སྤྲུལ་སྐུ་མྱུར་བྱོན་འཕྲིན་ལས་འོད་སྣང་།
སྤྲུལ་སྐུ་མྱུར་བྱོན་འཕྲིན་ལས་འོད་སྣང་ཞེས་བྱ་བ་བཞུགས་སོ། །
ན་མོ་ཨཱརྱ་ཏཱ་རེ་ཡ། དུས་གསུམ་རྒྱལ་ཡུམ་རྗེ་བཙུན་སྒྲོལ་མ་ཡི། །ཕྱི་ནང་གསང་གསུམ་ཐུགས་རྗེའི་ནུས་མཐུ་ཡིས། །རྒྱལ་ཀུན་འདུས་པའི་དཔལ་ལྡན་བླ་མ་ཡི། །མཛད་འཕྲིན་འོད་སྣང་གསལ་བའི་དགེ་ལེགས་སྩོལ། །རྨད་བྱུང་ཐུགས་བསྐྱེད་དུས་ལས་ཡོལ་མེད་པར། །སྤྲུལ་བའི་སྒྱུ་འཕྲུལ་ངུར་སྨྲིག་རོལ་བའི་གར། །སྐྱེས་སྦྱང་ཡོན་ཏན་མཆོག་ལ་ཟླ་བྲལ་བ། །དེང་འདིར་མངོན་པར་འཆར་བའི་དགེ་ལེགས་སྩོལ། །ངེས་དོན་སྙིང་པོའི་རྒྱལ་བསྟན་པད་མའི་ཚལ། །དར་ཞིང་རྒྱས་ལ་ཡུན་རིང་གནས་སླད་དུ། །སྐྱེ་སྤྲུལ་གཞོན་ནུ་གསར་བ་པད་མའི་གཉེན། །དེང་འདིར་མངོན་པར་འཆར་བའི་དགེ་ལེགས་སྩོལ། །བསོད་ནམས་ལེགས་བྱས་ཆུ་གཏེར་ལས་འཁྲུངས་པའི། །རྣམ་གྲོལ་ལམ་བཟང་གསལ་བའི་སྒྲོན་མེ་མཆོག །ལེགས་བཤད་འོད་ཀྱིས་འགྲོ་ཀུན་མུན་སེལ་བའི། །སྤྲུལ་བའི་འོད་སྟོང་རྒྱུན་མི་འཆད་པར་སྨོན། །ཀུན་ལ་སྙོམས་པའི་ཐུགས་རྗེའི་འོད་དཀར་ཆ། །ཡོངས་སུ་རྫོགས་པའི་མཚུངས་མེད་རིན་པོ་ཆེ། །བསྟན་འགྲོའི་དོན་ཆེན་སྒྲུབ་ལ་ཉེར་དགོངས་ནས། །སྤྲུལ་བའི་ཟློས་གར་མྱུར་དུ་མཇལ་བར་སྨོན། །གཞོན་ནུ་གཟུགས་བཟང་མཚན་དཔེས་རབ་བརྒྱན་པའི། །བློ་གསལ་རིགས་བཟང་མཐུ་སྟོབས་ནུས་པའི་བདག །བསླབ་གསུམ་རྒྱན་གྱི་མཆོག་ཏུ་རོལ་བ་ཡི། །སྤྲུལ་བའི་ཐུགས་རྗེའི་གྲུ་ཆར་འཇོ་བར་ཤོག །ལེགས་བྱས་དགེ་ཚོགས་ཇི་སྙེད་མཆིས་པ་ཡིས། །མཚན་ལྡན་བླ་མའི་མཛད་འཕྲིན་རྒྱས་པ་དང༌། །བུ་སློབ་ཚོགས་ཀྱི་དམ་ཚིག་རབ་བརྟན་ཅིང༌། །ངེས་དོན་བསྟན་པ་རྒྱས་པའི་བཀྲ་ཤིས་ཤོག །ཅེས་སྤྲུལ་སྐུ་མྱུར་བྱོན་འཕྲིན་ལས་འོད་སྣང་ཞེས་བྱ་བ་འདི་ནི་འཛམ་ཐང་བ་གྲྭ་བཙུན་པ་ཤེས་རབ་སོགས་ཀྱིས་དར་བཅས་སྐུལ་ངོར་སྤྲང་འཁྱམས་པ་དངོས་གྲུབ་དཔལ་གྱིས་བྲིས་པའོ། །ཛ་ཡནྟུ།