མཚུངས་མེད་ངག་དབང་བརྩོན་འགྲུས་ཀྱི་རྣལ་འབྱོར་ཡིད་བཞིན་དབང་གི་རྒྱལ་པོ།
མཚུངས་མེད་ངག་དབང་བརྩོན་འགྲུས་ཀྱི་རྣལ་འབྱོར་ཡིད་བཞིན་དབང་གི་རྒྱལ་པོ་ཞེས་བྱ་བ་བཞུགས་སོ། །
དཔལ་ལྡན་བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །དཔལ་ལྡན་བླ་མ་རྒྱལ་བ་ཀུན་འདུས་པའི། །བདག་ཉིད་མཐོང་བའི་དད་དང་མོས་གུས་ཀྱིས། །ཉམས་རྟོགས་ཡོན་ཏན་མ་ལུས་འབྱུང་བར་འགྱུར། །དེ་སླད་བླ་མའི་རྣལ་འབྱོར་བསྒོམ་པའི་ཚུལ། །མདོར་བསྡུས་ཙམ་ཞིག་ངག་གིས་བརྗོད་པ་འདི། །ཟབ་ལམ་རིམ་གཉིས་ཡེ་ཤེས་ཉམས་རྟོགས་རྣམས། །སྐྱེ་བར་འདོད་པ་རྣམས་ཀྱིས་རབ་བསྒོམས་ནས། །དངོས་གྲུབ་མ་ལུས་གཏེར་ཁ་འབྱེད་པར་གྱིས། །དེ་ལ་འདིར་སྔོན་འགྲོ། དངོས་གཞི། རྗེས་ཀྱི་བྱ་བ་གསུམ་ལས། དང་པོ་ནི། རྒྱལ་བ་ཀུན་འདུས་རྗེ་བཙུན་རིན་པོ་ཆེ། །བླ་མེད་བྱང་ཆུབ་སྙིང་པོ་མ་ཐོབ་བར། །འགྲོ་རྣམས་འཁོར་བའི་མཚོ་ལས་སྒྲོལ་བའི་ཕྱིར། །སྐྱབས་སུ་བསྟེན་ནོ་ཐུགས་རྗེས་བཟུང་དུ་གསོལ། །ཞེས་སྐྱབས་འགྲོ་ལན་གསུམ་བྱ། དེ་ནས། འགྲོ་རྣམས་སྡུག་བསྔལ་ཕྲ་རགས་ཐམས་ཅད་ལས། །བསྒྲལ་ནས་སྐུ་བཞི་མངོན་དུ་གྱུར་བའི་ཕྱིར། །མཚུངས་མེད་དཔལ་ལྡན་བླ་མ་དམ་པ་ཡི། །རྣལ་འབྱོར་རྩེ་གཅིག་ཉིད་དུ་བསྒོམ་པར་བྱ། །ཞེས་སེམས་བསྐྱེད་ལན་གསུམ་བྱའོ། །གཉིས་པ་དངོས་གཞི་ནི། སྟོང་པའི་ངང་ལས་མདུན་གྱི་ནམ་མཁའ་ལ། །གཞལ་མེད་ཁང་དབུས་སེང་ཁྲི་པད་ཟླའི་སྟེང༌། །སྐྱབས་གནས་རྒྱལ་ཀུན་ངོ་བོ་དབྱེར་མེད་པ། །མཚན་དཔེ་གསལ་རྫོགས་ངུར་སྨྲིག་རོལ་བ་ཡི། །རྡོ་རྗེ་འཆང་དངོས་ངག་དབང་བརྩོན་འགྲུས་ཉིད། །སྐུ་མདོག་དཀར་དམར་གཟི་འོད་རབ་འབར་བ། །བདག་ལ་དགྱེས་པའི་ཞལ་རས་འཛུམ་དཀར་གཡོ། །སྐུ་ལ་བདེ་སྟོང་ཉམས་ཀྱིས་མདངས་ཆགས་པ། །ཕྱག་གཉིས་མཉམ་པར་བཞག་པའི་ཕྱག་རྒྱ་མཛད། །ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། །ཆོས་གོས་རྣམ་གསུམ་འོད་མཚན་སྟོང་འབར་བ། །གསུང་ནི་ཡན་ལག་དྲུག་ཅུའི་སྒྲ་དབྱངས་ལྡན། །ཐུགས་ནི་བདེ་སྟོང་ཡེ་ཤེས་གཡོ་བ་མེད། རྡོ་རྗེའི་སྐུ་ལ་ལྷ་ཡི་ཚོགས་བཅས་པ། །དུས་འཁོར་ལ་སོགས་དཀྱིལ་འཁོར་ཀུན་གྱི་བདག །སྐྱབས་གནས་ཀུན་འདུས་བླ་མ་རིན་པོ་ཆེའི། །སྐུ་ཡི་མཐའ་སྐོར་ཕྱོགས་རྣམས་ཐམས་ཅད་དུ། །རྩ་བརྒྱུད་བླ་མ་ཡི་དམ་ལྷ་རྣམས་དང༌། །སངས་རྒྱས་བྱང་སེམས་མཁའ་འགྲོ་ཆོས་སྐྱོང་རྣམས། །སྤྲིན་བཞིན་འཁྲིགས་ཤིང་བྱིན་རླབས་འོད་ཕུང་འཁྲིགས། །བླ་མའི་དཔྲལ་མགྲིན་ཐུགས་ཀ་ལྟེ་བ་ལ། །སྐུ་བཞིའི་བདག་ཉིད་ཡིག་འབྲུ་བཞི་མཚན་གྱུར། །བདག་དང་འགྲོ་བ་སེམས་ཅན་ཐམས་ཅད་ལ། །བརྩེ་བས་ཉེར་དགོངས་ལེགས་པར་བཞུགས་སུ་གསོལ། །ཞེས་བརྗོད་དེ་བླ་མ་སངས་རྒྱས་ཀུན་འདུས་སུ་བསྒོམ་པར་བྱའོ། །དེ་ནས་ཡན་ལག་བདུན་པ་འབུལ་བ་ནི། དཀོན་མཆོག་ཀུན་འདུས་བླ་མ་དམ་པ་ལ། །ཕྱི་ནང་གསང་བའི་མཆོད་པ་ལ་སོགས་པ། །ཀུན་ཏུ་བཟང་པོའི་མཆོད་སྤྲིན་རྒྱ་མཚོས་མཆོད། །སྡིག་ལྟུང་ཇི་སྙེད་མཆིས་པ་མཐོལ་ཞིང་བཤགས། །རྗེ་བཙུན་བླ་མའི་གསང་གསུམ་ལ་སོགས་པ། །དུས་གསུམ་བསགས་པའི་དགེ་ལ་རྗེས་ཡི་རང༌། །ཟབ་གསང་རིམ་གཉིས་ལམ་ལ་སོགས་པ་ཡི། །ཆོས་འཁོར་རྒྱུན་མི་ཆད་པར་སྐོར་དུ་གསོལ། །བདག་དང་སེམས་ཅན་བྱམས་བརྩེས་ཉེར་དགོངས་ནས། །མྱ་ངན་མི་འདའ་བཞུགས་པར་གསོལ་བ་འདེབས། །རབ་དཀར་དགེ་འདིས་བྱང་ཆུབ་མྱུར་ཐོབ་ཤོག །དེ་ནས་གསོལ་བ་རྩེ་གཅིག་ཏུ་འདེབས་པ་ནི། རིགས་ཀྱི་དཀྱིལ་འཁོར་ཐམས་ཅད་ཀྱི་ཁྱབ་བདག་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །བླ་མ་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །ཡི་དམ་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །སངས་རྒྱས་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །དམ་ཆོས་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །དགེ་འདུན་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །ཆོས་སྐྱོང་ཀུན་འདུས་ཀྱི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །བདེ་ཆེན་ཡེ་ཤེས་རྡོ་རྗེའི་ངོ་བོ་རྡོ་རྗེ་འཆང་ཆེན་པོ་ངག་དབང་བརྩོན་འགྲུས་དཔལ་བཟང་པོ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། གཞན་དོན་ཁུར་དུ་ཁྱེར་བའི་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཟབ་མོ་མཐའ་བྲལ་དབུ་མ་ཆེན་པོའི་དོན་རྟོགས་པར་བྱིན་གྱིས་བརླབ་ཏུ་གསོལ། ལས་རླུང་མཐའ་དག་དབུ་མར་ཐིམ་པའི་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཉམས་རྟོགས་ཀྱི་འབྲས་བུ་དབྱར་མཚོ་ལྟར་རྒྱས་པར་བྱིན་གྱིས་བརླབ་ཏུ་གསོལ། །མཆོག་མི་འགྱུར་གྱི་བདེ་བ་ཆེན་པོའི་ཆ་ཤས་ཡོངས་སུ་རྫོགས་པར་བྱིན་གྱིས་བརླབ་ཏུ་གསོལ། དཔལ་ལྡན་སྐུ་བཞིའི་འབྲས་བུ་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ། །དེ་མ་ཐོབ་ཀྱི་བར་དུ་ཡང་ཁམས་དྲུག་ལྡན་གྱི་རྡོ་རྗེའི་ལུས་ལེགས་པར་ཐོབ་ཅིང་རྗེ་བཙུན་བླ་མ་དམ་པ་ཁྱེད་ཀྱིས་རྗེས་སུ་བཟུང་ནས་ཟབ་ལམ་རྡོ་རྗེའི་རྣལ་འབྱོར་སྒོམ་པར་བྱིན་གྱིས་བརླབ་ཏུ་གསོལ། དེ་སྒོམ་པ་ལ་ཕྱི་ནང་གི་བར་ཆད་གང་ཡང་མེད་པར་བྱིན་གྱིས་བརླབ་ཏུ་གསོལ། ལམ་ཚུལ་བཞིན་དུ་སྒོམ་པའི་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་འདེབས་པར་བྱ། དེ་ལྟར་རྩེ་གཅིག་གསོལ་བ་བཏབ་པ་ཡིས། །བདག་ལ་བརྩེ་བའི་སྤྱན་གྱིས་ལྷག་པར་གཟིགས། །བླ་མའི་དཔྲལ་མགྲིན་ཐུགས་ཀ་ལྟེ་བ་ཡི། །ཡི་གེ་བཞི་ལས་འོད་ཟེར་རྣམ་བཞི་འཕྲོས། །བདག་གི་གནས་ཞིར་ཐིམ་པས་སེམས་རྒྱུད་ལ། །མཚན་ལྡན་བླ་མའི་གསང་གསུམ་བྱིན་རླབས་ཞུགས། །ལུས་ལ་བདེ་བ་ཆེན་པོས་རྟག་ཏུ་ཁྱབ། །ངག་ལ་གཞོམ་མེད་རིག་སྔགས་ནུས་པ་འབར། །སེམས་ལ་བདེ་སྟོང་ཡེ་ཤེས་ཆེས་ཆེར་རྒྱས། །འཁོར་འདས་ཆོས་ཀུན་འོད་གསལ་འཁོར་ལོར་ཤར། །བླ་མའི་ཐུགས་དང་རང་སེམས་དབྱེར་མེད་གྱུར། །དེ་ནས་བླ་མའི་ཐུགས་དང་རང་སེམས་དབྱེར་མེད་ཀྱི་ངང་ནས་མཚན་སྔགས་བཟླ། ཨོཾ་གུ་རུ་བཛྲ་དྷ་ར་ཝ་གིནྡྲ་བིརྻཱ་སརྦ་སིདྡྷི་ཧཱུཾ་ཧཱུཾ། ཡང་ན་ཨོཾ་གུ་རུ་བཛྲ་དྷ་ར་མཱ་ཏི་བྷ་ཏྲ་ཤཱ་ས་ན་སུརྱ་སརྦ་སིདྡྷི་ཧཱུཾ་ཧཱུཾ། ཞེས་ཅི་ནུས་བཟླས་ནས། བླ་མས་སྐུ་ལས་བདུད་རྩིའི་རྒྱུན་འབབ་པས། །སྡིག་ལྟུང་སྦྱང་ཞིང་སེམས་རྒྱུད་དྲི་མ་དག །ལྷ་ཚོགས་རྣམས་ནི་བླ་མའི་སྐུ་ལ་ཐིམ། །བླ་མའི་སྐུ་ལ་བདེ་སྟོང་གཟི་མདངས་རྒྱས། །བླ་མ་འོད་ཞུ་རང་ལ་ཐིམ་པར་གྱུར། །བླ་མ་རང་སེམས་དབྱེར་མེད་ཆོས་ཀྱི་སྐུ། །གནས་ལུགས་སྤྲོས་བྲལ་ངང་དུ་མཉམ་བཞག་ནས། །བདག་གི་སེམས་རྒྱུད་བྱིན་གྱིས་བརླབ་པར་གྱུར། ། ཞེས་རང་སེམས་བྱིན་གྱིས་རླབ་པར་མོས་ལ། གསུམ་པ་རྗེས་ཀྱི་སྨོན་ལམ་ནི། རྒྱལ་ཀུན་བརྩེ་ཆེན་ངུར་སྨྲིག་འཛིན་པའི་གར། །གཞུང་བརྒྱ་སྨྲ་བའི་ང༷ག་གི་དབ༷ང་ཕྱུག་དཔལ། །གུས་རྟག་བརྩོ༷ན་འགྲུ༷ས་ཆུ་བོའི་དཔལ་མངའ་བ། །མཚུངས་མེད་དཔལ་ལྡན་བླ་མས་ཐུགས་རྗེས་ཟུངས། ། ང༷ག་གི་དབ༷ང་ཕྱུག་ཆོས་སྦྱིན་བརྩོ༷ན་པའི་གཏེར། །ངང་བའི་བུ་མོ་སྒྱུ་མའི་གར་མཁན་འགྲུ༷ས། །སྨྲ་བའི་འབབ་སྟེགས་དྲི་ཟའི་དགའ་ཚལ་ནས། །མདོ་སྔགས་རྒྱུད་མང་ཆོས་ཀྱིས་སྨིན་པར་ཤོག །བདག་ནི་སྐྱེ་བ་འདི་དང་ཚེ་རབས་ཀུན། །མཚན་ལྡན་བླ་མ་ཁྱེད་ཀྱིས་རྗེས་བཟུང་ནས། །རིམ་གཉིས་ལམ་གྱི་ཉམས་དང་རྟོགས་པ་རྣམས། །མྱུར་ཏུ་རྫོགས་ནས་རྡོ་རྗེ་འཆང་ཐོབ་ཤོག ། དགེ་བ་འདི་ཡི་མྱུར་ཏུ་བདག །རྗེ་བཙུན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་མཚུངས་མེད་ངག་དབང་བརྩོན་འགྲུས་ཀྱི་རྣལ་འབྱོར་ཡིད་བཞིན་དབང་གི་རྒྱལ་པོ་ཞེས་བྱ་བ་འདི་ནི་འབྲས་རབ་འབྱམས་པའི་མིང་ཙམ་འཛིན་པ་ངག་དབང་དངོས་གྲུབ་དཔལ་ནས་བྲིས་པའོ། ། འདིས་ཀྱང་ཚེ་རབས་ཐམས་ཅད་དུ་རྗེ་བཙུན་བླ་མའི་རྗེས་སུ་འཛིན་པའི་རྒྱུར་གྱུར་ཅིག ། །།སརྦ་མངྒ་ལམ། ། ཛ་ཡནྟུ།