ཞབས་བརྟན་གསོལ་འདེབས་དད་པའི་རང་མདངས།
ཞབས་བརྟན་གསོལ་འདེབས་དད་པའི་རང་མདངས་ཞེས་བྱ་བ་བཞུགས་སོ། །
ཨོཾ་སྭ་སྟི། མཁྱེན་དང་བརྩེ་བའི་སྟོན་པ་རྫོགས་སངས་རྒྱས། །སྲིད་ཞིའི་གདུང་བ་སེལ་བའི་ལུང་རྟོགས་ཆོས། །རིག་གྲོལ་ཡོན་ཏན་ལྡན་པའི་འཕགས་ཚོགས་ཀྱིས། །འཆི་མེད་ཚེ་ཡི་དངོས་གྲུབ་སྩལ་དུ་གསོལ། །བྱམས་བརྩེའི་འགྲོ་རྣམས་ངག་གིས་དབང་བསྒྱུར་ཞིང༌། །བདེ་གསལ་ཡེ་ཤེས་ལྡན་པ་དགའ་བཞིའི་གཏེར། །བསྟན་པ་རྒྱ་མཚོའི་མངའ་བདག་དྲིན་ཅན་རྗེ། །ཚེ་མཐའ་ཡས་པའི་ངོ་བོར་ཞབས་བརྟན་གསོལ། །ངུར་སྨྲིག་རྒྱན་དུ་འཆང་བ་ཆོས་ཀྱི་རྗེ། །མི་འཇིག་རྡོ་རྗེའི་ཁྲི་འཕངས་ཡངས་བའི་རྩེར། །གསང་གསུམ་མི་འགྱུར་རྡོ་རྗེའི་ཁམས་བརྟན་ཞིང༌། །ཞབས་པད་བསྐལ་བརྒྱའི་བར་དུ་བཞུགས་གསོལ་འདེབས། །དེ་ལྟར་གསོལ་བཏབ་མཆོག་གསུམ་བདེན་མཐུ་ཡིས། །ཇི་སྲིད་བླ་མེད་བྱང་ཆུབ་མ་ཐོབ་བར། །དྲིན་ཅན་བླ་མ་མཆོག་དང་མི་འབྲལ་ཞིང༌། །གདམས་ངག་ཆོས་ཀྱི་དཔལ་ལ་སྤྱོད་པར་ཤོག །ཅེས་པ་འདི་ཡང་ཁྲི་འཛིན་པ་མུན་སེལ་གྱིས་སྐུལ་ངོར་འབྲས་རབ་འབྱམས་པ་དངོས་གྲུབ་དཔལ་གྱིས་བྲིས་པའོ། །