རྗེས་དྲན་དད་པའི་རང་མདངས།
རྗེས་དྲན་དད་པའི་རང་མདངས་ཞེས་བྱ་བ་བཞུགས་སོ། །
ན་མོ་གུ་རུ་གུ་ཎ་བྷ་དྲ་ཡ། །གདོད་མའི་དུས་ནས་མངོན་རྫོགས་བྱང་ཆུབ་ཀྱང༌། །སྐལ་བཟང་འགྲོ་བའི་རེ་བ་སྐོང་བའི་ཕྱིར། །བསླབ་གསུམ་རྒྱན་གྱིས་མཛེས་པའི་རྣམ་རོལ་བ། །མཚུངས་མེད་ཡོན་ཏན་བཟང་བོས་དཔལ་འདི་སྐྱོངས། །སྡེ་སྣོད་གསུམ་གྱི་ངག་ལ་དབང་འབྱོར་ཞིང༌། །ལུང་རྟོགས་ཡོན་ཏན་བཟང་པོའི་ནོར་གྱིས་ཕྱུག །བསླབ་གསུམ་རྒྱན་གྱིས་མཛེས་པའི་ངུར་སྨྲིག་གར། །མགོན་གང་མཁས་གྲུབ་བྱེ་བའི་གཙུག་ན་མཛེས། །ངེས་གསང་ཐུབ་བསྟན་རིན་ཆེན་བཅུད་ལྡན་མ། །སྙིགས་དུས་རྒྱ་མཚོའི་ཀླུང་དུ་སིམ་པའི་ཚེ། །ཐབས་མཁས་ཁྱབ་འཇུག་སྒྱུ་འཕྲུལ་སྣ་ཚོགས་ཀྱིས། །ལེགས་པར་འདེགས་མཁས་ངེས་དོན་བསྟན་པའི་གཉེན། །ངེས་དོན་སྙིང་པོའི་ཆོས་སྒྲ་སྒྲོགས་པའི་དགོན། །གདུལ་བྱ་པད་དཀར་བཀྲ་བའི་ནགས་ཀློང་ན། །འཁྲུལ་བྲལ་ལུང་རིགས་སྙན་པའི་གསུང་དབྱངས་ཀྱིས། །ངེས་དོན་མདོ་ཡི་དགོངས་དོན་ཕྱོགས་བརྒྱར་སྤེལ། །རིང་ནས་ཐུགས་བསྐྱེད་རླབས་འཕྲེང་ཡོལ་མེད་པར། །ཐུབ་བསྟན་སྙིང་བོ་གསལ་བའི་ཁྲི་གདུགས་མཆོག །སླར་ཡང་ཐུབ་བསྟན་སྤེལ་ལ་ཟླ་བྲལ་ཞིག །རིང་མིན་བསྟན་འགྲོའི་མགོན་དུ་བརྩེ་བས་དགོངས། །དེ་ལྟར་གསོལ་བཏབ་དགེ་བའི་རྣམ་དཀར་ལས། །སྐྱེ་བ་འདི་དང་ཚེ་རབས་ཐམས་ཅད་དུ། །འདྲེན་མཆོག་གང་གི་བྱམས་དང་བརྩེ་བ་ཡིས། །རྗེས་བཟུང་དོན་དམ་བྱང་ཆུབ་མྱུར་མངོན་ཤོག །ཅེས་པ་འདི་ནི་ངེས་དོན་དགའ་ཚལ་གྱི་དེབ་བསྐྲུན་སྐབས་རྗེ་བླ་མ་ཡོན་ཏན་བཟང་པོའི་རྗེས་དྲན་དུ་ཕྲན་ཐ་ཤལ་བ་དངོས་གྲུབ་དཔལ་གྱིས་བྲིས་པའོ། །