོངས་རྫོགས་བསྐུར་བ་ལ་བརྟེན་ནས་རྡོ་རྗེ་བཞི་ཡི་ཡེ་ཤེས་བསྐྱེད་པའི་བག་ཆགས་ཁྱད་པར་ཅན་བཞག དེ་ནས་སྤྲོས་བྲལ་རྣམ་པར་མི་རྟོག་པའི་གནས་ལུགས་བསྒོམ་པའི་མན་ངག་བྱིན་རླབས་འབེབས་པས་སློབ་མའི་རྒྱུད་བྱིན་གྱིས་བརླབས་ཏེ། ཇི་སྐད་དུ། ལས་དང་པོ་བའི་གང་ཟག་གིས། །ལུས་དབེན་པ་ལ་མ་བརྟེན་པར། །སེམས་དབེན་རྙེད་པར་མི་འགྱུར་བས། །འདྲེས་སྤངས་དབེན་པར་གནས་པར་བྱ། །ཞེས་པ་ལྟར་མུན་ཁང་ལ་ལུས་བྱེད་བཅིངས་དམ་པོའི་རྫོགས་རིམ་གྱི་ཐུན་མོང་མ་ཡིན་པའི་ཉེར་བསྡོགས་དབེན་པ་གསུམ་སྟེ་ལུས་ངག་ཡིད་གསུམ་ཐ་མལ་གྱི་རྣམ་པར་རྟོག་པའི་དབེན་པའམ། ལུས་བྱ་བྱེད་ཀྱིས་དབེན་པ། ངག་སྨྲ་བརྗོད་ཀྱིས་དབེན་པ། སེམས་རྣམ་རྟོག་གིས་དབེན་པའི་རྣལ་འབྱོར་ལ་ཉམས་ལེན་གནད་དུ་བསྣུན་ངེས་ཀྱི་སྒོ་ནས་ཞག་བརྒྱ་ཙམ་གྱིས་དུས་འདའ་བར་མཛད་ལ། འོད་གསལ་སེམས་ཀྱི་རང་ངོ་ཇི་བཞིན་འཕྲོད་ཅིང་སྣང་བའི་འཆར་སྒོ་ལ་སྟོང་གཟུགས་ཀྱི་སྣང་བརྙན་སྣ་ཚོགས་པ་དང་བཅས་ཏེ་གཡོ་བའི་ཉམས། ཐོབ་པའི་ཉམས། གོམས་པའི་ཉམས། བརྟན་པའི་ཉམས། མཐར་ཕྱིན་པའི་ཉམས་རྣམས་རིམ་གྱིས་མངོན་དུ་བྱས་ནས་མི་རྟོག་ཡེ་ཤེས་ཀྱི་རང་མདངས་ཀྱི་ཆ་མངོན་དུ་བྱས་སོ། །དེ་ནས་རྫོགས་རིམ་གྱི་དངོས་གཞི་ལ་དུས་འཁོར་རྩ་རྒྱུད་ལས། སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་པ་ལྟར་སྦྱོར་བ་ཡན་ལག་དྲུག་ལས་སོར་སྡུད་ཀྱི་རྣལ་འབྱོར་བསྒོམ་པའི་མན་ངག་ལེགས་པར་གསན་ཏེ། རྒྱུད་ལས། སོ་སོར་སྡུད་པ་ལུས་ལ་ཡུལ་དང་ཡུལ་ཅན་བཅུ་པོ་རྣམས་ནི་རབ་ཏུ་འཇུག་པ་མེད་པའོ། །ཞེས་དང༌། ཇི་སྐད་དུ། མི་གཡོ་བ་ནི་གསུམ་ལྡན་གྱིས། །དྷཱུ་ཏཱིར་རླུང་བཅུ་ཆུད་གྱུར་པས། །ཕྱི་ནང་རྟོག་འགགས་རྟགས་བཅུར་འབྱུང༌། །སོ་སོར་གཅོད་པའི་ཡན་ལག་ཡིན། །ཞེས་གསུངས་པ་བཞིན་ལུས་གནད་དང་སེམས་གནད་རྒྱུད་ལས་བསྟན་པ་བཞིན་དུ་བསམ་མེད་ཀྱི་རྣལ་འབྱོར་དང༌། རྩེ་གཅིག་པའི་རྣལ་འབྱོར་དང༌། རང་གྲོལ་གྱི་རྣལ་འབྱོར་དང༌། རྩོད་བྲལ་གྱི་རྣལ་འབྱོར་སོགས་ཉིན་མཚན་གྱི་རྣལ་འབྱོར་ཟླ་བ་ལྔའི་ཡུན་ཚད་དུ་བསྒོམ་པ་ལ་བརྟེན་ནས། རྒྱུད་ཕྱི་མ་ལས། མཚན་མོ་དུ་བ་ལ་སོགས་རྣལ་འབྱོར་སླར་ཡང་ཉིན་མོ་ནམ་མཁའ་ལ་ནི་འབར་བ་ལ་སོགས་ཀྱང༌། །ཞེས་དང༌། བསྡུས་རྒྱུད་ལས། སྟོང་བ་ལ་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉིད་དང་མར་མེ་དང༌། །འབར་བ་དང་ནི་ཟླ་བ་ཉི་མ་རྡོ་རྗེ་རྣམ་དང་མཆོག་གི་ཆ་དང་ཐིག་ལེ་མཐོང་བར་འགྱུར། །ཞེས་རྒྱུད་ལས་བསྟན་པ་ལྟར་སྟོང་གཟུགས་འོད་གསལ་གྱི་རྟགས་བཅུ་ནུས་མ་བཅུའི་ངོ་བོར་ཤར་ཏེ་ཉམས་དང་འོད་གསལ་གྱི་རྟོགས་པ་དབྱར་མཚོ་ལྟར་རྒྱས་པར་གྱུར་ཏོ། །འདི་ཡས་མས་ཤིག་ལ་བདེ་ར་གོང་མའི་མདོ་ནས་སྐྱབས་རྗེ་མཚམས་པ་བ་སྨོན་ལམ་བཟང་པོས་ཀློང་གསལ་སྙིང་པོའི་སྐུ་གསུམ་ཆོ་ག ཀར་གླིང་ཞི་ཁྲོ་འཕྲད་ཚད་རང་གྲོལ། རཏྣ་གླིང་བའི་ཕུར་བ་དང༌། ཚེ་སྒྲུབ་སྟེ་སྔ་འགྱུར་རྙིང་མའི་གཏེར་མའི་ཕྱོགས་འགའ་རེ་དང༌། དཔལ་དུས་ཀྱི་འཁོར་ལོའི་ལྷ་དགུ་དང༌། མི་འཁྲུགས་པའི་དབང་སོགས་གནང་བ་དམ་པ་འདི་ཉིད་ཀྱིས་ལེགས་པར་ཞུས་སོ། །དེ་ནས་བསམ་གཏན་གྱི་རྣལ་འབྱོར་ཉམས་སུ་ལེན་པའི་གདམས་པ་རྗེ་བཙུན་དཔལ་ལྡན་བླ་མ་དམ་པ་ལས་ལེགས་པར་གསན་ནས། སྤྱན་རས་གཟིགས་ཀྱི་འགྲེལ་ཆེན་དྲི་མེད་འོད་ལས། ཡུལ་དང་ཡུལ་ཅན་བཅུ་བོ་རྣམས་ནི་གཅིག་ཉིད་དུ་ནི་སྣ་ཚོགས་གཟུགས་ལ་བསམ་གཏན་པའོ། །ཞེས་པ་ལྟར་སྔར་སོར་སྡུད་ཀྱི་སྐབས་རང་བྱུང་འོད་གསལ་གྱི་འཆར་སྒོ་སྟོང་གཟུགས་རྣམས་སེམས་འོད་གསལ་བའི་སེམས་དང་དབྱེར་མེད་ཀྱི་དོན་ལ་སྤྲོས་བྲལ་དུ་རྩེ་གཅིག་ཏུ་མཉམ་པར་བཞག དེ་ཡང་བསྡུས་རྒྱུད་ལས། བསམ་གཏན་དག་ཀྱང་ཤེས་རབ་རྟོག་དང་དཔྱོད་པ་དགའ་དང་གཡོ་མེད་བདེ་བ་རྩེ་གཅིག་སེམས་དཔའ་འོ། །ཞེས་གསུངས་པ་བཞིན་བསམ་གཏན་གྱི་ཡན་ལག་རྣམས་སེམས་རྒྱུད་ལ་ལེགས་པར་འཁྲུངས་ནས་སྔར་ལས་ལྷག་པའི་གཟུགས་སྣང་གི་འཆར་སྒོ་ཡང་མཐའ་ཀླས་ཤིང་སྤྲོས་བྲལ་གྱི་གནས་ལུགས་ལ་ཐུགས་ངེས་ཀྱི་དགེ་ལེགས་དབྱར་མཚོ་ལྟར་རབ་ཏུ་རྒྱས་པ་ཡིན་ལ། དུས་ཡུན་ཡང་དེང་སྐབས་ཀྱི་ལག་ལེན་བཞིན་ཟླ་བ་ལྔ་ལ་ཉམས་བཞེས་ཚུལ་བཞིན་དུ་མཛད་པ་ཡིན་ནོ། །དེའི་རྗེས་ནས་སྔར་སྟོང་གཟུགས་སེམས་དང་འདྲེས་པར་བྱས་པ་དེ་ཉིད་སྲོག་གམ་རླུང་བསྲེ་བའི་སྲོག་རྩོལ་གྱི་རྣལ་འབྱོར་ཉམས་སུ་ལེན་ཚུལ་དཔལ་ལྡན་བླ་མ་དམ་པ་ལས་ལེགས་པར་གདམས་པ་བཞིན་རླུང་སེམས་དབྱེར་མེད་ཀྱི་རྣལ་འབྱོར་ལ་བརྟེན་ནས་རྡོར་བཟླས་བུམ་ཅན་ལུས་སྦྱོང་འཁྲུལ་འཁོར་ལག་ལེན་བཅས་ཀྱིས་གཡས་གཡོན་རོ་རྐྱང་གི་རྒྱུ་བ་བཙན་ཐབས་ཀྱིས་དབུ་མར་དགག་སྟེ་སྲོག་ཐུར་གོང་བུ་གཅིག་ཏུ་བསྲེ་བའི་མན་ངག་གི་བོགས་འདོན་སྤོགས་ཆོག་དང་བཅས་པ་དམ་པ་གོང་མའི་ཕྱག་བཞེས་བཞིན་ཟླ་བ་དགུ་དང་ཞག་ཉེར་དྲུག་ལ་ཉམས་ལེན་གནད་དུ་བསྣུན་པར་མཛད་པ་ཡིན་ནོ། །དེ་ནས་སྟོང་གཟུགས་དང་འདྲེས་པ་ཐིག་ལེ་བསྲེས་ཏེ་འབར་སྣང་གི་སྐུ་སྒྲུབ་པར་བྱེད་པ་འཛིན་པའི་ཡན་ལག་གི་རྣལ་འབྱོར་གྱི་ཉམས་ལེན་ཕ་གཅིག་བླ་མའི་ལེགས་པར་གདམས་པ་བཞིན་རླུང་སེམས་དབྱེར་མེད་ཀྱི་རྣལ་འབྱོར་ལ་བརྟེན་ནས་རླུང་སྦྱོར་གནས་དྲུག་གི་བུམ་ཅན་ཚན་པ་སྔ་ཕྱིའི་སྦྱོར་བས། རླུང་སེམས་མཐའ་དག་མི་ཤིགས་པའི་ཐིག་ལེ་དྲུག་ལ་རོ་གཅིག་ཏུ་བསྟིམ་ཞིང་འབྱུང་འཇུག་མེད་པར་བརྟན་བྱེད་ཀྱི་ཐབས་ཚུལ་རླུང་གི་སྤོགས་ཆོག འཁྲུལ་འཁོར་གྱི་སྤོགས་ཆོག རྩའི་སྤོགས་ཆོག་ཐིག་ལེའི་སྤོགས་ཆོག་སོགས་སྔོན་བྱོན་རང་རེས་དམ་པ་དག་གི་ཕྱག་སྲོལ་བཞིན་ཟླ་བ་གཉིས་ཀྱི་ཡུན་དུ་གནད་བསྣུན་གྱིས་འབད་པ་རྒྱ་ཆེར་བྱས་སོ། །དེ་ནས་རྗེས་དྲན་བསྒོམ་པ་ནི། དཔལ་དུས་ཀྱི་འཁོར་ལོའི་རྒྱུད་ལས། གཏུམ་མོའི་སྣང་བར་གང་ཞིག་གྱུར་བ་ངེས་པར་ལུས་དང་ནམ་མཁའ་ལ་ཡང་རྗེས་སུ་དྲན་པར་འགྱུར། །ཞེས་གསུངས་པ་བཞིན་དུ་འབར་སྣང་གི་སྐུ་སྒྲུབ་པའི་ཕྱག་ཆེན་ལ་བརྟེན་ནས་མི་འགྱུར་བའི་བདེ་བ་དངོས་སུ་སྒྲུབ་པར་བྱེད་པ་རྗེས་དྲན་གྱི་ཡན་ལག་གི་རྣལ་འབྱོར་བསྒོམ་ཚུལ་རྗེ་བཙུན་དམ་པ་གང་གི་ལེགས་པར་སྣང་བ་ལྟར་ཞུ་བདེ་ཁྱད་པར་ཅན་འདྲེན་པའི་ཐབས་སྐུ་གསུམ་འདུག་སྟངས་ཀྱི་རླུང་སྦྱོར་རྣམས་དང༌། དབྱེ་སྡུད་སྒོ་གླེག་ཀུན་འདུས་སོགས་རླུང་སྦྱོར་ལྔ་ཚན་བཅས་འཁྲུལ་འཁོར་ཉི་ཤུའི་ལག་ལེན་སྔོན་འགྲོ་དང་རང་ལུས་འདོད་ལྷ་ཡབ་ཡུམ་རྗེས་ཆགས་དགའ་བཞིའི་རྣམ་པ་དང་བཅས། སླར་ཡང་འཁྲུལ་འཁོར་ཉི་ཤུའི་དངོས་གཞིའི་ལག་ལེན་ཚད་དང་ལྡན་པ་དམ་པའི་བཞེད་སྲོལ་ཇི་བཞིན་ཉམས་ལེན་ལ་སྒོ་གང་ཐད་ནས་བརྩོན་ཏེ་ལུས་བཅུད་ཀྱི་དྭངས་མ་བྱང་ཆུབ་སེམས་ཀྱི་ཐིག་ལེ་དབབ་བཟློག་དགྲམ་སོགས་ལ་བརྟན་པ་ཐོབ་པའི་ཐབས་སྣ་ཚོགས་ཀྱིས་སྦྱང་བ་མི་དམན་པར་བྱས་ཏེ་བདེ་སྟོང་གི་ཡེ་ཤེས་ཁྱད་པར་ཅན་ཐུགས་ལ་འཁྲུངས་བར་བྱས་ཏེ་དམ་པ་གོང་མའི་ཕྱག་བཞེས་བཞིན་ཟླ་བ་ལྔ་དང་ཉིན་བཅོ་བརྒྱད་ལ་བསྒོམ་པ་ཡིན་ནོ། །དེ་ནས་རྒྱུད་ལས། ཤེས་རབ་ཐབས་ཀྱི་བདག་ཉིད་ཀྱིས་ནི་འགྱུར་མེད་བདེ་བའི་དབང་གིས་ཡེ་ཤེས་གཟུགས་ལ་ཏིང་ངེ་འཛིན། །ཞེས་གསུངས་པ་ལྟར་ཕྱག་ཆེན་ལ་བརྟེན་ནས་མཆོག་མི་འགྱུར་གྱི་བདེ་བའི་ཆ་ཉི་ཁྲི་ཅིག་སྟོང་དྲུག་བརྒྱ་འགྲུབ་པར་བྱེད་པ་ཏིང་ངེ་འཛིན་གྱི་རྣལ་འབྱོར་མཆོག་ཉམས་སུ་ལེན་ཚུལ་མཆོག་དམན་ཐམས་ཅད་ལ་གདམས་པའི་སྲོལ་ཇི་ལྟ་བ་བཞིན་ཁྱབ་བདག་འདྲེན་པ་མཆོག་གིས་བརྩེ་ཆེན་མཁྱེན་པའི་དགོངས་ཀློང་ནས་ལེགས་པར་བསྩལ་བ་ལྟར་རྗེ་བཙུན་དམ་པ་གང་གིས་རང་ལུས་ལྷ་ཡི་དག་སྣང་སྟོང་གཟུགས་དབྱེར་མེད་ཀྱི་སྣང་བ་ལས། མི་འགྱུར་བདེ་ཆེན་གྱིས་ལུས་ནང་གི་འཁོར་ལོ་དྲུག་ཏུ་མས་རིམ་ནས་ཕྱེད་རེ་གང་བ་དང་ཏིང་ངེ་འཛིན་གྱི་ས་རེ་ཐོབ་པའི་ཚུལ་གྱིས་ས་བཅུ་གཉིས་ཐོབ་པའི་མོས་འདུན་དང་རྣམ་པ་ཡིད་བྱེད་ཀྱིས་རྨད་དུ་བྱུང་བའི་གསང་ཆེན་ཐེག་པའི་སྦྱོར་བ་ཡན་ལག་དྲུག་པའི་འབྲས་བུའི་རྣལ་འབྱོར་ཉམས་ལེན་གྱི་སྨོན་པ་བཟང་པོ་ངེས་དོན་སྒྲུབ་རྒྱུད་ཀྱི་རྗེས་འཇུག་དག་གི་ཕྱག་བཞེས་མ་ཉམས་པའི་རྒྱུན་ལེགས་པར་བསྐྱངས་ཏེ་ཉམས་བཞེས་ལེགས་པར་མཛད་ལ། དེ་ནས་ཟབ་ལམ་འཕོ་བའི་གདམས་པ་ལེགས་པར་གསན་ནས་འཕོ་བའི་མན་ངག་བཅས། ལས་དང་བོ་བའི་ཚུལ་གྱིས་ཐུགས་ཉམས་ལེན་ལ་ཞག་གྲངས་བདུན་དུ་བརྩོན་ཞིང་སྤྱིར་ལོ་གསུམ་གྱི་རིང་སྦྱོར་བ་ཡན་ལག་དྲུག་གི་སྒྲུབ་པ་ཉམས་ལེན་ལ་གཞོལ་བར་བྱས་ནས་ཉམས་རྟོགས་ཀྱི་གཏེར་བརྡོལ། གྲུབ་རྟགས་དང་མངོན་ཤེས་སོགས་ཀྱི་འབྲས་བཟང་སྨིན་ཏེ་རྗེ་བཙུན་དཔལ་ལྡན་བླ་མའི་ཐུགས་ཟིན་གྱི་སྐྱེས་བུ་དང༌། མཆེད་གྲོགས་རྡོ་རྗེ་སྤུན་གྲོགས་རྣམས་ལ་དད་པ་དང་ཡིད་ཆེས་སྐྱེ་བར་གྱུར་པ་སྟེ། སྐྱབས་གནས་དམ་པ་འདི་ཉིད་ཀྱི་མཆེད་གྲོགས་རྟོགས་པའི་དབང་ཕྱུག་བླ་མ་གསལ་ལྡན་གྱི་ཞལ་སྔ་ནས། ངེད་གཉིས་ཟབ་ལམ་རྡོ་རྗེའི་རྣལ་འབྱོར་ལ་བརྩོན་སྐབས་རྗེ་བཙུན་བླ་མ་ངག་བརྩོན་ལ་ནི། ཀུན་ལས་ཁྱད་པར་དུ་འཕགས་པའི་བླ་མ་ལ་དད་པ་དང་མོས་གུས་ཁྱད་པར་བ་ཞིག་ཡོད་དེ། སྐྱབས་གནས་དམ་པ་བླ་མ་རིན་པོ་ཆེ་ནས་ཆོས་ཁྲིད་གནང་བའི་སྐབས་རྣམས་སུ་ཁོང་ཕྱག་ཐལ་མོ་སྦྱར། རྡོ་རྗེ་འཆང་བླ་མ་བཀའ་དྲིན་ཅན་ཞེས་བླ་མའི་མཚན་ནས་བརྗོད་དེ་སྤྱན་ཆབ་བསིལ་བར་བྱེད་ལ། དེ་ཡང་ལན་གཅིག་ཙམ་མ་ཡིན་པར་སྐུ་ཚེ་གང་བོར་དེ་ལྟར་མཛད་དོ། །དེ་ལྟར་རྗེ་འདི་ལ་ཆོས་འབྲེལ་དངོས་ཐོབ་ཀྱི་བླ་མ་རྣམས་ལ་གུས་འདུད་ཞེ་ས་དང་བཅས་པའི་སྒོ་ནས་མོས་གུས་ཚད་མེད་དང་ལྡན་པ་བཀའ་གདམས་པ་གོང་མའི་རྣམ་པར་ཐར་བ་བཞིན་ཡིན་པ་དང༌། དཀའ་སྤྱད་དང་སྙིང་རུས་འགྲན་ཟླ་དང་བྲལ་བ་ཞིག་ཡིན་ལ། རླུང་བུམ་པ་ཅན་གྲུབ་པའི་ཚད་ཀྱང་རབ་ཀྱི་ཚད་དུ་གྱུར། བླ་མས་རྗེས་དྲན་གྱི་འཁྲུལ་འཁོར་ཁྲིད་གསུངས་པའི་སྐབས་སུ་ཡེ་ཤེས་ཕེབས་ཏེ་བླ་མ་ངག་བརྩོན་གྱི་ཉམས་སྣང་ལ་བྱང་ཤམྦྷ་ལར་གསང་སྔགས་འཛིན་པའི་རྣལ་འབྱོར་བ་འགའ་ཞིག་གིས་འཁྲུལ་འཁོར་སྦྱང་བའི་གཟིགས་སྣང་འབྱུང་བར་གྲགས། བླ་མ་ངག་བརྩོན་གྱིས་ཕྱག་རྒྱ་དེང་དུས་དང་མི་འདྲ་བ་ཡུན་རིང་པོའི་བར་དུ་མཛད་ལ། མཆེད་གྲོགས་རྣམས་ཀྱིས་རླུང་མ་ཟིན་ཀྱང་ཁོང་གིས་རླུང་བཟུང་བ་བདེ་ལེགས་སུ་ཟིན་པ་དང༌། འཕོ་བ་སྦྱང་སྐབས་དམ་པ་འདི་ལ་སྤྱི་གཙུག་འབུལ་ཏེ་རྡོལ་བ་སོགས་འཕོ་རྟགས་རྣམས་ཇི་བཞིན་དུ་འབྱུང་བར་གསུངས་སོ། །རབ་རྒྱལ་ཤིང་བྱ་ལོར་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་ལག་ལེན་དེང་དུས་ལྟར་ལོ་གསུམ་ལེགས་པར་རྫོགས་པའོ། །རབ་རྒྱལ་ཤིང་བྱ་ལོ་འདིར་དམ་པ་འདི་ཉིད་མངལ་བཤོལ་དང་བཅས་ན་ལོ་ཉི་ཤུ་དང་རང་ལོ་བཅུ་དགུ་ལ་སླེབས་པ་ཡིན་ལ། ཇི་སྐད་དུ། འདུལ་བསྟོད་ལས། ཇི་ལྟར་ས་ནི་སྐྱེ་དགུ་རྣམས་ཀྱི་གཞི། །དེ་ལས་འབྲས་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་ཡོན་ཏན་རྣམས་ཀྱང་སྐྱེ། །ཞེས་དང༌། འཇམ་མགོན་བླ་མ་བློ་བཟང་གྲགས་པའི་ཞལ་སྔ་ནས། གང་ལ་བརྟེན་ན་བདེ་བླག་ཏུ། །ཐར་བའི་གྲོང་དུ་བགྲོད་པའི་ཐབས། །བདེ་གཤེགས་བསྟན་པའི་སྙིང་པོ་མཆོག །སོ་སོར་ཐར་ཅེས་གྲགས་པ་གང༌། །ཞེས་དང༌། སོ་སོར་ཐར་བའི་མདོ་ལས། དང་པོ་ཚུལ་ཁྲིམས་མེད་པར་གྱུར་པ་དེ། །ཕྱིས་ནས་མྱ་ངན་འདས་པ་ཐོབ་སྙམ་མམ། །ཞེས་དང༌། དཔུང་བཟང་གི་ཞུས་པའི་མདོ་ལས། རྒྱལ་བ་ངས་གསུངས་སོ་སོར་ཐར་བ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པའི་རྟགས་དང་ཆོ་ག་སྤང། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་དང༌། ཇོ་བོ་རྗེ་དཔལ་ལྡན་ཨ་ཏི་ཤའི་ཞལ་སྔ་ནས། སོ་སོར་ཐར་བ་རིགས་བདུན་དུ། །དེ་བཞིན་གཤེགས་པས་གསུངས་པ་ལས། །ཚངས་སྤྱོད་དཔལ་ནི་མཆོག་ཡིན་ཏེ། །དགེ་སློང་སྡོམ་པ་དག་ཏུ་བཞེད། །ཅེས་གསུངས་པ་ལྟར། བསྟན་པའི་ནང་མཛོད་སོ་སོར་ཐར་བ་རིགས་བདུན་གྱི་ནང་ནས་ཆེས་མཆོག་ཏུ་གྱུར་བ། རྒྱལ་མཚན་གྱི་ཏོག་ལྟར་མངོན་པར་འཕགས་པ་ནི། དགེ་སློང་གི་སྡོམ་པ་ཉིད་དུ་གཟིགས་ཤིང༌། སྡོམ་པ་ཕྱི་མ་གཉིས་ཀྱི་རྟེན་དུའང་འདི་ཉིད་ཁྱད་པར་དུ་འཕགས་པ་དང༌། འཇིག་རྟེན་གྱི་ཁམས་སུ་བསྟན་པ་གནས་པའི་གཙོ་བོའང་འདི་ཁོ་ནར་རག་ལས་པ་ཉིད་དུ་དགོངས་ནས་ཐང་སྐྱ་རུ་རྡོ་རྗེ་འཆང་འཕགས་པ་ཉེ་བར་འཁོར་ལྟ་བུ་མཚམས་པ་བ་སྨོན་ལམ་བཟང་པོའི་མཁན་པོ་མཛད་ནས་དགེ་འདུན་གྲངས་ཚང་གི་དབུས་ནས་བསྙེན་པར་རྫོགས་པ་དགེ་སློང་གི་སྡོམ་པ་ཡང་དག་པར་བཞེས་ཏེ། ལྷག་པ་ཚུལ་ཁྲིམས་ཀྱི་བསླབ་པ་ཡོངས་སུ་རྫོགས་པའི་ལྷའི་ཆུ་བོས་ཐུགས་རྒྱུད་ཀྱི་བུམ་བཟང་ཡོངས་སུ་བཀང་སྟེ། ལྷ་དང་བཅས་པའི་འཇིག་རྟེན་གྱི་ཡོན་གནས་ཟླ་མེད་པ་ཉིད་དུ་མངོན་པར་བཞེངས་ཤིང༌། དེ་ཡང་ཇི་སྐད་དུ། དམ་པ་རྣམས་ཀྱིས་ཁས་འཆེ་མི་བྱེད་ལ། །གལ་ཏེ་དཀའ་བའི་ཁས་ནི་བླང་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ཤི་ཡང་གཞན་དུ་བྱེད་པར་མི་འགྱུར་རོ། །ཞེས་པ་ལྟར་སྡོམ་པ་བཞེས་པ་ལ་དཔའ་བ་ཙམ་མ་ཡིན་པར་དེ་ནས་བཟུང་སྟེ་དགེ་སློང་གི་གནང་བཀག་སྒྲུབ་གསུམ་གྱི་བཅས་པ་རྣམས་ཕྲ་ཞིང་ཕྲ་བ་ཚུན་ཆོད་མིག་འབྲས་ལྟར་སྲུང་བ་ལ་བརྩོན་པར་མཛད་པས་སྐུ་ཚེའི་མཐའ་བརྟེན་པ་སྟེ་ལེགས་པར་བསྲུང་བར་བྱས་སོ། །དེ་ནས་དམ་པ་འདི་ཉིད་དགུང་གྲངས་ཉི་ཤུ་པ། སྤྱི་ལོ་༡༩༤༦ལོ། རབ་རྒྱལ་མི་ཟད་ཅེས་པ་མེ་ཁྱི་ལོར་གཙང་བ་མཆོག་སྤྲུལ་བློ་གྲོས་རྣམ་རྒྱལ་སོགས་བླ་གྲྭ་སུམ་ཅུ་ལྷག་དང་མཉམ་དུ་སླར་ཡང་དཔལ་དུས་ཀྱི་འཁོར་ལོའི་ལམ་རིམ་གཉིས་ལ་ལོ་གསུམ་ཉམས་བཞེས་མཛད་ལ། དམ་པ་འདི་ཉིད་དགུང་གྲངས་ཉེར་གཅིག་པ་སྤྱི་ལོ་༡༩༤༧ལོ། རབ་རྒྱལ་མེ་ཕག་གི་ལོ་ལ་མགར་བ་བླ་མ་འཇམ་དབྱངས་དང༌། ལམ་ཁོའི་མཁན་རིན་པོ་ཆེ་གསང་སྔགས་བསྟན་འཛིན་རྣམ་གཉིས་ཀྱི་ཞུས་ངོར་སྐྱབས་རྗེ་དམ་པ་མཚམས་པ་བ་སྨོན་ལམ་བཟང་པོ་མཆོག་གི་ཐུགས་ཆོས་ཀྱི་མཛོད་ཀློང་ནས་དཔལ་དུས་ཀྱི་འཁོར་ལོའི་རྫོགས་རིམ་སྨིན་བྱེད་དབང་གི་རིམ་པ་ལེགས་པར་རྗེས་སུ་གནང་བའི་རིམ་པ་འདི་ལྟ་སྟེ། ཐོག་མར་དཀྱིལ་འཁོར་གྱི་གཙོ་བོ་དཔལ་ལྡན་དང་བོའི་སངས་རྒྱས་དཔལ་དུས་ཀྱི་འཁོར་ལོའི་ཡེ་ཤེས་ཀྱི་སྐུར་བཞེངས་ཏེ་རྡོ་རྗེའི་སློབ་མ་དག་ཐུགས་བརྩེ་བས་རྗེས་སུ་བཟུང་སྟེ། དཔལ་དུས་ཀྱི་འཁོར་ལོའི་དབང་མོ་ཆེ། སློབ་མ་རྗེས་འཛིན། སྟ་གོན། བྱིས་པ་འཇུག་པའི་དབང་བདུན། མཆོག་དབང་གོང་མ་བཞི། མཆོག་དབང་ཁྱད་པར་ཅན་ཏེ་རྡོ་རྗེ་སློབ་མའི་དབང་རྣམས་དང༌། བདག་པོ་དང་བདག་པོ་ཆེན་པོའི་དབང་སྟེ་རྡོ་རྗེ་སློབ་དཔོན་གྱི་དབང་དང་བཅས་ཡོངས་སུ་རྫོགས་པ་བཀའ་དྲིན་དུ་བསྩལ། སྐབས་དེར་སློབ་མ་ལྷ་འབུལ་གྱི་སྔོན་དུ་རྡོ་རྗེ་སློབ་དཔོན་གྱིས་སློབ་མ་ཡོངས་རྫོགས་ཁྲིད་པའི་ཚུལ་གྱིས་དཀྱིལ་འཁོར་ལ་བསྐོར་བ་གསུམ་བྱས། དེ་ནས་གསུང་གསེང་མཐོན་པོའི་སྒོ་ནས་སློབ་ཚོགས་ལ་བརྡ་སྦྱར་ཏེ་འགྲོ་བའི་འདུན་པ་དང་བཅས་དད་མོས་དྲག་པོའི་ངང་ནས། སྨོན་ལམ་ཁྱད་པར་ཅན་གངས་རིའི་ཕྲེང་བ་ཐོན་ལ་ངས་རྗེས་སུ་ཕེབས་དང༌། རང་རེ་དག་བྱང་ཤམྦྷ་ལར་འགྲོའོ། །ཞེས་གསུངས་ནས་རྒྱང་རིང་པོ་ཞིག་ཏུ་དཔོན་སློབ་སེར་ཕྲེང་བྱས་ཏེ་བྱོན་དུ་བཅུག དེ་ནས་ཕྱིར་ཕེབས་ཏེ་དཀྱིལ་འཁོར་དང་ཉེ་བའི་སར། དགའ་འཁྱིལ་གྱི་རྣམ་པས་བསྐོར་ནས་དཀྱིལ་འཁོར་གྱི་དྲུང་དེར་འབྱོར་མ་ཐག་སློབ་མ་ལྷ་འབུལ་གནང་སྟེ་བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མེད་པར་མོས་ལ་གསོལ་བ་རྩེ་གཅིག་ཏུ་འདེབས་པར་གྱིས་ཤིག་དང༌། མ་འོངས་པ་ན་རིགས་ལྡན་དྲག་པོའི་འཁོར་ལོ་ཅན་གྱི་གདུལ་བྱར་སྐྱེ་མི་སྐྱེ་ཐེ་ཚོམ་མེད་ཅེས་དབུགས་དབྱུང་གནང་བས། སློབ་མ་ཐམས་ཅད་དད་གདུང་དྲག་པོའི་ངང་ནས་ངུ་བ་དང་དགོད་པ། ཕཊ་དང་ཕེམ་ཞེས་ཡེ་ཤེས་འབེབས་པའི་གར་སྟབས་ཀྱི་ངང་ལ་དལ་གཅིག་གནས་སོ། །དེའི་རྗེས་ཐོག་ལ་ཕྱོགས་ཡས་མས་ནས་དད་ལྡན་སྐྱེ་བོ་ཕོ་མོ་སྟོང་ཕྲག་འགའ་ཞིག་འདུས་པས། དེ་དག་དང་མཉམ་དུ་མི་འཁྲུགས་པ་དང༌། ལྟུང་བཤགས་ལྷ་སོ་ལྔའི་དབང་ལེགས་པར་ཞུས། དགུང་གྲངས་ཉེར་གསུམ་པ་ལ་རྒྱ་བླ་པད་མ་རྣམ་རྒྱལ་སོགས་མཉམ་དུ་གདན་ཐོག་གཅིག་མའི་སྒྲུབ་པ་ལེགས་པར་མཛད་དོ། །དམ་པ་འདི་ཉིད་དགུང་གྲངས་ཉེར་བཞི་པ། སྤྱི་ལོ་༡༩༥༠ལོ། རབ་རྒྱལ་རྣམ་འགྱུར་ཅེས་པ་ལྕགས་སྟག་གི་ལོར་སླར་ཡང་དམ་པ་འདི་དང༌། བསྟན་བཟང༌། ཁེར་ཁང་ཆོས་གྲགས་སོགས་བླ་གྲྭ་སུམ་ཅུ་ལྷག་དང་མཉམ་དུ་སྦྱོར་བ་ཡན་ལག་དྲུག་ཉམས་བཞེས་གནད་དུ་བསྣུན་པ་མཛད་ལ། རླུང་སེམས་ལ་རང་དབང་ཐོབ་ཅིང་ཆེས་ངོ་མཚར་བའི་ཉམས་དང་རྟོགས་པ་དང་གྲུབ་པའི་དབང་ཕྱུག་ཏུ་གྱུར། སྐབས་དེར་རྒྱ་བླ་རབ་གསལ་ཉི་མ་ཐུན་དཔོན་མཛད་པའི་སྐབས་སུ། ཉིན་གཅིག་དམ་པ་འདི་ཉིད་ཀྱི་བཟོ་བྱེད་པའི་ཁབ་ཞིག་མིད་དུ་ཤོར་བ་ཉིན་ཞག་བཞི་ཙམ་གྱི་ཕྱི་དྲོས་ཆ་ལ་ཉམས་འུར་ནས་ཕཊ་ཤར་ཞིག་བརྗོད་པ་དང་མཉམ་དུ་རླུང་རོ་ཕྲ་ལ་སངས་བ་ཞིག་བསལ་ནས་ཁབ་དེ་ཁྲག་ཤ་ཞིག་དང་བཅས་ཕྱིར་འཕངས་པ་ཆོས་མཆེད་བླ་མ་ཁེར་ཁང་ཆོས་གྲགས་སོགས་ལ་གསལ་བ་ཡིན་ནོ། །རྗེ་བཙུན་དམ་པ་འདི་དགུང་གྲངས་ཉེར་བརྒྱད་པ། སྤྱི་ལོ་༡༩༥༤ལོ། རབ་རྒྱལ་ཤིང་རྟ་ལོར་གཅུང་བྱ་བྲལ་བ་འདྲེན་མཆོག་དང་མཉམ་དུ་མཚུངས་མེད་མཁན་རིན་པོ་ཆེ་གསང་སྔགས་བསྟན་འཛིན་དཔལ་བཟང་པོ་མཆོག་གི་ཐུགས་གདམས་ངག་ཆོས་ཀྱི་མཛོད་ཀློང་ནས་སྦྱོར་དྲུག་ཁྲིད་ལུང་རེ་གནང་པར་མཛད་ལ། གཙོ་བོར་འབའ་མདའ་བ་འཇམ་པའི་དབྱངས་དངོས་ཐུབ་བསྟན་དགེ་ལེགས་རྒྱ་མཚོས་མཛད་པའི་བསྡུས་གྲྭའི་སྤྱི་དོན་རིན་ཆེན་སྒྲོན་མེ་དང༌། དེའི་ཟུར་དཔྱད་ཉིད་བྱེད་སྣང་བ་དང༌། བསྡུས་ཞིབ་བཅས་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་འགྲེལ་བ་ཡུམ་དོན་གསལ་བའི་མེ་ལོང་དང༌། བསླབ་བྱ་གནམ་རྩེད་ལྡང་མ། ཏྲཻ་བོའི་སྡོམ་གསུམ་མམ་སོ་ཐར་བྱང་སེམས་གསང་སྔགས་གསུམ་གྱི་སྡོམ་གསུམ་གྱི་བསླབ་བྱ་འོད་འཕྲེང་དང༌། འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོའི་ལམ་རིམ་དང༌། དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་སྤྱི་དོན་རྡོ་རྗེ་བདུད་རྩིའི་ཆུ་གཏེར་སོགས་ཐུན་མོང་དང་ཐུན་མོང་མ་ཡིན་པའི་རིག་གནས་རྒྱ་ཆེན་པོ་ལ་གསན་བསམ་མཛད་ནས་ཐོས་དོན་ཇི་བཞིན་རྒྱུད་ལ་སྦྱར། ཤེས་རབ་དང་བརྩོན་འགྲུས་དབྱར་མཚོ་ལྟར་རྒྱས། མཁན་ཆེན་རིན་པོ་ཆེ་དེས་ཀྱང་ཨ་སྐྱོང་བསྟན་འཛིན་རྒྱ་མཚོ་ལ་བདག་གི་སློབ་མ་སྒང་བ་བླ་མའི་ཚ་བོ་ངག་དབང་བརྩོན་འགྲུས་ནི་ཤེས་རབ་དང་བརྩོན་འགྲུས་གཉིས་ཀ་ཕུལ་དུ་བྱུང་ཞིང༌། གཞན་ལས་ཁྱད་པར་འཕགས་པ་ཞིག་ཡོད་ཅེས་བསྔགས་བརྗོད་མཛད། མཁན་ཆེན་དམ་པ་གསང་སྔགས་བསྟན་འཛིན་ལས། མི་འཁྲུགས་པའི་དབང་དང༌། རྟ་ཕྱག་ཁྱུང་གསུམ་གྱི་རྗེ་གནང་དང༌། རྡོར་ཤུགས་ཀྱི་རྗེས་གནང༌། མགོན་པོ་གུར་གྱི་རྗེས་གནང༌། ལྟུང་བཤགས་ལྷ་སོ་ལྔའི་རྗེས་གནང་སོགས་ལེགས་པར་ཐོབ་པའི་སྐལ་ལྡན་གྱི་སློབ་མ་ཡིན་ནོ། །ཡང་ཉིན་ཞིག་ལ་རྗེ་བཙུན་དཔལ་ལྡན་བླ་མ་དམ་པ་འདི་ཉིད་རྡོ་རྗེ་འཆང་མཚམས་པ་བ་སྨོན་ལམ་བཟང་པོའི་མདུན་དུ་བྱོན་དུས་ཞིག་ལ་བླ་མའི་ཞལ་འདོན་གསུང་བཞིན་པའི་སྐབས་དང་འཕྲད། ཞལ་འདོན་གྱི་དཔེ་ཆ་ལས་ལྡེབ་ཤར་ཞིག་བླངས་ནས་འདི་ཐོན་དང་གསུངས། དེ་ནི་རྒྱལ་སྲས་ལག་ལེན་སོ་བདུན་མའི་ནང་གི་ལྡེབ་ཤར་ཞིག་ལགས། དེ་ནས་བླ་མས་གསུང་རྒྱུར་ཆོས་པ་བཟང་བོ་ཞིག་འོངས་དགོས་ཕྱིན་འདི་ལྟར་ངེས་པར་ཉམས་སུ་ལེན་དགོས་པ་རེད། དེ་མ་གཏོགས་ཆོས་པ་བཟང་པོ་ཞིག་འོང་ཚུལ་མེད་ཅེས་གསུངས། བླ་མ་ལ་རྒྱལ་སྲས་ལག་ལེན་གྱི་ལུང་ཞུས་པས་དགྱེས་བཞིན་དུ་གསུང་བ་མ་ཟད་རི་ཁྲོད་ཅོག་ཞུ་ཞིག་ཀྱང་གནང་བས་རྟེན་འབྲེལ་ཕུན་སུམ་ཚོགས་པ་ཞིག་བྱུང༌། རྟེན་འབྲེལ་གྱི་སྒོ་དེ་ལ་བརྟེན་ནས་རྗེ་འདི་ཉིད་བློ་ཕུག་ཆོས་ལ་གཏད། ཆོས་ཕུག་སྤྲང་ལ་གཏད། སྤྲང་ཕུག་བྲག་ལ་གཏད། བྲག་ཕུག་ཤི་ལ་གཏད་ནས་ལྟོ་གོས་གཏམ་གསུམ་ཁྱད་དུ་བསད་ནས། གྲོགས་བྱ་དང་བྱེའུ་རི་དྭགས་སོགས་ལ་བཅོལ་བའི་རི་ཁྲོད་ཉུལ་བའི་བཀྲ་ཤིས་རྟེན་འབྲེལ་དེ་འདི་ནས་འགྲིགས་པའོ། །གཞན་ཡང་རྗེ་བཀའ་དྲིན་གྱི་བླ་མ་རིན་པོ་ཆེས་རྗེས་ནས་ཁྱོད་རང་ཡུལ་དུ་ཐོན་སྐབས་འཇིག་རྟེན་པ་རྣམས་ཀྱི་ཁ་དཔེར། ཕ་ཤུལ་བུ་དང་གཡག་ཤུལ་གོ་བས་འཛིན་དགོས་ཟེར་བའི་སྲོལ་བཞིན་ཕའི་དཔོན་ཐོབ་འཛིན་དགོས་ལུགས་བཤད་པ་སོགས་ལ་གཏན་ནས་ཉན་མི་རུང་སོགས་ཀྱིས་ཞལ་གདམས་རིན་ཐང་བྲལ་བ་མང་དུ་གསུངས་སོ། །དེ་བཞིན་དུ་ཁོང་གིས་ཀྱང་རྒྱལ་སྲས་ལག་ལེན་ལ་སྐུ་ཚེ་གང་གི་ཉམས་ལེན་མཛད་ནས་འཇིག་རྟེན་ཆོས་བརྒྱད་བློས་བཏང་བ་ལགས་སོ། །འདི་སྐད་བདག་གི་ཐོས་པ་གཅིག་ཏུ་ན། ཀྱ་པུ་བླ་མ་ངག་དབང་རིན་ཆེན་བཟང་པོ་མཆོག་གི་ཞལ་གྱི་བུམ་བཟང་ལས་དཔལ་དུས་ཀྱི་འཁོར་ལོའི་དབང་ཆེན་ལེགས་པར་ཐོབ་པའི་སྐལ་བ་དང་ལྡན་པ་ཡིན་ནོ། །གཞན་ཡང་སྐབས་འདི་ཡས་མས་སུ་གདོང་ཡང་བླ་མའི་ཆོས་སྡེ་ལ། གསང་བདག་རྣམ་སྤྲུལ་རྡོ་རྗེ་དགྲ་འདུལ་གྱིས་བདེ་ཆེན་ཞིང་དབང་གསུངས་པ་དམ་པ་འདི་ཉིད་ཀྱིས་ལེགས་པར་ཞུས། ཀཿཐོག་སྨོག་ཚ་སྤྲུལ་སྐུ་འཇིགས་བྲལ་ཕྱོགས་ལས་རྣམ་རྒྱལ་ལས། རིག་འཛིན་བདུད་འདུལ་རྡོ་རྗེའི་གསུང་ཆོས་ཡོངས་རྫོགས་ཀྱི་དབང་ལུང་དང༌། རིག་འཛིན་ཀློང་གསལ་སྙིང་པོའི་གཏེར་ཆོས་ཀྱི་དབང་ལུང་ཡོངས་རྫོགས་གསན་པར་མཛད་དོ། །ཁྲ་དགེ་སློང་གིས་དམ་པ་འདི་ཉིད་ལ་གནས་ཆུང་གི་སྲོག་གཏད་དང་ལུང་ལེགས་པར་གནང༌། མཚན་ལ་ཀུན་བཟང་ཆོས་ཉིད་ཅེས་གསོལ་བའོ། །དེ་ཡང་བྱང་བླ་བྲང་བཀྲ་ཤིས་འཁྱིལ་གྱི་རབ་བྱུང་ངུར་སྨྲིག་འཆང་བ་སྟོང་ཕྲག་གསུམ་ལས་བྱང་རི་རྫ་དམར་ཀྱི་རྗེ་བཙུན་མི་ལ་གཉིས་པར་གྲགས་པ་འཛམ་གླིང་ལ་ལྡིར་བའི་དགེ་བའི་བཤེས་གཉེན་ཆེན་པོ་ཨ་ཁུ་དམ་ཆོས་རྒྱ་མཚོ་ལས་རྗེ་བཙུན་རྡོ་རྗེ་རྣལ་འབྱོར་མས་རྒྱ་གར་ཕ་དམ་པ་ལ་གནང་ནས་ཉམས་སུ་བླངས་བས་སྐུ་ཚེ་ལོ་ལྔ་བརྒྱ་དང་བདུན་ཅུ་དོན་གཉིས་ཐུབ་ཅིང་གྲུབ་པ་མཉེས། དེ་ནས་རིམ་གྱིས་མི་ཉག་རིན་རྒྱལ་དང་དེས་རས་སྟོན་བློ་གྲོས་མཚུངས་མེད། དེས་བླ་མ་ཚེ་དབང༌། དེས་གནས་རྙིང་བ་ཆོས་ཀྱི་རྒྱལ་མཚན། དེས་སྲས་ཀུན་དགའ་བདེ་ལེགས་རིན་ཆེན་རྒྱལ་མཚན་དཔལ་བཟང་པོ་སོགས་ལ་གནང་ནས་རྒྱུད་པའི་མེ་ཏོག་བཅུད་ལེན་གྱི་གདམས་པ་གསན་པ་སོགས་དམ་ཆོས་ཟབ་ཁྱད་ཅན་མང་དུ་མནོས། འཇམ་དབྱངས་བཞད་པ་བསྟན་པའི་རྒྱལ་མཚན་མཆོག་གི་ཡོངས་འཛིན་རིན་པོ་ཆེ་ཀླུ་ཤོད་དཀོན་མཆོག་རྒྱ་མཚོ་ལས། རྗེའི་ཐུན་མོང་མ་ཡིན་པའི་དབུ་མའི་ལྟ་ཁྲིད་དང༌། བློ་སྦྱོང་སྙན་རྒྱུད་ཆེན་མོའི་གདམས་པ། ཕྱག་ཆེན་ཚང་བ་རྒྱལ་བའི་གཞུང་ལམ། དེའི་འགྲེལ་བ་ཡང་གསལ་སྒྲོན་མེ། རྗེའི་ལམ་རིམ་ཆེན་མོ་དང༌། རྡོ་བཅུད་ལེན། ཆུ་བཅུད་ལེན་སོགས་ཟབ་ཆོས་མང་དུ་གསན། མདོར་ན་མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་མང་བོ་བསམ་སྦྱོར་གཉིས་ཀྱིས་ཁོང་གི་སྙིང་དང་དཔྲལ་བའི་མིག་བཞིན་དུ་ལེགས་པར་བསྟེན་ནས་མདོ་སྔགས་དམ་པའི་ཆོས་ལ་གསན་བསམ་རྒྱ་ཆེན་པོ་མཛད་ནས་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་རྗེས་སུ་བསྙེག་པར་མཛད་དོ། །དམ་པ་འདི་ཉིད་དགུང་གྲངས་སོ་གཉིས་པ་སྤྱི་ལོ་༡༩༥༨ པ། རབ་རྒྱལ་རྣམ་འཕྱང་ཞེས་ས་ཕོ་ཁྱིའི་ལོ་ལ་བོད་ལྗོངས་སྤྱིའི་བསྟན་སྲིད་ལ་ཉམས་རྒུད་ཆེན་པོ་བྱུང་དུས་ཡིན་ལ། སྤྱི་ལོ་༡༩༥༨་དང་༡༩༥༩་ལ་བོད་ཕལ་ཆེར་རྒྱ་ནག་གི་གཡོ་འོག་ཏུ་གྱུར། དེ་དུས་སུ་རྗེ་བཙུན་བླ་མ་དམ་པ་འདི་ཉིད་དགུང་གྲངས་སོ་དྲུག་པ། སྤྱི་ལོ་༡༩༦༢ ལོ། རབ་རྒྱལ་དགེ་བྱེད་ཅེས་པ་ཆུ་སྟག་ལོར་བླ་གྲྭ་རྣམས་ཀྱིས་ཨ་བྲ་གསོད་དགོས་པའི་ཁྲིམས་ལས་བཤོལ་ཏེ། ཇི་སྐད་དུ། རྐྱེན་ངན་དགེ་བའི་བཤེས་གཉེན་ཡིན། །ཞེས་སོགས་གསུངས་པ་ལྟར་རྐྱེན་དེ་ལ་བརྟེན་ནས་གནས་ངེས་མེད་དུ་རི་ཁྲོད་འགྲིམ་པར་བྱས་སོ།། །། སྨྲས་པ། བསླབ་གསུམ་ངུར་སྨྲིག་འཛིན་པའི་རྒྱན་གྱི་མཆོག ། གང་ཐུགས་གསེར་ལྡན་འཛིན་མའི་ཞིང་ས་རུ། །བསྟན་པའི་ནང་མཛོད་སོ་སོར་ཐར་བ་ཡི། །དགེ་སློང་སྡོམ་པའི་ལྷ་ཡི་ལྗོན་ཤིང་བཞད། །དང་བོའི་སངས་རྒྱས་དཔལ་ལྡན་དུས་འཁོར་གྱི། །གསང་ཆེན་རྡོ་རྗེ་ཐེག་པའི་རིམ་གཉིས་ལམ། །མཐར་ཐུག་གསང་ཆེན་ཆོས་ཀྱི་མཛོད་ཀློང་ནས། །སྒོ་ཕར་ཕྱེ་སྟེ་སྐལ་ལྡན་སློབ་མར་གཟིགས། །ཐོག་མར་སེམས་རྒྱུད་སྦྱོང་བའི་ཐབས་དམ་པ། །སྔོན་འགྲོ་ཆོས་རྣམ་ལྔ་ཡི་བསྒོམ་བཟླས་དང༌། །བསྐྱེད་རིམ་དབང་བཞི་ཐབས་ཀྱིས་རྒྱུད་སྦྱངས་ནས། །རྫོགས་རིམ་ཡེ་ཤེས་སྐྱེ་བའི་རྒྱུད་སྨིན་པ། །བླ་མེད་རྒྱུད་རྒྱལ་དཔལ་ལྡན་དུས་འཁོར་གྱི། །རྒྱུད་ཀྱི་ཡང་སྙིང་ཟབ་ལམ་རྣལ་འབྱོར་གྱི། །རྫོགས་རིམ་སྦྱོར་བ་དྲུག་གི་དབང་ལུང་དང༌། །བྱིན་བརླབ་དོན་བརྒྱུད་མན་ངག་ཆུ་བོ་ཀུན། །ལེགས་པར་མནོས་ནས་ཉམས་ལེན་གནད་བསྣུན་མཛད། །བསྒོམ་པའི་འབྲས་བུ་ཉམས་དང་རྟོགས་པ་སོགས། །ཡོན་ཏན་ལོ་འབྲས་ཁུར་གྱིས་རབ་བརྗིད་ཅིང༌། །འཇིག་རྟེན་མིག་གཅིག་རྣལ་འབྱོར་དབང་ཕྱུག་གྱུར། །ཅེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་མདོ་སྔགས་རབ་འབྱམས་ལ་ཐོས་བསམ་བྱས་ཏེ་ཐོས་དོན་ཉམས་བཞེས་མཛད་པའི་སྐབས་རྣམ་པར་བཤད་པ་རྫོགས་སོ།། །། ༈ དུས་གསུམ་རྒྱལ་དང་རྒྱལ་སྲས་ཐམས་ཅད་ལ། །ཕྱག་འཚལ་མཆོད་འབུལ་སྡིག་ལྟུང་སོ་སོར་བཤགས། །རྣམ་ཐར་འདི་ཉིད་མཐོང་ཐོས་སྐྱེ་བོ་ཀུན། །རྣམ་གྲོལ་ལམ་བཟང་འཇུག་པར་བྱིན་གྱིས་རློབས། །༈ བཞི་བ་གནས་ངེས་མེད་ལ་སྒྲུབ་པ་གཙོ་བོར་མཛད་ཅིང་སྐལ་ལྡན་གྱི་གདུལ་བྱ་རྗེས་སུ་བཟུང་བའི་སྐབས་རྣམ་པར་བཤད་པ་ལ།
རྗེ་བཙུན་བླ་མ་དམ་པ་རྗེ་ངག་དབང་བརྩོན་འགྲུས་མཆོག་མཁས་བཙུན་བཟང་གསུམ་གྱི་བླ་མ་དུ་མ་བསམ་སྦྱོར་གཉིས་ཀྱིས་ཚུལ་བཞིན་དུ་ཡང་དག་པར་བརྟེན་ནས་གཞུང་ལུགས་རྒྱ་མཚོ་ཆེན་པོ་ཧུབ་ཀྱིས་བཞེས་ཤིང་སྦྱངས་པའི་རྩལ་ཐོན། མཚན་ལྡན་གྱི་བླ་མ་གང་མང་གི་མདུན་ནས་དབང་ལུང་ཁྲིད་གསུམ་གསན་པ་དང༌། མཁས་པའི་ཕྱག་བཞེས་བཞིན་ཆད་ལྷག་མེད་པར་སྦྱངས་བ་མཐར་ཕྱིན་པ་བྱས་པའི་ཚུལ་བཤད་ཟིན་པ་དེ་བཞིན་ནོ། །དེ་ནས་སྤྱི་ལོ་༡༩༦༢ལོ། རབ་རྒྱལ་དགེ་བྱེད་ཅེས་པ་ཆུ་སྟག་ལོ། དམ་པ་འདི་ཉིད་དགུང་གྲངས་སོ་དྲུག་པ་ལ། རྒྱལ་ཁབ་ཀྱིས་ཨ་བྲ་གསོད་དགོས་པའི་ཁྲིམས་བཅས་པ་ལས་བཤོལ་ཏེ་འཇིག་རྟེན་ཆོས་བརྒྱད་ལ་ཞེན་པ་ལོག་སྟེ་རང་ཡུལ་ཕ་མ་ཉེ་དུ་རྣམས་རིང་དུ་སྤངས་ནས་བྱ་དང་རི་དྭགས་ལས་གྲོགས་གཞན་མེད་པའི་དབེན་པའི་རི་ཁྲོད་དུ་རྒྱལ་སྲས་ཀྱི་སྤྱོད་པ་ཉམས་བཞེས་ལ་གཞོལ་བར་ཕེབས་པ་ཡིན་ལ། དེ་ཡང་རང་ཡུལ་དང་ཕ་མ་ཉེ་དུ་སོགས་རིང་དུ་སྤངས་ནས་གྲོགས་བྱ་དང་རི་དྭགས་ལས་གཞན་མེད་པའི་གནས་རྣམས་སུ་ཐོས་དོན་ཇི་བཞིན་རྒྱུད་ལ་སྦྱར་ནས་ཚེ་གཅིག་ལ་སྒྲུབ་པ་ཉམས་སུ་ལེན་པའི་དམ་བཅའ་ཐུགས་ལ་དགོངས་ནས། དེ་ཡང་ཇི་སྐད་དུ། དང་པོ་རྒྱ་ཆེན་ཐོས་པ་མང་དུ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་དོན་དུ་བསྔོས། །ཞེས་རྗེ་བདག་ཉིད་ཆེན་པོས་གསུངས་པ་ལྟར་མདོ་སྔགས་ཀྱི་ཉམས་ལེན་ཟུང་དུ་དྲིལ་བའི་ཉམས་ལེན་གྱི་ཕྱག་སྲོལ་དྲི་མ་མེད་པའི་རྣམ་ཐར་བསྐྱངས། །ཕྱི་འདུལ་ཁྲིམས་དག་པའི་ཀུན་སྤྱོད་བཀའ་གདམས་རྣམ་ཐར་གཙང་མའི་བརྟུལ་ཞུགས་ཀྱིས་བསྡམས་ཤིང༌། ནང་བྱང་ཆུབ་ཀྱི་སེམས་རྣམ་པ་གཉིས་དང་རིམ་གཉིས་ཟབ་མོའི་རྣལ་འབྱོར་ལ་ཐུན་བཞི་ཆད་མེད་མཛད་པ་དང༌། ཚེ་སྲོག་བློས་བཏང་ནས་ཉིན་མཚན་ཀུན་ཏུ་སྒྲུབ་པ་སྙིང་པོར་མཛད། རྒྱུན་དུ་ལོ་གཅིག་ནང་ནད་སོགས་གློ་བུར་གྱི་རྐྱེན་གཞན་མེད་ཚེ་མང་ནའང་མཚམས་ཐེངས་གཉིས་ལས་ལྷག་གྲོལ་མ་མྱོང༌། དགོན་པའམ་གྲོང་བའི་ནང་དུ་གདུལ་བྱའི་དོན་དུ་ཕེབས་དགོས་བྱུང་ནའང་ཉི་མ་བཞི་དང་ལྔ་ལས་ལྷག་པ་མི་བཞུགས་པར་དབེན་གནས་སུ་ཕེབས། དབེན་པའི་གནས་སུ་འཚོ་བ་སྦྱོར་མཁན་མེད་པས་ཚེ་ཡུན་རིང་པོར་མེ་ཏོག་བཅུད་ལེན་དང༌། རྡོ་བཅུད་ལེན། ཏིང་ངེ་འཛིན་གྱི་ཟས་བཞེས་ནས་ཉིན་མཚན་ཀུན་ཏུ་བསྐྱེད་རྫོགས་ཀྱི་རྣལ་འབྱོར་ལ་རྩེ་གཅིག་ཏུ་གཞོལ་བས་ན། ཉམས་རྟོགས་ཡོན་ཏན་གྱི་ཀློང་བརྡོལ་ཞིང་གྲུབ་པའི་དབང་ཕྱུག་ཏུ་གྱུར། རྒྱལ་ཁབ་ཀྱི་ཆོས་ལུགས་བཅོས་བསྒྱུར་ཏེ་དགོན་པ་རྣམས་གཏོར་བཤིགས་བཏང་སྟེ་བླ་གྲྭ་མཁས་བཙུན་བཟང་གསུམ་འཛོམས་པ་རྣམས་བཙོན་དུ་ཁྲིད་པ་དང༌། དེའི་ལྷག་མ་རྣམས་སྐྱ་སར་ཕབ་པའི་ལོ་རབས་དང༌། རིག་གནས་གསར་རྗེ་ཞེས་པ་ཡ་རབས་ཀྱི་ལུགས་སྲོལ་བསྣུབས་པ་དང༌། དམ་པ་རྣམས་ལྷ་འདྲེ་གདོན་བགེགས་སུ་མིང་བཏགས་ནས་སྡུག་ལ་སྦྱོར་བའི་དུས་སུའང་ཉམས་དགའི་དབེན་པའི་གནས་སུ་བཞུགས་ཤིང༌། སྤྱིར་མཆོག་གསུམ་དང་ཁྱད་པར་མགོན་པོ། ཆོས་རྒྱལ། གནས་ཆུང་རྣམས་ཀྱིས་སྲུང་སྐྱོབ་མཛད་པའི་མཐུས། རྒྱལ་ཁབ་ཀྱི་ཁྲིམས་ཀྱི་འཇིགས་པ་མཐོང་མ་མྱོང་ཞིང༌། རི་དྭགས་བཞིན་དུ་མི་མེད་ཀྱི་ལུང་སྟོང་འགྲིམས་ནས་བཞུགས་ཤིང༌། དམ་པ་འདི་ཉིད་ནི་ནང་བ་སངས་རྒྱས་པའི་གྲུབ་མཐའ་ཇོ་འབྲུག་བཀའ་གསུམ། ས་དགེ་རྙིང་གསུམ་ཀུན་ལའང་ཆགས་སྡང་དང་ཕྱོགས་རིས་ཅུང་ཟད་ཙམ་ཡང་མི་མཛད་པར་གཞན་སློབ་ཚོགས་ལ་གྲུབ་མཐའ་ཕྱོགས་རིས་བྱེད་མི་རུང་སྟེ། གངས་ཅན་གྱི་གྲུབ་མཐའ་ཀུན་འབྱེད་པའི་མཁས་དབང་རྣམས་སངས་རྒྱས་ཀྱིས་ཡང་ཡང་ལུང་བསྟན་པ་དང༌། དེ་དག་གི་གྲུབ་མཐའ་ཀུན་གདུལ་བྱ་སོ་སོར་གསུངས་བའི་ནང་བ་སངས་རྒྱས་པ་ཁོ་ན་ཡིན་པས་ཀུན་ལ་དག་སྣང་སྦྱང་དགོས་ཏེ། དཔེར་ན་གངས་རིའི་ལྗོངས་འདིར་གཞན་སྟོང་དབུ་མའི་ཤིང་རྟའི་སྲོལ་འབྱེད་ཀུན་མཁྱེན་ཇོ་ནང་བ་དོལ་པོ་ཤེས་རབ་རྒྱལ་མཚན་རྒྱལ་བའི་ལུང་གིས་བསྔགས་པ་ཚུལ་འདི་ལྟ་སྟེ། གཙུག་ཏོར་རྣམ་པར་རྒྱལ་མའི་རྒྱུད་ལས། བདེ་གཤེགས་མྱ་ངན་འདས་འོག་ནས། །ལོ་ནི་སྟོང་དང་ཕྱེད་རིང་ཚེ། །གདོང་དམར་ཡུལ་དུ་ང་འདྲ་བའི། །བསྟན་པ་འཛིན་པའི་དགེ་སློང་ཞིག །ཆུ་བོ་ལྗོན་ཤིང་འཕྲེང་མཛེས་སུ། །ཀ་ཡོ་རི་ཡི་གྲོང་ཁྱེར་དུ། །ཡབ་ནི་ཡེ་ཤེས་དབང་ཕྱུག་ཆེ། །ཡུམ་ནི་ཚུལ་ཁྲིམས་རྒྱན་ཞེས་གྲགས། །སྲས་ནི་སངས་རྒྱས་མིང་ཅན་འབྱུང༌། །ང་ཡི་བསྟན་པའི་རྒྱལ་མཚན་འཛུགས། །ཆོས་ཀྱི་དུང་འབུད་དར་ཕྱར་འགྱུར། །ཞེས་དང༌། ཨ་དྲ་ཤི་ལ་བཀོད་པའི་མདོ་ལས། ཨ་དྲ་ཤི་ལས་བཅོམ་ལྡན་འདས་ལ་ཞུས་ནས། ཆོས་ཀྱི་རྒྱལ་པོས་གསོལ་པ། རྟག་ཏུ་གཟིགས་པ་སྤྱན་རས་གཟིགས། །མ་འོངས་དུས་ཀྱི་ཐ་མ་ལ། །སྙིགས་དུས་སེམས་ཅན་སྐྱོབ་པའི་ཕྱིར། །མ་ཧཱ་སུ་རའི་བྱང་ཕྱོགས་སུ། །ཁ་བ་ཅན་གྱི་ཡུལ་དབུས་ན། །གྲོང་ཁྱེར་ཆེན་པོ་ཀ་ཡོ་རི། །རྣམ་པར་གྲགས་པའི་ས་བདག་ནི། །ཡེ་ཤེས་དབང་ཕྱུག་ཡབ་སྨོས་པ། །དེ་ཡི་སྲས་སུ་བལྟམས་པར་མཐོང༌། །དེ་ལ་གང་འབྲེལ་སེམས་ཅན་ཀྱང༌། །འཕགས་པའི་གང་ཟག་ཤ་སྟག་གོ །ཞེས་སོགས་མདོ་རྒྱུད་ཀྱི་ལུང་བརྒྱ་ཕྲག་དུ་མར་རྣམ་ཐར་གསལ་སྒྲོན་ན་གསལ་བ་ལྟར་ཡིན་ལ། དེ་བཞིན་དུ་དགེ་ལྡན་པའི་བསྟན་པ་གསེར་བཙོ་མ་ལྟ་བུ་འདི་ཉིད་སྲོལ་འབྱེད་པའི་རྗེ་ཙོང་ཁ་བ་བློ་བཟང་གྲགས་པ་ལུང་དུ་བསྟན་པ་ནི། འཇམ་དཔལ་རྩ་རྒྱུད་ལས། འཇིག་རྟེན་ང་ནི་མྱ་ངན་འདས། །ས་ཡི་སྟེང་འདི་སྟོངས་གྱུར་ན། །ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ན་ཡོད་པ་ཡིན། །ཞེས་དང༌། མཁའ་འགྲོ་གསང་བའི་རྒྱུད་ལས། འཇམ་དཔལ་སྤྲུལ་བ་བློ་བཟང་གྲགས། །བསྟན་པ་རྒྱས་བྱེད་ངོ་མཚར་ཅན། །ཞེས་སོགས་གསུངས་པ་ལྟར་དང༌། དེ་ལྟར་ཆེ་བ་དྲུག་ལྡན་གྱི་སྔ་འགྱུར་རྙིང་མའི་བསྟན་པའི་མངའ་བདག་སློབ་དཔོན་པད་མ་འབྱུང་གནས་ལུང་བསྟན་པའི་ཚུལ་འདི་ལྟ་སྟེ། དབུས་གྱུར་ཚལ་ལུང་བསྟན་པའི་མདོ་ལས། འདི་ནས་ལོ་ནི་བཞི་གཉིས་ན། །དྷ་ན་ཀོ་ཤའི་མཚོ་གླིང་ན། །རང་འཁྲུངས་པདྨའི་སྟེང་དུ་ནི། །པདྨ་འབྱུང་ནས་ཞེས་བྱ་བ། །གསང་སྔགས་བསྟན་པའི་བདག་པོ་འབྱུང༌། །ཞེས་དང༌། བླ་མེད་དོན་རྫོགས་འདུས་པའི་རྒྱུད་ལས། འདི་ནས་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །འཇིག་རྟེན་ཀུན་ལས་རྒྱལ་བའི་མཆོག །ཨུ་རྒྱན་ཡུལ་དུ་ང་ཉིད་འབྱུང༌། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པ་ལུང་དུ་སྟོན། །ཞེས་གསུངས་པ་ལྟར་ཡིན་པས་དག་སྣང་ལས་ཕྱོགས་རིས་མི་བྱེད་པ་གལ་ཆེ། དེ་ལྟར་བོད་འདིར་དར་བའི་ནང་བ་བའི་ཕྱག་རྫོགས་དབུ་གསུམ་གྱི་བསྟན་པ་ཐམས་ཅད་བཟང་ངན་མེད་པར་ཐམས་ཅད་ཀྱི་རང་རང་གི་ལྟ་གྲུབ་ལ་བརྟེན་ནས་གྲུབ་པའི་སར་གཤེགས་པ་ཤ་སྟག་བྱུང་བ་དང༌། རྣལ་འབྱོར་ཉམས་མྱོང་ཅན་གྱིས་དཔྱད་ན་དགོངས་པ་གཅིག་ཏུ་འདུས་པ་ཡིན་ཏེ། པཎ་ཆེན་བློ་བཟང་ཆོས་རྒྱན་གྱི་གསུང་ལས། ལྷན་གཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང༌། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང༌། །ངེས་དོན་ལུང་རིགས་ལ་མཁས་ཤིང༌། །ཉམས་མྱོང་ཅན་གྱི་རྣལ་འབྱོར་བས། །དཔྱད་ན་དགོངས་པ་གཅིག་ཏུ་འབབ། །ཅེས་དང༌། ཤར་སྐལ་ལྡན་རྒྱ་མཚོའི་གསུང་སྒྲོས་ལས། གཞན་གྲུབ་མཐའ་ཆོས་ལུགས་སྣ་ཚོགས་ལ། །ཡིད་གཡོ་བའི་དད་པ་སྐྱེས་ན་རབ། །དེ་མིན་ནའང་དག་སྣང་སྦྱོང་བ་དང༌། །དོན་མེད་པར་མི་སྨོད་དམ་བཅའ་ཡིན། །ཞེས་པ་དང༌། ཆོས་རང་རང་མོས་པའི་ངོ་ན་ཟབ། །མཆོག་སངས་རྒྱས་ཐོབ་པའི་ཐབས་དམ་པ། །ས་དགེ་ལྡན་གསར་རྙིང་ཀུན་ལ་ཡོད། །ཅེས་དང༌། རྡོ་གྲུབ་འཇིགས་མེད་བསྟན་པའི་ཉི་མའི་ལྟ་མགུར་མུན་སེལ་ལས། ལར་རྫོགས་ཆེན་བློ་འདས་རིག་པ་དང༌། །དཔལ་དུས་འཁོར་རྒྱུད་སྡེའི་རིང་ལུགས་ཀྱི། །ལམ་མི་འགྱུར་བདེ་བའི་བསྒྲུབ་གཞི་གཉིས། །མིང་འདོགས་ཚུལ་ཙམ་ལས་སོ་སོར་མེད། །ཅེས་སོགས་ཀྱི་ལུང་དྲངས་ནས་ལྟ་བ་དང་རང་ལུགས་གང་ལྟར་ཡིན་ཀྱང་རང་ཕྱོགས་ཀྱི་གྲུབ་མཐའི་ཕྱོགས་ཞེན་མེད་པར་བསྟན་པ་ཐམས་ཅད་འགལ་མེད་དུ་འཛིན་པའི་སྐྱེས་བུ་དམ་པའི་རྣམ་ཐར་སྐྱོང་བ་ལས་གཞན་གྲུབ་མཐའ་ལ་སྨོད་ན་གསང་བ་སྔགས་ནས་བཤད་པའི་རྩ་ལྟུང་བཅུ་བཞི་ལས་གྲུབ་མཐའ་སྨོད་པའི་རྩ་ལྟུང་འབྱུང་བར་འགྱུར་བས་གྲུབ་མཐའི་ཆགས་སྡང་ལ་བདག་ལེགས་སུ་འདོད་པ་རྣམས་ཀྱིས་དོགས་ཟོན་གྱིས། དེ་ཡང་སྔར་བོད་ཀྱི་བསྟན་སྲིད་ལ་ཆོས་ལུགས་ཀྱི་ཆགས་སྡང་རྩོད་ནས་ཉམས་ཆག་ཆེན་པོ་བྱུང་ཡོད་པ་འདས་པའི་ལོ་རྒྱུས་ན་གསལ་བ་ལྟར་ཡིན་པས་ཀུན་ལ་དག་སྣང་སྦྱོང་བ་གལ། གལ་ཏེ་དག་སྣང་སྦྱང་མ་ནུས་ན་རང་གི་གྲུབ་མཐའ་ལ་འབད་བརྩོན་བྱས་ཏེ་གཞན་ལ་ཞེ་སྡང་བྱེད་མི་རུང༌། དེ་ལྟ་མིན་ན་ཆོས་སྤངས་ཀྱི་ལས་བསགས་པ་ལ་ཉེ་བའོ། །ཞེས་སོགས་ཞལ་གདམས་ཡང་ཡང་གསུངས་ལ། དེས་ན་དམ་པ་འདི་ཉིད་ཀྱིས་གདུལ་བྱ་དགེ་ལྡན་པ་ཞིག་ཡིན་ན་དགེ་ལྡན་པའི་རང་ལུགས་གཙོ་བོར་བྱས་ནས་ཆོས་འཆད། དེ་བཞིན་དུ་རྙིང་མ་པ་དང༌། ཇོ་ནང་པ་དང༌། བཀའ་བརྒྱུད་པ་སོགས་གདུལ་བྱའི་བློ་དང་དབང་བོ་འཚམས་པར་དམ་པའི་ཆོས་ཀྱི་གྲུ་ཆར་འཇོ་བར་མཛད་པ་ཡིན་ནོ། །དེ་ཡང་ཇི་སྐད་དུ།¿སྤྱོད་འཇུག་ལས། སྐལ་ལྡན་ཟླ་འོད་ཙནྡན་གྱིས་བསིལ་བའི། །ཡངས་བའི་རྡོ་ལེབ་ཁང་བཟང་ཉམས་དགའ་བར། །སྒྲ་མེད་ཞི་བའི་ནགས་ཀླུང་གཡོབ་པ་ཡིས། །གཞན་ལ་ཕན་དོན་སེམས་ཤིང་འཆག་པར་བྱེད། །ཁང་སྟོང་ཤིང་དྲུང་ཕུག་དག་ཏུ། །གང་དུ་ཇི་སྲིད་འདོད་གནས་ཤིང༌། །ཡོངས་འཛིན་བསྲུང་བའི་སྡུག་བསྔལ་སྤངས། །ལྟོས་པ་མེད་པའི་བག་ཡངས་སྤྱོད། །རང་དབང་སྤྱོད་ཅིང་ཆགས་མེད་ལ། །གང་དུ་ཡང་ནི་འབྲེལ་མེད་པའི། །ཆོག་ཤེས་བདེ་སྤྱོད་གང་ཡིན་པ། །དབང་པོས་ཀྱང་ནི་དེ་རྙེད་དཀའ། །དེ་ལ་སོགས་པ་རྣམ་པ་ཡིས། །དབེན་པའི་ཡོན་ཏན་བསམ་བྱས་ནས། །ཞེས་སོགས་གསུངས་པ་ལྟར་གྱི་དབེན་པའི་ཡོན་ཏན་ཀུན་ཚང་བ་གནས་ཆེན་པད་མ་རི་མཐོ་སོགས་སུ་བྱོན་ནས། སྤྱོད་འཇུག་ལས། རྣམ་རྟོག་ཉེ་བར་ཞི་བ་དང༌། །བྱང་ཆུབ་སེམས་ནི་བསྒོམ་པར་བྱ། །བདག་དང་གཞན་དུ་མཉམ་པ་ནི། །དང་པོ་ཉིད་དུ་འབད་དེ་བསྒོམ། །བདེ་དང་སྡུག་བསྔལ་མཉམ་པས་ན། །ཐམས་ཅད་བདག་བཞིན་བསྲུང་བར་བྱ། །ཞེས་སོགས་གསུངས་བ་ལྟར་གྱི་མན་ངག་ལ་ལྷག་པར་ཉམས་ལེན་གྱི་མཐིལ་མཛད། མཁས་བཙུན་བཟང་གསུམ་གྱི་སྒོ་ནས་རྒྱལ་བའི་བསྟན་པ་རིན་པོ་ཆེ། །རང་གི་སྲོག་ལས་ཀྱང་གཅེས་པའི་སྒོ་ནས་རྒྱལ་བསྟན་གྱི་ཁུར་མཐའ་དག་གཅིག་ཏུ་བཞེས། གཞན་ཡང༌། གཏེར་ཆེན་མཆོག་གྱུར་བདེ་ཆེན་གླིང་བའི་གནས་ཀྱི་མདོ་བྱང་ལས། དེ་ལ་གནས་ཀྱི་ཕུན་ཚོགས་ནི༔ ཐོག་མ་ཉིད་དུ་རྒྱལ་བས་གསུངས༔ སྒྲུབ་པའི་གནས་དེ་མ་ལེགས་ན༔ སྒྲུབ་པ་ཐམས་ཅད་དོན་མེད་འགྱུར༔ སྒྲུབ་པའི་གནས་ཀྱི་མཆོག་རྣམས་ལ༔ བསྒྲུབ་ན་དངོས་གྲུབ་འབད་མེད་འགྲུབ། །ས་ཕྱོགས་ཕལ་ལ་སྒྲུབ་པ་བས༔ ཕུན་ཚོགས་གནས་སུ་འབུམ་གྱིས་ལྷག༔ ཕུན་སུམ་ཚོགས་པའི་གནས་དེ་ནི༔ ཨུ་དུམ་ཝ་རའི་མེ་ཏོག་བཞིན༔ བརྒྱ་ལམ་ལ་ནི་རེ་རེ་ཙམ༔ ཞེས་གསུངས་པའི་གནས་ཀྱི་ཡོན་ཏན་རྣམས་ཐུགས་ལ་དགོངས་ནས་སྔ་གཞུག་ཏུ་རྒྱ་ནག་རི་བོ་རྩེ་ལྔ། གླང་ཆེན་འགྱིང་རི། རི་བོ་བྱ་རྐང༌། གཤགས་རལ་གནས་ཆེན། དགྲ་བཅོམ་ལྔ་བརྒྱ་དང༌། རི་བོ་གྲུ་འཛིན་སོགས་རྒྱ་ནག་གི་གནས་རི་གྲགས་ཆེ་བ་རྣམས་དང༌། གནས་ཆེན་པདྨ་རི་མཐོ། ཟ་ལུང་རི་ཁྲོད། རྒྱལ་སྲས་རི་ཁྲོད། རྒྱང་རྩེའི་རི་ཁྲོད། གནམ་ཆ་རི་ཁྲོད། བྲག་དཀར་སྤྲེལ་རྫོང་ཐུགས་རྗེ་ཆེན་པོའི་གནས། བྲག་སྐྱ་ལྷུན་གྲུབ་རྫོང༌། གནས་དཀར་མོ་རྫོང༌། ལྭ་ནག་སྒྲུབ་ཕུག ཤུགས་པ་ར་ཡས། རྗེ་བླ་མ་མཉམ་མེད་ཙོང་ཁ་བ་བློ་བཟང་གྲགས་པའི་སྒྲུབ་ཕུག རས་ཆུང་ཕུག་པ། སྲག་མང་དང༌། དཀར་མདོང༌། སྨན་ལུང་བྲག་དཀར་དང༌། འཛི་སྟོད་དར་ལྔའི་རི་ཁྲོད། སེ་རའི་ཉི་མ་རི་ཁྲོད། ས་བཅུའི་དབང་ཕྱུག་རྨ་ཆེན་སྦོམ་ར་སོགས་གནས་ཆེན་རྣམས་སུ་འགྲིམས་ནས་སྒྲུབ་པ་སྙིང་པོར་བྱས་ཏེ། སྔ་གཞུག་ཏུ་མི་ལོ་བཞི་བཅུ་ལྷག་ལ་བོད་ཀྱི་བྱང་ཤར་གྱི་གནས་ཆེན་ཁག་དང༌། སི་ཁྲོན་དང་དབུས་གཙང་གི་གནས་ཆེན་དང༌། མཚོ་སྙིང་མ་ཧཱ་དེ་ཝ་སོགས་མཚོ་སྔོན་ཕྱོགས་ཀྱི་གནས་འགང་ཆེན་སོགས་གནས་བརྒྱ་དང་ལྔ་བཅུ་ལྷག་གི་བྲག་ཕུག་ཏུ་ཐོས་དོན་ཇི་བཞིན་རྒྱུད་ལ་སྦྱོར་བའི་ཉམས་བཞེས་ལ་གཞོལ་བའི་སྒྲུབ་པའི་རྒྱལ་མཚན་མཁའ་ལ་བསྒྲེངས། ལྷག་པར་དུ། ཇི་སྐད་དུ། མདོར་ན་དངོས་དང་བརྒྱུད་པ་ཡིས། །ཕན་བདེ་མ་རྣམས་ཀུན་ལ་འབུལ། །མ་ཡི་གནོད་དང་སྡུག་བསྔལ་ཀུན། །གསང་བའི་བདག་ལ་ལེན་པར་ཤོག །དེ་དག་ཀུན་ཀྱང་ཆོས་བརྒྱད་ཀྱི། །རྟོག་པའི་དྲི་མས་མ་སྤགས་ཤིང༌། །ཆོས་ཀུན་སྒྱུ་མར་ཤེས་པའི་བློས། །ཞེན་མེད་འཆིང་བ་ལས་གྲོལ་ཤོག །ཞེས་གསུངས་པ་ལྟར་རིན་ཆེན་བྱང་ཆུབ་ཀྱི་སེམས་བདག་བས་གཞན་གཅེས་དང༌། བདེ་སྡུག་གཏོང་ལེན་བསྒོམ་པ་དང༌། བློ་སྦྱོང་མཚོན་ཆ་མ་ལས། ལུས་ལ་མི་བཟད་ན་ཚ་བྱུང་བའི་ཚེ། །འགྲོ་བའི་ལུས་ལ་གནོད་པ་བསྐྱལ་བ་ཡི། །ལས་ངན་མཚོན་ཆ་རང་ལ་འཁོར་བ་ཡིན། །ད་ནི་དུཿཁ་མ་ལུས་རང་ལ་བླང༌། །དབང་མེད་གཞན་གྱིས་འཁོལ་ཞིང་མནར་བའི་ཚེ། །དམན་ལ་སྡང་ཞིང་བྲན་དུ་བཀོལ་བ་ཡི། །ལས་ངན་མཚོན་ཆ་རང་ལ་འཁོར་བ་ཡིན། །ད་ནི་ལུས་སྲོག་གཞན་དུ་བཀོལ་བར་བྱ། །མི་སྙན་ཚིག་རྣམས་རྣ་བར་བྱུང་བ་ན། །ཕྲ་མ་ལ་སོགས་ངག་གི་ཉེས་པ་ཡི། །ལས་ངན་མཚོན་ཆ་རང་ལ་འཁོར་བ་ཡིན། །ད་ནི་ངག་གི་སྐྱོན་ལ་སྨད་པར་བྱ། །ཞེས་སོགས་གསུངས་པ་ལྟར་སྡུག་བསྔལ་ལམ་ཁྱེར་གྱི་གདམས་པ་སོགས་ལ་ཉམས་ལེན་མཐར་ཕྱིན་པར་མཛད་ལ། རིག་གནས་གསར་བརྗེ་ཆེན་མོ་ཞེས་ཆོས་པ་ཐམས་ཅད་ལྷ་འདྲེ་གདོན་བགེགས་ལ་བརྩིས་ནས་ཐུབ་ཚོད་བཏང་བའི་སྐབས་སུ་ཡང་མི་མེད་དབེན་པའི་ནགས་ཁྲོད་རྣམས་སུ་མེ་ཏོག་བཅུད་ལེན་གྱི་གདམས་པ་ལ་བརྟེན་ནས། ཇི་སྐད་དུ། སྙིང་པོ་མེད་པའི་ཚེ་འདིའི་བྱ་བ་དོར། །ཕུན་ཚོགས་དབེན་པའི་གནས་སུ་བག་ཕབ་སྟེ། །ཉམས་ལེན་དམ་ཆོས་སྒྲུབ་པའི་ཆ་རྐྱེན་དུ། །ཟབ་མོའི་བཅུད་ལེན་གདམས་པ་བདག་གིས་སྦྱིན། །ཞེས་གསུངས་པ་ལྟར་རྡོ་བཅུད་ལེན་དང༌། ཆུ་བཅུད་ལེན་དང༌། མེ་ཏོག་བཅུད་ལེན་སོགས་ལ་བརྟེན་ནས་དབེན་པའི་གནས་སྒྲུབ་པ་ལ་གཞོལ། དེ་ཡང་བཅུད་ལེན་བསྒོམ་བཟླས་མདོར་བསྡུས་ནི། མཆོག་གསུམ་ལ་ཡིད་ཁྱེད་ཤེས་ཀྱི་སྐྱབས་འགྲོ་དང༌། སེམས་བསྐྱེད་ཚད་མེད་བཞི་སྔོན་དུ་འགྲོ་བའི་སྒོ་ནས། སྟོང་སྦྱངས་དང་བཅས་ཏེ་རང་ཉིད་རྡོ་རྗེ་རྣལ་འབྱོར་མར་བསྐྱེད་ནས་དུས་གསུམ་གྱི་རྒྱལ་བ་སྲས་དང་བཅས་པ་སྤྲིན་གྱི་ཕུང་བོ་བཞིན་དུ་སྤྱན་དྲངས། དེ་དག་གི་བྱིན་རླབས་དང་ས་ཆུ་མེ་རླུང་ནམ་མཁའ་སྟེ་འབྱུང་བ་ལྔའི་དྭངས་བཅུད་ཐམས་ཅད་དང༌། འཇིག་རྟེན་ཁམས་ཀྱི་དཔལ་དང་ཕུན་སུམ་ཚོགས་པ་ཐམས་ཅད་འོད་དང་འོད་ཟེར་གྱི་རྣམ་པར་བཀུག་ནས་མེ་ཏོག་སྣ་ཚོགས་ཀྱི་ཕྱེ་མ་རིལ་བུར་བྱས་པ་ལ་ཐིམ་པར་བསམ་ནས། དེ་དག་ཟག་མེད་ཀྱི་བདུད་རྩིར་དམིགས་ཏེ། ཨོཾ་སརྦ་བུདྡྷ་ཌཱཀྐི་ནི་རི་ནི་ས་ཨ་མྲི་ཏ་སིདྷི་ཧཱུཾ ཞེས་བརྒྱ་སྟོང་ཁྲི་འབུམ་བཟླས་ནས་རིལ་བུ་དེ་མིད་པས་ལུས་ཐམས་ཅད་ཡེ་ཤེས་ཀྱི་བདུད་རྩིས་གང་ཟག་པ་མེད་པའི་བདེ་བས་སྟོང་ཉིད་ཡུལ་དུ་བྱས་པའི་བདེ་སྟོང་གི་ཏིང་ངེ་འཛིན་སྐྱེས་པར་བསམ་ཞིང་གསོལ་བར་བྱའོ། །ཕན་ཡོན་ནི་ནད་ཀུན་ལ་ཕན། ཚེ་རིང༌། ལུས་མདངས་ལེགས། རྒས་ཁ་སྲ། སྐྲ་དཀར་གཉེར་མ་ཉུང༌། ནད་ཡམས་ཀྱིས་མི་ཚུགས། ལུས་ལ་ཤིག་སྲོ་མི་འབྱུང༌། ཤེས་རབ་ཆེ། རིག་པ་དྭངས། དད་ཟས་དང་ལོག་འཚོས་མ་གོས་པས་ས་དང་ལམ་གྱི་རྟོགས་པ་སྐྱེ་སླ། ཉིན་པར་མི་འདུ། མཚན་མོ་མཁའ་འགྲོ་འདུ། དུས་རྒྱུན་དུ་ཟས་འདུ་བ་སོགས་བཅུད་ལེན་གྱི་མན་ངག་ནས་བསྟན་པའི་ཕན་ཡོན་རྣམས་མངོན་དུ་གྱུར་བ་ཡང་བསམ་གྱིས་མི་ཁྱབ་པའི་སྐྱེས་བུ་ཆེན་པོ་ཞིག་གིས་མཛད་པ་ལགས་སོ། །དེ་ཡང་དཔལ་འཁོར་ལོ་སྡོམ་པའི་ཕོ་བྲང་གནས་མཆོག་བྲག་དཀར་གྱི་དབེན་གནས་སུ་སྦྱར་བའི་མདོ་སྔགས་ལམ་གྱི་བསླབ་བྱ་མགུར་མ་ནི། མགོན་རྗེ་བཙུན་འཇམ་དབྱངས་མི་ཡི་གར། །རྗེ་ཐམས་ཅད་མཁྱེན་པ་བློ་བཟང་གྲགས། །དེང་སྙིགས་དུས་བཤེས་གཉེན་ཚུལ་བཟུང་བའི། །ཕ་བླ་མའི་ཞབས་རྡུལ་སྤྱི་བོས་མཆོད། །སྔོན་ལས་སྨོན་མཐུན་པའི་སློབ་བུ་ཡི། །ཡིད་མགུ་ཕྱིར་བསླབ་བྱའི་གླུ་འདི་སྤེལ། །མགོན་མཚན་ལྡན་བཤེས་གཉེན་བསམ་སྦྱོར་གཉིས། །ཡང་དག་པའི་སྒོ་ནས་ཚུལ་བཞིན་བསྟེན། །ཐུགས་མཉེས་པར་གྱིས་ལ་བཀའ་བཞིན་སྒྲུབས། །འདི་མདོ་སྔགས་ལམ་གྱི་རྩ་བ་ཡིན། །རྟེན་དལ་བ་བརྒྱད་དང་འབྱོར་བ་བཅུ། །རྙེད་དཀའ་ཞིང་དོན་ཡང་ཆེ་བས་ན། །དེ་ཆུད་ཟོས་མ་བྱེད་སྙིང་པོ་ལོངས། །འདི་རང་བློ་ཆོས་ལ་སྐུལ་བྱེད་ཡིན། །རྟེན་འདི་ཡང་མྱུར་ཏུ་འཇིག་པར་སླ། །སྤྱིར་རྩ་བ་གསུམ་དང་རྒྱུ་མཚན་དགུ། །ཐག་བཅད་པ་གསུམ་གྱི་འཆི་བ་སྒོམས། །འདི་ཚེ་འདི་བློ་ཡི་གཏོང་བྱེད་ཡིན༌། །གནས་འཇིགས་རུང་ངན་སོང་གསུམ་པོ་དེར། །ཚ་གྲང་དང་བཀྲེས་སྐོམ་བླུན་རྨོངས་སོགས། །བཟོད་དཀའ་བའི་སྡུག་བསྔལ་བསམ་མི་ཁྱབ། །དེར་མི་འགྲོའི་ཐབས་ལ་འབད་པར་འཚལ། །ཚེ་འདི་ཕྱི་ཀུན་གྱི་སྐྱབས་གནས་མཆོག །སྐྱབས་བསླུ་མེད་དཀོན་མཆོག་རིན་ཆེན་གསུམ། །འདི་དེང་ནས་བྱང་ཆུབ་མ་ཐོབ་བར། །ཁ་ཙམ་མིན་སྙིང་ནས་སྐྱབས་སུ་བསྟེན། །ལས་ངེས་དང་འཕེལ་ཆེ་མ་བྱས་པར། །འཕྲད་མི་སྲིད་བྱས་པ་ཆུད་མི་ཟ། །ཚུལ་འདི་ལ་ངེས་པ་རྙེད་བྱས་ནས། །ལས་དགེ་སྡིག་བླང་དོར་བྱེད་པར་གྱིས། །ལྷ་འཕོ་ལྟུང་ལྷ་མིན་འཐབ་རྩོད་དང༌། །མི་སྐྱེ་རྒ་ན་འཆིའི་སྡུག་བསྔལ་སོགས། །ཡུལ་མཐོ་རིས་གསུམ་ཡང་སྡུག་བསྔལ་གནས། །འདི་སོམས་ལ་ཐར་འདོད་ངེས་འབྱུང་སྐྱེད། །ཚུལ་ཁྲིམས་དང་ཏིང་འཛིན་ཤེས་རབ་རྣམས། །རང་རྒྱུད་ཀྱི་ཉོན་མོངས་སུན་འབྱིན་དང༌། །མགོ་གནོན་དང་རྩད་ནས་སྤོང་བྱེད་ཐབས། །བསླབ་གསུམ་གྱི་ཉམས་ལེན་འདི་ལ་འབུངས། །མར་ཤེས་དང་དྲིན་དྲན་དྲིན་གཟོ་དང༌། །བྱམས་སྙིང་རྗེ་ལྷག་བསམ་བྱང་ཆུབ་སེམས། །འདི་ཐེག་ཆེན་ལམ་གྱི་སྲོག་ཤིང་ཡིན། །དུས་རྒྱུན་མའི་ཉམས་ལེན་གནད་དུ་ཟུངས། །ལུས་ལོངས་སྤྱོད་དུས་གསུམ་དགེ་རྩ་སོགས། །གཏོང་སྙམ་པའི་སེམས་པ་ཡང་ཡང་སྦྱོངས། །རྒྱུད་སྡོམ་པ་གསུམ་གྱི་མི་མཐུན་ཕྱོགས། །སྤོང་སྙམ་པའི་སེམས་པ་ནན་གྱིས་སྐྱེད། །སྤྱད་དཀའ་བའི་གནས་དང་གནོད་བྱེད་ལ། །ཁོང་འཁྲུགས་པ་མེད་པའི་བཟོད་པ་སྒོམས། །ལམ་ཐེག་པ་ཆེན་པོའི་ཉམས་ལེན་ལ། །ཡིད་སྙིང་ནས་སྤྲོ་བའི་བརྩོན་འགྲུས་སྐྱེད། །སེམས་གཡེང་བ་མེད་པར་དགེ་བ་ལ། །བློ་རྩེ་གཅིག་གནས་པའི་བསམ་གཏན་སྒོམས། །ཆོས་བདེན་གཉིས་ཟབ་མོའི་ཡིན་ལུགས་རྣམས། །བློས་ཚུལ་བཞིན་འབྱེད་པའི་ཤེས་རབ་སྐྱེད། །རྒྱུ་ཟང་ཟིང་སྦྱིན་ལ་གདུལ་བྱ་བསྡུས། །གཏམ་སྙན་པོ་བརྗོད་ལ་གདམས་ངག་སྦྱིན། །གང་བསྟན་པའི་དོན་དེ་སྤྱོད་དུ་ཆུག །རང་དེ་དང་མཐུན་པའི་ཉམས་ལེན་གྱིས། །སྤྱོད་ཕར་ཕྱིན་དྲུག་དང་བསྡུ་དངོས་བཞི། །བྱ་དཀའ་ཞིང་རྒྱ་ཆེ་གྲངས་མང་བའི། །བོང་རྒྱལ་སྲས་སྤྱོད་པའི་གནད་སྡོམ་ཡིན། །མཆོག་སངས་རྒྱས་འདོད་རྣམས་འདི་ལ་བརྩོན། །ཤིན་སྦྱངས་ཀྱི་བདེ་བའི་ཟིན་པ་ཡི། །བྱིང་རྒོད་དང་བྲལ་བའི་ཞི་གནས་སྐྱོངས། །གཟུང་འཛིན་གྱིས་བསྡུས་པའི་ཆོས་ཀུན་གྱི། །གནས་ལུགས་ལ་དཔྱོད་པའི་ལྷག་མཐོང་སྐྱེད། །དཔལ་ཀླུ་སྒྲུབ་ཡབ་སྲས་དགོངས་པའི་དོན། །སྟོང་རྟེན་འབྱུང་ཕན་ཚུན་འགལ་མེད་པའི། །དོན་མཐའ་བྲལ་དབུ་མའི་ལྟ་བ་ཡི། །གནད་རིགས་པ་དུ་མས་བཙལ་བར་བྱ། །ཆོས་ཐམས་ཅད་མིང་བརྡས་ཕར་བཏགས་ལས། །ཚུལ་ཡུལ་སྟེང་གྲུབ་པ་མེད་པ་ཡི། །དོན་སྐྱེ་མེད་སྟོང་བའི་དབྱིངས་དེ་རུ། །སེམས་མཉམ་པར་ཞོག་དང་སྙིང་གི་བུ། །ཡུལ་གང་སྣང་སྒྱུ་མའི་འཁྲུལ་འཁོར་དང༌། །རྨི་ལམ་དང་གཟུགས་བརྙན་ཇི་བཞིན་དུ། །ཚུལ་སྣང་ཡང་བདེན་པར་མེད་སྙམ་པའི། །རྗེས་ཐོབ་ཀྱི་སྒྱུ་མའི་རྣལ་འབྱོར་སྐྱོངས། །དབང་ཟབ་མོའི་རང་རྒྱུད་སྨིན་པ་དང༌། །སྡོམ་དམ་ཚིག་མིག་གི་འབྲས་བཞིན་སྲུངས། །གཞི་སྐྱེ་ཤི་བར་དོ་སྦྱོང་བྱེད་ཀྱི། །ལམ་ཟབ་གསལ་ལྷ་ཡི་རྣལ་འབྱོར་སྒོམས། །རླུང་དབུ་མར་ཞུགས་གནས་ཐིམ་བྱེད་ཀྱི། །ལུས་རྩ་ཐིག་རླུང་གསུམ་གནད་དུ་སྣུན། །ཐབས་བདེ་ཆེན་ཡེ་ཤེས་རྡོ་རྗེ་དེ། །དབྱིངས་ཤེས་རབ་ཡུམ་གྱི་པད་མར་སྦྱོར། །ལམ་རིམ་པ་ལྔ་ཡི་ཉམས་ལེན་གྱིས། །མཆོག་ཁ་སྦྱོར་བདུན་ལྡན་ཐོབ་ལ་རེམས། །ཚེ་འདི་སྣང་འཁྲི་བ་ཀུན་བཅད་དེ། །གནས་རི་ཁྲོད་གུ་ཡངས་བློ་བདེ་རུ། །ཆོས་མདོ་སྔགས་ཟུང་འཇུག་ཉམས་ལེན་ལ། ཡིད་སྐུལ་ཅིག་བློ་གསལ་སྙིང་གི་བུ། །གནས་ཡིད་འོང་དབེན་པའི་དགའ་ཚལ་དུ། །གྲོགས་རི་དྭགས་རྩེ་ཞིང་བྱ་བྱེའུ་ཡིས། །སྐད་སྙན་པའི་ཡ་མཚན་གཏམ་མང་སྒྲོགས། །མདངས་ཁ་དོག་བཀྲ་བའི་པད་ཚལ་དུ། །རྐང་དྲུག་ལྡན་བུང་བས་གླུ་དབྱངས་ལེན། །མདོག་སྔོ་ལྗང་གཡུ་ལོ་འབོལ་བ་ཡི། །ཤིང་ལྗོན་པའི་ཚོགས་རྣམས་གར་སྟབས་འགྱེད། །ཉམས་དགའ་བའི་ལྟད་མོ་སྣ་ཚོགས་ཀྱིས། །སེམས་སྐྱིད་པའི་སྣང་བ་འཆར་དུ་བཅུག །ཟས་ཚོད་མ་སྣ་ཚོགས་དེ་རུ་ཡོད། །གོས་མལ་སྟན་ཤིང་ལོ་ཤུག་ཤུན་ཡོད། །ནང་རང་སེམས་ཆོས་ལ་སྐུལ་བྱེད་ཀྱི། །ཡ་མཚན་པའི་རྐྱེན་མང་དེ་ན་མཆིས། །ལར་བྱ་སྤྱོད་ཉུང་བའི་རང་ལུས་བདེ། །རྒྱུད་དཀྲུགས་མཁན་མེད་པས་རང་སེམས་བདེ། །སེམས་ཆོས་དང་བསྟུན་ན་ཤིན་ཏུུ་བདེ། །བློ་རྣམ་རིག་དབང་པོ་ཆེས་ཆེར་གསལ། །སྔར་མེད་པའི་ངེས་ཤེས་མང་དུ་འཁྲུངས། །སེམས་རྣམ་གཡེང་ལེ་ལོ་དེ་རུ་ཉུང༌། །རྒྱུད་ཆགས་སྡང་སློང་བའི་གཏམ་ཡང་མེད། །ལམ་ཉམས་རྟོགས་ཉིན་བཞིན་གོང་འཕེལ་འགྲོ །དོན་དེ་ཕྱིར་དམ་པས་ཆེར་བསྔགས་པའི། །གནས་མི་མེད་དབེན་པའི་རི་སུལ་དུ། །དུག་སྨན་དུ་བསྒྱུར་བའི་གདམས་ངག་མཆོག །ལམ་ཐེག་ཆེན་བློ་སྦྱོང་ཉམས་ལེན་ལ། །དེང་བརྩོན་ཅིག་ཤེས་ལྡན་སྙིང་གི་བུ། །མདོ་ཧྲིལ་གྱིས་དྲིལ་ན་རང་གི་རྒྱུད། །ཆོས་བཞིན་དུ་འདུལ་ལ་འབད་པར་གྱིས། །ལམ་ཡོངས་སུ་རྫོགས་པའི་གླུ་འདི་ཡིས། །མ་འགྲོ་ཀུན་སྐུ་གསུམ་ཐོབ་པར་ཤོག །ཆོས་མདོ་སྔགས་གཉིས་ཀྱི་ལམ་རིམ་གྱི། །གནད་ཡོངས་སུ་དུས་པའི་གླུ་དབྱངས་འདི། །ཕྱོགས་ངེས་མེད་འཁྱམས་པའི་རི་ཁྲོད་པས། །སྙིང་བརྩེ་བའི་བུ་ལ་ཕན་ཕྱིར་བྲིས། །ཞེས་གཞན་ཕན་བྱང་ཆུབ་སེམས་ཀྱིས་ཀུན་ནས་བསླངས་ཏེ་མགུར་དབྱངས་འདི་གསུངས་སོ། །ཡང་གནས་མི་མེད་དབེན་པའི་རི་ཁྲོད་ནས་རང་སེམས་འདུལ་བའི་བསླབ་བྱ་མགུར་མ་གསུངས་པ་འདི་ལྟ་སྟེ། སྐྱབས་བསླུ་མེད་དཀོན་མཆོག་རྣམ་གསུམ་དང༌། །རྗེ་ཐམས་ཅད་མཁྱེན་པ་བློ་བཟང་གྲགས། །མགོན་མཉམ་མེད་དྲིན་ཅན་བླ་མ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །དུས་ཡུན་རིང་འགྲོགས་པའི་སློབ་བུ་ལ། །ཤ་ཚ་བའི་གཏམ་གྱི་གྲོས་ཞིག་གླེང༌། །ཚེ་འདི་ཕྱིའི་ལེགས་ཚོགས་འབྱུང་བའི་གནས། །ལམ་སྟོན་པའི་མཚན་ལྡན་བླ་མ་བསྟེན། །རྟེན་རྙེད་དཀའི་དལ་འབྱོར་ཐོབ་དུས་འདིར། །དོན་མེད་པར་མ་གཏོང་སྙིང་པོ་ལོངས། །དགྲ་འཆི་བདག་ནམ་འོང་ཆ་མེད་པས། །དུས་མྱུར་ཏུ་དམ་ཆོས་རྣམ་དག་སྒྲུབས། །མར་ངན་སོང་གསུམ་ན་སྡུག་བསྔལ་ཆེ། །དེར་མི་སྐྱེས་ཐབས་ལ་འབད་པར་འཚལ། །འཇིགས་དེ་ལས་སྐྱོབ་པའི་དཀོན་མཆོག་གསུམ། །སེམས་དད་པའི་སྙིང་ནས་སྐྱབས་སུ་བསྟེན། །ལས་དགེ་སྡིག་བསགས་པའི་བདེ་སྡུག་འབྱུང༌། ད་སྡིག་སྤོང་དགེ་བ་སྒྲུབས་པར་གྱིས། །གནས་ཁམས་གསུམ་འཁོར་བའི་སྡུག་བསྔལ་ལ། །ཡིད་སུན་པར་གྱིས་ལ་ཐར་ལམ་སྙོགས། །ལམ་བསླབ་གསུམ་བདེན་བཞིའི་ཉམས་ལེན་གྱིས། །མཆོག་ཐར་བའི་གོ་འཕང་ཐོབ་ལ་རེམ། །ལམ་བསླབ་པ་གསུམ་གྱི་གཞི་རྩ་ཉིད། །རྒྱུད་ཚུལ་ཁྲིམས་སྲོག་དང་བསྡོས་ལ་སྲུངས། །རྒྱུད་སྡོམ་གསུམ་བཅས་མཚམས་ཆེས་རལ་བའི། །ཚེ་འདི་ཕྱིའི་སྡུག་བསྔལ་དཔག་མེད་སྟེར། །ཁྲིམས་ཕྲ་མོ་ཅུང་ཟད་ཉམས་པས་ཀྱང༌། །གནས་ངན་འགྲོ་ཨེ་ལེའི་འདབ་ཀླུ་བཞིན། །ཕན་འདོགས་པའི་ཚུལ་གྱིས་ཕམ་སྟེར་བའི། །བདུད་མཛེས་མའི་ཚུལ་བཟུང་གཡོ་སྒྱུ་མཁན། །འདིའི་བསླུ་བྲིད་ཐབས་ངན་སྣ་ཚོགས་ལ། །སེམས་དོགས་ཟོན་གྱིས་ཤིག་སྙིང་གི་བུ། །ཚེ་འདི་ཕྱིའི་སྡུག་བསྔལ་སྟེར་མཁན་མོ། །ལམ་ཐར་བའི་སྲོག་གཅོད་ཤན་པ་མོ། །རྒྱུད་ཚུལ་ཁྲིམས་འཕྲོག་པའི་ཆོམ་རྐུན་མོ། །དགྲ་བུད་མེད་དབང་དུ་མ་གཏོང་བུ། །གཏམ་མི་ཁ་ངན་པའི་སྣ་འདྲེན་མོ། །ལུས་བཀྲག་མདངས་འཇོམས་པའི་ནད་བདག་མོ། །གུས་ངུར་སྨྲིག་འཕྲོག་པའི་ཇག་པ་མོ། །འདི་དགྲ་ཡི་དྭངས་མར་ཟུངས་ཤིག་བུ། །ཡར་མཐོ་རིས་ལམ་འགོག་བྱེད་མཁན་མོ། །མར་ངན་སོང་ཁྲིད་པའི་ས་མཁན་མོ། །གནས་འཁོར་བར་འཆིང་བའི་ཕུང་བྱེད་མོ། །འདི་སྙིང་ནས་བདུད་མོར་སོམས་ཤིག་བུ། །མིག་འཛུམ་པའི་ཚུལ་གྱིས་བསླུ་མཁན་མ། །ཁ་ཡག་པའི་ཚིག་གིས་བྲིད་མཁན་མ། །མངལ་མི་གཙང་འདམ་དུ་འཕེན་མཁན་མ། །གྲོགས་ངན་པའི་བདུད་མོ་སྤོངས་ཤིག་ཀྱེ། །ཚོགས་གྲྭ་སར་འགྲོ་བའི་ལམ་འགོག་མ། །གྲོང་ཁྱིམ་གྱི་བཙུན་དུ་འཛིན་མཁན་མ། །སྡུག་སྣ་དགུར་གཏོད་བའི་དགྲ་བོ་མ། །སེམས་དགེ་བའི་བར་ཆད་བྱེད་མཁན་མ། །རྒྱུད་ཆགས་སྡང་སྐྱེད་པའི་བདུད་མོ་མ། །འདིའི་དྲུང་དུ་མ་བཏུད་སྙིང་གི་བུ། །འདི་འོན་ཀྱང་སྐྱེ་སྔོན་རང་གི་མར། །ལན་དུ་མར་གྱུར་བའི་ངང་ཚུལ་ལ། །ལུང་རིགས་པ་གཉིས་ཀྱིས་ངེས་ཤེས་སྐྱེད། །བྱམས་སྙིང་རྗེ་ལྷག་བསམ་དག་པས་སྐྱོངས། །སེམས་ཆགས་པའི་གདོན་གྱིས་སྨྱོས་པ་ཡིས། །ཚེ་འདི་ཕྱི་ཀུན་གྱི་དཔལ་འཕྲོག་པའི། །དགྲ་བུད་མེད་མཛེས་པར་སྣང་ན་ཡང༌། །དཔེ་ཕྱེ་ལེབ་མིག་ལ་མར་མེ་བཞིན། །རང་ཆགས་མཁན་ངོ་བོ་ཉིད་ཀྱིས་སྟོང༌། །ཡུལ་བུད་མེད་དེ་ཡང་གང་དུ་ཡང༌། །དོན་བདེན་པར་གྲུབ་པ་རྡུལ་ཙམ་མེད། །དཔེ་གློག་བརྙན་ནང་གི་བུད་མེད་བཞིན། །ཕྱི་ལྤགས་པ་ཤ་ཁྲག་རུས་པ་དང༌། །ནང་ཀླད་པ་བཤང་གཅི་སྣབས་ཡིན་པའི། །གཞོན་ན་ཆུང་མཛེས་པར་སྣང་བ་འདི། །དཔེ་ཁྱི་ཕག་མིག་ལ་བཤང་སྐྱུགས་བཞིན། །དོན་དེ་ཕྱིར་འདི་ལ་ཞེན་པ་ལོག །རང་དབང་མེད་གཤིན་རྗེས་ཁྲིད་པའི་ཚེ། །གྲོགས་བརྩེ་གདུང་ཆེ་བའི་མཛའ་ན་མོ། །གདོང་མཆི་མས་གང་བཞིན་ཤུལ་དུ་སྐྱུར། །དུས་དེ་འདྲ་ནམ་འོང་ཆ་མེད་པས། །ཁྱོད་བུད་མེད་དོན་གཉེར་བསམ་པ་སྤོངས། །དགྲ་མ་རུང་འདོད་ཆགས་མགོ་བོ་ལ། །ཆོས་སྟོང་ཉིད་ལྟ་བའི་ངར་ལྡན་པའི། །མཚོན་མི་སྡུག་པ་ཡི་རལ་གྲི་སྣུན། །ཁྲིམས་ཡིད་བཞིན་དབང་གི་རྒྱལ་བོའི་དགྲ། །སེམས་འདོད་ཆགས་ཆོམ་རྐུན་འབྱུང་བའི་གནས། །ངག་ཆགས་གཏམ་སྣ་ཚོགས་སྨྲ་བའི་སྒོར། །དྲན་ཤེས་བཞིན་བག་ཡོད་ལྕགས་གཟེར་ཐོབས། །ལྷ་བླ་མའི་དབྱིངས་ནས་མི་ཁྲེལ་ཡང༌། །ཁྲིམས་གཙང་མའི་རང་སེམས་མི་ཁྲེལ་བ། །མི་ཀུན་གྱིས་སྙིང་ནས་མི་ཁྲེལ་བའི། །ཁྱོད་ངོ་ཚ་ཁྲེལ་ཡོད་ཀྱིས་དང་བུ། །ཁྲིམས་རྣམ་དག་སྲུངས་བའི་སྐྱེས་བུ་དེ། །མི་ཀུན་གྱིས་བཀུར་ཞིང་ལྷས་ཀྱང་བསྲུང༌། །ལྷ་བླ་མ་ཡི་དམ་དེ་ལ་དགྱེས། །ཚེ་འདི་ཕྱི་ཀུན་ཏུ་བདེ་ཞིང་སྐྱིད། །སྔོན་བསགས་པའི་སྡིག་ལྟུང་འདག་པ་སོགས། །ཁྲིམས་བསྲུངས་བའི་ཕན་ཡོན་མཐའ་ཡས་སོ། །སྙིང་གཏིང་ནས་བརྩེ་བའི་ཆོས་མཐུན་བུ། །སྤྲང་བདག་གི་ངག་ལ་ཉན་འདོད་ན། །ཚུལ་འདི་དག་སོམ་ལ་རང་རྒྱུད་ཀྱི། །སྡོམ་དམ་ཚིག་དཔྲལ་བའི་མིག་བཞིན་སྲུངས། །ཆོས་ཐེག་པ་ཆེན་པོའི་ལམ་གྱི་གནད། །མ་འགྲོ་ལ་བྱམས་དང་སྙིང་རྗེ་དང༌། ལམ་ལྷག་བསམ་བྱང་ཆུབ་སེམས་མཆོག་སྐྱེད། །ཆོས་བདག་གཞན་རྗེ་བའི་རྣལ་འབྱོར་སྒོམས། །ལར་རྒྱལ་སྲས་སྤྱོད་པ་མཐའ་དག་དང༌། །དགོས་ཕྱིན་དྲུག་བསྡུ་བཞིའི་ལམ་ལ་སློབས། །རྗེ་ཐམས་ཅད་མཁྱེན་པའི་བཞེད་པའི་སྲོལ། །ལམ་ཟབ་མོ་དབུ་མའི་ལྟ་བ་ཚོལ། །མིང་རྟོག་པའི་བཏགས་ཙམ་མ་གཏོགས་པར། །ཡུལ་རང་ངོས་གྲུབ་པ་མེད་པའི་དོན། །གཞི་སྟོང་བ་ཉིད་ལ་དམིགས་པ་ཡི། །སྐྱོན་བྱིང་རྒོད་བྲལ་བའི་ཏིང་འཛིན་སྒོམས། །དབང་ལེགས་པར་ཞུས་ལ་དམ་སྡོམ་སྲུངས། །བཀའ་རྒྱུད་སྡེའི་དོན་ལ་ཐོས་བསམ་གྱིས། །གཞི་སྦྱང་བྱ་སྐྱེ་ཤི་བར་དོ་གསུམ། །ལམ་སྦྱོང་བྱེད་རིམ་གཉིས་རྣལ་འབྱོར་གྱིས། །མཆོག་སྦྱང་འབྲས་སྐུ་གསུམ་བསྒྲུབ་པ་ལ། །དུས་ད་ལན་བག་ཆགས་ཅི་ཐེབ་ཀྱིས། །ད་མདོར་ན་རྒྱུན་དུ་སེམས་ལ་རྟོག །དགྲ་ཉོན་མོངས་ཚོགས་ལ་བག་ཡོད་སྒྲིམས། །རང་ནམ་འཆི་ངེས་མེད་བསམ་པ་དང༌། །ལར་ཅིས་ཀྱང་དགོས་མེད་བསམ་པ་གཉིས། །ཆོས་རྣམ་དག་འགྲུབ་པའི་མན་ངག་ལགས། །འདི་རྒྱུན་དུ་སྒོམས་ཤིག་སྙིང་གི་བུ། །གྲོགས་ངན་པ་འགའ་དང་འགྲོགས་པ་ཡི། །སྙིང་མཐུན་པའི་བུ་ལ་ཕན་པའི་ཕྱིར། །ཆོས་མདོ་སྔགས་གཉིས་ཀྱི་གནད་བསྡུས་ཏེ། །ཚིག་གོ་སླའི་ངག་གིས་གླུ་འདི་བླངས། །འདིའི་དགེ་བས་བདག་གཞན་འགྲོ་བ་ཀུན། །མཆོག་ཟུང་འཇུག་རྡོ་རྗེ་འཆང་ཐོབ་ཤོག །ཅེས་པ་འདི་རྗེ་བཙུན་དམ་པ་འདི་ཉིད་ཀྱིས་དབེན་པའི་གནས་ནས་ལྷག་བསམ་གྱིས་མགུར་གླུ་འདི་གསུངས་སོ། ། དེ་ཡང་ཐུན་མོང་མ་ཡིན་པའི་གྲུབ་པའི་རྟགས་ལ་མངའ་བརྙེས་པའི་ཚུལ་ཡོད་དེ། གནས་ཆེན་པདྨ་རི་མཐོར་བླ་མ་ཤེས་རབ་ཚང་དང་མཉམ་དུ་བཞུགས་པའི་སྐབས་སུ་ཁོང་གིས་ཉིན་གུང་ཇ་ཕུད་བཤམས་ནས་དགོང་མོ་གསོལ་ག་གསུངས་ནས་ཕྱེད་ཙམ་ལ་ཆང་དྲི་བྲོ་བ་ཅི་ཡིན་སྙམ་ནས་གཟིགས་པས་ཇ་ཕུད་ཆང་དུ་གྱུར་བ་དང༌། དགའ་དགྱེས་བྲག་དཀར་དུ་བཞུགས་སྐབས་ཧོར་ཚང་དམག་མི་རྣམས་ཀྱིས་བཟུང་ནས་ཁྲིད་འོང་སྐབས་སུ་གློ་བུར་དུ་འཇའ་ལྟར་ཡལ་ནས་མི་སྣང་བར་གྱུར། ཡང་དཀར་ལྷ་དགོན་གྱི་དགོན་བདག་བློ་བཟང་འཕྲིན་ལས་རྒྱ་མཚོས་ཁོང་ལ་བཞེས་བ་ཞིག་འབུལ་འགྲོ་དུས་དམ་པ་འདི་ཉིད་བསུ་རུ་ཕེབས་པ་ལ་སྒ་ཕྱར་ཞིག་ཕྱག་ཏུ་བཟུང་བ་འཕྲིན་ལས་རྒྱ་མཚོས་ཕྱག་ནས་བླངས་ནས་སར་འཕང༌། དམ་པ་འདི་ཉིད་སྔོན་དུ་བྱོན་ཏེ་བློ་བཟང་འཕྲིན་ལས་རྒྱ་མཚོ་རྗེས་ནས་སྒྲུབ་ཕུག་ནང་དུ་བྱོན་ཚེ་སྒ་ཕྱར་སྒྲུབ་ཕུག་ནང་དུ་ཐོན་འདུག འདི་སུས་ཁྱེར་འོང་ཞེས་དྲིས་ཚེ་བཞད་ནས་ཅི་ཡང་མ་གསུངས་སོ། །ཡང་འདས་ལོག་མཛད་པའི་བླ་མ་དུ་མས་ཧ་དའི་དགེ་བཤེས་ཟེར་བའི་རི་ཁྲོད་པ་ཞིག་གིས་ངན་སོང་གི་སེམས་ཅན་མང་པོ་ཉིན་རེ་བཞིན་ཐར་ལམ་ལ་བཀོད་འདུག་ཅེས་གསུངས་པ་བཞིན་སེམས་ཅན་དུ་མ་ཐར་བའི་ལམ་བཟང་ལ་འདྲེན་པར་མཛད་དོ། །ཡང་ཆུ་མགོ་ཤར་ཞེས་པའི་ཡུལ་གྱི་དགེ་འདུན་ཞིག་གི་སྲིང་མོའི་རྨི་ལམ་ལ་བྱ་བྲལ་བ་བྱོན་ནས་ད་ཁྱོད་ཞག་གསུམ་ལས་ཚེ་མེད་ཅེས་རྨིས་པས་བུད་མེད་དེ་ཉིན་གསུམ་གྱི་རྗེས་སུ་ཚེ་ལས་འདས་པ་དང༌། ཐང་དཀར་རྩ་ཞེས་པར་ཆུའི་འཇིགས་པ་བྱུང་ཚེ་དམ་པ་འདི་ཉིད་ཀྱིས་གཟུངས་སྔགས་གསུངས་ནས་ནས་འཐོར་བ་ཙམ་གྱིས་ཆུས་འཇིགས་པ་ལས་སྐྱབས་པ་དང༌། མཛོ་གྲྭ་སྡེ་བ་ལྷ་ནག་གི་ནད་ཡམས་ལས་སྐྱབས་པ་དང༌། མཛོད་དྲིའི་བྲག་དམར་ལ་བཞུགས་ཚེ་སྒྲོལ་མ་ཟེར་བའི་བུད་མེད་དད་པ་ཅན་ཞིག་ཡོད་པ་དེའི་མཚམས་གྲོ་བསྐྱལ་བ་ལ་ཆས་ཚེ་མིག་རྒྱང་གང་གི་རི་ཉག་ཞིག་ནས་ལྟས་ཚེ་བྱ་བྲལ་བ་བཞུགས་པའི་ཉེ་འདབས་སུ་ཆོས་པ་ལ་ཞེ་སྡང་བའི་དམག་མི་འགའ་ཡོད་པ་དམ་པ་གང་ཉིད་བཞུགས་པའི་གནས་ནས་ཕྱིར་འོང་བས་བུད་མེད་དེའི་སེམས་ལ་སྐྲག་འཇིགས་ཚད་མེད་པ་སྐྱེས་ཚེ་མིག་འབྱེད་འཛུམ་གཅིག་གི་ཡུན་ལ་དད་ཅན་གྱི་ཡོན་བདག་མ་དེའི་ཐག་ཉེ་བའི་སར་ཤིང་སྡོང་ཞིག་ཡོད་པའི་རྩར་ཕེབས་ནས་བཞད་ཅིང་བཞུགས་པ་ལགས་ན་དེ་ནི་རླུང་སེམས་ལ་དབང་ཐོབ་པའི་རྟགས་མཚན་ཞིག་ཏུ་མངོན། སྨན་ལོང་བྲག་དཀར་དང༌།བྲག་སྐྱ་ལྷུན་གྲུབ་རྫོང་ནས་གཙོ་འདུས་སོགས་ཀྱིས་མཚམས་ལ་བཞུགས་པའི་སྐབས་སུ་བུམ་པ་དང་ནང་མཆོད་སྒྲུབ་སྐབས་བུམ་ཆུ་དང་ནང་མཆོད་ཁོལ་ཏེ་ཕྱིར་འཕྱུར་བ་ཉེ་གནས་གྲྭ་བ་དུ་མས་མངོན་སུམ་ཚད་མས་གྲུབ་པས་ན་ཡ་མཚན་པར་གྱུར། །ཡི་དམ་གྱི་ཞལ་གཟིགས་ཤིང༌། ཆོས་སྐྱོང་བྲན་བཞིན་དུ་འཁོར་བ། གྲུབ་པའི་རྟགས་མཚན་སོགས་གསང་བའི་རྣམ་ཐར་ཤིན་ཏུ་མང་ངོ། །གཞན་ཡང་བྱ་དང་བྱེའུ་སོགས་སྲོག་ཆགས་དུད་འགྲོའི་རིགས་མི་འདྲ་བ་བརྒྱ་ལྷག་རྣམས་མི་གཞན་ཞིག་མཐོང་ཚེ་སྐྲག་འཇིགས་ཡོད་པ་དང༌། རྣལ་འབྱོར་གྱི་དབང་ཕྱུག་འདི་དང་འཚོ་བ་མཉམ་དུ་རོལ་བ་དང༌། ཇི་ལྟར་བགོ་བ་ལྟར་བྱེད་པ་དང༌། དམ་པ་འདི་བཞུགས་པའི་སྒྲུབ་ཕུག་དང་ཉེ་བར་བྱ་ཚང་ཞིག་ཡོད་པ་དེའི་ནང་ལ་བྱ་གཉིས་ཡོད༌། དེ་གཉིས་ཀྱི་མིང་བྱང་ཆུབ་དང་རྣམ་གྲོལ་ཞེས་བཏགས། བྱ་དེ་གཉིས་ཀྱིས་སྐད་གོ དེ་ནས་དེ་གཉིས་ཤི་དུས་སུ་འཕོ་བ་གསུངས། རྗེས་ནས་རྗེ་བཙུན་འདི་ཉིད་བྱོན་པའི་ལམ་ན་ཁྱིམ་ཚང་ཞིག་ལ་གྲྭ་བ་བྱང་ཆུབ་དང་རྣམ་གྲོལ་ཞེས་པ་ཡོད། སྔར་གྱི་བྱ་གཉིས་ཤི་དུས་ནས་བརྩིས་པས་ལོ་འགྲིགས་པས་བྱ་གཉིས་གྲྭ་བ་གཉིས་ཀྱི་ལུས་བླངས་པ་སོགས་ནི་སེམས་ཅན་རྣམས་ལ་བྱམས་སྙིང་རྗེ་བྱང་ཆུབ་ཀྱི་སེམས་བསྒོམས་པའི་འབྲས་རྟགས་ཁྱད་པར་ཅན་དང་ལྡན་པས་སྐྱེ་བོ་སུ་འདྲ་ཞིག་ཡིན་ཀྱང་སེམས་རྣལ་དུ་གནས་པ་ཞིག་ཡིན་ཕྱིན་དམ་པ་འདི་ལ་རང་དབང་མེད་པར་ཡིད་ཆེས་པའོ། །རྗེ་བཙུན་བླ་མ་དམ་པ་འདི་ཉིད་ཤིང་བཟའ་སྨན་པ་ཡོད་སར་བཞུགས་ཡོད་སྐབས་མཚན་མོ་རྒྱལ་ཁབ་ཀྱི་ཉེན་རྟོག་པ་འགའ་ཡོང་ནས་སྔོག་གཤེར་བྱེད་པའི་ཚེ་སྨན་པ་ལ་སྔངས་སྐྲག་ཆེན་པོ་སྐྱེས། ཉེན་རྟོག་པས་སྔོག་གཤེར་ཅི་འདྲ་བྱས་ཀྱང་དམ་པ་གང་ཉིད་མ་རྙེད། སྨན་པའི་ལྟས་ཚེ་ཁོང་ཉེན་རྟོག་པའི་ལམ་ན་བག་ཕེབས་ཏེ་བཞུགས་ཡོད་པར་མཐོང༌། དེ་ཡང་རྗེ་ས་པཎ་གྱིས་བློ་དང་ལྡན་ན་མ་སྨྲས་ཀྱང༌། །རྣམ་འགྱུར་ཉིད་ལས་བསམ་པ་གོ །བལ་བོའི་ཟེའུ་མ་ཟོས་ཀྱང༌། །ཁ་དོག་ཉིད་ལས་བྲོ་བ་ཤེས། །ཞེས་གསུངས་པ་ལྟར་ལམ་གྱི་གནད་ཤེས་པ་ཞིག་གིས་བལྟས་ན་མཛད་སྒོའི་བབས་ཤིན་ཏུ་ལེགས་པར་ངེས། བསྟན་པ་ཡང་དར་གྱི་དུས་འདིར་ལམ་རིམ་དང་རིམ་གཉིས་ཀྱི་ཉམས་བཞེས་ལ་ཁོང་དང་འདྲ་བ་མདོ་སྨད་ཀྱི་ལྗོངས་འདི་ན་ཧ་ཅང་ཉུང་བའོ། །དེང་དུས་ཀྱི་རྗེ་མི་ལ་རས་པ་ཞེས་ཞྭ་དམར་སྐུ་ཕྱོགས་རིན་པོ་ཆེའི་ཡོངས་འཛིན་ཨ་ཁུ་ཞོ་འོང་རིན་པོ་ཆེ་དང༌། མཁས་གྲུབ་གཉིས་ལྡན་གྱི་བླ་མ་ཡོན་ཏན་བཟང་པོ་སོགས་ཀྱིས་བསྔགས་བརྗོད་ཀྱི་མེ་ཏོག་ཡང་ཡང་འཐོར། དེ་ལྟར་ཁོང་རིན་པོ་ཆེ་འདི་ཉིད་ཀྱི་དང་པོ་རྒྱ་ཆེན་ཐོས་པ་མང་དུ་བཙལ་ནས་བར་དུ་གཞུང་ལུགས་མཐའ་དག་གདམས་པར་ཤར་ཏེ་ཐ་མར་དབེན་པའི་རི་ཁྲོད་དུ་ཟས་མེ་ཏོག་བཅུད་ལེན་དང༌། རྡོ་བཅུད་ལེན། གྲོགས་མི་མིན་ལྷ་འདྲེ་ལ་བཅོལ་ནས་སྒྲུབ་པ་ཉམས་སུ་བླངས་ནས་ཉམས་དང་རྟོགས་པའི་འབྲས་བུ་སྨིན། གྲུབ་རྟགས་དང་མངོན་ཤེས་ཀྱི་གཏེར་བརྡོལ་ནས་གཞན་དོན་མཛད་པའི་ཚུལ་ཡང་མདོར་བསྡུས་ཙམ་ཞིག་བརྗོད་པར་བྱ་བ་ལ། གཡའ་མ་བཀྲ་ཤིས་འཁྱིལ་ཞེས་རྗེ་ཞབས་དཀར་ཚོགས་དྲུག་རང་གྲོལ་གྱི་གདན་ས་རུ་བྱོན། དགོན་དེའི་ཁྲི་རབས་བཞི་བ་རྒྱལ་བོ་རིགས་འཛིན་དཔལ་ལྡན་བཀྲ་ཤིས་ཀྱི་ཡང་སྤྲུལ་བླ་མ་ཤེས་རབ་དང་མཇལ། བླ་མ་དེ་དགའ་སྤྲོ་དཔག་ཏུ་མེད་པ་སྐྱེས་ནས་སྤྱན་ཆབ་བསིལ་བཞིན་རྗེ་འདི་ནི་བདག་གི་བླ་མ་ཞབས་དཀར་བའི་ཡང་སྤྲུལ་འཁྲུལ་མེད་རེད། བདེ་བ་ཅན་གྱི་ལྷ་ཁང་བཞེང་བ་ལེགས་པར་གྲུབ་པའི་རབ་གནས་ལ་བྱོན་པ་ཡིན་ཞེས་ལྷ་ཁང་དེ་དང༌། ཞབས་དཀར་བའི་སྐུ་བརྙན་སོགས་རྟེན་བརྟེན་པ་ཡོངས་རྫོགས་ལ་རབ་གནས་ཀྱི་མེ་ཏོག་འཐོར་དགོས་ཞེས་གནས་དེར་རབ་གནས་རྒྱས་སྤྲོས་མཛད། ས་དེར་གནས་པའི་གྲྭ་བཙུན་པ་དང༌། སྔགས་པའི་རིགས་རྣམས་ལ་སྤྱོད་འཇུག་གི་ལུང་དང༌། རྒྱལ་སྲས་ལག་ལེན་སོ་བདུན་མའི་ཁྲིད་དང༌། བླ་མཆོད་ཀྱི་ཁྲིད་ལུང་དང༌། བསྟན་པའི་གཞི་མ་དགེ་འདུན་པ་རྣམས་ལ་བསྙེན་རྫོགས་ཀྱི་སྡོམ་པ་གནང༌། ཞོ་འོང་ལ་བྱོན་ནས་ཁྱིམ་པ་ཕོ་མོ་རྣམས་ལ་བསྙེན་ནས་དུས་ཁྲིམས་ཡན་ལག་བརྒྱད་པའི་སྡོམ་ལུང་དང༌། རྒྱལ་སྲས་ལག་ལེན་སོ་བདུན་མའི་ཁྲིད་ལུང་གནང་བ་དང༌། དགེ་སྡིག་བླང་དོར་ཇི་བཞིན་བྱེད་ཚུལ་གྱི་བསླབ་བྱ་སོགས་ཟབ་ཆོས་ཀྱི་སྒོ་ཐང་མར་བརྡལ་བར་མཛད། བར་སྐབས་སུ་མཚོ་སྔོན་ཕྱོགས་ཀྱི་གདུལ་བྱ་སེར་སྐྱ་ཕོ་མོ་རྗེས་སུ་འཛིན་པའི་ཕྱིར་དཔལ་ལྡན་བླ་མ་དམ་པ་འདི་ཉིད་དགུང་གྲངས་ང་གསུམ་པ་སྤྱི་ལོ ༡༩༧༩ ལོ། རབ་རྒྱལ་དོན་གྲུབ་ཞེས་པ་ས་ལུག་ལོར་མདོ་སྨད་གཡེར་མོ་ཐང་དུ་ཞབས་ཀྱི་པདྨོ་ཐོག་མར་བསྐྱོད་སྐབས། བློ་བཟང་འཕྲིན་ལས་རྒྱ་མཚོ་མཆོག་གིས་ངོ་ཤེས་ཤིང་ཡོན་ཏན་མཐོང་བས་མི་ཕྱེད་པའི་དད་པ་སྐྱེས་སོ། །རྣལ་འབྱོར་གྱི་དབང་ཕྱུག་ཆེན་པོ་འདི་ཉིད་ཐོག་མར་མཚོ་རྔའི་ཧ་ཏ་ལུང་བའི་བྲག་སྐྱ་ལྷུན་གྲུབ་རྫོང་དུ་བཞུགས་པའི་ཐུགས་དགོངས་བཏང་ཚེ། ས་དེའི་བླ་རྒན་སྔགས་རྒན་བསམ་པ་དཀར་པོ་ཅན་དུ་མས། དམ་པ་ཁྱེད་གནས་དེར་གཏན་ནས་བཞུགས་མི་ཉན་སྔོན་ཆད་མཚམས་པ་བ་མང་པོ་ཞིག་སྲོག་ཤོར་བ་མ་ཟད་གནས་དེར་འགྲིམས་པའི་སྐྱེ་བོ་ཕོ་མོ་རྒན་གཞོན་མང་པོ་ཞིག་ཤི་ཆད་དང་ན་ཚ་བྱུང་ཞེས་རྒྱུ་མཚན་ཞུས་ཏེ་བཤོལ་བཏབ་ཀྱང་ཁར་མ་ཉན་པར་དེ་ནས་མཚམས་ལ་བཞུགས། རྗེས་སུ་མི་མང་པོས་ཁོང་ལ་ཁྱེད་ལྷ་འདྲེས་གནོད་པ་བྱེད་པར་མི་སྐྲག་གམ་ཅེས་ཞུས་པ་ལ། ང་མི་སྐྲག་ཅེས་ལན་བཏབ། ཆོས་ཐམས་ཅད་བདེན་མེད་དུ་གཟིགས་ཤིང་སྟོང་ཉིད་ཀྱི་ལྟ་བ་རྟོགས་པས། རྗེ་མི་ལ་རས་པའི་རྣམ་ཐར་དུ། ལམ་བསྐྱེད་རྫོགས་བརྟན་པར་བསྒོམ་པའི་མཐུས། །ནང་རྩ་གནད་རྟེན་འབྲེལ་ཤེས་པའི་ཕྱིར། །ཕྱི་འཁྲུལ་སྣང་གི་དྲན་པ་དབྱིངས་སུ་ཡལ། །གནོད་བྱ་དང་གནོད་བྱེད་ངས་མ་མཐོང༌། །ཆོས་སྡེ་སྣོད་ཀྱི་གསུང་རབ་ཞལ་ཕྱེ་ཡང༌། །དོན་དེ་ལས་མེད་པ་བློ་ཐག་ཆོད། །ཅེས་གསུངས་པ་ལྟར་གནོད་བྱ་དང་གནོད་བྱེད་མེད་པའི་གནས་ལུགས་རྟོགས་པས་གནས་འཇིགས་རུང་གང་དུ་བཞུགས་ཀྱང་འཇིགས་ཞུམ་གཏན་ནས་མེད། གནས་དེར་སྔོན་ཁ་རག་སྒོམ་ཆེན་དང༌། ཞབས་དཀར་ཚོགས་དྲུག་རང་གྲོལ། ཨ་རིག་དགེ་བཤེས་ཆེན་མོ། སེ་རའི་རིན་ཕྲེང། རྗེ་གསེར་ཁང་བ། གྲུབ་ཆེན་ཤར་སྐལ་ལྡན་རྒྱ་མཚོ། སྐུ་ཕྱོགས་རྒྱ་ལི་སོགས་མཁས་གྲུབ་དམ་པ་མང་པོས་སྒོམ་སྒྲུབ་མཛད་མྱོང་བས་གནས་བྱིན་ཅན་ཞིག་ཡིན་ཞིང༌། སྐབས་ཤིག་ལ་གནས་རྒོད་དུ་ཤོར་ཏེ་མཁར་ནང་བླ་མ་བྲག་ལ་ལྕེབས། དེའི་རྗེས་སུ་གནས་དེར་ཕེབས་པའི་སྒོམ་སྒྲུབ་པ་མང་པོར་ལྷ་འདྲེས་གནོད་པ་བཏང་བ་དང༌། གནས་བཙན་པོ་དེ་བརྒྱུད་མྱོང་བའི་ཁྱིམ་པ་ཕོ་མོ་རྒན་གཞོན་མང་པོར་ལྷ་འདྲེས་གནོད་པ་བཏང་ནས་མི་བཅུ་གསུམ་ཤི་ལྕེབས་བྱས་ལ། གནས་དེ་ནས་བར་སྐབས་ཤིག་ལ་མཚམས་པ་འདུག་མི་མེད་པར་གྱུར། རྣལ་འབྱོར་གྱི་དབང་ཕྱུག་ཆེན་པོ་ཁོང་བཞུགས་ནས་གནས་རྒོད་དེ་བཏུལ་ནས་གཉུག་མར་གནས་པ་ལྷ་འདྲེ་རྣམས་ཀྱིས་ཆོས་སྒྲུབ་པ་པོ་རྣམས་ལ་གྲོགས་བྱེད་པ་དང༌། སེམས་ཅན་ལ་གནོད་འཚེ་མི་བྱེད་པར་དམ་ལ་གནས་པར་བྱས། མཚན་མོའི་དུས་སུ་མེ་འབུད་པ་དང༌། ཧབ་ཆ་རྒྱག་པ། གླུ་ལེན་པ། དགུན་གྱི་དུས་སུ་སྦྲུལ་ཆེན་པོ་མཐོང་བ་སོགས་བྱུང་ཀྱང༌། དམ་པ་འདི་ཉིད་ཕེབས་པའི་དུས་མཚམས་དེ་ནས་བཟུང་ད་བར་དུ་ས་དེ་ནས་མི་སུ་ཡིན་གྲི་ཤི་ལ་སོང་བ་དང༌། གཟའ་དང་བཙན་ཕོག་པ་སོགས་ཀྱི་གཏམ་ཐོས་རྒྱུ་མེད་པར་གྱུར་བ་དང༌། གནས་དེར་དུང་འབུད་པ་དང༌། གཎྜི་རྡུང་བ། རྔ་རྡུང་པ། སྐབས་འགར་ཁ་བ་མེ་ཏོག་གི་དབྱིབས་ཅན་འདབ་མ་དྲུག་ལྡན་དང༌། འཁོར་ལོ་རྩིབས་དྲུག་པའི་དབྱིབས་ཅན་བབས་པ་སློབ་མ་རྣམས་ཀྱིས་མཐོང་གསལ་ལྟར་ལགས། གཞན་ཡང་གནས་དེར་རི་དྭགས་ཤྭ་ཤེའུ་སོགས་ཀྱིས་རྩེ་བྲོ་བྱེད་པ་སོགས་ཡ་མཚན་པའི་རྣམ་འགྱུར་མང་པོ་སྟོན་པ་དང༌། གླ་བ་རྨས་མ་ཞིག་གིས་ལྕགས་རྙི་དྲུད་ནས་དམ་པ་འདི་ཉིད་ཀྱི་དྲུང་དུ་འོང་ནས་ཕྱག་འོག་ནས་འོ་མ་འཐུང་བ་དང༌། ཡང་གནས་དེར་བྱེའུ་ཞིག་གིས་དྲ་མའི་ཐད་དུ་འོང་ནས་སྐྱིད་ད་སྐྱིད་ད་ཟེར་བ་དང༌། བྱེའུ་གཞན་པས་ཇོ་བོ་རྗེ་ཇོ་བོ་རྗེ་ཟེར་བ་དང༌། བྱ་དང་རི་དྭགས་སོགས་ཀྱིས་སྐད་རིགས་སྣ་ཚོགས་བསྒྲགས་པ་སོགས་ཡ་མཚན་པའི་གནས་སུ་མཆིས་སོ། །དམ་པ་འདི་ཉིད་ཧ་ད་ལ་ཐོག་དང་པོ་ཕེབས་ནས་བཞུགས་སྐབས་མཚོ་ལྷོ་ཁུལ་གྱི་རྫོང་དཔོན་ཞིག་གིས་ཁ་ད་ལུང་བའི་ནང་ན་ཆོས་ལུགས་པ་ཞིག་ཡོད་ཟེར་བའི་བདེན་རྫུན་ལྟ་རུ་སོང་ཚེ་ཧ་ད་ནང་ལ་འགྲོ་ལམ་ཡོད་མེད་མི་ཞིག་ལ་དྲིས་པས་ལམ་ཡོད་ཟེར་བ་ལྟར་སོང་ནས་ལྟས་ཚེ་ལུང་བའི་ཁ་བྲག་གིས་བཅད་ཡོད་པ་མཐོང་ནས་འགྲོ་ས་མ་རྙེད་ནས་ཕྱིར་ལོག དེ་ཡང་དམ་པ་འདི་ཉིད་ཀྱི་ནུས་མཐུ་ཡིན་ནོ། །བློ་བཟང་འཕྲིན་ལས་རྒྱ་མཚོས་མཚོ་སྔོན་ཀིརྟི་དགོན་དཀར་ལྷ་དགོན་བཏབ་པ་ནས་ད་ལྟའི་བར་དུ་དགོན་སྡེ་འདི་ལ་ཆོས་དང་ཟང་ཟིང་སོགས་བྱ་བ་གང་གི་སྒོ་ནས་ཀྱང་དྲིན་གྱིས་བསྐྱངས་པས་བཀའ་དྲིན་ལ་འཁོར་བ་མེད། དམ་པ་འདི་ཉིད་དགུང་གྲངས་ང་བཞི་བ་རབ་རྒྱལ་ལྕགས་སྤྲེལ་༡༩༨༠ ལོར་ཁོང་གི་སྐུ་མཆེད་ཡོན་ཏན་རྒྱ་མཚོའམ་འདྲེན་མཆོག་མཚོ་སྔོན་པོ་ཕྱོགས་སུ་ཕེབས་པས། ཁོང་ཉིད་དང་འཕྲད་པས་དགའ་སྤྲོ་ཚད་ལས་འདས་པ་སྐྱེ། དེ་ནས་ཁོང་གིས་སྐུ་གཡོག་ཞབས་ཕྱི་བསྒྲུབས་ཏེ་ཁོང་དང་མཉམ་དུ་སྒྲུབ་པ་ཉམས་ལེན་ལ་བརྩོན་པར་མཛད། ཁོང་དགོན་པར་ཕེབས་ནས་དབང་གནང་བའི་སྐབས་སུ། དབང་སྒྲུབ་གྲོགས་དང༌། བསྙེན་རྫོགས་སོགས་སྒྲུབ་པའི་སྐབས་རྣམས་སུ་གསང་སྟོན་མཛད་པ་དང༌། སྐབས་འགར་ཆོས་སྐྱོང་གི་བསྐང་གསོལ་གསུངས་པ་སོགས་དགོན་པར་ཐུགས་བསམ་ཤིན་ཏུ་དཀར་བས་བཀའ་དྲིན་ཤིན་ཏུ་ཆེ། དགོན་འདི་ཐོག་མར་འདེབས་པའི་སྐབས་སུ། དམ་པ་འདི་ཉིད་ཀྱིས་ཆོས་སྡེ་འདིའི་མཚན་ལ་བཤད་སྒྲུབ་བཀྲ་ཤིས་གླིང་ཞེས་གསོལ། དེ་ནས་བཟུང་གྲྭ་བ་རྣམས་ལ་རབ་བྱུང་དང༌། དགེ་ཚུལ་དང་བསྙེན་རྫོགས་ཀྱི་སྡོམ་པ་རྗེ་བཙུན་དམ་པ་ཉིད་ཀྱིས་གནང་ཞིང༌། རབ་བྱུང་དང་བསྙེན་རྫོགས་ཀྱི་མཁན་པོ་དམ་པ་གང་གིས་མཛད་ཅིང༌། ཁོང་དང་ཁོང་གི་སྐུ་མཆེད་དགེ་སློང་འདྲེན་མཆོག་གམ་ཡོན་ཏན་རྒྱ་མཚོ་དང༌། རྔ་བ་ཀིརྟིའི་དགེ་རྒན་ལྷ་རམས་པ་ཚུལ་ཁྲིམས་རྣམ་གསུམ་གྱིས་ཆོས་འདུལ་བའི་གཞི་གསུམ་གྱི་ཕྱག་ལེན་ཇི་ལྟ་བ་བཞིན་ལེགས་པར་བཙུགས། ས་དེའི་སེར་སྐྱ་མཆོག་དམན་མཐའ་དག་ལ་སེམས་བསྐྱེད་པ་དང༌། འཕགས་པ་ཐུགས་རྗེ་ཆེན་པོའི་དབང་དང༌། སྒྲོལ་མའི་དབང༌། ཀླུ་གདོན་གྱི་གནོད་པ་ཞི་བའི་ཆེད་དུ་ཚེ་དབང་ལན་བཞི་གནང་བ་དང༌། དགོན་པའི་གྲྭ་མང་ལ་རྒྱལ་པོ་སྐུ་ལྔའི་ཆོ་ག་རྡོ་རྗེ་སྒྲ་དབྱངས་དང༌། ཀུན་ཕན་སྤྲིན་གྱི་སྒྲ་དབྱངས་ཀྱི་རྗེས་གནང་བསྩལ་བ་དང༌། སེར་སྐྱ་ཁྲི་འབུམ་མང་པོར་བླ་མཆོད་དང༌། གཅོད་སྟན་ཐོག་གཅིག་མ་དང༌། བཟང་སྤྱོད་སྨོན་ལམ། མདོ་གདུགས་སྒྲོལ་གསུམ་དང་མ་ཎི། དམིགས་བརྩེ་མ་སོགས་གང་ལ་གང་འདོད་ཀྱི་ཆོས་ཀྱི་དབང་ལུང་གནང་བས་མ་རིག་པའི་སྨག་ཏུ་སྡུག་བསྔལ་གྱི་ཉམ་ཐག་པའི་མཚོ་སྔོན་པོ་གཡས་རུ་གཡོན་རུ་སོགས་ས་ཆ་གཞན་དང་གཞན་གྱི་དད་ལྡན་མང་ཚོགས་ཁྲི་འབུམ་མང་པོ་སྨིན་ཅིང་གྲོལ་བར་མཛད་པ་དང༌། མཐོ་རིས་དང༌། ཐར་བ་དང་ཐམས་ཅད་མཁྱེན་པའི་ལམ་སྣ་ཟིན་པར་བྱས། དམ་པ་འདི་ཉིད་ཀྱིས་འཁྱམས་རི་དགོན་པ་དང༌། ཇོ་སྐོར་དགོན་པ་སོགས་དགོན་པ་གཞན་རྣམས་ཀྱི་གྲྭ་བ་མང་པོའི་རབ་བྱུང་དང༌། དགེ་ཚུལ་དང༌། བསྙེན་རྫོགས་ཀྱི་མཁན་པོ་དང་སློབ་དཔོན་མཛད་དེ་ངུར་སྨྲིག་གི་རྒྱལ་མཚན་གསོལ་བར་མཛད། ཁྱིམ་པ་ཕོ་མོ་སྟོང་ཕྲག་དུ་མར་དགེ་བསྙེན་གྱི་སྡོམ་པ་གནང་བ་དང༌། མི་ཁྲི་ཕྲག་མང་པོར་བསྙེན་གནས་ཀྱི་སྡོམ་པ་གནང༌། མཚོ་སྔོན་པོའི་ཉེ་འགྲམ་གྱི་སེར་སྐྱ་ཕལ་ཆེ་བ་རྗེ་བཙུན་དཔལ་ལྡན་བླ་མ་འདི་ཉིད་ཀྱི་སློབ་མར་གྱུར་པས་སྙན་གྲགས་ཀྱི་བ་དན་དཀར་པོ་སྲིད་གསུམ་མཁའ་རུ་འཕྱར་ཞིང༌། ཟབ་རྒྱས་ཀྱི་འཕྲིན་ལས་ཕྱོགས་བཅུར་རྒྱས་པས་བསྟན་འགྲོའི་དཔུང་གཉེན་དུ་གྱུར། ལོ་ནས་ལོར་མཐུད་ཅིང་བསྙེན་སྒྲུབ་མཚམས་སུ་བཞུགས་པས་ཁོམ་ལོང་མེད་ན་ཡང༌། ཀིརྟི་དགོན་དཀར་ལྷ་དགོན་པ་འདིའི་གྲྭ་བ་རྣམས་ལ་སྐྱབས་འགྲོའི་ཁྲིད་རྒྱས་པ་དང༌། པཎ་ཆེན་བདེ་ལམ་དང༌། བླ་མཆོད་ཀྱི་ཁྲིད་དང༌། བློ་སྦྱོང་ཚིག་བརྒྱད་མ་སོགས་བློ་སྦྱོང་སྐོར་དང༌། བྱང་ཆུབ་སེམས་དཔའི་སྤྱོད་པ་ལ་འཇུག་པ་དང༌། སྤྱོད་འཇུག་དར་ཊཱིཀ་དང༌། རྒྱལ་མཁན་པོའི་ཊཱི་ཀའི་སྟེང་ནས་རྒྱས་ཁྲིད་དང༌། རྒྱལ་སྲས་ལག་ལེན་རྩ་འགྲེལ་སོགས་བཤད་ཁྲིད་གནང༌། ཆོས་སྐྱོང་གི་སྲོག་གཏད་མཛད་པ་དང༌། རྒྱལ་བའི་སྐུ་གསུང་ཐུགས་ཀྱི་རྟེན་གསུམ་རྣམས་ལ་རབ་གནས་ལེགས་པར་བྱས་ནས་བྱིན་རླབས་ཀྱི་གཟི་འོད་དང་ལྡན་པར་གྱུར། དགོན་པའི་བཤད་སྒྲུབ་སོགས་ཆོས་སྲིད་ཀྱི་བྱ་བ་གལ་ཆེན་རྣམས་དམ་པ་གང་གིས་ལུང་བསྟན་གནང་བ་ལྟར་སྒྲུབ་པའོ། །གནས་ལ་ཆགས་ཞེན་སྤང་ཕྱིར་རྒྱུན་དུ་གནས་བཅས་ནས་ཟླ་བ་འགའ་རེ་དང༌། མང་ན་ཡང་ལོ་གཉིས་ལས་མང་བཞུགས་མ་མྱོང་མོད། དམ་པ་འདི་ཉིད་མཚོ་སྔོན་པོར་ཕེབས་ནས་ལོ་དྲུག་ཙམ་བཞུགས་པས་ད་ནི་གནས་གཞན་ལ་སྤོར་དགོས་སྙམ་ནས་ཡུལ་གཞན་བསྙེག་པའི་སྟ་གོན་བྱས་པ་ལ། དད་ལྡན་སེར་སྐྱའི་སློབ་མ་དང༌། མང་ཚོགས་མང་པོ་དང༌། ཐ་ན་བྱིས་པ་ལོ་ལྔ་དྲུག་ཡན་ཆད་ཀྱིས་ཁོང་གཞན་དུ་ཕེབས་རྒྱུའི་གཏམ་ཐོས་པའི་མོད་ལ། ད་ནི་ཅི་བྱ་སྙམ་ནས་སྨྲེ་སྔགས་འདོན་པ་དང༌། གནས་འདིར་ཉི་ཟླའི་འོད་ནུབ་པ་འདྲ་བས་སྡུག་བསྔལ་དྲག་པོས་ནོན། ཀུན་གྱིས་དམ་པ་ཁྱེད་བཞུགས་ནས་ས་འདིའི་སྐྱེ་འགྲོ་རྣམས་རྗེས་སུ་འཛིན་དགོས་པའི་བཤོལ་བཏབ་ནས་བཀག་པ་དང༌། མང་ཚོགས་ཀྱིས་གོང་ཧོ་རྫོང་སྲིད་གཞུང་ལ་ཁོང་བཞུགས་དགོས་པའི་རེ་བ་ཞུས། རྫོང་དཔོན་ལྷ་མཁར་བྱམས་ཟེར་བའི་གོང་ཧོ་རྫོང་གི་མང་ཚོགས་འབུམ་ཕྲག་ལྷག་གི་ཚབ་བྱས་ཏེ། ཁོང་ལ་བཞུགས་དགོས་པའི་ཞུ་བ་ནན་ཏན་ཕུལ་བ་ལ། དམ་པ་འདི་ཉིད་ཀྱིས་གནས་གཅིག་ཏུ་བཞུགས་ན་དགེ་སྦྱོར་ལ་མི་ཕན་པས་རྒྱུ་མཚན་ལ། རྗེ་རེད་མདའ་བའི་གསུང་ལས། གང་དུ་གནས་ན་སྣང་ཤེས་འཕེལ་འགྱུར་ཞིང༌། །རང་རྒྱུད་རྙེད་བསྐུར་ཞགས་པའི་འཆིང་བྱེད་ལ། །གཞན་རྒྱུད་ཕྲག་དོག་འགྲན་སེམས་ཀྱིས་གདུང་བའི། །ཡུལ་དེར་སྐད་ཅིག་ཙམ་ཡང་མི་གནས་སོ། །ཞེས་གསུངས་པ་དང༌། མཁས་བཙུན་གཞོན་ནུ་གྲུབ་ཀྱིས། གནས་གཅིག་ཡུན་རིང་ཆགས་སྡང་སྐྱེ་བའི་རྒྱུ། །འདྲེས་བྱས་མང་ན་ཕྱོགས་རིས་ཞེན་པ་འཕེལ། །གསོག་རུམ་མང་པོས་ལུས་ངག་དགེ་སྦྱོར་གཅོག །རྒྱུས་མེད་ཡུལ་དུ་འཁྱམ་ན་མི་འཐད་དམ། །ཞེས་གསུངས་པ་སོགས་ལུང་དུ་མས་སྒོ་ནས་ཞུ་བ་བཟློག་ཐབས་བྱས་ཀྱང༌། སེར་སྐྱ་རྣམས་ཀྱིས་བྱང་ཆུབ་སེམས་དཔའ་ཐམས་ཅད་བསྟན་འགྲོའི་དོན་དུ་བྱོན་པ་ཡིན་པས་གནས་འདིའི་སེམས་ཅན་ལ་སྙིང་རྗེ་དགོངས་ནས་ཅིས་ཀྱང་བཞུགས་པར་མཁྱེན་མཁྱེན་ཞུས་ནས། དམ་པ་ཁྱེད་ལ་དོན་ཅི་ཞིག་སྒྲུབ་དགོས་ཀྱང་ང་ཚོའི་སྒྲུབ་ངེས་ཡིན་ཞེས་ནན་གྱིས་བཀག་པ་དང༌། ཁོང་གིས་མ་གྱུར་སེམས་ཅན་ཐམས་ཅད་ལ་སྙིང་རེ་རྗེ༌། ང་ཡི་ཚེ་སྲོག་བློས་བཏང་ནས་སྒྲུབ་པ་བྱེད་པའི་དམ་བཅའ་ནི་འཁོར་བའི་འདམ་ལ་བྱིང་བའི་སེམས་ཅན་ཐམས་ཅད་སྐྱོབ་རྒྱུ་དེ་ཡིན། ཞེས་གསུངས་ནས་བསྟན་འགྲོའི་དོན་དུ་བཞུགས་ཞེས་ཞལ་གྱིས་བཞེས། དམ་པ་འདི་ཉིད་ཀྱི་སྐྱ་སེར་ཐམས་ཅད་དགེ་བར་བསྐུལ་ནས་ཡུལ་དེའི་གཉེན་སྒྲིག་བྱེད་པ་དང༌། བྱིས་པའི་བཙས་སྟོན་རྣམས་ལ་ནོར་ལུག་མང་པོ་བཤས་ནས་དམར་སྟོན་བྱེད་པའི་སྲོལ་དེ་མེད་པར་བྱས་ཏེ། ཀ་ར་སིལ་ཏོག་སོགས་དཀར་སྟོན་དུ་བསྒྱུར། མི་དགེ་བ་བཅུའི་ལས་ལ་ཞེན་པའི་མི་རྣམས་ལ་ཆང་དང་དུ་བ། འཕྲོག་རྐུ་སོགས་མི་དགེ་བའི་ལས་སྤང་དུ་བཅུག་ནས་དགེ་བ་བཅུ་ལ་གནས་པར་བྱས། སྲིད་འབྱོར་ཐམས་ཅད་ཆུ་ཤིང་ལྟར་གཟིགས་ཏེ་རྒྱུ་འབྱོར་གང་ཕུལ་ཀྱང་མི་ལེན་པར་ཆོས་སྡེ་སོ་སོ་ལ་ཕུལ་བའོ། །གནས་གང་དུ་ཕེབས་ཀྱང་དཔེ་ཆ་སོགས་ཡོ་བྱད་རྒྱབ་གང་བོ་ལས་མེད། དབང་ལུང་གསུང་ཐེངས་རེར་ཁོང་ལ་འབུལ་ནོར་སྒོར་ཁྲི་ཕྲག་དང༌། ཇ་མར་གོས། ཕྲུག་ཅི་མང་འདུས་པ་གཅིག་ཀྱང་མ་ལུས་པར་ཉེ་ལོགས་འགྲམ་གྱི་དགོན་སྡེ་རྣམས་ཀྱི་རྟེན་བཞེངས་ཀྱི་ཆ་རྐྱེན་དུ་ཕུལ། ཀིརྟི་དགོན་དཀར་ལྷ་དགོན་པ་ལ་གནས་བརྟན་བཅུ་དྲུག་བཞེངས་བྱེད་དང༌། མ་ཎི་དུང་འཁོར་གྱི་ཆ་རྐྱེན་དུ་ཕུལ་བ་སོགས་སྔ་ཕྱིར་སྒོར་ཁྲི་ཕྲག་དུ་མ་ཕུལ་ནས་དགོན་སྡེ་འདི་ཉིད་ཟང་ཟིང་གིས་བསྐྱངས། ཅོས་སྐོར་དགོན་པ་དང༌། འཁྱམས་རུ་དགོན་པ་སོགས་ལའང་འབུལ་ནོར་གང་བྱུང་ཐམས་ཅད་རྟེན་བཞེངས་ཀྱི་ཆ་རྐྱེན་དུ་ཕུལ། དམ་པ་འདི་ཉིད་མཚམས་ཁང་དུ་ཕྱིར་ཕེབས་དུས་བཞེས་བ་བྲོ་ཁུག་མ་གང་ལས་ཁྱེར་རྒྱུ་མེད་ལ། གཞན་ཡང་ལོ་རེར་གྲོང་བའི་ནང་གི་དབུལ་ཕོངས་ཅན་དང༌། དཀའ་ཁག་ཅན་གང་ཡིན་རྩར་བཅད་ནས་སྒོར་མོ་དང་ཕྱེ་རྩམ་སོགས་འགྱེད་དེ། དེ་ཚོའི་དབུལ་ཕོངས་ཀྱི་སྡུག་བསྔལ་བསལ་ནས་དགེ་བར་བསྐུལ། དད་འབུལ་གྱི་དངོས་རྫས་སྒོར་ཅུང་ཙམ་ཡང་ཆུད་ཟོས་སུ་བཏང་བ་མེད་པར་བྱས་སོ། ། རྗེ་བཙུན་བླ་མ་དམ་པ་འདི་ཉིད་དབུས་གཙང་ཆོས་ཀྱི་ཞིང་ཁམས་སུ་ལན་དུ་མར་ཆིབས་བསྒྱུར་མཛད། ལྷ་སའི་ཇོ་བོ་རིན་པོ་ཆེ་ཤཱཀྱ་མུ་ནེ་ལ་གསེར་ཆབ་སྔ་ཕྱི་དུ་མར་ཕུལ། སེར་འབྲས་དགེ་གསུམ་དང༌། པོ་ཏ་ལ་དང༌། ནོར་བུ་གླིང་ག་དང༌། བསམ་ཡས་དང༌། བསམ་ཡས་མཆིམས་ཕུ་དང༌། ཁྲ་འབྲུག་སྒྲོལ་མ་སོགས་དང༌། བཀྲ་ཤིས་ལྷུན་པོ་དང༌། རྒྱལ་རྩེ་དཔལ་འཁོར་ཆོས་སྡེའི་མཆོད་རྟེན་དང༌། ས་སྐྱ་སོགས་ལ་མཆོད་མཇལ་བྱས་ནས་བསྟན་པ་དང་འགྲོ་བའི་དོན་དུ་ཐུགས་སྨོན་རྒྱ་ཆེར་མཛད། རྒྱ་ནག་གི་གནས་ཆེན་རི་བོ་རྩེ་ལྔ་སོགས་སུ་ཕེབས་ནས་བསྟན་འགྲོའི་དོན་བླ་ན་མེད་པ་མཛད། ཡང་རྣལ་འབྱོར་གྱི་དབང་ཕྱུག་ཆེན་པོ་འདི་འདོད་ཆུང་ཆོག་ཤེས་ལ་གནས་ཤིང༌། དམ་པ་འདི་ཉིད་དགུང་གྲངས་ང་བརྒྱད་པ། སྤྱི་ལོ་༡༩༨༤ལོ། རབ་རྒྱལ་ཤིང་བྱི་ལོའི་རྗེ་བཙུན་དམ་པ་འདི་ཉིད་མཚོ་སྙིང་ལ་ཕེབས་ནས་བསང་གསོལ་མང་བོ་བྱས། དེ་རྗེས་མཚོ་གཏེར་འབུལ་སྐབས་མཚོ་དར་ཕྱེས་ནས་མཚོ་གཏེར་ཕུལ། ཕྱིར་ཉིན་ཁོང་ཕྱིར་ཕེབས་དུས་མཚོ་དར་གློ་བུར་ཁ་ཟུམ་ནས་སེར་ཁ་གཅིག་ཀྱང་མེད་པ་ཞབས་ཕྱི་བ་དབང་དྲག རྡི་ཁོ། སོགས་ཀྱིས་མཐོང་ནས་ཡ་མཚན་པར་གྱུར། དམ་པ་འདི་ཉིད་དགུང་གྲངས་ང་བརྒྱད་པ། སྤྱི་ལོ་༡༩༨༤ལོ། རབ་རྒྱལ་ཤིང་བྱི་ལོར་རྗེ་བཙུན་དམ་པ་འདི་ཉིད་རྩ་བའི་གདན་ས་ལུང་སྐྱ་དགོན་མི་འགྱུར་བདེ་ཆེན་གླིང་དུ་བྱོན་ནས་བློ་སྦྱོང་དང་མི་འཁྲུགས་པའི་དབང་དང༌། གྲྭ་བ་བརྒྱ་ལྷག་ལ་བསྙེན་རྫོགས་ཀྱི་སྡོམ་པའི་མཁན་པོ་མཛད་ནས་ཆོས་འདུལ་བའི་ཕྱག་ལེན་བཞིན་དགེ་སློང་གི་སྡོམ་པ་ཡང་དག་པར་གནང་བར་མཛད་དོ། །དམ་པ་འདི་ཉིད་དགུང་གྲངས་ང་དགུ་བ། སྤྱི་ལོ་༡༩༨༥ལོ། རབ་རྒྱལ་ཤིང་གླང་གི་ལོར་ལུང་སྐྱ་དགོན་མི་འགྱུར་བདེ་ཆེན་གླིང་དུ་བྱོན་ནས་རྒྱལ་སྲས་ལག་ལེན་སོགས་ཟབ་ཆོས་དུ་མ་གསུངས་བར་མཛད། སྐབས་སྔ་ཕྱི་གང་རུང་ལ་ཆུ་གཏོར་བརྒྱ་རྩ། བླ་མ་མཆོད་པ། བླ་མའི་རྣལ་འབྱོར་དངོས་གྲུབ་འགུགས་པའི་ལྕགས་གྱུ་མ་སོགས་ཀྱིས་ཁྲིད་ལུང་གི་ཆོས་ཆར་འཇོ་བར་བྱས་སོ། །རྗེ་བཙུན་བླ་མ་འདི་ཉིད་སྤྱི་ལོ་༡༩༨༩ ལོ་བླ་མ་གསལ་ལྡན་གྱི་མདུན་དུ་ཕེབས་ནས་རྣམ་པ་གཉིས་ཡུན་རིང་ངོ་མ་ཐུག་པ་ལ་ཞལ་མཇལ་བ་ཕན་ཚུན་ཐུགས་དགྱེས་པའི་སྒོ་ནས་ཞལ་གསུངས་གནང་སྟེ་ཉིན་བདུན་ལ་བཞུགས། དེ་དུས་སུ་བླ་མ་གསལ་ལྡན་གྱི་དབོན་རིག་པའི་རྡོ་རྗེ་སོགས་གྲྭ་བ་དུ་མ་ལ་ཟབ་ལམ་སྦྱོར་བ་ཡན་ལག་དྲུག་གི་སྔོན་འགྲོའི་བཤད་ཁྲིད་ལེགས་པར་གནང་བའོ། །མཚུངས་མེད་བླ་མ་དམ་པ་གང་ཉིད་དགུང་གྲངས་རེ་བདུན་པ། སྤྱི་ལོ་༡༩༩༣ ལོ། རབ་གནས་དཔལ་གདོང་ཞེས་པ་ཆུ་བྱ་ལོར་གཙང་ཆེན་རྡོ་རྗེ་སློབ་དཔོན་ངག་དབང་ཡོན་ཏན་བཟང་པོའི་མཛད་པའི་གཞན་སྟོང་གི་དཔེ་ཆ་མཇལ་བས་ཡིད་ལ་དགའ་དད་ལྷག་པར་སྐྱེས་འཛམ་ཐང་བསམ་འགྲུབ་ནོར་བུའི་གླིང་དུ་བྱོན་ཏེ་བླ་མ་ཡོན་ཏན་བཟང་དང་མཇལ། ཕན་ཚུན་ཐུགས་ཡིད་དགའ་སྤྲོས་ངང་གསུང་གླེང་ཞིབ་རྒྱས་མཛད། སྐབས་དེ་དུས་སུ་གཞན་སྟོང་ཡང་གསན་ཡོད་པར་སྣང་ངོ༌། །དེ་ནས་ཆུ་བྱ་ལོར་ལྷ་དབང་ཐང་དུ་བྱོན། རྣལ་འབྱོར་གྱི་དབང་ཕྱུག་མང་དགེ་བླ་མ་སྐལ་ལྡན་སོགས་ལ་དཔལ་དུས་ཀྱི་འཁོར་ལོའི་སྦྱོར་དྲུག་དངོས་གཞིའི་ཉམས་ཁྲིད་དང༌། རིམ་གཉིས་སྨོན་ལམ་བསྩལ་བ་སོགས་ཆོས་ཀྱི་བཀའ་དྲིན་ཆེན་པོས་བསྐྱངས། དམ་པ་འདི་ཉིད་དགུང་གྲངས་དོན་གཅིག་པ། སྤྱི་ལོ་༡༩༩༧ལོ། རབ་གནས་མེ་གླང་གི་ལོར་ལུང་སྐྱ་དགོན་མི་འགྱུར་བདེ་ཆེན་གླིང་དུ་སླར་བྱོན་ནས་གཙང་སྤྲུལ་བློ་གྲོས་རྣམ་རྒྱལ་སོགས་བླ་གྲྭ་དུ་མ་ལ། དབུ་མ་ཆེན་པོ་གཞན་སྟོང་གདོང་ལྔའི་ང་རོའི་བཤད་པ་རྒྱ་ཆེར་གསུངས། ཀུན་ཀྱང་རྟག་ཆད་ཀྱི་སྤྲོས་པ་དང་བྲལ་བའི་དབུ་མའི་ལམ་བཟང་འགོད་པར་མཛད་དོ། །ཆོས་སྡེ་དེར་ཐེབས་འཇོག་ནི། ཁྲ་དགེ་སློང་གི་སྐུ་གདུང་དང༌། སྐྱབས་རྗེ་དམ་པ་མཚམས་པ་བ་སྨོན་ལམ་བཟང་པོའི་དབུ་ཞྭ་དང༌། རོལ་མོ་དང༌། ཕར་ཕྱིན་དཔེ་ཆ། བསྡུས་གྲྭའི་སྐོར་གྱི་དཔེ་ཆ། འདུལ་བའི་དཔེ་ཆའི་སྐོར། ཟླ་གམ་གྱི་མཐུན་རྐྱེན་ལ་སྒོར་ཁྲི་ལྷག་དང༌། སྐོང་བུ་བརྒྱ། མཆོད་མེ་ཁྲི་མཆོད་ཀྱི་ཐེབས་རྩ་བཞག་ལ། མཚམས་པ་བ་སྨོན་ལམ་བཟང་པོའི་དབུ་ཞྭ་བྱམས་ཆེན་གྱི་གཟུངས་འཇུག་ཏུ་བཞུགས་ཡོད། ལོ་དེར་མདོ་ལུའི་རྡོ་ཁ་དགོན་ངེས་དོན་ཆོས་འཁོར་གླིང་དུ་བྱོན། ཉིན་བཅུ་ཡས་མས་སུ་མཁྱེན་དཔྱོད་མཆོག་ཏུ་ཡངས་བ་མཁན་རྡོར་འཛིན་སོགས་སློབ་ཚོགས་དུ་མ་ལ་སྐྱབས་འགྲོའི་ཁྲིད་དང༌། རྒྱལ་སྲས་ལག་ལེན་དང༌། གངས་ཅན་མཁས་གྲུབ་ཀུན་གྱི་གཙུག་རྒྱན་རྗེ་ཏཱ་ར་ནཱ་ཐའི་རྒྱལ་བའི་བསྟན་པ་ལ་འཇུག་པའི་རིམ་པ་སྐྱེས་བུ་གསུམ་གྱི་མན་ངག་གི་ཁྲིད་ཡིག་བདུད་རྩིའི་ཉིང་ཁུ་བཤད་ཁྲིད་གནང་ནས་བཀའ་གདམས་གོང་མའི་རྣམ་ཐར་ལ་འཇུག་པར་མཛད། རྗེས་སུ་ཤར་འཛམ་ཐང་དུ་བླ་མ་གསལ་ལྡན་ཕེབས་སྐབས་བླ་མ་གསལ་ལྡན་དང་རྗེ་བཙུན་དམ་པ་འདི་གཉིས་ཞལ་མཇལ་གསུང་གླེང་མང་དུ་གནང༌། སྐྱེ་བ་དང་ཚེ་རབས་ཀུན་ཏུ་མི་འབྲལ་བའི་སྨོན་ལམ་བཏབ། དེ་དུས་སུ་མཁན་སྤྲུལ་རིག་པའི་རྡོ་རྗེས་རྗེས་ནས་སྐུ་ཉིད་རང་ཡུལ་དུ་ལན་གཅིག་ཕེབས་དགོས་ཞེས་ཞུས་ཚེ། དམ་པ་འདི་ཉིད་ཀྱི་ཞལ་ནས། ད་ཕྱིན་ཆད་ང་རང་ཡུལ་དུ་མི་འོང༌། དེའི་རྒྱུ་མཚན་ནི་བླ་མ་རྡོ་རྗེ་འཆང་གི་བཀའ་དྲིན་ལས་ཐོག་མར་རི་ཁྲོད་ཞིག་ཏུ་འགྲོ་ཐུབ་སོང༌། བར་དུ་རི་ཁྲོད་བརྒྱ་དང་ལྔ་བཅུ་ལྷག་ལ་སྒྲུབ་པ་ཉམས་ལེན་རེ་བྱེད་རྒྱུའི་སྐལ་བ་བྱུང༌། ད་ཚེ་མཇུག་འདིར་གནས་དབེན་པ་དང་གྲོང་བ་གང་ཡིན་ཀྱང་དགེ་སྦྱོར་འཕེལ་བའི་གནས་གཅིག་ཏུ་བཞུགས་ངེས་ཡིན། ཁྱེད་ལ་སྔར་བདག་གིས་ཆོས་ཁྲིད་མང་དུ་བཏབ། རྗེས་ནས་ཁྱེད་ཀྱིས་གཞུང་ལུགས་དུ་མ་ལ་གཟིགས་རྟོགས་བྱེད་པ་ནས་ཐོས་དོན་རྒྱུད་ལ་སྦྱོར་བའི་ཉམས་ལེན་རེ་ངེས་པར་བྱེད་པ་གལ་ཆེ་ཚུལ་སོགས་ཞལ་གདམས་དུ་མ་གསུངས་སོ། །དམ་པ་འདི་ཉིད་དགུང་གྲངས་དོན་གཅིག་པ། སྤྱི་ལོ་༡༩༩༧ལོ། རབ་གནས་མེ་གླང་གི་ལོའི་ཧོར་ཟླ་དྲུག་པ་ལ། མདོ་སྨད་ཀྱི་གནས་རྣམས་ལས་དབུས་ན་ཉི་ཟླ་ལྟར་ཁྱད་པར་དུ་འཕགས་པའི་གནས་མཆོག་རྨ་ཆེན་མཚམས་ལུང་དུ་བཞུགས་ནས་སྒྲུབ་པ་ཉམས་ལེན་ལ་གཞོལ་བར་མཛད་དོ། །སྐབས་དེར་རྨ་ཆེན་མཚམས་ལུང་དུ་དམ་པ་འདི་ཉིད་ཀྱི་གཟིགས་སྣང་ལ་ཤེལ་གྱི་མཆོད་རྟེན་ཆེ་ཆུང་གསུམ་ཡོད་པར་གཟིགས་པས་ཉེ་གནས་སོགས་ལ་འདི་ན་མཆོད་རྟེན་གསུམ་ཡོད་གཏེར་བདག་གཉན་པོ་གཡུ་རྩེ་རེད་ཅེས་གསུངས། གནས་དེར་སྒྲུབ་པ་མཛད་པའི་སྐབས་སུ་དམ་པ་འདི་ཉིད་ཀྱི་གཟིམ་མའི་སྟེང་ན་དངོས་གྲུབ་མཉེས་པའི་རིལ་བུ་ཡུང་འབྲུ་ཆུང་ངུ་དུ་མ་བབས་པ་ཁོང་གི་སྐུའི་ཚ་བོ་སོགས་ཀྱིས་མངོན་སུམ་དུ་གྲུབ་པའོ། །དམ་པ་འདི་ཉིད་དགུང་གྲངས་དོན་གསུམ་པའི་བར་ལོ་གཉིས་ལྷག་ལ་གནས་དེར་བཞུགས་པའོ། །སྤྱིར་འཛམ་ཐང་ལ་ཐེངས་དུ་མར་ཞབས་ཀྱིས་བཅག སྐབས་དེ་དག་ཏུ་རྗེ་བླ་མ་ངག་དབང་ཡོན་ཏན་བཟང་པོའི་ཞལ་སྔ་ནས། དུས་འཁོར་སྡོམ་ཆེན་དང༌། ཕུར་བའི་དབང༌། གཅོད་དབང་ནམ་མཁའ་སྒོ་འབྱེད་སོགས་ལེགས་པར་ཞུས། བླ་མ་ཚོགས་གཉིས་སོགས་ཀྱིས་ཞུས་པའི་ངོར་གཙང་ཆེན་བླ་མའི་མགོན་ཁང་ནས། འཛམ་ཐང་གཙང་བ་དགོན་གྱི་བླ་གྲྭ་ཡོངས་ལ་བཀའ་བབ་དྲུག་ལྡན་བླ་ཆེན་ཡེ་ཤེས་རྒྱ་མཚོའི་ཟིན་བྲིས་ཀྱི་ཁྲིད་ལུང་དང༌། རྗེ་ཏཱ་ར་ནཱ་ཐས་མཛད་པའི་མཐོང་དོན་གྱི་ཁྲིད་ལུང་དང་བཅས་གསུངས། སྐབས་དེ་དུས་ཀྱི་ཞལ་གདམས་ཉུང་བསྡུས་གསུངས་བ་ནི། སྐྱབས་འགྲོ་བསྒོམ་པའི་སྐབས་སུ་དྲིན་ཅན་ཕ་མ་སོགས་མཁའ་ཁྱབ་ཀྱི་འགྲོ་བ་རྣམས་སྲིད་ཞིའི་འཇིགས་པ་ལས་སྐྱོབ་པའི་སྐྱབས་གནས་བླ་མ་དཀོན་མཆོག་གསུམ་རྒྱུན་དུ་བརྟེན་ནས་ཡིད་ཆེས་ཀྱི་དད་པ་འབྲལ་མེད་དུ་བྱེད་དགོས། སེམས་བསྐྱེད་བསྒོམ་པའི་དུས་སུ་དྲིན་ཅན་ཕ་མ་རྣམས་ལ་སྡུག་བསྔལ་ཕྲ་རགས་ལས་བྲལ་བ་བདག་གིས་བྱའོ་སྙམ་པའི་གཞན་དོན་ཁུར་དུ་འཁྱེར་བའི་སྙིང་རྗེ་ཆེན་པོ་དང༌། དེ་དག་ལ་བླ་མེད་བྱང་ཆུབ་ཐོབ་པར་འདོད་པ་རྟག་ཏུ་གལ་ཆེ་བ་དང༌། བཤགས་པའི་སྐབས་རྣམས་སུ་གཉེན་པོ་སྟོབས་བཞི་ཚང་བའི་བཤགས་སྡོམ་གལ་ཆེ། དེ་ཡང་སྔར་བྱས་ཀྱི་སྡིག་ལྟུང་ལ་དུག་ཁོང་དུ་སོང་བ་ལྟ་བུའི་འགྱོད་པ་དང༌། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་དང༌། རང་རྒྱུད་ཀྱི་སྐྱབས་འགྲོ་སོགས་དང༌། རྡོར་སེམས་སོགས་རྟེན་གྱི་སྟོབས་དང༌། སྡིག་པ་མི་དགེ་བའི་ལས་དེ་དང་དེའི་གཉེན་པོ་ཆེད་དུ་བསྒོམ་པ་ནི་གཉེན་པོ་ཀུན་ཏུ་སྤྱོད་པའི་སྟོབས་ཏེ་དེ་བཞིའི་སྒོ་ནས་བཤགས་པ་ལ་འབད་དགོས། མཎྜལ་སོགས་མཆོད་པའི་སྐབས་སུ་དངོས་འབྱོར་ཡིད་སྤྲུལ་གྱི་མཆོད་པ་ལ་འབད་དགོས། བླ་མའི་རྣལ་འབྱོར་གྱི་སྐབས་སུ་བླ་མ་སངས་རྒྱས་དངོས་མཐོང་དང་མོས་གུས་ཚད་མེད་པ་དང༌། བླ་མའི་བཀའ་ཚུལ་བཞིན་དུ་སྒྲུབ་པ་ནི་མདོ་སྔགས་གང་གི་སྐབས་སུ་གལ་ཆེ། བསྐྱེད་རིམ་གྱི་སྐབས་སུ་གཟུང་འཛིན་གཉིས་ཀྱིས་བསྡུས་པའི་ཆོས་ཐམས་ཅད་བདེན་མེད་སྒྱུ་མ་ལྟ་བུར་ངེས་ཤེས་ཡང་ཡང་དྲན་པར་བྱས་ནས་ལྷ་སྐུ་སྣང་ལ་རང་བཞིན་མེད་པས་ཟབ་མོ་སྟོང་ཉིད་ཀྱིས་རྒྱས་བཏབ་པ་དང༌། ལྷའི་གསལ་སྣང་སྐུ་དང་ཕྱག་མཚན་སྤྱན་དཀར་ནག་སོགས་ལེགས་པར་གསལ་བའི་ཟབ་གསལ་གཉིས་མེད་ཀྱི་རྣལ་འབྱོར་ཞིག་དགོས། རྫོགས་རིམ་སྔོན་འགྲོའི་སྐབས་ལུས་གནད་སོགས་ལེགས་པར་བྱས་ནས་བླ་མའི་མན་ངག་ལྟར་བསྒོམ་དགོས་པ་དང༌། དངོས་གཞིའི་སྐབས་སུ་གཟུང་འཛིན་སོགས་སྤྲོས་པ་ཐམས་ཅད་བྲལ་བའི་གཉིས་མེད་ཀྱི་ཡེ་ཤེས་རྟོག་མེད་སྤྲོས་བྲལ་དུ་མཉམ་པར་བཞག་དགོས་པ་དང༌། རྗེས་བསྔོ་བའི་སྐབས་སུ་དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །ཞེས་སོགས་གསུངས་པ་ལྟར་དུས་གསུམ་གྱི་སངས་རྒྱས་རྣམས་ཀྱིས་ཇི་ལྟར་བསྔོས་པ་བཞིན་དུ་དུས་གསུམ་དུ་བསགས་པའི་དགེ་བའི་རྩ་བ་ཀུན་མ་རྒན་འགྲོ་བ་ཀུན་གྱི་དོན་དུ་བླ་མེད་རྫོགས་བྱང་ཐོབ་པའི་ཆེད་དུ་བསྔོ་བ་དང༌། ཡང་ན་འཇམ་དཔལ་དཔའ་བོས་ཇི་ལྟར་མཁྱེན་པ་དང༌། ཞེས་སོགས་གསུངས་པ་ལྟར་བྱང་ཆུབ་སེམས་དཔའ་འཇམ་དཔལ་སོགས་ཀྱིས་ཇི་ལྟར་བསྔོས་པ་ལྟར་བདག་གིས་ཀྱང་དེ་ལྟར་བསྔོ་བར་བྱ་དགོས་པར་གསུངས་སོ། །ཡང་འགའ་རེ་ལ་དུས་འཁོར་ལྷན་སྐྱེས་ཀྱི་ཁྲིད་གནང༌། རྗེ་ངག་དབང་ཡོན་ཏན་བཟང་པོ་སོགས་ལ་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་སྤྱི་དོན་རྡོ་རྗེ་བདུད་རྩིའི་ཆུ་གཏེར་གྱི་ཟབ་ཁྲིད་དང༌། བློ་སྦྱོང་ཚིགས་བརྒྱད་མ་དང༌། ཇོ་བོ་རྗེ་དང་འབྲོམ་སྟོན་པ་རྒྱལ་བའི་འབྱུང་གནས་གཉིས་ཀྱི་རྣམ་ཐར་གནང༌། གཞལ་ཡས་ཁང་གི་ནང་ནས་དཔོན་སློབ་བརྒྱ་ལྷག་ལ་སྔོན་འགྲོའི་ལུང་དང་རྒྱལ་སྲས་ལག་ལེན་ས་བཅད་དང་བཅས་པའི་ཁྲིད་ལུང་གནང༌། ངག་དབང་རྣམ་རྒྱལ་གྱི་ཁང་བའི་ནང་ནས་མཁན་འོད་རབ་གཙོས་བླ་སྤྲུལ་བཅུ་ཕྲག་ལྷག་ལ་ལམ་རིམ་དང་རྗེ་མི་ལས་རྣམ་ཐར་མདོར་བསྡུས་ཉིན་གསུམ་ལ་གསུངས། རྐ་མདའི་སྨན་ཁང་དུ་བཞུགས་སྐབས་བློ་སྦྱོང་དང༌། སྤྱི་དོན་མཐོང་དོན་སོགས་ཀྱི་ཁྲིད་དང༌། དགེ་སློང་གི་སྡོམ་རྒྱུན་གནང༌། མགོན་ཁང་དུ་ངེས་དོན་བསྟན་པའི་རྩ་ལག་སྤྲུལ་འཇིགས་མེད་རྡོ་རྗེ་དང༌། ཐུན་པ་བ་ཆོས་ཚན་གསུམ་དཔེ་ཆ་བ་སོགས་ལ་སེམས་ཁྲིད་དང་ལྷན་སྐྱེས་ཀྱི་ཁྲིད་དང༌། མཚམས་པ་བ་སྨོན་ལམ་བཟང་པོའི་རྣམ་ཐར་གསུངས། མཚམས་ཐར་གི་ཁང་བའི་ནང་ནས་སྟོང་ཆེན་དང༌། ཤེས་རབ་རྒྱ་མཚོ་སོགས་ལ་བློ་སྦྱོང་ཚིག་བརྒྱད་མ་དང༌། ཇོ་བོ་རྗེའི་རྣམ་ཐར་གསུངས་པ་སོགས་བཀའ་ཆོས་མང་དུ་བསྩལ། སྐབས་དེ་དུས་སུ་གསུངས་བའི་བླ་མ་ཡོན་ཏན་བཟང་པོའི་ཞབས་བརྟན་གསོལ་འདེབས་འདི་ལྟ་སྟཻ། རྒྱལ་བ་ཀུན་གྱི་ཡེ་ཤེས་སྒྱུ་མའི་གར། །ངུར་སྨྲིག་ཚུལ་འཆང་གསུམ་ལྡན་རྡོ་རྗེ་འཛིན། །མཚུངས་མེད་སྤྲུལ་བའི་སྐུ་ལ་གསོལ་བ་འདེབས། །བདག་ཅག་རྣམས་ཀྱི་བློ་སྣ་ཆོས་ལ་བསྒྱུར། །བསྟན་དང་འགྲོ་བའི་དོན་དུ་བསྐལ་བརྒྱའི་བར། །མི་གཡོ་ཞབས་པད་བརྟན་པར་མཛད་དུ་གསོལ། །སྐྱབས་གཅིག་ཏཱ་རེས་རྗེས་བཟུང་འགྲོ་བའི་མགོན། །མཚུངས་མེད་གུ་ཎའི་མཚན་ཅན་ཁྱེད་ཉིད་ལ། །གསོལ་བ་སྙིང་ནས་འདེབས་སོ་བྱིན་གྱིས་རློབས། །བདག་ཅག་མགོན་མེད་ཉམ་ཐག་སློབ་འབངས་རྣམས། །ཐུགས་རྗེས་མ་དོར་བསྐལ་བརྒྱར་ཞབས་བརྟན་ཤོག །ཅེས་པ་འདི་ནི་སྟོང་ཆེན་དང་གྲགས་པ་རྡོ་རྗེ། ཤེས་རབ་རྒྱ་མཚོ། ཕུན་ཚོགས་རྒྱ་མཚོ་རྣམས་ཀྱིས་སྐུལ་ངོར་དམ་པ་འདི་ཉིད་ཀྱིས་སྦྱར་བ་དང༌། ངག་གི་དབང་ཕྱུག་འཇམ་དཔལ་གཞོན་ནུ་མཆོག །སྙིང་རྗེའི་ཡོན་ཏན་གཏེར་མཛོད་པད་དཀར་འཆང༌། །མཐུ་སྟོབས་འཕྲིན་ལས་མཛད་བཟང་རྡོ་རྗེ་འཛིན། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཁྱེད་སྐུ་མི་འཇིགས་གདོང་ལྔས་བཏེགས་པའི་ཁྲིར། །མི་གཡོ་བསྐལ་བ་རྒྱ་མཚོར་ཞབས་བརྟན་ཤོག །བདག་ཅག་དེང་ནས་ཚེ་རབས་ཐམས་ཅད་དུ། །འབྲལ་བ་མེད་པར་རྗེས་སུ་འཛིན་གྱུར་ཅིག །ཅེས་རིགས་ལྡན་གྱིས་སྐུལ་ངོར་དམ་པ་འདི་ཉིད་ཀྱིས་བླ་མ་ཡོན་ཏན་བཟང་གི་ཞབས་བརྟན་གསོལ་འདེབས་སུ་གསུངས་སོ། །ཡང་དམ་པ་གང་གི་ཕྱག་བྲིས་ཤོག་དྲིལ་ལས། རང་སྟོང་པས་ནི། ཀུན་རྫོབ་དང་དོན་དམ་པའི་ཆོས་ཐམས་ཅད་རང༷་གི་ངོ་བོས་སྟོ༷ང་ཞིང་བདེན་པར་མེད་པའི་ཕྱིར་ན་ཆོས་ཐམས་ཅད་རང་སྟོང་ཡིན་ཞེས་འདོད། གཞན་སྟོང་པས་ནི། ཀུན་རྫོབ་ཀྱི་ཆོས་ཐམས་ཅད་བདེན་པར་མེད་པ་རང་གི་ངོ་བོས་སྟོང་བ་ཡིན་པ་དང༌། དོན་དམ་གྱི་དབྱིངས་ནི་བདེན་པར་གྲུབ་པའི་ཕྱིར་ན་རང་གི་ངོ་བོས་མི་སྟོང་ལ། འོན་ཀྱང་དེ་སྟོང་ཉིད་ཡིན་ཏེ། གཞ༷ན་གཟུང་འཛིན་སོགས་ཀུན་རྫོབ་ཀྱི་སྤྲོས་པ་ཐམས་ཅད་ཀྱིས་སྟོ༷ང་བའི་ཕྱིར་ན་དོན་དམ་ནི་གཞན་སྟོང་ཡིན་ཞེས་འདོད། ཀུན་རྫོབ་རང་སྟོང་ཡིན་པ་ལ་གཉིས་ཀ་མཐུན་ཡང༌། དོན་དམ་རང་སྟོང་དུ་བཞེད་མི་བཞེད་ཀྱི་ཁྱད་པར་ཡོད་དོ། །རང་སྟོང་བས་སྟོང་ཉིད་ནི་སྤྲོས་པ་བྲལ་བ་ཙམ་གྱི་མེད་དགག་སྟོང་རྐྱང་ཙམ་ལ་འཇོག་གོ གཞན་སྟོང་པས་སྟོང་ཉིད་ནི། སྤྲོས་པ་བྲལ་ཙམ་ལ་མི་འཇོག་པར་གཟུང་འཛིན་སོགས་ཀུན་རྫོབ་ཀྱི་སྤྲོས་པ་ཐམས་ཅད་ཀྱིས་སྟོང་བའི་སྤྲོས་བྲལ་རྣམ་པར་མི་རྟོག་པའི་ཡེ་ཤེས་ཕྲ་མོ་སྒྲིབ་བྲལ་འཕགས་པའི་སོ་སོར་རང་རིག་པའི་ཡེ་ཤེས་ལ་འཇོག་གོ །དེ་ལ་དོན་དམ་ཆོས་དབྱིངས་ནི། འགོག་བདེན་ཆེན་པོ་དང་རྣམ་པ་ཐམས་ཅད་མཁྱེན་པའི་ཡེ་ཤེས་སོགས་མཐར་ཐུག་གི་སྐུ་དང་ཡེ་ཤེས་སོགས་ཀྱི་རྣམ་པ་ཐམས་ཅད་པ་ཡིན་པ་དང༌། འཁོར་འདས་ཀུན་ལ་ཁྱབ་པ་དང༌། དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་གཅིག་པའི་དབྱིངས་ཆོས་སྐུ་སྟེ། མཐར་ཐུག་ངེས་དོན་དབུ་མ་ཆེན་པོ་ནི། རྒྱལ་བའི་བཀའ་འཁོར་ལོ་གསུམ་པའི་མཐར་ཐུག་གི་དགོངས་དོན་རྒྱུད་ཐམས་ཅད་ཀྱི་གཙོ་བོ་དཔལ་དུས་ཀྱི་འཁོར་ལོའི་རྫོགས་རིམ་དང་གཉིས་སུ་མེད་པ་དེ། བྱམས་འཇམ་དབྱངས་གཉིས་དང༌། བྱང་ཤམྦྷ་ལའི་ཆོས་རྒྱལ་རྣམ་གསུམ། ཀླུ་སྒྲུབ། ཐོགས་མེད། དབྱིག་གཉེན། ཕྱོགས་གླང༌། ས་ར་ཧ། ཞི་བ་ལྷ་སོགས་རྫོགས་ལྡན་སྐབས་ཀྱི་འཕགས་ཡུལ་གྱི་པཎ་གྲུབ་རྣམས་ཀྱི་གཞུང་ལུགས་དང་མཐུན་པར་རིགས་པ་བརྒྱ་ཕྲག་གི་སྒོ་ནས་མདོ་སྔགས་གཞུང་བརྒྱའི་དགོངས་དོན་གཅིག་ཏུ་དྲིལ་ནས་གངས་ཅན་གྱི་ལྗོངས་འདིར་ཤིང་རྟའི་སྲོལ་འབྱེད་པ་པོ་ནི། རྒྱལ་བའི་ལུང་ཟིན་གྱི་སྐྱེས་མཆོག་ཆེན་པོ་ཀུན་མཁྱེན་ཆོས་ཀྱི་རྒྱལ་པོ་ཇོ་ནང་པ་ཆེན་པོ་ཉིད་ཡིན་ལ། མདོ་དོན་མཐར་ཐུག་གཞན་སྟོང་དབུ་མ་དང༌། །རྒྱུད་དོན་མཐར་ཐུག་རྡོ་རྗེའི་རྣལ་འབྱོར་གྱི། །ལྟ་སྒོམ་འབྲེལ་བའི་ལམ་གྱི་གནད་བཟུང་སྟེ། །ཞེས་གསུངས་པ་ལྟར་རོ། །ཞེས་ཇོ་ནང་རང་ལུགས་ལྟར་དང༌། ཡང་ཤོག་དྲིལ་ཞིག་ལས། ཆོས་དང་གང་ཟག་ཐམས་ཅད་བདེན་མེད་ཏུ་སྒྲུབ་བྱེད་གཅིག་དུ་བྲལ་གྱི་རིགས་པའམ་གནད་བཞིའི་རིགས་པ་ནི། དང་པོ་དགག་བྱ་ངེས་པའི་གནད་ནི། དེ་ཡང་ངར་འཛིན་གྱིས་བཟུང་བའི་ང་ནི་རང་གི་ཕུང་པོ་ལྔ་དང་ལུས་སེམས་གཉིས་ལས་དོན་གཞན་དུ་མ་ཡིན་ཞིང༌། ཕུང་པོ་ལྔ་པོ་རེ་རེ་བ་དང་ལུས་སེམས་གཉིས་རེ་རེ་བའི་སྟེང་དུ་ཡང་མ་ཡིན་ཀྱང༌། ང་ཕུང་པོ་ལྔ་པོ་ཚོགས་ཙམ་པའམ་ལུས་སེམས་གཉིས་ཚོགས་ཙམ་པའི་བམ་མེ་བ་དེའི་སྟེང་དུ་རྟོག་པས་བཏགས་པ་ཙམ་མ་ཡིན་པར་ཡེ་ནས་ཚུགས་ཐུབ་ཏུ་གྲུབ་པ་རང་ངོས་ནས་ཡོད་པ་ལྟ་བུ་ཞིག་སྣང་རྒྱུ་དེ་འགོག་རྒྱུའི་བདག་གམ་ང་ཡིན་ལ། དེ་ནི་དགག་བྱ་ངེས་པའི་གནད་དོ། །གཉིས་པ་ཁྱབ་པ་ངེས་པའི་གནད་ནི། དེ་ལྟ་བུའི་ང་དེ་ཕུང་པོ་ལྔའི་སྟེང་དུ་ཡོད་ན་ང་དེ་ཕུང་པོ་ལྔ་དང་གཅིག་ཏུ་ཡོད་དམ་ཐ་དད་དུ་ཡོད། ཡོད་ཚུལ་དེ་གཉིས་ལས་གཞན་མེད་དེ། ཆོས་གང་ཡིན་ཀྱང་ཡང་ན་གཅིག་གི་རྣམ་པར་ཡོད་དགོས་ཡང་ན་དུ་མའི་རྣམ་པར་ཡོད་དགོས་ལ། དེ་ལས་གཞན་པའི་ཡོད་ཚུལ་མེད་པས་ཕྱིར་རོ། །དེ་ནི་ཁྱབ་བ་ངེས་པའི་གནད་དོ། །གསུམ་པ་བདེན་པའི་གཅིག་དུ་བྲལ་ངེས་པའི་གནད་ནི། དེ་ལྟར་བཟུང་བའི་ང་དེ་ཕུང་པོ་ལྔ་དང་གཅིག་ཏུ་ཡོད་དོ་སྙམ་ན་གང་ཟག་གཅིག་ལ་ཕུང་པོ་ལྔ་ཡོད་པ་བཞིན་དུ་ང་ཡང་རྒྱུད་ཐ་དད་པ་ལྔ་ཡོད་པར་འགྱུར་བ་དང༌། ཡང་ན་ང་གཅིག་ཡིན་པ་བཞིན་དུ་ཕུང་པོ་ལྔ་ཡང་ཆ་མེད་གཅིག་ཏུ་འགྱུར་པ་སོགས་ཀྱི་ཉེས་པ་དུ་མ་ཡོད་པས་ང་དེ་ཕུང་པོ་དང་བདེན་པའི་གཅིག་ཏུ་མ་གྲུབ་པོ། །དེ་ནི་གཅིག་བྲལ་ངེས་པའི་གནད་དོ། །བཞི་བ་བདེན་པའི་དུ་བྲལ་ངེས་པའི་གནད་ནི། ང་དེ་ཕུང་པོ་ལྔ་དང་གཅིག་ཏུ་མ་གྲུབ་ཀྱང༌། ཕུང་པོ་ལྔའི་སྟེང་དུ་ཐ་དད་དུ་གྲུབ་སྙམ་ན་ཕུང་པོ་ལྔ་ཡང་གཟུགས་ཀྱི་ཕུང་པོ་ལ་སོགས་པ་རེ་རེ་ནས་བསལ་བའི་ཤུལ་དུ་འདི་རྣམ་ཤེས་ཀྱི་ཕུང་པོའོ། །ཞེས་ལོགས་སུ་ངོས་འཛིན་རྒྱུ་ཡོད་པ་བཞིན་དུ། གཟུགས་ཕུང་སོགས་ཕུང་པོ་ལྔ་པོ་རེ་རེ་ནས་བསལ་བའི་ཤུལ་དུ་ང་དེ་ཡང་འདི་འོ་ཞེས་ལོགས་སུ་ཐ་དད་དུ་འཛིན་རྒྱུ་དང༌། སྟོན་རྒྱུ་ཞིག་ཡོད་དགོས་པ་ལ་དེ་ལྟར་མི་འདུག་པས་ང་དེ་ཕུང་པོ་ལྔ་དང་ཐ་དད་དུ་མ་གྲུབ་པོ། །དེ་ནི་དུ་བྲལ་ངེས་པའི་གནད་དོ། །དེ་ཡང་འདི་ལྟར་ང་ཆོས་ཅན། བདེན་པར་མེད་དེ། བདེན་པའི་གཅིག་དང་དུ་མ་གང་དུ་ཡང་མེད་པའི་ཕྱིར། ཞེས་པའོ། །ཆོས་ཀྱི་བདག་མེད་གཏན་ལ་འབེབ་པ་དེས་འགྲེས་སྦྱར་རོ། །དེ་ལྟར་ཆོས་དང་གང་ཟག་ཐམས་ཅད་བདེན་མེད་དུ་ངེས་པ་དེའི་ཚེ་ངེས་ངོར་རང་བཞིན་མེད་པར་ངེས་པའི་ངེས་ཤེས་དམ་སྤྲིང་བ་དང༌། སྣང་ངོར་བདེན་གྲུབ་བཀག་ཙམ་གྱི་མེད་དགག་སྟོང་སེང་བའི་ཁྱད་པར་གཉིས་ལྡན་དུ་བྱས་ནས་སྐྱོང་བ་ནི་མཉམ་བཞག་ནམ་མཁའ་ལྟ་བུའོ། །རིགས་པའི་རྒྱལ་པོ་རྟེན་འབྲེལ་ནི། མྱུ་གུ་ཆོས་ཅན། བདེན་པར་མེད་དེ། རྟེན་འབྲེལ་ཡིན་པའི་ཕྱིར་ཞེས་པའོ། །དེ་ཡང་མྱུ་གུ་རྟེན་འབྲེལ་ཡིན་ཏེ། རང་གི་རྒྱུ་ཉེར་ལེན་དང་བྱེད་རྐྱེན་སོགས་ལ་ལྟོས་ཤིང་བརྟེན་ལ། རྒྱུ་ལོག་ན་འབྲས་བུ་ཡང་ལོག་ངེས་ཀྱི་འབྲེལ་བ་གྲུབ་པའི་ཆོས་ཡིན་པའི་ཕྱིར། རྟེན་འབྲེལ་ཡིན་ན་བདེན་མེད་ཡིན་ཏེ། བདེན་གྲུབ་ནི་རྒྱུ་རྐྱེན་ལ་མ་ལྟོས་ཤིང་གང་ལའང་མ་འབྲེལ་བའི་ཚུགས་ཐུབ་ཀྱི་དངོས་པོ་འགྱུར་བ་མེད་པ་ཞིག་ཡིན་དགོས་ལ། རྟེན་འབྲེལ་གྱི་ཆོས་ཐམས་ཅད་དེ་ལྟ་བུ་མ་ཡིན་པའི་ཕྱིར་རོ། །དེ་ལྟར་ངེས་པའི་ཚེ་ངེས་ངོར་བདེན་གྲུབ་བཀག་པའི་མེད་དགག་སྟོང་སང་ངེ་བ་དང༌། སྣང་ངོར་སྒྱུ་མ་ལྟ་བུའི་མྱུ་གུ་མ་འགག་པར་འཆར་བས་ན་མཐའ་གཉིས་ཅིག་ཆར་སེལ་ལོ། །ཞེས་རང་སྟོང་བའི་ལུགས་བཞིན་ཕྱག་བྲིས་ཤོག་དྲིལ་གྱི་ཚིག་ཇི་བཞིན་བཀོད་པའོ། །འཛི་སྟོད་ཀྱི་དར་ལྔའི་རི་ཁྲོད་སྤྲོས་བྲལ་ཆོས་རྫོང་དུ་ཟླ་བ་གཉིས་ཙམ་སྒོམ་སྒྲུབ་མཛད་དེ་བཞུགས། དམ་པ་འདི་ཉིད་ཀྱི་གསུང་ཆོས་སྐབས་སུ་སེམས་ཅན་གྱི་སྡུག་བསྔལ་ཕྲ་རགས་རྣམས་དང༌། བྱང་ཆུབ་ཀྱི་སེམས་རིན་པོ་ཆེ་དང༌། མཆོག་གསུམ་གྱི་ཡོན་ཏན་དང༌། ཁྱད་པར་དུ་མཚམས་པ་བ་སྨོན་ལམ་བཟང་པོའི་མཚན་རེ་བརྗོད་པ་ཙམ་ཀྱིས་སྤྱན་ཆབ་བསིལ་བ་དང༌། འདོད་ཆུང་ཆོག་ཤེས། ཚེ་འདི་བློས་བཏང་ནས་བཀའ་གདམས་གོང་མའི་རྣམ་ཐར་བཞིན་སྐྱེས་བུ་དམ་པའི་རྣམ་ཐར་གྱི་མཚན་སྙན་གྲགས་པའི་བ་དན་དཀར་བོ་སྲིད་གསུམ་གྱི་མཁའ་རུ་འཕྱར་ཞིང༌། འགྲོ་བ་སེམས་ཅན་གྱི་དོན་མཛད་པ་ལ་མཐུ་སྟོབས་ཕུན་སུམ་ཚོགས་པའི་བདག་ཉིད་དོ། །དེ་ནས་སླར་ཡང༌། དཔལ་ལྡན་བླ་མ་རིན་པོ་ཆེ་དགུང་གྲངས་དོན་གསུམ་པ། སྤྱི་ལོ་༡༩༩༩ལོ། རབ་གནས་མྱོས་ལྡན་ཞེས་པ་ས་མོ་ཡོས་ཀྱི་ལོའི་ཟླ་བ་བརྒྱད་པའི་ནང་ཇོ་ནང་བསྟན་པའི་གནས་གཞི་ཆེན་མོ་ཤར་འཛམ་ཐང་བསམ་འགྲུབ་ནོར་བུའི་གླིང་དུ་བྱོན་ནས་ཇོ་ནང་གི་བསྟན་པ་ལ་ལྷག་བསམ་གྱི་གདུགས་དཀར་ས་གསུམ་ན་ཁྱབ་པའི་དཔལ་ལྡན་བླ་མ་རིན་པོ་ཆེ་ངག་དབང་ཡོན་ཏན་བཟང་པོ་མཆོག་གིས་ཐུགས་བསྐྱེད་ལས། ཀུན་མཁྱེན་ཇོ་ནང་བ་ཆེན་པོ་དོལ་བོ་བ་ཤེས་རབ་རྒྱལ་མཚན་དཔལ་བཟང་པོ་མཆོག་གི་བཀའ་འབུམ་དང༌། རྗེ་བཙུན་ཏཱ་ར་ནཱ་ཐའི་གསུང་འབུམ་དང༌། སྐྱབས་རྗེ་བློ་གྲོས་གྲགས་པའི་གསུང་འབུམ་དང་གསུམ་པར་བསྐྲུན་ལེགས་པར་གྲུབ་པའི་དགའ་སྟོན་གངས་ཅན་དགེ་བའི་ཟླ་བ་ཐེངས་གཉིས་པ་ཚོགས་སྐབས་སུ་བྱོན། རབ་གནས་དགའ་སྟོན་ལ་པར་ཤིང་གི་ཆ་རྐྱེན་དུ་དམིགས་ནས་དམངས་སྒོར་ཉིས་ཁྲི་ལྷག་འབུལ་བ་བྱས་ནས་བསྟན་འགྲོའི་དོན་དུ་ཐུགས་སྨོན་རྒྱ་ཆེར་མཛད། ལྕམ་མདའ་དགོན་གྱི་མཁས་བཙུན་བཟང་གསུམ་གྱི་ཡོན་ཏན་གྱིས་ཕྱུག་པའི་མཁན་བློ་ཆོས་སོགས་ལ་བློ་སྦྱོང་ཚིགས་བརྒྱད་མ་དང༌། བློ་སྦྱོང་དོན་བདུན་མ་བཅས་གསུངས་པའོ། །དཔལ་ལྡན་བླ་མ་རིན་པོ་ཆེ་དགུང་གྲངས་དོན་གསུམ་པ། སྤྱི་ལོ་༡༩༩༩ལོ། རབ་གནས་མྱོས་ལྡན་ཞེས་པ་ས་མོ་ཡོས་ཀྱི་ལོའི་ཟླ་བ་དགུ་བའི་ནང་རྒྱ་ནག་ཁྲི་ཏུའི་རུ་ཕེབས། ཏི་ཡིན་དགོན་དུ་བཞུགས། དེ་ནས་དམ་པ་འདི་ཉིད་དགུང་གྲངས་དོན་བཞི་པ། སྤྱི་ལོ་༢༠༠༠ལོ། རབ་གནས་རྣམ་གནོན་ཞེས་པ་ལྕགས་འབྲུག་གི་ལོ་ཟླ་བ་གཉིས་པ་ལ། དམ་པ་འདི་ཉིད་སྙུང་གཞི་དྲག་པོས་ཟིན་པའི་ཚུལ་གནང༌། སྨན་ཁང་དུ་མི་འགྲོ་གསུངས་ནས་ཉིན་བཅུ་བཞི་ཙམ་ལ་མ་སོང༌། སྐུ་ཉིད་ཀྱི་ཚ་བོ་སོགས་ཀྱིས་ནན་ཞུས་བྱས་ནས་དམག་གི་སྨན་ཁང་དུ་སོང་ནས་ནད་གཞི་ལས་སངས་བའི་མཛད་ཚུལ་གནང༌། ཁྲི་ཏུའི་ནས་རྒྱལ་སྲས་ལག་ལེན་སོགས་དང༌། སྐྱབས་སྡོམ་དང༌། དགེ་བསྙེན་གྱི་སྡོམ་པ་གནང་བར་མཛད། དམ་པ་འདི་ཉིད་ཀྱི་གཟིམ་ཁྲི་སོགས་གྱི་སྟེང་དུ་རིལ་བུ་དྲི་བཟང་གིས་ཁྱབ་པ་དུ་མ་སྐབས་སྐབས་སུ་འབབ་པ་སློབ་ཚོགས་དུ་མས་མངོན་སུམ་དུ་མཐོང་བ་ལྟར་སྐབས་འདི་དུས་སུ་རིལ་བུ་དྲི་བཟང་གིས་ཁྱབ་པ་དུ་མ་བབས་སོ། །དམ་པ་འདི་ཉིད་དགུང་གྲངས་དོན་ལྔ་བ། སྤྱི་ལོ༢༠༠༡ལོ། རབ་གནས་ལྕགས་མོ་སྦྲུལ་གྱི་ལོ་ཟླ་བཅུ་གཉིས་པ་རྒྱ་ནག་དུང་པེ་ལ་ཞབས་ཀྱིས་བཅག་ནས་ཉིན་ཉི་ཤུ་ཙམ་ལ་བཞུགས། དེ་ནས་སླར་ཁྲི་ཏུའི་ལ་བྱོན་ཏེ་དགེ་སྦྱོར་རེ་བྱས་ནས་བཞུགས། དེ་ནས་དམ་པ་འདི་ཉིད་དགུང་གྲངས་དོན་དྲུག་པ། སྤྱི་ལོ་༢༠༠༢ལོ། རབ་གནས་སྣ་ཚོགས་ཞེས་པ་ཆུ་ཕོ་རྟའི་ལོའི་ཟླ་བ་གསུམ་པ་ལ་རྒྱ་ནག་གི་ཤར་ཕྱོགས་ཀྱི་དུང་པེ་ལ་བྱོན་ནས་བཞུགས། དེ་ནས་སིན་ཡང་སོགས་སུ་ཕེབས་ཏེ་དད་ལྡན་མང་ཚོགས་ལ་འཕོ་བ་དང༌། ཚེ་དབང་གསུངས། དེ་ནས་བཟུང་ཟླ་བ་རེ་རེ་ཉ་སྲོག་བླུ་བྱེད་རྒྱུ་ཞལ་གྱི་བཞེས་ནས་ཟླ་བ་རེ་རེ་ལ་ཉུང་ཚེ་སྒོར་ཁྲི་གསུམ་ཡས་མས་དང༌། མང་ཚེ་ཁྲི་དགུ་ཡས་མས་ཀྱིས་སྲོག་བླུ་བྱས་ཏེ་བསྟན་པ་དང་འགྲོ་བའི་དོན་དུ་ཐུགས་སྨོན་རྒྱ་ཆེར་གནང་བར་བྱས་ལ། དེ་ནས་སིན་ཡང་ཕེབས་ནས་ཟླ་བ་གཅིག་ཙམ་བཞུགས། དེ་དུས་སུ་ཚེ་དབང་དང་འཕོ་བ་གསུངས་ཏེ་དད་ཅན་གྱི་གང་ཟག་དག་དུས་མིན་གྱི་འཆི་བ་ལས་བཟློག་པ་དང༌། ཐར་བའི་ལམ་སྣ་ཟིན་པར་བྱས་སོ། །ཟླ་བ་བཞི་བའི་ནང་ཧར་ཕིན་བྱོན་ནས་དད་ལྡན་མི་སེར་ལ་སྐྱབས་སྡོམ་དང་ཉ་སོགས་སྲོག་བསླུ་དུ་མ་བྱས་ཏེ་ཐུགས་སྨོན་རྒྱ་ཆེར་གནང༌། དམ་པ་འདི་ཉིད་དགུང་གྲངས་དོན་བདུན་པ། སྤྱི་ལོ་༢༠༠༣ལོ། རབ་གནས་ཉི་མ་ཞེས་པ་ཆུ་མོ་ལུག་གི་ལོའི་ཟླ་བ་བདུན་པའི་ནང་ནན་ཧྲན་སིར་བྱོན་ནས་ཟླ་བ་གཅིག་ཙམ་བཞུགས་ནས་འགྲོ་བའི་དོན་མཛད། དེ་ནས་སླར་དུང་པེ་བྱོན་ནས་དད་ལྡན་དུ་མ་ལ་ཆོས་འབྲེལ་གསུངས་པ་སོགས་བསྟན་འགྲོའི་དོན་མཛད་ནས་བཞུགས། དེ་དུས་ཉིན་གཅིག་ལ་འཕོ་བ་གསུང་འདུག་པས་ཉེ་གནས་ཀྱི་རྒྱུ་མཚན་དྲིས་ཚེ་ཡོན་བདག་དཀར་མོ་མཚོ་ཤི་སོང་འདུག་པས་དེའི་དོན་ཡིན་གསུངས། དེའི་ཕྱི་ཉིན་ཡོན་བདག་དེ་ཤི་སོང་ཞེས་ཉེ་གནས་ལ་ཁ་པར་བསླེབས་པ་དང༌། ཡང་ཉིན་གཅིག་ལ་ཉེ་གནས་ལ་ལམ་ཆེན་ཞིག་ནས་འཕྲུལ་རྟས་རྒྱབ་ཚེ་དམ་པ་འདི་ཉིད་ཁང་བའི་ནང་དུ་བཞུགས་ཀྱང་མཁྱེན་པ་སོགས་ལྐོག་གྱུར་གྱི་གནས་ལ་མཁྱེན་པ་ཐོགས་པ་མེད་པའི་མཁྱེན་པ་མངའ་བའོ། །དེ་ནས་དམ་པ་འདི་ཉིད་དགུང་གྲངས་དོན་བརྒྱད་པ། སྤྱི་ལོ་༢༠༠༤ལོ། རབ་གནས་ཤིང་ཕོ་སྤྲེལ་གྱི་ལོ་ལ་ཟི་ལིང་དུ་བྱོན། དེ་ནས་འཁྱམས་རི་དགོན་པར་བྱོན་ནས་སློབ་ཚོགས་རྣམས་ལ་རྒྱལ་སྲས་ལག་ལེན་དང་བློ་སྦྱོང་དོན་བདུན་མ་སོགས་བཀའ་སློབ་དུ་མ་གསུངས། དེ་ནས་སློབ་ཚོགས་རྣམས་ཀྱིས་དགོན་དེར་བཞུགས་དགོས་ཞེས་ཞུ་བ་ནན་གྱིས་ཕུལ་ཀྱང་ལྡོག་མ་ནུས་ཏེ་རྒྱ་ནག་དུང་པེ་ལ་བྱོན་ནས་བཞུགས། དེ་ནས་དམ་པ་འདི་ཉིད་དགུང་གྲངས་དོན་དགུ་པ། སྤྱི་ལོ་༢༠༠༥ལོ། རབ་གནས་ས་སྐྱོང་ཞེས་པ་ཤིང་མོ་བྱའི་ལོ་ལ་དམ་པ་འདི་ཉིད་ཀྱིས་ཐུགས་བྱམས་བརྩེས་ཉེ་བར་བསྐུལ་ནས་ཤ་བཅད་ནས་སྨོན་ལམ་རྒྱ་ཆེར་བཏབ་པ་སོགས་བསྟན་འགྲོའི་དོན་རྒྱ་ཆེར་མཛད། དམ་པ་འདིའི་ལྗགས་བསྙེན་ལ་མ་ཎི་དུང་ཕྱུར་སོགས་བཟླས་པ་མཛད། དགེ་སྦྱོར་ཡང་སྨྱུང་གནས་སྟོང་སོགས་དགེ་བ་རླབས་ཆེན་བསགས། དམ་པ་འདི་ཉིད་ཀྱི་ལྗགས་རྩོམ་ཡང༌། བློ་སྦྱོང་ཡིད་ཀྱི་མུན་སེལ་གྱི་ཟུར་འདེབས་དང༌། ལམ་རིམ་ཉེར་མཁོ་དང༌། སྐྱེས་བུ་གསུམ་གྱི་མན་ངག་གི་ཁྲིད་ཡིག་རྒྱས་འགྲེལ་ཡིད་ཀྱི་མུན་སེལ་གྱི་ས་བཅད་ཤེལ་དཀར་མེ་ལོང་དང༌། ཐེག་པ་ཆེན་པོའི་བློ་སྦྱོང་ཡིད་ཀྱི་མུན་སེལ་ཞེས་བྱ་བའི་ས་བཅད་ཕྱོགས་བསྡུས་དང༌། ལམ་རིམ་དམར་ཁྲིད་བདེ་ལམ་གྱི་ས་བཅད་དང༌། བདེ་ལམ་གྱི་མཚན་དོན་སོགས་བཤད་པ་དང༌། དཔེ་དོན་སྦྱོར་ཚུལ་ཉུང་བསྡུས་དང༌། བླ་མ་མཆོད་པའི་ཆོ་གའི་ས་བཅད་ཉུང་བསྡུས་གཞུང་ཚིག་དང་སྦྱོར་ཚུལ་ཙམ་བཀོད་པ་དང༌། མདོ་སྔགས་ལམ་གྱི་བསླབ་བྱ་མགུར་མ་དང༌། རང་སེམས་འདུལ་བའི་བསླབ་བྱ་མགུར་མ་དང༌། ཆོས་དང་གང་ཟག་ཐམས་ཅད་བདེན་མེད་དུ་སྒྲུབ་བྱེད་གཅིག་དུ་བྲལ་གྱི་རིགས་པའམ་གནད་བཞིའི་རིགས་པ་སོགས་གཞུང་ལུགས་དུ་མ་མཛད་པའོ། །མདོར་ན་ལམ་ཕ་རོལ་ཏུ་ཕྱིན་པ་དྲུག་དང༌། བསྡུ་བའི་དངོས་པོ་བཞི་ལ་སོགས་པ་རྒྱལ་བའི་སྲས་ཀྱི་སྤྱོད་པ་རླབས་པོ་ཆེ་མཐའ་དག་ལ་གོམས་པ་ཀློང་དུ་གྱུར་བས་སྐུ་གསུང་ཐུགས་ཀྱི་མཛད་པ་ཕྲ་རགས་ཇི་ལྟར་ཡང་བསྟན་འགྲོའི་གསོས་སྨན་དུ་མི་འགྱུར་བ་གཅིག་ཀྱང་མ་མཆིས་ཤིང༌། སྒོ་གསུམ་གྱི་བགྱི་བ་གང་ལའང་རང་དོན་ཡིད་བྱེད་ཀྱིས་བསླད་པ་ཕྲ་མོ་ཙམ་ཡང་མེད་པར་རྣམ་པར་དཀར་བའི་དངོས་པོ་གང་བསྒྲུབས་ཐམས་ཅད་འཕགས་པ་བཟང་པོ་སྤྱོད་པའི་སྨོན་ལམ་སོགས་ལས་འབྱུང་བ་ལྟར་གཞན་དོན་འབའ་ཞིག་ཏུ་བསྔོ་བར་མཛད་པའི་རྒྱུ་མཚན་གྱིས་ཇི་སྲིད་གཟུགས་སྐུའི་འཁྲུལ་འཁོར་ཞིག་པའི་ཚུལ་བསྟན་པ་དེ་སྲིད་དུ་ཚོགས་གཉིས་ཀྱི་སྤྱོད་པ་ལས་སྐད་ཅིག་ལས་ཀྱང་ཉམས་པ་མེད་ལ། འགྲོ་བ་མ་ལུས་པའི་མགོན་སྐྱབས་དཔུང་གཉེན་དང༌། གསང་གསུམ་ཡོན་ཏན་མི་ཟད་པའི་གཏེར་ཆེན་པོར་གྱུར་བ་སྟེ། མདོ་སྡེ་རྒྱན་ལས། ཐབས་མཆོག་ཤེས་པ་གང་ཞིག་བསོད་ནམས་ཡང་དག་བསྡུས་པ་ཤིན་ཏུ་རྒྱ་ཆེན་ཀུན། །གཞན་དང་ཐུན་མོང་བྱས་ནས་ཉིན་གཅིག་བཞིན་དུ་རྫོགས་པའི་བྱང་ཆུབ་ཡོངས་བསྔོ་ཞིང༌། །བཟང་པོའི་གནས་སུ་སྐྱེས་པས་རྟག་ཏུ་དགེ་བྱེད་མངོན་ཤེས་ཡོན་ཏན་རྣམས་ཀྱིས་རྩེན། །སངས་རྒྱས་སྲས་དེ་ཀུན་གྱི་བླ་ན་འདུག་པ་ཡོན་ཏན་གཏེར་དུ་ཤེས་པར་བྱ། །ཞེས་གསུངས་པ་ལྟར་མངོན་དུ་གྱུར་བའི་སྐྱེས་བུ་དམ་པའོ། །སྨྲས་པ། རྨད་བྱུང་དབེན་པའི་རི་ལ་དཀའ་སྤྱད་ནས། །རིམ་གཉིས་ལམ་གྱི་ཉམས་ལེན་ཚུལ་བཞིན་དུ། །བསྒོམས་པས་ཉམས་རྟོགས་ལྷ་ཡི་པད་ཚལ་བཞད། །རྣལ་འབྱོར་རྣམས་ཀྱི་གཙུག་གི་ནོར་བུར་གྱུར། །སྟོང་གསུམ་རིན་ཆེན་རྒྱན་གྱིས་གང་བ་ཡིས། །བ་སྤུའི་རྩེ་ཡང་སྒུལ་བར་མི་ནུས་མོད། །ཉམ་ཐག་འགྲོ་ལ་བརྩེ་བས་གཡོ་བ་ནི། །རྒྱལ་སྲས་སེམས་དཔའ་རྣམས་ཀྱི་རང་གཤིས་ལགས། །སྐལ་བཟང་གདུལ་བྱའི་ཆོས་ཀྱི་ཞིང་ས་ལ། །བྱམས་དང་སྙིང་རྗེའི་ཆུ་འཛིན་བ་གམ་ལས། །ཟབ་གསང་གདམས་ངག་ཆོས་ཀྱི་སྦྲང་ཆར་འབེབས། །རྣམ་གྲོལ་ལམ་བཟང་འབྲས་བུ་ལེགས་པར་སྨིན། །མཆོག་ཐུན་དངོས་གྲུབ་ཐོབ་པའི་དགེ་མཚན་དང༌། །གྲུབ་པའི་དབང་ཕྱུག་དཔལ་ལྡན་བླ་མ་ཡི། །སྐུ་གསུང་ཐུགས་ཀྱི་གསང་བ་བསམ་མི་ཁྱབ། །བསྔགས་པའི་བ་དན་སྲིད་ན་ལྷག་པར་མཛེས། །ཞེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་གནས་ངེས་མེད་ལ་སྒྲུབ་པ་གཙོ་བོར་མཛད་ཅིང་སྐལ་ལྡན་གྱི་གདུལ་བྱ་རྗེས་སུ་བཟུང་བའི་སྐབས་རྣམ་པར་བཤད་ཟིན་ཏོ།། །།
༈ དུས་གསུམ་རྒྱལ་རྣམས་འཁོར་བའི་ཕྱི་མཐའི་བར། །མྱ་ངན་མི་འདའ་རྟག་པར་བཞུགས་གྱུར་ཀྱང༌། །གདུལ་བྱའི་བསམ་ངོར་མྱ་ངན་འདའ་ཚུལ་བསྟན། །གང་ལ་གང་འདུལ་མཛད་པ་སྟོན་རྣམས་གུས། །ལྔ་བ་རྣམ་བྱང་གི་མཛད་འཕྲིན་རྣམས་རྫོགས་ནས་འགྲོ་རྣམས་ཆོས་ལ་བསྐུལ་ཕྱིར་གཟུགས་སྐུ་ཆོས་དབྱིངས་སུ་བསྡུ་ཚུལ་ནི།
དེ་ལྟར་སྒོམ་སྒྲུབ་དང་བསྟན་འགྲོའི་དོན་རྒྱ་ཆེར་བྱས་ནས་དམ་པ་འདི་ཉིད་དགུང་གྲངས་བརྒྱད་ཅུ་པ། སྤྱི་ལོ་༢༠༠༦ལོ། རབ་གནས་མི་ཟད་པ་མེ་ཕོ་ཁྱིའི་ལོ་ཟླ་བ་བརྒྱད་པ་ནས་ཟས་མ་བཞེས་ནས་ཅུང་ཟད་སྙུང་ཚུལ་བཞེས། དེ་ནས་ཟི་ལིང་ལ་བྱོན་ནས་ཉིན་བརྒྱད་ཙམ་གྱི་རྗེས། གྲོ་བཞིན་ཟླ་བ་ཧོར་ཟླ་བདུན་པའི་ཚེས་ཉེར་དགུའི་མཚན་མོ་པེ་ཅིང་ཆུ་ཚོད་དགུའི་ཆ་ལ། རེ་ཞིག་མི་མཇེད་འཇིག་རྟེན་གྱི་ཞིང་འདིའི་གདུལ་བྱ་རྫོགས་ནས་རྟག་འཛིན་ཅན་རྣམས་ཀྱི་ཞེན་པ་ལྡོག་པའི་ཕྱིར་དང༌། ཞིང་གཞན་གྱི་སྐལ་ལྡན་གྱི་གདུལ་བྱ་རྣམས་སྨིན་ཅིང་གྲོལ་བར་མཛད་པའི་སླད་དུ། བདེ་གཤེགས་རྒྱལ་བ་རྣམས་སྐུ་མྱ་ངན་ལས་འདས་པའི་ཚེ་སེང་གེ་ཉལ་སྟབས་ཀྱིས་བདུད་བཞི་ཟིལ་གྱིས་མནན་པའི་རྣམ་ཐར་ལྟར་གདུལ་བྱ་ཐུན་མོང་གི་ངོར་དགོངས་པ་ཆོས་ཀྱི་དབྱིངས་སུ་བསྡུས་པའི་ཚུལ་བསྟན་པའོ། །ཁྲུམས་སྟོད་ཟླ་བ་ཧོར་ཟླ་བརྒྱད་པའི་ཚེས་གསུམ་ལ་རྟོགས་པའི་དབང་ཕྱུག་རྒྱ་བླ་པད་མ་རྣམ་རྒྱལ་བྱོན་ནས་ཐུགས་འོད་གསལ་ལས་བསླངས་བར་མཛད། ཚེས་བརྒྱད་ལ་ཨ་ཁུ་བཟང་པོ་སོགས་སྐྱེས་ཆེན་དུ་མ་བཅས་དད་ཅན་སློབ་མ་རྣམས་ཀྱིས་སྐུ་གདུང་རིན་པོ་ཆེ་ཟི་ལིང་ནས་སྤྱན་དྲངས་ནས་སྔར་དམ་པ་འདི་ཉིད་ལོ་དུ་མར་སྒྲུབ་པ་ཉམས་ལེན་མཛད་པའི་གནས་མཆོག་དཔལ་དུས་ཀྱི་འཁོར་ལོ་དང༌། འཁོར་ལོ་བདེ་མཆོག་དང༌། རྗེ་བཙུན་རྡོ་རྗེ་རྣལ་འབྱོར་མ་སོགས་ཀྱི་བསྐྱེད་རྫོགས་ཉམས་བཞེས་མཛད་པའི་གནས་དེའི་མཚམས་ཁང་དུ་སྤྱན་དྲངས་ནས་གདུང་མཆོད་དང༌། དད་ལྡན་སློབ་མ་སོགས་ལ་སྐུ་གདུང་རིན་པོ་ཆེར་མཇལ་དུ་བཅུག ཚེས་བཅུ་གཉིས་ཉིན་བྱ་ཁྱུང་དགོན་པའི་དགེ་བཤེས་རྡོ་ཕུང་རིན་པོ་ཆེས་སྦྱིན་སྲེག་གི་བླ་མ་བྱས་ཏེ་སྐུ་གདུང་བཞུགས་འབུལ་བྱས། གདུང་གི་དུ་བ་སྔོ་ལྗང་དར་ཡུག་ལྟ་བུའི་རྣམ་པ་དང༌། འོད་དཀར་གྱི་འཇའ་སྤྲིན་འཐིབས་ནས་མཁའ་དབྱིངས་སུ་ཡལ་བ་དང༌། ངོ་མཚར་བའི་འོད་ཀྱི་ཐིག་ལེ་སྣ་ཚོགས་དང༌། ཐིག་ལེ་ཞིག་གི་དབུས་སུ་རྗེ་བཙུན་མི་ལའི་སྐུ་བརྙན་དང༌། རྒྱུད་སྡེ་སྣ་ཚོགས་ཀྱི་དཀྱིལ་འཁོར་དང༌། རྗེ་བཙུན་སྒྲོལ་མའི་སྐུ་བརྙན་སོགས་ལྷ་སྐུ་སྣ་ཚོགས་འདྲེན་བྱེད་ཀྱི་ཡུལ་དུ་གསལ་བར་སྣང་བ་སོགས་མདོར་ན་དད་པ་ཅན་རྣམས་ལ་ཡིད་ཆེས་ཀྱི་དང་བ་འདྲེན་ནུས་པའི་རྨད་བྱུང་གྲུབ་པའི་རྟགས་ཀྱིས་ཞིང་འདིར་རྫོགས་ལྡན་ཆོས་ཀྱི་བྱིན་རླབས་ཀྱི་འོད་སྣང་དཀར་བོས་ཁྱབ་པར་མཛད་ལ། དད་སློབ་འདུས་སྡེ་རྣམས་ཀྱིས་སྐྱོ་གདུང་ཡིད་ཕམ་གྱི་ངང་མིག་ཆུ་འཐོར་བཞིན་སྐྱེ་བ་ནས་ཚེ་རབས་ཐམས་ཅད་དུ་རྗེས་སུ་འཛིན་པའི་སྨོན་ལམ་ཡང་ཡང་བཏབ། །དེ་ནས་ཧོར་ཟླ་དགུ་བའི་ཚེས་གཉིས་ལ་གདུང་ཁང་སྒོ་ཕྱེས་ཚེ་དབུ་ཐོད་ཀྱི་ནང་དུ་རྗེ་བཙུན་མི་ལ་རས་པ་དང༌། རྡོ་རྗེ་སེམས་དཔའི་སྐུ་བརྙན་གྱི་རི་མོ་དང༌། གདུང་ཐལ་གྱི་ནང་དུ་གདུང་རུས་རིལ་བུ་སུམ་བརྒྱ་དྲུག་ཅུ་མདོག་སྔོ་ནག་དང༌། ཚིགས་ཆེན་གྱི་རུས་པ་རྣམས་རིལ་བུ་ཡུང་འབྲུ་ཙམ་ཁ་དོག་དཀར་པོ་དུ་མ་འབབས་པ་སོགས་ངོ་མཚར་བའི་རྟགས་མཚན་དུ་མ་ཡོད་པར་གསུངས་སོ། །གདུང་མཆོད་ཡང་དཀར་ལྷ་དགོན་པ་དང༌། འཁྱམས་རི་དགོན་པ་སོགས་ཀྱི་གྲྭ་བཙུན་པ་རྣམས་ཀྱིས་ཉིན་མཚན་བར་མ་ཆད་པར་རྒྱུན་བཟུང་ནས་ཐ་སྐར་ཟླ་བའི་བཅུ་དགུ་ལ་གདུང་མཆོད་མཇུག་དྲིལ་བར་བྱས། དེ་ནས་གཅུང་བྱ་བཏང་འདྲེན་མཆོག་གམ་ཡོན་ཏན་གྱིས་དམ་པ་འདི་ཉིད་ཀྱི་སྐུ་གདུང་གི་རྟེན་ཁྲུ་དྲུག་གི་ཆེ་ཚད་དང་ལྡན་པ་གསེར་དངུལ་རིན་པོ་ཆེ་དང༌། གཡུ་བྱུར་སོགས་རིན་པོ་ཆེ་དུ་མའི་ཕྲ་རྒྱན་དང་བཅས་པའི་བྱང་ཆུབ་མཆོད་རྟེན་བཟོ་བཀོད་ལེགས་པ་དང༌། སྐུའི་ཚ་བོ་ཀུན་རྣམ་གྱིས་སྐུ་གདུང་ཆེ་ཚད་སོགས་སྔ་མ་བཞིན་བཞེངས་པ་དང༌། ཞོ་འོང་སྡེ་བས་དད་རྟེན་དུ་སྐུ་གདུང་བཞེངས་བ་རྣམས་ཕྱི་རབས་ཀྱི་དད་ལྡན་གྱི་སྐྱེ་བོ་རྣམས་ཀྱིས་བསོད་ནམས་བསགས་པའི་ཞིང་དུ་ལེགས་པར་བསྐྲུན་པའོ། །སྨྲས་པ། སྐྱེ་འཆི་འཕོ་འགྱུར་བྲལ་བའི་རྡོ་རྗེའི་སྐུ། །གདུལ་བྱ་རྟག་པར་འཛིན་པ་འདུལ་སླད་དུ། །ཐུན་མོང་སྣང་ངོར་ཤར་བའི་གཟུགས་ཀྱི་སྐུ། །ཞི་བའི་དབྱིངས་སུ་རེ་ཞིག་བསྡུ་ཚུལ་མཛད། །ས་གསུམ་འགྲོ་ལ་ལེགས་པར་སྟོན་མཛད་པའི། །ཐུབ་བསྟན་ཀུ་མུད་མཛེས་པའི་གཉེན་གཅིག་པུ། །གློ་བུར་ཉིད་དུ་ཞི་བའི་དབྱིངས་སུ་ནུབ། །མི་མཇེད་ཞིང་འདིར་གློ་བུར་མུན་པས་ཁྱབ། །སྐུ་གདུང་ཞུགས་འབུལ་མཛད་ཚེ་དགེ་མཚན་གྱི། །འོད་ཀྱི་ཐིག་ལེ་རྣམ་པ་དུ་མའི་གཟུགས། །རྣམ་བཀྲ་འཇའ་ཚོན་རི་མོས་ཡོངས་སུ་མཛེས། །མེ་ཏོག་སིལ་མའི་གྲུ་ཆར་འབེབས་པ་སོགས། །ལྟས་བཟང་མཆོད་པའི་ས་དང་བར་སྣང་བཀང༌། །གང་ལ་དད་པའི་སྐྱེ་བོའི་ཚོགས་རྣམས་ལ། །མགོན་དང་བྲལ་བའི་མྱ་ངན་གྱིས་གདུང་ཀྱང༌། །རྨད་བྱུང་ངོ་མཚར་དགེ་ལེགས་མཚན་མ་དེས། །ཡིད་ཀྱི་ངལ་གསོའང་ཅི་ཡང་དལ་ཅིག་ཐོབ། །འདྲེན་མཆོག་གང་གི་མཛེས་པའི་ཞལ་རས་ལ། །རེ་ཞིག་མཇལ་བའི་སྐལ་བ་དམན་ན་ཡང༌། །གང་གསུང་ཉམས་སུ་མྱོང་ཞིང་རྣམ་ཐར་ཉིད། །མཐོང་ཐོས་དྲན་པའི་དོན་ལྡན་སྐལ་བཟང་ཐོབ། །ཅེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་ལས་གཟུགས་སྐུ་ཞི་བའི་དབྱིངས་སུ་བསྡུ་བའི་མཛད་པའི་སྐབས་རྣམ་པར་བཤད་ཟིན་ཏོ།། །།
༈ དུས་གསུམ་རྒྱལ་རྣམས་འཁོར་བའི་ཕྱི་མཐའི་བར། །སྐུ་གསུང་ཐུགས་ཀྱི་མཛད་པ་ལེགས་སྟོན་པར། །ཞལ་བཞེས་དམ་བཅའ་ཁུར་ལྕི་ཁུར་བ་ཡི། །རྒྱལ་སྲས་བྱང་ཆུབ་རྣམས་ལ་གུས་ཕྱག་འཚལ། །
བཞི་བ་དཔལ་ལྡན་བླ་མའི་རྣམ་ཐར་བརྗོད་པའི་ཕན་ཡོན་བཤད་པའི་སྒོ་ནས་མཇུག་བསྡུ་བའི་ཚུལ།
བཞི་བ་དཔལ་ལྡན་བླ་མའི་རྣམ་ཐར་བརྗོད་པའི་ཕན་ཡོན་བཤད་པའི་སྒོ་ནས་མཇུག་བསྡུ་བའི་ཚུལ་ནི།
དེ་ལྟར་མཚུངས་མེད་དཔལ་ལྡན་བླ་མ་རིན་པོ་ཆེ་ངག་བརྩོན་གྱི་རྣམ་པར་ཐར་བ་རྣམས་ནི་ངོ་མཚར་བའི་མཛད་པ་ལགས་ན་གདུལ་བྱ་སྐལ་བ་དང་ལྡན་པ་རྣམས་ཀྱི་དད་པའི་ཞིང་ས་ཞིག་ཏུ་ངེས་སོ། །དེ་ལ་དད་པ་དང་འདུན་པ་བསྐྱེད་པའི་ཕྱིར་དུ་རྟོགས་པ་བརྗོད་པ་ཡིན་ཏེ། ཇི་སྐད་དུ། དད་པའི་ཞིང་ནི་སློབ་དཔོན་ཡིན་པས་བླ་མའི་རྣམ་ཐར་བཤད་པར་བྱའོ། །ཞེས་གསུངས་པ་ལྟར་དད་པ་རྣམ་དག་ཞིག་བསྐྱེད་པ་ནི་དཔལ་ལྡན་བླ་མའི་གསང་གསུམ་གྱི་རྣམ་ཐར་ཇི་བཞིན་ཤེས་པ་ལ་རག་ལས་པ་ཡིན་ལ། དེ་ཡང་མདོ་སྔགས་ཐམས་ཅད་ཀྱི་སྐབས་སུ་ལམ་ཡོངས་རྫོགས་ཀྱི་བྱིན་རླབས་ཀྱི་སྒོ་ལེགས་པར་ཕྱེ་བའི་སྒོ་གཅིག་པུ་གྱུར་བ་ནི། གང་ཟག་རང་རང་ལ་མདོ་སྔགས་གང་གི་ལམ་གྱི་ཆོས་ཚུལ་ལེགས་པར་འདོམས་པའི་དགེ་བའི་བཤེས་གཉེན་མཆོག་ཁོ་ན་ཡིན་ལ། དེ་ལ་དད་པ་རྣམ་དག་ཞིག་ཡོད་ན་ལམ་གྱི་ཡོན་ཏན་རྣམས་རིམ་གྱིས་རྒྱུད་ལ་སྐྱེས་ནས་མཐར་ཐུག་བྱང་ཆུབ་མངོན་དུ་གྱུར་བ་ཉིད་ཡིན་ཏེ། ཇི་སྐད་དུ། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་དང༌། རྗེ་ཏཱ་ར་ནཱ་ཐའི་ཞལ་ནས། བླ་མ་སངས་རྒྱས་སུ་མཐོང་ན། །སྒོམ་མི་སྐྱེ་རང་དབང་ག་ལ་ཡོད། །ཅེས་སོགས་གསུངས་པ་ལྟར་རོ། །དེས་ན་ཡོན་ཏན་གང་སྐྱེ་བ་ཐམས་ཅད་ནི་བླ་མ་ལ་དད་གུས་བྱས་པ་ལས་བྱུང་ལ། དད་གུས་དེ་ཡང་རྩ་བ་དཔལ་ལྡན་བླ་མའི་རྣམ་ཐར་ལས་བྱུང་བས་ན། ཡོན་ཏན་གང་སྐྱེ་བ་ཐམས་ཅད་དཔལ་ལྡན་བླ་མའི་རྣམ་ཐར་བརྗོད་པའི་ཕན་ཡོན་ཡིན་ནོ། །གཞན་ཡང་མདོ་སྡེ་དུ་མ་ལས་རྗེ་བཙུན་དཔལ་ལྡན་བླ་མའི་རྣམ་ཐར་བརྗོད་པའི་ཕན་ཡོན་མཐའ་ཡས་པ་གསུངས་ཏེ། །མདོ་ལས། གཞོན་ནུ་སློབ་དཔོན་གྱི་མཚན་ཉིད་བཤད་པར་བྱའོ། །མཁན་པོའི་ཡོན་ཏན་གྱི་བཤད་པ་ལ་བརྩོན་ཤིག ཅེས་དང༌། བྱང་ཆུབ་ཤིང་དྲུང་དུ་འཇུག་པའི་མདོ་ལས། འོད་སྲུང་བླ་མའི་རྣམ་ཐར་ལ་རྟོག་ཅིང་བཤད་པར་གྱིས་ཤིག མཁན་པོའི་མཚན་ཉིད་ལ་ནན་ཏན་གྱིས་ཤིག ཅེས་དང༌། དྲི་མེད་འོད་ཟེར་བརྒྱ་བའི་རྒྱུད་ལས། རྡོ་རྗེ་སློབ་དཔོན་ཐམས་ཅད་མཁྱེན། །མོས་གུས་དྲག་པོ་འབྱུང་བའི་གཞི། །བླ་མའི་རྣམ་ཐར་རྒྱས་བསྡུས་རྣམས། །ཡིད་བཞིན་ནོར་བུ་ལྟ་བུ་ཅན། །ཡང་ཡང་བལྟ་བར་བརྩོན་གྱུར་ན། །དངོས་གྲུབ་ཐོབ་པར་ཐེ་ཚོམ་མེད། །ཅེས་སོགས་མདོ་སྡེ་དུ་མ་ནས་བླ་མའི་རྣམ་ཐར་ཇི་བཞིན་རྟོགས་པ་དང༌། གཞན་ལ་བརྗོད་པའི་ཕན་ཡོན་མཐའ་ཡས་པར་གསུངས་སོ། །དེ་རྟོགས་པ་དང་བརྗོད་པའི་ཕན་ཡོན་ནི་གང་ལ་དད་པ་སྐྱེ་བ་དེ་ཡིན་ལ། སྤྱིར་དད་པ་ནི་དཀར་ཆོས་ཀུན་གྱི་སྔོན་འགྲོ་མེད་དུ་མི་རུང་བ་ཡོན་ཏན་ཀུན་གྱི་སྐྱེད་བྱེད་ཉེས་སྐྱོན་མཐའ་དག་ལས་སྒྲོལ་བྱེད་ཡིན་པའི་ཚུལ་མདོ་དང་བསྟན་བཅོས་དག་ལས་རྒྱས་པར་བཀའ་སྩལ་བ་ལྟར་ཡིན་པས། དད་པ་དཀར་ཆོས་ཐམས་ཅད་ཀྱི་སྔོན་དུ་བསྐྱེད་པར་བྱའོ། །རྗེ་བཙུན་བླ་མ་དམ་པ་རྣམས་ཀྱི་རྣམ་པར་ཐར་བ་རྣམས་རང་གི་ཉམས་ལེན་དུ་འཁྱེར་དགོས་པ་ནི་གནད་དམ་པ་ཡིན་ཏེ། རྒྱུད་ལས། སློབ་མས་བླ་མའི་རྣམ་ཐར་སྙེགས་པར་འགྱུར། །ཞེས་དང༌། རྗེ་བདག་ཉིད་ཆེན་པོའི་ཞལ་སྔ་ནས། རྣལ་འབྱོར་ངས་ཀྱང་ཉམས་ལེན་དེ་ལྟར་མཛད། །ཐར་འདོད་ཁྱེད་རྣམས་དེ་ལྟར་བསྐྱང་འཚལ་ལོ། །ཞེས་གསུངས་པ་བཞིན་རྗེ་བཙུན་དཔལ་ལྡན་བླ་མ་རྣམས་ཀྱི་རྣམ་པར་ཐར་བ་རྣམས་རྗེས་འཇུག་གི་གདུལ་བྱ་རྣམས་ཀྱིས་ཉམས་ལེན་བྱེད་པ་དང༌། དད་པ་དང་མོས་གུས་ཚད་མེད་ཞིག་སྐྱེ་བ་ནི་རྣམ་པར་ཐར་བ་བརྗོད་པའི་དགོས་པ་ཡིན་ནོ། ། རྗེ་བཙུན་དམ་པ་འདི་ཉིད་ཀྱི་ཡོན་ཏན་མཐའ་དག་བུམ་ནང་གི་མར་མེ་ལྟར་སྦས་པས་བཀའ་གདམས་གོང་མའི་རྣམ་ཐར་གཙང་མའི་བརྟུལ་བཞུགས་བདག་གིར་མཛད་པའི་དབང་གིས་ཁོང་གི་ཡོན་ཏན་དང་རྣམ་ཐར་གཞན་ལ་མི་གསུངས་བས་དེ་ཙམ་ལས་སྤྲོ་མ་ནུས་མོད་རྣམ་ཐར་གྱི་ས་བོན་འདི་ཙམ་ལ་བརྟེན་ནས་ཐམས་ཅད་མཐོ་རིས་དང་ཐར་བའི་ལམ་སྣ་ཟིན་པར་བྱིན་གྱིས་རླབས་ཏུ་གསོལ། སེམས་ཅན་རྣམས་སྨིན་ཅིང་གྲོལ་བར་མཛད་པའི་སྐྱེས་བུ་མཆོག་རབ་དམ་པ་རྗེ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་ཐར་བ་དང་ཐམས་ཅད་མཁྱེན་པའི་ལམ་སྟོན་མཁའ་ཁྱབ་ཀྱི་སེམས་ཅན་རྣམས་ལ་སྲིད་ཞིའི་དཔལ་འབྱོར་རྒྱུན་མི་ཆད་དུ་སྩོལ་བར་མཛད་པའི་དགེ་ལེགས་ཀྱི་དགའ་སྟོན་ཆེན་པོ་འདི་ཉིད་དགེ་ཞིང་བཀྲ་ཤིས་པ་དགེ་ལེགས་འཕེལ་བར་གྱུར་ཏོ། ། སླར་སྨྲས་པ། མགོན་ཁྱོད་རྒྱལ་བ་ཉིད་ཀྱང་ངུར་སྨྲིག་གར། །སྲིད་པ་སྤངས་ཀྱང་སྲིད་པའི་ཚུལ་འཛིན་པ། །མི་སློབ་ཉིད་ཀྱང་སློབ་པའི་ངང་ཚུལ་འཛིན། །སྲིད་མཐའ་བྲལ་བ་སྲིད་མཐའ་ཅན་དུ་མཛད། །རྨད་བྱུང་ཤེས་བརྩོན་ཟླ་འོད་དཀར་བོ་ཡིས། །ཐོས་བསམ་གསེར་གྱི་ཀུ་མུད་འཛུམ་པ་ལས། །ལེགས་བཤད་དྲི་བསུང་ཕྱོགས་མཐར་སྤྲོ་བ་ཡི། །ངོ་མཚར་རྐང་དྲུག་དབང་པོས་སྤྱོད་ཡུལ་ངེས། །བྱ་བཏང་ཀུན་སྤངས་རྣམ་པར་རྒྱལ་བའི་དར། །ནམ་ཡང་འགྱེལ་མེད་སྲིད་པའི་རྩེ་མོར་བསྒྲེངས། །ཐུགས་བསྐྱེད་རྟ་བདུན་ཤིང་རྟས་ཉེར་དྲངས་ནས། །གདམས་ངག་ཆོས་ཀྱི་ལི་ཁྲིའི་ཟེར་ཕྲེང་བརྡལ། །གྲགས་སྙན་ཀུན་གསལ་མཐའ་དང་འགྲན་བཟོད་གང༌། །འགྱུར་མེད་རྡོ་རྗེའི་གསང་གསུམ་རྒྱ་མཚོ་ལས། །འོད་དཀར་ཟེགས་མ་འཐུལ་བས་སྲིད་ཞི་ཡི། །ཕན་བདེ་མ་ལུས་སྟེར་བའི་ཡིད་བཞིན་ནོར། །རྟོགས་བརྗོད་ཕུལ་བྱུང་གཏམ་ཀྱི་རོལ་མོ་འདི། །ལྷག་བསམ་རྨད་བྱུང་ཆུ་འཛིན་བ་གམ་ནས། །སྙན་ཚིག་ཚངས་པའི་རྒྱུད་མངས་བརྡུངས་བ་ཡིས། །སྐལ་ལྡན་གདུལ་བྱའི་དད་པའི་གསོས་སུ་སྨིན། །འཇིག་རྟེན་སྐྱོན་གྱི་དུག་ཚེར་གྲ་མའི་ནགས། །ཡོན་ཏན་ལྷ་ཡི་ལྗོན་པ་ཞེས་བྱས་ནས། །སྒྲོ་བཏགས་ཆགས་ཞེན་གཏམ་ངན་ཆེར་སྒྲོགས་ནས། །ས་གསུམ་འུར་གྱིས་སྤེལ་དང་འདི་མི་འདྲ། །རྣམ་ཐར་འདོད་འཇོའི་བུམ་བཟང་འདི་ཉིད་ནི། །བདག་ཐོས་རྣམ་ཐར་ས་བོན་ལས་བཤད་བཞིན། །བཤད་ལས་ཕྲ་ཞིབ་རིགས་པས་ཚོལ་ཁོམ་བྲལ། །དེ་ཕྱིར་ཆད་ལྷག་ནོར་བའི་ཉེས་ཚོགས་ཀུན། །དུས་གསུམ་རྒྱལ་བ་ཀུན་ལ་སྙིང་ནས་བཤགས། །འདིར་འབད་རྣམ་དཀར་དགེ་ལེགས་འབུམ་གཡོ་བས། །རྗེ་བཙུན་བླ་མའི་རྣམ་པར་ཐར་བ་ལ། །དད་མོས་རྣམ་དག་འབྲས་བུ་རབ་སྨིན་ནས། །རྗེ་བཙུན་བླ་མས་ཚེ་རབས་རྗེས་འཛིན་ཤོག ། ཅེས་མཚུངས་མེད་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་མཆོག་གི་རྣམ་པར་ཐར་བ་སྐལ་བཟང་དད་པའི་འཇུག་ངོགས་འདོད་འཇོའི་བུམ་བཟང་ཞེས་བྱ་བ་འདི་ནི་དམ་པ་གང་གི་གཅུང་བྱ་བྲལ་བ་འདྲེན་མཆོག་གིས་སྒོར་སྟོང་དང་དར་བཅས་བསྐུལ་བ་དང༌། བླ་མ་རབ་དགའ་དང༌། བླ་མ་གསུང་དབྱངས་དང༌། ཆོས་དོན་དང༌། བླ་མ་ཚོགས་གཉིས་རྣམས་ཀྱིས་དངོས་རྫས་དར་དང་བཅས་ཏེ་རྗེ་བཙུན་དམ་པ་ངག་དབང་བརྩོན་འགྲུས་ཀྱི་རྣམ་པར་ཐར་བ་ཞིག་འབྲི་དགོས་ཞེས་ནན་གྱིས་བསྐུལ་བ་ལ་བརྟེན་ནས་རབ་གནས་ཐམས་ཅད་འདུལ་ཞེས་པ་མེ་ཕག་ལོའི་མགོ་ཟླ་བའི་ཡར་ཚེས་ལ་དབུ་མ་དང་སྡོམ་གསུམ་དང་བསྡུས་གྲྭའི་དཔེ་ཁྲིད་སོགས་བྱ་བ་དུ་མས་ཞར་ལ་ཉིན་བདུན་ཙམ་གྱི་རིང་ཨ་སྐྱོང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་ནས་འཕགས་བོད་ཀུན་ལ་ཉུལ་བའི་སྤྲང་འཁྱམས་པ་ངག་དབང་དངོས་གྲུབ་དཔལ་གྱིས་རྫོགས་པར་བྲིས་པའོ། །འདི་ཉིད་ཐུབ་པའི་བསྟན་པ་རིན་པོ་ཆེ་འཛིན་མའི་ཁྱོན་ཀུན་ཏུ་ཁྱབ་པའི་རྒྱུར་གྱུར་ཅིག ། །།སརྦ་མངྒ་ལམ། །ཛ་ཡནྟུ།