ཁྱབ་བདག་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་རྣམ་པར་ཐར་བ་ཐར་འདོད་དད་པའི་འཇུག་ངོགས།
ཁྱབ་བདག་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་རྣམ་པར་ཐར་བ་ཐར་འདོད་དད་པའི་འཇུག་ངོགས་ཞེས་བྱ་བ་བཞུགས་སོ། །
མཛད་པ་པོ་འབྲས་རབ་འབྱམས་པ་དངོས་གྲུབ་དཔལ། ན་མོ་གུ་རུ་བྷྱཿ རྨད་བྱུང་ཚོགས་གཉིས་རྡུལ་མང་བརྩེགས་པ་ཡི། །སྐུ་བཞི་ལྷུན་པོ་སྲིད་ཞིའི་ཁམས་ན་བརྗིད། །འགྲོ་བའི་བླ་མ་ཐམས་ཅད་མཁྱེན་པ་མཆོག ། མི་འབྲལ་སྤྱི་གཙུག་རྒྱན་དུ་བཞུགས་སུ་གསོལ། །ཚངས་དབྱངས་སྙན་པའི་ང༷ག་ལ་དབ༷ང་འབྱོར་བའི། །མདོ་སྔགས་ཟུང་འབྲེལ་བཤ༷ད་སྒྲུ༷བ་བསྟན་པའི་དཔ༷ལ། །འཆད་མཁས་ཡོངས་འཛིན་ཉི་མ་གཞོན་ནུ་ཡིས། །བདག་སྙིང་མུན་པ་སེལ་བར་མཛད་དུ་གསོལ། །རྒྱལ་ཀུན་བྱམས་བརྩེའི་སྙིང་པོ་མལླི་ཀ །ངོ་མཚར་མཚན་དཔེའི་འདབ་བརྒྱ་གྲོལ་བའི་དཔྱིད། །ངེས་གསང་ཟབ་མོའི་ལེགས་བཤད་སྦྲང་རྩིའི་བཅུད། །སྤྲོ་མཛད་དཔལ་ལྡན་བླ་མས་རྣམ་ཀུན་སྐྱོངས། །ཐུགས་ཀློང་བཤ༷ད་མཛོད་ཆེན་པོའི་རྒྱ་མཚོ་འཁྱིལ། །སྒྲུ༷བ་པའི་ཉམས་རྟོགས་ཁོ་ལག་འཕེལ་ཞིང་རྒྱས། །དཔ༷ལ་ལྡན་སྐུ་བཞིའི་འབྲས་བུ་ཆེར་སྨིན་པས། །གང་གི་མཛད་བཟང་འཆད་པའི་དགེ་ལེགས་སྩོལ། །གསང་གསུམ་སྒྱུ་འཕྲུལ་ཟླ་བ་གཅིག་ཉིད་ལས། །རང་འདྲའི་
ཆུ་ཟླས་རྣམ་ཀུན་དོན་ཡོད་ཀྱི། །མཛད་པའི་དགེ་ལེགས་རྩེ་དགའ་འགྱེད་པ་དག །སྐལ་བཟང 
་ཀུན་དགའི་གར་གྱི་རི་མོར་འགོད། །དེ་ལ་འདིར་དུས་གསུམ་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་མཐུ་གཅིག་ཏུ་བསྡུས་པ། རིགས་དང་དཀྱིལ་འཁོར་ཐམས་ཅད་ཀྱི་མངའ་བདག་ཤེས་བྱའི་དཀྱིལ་འཁོར་མཐའ་དག་གཟིགས་པའི་མཁྱེན་སྤྱན་ཡངས་ཤིང་མདོ་སྔགས་གྲུབ་མཐའ་རྒྱ་མཚོའི་ཕ་རོལ་ཏུ་སོན་པ། ཁྱབ་བདག་རྡོ་རྗེ་འཆང་ཆེན་པོ་བཀའ་དྲིན་མཚུངས་པ་མེད་པའི་ཆོས་རྗེ་དམ་པ་གང་གི་དོན་གྱི་སླད་དུ་མཚན་ནས་སྨོས་ན༧ངག་དབང་བཤད་སྒྲུབ་དཔལ་བཟང་བོ་མཆོག་གི་རྣམ་པར་ཐར་བ་ཐར་འདོད་དད་པའི་འཇུག་ངོགས་ཞེས་བྱ་བ་བྲི་བར་བྱ་བ་ལ། ཐོག་མར་དགེ་བ་སྔོན་བྱོན་དམ་པའི་སྐྱེས་རབས་ཀྱི་སྐབས་ཕྱེ་བ་དང༌། བར་དུ་དགེ་བ་ད་ལྟར་བྱུང་བའི་སྤྲུལ་བའི་ཟློས་གར་གྱི་མཛད་ཚུལ་དང༌། ཐ་མར་དགེ་བ་ཕྱི་མཐར་འཕྲིན་ལས་ཀྱི་འཇུག་པ་འགོག་མེད་དུ་ཤར་ཚུལ་དང་གསུམ། དང་པོ་སྤྱིར་དཔལ་ལྡན་བླ་མ་དག་གི་མཚན་ཉིད་སོགས་ཅུང་ཟད་བཤད་པ་དང༌། སྔོན་གྱི་འཁྲུངས་རབས་དངོས་བཤད་པ་དང་གཉིས། དང་པོ་ནི། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་སྟེན། །ཞེས་དང༌། དཔལ་དུས་ཀྱི་འཁོར་ལོའི་རྩ་རྒྱུད་ལས། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་རྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་མཁས། །གསང་སྔགས་འཆད་བྱེད་སློབ་དཔོན་སྟེ། །དང་བའི་བདག་ཉིད་དབང་བོ་དུལ། །ཞེས་གསུངས་པ་ལྟར་ཡོན་ཏན་ཚད་མེད་པ་ཐམས་ཅད་དང་ལྡན་ཞིང་སྐྱོན་ཐམས་ཅད་དང་བྲལ་བ་སངས་རྒྱས་མ་ལུས་པ་འདུས་པའི་ངོ་བོ། དམ་ཆོས་ཐམས་ཅད་ཀྱི་འབྱུང་གནས། འཕགས་པའི་དགེ་འདུན་རྒྱ་མཚོའི་གཙུག་རྒྱན་ནི་དཔལ་ལྡན་བླ་མ་དམ་པ་ཡིན་ནོ། །དེ་ཡང་དཔལ་དུས་ཀྱི་འཁོར་ལོའི་རྒྱུད་ཕྱི་མ་ལས། སློབ་དཔོན་དེ་ནི་སངས་རྒྱས་ཉིད་དེ་རབ་མཆོག་ས་གཞིའི་སྟེང་ན་ཆོས་ནི་དེ་ཡིས་སྟོན་པའོ། །དགེ་འདུན་གང་ཞིག་དེར་གནས་རབ་ཏུ་དགའ་བའི་ཐུགས་ལྡན་སེམས་ཅན་ཀུན་ལ་རྗེས་སུ་བརྩེ་བ་སྟེ། །ཞེས་དང༌། ཡེ་ཤེས་གྲུབ་པའི་རྒྱུད་ལས། བླ་མ་སངས་རྒྱས་ཆོས་འགྱུར་ཞིང༌། །དགེ་འདུན་ཡང་ནི་དེ་སྙེད་དེ། །དེ་འདྲ་ཉིད་ཀྱི་ཤེས་གྱུར་བས། །དེ་བས་དཀོན་མཆོག་གསུམ་ཡིན་ནོ། །ཞེས་དང༌། སྡོམ་པ་འབྱུང་བའི་རྒྱུད་ལས། །བླ་མ་སངས་རྒྱས་བླ་མ་ཆོས། །བླ་མ་དེ་བཞིན་དགེ་འདུན་ཏེ། །སངས་རྒྱས་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲྭ་བ་སྡོམ། །ཞེས་དང༌། བདེ་མཆོག་རྩ་རྒྱུད་ལས། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །ཞེས་དང༌། མཁའ་འགྲོ་ཀུན་སྤྱོད་ཀྱི་རྒྱུད་ལས། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །ཞེས་དང༌། སྒྱུ་འཕྲུལ་དྲྭ་བའི་རྒྱུད་ལས། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །ཞེས་དང༌། དུས་འཁོར་བསྡུས་པའི་རྒྱུད་ལས། མི་ཡི་འཇིག་རྟེན་རྣམས་སུ་ཉོན་མོངས་རྣམས་བྲལ་བླ་མ་གང་དག་རྡོ་རྗེ་འཛིན་བདག་ཉིད། །སེམས་ཅན་རྣམས་ལ་དེ་ཡིས་བདེ་མཉམ་འབྲས་བུ་ཐར་བ་སྟེར་བས་ཕྱག་བྱ་མཆོད་བྱ་སྲས་རྣམས་ཀྱིས། །ཞེས་གསུངས་པ་དང༌། བཤད་རྒྱུད་རྡོ་རྗེའི་འཕྲེང་བ་ལས། བླ་མ་དང་ནི་རྡོ་རྗེ་འཆང༌། །ཐ་དད་པར་ནི་མི་བརྟག་གོ །ཞེས་དང༌། རྡོ་རྗེ་གུར་ལས། ཇི་ལྟར་ནམ་མཁའ་མཛོད་ཆེན་དུ། །ཐུབ་པ་རྡོ་རྗེ་ཆོས་འཛིན་བཞིན། །མགོན་པོ་རྟ་བདུན་རྒྱལ་པོ་ལྟར། །དེ་བཞིན་སློབ་དཔོན་རབ་ཏུ་གྲགས། །ཞེས་དང༌། བྲམ་ཟེ་བསོད་སྙོམས་པའི་རྒྱུད་ལས། དབང་བསྐུར་བླ་མ་མིག་དང་འདྲ། །མན་ངག་སྟོན་པ་སྙིང་དང་འདྲ། །རྒྱུད་སྟོན་པ་ནི་ལུས་དང་འདྲ། །དེ་ལ་དམ་ཚིག་མ་ཉམས་ན། །འདུལ་ཁྲིམས་ཉིས་བརྒྱ་ལྔ་བཅུ་དང༌། །བྱང་སེམས་སྡོམ་པ་ཉི་ཤུ་སོགས། །ཉམས་ཀྱང་རྡོ་རྗེ་འཛིན་པ་ཐོབ། །ཅེས་དང༌། ཡེ་ཤེས་ཐིག་ལེའི་རྒྱུད་ལས། བླ་མ་མཐོ་རིས་ཐར་བའི་བླ། །བླ་མ་ཡེ་ཤེས་བླ་ན་མེད། །བླ་མ་ཡོན་ཏན་བླ་མ་མགོན། །བླ་མ་རྡོ་རྗེ་འཛིན་པ་ཉིད། །ཅེས་དང༌། ཡོན་ཏན་ཡོངས་བཟུང་གི་རྒྱུད་ལས། བླ་མ་མེད་པའི་གོང་རོལ་ན། །སངས་རྒྱས་བྱ་བ་མིང་ཡང་མེད། །འདས་དང་མ་འོངས་སངས་རྒྱས་རྣམས། །བླ་མ་དག་ལ་བརྟེན་ནས་འབྱུང༌། །ཞེས་དང༌། རྩ་རྒྱུད་ལས། བླ་མའི་ཞལ་ལ་མ་བརྟེན་དང༌། །དེ་ཡི་མན་ངག་མ་ཐོབ་པར། །འཁོར་བ་རྒྱ་ཆེ་རྒྱ་མཚོ་ལས། །ཕ་རོལ་ཕྱིན་པར་མི་འགྱུར་རོ། །ཞེས་གསུངས་པ་ལྟར་དཔལ་ལྡན་བླ་མའི་ཡོན་ཏན་དཔག་ཏུ་མེད་པ་རྒྱུད་སྡེ་དུ་མར་གསུངས་སོ། །སྐུའི་ཆ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཞུགས་པར་ཡང་གསུངས་ཏེ། དཔལ་གསང་བ་འདུས་པའི་རྒྱུད་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །དེ་ཡི་གཟུགས་ཀྱི་ཕུང་བོ་ནི། །སངས་རྒྱས་རྣམ་པར་སྣང་མཛད་ཡིན། །ཞེས་སོགས་དང༌། བླ་མ་ལྔ་བཅུ་པ་ལས། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་རྣམས། །དུས་གསུམ་ལ་ནི་མངོན་ཕྱག་འཚལ། །ཞེས་གསུངས་པ་ལྟར་བླ་མ་སངས་རྒྱས་ཉིད་ཡྀན་ལ། ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་རྣམས་འདུས་ཏེ། ཉིན་ལན་གསུམ་མཚན་ལན་གསུམ་དུ་ཕྱག་འཚལ་བར་གསུངས་སོ། །དེས་ན་འཕགས་པའི་དགེ་འདུན་རྒྱ་མཚོའི་མངའ་བདག་ནི་རྡོ་རྗེ་སློབ་དཔོན་ཡིན་ལ་ཐམས་ཅད་ཀྱི་སྔོན་དུ་དད་པ་བྱ་དགོས་ཏེ། ཏ་ལ་ལའི་མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། ། མི་དགེ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་བའི་གྲོང་ཁྱེར་མཚོན་པ་ཡིན། །དད་པས་རྟོག་པ་སེལ་ཞིང་སེམས་དད་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་གཏེར་དང་ནོར་དང་རྐང་བའི་མཆོག །ལག་པ་བཞིན་དུ་དགེ་བའི་སྡུད་རྩ་ཡིན། །དད་པས་ཡོངས་སུ་གཏོང་ལ་དགའ་བར་བྱེད། །དད་པས་རྒྱལ་བའི་ཆོས་ལ་རབ་དགའ་བྱེད། །དད་པས་ཡོན་ཏན་ཡེ་ཤེས་ཁྱད་པར་འཕགས། །སངས་རྒྱས་གོ་འཕང་ཐོབ་ཅིང་ཐོབ་པར་བྱེད། །ཅེས་དང༌། ཆོས་བཅུ་བའི་མདོ་ལས། དད་པ་ཐེག་པའི་མཆོག་ཡིན་ཏེ། །དེས་ནི་འདྲེན་པ་ངེས་པར་འབྱུང༌། །དེ་ཕྱིར་བློ་དང་ལྡན་པའི་མི། །དད་པའི་རྗེས་སུ་འབྲང་ལ་བརྟེན། །དད་པ་མེད་པའི་མི་དག་ལ། །དཀར་བོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། མདོ་སྡེ་རྒྱ་ཆེར་རོལ་བ་ལས། ཀུན་དགའ་བོ་དད་པ་ལ་བརྩོན་པར་གྱིས་ཤིག ཅེས་དང༌། སེང་གེས་ཞུས་པའི་མདོ་ལས། དད་པས་མི་ཁོམ་སྤོང་བར་འགྱུར། །ཞེས་དང༌། འོད་དཔག་མེད་ཞིང་གི་བཀོད་པའི་མདོ་ལས། སངས་རྒྱས་དང་ཆོས་དང་དགེ་འདུན་དང༌། སློབ་དཔོན་དང་མཁན་པོ་དང༌། དགེ་བའི་བཤེས་གཉེན་ལ་གུས་པ་དང་བཅས་པ་སྔོན་དུ་འགྲོའོ། །ཞེས་དང༌། འཕགས་པ་སྡོང་བོ་བཀོད་པའི་མདོ་ལས། དད་པ་ཡྀད་བཞིན་ནོར་བུ་བུམ་པ་བཟང༌། །འདོད་དགུ་འཇོ་བའི་བཞོན་མཚུངས་པ། །བླ་མ་དང་ནི་སངས་རྒྱས་ལ། །དེ་ལྟ་བས་ན་མགུ་བར་བྱ། །སངས་རྒྱས་དད་པས་བསོད་ནམས་གང༌། །སངས་རྒྱས་ཞིང་དུ་སྐྱེ་བར་འགྱུར། །ཞེས་དང༌། འཕགས་པ་ཡན་ལག་མེ་ཏོག་མཆོག་གི་མདོར། སངས་རྒྱས་འཕྲད་ན་ཤིན་ཏུ་དད། །དད་ནས་ཤིན་ཏུ་གུས་པར་འགྱུར། །གུས་པས་ནན་ཏན་བྱེད་པས་ན། །མྱུར་དུ་བྱང་ཆུབ་ཐོབ་པར་འགྱུར། །ཞེས་སོགས་མང་དུ་གསུངས་བའི་ཕྱིར་རོ། །ད་ནི་མོས་གུས་ཇི་ལྟར་བསྒོམ་པའི་ཚུལ་ནི། དངོས་པོའི་མཚན་ཉིད་ཀྱི་དབང་དུ་བྱས་ན། བླ་མ་དེ་སངས་རྒྱས་བྱང་སེམས་ཀྱི་རྣམ་སྤྲུལ་ཡིན་པ་ཡང་སྲིད། དེ་མ་ཡིན་པར་ཐ་མལ་པ་ཡིན་དུ་ཆུག་ཀྱང༌། རྡོ་རྗེ་སློབ་དཔོན་དེའི་སྐུ་གསུང་ཐུགས་ལ་ཡི་དམ་གྱི་ལྷ་རྣམས་རྗེས་སུ་ཞུགས་པའི་ཚུལ་གྱིས་འགྲོ་དོན་མཛད་པ་ཡིན་པས་སངས་རྒྱས་དངོས་དང་ཁྱད་པར་མེད་པ་ལྟ་བུ་ཡིན་ལ། དེ་མཉེས་ན་སངས་རྒྱས་མཉེས། དེ་ལ་སྡིག་བསགས་ན་སངས་རྒྱས་ལ་སྡིག་བསགས་པར་འགྲོ་ལ། དེ་ལ་མཆོད་པ་ཕུལ་བས་སངས་རྒྱས་ཐམས་ཅད་ལ་མཆོད་པའི་ཕྱིར་སློབ་མའི་སྒྲིབ་པ་ཐམས་ཅད་ཟད་པར་འགྱུར་ཏེ། འཇམ་དཔལ་ཞལ་ལུང་ལས། དེ་ལ་བརྙས་བྱེད་སེམས་ཅན་གང༌། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང༌། །ཞེས་དང༌། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་གསུངས་པའི་ཕྱིར། མོས་གུས་བསྒོམ་པའི་ཚུལ་ནི་བླ་མ་དེ་ཉིད་དོན་དངོས་པོ་ལ་སུ་གང་ཡིན་རུང་སོ་སོའི་སྐྱེ་བོའམ། འཕགས་པ་སློབ་པ་ལྟ་བུ་དང༌། དགེ་བའི་བཤེས་གཉེན་ཕལ་བ་སོགས་སུ་བལྟ་བ་མ་ཡིན་པར་སངས་རྒྱས་དངོས་སུ་བསྒོམ་དགོས་དོན་ལ་སངས་རྒྱས་གཅིག་དང་མང་བོ་ཁྱད་མེད་ཀྱང༌། མོས་གུས་འཇུག་ཚུལ་ཁྱད་ཡོད་པས་ཕྱོགས་བཅུ་དུས་གསུམ་ཀྱི་སངས་རྒྱས་ཀུན་འདུས་པའི་ངོ་བོ་ཡིན། དེས་ན་ཆོས་དང་དགེ་འདུན་ཀུན་ཀྱང་ཡིན་པས། བདག་གི་བླ་མ་འདི་ཉིད་དངོས་གནས་ལ་དཀོན་མཆོག་ཀུན་འདུས། བླ་མ་ཉིད་དཀོན་མཆོག་གསུམ། དཀོན་མཆོག་གསུམ་ཉིད་བླ་མ་ཡིན། སངས་རྒྱས་ཡི་དམ་བྱང་སེམས་མཁའ་འགྲོ་ཆོས་སྐྱོང་སོགས་དངོས་སུ་བྱོན་ཀྱང་རུང༌། བདག་ལ་དཔལ་ལྡན་བླ་མས་མཛད་པ་ལས་ལྷག་པོ་མཛད་རྒྱུ་དང་སྟོན་རྒྱུ་མེད། དེ་དག་དངོས་སུ་མཇལ་བའི་སྐལ་བ་མེད་དུས་འདིར། དེ་རྣམས་ཀྱི་མཛད་རྒྱུ་ཐམས་ཅད་བླ་མས་མཛད་པ་ཡིན་པས་བཀའ་དྲིན་རང་ཆེའོ་སྙམ། བླ་མ་སངས་རྒྱས་ཀུན་འདུས་སུ་ཤེས་ནས་ཡོན་ཏན་མཐའ་མེད་པའི་དད་པ་དང༌། བཀའ་དྲིན་ཤིན་ཏུ་ཆེ་བར་ཤེས་པ་གཉིས་འཛོམ་ན་མོས་གུས་ཚུལ་བཞིན་སྒོམ་ལུགས་ཡིན་ནོ། །བཀའ་དྲིན་དྲན་པ་མེད་ན་སྤྱིར་བྱས་པ་མི་གཟོ་ཞིང༌། ངོ་ཚ་ཁྲེལ་མེད་དེ་བྱུར་ཆགས་ཉེས་པ་ཐམས་ཅད་ཀྱི་རྩ་བ་ཡིན། བསོད་ནམས་དང་དཔལ་དང་དགེ་ལེགས་ཐམས་ཅད་ཕྱགས་མ་བཏབ་པ་བཞིན་ཉམས་འགྲོའོ། །དེས་ན་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ་སློབ་མ་དམ་ཚིག་དང་ལྡན་པས་མོས་གུས་དེ་ལྟར་བྱས་ནས་བླ་མ་བསྒོམས་ཤིང་གསོལ་བ་བཏབ་ན་ཐབས་གཞན་མེད་ཀྱང༌། མཆོག་ཐུན་མོང་གི་འདོད་དོན་ཐམས་ཅད་འགྲུབ་པར་འགྱུར་རོ། །དེ་ལྟར་མོས་གུས་སོགས་བྱས་ན་ཕན་ཡོན་དུ་མ་འབྱུང་བར་གསུངས་ཏེ། དགྱེས་པ་རྡོ་རྗེའི་རྒྱུད་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང༌། །བདག་གི་བསོད་ནམས་ལས་ཤེས་བྱ། །ཞེས་དང༌། སྒྱུ་འཕྲུལ་དྲྭ་བ་ལས། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །དེ་བཞིན་གཤེགས་པ་རིན་ཆེན་ཏོག །དེ་ཉིད་རྟག་ཏུ་རྡོ་རྗེ་འཆང༌། །དེ་ཉིད་ཡེ་ཤེས་རྒྱ་མཚོ་སྟེ། །ཡིད་བཞིན་ནོར་བུ་རིན་ཆེན་སྦྱིན། །སློབ་དཔོན་གྱི་ནི་ཡོན་ཏན་བཟུང༌། །སྐྱོན་ནི་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང༌། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང༌། རྡོ་རྗེ་གུར་ལས། སློབ་དཔོན་སྟོན་པར་གྱུར་བ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །ཞེས་དང༌། རྡོ་རྗེ་སེམས་དཔའ་ཇི་ལྟ་བུས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་གཟུང་དམིགས་ནས། །ཕལ་བའི་གཟུགས་སུ་གནས་པའོ། །ཞེས་དང༌། དཔལ་དྲི་མ་མེད་པའི་འོད་ལས། དུས་ཀྱི་འཁོར་ལོའི་རྒྱུད་སྟོན་པ་པོ་རྡོ་རྗེ་སློབ་དཔོན་ནི་བཅོམ་ལྡན་འདས་འཇམ་དཔལ་ཇི་ལྟ་བ་དང་དུས་ཀྱི་འཁོར་ལོ་དང་པོའི་སངས་རྒྱས་ཇི་ལྟ་བ་བཞིན་དུ་ཐར་བ་དོན་དུ་གཉེར་བ་རྣམས་ཀྱིས་ལྟ་བར་བྱའོ། །ཞེས་དང༌། སློབ་དཔོན་ཀླུ་སྒྲུབ་ཀྱི་རིམ་ལྔ་ལས། བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འདོད་ཀྱང་ནི་གྲོལ་བར་འགྱུར། །ཞེས་དང༌། སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་ཀྱིས་ནི་སྡུག་བསྔལ་གྱི། །རྒྱ་མཚོའི་འཇིངས་ལས་སྒྲོལ་བར་འགྱུར། །ཞེས་དང༌། དཔལ་ས་ར་ཧའི་ཞལ་ནས། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་དང༌། ཡེ་ཤེས་གྲུབ་པ་ལས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་འགྲོ་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་པར་སྲིད་མཐར་མིན། །ཞེས་དང༌། མཐུ་སྟོབས་དབང་ཕྱུག་བིརྺ་པས་ཀྱང༌། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང༌། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་པ་ལ་སོགས་པ་སྟེ་དངོས་གྲུབ་ཐམས་ཅད་ཀྱི་རྩ་བ་བླ་མ་ཡིན་པར་གསུང་པའི་ལུང་ཁུངས་མཐའ་ཡས་སོ། །ད་ལྟ་མངོན་སུམ་གྱིས་གྲུབ་པ་ཡང༌། རྩ་བའི་བླ་མ་ལ་དད་པ་མེད་པ་རྣམས་མི་འདོད་པ་དུ་མ་ཐོག་ཏུ་འབབ་པ་དང༌། བླ་མ་གུས་པར་བསྟེན་པ་རྣམས་ལ་བདེ་སྐྱིད་སྙན་གསུམ་རང་ཤུགས་ཀྱིས་འབྱུང་བ་མཐོང་ངོ༌། །གཞན་ཡང་བླ་མ་དམ་པ་རྣམས་ཀྱི་གསུང་ལས་འདི་སྐད་ཅེས། བླ་མ་སངས་རྒྱས་སུ་མཐོང་ན་སངས་རྒྱས་ཀྱི་བྱིན་རླབས་འཇུག བྱང་ཆུབ་སེམས་དཔར་མཐོང་ན་བྱང་ཆུབ་སེམས་དཔའི་བྱིན་རླབས་དང༌། གྲུབ་ཐོབ་ཏུ་མཐོང་ན་གྲུབ་ཐོབ་ཀྱི་བྱིན་རླབས། སོ་སོའི་སྐྱེ་བོའི་དགེ་བའི་བཤེས་གཉེན་དུ་མཐོང་ན་དེ་དང་མཐུན་པར་བྱིན་རླབས་འཇུག་སྟེ། མོས་གུས་མེད་ན་བྱིན་རླབས་ཡེ་མི་འཇུག་པར་ཐམས་ཅད་མཁྱེན་པ་ཏཱ་ར་ནཱ་ཐ་སོགས་ཀྱིས་གསུངས་སོ། །དེ་ལྟར་དད་པའི་ཞིང་ནི་དཔལ་ལྡན་བླ་མ་དམ་པ་ཉིད་དུ་ངེས་པས་སློབ་དཔོན་གྱི་རྣམ་པར་ཐར་བ་བཤད་པར་བྱ་ཞེས་མདོ་རྒྱུད་དུ་མ་ནས་གསུངས་ཏེ། དྲི་མེད་གྲགས་པའི་ཞུས་པའི་མདོ་ལས། རབ་འབྱོར་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར། རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སྦྱིན་པ་བྱིན་ན་བསོད་ནམས་མང་དུ་བསྐྱེད་དམ་རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་བསྩལ་བ། རབ་འབྱོར་གང་ལ་ལ་ཞིག་གིས་བླ་མའི་རྣམ་ཐར་གྱི་ཚིག་བཞི་ཕྱེད་ཙམ་སྟོན་ན་དེ་བས་བསོད་ནམས་མང་དུ་བསྐྱེད་པར་འགྱུར་རོ། །ཞེས་དང༌། གཞོན་ནུ་ལུང་བསྟན་པའི་མདོ་ལས། གཞོན་ནུ་སློབ་དཔོན་གྱི་མཚན་ཉིད་བཤད་པར་བྱའོ། །མཁན་པོའི་ཡོན་ཏན་གྱི་བཤད་པ་ལ་བརྩོན་ཅིག །ཅེས་དང༌། འཕགས་པ་གཎྜི་རྒྱས་པའི་མདོ་ལས། སློབ་དཔོན་མཚན་ཉིད་སུས་བཤད་པ། བསོད་ནམས་མཐའ་ཡས་དཔག་མེད་ཐོབ། །ལྷ་ཡི་བསྲུང་ལ་བར་ཆད་མེད། །དེ་ཕྱིར་བླ་མ་ལ་གུས་ཤིག །ཅེས་དང༌། ཚུལ་ཁྲིམས་དྲི་མེད་བསལ་བའི་མདོ་ལས། ཀུན་དགའ་བོ་ཚུལ་ཁྲིམས་དང་ལྡན་པའི་བྱང་ཆུབ་སེམས་དཔའ་ནི་བླ་མའི་མཚན་ཉིད་ལ་རྟོགས་པར་བྱའོ། །མོས་པར་བྱའོ། །ཞེས་སོགས་མདོ་དུ་མ་དང༌། རྒྱུད་ཡང་སྒྱུ་འཕྲུལ་དྲྭ་བའི་རྒྱུད་ལས། སློབ་དཔོན་མེད་པར་གྱུར་ནས་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཞེས་དང༌། ཡེ་ཤེས་གསལ་བའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་བ་སྟོང་དུ་བསྒོམས་པ་བས། །བླ་མ་དྲན་པའི་བསོད་ནམས་ཆེ། །ཞེས་དང༌། དམ་ཚིག་བཀོད་པའི་རྒྱུད་ལས། རྫོགས་པའི་རིམ་པ་བསྐལ་བའི་བར་དུ་ནི། །འདུ་འཛི་གཡེང་བ་སྤངས་ནས་བསྒོམས་པ་བས། །བླ་མ་སེམས་ཀྱི་དཀྱིལ་དུ་དར་ཅིག་ཤར་བ་ཙམ། །འབུམ་ཕྲག་ཉི་ཤུའི་ཆར་ཡང་མི་ཕོད་དོ། །ཞེས་དང༌། འཇམ་དཔལ་རྩ་རྒྱུད་དུ། སློབ་དཔོན་བླ་མ་མཚན་ཉིད་ལྡན། །སློབ་མས་སློབ་དཔོན་མཐོང་བར་སྤྲོ། །དེ་ལྟ་བུ་ཡིས་རྟག་ཏུ་ནི། །དངོས་གྲུབ་ཡང་དག་འབྱོར་བ་ཉིད། །ཅེས་སོགས་མདོ་རྒྱུད་དུ་མ་ནས་བླ་མ་ལ་དད་མོས་དང་རྣམ་ཐར་བརྗོད་ཅིང་རྗེས་སུ་དྲན་པར་བྱས་ན་ཕན་ཡོན་དཔག་ཏུ་མེད་པ་ཡོད་པར་གསུངས་པས་འདི་རྩོམ་པ་ལ་སྤྲོ་བ་སྐྱེས་པས་ཅུང་ཟད་འབྲི་བར་འཚལ་ལོ། །སྨྲས་པ། རྒྱལ་ཀུན་ཡེ་ཤེས་ཟླ་བའི་ཆ་ཀུན་རྫོགས། །མཚན་ཙམ་དྲན་པས་དངོས་གྲུབ་མཆོག་སྩོལ་བ། །སློབ་དཔོན་ཉིད་ཅེས་མདོ་རྒྱུད་ཐམས་ཅད་ཀྱིས། །ངོ་མཚར་གཏམ་ཚོགས་སྤྲིན་གྱི་རོལ་མོ་སྙན། །བར་སྐབས་ཀྱི་ངལ་གསོ་བའི་ཚིགས་སུ་བཅད་པའོ། །
གཉིས་པ་སྔོན་གྱི་འཁྲུངས་རབས་དངོས་བཤད་པ།
གཉིས་པ་སྔོན་གྱི་འཁྲུངས་རབས་དངོས་བཤད་པ་ནི།
ཇི་སྐད་དུ་རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ལྷུམས་སུ་འཇུག་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་བ་དང༌། ངེས་འབྱུང་དཀའ་བ་སྤྱོད་པ་དང༌། །བྱང་ཆུབ་སྙིང་པོ་གཤེགས་པ་དང༌། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང༌། །མྱ་ངན་འདས་པར་གཤེགས་མཛད་རྣམས༌། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་འཆང་ཆེན་པོ་༧ངག་དབང་བཤད་སྒྲུབ་དཔལ་ནི་བསྐལ་བ་དཔག་ཏུ་མེད་པའི་སྔ་རོལ་ནས་འོག་མིན་སྡུག་པོ་བཀོད་པའི་ཞིང་དུ་ཆོས་སྐུའི་ངོ་བོར་སངས་རྒྱས་ཟིན་ཀྱང་དག་མ་དག་གི་ཞིང་ཁམས་རབ་འབྱམས་སུ་སྤྲུལ་བའི་ཕྲེང་བ་རྡུལ་གྲངས་ལས་འདས་པ་ཡོད་མོད་ཀྱང་བདག་ལྟ་བུའི་ཚུལ་མཐོང་གི་སོ་སོའི་སྐྱེ་བོའི་བརྗོད་བྱའི་ཡུལ་ལས་འདས་ལ། འོན་ཀྱང་ཐུན་མོང་སྣང་ཚོད་ལྟར་ཡོངས་སུ་གྲགས་ཆེ་བ་ལྟར་སྔོན་གྱི་སྐྱེ་བའི་རྣམ་པར་ཐར་བ་ཅུང་ཟད་བརྗོད་ན། དེ་ཡང་རྗེ་བཙུན་བླ་མ་དམ་པ་རང་གིས་འོག་ནས་འབྱུང་བ་བཞིན་མཆོག་གི་སྤྲུལ་སྐུ་རྣམ་གསུམ་གྱི་ཡ་གྱལ་གཏེར་སྟོན་རིག་འཛིན་རྒོད་ལྡེམ་ཅན་གྱི་སྤྲུལ་བ་ཡིན་པར་ཡང་ཡང་གསུངས་བ་དང༌། གཏེར་སྟོན་ལས་རབ་གླིང་བའམ་ཉག་བླ་བསོད་རྒྱལ་གྱིས་རང་ཉིད་ཀྱི་ཡང་སྲིད་དུ་ལུང་བསྟན་པ་ལྟར་བརྗོད་པ་ལ། དང་བོ་རྗེ་བཙུན་དམ་པ་འདི་ཉིད་འོག་མིན་ཆེན་པོ་སྟོན་པ་ཀུན་ཏུ་བཟང་པོའི་ངེས་གསང་ཟབ་མོའི་ཆོས་འཁོར་བསྐོར་བའི་དུས་སུ། དེའི་བཀའ་བསྡུ་མཛད་པ་པོ་སེམས་དཔའ་རྡོ་རྗེ་སྙིང་པོར་འཁྲུངས་བ་དང༌། འོད་སྣང་སྤྲུལ་བའི་ཞིང་ཁམས་སུ་སྤྲུལ་སྐུའི་འཁོར་ལ་གསང་སྔགས་ཀྱི་ཆོས་གསུངས་པའི་སྟོན་པ་གཞོན་ནུ་ཁྱེའུ་ཆུང་ཤེད་ལ་རོལ་བ་ཞེས་བྱ་བར་གྱུར་པ་དང༌། ལྷ་ཡུལ་སྣང་བ་དམ་པའི་ཞིང་དུ་རྫོགས་ཆེན་གྱི་བསྟན་པའི་བདག་པོ་ལྷ་དབང་གི་སྲས་དྭེ་ཝ་བཟང་སྐྱོངས་སུ་འཁྲུངས་པ་དང༌། རྡོ་རྗེ་འཆང་གི་སྤྱན་སྔར་གསང་སྔགས་ཀྱི་བཀའི་བསྡུ་བ་བྱེད་པོ་བྱང་སེམས་ཡེ་ཤེས་སྙིང་པོའི་སྐུར་བཞེངས་པ་དང༌། བདེ་གཤེགས་སྟོན་པ་བཅུ་གཉིས་ཀྱི་སྤྱན་སྔར་ནང་རྒྱུད་ཀྱི་བཀའ་བསྡུ་མཛད་པ་པོ་སེམས་དཔའ་རྡོ་རྗེ་སྙིང་པོ་གཉིས་པའི་སྐུར་སྟོན་པ་དང༌། འཛམ་གླིང་དུ་བདག་ཅག་གི་སྟོན་པ་མཉམ་མེད་ཤྭཀྱའི་དབང་བོའི་དུས་སུ་གཞོན་ནུ་དོན་གྲུབ་ཀྱི་རིམ་གྲོ་བའི་མ་མ་སྐྱེ་དགུའི་བདག་མོར་གྱུར་བ་དང༌། རྒྱལ་སྲས་དགའ་རབ་རྡོ་རྗེ་བྱོན་ཚེ་དེའི་མ་ཡུམ་མཁའ་འགྲོ་བདེ་ལྡན་མའི་སྐུར་འཁྲུངས་པ་དང༌། གཞན་ཡང་རིག་འཛིན་སློབ་དཔོན་དུ་མ་སྐྱེད་པའི་ཡུམ་དུར་ཁྲོད་དུ་རྒྱུ་བའི་ཁྲོ་མོ་རིག་བྱེད་བདེ་མའི་སྐུར་བཞེངས་པ་དང༌། སློབ་དཔོན་འཇམ་དཔལ་བཤེས་གཉེན་གྱི་འཁོར་གྱི་ཐོག་མ་བྲམ་ཟེ་ཡིད་བཞིན་དཔལ་ཞེས་བྱར་གྱུར་ཏེ་སྟོན་འཁོར་མཉེས་པའི་རིམ་གྲོ་བ་མཛད་པ་དང༌། རྒྱལ་བོ་ཨིནྟྲ་བྷོ་དྷི་བྱོན་སྐབས་དེའི་ཆོས་བློན་མཆོག་གི་སྐུར་གྱུར་པ་དང༌། རང་བྱུང་གུ་རུ་པདྨ་དྷ་ན་ཀོ་ཤའི་མཚོ་རུ་འཁྲུངས་ཚེ་ལྷ་ཡུལ་གྱི་བྱང་སེམས་ནམ་མཁའི་སྙིང་པོའི་སྐུར་བཞེངས་ཏེ་ནམ་མཁའི་སྤྲིན་གསེབ་ནས་འཁོར་གྱི་ལྷ་ཚོགས་དུ་མ་བཅས་སྐུ་ཁྲུས་གསོལ་བར་མཛད་པ་དང༌། གུ་རུས་ཨོ་རྒྱན་གྱི་རྒྱལ་སྲིད་བསྐྱངས་ཚེ་དེའི་སྦས་པའི་ནང་འཁོར་བཻ་ཌཱུརྱའི་མདོག་ཅན་ནོར་བུ་འཛིན་པའི་ཆས་ཞུགས་ཀྱི་སེམས་དཔར་གྱུར་པ་དང༌། གུ་རུས་བསིལ་བའི་ཚལ་དུ་བརྟུལ་ཞུགས་ཀྱི་སྤྱོད་པ་མཛད་ཚེ་ལས་བྱེད་ཆོས་འཆད་བདེ་བའི་རྡོ་རྗེ་ཞེས་བྱར་གྱུར་བ་དང༌། གུ་རུ་མ་ལ་ཡ་རུ་བྱོན་སྐབས་གུ་རུས་ཐུགས་རྒྱུད་བསྐུལ་བའི་སྡེ་བརྒྱད་ཀྱི་གཙོ་བོ་ཁྲོ་བོ་དྲག་པོ་གཏུམ་པོའི་སྐུར་བཞེངས་བ་དང༌། གུ་རུས་དུར་ཁྲོད་བརྒྱད་དུ་གསང་སྔགས་ཀྱི་ཆོས་གསུངས་ཚེ་ཆོས་ཀྱི་སྲས་ཤྭཀྱ་མི་ཏྲ་ཞེས་བྱར་གྱུར་བ་དང༌། གུ་རུས་བྲག་དམར་བྱ་ཁྱུང་ཚལ་དུ་ཀུན་དགའ་བོ་ལ་ཆོས་ཞུས་ཚེ་དེ་དང་ལྷན་གཅིག་པའི་གྲོགས་མདོ་སྡེ་ཁོང་ཆུབ་ཉན་ཐོས་ཞི་བའི་སྙིང་བོར་གྱུར་པ་དང༌། གུ་རུས་མ་ར་ཏེ་ཀར་ཉེ་རྒྱུའི་སྤྱོད་པ་མཛད་པའི་ཚེ་ཡིད་འཛིན་ལྷ་མོ་མནྡ་རར་གྱུར་བ་དང༌། གུ་རུས་ཚོགས་སྤྱོད་ཀྱི་བདེ་ཆེན་སྤོར་བའི་ཚུལ་བསྟན་ཚེ་བདུད་རྩི་མ་ད་ནའི་བསྙེན་བསྐུར་འབུལ་བའི་ཆང་ཚོང་མ་བཱི་ན་མོར་གྱུར་བ་དང༌། རྒྱལ་བོ་གཙུག་ལག་འཛིན་གྱིས་ལུགས་གཉིས་དང་མདོ་སྔགས་ཀྱི་གཙུག་ལག་ཟུང་གི་བསྟན་པའི་གཞི་རྩ་འཛུགས་ཚེ་ཡིག་རིས་འདུ་བྱེད་ཀྱི་ཆོས་བློན་ཡེ་ཤེས་གསལ་དུ་གྱུར་བ་དང༌། གཞན་ཡང་གུ་རུ་པདྨའི་ཐུགས་ཟིན་གྱི་ཡུམ་བཙུན་མོ་འོད་འཆང་མར་གྱུར་ནས་གུ་རུའི་ཐུགས་མཉེས་པར་མཛད་པ་དང༌། གུ་རུས་ཨོ་རྒྱན་གྱི་ཡུལ་གྲུ་བཅུ་དྲུག་ཆོས་ཀྱིས་སྐྱོངས་ཚེ་དེའི་ཆོས་བསྐུལ་ཞུ་བ་པོ་དང་བཀའི་བསྡུ་བའི་བྱེད་པོ་རྒྱལ་པོ་བདེ་བའི་འབྱུང་གནས་ཞེས་བྱར་གྱུར་པ་དང༌། རྡོ་རྗེ་གདན་དུ་མུ་སྟེགས་པའི་སྡེ་ཚོགས་བཟློག་པའི་གུ་རུ་སེང་གེ་སྒྲ་སྒྲོགས་ཀྱི་སྐུར་བཞེངས་ཚེ་ངན་སྔགས་ཀྱི་གཏེར་སྒྲོམ་འབུལ་བའི་ཌཱ་ཀི་བདེ་འབྱུང་གཉིས་པར་གྱུར་བ་དང༌། གཞན་ཡང་རྡོ་རྗེ་གདན་གྱི་གནྡྷོ་ལའི་ཞབས་ཏོག་ཞུ་མཁན་གྱི་དེད་དཔོན་ཀ་ཁ་འཛིན་པ་རུ་གྱུར་བ་དང༌། གུ་རུས་བལ་ཡུལ་ཡང་ལེ་ཤོད་དུ་མཆོག་གི་དངོས་གྲུབ་སྒྲུབ་པའི་ཚེ་བར་ཆད་བཟློག་པའི་ཕུར་བའི་རྒྱུད་རྒྱ་གར་ཨོ་རྒྱན་ཡུལ་ནས་སྤྱན་འདྲེན་པ་པོ་བལ་བོ་ཛི་ན་མི་ཏྲ་ཞེས་བྱར་གྱུར་བ་དང༌། གུ་རུ་བོད་ཡུལ་དུ་བྱོན་སྐབས་སུ་ཞང་སྣ་ནམ་པ་རྡོ་རྗེ་བདུད་འཇོམས་ཀྱི་སྐུར་འཁྲུངས་པ་ཡིན་ལ། དེ་ཡང་རུས་སྣ་ནམ་པའི་རིགས་སུ་གཏོགས་པ་སྐུ་གཞོན་ནུའི་དུས་སུ་རྒྱལ་བོ་ཁྲི་སྲོང་གི་ཆོས་བློན་དུ་གྱུར། ཕྱིས་སུ་གུ་རུའི་དངོས་སློབ་དུ་གྱུར། གུ་རུ་པདྨས་གསང་སྔགས་ཀྱི་སྨིན་དབང་རྗེ་འབངས་རྣམས་ལ་གནང་ཚེ་ཇོ་མོ་མཚོ་རྒྱལ་དང་མཉམ་དུ་བྱང་ཕུར་བའི་དཀྱིལ་འཁོར་དུ་རིགས་ཀྱི་མེ་ཏོག་ཕོག་པས་ལས་རིགས་ཀྱི་མཆོག་གི་དངོས་གྲུབ་བརྙེས། གྲུབ་པའི་རྟགས་མཚན་ལ་བསམ་ཡས་ལས་ཡུལ་ཐག་རིང་བའི་སྒྲུབ་གནས་སུ་བཞུགས་ཡོད་པའི་སྐབས་སུ་བསམ་ཡས་རབ་གནས་མཛད་པའི་དུས་ལ་བབས་པར་མཁྱེན་ནས་ཕུར་བུ་བྲག་ལ་གཟིར་བས་བྲག་གས་པའི་སྲུབ་གསང་ཆུང་ངུ་ནས་ཟང་ཐལ་དུ་བསམ་ཡས་སུ་ཕེབས་པ་དང༌། ཧས་པོ་རི་ལ་མེ་ཤོར་སྐབས་ཧས་པོ་རིའི་ཡང་གོང་དུ་བྲག་ལ་ཕུར་བ་འདམ་ལྟར་བཏབ་ནས་མེ་བཟློག་པར་མཛད་པ་དང༌། དུས་ཡུན་ཐུང་ངུ་ནས་གླིང་བཞི་བསྐོར་ནུས་པའི་རྫུ་འཕྲུལ་མངའ་བས་ཆོས་རྒྱལ་དབང་བོ་སྡེས་རྡོ་རྗེ་བདུད་འཇོམས་རླུང་ལྟར་ཐོགས་མེད་ཅེས་བསྔགས་པ་ལྟར་ཡོངས་སུ་གྲགས་པའོ། །གུ་རུ་པདྨ་ལས་སྤྱིར་སྔ་འགྱུར་གསང་སྔགས་བཀའ་མའི་སྨིན་གྲོལ་གྱི་གདམས་དོན་མངོན་གྱུར་མཛད་པ་དང༌། བྱེ་བྲག་རང་གི་སྤྲུལ་པ་རིམ་བྱོན་གྱི་ཟབ་གཏེར་དང༌། སྤྲུལ་བ་དུས་མཉམ་པའི་ཟབ་གཏེར་སོ་སོ་བ་དག་གི་སྨིན་བྱེད་དབང་དང་གྲོལ་བྱེད་ཀྱི་གདམས་པ་རྣམས་ཀྱི་ཚིག་ལྷག་ཆད་དང༌། དོན་ནོར་འཁྲུལ་མེད་པར་རང་དུས་ལས་མི་ཡོལ་བར་སད་པའི་དགོངས་སྨོན་དང་གཏད་རྒྱས་ཐུགས་ཀྱི་དབྱིངས་ཀུན་ཏུ་གཏམ་པར་མཛད་པ་ལགས། བོད་དུ་བསྟན་པ་ཕྱི་དར་གྱི་དུས་སུ་ཁ་ཆེའི་པནྚིཏ་ཤཱཀྱ་ཤྲཱི་བྱོན་ནས་བསྟན་པའི་མེ་རོ་སྟོད་ནས་སློངས་བའི་སྐབས་སུ་ཁྲོ་ཕུ་ལོ་ཙ་བ་བྱམས་པ་དཔལ་ཞེས་མཁས་བཙུན་ཡོན་ཏན་གྱི་དབང་ཕྱུག་ཁ་ཆེ་པཎ་ཆེན་གྱི་དངོས་སློབ་ཏུ་གྱུར་ནས་བསྟན་པའི་བྱ་བ་རྒྱས་པར་མཛད་པ་དང༌། དེའི་ཕྱིས་སུ་གུ་རུའི་ཐུགས་གཏེར་གྱི་མངའ་བདག་རྒྱལ་བོ་ལྟ་བུའི་གཏེར་སྟོན་ལྔའི་ནང་ཚན་རྩོད་མེད་མཆོག་གི་སྤྲུལ་བའི་སྐུ་རྣམ་པ་གསུམ་གྱི་ཡ་གྱལ་ཡིད་བཞིན་ནོར་བུ་ལྟ་བུའི་གཏེར་སྟོན་དུ་གྲགས་པ་རིག་འཛིན་ཆེན་པོ་རྒོད་ཀྱི་ལྡེམ་འཕྲུ་ཅན་དུ་སྐུའི་སྐྱེ་བ་བཞེས། འདི་ཉིད་རྗེ་བཙུན་དམ་པ་ངག་དབང་བཤད་སྒྲུབ་དཔལ་རང་གིས་གསལ་བར་དྲན་ཞིང༌། གྱང་སྤྲུལ་གྱིས་རྗེ་འདི་ཉིད་ལ་ཁྱེད་སུའི་སྤྲུལ་སྐུ་ཡིན་ཞེས་དྲིས་ཚེ་བདག་རིག་འཛིན་རྒོད་ལྡེམ་ཅན་གྱི་རྣམ་འཕྲུལ་ཡིན་ནོ་གསུངས་ལ། གྱང་སྤྲུལ་གྱིས་དེ་དེ་བཞིན་ནོ་ཞེས་གསུངས་པ་དང༌། རྒྱལ་སྲས་པདྨ་རྣམ་རྒྱལ་ལ་དེ་ལྟར་གསུངས་བ་སོགས་རྩོད་མེད་དུ་གྲགས་ཤིང་གྲུབ་ལ། དེས་ན་རིག་འཛིན་རྒོད་ལྡེམ་ཅན་ནམ་རིག་འཛིན་ཆེན་པོ་དངོས་གྲུབ་རྒྱལ་མཚན་ནི། རི་བོ་བཀྲ་བཟང་གི་ཤར་མདུན་བྱང་ཐོ་ཡོལ་ནག་པོའི་ཡུལ་བརྒྱུད་སྣ་མོ་ལུང་གི་གཟིམ་ཁང་དུ་སློབ་དཔོན་བདུད་འདུལ་གྱི་སྲས་སུ་མེ་མོ་གླང་གི་ཟླ་བའི་ཚེས་བཅུ་ལ་མཚན་རྟགས་ཁྱད་པར་ཅན་དང་བཅས་ཏེ་སྐུ་བལྟམས། ལུང་དོན་ལྟར་དགུང་ལོ་བཅུ་གཉིས་པའི་དུས་དབུ་གཙུག་ཏུ་རྒོད་སྒྲོ་གསུམ་དང་ཉེར་བཞིའི་དུས་རྒོད་སྒྲོ་ལྔ་སྐྱེས་པས་རིག་འཛིན་རྒོད་ལྡེམ་ཅན་ཞེས་ཡོངས་སུ་གྲགས། སྐུ་ལ་རྟགས་བཅུ་གསུམ་རྫོགས་པ། སྤྱིར་གཏེར་གནས་གསུམ་ནས་ཁྱད་པར་དུ་འཕགས་པའི་གཏེར་མཛོད་གསུམ་དང༌། གཏེར་ཕྲན་བརྒྱ་རྩའི་ལྡེ་མིག་ཡོད་པ་སྤྱན་དྲངས་ནས་གཏེར་ཚབ་སྦས། བྱེ་བྲག་ཏུ་གཉན་ཡུལ་བྲག་རི་དུག་སྦྲུལ་སྤུངས་འདྲའི་ཟད་ཟད་ལྷ་བྲག་གི་ཕུག་པ་ནས་གཏེར་སྒྲོམ་སྔོན་པོ་གྲུ་བཞི་ནང་ཆོད་སོ་སོར་ཡོད་པ་ནས་མཛོད་ལྔ་འདུས་པའི་ཟབ་གཏེར་བརྡ་རྟགས་བཅོ་བརྒྱད་དམ་མཛོད་ལྔ་རེ་རེ་ལ་ཆོས་ཚན་བརྒྱ་རྩ་རེ་བཞུགས་པས་ཡོངས་དྲིལ་ལྔ་བརྒྱ་ཡན་ལག་བཅས་ཤོག་སེར་གཏན་ལ་ཕབ་ནས་སྐལ་ལྡན་གྱི་གདུལ་བྱ་རྣམས་ལ་སྤེལ་ནས་སྲས་བརྒྱུད་ཡུམ་བརྒྱུད་སློབ་བརྒྱུད་གསུམ་ལས་བྱོན་པའི་ཆོས་རྒྱུད་དེང་སང་བར་དུ་གནས། ཁྱད་པར་བྱང་གཏེར་འདི་ཉིད་བསྟན་པ་སྤེལ་བ། མཐའ་དམག་བཟློག་པ། རིམས་ནད་གཅོད་པ་སོགས་མ་ཚང་བ་མེད་པ་ཡིན་པར་གསུངས་སོ། །དེ་ལྟ་བུའི་མཛད་པ་མཐར་ཕྱིན་ནས་དགུང་ལོ་བདུན་ཅུ་རྩ་གཉིས་པར་ངོ་མཚར་བའི་ལྟས་དུ་མ་དང་བཅས་ཏེ་དགོངས་པ་ཆོས་དབྱིངས་སུ་ཐིམ་པ་ཡིན་ནོ། །དེ་ནས་རིག་འཛིན་ཆེན་པོ་དེའི་སྤྲུལ་བ་ཉེར་ལྔ་སྟོན་པའི་ནང་ཚན་རིག་འཛིན་སྐུ་ཕྲེང་གཉིས་པར་བགྲང་བ་མངའ་རིས་མཆོག་སྤྲུལ་ལེགས་ལྡན་རྡོ་རྗེར་འཁྲུངས་ཏེ། གསང་སྔགས་སྔ་འགྱུར་གྱི་བཀའ་གཏེར་སྤྱིའི་བསྟན་པའི་བདག་པོ་དང༌། ཁྱད་པར་དུ་རང་གཏེར་གྱི་གནས་བསམ་ཡས་འོན་བུ་སྟག་ཚངས་སོགས་ནས་བླ་རྫོགས་ཐུགས་གསུམ་སོགས་ཀྱི་ཟབ་གཏེར་དུ་མ་སྤྱན་དྲངས། གཏེར་ཆེན་རིག་འཛིན་ཆེན་པོ་ཞེས་ཡོངས་སུ་གྲགས་ཏེ་ཨེ་ཝཾ་ལྕོག་སྒར་བསྐྱངས་ནས་བསྟན་པ་ལ་བྱ་བ་རྒྱ་ཆེན་སྒྲུབ་པར་མཛད་པ་ལགས་སོ། །དེའི་རྗེས་རིག་འཛིན་སྐུ་ཕྲེང་གསུམ་པ་རིག་འཛིན་ངག་གི་དབང་བོ་འཁྲུངས་ཏེ་རང་སྣང་དབང་དུ་འདུ་ཞིང་གཞན་སྣང་ཟིལ་གྱིས་གནོན་པའི་མཐུ་སྟོབས་ནུས་པའི་རྩལ་འཆང་སྔ་འགྱུར་བཀའ་གཏེར་ཡོངས་ཀྱི་བསྟན་པའི་བདག་པོར་གྱུར། ཐུབ་བསྟན་རྡོ་རྗེ་བྲག་གི་ཆོས་སྡེ་གསར་འདེབས་བྱས་ནས་གཟུགས་སྐུའི་བཀོད་པ་བསྡུས་སོ། །དེ་ནས་རིག་འཛིན་ཆེན་པོ་སྐུ་ཕྲེང་བཞི་བ་ལྷ་རིགས་གསུམ་ལྡན་རྡོ་རྗེ་འཛིན་དབང་རིག་འཛིན་པདྨ་འཕྲིན་ལས་སུ་སྐྱེ་བ་བཞེས་ནས་ཡོན་ཏན་དུ་མས་བརྒྱན་ཏེ། སྔ་འགྱུར་བསྟན་པ་བཤད་སྒྲུབ་ཟུང་འབྲེལ་གྱི་འཕྲིན་ལས་ཕྱོགས་བཅུར་སྤེལ་ནས་དྲན་དབང་དུ་མའི་གཙུག་རྒྱན་དུ་གྱུར། དམ་པའི་སྐྱེས་མཆོག་རིག་འཛིན་ཆེན་པོ་དེ་ཉིད་ཀྱི་སྐྱེས་སྤྲུལ་གྱི་ཟློས་གར་སླར་ཡང་ལྕགས་མདུད་ཉག་ཡུལ་དུ་སྐྱེ་སྤྲུལ་དང་བོ་སྐལ་བཟང་པདྨ་དབང་ཕྱུག་ཅེས་པ་ཐུབ་བསྟན་རྡོ་རྗེ་བྲག་གི་ཆོས་ཁྲིར་ཕེབས་ནས་རྙིང་བསྟན་སྤྱི་དང་བྱེ་བྲག་རིག་འཛིན་བླ་མའི་བཀའ་གཏེར་གྱི་བསྟན་པ་སྤེལ་བ་དང༌། ཁྱད་པར་དགོངས་གཏེར་ཟབ་མོའི་ཀློང་རྡོལ་ཏེ་བླ་རྫོགས་ཐུགས་གསུམ་གྱི་ཟབ་གཏེར་རྒྱ་མཚོ་ལྟ་བུ་ལ་དབང་སྒྱུར་མཛད་པ་ལགས་སོ། །སྐྱེ་སྤྲུལ་གཉིས་པ་སྙིགས་དུས་ཀྱི་བསྟན་འགྲོའི་གསོ་སྨན་ཆེན་པོ་རིག་འཛིན་ལས་རབ་གླིང་བ་འཕྲིན་ལས་རྩལ་ལམ་ཉག་བླ་བསོད་རྒྱལ་ནི། ཉག་སྟོད་སའི་ཐིག་ལེ་ཞི་བ་ཟེར་བའི་ཡུལ་གྲོང་དེར། ཡབ་ཞི་བ་དར་རྒྱས་ཞེས་པ་དང༌། ཡུམ་ཡེ་ཤེས་ཀྱི་མཁའ་འགྲོ་མ་མི་མོའི་གཟུགས་སུ་བྱོན་པ་ཨོ་རྒྱན་སྒྲོལ་མ་ཞེས་པ་གཉིས་ཀྱི་སྲས་སུ་མེ་འབྲུག་ལོར་སྐུ་འཁྲུངས་པ་ལགས་ཏེ། རང་གཏེར་ཁ་བྱང་གསལ་བའི་ལྡེ་མིག་ལས། རྡོ་རྗེ་བདུད་འཇོམས་སྤྲུལ་བ་མེ་འབྲུག་ལོ༔ ཤེས་རབ་སྙིང་རྗེ་ཆེ་ཞིང་ལས་འཕྲོ་ཅན༔ སྨོན་ལམ་དབང་གིས་མདོ་ཁམས་ཉག་སྟོད་དུ༔ ཕ་མ་འབྲུག་སྤྲེལ་ལོ་བའི་བུ་རུ་འབྱུང༔ ཞེས་དང༌། རྡོ་གྲུབ་ལུང་བསྟན་ལས། སྣ་ནམ་ནམ་སྙིང་སྤྲུལ་བ་ཉག་གི་ཕྱོགས་ནས་འབྱུང༌། །ཞེས་གསུངས་སོ། །དེ་ནས་རེ་ཞིག་ཕའི་བསམ་པ་ལྟར་ཁྱིམ་དུ་བཞུགས། དེ་ནས་རི་ཁྲོད་སྒར་བྱོན་ནས་དེ་ཀའི་སྒྲུབ་བསྟན་གྱི་སྲོག་ཤིང་བླ་མ་མཐའ་ཡས་སམ་བཅོམ་ལྡན་རྡོ་རྗེ་ཞུ་བ་དེའི་ཞབས་སྤྱི་བོར་བླངས་ཏེ་ཐོག་མར་ཀློང་གསལ་རྡོ་རྗེ་སྙིང་པོའི་གཏེར་བྱོན་གྱི་སྔོན་འགྲོའི་ཆོས་ཁྲིད་སོགས་སྨིན་གྲོལ་གྱི་གདམས་པ་དུ་མ་གསན་བསམ་ལྷུར་བཞེས་མཛད། ས་སྦྲུལ་ལོ་ནས་ཤིང་ཁྱིའི་བར་ལོ་ལྔ་དབེན་གནས་དེར་བཞུགས་ནས་སྒྲུབ་པ་ཁོ་ན་ལ་བརྩོན་པར་མཛད། ཤིང་ཁྱིའི་ལོ་དེར་པདྨ་འོད་ཀྱི་རྟེན་བརྟེན་པའི་ལྷ་ཚོགས་གསལ་བར་མཇལ། རྡོ་སྒྲོམ་ལས་ཞི་ཁྲོའི་སྐོར་དུ་མ་ཕབ། དེ་ནས་ཀ༔ཐོག་རྡོ་རྗེ་གདན་དུ་བྱོན་ནས་པདྨ་ཚངས་པའི་དྲ་བ་རིགས་ཀྱི་བདག་པོར་བསྟེན་ནས། བདུད་ཀློང་གི་ཟབ་གཏེར་གྱི་སྨིན་དབང་ལེགས་ཐོབ་དང༌། དགེ་རྩེ་སྤྲུལ་སྐུའི་མདུན་ནས་ལུང་རྣམས་གསན། ཁྱི་ནས་སྟག་ཡོས་བར་ལོ་ལྔར་གཏེར་སྒྲུབ་ཁོ་ན་ལ་བརྩོན། དེའི་རྗེས་ནས་དཔལ་སྤྲུལ་གྱི་མདུན་ནས་ཟབ་ཆོས་དུ་མ་ཞུས་སོ། །མེ་ཁྱིའི་ལོར་དཔལ་བཀྲ་ཤིས་ལྷ་རྩེར་འཇམ་དབྱངས་མཁྱེན་བརྩེའི་དབང་བོའི་མདུན་ནས་ཟབ་ཆོས་དུ་མ་གསན་བསམ་མཛད་དོ། །དགུང་གྲངས་སོ་གཉིས་པར་གུ་རུ་པདྨའི་ཞལ་ལུང་དོན་གྱི་རྣམ་གྲངས་ཉེར་གཅིག་གཏན་ལ་ཕབ་པར་མཛད་ལ། ས་ཕོ་བྱི་བའི་ལོར་རྒྱལ་དབང་ཐུབ་བསྟན་རྒྱ་མཚོའི་བཀའ་གསུང་ལྟར་དབུས་གཙང་དུ་བྱོན་ནས་༧གོང་ས་རྒྱལ་དབང་བཅུ་གསུམ་པ་ཐུབ་བསྟན་རྒྱ་མཚོ་དང་ཕན་ཚུན་ཟབ་ཆོས་དུ་མ་གསུངས་བ་སོགས་བསྟན་འགྲོའི་དོན་རྒྱ་ཆེར་མཛད་པ་དང༌། མདོར་ན་སྐུ་ཚེ་ཐམས་ཅད་དུ་གྲུབ་མཉེས་ཀྱི་སྐྱེས་བུ་དུ་མ་ལས་དབང་ལུང་མན་ངག་མཐའ་ཡས་པ་གསན་ནས་བོད་ཆོལ་ག་གསུམ་གྱི་གནས་མཆོག་རྣམས་སུ་ཟབ་གཏེར་སྣ་ཚོགས་སྤྱན་དྲངས་པ། ཟབ་མོའི་ཆོས་སྣ་ཚོགས་གསུངས་ནས་གདུལ་བྱ་རྣམས་ཐར་བའི་ལམ་བཟང་ལ་བཀོད་དོ། །སྐབས་འདི་ཡས་མས་སུ་ཤར་འཛམ་ཐང་བསམ་འགྲུབ་ནོར་བུའི་གླིང་དུ་ཕེབས་ནས། ཁྱབ་བདག་རྡོ་རྗེ་འཆང་དགེ་སྐོར་བླ་མ་བསྟན་འཛིན་གྲགས་པའི་དྲུང་ནས་དཔལ་དུས་ཀྱི་འཁོར་ལོའི་དབང་ཆེན་སོགས་ལམ་ཁོའི་མཁན་ཆེན་གསང་སྔགས་བསྟན་འཛིན་སོགས་དང་མཉམ་པོར་ནོད། དེ་ནས་གུ་རུ་དྲག་པོའི་དབང་ཆེན་དང༌། སྦྱོར་དྲུག་པ་རྣམས་ལ་སྨིན་ཁྲིད་སོགས་ཉག་བླ་བསོད་རྒྱལ་གྱིས་གནང༌། རོང་བ་བླ་མ་ཀུན་དགའ་རབ་ལྡན་སོགས་ཀྱིས་རྟོགས་འབུལ་བྱས་ནས་ཐུགས་དགྱེས་ཏེ་ཇོ་ནང་གི་ཆོས་བརྒྱུད་འདིའི་བྱིན་རླབས་ལ་སེལ་མ་ཞུགས་ཤིང་བླ་སློབ་ཀྱི་བསྟེན་ཚུལ་མ་ལོག་པས་རྟོགས་པ་མཆོག་ལྡན་གྱི་རྣལ་འབྱོར་བ་ཤ་སྟག་རེད་འདུག་ཅེས་བསྔགས་བརྗོད་གནང་བ་སོགས་ཞིབ་པར་ཆོས་འབྱུང་ཟླ་བའི་སྒྲོན་མེ་ལ་སྤྱན་རས་གཡོ་བར་ཞུ། དགུང་གྲངས་དོན་གཅིག་པ་ཤིང་གླང་ལོར་མགོ་ལོག་གི་གཉན་པོ་གཡུ་རྩེར་གནས་སྒོ་ཞིག་ཕྱེ་བའི་ཆེད་དུ་བྱོན་ནས་ཟླ་བ་གཅིག་ལ་མཚམས་བཞུཊ། ཨ་སྐྱོང་ཀར་མཐུའི་སྲས་མོ་གནས་སྒོ་ཕྱེ་བའི་གྲོགས་ཡིན་པར་གསུངས་ཀྱང་རྟེན་འབྲེལ་མ་འགྲིག དེའི་སྐབས་སུ་ཨ་སྐྱོང་ཡར་ཐང་དགོན་དུ་བྱོན་ནས་རྒྱ་སྤྲུལ་ངག་དབང་བསྟན་འཛིན་ལ་ཁྱེད་ཀྱིས་ཡུམ་བཞེས་ན་བསྟན་འགྲོའི་དོན་ཆེན་གྲུབ་པ་དང༌། བདག་ཀྱང་ལོ་རྗེས་མ་འདིར་བྱོན་ནས་གཏན་བཞུགས་གནང་བར་ཞལ་བཞེས་མཛད། དེ་ནས་རང་ཡུལ་དུ་བྱོན་ནས་གཏེར་འཇུག་མ་རྫོགས་པ་རྣམས་ཀྱང་སླད་མར་སྤྱོད་པའི་དགོངས་སྨོན་དང་འབྲེལ་བར་གཏེར་གནས་སོ་སོར་གཏེར་སྲུང་རྣམས་ལ་གཉེར་བཅོལ་མཛད། དེ་ནས་ཟད་པ་མེ་སྟག་ལོའི་ཧོར་ཟླ་དང་བོ་དཔྱིད་ཟླ་ར་བ་དབོ་ཟླའི་ཚེས་བཅུའི་སྲོད་འཁོར་ལ་ངོ་མཚར་བའི་ལྟས་དང་བཅས་མཛད་པ་ཐ་མའི་གདུལ་བྱ་རྣམས་འདུལ་བའི་སླད་དུ་གཟུགས་སྐུའི་བཀོད་པ་དབྱིངས་སུ་བསྡུས་ཏེ་པདྨ་འོད་ཀྱི་ཞིང་གི་གཙོ་བོ་སྤྲུལ་གཞིའི་ཐུགས་ཀ་རུ་ཐིམ་པས་མྱ་ངན་ལས་འདས་པའི་ཚུལ་གྱི་མཛད་པ་བསྟན་ཏོ། །སྨྲས་པ། ཨེ་མ་དུས་གསུམ་རྒྱལ་བའི་བརྩེ་ཆེན་ལས། སྤྲུལ་བ་ཡང་སྤྲུལ་བྱེ་བའི་རོལ་གར་གྱི། །སྒྱུ་འཕྲུལ་ཕ་མཐའ་བདག་འདྲའི་བློ་ལས་འདས། །མཚན་ཙམ་བརྗོད་པའི་བསོད་ནམས་ཆུ་འཛིན་འཁྲིགས། །སྐལ་ལྡན་གདུལ་བྱའི་སྐྱེད་ཚལ་རབ་ཡངས་པར། །བྱམས་བརྩེའི་དཔྱིད་ཀྱི་ཕོ་ཉས་ཉེར་དྲངས་བའི། །མཁས་གྲུབ་རིག་འཛིན་པད་དཀར་ཚར་དུ་དངར། །བསྟན་འགྲོ་རྐང་དྲུག་གསོས་སུ་གྱུར་འདི་རྨད། །ཞེས་བར་སྐབས་ཀྱི་ཚིགས་སུ་བཅད་པའོ།། །།
གཉིས་པ་ད་ལྟར་བྱུང་བའི་སྤྲུལ་བའི་ཟློས་གར་མཛད་ཚུལ།
གཉིས་པ་ད་ལྟར་བྱུང་བའི་སྤྲུལ་བའི་ཟློས་གར་མཛད་ཚུལ་ལ།
དམ་པ་གང་ཉིད་གཟུགས་སྐུའི་མྱུ་གུ་ཇི་ལྟར་འཁྲུངས་བའི་ཚུལ་དང༌། མཁས་གྲུབ་ཀྱི་སྐྱེས་བུ་དུ་མ་བསྟེན་ནས་ཉམས་རྟོགས་ཀྱི་འབྲས་བཟང་སྨིན་ཚུལ། སྐལ་བཟང་གདུལ་བྱའི་ཚོགས་ལ་ཟབ་ཆོས་ཀྱིས་ཚིམ་པར་མཛད་ནས་བསྟན་འགྲོའི་དོན་སྒྲུབ་པ་དང༌། རེ་ཞིག་ཞིང་འདིར་གདུལ་བྱ་རྫོགས་ནས་གཟུགས་སྐུ་ཆོས་དབྱིངས་སུ་བསྡུ་བའི་རྣམ་པར་ཐར་བ་དང་བཞི།
དང་པོ་ནི་དམ་པ་གང་ཉིད་གཟུགས་སྐུའི་སྨྱུ་གུ་ཇི་ལྟར་འཁྲུངས་བའི་ཚུལ།
དང་པོ་ནི་དམ་པ་གང་ཉིད་གཟུགས་སྐུའི་སྨྱུ་གུ་ཇི་ལྟར་འཁྲུངས་བའི་ཚུལ་ནི།
རྗེ་བཙུན་བྱམས་མགོན་གྱི་བསྟན་བཅོས་རྒྱུད་བླ་མ་ལས། གང་ཞིག་བརྒྱ་བྱིན་རྔ་དང་སྤྲིན་བཞིན་དང༌། །ཚངས་ཉི་རིན་ཆེན་ཡིད་བཞིན་ནོར་རྒྱལ་བཞིན། །སྒྲ་བརྙན་ནམ་མཁའ་ས་བཞིན་སྲིད་པའི་བར། །འབད་མེད་གཞན་དོན་མཛད་དེ་རྣལ་འབྱོར་རིག །ཅེས་དང༌། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །ཞེས་པ་ནས། སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར་རྗེ་བཙུན་དམ་པ་གང་ཉིད་ཐུགས་ཆོས་ཀྱི་དབྱིངས་ལས་མ་གཡོས་པར་བརྩེ་བ་ཐུགས་རྗེ་ཆེན་པོའི་གཞན་དབང་དུ་གྱུར་ནས་སྤྲུལ་བའི་ཟློས་གར་གྱི་རྣམ་འཕྲུལ་མ་འགག་པར་གདུལ་བྱ་འདྲེན་པའི་དཔལ་དུ་ཤར་བ་གཟུགས་སྐུ་མིའི་ཤ་ཚུགས་ཀྱི་རྣམ་པར་སྒྱུ་འཕྲུལ་དྲྭ་བའི་སྐྱེ་བ་བཟུང་བའི་ཡུལ་ནི། གངས་ལྗོངས་ནོར་འཛིན་མཆོག་གི་ཐིག་ལེ་རབ་དཀར་ཀེ་ལ་ཤའི་ས་འཛིན་གྱི་ཕྲེང་བ་ཆུ་ཤེལ་ཞུན་མའི་གངས་རིའི་ར་བས་ཀུན་ནས་འཁྱུད་པ། འཕགས་མཆོག་མིག་མི་འཛུམ་གྱི་གདུལ་ཞིང༌། མདོ་ཁམས་སྨད་ཀྱི་ཆར་གཏོགས་ཨ་མྱེ་རྨ་རྒྱལ་སྤོམ་རའི་ཤར་ཕྱོགས། གཉན་པོ་གཡུ་རྩེའི་ལྷོ་ཕྱོགས། རྡོ་འཛི་སྨྲ་གསུམ་གྱི་ནང་ཚན་སྨྲ་ཀླུང་དལ་གྱིས་འབབ་པའི་སྨྲ་ཁོག་སྟོད་ཀྱི་སར་ཨ་སྐྱོང་ཡར་ཐང་ཞེས་པ་སའི་དགེ་མཚན་བཀྲ་ཤིས་རྟགས་བརྒྱད་ཀྱིས་ཉེ་བར་བརྒྱན་པ། དཔལ་ཨརྱ་ཏཱ་རའི་བྱིན་གྱིས་བརླབས་པའི་གནས། དམ་ཅན་ཆོས་སྐྱོང་སྲུང་མ་ངང་གིས་འདུ་བའི་གནས་མཆོག་དེར། ཡབ་མི་ཆོས་ལ་བློ་མིག་རྒྱས་པ། ལྷ་ཆོས་ལ་གུས་འདུད་ཆེ་བ། ལོངས་སྤྱོད་ཀྱི་འབྱོར་སྒོ་ཡངས་བ། དཔའ་འཛངས་ཀྱི་སྟོབས་རྩལ་རྫོགས་པ། ཞི་རྒྱས་དབང་དྲག་གི་ལས་ལ་དབང་བའི་རིག་པ་འཛིན་པ། རྒྱ་བླ་མ་ངག་དབང་དཀོན་མཆོག་གི་ཡང་སྤྲུལ་ངག་དབང་བསྟན་འཛིན་དང༌། ཡུམ་བུད་མེད་ཀྱི་སྐྱོན་དང་བྲལ་ཞིང་དད་པ་དང་བྱམས་བརྩེ་དང་ལྡན་པའི་ཕྱིར་སྐ་བཟའ་པན་སྒྲོན་གཉིས་ལ་སྲས་སྤྲུལ་སྐུ་ལྔ་འཁྲུངས་བའི་སྲས་ཆེ་བ་ཉིད་དུ། རབ་རྒྱལ་མེ་མོ་ཡོས་ཞེས་པ། སྤྱི་ལོ་༡༩༢༧ལོ། ཕུག་ལུགས་ལྟར་ན་རིགས་ལྡན་མ་འགགས་པ་ཁྲིར་འཁོད་པའི་ལོ་ནག་པ་ཟླ་བའི་ཚེས་བཅོ་ལྔ་ལ་རྗེ་བཙུན་དམ་པ་ངག་དབང་བཤད་སྒྲུབ་དཔལ་བཟང་བོ་མཆོག་གཟུགས་སྐུ་སྒྱུ་འཕྲུལ་གྱི་རོལ་གར་མྱུ་གུ་གསར་བ་མངོན་པར་བཞད་ལ། གང་གི་སྐལ་བཟང་གི་གདུལ་བྱ་རྣམས་སྙིང་གི་མུན་པ་སངས་བྱེད་ཀྱི་མཚན་དཔེའི་ལང་ཚོ་རབ་ཏུ་རྒྱས་པའི་གཟི་འོད་ཀྱིས་དཀར་ཕྱོགས་ཀྱི་ལྷ་སྲུང་རྣམས་ཀྱི་ཡིད་ལ་སིམ་པ་སྟེར་བའི་བདུད་རྩིའི་སྨན་མཆོག་ལེགས་པར་སོན་པར་གྱུར། དམ་པ་དེ་ཡང༌། ཇི་སྐད་དུ། ཆོས་བཅུ་བའི་མདོ་ལས། བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་དང༌། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང༌། །མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་པར་བྱ། །ཞེས་གསུངས་པ་ལྟར་བྱིས་པ་གཞན་དང་མི་འདྲ་པར་མཆོག་གསུམ་ལ་དད་གུས་ལྡན་པ། འབུ་སྲིན་ཕྲ་མོ་ཚུན་ཆད་ལ་བྱམས་བརྩེ་དང་ལྡན་པ། ཉམ་ཐག་མཐོང་བ་ན་སྙིང་རྗེས་སྤྱན་ཆབ་བསིལ་བ། ཆགས་སྡང་མེད་པ། ཟམ་མོའི་ཆོས་ཐོས་པ་ན་མིག་ནས་མཆི་མ་ལྡང་བ། ལུས་ཀྱི་བ་སྤུ་གཡོ་བའི་རྟགས་མཚན་ཁྱད་པར་ཅན་དང་ལྡན་པ་ཞིག་ཡིན་པ་ནི་ཀུན་ལ་རྩོད་མེད་དུ་གྲགས་ཤིང་གྲུབ་ལ། ཆུང་དུས་སུ་གྲུབ་པའི་རྟགས་མཚན་དུ་མ་ཡོད་པར་གྲགས་ཀྱང་ད་ལྟ་ཆ་རྒྱུས་ཇི་བཞིན་ཡོད་པའི་མི་མེད་པས་ན་དེ་ཙམ་ལས་སྤྲོས་པའི་ཁུངས་མ་རྙེད་དོ།། །། སྨྲས་པ། སྲིད་ལས་འདས་ཀྱང་སྔོན་གྱི་སྨོན་ལམ་གྱིས། ། སྲིད་པའི་ཞིང་འདིར་ངོ་མཚར་སྒྱུ་མའི་སྐུ། །སྲིད་པའི་རྟེན་བཟང་ལྷ་ལས་ཕུལ་བྱུང་བ། །སྲིད་འདིར་མཛེས་པའི་གཞོན་ནུའི་མེ་ཏོག་བཞད། །ཅེས་བར་སྐབས་ཀྱི་ཚིགས་སུ་བཅད་པའོ། །
གཉིས་པ་མཁས་གྲུབ་ཀྱི་སྐྱེས་བུ་དུ་མ་བསྟེན་ནས་ཉམས་རྟོགས་ཀྱི་འབྲས་བཟང་སྨིན་ཚུལ།
གཉིས་པ་མཁས་གྲུབ་ཀྱི་སྐྱེས་བུ་དུ་མ་བསྟེན་ནས་ཉམས་རྟོགས་ཀྱི་འབྲས་བཟང་སྨིན་ཚུལ་ནི།
དེ་ནས་དམ་པ་འདི་ཉིད་དགུང་གྲངས་བདུན་པ་བཞེས་ཚེ་རྣམ་དཀར་ལེགས་པའི་དབུ་ཚུགས་པའི་ཚུལ་གྱིས་གསུང་རབ་ཀྱི་སྒྲ་ཚིག་ལ་མི་རྨོངས་པའི་བློ་གྲོས་ཉེ་བར་འཁྲུངས་ཆེད་རང་གི་ཡབ་སྤྲུལ་ངག་དབང་བསྟན་འཛིན་སོགས་ཀྱི་དྲུང་ནས་དབྱངས་དང་གསལ་བྱེད་ཀྱི་འཇུག་པ་ལ་བརྟེན་ནས་ཡི་གེ་བཀླག་ཅིང་རང་ཡུལ་གྱི་སྲོལ་དང་མཐུན་པར་འདོན་ཆ་དུ་མ་ལ་དཀའ་ཚེག་ཆེར་མ་དགོས་པར་མཁྱེན། དེ་ནས། ཇི་སྐད་དུ། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་དང༌། ཚུལ་གནས་ཐོས་དང་བསམ་ལྡན་པའི། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་དགུང་གྲངས་བརྒྱད་པ་ཤིང་ཁྱི་ལོར་གླང་འབུད་དགོན་མདོ་སྔགས་བཤད་སྒྲུབ་གླིང་གི་མཁས་པའི་དབང་ཕྱུག་མཁན་ཆེན་ངག་དབང་བསྟན་འཛིན་བཟང་བོ་མཆོག་གི་དྲུང་ནས་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་རབ་བྱུང་དང་དགེ་ཚུལ་གྱི་སྡོམ་པ་བཞེས་ནས་དགེ་ཚུལ་གྱི་བསླབ་བྱ་རྣམས་གསན་སྦྱང་བྱས། དེ་ནས་བཟུང༌། ཇི་སྐད་དུ། དམ་པས་ཁས་ཆེ་མང་པོ་མི་བྱེད་ཅིང༌། །གལ་ཏེ་དཀའ་བའི་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ཤི་ཡང་གཞན་དུ་བྱེད་པར་མི་འགྱུར་རོ། །ཞེས་པ་ལྟར་ཉེས་ལྟུང་ཕྲ་མོས་ཀྱང་མ་གོས་པར་སྡོམ་པ་མིག་འབྲས་ལྟར་བསྲུངས་བས་ཚུལ་ཁྲིམས་ཀྱི་དྲི་ངད་ཕྱོགས་ཀུན་ཏུ་ཁྱབ་པར་གྱུར། དེ་ནས་དམ་པ་གང་ཉིད་དགུང་གྲངས་བཅོ་ལྔ་བ་བཞེས་ཚེ་རང་གི་ཡབ་རྒྱ་སྤྲུལ་སྐུ་སྙུང་གཞི་དྲག་པོས་ཟིན་ནས་ཤར་འཛམ་ཐང་བསམ་འགྲུབ་ནོར་བུའི་གླིང་དུ་བྱོན་པ་དང་མཉམ་དུ་གཅུང་བསྟན་ནོར་དང་དམ་པ་གང་ཉིད་དང་བཅས་འཛི་ཀར་ཕེབས། དེ་ནས་འཛི་ཀའི་ལྷ་མོ་དར་ཐང་དང་ཉེ་བར་བྱ་ཡུར་ཛམ་ལྷའི་ཆོས་སྡེར་སྐུ་སྤུན་བརྟན་ནོར་དང་རྗེ་བཙུན་དམ་པ་གང་ཉིད་བཅས་བྱོན། ཆོས་སྡེ་དེ་ཉིད་ཀྱི་རྡོ་རྗེ་སློབ་དཔོན་རིགས་བརྒྱའི་ཁྱབ་བདག་རྡོ་རྗེ་འཆང་དངོས་ངག་དབང་བསྟན་པ་རབ་རྒྱས་མཆོག་གིས་མདང་དགོང་རྨི་ལམ་བཟང་བོ་བྱུང་བས་རྟེན་འབྲེལ་ལེགས་གསུངས་ནས་ཐུགས་བརྩེ་བས་རྗེས་སུ་བཟུང༌། དམ་པ་འདི་མ་འོངས་པ་ན་བསྟན་འགྲོའི་དོན་ཆེན་སྒྲུབ་པའི་སྐྱེས་བུ་ཞིག་གྱུར་ངེས་ཀྱི་བཀའ་ལུང་གནང༌། དེ་ནས་གནས་དེར་རྗེ་བཙུན་དམ་པ་ངག་དབང་བསྟན་པ་རབ་རྒྱས་མཆོག་གིས་ཐུགས་བརྩེ་བས་དགྱེས་བཞིན་ལེགས་པར་རྗེས་སུ་བཟུང་བའི་མཛད་ཆེན་གནང་སྟེ་རང་རེ་དཔལ་ལྡན་རྒྱལ་བ་ཇོ་ནང་བའི་མེ་ཏོག་གང་ལ་ཕོག་པའི་ལྷ་སྐལ་དང་བོའི་སངས་རྒྱས་དཔལ་དུས་ཀྱི་འཁོར་ལོའི་གསང་ཆེན་རྡོ་རྗེ་ཐེག་པའི་རིམ་གཉིས་ཟབ་མོའི་ཉེ་ལམ་མཐར་ཐུག་པའི་གསང་ཆེན་ཆོས་ཀྱི་མཛོད་ཀློང་གི་སྒོ་འཕར་ཕྱེ་བར་དགོངས་ཏེ། སྐལ་བ་དང་ལྡན་པའི་སློབ་མར་གཟིགས་ནས། ཐོག་མར་སེམས་རྒྱུད་སྦྱོང་བའི་ཐབས་སྔོན་དུ་འགྲོ་བའི་ཆོས་རྣམ་པ་ལྔའི་དམིགས་ཁྲིད་ལེགས་པར་གསུངས་ཏེ་དམ་པ་གང་གིས་གསན་བསམ་སོགས་བྱས། དེ་ཡང་ཐོག་མར་སྐྱབས་འགྲོ་ནི་ནང་བ་སངས་རྒྱས་པའི་བསྟན་པའི་འཇུག་སྒོ་ཡིན་པས་དེ་རྒྱུད་ལ་སྐྱེས་ན་ནང་བ་སངས་རྒྱས་པའི་གྲལ་དུ་ཆུད་པ་དང་མ་སྐྱེས་ན་ནང་བ་སངས་རྒྱས་པའི་གྲལ་དུ་མི་ཆུད་པར་དགོངས་ནས་སྐྱབས་འགྲོ་ལ་འཇུག དེ་ཡང་ཇི་སྐད་དུ། སྐྱབས་འགྲོའི་ངོ་བོ་ཨི་ཐི་བ། །བདག་ཉིད་ལྷག་པར་འཇིགས་པ་དང༌། །དཀོན་མཆོག་སྐྱོབ་པའི་ནུས་ལྡན་དུ། །ཤེས་ལས་བྱུང་བའི་སྐྱབས་འགྲོ་ལ། །ཐམས་ཅད་མཁྱེན་པ་ཁྱོད་ཉིད་བཞེད། །ཅེས་གསུངས་པ་ལྟར་རང་འཁོར་བའི་སྡུག་བསྔལ་ལ་འཇིགས་པ་དང༌། སྡུག་བསྔལ་དེ་ལས་སྐྱོབ་པའི་ནུས་པ་མཆོག་གསུམ་ལ་ཡོད་པར་ཡིད་ཆེས་པའི་སྐྱབས་འགྲོའི་རྒྱུ་གཉིས་སྔོན་དུ་སོང་བར་བྱས་ནས། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་་འདུན་ནི། །ཐར་བ་འདོད་པ་རྣམས་ཀྱི་སྐྱབས། །ཞེས་པ་ལྟར་འཇིག་རྟེན་པའི་ལྷ་སོགས་ནི་རང་ཉིད་འཁོར་བའི་འཆིང་བ་ལས་མ་གྲོལ་བས་གཞན་ག་ལ་སྐྱཽབ་ནུས། དེས་ན་ཐར་བ་འདོད་པ་རྣམས་ཀྱི་སྐྱབས་ནི་མཆོག་གསུམ་ཉིད་དུ་ངེས་པ་དང༌། དེ་ཡང་མཆོག་གསུམ་གྱི་ཡོན་ཏན་ཤེས་པ། ཁྱད་པར་ཤེས་པ། ཁས་བླངས་པ་སྐྱབས་གནས་གཞན་མི་འཚོལ་བའི་ཆོས་བཞི་ཚང་བའི་སྐྱབས་འགྲོ་རྣམ་དག་སྐྱེ་བར་བྱས་ཏེ། སྐྱབས་འགྲོའི་ངག་ཚིག་དང་ལུས་ཀྱི་ཕྱག་རེ་སྦྲགས་ནས། ཕྱག་གྲངས་འབུམ་ལྷག་དང་བཅས་དཀའ་ངལ་ཁྱད་དུ་བསད་པའི་སྒོ་ནས་ལམ་གྱི་ཡོན་ཏན་ཐམས་ཅད་སྐྱེ་བའི་གཞི་རྩ་ཚུགས་པའི་སྐྱབས་འགྲོ་རྣམ་དག་གིས་རྒྱུད་སྦྱངས་སོ། །དེ་ནས་ཐེག་པ་ཆེན་པོའི་འཇུག་སྒོ་བྱང་ཆུབ་སེམས་བསྐྱེད་རང་རྒྱུད་ལ་ཡོད་ན་རང་ཉིད་ཐེག་ཆེན་པ་དང༌། དེས་ཟིན་པའི་དགེ་རྩ་རྣམས་བླ་མེད་བྱང་ཆུབ་ཀྱི་རྒྱུར་འགྲོ་ལ། སེམས་དེ་མེད་ན་དེ་དག་ལས་ལྡོག་པར་འགྱུར་བར་གཟིགས་ནས་སེམས་བསྐྱེད་བསྒོམ་བཟླས་ལ་འཇུག དེ་ཡང༌། ཇི་སྐད་དུ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང༌། ཐེག་པ་ཆེན་པོ་མདོ་སྡེ་རྒྱན་ལས། བརྟན་པ་རྣམས་ཀྱི་སྨོན་ལམ་ནི། སེམས་པ་འདུན་དང་བཅས་པ་སྟེ། །ཞེས་གསུངས་པ་ལྟར་རྒྱལ་བོ་ལྟ་བུའི་སེམས་བསྐྱེད་སེམས་ཅན་གཞན་དོན་དུ་བླ་མེད་བྱང་ཆུབ་ཐོབ་འདོད་ཀྱི་འདུན་པ་བཅོས་མིན་བསྐྱེད་པ་དང༌། སེམས་བསྐྱེད་དེ་ལ་ཡང༌། རྒྱལ་སྲས་ཞི་བ་ལྷས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་པར་བྱ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་པར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པ་ལྟར་སྨོན་འཇུག་གི་སེམས་ལ་མྱོང་བ་ཐོན་པ་དང༌། མདོ་སྡེ་རྒྱན་ལས། ཉེས་པ་འདི་ཀུན་བྱམས་སོགས་ལ། །ལེགས་པར་གནས་ལ་མི་འབྱུང་སྟེ། །ཉོན་མོངས་ཅན་མིན་སེམས་ཅན་གྱི། །དོན་དུ་འཁོར་བ་ཡོངས་མི་གཏོང༌། །ཞེས་པ་ལྟར་སེམས་བསྐྱེད་མ་སྐྱེས་པ་སྐྱེ་བའི་རྒྱུ་དང༌། སྐྱེས་པ་བརྟན་པར་བྱེད་པ་དང༌། འཕེལ་བར་བྱེད་པའི་ཐབས་ལ་ཚད་མེད་བཞི་སེམས་བསྐྱེད་དང་སྦྲགས་ནས་དམ་པ་གོང་མའི་ཕྱག་བཞེས་ལྟར་བསྒོམས། དེ་ཕན་ཆད་དུ། ཇི་སྐད་དུ། སྐྱེས་བུ་དམ་པ་ཁུར་ལྕི་ཁུར་བ་དག །ཉམ་ངའི་གནས་སུ་ནམ་ཡང་འདོར་མི་སྲིད། །ཅེས་གསུངས་པ་བཞིན་གཞན་དོན་ཁོ་ན་སྒྲུབ་པ་ལ་གཞོལ་བ་ཡིན་ནོ། །དེ་ནས་རིམ་གཉིས་ཀྱི་རྣལ་འབྱོར་གྱི་ལམ་རྒྱུད་ལ་སྐྱེ་བ་ལ་གེགས་སུ་གྱུར་བའི་ཉེས་ལྟུང་གི་དྲི་མ་དག་སྦྱོང་བའི་ཐབས་དཔལ་ཧེ་རུ་ཀ་རྡོ་རྗེ་སེམས་དཔའི་ཡི་གེ་བརྒྱ་བའི་བསྒོམ་བཟླས་ཀྱི་དམིགས་ཁྲིད་ལེགས་པར་བྱང་ཆུབ་པར་བྱས་ཏེ། རིགས་ཀུན་འདུས་པའི་ངོ་བོ་རྡོ་རྗེ་སེམས་དཔའ་སྤྱི་བོར་བསྒོམས་ཞིང༌། ཡི་གེ་བརྒྱ་བའི་སྔགས་བཟླས་པ་དང༌། བདུད་རྩི་འབེབས་སྦྱོང་དང༌། མཐོལ་བཤགས་བྱས་ལ། མཐོལ་བཤགས་དེ་ཡང་གཉེན་པོ་སྟོབས་བཞི་ཚང་བ་ཞིག་དགོས་ཏེ། ཆོས་བཞི་བསྟན་པའི་མདོ་ལས། བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན་འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང༌། གཉེན་པོ་ཀུན་ཏུ་སྤྱོད་པ་དང༌། ཉེས་པ་ལས་ལྡོག་པའི་སྟོབས་དང༌། རྟེན་གྱི་སྟོབས་སོ། །ཞེས་གསུངས་པ་ལྟར་སྔར་བྱས་ཀྱི་སྡིག་པ་ལ་དུག་འཐུང་བ་ལྟ་བུའི་འགྱོད་སེམས་དྲག་པོ་སུན་འབྱིན་པའི་སྟོབས་དང༌། ཕྱིན་ཆད་སྲོག་ལ་བབས་ཀྱང་མི་བགྱིད་པའི་སྡོམ་སེམས་དྲག་པོ་སླར་ལྡོག་པའི་སྟོབས་དང༌། སྐྱབས་སུ་འགྲོ་བ་སེམས་བསྐྱེད་པ་རང་རྒྱུད་ཀྱི་རྟེན་དང༌། བཤགས་ཡུལ་གྱི་རྟེན་གཉིས་རྟེན་གྱི་སྟོབས་དང་སྡིག་པའི་ལས་བྱས་པ་དེ་དང་དེའི་གཉེན་པོར་ཆེད་དུ་དམིགས་ནས་སྒྲུབ་པའི་དགེ་བ་རྣམས་གཉེན་པོ་ཀུན་ཏུ་སྤྱོད་པ་ཡིན་ལ། དེ་ལྟ་བུའི་སྟོབས་བཞི་ཚང་བའི་སྒོ་ནས་ཧེ་རུ་ཀའི་ཡིག་བརྒྱ་འབུམ་ལྷག་གིས་སྒྲིབ་པ་སྦྱོང་བའི་ཐབས་སྒོ་དུ་མ་ནས་འབད་པར་བྱས། རྟགས་མཚན་ཡང་ཁྲུས་བྱས་པ་དང༌། ཆུ་བོ་ཆེན་པོ་ལས་བརྒལ་བ་དང༌། ལུས་ལས་རྣག་ཁྲག་ཟག་པ་སོགས་ཉམས་ཀྱི་ཚུལ་དུ་ཤར་བ་བྱུང་ངོ། །དེ་ནས་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བར། །ཞེས་གསུངས་པ་ལྟར་རྒྱུ་ཚོགས་མ་ཚང་ན་འབྲས་བུ་མི་སྐྱེ་ལ་ཚང་ན་སྐྱེ་བས་རིམ་གཉིས་ཀྱི་རྣམ་འབྱོར་སྐྱེ་བའི་རྒྱུ་ཚོགས་ཚང་བ་ལ་ཚོགས་བསགས་དགོས་པར་གཟིགས་ནས་རིམ་གཉིས་ཀྱི་ཡེ་ཤེས་སྐྱེ་བའི་རྒྱུ་མཎྜལ་གྱི་ཚོགས་བསགས་ཏེ། དེ་ཡང་རྣམ་དཀར་དགེ་ཚོགས་ཉེ་བར་བསྐྲུན་ཆེད་དཔལ་དུས་ཀྱི་འཁོར་ལོའི་རྒྱུད་ལས་བསྟན་པའི་འཇིག་རྟེན་ཁམས་ཀྱི་རྣམས་བཞག་རྣམས་ལ་མཁས་པར་བྱས་ནས་རི་རབ་གླིང་བཞི་སོགས་ལྷ་མིའི་དཔལ་འབྱོར་མ་ཚང་བ་མེད་པའི་ཡིད་སྤྲུལ་དང༌། འབྲུ་སྣ་སོགས་དངོས་སུ་འབྱོར་བའི་མཆོད་པ་སོགས་ཀུན་ཏུ་བཟང་བོའི་མཆོད་པ་དེ་ཉིད་མཆོད་ཡུལ་བླ་མ་ཡི་དམ་སངས་རྒྱས་ཆོས་ཚོགས་སོགས་ལ་འབུལ་བ་སོགས་མདོར་ན། རྒྱན་ལས། བྱང་ཆུབ་སེམས་དཔའ་རྣམས་ཀྱི་ཚོགས། །བསོད་ནམས་ཡེ་ཤེས་མཚུངས་པ་མེད། །གཅིག་གིས་འཁོར་བར་མངོན་མཐོ་བྱེད། །གཞན་གྱི་ཉོན་མོངས་མེད་པར་འཁོར། །སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །རྒྱུན་དུ་སྒོམ་པ་ཐོབ་ནས་ནི། །དགེ་བ་ཡང་ནས་ཡང་དུ་སྒྲུབ། །བསྟན་པའི་ཚོགས་གང་ཡིན་པ་དེ། །དོན་ཀུན་སྒྲུབ་པར་བྱེད་པའང་ཡིན། །ཞེས་གསུངས་པ་ལྟར་སྒོ་དུ་མ་ནས་ཚོགས་བསགས་ཏེ་ཐུགས་དགྱེས་པ་བསྐྱེད་པའི་ལེགས་བྱས་མི་དམན་པའི་བསོད་ནམས་ཀྱི་ཚོགས་ཆེན་བསགས་པའི་མཆོད་ཚིག་ངག་འདོན་དམིགས་གནད་དང་བཅས་དེང་དུས་ཕྱག་ལེན་ལྟར་ཞག་བདུན་ཕྲག་གསུམ་ལྷག་ལ་གསང་ཆེན་ལམ་གྱི་མངོན་རྟོགས་ལེགས་པར་འཁྲུང་བྱེད་ཀྱི་དགེ་རྩ་བསྐྲུན་པར་བྱས་སོ། །དེ་ནས་བྱིན་རླབས་ཀྱི་རྩ་བ་བླ་མའི་རྣལ་འབྱོར་ཉིད་ལམ་རིམ་གཉིས་ཀྱི་ཡེ་ཤེས་ཉེ་བར་སྐྱེད་བྱེད་ཡིན་པར་ཐུགས་ལ་དགོངས་ནས་བླ་མའི་རྣལ་འབྱོར་གྱི་དམིགས་པའི་རིམ་པ་ཚུལ་བཞིན་དུ་བསླབས་ཏེ། ཇི་སྐད་དུ། རྗེ་བཙུན་ཏཱ་ར་ནཱ་ཐའི་ཞལ་སྔ་ནས། རྡོ་རྗེ་སློབ་དཔོན་མཚན་ཉིད་དང་ལྡན་པ་ལ། སློབ་མ་དམ་ཚིག་དང་ལྡན་པས་མོས་གུས་དེ་ལྟ་བུའི་སྒོ་ནས་བླ་མ་བསྒོམས་ཤིང་གསོལ་བ་བཏབ་ན་ཐབས་གཞན་མེད་ཀྱང༌། མཆོག་ཐུན་མོང་གི་འདོད་དོན་ཐམས་ཅད་འགྲུབ་པར་འགྱུར་བ་ཡིན་ནོ། །ཞེས་གསུངས་པ་བཞིན་བཀའ་དྲིན་གསུམ་ལྡན་གྱི་སྔགས་ཀྱི་རྡོ་རྗེ་སློབ་དཔོན་ཉིད། བླ་མ་ཡི་དམ་སངས་རྒྱས་བྱང་སེམས་ཆོས་ཚོགས་མཁའ་འགྲོ་ཆོས་སྐྱོང་ཀུན་འདུས་པའི་བདག་ཉིད་དུ་མོས་ནས་བྱིན་རླབས་དངོས་སུ་འབེབས་བྱེད་དབང་བཞི་བླངས། སྒྲིབ་བཞི་དག་པར་བྱེད་པ་དང༌། འབྲས་བུ་སྐུ་བཞི་ཐོབ་པར་བྱེད་པའི་དམིགས་པའི་གནད་དང་མ་བྲལ་བར། བླ་མ་སངས་རྒྱས་དངོས་མཐོང་གི་གུས་འདུན་ཉམས་པ་མེད་པའི་ཟབ་ལམ་བླ་མའི་རྣལ་འབྱོར་འདོན་སྒོམ་སྦྲགས་མའི་སྒོ་ནས་དེང་སང་དམ་པ་གོང་མའི་ཕྱག་བཞེས་ལྟར་ཞག་བདུན་ཕྲག་གསུམ་ལྷག་ལ་ལག་ལེན་གནད་སྨིན་བགྱིས་ཏེ། ཐུན་མོང་གི་སྔོན་འགྲོ་འབུམ་ལྔ་དམ་པ་གོང་མའི་ཕྱག་བཞེས་ལྟར་གུས་སྦྱོར་དང་རྟག་སྦྱོར་གྱི་བརྩོན་འགྲུས་ཀྱིས་ཉམས་ལེན་གནད་དུ་འགྲོ་བར་མཛད། གྲུབ་འབྲས་ཀྱང་ཉམས་དང་རྨི་ལམ་གྱི་རྟགས་མཚན་དུ་མ་ཤར་བ་ཡིན་ནོ། །དེ་ནས་དབང་གོང་མ་གསུམ་གྱིས་སེམས་རྒྱུད་ལ་རྫོགས་རིམ་གྱི་ཡེ་ཤེས་སྐྱེ་རུང་གི་ས་བོན་ལེགས་པར་བཞག་ཀྱང་བསྐྱེད་རིམ་གྱིས་ཀྱང་རྫོགས་རིམ་སྐྱེ་རུང་གི་ནུས་པ་གསོས་བཏབ་ནས་ནུས་པ་མཐུ་ཅན་དུ་མ་བྱས་པར་རྫོགས་རིམ་གྱི་ལམ་དངོས་སྐྱེ་བ་མེད་པས་ན། རྫོགས་རིམ་གྱི་ཐུན་མོང་མ་ཡིན་པའི་སྔོན་འགྲོ་ལ་མོས་སྒོམ་བསྐྱེད་རིམ་གྱི་ལྷའི་རྣལ་འབྱོར་བསྡུས་པ་དཔལ་དུས་ཀྱི་འཁོར་ལོ་ལྷན་སྐྱེས་ཀྱི་རྣལ་འབྱོར་བཟླས་པ་དང་བཅས་ཀྱི་དམིགས་ཁྲིད་བླ་མས་ཚུལ་ཇི་ལྟར་གདམས་པ་དེའི་དོན་ངེས་པར་བྱས་ནས། བསྐྱེད་རིམ་གྱི་སྤང་བྱའི་གཙོ་བོ་ཡང༌། རྡོ་རྗེ་གུར་གྱི་རྒྱུད་ལས། ཐ་མལ་རྣམ་པ་གཞོམ་དོན་དུ། །ཡང་དག་བསྒོམ་པ་རབ་བསྒྲགས་བགྱི། །ཞེས་གསུངས་པ་ལྟར་སྣོད་བཅུད་ཐ་མལ་གྱི་སྣང་ཞེན་སྟོང་བའི་དབྱིངས་སུ་སྦྱངས་ཏེ་རང་གི་ལུས་ངག་ཡིད་གསུམ་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཀྱི་རྣམ་པར་བསྐྱེད་ནས་དུས་འཁོར་གྱི་རྟེན་དང་བརྟེན་པའི་སྙིང་པོ་རྣམ་བཅུ་དབང་ལྡན་གྱི་སྔགས་བྱེ་བ་བཟླས་ནས། མོས་སྒོམ་དག་པ་ལྷའི་གསལ་སྣང་སྔགས་བླ་མེད་ཀྱི་དག་རྫོགས་སྨིན་གསུམ་གྱིས་གནད་ཚང་བའི་སྒོ་ནས་རྫོགས་རིམ་གྱི་ལམ་སྐྱེ་བའི་གཞི་རྟེན་བསྐྱེད་པའི་རིམ་པའི་རྣམ་འབྱོར་ལ་བརྩོན་པས་དག་གསལ་ལྷའི་ང་རྒྱལ་གསུམ་ལ་ཆེས་བརྟན་པ་ཐོབ་ཅིང་ལྷའི་གསལ་སྣང་ལ་ཐུགས་ངེས་ཆེན་པོ་སྐྱེས་ཏེ་རྫོགས་རིམ་གྱི་ཡེ་ཤེས་སྐྱེ་བའི་ནུས་པ་ཁྱད་པར་ཅན་བཞག་པར་བྱས་སོ། །དེ་ནས་རྗེ་བཙུན་དཔལ་ལྡན་བླ་མ་ངག་དབང་བསྟན་པ་རབ་རྒྱས་མཆོག་གིས་ཡེ་ཤེས་ཀྱི་དཀྱིལ་འཁོར་ཉེ་བར་བཞེངས་ཏེ་སློབ་མ་དམ་པ་གང་ལ་རྫོགས་རིམ་གྱི་ཡེ་ཤེས་སྨིན་བྱེད་ཀྱི་ཐབས་མཆོག་གཟུགས་བརྙན་གྱི་དཀྱིལ་འཁོར་དུ་བྱིན་རླབས་འབེབས་པ་དང་བཅས་ཏེ་མཆོག་དབང་གོང་མ་བཞི་ཡོངས་རྫོགས་བསྐུར་བས་རྡོ་རྗེ་བཞིའི་ཡེ་ཤེས་བསྐྱེད་པའི་བག་ཆགས་ཁྱད་པར་ཅན་བཞག དེ་ནས་སྤྲོས་བྲལ་རྣམ་པར་མི་རྟོག་པའི་གནས་ལུགས་སྒོམ་པའི་མན་ངག་བྱིན་རླབས་འབེབས་པས་སློབ་མའི་རྒྱུད་བྱིན་གྱིས་བརླབས་ཏེ། ཇི་སྐད་དུ། ལས་དང་པོ་ཡི་གང་ཟག་གིས། །ལུས་དབེན་པ་ལ་མ་བརྟེན་པར། །སེམས་དབེན་རྙེད་པར་མི་འགྱུར་བས། །འདྲིས་སྤངས་དབེན་པར་གནས་པར་བྱ། །ཞེས་པ་ལྟར་མུན་ཁང་ལ་ལུས་བྱེད་བཅིངས་དམ་པོ་རྫོགས་རིམ་གྱི་ཐུན་མོང་མ་ཡིན་པའི་ཉེར་བསྡོགས་དབེན་པ་གསུམ་སྟེ་ལུས་ངག་ཡིད་གསུམ་ཐ་མལ་གྱི་རྣམ་པར་རྟོག་པས་དབེན་པའམ་ལུས་བྱ་བྱེད་ཀྱིས་དབེན་པ། ངག་སྨྲ་བརྗོད་ཀྱིས་དབེན་པ། སེམས་རྣམ་རྟོག་གིས་དབེན་པའི་རྣམ་འབྱོར་ལ་ཉམས་ལེན་གནད་དུ་བསྣུན་ངེས་ཀྱི་སྒོ་ནས་ཞག་བདུན་ཅུ་ཙམ་གྱི་དུས་འདའ་བར་མཛད་ལ། འོད་གསལ་སེམས་ཀྱི་རང་ངོ་ཇི་བཞིན་འཕྲོད་ཅིང་སྣང་བའི་འཆར་སྒོ་ལ་སྟོང་གཟུགས་ཀྱི་སྣང་བརྙན་སྣ་ཚོགས་པ་དང་བཅས་ཏེ་གཡོ་བའི་ཉམས། ཐོབ་པའི་ཉམས། གོམས་པའི་ཉམས། བརྟན་པའི་ཉམས། མཐར་ཕྱིན་པའི་ཉམས་རྣམས་རིམ་གྱིས་མངོན་དུ་བྱས་ནས་མི་རྟོག་ཡེ་ཤེས་ཀྱི་རང་མདངས་ཀྱི་ཆ་མངོན་དུ་བྱས་སོ། །དེ་ནས་རྫོགས་རིམ་གྱི་དངོས་གཞི་ལ། དུས་འཁོར་རྩ་རྒྱུད་ལས། སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་པ་ལྟར་སྦྱོར་བ་ཡན་ལག་དྲུག་ལས་སོར་སྡུད་ཀྱི་རྣལ་འབྱོར་སྒོམ་པའི་མན་ངག་ལེགས་པར་གསན་ཏེ། རྒྱུད་ལས༌། སོ་སོར་སྡུད་པ་ལུས་ལ་ཡུལ་དང་ཡུལ་ཅན་བཅུ་པོ་རྣམས་ནི་རབ་ཏུ་འཇུག་པ་མེད་པའོ། །ཞེས་དང༌། ཇི་སྐད་དུ། མི་གཡོ་བ་ནི་གསུམ་ལྡན་གྱིས། །དྷཱུ་ཏཱིར་རླུང་བཅུ་ཆུད་གྱུར་པས། །ཕྱི་ནང་རྟོག་འགགས་རྟགས་བཅུ་འབྱུང༌། །སོ་སོར་གཅོད་པའི་ཡན་ལག་ཡིན། །ཞེས་གསུངས་པ་བཞིན་ལུས་གནད་དང་སེམས་གནད་རྒྱུད་ལས་བསྟན་པ་བཞིན་དུ་བསམ་མེད་ཀྱི་རྣལ་འབྱོར་དང༌། རྩེ་གཅིག་པའི་རྣལ་འབྱོར་དང༌། རང་གྲོལ་གྱི་རྣལ་འབྱོར་དང༌། རྩོལ་བྲལ་གྱི་རྣལ་འབྱོར་སོགས་ཉིན་མཚན་གྱི་རྣལ་འབྱོར་ཟླ་བ་ལྔའི་ཡུན་ཚད་དུ་བསྒོམ་པ་ལ་བརྟེན་ནས། རྒྱུད་ཕྱི་མ་ལས། མཚན་མོ་དུ་བ་ལ་སོགས་རྣལ་འབྱོར་སླར་ཡང་ཉིན་མོ་ནམ་མཁའ་ལ་ནི་འབར་བ་ལ་སོགས་ཀྱང༌། །ཞེས་དང༌། བསྡུས་རྒྱུད་ལས། སྟོང་བ་ལ་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉིད་དང་མར་མེ་དང༌། །འབར་བ་དང་ནི་ཟླ་བ་ཉི་མ་རྡོ་རྗེ་རྣམས་དང་མཆོག་གི་ཆ་དང་ཐིག་ལེ་མཐོང་བར་འགྱུར། །ཞེས་རྒྱུད་ལས་བསྟན་པ་ལྟར་སྟོང་གཟུགས་འོད་གསལ་གྱི་རྟགས་བཅུ་ནུས་མ་བཅུའི་ངོ་བོར་ཤར་ཏེ་ཉམས་དང་འོད་གསལ་གྱི་རྟོགས་པ་དབྱར་མཚོ་ལྟར་རྒྱས། དེ་དུས་སུ་ཉིན་ཞིག་ལ་ཉམ་ཐག་གི་སེམས་ཅན་ཞིག་མཐོང་བའི་རྐྱེན་བྱས་ནས་རྗེ་བཙུན་བླ་མ་དམ་པ་འདི་ལ་འགྲོ་བ་རྣམས་མས་བུ་ལ་བརྩེ་བ་ལྟར་སྙིང་རྗེ་ཚད་མེད་ཞིག་སྐྱེས་ནས་སྤྱན་ཆབ་ཡུན་རིང་དུ་བསིལ། དེ་དཔལ་ལྡན་བླ་མ་ངག་དབང་བསྟན་པ་རབ་རྒྱས་ཀྱིས་གཟིགས་ནས་སློབ་ཚོགས་རྣམས་ལ། དཔལ་ལྡན་དུས་ཀྱི་འཁོར་ལོའི་རྒྱུད་ལས། སྟོང་ཉིད་སྙིང་རྗེའི་བདག་ཉིད་ཅན། ཞེས་གསུངས་པ་ལྟར་དོན་དམ་རང་བྱུང་འོད་གསལ་བའི་རྣམ་ཀུན་མཆོག་ལྡན་གྱི་ཤེས་རབ་སྟོང་བ་ཉིད་དང་ཐབས་བདེ་བ་ཆེན་པོའི་སྙིང་རྗེ་གཉིས་དབྱེར་མེད་ཟུང་འཇུག་སྟོང་ཉིད་རྗེའི་སྙིང་བོ་ཅན་སོགས་ཡིན་པར་གསལ་བར་གསུངས་སོ། །ཡང་དམ་པ་གང་ཉིད་ཐུན་གྱི་སྐབས་སུ་མུན་ཆུང་ནང་དུ་ཉིན་དུ་མ་ལ་འོད་གསལ་ཉམས་ཀྱི་སྣང་བ་ལ་བུད་མེད་མཛེས་མ་ཞིག་ཤར་འདུག་པས་རིགས་བདག་ངག་དབང་བསྟན་པ་རབ་རྒྱས་ལ་ཞུས་པས་ཁོང་གི་ཞལ་ནས་དེ་ནི་ཚེ་རིང་མ་ཡིན་པས་ཉིད་ཀྱིས་མཆོད་གསོལ་གྱིས་དང་རྗེ་བཙུན་མི་ལ་རས་པ་བཞིན་ཆོས་མཐུན་བྱང་ཆུབ་སྒྲུབ་པའི་གྲོགས་མཛད་པར་འགྱུར་ཞེས་བཀའ་ལུང་གསུངས་པས། དམ་པ་གང་གིས་ཚེ་རིང་མའི་གསོལ་མཆོད་བསྡུས་པ་ཞིག་རྒྱུན་དུ་གསུངས་བ་ཡིན་ནོ། །དམ་པ་གང་གི་ཡབ་སྙུང་གཞི་ལས་མ་ཐར་བས་རྐྱེན་གྱིས་སོར་སྡུད་གྱི་རྗེས་ནས་རང་ཡུལ་དུ་བྱོན་དགོས་བྱུང༌། རྗེ་བཙུན་དམ་པ་གང་ཉིད་རང་ཡུལ་བྱོན་ཁར་ཆོས་རྣམས་བདེན་སྟོང་སྒྱུ་མ་ལྟ་བུར་རྟོགས་པ་སོགས་འོད་གསལ་ཉམས་ཀྱི་རྟོགས་པ་བླ་མ་དམ་པ་གང་ཉིད་ལ་ཞུས་པས་བླ་མའི་ཐུགས་མཉེས་པའི་མཆོད་སྤྲིན་དུ་གྱུར། དམ་པ་འདི་ཉིད་ཀྱིས་རྗེ་བཙུན་ངག་དབང་བསྟན་པ་རབ་རྒྱས་ཀྱི་ཞབས་སྤྱི་བོར་བཀོད་དེ་གསོལ་བ་ལན་བརྒྱར་བཏབ་ནས་བསྟན་འགྲོའི་དོན་གསུང་གླེང་དུ་མ་གནང་ནས་རང་ཡུལ་ལ་ཕེབས་སོ། །དེ་ནས་རབ་རྒྱལ་ཆུ་རྟ་ལོར་ཡབ་རྒྱ་སྤྲུལ་སྐུ་ངག་དབང་བསྟན་འཛིན་སྐུ་མྱ་ངན་ལས་འདས་པའི་ཚུལ་བསྟན་པ་ཡིན་ལ། ལོ་དེའི་སྟོན་ཁར་རྩ་བའི་གདན་ས་ཨ་སྐྱོང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་གི་སྒྲུབ་གྲྭ་བསམ་གཏན་གླིང་དུ་རྟོགས་པའི་དབང་ཕྱུག་མདོས་དབོན་པོ་༧སངས་རྒྱས་རྡོ་རྗེ་རིགས་ཀྱི་ཅོད་པན་དུ་བསྟེན་ལ། དེ་ཡང་དབུ་མ་བཞི་བརྒྱ་བ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བརྗོད། །ཅེས་དང༌། སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །གུས་པས་འདུད་དེ་རྩེ་གཅིག་བཏུད། །རབ་ཏུ་དང་ལ་དྲི་མེད་ཡིད། །ནད་པས་སྨན་པའི་ཚིག་ཉན་བཞིན། །རིམ་གྲོ་བསྐྱེད་དེ་ཆོས་ཉོན་ཅིག །ཅེས་གསུངས་པ་ལྟར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་སླར་ཡང་དཔལ་དུས་ཀྱི་འཁོར་ལོའི་རིམ་གཉིས་ཀྱི་ལམ་སྔོན་འགྲོ་དང་བཅས་པ་ཉམས་བཞེས་མཛད་ལ། དེ་ཡང་ཐུན་མོང་གི་སྔོན་འགྲོ་འབུམ་ལྔ་དང༌། རྫོགས་རིམ་གྱི་ཐུན་མོང་མ་ཡིན་པའི་སྔོན་འགྲོ་དུས་འཁོར་ལྷན་སྐྱེས་དང༌། དབེན་པ་གསུམ་ལྡན་དང༌། དངོས་གཞི་སོར་སྡུད་ཡན་ཆད་སྔར་བཤད་པ་ལྟར་ཉམས་བཞེས་གནད་དུ་སྨིན་པར་མཛད་པ་ཡིན་ནོ། །རབ་རྒྱལ་ཤིང་སྤྲེལ་གྱི་ལོ་འདིར་སྨྲ་ཁོག་སེ་ལེ་ཐང་དུ། ཁྲག་འཐུང་བདུད་འཇོམས་གླིང་བའི་གདུང་འཛིན་རིག་འཛིན་ཆེན་པོ་ཀུན་བཟང་ཉི་མ་བྱོན་སྐབས་དེར་ཆོས་ཞུ་བ་ལ་མདོས་དབོན་པོ་སངས་རྒྱས་རྡོ་རྗེ་དང་རྗེ་བཙུན་དམ་པ་ངག་དབང་བཤད་སྒྲུབ་དཔལ་སོགས་སྦྱོར་དྲུག་པ་ཐམས་ཅད་བྱོན། ཀུན་བཟང་ཉི་མ་ཁྲི་ཐོག་ལས་བཞེངས་ནས་གུས་འདུད་བྱས། དེ་ཡང་ཀུན་བཟང་ཉི་མའི་གཏེར་ལུང་ལས། མེ་སྤྲེལ་ལོ་ལ་ཁྲག་གི་མཚོ་མོ་འཁྱིལ། །ཞེས་པའི་བསྟན་པའི་རྐྱེན་ངན་སེལ་ཆེད་དུ། རང་གི་གཏེར་ཆོས་པོད་བཞི་བཅུ་ཞེ་གསུམ་ཡོངས་རྫོགས་ཀྱི་དབང་ལུང་དང་སྲོག་གཏད་དང་བཅས་གསུངས་པས་དེ་ཐམས་ཅད་ལེགས་པར་ཞུས་པ་ཡིན་ནོ། །དེ་ནས་བསམ་གཏན་གྱི་རྣམ་འབྱོར་ཉམས་སུ་ལེན་པའི་གདམས་པ་རྗེ་བཙུན་བླ་མ་དམ་པ་ལས་ལེགས་པར་གསན་ནས། སྤྱན་རས་གཟིགས་ཀྱི་དྲི་མེད་འོད་ལས། ཡུལ་དང་ཡུལ་ཅན་བཅུ་བོ་རྣམས་གཅིག་ཉིད་དུ་སྣ་ཚོགས་གཟུགས་ལ་བསམ་གཏན་པའོ། །ཞེས་པ་ལྟར་སྔར་སོར་སྡུད་ཀྱི་སྐབས་ཀྱི་རང་བྱུང་འོད་གསལ་གྱི་འཆར་སྒོ་སྟོང་གཟུགས་རྣམས་རང་སེམས་འོད་གསལ་བའི་སེམས་དང་དབྱེར་མེད་ཀྱི་དོན་ལ་སྤྲོས་བྲལ་དུ་རྩེ་གཅིག་ཏུ་མཉམ་པར་བཞག དེ་ཡང་བསྡུས་རྒྱུད་ལས། བསམ་གཏན་དག་ཀྱང་ཤེས་རབ་རྟོག་དང་དཔྱོད་པ་དགའ་དང་གཡོ་མེད་བདེ་བ་རྩེ་གཅིག་སེམས་དཔའ་འོ། །ཞེས་གསུངས་པ་བཞིན་བསམ་གཏན་གྱི་ཡན་ལག་རྣམས་སེམས་རྒྱུད་ལ་ལེགས་པར་འཁྲུངས་ནས་སྔར་ལས་ལྷག་པའི་གཟུགས་སྣང་གི་འཆར་སྒོ་ཡང་མཐའ་ཀླས་ཤིང་སྤྲོས་བྲལ་གྱི་གནས་ལུགས་ལ་ཐུགས་ངེས་ཀྱི་དགེ་ལེགས་དབྱར་མཚོ་ལྟར་རབ་ཏུ་རྒྱས་པ་ཡིན་ལ། དུས་ཡུན་ཡང་དེང་སྐབས་ཀྱི་ལག་ལེན་བཞིན་ཟླ་བ་ལྔ་ལ་ཉམས་བཞེས་མཛད་པ་ཡིན་ནོ། །དེའི་རྗེས་ནས་སྔར་སྟོང་གཟུགས་སེམས་དང་འདྲེས་པར་བྱས་པ་དེ་སྲོག་གམ་རླུང་དང་བསྲེ་བའི་སྲོག་རྩོལ་གྱི་རྣལ་འབྱོར་ཉམས་སུ་ལེན་ཚུལ་དཔལ་ལྡན་བླ་མ་དམ་པ་ལ་ལེགས་པར་གདམས་པ་བཞིན་རླུང་སེམས་དབྱེར་མེད་ཀྱི་རྣལ་འབྱོར་ལ་བརྟེན་ནས་རྡོར་བཟླས་བུམ་ཅན་ལུས་སྦྱོང་འཁྲུལ་འཁོར་ལག་ལེན་བཅས་ཀྱིས། གཡས་གཡོན་རོ་རྐྱང་གི་རྒྱུ་བ་བཙན་ཐབས་ཀྱིས་དབུ་མར་དགག་སྟེ་སྲོག་ཐུར་གོང་བུ་གཅིག་ཏུ་བསྲེ་བའི་མན་ངག་གི་བོགས་འདོན་སྤོགས་ཆོག་དང་བཅས་པ་ཕྱག་བཞེས་ཟླ་བ་དགུ་དང་ཞག་ཉེར་དྲུག་ལ་ཉམས་ལེན་གནད་བསྣུན་དང་ལྡན་པར་མཛད་པ་ཡིན་ནོ། །དེ་ནས་སྟོང་གཟུགས་སྲོག་དང་འདྲེས་པ་ཐིག་ལེར་བསྲེས་ཏེ་འབར་སྣང་གི་སྐུ་སྒྲུབ་པར་བྱེད་པ་འཛིན་པའི་ཡན་ལག་གི་རྣལ་འབྱོར་གྱི་ཉམས་ལེན་ཕ་གཅིག་བླ་མས་ལེགས་པར་གདམས་པ་བཞིན་རླུང་སེམས་དབྱེར་མེད་ཀྱི་རྣམ་འབྱོར་ལ་བརྟེན་ནས་རླུང་སྦྱོར་གནས་དྲུག་བུམ་ཅན་ཚན་པ་སྔ་ཕྱིའི་སྦྱོར་བས། རླུང་སེམས་མཐའ་དག་མི་ཤིགས་པའི་ཐིག་ལེ་དྲུག་ལ་རོ་གཅིག་ཏུ་བསྟིམ་ཞིང་འབྱུང་འཇུག་མེད་པར་བརྟན་བྱེད་ཀྱི་ཐབས་ཚུལ་རླུང་གི་སྤོགས་ཆོག འཁྲུལ་འཁོར་གྱི་སྤོགས་ཆོག རྩའི་སྤོགས་ཆོག ཐིག་ལེའི་སྤོགས་ཆོག སྣ་ཚོགས་སྔོན་བྱོན་རང་རེས་དམ་པ་དག་གི་ཕྱག་སྲོལ་བཞིན་ཟླ་བ་གཉིས་ཀྱི་ཡུན་དུ་གནད་བསྣུན་གྱིས་འབད་པ་རྒྱ་ཆེར་བྱས་སོ། །དེ་ནས་རྗེས་དྲན་སྒོམ་པ་ནི། དཔལ་དུས་ཀྱི་འཁོར་ལོའི་རྒྱུད་ལས། གཏུམ་མོའི་སྣང་བར་གང་ཞིག་གྱུར་བ་ངེས་པར་ལུས་དང་ནམ་མཁའ་ལ་ཡང་རྗེས་སུ་དྲན་པར་འགྱུར། །ཞེས་པ་བཞིན་དུ་འབར་སྣང་གི་སྐུ་སྒྲུབ་པའི་ཕྱག་ཆེན་ལ་བརྟེན་ནས་མི་འགྱུར་བའི་བདེ་བ་དངོས་སུ་སྒྲུབ་པར་བྱེད་པ་རྗེས་དྲན་གྱི་ཡན་ལག་གི་རྣལ་འབྱོར་སྒོམ་ཚུལ་རྗེ་བཙུན་དམ་པ་གང་གིས་ལེགས་པར་གནང་བ་ལྟར་ཞུ་བདེ་ཁྱད་པར་ཅན་འདྲེན་པའི་ཐབས་སྐུ་གསུམ་འདུག་སྟངས་ཀྱི་རླུང་སྦྱོར་རྣམས་དང༌། དབྱེ་སྡུག་སྒོ་གླེག་ཀུན་འདུས་སོགས་རླུང་སྦྱོར་ལྔ་ཚན་བཅས་འཁྲུལ་འཁོར་ཉི་ཤུའི་ལག་ལེན་སྔོན་འགྲོ་དང་རང་ལུས་འདོད་ལྷ་ཡབ་ཡུམ་རྗེས་ཆགས་དགའ་བཞིའི་རྣམ་པ་དང་བཅས། སླར་ཡང་འཁྲུལ་འཁོར་ཉི་ཤུའི་དངོས་གཞིའི་ལག་ལེན་ཚད་དང་ལྡན་པ་དམ་པའི་བཞེད་སྲོལ་ཇི་བཞིན་ཉམས་ལེན་ལ་སྒོ་གང་ཐད་ནས་བརྩོན་ཏེ་ལུས་བཅུད་ཀྱི་དྭངས་མ་བྱང་ཆུབ་སེམས་ཀྱི་ཐིག་ལེ་དབབ་བཟློག་བཀྲམ་གསུམ་ལ་བརྟན་པ་ཐོབ་པའི་ཐབས་སྣ་ཚོགས་ཀྱིས་སྦྱངས་བ་མི་དམན་པར་བྱས་ནས་བདེ་སྟོང་གི་ཡེ་ཤེས་ཁྱད་པར་ཅན་ཐུགས་ལ་འཁྲུངས་བར་བྱས་ཏེ་དམ་པ་གོང་མའི་ཕྱག་བཞེས་བཞིན་ཟླ་བ་ལྔ་དང་ཉིན་བཅོ་བརྒྱད་ལ་བསྒོམས་པ་ཡིན་ནོ། །དེ་ནས་རྒྱུད་ལས། ཤེས་རབ་ཐབས་ཀྱི་བདག་ཉིད་ཀྱིས་ནི་འགྱུར་མེད་བདེ་བའི་དབང་གིས་ཡེ་ཤེས་གཟུགས་ལ་ཏིང་ངེ་འཛིན། །ཞེས་གསུངས་པ་ལྟར་ཕྱག་ཆེན་ལ་བརྟེན་ནས་མཆོག་མི་འགྱུར་གྱི་བདེ་བའི་ཆ་ཉི་ཁྲི་ཆིག་སྟོང་དྲུག་བརྒྱ་འགྲུབ་པར་བྱེད་པ་ཏིང་ངེ་འཛིན་གྱི་རྣལ་འབྱོར་མཆོག་ཉམས་སུ་ལེན་ཚུལ་མཆོག་དམན་ཐམས་ཅད་ལ་གདམས་པའི་སྲོལ་ཇི་ལྟ་བ་བཞིན་ཁྱབ་བདག་འདྲེན་པ་མཆོག་གིས་བརྩེ་ཆེན་མཁྱེན་པའི་དགོངས་ཀློང་ནས་ལེགས་པར་བསྩལ་བ་ལྟར་རྗཻ་བཙུན་དམ་པ་གང་གིས་རང་ལུས་ལྷ་ཡི་དག་སྣང་སྟོང་གཟུགས་དབྱེར་མེད་ཀྱི་སྣང་བ་ལས། མི་འགྱུར་བདེ་ཆེན་གྱིས་ལུས་ནང་གི་འཁོར་ལོ་དྲུག་ཏུ་མས་རིམ་ནས་ཕྱེད་རེ་གང་བ་དང་ཏིང་ངེ་འཛིན་གྱི་ས་རེ་ཐོབ་པའི་ཚུལ་གྱིས་ས་བཅུ་གཉིས་ཐོབ་པའི་མོས་འདུན་དང་རྣམ་པ་ཡིད་བྱེད་ཀྱིས་རྨད་དུ་བྱུང་བའི་གསང་ཆེན་ཐེག་པའི་ཡན་ལག་དྲུག་པའི་འབྲས་བུའི་རྣལ་འབྱོར་ཉམས་ལེན་གྱི་སྨོན་པ་བཟང་བོ་ངེས་དོན་སྒྲུབ་བརྒྱུད་ཀྱི་རྗེས་འཇུག་དག་གི་ཕྱག་བཞེས་མ་ཉམས་པའི་རྒྱུན་ལེགས་པར་བསྐྱངས་ཏེ་ཉམས་བཞེས་མཛད་ལ། དེ་ནས་ཟབ་ལམ་འཕོ་བའི་གདམས་པ་ལེགས་པར་གསན་ནས་འཕོ་བའི་མན་ངག་བཅས། ལས་དང་བོ་བའི་ཚུལ་གྱིས་ཐུགས་ཉམས་ལེན་ལ་ཞག་བདུན་དུ་བརྩོན་ཞིང༌། སྤྱིར་ལོ་གསུམ་གྱི་རིང་སྦྱོར་བ་ཡན་ལག་དྲུག་གི་སྒྲུབ་པ་ཉམས་ལེན་ལ་གཞོལ་བར་མཛད་དོ། །དེ་ནས་རབ་རྒྱལ་ཤིང་བྱ་ལོའི་ཁྲུམས་སྟོད་ཟླ་བ་ལ་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་མཐར་ཕྱིན། དེ་ནས་རྗེ་བཙུན་དམ་པ་གང་ཉིད་དགུང་གྲངས་ཉི་ཤུ་པ་རབ་རྒྱལ་མེ་ཁྱི་ལོར་སྔར་གྱི་རྒྱུན་བསྐྱངས་ནས་ལོ་གཅིག་ཙམ་ལ་སྐུ་མཚམས་དམ་པོ་བཅད་ནས་སྒྲུབ་པ་ཉམས་ལེན་ལ་གནད་དུ་སྨིན་པར་རྩེ་གཅིག་ཏུ་གཞོལ་བར་མཛད་ནས་འོད་གསལ་ཉམས་ཀྱི་རྟོགས་པ་ཡང་མཐའ་ཀླས་པ་བྱུང་བ་ཡིན་ནོ། །དེའི་དགུན་སྟོད་ཞིག་ལ་རྗེ་བཙུན་དམ་པ་འདི་ཉིད་ཐུགས་ཆེན་དུ་བྱོན་ནས་ཐུགས་ཆེན་གྱི་གནས་ཐམས་ཅད་དག་པའི་ལྷ་ཚོགས་དུ་མར་གཟིགས་པ་སོགས་བྱུང༌། དེ་ནས་བཀའ་དྲིན་གསུམ་ལྡན་གྱི་རྗེ་བཙུན་དམ་པ་དགུང་གྲངས་ཉེར་གཅིག་པ་སྤྱི་ལོ་༡༩༤༧བསྐལ་བ་མེ་ཕག་ལོར་ངེས་དོན་བསྟན་པའི་གནས་གཞི་ཤར་འཛམ་ཐང་བསམ་འགྲུབ་ནོར་བུའི་གླིང་དུ་ཕེབས་ཏེ། གཙང་ཆེན་དགོན་དུ་སྒྲུབ་གྲྭར་བཞུགས་ནས་གཙང་ཆེན་གྱི་རྡོ་རྗེ་སློབ་དཔོན་ཁྱབ་བདག་རྡོ་རྗེ་འཆང་དངོས་ངག་དབང་རྡོ་རྗེ་བཟང་བོ་མཆོག་གི་ཞབས་ལ་གཏུག་སྟེ། ཕྱག་རྡོར་དང༌། རྟ་མགྲིན་དང༌། ཕུར་བ་རྣམས་ཀྱི་དབང་དང༌། བསྐྱེད་རིམ་གྱི་དམིགས་ཁྲིད་རྣམས་ལེགས་པར་གསན་ནས། སྔགས་བླ་མེད་ཀྱི་དག་རྫོགས་སྨིན་གསུམ་ལེགས་པར་སྦྱར་ནས་བསྐྱེད་རིམ་ལྷའི་རྣལ་འབྱོར་གྱི་ཉམས་ལེན་ཚུལ་བཞིན་དུ་གནང་བ་ལ་བརྟེན་ནས། གང་གི་ཐུགས་ཀློང་ལ་བསྐྱེད་རིམ་ལྷའི་གསལ་སྣང་དང་ང་རྒྱལ་ལ་བརྟན་པ་རབ་རྒྱས་མཐར་ཐུག་པས་ཉེ་བར་གཏམས་པ་ཡིན་ནོ། །རྗེ་བཙུན་དམ་པ་འདི་ལ་རྡོ་རྗེ་འཆང་ངག་དབང་རྡོ་རྗེ་བཟང་པོའི་ཞལ་སྔ་ནས་ཁྱེད་ཀྱིས་མ་འོངས་པ་ན་རྡོ་རྗེ་སློབ་དཔོན་ངེས་པར་མཛད་དགོས་པས་ན་ཁོང་གིས་དཔལ་དུས་ཀྱི་འཁོར་ལོའི་དབང་ཆེན་ཞིག་བསྐུར་གསུངས་ནས་གཙོ་བོར་དམ་པ་འདི་གཅིག་པུའི་ཆེད་དུ་རྡོ་རྗེ་སློབ་དཔོན་གྱི་དབང་དང་བཅས་དུས་འཁོར་དབང་ཆེན་ཡོངས་རྫོགས་ཤིག་ལེགས་པར་གནང་ནས་རིམ་གཉིས་ཀྱི་ལམ་སྨིན་རུང་གི་ནུས་པ་ཁྱད་པར་ཅན་བཞག་པ་ཡིན་ནོ། །དེ་ནས་ཀཿཐོག་ཕྱག་ཚ་པདྨ་འཕྲིན་ལས་རྒྱ་མཚོའི་མདུན་ནས་མདོ་སྒྱུ་སེམས་གསུམ་དང༌། འཁོར་བ་དུང་སྤྲུག་གི་སྒོ་ནས་ཐུགས་ཀློང་ཆོས་ཀྱི་མཛོད་དུ་གཏམ་པར་མཛད་པ་ཡིན་ནོ། །དེ་ནས་ཀ༔ཐོག་རྨོག་ཚ་འཇིགས་བྲལ་ཕྱོགས་ལས་རྣམ་རྒྱལ་གྱི་གདམས་ངག་གསུང་གི་གྲལ་ནས་བདུད་འདུལ་དང༌། ཀློང་གསལ་སྙིང་པོའི་དབང་ལུང་ཡོངས་རྫོགས་ཀྱི་ཆོས་ཀྱི་སྐལ་བ་ལེགས་པར་ཐོབ་པ་ཡིན་ནོ། །སྐབས་དེ་དུས་ཞིག་ནས་ལོ་གཉིས་ཡས་མས་སུ་རྡོ་རྗེ་ཕུར་བའི་གར་འཆམ་གྱི་འཆམ་དཔོན་མཛད་ནས་བསྟན་འགྲོའི་གནོད་པ་མཐའ་དག་ཡུན་རིང་དུ་ཞི་ནས་བདེ་སྐྱིད་ཀྱི་དཔལ་ལ་རོལ་བའི་སྐལ་བ་བྱུང༌། དེ་ནས་དམ་པ་གང་ཉིད་དགུང་གྲངས་ཉེར་གཉིས་དང་ཉེར་གསུམ་གྱི་སྐབས་སུ་རྗེ་བཙུན་དམ་པ་གང་གིས་ལྷ་བཟོ་བ་མཛད་འཕྲིན་དང༌། མུ་ར་ལྷ་བཟོ་གཏེར་སྒར་ཕེབས་སྐབས་ཆོས་སྡེ་འདིར་བྱོན་པར་བསྐུལ་ནས། སྔར་ཧུས་རིགས་མཱ་ཆི་ཚང་གིས་སྒྲོལ་མའི་མཆོད་རྟེན་དང༌། རྣམ་རྒྱལ་མཆོད་རྟེན་དང༌།ཕུར་བའི་མཆོད་རྟེན་རྣམས་གཏོར་བཤིག་ཚད་མེད་བཏང་བ་ལས་སྒྲོལ་མའི་མཆོད་རྟེན་ནང་གི་སྨན་ལྷ་མཆེད་བརྒྱད་སོགས་དང༌། རྣམ་རྒྱལ་མཆོད་རྟེན་ནང་གི་གུ་རུ་མཚན་བརྒྱད་སོགས་དང༌། ཕུར་བའི་མཆོད་རྟེན་གྱི་ལྷ་སྐུ་དུ་མ་སྐྱེ་དགུ་རྣམས་ཀྱི་བསོད་ནམས་ཞིང་དུ་ཉམས་གསོ་ལེགས་པར་མཛད་པ་དང༌། ལོ་དེར་དམ་པ་གང་ཉིད་ཀྱིས་ས་ཟླའི་སྐབས་ལ་སྔར་རྒྱ་བླ་མ་ངག་དབང་དཀོན་མཆོག་གི་སྨྱུང་གནས་མཆོག་བརྒྱད་དགོན་འདིར་བཙུགས་ཡོད་པ་དེ་རྒྱུན་བསྐྱངས་བྱས་ཏེ་སྤྱི་ལོ་༡༩༥༧རབ་རྒྱལ་མེ་བྱ་བར་ལ་སྨྱུང་གནས་མཆོག་བརྒྱད་ཆོ་ཁ་དང་ཕྱག་རིང་ཕྱག་ཐུང་དང་བཅས་པ་ལེགས་པར་བསྒྲུབས་ལ། དེ་དག་གི་སྐབས་སུ་བདེ་བ་ཅན་གྱི་རྒྱུ་བཞི་དང་བློ་ལྡོག་རྣམ་བཞི་སོགས་གསུངས་ནས་གདུལ་བྱ་རྣམས་ལ་ཐར་བའི་ལམ་བཟང་བསྐྲུན་པའི་ས་བོན་གྱི་མྱུ་གུ་བསྐྱེད་པར་བྱས་པ་ཡིན་ནོ། །སྐབས་དེ་ཡས་མས་ཞིག་ལ་རྗེ་བཙུན་དམ་པ་འདི་ཉིད་ཀྱིས་དབང་ཆོག་ཞིག་གསུངས་བའི་དུས་སུ་མདོག་ཐལ་སྐྱ་ལྟ་བུ་ཡོད་པའི་སེམས་ཅན་ཞིག་མཐོང་བས་སྐྱབས་རྗེ་མདོས་དབོན་པོ་ལ་ཞུས་པས་དེ་ནི་བར་དོ་བ་རེད་ཅེས་གསུངས་པ་སོགས་རྒྱལ་གདོན་དྲི་ཟ་སོགས་མཐོང་བ་གྲངས་ལས་འདས་ཀྱང་འདིར་བཤད་པ་ལ་དགོས་པ་ཆེར་མ་མཐོང་བས་མ་སྤྲོས་པའོ། །དེའི་རྗེས་ཞིག་ལ་ཀཿཐོག་དབོན་སྤྲུལ་ཚུལ་ཁྲིམས་ཡོན་ཏན་རྒྱ་མཚོའི་ཐུགས་བརྩེ་ཆེན་དགོངས་པའི་ཀློང་ནས་བསྐལ་བ་ས་བྱི་ལ་གདམས་ངག་མཛོད་དང༌། ས་གླིང་ལ་རྙིང་ཐིག་ཡ་བཞི་དང༌། ཐོས་གྲོལ་བསྐྱེད་རྫོགས་བཅས་ལེགས་གནང་བྱས་པ་རྗེ་བཙུན་དམ་པ་གང་ཉིད་ཀྱིས་གསན་པ་ཡིན་ནོ། །སྐབས་འདི་ཡས་མས་སུ་འབེ་ཚ་བླ་མ་ཚུལ་ཁྲིམས་འོད་ཟེར་གྱི་གསུང་ཚངས་པའི་དབྱངས་ནས་འཇིགས་མེད་གླིང་བའི་བདེ་ཆེན་ཞིང་ཁྲིད་དང༌། ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་གི་སྐལ་བ་བསྩལ་ཏེ་ཐུགས་བརྩེ་བས་རྗེས་སུ་བཟུང་སྟེ་བདེ་ཆེན་ཞིང་ཁྲིད་ཀྱི་སྒོ་ནས་བདེ་བ་ཅན་གྱི་རྒྱུ་བཞི་རྟག་ཏུ་གསུངས་དགོས་ཞེས་བཀས་བསྐུལ་མ་གནང་བ་ཡིན་ནོ། །ལོ་དེ་དག་གི་སྐབས་ཞིག་ཏུ་དམ་པ་གང་ཉིད་སྐུ་མཚམས་བཅད་དེ་བདེ་བ་ཅན་དུ་སྐྱེ་བ་འཛིན་པའི་ཆོ་ག་མདོར་བསྡུས་པ་ཞིང་མཆོག་བགྲོད་པའི་བདེ་ལམ་ཞེས་པའི་བདེ་ལྡན་གྱི་ཞིང་དེར་སྐྱེ་བའི་ཐུགས་སྨོན་རྒྱ་ཆེར་ཡང་ཡང་གནང༌། དེའི་སྐབས་ནས་བཟུང་སྟེ་མཚན་ཙམ་འཛིན་པ་ཙམ་གྱིས་ཐར་བའི་ལམ་བཟང་ལ་འཁོད་པར་མཛད་པའི་འདྲེན་པ་འོད་དཔག་མེད་ཀྱི་ཞལ་གཟིགས་ཡང་ཡང་བྱུང་ནས་འབྲེལ་ཚད་བདེ་ཆེན་ཞིང་དུ་སྐྱེ་བའི་ལུང་བསྟན་ལེགས་པར་ཐོབ་པ་ཡིན་ནོ། །འདི་སྐད་རྗེ་བཙུན་དམ་པ་གང་གིས་ཐོས་པ་དུས་གཅིག་ན། རིགས་བདག་དམ་པ་མདོས་དབོན་པོ་སངས་རྒྱས་རྡོ་རྗེའི་ཞལ་གསུང་བདུད་རྩིའི་བུམ་བཟང་ལས་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་སྒོམ་རིམ་གྲུབ་པའི་ལམ་བཟང་སྐུ་བཞིའི་རྒྱལ་སར་བགྲོད་པའི་ཤིང་རྟ་ཞེས་བྱ་བའི་གཞུང་ལ་གཏེར་སྟོན་ཀ་བྱང་དང་མཉམ་དུ་ཡུན་རིང་དུ་སྦྱང་བ་མི་དམན་པར་མཛད་ནས་ཐུགས་ལ་བྱང་ཆུབ་པར་མཛད། རྗེས་ནས་རང་ཅག་ལ་སྒོམ་རིམ་གྱི་བཤད་ཁྲིད་གསུངས་བའི་སྐབས་རྣམས་སུ་གཞུང་ཚིག་འདི་དང་འདི་ལ་དཔལ་ལྡན་བླ་མས་འདི་ལྟར་གསུངས་ཞེས་ཚིག་གཅིག་ཀྱང་མ་ལུས་པ་དྲན་ཤེས་ཀྱིས་མི་བརྗེད་པའི་གཟུངས་སུ་བཟུང་ཡོད་པ་བདག་ཅག་གུས་སློབ་རྣམས་ཀྱིས་སྐལ་བ་ཐོབ་པར་བྱུང་བ་ཡིན་ནོ། །དེ་ནས་རྗེ་བཙུན་དམ་པ་གང་ཉིད་དགུང་གྲངས་ཉེར་བཞི་པ་རབ་རྒྱལ་རྣམ་འགྱུར་ཞེས་པ་ལྕགས་སྟག་སྤྱི་ལོ་༡༩༥༠ལོའི་ས་གའི་ཟླ་བ་ལ། མདོས་དབོན་པོ་སངས་རྒྱས་རྡོ་རྗེ་དང་དམ་པ་འདི་ཉིད་སོགས་ཀྱི་ཐུགས་བཞེད་བཞིན་འབྲོག་དགེ་སྤྲུལ་སྐུ་འཇམ་དབྱངས་མཁྱེན་རབ་རྒྱ་མཚོ་མཆོག་ཨ་སྐྱོང་ཡར་ཐང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་དུ་ཆིབས་བསྒྱུར་གནང་ནས་ས་ཟླའི་ཚེས་ཉེར་གཅིག་ལ། སྐལ་བཟང་གི་གདུལ་བྱ་དབང་བོ་རབ་དང་མཆོག་ཏུ་གྱུར་བ་རྗེ་བཙུན་དམ་པ་ངག་དབང་བཤད་སྒྲུབ་དཔལ་འདི་ཉིད་དང༌། མདོས་དབོན་པོ་སངས་རྒྱས་རྡོ་རྗེ་དང༌། ཨ་མཁར་སྤྲུལ་སྐུ་འགྲོ་ཕན་རྒྱ་མཚོ་དང༌། རྫ་ནང་བླ་མ་མཁྱེན་ལྡན་དང༌། རྒྱལ་སྲས་པད་ལོ་དང༌། འབེ་ཚའི་མཁན་སྤྲུལ་དང༌། ཀ་བཞི་གཏེར་སྟོན་དང༌། ཁང་སར་གྱི་སྤྲུལ་བསྟན་པོ་དང༌། སྐྱ་བླ་མ་གར་དབང་སོགས་འཁོར་འདུས་པ་རྒྱ་མཚོ་ལ་ཐུགས་ཆོས་ཀྱི་མཛོད་ཀློང་ནས་རྫོགས་རིམ་སྨིན་བྱེད་དབང་གི་རིམ་པ་ལེགས་པར་རྗེས་སུ་གནང་བའི་རིམ་པ་འདི་ལྟ་སྟེ། ཐོག་མར་དཀྱིལ་འཁོར་གྱི་གཙོ་བོ་དཔལ་ལྡན་དང་བོའི་སངས་རྒྱས་དཔལ་དུས་ཀྱི་འཁོར་ལོའི་ཡེ་ཤེས་ཀྱི་སྐུར་བཞེངས་ཏེ་རྡོ་རྗེའི་སློབ་མ་དག་ཐུགས་བརྩེ་བས་རྗེས་སུ་བཟུང་སྟེ། དཔལ་དུས་ཀྱི་འཁོར་ལོའི་དབང་མོ་ཆེ། སློབ་མ་རྗེས་འཛིན། སྟ་གོན། བྱིས་པ་འཇུག་པའི་དབང་བདུན། མཆོག་དབང་གོང་མ་བཞི། མཆོག་དབང་ཁྱད་པར་ཅན་ཏེ་རྡོ་རྗེ་སློབ་མའི་དབང་རྣམས་དང༌། བདག་པོ་དང་བདག་པོ་ཆེན་པོའི་དབང་སྟེ་རྡོ་རྗེ་སློབ་དཔོན་གྱི་དབང་དང་བཅས་ཡོངས་སུ་རྫོགས་པ་བཀའ་དྲིན་དུ་མཛད། དེ་ནས་རིན་འབྱུང་བརྒྱ་རྩ་དང༌། བ་རི་བརྒྱ་རྩ་དང༌། རྒྱུད་སྡེ་རབ་འབྱམས་ཀྱི་ནང་ནས། བཅོམ་ལྡན་འདས་གཤིན་རྗེ་གཤེད་དམར་བོ་ལྷ་བཅུ་གསུམ་གྱི་དབང་ནས་བཅོམ་ལྡན་འདས་དཔལ་རྡོ་རྗེ་འཇིགས་བྱེད་རྭ་ལུགས་ལྷ་བཅུ་གསུམ་གྱི་དབང་གི་བར་གཤིན་རྗེ་རབ་འབྱམས་ཀྱི་དབང་བདུན་དང༌། བདེ་མཆོག་ལུ་དྲིལ་ནག་གསུམ་དང༌། བཅོམ་ལྡན་འདས་དཔལ་འཁོར་ལོ་སྡོམ་པ་བསྡུས་རྒྱུད་རྩ་བའི་དབང་ནས་བཅོམ་ལྡན་འདས་འཁོར་ལོ་བདེ་མཆོག་ཁ་སྦྱོར་རྡོར་སེམས་ལྷ་སོ་བདུན་གྱི་དབང་གི་བར་བདེ་མཆོག་རབ་འབྱམས་དབང་ཆེན་བཅོ་བརྒྱད་དང༌། གྲུབ་ཆེན་ཤ་བ་རི་བའི་ལུགས་ཀྱི་མ་རྒྱུད་སངས་རྒྱས་ཐོད་པ་ཉེར་ལྔ་དང༌། མ་རྒྱུད་ཕག་མོ་རབ་འབྱམས་དང༌། དཔལ་ལྡན་རྒྱལ་བ་ཇོ་ནང་བའི་ལུགས་ཀྱི་ཕུར་བ་དང༌། ཐམས་ཅད་རིགས་པ་དང༌། མི་འཁྲུགས་པ་དང༌། ཚེ་དཔག་མེད་ལྷ་དགུ་དང༌། ལྷ་གཅིག་བུམ་གཅིག་དང༌། དུས་འཁོར་སྡོམ་ཆེན་དང༌། དུས་འཁོར་ལྷ་དགུའི་དབང་རྣམས་ཟླ་བ་གསུམ་ལ་ལེགས་པར་བསྩལ་བ་རྣམས་ལེགས་པར་ཞུས་ནས་སྐལ་བ་དང་ལྡན་པའི་གདུལ་བྱར་གྱུར་བ་ཡིན་ནོ། །དེ་དུས་སུ་རྗེ་བཙུན་དམ་པ་འདི་ཉིད་ཀྱིས། འདུལ་བསྟོད་ལས། ཇི་ལྟར་ས་ནི་སྐྱེ་དགུ་རྣམས་ཀྱི་གཞི། །དེ་ལས་འབྲས་རྣམས་སྐྱེ་བར་འགྱུར་བ་ལྟར། དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་ཡོན་ཏན་རྣམས་ཀྱང་སྐྱེ། །ཞེས་དང༌། འཇམ་མགོན་བླ་མས། གང་ལ་བརྟེན་ན་བདེ་བླག་ཏུ། །ཐར་བའི་གྲོང་དུ་བགྲོད་པའི་ཐབས། །བདེ་གཤེགས་བསྟན་པའི་སྙིང་པོ་མཆོག །སོ་སོར་ཐར་ཅེས་གྲགས་པ་གང༌། །ཞེས་དང༌། སོ་སོར་ཐར་བའི་མདོ་ལས། དང་བོ་ཚུལ་ཁྲིམས་མེད་པར་གྱུར་པ་དེ། །ཕྱིས་ནས་མྱ་ངན་འདས་པ་འཐོབ་སྙམ་མམ། །ཞེས་དང༌། འཇམ་དཔལ་རྩ་རྒྱུད་ལས། ཚུལ་ཁྲིམས་འཆལ་ལ་ཐུབ་དབང་གིས། །སྔགས་སྒྲུབ་པར་ནི་མ་གསུངས་ཏེ། །མྱ་ངན་འདས་གྲོང་འགྲོ་བ་ཡི། །ཡུལ་དག་ཕྱོགས་ཀྱང་མ་ཡིན་ནོ། །ཞེས་དང༌། དཔུང་བཟང་གི་ཞུས་པ་ལས། རྒྱལ་བ་ངས་གསུངས་སོ་སོར་ཐར་བ་ཡི། ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པའི་རྟགས་དང་ཆོ་ག་སྤང༌། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་སོགས་བཀའ་དང་བསྟན་བཅོས་དུ་མ་ལས་སོ་སོར་ཐར་བའི་སྡོམ་པ་བསྟན་པའི་རྩ་བ་ཡིན་པར་ཡང་ཡང་ལུང་རིགས་ཀྱི་སྒོ་ནས་གསུངས་པ་དག་ལ་ངེས་པ་ཡང་དག་རྙེད་ནས། རྗེ་བཙུན་དམ་པ་འབྲོག་དགེ་སྤྲུལ་སྐུ་འཇམ་དབྱངས་མཁྱེན་རབ་རྒྱ་མཚོ་སོགས་དགེ་འདུན་གྲངས་ཚང་གི་སྐུ་མདུན་ནས་གསོལ་བཞི་ལས་ཀྱི་ཆོ་ག་ལ་བརྟེན་ནས་ངེས་འབྱུང་གི་བསམ་པ་རྣམ་པར་དག་པས་ཀུན་ནས་བསླངས་ཏེ་བསྙེན་རྫོགས་ཀྱི་སྡོམ་པ་ལེགས་པར་མནོས་པར་བྱས་ལ། དེ་ནས་བཟུང་སོ་སོར་ཐར་བའི་བསྙེན་རྫོགས་ཀྱི་སྡོམ་པའི་མི་མཐུན་ཕྱོགས་མཐའ་དག་བསྲུངས་ཤིང་མཐུན་ཕྱོགས་མཐའ་དག་ལེགས་པར་བསྒྲུབས་ཏེ་ཀུན་ནས་ཉོན་མོངས་པ་དང་རྣམ་བྱང་ཕྱོགས་ཀྱི་བླང་དོར་ཕྱིན་ཅི་མ་ལོག་པར་ཚུལ་བཞིན་དུ་སྒྲུབ་པ་ཡིན་ནོ། །ལོ་དེའི་སྟོན་ཁར་རྗེ་བཙུན་དམ་པ་གང་ཉིད་མི་འཁྲུགས་པ་སོགས་གྱི་མཚམས་ཟླ་བ་དྲུག་ཡས་མས་སུ་རྩེ་གཅིག་ཏུ་བསྒྲུབ་པ་ལ་གཞོལ་བར་བྱས་ནས་གྲུབ་པའི་རྟགས་མཚན་ཡང་གཏོར་མ་ལས་མེ་ཏོག་ཡ་མཚན་དུ་མ་བྱུང་བ་སྐྱེ་བོ་དུ་མས་མཐོང་ཐོས་སུ་གྱུར་བ་ཡིན་ནོ། །ཡང་སྐབས་དུ་མར་གྱང་སྤྲུལ་དོན་གྲུབ་རྡོ་རྗེའི་མདུན་ནས་བདེ་སྨོན་འགྲེལ་ཆེན་སོགས་བདེ་ཆེན་ཞིང་ཁྲིད་ལན་དུ་མར་གསན་བསམ་མཛད་པ་ཡིན་ནོ། །དེ་ནས་རྗེ་བཙུན་དམ་པ་གང་ཉིད་དགུང་གྲངས་ཉེར་ལྔ་བ་རབ་རྒྱལ་ལྕགས་ཡོས་ལོར་དམ་པ་འདི་ཉིད་དང༌། བྱ་བཏང་བ་བླ་མ་ཚུལ་རྒྱམ་དང༌། ཚུལ་བཟང་རྣམས་ཀྱི་དད་པས་གུས་ཕྱག་དང་བཅས་ཏེ་གསོལ་བ་བཏབ་པའི་ངོར། རིགས་བདག་སངས་རྒྱས་རྡོ་རྗེའི་གསུང་གི་མཚམས་སྤྲིན་གསར་བ་ལས་བྱང་ཆུབ་ལམ་རིམ་ཆེན་པོའི་ཆོས་ཀྱི་གྲུ་ཆར་འཇོ་བ་གང་ཐུགས་གསེར་ལྡན་འཛིན་མའི་གཞི་ལ་ཡོངས་སུ་འཁྱིལ་ཏེ། བསྟན་པ་ཐམས་ཅད་འགལ་མེད་དུ་རྟོགས་པའི་ཆེ་བ་དང༌། གསུང་རབ་ཐམས་ཅད་གདམས་ངག་ཏུ་འཆར་བའི་ཆེ་བ་དང༌། རྒྱལ་བའི་དགོངས་པ་བདེ་བླག་ཏུ་རྙེད་པའི་ཆེ་བ་དང༌། ཉེས་སྤྱོད་ཐམས་ཅད་རང་འགགས་སུ་འགྲོ་བའི་ཆེ་བ་བཞི་ལྡན་གྱི་སྐྱེས་བུ་གསུམ་གྱི་ལམ་གྱི་རིམ་པ་དག་རང་རྒྱུད་ལ་ལེགས་པར་འཁྲུངས་བར་བྱས་པ་ཡིན་ནོ། །ཡང་མདོས་དབོན་པོའི་མདུན་ནས་དཔལ་སྤྲུལ་སྔོན་འགྲོ་གསན་བསམ་མཛད་པ་ཡིན་ནོ། །སྐབས་དེ་དང་ཉེ་བའི་ཆར་རྗེ་བཙུན་དམ་པ་གང་གི་སྐུ་སྤུན་རྣམས་ཉ་དགེ་དང་རི་ཤུལ་སོགས་ལ་གྱོད་ཐུག་ནས་གཙང་བ་བསེ་སྤྲུལ་སྐུ་སོགས་ཀྱིས་གྱོད་བཤད་སྐབས་གྱོད་ཡ་འགའ་ཞིག་གིས་བཤད་སྒྲུབ་དཔལ་ནི་བྱང་ཆུབ་སེམས་དཔའ་ཡིན་པས་ཆགས་སྡང་མེད་ཅེས་ཟེར་འདུག་པས་ང་ཚོས་ཇི་ལྟར་འདུག་ཅེས་བལྟ་ཟེར་ནས་རྗེ་བཙུན་དམ་པ་གང་ལ་བདག་ཅག་རྣམས་ལ་ཚྭ་ཞིག་སྦྱིན་པར་ཞུས་པས། ཇི་སྐད་དུ། བདག་ལ་དེ་དག་སྡུག་སྨིན་ཞིང༌། །བདག་དགེ་མ་ལུས་དེར་སྨིན་ཤོག །ཅེས་དང༌། ཀུན་མཁྱེན་ཇོ་ནང་བའི་ཞལ་ནས། བདག་ལ་བརྟེན་ནས་ནམ་དུ་ཡང༌། །གཞན་ལ་གནོད་པར་མ་གྱུར་ཅིག །སྒོ་གསུམ་གང་དང་གང་བརྩོན་པ། །གཞན་ལ་ཕན་པ་འགྱུར་བར་ཤོག །ཅེས་གསུངས་པ་ལྟར་ཐུགས་བྱམས་བརྩེ་དང་ལྡན་པའི་སྒོ་ནས་གནང་བས་ཀུན་ལ་དད་པ་སྐྱེས་ནས་ད་ནི་རང་ཅག་རྣམས་ཕམ་ཉེས་ཞིག་བྱུང་ཡང་གྱོད་ངེས་པར་འགྲིག་པར་བྱ་ཞེས་ཐམས་ཅད་ཀྱིས་དམ་བཅས་ནས་གྱོད་ལེགས་པར་འགྲིགས་པ་ཡིན་ནོ། །ཡང་རྗེ་བཙུན་དམ་པ་འདི་ཉིད་ལ་གཟའི་རྟེན་ཐང་ཞིག་ཡོད་པ་དེར་གཟའ་རྒོད་ཁྱབ་འཇུག་ཆེན་པོ་དངོས་སུ་བཞུགས་ཡོད་པ་ཀུན་དགའ་སོགས་སློབ་ཚོགས་དུ་མས་ལན་དུ་མར་མངོན་སུམ་དུ་མཐོང་ལ། དམ་པ་འདི་ཉིད་ཀྱིས་ཁྲིམས་ཁང་བྱོན་སྐབས་སོགས་རྒྱུན་དུ་ཆག་མེད་དུ་གཟའ་མཆོག་ཆེན་པོའི་གཏོར་ཆོག་ཞལ་འདོན་མཛད་ལ། དེ་ནས་ལོ་དེར་རྗེ་བཙུན་དམ་པ་གང་ཉིད་ཟབ་ལམ་རྡོ་རྗེའི་རྣལ་འབྱོར་གྱི་ཉམས་ལེན་ལ་གནད་དུ་བསྣུན་པ་ཉིན་མཚན་ཀུན་ལ་བརྩོན་པར་མཛད་ནས་བཞུགས་སྐབས་སུ། ཇི་སྐད་དུ། རྩ་རྒྱུད་ལས། ཕྱག་རྒྱ་ཆེན་པོའི་རྣལ་འབྱོར་གྱིས། །རྡོ་རྗེ་འབེབས་པས་བྱིན་གྱིས་བརླབས། །ཞེས་གསུངས་པ་བཞིན་ཉིན་ཞིག་ལ་ཡེ་ཤེས་ཡུན་རིང་འབེབ་པ་སོགས་བྱུང༌། དེ་དུས་སུ་ཡང་གྲུབ་པའི་གཏེར་ཆེན་སྒྲིབ་བྲལ་རིག་པའི་རྡོ་རྗེའི་ལུང་བསྟན་ལས། སྙིང་རླུང་སྐབས་སུ་ལྡང་ཡང་སྲིད། །བདེ་སྟོང་རྡོ་རྗེའི་རླུང་གིས་སྦྱོང༌། །འབྲེལ་ཚད་གྲོལ་བའི་རྣལ་འབྱོར་འོང༌། །ཞེས་ལུང་དུ་བསྟན་པ་ལྟར་རླུང་ཅུང་ཟད་ལྡང་ནས་མདོས་དབོན་པོ་སངས་རྒྱས་རྡོ་རྗེའི་སྐུ་དྲུང་དུ་བྱོན་ནས་འོད་གསལ་ཉམས་ཀྱི་རྟོགས་པའྀ་འཆར་སྒོ་སྣ་ཚོགས་པ་དག་ཞུས། རྗེ་སངས་རྒྱས་རྡོ་རྗེའི་ཞལ་ནས་མདང་དགོང་ཁོང་གི་རྨི་ལམ་འོད་གསལ་ཉམས་ཀྱི་སྣང་བ་ལ། དཔལ་དུས་ཀྱི་འཁོར་ལོའི་ཐུགས་གསུང་སྐུའི་དཀྱིལ་འཁོར་ཡོངས་རྫོགས་ཞིག་འཆར་བས་དམ་པ་ཁྱེད་ཉིད་ཟུང་འཇུག་གདོད་མའི་ཐར་བའི་ལམ་བཟང་ལ་ཞུགས་པར་གྱུར་ལ། དེ་འདྲའི་དཀྱིལ་འཁོར་གྱི་ཕྱོགས་བཞིར་འབྲུག་དུ་མ་བབས་ཡོད་པས་དམ་པ་གང་ཉིད་ཀྱི་མཚན་གྱི་སྙན་པ་ཕྱོགས་བཅུར་ཁྱབ་པར་འགྱུར་རོ་ཞེས་བཀས་ལུང་བསྟན་གནང༌། དམ་པ་གང་ཉིད་ཀྱི་སྐུ་ཚེ་མི་འགྱུར་ཚེ་མཐའ་ཡས་པའི་ངོ་བོར་བཞུགས་ཕྱིར་ཞབས་བརྟན་རིམ་གྲོ་དུ་མ་བསྒྲུབ་པར་བྱས། དེ་ནས་ཉིན་ཞིག་ཁོང་ཐུགས་སངས་ལ་བྱོན་སྐབས་གཅུང་བསྟན་ནོར་ལ་དེ་རིང་བདག་ཕ་བཟང་བུ་རྟ་ཐོག་འབུད་པ་བཞིན་དོན་དམ་རང་བྱུང་འོད་གསལ་བའི་ཡེ་ཤེས་ཀྱི་རང་ཞལ་མཇལ་བས་བདེ་གསལ་མི་རྟོག་ཁྱད་པར་ཅན་སྐྱེས་བྱུང་གསུངས་ནས་ཐུགས་དགྱེས་ཉམས་མཛད། དེ་ནས་རླུང་ཇེ་དགའ་རུ་སོང༌། འོན་ཀྱང་འོད་གསལ་ཉམས་ཀྱི་འཆར་སྒོ་ལུས་ཉམས། སེམས་ཉམས། ངག་ཉམས། མཐོང་ཉམས་རྣམས་ཇི་བཞིན་ངོ་སྤྲད་དཀའ་བས་གེགས་ཐམས་ཅད་སེལ་མ་ཐུབ་པ་ཡིན་ནོ། །དེ་ནས་རྗེ་བཙུན་དམ་པ་གང་ཉིད་དགུང་གྲངས་ཉེར་དྲུག་པ། རབ་རྒྱལ་དགའ་བ་ཞེས་པ་ཆུ་ཕོ་འབྲུག་སྤྱི་ལོ་༡༩༥༢ལོར། རིགས་བརྒྱའི་ཁྱབ་བདག་སངས་རྒྱས་རྡོ་རྗེའི་བཀའ་གསུངས་ལྟར་རྡོ་རྗེ་འཆང་དངོས་མཚམས་པ་བ་སྨོན་ལམ་བཟང་བོའི་སྐུ་དྲུང་དུ་བྱོན། བླ་མ་དེ་ཉིད་ཀྱིས་ཐུགས་བརྩེ་བས་རྗེས་སུ་བཟུང༌། རྗེ་བཙུན་བླ་མ་དམ་པ་ངག་དབང་བཤད་སྒྲུབ་དཔལ་གྱིས་རང་གི་འོད་གསལ་གྱི་འཆར་སྒོ་རྣམས་དང༌། རྩ་རླུང་ཐིག་ལེའི་གེགས་རྣམས་ལེགས་པར་ཞུས་ཏེ། རིགས་ཀྱི་ཅོད་པན་སྨོན་ལམ་བཟང་བོ་དེ་ཉིད་ཀྱིས་རྩའི་གེགས་སེལ་འཁྲུལ་འཁོར་དང༌། རླུང་གི་གེགས་སེལ་རླུང་སྦྱོར། ཐིག་ལེའི་གེགས་སེལ་དེ་གཉིས་འཛོམ་པའི་བཞུ་བཏུལ། སེམས་གེགས་ལ་དམིགས་པའི་གནད་སྣ་ཚོགས་སུ་འཕོ་བ་རྣམས་ཀྱིས་སེལ་བར་བྱས་ལ། གཙོ་བོ་ཡེ་ཤེས་ཕེབས་པའི་ཉམས་ཡིན་པས་གཞན་སྨན་བཅོས་སོགས་གང་ཡང་མ་བྱས་པར་ཉམས་ངོ་སྤྲད་དེ་ཉམས་བྱུང་རྒྱལ་དུ་བསྐྱངས་པས་གེགས་སེལ་ཞིང་ཡོན་ཏན་གོང་འཕེལ་དུ་གྱུར་ནས་ཆོས་སྡེ་དེར་ཡུན་རིང་དུ་སྒྲུབ་པ་ལ་གཞོལ་བར་མཛད་པ་ཡིན་ནོ། །དེའི་སྐབས་སུ་ལམ་ཁོའི་མཁན་པོ་ངག་དབང་གསང་སྔགས་བསྟན་འཛིན་གྱི་མདུན་ནས་སྒོམ་རིམ་དང་ཞིང་ཁྲིད་ཞུས་པར་བཤད་སྲོལ་ཙམ་ཡོད་ཀྱང་ཁུངས་ཇི་བཞིན་མ་རྙེད་དོ། །དེ་ནས་དམ་པ་གང་ཉིད་དགུང་གྲངས་ཉེར་བདུན་པ། སྤྱི་ལོ་༡༩༥༣རབ་རྒྱལ་རྣམ་རྒྱལ་ཞེས་པ་ཆུ་སྦྲུལ་ལོ་ལ་རང་དགོན་ནས་བདེ་ཆེན་ཞིང་སྒྲུབ་ཀྱི་མཚམས་བཞུགས་ཏེ་ཞག་ཉིས་བརྒྱའི་རིང་ལ་བདེ་བར་གཤེགས་པའི་སྣང་བརྙན་དང༌། འོད་མདོའི་གླེགས་བམ་སོགས་རྟེན་གསུམ་གྱི་མདུན་དུ་མཆོད་པ་བཀོད་ལེགས་ཡིད་འོང་དུ་མ་མཛེས་པར་བཀྲམ་སྟེ། བདེ་བ་ཅན་དུ་བགྲཽད་པའི་ཆོ་ག་དཔག་མེད་མྱུར་ལམ་ཞེས་པའི་སྒོ་ནས་བདེ་བ་ཅན་གྱི་རྒྱུ་བཞི་ཚང་བར་བཟང་སྤྱོད་ཚར་ལྔ་བཅུ་དང་ཨ་མི་ཏ་བྷ་ལྔ་སྟོང་རེ་ཉི་མ་རེ་རེར་བཟླས་ནས་འགྲོ་ཀུན་བདེ་བ་ཅན་དུ་སྐྱེ་བའི་སྨོན་ལམ་རྒྱ་ཆེར་གནང༌། དེའི་དུས་སུ་ཡང་མགོན་པོ་འོད་དཔག་མེད་ཀྱི་སྐུ་པདྨ་ར་གའི་ལྷུན་པོ་ལ་ཉི་མ་འབུམ་གྱིས་འཁྱུད་པ་ལྟ་བུའི་གཟི་མདངས་དང་བཅས་མངོན་སུམ་དུ་མཇལ་བས་བདེ་སྟོང་མི་འགྱུར་བའི་དགའ་བ་ཁྱད་པར་ཅན་ཐུགས་ལ་འཁྲུངས་ནས་འབྲེལ་ཚད་དོན་ལྡན་དུ་གྱུར། དུས་སྐབས་ཞིག་ལ་རྗེ་བཙུན་དམ་པ་འདི་ཉིད་འབྲོས་སྐོར་ལ་བྱོན་སྐབས་མཚན་དུས་ཞིག་ལ་སེར་དྲག་བབས་ནས་རྟ་རྣམས་གར་སོང་ཆ་མེད་དུ་གྱུར༌། དེ་དུས་སུ་གྲྭ་བ་རྣམས་རྟ་བཙལ་བ་ལ་འགྲོ་རྩིས་བྱེད་སྐབས་རྗེ་བཙུན་དམ་པ་འདི་ཉིད་ཀྱིས་འགྲོ་མི་དགོས་གསུངས། དེའི་ཕྱིར་ཉིན་རྟ་རྣམས་སྒོ་དྲུང་ལ་སླེབས་འདུག་དེར་གནས་པའི་མི་དུ་མས་རྟ་རྣམས་དང་མཉམ་དུ་གཟའ་ཡོད་པར་མཐོང་བས་ཐམས་ཅད་དད་པ་སྐྱེས་ནས་ཚེ་འདི་ཕྱིའི་སྐྱབས་འཇུག་ཡང་ཡང་ཞུས་པ་ཡིན་ནོ། །དུས་སྐབས་ཞིག་ལ་ཨ་འཛོམས་འབྲུག་པའི་སློབ་མ་པུ་རུ་སློབ་མ་གུས་གུས་སམ་ཀུན་བཟང་རྒྱལ་སྲས་པད་མ་རྣམ་རྒྱལ་དྲུང་དུ་བྱོན་སྐབས་རྗེ་བཙུན་དམ་པ་འདི་ཉིད་ཀྱིས་རྟོགས་འབུལ་བྱས་ལ། དེ་དུས་སུ་པུ་རུ་བླ་མ་ཀུན་བཟང་གིས་གྲྭ་བ་གཞོན་ནུ་དེ་སུ་ཞིག་རེད་ཅེས་རྒྱལ་སྲས་ལ་དྲིས། རྒྱལ་སྲས་ཀྱིས་དེ་ནི་རྒྱ་སྤྲུལ་སྐུའི་སྲས་བཤད་སྒྲུབ་དཔལ་ཟེར་བ་དེ་རེད་ཅེས་གསུངས་ཚེ་གང་གི་ཞལ་ནས་གཞོན་ནུ་འདི་ལྟ་བུ་ལ་ཉམས་རྟོགས་ངོ་མཚར་བ་འདུག་གསུངས་ནས་ཕྱག་གཉིས་ཐལ་མོ་སྦྱར་བར་མཛད་དོ། །ཡང་སྐབས་འདི་སྐོར་ཞིག་ལ་དམ་པ་འདི་ཉིད་ཀྱིས་ལོ་གཉིས་ཙམ་ལ་ཕུར་བ་རྡོ་རྗེ་གཞོན་ནུའི་སྒྲུབ་དཔོན་མཛད། སྤྱན་འདྲེན་སྐབས་སུ་དཔལ་ཆེན་རྡོ་རྗེ་གཞོན་ནུ་ཞལ་མངོན་སུམ་དུ་གཟིགས་ནས་དྲག་པོ་མངོན་སྤྱོད་ཀྱི་ལས་ལ་དབང་བའི་དངོས་གྲུབ་ཐོབ། སློབ་མ་ལས་སྣང་དག་པ་རྣམས་ཀྱིས་ཕུར་བའི་དཀྱིལ་འཁོར་གྱི་མཐར་ཕུར་སྲུང་མངོན་སུམ་དུ་གཟིགས་པ་སོགས་བྱུང་བའོ། །སླར་སྨྲས་པ། རྣམ་མང་རྒྱུད་སྡེའི་མན་ངག་ཆུ་བོ་དལ་འབབ་ཀླུང༌། །དབང་འབྱོར་བཤད་སྒྲུབ་རླབས་ཀྱིས་འཁྲི་ཤིང་གཡོ་བཞིན་པར། །དཔལ་ལྡན་གསང་གསུམ་ཀུན་འདུས་ཟབ་རྒྱས་རྒྱ་མཚོ་ཆེར། །གཞོལ་ཞིང་འབབ་པའི་གསང་མཛོད་ཇི་བཞིན་དཔག་པར་དཀའ། །ངེས་གསང་རྒྱུད་སྡེ་གྲུབ་ཆེན་བྱེ་བའི་ཐུགས་ཀྱི་བཅུད། །བྱིན་རླབས་སྙན་བརྒྱུད་མན་ངག་ཕྱག་བཞེས་ཕྲ་མོ་ནས། །གེགས་སེལ་བོགས་འདོན་ཉམས་མྱོང་འབྲས་བུ་ཚད་མར་བཅས། །ཐང་མར་བརྡལ་བའི་ངོ་མཚར་མཛད་ བཟང་སུ་ཡིས་དཔོག །བསྐལ་མང་བསགས་པའི་བསོད་ནམས་བྱེ་བའི་ཆུ ་གཏེར་ལས། །ཉེར་བར་ཐོན་པའི་མཁས་དང་གྲུབ་པའི་ཉི་ཟླ་ཟུང༌། །རྨད་བྱུང་ངེས་གསང་སྙིང་པོའི་བསྟན་པའི་གླིང་འདིར་ཤར། །རྒྱལ་བསྟན་འགྲོ་བའི་གཉེན་གཅིག་ཁྱེད་མིན་གཞན་ན་སུ། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། །།
གསུམ་པ་སྐལ་བཟང་གདུལ་བྱའི་ཚོགས་ལ་ཟབ་ཆོས་ཀྱིས་ཚིམ་པར་མཛད་ནས་བསྟན་འགྲོའི་དོན་སྒྲུབ་པ།
གསུམ་པ་སྐལ་བཟང་གདུལ་བྱའི་ཚོགས་ལ་ཟབ་ཆོས་ཀྱིས་ཚིམ་པར་མཛད་ནས་བསྟན་འགྲོའི་དོན་སྒྲུབ་པ་ནི།
དེ་ནས་དམ་པ་གང་ཉིད་དགུང་གྲངས་ཉེར་བརྒྱད་པ་སྤྱི་ལོ༡༩༥༤རབ་རྒྱལ་རྒྱལ་བ་ཞེས་པ་ཤིང་ཕོ་རྟ་ལ་སྐྱབས་རྗེ་མདོས་དབོན་པོ་སངས་རྒྱས་རྡོ་རྗེ་ནས་རྗེ་བཙུན་དཔལ་ལྡན་བླ་མ་༧ངག་དབང་བཤད་སྒྲུབ་དཔལ་རང་གི་རྒྱལ་ཚབ་དུ་རྡོ་རྗེ་སློབ་དཔོན་གྱི་གདན་རབས་ལྔ་བ་རུ་མངའ་གསོལ་མཛད། དེ་ཡང་གང་གི་རྩ་བའི་གདན་ས་འདིའི་རྡོ་རྗེ་སློབ་དཔོན་གདན་རབས་དང་བོ་གྲུབ་པའི་དབང་ཕྱུག་རྒྱ་བླ་མ་ངག་དབང་དཀོན་མཆོག་དང༌། གཉིས་པ་རྣམ་འབྱོར་གྱི་དབང་ཕྱུག་དབོན་པོ་བསྟན་གསལ་མཆོག་དང༌། གསུམ་པ་མཐུ་སྟོབས་ཀྱི་དབང་ཕྱུག་རྒྱ་སྤྲུལ་སྐུ་ངག་དབང་བསྟན་འཛིན་མཆོག་དང༌། བཞི་བ་རྗེ་བཙུན་བྱམས་མགོན་གྱི་རྣམ་འཕྲུལ་མདོས་དབོན་པོ་སངས་རྒྱས་རྡོ་རྗེ་དང༌། གདན་རབས་ལྔ་བ་ནི། རྒྱན་ལས། དེ་ལྟར་བློ་བཟང་སྐྱོ་བ་མེད་ལྡན་བརྩེ་བ་ཅན། །སྙན་པར་རབ་གྲགས་ཆོ་ག་བཟང་ཤེས་ལྡན་པ་ཡི། །བྱང་ཆུབ་སེམས་དཔའ་ལེགས་པར་སྨྲ་བ་ཡིན་པ་སྟེ། །བཤད་པས་སྐྱེ་བོའི་ནང་ན་ཉི་མ་བཞིན་དུ་ལྷམ། །ཞེས་དང༌། རིན་ཆེན་ཕྲེང་བ་ལས། ཆོག་ཤེས་འདོད་ཆུང་སྙིང་རྗེར་ལྡན། །ཉོན་མོངས་སྤངས་བའི་ཤེས་རབ་ཅན། །ཞེས་གསུངས་པ་ལྟར་ཚེ་འདིའི་སྣང་བ་ཐམས་ཅད་མཆིལ་མའི་ཐལ་བ་བཞིན་དུ་རིང་དུ་དོར་ཞིང༌། སྲིད་གསུམ་མེ་འོབས་ཀྱི་གནས་ལྟ་བུར་གཟིགས་ནས་འཁོར་བ་ལ་རྒྱབ་ཀྱིས་ཕྱོགས་པ། གཞན་དོན་རླབས་ཆེན་སྒྲུབ་པའི་དམ་བཅའི་ཁུར་བཞེས་ཏེ་ཐེག་པ་ཆེན་པོའི་ལམ་སྤྱི་དང༌། ཁྱད་པར་དུ་དཔལ་དུས་ཀྱི་འཁོར་ལོའི་ཟབ་མོའི་ལམ་གྱི་རིམ་པ་ལ་ཐུགས་ཅུང་ཟད་ཀྱང་ལྷོད་པ་མེད་པར་རྩེ་གཅིག་ཏུ་བསྒྲུབས་པར་བྱས་ནས་ས་ལམ་གྱི་རྟོགས་པ་མཆོག་གི་གོ་འཕང་མངོན་དུ་མཛད་ནས། །བསྟན་པ་དང་སེམས་ཅན་གྱི་དོན་ལ་ལྷག་པའི་བསམ་པ་གངས་ཀྱི་རི་བོ་ལས་ཀྱང་རྣམ་པར་དཀར་བའི་སྒོ་ནས་སྐྱེ་དགུ་ཡོངས་ལ་བླང་དོར་གྱི་གནས་དང༌། སེམས་ཅན་རང་རང་གི་མོས་པ་དང་མཐུན་པའི་ལམ་གྱི་རིམ་པ་རྣམས་དང༌། རིགས་དང་དཀྱིལ་འཁོར་ཀུན་གྱི་མངའ་བདག་ཏུ་བཞུགས་ཏེ་རིམ་གཉིས་ཀྱི་ལམ་གདུལ་བྱའི་རྒྱུད་ལ་བསྐྱེད་ཅིང༌། སངས་རྒྱས་ཀྱི་བསྟན་པ་སྤྱི་དང༌། ཁྱད་པར་ངེས་གསང་གཞན་སྟོང་དབུ་མ་ཆེན་པོའི་རིང་ལུགས་ཉམས་མེད་དུ་འཛིན་ཅིང་སྤེལ་བའི་བཤེས་གཉེན་ཆེན་པོ་མཚན་བརྗོད་པར་དཀའ་བ། དོན་གྱི་སླད་དུ་མཚན་ནས་སྨོས་ན་ཁྱབ་བདག་རྡོ་རྗེ་འཆང་ཆེན་པོ་༧་ངག་དབང་བཤད་སྒྲུབ་དཔལ་བཟང་བོ་འདི་ཉིད་ཡིན་ནོ། །ལོ་དེར་སྦྱོར་དྲུག་གསར་བཞུགས་པ་འཇིགས་སངས་སོགས་ལྔ་ཡོད་ལ། དེ་རྣམས་ལ་མདོས་དབོན་པོ་སངས་རྒྱས་རྡོ་རྗེ་དང་རྗེ་བཙུན་དམ་པ་འདི་གཉིས་ཀྱིས་དཔལ་ལྡན་རྒྱལ་བ་ཇོ་ནང་བའི་བྱིན་རླབས་དོན་བརྒྱུད་ཀྱི་ཉམས་མྱོང་ཟབ་ཁྲིད་ལག་ལེན་གྱི་སྒོ་ནས་བྱམས་བརྩེའི་ཆུ་འཛིན་དྲྭ་བ་ལས་གདམས་ངག་ཟབ་རྒྱས་ཆོས་ཀྱི་སྦྲང་ཆར་དུས་དུས་སུ་འཇོ་བར་མཛད་པ་ཡིན་ནོ། །སྐབས་འདི་ཡས་མས་སུ། སྔོན་ཆོས་སྡེ་འདིར་ཚེ་བསྙེན་དུང་འཁོར་ཞིག་ཡོད་པ་དེ་རྒྱ་མཱ་ཆི་ཚང་གིས་གཏོར་བཤིག་བཏང་བ་དེ་དམ་པ་འདི་ཉིད་ཀྱིས་དེའི་ཤུལ་དུ་ཡིག་བརྒྱའི་དུང་འཁོར་ཆེ་བ་བྱིན་རླབས་དང་ལྡན་པ་ཞིག་གསར་བཞེངས་བྱས་ནས་བསྟན་འགྲོའི་དོན་དུ་ཐུགས་སྨོན་རྒྱ་ཆེར་གནང༌། དེ་ནས་རྗེ་བཙུན་དམ་པ་དགུང་གྲངས་ཉེར་དགུ་བ་སྤྱི་ལོ་༡༩༥༥རབ་རྒྱལ་མྱོས་བྱེད་ཅེས་པ་ཤིང་མོ་ལུག་གི་ལོར་སྦྱོར་དྲུག་པ་གསར་བཞུགས་སངས་ཕུན་དང༌། ལུང་རིགས་སོགས་དྲུག་ཡོད་དོ། །ལོ་དེར་སྦྱོར་དྲུག་པ་རྣམས་ལ་ཁྲིད་སྐབས་དང༌། མྱུང་གནས་མཆོག་བརྒྱད་སྐབས་མ་གཏོགས་དམ་པ་འདི་ཉིད་ཀྱིས་ཡི་དམ་དུ་མས་དམ་མཚམས་བཞུགས་ནས་སྒྲུབ་པ་ཉམས་ལེན་ལ་རྟག་ཏུ་བརྩོན་པར་མཛད་དོ། །དེ་ནས་དམ་པ་གང་ཉིད་དགུང་གྲངས་སུམ་བཅུ་བ་སྤྱི་ལོ་༡༩༥༦རབ་རྒྱལ་མེ་སྤྲེལ་ལོ་ལ་སྦྱོར་དྲུག་པ་སྤྲུལ་ཤེར་གྲགས་དང༌། སངས་རྒྱམ་སོགས་བཞི་ཡོད་ལ། ལོ་དེར་རྩི་ནང་བླ་མ་མཚན་བཟང་མཆོག་ཆོས་སྡེ་འདིར་ཆིབས་བསྒྱུར་བསྐྱངས་ནས་སྨིན་བྱེད་དབང་གི་རིམ་པ་སྩལ་བ་འདི་ལྟ་སྟེ། ཐོག་མར་སློབ་དཔོན་འཇིགས་མེད་འབྱུང་གནས་ཀྱིས་བསྡུས་པར་མཛད་པའི་དཔལ་གསང་བ་འདུས་པ་འཇམ་པའི་རྡོ་རྗེ་ལྷ་དགུའི་དབང་ནས། རྣམ་རྒྱལ་མའི་དབང་གི་བར་དབང་བཞི་བཅུ་ཞེ་དགུ་སྟེ་དཔལ་རྡོ་རྗེ་ཕྲེང་བའི་དབང་ཡོངས་རྫོགས་ས་བཟང་མ་ཏི་པཎ་ཆེན་གྱིས་མཛད་པའི་སྒྲུབ་ཐབས་དང༌། ཐུབ་བསྟན་དགེ་ལེགས་རྒྱ་མཚོའི་རྡོ་རྗེ་ཕྲེང་བའི་དབང་ཆོག་གཉིས་ལ་བརྟེན་ནས་གསུངས་བ་དང༌། རྒྱུད་སྡེ་བཞིའི་དཀྱིལ་འཁོར་བརྒྱ་རྩའི་དབང་དང༌། ཚེ་དཔག་མེད་ལྷ་གཅིག་བུམ་གཅིག་གི་དབང་དང༌། ཁྲོས་མ་ལྷ་དགུའི་དབང་དང༌། གཅོད་དབང་ནམ་མཁའ་སྒོ་འབྱེད་ཀྱི་དབང་དང༌། མགོན་པོ་བྲག་རྫོང་མའི་རྗེས་གནང་དང༌། རྣམ་འཇོམས་ཁྲོ་ནག་གི་དབང་རྣམས་ལེགས་པར་ཐོབ་པའི་སྐལ་བ་བཟང་བོར་བྱས་པ་ཡིན་ནོ། །དེ་ནས་དམ་པ་གང་ཉིད་དགུང་གྲངས་སོ་གཅིག་སྤྱི་ལོ་༡༩༥༧རབ་རྒྱལ་གསེར་འཕྱང་ཞེས་པ་མེ་བྱ་ལོར་སྦྱོར་དྲུག་པ་པད་ཚུལ་བླ་མ་རྟ་མགྲིན་སོགས་བརྒྱད་གསར་བཞུགས་ཡོད། དེ་རྣམས་ལ་སྔོན་འགྲོ་འབུམ་ལྔ་དང༌། ཐུན་མོང་མ་ཡིན་པའི་སྔོན་འགྲོ་དུས་འཁོར་ལྷན་སྐྱ྄ེས་ཀྱི་བར་མདོས་དབོན་པོ་སངས་རྒྱས་རྡོ་རྗེ་དང་རྗེ་བཙུན་དམ་པ་འདི་གཉིས་ཀྱིས་ཟབ་ཁྲིད་ཀྱིས་ལེགས་པར་བསྐྱངས་བ་ཡིན་ནོ། །དེ་ནས་དམ་པ་འདི་ཉིད་དགུང་གྲངས་སོ་གཉིས་པ་སྤྱི་ལོ་༡༩༥༨རབ་རྒྱལ་རྣམ་འཕྱང་ཞེས་པ་ས་ཕོ་ཁྱིའི་ལོ་ལ་བོད་ལྗོངས་སྤྱིའི་བསྟན་སྲིད་ལ་ཉམས་རྒུད་ཆེན་པོ་བྱུང་དུས་ཡིན་པས། དམ་པ་འདི་ཉིད་ལོ་དེའི་དབྱར་མགོ་མའི་དུས་སྐབས་ནས་རྒྱ་དམག་ལ་བྱོལ་ནས་རི་མགོར་བྲོས། དེའི་སྐབས་ནགས་རྫིག་མ་ནས་བླ་མ་དབུ་བཞུགས་བྱས་ནས་བསྐང་གསོལ་སོགས་ཚོགས། དེ་ནས་དམ་པ་གང་ཉིད་དགུང་གྲངས་སོ་གསུམ་པ་སྤྱི་ལོ་༡༩༥༩རབ་རྒྱལ་སྒྱུར་བྱེད་ཅེས་པ་ས་མོ་ཕག་གི་ལོར་མཛེ་གཞུང་དུ་བྲོས་ནས་བཞུགས། དེ་དུས་དམ་པ་འདི་ཉིད་ཀྱིས་མ་ཎི་ཉིན་དུ་མར་ཚོགས་ནས་སྐྱེ་དགུའི་དོན་དུ་བསྔོ་སྨོན་མཛད། མཛེ་གཞུང་དང་འཛི་ཆེན་སོགས་སུ་བཙན་བྱོལ་དུ་བཞུགས། ལྔ་བརྒྱད་དང་ང་དགུ་ལོར་མགོ་ལོག་ཕལ་ཆེར་རྒྱ་ནག་གི་བཙན་འོག་ཏུ་གྱུར། དེ་ནས། ཇི་སྐད་དུ། གཞན་དོན་བརྩེ་བ་ཅན་རྣམས་སྲོག་ཕྱིར་ཡང༌། །རང་གི་ནུས་པ་ལྷོད་པར་མི་བྱེད་ལ། །ཞེས་གསུངས་པ་ལྟར་རྗེ་བཙུན་དམ་པ་འདི་ཉིད་ཀྱི་ཞལ་ནས་གསུངས་པ་འདི་ལྟ་སྟེ། དབུ་མ་བཞི་བརྒྱ་པ་ལས། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་དང༌། རྒྱལ་སྲས་ཞི་བ་ལྷས། འགྲོ་མང་རྡོག་པས་བདག་གི་སྤྱིར་འཚོག་གམ། །འགུམ་ཡང་མི་བསྡོ་འཇིག་རྟེན་མགོན་དགྱེས་མཛོད། །ཅེས་གསུངས་པ་ལྟར་བདག་ནི་རང་ལ་སྡུག་བསྔལ་དང་དཀའ་ཚེགས་ཇི་ལྟར་མྱོང་ཡང་མགོ་སྒུར་རྒྱུ་ཡིན། ང་ཚོ་འདི་ལྟར་འདུག་ན་སེམས་ཅན་གྱི་ཤ་ཁྲག་ལ་རྟེན་དགོས་པས་སེམས་ཅན་དུ་མས་སྲོག་ལ་འཚེ་པར་འགྱུར་ལ། དེ་ལས་བདག་ཤི་ན་དགའ་གསུངས་ནས་སྟོན་དུས་སུ་རང་ཡུལ་དུ་བྱོན་ནས་རྒྱ་ནག་ལ་མགོ་སྒུར། དེ་ནས་བོད་སྤྱི་མཐུན་གྱི་ལས་དབང་གིས་དམ་ཉམས་རྣམས་སེང་གེ་ལྟར་འགྱིང་དམ་ལྡན་རྣམས་ཁྱི་ལྟར་སྡང་བའི་སྐབས་ཡིན་པས། རྗེ་བཙུན་དམ་པ་འདི་ཉིད་སྨྲ་ཁོག་སེ་ལེ་ཐང་ཁྲིམས་ཁང་དུ་བཟུང༌། དེའི་སྐབས་སུ་རྫུ་འཕྲུལ་གྱིས་རང་གི་ལག་ལྕགས་བླངས་ནས་ཟུར་དུ་བཞག་ནས་ཁྲིམས་སྲུང་བ་རྣམས་ཡོང་སྐབས་སླར་ཡང་མི་མངོན་པར་ལག་པར་བརྒྱབ་པ་དང༌། ཟང་ཐལ་དུ་བྱོན་པ་སོགས་རྟགས་མཚན་ཁྱད་འཕགས་དུ་མ་བསྟན་ལ། དེ་ནས་དམ་པ་གང་ཉིད་རྒྱུ་མདའ་ལ་ཁྱེར། དེ་ནས་ཟི་ལིང་གྲ་བ་ཁྲང་ངམ་བླ་མ་ཏིས་ལ་ཁྱེར་ནས་ལོ་བཞི་ཙམ་ལ་བཟུང༌། སྐབས་དེ་དག་ཏུ་རྗེ་བཙུན་དམ་པ་གང་ཉིད་ཀྱིས། ཇི་སྐད་དུ། བདག་ལ་དེ་དག་སྡུག་སྨིན་ཞིང༌། །བདག་དགེ་མ་ལུས་དེ་སྨིན་ཤོག །ཅེས་དང༌། ལེ་ལན་ཐམས་ཅད་གཅིག་ལ་གདའ། །ཀུན་ལ་བཀའ་དྲིན་ཆེ་བར་བསྒོམ། །ཞེས་གསུངས་པ་བཞིན་བདག་ལ་སྡུག་བསྔལ་གང་འབྱུང་བ་ཐམས་ཅད་རང་གཅེས་འཛིན་འདི་ཁོ་ན་ལན་པ་ཡིན་ལ། བདག་ལ་རྡེག་རྡུང་བྱེད་པའི་སེམས་ཅན་རྣམས་བདག་གི་ལས་སྒྲིབ་སྦྱོང་མཁན་ཡིན་པས་བཀའ་དྲིན་ཆེ་སྙམ་པ་དང༌། བདག་གི་སྡུག་བསྔལ་འདིས་མཚོན་ནས་མ་རྒན་འགྲོ་བ་རྣམས་ཀྱི་སྡུག་བསྔལ་མ་ལུས་པ་ཐམས་ཅད་བདག་ལ་སྨིན་པར་གྱུར་ཅིག རང་ལ་བདེ་བ་དང་དགེ་བ་ཇི་སྙེད་ཡོད་པ་ཐམས་ཅད་གཞན་སེམས་ཅན་ཐམས་ཅད་ལ་སྨིན་པར་ཤོག་ཅིག་སྙམ་པའི་བདག་གཞན་མཉམ་རྗེའི་བྱང་ཆུབ་ཀྱི་སེམས་ཀྱིས་ཐུགས་རྒྱུད་མཛེས་པར་གཏམས་ནས་རྒྱལ་སྲས་བྱང་ཆུབ་སེམས་དཔའི་སྤྱོད་པ་མཐའ་ཀླས་པ་མཛད། ཁྲིམས་ཁང་དེར་བཞུགས་སྐབས་བཀའ་བབ་རིག་འཛིན་ཆེན་མོའི་མདུན་ནས་ཟབ་ཆོས་འགའ་རེ་གསང་བ་བྱས་ནས་ཞུས་པ་དང༌། སངས་རྒྱས་ཀུན་གྱི་གསུང་གི་རྡོ་རྗེ་མཆོག །ཅེས་སོགས་ཀྱི་མདོས་དབོན་པོ་སངས་རྒྱས་རྡོ་རྗེའི་གསོལ་འདེབས་འདི་ཡང་དམ་པ་འདི་ཉིད་ཀྱིས་ཞུས་ནས་བཀའ་བབ་རིག་འཛིན་ཆེན་མོས་གསུངས་པ་ཡིན་ནོ། །ཁྲིམས་ཁང་དེར་མཁན་བླ་སྤྲུལ་ཆིག་སྟོང་ལ་ཉེ་བ་ཙམ་ཡོད་ཀྱང་སྐྱེས་བུ་དམ་པ་འདི་ཉིད་ཀྱི་མཛད་བཟང་གི་རྣམ་པར་ཐར་བས་ཀུན་གྱི་ཡིད་དབང་འཕྲོག་ནས་རྒྱ་སྤྲུལ་སྐུ་བཤད་སྒྲུབ་དཔལ་ཞེས་མཚན་གྱི་སྙན་པའི་གདུགས་དཀར་གཅིག་གིས་ཕྱོགས་ཀུན་ཏུ་ཁྱབ་པར་གྱུར་བ་ཡིན་ནོ། །དམ་པ་གང་ཉིད་ཁྲིམས་ཁང་དེར་སྐུ་རྣམ་སྣང་ཆོས་བདུན་བཞུགས་ནས་མྱ་ངན་ལས་འདའ་བར་བརྩམ་པ་ན་རྒྱལ་སྲས་པད་ལོས་བརྟན་བཞུགས་ཕུལ་ནས་གང་སྐུ་ཚེ་མཐའ་ཡས་པའི་ངོ་བོར་བརྟན་པ་ཡིན་ནོ། །དེ་ནས་དམ་པ་གང་ཉིད་དགུང་གྲངས་སོ་དྲུག་པ་སྤྱི་ལོ་༡༩༦༢རབ་རྒྱལ་དགེ་བྱེད་ཅེས་པ་ཆུ་སྟག་ལོའི་གྲོ་བཞིན་ཟླ་བའི་དུས་ཞིག་ལ་དམ་པ་འདི་ཉིད་དང༌། སྤྲུལ་བཀྲ་ཤིས་རྒྱ་མཚོ་དང༌། སྙན་དགོན་གྱི་སྤྲུལ་འཇམ་དབྱངས་ཉི་མ། ཤར་འོད་སྤྲུལ་བློ་བཟང་ཐབས་མཁས་དང༌། གོང་མའི་བློན་ར་པོ་བཞི་མཉམ་དུ་གནས་ཡོད་པའི་ཉིན་ཞིག་ལ་སྔར་ས་ཆ་དེར་བྱ་ཕོ་རོག་མེད་ཀྱང་དེའི་ཉིན་ཁྲིམས་ཁང་དེར་ཕོ་རོག་དུ་མ་གྲགས་པས་རྗེ་བཙུན་དམ་པ་འདི་ཉིད་ཀྱིས་ཁྱེད་རྣམས་ཀྱིས་ཧ་ཨེ་གོ་ངེད་རྣམས་འགྲོ་ཟེར་གྱི་འདུག་གསུངས་པས་ཐམས་ཅད་ཀྱིས་དམ་པ་འདིའི་གསུང་ལ་བསླུ་བ་མི་སྲིད་བསམ་ནས་རེ་སྒུག་ངང་དུ་གནས། དེ་ནས་ཉིན་གསུམ་ཙམ་ནས་གོང་དུ་སྨྲས་པའི་སྤྲུལ་གསུམ་མངག་བྱུང༌། དེའི་ཕྱིར་ཉིན་ཉེས་མེད་རྗེ་བཙུན་དམ་པ་འདི་ཉིད་མུན་ནག་ཁྲིམས་ཁང་གི་གླིང་ལས་གྲོལ། དེ་དུས་སུ་གློག་ཞགས་དང་སེར་བ་དྲག་པོ་འབབ་པས་ཀུན་གྱིས་ང་ཚོ་ས་འདིར་ལོ་བཞི་ལྔ་ཙམ་གནས་ཀྱང་སེར་ར་འབབ་མ་མྱོང་དེ་རིང་ཇི་ཡིན་ཞེས་གླེང་མོར་བྱེད་སྐབས། བཀའ་བབ་རིག་འཛིན་ཆེན་པོའི་ཞལ་སྔ་ནས། ཁྱེད་རྣམས་ཀྱི་འདྲ་འདྲ་ཡིན་ཟེར་མོད་ཀྱང་དེ་རིང་ཨ་སྐྱོང་རྒྱ་སྤྲུལ་སྐུ་༧ངག་དབང་བཤད་སྒྲུབ་དཔལ་མགོན་པོ་བེར་ནག་ཅན་གྱིས་བསུས་སོང་བས་ཁྱེད་རྣམས་ཀྱི་དགོངས་སམ་ཞེས་གསུངས་སོ། །དེའི་སྐབས་སུ་བློན་ར་པོའི་རྗེ་བཙུན་དམ་པ་བཤད་སྒྲུབ་དཔལ་གྱིས་མཉམ་དུ་འགྲོ་ཞེས་སྔར་གསུངས་ཡོད་པས་ཇི་ཡིན་སྙམ་ཐེ་ཚོམ་ཟོས་ནས་གནས་པའི་སྐབས་སུ་ཕྱིར་ཉིན་ར་པོ་ཡང་མངག་ནས་འོང༌། དེ་ནས་སྤྲུལ་རྣམས་ཀྱིས་ཚོང་ཁང་ཞིག་ཏུ་ཤིང་ཏོག་རེ་བཟུང་ནས་བཞུགས་ཡོད་པ་དང་མཇལ། རྗེ་བཙུན་དམ་པ་གང་གིས་ངེད་རྣམས་ཀྱིས་ར་པོ་ཁྱོད་བསྒུགས་ནས་འདུག་ཡོད་གསུངས་སོ། །དེ་ནས་དམ་པ་འདི་ཉིད་ལོ་དེའི་ཁྲུམས་སྟོད་ཟླ་བ་ལ་རང་ཡུལ་དགའ་བའི་ཚལ་ལ་ཕེབས། དེ་ནས་རྒྱལ་སྲས་པད་ལོའི་སྐུ་མདུན་བྱོན་ནས་བསྟན་འགྲོའི་དོན་ལ་གསུང་གླེང་ཞིབ་རྒྱས་ཉིན་གཅིག་ལ་མཛད། དེ་ནས་ཡང་དུས་ཀྱི་འཕོ་འགྱུར་གྱི་དབང་གིས་མཉམ་ལས་ཀྱི་ལས་དཀའ་སོགས་ལ་འབད་པ་བྱེད་དགོས་བྱུང༌། འོན་ཀྱང་དམ་པ་གང་ཉིད་ཉིན་དུས་སུ་ལས་དཀའ་སྣ་ཚོགས་བྱེད་དགོས་བྱུང་ཀྱང་མཚན་མོར་རྒྱུན་དུ་ཚོགས་བསགས་དང་སྒྲིབ་སྦྱང་དང་སྤྲོས་བྲལ་མི་རྟོག་པའི་ཡེ་ཤེས་ལ་རྩེ་གཅིག་གཅིག་ཏུ་གཞོལ་བ་དང༌། ཆོས་མིན་ལོག་ལམ་ལ་ཞུགས་པའི་སྐྱེ་བོའི་ཚོགས་ལ་གསང་ནས་གདུལ་བྱ་རྣམས་ལ་ཐུགས་གཡོ་མེད་ཆོས་ཀྱི་མཛོད་ཀློང་ནས་ཟབ་རྒྱས་གདམས་ངག་གིས་ཚིམ་པར་མཛད་པ་ཡིན་ནོ། །ཡང་དམ་པ་གང་ཉིད་དགུང་གྲངས་བཞི་བཅུ་ཞེ་གཅིག་པ་སྤྱི་ལོ༡༩༦༧རབ་རྒྱལ་མེ་ལུག་ལོ་ནས་བཟུང་ཉེས་མེད་དམ་ལྡན་གྱི་སྐྱེས་བུ་དུ་མ་རིག་གནས་གསར་བརྗེ་ཞེས་པའི་མིང་བཏགས་པའི་ཟིང་འཚུབ་བསམ་བཞིན་དུ་སྔར་བསླངས་བའི་རྐྱེན་གྱིས་ལྕགས་རི་ཐང་དུ་ཟླ་གཉིས་ཙམ་ལ་འཛིན་གྲྭ་ཞེས་པ་བཀག ལོ་དེ་ནས་བཟུང་སྤྱི་ལོ་༡༩༧༡རབ་རྒྱལ་མེ་ཕག་ལོ་བར་ལོ་རེ་བཞིན་ཟླ་བ་གཅིག་གཉིས་བཀག འོན་ཀྱང་དམ་པ་འདི་ཉིད་སྐབས་འགའ་རེ་མ་གཏོགས་ལས་བྱེད་དད་འདུན་པ་ཞིག་གི་ཐབས་ཀྱི་སྒོ་ནས་འགྲོ་མ་དགོས་པ་ཡང་བྱུང༌། ལྕགས་རི་ཐང་དུ་བཀག་པའི་སྐབས་ཞིག་ལ་མཚན་དཀྱིལ་ཞིག་ལ་རྗེ་བཙུན་དམ་པ་འདི་ཉིད་ཀྱི་ཞལ་ནས། རྐྱེན་ངན་ཞིག་ཡོད་པས་ང་ཚོ་ད་ལྟ་ནས་མྱུར་དུ་ལང་དགོས་གསུངས། དེ་ནས་ཐམས་ཅད་ཡར་བཞེངས་ནས་བལྟས་པས་ལྕགས་རིའི་ཇོའི་ཁང་གི་ཕྱོགས་གཅིག་མེ་འབར་གྱིན་འདུག་པ་སོགས་འབྱུང་འགྱུར་གྱི་ལུང་བསྟན་མང་བོ་གསང་བ་བྱས་ནས་གསུངས། ཐམས་ཅད་ཀྱིས་དམ་པ་འདི་ལ་དད་འདུན་གྱི་སྒོ་ནས་བསྟོད་བསྔགས་ཀྱི་ཕྲེང་བ་ཚར་དུ་དངར་བ་ཡིན་ནོ། །སྤྱི་ལོ་༡༩༦༨རབ་རྒྱལ་ཕུར་བུ་ཞེས་པ་ས་ཕོ་སྤྲེལ་གྱི་ལོར་རྗེ་བཙུན་དམ་པ་གང་ཉིད་ཕག་འཚོ་རུ་བཞག དེ་ནས་དམ་པ་གང་ཉིད་ཀྱིས་ཕག་འཚོ་སྐྱོང་བྱས་ནས་བཞུགས། ཕག་རྣམས་ལ་རྟེན་འདུས་དང་ཁ་ཟས་སོགས་སྦྱིན། སངས་རྒྱས་ཀྱི་མཚན་རྣ་ལམ་དུ་བརྗོད་པ་སོགས་ཀྱི་སྒོ་ནས་ཐུགས་བརྩེ་བས་རྗེས་སུ་བཟུང༌། རྗེ་བཙུན་དམ་པ་གང་གི་སྨྲས་པའི་དོན་རྣམས་ཕག་རྣམས་ཀྱིས་གོ་བ་ཐམས་ཅད་ཀྱིས་མཐུན་སྣང་དུ་གྲུབ་པ་ཞིག་བྱུང་བ་ཡིན་ནོ། ། སྐབས་དེ་དག་ཏུ་དམ་པ་གང་ཉིད་ཀྱིས་ཕག་འཚོ་ཞོར་ལ་ཉིན་དུས་སུ་དཔེ་གཟིགས་དང་འོད་དཔག་མེད་ཀྱི་མཚན་བཟླས་བ་སོགས་མཛད་བཟང་གནང་ནས་བཞུགས། མཚན་མོར་དུས་རྟག་ཏུ་ཀུན་ཁྱབ་ཆོས་དབྱིངས་སྤྲོས་བྲལ་སྟོང་བ་ཉིད་ལ་མཉམ་པར་བཞག་སྟེ་ཐུན་བཞུགས་ཏེ་གནས་ཡོད་པ། དེ་དུས་སུ་ཕག་འཚོ་རོགས་བརྩོན་འགྲུས་དང་བསམ་གཏན་སོགས་ཀྱིས་མཐོང་ཐོས་སུ་གྱུར་བ་ཡིན་ནོ། །འདི་དུས་ཞིག་ལ་བརྩོན་འགྲུས་དང་དྭངས་རིས་ཞེས་པའི་བྱིས་པ་གཉིས་ཀྱིས་ལྐོག་ཏུ་དམ་པ་གང་ལ་ཁྱེད་བླ་མ་བཟང་བས་ཕག་ཟས་མགྱོགས་པར་སྦྱིན་རྒྱུ་ཡིན་ནམ་ཞེས་བཤད་ན་ཕག་ཟས་མགྱོགས་པར་སྦྱིན་པར་འགྱུར་བས་ངེད་གཉིས་ཁྱིམ་ལ་འགྲོ་ཞེས་གྲོས་བྱས་ནས་དམ་པ་གང་གི་མདུན་སར་འབྱོར་བ་ན་རྗེ་བཙུན་དམ་པ་བཞད་གད་ཞིག་བྱས་ནས་གྲོས་བྱས་པ་ཐམས་ཅད་གཅིག་ཀྱང་མ་ལུས་པ་གསུངས་བྱུང་བས་སྐྲག་འཇིགས་སྐྱེས་ནས་ཅི་ཡང་ཟེར་རྒྱུ་མ་རྙེད། དེའི་རྗེས་ནས་དམ་པ་གང་གི་མདུན་ནས་རྣམ་རྟོག་འདྲ་མིན་འཕྲོ་ཚེ་འཇིགས་སྣང་སྐྱེ་བ་ཞིག་ཏུ་གྱུར། འདི་དག་གི་སྐབས་སུ་བྱ་བྲལ་བ་ཆོས་དབྱིངས་དང༌། མུག་བླ་བསོད་ནམས་དང༌། རིག་གསལ་དང༌། གླིང་བླ་གསལ་བཟང་དང༌། ཕིས་འཛི་བླ་མ་ཚུལ་རྒྱམ་སོགས་སྐྱེས་ཆེན་དུ་མ་སྔ་ཕྱི་དུ་མར་ཁོང་གི་སྐུ་མདུན་དུ་ལྐོག་དུ་ཕེབས་ནས་ཁོང་གིས་ཟབ་ཆོས་ཀྱིས་ཐུགས་ཚིམ་པར་མཛད་དོ། །དམ་པ་གང་ཉིད་དགུང་གྲངས་ཞེ་བདུན་པ་སྤྱི་ལོ་༡༩༧༣རབ་རྒྱལ་ཆུ་གླང་གི་ལོར་དམ་པ་གང་གི་རིགས་བདག་མདོས་དབོན་པོ་སངས་རྒྱས་རྡོ་རྗེ་གཟུགས་སྐུ་ཆོས་དབྱིངས་སུ་བསྡུ་བའི་ཚུལ་བསྟན་དུས་དམ་པ་གང་གི་ཞལ་ནས། མདོས་དབོན་པོ་སངས་རྒྱས་རྡོ་རྗེ་ནི་ཤར་ཕྱོགས་མངོན་པར་དགའ་བའི་ཞིང་ཁམས་སུ་བྱོན་པ་བདག་གིས་མངོན་སུམ་དུ་གསལ་བར་མཐོང་ཞེས་བཀའ་བསྩལ་བ་ཡིན་ནོ། །དབྱར་དུས་ཞིག་ལ་གད་ཐོག་གི་གྲོང་སྡེ་རྣམས་ཀྱི་མདོ་ནང་དུ་གློག་རྒྱབ་དུས་སུ་གློག་ཞགས་འཁྱུགས་ནས་འབྲུག་གྲགས་སེར་དྲག་བབས་ནས་གྲོང་སྡེའི་མི་རྣམས་བླ་མའི་གཟིམ་ཁང་གི་བྱ་འདབ་བམ་དྲབ་སྣེའི་འོག་ཏུ་གནས་སྐབས་སུ་རྗེ་བཙུན་དམ་པ་འདི་ཉིད་ཀྱིས་ཕྱག་ལ་ཤིང་ཞིག་བཟུང་སྟེ་གཟིམ་ཁང་གི་ར་སྐོར་ནང་ནས་མི་ལ་བཀའ་བཅོམ་པ་བཞིན་དུ་བཀའ་བཅོམ་ནས་བཞུགས་ཡོད་དུས་ཐོག་དྲུག་ཙམ་གཟིམ་ཁང་གི་མདུན་དང་གཡས་གཡོན་ལ་འཕངས་ཀྱང་དམ་པ་གང་གི་སྐུ་ལ་ཅུང་ཟད་གནོད་མ་ནུས་པ་ཀུན་གྱིས་མཐོང་སྣང་དུ་གྲུབ་པ་ཡིན་ནོ། །སྤྱི་ལོ༡༩༧༧རབ་རྒྱལ་མེ་སྦྲུལ་ཡས་མས་ཀྱི་སྐབས་སུ་རྗེ་བཙུན་དམ་པ་འདི་ཉིད་ཡར་ཐང་གྲོང་མང་གི་སློབ་ཁང་དུ་ཉིན་གསུམ་ཙམ་འཛིན་བཟུང་བྱས་ནས་མངགས། དེ་ནས་ཉིན་གཉིས་ཙམ་གྱི་རྗེས་སུ་རྗེ་བཙུན་དམ་པ་འདི་ཉིད་ཀྱིས་གྲྭ་བསམ་གཏན་ལ་ཁོང་གི་བཅའ་ལག་རྣམས་བདག་གཉེར་གྱིས་བདག་ཁྲིམས་ཁང་ལ་འགྲོ་དགོས་འདུག་ཅེས་ལུང་བསྟན་གསུངས། བཀའ་ལུང་ལྟར་སླར་ཡང་སེ་ལེ་ཐང་གི་ཁྲིམས་ཁང་ལ་བཟུང་དང་པོ་ཁྲིམས་ཁང་སྒོ་ནང་ནས་བྱོན་སྐབས་ཆོས་མཆོག་ཅེས་པ་དེ་སྒོ་སྲུང་ཡིན། སྒོ་སྲུང་དེས་དམ་པ་གང་ཉིད་སུ་ཡིན་མི་ཤེས་ཀྱང་ཐག་ཉེ་ཐོན་དུས་གཟི་བརྗིད་མ་བཟོད་ནས་མེ་མདའ་དེ་ས་ལ་བཞག་ནས་མགོ་སྒུར་ནས་འདུག་དགོས་བྱུང་ཞེས་སྒོ་སྲུང་བ་རང་ཉིད་ཀྱིས་བཤད་དོ། །དེ་ནས་ཁྲིམས་ཁང་གི་ལས་མཁན་རྣམས་ཀྱིས་ལྕག་གིས་རྡུང་བ་སོགས་ཇི་ལྟར་བྱས་ཀྱང་གཡོ་མེད་ཏིང་ངེ་འཛིན་གྱི་ངང་དུ་བཞུགས་ནས་མིག་འབྱེད་འཛུམ་ཙམ་ཡང་མ་བྱས་པར་བཞུགས་པ་དང༌། གྲང་ངར་ཆེ་བའི་སྐབས་གོས་མེད་སྐུ་རྗེན་དུ་བཞག་ཀྱང་གཏུམ་མོའི་བདེ་དྲོད་ལ་བརྟེན་ནས་ཅུང་ཟད་གནོད་མ་ནུས་པས་ཁྲིམས་སྲུང་ལས་མཁན་རྣམས་ཀྱིས་འདི་ལ་རྡུང་རྡེག་བྱས་ན་རྒྱ་སྐད་དུ་མི་ཡོས་ཙོ་ཡོང་ཞེས་དོན་འབྲས་མེད་ཅེས་བཤད་པ་ཁྲིམས་སྲུང་བ་དང་ཁྲིམས་གྲོགས་རྣམས་ཀྱིས་ཐོས། དེ་དུས་སུ་བདེ་སྲུང་བ་ཤེས་རབ་ཅེས་པ་དེས་ང་རང་ཚོས་ཟླ་ཕོག་བྱ་བ་འདི་ལྟ་བུ་ལ་བརྟེན་ནས་ལེན་གྱི་ཡོད་པས་རྡེག་རྡུང་བྱེད་དགོས་པ་རེད་ཅེས་བཤད་ཚེ་དམ་པ་འདི་ཉིད་ཀྱིས་བདག་ལ་རྡེག་རྡུང་གྱིས་གསུངས་ནས་བྱམས་བརྩེ་ཡང་ཡང་བསྒོམ་པ་བཤད་སྲོལ་ཙམ་མ་ཡིན་པར་དོན་ལ་གནས་པ་ཡིན་ལ། དེ་ནས་ཟླ་བ་བཞི་ཡས་མས་ཙམ་ནས་ཉེས་མེད་རྗེ་བཙུན་དམ་པ་གང་ཉིད་ཁྲིམས་ལས་གྲོལ་བ་ཡིན་ནོ། །ཡང་སྐབས་ཞིག་ལ་འཇའ་བླ་ཚུལ་རྒྱམ་གྱིས་རྗེ་བཙུན་དམ་པ་གང་ལ་བདག་གི་མ་ཤི་ནས་བདག་གིས་རུས་སྦྱོང་ཡུན་རིང་བྱས་ནས་རུས་པའི་མདོག་ཐེངས་གསུམ་ཙམ་ལ་འགྱུར་ཡང་བདག་གིས་ནི་མ་རྒན་དེ་གར་སྐྱེས་རྨི་ལམ་ཙམ་ཡང་རྨིས་མ་མྱོང་བས་དམ་པ་ཁྱེད་ཀྱིས་བདག་ལ་མ་གསང་བར་གསུང་བར་ཡང་ཡང་ནན་གྱིས་ཞུས་པའི་ངོར་རྗེ་བཙུན་དམ་པའི་ཞལ་ནས་ཁྱེད་ཀྱི་མ་ནི་བྱང་ཕྱོགས་སུ་ཧུས་ཧུས་ཞིག་གི་བུ་རུ་མི་ལུས་ཙམ་པོ་བ་ཞིག་བླངས་འདུག དེ་ནས་ཚེ་འཕོས་ཐུབ་ན་བདེ་འགྲོའི་རྟེན་བཟང་ཐོབ་པར་འགྱུར་བས་ཁྱོད་ཀྱིས་བརྩོན་དང་ཁོང་གིས་ཀྱང་འབད་པར་བྱའོ་ཞེས་གསུངས་སོ། །དེ་ནས་རྗེ་བཙུན་དམ་པ་གང་ཉིད་དགུང་གྲངས་ང་བཞི་བ་སྤྱི་ལོ་༡༩༨༠རབ་རྒྱལ་དྲག་པོ་ཞེས་པ་ལྕགས་སྤྲེལ་ལོ་ལ་དཀར་ཕྱོགས་ཆོས་ཀྱི་དབུ་འཕང་ཅུང་མགོ་མཐོ་བའི་དབུ་ཚུགས་པ་ཡིན་ལ། རྗེ་བཙུན་དམ་པ་འདི་ཉིད་ཀྱིས་དགོན་གོང་མའི་སྒྲུབ་གྲྭའི་ཚོགས་ཁང་སོགས་ཉམས་གསོ་བྱས། ལོ་དེའི་ས་ག་ཟླ་བའི་དུས་སུ་སྦྱོར་དྲུག་པ་གསར་བཞུགས་བསམ་གཏན་དང༌། ཚུལ་ཁྲིམས་བཟང་དང༌། ཚུལ་ཁྲིམས་དཔལ་དང་གསུམ་ཡོད་ལ། དེ་དག་གིས་གད་དམར་ཞེས་པའི་གྲོང་དེར་སྦྱོར་དྲུག་གི་དབུ་བཟུང་ནས་དབེན་གསུམ་གྱི་སྐབས་དགོན་གོང་མའི་སྒྲུབ་གྲྭ་ལ་གནས་སྤོར་བྱས་ནས་བཞུགས། ཡང་དེའི་དུས་སྐབས་ཞིག་ལ་རྗེ་བཙུན་དམ་པ་གང་གི་སྔར་ཡིག་བརྒྱའི་དུང་འཁོར་བཞེངས་བ་དེ་རིག་གནས་གསར་བརྗེ་ཞེས་པའི་ཟིང་འཚུབ་ཀྱི་སྐབས་སུ་གཏོར་བཤིག་བཏང་བ་དེ་སླར་ཡང་ཡིག་བརྒྱའི་དུང་འཁོར་སྔར་ལས་ཆེ་བ་དང༌། འཁོར་ཁང་ནང་གི་ལྷ་དང་བཅས་པ་ལེགས་པར་བཞེངས། འཁོར་ལོ་འདི་རང་འཁོར་བྱེད་པར་གྲགས་ཤིང་གྲུབ་པ་ཡིན་ཏེ། ནམ་ལང་བའི་དུས་ཁ་བ་ཆེར་བབས་པའི་སྐབས་ལ་མི་གཅིག་ཀྱང་མ་སོང་བ་རྐང་རྗེས་ཡོད་མེད་ཀྱིས་ཤེས་ཐུབ་པས་མི་གཅིག་ཀྱང་མ་སོང་ཡང་འཁོར་ལོ་འདི་ཉིད་རང་འཁོར་བྱེད་བཞིན་ཡོད་པ་མི་དུ་མས་མཐུན་སྣང་དུ་གྲུབ་པ་ཡིན་ནོ། །དེ་ནས་དམ་པ་གང་ཉིད་དགུང་གྲངས་ང་བཅུ་རྩ་ལྔ་བ་སྤྱི་ལོ༡༩༨༡རབ་རྒྱལ་ལྕགས་བྱ་ལོར་སྦྱོར་དྲུག་པ་གསར་འདུག་བླ་མ་ཀ་དག རྡོར་བཟང༌། ཆོས་ཀུན་དཔལ། ཆོས་མཆོག བརྩོན་འགྲུས། རིན་ཆེན་དཔལ་སོགས་བརྒྱད་དང༌། ལོ་དེར་རྗེ་བཙུན་དམ་པ་གང་ཉིད་འབྲ་ལོ་དགོན་དུ་ཆིབས་བསྒྱུར་བསྐྱངས་ནས་གདུལ་བྱ་པད་ཚལ་བཀྲ་བའི་གཉེན་དུ་བཞུགས་ཏེ། མདོ་ལས། སྟོང་བ་ཞི་བ་སྐྱེ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་ཏེ། །དེ་དག་ཐུགས་རྗེ་མང་བས་ཐབས་ཚུལ་དང༌། །རིགས་པ་བརྒྱ་དག་གིས་ནི་འཛུགས་པར་མཛད། །ཅེས་དང༌། ཇི་སྐད་དུ། འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་འཕོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་མཛད། །ཅེས་གསུངས་པ་ལྟར་འཁོར་འདུས་ཚོགས་སྟོང་ཕྲག་དུ་མ་བདེ་ཆེན་ཞིང་དབང་དང༌། ཞིང་ཁྲིད་བཅས་ཉི་མ་བདུན་ལ་གསུངས་ནས་སྐྱེ་དགུ་རྣམས་ལ་རྣམ་དཀར་ཐར་བའི་ལམ་བཟང་ལ་འགོད་པར་མཛད། དེ་དུས་སུ་གསེར་བྱེ་ནམ་མཁའ་ནས་འབབ་པས་གོས་དང་ས་གཞི་སེར་པོ་གྱུར་བ་བཤད་སྲོལ་ཙམ་མ་ཡིན་པར་ཀུན་གྱིས་མཐོང་སྣང་དུ་གྲགས་ཤིང་གྲུབ་པ་ཡིན་ནོ། །དེ་ནས་དམ་པ་གང་ཉིད་དགུང་གྲངས་ལྔ་དྲུག་པ་སྤྱི་ལོ༡༩༨༢རབ་རྒྱལ་རྔ་ཆེན་ཞེས་པ་ཆུ་ཁྱི་ལོར་རྗེ་བཙུན་དམ་པ་གང་ཉིད་སྐུ་འཁོར་བཞི་བཅུ་ཡས་མས་དང་བཅས་ནས་དབུས་གཙང་ཆོས་ཀྱི་ཞིང་དུ་ཆིབས་བསྒྱུར་མཛད། ལྷ་སའི་ཇོ་བོ་ཤཱཀྱ་མུ་ནེ་ལ་གསེར་ཆབ་ཕུལ་བ་སོགས་དང༌། སེར་འབྲས་དགེ་གསུམ་དང༌། པོ་ཏ་ལ་དང༌། ནོར་བུ་གླིང་ག་དང༌། བསམ་ཡས་དང༌། བསམ་ཡས་མཆིམས་ཕུ་དང༌། ཁྲ་འབྲུག་སྒྲོལ་མ་སོགས་དང༌། བཀྲ་ཤིས་ལྷུན་པོ་དང༌། རྒྱལ་རྩེ་དཔལ་འཁོར་ཆོས་སྡེའི་མཆོད་རྟེན་དང༌། ས་སྐྱ་སོགས་དང༌། སྐུ་འབུམ་དང་བཅས་པ་ལ་མཆོད་མཇལ་དང་ཕྱག་སྐོར་དུ་མ་བྱས་ནས་བསྟན་འགྲོའི་དོན་དུ་སྨོན་ལམ་རྒྱ་ཆེར་མཛད་པ་ཡིན་ནོ། །ལོ་དེར་སྦྱོར་དྲུག་པ་བླ་མ་སེངྒ་དང༌། རིགས་སྨྲ་བ་ཡེ་ཤེས་དཔལ་དང༌། ཐུབ་དབང་དང༌། རང་བྱུང་དང༌། ངག་དབང་བློ་གྲོས་སོགས་བཅུ་དང༌། ལོ་དེར་དམ་པ་གང་ཉིད་ཀྱིས་དགེ་འདུན་གྱི་འདུས་ཚོགས་ཡོངས་ལ་ཇོ་ཕུར་གྱི་རྒྱུད་འདེབས་ནས་བཟུང་དཔལ་ཆེན་ཐུགས་ཐིག་དང༌། སྦས་པ་མིག་འབྱེད་དང་བཅས་པ་དང༌། སྒྲོལ་མ་དམར་མོ་དང༌། མཎྜལ་བཞི་བ་རྣམས་ཀྱི་བཀླག་ལུང་བསྩལ་བ་ཡིན་ནོ། །ལོ་དེར་ཡང་རྩ་བའི་གདན་ས་ཨ་སྐྱོང་ཡར་ཐང་གི་ཆོས་སྡེ་འདི་དང༌། འབྲ་ལོ་དང༌། གྱི་ལུང་སོགས་སུ་ཕེབས་ནས། དད་ལྡན་གྱི་གདུལ་བྱ་རྒྱུ་སྐར་གྱི་ཕྲེང་བ་ཚར་དུ་དངར་བའི་གཉེན་དུ་བཞུགས་ནས་བདེ་ཆེན་ཞིང་དབང་དང༌། བདེ་ཆེན་ཞིང་ཁྲིད་ཀྱི་གདམས་ངག་ཆོས་ཀྱི་བདུད་རྩིས་ཚིམ་པར་མཛད་པ་ཡིན་ནོ། །དེ་ནས་རྗེ་བཙུན་དམ་པ་དགུང་གྲངས་ང་བདུན་པ་སྤྱི་ལོ་༡༩༨༣རབ་རྒྱལ་ཆུ་མོ་ཕག་གི་ལོར་སྦྱོར་དྲུག་པ་གསར་བཞུགས་རབ་འབྱོར། དགའ་རབ་རྡོ་རྗེ། འོད་དྲི། འཇམ་དབྱངས། ཨ་དོན་སོགས་བརྒྱད་དང༌། དེའི་དུས་སྐབས་ཞིག་ལ་རྗེ་བཙུན་དམ་པ་འདི་ཉིད་དང་སྦྱོར་དྲུག་པ་རྣམས་དང་མཉམ་དུ་རྗེ་བཙུན་དམ་པས་དབུ་མཛད་བྱས་ནས་ཚངས་སྒྲ་གསུང་བའི་སྐབས་སློབ་མ་ཞིག་གི་བསམ་པ་ལ་རྔ་རོལ་རྡུང་ཚུལ་ཅུང་ཟད་མི་འདྲ་སྙམ་པ་ལ་དམ་པ་གང་ཉིད་ཀྱིས་མཁྱེན་ནས་རྔ་རོལ་རྡུང་ཚུལ་འདི་སྔོན་རྒྱ་སྤྲུལ་སྐུའི་ཕྱག་སྲོལ་ཡིན་ཚུལ་སྐབས་དེར་ཞིབ་རྒྱས་སུ་གསུངས་ལ། ལོ་དེར་པུང་ཡིས་དང༌། འབྲ་ལོ་དགོན་དང༌། གྱི་ལུང་སོགས་ལ་ཞབས་ཀྱིས་བཅགས་ནས་བདེ་བ་ཅན་གྱི་རྒྱུ་བཞི་སོགས་ཟབ་ཆོས་དུ་མ་དང༌། བདེ་ཆེན་ཞིང་དབང་རྣམས་སྐལ་བཟང་གདུལ་བྱའི་ཚོགས་ལ་བགོ་སྐལ་དུ་འགྱེད་པའོ། །དེ་ནས་དམ་པ་འདི་ཉིད་དགུང་གྲངས་ང་བརྒྱད་པ་སྤྱི་ལོ༡༩༨༤རབ་རྒྱལ་མིག་དམར་ཞེས་པ་ཤིང་ཕོ་བྱི་བའི་ལོ་ལ་སྦྱོར་དྲུག་པ་གསར་བཞུགས་དགེ་ལེགས་དང༌། ཤེར་སྒྲིགས། ཆོས་རྡོར། ཕྲན་ཐ་ཤལ་བ་ང་རང་དང༌། རིན་ཚུལ། ཆོས་འཕགས། སོགས་བརྒྱད་དང༌། ལོ་དེར་ཆོས་སྡེ་འདི་དང༌། སྨྲ་ཤོད་ཀྱི་སྒོ་མང་དགོན་པ་དང༌། འབྲ་ལོ་དགོན། པུང་ཡུས། གྱི་ལུང་སོགས་ལ་ཐུགས་བྱམས་བརྩེའི་སྒོ་ནས་ཞབས་ཀྱིས་བཅགས་ཏེ་ཉིན་བདུན་རེ་བདུན་རེ་བདེ་ཆེན་ཞིང་སྒྲུབ་ཀྱི་སྒོ་ནས་སྔ་ཕྱི་ཀུན་དུ་མཆོད་མེ་སོགས་མཆོད་པ་ཁྲི་ཕྲག་དུ་མ་དང༌། གདུལ་བྱའི་ཚོགས་ལ་མཁས་གྲུབ་ཀརྨ་ཆགས་མེད་ཀྱི་བདེ་སྨོན་གྱི་ཁྲིད་དང༌། སྟོང་ཟ་སིདྡྷིའི་ཞིང་ཁྲིད་སོགས་ཀྱི་སྒོ་ནས་བདེ་བ་ཅན་གྱི་རྒྱུ་བཞི་དང༌། བདེ་ཆེན་ཞིང་དབང་བཅས་སེམས་རྒྱུད་ལ་ཕན་ངེས་ཀྱི་ཟབ་ཆོས་ལེགས་པར་གནང་བ་ཡིན་ནོ། །དེ་ནས་རྗེ་བཙུན་བླ་མ་དམ་པ་འདི་ཉིད་དགུང་གྲངས་ང་བཅུ་རྩ་དགུ་བ་སྤྱི་ལོ་༡༩༨༥རབ་རྒྱལ་ཁྲོ་བོ་ཞེས་པ་ཤིང་གླང་ལོའི་དཔྱིད་དུས་སུ་ལྷ་སྡེ་རྣམས་ཀྱིས་སྒྲོལ་མའི་མཆོད་རྟེན་བཞེངས་བའི་མགོ་རྩོམ། དེ་དུས་སུ་དམ་པ་འདི་ཉིད་ཀྱིས་སྒྲོལ་མའི་མཆོད་རྟེན་གྱི་ཐོག་བརྩེགས་དགུ་བོ་ཡོངས་སུ་གྲུབ་ནས་མཆོད་རྟེན་གྱི་ཉི་ཟླ་དང་བཅས་པ་མདང་དགོང་རྨི་ལམ་འོད་གསལ་གྱི་སྐབས་སུ་ཤར་བས་མཆོད་རྟེན་འདི་ལེགས་འགྲུབ་ཡོང་ཞེས་ལུང་བསྟན་གནང༌། དམ་པ་འདི་ཉིད་ཀྱིས་མཆོད་རྟེན་འདི་བཞེངས་བའི་ཆ་རྐྱེན་དུ་རྒྱུ་རྫས་དུ་མ་སྦྱིན། ལོ་དེར་བར་རོད་བློ་འཕེལ་སོགས་ཀྱིས་ཞུས་ནས་སྒ་མདའ་ལ་ཆིབས་བསྒྱུར་གནང་ནས་ཉིན་བདུན་ཙམ་ལ་བདེ་ཆེན་ཞིང་དབང་དང༌། བདེ་བ་ཅན་གྱི་རྒྱུ་བཞིའི་སྒོ་ནས་ཞིང་ཁྲིད་རྒྱས་པར་གསུངས་ནས་ཐུགས་བརྩེ་བའི་བཀའ་དྲིན་བསྩལ་བ་ཡིན་ནོ། །དེའི་སྐབས་སུ་བདེ་བ་ཅན་གྱི་རྒྱུ་བཞི་གསུངས་པ་སྒྲ་ཐག་ལས་བཤུས་ཏེ། དོན་བསྡུས་སུ་ཅུང་ཟད་བཀོད་ན་འདི་ལྟ་སྟེ། འོ་ད་ལན་སྐབས་སུ་བབས་པ་བདེ་བ་ཅན་གྱི་རྒྱུ་བཞི་མདོར་བསྡུས་ཙམ་བཤད་ན། དེ་ཡང་བདག་ཅག་གི་སྟོན་པ་ཐུགས་བརྩེ་བ་དང་ལྡན་པ་དེ་ཉིད་ཀྱི་འོད་མདོ་ལས། བཅོམ་ལྡན་འདས་གལ་ཏེ་བདག་བྱང་ཆུབ་འཐོབ་པའི་ཚེ་སངས་རྒྱས་ཀྱི་ཞིང་གྲངས་མ་མཆིས་དཔག་ཏུ་མ་མཆིས་པ་དག་ན་སེམས་ཅན་གང་དག་གིས་བདག་གི་མིང་ཐོས་ནས་སངས་རྒྱས་ཀྱི་ཞིང་དེར་སྐྱེ་བར་བགྱི་བའི་སླད་དུ་སེམས་གཏོང་ཞིང༌། དགེ་བའི་རྩ་བ་རྣམས་ཀྱང་ཡོངས་སུ་བསྔོ་བར་བགྱིད་ན་མཚམས་མ་མཆིས་པ་བགྱིད་པ་དང༌། དམ་པའི་ཆོས་སྤོང་བའི་སྒྲིབ་པས་བསྒྲིབས་པའི་སེམས་ཅན་རྣམས་མ་གཏོགས་པར་དེ་དག་ཐ་ན་སེམས་བསྐྱེད་པའི་འགྱུར་བ་བཅུས་སངས་རྒྱས་ཀྱི་ཞིང་དེར་སྐྱེ་བར་མ་གྱུར་པ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བགྱིའོ། །ཞེས་གསུངས་པ་ལྟར་བདེ་བ་ཅན་སྐྱེ་བའི་རྒྱུ་བཞི་ལས། དང་པོ་དད་པ་དང་འདུན་པ་བསྐྱེད་པ་ནི། སྟོན་པ་ཐུགས་རྗེ་དང་ལྡན་པའི་ཐུགས་རྣམ་པ་ཐམས་ཅད་མཁྱེན་པས་བདེ་བ་ཅན་གྱི་ཞིང་བཀོད་དང་ཡོན་ཏན་རྣམས་མངོན་སུམ་དུ་མཁྱེན་ནས་གསུངས་པ་ཡིན་པས་འཆི་མེད་རྔ་སྒྲ་དང་འོད་མདོ་སོགས་ལས་བསྟན་པའི་ཞིང་ཁམས་གཙོ་འཁོར་དང་བཅས་པའི་རྣམ་པ་ཐམས་ཅད་སྤྱི་དང་བྱེ་བྲག་རྣམས་ངེས་པར་བདེན་ནོ་སྙམ་དུ་ཡིད་ཆེས་པའི་སྒོ་ནས་བདེ་བ་ཅན་གྱི་ཞིང་གི་སྣོད་བཅུད་ཀྱི་བཀོད་པ་དང༌། དེར་སྐྱེ་བའི་རྒྱུ་ཚོགས་བསྒྲུབ་ན་འགྲུབ་པ་དང༌། ཞིང་དེར་སྐྱེས་ནས་ས་ལམ་གྱི་ཡོན་ཏན་རྣམས་བདེ་བླག་ཚེགས་མེད་དུ་འབྱུང་བ་ལ་སོགས་པའི་ཚུལ། དང་འདོད་ཡིད་ཆེས་པའི་དད་པ་སྒོ་དུ་མ་ནས་བསྐྱེད། དེ་ནས་ཐབས་ཅི་ཡོད་ཀྱི་ཞིང་ཁམས་དེར་ངེས་པར་སྐྱེ་བར་བྱའོ། །དེ་ཡང་རྒྱུ་ཚོགས་མ་ཚང་ན་མི་སྐྱེ་བས་རྒྱུ་ཚོགས་མདོ་ལས་གསུངས་པ་རྣམས་སྒྲུབ་པར་བགྱིའོ་སྙམ་དུ་ཞིང་དེར་སྐྱེ་བར་བྱ་སྟེ། འོད་མདོ་ལས། གང་དག་རྒྱལ་བའི་བཀའ་དང་ཤེས་རབ་ཅན། །དེ་དག་དེ་བས་བསོད་ནམས་མང་དུ་འགྱུར། །དོན་དམ་ཐོབ་ཕྱིར་དད་པ་རྩ་བ་སྟེ། །དེ་ལྟ་བས་ན་ཐོས་པས་ཡིད་གཉིས་སོལ། །ཞེས་དང༌། དེ་ལྟ་བས་ན་དེ་བཞིན་གཤེགས་བསྟན་ཐོས་ནས་མགུ་དང་དད་བསྐྱེད་ལ། བདེ་བ་ཅན་གྱི་འཇིག་རྟེན་ཁམས་མཆོག་ཏུ། །འགྲོ་བར་བྱ་ཕྱིར་མོས་པ་དྲག་པོ་བསྐྱེད། །ཅེས་དང༌། བརྒྱ་ལམ་ན་ནི་མི་ཡི་ལུས་རྙེད་ལ། །བརྒྱ་ལམ་ན་ནི་སངས་རྒྱས་འབྱུང་བར་འགྱུར། །དད་དང་ཤེས་རབ་ཡུན་རིང་རྙེད་པར་འགྱུར། །དེ་བས་དོན་ཐོབ་བྱ་ཕྱིར་བརྩོན་འགྲུས་བསྐྱེད། །ཅེས་དང༌། འཆི་མེད་རྔ་སྒྲ་ལས་ཀྱང༌། རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་མོས་པ་དང་དང་བ་དང་གུས་པ་མང་བ་དེར་སྐྱེ་བར་འགྱུར་ཏེ། ཞེས་གསུངས་པ་ལྟར་རོ། །བདེ་བ་ཅན་སྐྱེ་བའི་རྒྱུ་ཚོགས་གཉིས་པ་བདེ་བ་ཅན་གྱི་ཞིང་ཁམས་དང༌། དེ་བཞིན་གཤེགས་པ་འོད་དཔག་མེད་འཁོར་བཅས་ཡིད་ལ་བྱེད་པའི་ཚུལ་ནི། གནས་ཁང་བྱི་དོར་དང༌། རྟེན་དང་མཆོད་པ་ལེགས་པར་བཤམས་ནས། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་བཀོད་པ་ཕུན་སུམ་ཚོགས་པ་ཐམས་ཅད་ཡོངས་སུ་རྫོགས་པ། བེམ་ཆོས་མ་ཡིན་པར་སངས་རྒྱས་འོད་དཔག་མེད་ཀྱི་ཡེ་ཤེས་ཀྱི་སྣང་ཆ་ལས་གྲུབ་པ། གསེར་གྱི་ས་གཞི། རིན་པོ་ཆེ་དུ་མའི་ཚལ་དང༌། མེ་ཏོག་གི་ཚལ་དང༌། མཛེས་སྡུག་གི་ཆུ་མཚོ་དང༌། རིན་པོ་ཆེ་སྣ་ཚོགས་ཀྱི་རི་བོ་དང༌། བྱ་སྣ་ཚོགས་དང༌། གཞལ་མེད་ཁང་སོགས་རྒྱན་བཀོད་ཡོངས་སུ་རྫོགས་པའི་ཞིང་ཁམས་དེར་བཅོམ་ལྡན་འདས་འོད་དཔག་མེད་མཚན་དང་དཔེ་བྱད་ཀྱིས་བརྒྱན་པའི་སྐུ་དང༌། བྱང་ཆུབ་སེམས་དཔའ་སྤྱན་རས་གཟིགས་དང་མཐུ་ཆེན་ཐོབ་སོགས་འཁོར་ཐེག་པ་གསུམ་གྱི་དགེ་འདུན་གྱི་ཚོགས་བསམ་གྱིས་མི་ཁྱབ་པ་སོགས་དཔྱད་འཇོག་ཅི་རིགས་ཀྱི་སྒོ་ནས་ཡང་ནས་ཡང་དུ་བསྒོམ་པར་བྱ་སྟེ། འོད་མདོ་ལས། ཀུན་དགའ་བོ་འཇིག་རྟེན་གྱི་ཁམས་བདེ་བ་ཅན་གྱི་ཡོན་ཏན་དང༌། བསྔགས་པ་དེ་ལྟར་དཔག་ཏུ་མེད་དོ། །ཞེས་པ་ནས། ཀུན་དགའ་བོ་སེམས་ཅན་གང་དག་ཁ་ཅིག་ནི་དེ་བཞིན་གཤེགས་པའི་རྣམ་པས་ཡང་དང་ཡང་དུ་ཡིད་ལ་བྱེད་པ་དང༌། ཞེས་སོགས་རྒྱ་ཆེར་གསུངས་སོ། །གསུམ་པ་བདེ་བ་ཅན་གྱི་རྒྱུ་སྒོ་དུ་མ་ནས་ཚོགས་བསགས་པ་ནི། བདེ་བ་ཅན་དེར་སྐྱེ་བའི་རྒྱུ་དམིགས་ཏེ། འོད་དཔག་མེད་མངོན་སུམ་དུ་མཐོང་བར་འདོད་པའི་སྒོ་ནས་ཡང་ནས་ཡང་དུ་ཡིད་ལ་བྱེད་པ། འོད་དཔག་མེད་ཀྱི་མཚན་བརྗོད་པ། བློ་ལྡོག་རྣམ་བཞི་སྒོམ་པ། ཡན་ལག་བདུན་པ་དང༌། སྐྱབས་འགྲོ། བདེན་བཞིའི་འཇུག་ལྡོག་སོགས་ཅི་ནུས་སུ་བསྒོམ་པར་བྱ་བ་ཡིན་ཏེ། བདེ་བ་ཅན་གྱི་བཀོད་པའི་མདོ་ལས། སངས་རྒྱས་ཀྱི་ཞིང་དེར་སྐྱེ་བར་བྱ་བའི་ཕྱིར་དགེ་བའི་རྩ་བ་རྣམས། ཞེས་དང༌། འཆི་མེད་རྔ་སྒྲ་ལས། དགེ་བའི་རྩ་བ་ཐམས་ཅད་ཀྱང༌། །ཞེས་དང༌། འོད་མདོ་ལས། སངས་རྒྱས་ཀྱི་ཞིང་དེར་སྐྱེ་བར་བགྱི་བའི་སླད་དུ་སེམས་གཏོང་ཞིང་དགེ་བའི་རྩ་བ་རྣམས་ཀྱང་བསྔོ་བར་བགྱིད་ན། ཞེས་སོགས་གསུངས་སོ། །བདེ་བ་ཅན་གྱི་རྒྱུ་བཞི་བ་དགེ་རྩ་རྣམས་ཞིང་དེར་སྐྱེ་བའི་རྒྱུར་བསྔོ་བའི་སྨོན་ལམ་ནི། སངས་རྒྱས་འོད་དཔག་མེད་ཡིད་བྱེད་ཀྱི་དགེ་བའི་རྩ་བ་དེས་མཚོན་པའི་རང་གཞན་དུས་གསུམ་གྱི་དགེ་ཚོགས་ཐམས་ཅད་ཀྱི་མཐུ་ལ་བརྟེན་ནས་བདེ་བ་ཅན་དེར་སྐྱེས་ནས་འོད་དཔག་མེད་འཁོར་བཅས་ཞལ་མངོན་སུམ་དུ་མཐོང་ནས་ཞིང་དེར་སྐྱེས་སྦྱང་གི་ཡོན་ཏན་མ་ལུས་པ་ཐམས་ཅད་ཐོབ་པར་གྱུར་བར་སྨོན་པ་ཡིན་ཏེ། འཕགས་པ་བདེ་བ་ཅན་གྱི་མདོ་ལས། སངས་རྒྱས་ཀྱི་ཞིང་དེར་སྐྱེ་བར་བྱ་བའི་ཕྱིར་དགེ་བའི་རྩ་བ་རྣམས་གུས་པར་ཡོངས་སུ་བསྔོ་བར་བྱའོ། །ཞེས་དང༌། འོད་མདོ་ལས། དགེ་བའི་རྩ་བ་རྣམས་གུས་པར་ཡོངས་སུ་བསྔོ་བར་བགྱིད་ན། ཞེས་སོགས་མང་དུ་གསུངས་སོ། །ཡང་ཞིང་དེའི་བྱང་ཆུབ་སེམས་དཔའི་རིགས་སུ་སྐྱེ་བའི་རྒྱུ་ཚོགས་ལ་ནི། བྱང་ཆུབ་ཀྱི་སེམས་བསྐྱེད་སོགས་ཚང་དགོས་ཏེ། འོད་མདོ་ལས། ཀུན་དགའ་བོ་སེམས་ཅན་གང་དག་ཁ་ཅིག་ནི་དེ་བཞིན་གཤེགས་པའི་རྣམ་པའི་ཡང་དང་ཡང་དུ་ཡིད་ལ་བྱེད་པ་དང༌། དགེ་བའི་རྩ་བ་དཔག་ཏུ་མེད་པ་བསྐྱེད་པ་དང༌། བྱང་ཆུབ་ཏུ་སེམས་ཡོངས་སུ་བསྔོས་ཏེ། འཇིག་རྟེན་གྱི་ཁམས་དེར་སྐྱེ་བར་སྨོན་ལམ་འདེབས་པ་དེ་དག་འཆི་བའི་དུས་ཉེ་བར་གནས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་དགེ་སློང་གི་ཚོགས་དུ་མས་ཡོངས་སུ་བསྐོར་ཅིང་མདུན་གྱི་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འདས་འོད་དཔག་མེད་དེ་མཐོང་ནས་རབ་ཏུ་དང་བའི་སེམས་ཀྱིས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དེ་ཉིད་དུ་སྐྱེ་བར་འགྱུར་རོ། །ཞེས་སོགས་གསུངས་སོ། །ཡང་བདེ་བ་ཅན་གྱི་རྒྱུ་བཞི་ནི། ཞིང་ཁམས་ཀྱི་རྣམ་པ་ཡིད་ལ་ཡང་ནས་ཡང་དུ་བྱ་བ། བསོད་ནམས་ཀྱི་ཚོགས་བསགས་པ། བྱང་ཆུབ་མཆོག་ཏུ་སེམས་བསྐྱེད་པ། དགེ་བའི་རྩ་བ་ཐམས་ཅད་རང་གཞན་བདེ་བ་ཅན་དུ་སྐྱེ་བའི་རྒྱུར་བསྔོ་བ་ལ་བཤད་པའི་མཁས་པའང་ཡོད་དོ། །ཞེས་དམ་པ་གང་གི་གསུངས་ཟིན་མདོར་བསྡུས་ཏེ་བཀོད་པའོ། ། རྗེ་བཙུན་དམ་པ་གང་ཉིད་ལོ་དེའི་ས་ཟླའི་ཚེས་ཉེར་གཉིས་ལ་ཨ་པང་གཏེར་སྟོན་གྱི་སྲས་མོ་མཁའ་འགྲོ་མ་ཏཱ་རེ་ལྷ་མོའི་མདུན་ནས་དབང་ལུང་དུ་མ་ཞུས། ལོ་དེའི་ཆུ་སྟོད་ཟླ་བའི་ཚེས་བཅུ་བཞི་ལ་ལོ་དེར་སྦྱོར་དྲུག་མཐར་ཕྱིན་པ་རྣམས་ཀྱི་དགའ་སྟོན་ལ་དཔལ་དུས་ཀྱི་འཁོར་ལོའི་ཚོགས་མཆོད་ལ་དམ་པ་གང་ཉིད་ཕེབས་པ་ཡིན་ནོ། །དེ་ནས་སྒྲོལ་མའི་མཆོད་རྟེན་ལེགས་གྲུབ་བྱུང་ནས་ལོ་དེའི་ཐ་སྐར་ཟླ་བའི་ཚེས་བཞི་ལ་རྗེ་བཙུན་དམ་པ་འདི་ཉིད་དང༌། དགེ་འདུན་འདུས་པ་རྒྱ་མཚོས་རབ་གནས་བསྔོ་སྨོན་དང་བཅས་ཏེ་བཀྲ་ཤིས་དགའ་སྟོན་རྒྱ་ཆེར་བྱས་པ་ཡིན་ནོ། །ཟླ་དེར་སྦྱོར་དྲུག་པ་ཀླུ་སྒྲུབ། རིན་ཆེན། ཆོས་རྣམ་སོགས་མི་བཅུ་དགུ་གསར་འདུག་བྱས་པ་ཡིན་ལ། སྐབས་ཞིག་ལ་དམ་པ་འདི་ཉིད་ལ་དད་འདུན་ཆེ་བའི་ཚེ་པོ་ཞེས་པའི་རྒད་པོ་ཞིག་ཡོད་པ་དེ་མཚན་གཅིག་ལ་ཆར་བའི་ནང་དུ་ལྷག་ཀྱང་རློན་ཐིགས་ཙམ་ཡང་མ་བྱུང་བས་ཀུན་གྱིས་ཁྱོད་ལ་རློན་ཐིགས་ཙམ་ཡང་མི་བྱུང་བ་ཅི་ཡིན་ཞེས་དྲིས་ཚེ་བདག་གིས་བླ་མ་བཤད་སྒྲུབ་དཔལ་ལ་གསོལ་བ་བཏབ་པས་ཡིན་ཞེས་བཤད་པས་བླ་མའི་བྱིན་རླབས་དང་སློབ་མའི་དད་པ་གཉིས་ཚོགས་བྱུང་ན་དེ་ལྟར་འབྱུང་བར་ངེས་པ་ཡིན་ནོ། །ལོ་དེར་སྤྲུལ་སྐུ་ངག་དབང་བསྟན་འཛིན་སོགས་དགེ་འདུན་བརྒྱ་ཕྲག་ཙམ་ལ་དམ་པ་གང་གིས་འོད་མདོའི་བཀླག་ལུང་གསུངས། དེ་ནས་ལོ་དེའི་སྨིན་དྲུག་ཟླ་བའི་ཚེས་གཅིག་ལ་མཁས་ཤིང་གྲུབ་པའི་དབང་ཕྱུག་༧རྗེ་བཙུན་དམ་པ་མཁན་ཆེན་བློ་བཟང་འཕྲིན་ལས་ཀྱིས། སྐལ་བཟང་གི་གདུལ་བྱ་རྗེ་བཙུན་དམ་པ་འདི་ཉིད་དང༌། བྱ་བྲལ་བ་ཆོས་དབྱིངས་དང༌། དགོན་སྡེ་འདིར་བཀའ་དྲིན་མཚུངས་ཟླ་མ་མཆིས་པ་བླ་མ་ཨེ་མགོན་དང༌། མཁན་ཆེན་ཤེས་རབ་དཔལ་དང༌། ཚུལ་རྒྱམ་དང༌། གླང་འབུད་དགོན་གྱི་མཁན་སྤྲུལ་སོགས་འདུས་པ་ཁྲི་ཕྲག་གསུམ་ལྷག་ལ་ས་ཆོག་ཐིག་རྡུལ་མཚོན་བཅས་པ་སྔོན་དུ་འགྲོ་བའི་སྒོ་ནས་དཔལ་དུས་ཀྱི་འཁོར་ལོའི་ལྷ་དྲུག་བརྒྱ་སོ་དྲུག་གི་ཡེ་ཤེས་སྒྱུ་མའི་སྐུར་བཞེངས་ཏེ་རྒྱུད་ཐམས་ཅད་ཀྱི་རྩེ་མོར་གྱུར་བ་དཔལ་དུས་ཀྱི་འཁོར་ལོའི་སྨིན་བྱེད་དབང་གི་རིམ་པ་སྩལ་བ་འདི་ལྟ་སྟེ། སློབ་མ་རྗེས་འཛིན་དང༌། སྟ་གོན་དང༌། བྱིས་པ་འཇུག་པའི་དབང་བདུན། མཆོག་དབང་གོང་མ་བཞི། མཆོག་དབང་ཁྱད་པར་ཅན་ཏེ་རྡོ་རྗེ་སློབ་མའི་དབང་རྣམས་དང༌། བདག་པོ་དང་བདག་པོ་ཆེན་པོའི་དབང་སྟེ་རྡོ་རྗེ་སློབ་དཔོན་གྱི་དབང་དང༌། དཔལ་དུས་ཀྱི་འཁོར་ལོའི་ལྷ་དགུའི་དབང་དང་བཅས་པ་ཡོངས་སུ་རྫོགས་པ་བཀའ་དྲིན་དུ་གནང་བས་སྐལ་བ་དང་ལྡན་པའི་རྡོ་རྗེའི་སློབ་མ་དམ་པ་གང་ཉིད་ཀྱི་ཐུགས་མཚོ་རྡོ་རྗེ་བཞིའི་རྣལ་འབྱོར་སྔར་མ་སྐྱེས་པ་བསྐྱེད་པ་དང༌། སྐྱེས་ཟིན་གང་དག་མི་ཉམས་པར་གོང་འཕེལ་དུ་བྱེད་པའི་ལེགས་ཚོགས་རྒྱ་ཆེར་བསྐྲུན་པར་མཛད་པ་ཡིན་ནོ། །དེའི་རྗེས་སུ་རྡོ་རྗེ་མི་འཁྲུགས་པའི་དབང་དང༌། རྟ་ཕྱག་ཁྱུང་གསུམ་གྱི་རྗེས་གནང་དག་བསྩལ་བ་ཡིན་ནོ། །ཟླ་དེའི་ཚེས་བཅུ་གསུམ་གྱི་ཉིན་ལ་རྗེ་བཙུན་དམ་པ་འདི་ཉིད་པུང་ཡུས་དང་སྡེ་ཚོ་གཉིས་ལ་བདེ་ཆེན་ཞིང་ཁྲིད་དང་ཞིང་དབང་ཉིན་བདུན་བདུན་གསུངས་ནས་ཚེས་ཉེར་དྲུག་ལ་རང་དགོན་དུ་ཞབས་སོར་འཁོད་པ་ཡིན་ནོ། །ཡང་སྔ་ཕྱི་ཐེངས་གཉིས་སུ་བྱ་བྲལ་བ་ཆོས་དབྱིངས་བྱོན་ནས་རྗེ་བཙུན་དམ་པ་འདི་ཉིད་ཀྱིས་རྣམ་ཆོས་ཞིང་དབང་ལན་གཉིས་ཡང་དག་པར་གནང་བ་ཡིན་ནོ། །མགོ་ཟླ་བའི་ཚེས་བརྒྱད་ནས་རང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་ནས་སྐལ་བཟང་གི་གདུལ་བྱ་བླ་མ་ངག་བསྟན་སོགས་འཁོར་འདུས་པ་སྟོང་ཕྲག་དུ་མ་ལ་བདེ་ཆེན་ཞིང་སྒྲུབ་གསུངས་ལ། སྔ་དྲོ་རྣམས་ལ་དམ་པ་གང་ཉིད་དབུ་བཞུགས་བྱས་ནས་དགེ་འདུན་གྱི་འདུས་ཚོགས་དུ་མས་བདེ་བ་ཅན་དུ་བགྲོད་པའི་ཆོ་ག་དཔག་མེད་མྱུར་ལམ་དང་བཟང་སྤྱོད་སོགས་གསུངས། ཕྱི་དྲོའི་དུས་སུ་བདེ་ཆེན་ཞིང་ཁྲིད་དང་བདེ་སྨོན་གསུངས། ཚེས་བཅོ་ལྔའི་ཉིན་བདེ་ཆེན་ཞིང་དབང་གསུངས། ཚེས་བཅུ་དྲུག་ལ་བདེ་ཆེན་ཞིང་ཁྲིད་ཡོངས་རྫོགས་ནས་དགེ་བའི་རྩ་བ་ཇི་སྙེད་མཆིས་པ་ཀུན་བླ་མེད་རྫོགས་བྱང་དུ་བསྔོས་ནས་སྨོན་ལམ་རྒྱ་ཆེར་གནང༌། ཚེས་བཅུ་བདུན་ལ་ཞིང་ཁྲིད་ཡོངས་སུ་རྫོགས་པའི་དགའ་སྟོན་རྟེན་འབྲེལ་གྱི་ཚུལ་དུ་སྐུ་གསུམ་ཆོ་གའི་སྒོ་ནས་ཚོགས་མཆོད་ཀྱི་དགའ་སྟོན་གྱི་དུས་འདའ་བར་མཛད་པ་ཡིན་ལ། དེ་དུས་སུ་དམ་པ་འདི་ཉིད་ཀྱིས་བླ་མ་ངག་བསྟན་ལ་ཁྱེད་ཀྱིས་གདུལ་བྱ་རྣམས་ལ་བདེ་ཆེན་ཞིང་སྒྲུབ་རེ་གསུངས་དགོས་ཞེས་བཀས་བསྐུལ་བ་ལ་བརྟེན་ནས། ངག་བསྟན་གྱིས་རྡི་མདའ་དགོན། པན་ཆེན་དགོན། མུག་ཡང་རྣམས་ལ་ལོ་རེ་རེ་བཞིན་ཕེབས་ནས་མཆོད་མེ་ཁྲི་མཆོད་དུ་མ་དང་བཅས་ཏེ་ཞིང་སྒྲུབ་གསུངས་ནས་བཀའ་དྲིན་བསྐྱངས་ཏེ་ལོ་ཉི་ཤུ་ཙམ་གྱི་རིང་ལ་རྗེ་བཙུན་དམ་པ་གང་གི་འཕྲིན་ལས་ཀྱི་རྒྱུན་བསྐྱངས་བར་མཛད་པའོ། །དགུན་ཐ་ཆུང་ལ་རྗེ་བཙུན་དམ་པ་འདི་ཉིད་དགོན་སྡེ་འདིར་ཕུར་བ་ཁྲོ་བཅུའི་གར་འཆམ་ལ་ཆིབས་བསྒྱུར་གནང་ནས་སངས་རྒྱས་རྗེས་སུ་དྲན་པའི་སྒོ་ནས་གཟིགས་མོར་མཛད། དེ་ནས་དམ་པ་གང་ཉིད་དགུང་གྲངས་དྲུག་ཅུ་བ་སྤྱི་ལོ་༡༩༨༦རབ་རྒྱལ་ཟད་པ་ཞེས་པ་མེ་ཕོ་སྟག་གི་ལོའི་མཆུ་ཟླ་བའི་ཚེས་བརྒྱད་ཀྱི་དུས་སུ་དམ་པ་འདི་ཉིད་དང་འདུས་ཚོགས་དུ་མས་སྒྲོལ་མའི་མཎྜལ་བཞི་བ་ཟབ་རྒྱས་ཞིག་གསུངས་པ་ཡིན་ནོ། །དེའི་ཚེས་བཅུ་ལ་དམ་པ་གང་ཉིད་དང་སྦྱོར་དྲུག་པ་ཆོས་ཚན་སྔ་ཕྱི་རྣམས་དང་བཅས་པས་སྐུ་གསུམ་ཆོ་གའི་སྒོ་ནས་ཚོགས་མཆོད་རྒྱ་ཆེར་མཛད་པ་ཡིན་ནོ། །དེ་ནས་སྔོན་རྡོ་རྗེ་འཆང་ངག་དབང་རྡོ་རྗེ་བཟང་པོའི་བཀའ་གསུང་ལ་རྗེ་བཙུན་དམ་པ་ངག་དབང་བཤད་སྒྲུབ་དཔལ་ཁྱེད་ཀྱིས་རྗེས་ནས་དུས་འཁོར་གསར་བའི་སྒྲུབ་མཆོད་ཞིག་འཛུགས་དང་བསྟན་འགྲོའི་དོན་རྒྱ་ཆེར་འབྱུང་ཞེས་ལུང་བསྟན་པ་ལྟར་དགོན་སྡེ་འདིར་དུས་འཁོར་ལྷ་དགུའི་སྒྲུབ་མཆོད་ཞིག་ཡོད་པ་དེ་ལོ་འདིར་དམ་པ་གང་ཉིད་ཀྱིས་སྐྱི་གདན་བཞག་སྟེ་དུས་འཁོར་གསར་བའི་སྒྲུབ་མཆོད་དུ་བསྒྱུར་ལ། དེ་ཡང་འཛམ་ཐང་བསམ་འགྲུབ་ནོར་བུའི་གླིང་ནས་མཆོད་དཔོན་དང་དབུ་མཛད་སོགས་ཀྱི་དགེ་རྒན་གདན་འདྲེན་བྱས་ནས་དམ་པ་གོང་མའི་ཕྱག་ལེན་ཇི་ལྟ་བ་བཞིན་དཔལ་དུས་ཀྱི་འཁོར་ལོའི་ཐུགས་གསུང་སྐུའི་དཀྱིལ་འཁོར་ཡོངས་རྫོགས་ཀྱི་ས་ཆོག་ཐིག་རྡུལ་མཚོན་དང་བཅས་དུས་འཁོར་གསར་བའི་སྒྲུབ་མཆོད་འཛུགས་པར་བྱས་ནས་དད་ལྡན་སྐྱེ་བོའི་བསོད་ནམས་ཀྱི་ཞིང་མཆོག་ཏུ་བསྐྲུན་པ་ཡིན་ནོ། །ལོ་དེའི་ཁྲུམས་སྟོད་ཟླ་བའི་ཚེས་བཞི་ལ་དམ་པ་གང་ཉིད་ཀྱི་མ་ཡུམ་འདས། དེ་དུས་སུ་དམ་པ་འདི་ཉིད་ཀྱིས་ཞལ་ནས་ཁོང་གི་མ་དེ་འོད་དཔག་མེད་ཀྱི་ཞིང་དུ་སྐྱེ་སྟེ། ཁོང་གིས་ཐུན་གྱི་འོད་གསལ་ལ་བདེ་བ་ཅན་ན་མེ་ཏོག་དམར་བོ་གསར་དུ་སྐྱེ་བ་དེར་པན་སྒྲོན་སྐྱེ་བའི་ཉམས་སྣང་ཤར་ཞེས་གསུངས། ཡང་སྐབས་ཞིག་ལ་གྲྭ་བཙུན་པ་ཕུན་ཚོགས་ཀྱིས་བདག་གི་མ་གང་དུ་སྐྱེས་འདུག་ཅེས་ཡང་ཡང་ཞུས་པས་ཁོང་སྐབས་རེ་ཧ་གོ་བ་རེ་ཡོད་པས་གོ་ན་རྗེས་ནས་བཤད་གསུངས། དེའི་རྗེས་ནས་ཉིན་ཞིག་ལ་ཕུན་ཚོགས་ཁྱེད་ཀྱི་མ་སྡུག་བསྔལ་མེད་པའི་བདེ་དང་ལྡན་པར་བདག་གི་ཉམས་སྣང་ལ་ཤར་བས་ཐར་བའི་ལམ་སྣ་ཟིན་པར་ལུང་བསྟན་གནང༌། དེ་དུས་སུ་མགར་དགེ་ཞེས་པ་ནི་ཡར་འགྲོ་གཡུ་མཚོའི་ནང་དུ་ཉ་ཞིག་གི་སྐྱེ་བ་བླངས་ནས་སྡུག་བསྔལ་མྱོང་གི་འདུག་ཅེས་གསུངས་པ་དང༌། ཡང་ཉིན་ཞིག་ལ་ཡུལ་འདིའི་ཚེ་ལས་འདས་མ་ཞིག་ཡུལ་དུས་འདི་ལྟ་བུ་ལ་རྟ་རྒོད་མ་ཞིག་གི་སྐྱེ་བ་བླངས་ཞེས་གསལ་བར་གསུངས་སོ། །ཡང་དེ་དུས་ཞིག་ལ། དཔལ་ལྡན་ཟླ་བ་གྲགས་པའི་ཞལ་ནས། སོ་སོའི་སྐྱེ་བོའི་དུས་ནའང་སྟོང་བ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང༌། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང༌། །ལུས་ཀྱི་བ་སྤུ་ལྡང་བར་གྱུར་བ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ནོ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་དང༌། འཕགས་པ་ཐོགས་མེད་ཀྱི་ས་སྡེ་ལས། སྙིང་བརྩེ་བ་དང༌། སྙན་པར་སྨྲ་བ་དང༌། སྤར་བ་མ་འཆུམ་པ་དང༌། ཟབ་མོའི་དོན་གྱི་དགོངས་པ་ངེས་པར་འགྲེལ་བ་ལས། བྱང་ཆུབ་སེམས་དཔའ་དང༌། ཞེས་གསུངས་པ་ལྟར་རང་ཡུལ་གྱི་མི་ཞིག་ཤི་བའི་དུས་འཕོ་བ་གསུང་བཞིན་པའི་སྐབས་གྲྭ་བ་ཞིག་ཅུང་ཟད་བགད་པས། དམ་པ་འདི་ཉིད་སྤྱན་ཆབ་ཡུན་རིང་བསིལ་བ་སོགས་སེམས་ཅན་ཉམ་ཐག་མཐོང་ཐོས་སྐབས་རྣམས་སུ་བཅོས་མིན་གྱི་སྙིང་རྗེས་དབང་གིས་སྤྱན་ཆབ་བསིལ་བ་དང༌། བླ་མའི་རྣལ་འབྱོར་ཁྲིད་པའི་སྐབས་སོགས་དང༌། ཟབ་མོས་ཆོས་བཤད་པ་སོགས་ཀྱི་སྐབས་སུ་དད་པ་དང་མོས་གུས་བཅོས་མིན་གྱིས་སྤྱན་ཆབ་བསིལ་བ་གྲངས་ལས་འདས། དེ་ལྟ་བུའི་རྟགས་མཚན་ལ་བརྟེན་ནས་བྱང་ཆུབ་སེམས་དཔའ་ཡིན་པར་འཁྲུལ་མེད་དུ་གྲུབ་པའི་ཕྱིར་རོ། །ལོ་དེའི་ཐ་སྐར་ཟླ་བའི་ཚེས་བདུན་ལ་སྦྱོར་དྲུག་པ་གསར་ཞུགས་བུ་ལོ། ཚུལ་ཁྲིམས་སོགས་བཅུ་བཞི་ཡོད། ཟླ་དེའི་ཚེས་བཅུ་གསུམ་ལ་པོང་ཡུས་དགོན་པ་དང་སྡེ་ཚོ་དགོན་པ་གཉིས་ལ་རིམ་བཞིན་ཕེབས་ནས་བདེ་ཆེན་ཞིང་ཁྲིད་དང་ཞིང་དབང་བཅས་ཉིན་བཅོ་ལྔ་ལ་གསུངས། དེའི་སྐབས་སུ་མཆོད་མེ་ཁྲི་མཆོད་ཙམ་དང་རི་དྭགས་མི་གསོད་པར་དམ་བཅས་མཁན་དུ་མ་དང༌། ཆང་དུ་བ་སོགས་གཅོད་མི་དུ་མ་བྱུང་བ་སོགས་རྣམ་དཀར་ཆོས་ལྡན་གྱི་བྱ་བ་མཐའ་ཀླས་པ་མཛད་ནས་སྐྱེ་བོ་དུ་མ་ལ་ཐར་བའི་ལམ་བཟང་གི་ས་བོན་བསྐྲུན་པར་མཛད། དེ་དུས་སུ་ཉིན་ཐ་མ་ལ། བདག་གིས་བཤད་པ་རྣམས་སེམས་ལ་མ་བརྗེད་པར་བཟུང་ནས་དལ་འབྱོར་དོན་ཡོད་རེ་ངེས་པར་བྱེད་པ་བདག་གི་རེ་བ་ཡིན། སྤྱིར་འདུས་བྱས་ཐམས་ཅད་མི་རྟག་པ་ཡིན། འདུས་པའི་ཐ་མ་བྲལ་དགོས་པ་དང༌། སྐྱེས་པའི་ཐ་མ་འཆི་དགོས་པ་ཡིན་པས་ད་ལོ་མ་གཏོགས་རྗེས་ནས་ཞིང་སྒྲུབ་གསུང་བའི་དུས་སྐབས་འཛོམ་མིན་མི་ཤེས་ལ། ཁྱེད་རྣམས་ཀྱིས་གསོལ་བ་རྩེ་གཅིག་ཏུ་ཐོབ་དང༌། བདག་གིས་ཡང་དུས་ནམ་ཡང་མི་བརྗེད་པར་དཀོན་མཆོག་གསུམ་ལ་སྐྱབས་འཇུག་ཞུ་ཞེས་གསུངས་ནས་བུ་སློབ་རྣམས་ཐུགས་བརྩེ་བས་དགོངས་ནས་སྤྱན་ཆབ་བསིལ། སློབ་འབངས་རྣམས་ཀྱིས་དད་གུས་ཀྱི་སྒོ་ནས་མིག་ཆུ་ཐོར་བཞིན་ལྷ་ཕྱག་ཡང་ཡང་འཚལ་ནས་གསོལ་བ་རྩེ་གཅིག་ཏུ་བཏབ། དེ་ནས་རང་དགོན་དུ་ལོ་རེའི་སྨིན་དྲུག་ཟླ་བའི་ཚེས་གཅིག་ནས་བཟུང་ཉིན་བཅུའི་རིང་ལ་སྐལ་ལྡན་གདུལ་བྱའི་ཚོགས་ལ་བདེ་ཆེན་ཞིང་ཁྲིད་དང་བདེ་ཆེན་ཞིང་དབང་རྣམས་ལེགས་པར་བསྩལ་ཏེ་མཆོད་མེ་ཁྲི་མཆོད་དུ་མ་སོགས་བདེ་བ་ཅན་དུ་སྐྱེ་བའི་རྒྱུ་བཞི་མ་ཚང་བ་མེད་པའི་རྣམ་དཀར་བསོད་ནམས་ཀྱི་མཆོད་སྤྲིན་རྒྱ་ཆེར་བསྐྲུན་པར་བྱས་པ་ཡིན་ལ། བདེ་ཆེན་ཞིང་དབང་མཇུག་རྫོགས་དུས་སུ་དམ་པ་འདི་ཉིད་ཀྱི་གསུང་བཤད་གནང་བ་འདི་ལྟ་སྟེ། འོ་ད་ཁྱེད་རྣམས་ཀྱིས་དགའ་བ་སྒོམ་དང་བདེ་ཆེན་ཞིང་དབང་བསྐུར་ཟིན་པ་རེད། བསྔོ་བ་དང་སྨོན་ལམ་དང་བཅས་བཀྲ་ཤིས་ཀྱིས་མཐར་བརྒྱན་ཟིན་པ་རེད། དེ་ཁྱེད་རྣམས་ཀྱིས་སེམས་ལ་བཟུང་རྒྱུ་ལ་སྔོན་བྱོན་མཁས་གྲུབ་དམ་པས་ཡང་ཡང་གསུངས་པ་བདག་གིས་ཚིག་གཅིག་གཉིས་ཙམ་བཤད་ན། སྔར་ཆོས་སྒྲ་རྣ་བའི་གོ་མ་མྱོང་བའི་རྒ་རྒས་ལྟ་བུ་ཞིག་ཡིན་ཡང་བདེ་སྨོན་ཚར་གཅིག་ཁྲིད་སྦྱང་བྱས་ན་བདེ་བ་ཅན་སྐྱེ་བའི་རྒྱུ་བཞི་ཁ་ཚང་བས། སང་ནངས་མོ་ཤི་འགྲོ་བ་ཞིག་ཡིན་ན་བདེ་བ་ཅན་སྐྱེ་ངེས་པ་ཅན་ཡིན་པས་ཆེ་ཐོབ་ཆེ་ཚང་བ་ཡིན། དེ་མིན་ཡང་སངས་རྒྱས་འོད་དཔག་མེད་ལ་དད་པའི་སྒོ་ནས་མཚན་ལན་གཅིག་བརྗོད། ཐལ་མོ་ལན་གཅིག་སྦྱར་བ་དེས་ཀྱང་ནམ་ཞིག་བདེ་བ་ཅན་སྐྱེ་བས་ན་ཆུང་ཐོབ་ཆུང་ཚང་བ་ཡིན། དེས་ན་མདོ་ཡི་ཉེ་ལམ་རྨད་དུ་བྱུང་བ་ཡིན་པ་རེད། དེ་ལྟ་བུའི་སྒོ་ནས་ཞིང་ཁམས་བདེ་བ་ཅན་དུ་སྐྱེ་བའི་རྒྱུ་ཚོགས་སྒྲུབ་ཚུལ་ནི་མདོའི་དགོངས་དོན་རེད། སངས་རྒྱས་རང་ཉིད་ཀྱིས་སྔོན་སེམས་ཅན་གྱི་དོན་དུ་ཐུགས་བསྐྱེད་ཚེ་བདག་གི་མིང་ཙམ་འཛིན་པའི་སེམས་ཅན་རྣམས་བདེ་བ་ཅན་དུ་འདྲེན་ནུས་པ་ཞིག་ཁོང་མ་འོང་བར་བདག་སེམས་ཅན་གྱི་དོན་དུ་སྡོད་དེ་རང་དོན་སངས་རྒྱས་པར་མི་བྱའོ། །ཞེས་གསུངས་ནས་ཐུགས་དམ་ཞལ་གྱིས་བཞེས་པ་བཞིན་ད་ལྟ་སེམས་ཅན་རྣམས་འདྲེན་པའི་དཔལ་དུ་གྱུར་ནས། སངས་རྒྱས་པའི་སྟོབས་ཀྱིས་ད་ལྟ་སེམས་ཅན་སུ་ཞིག་གིས་ནུབ་བདེ་བ་ཅན་དུ་སྐྱེ་བའི་རྒྱུ་ཚོགས་སྒྲུབ་ཅིང་སངས་རྒྱས་ཀྱི་མཚན་བཟུང་ན། ཞིང་ཁམས་བདེ་བ་ཅན་དུ་སྐྱེ་མི་སྐྱེ་ཐེ་ཚོམ་ཙམ་ཡང་མི་དགོས་ཤིང༌། ངེས་པར་སྐྱེ་བ་སངས་རྒྱས་ཀྱི་བཀས་གྲུབ་མོད་བདེན་པའི་གསུང་ལ་ཡིད་གཉིས་བྱ་བའི་གནས་མེད་དོ། །བདེ་བ་ཅན་དུ་སྐྱེ་ངེས་པ་ཅན་ནི་རེད། ཡང་སེམས་ལ་བཟུང་རྒྱུ་མཁས་གྲུབ་རིག་འཛིན་དུ་མས་འདི་ལྟར་གསུངས་ཏེ། རྒྱུ་བཞི་སྒྲུབ་བཞིན་སངས་རྒྱས་འོད་དཔག་མེད་ཀྱི་མཚན་བྱེ་བ་ཞིག་འདོན་ན་ཞིང་ཁམས་བདེ་བ་ཅན་དུ་མ་སྐྱེས་ཚེ་ཁོང་རྣམས་ཀྱིས་བསླུས་ནི་ཡིན་ཞེས་གསུངས་ཚད་མ་ཡོད་པས། ཐམས་ཅད་ཀྱིས་དགའ་སྤྲོ་བཅས། དང་འདོད་ཡིད་ཆེས་དང་ལྡན་པའི་སྒོ་ནས་བདེ་བ་ཅན་གྱི་རྒྱུ་བཞི་དང་བསྒྲགས་ནས་མཚན་བྱེ་བ་རེ་འདོན་ན་བདེ་བ་ཅན་དུ་སྐྱེ་མི་སྐྱེ་ཐེ་ཚོམ་ཙམ་ཡང་མི་དགོས་པ་རེད། དད་འདུན་རབ་གཅིག་ཡོད་པ་གལ་ཆེ་བ་ཡིན་ལ། དད་པ་ཡོད་ན་དབུས་རྡོ་ལམ་རྡོའི་བཤད་སྲོལ་ལྟར་ཡིན། དད་པ་མེད་ན་དགེ་སློང་ལེགས་སྐར་བཞིན་རེད། དེས་ན་དད་པ་ཡོད་ན། མོས་གུས་ཕྱག་ལ་ཉེ་རིང་ཁྱད་མེད་ཕྱིར། །ཞེས་གསུངས་པ་བཞིན་དད་པ་དང་མོས་གུས་ཡོད་ན་སངས་རྒྱས་འོད་དཔག་མེད་ཀྱི་སྐུ་མདུན་ནས་ཕྱག་འཚལ་བ་དང་ཐག་རིང་བ་འདི་ནས་ཕྱག་འཚལ་བ་གཉིས་ལ་ཁྱད་ཅུང་ཟད་ཙམ་ཡང་མེད་པ་རེད། ཇི་སྐད་དུ། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་འགྲུབ། །ཅེས་དང༌། གང་ཞིག་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་གསུངས་བ་རེད། དཀོན་མཆོག་གསུམ་དད་པ་རབ་གཅིག་ཡོད་ན་བྱིན་རླབས་རབ་ཞིག་དང༌། དད་པ་འབྲིང་ཞིག་ལས་མེད་ན་བྱིན་རླབས་འབྲིང་དང༌། དད་པ་ཐ་ན་ཞིག་ལས་མེད་ན་བྱིན་རླབས་ཐ་ན་ཞིག་དང༌། དད་པ་གཏན་ནས་མེད་ན་བྱིན་རླབས་གཏན་ནས་ཞུགས་ཐུབ་པ་མ་རེད། དེའི་རྒྱུ་མཚན་ཡང༌། ཇི་སྐད་དུ། དད་པ་མེད་པའི་མི་རྣམས་ལ། །དཀར་བོའི་ཆོས་ནི་མི་འབྱུང་སྟེ། །ས་བོན་མེ་ཡི་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་བ་རེད། ཅེས་པ་འདི་ནི་ཚིག་སྦྱོར་གྱིས་མ་བརྒྱན་པར་སྒྲ་ཐག་ལས་ཚིག་ཟིན་ཇི་བཞིན་དུ་བཤུས་ཏེ་བཀོད་པ་ཡིན་ནོ། །དེ་ལྟར་དམ་པ་འདི་ཉིད་ཀྱིས་རང་གི་བུ་སློབ་སྦྱོར་དྲུག་པ་རྣམས་ལ་དཔག་མེད་མྱུར་ལམ་གྱི་སྒོ་ནས་འོད་དཔག་མེད་ཀྱི་མཚན་བྱེ་བ་རེ་ངེས་པར་མཚམས་བཅད་ནས་འདུག་དགོས་ཞེས་བཀའ་སྩལ་བ་ལྟར་ཐམས་ཅད་བཞུགས་པའི་ལུགས་སྲོལ་བཟང་པོ་ཡོད་པ་ཡིན་ལ། རྗེ་བཙུན་དམ་པ་གང་ཉིད་ལས་སྣང་དག་པ་མང་པོས་སངས་རྒྱས་འོད་དཔག་མེད་དངོས་སུ་ལན་དུ་མར་མཐོང་བ་ཡིན་ལ། དེ་ཡང་ཡིད་ཆེས་པའི་སྐྱེས་བུ་དུ་མ་ལས་ཐོས་པས་ཡིད་ཆེས་ཀྱི་རྟགས་ཡང་དག་གིས་གྲུབ་པའོ། །དེ་ནས་ཟླ་དེའི་ཚེས་བཅུ་གསུམ་ལ་དབང་རུས་སོགས་སུ་ཆིབས་བསྒྱུར་གནང་ནས་བདེ་ཆེན་ཞིང་སྒྲུབ་ཀྱི་ཁྲིད་དང༌། ཞིང་དབང་དང༌། ཚོགས་མཆོད་བཅས་ཉིན་བཅུ་ལ་བཀའ་དྲིན་བསྐྱངས་ནས་འབྲེལ་ཚད་དོན་ལྡན་དུ་བྱས་པ་ཡིན་ནོ། །མགོ་ཟླ་བའི་ཚེས་བཅུ་གསུམ་ནས་དམ་པ་འདི་ཉིད་ཀྱི་ཐབས་འཕྲུལ་གྱིས་བསྐུལ་ནས་རང་དགོན་དུ་བཤད་གྲྭ་གསར་འཛུགས་བྱས་ནས་མཁན་ཆེན་ཤེས་རབ་དཔལ་གྱིས་བཀའ་དྲིན་བསྐྱངས་བ་ཡིན་ནོ། །དེ་ནས་རྗེ་བཙུན་དམ་པ་བླ་མ་རིན་པོ་ཆེ་དགུང་གྲངས་རེ་གཅིག་པ་སྤྱི་ལོ༡༩༨༧རབ་བྱུང་བཅུ་བདུན་པ་མེ་ཡོས་ལོའི་མཆུ་ཟླ་བའི་ཚེས་བརྒྱད་ཀྱི་ཉིན་ལ་རྗེ་བཙུན་དམ་པ་གང་ཉིད་དང་སྦྱོར་དྲུག་པ་རྣམས་ཀྱིས་མཎྜལ་བཞི་བ་གསུངས། དེའི་ཚེས་བཅུ་ལ་སྐུ་གསུམ་ཆོ་གའི་སྒོ་ནས་ཚོགས་མཆོད་གསུངས་པ་ཡིན་ལ། དེ་བཞིན་དུ་དམ་པ་འདི་ཉིད་ཀྱིས་༡༩༨༡རབ་རྒྱལ་ལྕགས་བྱ་ལོ་ནས་བཟུང་གཟུགས་སྐུ་མྱ་ངན་ལས་འདའ་ཚུལ་མཛད་པའི་བར་ཚེས་བཅུ་རྣམས་ལ་སྐུ་གསུམ་ཆོ་གའི་ཚོགས་མཆོད་དང༌། ཚེས་ཉེར་ལྔ་རྣམས་ལ་སྒྲོལ་མ་དམར་མོའི་ཚོགས་མཆོད་ཆག་མེད་དུ་བླ་མ་རིན་པོ་ཆེ་དང་སྦྱོར་དྲུག་པ་ཆོས་ཚན་སྔ་ཕྱི་དང་བཅས་བླ་གྲྭ་ཡོངས་ཀྱི་གསུངས་གནང་མཛད་པ་ལགས་སོ། །དེ་ནས་དབོ་ཟླ་བའི་ཚེས་དྲུག་ལ་རྒྱ་སྤྲུལ་སྐུ་སྐྱེ་ཕྲེང་གསུམ་པས་རྣམ་རྒྱལ་མཆོད་རྟེན་བཞེངས་པའི་དབུ་བརྩམས། དེ་དུས་སུ་བླ་མ་དམ་པ་འདི་ཉིད་ཀྱི་རྣམ་རྒྱལ་མཆོད་རྟེན་བུམ་པ་མན་ཆད་ལས་རྨི་ལམ་འོད་གསལ་དུ་ཁོང་གིས་མ་མཐོང་བས་ཁོང་གི་ཚེ་ལ་གེགས་རེ་ཡོད་སྲིད་གསུངས། ལོ་དེའི་དཔྱིད་དུས་ཞིག་ལ་རྗེ་བཙུན་དམ་པ་གང་གིས་ང་ཚོའི་ཆོས་ཚན་ལ་སྒོམ་རིམ་ཁྲིད་བཞིན་པའི་སྐབས་སུ་དམ་པ་གང་གིས་དཀོན་མཆོག་གསུམ་མཁྱེན་གསུངས་ནས་དལ་གཅིག་ཉམས་པར་བཞག་སྟེ་བཞུགས། དེ་ནས་ཁོང་གི་ཞལ་ནས་དེ་རིང་ཁྱེད་རང་རྣམས་ཀྱིས་འཁྲུལ་འཁོར་ཁང་བ་འདེགས་ཀྱི་ཡོད་པ་ཡིན་ནམ་གསུངས་ནས་ལྷག་མའི་ཚིག་དོན་གསུངས་བཞིན་བཞུགས། དེ་ནས་དཔེ་ཁྲིད་གྲོལ་རྗེས་སུ་བདག་ཅག་རྣམས་དགོན་གོང་མར་ཡོང༌། དེའི་ཉིན་འཁྲུལ་འཁོར་ཁང་བ་བཀྱགས་སྐབས་གྱང་ལོག་ནས་ཐམས་ཅད་བསད་ལ་ཁད་བྱས་ཏེ་སྐྲག་འཇིགས་སྐྱེ་དགོས་བྱུང་ཀྱང་ཕ་བླ་མའི་ཐུགས་རྗེ་འོད་རླབས་ཀྱིས་རྐྱེན་ངན་གྱི་མུན་པ་སེལ་བར་མཛད་པ་ཐེ་ཚོམ་ཙམ་ཡང་མེད་དོ། །དམ་པ་འདི་ཉིད་ཆུང་དུས་ནས་བཟུང་མཁྱེན་ཚུལ་གནང་བ་མཐའ་ལས་འདས་ཀྱང་ཚིག་ཚོགས་མང་དོགས་ནས་མ་སྤྲོས་སོ། །ཡང་ལྕགས་རི་ཐང་ལ་རྨོག་སྤྲུལ་འཇིགས་བྲལ་ཕྱོགས་ལས་རྣམ་རྒྱལ་བྱོན་སྐབས་ཟླ་དེའི་ཚེས་བཅོ་བརྒྱད་ནས་ཉེར་བདུན་བར་དམ་པ་འདི་ཉིད་བྱོན་ནས་དབང་ལུང་དུ་མ་ཞུས། ཟླ་དེའི་ཚེས་བཅུ་གསུམ་ལ་སྦྱོར་དྲུག་གི་དབེན་གསུམ་པ་རྣམས་ལ་དཔལ་དུས་ཀྱི་འཁོར་ལོའི་མཆོག་དབང་གསུངས་ལ། དེ་ལྟར་ལོ་རེ་རེ་བཞིན་སྦྱོར་དྲུག་གི་དབེན་གསུམ་པ་རྣམས་ལ་དཔལ་དུས་ཀྱི་འཁོར་ལོའི་མཆོག་དབང་ལེགས་པར་གནང་ནས་རྫོགས་རིམ་གྱི་རྣལ་འབྱོར་རྒྱུད་ལ་སྨིན་རུང་དུ་བྱས་པ་ཡིན་ནོ། །དེ་ནས་ནག་པ་ཟླ་བའི་ཚེས་བཅུ་གསུམ་སྐར་མ་རྒྱལ་གྱིས་ཉིན་ལ་དམ་པ་ཉིད་གྲུབ་ཆེན་དུ་མས་ཞབས་ཀྱིས་བཅགས་ནས་གདུལ་བྱ་རིགས་ཅན་གསུམ་ལ་རང་རང་གི་བློ་དང་འཚམས་པའི་སྒོ་ནས་བདེ་ཆེན་ཞིང་ཁྲིད་དང༌། ཞིང་དབང་སོགས་ཟབ་ཆོས་ཀྱི་ཐང་མར་བརྡལ་བ་ལ་བརྟེན་ནས་སྐྱེ་དགུའི་ཡོང་ལ་ཕན་པའི་ཞི་བསིལ་ཆོས་ཀྱི་སྨན་མཆོག་དམ་པ་ཐོབ་པར་བྱས་པ་ཡིན་ནོ། །ཡང་རྗེ་བཙུན་དམ་པ་འདི་ཉིད་ནི། སྤྱི་ལོ༡༩༨༠རབ་རྒྱལ་ལྕགས་སྤྲེལ་ལོ་ནས་བཟུང་སྤྱི་ལོ་༡༩༨༧རབ་བྱུང་བཅུུ་བདུན་པའི་མེ་ཡོས་བར་དུ་དབང་ལུང་ཁྲིད་གསུམ་གསུངས་བའི་སྐབས་མ་གཏོགས་ཉིན་མ་རེ་རེ་བཞིན་ཐུན་བཞི་ཆག་མེད་དུ་ཐུགས་སྤྲོས་བྲལ་བདེ་སྟོང་གཉིས་མེད་ཀྱི་ཡེ་ཤེས་ལ་གཞོལ་བ་ཡིན་ལ། སྦྱོར་དྲུག་པ་རྣམས་ལ་ཉིན་ཕྱེད་ཀྱི་དུས་ལ་དུས་དང་འཚམས་པའི་སྒོ་ནས་དཔལ་ལྡན་རྒྱལ་བ་ཇོ་ནང་བའི་བྱིན་རླབས་དོན་བརྒྱུད་ཀྱི་ཉམས་མྱོང་ཟབ་ཁྲིད་ལག་ལེན་གྱི་སྒོ་ནས་ཐུན་མོང་གི་སྔོན་འགྲོ་འབུམ་ལྔ་དང༌། དཔལ་དུས་ཀྱི་འཁོར་ལོའི་ཐུན་མོང་མ་ཡིན་པའི་སྔོན་འགྲོ་དུས་འཁོར་ལྷན་སྐྱེས་དང༌། དབེན་པ་གསུམ་ལྡན་དང༌། དངོས་གཞི་ཟབ་ལམ་རྡོ་རྗེའི་རྣལ་འབྱོར་སོར་སྡུད་དང༌། བསམ་གཏན་དང༌། སྲོག་རྩོལ་དང༌། འཛིན་པ་དང༌། རྗེས་དྲན་དང༌། ཏིང་ངེ་འཛིན་ཏེ་སྦྱོར་བ་ཡན་ལག་དྲུག་གི་དབང་ལུང་ཁྲིད་གསུམ་ཡོངས་རྫོགས་རྒྱ་མཚོའི་རླབས་ལྟར་དུས་ལས་ཡོལ་བ་མེད་པར་ཆུ་རྒྱུན་བཞིན་ལེགས་བར་བསྩལ་བ་ཡིན་ལ། ལོ་དེར་རང་ཅག་རྣམས་སྦྱོར་དྲུག་མཇུག་རྫོགས་པའི་སྐབས་སུ་བུ་སློབ་རྒྱུ་སྐར་གྱི་ཕྲེང་བ་ཚར་དུ་དངར་བ་ལ་ཐུགས་བྱམས་བརྩེའི་ཆུ་འཛིན་འཁྲིགས་པ་ལས་ཞལ་ཆེམས་ཀྱི་ཚུལ་དུ་བསླབ་བྱ་འདི་ལྟར་གསུངས་ཏེ། གང་གི་ཞལ་ནས། ཁྱེད་རྣམས་ལ་བླ་རྒན་གྱིས་ཡ་རབས་སྤྱོད་བཟང་ལ་འབད་ཚུལ་ཅུང་ཟད་བཤད་ན། ཇི་སྐད་དུ། སྒོ་གསུམ་དགེ་བ་སྦྱར་ཕྱིར་མིང་དང་དོན། །མཐུན་པའི་བཤེས་ཤིག་རང་གི་དགེ་རྒན་དུ། །བསྟེན་ནས་ཆོས་ཀྱི་བྱ་བ་མ་ལུས་པའི། །རྩ་བར་མཐོང་སྟེ་བཀའ་བཞིན་བསྒྲུབས་པ་ཡིས། །རྟེན་འབྲེལ་མགོ་ནས་འགྲིགས་པར་གྱིས་ཤིག་ཨང༌། །ཞེས་དང༌། རྗེ་བདག་ཉིད་ཆེན་པོའི་ཞལ་ནས། ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །ཚུལ་བཞིན་བསྟེན་པ་ལམ་གྱི་རྩ་བ་རུ། །ལེགས་པར་མཐོང་ནས། ཞེས་དང༌། རྗེ་ཐམས་ཅད་མཁྱེན་པ་ཏཱ་ར་ནཱ་ཐས། བླ་མ་སངས་རྒྱས་སུ་མཐོང་ན་སྒོམ་མི་སྐྱེ་རང་དབང་ག་ལ་ཡོད། ཅེས་གསུངས་པ་ལྟར་དང་པོ་བླ་མ་བརྟགས་ནས་ཚུལ་བཞིན་དུ་བསྟེན་དགོས། བསྟེན་ཚུལ་ཡང་བསམ་སྦྱོར་གཉིས་ཏེ། དང་པོ་བླ་མ་སངས་རྒྱས་དངོས་མཐོང་གི་དད་གུས་བྱ་བ་ཡིན་ལ། གཉིས་པ་སྦྱོར་བས་བསྟེན་ཚུལ་ནི་སྒོ་གསུམ་གྱིས་མཉེས་པ་དང༌། ཁྱད་པར་ཅི་གསུངས་བཀའ་བཞིན་སྒྲུབ་པའོ། །དེ་ཡང་ཆོས་ཚིགས་བཅད་གཅིག་ཙམ་ཞུས་ན་ཡང་བླ་མར་བཟུང་དགོས་ཏེ། ཇི་སྐད་དུ། ཚིགས་བཅད་གཅིག་ཙམ་ཐོས་པ་ལའང༌། །གལ་ཏེ་བླ་མར་མི་འཛིན་ན། །ཁྱི་ཡི་སྐྱེ་བ་བརྒྱར་སྐྱེས་ཏེ། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས་ལ། ཡང་བླ་མ་མ་བརྟགས་དུག་ཐུང་འདྲ། །སློབ་མ་མ་བརྟགས་གཡང་མཆོང་འདྲ། །ཞེས་གསུངས་པ་ལྟར་བཤེས་གཉེན་བསྟེན་ཚུལ་ལེགས་པ་ཞིག་མ་བྱུང་ན་ངན་སོང་ལས་གཞན་འགྲོ་ས་མེད་པས་ན་མདོ་སྔགས་ཐམས་ཅད་ཀྱི་རྩ་བ་བླ་མ་ཚུལ་བཞིན་དུ་བསྟེན་དགོས། ཡང་ཇི་སྐད་དུ། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་གསུངས་པ་ལྟར་ཚུལ་ཁྲིམས་བསྲུང་ན་ཕན་ཡོན་ཆེ་བ་དང༌། མ་བསྲུངས་ན་རྣམ་སྨིན་ཆེ་བ་སོགས་གསུངས་ནས། ཚུལ་ཁྲིམས་རྣམ་པར་དག་པའི་གཞི་བཟུང་ན་བདག་གི་བཀའ་བཞིན་སྒྲུབ་པ་ཡིན། ཚུལ་ཁྲིམས་མ་བསྲུངས་ན་བདག་གི་བཀའ་དང་འགལ་བ་ཡིན། དེ་ཐམས་ཅད་ཀྱི་སེམས་ལ་བཟུང་དགོས། ཚུལ་ཁྲིམས་ལེགས་པ་ཞིག་བསྲུངས་ན་ཆོས་ལ་ཇོ་འབྲུག་བཀའ་གསུམ། ས་དགེ་རྙིང་གསུམ་སོགས་ཀྱི་ཆོས་གང་བསྒྲུབ་ན་བདག་ལ་ཁྱད་པར་མེད། དེས་རྒྱུ་མཚན་ཡང་ཆོས་བརྒྱུད་དེ་དག་གི་སྔོན་བྱོན་སྐྱེས་བུ་དམ་པ་རྣམས་ཀྱིས་རང་རང་གི་ལྟ་གྲུབ་ཉམས་སུ་བླངས་བ་ལ་བརྟེན་ནས་མཐར་ཐུག་གི་ཟུང་འཇུག་གོ་འཕང་མངོན་དུ་བྱས་པ་ཡིན་པས་ཆོས་ཀྱི་དངོས་ནས་ཁྱད་མ་མཆིས་ཀྱང་གང་ཟག་རང་དངོས་ནས་དབང་བོ་དང་མོས་པ་དང་སྦྱང་བརྩོན་སོགས་མི་འདྲ་བའི་དབང་གིས་འབྲས་བུ་ཐོབ་དཀའ་སླ་བྱུང་བ་ཡིན་ནོ། །ཇི་སྐད་དུ། མ་ཤེས་འཁོར་བ་བདེན་པར་བཟུང༌། །དགྲ་འདུལ་གཉེན་སྐྱོང་བྱེད་པ་དེ། །གདུག་རྩུབ་ཚེར་མའི་གདན་དང་འདྲ། །དེ་ནི་ནམ་ཡང་བདེ་དུས་མེད། །ཐར་བ་ཐོབ་པ་ག་ལ་སྲིད། །ཅེས་གསུངས་པ་ལྟར་ཁྱེད་རྣམས་ཀྱིས་རྒྱུན་དུ་དགྲ་འདུལ་གཉེན་སྐྱོང་སོགས་བྱས་ན་དུས་ནམ་ཡང་བདེ་དུས་མེད་པས། དེ་དོར་ནས་ཐོས་བསམ་སྒོམ་གསུམ་མཚམས་བསྙེན་སྒྲུབ་དང༌། ཚུལ་ཁྲིམས་དང༌། བྱང་ཆུབ་ཀྱི་སེམས་དང༌། སྟོང་ཉིད་ཀྱི་ལྟ་བ་དང༌། ཚོགས་བསགས་སྒྲིབ་སྦྱོང་ལ་འབད་དེ་དཔལ་འབྱོར་སྙན་གྲགས་སོགས་ལ་མི་ཞེན་པར་ཁ་ཙམ་ཚིག་ཙམ་མ་ཡིན་པར་འདོད་ཆུང་ཆོག་ཤེས་ཀྱིས་ལྟོ་སྐྱ་གོས་ཧྲུལ་གྱི་སྤྱོད་པ་སོགས་ལ་འབད་ནས་དལ་འབྱོར་དོན་ཡོད་རེ་ངེས་པར་བྱེད་དགོས་ཀྱི། ལམ་གང་ཡང་མི་སློབ་པར་རྒྱུ་མེད་རྐྱེན་མེད་ལས་སངས་རྒྱས་པ་ཞིག་མི་སྲིད་ལ། དེས་ན་བདག་གིས་ནི་ཁྱེད་རྣམས་ལ་ཐར་བའི་ལམ་བཟང་བསྟན་པ་ཡིན། དེ་ལས་ལྷག་པ་ཞིག་བཤད་རྒྱུ་མེད་ཐར་བ་ཐོབ་མི་ཐོབ་ཁྱེད་རང་རྣམས་ལ་རག་ལས་པ་ཡིན་ཏེ། རྫོགས་པའི་སངས་རྒྱས་ཀྱི་ཞལ་ནས། ངས་ནི་ཁྱོད་ལ་ཐར་བའི་ལམ་བསྟན་ནོ། །ཐར་བ་རང་ལ་རག་ལས་མཁྱེན་པར་མཛོད། །ཅེས་གསུངས་པ་སོགས་ལས་འབྲས་དང་མཆོག་གསུམ་ཡིད་ཆེས་ཀྱི་སྒོ་ནས་བླང་དོར་ལ་རྒྱུན་དུ་འབད་པར་གྱིས་ཤིག་ཅེས་བུ་སློབ་རྣམས་ལ་ཕན་པའི་གྲོས་འདེབས་ཡང་ཡང་གསུངས་ནས། བླ་རྒན་ནི་ད་ལོ་ལས་ཚེ་ཨེ་ཡོད་མི་ཤེས་པས་ཁྱེད་རྣམས་ཀྱིས་སེམས་ལ་མ་བརྗེད་པར་གྱིས་ཤིག་ཅེས་གསུངས་སོ། །ཡང་དམ་པ་གང་ཉིད་ཀྱིས་ཉིན་མ་རེ་རེ་བཞིན་ཆད་མེད་དུ་འགྲོ་བའི་མ་རིག་པའི་མུན་པ་སེལ་ཕྱིར་དུ་མཆོད་མེ་བཅོ་ལྔ་ཡས་མས་རྒྱུན་དུ་མཆོད་པས་མཆོད་མེ་ཁྲི་མཆོད་དུ་མ་དང༌། གང་གིས་རྒྱུན་དུ་ཕྱག་འཚལ་བས་ཕྱག་འཚལ་སའི་ཤིང་ཧ་ཅང་ཟད་སོང་ཡོད་པ་དེ་འདྲ་བདག་གིས་ད་སྔ་མཐོང་ཐོས་སུ་གྱུར་མ་མྱོང༌། སྦྱོར་དྲུག་པ་སོགས་སློབ་ཚོགས་ལ་རྒྱུན་དུ་ཁ་ཟས་དང༌། གཟན་ཤམ་ཐབས་སོགས་གྲངས་ལས་འདས་པ་གནང་བར་མཛད་པ་ཡིན་ལ། དེའི་སྐབས་ཀྱི་སློབ་ཚོགས་དགའ་རེའི་བརྗེད་ཡོད་པ་སྲིད་པས་མ་བརྗེད་པར་བླ་མའི་ཐུགས་མཉེས་ཕྱིར་དགྲ་འདུལ་གཉེན་སྐྱོང་སོགས་འཇིག་རྟེན་པའི་བྱ་བཞག་དོར་ནས་དམ་པའི་ལྷ་ཆོས་ལ་འབད་པར་རིགས་སོ། །དམ་པ་འདི་ཉིད་ཀྱི་བཟླས་པའི་གྲངས་ལ་གཞིགས་ན་འོད་དཔག་མེད་ཀྱི་མཚན་བྱེ་བ་བཅུ་བདུན་དང༌། མ་ཎི་བྱེ་བ་ལྔ་སོགས་ཡི་དམ་གྱི་ལྗགས་བསྙེན་བཟླས་པ་དུང་ཕྱིར་དུ་མ་ཡོད་པར་གྲགས་ཤིང་གྲུབ་པ་ཡིན་ནོ། །རྗེ་བཙུན་བླ་མ་འདི་ཉིད་ཀྱི་ཐོས་བསམ་སྒོམ་གསུམ་དང༌། ཚོགས་བསགས་སྒྲིབ་སྦྱང་དང༌། ངེས་འབྱུང་བྱང་སེམས་སྟོང་ཉིད་ཀྱི་ལྟ་བ་ལ་ཉིན་མཚན་ཀུན་ལ་འབད་པ་དང༌། འདོད་ཆུང་ཆོག་ཤེས་ཀྱི་ངང་བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་བྲག་ལ་གཏད་པའི་རྣམ་པར་ཐར་བ་འདི་ལྟ་བུ་ལ་བསམ་ན། དེང་དུས་ཀྱི་འཇིག་རྟེན་ཆོས་བརྒྱད་ཁོ་ན་ལ་གཡེང་བའི་ཐོས་བསམ་སྒོམ་གསུམ་གྱིས་དབེན་པ། བསྟན་འགྲོའི་དོན་ཁ་ལ་བཏགས་ནས་དཔལ་འབྱོར་སྙན་གྲགས་ཀྱིས་མི་ཚེ་སྐྱལ་བའི་བླ་མ་མཁན་པོ་སྤྲུལ་སྐུ་རྣམས་ལ་དོགས་པ་ཞིག་སྐྱེས་བྱུང༌། བདག་གི་ལས་སྣང་མ་དག་པ་ཡིན་ན་ཡིན་པར་གྱུར་ཅིག གལ་ཏེ་ལས་སྣང་མ་དག་པ་མིན་པར་བསོད་ནམས་ཟད་པའི་སྙིགས་མ་ལྔ་བདོའི་ཐན་རྟགས་ཞིག་ཡིན་ན་དེ་ལས་ལྡོག་ནས་དམ་པ་འདི་འདྲའི་རྣམ་ཐར་ལ་འཇུག་པར་ཞུ། ཡང་ན་ཐོས་བསམ་སྒོམ་གསུམ་སོགས་ཡལ་བར་དོར་ནས་སངས་རྒྱས་པའི་གདམས་པ་གཞན་ཞིག་ཡོད་པ་ཡིན་ན་བདག་ལ་མྱུར་དུ་བསྟན་དུ་གསོལ། །སྨྲས་པ།ངེས་དོན་སྙིང་པོའི་ཟབ་གསང་ཆོས་ཀྱི་རྒྱ་མཚོ་ལས། །མན་ངག་དབང་ཁྲིད་ལུང་གི་ཆོས་རྒྱུན་དལ་འབབ་ཀླུང༌། །དད་བརྩོན་ཤེས་རབ་ཡུར་བའི་ལམ་ནས་ཉེར་དྲངས་པ། །གང་ཐུགས་ས་འཛིན་པདྨའི་རྫིང་བུར་ཡོངས་སུ་བསྐྱིལ། །ལེགས་བྱས་བསོད་ནམས་འོ་མའི་རྒྱ་མཚོ་འཕྱུར་བ་ལས། །བརྩེ་ཆེན་བདག་ཉིད་ཤེས་རབ་ནོར་བུའི་གཏེར་བརྡོལ་བས། །རྒྱལ་བསྟན་བཤད་སྒྲུབ་རྒྱ་མཚོའི་གསང་མཛོད་འཛིན་པའི་དཔལ། །གཞན་དྲིང་མི་འཇོག་རང་དབང་ཉིད་དུ་སྤྱོད་པའི་མཆོག །རྒྱལ་ཀུན་གསང་གསུམ་སྙིང་པོ་དུས་འཁོར་གྱི། །དགོངས་བཅུད་ཟབ་མོའི་རྣལ་འབྱོར་ངེས་གསང་མཆོག །གང་ཐུགས་ཀློང་དུ་བརྡོལ་བའི་ངོ་མཚར་གཏམ། །སྐལ་བཟང་རྐང་དྲུག་ཡིད་ཀྱི་གསོས་སྨན་མཆོག །ཅེས་པའང་བར་སྐབས་ཀྱི་ཚིགས་སུ་བཅད་པའོ།། །།
བཞི་བ་རེ་ཞིག་ཞིང་འདིར་གདུལ་བྱ་རྫོགས་ནས་གཟུགས་སྐུ་ཆོས་དབྱིངས་སུ་བསྡུ་བའི་རྣམ་པར་ཐར་བ།
བཞི་བ་རེ་ཞིག་ཞིང་འདིར་གདུལ་བྱ་རྫོགས་ནས་གཟུགས་སྐུ་ཆོས་དབྱིངས་སུ་བསྡུ་བའི་རྣམ་པར་ཐར་བ་ནི།
དེ་ནས་རྗེ་བཙུན་དམ་པ་ཁྱབ་བདག་རྡོ་རྗེ་འཆང་ཆེན་པོ་༧ངག་དབང་བཤད་སྒྲུབ་དཔལ་བཟང་བོ་མཆོག་དགུང་གྲངས་རེ་གཅིག་པ་སྤྱི་ལོ་༡༩༨༧རབ་བྱུང་བཅུ་བདུན་པ་མེ་ཡོས་ལོའི་ཁྲུམས་སྟོད་ཟླ་བའི་ཚེས་བཅུ་དགུའི་ཉིན་ཕྱེད་ཀྱི་དུས་སུ་དམ་པ་ཉིད་ཅུང་ཙམ་སྙུང་བའི་ཚུལ་བསྟན། དམ་པ་གང་ཉིད་དགུང་གྲངས་རེ་གཅིག་པ་བཞེས་པའི་བར་མདུན་གཡོག་པ་མི་གཅིག་ཀྱང་མ་བཞག་པ་ཡིན་ལ། དེའི་དགུང་མོར་མི་གཅིག་ཀྱང་མེད་མོད། དམ་པ་གང་ཉིད་ཅུང་ཟད་སྙུང་གི་ཡོད་པས་དགོང་མོར་ཚུལ་ཁྲིམས་བཟང་འོང་ནས་བལྟ་བ་དེའི་ཚེ་དམ་པ་གང་ཉིད་ཀྱིས་མཆོད་པ་མཛེས་བཀོད་ལེགས་པ་ཞིག་བཤམས་ནས་བླ་མཆོད་ཞིག་གསུང་བཞིན་བཞུགས། དམ་པ་གང་ཉིད་སྔར་ལས་གཟི་མདངས་རྒྱས་ནས་འདུག །དེ་ནས་བླ་མ་དམ་པའི་ཞལ་ནས་ཁྱོད་ཡར་སོང་དང་ཁོང་ལ་སྐྱོན་མི་འདུག་གསུངས་ཀྱང་ཚུལ་ཁྲིམས་བཟང་མ་སོང༌། དེ་ནས་བླ་མའི་ཞལ་ནས་ཡན་ལག་བདུན་པ་ཞིག་འདོན་རོགས་ཀྱིས་གསུངས་ནས་ཡན་ལག་བདུན་པ་སོགས་གསུངས། དེ་ནས་དམ་པ་འདི་ཉིད་ཞབས་རྡོ་རྗེ་སྐྱིལ་ཀྲུང་ཕྱག་ཐུགས་ཀར་རྡོར་འཆང་གི་ཕྱག་རྒྱ་མཛད་དེ་སྐུ་རྣམ་སྣང་ཆོས་བདུན་བཅས་ཐུགས་ཆོས་ཉིད་དེ་བཞིན་ཉིད་ལ་མཉམ་པར་བཞག་ནས་བཞུགས། དེ་ནས་ཚུལ་ཁྲིམས་བཟང་གི་སྐད་འབོད་བྱས་ནས་བཞུགས་བཞེས་གསོལ། དེ་ནས་ཇི་སྐད་དུ། འདི་དག་ལ་སོགས་ཚིག་གིས་ནི། །དེ་དག་བྱིན་གྱིས་བརླབས་པར་བསྟན། །དེ་ནི་བདུད་གཉིས་བཅོམ་པ་ཡི། །གདུལ་བ་ལ་ནི་ཐུགས་བརྩེའི་ཕྱིར། །ཞེས་པ་བཞིན་ཉིན་གསུམ་ལ་སློབ་ཚོགས་རྣམས་ཀྱི་ངོ་མི་ལྡོག་ཙམ་དུ་བཞུགས། དེ་ནས་མཛད་པ་ཐ་མའི་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་ཟླ་དེའི་ཚེས་ཉེར་གཅིག་གི་དགོང་མོར་གང་སྐུ་རྣམ་སྣང་ཆོས་བདུན་བཞུགས་པ་དེ་ལས་གཡོ་བ་མེད་པ་ཕཊ་སྒྲ་ཆེ་ཆུང་གསུམ་དང་བཅས་ཏེ་ཐུགས་འོད་གསལ་ཆོས་ཀྱི་དབྱིངས་སུ་གཡོ་མེད་དུ་སྙོམས་པར་བཞུགས་ནས་གཟུགས་སྐུ་ལ་དྲོད་ཅུང་ཟད་མ་ལྡོག་པར་དྲི་བཟང་སྣ་ཚོགས་ཀྱིས་ཕྱི་ནང་ཀུན་ཏུ་ཁྱབ། སྔར་ལས་བཀྲག་མདངས་ཆེས་ཆེར་རྒྱས་ཏེ་ཞག་བརྒྱད་ཀྱི་རིང་ལ་འོད་གསལ་ཆོས་ཀྱི་དབྱིངས་ལ་ཐུགས་དམ་དུ་བཞུགས་ལ། དེ་ནས་དེའི་མཐར་ཀུན་མཁྱེན་ཇོ་ནང་བ་ཆེན་པོའི་ཞལ་སྔ་ནས། ནོར་བུའི་རྩེ་མོར་ཉི་རྡུལ་བརྟན། །གཙུག་ཏོར་བྱང་སེམས་ཟླ་བ་ཉ། །ཞེས་གསུངས་པ་ལྟར་གྱི་ཏིང་ངེ་འཛིན་མཆོག་བརྙེས་པའི་སྒོ་ནས་ཟུང་འཇུག་མཐར་ཐུག་པ་མྱུར་དུ་མངོན་དུ་གྱུར་བའི་སྔ་ལྟས། དབང་མདོར་བསྟན་གྱི་རྒྱུད་ལས་གསུངས་པ་ཇི་བཞིན་གྱི་རྟགས་མཚན་ཁྱད་པར་ཅན་དཀར་ཆ་སྟེང་གི་ཤངས་བུག་ནས་ལུད་ཅིང་དམར་ཆ་ནོར་བུའི་རྩེ་མོར་ཆེས་གསལ་བར་བྱུང་བ་ནས་ཐུགས་དམ་གྲོལ། །དེ་ནས་གཙང་ཆེན་དགོན་གྱི་གཙང་བ་སྐུ་འབྲིང་བྱོན་ནས་སློབ་དཔོན་ཀུན་སྙིང་ལུགས་ཀྱི་ཀུན་རིག་གནས་ཡིག་དང༌། སློབ་དཔོན་སངས་རྒྱས་གསང་བའི་ལུགས་ཀྱི་ཀུན་རིག་གནས་ཡིག་དང༌། རྡོ་རྗེ་མི་འཁྲུགས་པའི་གནས་ཡིག་དང༌། དཔལ་དུས་ཀྱི་འཁོར་ལོའི་གནས་ཡིག་སོགས་ལེགས་འབུལ་བྱས་ནས་ཆོས་གོས་རྣམ་གསུམ་དང་ལོངས་སྐུའི་ཆས་སུ་གཞུག་པར་གདུང་ཆོས་ལེགས་པར་བྱས། དེ་ནས་ཚེས་ཉེར་དགུ་ནས་བཟུང་ཐ་སྐར་ཟླ་བའི་ཚེས་བཞི་བར་དད་ལྡན་གྱི་འདུས་པ་རྒྱ་མཚོ་ལྟ་བུ་ལ་སྐུ་གདུང་རིན་པོ་ཆེ་ལ་མཇལ་ཕྱག་བྱེད་དུ་འཇུག་པ་ཡིན་ལ། གཟུགས་སྐུ་མྱ་ངན་ལས་འདས་པ་ནས་མཆོད་སྤྲིན་རྒྱ་ཆེན་པོ་དང༌། དཔལ་དུས་ཀྱི་འཁོར་ལོའི་ལྷ་དགུ་སོགས་རྒྱུད་སྡེ་དུ་མའི་སྒོ་ནས་གདུང་མཆོད་ལེགས་བསྐྲུན་བྱས་པ་ཡིན་ལ། དེ་ནས་ཚེས་ལྔའི་ཉིན་སྐུ་གདུང་ཞུགས་འབུལ་གྱི་ཉིན་གཙང་བའི་གསེར་ཁྲི་བདུན་པ་སྐུ་འབྲིང་ངག་དབང་བསོད་ནམས་དཔལ་ལྡན་མཆོག་དང༌། རྒྱ་སྤྲུལ་སྐུ་ཕྲེང་གསུམ་པ་ངག་དབང་བསྟན་འཛིན་སོགས་ཀྱིས་རྡོ་རྗེ་མི་འཁྲུགས་པའི་སྦྱིན་སྲེག་དང༌། སྐུ་གསུམ་ཆོ་གའི་སྦྱིན་སྲེག་དང༌། རྡོར་སེམས་ཀྱི་སྦྱིན་སྲེག་རྣམས་ཀྱིས་སྐུ་གདུང་རིན་པོ་ཆེ་ཞུགས་འབུལ་གྱི་ཆོ་ག་བྱས། དེ་དུས་བྱ་ཐང་དཀར་རྒོད་གཅིག་གདུང་ཁང་གི་གཡོན་ཟུར་དུ་བབས་ཏེ་དར་གཅིག་འདུག དེ་ནས་གདུང་ཁང་ལ་གཡས་སྐོར་ལན་འགའ་བྱས་ནས་ཕུར་སོང་བ་དང༌། མཁའ་ལ་འཇའ་སྤྲིན་སྣ་ཚོགས་ཤར་བ་སོགས་ངོ་མཚར་བའི་དགེ་ལེགས་ཀྱི་མཚན་ལེགས་དུ་མ་བྱུང་བ་ཡིན་ནོ། །དེ་དུས་སུ་རང་ཅག་བུ་སློབ་རྣམས་ཀྱིས་སྐྱོ་གདུང་ཡིད་ཕམ་གྱི་ངང་མིག་ཆུ་འཐོར་བཞིན་ཚེ་རབས་ཐམས་ཅད་དུ་རྗེས་སུ་འཛིན་པའི་གསོལ་བ་ཡང་ཡང་བཏབ། གདུང་ཁང་ལ་ཞག་བདུན་ཕྲག་གཅིག་ལ་སློབ་ཚོགས་དག་གིས་ཕྱག་མཆོད་བྱས་ནས་ཚེས་བཅུ་བཞིའི་ཉིན་གདུང་ཁང་སྒོ་ཕྱེས། དེ་དུས་སུ་ཐུགས་ལྗགས་སྤྱན་གསུམ་མ་ཚིག་པ་གནས་པ་དང༌། གདུང་རུས་ཞིག་ལ་དཔལ་དུས་ཀྱི་འཁོར་ལོའི་ལྷ་ཚོགས་འབུར་དོད་དུ་གསལ་བར་ཡོད་པ་ཀུན་གྱིས་མཐོང་ཐོས་སུ་གྱུར་ཡོད་ཀྱང་ཉིན་གཉིས་གསུམ་གྱི་རྗེས་སུ་དེ་འདྲའི་གདུང་རུས་དེ་རང་ཅག་རྣམས་ཀྱིས་སྐལ་བར་མ་གྱུར་ནས་འཇའ་ལྟར་ཡལ་སོང་བ་ཡིན་ནོ། །གདུང་རུས་རྣམས་སྤྱན་དྲངས་ནས་ཅི་འབྱོར་གྱི་མཆོད་པ་དུ་མའི་མཆོད་པ་ཡིན་ནོ། །དེ་ནས་གདུང་ཁང་གི་ཤུལ་དུ་དད་ལྡན་བསོད་ནམས་བསགས་པའི་ཞིང་དུ་བྱང་ཆུབ་མཆོད་རྟེན་ལེགས་བཞེངས་མཛད། དེ་ནས་ཚེས་ཉེར་གསུམ་ལ་གདུང་རུས་ཀྱི་འདྲ་སྐུ་སྣ་ཚོགས་བཞེངས། དེ་ནས་སྨིན་དྲུག་ཟླ་བའི་ཚེས་བཅུ་གཅིག་ལ་གདུང་མཆོད་ཡོངས་སུ་རྫོགས་པ་ཡིན་ནོ། །དེ་ནས་རྗེ་བཙུན་དམ་པ་གང་གི་འཕྲིན་ལས་ཀྱི་རྒྱུན་ནི་ཆོས་སྡེ་འདིར་བཀའ་དྲིན་གཞལ་མཐའ་དང་བྲལ་བ་གང་གི་རྒྱལ་ཚབ་དམ་པ་བླ་མ་ཨེ་མགོན་གྱིས་ལེགས་བསྐྱངས་བྱས་ནས་ལོ་བཅུ་དགུ་སོང་ཟིན་པ་དེའོ། །དེ་ནས་གང་གི་སྐུ་སྤུན་བྱང་ཆུབ་དཔལ་སོགས་ཀྱིས། རྗེ་བཙུན་དམ་པ་གང་གི་སྐུ་གདུང་གི་རྟེན་གསེར་དངུལ་དང་རིན་པོ་ཆེ་སྣ་ཚོགས་ཀྱིས་ཕྲ་རྒྱན་དང་བཅས་པའི་ཐོག་བརྩེགས་གཉིས་ཀྱི་མཐོ་ཚད་དང་ལྡན་པའི་བྱང་ཆུབ་མཆོད་རྟེན་རབ་མཛེས་དང་ལྡན་པ་ཞིག་དང༌། ཆོས་ཀུན་དཔལ་སོགས་ཀྱིས་དམ་པ་གང་གི་སྐུ་གདུང་ལ་དཔལ་དུས་ཀྱི་འཁོར་ལོའི་མཆོད་རྟེན་ཐོག་བརྩེགས་ལྔ་དང་ལྡན་པ་དང༌། འོད་ཟེར་སོགས་ཀྱིས་ཟངས་གསེར་ལས་གྲུབ་པའི་སྐུ་གདུང་མིའི་ལུས་ཚད་དང་ལྡན་པ་རྣམས་ཕྱི་རབས་ཀྱི་དད་ལྡན་གྱི་སྐྱེ་བོ་དག་གིས་བསོད་ནམས་བསགས་པའི་ཞིང་དུ་ལེགས་བསྐྲུན་བྱས་པ་ཡིན་ལ། རྗེ་བཙུན་དམ་པ་གང་གི་གསོལ་འདེབས་ཡང་མཁས་པའི་གཙུག་རྒྱན་མཁན་ཆེན་དམ་པ་བློ་བཟང་འཕྲིན་ལས་ཀྱིས་འདི་ལྟར་གསུངས་ཏེ། དཔག་ཡས་བསོད་ནམས་ཀྱིས་བསྐྲུན་ཞིང་གི་མཆོག །མི་ཕྱེད་དད་རྒྱས་སྤྱི་བོར་བསྟེན་བྱས་ན། །དངོས་གྲུབ་འབྱུང་ནས་ཡིད་བཞིན་དབང་གི་རྒྱལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་གསུངས་པ་དང༌། སྟོང་ཉིད་སྙིང་རྗེས་ཐུགས་རྒྱུད་ཉེ་བར་གཏམ་པ་བླ་མ་ཨེ་མགོན་གྱིས་མཛད་པའི་གང་གི་གསོལ་འདེབས་ནི། ཨེ་མ་ཧོ། རྒྱལ་ཀུན་མཁྱེན་བརྩེའི་རང་གཟུགས་བླ་མ་རྗེ། །བཤད་དང་སྒྲུབ་པའི་དགོངས་ཀློང་ཡངས་པ་ན། །བདག་སོགས་འགྲོ་ལ་ལེགས་དགོས་དཔལ་སྟེར་བའི། །རང་རིག་བླ་མ་མཇལ་བར་བྱིན་གྱིས་རློབས། །ཞེས་གསུངས་པ་དང༌། སྤྲུལ་ལྷ་མཚམས་ཀྱིས་མཛད་པའི་རྗེ་བཙུན་དམ་པ་གང་གི་གསོལ་འདེབས་ཐུགས་རྗེའི་ཆུ་རྒྱུན་ཞེས་བྱ་བ་ནི། ཨེ་མ་ཧོ༔ ཀ་དག་ཆོས་དབྱིངས་ཀློང་ལས་གཟུགས་ཀྱི་སྐུར༔ ཡོངས་བཞེངས་བདེ་ལྡན་མགོན་པོ་འོད་མཐའ་ཡས༔ གདུལ་བྱའི་དཔལ་ཤར་མཚུངས་མེད་མཁྱེན་བརྩེའི་གཏེར༔ བཤད་དང་སྒྲུབ་པའི་དཔལ་མངའ་རིན་པོ་ཆེར༔ སྒོ་གསུམ་གུས་པ་ཆེན་པོས་གསོལ་བ་འདེབས༔ ཕྱི་ནང་གསང་བའི་བར་ཆད་ཀུན་ཞི་ཞིང་༔ ས་ལམ་ཡོན་ཏན་སྤངས་རྟོགས་མཐར་ཕྱིན་ནས༔ མཐའ་ཡས་འགྲོ་ཀུན་འདྲེན་པའི་དཔལ་ཐོབ་ཤོག༔ ཅེས་གསུངས་པ་དེ་ཡིན་པའི་ཕྱིར་རོ། །སླར་སྨྲས་པ།སྤྲོས་བྲལ་ཆོས་སྐུའི་མཁའ་དབྱིངས་གཟུགས་སྐུའི་ཟླ་བ་ལས། །སྐལ་བཟང་གདུལ་བྱའི་མོས་ངོར་འོ་མའི་མཚོ་ཆེན་ལ། །ཟླ་ཤར་ཇི་བཞིན་སྣང་འདི་ཐུགས་བསྐྱེད་རྟེན་འབྲེལ་ལས། །ལེགས་པར་ཤར་འདི་རྐྱེན་གཞན་གང་གིས་འགོག་པར་བྲལ། །འོན་ཀྱང་ཆེར་སྙིགས་དུས་ཀྱི་བསྐལ་བའི་མེ་དཔུང་གིས། །དད་འདུན་མོས་པའི་རྫིང་བུའི་ཀླུང་ཆེན་སྐེམས་གྱུར་ན། །སྤྲུལ་ཟླའི་གཟུགས་བརྙན་སྣང་བའི་གོ་སྐབས་ཅི་ཡིས་འབྱེད། །དེ་ལྟའང་སྙིགས་མའི་རང་མདངས་ཆོས་ཉིད་རྗེས་འགྲོ་ལགས། །ཨེ་མ་བསྐལ་བ་དུ་མར་བྱམས་བརྩེ་ཉེར་གོམས་ལས། །ཆེར་སྙིགས་འགྲོ་རྣམས་སྲིད་པའི་མཚོ་ཆེན་ལས་སྒྲོལ་ཞེས། །སྲས་བཅས་རྒྱལ་བའི་མདུན་སར་ཞལ་བཞེས་མ་ལགས་སམ། །ཉམ་ཐག་བདག་འདྲའི་སྐྱབས་མེད་རྣམས་ལ་ཅིའི་མི་དགོངས། །རྗེ་བཙུན་གང་གིས་མགོན་སྐྱབས་མི་མཛད་ན། །ཀྱེ་ཧུད་བདག་ཅག་མགོན་སྐྱབས་སུ་ལ་འཚོལ། །ཐུགས་ཀློང་བརྩེ་བའི་སྤྱན་རས་ཉེར་དགོངས་ནས། །ཐུགས་ཡིད་དབྱེར་མེད་འདྲེས་པར་བྱིན་གྱིས་རློབས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །
གསུམ་པ་ཕྱི་མཐའ་འཕྲིན་ལས་ཀྱིས་འཇུག་པ་འགོག་མེད་དུ་ཤར་ཚུལ།
གསུམ་པ་ཕྱི་མཐའ་འཕྲིན་ལས་ཀྱིས་འཇུག་པ་འགོག་མེད་དུ་ཤར་ཚུལ་ནི།
རྗེ་བཙུན་བྱམས་མགོན་གྱི་ཞལ་སྔ་ནས། །ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །ཞེས་པ་ནས། སྲིད་པ་ཇི་སྲིད་གནས་པར་སྟོན། །ཞེས་དང༌། གང་གི་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་ཆད། །ཅེས་གསུངས་པ་ལྟར་རྗེ་བཙུན་དམ་པ་གང་གི་སྤྲུལ་བའི་ཟློས་གར་གྱི་ཟླ་བ་གང་ཉིད་དག་དང་མ་དག་པའི་ཞིང་ཁམས་རབ་འབྱམས་ཀྱི་ཆུ་ཀླུང་མཐའ་ཡས་པ་ལ་ཆུ་ཟླའི་གཟུགས་བརྙན་ལྟར་ཤར་བ་ལས། ཡང་སྤྲུལ་གཞོན་ནུ་གསར་བའི་ཉིན་བྱེད་དབང་བོ་ཞིག་སྤྱི་ལོ་༡༩༩༢རབ་གནས་ ཆུ་སྤྲེལ་ལོ་ལ་སྐལ་བཟང ་རྣམ་འདྲེན་སྟོང་གི་ཞབས་ཀྱིས་བཅགས་པའི་གནས་མཆོག་རྒྱ་གར་རྡོ་རྗེ་གདན་གྱི་ཤར་ཕྱོགས་སུ་སྐུ་འཁྲུངས། མེ་གླང་ལ༧སྐྱབས་མགོན་ཐམས་ཅད་མཁྱེན་པ་རྒྱལ་དབང་བསྟན་འཛིན་རྒྱ་མཚོས་རྗེ་བཙུན་དམ་པ་ངག་དབང་བཤད་སྒྲུབ་དཔལ་གྱི་སྤྲུལ་སྐུ་ཡིན་པར་ཐུགས་ཐག་བཅད་པར་གྲགས་ལ། ད་ལྟ་རྒྱ་གར་འཕགས་པའི་ཡུལ་གྱི་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ་དཔལ་དུས་ཀྱི་འཁོར་ལོའི་རིམ་གཉིས་ཀྱི་རྣལ་འབྱོར་ལ་བརྩོན་བཞིན་དུ་སྐུ་ཚེ་མི་འགྱུར་རྟག་བརྟན་གྱི་ངོ་བོར་བཞུགས་པ་ཡིན་ནོ། །ཚུལ་དེ་ལྟར་གྱི་རྗེ་བཙུན་དམ་པ་གང་གི་རྣམ་པར་ཐར་བ་དེ་ལ་དད་པ་རྣམ་དག་ཞིག་ངེས་པར་དགོས་པས། དེའི་ཕྱིར་དུ། ཇི་སྐད་དུ། དད་པའི་ཞིང་ནི་སློབ་དཔོན་ཡིན་པས་བླ་མའི་རྣམ་ཐར་བཤད་པར་བྱའོ། །ཞེས་གསུངས་པ་ལྟར་མདོ་སྔགས་ཐམས་ཅད་ཀྱི་སྐབས་སུ་ལམ་ཡོངས་རྫོགས་ཀྱི་བྱིན་རླབས་ཀྱི་སྒོ་ལེགས་ཕྱེ་མཛད་པའི་གཞི་གཅིག་པུ་ཉིད་དུ་ངེས་པ་ནི། གང་ཟག་རང་རང་ལ་མདོ་སྔགས་གང་གི་ཆོས་ཚུལ་ལེགས་པར་འདོམས་པའི་དགེ་བའི་བཤེས་གཉེན་མཆོག་ཉིད་ལ། ཡིད་གཏིང་ནས་དད་པའི་རྩ་བ་བརྟན་པོ་ཡོད་པ་ལ་ཐུག་ཕྱིར། དད་པ་དེ་འདྲ་སྒོ་ཀུན་ནས་བསྐྱེད་པའི་ཐབས་ཀྱི་གཙོ་བོ་ནི། དཔལ་ལྡན་བླ་མ་དག་གི་གསང་གསུམ་གྱི་རྣམ་པར་ཐར་བ་ཅི་བཞིན་ཤེས་པ་དེ་ཡིན་ལ། དད་པ་རྣམ་དག་ཞིག་ཡོད་ན་མདོ་སྔགས་ཀྱི་ལམ་གང་སྐབས་སུ་བབས་པ་དེ་སེམས་རྒྱུད་ལ་སྐྱེ་བ་ནས་བཟུང་མཐར་ཐུག་གི་བྱང་ཆུབ་མཆོག་མངོན་དུ་གྱུར་བའི་བར་དུ་ངེས་པར་འབྱུང་བས་ན། ཡོན་ཏན་གང་སྐྱེ་བ་ཐམས་ཅད་གང་ལས་བྱུང་ན་བླ་མའི་གསང་གསུམ་གྱི་ཡོན་ཏན་ཤེས་ནས་མི་ཕྱེད་པའི་དད་པ་འཁྲུངས་བ་ལ་བརྟེན་ནས་བྱུང་བ་ཤ་སྟག་ཡིན་པས། དེ་ལྟར་ཡོན་ཏན་མ་ལུས་བྱུང་བ་ནི་རྗེ་བཙུན་དཔལ་ལྡན་བླ་མའི་རྣམ་ཐར་ལེགས་པར་བརྗོད་པའི་ཕན་ཡོན་དངོས་ཡིན་ནོ། །གཞན་ཡང་མདོ་སྡེ་དུ་མ་ནས་བླ་མའི་རྣམ་ཐར་བརྗོད་པ་སོགས་ལ་ཕན་ཡོན་དུ་མ་གསུངས་ཏེ། མདོ་ལས། གཞོན་ནུ་སློབ་དཔོན་གྱི་མཚན་ཉིད་བཤད་པར་བྱའོ། །མཁན་པོའི་ཡོན་ཏན་གྱི་བཤད་པ་ལ་བརྩོན་ཤིག ཅེས་དང༌། བྱང་ཆུབ་ཤིང་དྲུང་དུ་འཇུག་པའི་མདོ་ལས། འོད་སྲུང་བླ་མའི་རྣམ་ཐར་ལ་རྟོག་ཅིང་བཤད་པར་གྱིས་ཤིག མཁན་པོའི་མཚན་ཉིད་ལ་ནན་ཏན་གྱིས་ཤིག ཅེས་དང༌། དྲི་མེད་འོད་ཟེར་རྒྱས་པའི་རྒྱུད་ལས། རྡོ་རྗེ་སློབ་དཔོན་ཐམས་ཅད་མཁྱེན། །ཀུན་མཁྱེན་ཡེ་ཤེས་དབང་གི་རྒྱལ། །མོས་གུས་དྲག་པོ་འབྱུང་བའི་གཞི། །བླ་མའི་རྣམ་ཐར་རྒྱས་བསྡུས་རྣམས། །ཡིད་བཞིན་ནོར་བུ་ལྟ་བུ་ཅན། །ཡང་ཡང་བལྟ་བར་བརྩོན་གྱུར་ན། །དངོས་གྲུབ་ཐོབ་པར་ཐེ་ཚོམ་མེད། །ཅེས་གསུངས་པ་ལ་སོགས་པ་མདོ་སྡེ་དུ་མར་བླ་མའི་རྣམ་ཐར་ཇི་བཞིན་རྟོགས་པ་དང༌། གཞན་ལ་བརྗོད་པའི་ཕན་ཡོན་མཐའ་ཀླས་པར་གསུངས་སོ། །དེ་ལྟར་རྟོགས་པ་དང༌། བརྗོད་པའི་ཕན་ཡོན་གང་ལ་དད་པ་སྐྱེ་བ་ཡིན་ལ། སྤྱིར་དད་པ་ནི་ཆོས་ཀུན་གྱི་སྔོན་འགྲོ་མེད་མི་རུང་བ་ཡོན་ཏན་ཐམས་ཅད་སྐྱེད་བྱེད་ཉེས་སྐྱོན་དག་ལས་སྒྲོལ་བྱེད་ཡིན་པའི་ཚུལ་རྒྱལ་བའི་བཀའ་ལས་ལུང་དུ་མ་སྔར་དྲང་ཟིན་པ་ལྟར་དད་པ་ཡོན་ཏན་ཀུན་གྱི་གཞི་རྟེན་ཡིན་ཚུལ་ཤེས་པར་བྱའོ། །རྗེ་བཙུན་དམ་པ་འདི་ལྟ་བུའི་རྣམ་པར་ཐར་བ་ལ་ཐུགས་བསམ་ལེགས་བཞེས་གནང་ནས་རང་གི་དེ་ལྟ་བུ་ཞིག་འབད་དགོས་ཏེ། རྒྱུད་ལས། སློབ་མས་བླ་མའི་རྣམ་ཐར་སྙེགས་པར་འགྱུར། །ཞེས་གསུངས་པ་ལྟར་དཔལ་ལྡན་བླ་མའི་རྣམ་པར་ཐར་བ་དག་རྗེས་འཇུག་སློབ་མའི་ཉམས་ལེན་དུ་ཤེས་པ་དང༌། དད་མོས་རྣམ་དག་ཞིག་སྐྱེ་བ་ནི་རྣམ་ཐར་རྩོམ་པའི་དགོས་པ་ཡིན་པའི་ཕྱིར་རོ། །སླར་སྨྲས་པ། སྲས་བཅས་རྒྱལ་བའི་རྣམ་ཐར་དབང་འབྱོར་ཞིང༌། །མགོན་ཁྱོད་སྒྱུ་འཕྲུལ་རོལ་གར་ཅིར་ཡང་རྩེན། །ལེགས་བཤད་སྣང་བའི་མཛོད་འཛིན་དམ་པ་ཡིས། །གང་གི་ཡོན་ཏན་མཐོང་བའི་དགེ་ལེགས་སྩོལ། །དང་པོར་གདམས་ངག་གསན་བསམ་སྒྲོ་འདོགས་བཅད། །བར་དུ་བསྒོམས་པས་རྟོགས་པའི་དབང་ཕྱུག་གྱུར། །ཐ་མར་ངེས་གསང་བཤད་སྒྲུབ་བསྟན་པའི་དཔལ། །རྒྱལ་བ་ཀུན་དངོས་བརྩེ་བས་ལེགས་སྐྱོངས་ཤིག །བདག་འདྲའི་ཚུར་མཐོང་བློ་ཡི་ཡུལ་ལས་རབ་འདས་ཤིང༌། །ཉམས་རྟོགས་ཡོན་ཏན་རིན་ཆེན་རྡུལ་མང་རབ་བརྩེགས་པ། །འཕྲིན་ལས་འོད་དཀར་མཁའ་མཐའ་མཉམ་པའི་དགེ་ལེགས་ཀྱིས། །ངེས་གསང་བསྟན་པའི་རྒྱལ་མཚན་སྲིད་རྩེར་བསྒྲེངས་མཛད་སུ། །ཕྲག་དོག་རྡུལ་མར་བརྩེགས་པའི་རི་རྒྱལ་ལ། །སངས་རྒྱས་བྱོན་ཡང་དོན་དུ་འགྱུར་དཀའ་མོད། །ཕྱོགས་འཛིན་ཚིག་དང་མ་འདྲེས་ངོ་མཚར་གཏམ། །གཟུར་གནས་མཁས་པ་རྣམས་ཀྱིས་གཟིགས་མོར་མཛོད། །གང་གི་གསང་གསུམ་མཐའ་ཀླས་མཚོ་ཆེན་ལས། །བདག་བློའི་སྐྲ་རྩེའི་ཆུ་ཐིགས་ཙམ་བླངས་ནས། །རྟོགས་བརྗོད་ཐར་འདོད་དད་པའི་འཇུག་ངོགས་ཀྱི། །སྙན་ཚིག་དབྱར་སྐྱེས་སྒྲ་དབྱངས་རོལ་མོར་འཁྲོལ། །ཚུལ་འདི་བརྗོད་པའི་ལེགས་ཆ་གང་མཆིས་རྣམས། །བླ་མ་མཉེས་པའི་ཀུན་བཟང་མཆོད་སྤྲིན་དུ། །གྱུར་ནས་ཉེས་ཆ་ཐམས་ཅད་ཡོངས་དག་སྟེ། ། ཚེ་རབས་ཀུན་ཏུ་བླ་མའི་ཐུགས་ཟིན་ཤོག །འདིར་འབད་རྣམ་དཀར་མ་དྲོས་ཀླུང་ཆེན་དགེ་ལེགས་རླབས་ཕྲེང་འབུམ་གཡོ་བ། །འདས་དང་མ་འོངས་བསོད་ནམས་མཐའ་ཡས་རྒྱ་མཚོའི་ཀློང་དུ་སིམ་པ་ལས། །རྒྱལ་བསྟན་དཔག་བསམ་ལྗོན་ཤིང་རབ་རྒྱས་བཤད་སྒྲུབ་དཔལ་ཡོན་སྙེ་མ་འབུམ། །ལྷུན་གྲུབ་རྩོལ་མེད་ཅིར་ཡང་སྨིན་པས་སྐྱེ་དགུའི་རེ་བ་སྐོང་བར་ཤོག །དེང་དུས་ནས་བཟུང་བྱང་ཆེན་མ་བརྙེས་བར། །དམ་པ་ཁྱེད་ཀྱི་བརྩེ་བས་རྗེས་བཟུང་སྟེ། །ཡང་དག་ལམ་བཟང་མཆོག་ལ་རབ་བསྒྲོད་ནས། །ཕུན་ཚོགས་དགེ་ལེགས་རླབས་ཕྲེང་མཛེས་གྱུར་ཅིག །ཅེས་ཁྱབ་བདག་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་རྣམ་པར་ཐར་བ་ཐར་འདོད་དད་པའི་འཇུག་ངོགས་ཞེས་བྱ་བ་འདི་ནི། རྗེ་བཙུན་དམ་པ་འདི་ཉིད་བདག་ལ་རྒྱལ་བ་ཀུན་ལས་བཀའ་དྲིན་ལྕི་བས་ན། སྔར་ནས་རྣམ་ཐར་ཞིག་འབྲི་འདུན་ཡོད་ཀྱང་བྱ་བ་དུ་མས་བྲེལ་ནས་གོ་སྐབས་མ་བྱུང༌། ད་ལན་ངེས་དོན་བསྟན་པའི་གཉེན་གཅིག་བླ་མ་ཨེ་མགོན་མཆོག་གིས་ལྷ་རྫས་ཀྱི་དར་དཀར་སྲིད་དུ་རིང་བ་དང་བཅས་བཀའ་སྩལ་གསེར་གྱི་སྦྲམ་བུ་ལྟར་ལྕི་བ་སྙིང་གི་པདྨོ་མངོན་པར་བཞད་པའི་ཟེའུ་འབྲུར་ཕེབས་པ་དང༌། རྗེ་བཙུན་དམ་པ་གང་གི་སློབ་བུ་དམ་པ་རྡོར་བཟང་དང༌། རང་བྱུང་གཉིས་ཀྱིས་དཀའ་ངལ་འཛེམ་མེད་ཀྱི་སྒོ་ནས་ས་བོན་འཚོལ་སྡུད་བྱས་ནས་རྗེ་བཙུན་འཇམ་པའི་དབྱངས་ཀྱི་གསེར་སྐུ་དང༌། སངས་རྒྱས་འོད་དཔག་མེད་ཀྱི་སྣང་བརྙན་བཀྲ་ཤིས་ཀྱི་ལྷ་དར་དང་བཅས་བསྐུལ་བ་ལ་བརྟེན་ནས། རྗེ་བཙུན་དམ་པ་ངག་དབང་བཤད་སྒྲུབ་དཔལ་གྱི་ཞབས་རྡུལ་པད་མོ་དྲི་མ་མེད་པ་སྤྱི་བོར་ལེན་པ་བཙུན་གཟུགས་རྨོངས་རྟུལ་ཆོས་མེད་ཆོས་རྫུ་མཁན་ངག་དབང་དངོས་གྲུབ་དཔལ་ལམ་དབྱངས་ཅན་ངག་གི་རོལ་མཚོ་ཞེས་འབོད་པས། རབ་གནས་ས་སྐྱོང་ཞེས་པ་ཤིང་བྱ་ལོའི་ཁྲུམས་སྟོད་ཟླ་བའི་ཚེས་བཅོ་བརྒྱད་ནས་དཔེ་ཁྲིད་དུ་མའི་ཞར་ལ་བརྩམས་ཏེ། ཐ་སྐར་ཟླ་བའི་ཚེས་གཅིག་གི་བར་ཉིན་བཅུ་བཞིའི་རིང་ལ་དད་གུས་ཆེན་པོས་རྫོགས་པར་སྦྱར་བ་ཡིན་ནོ། །འདིས་ཀྱང་དཔལ་ལྡན་བླ་མའི་རྣམ་པར་ཐར་བ་ལ་མི་ལྡོག་པའི་དད་མོས་ཚུལ་བཞིན་དུ་སྐྱེས་ནས་ཚེ་རབས་ཐམས་ཅད་དུ་རྗེ་བཙུན་བླ་མ་དམ་པས་རྗེས་སུ་འཛིན་པར་གྱུར་ཅིག སརྦ་མངྒ་ལཾ། ཛ་ཡནྟུ། ཐུགས་ཀློང་བཤད་མཛོད་ཆེན་པོའི་རྒྱ་མཚོ་འཁྱིལ། །སྒྲུབ་པའི་ཉམས་རྟོགས་འཕེལ་བའི་ལོ་འདབ་རྒྱས། །དཔལ་ལྡན་སྐུ་བཞིའི་འབྲས་བུ་ཆེར་སྨིན་པས། །ཚེ་རབས་ཀུན་ཏུ་རྗེས་སུ་འཛིན་པར་ཤོག །ཅེས་པ་འདི་ནི་ངག་དབང་རབ་འབྱོར་གྱི་ངོར་སིདྡྷི་ཤྲཱི་ནས་བྲིས་པའོ།