ཞབས་བརྟན་འགྱུར་མེད་བདེ་ཆེན།
ཞབས་བརྟན་འགྱུར་མེད་བདེ་ཆེན་ཞེས་བྱ་བ་བཞུགས་སོ། །
ཨོཾ་སྭ་སྟི། དོན་གཉིས་མཐར་ཕྱིན་སྟོན་པ་རྫོགས་སངས་རྒྱས། །ཞི་བསིལ་དམ་ཆོས་ལུང་རྟོགས་རྀན་པོ་ཆེ། །རིག་གྲོལ་གཉིས་ལྡན་འཕགས་པའི་ཚོགས་རྣམས་ཀྱིས། །འཆི་མེད་ཚེ་ཡི་དངོས་གྲུབ་བསྩལ་ཏུ་གསོལ། །ངོ་མཚར་སྒྱུ་འཕྲུལ་དྲ་བའི་རོལ་གར་ལས། །དེང་འདིར་མཆོག་གསུམ་འདུས་པའི་རྡོ་རྗེ་འཛིན། །ཟབ་གསང་ཆོས་ཀྱི་བདུད་རྩིའི་དགའ་སྟོན་འགྱེད། །རྗེ་བཙུན་བླ་མའི་ཞབས་པད་བརྟན་པར་ཤོག །དགེ་ལེགས་འདོད་དགུར་འཇོ་བའི་ནོར་བུ་ཡི། །མི་ཤིགས་རླུང་སེམས་འགྱུར་མེད་བདེ་སྟོང་ལས། །རྣམ་གྲོལ་ཡང་དག་ཆོས་ཀྱི་གཏེར་བརྒྱ་བརྡོལ། །རྗེ་བཙུན་བླ་མའི་ཞབས་པད་བརྟན་པར་ཤོག །ལྷ་དང་བླ་མས་དངོས་སུ་རྗེས་བཟུང་ཞིང༌། །ཉམས་རྟོགས་ཀློང་དུ་བརྡོལ་བའི་ངོ་མཚར་གཏམ། །སྦས་པའི་གསང་བ་ཟད་མེད་རིན་ཆེན་གཏེར། །རྗེ་བཙུན་བླ་མའི་ཞབས་པད་བརྟན་པར་ཤོག །མི་ཟད་གདམས་ང༷ག་དཔལ་ལ་དབ༷ང་འབྱོར་བ། །རྨད་བྱུང་བསོ༷ད་ན༷མས་དཔལ་ལས་ལེགས་འཁྲུངས་པའི། །སྐལ་བ་བཟ༷ང་པོ༷་རྫོགས་ལྡན་གསར་བའི་དཔྱིད། །རྗེ་བཙུན་བླ་མའི་ཞབས་པད་བརྟན་པར་ཤོག །དེ་ལྟར་སྨོན་པས་རྗེ་བཙུན་བླ་མ་ཡི། །མཛད་འཕྲིན་འོད་སྣང་ཕྱོགས་བཅུར་རྒྱས་པ་དང༌། །བཤེས་གཉེན་ཁྱེད་དང་སྐད་ཅིག་མི་འབྲལ་བར། །གསུང་གི་དམ་ཆོས་དཔལ་ལ་སྤྱོད་པར་ཤོག །ཅེས་ཞབས་བརྟན་འགྱུར་མེད་བདེ་ཆེན་ཞེས་བྱ་བ་འདི་ཉིད་གྲྭ་བཙུན་པ་ངག་དབང་རྒྱ་མཚོ་ནས་དར་བཅས་སྐུལ་ངོར་སྤྲང་འཁྱམས་པ་དངོས་གྲུབ་དཔལ་གྱིས་ཟླ་ཚེས་བཟང་པོ་ལ་བྲིས་པའོ། །སརྦ་མངྒ་ལམ། །