ཞབས་བརྟན་གསོལ་འདེབས་འཆི་མེད་རྟག་བརྟན།
ཞབས་བརྟན་གསོལ་འདེབས་འཆི་མེད་རྟག་བརྟན་ཞེས་བྱ་བ་བཞུགས་སོ། །
ཨོཾ་སྭ་སྟི། རྨད་བྱུང་སྐུ་བཞིའི་མི་འཇིགས་ལྷུན་པོ་ལ། །འཆི་མེད་ཚེ་ཡི་དཔལ་ན་མངོན་མཐོ་བའི། །ཚེ་ཡི་ལྷ་མཆོག་རྣམས་ཀྱི་དགེ་ལེགས་ཀྱིས། །དཔལ་ལྡན་བླ་མའི་ཞབས་པད་བརྟན་དུ་གསོལ། །གསང་བདག་སྒྱུ་འཕྲུལ་མར་མེ་གཅིག་ཉིད་ལས། །རང་འདྲ་ཆད་པའི་ངུར་སྨྲིག་རྣམ་རོལ་བའི། །དམ་ཆོས་བདུད་རྩིའི་རྩེ་དགའ་འགྱེད་པ་ཡི། །དཔལ་ལྡན་བླ་མའི་ཞབས་པད་བརྟན་དུ་གསོལ། །བསོད་ནམས་འོ་མའི་རྒྱ་མཚོ་འཕྱུར་བ་ལས། །རྒྱལ་བསྟན་རྒྱ་མཚོའི་གསང་མཛོད་འཛིན་པ་ལ། །རླབས་ཆེན་མཛད་པའི་ནོར་བུའི་གཏེར་བརྡོལ་བའི། །དཔལ་ལྡན་བླ་མའི་ཞབས་པད་བརྟན་དུ་གསོལ། །འཇི༵གས་མེ༵ད་བདེན་གསུང་དམ་ཆོས་ནཱ་དའི་གླུ། །སྙན་དགུར་ལེན་པས་རྒྱལ་བ་རྒྱ་མཚོ་ཡི། །ཟབ་ལམ་རྡོ༵་རྗེ༵འི་སྙིང་པོ་ཐང་མལ་བརྡལ། །དཔལ་ལྡན་བླ་མའི་ཞབས་པད་བརྟན་དུ་གསོལ། །དབང་ལུང་མན་ངག་བདུད་རྩིའི་ཆུ་རྒྱུན་གྱིས། །སྐལ་བཟང་གདུལ་བྱའི་རེ་སྐོང་དཔག་བསམ་ཤིང༌། །དགོས་འདོད་ཀུན་འབྱུང་རྗེ་བཙུན་བླ་མ་ཡི། །སྐུ་ཚེ་མི་འགྱུར་བསྐལ་བརྒྱར་ཞབས་བརྟན་ཤོག །གདམས་ང༵ག་ཆོས་ཀྱི་དཔལ་ལ་དབ༵ང་བསྒྱུར་བ། །འཇི༵གས་མེ༵ད་རྒྱལ་བསྟན་འཛིན་པའི་མངའ་བདག་མཆོག །གསང་གསུམ་མི་འགྱུར་རྡོ༵་རྗེ༵འི་ཁམས་བརྟན་ནས། །མཛད་འཕྲིན་འོད་སྣང་ཕྱོགས་བཅུར་རྒྱས་པར་ཤོག །ཅེས་ཞབས་བརྟན་གསོལ་འདེབས་འཆི་མེད་རྟག་བརྟན་ཞེས་པ་འདི་ནི་ངག་དབང་ཀུན་དགའ་རྒྱལ་མཚན་གྱིས་དར་བཅས་སྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །རྒྱལ་བར་གྱུར་ཅིག །