ཞབས་བརྟན་ཚེ་ཡི་དཔལ་སྟེར།
ཞབས་བརྟན་ཚེ་ཡི་དཔལ་སྟེར་ཞེས་བྱ་བ་བཞུགས་སོ། ། སྐྱབས་གནས་བསླུ་མེད་བླ་མ་ཡི་དམ་ལྷ། །སངས་རྒྱས་ཆོས་ཚོགས་ཆོས་སྐྱོང་སྲུང་མ་ཡི། །གསང་གསུམ་བདེན་པའི་བྱིན་རླབས་ནུས་མཐུ་ཡིས། །ཞབས་བརྟན་བདེན་ཚིག་འགྲུབ་པའི་དགེ་ལེགས་སྩོལ། །ཟབ་གསང་མདོ་སྔགས་བསྟན་པ་སྤེལ་བའི་གཉེན། །མཁས་གྲུབ་བྱེ་བའི་གཙུག་གི་རྒྱན་གྱུར་བ། །སྐལ་བཟང་སྐྱེ་དགུའི་བསོད་ནམས་ཞིང་གི་རྟེན། །པད་མ་རྣམ་རྒྱལ་ཞབས་པད་བརྟན་དུ་གསོལ། །ཞབས་པ༵ད་མི་འཇིག་ཁྲི་ལ་ལེགས་བཞུགས་ནས། །རྒྱལ་བསྟན་སྙིང་པོ་ཀུན་མཁྱེན་ཇོ་ནང་བའི། །ངེས་གསང་བསྟན་པ་མ༷་ལུས་དར་རྒྱས་ཕྱིར། །ཚེ་ཡི་མི་མཐུན་ཕྱོགས་ལས་རྣ༵མ་རྒྱ༵ལ་ཤོག །བདག་ཅག་བུ་སློབ་འདུས་སྡེ་རྒྱ་མཚོ་ཡི། །རྣམ་དཀར་ཐོས་བསམ་སྒོམ་པའི་བསོད་ནམས་ཀྱིས། །རྗེ་བཙུན་བླ་མའི་ཞབས་པད་བསྐལ་བརྒྱའི་བར། །རྟག་བརྟན་མི་འགྱུར་བཞུགས་པའི་མཐུ་གྲུབ་ཤོག །འཆི་བདག་འཇོམས་པའི་ཚེ་ལྷ་རྣམ་གསུམ་གྱིས། །སྐུ་ཚེ་མི་འཇིག་གདོང་ལྔས་རབ་བཏེགས་པའི། །རྡོ་རྗེའི་ཁྲི་འཕང་ཞབས་པད་ལེགས་བཀོད་དེ། །གཡོ་མེད་བསྐལ་བརྒྱའི་བར་དུ་བརྟན་དུ་གསོལ། །ཆོས་ཉིད་བདེ་གཤེགས་སྙིང་པོའི་བདེན་པ་དང༌། །ཆོས་ཅན་རྟེན་འབྲེལ་བསླུ་བ་མེད་པ་ཡིས། །དཔལ་ལྡན་བླ་མའི་གསང་གསུམ་སྲིད་མཐའི་བར། །འགྱུར་མེད་རྡོ་རྗེའི་ཁམས་ལྟར་བརྟན་པར་ཤོག །དེ་ལྟར་གསོལ་བཏབ་སྨོན་པའི་རྣམ་དཀར་གྱིས། །སྐྱེ་བ་འདི་དང་ཚེ་རབས་ཐམས་ཅད་དུ། །མཚན་ལྡན་བླ་མ་མཆོག་དང་མི་འབྲལ་ཞིང༌། །གདམས་ངག་ཆོས་ཀྱི་དཔལ་ལ་སྤྱོད་པར་ཤོག །ཅེས་ཞབས་བརྟན་ཚེ་ཡི་དཔལ་སྟེར་ཞེས་བྱ་བ་འདི་ཡང་གང་གི་སློབ་བུ་ཞིག་གིས་སྐུལ་ངོར་འབྲས་རབ་འབྱམས་པ་དངོས་གྲུབ་དཔལ་ནས་དད་གུས་ཀྱིས་སྦྱར་བའོ། །སརྦ་མངྒ་ལམ། །