ཁྱབ་བདག་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་བླ་མའི་རྣལ་འབྱོར་དཔག་བསམ་ལྗོན་ཤིང་།
ཁྱབ་བདག་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་བླ་མའི་རྣལ་འབྱོར་དཔག་བསམ་ལྗོན་ཤིང་ཞེས་བྱ་བ་བཞུགས་སོ། །
ཁྱབ་བདག་རྡོ་རྗེ་འཆང་ཆེན་པོ་ལ་ཕྱག་འཚལ་ཞིང་སྐྱབས་སུ་མཆིའོ། །རྗེ་བཙུན་བླ་མ་སངས་རྒྱས་ཀུན་འདུས་སུ། །མཐོང་བའི་མོས་གུས་ཉིད་ཀྱིས་ཟབ་ལམ་གྱི། །ས་ལམ་ཉམས་རྟོགས་འབྲས་བུ་སྐྱེ་བས་ན། །གསང་སྔགས་རིམ་གཉིས་ལམ་གྱི་ཡེ་ཤེས་ཀུན། །རྟེན་གཞི་བླ་མ་སངས་རྒྱས་དངོས་ཉིད་དུ། །མཐོང་བའི་མོས་གུས་བསྐྱེད་ཕྱིར་བླ་མ་ཡི། །རྣལ་འབྱོར་སྒོམ་ཚུལ་མདོར་བསྡུས་འབྲི་བར་བྱ། །དེ་ལ་འདིར་སྔོན་འགྲོ་དང༌། དངོས་གཞི་དང༌། རྗེས་ཀྱི་བྱ་བ་དང་གསུམ། དང་པོ་ནི། དཀོན་མཆོག་ཀུན་འདུས་བླ་མ་རིན་པོ་ཆེ། །དེང་དུས་ནས་བཟུང་བྱང་ཆུབ་སྙིང་བོའི་བར། །འགྲོ་རྣམས་སྲིད་ཞིའི་སྡུག་བསྔལ་མཚོ་ཆེན་ལས། །སྐྱོབས་པའི་སྐྱབས་སུ་བསྟེན་ནོ་ཐུགས་རྗེས་ཟུངས། །ཞེས་སྐྱབས་འགྲོ་ལན་གསུམ་བྱ། མ་རྒན་སེམས་ཅན་སྡུག་བསྔལ་ཕྲ་རགས་ལས། །བསྒྲལ་ནས་ཐམས་ཅད་མཁྱེན་པའི་སར་འགོད་ཕྱིར། །བཀའ་དྲིན་གསུམ་ལྡན་དཔལ་ལྡན་བླ་མ་ཡི། །རྣལ་འབྱོར་རྩེ་གཅིག་ཉིད་ལ་བསྒོམ་པར་བྱ། །ཞེས་སེམས་བསྐྱེད་ལན་གསུམ་བྱའོ། །གཉིས་པ་དངོས་གཞི་ནི། སྟོང་པའི་ངང་ལས་རང་མདུན་ནམ་མཁའ་ལ། །གཞལ་མེད་ཁང་གི་དབུས་སུ་སེང་ཁྲི་དང༌། །པད་ཟླ་ཉི་མ་སྒྲ་གཅན་བརྩེགས་པའི་སྟེང༌། །སྐྱབས་གནས་རྒྱལ་ཀུན་ངོ་བོ་དབྱེར་མེད་པ། །ངུར་སྨྲིག་གར་གྱི་སྒྱུ་འཕྲུལ་རོལ་བ་ཡི། །རྡོ་རྗེ་འཆང་དངོས་ངག་དབང་བཤད་སྒྲུབ་དཔལ། །སྐུ་མདོག་དཀར་དམར་བྱི་རུའི་མདངས་ལྡན་པ། །འགྲོ་ལ་དགྱེས་པའི་ཞལ་རས་འཛུམ་དཀར་གཡོ། །སྐུ་ལ་བདེ་སྟོང་ཉམས་ཀྱིས་གཟི་འོད་འབར། །ཕྱག་གཉིས་ས་གནོན་ཕྱག་རྒྱ་རྣམ་པར་མཛད། །ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་ཤིང༌། །མཚན་དཔེ་གསར་རྫོགས་འོད་མཚན་སྟོང་འབར་བ། །ཆོས་གོས་རྣམ་གསུམ་ངུར་སྨྲིག་རྒྱན་གྱིས་མཛེས། །གསུང་ནི་གཞོམ་མེད་རྡོ་རྗེའི་སྒྲ་དབྱངས་ལྡན། །ཐུགས་ནི་གསལ་སྟོང་སྤྲོས་བྲལ་གཡོ་བ་མེད། །རྡོ་རྗེའི་སྐུ་ལ་ལྷ་ཡི་ཚོགས་བཅས་པ། །དུས་འཁོར་ལ་སོགས་དཀྱིལ་འཁོར་ཀུན་གྱི་བདག །དཀོན་མཆོག་ཀུན་འདུས་ངོ་བོ་བླ་མ་ཡི། །སྐུ་ཡི་མཐའ་བསྐོར་ཕྱོགས་རྣམས་ཐམས་ཅད་དུ། །རྩ་རྒྱུད་བླ་མ་ཡི་དམ་ལྷ་ཚོགས་དང༌། །སངས་རྒྱས་བྱང་སེམས་མཁའ་འགྲོ་ཆོས་སྐྱོང་རྣམས། །སྤྲིན་བཞིན་འཁྲིགས་ནས་བདག་དང་སེམས་ཅན་ལ། །བརྩེ་བ་ཆེན་པོས་དགོངས་ཏེ་བཞུགས་པར་གྱུར། །བླ་མའི་དཔྲལ་མགྲིན་ཐུགས་ཀ་ལྟེ་བ་ལ། །སྐུ་བཞིའི་ས་བོན་ཡིག་འབྲུ་བཞིས་མཚན་གྱུར། །སྐབས་འདིར་ནི་བླ་མ་ཉིད་དཀོན་མཆོག་ཀུན་འདུས་སུ་སྒོམ་པ་ཡིན་གྱི་སྤྱན་འདྲེན་སོགས་མི་དགོས་པར་གསུངས་སོ། །དེ་ནས་ཡན་ལག་བདུན་པ་འབུལ་བ་ནི། སྐུ་བཞིའི་མངའ་བདག་གཞོམ་མེད་རྡོ་རྗེའི་གསུང༌། །བདེ་ཆེན་སྤྲོས་བྲལ་འགྱུར་མེད་རྡོ་རྗེའི་ཐུགས། །རྡོ་རྗེ་འཆང་ཆེན་ངགདབང་བཤད་སྒྲུབ་དཔལ། །དཀོན་མཆོག་ཀུན་འདུས་ཞབས་ལ་ཕྱག་འཚལ་ལོ། །ཕྱི་མཆོད་ཉེར་སྤྱོད་བདུན་སོགས་མཁའ་དབྱིངས་ཁྱབ། །བདུད་རྩི་ལྔ་སོགས་ནང་གི་དམ་རྫས་དང༌། །བདེ་སྟོང་ཡེ་ཤེས་བསྐྱེད་པའི་གསང་ཡུམ་སོགས། །ཀུན་བཟང་མཆོད་པས་དཔལ་ལྡན་བླ་མ་མཆོད། །སྡོམ་པ་གསུམ་དང་འགལ་བ་ལ་སོགས་པ། །ཐོག་མེད་ནས་བསགས་སྡིག་ལྟུང་སོ་སོར་བཤགས། །རྗེ་བཙུན་དམ་པའི་གསང་གསུམ་ཡོན་ཏན་དང༌། །རང་གཞན་དུས་གསུམ་དགེ་ལ་རྗེས་ཡི་རང༌། །གསང་ཆེན་རིམ་གཉིས་ལམ་ལ་སོགས་པ་ཡི། །གང་འདུལ་ཆོས་འཁོར་བསྐོར་བར་མཛད་དུ་གསོལ། །སྐལ་དམན་བདག་སོགས་འགྲོ་ལ་ཉེར་དགོངས་ནས། །རྡོ་རྗེའི་སྐུ་ནི་བརྟན་པར་བཞུགས་སུ་གསོལ། །རབ་དཀར་དགེ་འདིས་ཁ་སྦྱོར་བདུན་ལྡན་གྱི། །རྡོ་རྗེ་འཆང་ཆེན་མྱུར་དུ་ཐོབ་པར་ཤོག །དེ་ནས་གསོལ་བ་རྩེ་གཅིག་ཏུ་འདེབས་པར་བྱ་སྟེ། རིགས་དང་དཀྱིལ་འཁོར་ཀུན་གྱི་ཁྱབ་བདག་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །བླ་མ་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་པོ་ལ་གསོལ་བ་འདེབས་སོ། །ཡི་དམ་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །སངས་རྒྱས་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །དམ་ཆོས་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །དགེ་འདུན་འདུན་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་པོ་ལ་གསོལ་བ་འདེབས་སོ། །ཆོས་སྐྱོང་ཀུན་འདུས་ཀྱི་ངོ་བོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །བདེ་ཆེན་ཡེ་ཤེས་རྡོ་རྗེའི་བདག་ཉིད་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་བོ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབས་པར་མཛད་དུ་གསོལ། འཁོར་བ་ལ་ཞེན་པ་ལོག་པར་བྱིན་གྱིས་བརླབ་ཏུ་གསོལ། གཞན་དོན་ཁུར་དུ་ཁྱེར་བའི་བྱང་ཆུབ་ཀྱི་སེམས་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཟབ་མོ་སྤྲོས་བྲལ་སྟོང་ཉིད་ཀྱི་དོན་རྟོགས་པར་བྱིན་གྱིས་བརླབ་ཏུ་གསོལ། ལས་རླུང་མཐའ་དག་དབུ་མར་ཞུགས་པའི་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཉམས་རྟོགས་ཀྱི་འབྲས་བུ་མཁའ་ལྟར་ཁྱབ་པར་བྱིན་གྱིས་བརླབ་ཏུ་གསོལ། མཆོག་མི་འགྱུར་གྱི་བདེ་བ་ཆེན་པོའི་ཆ་ཤས་ཡོངས་སུ་རྫོགས་པར་བྱིན་གྱིས་བརླབ་ཏུ་གསོལ། དེ་ལ་བརྟེན་ནས་དཔལ་ལྡན་སྐུ་བཞིའི་འབྲས་བུ་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ། དེ་མ་ཐོབ་ཀྱི་བར་དུ་ཡང་ཁམས་དྲུག་ལྡན་གྱི་རྡོ་རྗེའི་ལུས་ལེགས་པར་ཐོབ་ཅིང་རྗེ་བཙུན་བླ་མ་དམ་པ་ཁྱེད་ཀྱིས་རྗེས་སུ་བཟུང་ནས་ཟབ་ལམ་རྡོ་རྗེའི་རྣལ་འབྱོར་སྒོམ་པར་བྱིན་གྱིས་བརླབ་ཏུ་གསོལ། དེ་སྒོམ་པ་ལ་ཕྱི་ནང་གི་བར་ཆད་གང་ཡང་མེད་པར་བྱིན་གྱིས་བརླབ་ཏུ་གསོལ། ལམ་ཚུལ་བཞིན་དུ་སྒོམ་པའི་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་ལེགས་པར་འདེབས། དེ་ལྟར་རྩེ་གཅིག་གསོལ་བ་བཏབ་པ་ཡིས། །བདག་ལ་བརྩེ་བའི་སྤྱན་གྱིས་ལྷག་པར་གཟིགས། །བླ་མའི་དཔྲལ་མགྲིན་ཐུགས་ཀ་ལྟེ་བ་ཡི། །ཡི་གེ་བཞི་ལས་འོད་ཟེར་རྣམ་བཞི་འཕྲོས། །བདག་གི་གནས་བཞིར་ཐིམ་པས་སེམས་རྒྱུད་ལ། །མཚན་ལྡན་བླ་མའི་གསང་གསུམ་བྱིན་རླབས་ཞུགས། །ལུས་ལ་བདེ་བ་ཆེན་པོས་རྟག་ཏུ་ཁྱབ། །ངག་ལ་གཞོམ་མེད་རིག་སྔགས་ནུས་པ་འབར། །སེམས་ལ་བདེ་སྟོང་ཡེ་ཤེས་ཆེས་ཆེར་རྒྱས། །འཁོར་འདས་ཆོས་ཀུན་འོད་གསལ་འཁོར་ལོ་ཤར། །བླ་མའི་ཐུགས་དང་རང་སེམས་དབྱེར་མེད་གྱུར། །ཞེས་བླ་མའི་ཐུགས་དང་རང་སེམས་དབྱེར་མེད་ཀྱི་ངང་ནས་མཚན་སྔགས་བཟླ། ཨོཾ་ཨཱཿགུ་རུ་བཛྲ་དྷ་ར་ཝ་གིནྡྲ་བི་སྨྲྀ་ཏ་སཱ་དྷྱ་ཤྲཱི་སརྦ་སིདྡྷི་ཧཱུཾ་ཧཱུཾ། ཅི་ནུས་སུ་བཟླ། འདི་ལ་དབང་བཞི་ཚང་ཕྱིར་ལོགས་སུ་ལེན་མི་དགོས། བླ་མའི་སྐུ་ལས་འོད་ཟེར་ཚོགས་སྤྲོས་པས། །འགྲོ་བའི་སྒྲིབ་སྦྱངས་བདེ་ཆེན་ས་ལ་བཀོད། །འཁོར་རྣམས་འོད་ཞུ་བླ་མིའི་སྐུ་ལ་ཐིམ། །བླ་མའི་སྐུ་ལ་བདེ་སྟོང་གཟི་མདངས་རྒྱས། །བླ་མ་འོད་དུ་ཞུ་ནས་རང་ལ་ཐིམ། ། བླ་མ་རང་སེམས་དབྱེར་མེད་ཆོས་ཀྱི་སྐུ། །གནས་ལུགས་སྤྲོས་བྲལ་ངང་དུ་ཉམས་བཞག་ནས། །བདག་གི་སེམས་རྒྱུད་བྱིན་གྱིས་བརླབ་པར་གྱུར། །ཞེས་མོས་ལ། གསུམ་པ་རྗེས་ཀྱི་བྱ་བ་ནི། ཐེག་མཆོག་གདམས་ངག་སྟོན་ལ་དབང་འབྱོར་ཞིང༌། །ཟབ་རྒྱས་ཆོས་ཀྱི་བཤད་སྒྲུབ་དགའ་སྟོན་སྤེལ། །སངས་རྒྱས་ཀུན་དངོས་དཔལ་ལྡན་བླ་མ་ལ། །བྱང་ཆུབ་སྙིང་པོའི་བར་དུ་གསོལ་བ་འདེབས། །བདག་ནི་སྐྱེ་བ་འདི་དང་ཚེ་རབས་ཀུན། །མཚན་ལྡན་བླ་མ་ཁྱེད་ཀྱིས་རྗེས་བཟུང་སྟེ། །གསང་ཆེན་ལམ་གྱི་ཉམས་དང་རྟོགས་པ་ཀུན། །མྱུར་དུ་རྫོགས་ནས་རྡོ་རྗེ་འཆང་ཐོབ་ཤོག །དགེ་བ་འདི་ཡིས་མྱུར་དུ་བདག །རྗེ་བཙུན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཞེས་དགེ་བ་བསྔོའོ། །ཞེས་རྡོ་རྗེ་འཆང་ཆེན་པོ་ངག་དབང་བཤད་སྒྲུབ་དཔལ་གྱི་བླ་མའི་རྣལ་འབྱོར་དཔག་བསམ་ལྗོན་ཤིང་ཞེས་བྱ་བ་འདི་ཡང་གང་གི་སློབ་བུ་རིན་ཆེན་དཔལ་གྱིས་འཇམ་པའི་དབྱངས་ཀྱི་གསེར་སྐུ་དང་དར་བཅས་བསྐུལ་བ་སོགས་བློ་ལྡན་དུ་མའི་ངོར་མཚན་ལྡན་བླ་མ་གང་གི་ཞབས་རྡུལ་སྤྱི་བོར་ལེན་པ་བཙུན་གཟུགས་སིདྡྷི་ཤྲཱི་ནས་དམ་པ་རྣམས་ཀྱི་གསུང་རྗེས་བཟློས་བྱས་ནས་སྦྱར་བའོ། །འདིས་ཀྱང་རྗེ་བཙུན་བླ་མས་རྗེས་སུ་འཛིན་པའི་རྒྱུར་གྱུར་ཅིག །