ཟབ་ལམ་རྡོ་རྗེའི་རྣལ་འབྱོར་གྱི་ཁྲིད་ཡིག་མཐོང་བ་དོན་ལྡན་གྱི་སྡོམ་ཚིག་གྲུབ་པའི་དགོངས་རྒྱན།

ཟབ་ལམ་རྡོ་རྗེའི་རྣལ་འབྱོར་གྱི་ཁྲིད་ཡིག་མཐོང་བ་དོན་ལྡན་གྱི་སྡོམ་ཚིག་གྲུབ་པའི་དགོངས་རྒྱན་ཞེས་བྱ་བ་བཞུགས་སོ། །

ཨོཾ་སྭཱ་སྟི། ན་མོ་གུ་རུ་བུདྡྷཱ་བོ་དྷི་སཏྭེ་བྷྱཿ གང་ཞིག་ཕུན་ཚོགས་ཀུན་གྱི་གཞི། །བླ་མེད་གོ་འཕང་ཡིད་བཞིན་ནོར། །འགྲོ་བ་ཀུན་ལ་ཉེར་སྩོལ་བ། །བླ་མའི་ཞབས་ལ་གུས་པས་འདུད། །ཀུན་ཁྱབ་དབྱིངས་ནི་རྣམ་པ་ཐམས་ཅད་པ། །སེམས་ཉིད་རང་བཞིན་ཡོན་ཏན་ཀུན་གྱི་གཏེར། །དབྱེར་མེད་གདོད་ནས་རྣམ་གྲོལ་ཆོས་ཀྱི་སྐུ། །ནང་རིག་འགྱུར་མེད་དོན་དམ་རྒྱལ་གྱུར་ཅིག །གང་ཡང་རྒྱུད་སྡེའི་ཆུ་བོ་འབུམ་ཕྲག་གིས། །བློ་ཡི་མཚོ་ཆེན་བྲེས་ལས་མངོན་འཕགས་པ། །དེ་ལས་སྙིང་གི་བུམ་པ་གང་གྱུར་པའི། །གདམས་པའི་རྒྱུན་གྱིས་ཕྱོགས་འདི་སྐལ་བཟང་བྱ། །འདིར་ནི་རྒྱུད་ཀྱི་སྙིང་པོ་བླ་མེད་པ། །དངོས་གྲུབ་ཀུན་ཀྱི་འབྱུང་གནས་དུས་གསུམ་གྱིས། །རྒྱལ་ཀུན་བགྲོད་པ་གཅིག་པའི་ལམ་མཐར་ཐུག །རྣལ་འབྱོར་དབང་ཕྱུག་མ་ལུས་འཇུག་ངོགས་ཀྱི། །ཁམས་དྲུག་གང་ཟག་ཚེ་གཅིག་སངས་རྒྱས་ཀྱི། །འབྲས་བུ་མཆོག་ལ་ཡང་དག་འགོད་ནུས་པའི། །ཉེ་ལམ་མྱུར་ལམ་ཟབ་གསང་ཁྱད་པར་ཅན། །རྒྱུད་རྒྱལ་རྣམས་སུ་སྦས་པའི་དོན་མཆོག་འདི། །དུས་འཁོར་རྒྱུད་ལས་མ་སྦས་གསལ་བར་བསྟན། ཕྱག་རྒྱ་ཆེན་པོའི་རྣལ་འབྱོར་ཡན་ལག་དྲུག ། ཟབ་ལམ་རྡོ་རྗེའི་རྣལ་འབྱོར་ཞེས་བྱ་བ། །ཡིད་ཆེས་གསུམ་དང་ལྡན་པའི་ལམ་མཆོག་ཡིན། །འདི་འཆད་པ་ལ་ཟབ་ལམ་སྔོན་འགྲོ་དང༌། །རྡོ་རྗེའི་རྣལ་འབྱོར་དངོས་གཞི་སྒོམ་རིམ་དང༌། །རྗེས་ཀྱི་ལམ་དང་ས་མཚམས་སོགས་དང་གསུམ། དང་པོ་ཐུན་མོང་ཐུན་མོང་མ་ཡིན་གཉིས། །དང་པོ་ལ་ཡང་སྔོན་འགྲོ་འབུམ་ལྔ་ཞེས། །ཆོས་སྤྱིའི་རྩ་བ་སྐྱབས་འགྲོ་ཐེག་ཆེན་ཀྱི། །རྩ་བ་སེམས་བསྐྱེད་སྡིག་སྦྱོང་ཡིག་བརྒྱ་དང༌། །ཚོགས་བསགས་མཎྜལ་བྱིན་རླབས་རྩ་བ་ཡི། །བླ་མའི་རྣལ་འབྱོར་འཁྲིད་དང་རྣམ་པ་ལྔ། །དང་པོ་དབེན་གནས་བདེ་བའི་སྟན་ལ་འདུག །ལུས་གནད་དཀྱུས་མཐུན་ཙམ་བྱས་སེམས་རྣལ་དུ། །ཕབ་ནས་གང་དུ་གནས་པའི་ས་ཕྱོགས་ནི། །དག་པའི་ཞིང་ཁམས་ཡངས་ཤིང་རྒྱ་ཆེ་བར། །གྱུར་པའི་དབུས་སུ་རིན་ཆེན་ལས་གྲུབ་པའི། །ཁང་བཟང་གཞལ་མེད་རྒྱ་ཚད་ཆད་པ་མེད། །དེ་ཡི་དབུས་སུ་དཔག་བསམ་སྡོང་པོ་ལ། །ལོ་འདབ་མེ་ཏོག་འབྲས་བུ་རབ་ཏུ་རྒྱས། །དེ་ཡི་རྩེ་མོར་སེང་ཁྲི་པདྨ་དང༌། །ཉི་ཟླ་བརྩེགས་པའི་གདན་གྱི་སྟེང་དུ་ནི། ། རྩ་བའི་བླ་མ་རྡོ་རྗེ་འཆང་ཆེན་ལ། །བརྒྱུད་པའི་བླ་མ་རྣམས་དང་ཡི་དམ་གྱི། །རྒྱལ་བའི་དཀྱིལ་འཁོར་ལྷ་ཚོགས་ཐམས་ཅད་ཀྱིས། །བསྐོར་བ་རྩ་བར་མཁའ་འགྲོ་ཆོས་སྐྱོང་རྣམས། །བདག་ལ་སྐྱོབ་པའི་ཚུལ་གྱིས་བཞུགས་པར་སྒོམ། །དཔག་བསམ་ཤིང་གི་ཕྱོགས་བཞིར་གཞལ་ཡས་ཁང༌། །དེ་དབུས་སེང་ཁྲི་པདྨ་ཉི་ཟླའི་གདན། །བླ་མའི་སྐུ་ཡི་མདུན་ཕྱོགས་ཤཱཀྱ་ཐུབ། །དེ་སོགས་ཕྱོགས་བཅུ་དུས་གསུམ་སངས་རྒྱས་དང༌། །གཡས་ཕྱོགས་འཇམ་དཔལ་ལ་སོགས་བྱང་སེམས་རྣམས། །གཡོན་ཕྱོགས་ཤཱ་རིའི་བུ་སོགས་ཉན་རང་རྣམས། །རྒྱབ་ཕྱོགས་དམ་ཆོས་གླེགས་བམ་ཚུལ་བཞུགས་མོས། ། དེ་ནས་མཁའ་མཉམ་སེམས་ཅན་ཐམས་ཅད་ཀྱིས། །སྐྱབས་གནས་རྒྱ་མཚོའི་ཚོགས་ལ་མོས་གུས་ཀྱིས། །སྐྱབས་འགྲོ་བྱེད་པ་མོས་ཤིང་ཁྱད་པར་དུ། །སྙིང་རྗེས་འགྲོ་རྣམས་འཁོར་བའི་སྡུག་བསྔལ་ལས། །བསྐྱབ་ཏུ་གསོལ་ཞེས་ལེགས་པར་གསལ་བཏབ་ཏེ། །ནམ་མཁའ་ཞེས་སོགས་ཚིག་དོན་ལེགས་བསམ་སྟེ། །རྣམས་ལ་སྐྱབས་སུ་མཆིའོ་ཞེས་པའི་བར། །བརྗོད་ཅིང་བླ་མ་དཀོན་མཆོག་ཡོན་ཏན་དྲན། །འཁོར་བའི་སྡུག་བསྔལ་འཇིགས་པས་དཀོན་མཆོག་ལ། །ཡིད་ཆེས་བྱས་ནས་སྐྱབས་འགྲོ་ཅི་ནུས་བྱ། །བླ་མ་ཞེས་སོགས་ལན་གསུམ་གསོལ་བཏབ་བྱ། །དེ་ནས་སྐྱབས་ཡུལ་འོད་ཞུ་རང་ལ་ཐིམ། །དགེ་བ་འདི་ཡིས་སྐྱེ་བོ་ཞེས་སོགས་ཀྱིས། །དགེ་བ་རྫོགས་པའི་བྱང་ཆུབ་ཆེན་པོར་བསྔོ། །བར་སྐབས་རྣམས་སུ་སྐྱབས་འགྲོའི་གོ་དོན་རྣམས། །བཤད་ནས་སྐྱབས་འགྲོ་བློ་ལ་འབྱོར་ངེས་བྱ། །ལག་ལེན་སྐྱབས་འགྲོ་སྦྲགས་ནས་ཕྱག་འབུམ་བྱ། །འདི་སྐབས་ཉལ་བའི་རྣལ་འབྱོར་སྒོམ་ཚུལ་ནི། ། སྐྱབས་ཡུལ་མ་བསྡུས་བླ་མའི་སྐུ་མདུན་གྱི། །ས་གཞི་པད་ཟླའི་གདན་ལ་ཉལ་བར་མོས། །མོས་གུས་སྒོམ་བཞིན་གཉིད་དུ་འགྲོ་བར་བྱ། །དམིགས་བསྐོར་དང་པོ་སྐྱབས་འཁྲིད་རིམ་པ་རྫོགས། །

༈ གཉིས་པ་སྐྱབས་འགྲོ་སྔར་བཞིན་ལན་འགའ་བྱ། །སྐྱབས་ཡུལ་རང་ལ་བསྟིམ་པའི་རྗེས་སུ་ནི། །ཕྱོགས་བཅུའི་འཇིག་རྟེན་ཁམས་གང་ཕྱིན་ཀྱང་རུང༌། །ནམ་མཁའ་མཐའ་མེད་ཇི་བཞིན་སེམས་ཅན་གྱི། །མཐའ་མེད་དེ་དག་དྲིན་ཅན་ཕ་མ་ཡིན། །དེ་ཀུན་འདོད་པ་བདེ་འདོད་སྒྲུབ་མི་ཤེས། སྡུག་བསྔལ་འབའ་ཞིག་སྤྱོད་པ་སྙིང་རེ་རྗེ། །དེ་རྣམས་འཁོར་བའི་སྡུག་བསྔལ་ལས་དྲངས་ཏེ། །ཐར་པ་བླ་མེད་རྫོགས་པའི་སངས་རྒྱས་ཀྱི། །ས་ལ་འགོད་པར་བྱ་དགོས་ད་ལྟ་ལ། །དེ་འདྲའི་ནུས་མེད་ཐོག་མར་བདག་ཉིད་ལ། །སངས་རྒྱས་གོ་འཕང་མྱུར་དུ་ཐོབ་པར་བྱ། དེ་ཕྱིར་རྡོ་རྗེའི་རྣལ་འབྱོར་བསྒོམ་པར་བགྱི། །བསམ་བཞིན་སེམས་ཅན་ཐམས་ཅད་ཀྱི་དོན་དུ། །ཞེས་སོགས་འདོན་པ་བསྒྲགས་ཏེ་ཅི་ནུས་བརྗོད། །དེ་ནས་ཚད་མེད་བཞི་པོ་བསྒོམ་པ་ནི། །སེམས་ཅན་ཐམས་ཅད་བདེ་བ་དང་ཞེས་སོགས། །བརྗོད་བཞིན་འགྲོ་ཀུན་བདེ་དང་དེའི་རྒྱུ་ལྡན། །སྡུག་བསྔལ་རྒྱུ་བཅས་བྲལ་ཏེ་བདེ་དང་ལྡན། །ཆགས་སྡང་བྲལ་བའི་བཏང་སྙོམས་ཚད་མེད་ལ། །གནས་པར་གྱུར་ཅིག་བསམ་བཞིན་ཅི་ནུས་བྱ། །དེ་ནས་དགེ་བསྔོ་སྐྱབས་འགྲོའི་སྐབས་བཞིན་ནོ། །དེང་སྐབས་ལག་ལེན་ཞག་བདུན་བར་དུ་སྒོམ། །འདི་དུས་བྱམས་དང་སྙིང་རྗེ་སེམས་བསྐྱེད་ཀྱི། །དོན་རྣམས་ཞིབ་པར་བླ་མས་བཤད་དགོས་ལ། །དམིགས་བསྐོར་གཉིས་པ་སེམས་བསྐྱེད་འཁྲིད་རྫོགས་སོ། །

༈ གསུམ་པ་སྐྱབས་འགྲོ་སེམས་བསྐྱེད་ཚད་མེད་བཞི། །དམིགས་རྣམ་གསལ་ཞིང་དུས་ཡུན་ཐུང་ངུ་བྱ། །རང་གི་སྤྱི་བོར་པཾ་ལས་པདྨ་དང༌། །ཨ་ལས་ཟླ་བའི་དཀྱིལ་འཁོར་གྱི་སྟེང་དུ། །ཧཱུཾ་ལས་རྡོ་རྗེ་དཀར་པོ་རྩེ་ལྔ་པ། །ལྟེ་བར་ཧཱུཾ་ལས་འོད་འཕྲོས་འཕགས་པ་མཆོད། །སེམས་ཅན་ཀུན་གྱི་སྡིག་སྦྱངས་ཚུར་འདུས་ཏེ། །ཧཱུཾ་ལ་ཐིམ་ནས་དེ་འོད་ཞུ་བ་ལས། །རྡོར་སེམས་དཀར་པོ་ཞལ་གཅིག་ཕྱག་གཉིས་པ། །གཡས་ན་རྡོ་རྗེ་གཡོན་གྱིས་དྲིལ་བུ་འཛིན། །ཡུམ་ལ་འཁྱུད་པ་རྡོ་རྗེ་བསྙེམས་མ་ནི། །དཀར་མོ་གྲི་གུག་ཐོད་པ་འཛིན་པ་དང༌། །མཉམ་པར་སྦྱོར་བ་གཉིས་ཀའང་རུས་པ་དང༌། །རིན་ཆེན་རྒྱན་གྱིས་བརྒྱན་ཏེ་རྡོ་རྗེ་དང༌། །པདྨའི་སྐྱིལ་མོ་ཀྲུང་གིས་བཞུགས་པ་ཡི། །དཔྲལ་མགྲིན་ཐུགས་ཀ་ལྟེ་བའི་གནས་རིམ་བཞིན། །ཨོཾ་ཨཱཿ་ཧཱུཾ་ཧོཿཡི་གེས་མཚན་པ་དང༌། །ཐུགས་ཀའི་ཧཱུཾ་ལས་འོད་འཕྲོས་སངས་རྒྱས་ཀྱི། །བྱིན་རླབས་ཡེ་ཤེས་བདུད་རྩིའི་རྣམ་པར་དྲངས། །ཛཿཧཱུཾ་བཾ་ཧོཿགཉིས་སུ་མེད་པར་བསྟིམ། །བཅོམ་ལྡན་བདག་དང་སེམས་ཅན་ཐམས་ཅད་ཀྱི། །ཐོག་མ་མེད་ནས་བསགས་པའི་སྡིག་ལྟུང་ཚོགས། །བྱང་ཞིང་དག་པར་མཛད་དུ་གསོལ་ཞེས་སྒོམ། །ཧེ་རུ་ཀ་ཡི་ཡིག་བརྒྱ་ཅི་ནུས་བཟླས། དེ་ནས་བདག་ནི་མི་ཤེས་རྨོངས་པ་སྟེ། །ཞེས་སོགས་དེ་དོན་ཇི་བཞིན་བདག་ལ་ནི། །རྨོངས་པས་དམ་ཚིག་འགལ་ཀུན་བླ་མས་སྐྱོབ། །གཙོ་བོ་རྡོ་རྗེ་འཛིན་པའི་བདག་ཉིད་ཅན། །འགྲོ་བའི་གཙོ་ལ་བདག་ནི་སྐྱབས་སུ་མཆི། །སྐུ་གསུང་ཐུགས་དང་རྩ་བ་ཡན་ལག་གི །དམ་ཚིག་ཉམས་པ་ཐམས་ཅད་མཐོལ་ལོ་བཤགས༌། །འཁོར་བ་ཐོག་མེད་ནས་བསགས་སྡིག་སྒྲིབ་ཀུན། །བྱང་ཞིང་དག་པར་བྱིན་གྱིས་བརླབ་ཏུ་གསོལ། །རྡོ་རྗེ་སེམས་དཔའ་ཡབ་ཡུམ་འོད་དུ་ཞུ། །རང་ལ་ཐིམ་ནས་དགེ་བ་བསྔོ་བ་ནི། །དགེ་བ་འདི་ཡིས་མྱུར་དུ་ཞེས་སོགས་དང༌། །དགེ་བ་འདི་ཡིས་སྐྱེ་བོ་སོགས་ཀྱིས་སྔོ། །བཤགས་བསྡམ་བྱེད་ཚུལ་སྔར་བྱས་སྡིག་ལྟུང་ཀུན། །འགྱོད་དེ་ཕྱིན་ཆད་སྡོམ་སེམས་དང་བཅས་ཏེ། །རང་རྒྱུད་སྡོམ་དང་རྡོར་སེམས་རྟེན་སྟོབས་དང༌། །གཉེན་པོ་ཀུན་ཏུ་སྤྱོད་པའི་སྟོབས་ཀྱིས་བཤགས། །བདུད་རྩི་འབེབས་སྦྱོང་དམིགས་རྣམ་འབད་པར་བྱ། །དེང་སྐབས་ལག་ལེན་ཡིག་བརྒྱ་འབུམ་དུ་བཟླ། །དམིགས་བསྐོར་གསུམ་པ་ཡིག་བརྒྱའི་འཁྲིད་རིམ་རྫོགས། །འདི་སྐབས་སྡིག་སྒྲིབ་དག་པའི་རྟགས་དག་ནི། །ཉམས་དང་རྨི་ལམ་ཚུལ་དུ་བྱུང་བར་གསུངས། །

༈ བཞི་པ་སྐྱབས་སེམས་གོང་བཞིན་སྔོན་འགྲོ་ནས། མདུན་གྱི་ནམ་མཁར་བླ་མ་ཡི་དམ་དང༌། །སངས་རྒྱས་བྱང་ཆུབ་སྐྱབས་ཡུལ་སྐབས་ལྟར་གསལ། །ཕྱག་འཚལ་སྐྱབས་འགྲོ་མཎྜལ་བྱ་བ་ནི། །གང་གི་དྲིན་གྱིས་བདེ་ཆེན་ཉིད་སོགས་དང༌། །གང་གི་བཀའ་དྲིན་སོགས་ཀྱིས་ཕྱག་འཚལ་བྱ། །ཁྱོད་ནི་མ་དང་ཁྱོད་ནི་ཞེས་སོགས་དང༌། །དཔལ་ལྡན་བླ་མ་སོགས་ཀྱིས་སྐྱབས་འགྲོ་བྱ། །དེ་ནས་ལུས་ལས་མཎྜལ་ཚོམ་བུ་བཀོད། །ཡིད་ཀྱི་དམིགས་པ་འབྱུང་བ་བཞིའི་དཀྱིལ་འཁོར། །རྟེན་པའི་གླིང་བཞི་རི་རབ་འཁོར་ཡུག་བཅས། །སྲིད་རྩེ་ནས་བཟུང་ཁམས་གསུམ་ཡོངས་རྫོགས་པའི། །འཇིག་རྟེན་ཁམས་འདི་རིན་ཆེན་སྣ་བདུན་སོགས། །ལྷ་མིའི་དངོས་པོ་བཟང་པོས་ཡོང་བཀང་སྟེ། །བླ་མ་དཀོན་མཆོག་རྣམས་ལ་ཕུལ་བར་བགྱི། །དེ་ནས་བདག་ནི་མྱུར་དུ་རྫོགས་སངས་རྒྱས། །ཟབ་ལམ་རྡོ་རྗེའི་རྣལ་འབྱོར་ཉམས་རྟོགས་ཀུན། །སྐྱེ་བར་གསོལ་བ་འདེབས་པར་བྱ་བ་ཡིན། །དེ་སྐབས་ངག་ཏུ་འདི་སྐད་ཨོཾ་བཛྲ། །བྷུ་མི་ཨཱཿཧཱུཾ་ཅེས་སོགས་བརྗོད་པ་དང༌། །དེ་ནས་ཐུགས་རྗེས་འགྲོ་བའི་ཞེས་སོགས་དང༌། ས་གཞི་སྤོས་ཀྱིས་བྱུགས་ཤིང་ཞེས་སོགས་བརྗོད། ། ཚུལ་དེས་མཎྜལ་འབུལ་ནས་ཐུན་འཇོག་ཁར། མཆོད་ཡུལ་འོད་ཞུ་རང་ལ་གཉིས་མེད་ཐིམ། །དགེ་བ་བསྔོ་བ་སྐྱབས་འགྲོའི་སྐབས་བཞིན་བྱ། །ཕྱག་ལེན་དུས་ཞག་ཉེར་གཅིག་མཎྜལ་འབུལ། །སྐབས་འདིར་མཎྜལ་ཕན་ཡོན་དུས་འཁོར་གྱི། །ལུགས་ཀྱི་འཇིག་རྟེན་ཁམས་ཀྱི་བཀོད་པ་དང༌། །ཚོགས་བསག་དུ་མ་དགོས་ཚུལ་རབ་བཤད་བྱ། །དམིགས་བསྐོར་བཞི་པ་མཎྜལ་འཁྲིད་རྫོགས་སོ། ། ཚོགས་བསགས་ཐུབ་པའི་རྟགས་མང་གཞན་ལས་ཤེས། །

༈ ལྔ་པ་སྐྱབས་སེམས་སྔར་བཞིན་དག་ཞིང་དུ། ། སེང་ཁྲི་པདྨ་ཉི་ཟླའི་གདན་སྟེང་དུ། །རྩ་བའི་བླ་མ་ཁྱབ་བདག་རྡོ་རྗེ་འཆང༌། །སྐུ་མདོག་སྔོན་པོ་ཞལ་གཅིག་ཕྱག་གཉིས་པ། །རྡོར་དྲིལ་ཐུགས་ཀར་བསྣོལ་ནས་ཞབས་སྐྱིལ་ཀྲུང༌། ། དར་དང་རིན་ཆེན་རྒྱན་ཀྱིས་བརྒྱན་པ་དང༌། །མཚན་དང་དཔེ་བྱད་ཐམས་ཅད་ཡོངས་སུ་རྫོགས། །རང་ལ་དགྱེས་པའི་ཞལ་འཛུམ་བག་དང་ལྡན། །བརྒྱུད་པའི་བླ་མ་རྣམས་ཀྱིས་བསྐོར་བ་དང༌། །ཡི་དམ་སངས་རྒྱས་བྱང་སེམས་ཉན་རང་དང༌། །ཆོས་སྐྱོང་སྲུང་མ་ཐམས་ཅད་བཞུགས་པར་གྱུར། །ཕྱག་མཆོད་ཡན་ལག་བདུན་པ་རྒྱས་པར་བྱ། །བསྡུ་ན་ཡིད་ཀྱིས་སྤྲུལ་པའི་མཆོད་པ་ཕུལ། །དཔལ་ལྡན་བླ་མ་དམ་པ་བདག་ཕྱག་འཚལ། །མཆོད་ཅིང་སྡིག་བཤགས་དགེ་ལ་རྗེས་ཡི་རང། །ཆོས་འཁོར་བསྐོར་ཞིང་མྱ་ངན་ལས་མི་འདའ། །དགེ་བ་བླ་མེད་བྱང་ཆུབ་བསྔོ་བར་བྱ། །སྐྱབས་སུ་མཆིའོ་བྱང་ཆུབ་སེམས་བསྐྱེད་དོ། །བླ་ན་མེད་པའི་ལམ་ལ་བསྟེན་པར་བགྱི། །བདག་ལ་ཐུགས་རྗེས་བཟུང་དུ་གསོལ་ཞེས་བརྗོད། །བར་འདིར་སྤྲོ་ན་བླ་བརྒྱུད་གསོལ་འདེབས་བྱ། །བསྡུས་ན་མ་བྱས་རུང་ལ་ངེས་པར་དུ། །གདུང་བ་དྲག་པོས་གསོལ་བ་འདི་ལྟར་གདབ། །སངས་རྒྱས་ཀུན་འདུས་ཞེས་སོགས་བརྗོད་བཞིན་དུ། །ཚིག་དོན་བསམ་ཞིང་མོས་གུས་ཡང་ཡང་བྱ། ། བླ་མའི་དཔྲལ་པར་ཨོཾ་ཡིག་མགྲིན་པར་ཨཱཿ། ། སྙིང་གར་ཧཱུཾ་ཡིག་ལྟེ་བར་ཧོཿ་ཡིག་ནི། །སྐུ་གསུང་ཐུགས་དང་ཡེ་ཤེས་རྡོ་རྗེར་མོས། །ཨོཾ་ལས་འོད་དཀར་རང་གི་དཔྲལ་པར་ཐིམ། །ལུས་སྒྲིབ་དག་སྟེ་བུམ་དབང་ཐོབ་ནས་ནི། །སྐུ་ཡི་བྱིན་རླབས་ཞུགས་སྟེ་ཨཱཿཡིག་ལས། །འོད་དམར་འཕྲོས་ཏེ་བདག་གི་མགྲིན་པར་ཐིམ། །ངག་གི་སྡིག་སྒྲིབ་དག་ཅིང་གསང་དབང་ཐོབ། །གསུང་གི་བྱིན་རླབས་ཞུགས་ཏེ་ཧཱུཾ་ཡིག་ལས། །འོད་མཐིང་འཕྲོས་ཏེ་རང་གི་སྙིང་གར་ཐིམ། །ཡིད་ཀྱི་སྒྲིབ་དག་ཤེར་དབང་ཐོབ་ནས་ནི། །ཐུགས་ཀྱི་བྱིན་རླབས་ཞུགས་ཏེ་ཧོཿཡིག་ལས། །འོད་སེར་འཕྲོས་ཏེ་ལྟེ་བར་ཐིམ་པ་ལས། ཆགས་རྟོག་དག་སྟེ་བཞི་བའིདབང་ཡང་ཐོབ། །ཡེ་ཤེས་རྡོ་རྗེའི་བྱིན་རླབས་ཞུགས་པར་སྒོམ། ། སླར་ཡང་མོས་གུས་གསོལ་བ་བཏབ་པ་ཡིས། །སངས་རྒྱས་བྱང་སེམས་བླ་མ་ཉིད་ལ་ཐིམ། དེ་ཉིད་འོད་ཞུ་རང་ལ་ཐིམ་གྱུར་ནས། །བླ་མའི་ཐུགས་དང་རང་སེམས་དབྱེར་མེད་སྒོམ། །སྐྱེ་བ་ཀུན་ཏུ་ཞེས་སོགས་ཅི་རིགས་ཀྱིས། །དགེ་བ་བསྔོ་སྟེ་ཐུན་མཚམས་མོས་གུས་སྒོམ། །བླ་རྣམ་རྣམ་གསུམ་བདུན་ཕྲག་རེ་རེ་བྱ། །ཉལ་བའི་རྣལ་འབྱོར་རང་གི་སྙིང་ཀ་ལ། །པདྨ་འདབ་བརྒྱད་སྟེང་དུ་བླ་མའི་སྐུ། །ཚོན་གང་ཙམ་དུ་དགྱེས་པའི་ཚུལ་དུ་བཞུགས། །མོས་གུས་ངང་ལས་གཉིད་དུ་འགྲོ་བར་བྱ། །དམིགས་བསྐོར་ལྔ་པ་བླ་མའི་རྣལ་འབྱོར་རྫོགས༌། །སྐབས་འདིར་བླ་མར་མོས་གུས་ལམ་བྱེད་ཚུལ། །མོས་གུས་ཕན་ཡོན་བླ་མའི་མཚན་ཉིད་དང༌། །བླ་མ་བསྟེན་ཚུལ་ལ་སོགས་ཞིབ་དུ་བཤད། །

གཉིས་པ་ཐུན་མོང་མིན་པའི་སྔོན་འགྲོ།

གཉིས་པ་ཐུན་མོང་མིན་པའི་སྔོན་འགྲོ་ལ། །

རྫོགས་རིམ་བརྟེན་ལ་བསྐྱེད་པའི་རིམ་པ་དང༌། རྫོགས་རིམ་ཉེར་བསྡོགས་དབེན་གསུམ་བསྟེན་པ་གཉིས། །དང་པོར་རྫོགས་རིམ་གཙོ་བོར་བྱེད་པའི་སྐབས། །ཧ་ཅང་བསྡུས་པ་དུས་འཁོར་ལྷན་སྐྱེས་ཉིད། །དེ་ཡི་སྒོམ་ཚུལ་སྐྱབས་སེམས་སྔར་བཞིན་བསྒོམ། །སྟོང་པའི་ངང་ལས་དུས་འཁོར་ལྷན་སྐྱེས་སུ། །གྱུར་པ་ལ་སོགས་ངག་འདོན་བཞིན་དུ་སྒོམ། །རང་གི་སྙིང་ལས་འོད་ཟེར་འཕྲོས་པ་ཡིས། ། སྣོད་རྣམས་གཞལ་ཡས་ཁང་དང་བཅུད་ཐམས་ཅད། །དུས་ཀྱི་འཁོར་ལོའི་ལྷ་ཚོགས་གྱུར་བར་མོས། ། ཨོཾ་སྭཱཧཱ། །ཞེས་པ་ཅི་རིགས་བཟླ་བར་བྱ། །དེ་ནས་ཐམས་ཅད་འོད་ཞུ་རང་ལ་ཐིམ། །ལྷ་སྐུ་གསལ་སྟོང་ཅི་ནུས་མཉམ་པར་གཞག །དེ་ལྟར་ཡང་ཡང་བསྒོམས་ན་ལེགས་པར་གསུངས། །ཐུན་མཚམས་ལྷ་སྐུ་འོད་གསལ་ངང་དུ་སྦྱང༌། དགེ་བ་འདི་ཡིས་སོགས་ཀྱིས་དགེ་བ་བསྔོ། །ཕྱག་སྲོལ་བསྙེན་པ་འབུམ་ཕྲག་བཅུ་བཟླས་སྒོམ། །དམིགས་སྐོར་དྲུག་པ་བསྐྱེད་རིམ་བཤད་པ་རྫོགས། །

༈ གཉིས་པ་རྫོགས་རིམ་ཡེ་ཤེས་བསྐྱེད་པའི་ཕྱིར། བར་འདིར་མཆོག་དབང་གོང་མ་བསྐུར་བར་བྱ། །དེ་ནས་རྒྱུད་ལས་གསུངས་བཞིན་ལྟོས་མེད་བཞི། །ཡང་ན་དབེན་པ་གསུམ་ལྡན་ཞེས་བྱ་བ། །ལུས་ཀྱི་ལོངས་སྤྱོད་བདེ་སྡུག་ལ་སོགས་པ། །གང་ལ་ལྟོས་མེད་ལྟོས་མེད་དང་པོ་དང༌། ། དེ་བཞིན་ངག་ཡིད་འཕོ་བའི་ལོངས་སྤྱོད་ལ།།ལྟོས་པ་མེད་པ་ལྟོས་མེད་བཞི་ལྡན་ཡིན། །ཐོག་མ་མེད་ནས་ལུས་ངག་ཡིད་གསུམ་གྱི། །བྱ་བྱེད་ཁོ་ནར་འདས་ནས་དོན་མེད་སོང༌། །ཡང་དག་འབྲས་བུ་གང་ཡང་མ་གྲུབ་པས། །ཕྱིན་ཆད་ལྟོས་མེད་བཞི་ལྡན་ལམ་འབད་ན། །ཐར་བ་བླ་མེད་བྱང་ཆུབ་ཐོབ་པར་ངེས། །ཁམས་འཁྲུག་ལ་སོགས་གེགས་དང་གོལ་ས་དག །སྤང་ཕྱིར་ལུས་གནད་བཅའ་ཞིང་རླུང་རོ་བསལ། །ཡང་དག་དོན་ལ་སེམས་ནི་ལེགས་གནས་ཕྱིར། །རྣལ་འབྱོར་བརྟན་པ་ཅུང་ཟད་མ་ཐོབ་བར། །དྲན་པ་བསྟེན་ཙམ་མ་གཏོགས་དགེ་མི་དགེ། །ལུང་མ་བསྟན་ཀྱི་སྤྲོས་པ་ཀུན་དོར་ཏེ། །དབེན་པ་གསུམ་ལྡན་བསྟེན་པ་གལ་ཆེའོ། །འདི་སྐབས་མུན་ཁང་བལྟ་སྟངས་ངེས་ཅན་སོགས། །མཐའ་གཅིག་མ་ཡིན་དངོས་གཞི་སོར་སྡུད་ལ། །མྱུར་དུ་འཇུག་དགོས་དེ་ལམ་བྱང་བའི་ཕྱིར། །མུན་ཁང་བལྟ་སྟངས་ངེས་ཅན་ཕྱག་ལེན་མཛད། །གནས་སྤྱིའི་མཚན་ཉིད་རྩ་རྒྱུད་ལ་སོགས་བཞིན། །ཉིན་མོ་སྐྱེ་བོའི་རྒྱུ་འགྲུལ་མེད་པ་དང༌། །མཚན་མོ་དགྲ་ཡི་བརླག་ཅོར་མེད་པ་སོགས། །འཚེ་བའི་འཇྀགས་པ་མེད་ཅིང་འཐུང་བྱའི་ཆུ། །ལུས་ལ་མི་གནོད་ཐུན་མོང་མ་ཡིན་པའི། །གནས་ཀྱི་ཁྱད་པར་འབྱོར་ན་སྟེང་ཁང་ངམ། །བར་ཁང་མུན་ཁང་སྒོ་འཁྱོག་རིམ་པ་གསུམ། །སྐར་ཁུང་ཕྱི་ཆུང་ནང་ཡངས་མཐོང་དཀར་ཞིང༌། །བཀག་ན་སྣང་བ་ཆུང་ངུ་མེད་པ་དགོས། །ཀུན་སྤངས་གནས་ནི་ས་ཕུག་བྲག་ཕུག་དང༌། །ཁྱིམ་ལ་སོགས་པ་ཇི་ལྟར་རིགས་པ་སྟེ། །སྐམ་ཞིང་མུན་ནག་དགོས་ཞིང་གནས་དེ་ལ། །སྔོན་འགྲོ་སྒོམ་ཚུལ་ཐུན་གྱི་དང་པོ་ལ། །སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་དང༌། །བསྐྱེད་རིམ་བྱ་སྟེ་ཕྱི་ཐུན་རྣམས་ལ་བསྡུ། །ཐུན་གྱི་སྔོན་འགྲོ་ཉམས་སུ་ལེན་ལུགས་འདི། །འདི་ཡི་འོག་མ་ཐམས་ཅད་ཤེས་པར་བྱ། །དབེན་གསུམ་ཉམས་ལེན་དངོས་ནི་མུན་ཁང་དེར། །བསམ་གཏན་འབོལ་ཆུང་བཏིངས་ནས་ལུས་གནད་ནི། །རྐང་པ་རྡོ་རྗེའི་སྐྱིལ་ཀྲུང་སྒལ་ལྟག་བསྲང༌། །ལྐོག་མས་ཨོལ་མདུད་ནོན་ཙམ་མགྲིན་པ་དགུག །སོ་མཆུ་རང་སར་ལྕེ་རྩེ་རྐན་ལ་སྦྱར། །མཐེ་བོས་སྲིན་རྩ་མནན་ནས་སོར་མོས་བསྡམས། །ལག་པ་ཁུ་ཚུར་བརླ་བཞག་ལག་ངར་བསྲང༌། །མིག་ཀྱང་སྟེང་ཕྱོགས་ནམ་མཁར་བལྟ་བའི་ཚུལ། །གྱེན་དུ་བསྒྲིལ་ནས་གཡོ་མེད་བཞག་བྱས་ཏེ། །རླུང་འཁྲུགས་སེལ་ཞིང་རླུང་སྐྱོན་མི་འབྱུང་ཕྱིར། །རླུང་རོ་ལན་གསུམ་སངས་ཀྱིས་འབུད་པར་བྱ། །དེ་ནས་རང་བབས་ཅི་བདེར་རྒྱུ་རུ་གཞུག །སེམས་གནད་གང་ཡང་བསམ་དུ་མེད་པ་དང༌། །ཅི་ཡང་ཡིད་ལ་མི་བྱེད་ཆེད་མི་སྒྲིམ། །ཆེད་དུ་མ་ཀློད་ནམ་མཁའ་སོགས་ལ་ཡང༌། །ཆེར་གྱིས་བལྟ་བ་མ་ཡིན་རང་ཉིད་ལ། །ཆེད་དུ་ལྟ་བ་མ་ཡིན་གང་ལ་ཡང༌། །མི་བརྟེན་ཅིར་ཡང་འཆར་རུང་ཙམ་དེ་ལ། །བཟོ་བཅོས་མེད་པ་ལྷོད་དེ་བཞག་པར་བྱ། །དེ་ཁ་ལ་གནས་སྒོམ་ཏུ་བཏུབ་ན་ལེགས། །སེམས་འཕྲོ་ན་ནི་གཉེན་པོ་བརྟེན་དགོས་ལ། །སེམས་གནས་འཕྲོ་ལ་རྣམ་རྟོག་ཐོལ་ཐོལ་སྐྱེ། །གཟུགས་སོགས་རྣམ་པ་ཡིད་ལ་ཝལ་ཝལ་འཆར། །ཤར་མ་ཐག་ཏུ་རང་གི་ཤེས་ཀྱིན་འདུག །དགའ་མི་དགའ་དང་རྟོག་དཔྱོད་མི་བྱ་བར། །སྔར་གྱི་སེམས་གནས་འཇོག་ཚུལ་དེ་ཁ་བསྐྱངས། །རྣམ་རྟོག་གཅིག་ལ་གཅིག་བརྒྱུད་སྣ་ཚོགས་འཕྲོ། །ཡུན་རིང་འབྱམས་པ་བྱུང་ན་སྐྱོན་ཆེ་སྟེ། །འདི་ལ་དྲན་པས་ཟིན་མ་ཐག་ཏུུ་ནི། །ཕྱིན་ཆད་འོག་འགྱུ་རྒྱ་འབྱམས་མི་བྱེད་པར། །དྲན་པས་ཟིན་དགོས་སྙམ་པའི་འདུན་པ་བསྐྱེད། །གང་ཡང་བསམ་མེད་ངང་ནས་རིག་པ་སྒྲིམ། །སེམས་གནས་མི་གནས་འཕྲོའམ་མི་འཕྲོ་སོགས། །སྙམ་པའི་དྲན་ཤེས་བྱ་ར་ཡང་ཡང་བཏང༌། །འོག་འགྱུ་རྒྱ་འབྱམས་སོང་བ་ཇེ་ཆུང་འགྲོ །དེ་ལྟར་རྩེ་གཅིག་འཇུར་ལ་སྒོམ་དགོས་སོ། ། དེ་ནས་དགེ་བ་བསྔོ་བ་གོང་དང་འདྲ། །ཐུན་མཚམས་སེམས་ནི་བཟོ་མེད་གདངས་ལྡན་བྱ། །ལུས་ངག་སྤྱོད་པ་ཚུལ་གནས་མཐུན་པ་དགོས། །དེ་ལྟར་བསྒོམས་པས་ལུས་ཉམས་ངག་ཉམས་དང༌། །སེམས་ཉམས་མཐོང་ཉམས་རྨི་ཉམས་གང་བྱུང་ཀྱང༌། །རང་བབས་གང་བྱུང་དེ་ཀ་ལྷུག་པར་བསྐྱང༌། །ཐུན་མཚམས་ཀུན་ཏུ་རེ་དོགས་མི་བྱ་བར། །སྤྱོད་ལམ་དྲག་ཤུལ་འདོད་ཡོན་རྣམ་རྟོག་སྤངས། །ཀུན་ད་བྱང་ཆུབ་མ་ཉམས་བསྲུང་བར་བྱ། །གོས་སོགས་དྲོ་གྲང་རན་པ་མཚན་དུས་སུ། །གཉིད་ལོག་ཚིམ་ཞིང་ཉིན་མོར་གཉིད་སྤངས་ནས། །ཐུན་སྐབས་རྩེ་གཅིག་ཤུགས་ཀྱིས་ཡུན་བསྲིང་སྒོམ། །ཞག་དུས་བཞི་བཅུ་སྒོམ་པའི་ས་བཅད་མཛད། །དམིགས་བསྐོར་བདུན་པ་དབེན་གསུམ་བཤད་འཁྲིད་རྫོགས།།སྐབས་འདིར་དབེན་པའི་ཕན་ཡོན་ཞི་ལྷག་དང༌། །དབེན་གསུམ་གནད་རྣམས་ཞིབ་མོར་རྟོགས་པར་བྱེད། །ལག་ལེན་བསླབ་ཅིང་བྱིན་བརླབས་བྱ་བ་དང༌། །སེམས་འཁྲིད་ཡང་ཡང་བྱ་སྟེ་གནད་མ་འབྱོར། །བཅོས་ནས་གེགས་སེལ་ངོ་སྤྲོད་སྐབས་བབ་བྱ། །ཟབ་ལམ་རྡོ་རྗེའི་སྔོན་འགྲོའི་འཁྲིད་རྣམས་རྫོགས། །

༈ གཉིས་པ་ཟབ་ལམ་རྡོ་རྗེ་རྣལ་འབྱོར་གྱི། །དངོས་གཞི་སྒོམ་རིམ་རྒྱུད་ལས་གསུངས་པ་ལྟར། །མདོར་ན་ཡན་ལག་དྲུག་ནི་སོར་སྡུད་དང༌། །བསམ་གཏན་སྲོག་རྩོལ་འཛིན་པ་རྗེས་དྲན་དང༌། །ཏིང་ངེ་འཛིན་གྱི་ཡན་ལག་དྲུག་པོ་ཡིན། །དེ་དག་རྡོ་རྗེ་བཞི་ཡི་དབང་བྱས་ན། །སོར་བསམ་སྐུ་དང་སྲོག་འཛིན་གསུང་རྡོ་རྗེ། །རྗེས་དྲན་ཐུགས་དང་ཏིང་ངེ་འཛིན་ཡེ་ཤེས། །རྡོ་རྗེའི་རྣལ་འབྱོར་བསྙེན་སྒྲུབ་ཡན་ལག་བཞི། །སོར་བསམ་བསྙེན་པ་སྲོག་འཛིན་ཉེར་སྒྲུབ་དང༌། །རྗེས་དྲན་སྒྲུབ་པ་ཏིང་འཛིན་སྒྲུབ་ཆེན་ནོ། །དགེ་བ་གསུམ་ལྟར་སོར་བསམ་ཐོག་མར་དགེ། །སྲོག་འཛིན་བར་དགེ་དྲན་ཏིང་ཐ་མར་དགེ། །རྒྱུ་འབྲས་གཉིས་ལྟར་སོར་སྡུད་སྲོག་རྩོལ་དང༌། །རྗེས་དྲན་གསུམ་ནི་རྒྱུ་ཡི་ཡན་ལག་སྟེ། ། བསམ་གཏན་འཛིན་པ་ཏིང་འཛིན་གསུམ་འབྲས་བུ། །ཐམས་ཅད་ཕྱག་རྒྱ་ཆེན་པོའི་རྣལ་འབྱོར་གཅིག །ཡན་ལག་དངོས་རྣམས་སྔ་མ་མཐར་ཕྱིན་ནས། །ཕྱི་མ་རྒྱུད་ལ་སྐྱེ་བས་ཐོག་མ་ལ། །སྐྱེ་བའི་དུས་སྐབས་རིམ་ཅན་དུ་གནས་ཤིང༌། །དེ་དག་སྐྱེ་བའི་རྒྱུ་ཚོགས་བསླབ་པ་ཡི། །རྗེས་མཐུན་ཡན་ལག་དྲུག་ལ་ཐོག་མར་ནི། །སོ་སོར་ཞུས་ཤིང་སྦྱང་ནས་དེ་རྗེས་སུ། །སྟན་ཐོག་གཅིག་ཏུ་རྫོགས་པར་ཉམས་སུ་ལེན། །དངོས་གཞིར་ཐོག་མར་དགེ་དང་བར་དུ་དགེ། །ཐ་མར་དགེ་བའི་འཁྲིད་དེ་རྣམ་པ་གསུམ། །དང་པོ་ལ་ཡང་སོར་སྡུད་བསམ་གཏན་འཁྲིད། །དང་པོ་སོ་སོར་སྡུད་པའི་འཁྲིད་ལ་ནི། །ཉམས་ལེན་དམིགས་པའི་གནད་དང་སྒོམ་དོན་ནི། །བློ་ལ་འགོད་པ་གཉིས་ལས་དང་པོ་ལ། །སོར་སྡུད་དངོས་དང་བོགས་འདོན་སྤོགས་ཆོག་གཉིས། །དང་པོ་དངོས་ལ་མཚན་མོ་གསེང་མེད་དུ། །ནམ་མཁའི་རྣལ་འབྱོར་ཉིན་མོ་སྤྲིན་མེད་ཀྱི། །ནམ་མཁའི་རྣལ་འབྱོར་གཉིས་ལས་དང་པོ་ནི། །སྔོན་འགྲོ་ལུས་གནད་སྔར་བཞིན་ལེགས་བྱས་ཏེ། །ལྟ་སྟངས་སྨིན་མཚམས་ཐད་ནས་སོར་བཅུ་དྲུག །གཞལ་བའི་སྟེང་གི་ནམ་མཁར་ལྟ་བར་བྱ། །དབང་མདོར་བཀབ་དང་མ་བཀབ་མིག་དག་གིས། །ཞེས་པ་ཧ་ཅང་གདངས་བཙུམ་མ་ཡིན་པར། །རང་བབས་ངང་ནས་མིག་འབྲས་གྱེན་ལ་བཟློག །སེམས་གནད་ཕལ་ཆེར་དབེན་གསུམ་སྐབས་བཞིན་ལས། །ནམ་མཁའི་མུན་པར་སེམས་ནི་གཏད་ནས་འཇོག །ལུས་གནད་བྱེད་བཅིང་ལྡན་པས་ཡིད་མིག་རླུང༌། །གཙུག་ཏོར་ཐད་ཀྱི་ནམ་མཁར་དབྱེར་མེད་དུ། །བསྲེས་ཏེ་གང་ཡང་ཡིད་ལ་མི་བྱེད་སྒོམ། །སོར་སྡུད་དངོས་གཞིའི་དམིགས་པ་དང་པོའོ། །བསམ་མེད་རྣལ་འབྱོར་ཟླ་བ་གཅིག་ཏུ་སྒོམ། །དམིགས་པ་གཏོང་ཚུལ་མི་འདྲ་བཞི་ཙམ་བྱུང༌། །སོར་སྡུད་དམིགས་པའི་རྩ་བ་སྔར་བཤད་པ། །དེ་ཉིད་བསམ་མེད་རྣལ་འབྱོར་ཞེས་བྱ་ནི། །དཔེ་ནི་ལྷ་ཁང་ལྡེར་བཟོ་ལྟ་བུ་བཤད། །དེ་སྐབས་སེམས་མ་གཞུར་བའི་སྐྱོན་གྱིས་ནི། །སྒོམ་སྐྱོན་ཐེབས་ཏེ་སྒོམ་མིན་གཉིད་མིན་དུ། །འགྲོ་ན་ལྟ་སྟངས་ནམ་མཁའི་དབུས་སུ་ནི། །སེམས་ཐིམ་འགྲོ་བ་ལྟ་བུ་དྲག་ཏུ་གཏད། །རིག་པ་བསྒྲིམས་ནས་སྒོམ་པའི་ཏིང་ངེ་འཛིན། །སྤྲེའུ་སྒོ་གཅིག་ལྟ་བུའི་རྣལ་འབྱོར་ཏེ། །ཕྱག་ལེན་ཞག་ནི་བཅོ་ལྔའི་བར་དུ་སྒོམ། །རྩེ་གཅིག་རྣལ་འབྱོར་དམིགས་བསྐོར་གཉིས་པའོ། །དེ་ལྟར་བསྒོམས་པས་རླུང་སྟོད་འཚང་བ་དང༌། །མིག་རུས་ན་བ་ཡེ་ཤེས་ཕེབས་མིན་བརྒྱལ། །ཟུག་གཟེར་སྐྱེ་བ་ལ་སོགས་བྱུང་གྱུར་ན། །བྱེད་བཅིང་སྔར་ལས་མ་གཡོས་སེམས་གསལ་རིག །སྟེང་དུ་ཆེ་རེ་བཟོ་བཅོས་མེད་པར་བཞག །དུས་གསུམ་རྣམ་པར་རྟོག་པ་སྤངས་བྱས་ཏེ། །ད་ལྟའི་ཤེས་པ་སོ་མར་སེམས་གནས་ཏེ། །རང་ངོ་ཤེས་པའི་དྲན་པ་བསྟེན་པ་ནི། །དཔེ་ནི་སྤུན་གསུམ་བར་མ་འགྲོགས་ལྟ་བུ། །ཕྱག་ལེན་ཞག་ནི་བཅོ་ལྔའི་བར་དུ་སྒོམ། །རང་གྲོལ་རྣལ་འབྱོར་དམིགས་བསྐོར་གསུམ་པའོ། །དམིགས་པ་དེ་གཉིས་སྐབས་སུ་སེམས་བསྒྲིམས་པས། །ཡུད་ཙམ་གནས་ཤིང་དེ་རྗེས་ཇི་ཙམ་དུ། །སྒྲིམ་གྱིན་འཕྲོ་རྒོད་སོང་ན་གྲིམ་པའི་སྐྱོན། །མ་ཡེངས་དྲན་པའི་བྱ་ར་ཙམ་བཞག་ནས། །གང་ཡང་མི་སྒོམ་ལྷོད་གྱིས་ཀློད་དེ་བཞག །དཔེར་ན་རྔ་མོ་བཏགས་གྲོལ་ལྟ་བུ་སྟེ། །ཕྱག་སྲོལ་དུས་ཞག་བཅོ་ལྔའི་བར་དུ་སྒོམ། །རྩོལ་བྲལ་རྣལ་འབྱོར་དམིགས་བསྐོར་བཞི་པའོ། །དམིགས་པ་ཕྱི་མ་གསུམ་པོ་འདི་རྣམས་ཀྱང༌། །དང་པོའི་སྟེང་དུ་ཚང་བར་རེས་འགའ་སྒྲིམ། །རེས་འགའ་ཀློད་དེ་རེས་འགའ་སེམས་གསལ་རིག །ངོ་བོར་ལྟ་བ་ཕལ་ཆེར་རྩོལ་བྲལ་ངང༌། །བཟོ་མེད་འཇོག་པ་མཐིལ་དུ་བྱས་ཏེ་སྒོམ། །དམིགས་སྐོར་ལྔ་པའི་བཤད་འཁྲིད་རྫོགས་པའོ། །གཉིས་པ་ཉིན་མོའི་རྣལ་འབྱོར་ཞེས་བྱ་བ། །གནས་ཀྱི་ཁྱད་པར་འབྱོར་ལྡན་ཡིན་ན་ནི། །གནས་ཕྱེད་གཡབ་ཁ་ཤར་བསྟན་ནུབ་བསྟན་དང༌། ཀུན་སྤངས་གནས་ནི་སྐྱོ་ར་བྲག་ཤིང་སོགས། །རང་གི་ལུས་ལ་གྲིབ་མ་འབྱུང་བ་དང༌། །སྐྱེ་བོ་གཞན་གྱིས་ཚུར་མི་མཐོང་བའི་གནས། །གཉིས་ཀ་མཚུངས་པར་ནམ་མཁའ་རྒྱ་ཆེན་པོ། །མཐོང་བའི་ས་ལ་སྒོམ་པ་ཡིན་པར་གསུངས། །ཉི་འོད་གངས་རི་འོད་འཚེར་མིག་ལ་གནོད། །དེ་དག་མིག་ལམ་མི་འབྱུང་ས་ལའོ། །དུས་ནི་སྔ་དྲོ་ཉི་མར་རྒྱབ་ཕྱོགས་ཏེ། །ཕྱི་དྲོ་ཡང་ནི་དེ་བཞིན་ཉི་ཕྱེད་དུས། །མིག་ལ་གནོད་པ་ཡིན་པས་སྤངས་ཞེས་གསུངས། །ཕྱེད་གཡབ་བྱང་བསྟན་ཡང་ན་བྲག་དང་ནི། །རྩིག་པ་ལ་སོགས་གྲིབ་མ་ཆེ་ཡོད་ན། །ཉིན་གུང་བྱང་དུ་ཕྱོགས་པས་སྒོམ་དུ་རུང༌། །སྤྲིན་དང་སེར་བུ་མེད་པའི་དུས་སུ་སྒོམ། །དེ་དག་དུས་ལས་གཞན་དུ་མུན་ཁང་དུ། །མཚན་མོའི་རྣལ་འབྱོར་སྒོམ་པར་བྱ་བ་ཡིན། ། བསྒོམ་བྱ་དངོས་ནི་གོང་དུ་བསྟན་པ་ཡི། །མི་གཡོ་གསུམ་ལྡན་དེ་ཉིད་རྩེ་གཅིག་པའི། །རྣལ་འབྱོར་སོགས་གནད་ཕྱི་མ་གསུམ་པོ་དེ། །གེགས་སེལ་བོགས་འདོན་དགོས་ན་བསྒོམས་པར་གསུངས། །བསྒོམ་བྱ་དངོས་ནི་ཉིན་མཚན་རྣལ་འབྱོར་འདྲ། །མི་འདྲའི་ཁྱད་པར་ཉིན་མོའི་རྣལ་འབྱོར་ནི། །ལྟ་སྟངས་གནད་ནི་ཁྲོ་བོའི་ལྟ་སྡང་ལ། །མིག་ནི་འབྲུ་ཚུགས་ལྟ་ཚུལ་དགོས་པ་ཡིན། །དམིགས་པ་ཡུལ་གྱི་གནད་ནི་མུན་ནག་གི། །ནམ་མཁར་ལྟ་བའི་ཚབ་ཏུ་སྤྲིན་མེད་ཀྱི། །ནམ་མཁའ་སྔོ་སང་རང་སེམས་གསལ་ཧྲིག་ལ། །དབྱེར་མེད་ཚུལ་དུ་མཉམ་པར་འཇོག་དགོས་གསུངས། །དེང་སྐབས་ཟླ་བ་གཉིས་དང་ཕྱེད་དུ་སྒོམ། །དེ་ནི་དངོས་གཞིའི་དམིགས་བསྐོར་དྲུག་པའོ། །སྡོམ་པས་སོར་སྡུད་ཟླ་བ་ལྔ་ལ་སྒོམ། །གཉིས་པ་བོགས་འདོན་སྤོགས་ཆོག་ཉིན་པར་དང༌། །འབྲེལ་བའི་སྤོགས་ཆོག་མཚན་མོ་གཉིད་ཀྱི་ནི། །འོད་གསལ་འཛིན་པ་གཉིས་ལས་དང་པོ་ནི། །ལག་ལེན་ཉིན་མཚན་རྣལ་འབྱོར་གང་ཡིན་ཡང༌། །མིག་གཉིས་ལྟ་ས་ཕྲ་མོ་གཅིག་ལ་བསྒྲིལ། །ལྕེ་ཕུགས་བཟློག་ཅིང་མཆུ་སྣ་རྣ་བ་གཅུད། །བཞིན་རས་ཁྲོ་བོའི་གདོང་དང་ཉ་བཞི་སྒྲིམ། །རྐང་སོར་རྣམས་བཀུག་ཁུ་ཚུར་སྐྱིལ་ཀྲུང་དམ། །དཔུང་པ་དྲག་ཏུ་རྒྱངས་པས་དབང་པོ་ལྔའི། །རླུང་འཆིང་ལྟོ་བ་ཚིགས་པ་ཕྱིར་འཕེལ་བྱ། །རེ་མོས་མྱུར་མིན་ཆུ་ཚོད་ཙམ་རེ་སྤེལ། །དེས་ནི་སྲོག་ཐུར་གཉིས་པོ་བཅིངས་པར་འགྱུར། །ཐུན་གྱི་གསུམ་ཆའམ་བཞི་ཆ་ཙམ་རེ་བསྒོམ། །ཐུན་ལྷག་དཀྱུས་བཞིན་སྒོམ་པས་ཉམས་རྟོགས་སྐྱེ། །ཉམས་པ་སླར་གསོ་གོང་འཕེལ་འགྲོ་བར་གསུངས། །གནས་སྐབས་གསུམ་པོ་དེ་ལས་གཞན་མི་སྒོམ། །སྤོགས་པའི་ཆོ་གའི་དམིགས་བསྐོར་བདུན་པའོ། །གཉིས་པ་མཚན་མོ་ཉལ་བའི་སྐབས་སུ་ནི། །ལུས་གནད་ཙོག་པུའམ་སེང་གེའི་ཉལ་སྟབས་བྱ། །མིག་བཙུམ་མིག་འབྲས་གྱེན་ལ་བཟློག་པར་བྱ། །སེམས་གནད་ལྟ་སྟངས་ལམ་ནས་དྲངས་བྱས་ཏེ། །ནམ་མཁར་ལྟ་བ་མན་ངག་ཡིན་པས་ན། །དེ་ཡི་ངང་ནས་གཉིད་དུ་འགྲོ་བར་བྱ། །ཉིན་མོའི་སྒོམ་ཤུགས་གཉིད་ཁར་མཚམས་སྦྱར་མཐུས། །ཞག་བདུན་ལ་སོགས་འོད་གསལ་ཟིན་པར་འགྱུར། །ཅི་སྟེ་མ་ཟིན་རང་ཉིད་དུས་འཁོར་གསལ། །ཐུགས་ཀའི་འོད་འཕྲོས་སྣོད་བཅུད་འོད་ཞུ་ནས། །རང་ལ་ཐིམ་ནས་རང་ཡང་འོད་དུ་ཞུ། །འོད་ཕུང་མཐའ་ནས་རིམ་གྱིས་ཡལ་གྱུར་ནས། །སྙིང་ཁའི་ཐད་དུ་ཏིལ་འབྲུར་སེམས་བཟུང་ཏེ། །དེ་ཡལ་ནམ་མཁའ་སྟོང་པར་སེམས་གཏད་བྱ། །དེ་ལྟར་ལན་བདུན་བསྒོམས་ནས་སྔར་བཞིན་དུ། །སྒོམ་པས་འོད་གསལ་མྱུར་དུ་ཟིན་པར་འགྱུར། །གཉིད་འཐུག་སྐབས་སུ་གསལ་སྟོང་རིག་པ་ལ། །རྣམ་རྟོག་བྲལ་ཞིང་རང་ངོ་སྐྱོང་ཤེས་པ། །རྟགས་སྣང་སྣ་ཚོགས་འཆར་བ་ཞིག་བྱུང་ཚེ། །གཉིད་ཀྱི་འོད་གསལ་ཟིན་པའི་གྲངས་སུ་ཆུད། །ཉལ་བའི་རྣལ་འབྱོར་དམིགས་བསྐོར་བརྒྱད་པའོ། །

གཉིས་པ་སྒོམ་དོན་བློ་ལ་འགོད་པ།

གཉིས་པ་སྒོམ་དོན་བློ་ལ་འགོད་པ་ནི།

སོ་སོར་སྡུད་པའི་༡མཚན་དོན་༢སྒོམ་པའི་དུས། །༣སྒོམ་ཚུལ་ཡན་ལག་༤བསྒོམ་པའི་རྟགས་ཚད་དང༌། །༥དག་བྱ་དག་བྱེད་དབྱེ་བ་༦ཐོབ་འབྲས་དྲུག །དང་པོ་པྲ་ཏི་སོ་སོ་ཨཱ་ཧ་ར། །སྡུད་པ་མཚམས་སྦྱར་པྲ་ཏྱཱ་ཧ་ར་ནི། །སོ་སོར་སྡུད་པ་ཐ་མལ་དབང་པོ་ལྔ། །ཡུལ་ལྔའི་འབྲེལ་གཅོད་རྣམ་ཤེས་ཡན་པ་སྡུད། །ཡེ་ཤེས་རང་བཞིན་དབང་པོ་གཞན་ལྔ་ཡི། །འོད་གསལ་རང་བཞིན་ཡུལ་ལྔ་ལོངས་སྤྱོད་ཅིང༌། །ཟ་བ་ལེན་པའི་དོན་ཡིན་མདོར་ན་ནི། །ཐ་མལ་སྣང་བ་སེམས་སུ་བསྡུས་ནས་སུ། །ཡེ་ཤེས་སྣང་བ་ལ་ནི་འཇུག་པའོ། །གཉིས་པ་སོར་སྡུད་ཐོག་མར་ལན་གཅིག་ལ། །ལས་རླུང་སྣ་བུག་གཡས་སུ་འཕོས་མ་ཐག །དུས་དེར་བསྒོམས་ན་གཡས་ཀྱི་འཕོ་བ་རྣམས།།འབྱུང་པ་སྡུད་རིམ་རྒྱུ་བས་མ་དག་པའི། །སྣང་བ་དབྱིངས་སུ་བསྡུ་བའི་རྟེན་འབྲེལ་ཡོད། །ཐོག་མར་གཉིད་དུས་མ་གཏོགས་སྒོམ་པ་གལ། །ལུས་གནད་འབྱོངས་ཞིང་ཏིང་འཛིན་བརྟན་པ་ནས། །ཉིན་གུང་ཕྱི་ཕྲེད་ཐུན་མཚམས་རྣལ་འབྱོར་ཙམ། །བྱས་ན་གེགས་མེད་བོགས་བསྐྱེད་ཆེ་བར་གསུངས། ། གསུམ་པ་སོར་སྡུད་ངོ་བོ་རྣམ་མི་རྟོག །མི་གཡོ་གསུམ་ལྡན་བསྒོམ་པས་རླུང་བཅུ་ཡི། །ཆ་ཤས་ཅི་རིགས་དབུ་མར་སྡུད་བྱེད་པའི། ནུས་པ་ཅན་དེ་གནས་ལུགས་རྟོགས་པའི་ཐབས། །ཉིན་མཚན་རྣལ་འབྱོར་གཉིས་ཀ་ཚང་དགོས་པ། །མདོ་སྔགས་གཉིས་ཀའི་དགོངས་པ་ཡིན་པར་གསུངས། །འོན་ཀྱང་ལུས་ལ་གནད་དུ་བསྣུན་པ་སོགས། །ཐབས་ཀྱི་སྒོ་ནས་གསང་སྔགས་ཁྱད་པར་འཕགས། །ཉིན་མཚན་རྣལ་འབྱོར་སྒོམ་པས་རིམ་བཞིན་དུ། །གཡོན་དང་གཡས་ཀྱི་དཀྱིལ་འཁོར་ལྔ་ལྔ་ནི། །དབུ་མར་བསྡུས་པས་རྟགས་བཅུ་འཆར་བའོ། །བཞི་པ་སོར་སྡུད་ཡུལ་ནི་རྟགས་བཅུ་སྟེ། །རྒྱུད་ལས་གསུང་བཞིན་མཚན་རྟགས་བཞི་དང་ནི། །ཉིན་རྟགས་དྲུག་སྟེ་རྟགས་བཅུ་ངེས་པའི་རྟགས། །རྣམ་པ་མ་ངེས་རྟགས་ནི་མཐའ་ཡས་གསུངས། །སྣ་ཚོགས་གཟུགས་བརྙན་མཐོང་བ་ཞེས་བྱའོ། །ཆོས་ཉིད་ཡེ་ཤེས་རང་ལ་གནས་པ་དེ། །ཡེ་ཤེས་བསྒོམས་པས་མངོན་དུ་འགྱུར་བས་ན། །ཡིད་ཆེས་སྐྱེ་རྒྱུ་ཡིན་ཕྱིར་རྟགས་ཞེས་བྱ། །ཀུན་རྫོབ་འཁྲུལ་བའི་རྟགས་ཙམ་མ་ཡིན་ནོ། །རྟགས་ཀུན་མཐོང་བའི་ཤེས་པ་ཚད་མ་སྟེ། །བསྐྱེད་རིམ་ཚད་མ་རྗེས་དཔག་རྣལ་འབྱོར་གྱི། །ཡན་ལག་དྲུག་གི་ཚད་མ་མངོན་སུམ་མོ། །ལྔ་པ་ཡན་ལག་དྲུག་པོ་ཐམས་ཅད་ཀྱིས། །དྲི་མ་སྦྱང་གཞི་བདེ་གཤེགས་སྙིང་པོ་ཡིན། །དག་བྱ་དབྱེ་ན་སྤྱིར་ནི་ཕུང་ཁམས་ལ། །སུམ་ཅུ་སོ་དྲུག་རྣམས་ལས་སོར་སྡུད་ཀྱི། །ངོ་སྐལ་དག་བྱ་ཡེ་ཤེས་ཕུང་པོ་སོགས། །ཡེ་ཤེས་ཁམས་དྲུག་སྡེ་ཚན་གཅིག་ཡིན་ལ། །དག་བྱེད་སོར་སྡུད་དབྱེ་ན་བཅུ་ཡོད་དེ། །རྟགས་བཅུ་རིམ་འཆར་དབང་གིས་ཉམས་རྟོགས་ལ། །མཐོ་དམན་དབྱེ་བ་རྣམ་པ་བཅུ་ཡོད་དོ། །དྲུག་པ་གནས་སྐབས་འབྲས་བུ་བདེན་ཚིག་འགྲུབ་པ་དང༌། །མཐར་ཐུག་འབྲས་བུ་ནམ་ཞིག་རྫོགས་སངས་རྒྱས། །གོ་འཕང་ཐོབ་པའི་དུས་ན་རྡོ་རྗེ་སེམས། །ལ་སོགས་ཡེ་ཤེས་ཁམས་པ་དྲུག་ཚན་གཅིག །དཀྱིལ་འཁོར་རབ་འབྱམས་འབྱུང་བར་རྒྱུད་ལས་གསུངས། །དེ་ལྟར་སྒོམ་དོན་བློ་ལ་འགོད་པའི་ཚུལ། །བསྡུ་ན་ཐུན་གཅིག་རྒྱས་པར་མཐའ་བརྟན་བྱ། །དེས་ནི་སོ་སོར་སྡུད་པའི་འཁྲིད་རིམ་རྫོགས། །

གཉིས་པ་བསམ་གཏན་སྟོན་པར་བྱེད་པ། །

གཉིས་པ་བསམ་གཏན་སྟོན་པར་བྱེད་པ་ལ། །

ཉམས་ལེན་དམིགས་པའི་གནད་དང་སྒོམ་དོན་གཉིས། །དང་པོ་དངོས་དང་སྤོགས་ཆོག་བོགས་འདོན་གཉིས། །དང་པོར་ཉིན་མཚན་རྣལ་འབྱོར་གནས་གཉིས་བསྒོམ། །གཙོ་བོར་མཚན་མོའི་རྣལ་འབྱོར་བསྒོམ་བྱ་ཞིང༌། །ལུས་གནད་ངག་གནད་སོར་སྡུད་སྐབས་དང་འདྲ། །སེམས་གནད་མི་གཡོ་འཇོག་ཚུལ་ཕལ་ཆེར་འདྲ། །སོར་སྡུད་སྐབས་སུ་ནམ་མཁར་སེམས་གཏོད་པ། །འདིར་ནི་སྟོང་གཟུགས་སེམས་ནི་འཇོག་པ་སྟེ། །སྟོང་གཟུགས་མཐོང་དུས་རིག་པ་སྟོང་གཟུགས་ལ། །ཆེ་རེ་གཏད་ཅིང་རྣམ་རྟོག་ཡེ་མི་བྱེད། །སྟོང་གཟུགས་མེད་སྐབས་སོར་སྡུད་བཞིན་སྒོམ་བྱ། །སྟོང་གཟུགས་རྗེས་སུ་མིག་སེམས་མི་འབྲང་བར།།ལྟ་སྟངས་རིག་པ་ཐོག་མའི་གནས་སུ་འཇོག །སྟོང་གཟུགས་དེར་འདུས་གཡོ་མེད་བྱེད་པ་གལ། །དེ་ནི་དུས་ཡུན་ཟླ་བ་གཅིག་སྒོམ་པར། །ཕྱག་སྲོལ་ཡིན་ལ་དམིགས་བསྐོར་དགུ་པའཽ། །གཉིས་པ་སྤོགས་ཆོག་བོགས་འདོན་རྣམ་པ་གཉིས། །དང་པོ་ལ་ནི་དུས་ཞབས་སྙན་རྒྱུད་ལས། །བསམ་གཏན་སྟོང་གཟུགས་དྲག་ཏུ་སྒོམ་ཞེས་གསུངས། །སོར་སྡུད་སྤོགས་ཆོག་ལྟར་བྱེད་དམིགས་པ་ཡང༌། །སྟོང་གཟུགས་ཕྲ་མོ་ཞིག་ལ་སེམས་དྲག་ཏུ། །གཏད་པ་དེ་ནི་དམིགས་བསྐོར་བཅུ་པའོ། །གཉིས་པ་ཉིན་དང་གཉིད་ཀྱི་འོད་གསལ་འབྲེལ། །དང་པོ་སྣང་བ་གསལ་བའི་ཕྱོགས་སུ་ཡང༌། །སྟོང་གཟུགས་འཆར་ན་ལྟ་སྟངས་སྔར་ལས་ཀྱང༌། །ཅུང་ཟད་སྨད་ནས་ཞག་གསུམ་བཞི་ཙམ་བསྒོམས། །སྔར་ལས་རྟགས་སྣང་མི་གསལ་གྱུར་བ་ན། །བོགས་འདོན་མ་རན་སྔར་བཞིན་ཞག་ཤས་སྒོམ། །སྔར་བཞིན་ལྟ་སྟངས་སྨད་ནས་བསྒོམས་པ་ལ། །སྟོང་གཟུགས་བརྟན་པོ་ལེགས་པར་འཆར་ནུས་ན། །རིམ་གྱིས་ལྟ་སྟངས་ཐད་ཀར་ལྟ་བ་དང༌། ཐུར་དུ་ལྟ་བ་སོགས་ལ་སྟོང་གཟུགས་བརྟན། །རྡོ་སོགས་ཆེ་ཆུང་རན་པ་མདུན་དུ་བཞག །ལྟ་སྟངས་ལམ་ནས་སྟོང་གཟུགས་དེ་ལ་ཕབ། དངོས་པོ་མཐོང་བཞིན་སྟོང་གཟུགས་སེམས་གཞུར་སྒོམ། །དེ་ལྟར་བསྒོམས་པས་སྟོང་གཟུགས་དངོས་པོ་གཉིས། །ཆ་མཉམ་མཐོང་ན་འཆར་ཚུལ་ཐ་མ་ཡིན། །འོན་ཀྱང་ཡུན་རིང་གོམས་ན་གནད་དུ་འགྲོ ། འགའ་ཞིག་འོད་གསལ་རྟགས་དེ་ཁོ་ན་མཐོང༌། །འཆར་ཚུལ་འབྲིང་ཡིན་འགའ་ཞིག་རྟགས་སྣང་དང༌། །ལས་སྣང་གཉིས་ཡལ་མྱུར་དུ་འོད་གསལ་འཆར། །འདིའི་རིགས་བོགས་ཆེ་འཆར་སྒོ་བཟང་བ་ཡིན། །རྟགས་སྣང་ཡལ་ནས་ལས་སྣང་གསལ་གྱུར་ན། །བོགས་འདོན་བསྒོམ་མ་རན་པས་དམིགས་རྩ་བསྒོམ། །རི་སོགས་སྟོང་གཟུགས་འཆར་བས་སྣང་བ་ཀུན། །མཚོན་ནས་སྦྱོར་སྟེ་བསམ་གཏན་རྡེའུ་འདི། །ཟླ་གཅིག་སྒོམ་པ་དམིགས་བསྐོར་བཅུ་གཅིག་གོ། །འདི་མཚམས་འཆད་འགྱུར་གྲིབ་གཟུགས་ཟླ་གཅིག་སྒོམ། །སྟོང་སྒྲ་ཐོས་པ་བརྟན་པོ་ཡོད་ན་ནི། །ལས་སྣང་སྒྲ་དང་བསྲེས་ཏེ་གཉིས་ཀ་ལ། །སེམས་གཏད་ལས་སྣང་འགགས་ཏེ་སྟོང་སྒྲ་སྣང༌། །སྒྲ་རིགས་ཀུན་ལ་སྦྱངས་པས་སྟོང་སྒྲར་འགྱུར། །དྲི་རོ་རེག་བྱ་གསུམ་ལའང་དེ་བཞིན་དུ། །ཤེས་པར་བྱ་དགོས་དམིགས་བསྐོར་བཅུ་གཉིས་པའོ། །གཉིས་པ་སོར་སྡུད་སྐབས་དང་ཕལ་ཆེར་འདྲ། །ཉལ་ཚེ་སྟོང་གཟུགས་ཉིད་ལ་སེམས་གཏད་ཅིང། །རྣམ་རྟོག་མེད་པར་གཉིད་དུ་འགྲོ་བར་བྱ། །དེ་ལྟར་བསྒོམ་པས་འོད་གསལ་མྱུར་དུ་ཟིན། །སྟོང་གཟུགས་རང་ལུས་ནང་དུ་འཆར་ཐུབ་ན། །སྟོང་གཟུགས་སྙིང་གར་དྲངས་ནས་དེ་ལ་ནི། །སེམས་གཏད་གཉིད་དུ་འགྲོ་ན་དེ་མ་ཐག །གཉིད་ཀྱི་འོད་གསལ་ཟིན་པར་ཐེ་ཚོམ་མེད། །དེ་ལྟར་བསྒོམ་པ་དམིགས་བསྐོར་བཅུ་གསུམ་པའོ། །གྲིབ་གཟུགས་རྗེས་སུ་ཉིན་མཚན་རྣལ་འབྱོར་སླར། །ཟླ་བ་གཉིས་སྒོམ་བསམ་གཏན་ཟླ་ལྔའོ། །གཉིས་པ་སྒོམ་དོན་བློ་ལ་འགོད་ཚུལ་དྲུག །དང་པོ་བསམ་གཏན་མཚན་དོན་དྷྱཱ་ན་ཞེས་པ་ནི། །དམིགས་པར་སེམས་ནི་གཡོ་བ་མེད་པའམ། །དམིགས་པ་དབང་བར་བྱེད་པའི་དོན་ཡིན་ཏེ། །རྣམ་ཀུན་མཆོག་ལྡན་སྟོང་གཟུགས་འོད་གསལ་ལ། །རྩེ་གཅིག་གནས་དང་འགྱུ་བ་དབང་ཐོབ་པའི། །དོན་ཏེ་སྤྱི་ལྡོག་བསམ་གཏན་རྩེ་གཅིག་པ། །གཉིས་པ་སྒོམ་པའི་དུས་མཚམས་སོར་སྡུད་ནི། །མཐར་ཕྱིན་རབ་སྟེ་མིན་ནའང་འོད་གསལ་གྱི། །རྟགས་སྣང་བརྟན་པོར་ཤར་བའི་དུས་སུ་སྒོམ། །གསུམ་པ་སྒོམ་ཚུལ་ཡན་ལག་བསམ་གཏན་གྱི། །ངོ་བོ་འོད་གསལ་རྟགས་སྣང་རྩེ་གཅིག་ཏུ། །དམིགས་པའི་ཏིང་འཛིན་དེ་ཡི་ཡན་ལག་ལྔ། །རྟགས་བཅུ་རྩེ་གཅིག་སེམས་ནི་ཤེས་རབ་ཡིན། །སྟོང་གཟུགས་མཚན་ཉིད་ཤེས་པ་རྟོག་པ་ཡིན། །མཚན་ཉིད་ཤེས་ཚུལ་རང་སེམས་ཉམས་སུ་མྱོང༌། །སེམས་ཉིད་སྟོང་གཟུགས་ཤར་བ་སྤྲོས་མཚན་མེད། །མྱོང་ཞིང་ངེས་པ་དཔྱོད་པའི་ཡན་ལག་ཡིན། །ཏིང་འཛིན་སྟོབས་གྱིས་དགའ་སྐྱིད་བདེ་ཡན་ལག །ཏིང་འཛིན་བདེ་མྱོང་གཡོ་མེད་བདེ་ཡན་ལག ། དེས་རྐྱེན་བྱས་ནས་ལུས་ལ་ཤིན་སྦྱངས་ཀྱི། །བདེ་བས་ཁྱབ་པ་དེ་ཡི་ཕན་ཡོན་ནོ། །དེ་ཡང་དང་པོར་ཤེས་རབ་རྐྱང་པ་སྐྱེ། །དེ་ནས་གཉིས་ལྡན་གསུམ་ལྡན་བཞི་ལྡན་དང༌། །ལྔ་ལྡན་རིམ་འབྱུང་ཡན་ལག་རྫོགས་པར་སྐྱེས། །རྒྱུན་བསྲིངས་བསྒོམས་ན་མཐར་ཕྱིན་ཡོན་ཏན་སྐྱེ། །བཞི་པ་བསྒོམ་པའི་རྟགས་ཚད་རྒྱུད་ཇི་བཞིན། །སོར་སྡུད་ལས་ལྷག་རྟགས་བཅུས་བསྡུས་པ་ཡི། །སྲིད་གསུམ་གཟུགས་བརྙན་འོད་ཟེར་འཕྲོ་བ་དང༌། །ཕྲ་བ་འཚེར་བ་འདར་བ་གཞིག་དཀའ་བ། །ལྔ་ལྡན་ཐིག་ལེ་དུ་མས་མཚན་པ་མཐོང༌། །ཐིག་ལེའི་དབུས་སུ་སངས་རྒྱས་དུ་མ་འཆར། །ཀུན་རྫོབ་ལས་སྣང་སྒྱུ་མ་ལྟ་བུར་འཆར།།ཚད་མ་སོར་སྡུད་དང་མཚུངས་མངོན་ཤེས་འགྲུབ། །ལྔ་པ་དག་བྱ་དག་བྱེད་དབྱེ་བ་ལ། །དག་གཞི་སོར་སྡུད་སྐབས་བཞིན་དག་བྱ་ལ། །དབྱེ་ན་རྣམ་ཤེས་ཕུང་སོགས་མཁའ་ཁམས་དྲུག །དག་བྱེད་དབྱེ་ན་བསམ་གཏན་ཡན་ལག་ལྔ། །དེའི་ཡུལ་སྟོང་གཟུགས་ལྔ་སྟེ་བཅུ་ཡོད་དོ། །དྲུག་པ་བསྒོམ་པས་ཐོབ་པའི་འབྲས་བུ་ནི། །གནས་སྐབས་འབྲས་བུ་མངོན་ཤེས་ལྔ་ཐོབ་ཞིང༌། །མཐར་ཐུག་འབྲས་བུ་རྒྱལ་བ་མི་བསྐྱོད་སོགས། །མཁའ་ཁམས་དྲུག་ཚན་གཞི་དབྱིངས་མངོན་དུ་འགྱུར། །འཕྲོས་དོན་མན་ངག་ཤེས་རབ་ཡན་ལག་སྐྱེས། །སེམས་གང་གཏད་སར་སྟོང་གཟུགས་འཆར་བ་འབྱུང༌། །དེ་ནས་སྣང་བའི་སྟེང་དུ་འོད་གསལ་འཛིན། །ཕྱི་རོལ་སྣང་བ་གང་ལ་སེམས་བཞག་པ། །ལས་སྣང་འགགས་ཏེ་འོད་གསལ་སྣང་འགྱུར་ན། །སྔ་དྲོ་ཕྱི་དྲོར་རང་ཉིད་གཅེར་བུར་ཕྱུང༌། །གྲིབ་གཟུགས་སྙིང་གར་ལྟ་བའམ་ཉིན་གུང་དུ། །ལྗོན་ཤིང་གྲིབ་མར་ལྟ་བས་ཀྱང་རུང་སྟེ། །མིག་སྦྲིད་སྦྲིད་དུ་གཡོ་བ་མེད་པར་ལྟ། །དེ་ནས་ནམ་མཁར་བལྟས་པས་གྲིབ་གཟུགས་ཀྱི། །རྣམ་པའི་དབུས་སུ་རྟགས་སྣང་དཔག་མེད་འཆར། །ཟླ་དྲུག་བསྒོམས་པས་ས་འོག་གཏེར་སོགས་མཐོང༌། །དེ་བཞིན་སྐར་ཁུང་སོགས་སྦྱངས་ཁྱིམ་ནང་གི །ལྐོག་གྱུར་མཐོང་སོགས་གཞན་ལས་ཤེས་པར་བྱ། །དེས་ནི་བསམ་གཏན་འཁྲིད་རིམ་རྫོགས་པའོ། །གཉིས་པ་བར་དུ་དགེ་བ་ལས་རླུང་དེ། །ཨ་ཝ་དྷཱུ་ཏཱིར་འགག་བྱེད་སྲོག་རྩོལ་དང༌། །མི་ཤིགས་ཐིག་ལེར་ཐིམ་བྱེད་འཛིན་པ་གཉིས། །དང་པོ་ཉམས་ལེན་དམིགས་པའི་གནད་བཤད་པ། ། སྲོག་རྩོལ་ཡན་ལག་མཚན་ཉིད་ཚང་བ་དང༌། །སྲོག་རྩོལ་རྗེས་མཐུན་སྒྲུབ་པར་བྱ་བ་གཉིས། །རེ་ཞིག་ཕྱི་མའི་དབང་བྱས་བཤད་པར་བྱ། །པཎ་ཆེན་ཤཱཀྱ་ཤྲཱི་ནས་བརྒྱུད་པ་དང༌། །ཟླ་མགོན་མན་ངག་འབྲོ་ལུགས་གྲགས་པ་དང༌། །རྭ་ལུགས་གསུམ་གྱི་མན་ངག་གཞུང་ཤིང་བྱ། །ལུགས་གཞན་ཐོར་བུ་ཕལ་ཆེར་དེ་དག་མཐུན། །ཅུང་ཟད་ཁྱད་པར་ཡོད་པ་འཆད་པར་འགྱུར། །པཎ་ཆེན་ཤཱཀྱ་ཤྲཱིའི་མན་ངག་ལ། །སྔོན་འགྲོ་རྡོ་རྗེའི་བཟླས་པས་རྩ་ལམ་སྦྱང༌། །འཇམ་རླུང་དགང་གཏོང་སྦྱོར་བས་སྲོག་དབུ་མར། །ཞུགས་ནས་རྩུབ་རླུང་བུམ་པས་དབུ་མར་འཆིང༌། །བཙན་ཐབས་སྦྱོར་བས་ཉི་ཟླའི་ལམ་དགག་ཅིང༌། །བཀག་པས་འོག་སྒོ་བཙན་ཐབས་འགགས་ན་ནི། །སྟེང་གི་སྦྱོར་བས་དགྲོལ་བ་ལྕེ་གསུམ་བསྐྱོད། །དེ་ཡི་སྦྱོར་བས་བདུད་རྩིའི་བཅུད་མྱང་བ། །གཏུམ་མོ་སྦར་བའི་སྦྱོར་བས་སྲོག་ཐུར་བསྲེ། །འཆི་མེད་སྒྲུབ་པ་རྡོ་རྗེའི་ཚིག་དྲུག་ལས། །དང་པོ་བཞི་པོ་སྲོག་རྩོལ་མན་ངག་དང༌། །ཕྱི་མ་གཉིས་ནི་འཛིན་པའི་མན་ངག་མཛད། །སྐབས་འདིར་སྲོག་སྩོལ་མན་ངག་དངོས་དང་ནི། །བོགས་འདོན་གེགས་སེལ་དང་བཅས་རྣམ་པ་གཉིས། །དང་པོ་ལུས་སྦྱོང་འཁྲུལ་འཁོར་གཞན་ལས་ཤེས། །རྡོ་རྗེའི་བཟླས་པས་རྩ་ལམ་སྦྱང་ཚུལ་ནི། །བདུད་རྩི་འཁྱིལ་བའི་ལྟ་སྟངས་ཞེས་བྱ་བ། །ཐད་ཀ་ལས་ནི་ཅུང་ཟད་གྱེན་དུ་ཕྱོགས། །སྨིན་མའི་མཚམས་སུ་ཧྲིག་གེར་ལྟ་བ་ཡིན། །དམིགས་བསལ་ཅན་རྣམས་མ་གཏོགས་སྲོག་འཛིན་སྐབས། །ལྟ་སྟངས་ཐམས་ཅད་འདི་ཉིད་ངེས་པའོ། །ལུས་གནད་སྔར་ལྟར་རླུང་རོ་ལན་གསུམ་བསལ། །དང་པོར་རླུང་གི་འགྲོ་འོང་གནས་གསུམ་ལ། །སེམས་གཏོད་རྡོར་བཟླས་དམིགས་པ་དང་པོའོ། །རྩ་གསུམ་གསལ་གདབ་ཚུལ་ནི་ལུས་ཀྱི་ནང༌། །དབུ་མ་སྔཽན་པོ་མདའ་སྨྱུག་འབྲིང་བོ་ཙམ། །ཡར་སྣ་གཙུག་ཏོར་མར་སྣ་ལྟེ་བར་གནས། །གཡས་སུ་རོ་མ་དམར་པོ་གཡོན་རྐྱང་མ། །དཀར་པོ་དེ་གཉིས་དབུ་མ་ལས་ཕྲ་བ། །མོས་ཏེ་རླུང་ནི་ཕྱི་རོལ་འགྲོ་བའི་དུས། །ལྟེ་བ་ནས་བརྩམས་དབུ་རོ་གཉིས་ནས་སོང༌། །དཔྲལ་མགྲིན་ནས་བརྒྱུད་སྣ་བུག་ཕྱིར་འགྲོ་བསམ། །ནང་དུ་སྣ་བུག་ནས་ཞུགས་གཙུག་ཏོར་ནས། །མགྲིན་པའི་བར་གྱི་དབུ་རྐྱང་ལམ་རྒྱུད་ནས། །ལྟེ་བར་ཕྱིན་ནས་གནས་ཚེ་དབུ་མ་ནང༌། །གང་བར་བསམ་སྟེ་འབྱུང་འཇུག་གནས་གསུམ་མཉམ། །རིམ་གྱིས་གནས་པ་ཇེ་རིང་འགྲོ་བའོ། །སྣ་བུག་གཡས་ནས་རྒྱུ་ཚེ་རླུང་འོད་དམར། །གཡོན་ནས་རྒྱུ་ཚེ་དཀར་པོ་མཉམ་རྒྱུའི་སྐབས། །སྔོན་པོ་འགྲོ་འོང་གནས་གསུམ་བྱེད་པར་སྒོམ། །རྡོར་བཟླས་གཉིས་པའོ་དེ་ནས་སྔར་ལྟར་ལས། །ཕྱིར་རོལ་འགྲོ་ཚེ་འོད་ཟེར་ཨཱཿའི་སྒྲ་བཅས། །འོད་ཟེར་སྣེ་ལ་ཨཱཿཡིག་བཅས་ཏེ་འགྲོ། །དེ་ཉིད་ནང་དུ་འོང་ཚེ་ཨོཾ་སྒྲ་བཅས། །སྣེ་ལ་ཨོཾ་ཡིག་བཅས་ཏེ་འོང་བར་བསམ། །ཡི་གེ་དེ་གཉིས་དབུ་མ་ཁོ་ནར་འགྲོ །གནས་ཚེ་དབུ་མར་ཧཱུཾ་སྒྲ་བཅས་པ་དང༌། །ལྟེ་བའི་ཧཱུཾ་ཡིག་སེམས་གཏད་ཡི་གེ་ཡི། །ཁ་དོག་རླུང་ལྟར་དམར་དཀར་སྔོ་བའོ། །དེ་དག་དམིགས་བཅས་རྡོར་བཟླས་ཕྱི་མ་ཡིན། །འདི་གསུམ་ཞག་བདུན་རེ་རེ་སྒོམ་པ་ནི། །དེང་དུས་ཕྱག་སྲོལ་དམིགས་བསྐོར་བཅུ་བཞི་པའོ། །དོན་དམ་རྡོ་རྗེའི་བཟླས་པ་ཞེས་བྱ་ནི། །རླུང་གི་འགྲོ་འོང་གནས་གསུམ་སྟོང་གཟུགས་ཀྱི། །ཕྱག་རྒྱ་ཆེན་མོ་དབྱེར་མེད་ཤེས་པ་ན། །མིང་ཚིག་བརྗོད་པ་སྒྱུ་མར་རྟོགས་པའི་མིང༌། །གཉིས་པ་འཇམ་རླུང་དགང་གཏོང་སྦྱོར་བ་ནི། །ལས་རླུང་སྣ་བུག་གཡོན་རྒྱུ་ལག་པ་གཡས། །ཐལ་མོས་མཆན་ཁུང་གཡོན་དང་ནུ་མ་བཅས། །བསྡམས་པའི་སྟེང་ནས་བར་ལྷུ་གཡོན་པས་མནན། །རླུང་རོ་བསལ་ཏེ་གཡོན་མཛུབ་སྣ་གཡས་བཀག །གཡོན་ནས་རླུང་ཤུགས་ཆེ་ལ་རིང་བར་རྔུབས། །ལྟེ་བར་མནན་ཏེ་ཅུང་ཞིག་བསྡམས་བྱས་ནས། །མི་བདེ་བྱུང་ཚེ་མཛུམ་མོ་གཡོན་པ་ཡིས། །སྣ་བུག་གཡོན་བཀག་གདོང་གཡས་ཕྱོགས་པ་ཡིས། །སྣ་གཡས་རླུང་ཤུགས་དྲག་འབུད་སྣ་བུག་གཡས། །བཀག་སྟེ་གཡོན་ནས་རྔུབས་སོགས་གོང་བཞིན་སྦྱང༌། །འདི་སྐབས་སྐྱིལ་ཀྲུང་འོག་རླུང་རང་གནས་བཅིངས། །དེས་ནི་སྣ་བུག་གཡས་སུ་འཕོ་བ་སོགས། །ཕྱག་རྒྱ་དེ་ཉིད་གོ་བཟློག་བྱེད་དགོས་ལ། །མཉམ་རྒྱུར་སོང་ཚེ་བུམ་ཅན་བཟང་བར་གསུངས། །ཞག་བདུན་སྒོམ་པ་དམིགས་བསྐོར་བཅོ་ལྔ་པའོ། །གསུམ་པ་རྩུབ་རླུང་བུམ་པས་དབུ་མ་ལ། །སྲོག་རླུང་འཆིང་ཚུལ་ཐོག་མར་མཉམ་རྒྱུར་ལེགས། །ཡོན་པོར་འདུག་ན་གོང་གི་སྦྱོར་བ་ཡིས། །མཉམ་རྒྱུར་བཏང་སྟེ་རྐང་པ་སྐྱིལ་ཀྲུང་བྱ། །གཡས་གཡོན་དབུས་གསུམ་རླུང་རོ་དལ་དྲག་དང༌། །ཤིན་ཏུ་དྲག་པོའི་ཚུལ་གྱིས་གསུམ་གསུམ་བྱ། །སྟེང་རླུང་མྱུར་རྔུབས་ལྟེ་བར་མནན་པ་དང༌། །ལྷན་ཅིག་མཆིལ་མ་མིད་དེ་དེ་རྗེས་སུ། །ཐུར་སེལ་གཡས་གཡོན་དབུས་གསུམ་ནས་དྲངས་ཏེ། །ཁ་སྦྱོར་ལྟེ་བར་བཟུང་ལ་མི་ཐུབ་ཚེ། །རྔུབས་ཆུང་ལན་གསུམ་བྱས་ཏེ་ལྟེ་བར་མནན། །དེ་ནས་མི་ཐུབ་དལ་བུས་ཕྱིར་བཏང་བྱ། །འདི་དག་དམིགས་གནད་ལུས་ནང་འོད་གསལ་གྱི། །རྟགས་འཆར་ལྟེ་བར་སྟོང་གཟུགས་སེམས་གཏོད་དགོས། །དེ་ལྟ་མ་ཡིན་སྟོང་གཟུགས་ཤར་ས་དེར། །སེམས་གཏོད་མ་ཤར་ན་ནི་བློས་བཅོས་པའི། །སྒོམ་པའི་དམིགས་རྟེན་མི་དགོས་ལུས་དབུས་ཀྱི། །ལྟེ་ཐད་སེམས་ཀྱི་གཏད་སོ་བྱ་བར་གསུངས། །རླུང་རོ་དགུ་ཕྲུག་ཞག་བདུན་བུམ་ཅན་ནི། །ཞག་བརྒྱ་སྒོམ་པ་དམིགས་བསྐོར་བཅུ་དྲུག་པའོ། །དེ་ནས་ཡན་ལག་ལྔ་སྦྱོང་ལུགས་འབྱུང་དང༌། །ལུགས་ལྡོག་སྤེལ་མའི་ཉི་ཤུ་དབང་ཉེར་བཞི། །གནད་སྦྱོང་བཅུ་བཞི་ཞག་གྲངས་བཅོ་བརྒྱད་དྲུག །སྡོམ་པས་འཁྲུལ་འཁོར་ཞག་བརྒྱ་རྩ་བརྒྱད་འཁྱེར། །འཕོ་བ་ཞག་བདུན་བྱས་ཏེ་ཐུན་འཚམས་བྱ། །དེ་ནས་སླར་ཡང་རྡོར་བཟླས་སྔོན་འགྲོ་དང༌། །དངོས་གཞི་གཉིས་དང་འཇམ་རླུང་བུམ་ཅན་དང༌། །རྩུབ་རླུང་བུམ་ཅནརྣམས་ནི་ཞག་བདུན་བྱ། །པཎ་ཆེན་ཟླ་མགོན་མན་ངག་འབྲོ་ལུགས་ཀྱི། །བཞེད་ཕྱོགས་རྡོར་བཟླས་དགུག་དགང་རེངས་པ་དང༌། །རྡུལ་མཐའ་ཅན་ལྔ་ཕྱི་མ་སྤོགས་ཆོག་ཡིན། །མན་ངག་དངོས་གཞི་སྔ་མ་རྣམ་བཞིའོ། །རྡོར་བཟླས་རོ་རྐྱང་ནས་འགྲོ་དམིགས་མི་མཛད། །གཡས་གཡོན་མཉམ་རྒྱུ་གང་ཡིན་ཁྱད་མེད་པར། །ཕྱིར་འགྲོ་དམར་པོ་ནང་འཇུག་དཀར་པོ་གནས། །ནག་པོར་སྒོམ་པ་སྔོན་འགྲོ་གཉིས་མི་དགོས། །གཉིས་པ་དགུག་པ་སྣ་གཡས་རླུང་རྒྱུ་སྐབས། །ལྟ་སྟངས་ཅུང་ཟད་གཡས་ཕྱོགས་སུ་བསྒྱུར་ཞིང༌། །རླུང་ནང་དལ་བུས་གསང་གནས་མནན་ལ་བསྡམས། །སུད་ཙམ་སུད་ཙམ་བཅད་ཀྱིན་བཅད་ཀྱིན་མཐར། །སངས་ཀྱི་བཏང་ལ་དམིགས་བསྐོར་བཅུ་བདུན་པའོ། །གསུམ་པ་དགང་བ་སྣ་གཡོན་རླུང་རྒྱུ་ཚེ། །ལྟ་སྟངས་ཅུང་ཟད་གཡོན་བསྒྱུར་ནང་དུ་ནི། །ཅུང་ཟད་མགྱོགས་རྔུབས་གསུས་པ་ལྡིར་གྱིས་དགང༌། །གཏོང་བ་སྔར་འདྲ་དམིགས་བསྐོར་བཅོ་བརྒྱད་པའོ། །བཞི་པ་རེངས་པ་རླུང་བསལ་སྣ་གཡོན་ནས། །རྒྱུ་ན་ལྟ་སྟངས་གཡས་བསྒྱུར་འོག་སྒོ་བསྡམས། །གཡས་ནས་དལ་ལ་རིང་རྔུབས་གསང་གནས་སུ། །བཟུང་ལ་གཡས་ནས་བཏང་ལ་གཡས་རྒྱུ་ན། །ལྟ་སྟངས་གཡོན་བསྒྱུར་གཡོན་ནས་དལ་བུས་རྔུབས། །འོག་སྒོ་བསྡམས་ལ་ལྟོ་བ་ལྡིར་གྱིས་བྱ། །གཡོན་ནས་བཏང་ལ་རེ་མོས་སྤེལ་གྱིན་སྒོམ། །མཉམ་རྒྱུར་འདུག་ན་ལྟ་སྟངས་ཐད་ཀར་བྱ། །མྱུར་རྔུབས་ལྟེ་བར་ཁ་སྦྱོར་དྲག་པོའི་ངང༌། །ལྟོ་བ་ཅུང་ཟད་ཚིགས་པ་ལ་གཅེར་ལ། །ཕྱིར་རུ་དལ་བུས་གཏོང་བ་དེ་ལྟར་ན། །བུམ་པ་ཅན་ཏེ་དམིགས་བསྐོར་བཅུ་དགུ་པའོ། །འདི་བཞི་བདུན་ཕྲག་རེ་རེ་སྒོམ་པར་བྱ། །རྭ་ལུགས་མན་ངག་སྲོག་རླུང་དངོས་གཞུག་ནི། །ལུས་གནད་སོགས་ནི་སྤྱི་དང་འདྲ་བ་ལས། །སྣ་བུག་གཡས་པ་མཛུབ་མོས་བཀག་ཏེ་རླུང༌། །རྔུབས་ཞིང་འོག་རླུང་བག་ཙམ་བསྡམས་པ་ཡི། །བུམ་པ་ཅན་བཟུང་དེ་ནས་སྣ་གཡོན་བཀག །གཡས་ནས་འབུད་སོགས་གཡས་གཡོན་སྤེལ་གྱིན་སྒོམ། །བུམ་ཅན་འཛིན་པ་དམིགས་བསྐོར་ཉི་ཤུ་པའོ། །ཐུར་སེལ་དངོས་སུ་གཞུག་པ་སྟེང་རླུང་ནི། །སྔ་བཞིན་བྱས་ལ་འོག་སྒོ་འབྱེད་འཛུམ་གྱི། །དྲག་པོའི་སྦྱོར་བས་ཨོཾ་ཨཱཿལྷན་ཅིག་ཏུ། །དྲག་ཏུ་འཐེན་ཏེ་སྟེང་རླུང་གསང་གནས་གཟིར། །དེ་ལྟར་སྒོམ་པ་དམིགས་བསྐོར་ཉེར་གཅིག་པའོ། །མཉམ་གནས་རླུང་གཞུག་ཕར་ཆེར་སྔར་ལྟར་ལས། །སྣ་གཉིས་འབུད་རྔུབ་བྱ་སྟེ་གཙུག་ཏོར་གཞན། །འཁོར་ལོ་ལྔ་དང་ཡན་ལག་ཉིང་ལག་གི །རླུང་ཀུན་གཅིག་ཏུ་འདུས་པར་བསམ་བྱས་ན། །ཨོཾ་ཞེས་འོག་སྒོ་དྲག་བསྡམས་སྟེང་དུ་དྲངས། །ཨཱཿཞེས་འོག་སྒོ་དབྱེ་བས་ཐུར་དུ་བསྡིགས། །གྱེན་རྒྱུ་གཞུག་པ་དེ་དང་འདྲ་བ་ལས། །མགྲིན་པ་རོ་སྟོད་དྲག་ཏུ་གཅུད་པར་བྱ། །ཁྱབ་བྱེད་གཞུག་པ་དེ་དང་འདྲ་བ་ལས། །སོར་མོ་རྣམས་བསྐུམ་ཉ་བཞི་སྒྲིམ་པར་གསུངས། །འདི་ལྔ་ཞག་ནི་གཉིས་གཉིས་གཅིག་དང་གཅིག །གོ་རིམ་བཞིན་དུ་ཤེས་བྱ་ཞག་བདུན་ནོ། །མན་ལུང་མཚན་བརྗོད་སྦྱོར་དྲུག་ལུགས་ལ་ནི། །དལ་བུས་རྔུབ་པ་ཨོཾ་ཀྱི་ཡིད་བཟླས་དང༌། །ཁ་སྦྱོར་བུམ་ཅན་རྔུབ་ཆུང་འཛིན་པ་ན། །ཧཱུཾ་གི་ཡིད་བཟླས་དལ་བུས་རྒྱུ་བ་ནི། །མི་མངོན་འབུད་པ་ཨཱཿའི་ཡིད་བཟླས་བྱ། །འདི་ནི་རླུང་སྦྱོར་གཅིག་ལ་རྡོར་བཟླས་དང༌། །བུམ་ཅན་གཉིས་ཚང་ཤིན་ཏུ་ལེགས་པར་མངོན། །འདི་ནི་ཞག་བདུན་སྒོམ་པར་ལག་ལེན་ཡི།།ཐུན་མོང་མན་ངག་རླུང་ནི་ཕྱིར་འགྲོ་དུས། །རྟགས་སྣང་དྲག་ཏུ་སེམས་གཏད་ནང་འཇུག་དུས། །སེམས་བསྲེ་གནས་དུས་སེམས་དང་སྟོང་གཟུགས་བསྲེ། །མྱོང་འཛིན་བཤིག་པ་ཟབ་པའི་ཉམས་ལེན་ཏེ། །རྒྱུད་གཞུང་དགོངས་པ་དམིགས་བསྐོར་ཉེར་གཉིས་པའོ། །གཉིས་པ་སྤོགས་ཆོག་བོགས་འདོན་གེགས་བསལ་ཏེ། །དམིགས་སྐོར་གསུམ་ནི་འདིར་ནི་མ་སྤྲོས་སོ། །དེས་ནི་སྲོག་རྩོལ་འཁྲིད་ཀྱི་རིམ་པ་རྫོགས། །

གཉིས་པ་འཛིན་པ་སྟོན་པར་བྱེད་པ།

གཉིས་པ་འཛིན་པ་སྟོན་པར་བྱེད་པ་ལ། །

ཉམས་ལེན་དམིགས་པའི་གནད་ལ་མན་ངག་དངོས། །ཇི་སྐད་སྔར་ལྟར་བུམ་ཅན་སྦྱོར་བ་ཡིས། །སྲོག་ནི་དབུ་མའི་ཐིག་ལེར་ཐིམ་པ་སྟེ། །སྲོགའཛིན་བུམ་ཅན་བུམ་ཅན་ཙམ་འདྲ་ཡང༌། །སྲོག་རྩོལ་བུམ་ཅན་རོ་རྐྱང་ལམ་དགག་དང༌། །སྲོག་ཐུར་འདྲེ་ཕྱིར་སྒོམ་པ་སྐབས་འདིར་ནི། །སྲོག་ཐུར་འདྲེས་ཟིན་ཐིག་ལེར་ཐིམ་པའི་ཆེད། །ལྟེ་བའི་བུམ་ཅན་སྔར་དང་འདྲ་བ་སྟེ། །འོན་ཀྱང་འཛིན་པ་རྗེས་མཐུན་སྒོམ་པའི་སྐབས། །རླུང་རྣམས་ལྟེ་བའི་ཐིག་ལེར་ཐིམ་པ་ཡི། །མོས་པ་བྱ་སྟེ་ལྟེ་བའི་བུམ་ཅན་ནི། །ཞག་གྲངས་བཅོ་ལྔ་དམིགས་བསྐོར་ཉེར་དྲུག་པའོ། །སྙིང་ཁའི་བུམ་ཅན་དེ་དང་འདྲ་བ་ལས། །ལྟེ་བའི་བུམ་ཅན་བཅས་ཟིན་སྙིང་གར་འདྲེན། །ལག་གཉིས་རྒྱབ་བསྣོལ་རྡོ་རྗེ་སྐྱིལ་ཀྲུང་གི། །མཐེ་བོང་གཡས་གཡོན་འཐེན་པའི་ལུས་གནད་སྦྲགས། །དམིགས་བསྐོར་ཉེར་བདུན་མགྲིན་པའི་བུམ་ཅན་ནི། །རྐང་པ་སྐྱིལ་ཀྲུང་པུས་མོའི་ནང་ཁུགས་སུ། །གྲུ་མོ་བཙུགས་ཏེ་སོར་མོ་བསྣོལ་བ་ཡིས། །ལྟག་པ་མནན་ཏེ་མགོ་བསྒྱུར་ཁ་ནས་རླུང༌། །རྔུབ་སྟེ་ལྟག་པའི་ཐད་ཀར་ཤུགས་བསྒྱིལ་ལ། །ལྐོག་མས་ཨོལ་མདུད་ཐུར་སེལ་མགྲིན་པར་ཕུལ། །དམིགས་བསྐོར་ཉེར་བརྒྱད་དཔྲལ་པའི་བུམ་ཅན་ནི། །ཕལ་ཆེར་དེ་འདྲ་ལག་གཉིས་སྔར་བཞིན་དུ། །སྤྱི་བོར་འཐེན་ནས་ཁ་ནས་རླུང་རྔུབ་སྟེ། །རྐན་གྱི་ཕུགས་སུ་ཡར་བསྒྱིལ་ཁྱད་པར་རོ། །དམིགས་བསྐོར་ཉེར་དགུ་གཙུག་ཏོར་བུམ་ཅན་ཡང༌། །དམིགས་པ་གཙུག་ཏོར་བྱེད་པའི་ཁྱད་པར་ལས། །དེ་དང་འདྲ་བ་དམིགས་བསྐོར་སུམ་ཅུ་བའོ། །མན་ངག་ལས་འབྱུང་གསང་བའི་བུམ་ཅན་ནི། །རྟིང་པ་གཅིག་གིས་བཤང་སྒོ་བརྟེན་བྱས་ནས། །གཅིག་གིས་གསང་བ་མནན་ལ་ལག་པ་གཉིས། །གཞུག་ཆུད་ནས་ནི་ཕར་འཁྱིད་གང་ཙམ་བཙུགས། །གདོང་གྱེན་ཕྱོགས་པས་རླུང་དྲག་རིང་བར་མནན། །བཤང་སྒོ་གསང་སྒོ་གཉིས་ནས་ཐུར་སེལ་རླུང༌། །ལན་མང་དྲངས་པ་དེ་དང་སྟེང་རླུང་གཉིས། །རྒྱུ་ཞབས་མནན་བཞག་དམིགས་བསྐོར་སོ་གཅིག་པ། །ལག་ལེན་འདི་ལྟར་བྱེད་དེ་ལྟེ་བ་ཡི། །བུམ་ཅན་ཉི་ཤུ་སྙིང་གའི་བུམ་ཅན་གཅིག །ལྟེ་བའི་བུམ་ཅན་སྙིང་གར་དྲངས་བྱས་ཏེ། །སླར་ཡང་ལྟེ་བར་ཕབ་ནས་རླུང་གཏོང་དགོས། །དཔྲལ་མགྲིན་གཙུག་ཏོར་ལྟེ་བའི་བུམ་ཅན་ནི། །མི་འདྲེན་རླུང་ནི་གཏོང་ཁར་ལྟེ་བར་འབེབས། །མཐར་ནི་གསང་བའི་བུམ་ཅན་ཚར་རེ་བྱ། །རླུང་རོ་འཁྱམས་དོགས་ལག་ལེན་ཤེས་པར་བྱ། །སྙིང་མགྲིན་དཔྲལ་བ་གཙུགས་ཏོར་གསང་གནས་ལྔའི། །བུམ་ཅན་ཞག་གྲངས་སུམ་ཚན་ལྔ་ལ་སྒོམ། །རླུང་དང་རྩ་ཐིག་འཁྲུལ་འཁོར་སྤོགས་ཆོག་དང༌། །བདུད་རྩིའི་བཅུད་མྱང་རྣམས་ནི་བར་སྐབས་སྒོམ། །ལས་དང་པོ་པས་བུམ་ཅན་སྒོམ་པའི་སྐབས། །རླུང་འདུས་རྟགས་འགོར་ན་ནི་འདི་ལྟར་སྒོམ། །རྩ་འཁོར་སོ་སོར་བཤད་ལྟར་སྒོམ་ན་ལེགས། །རྩ་འཁོར་ནང་མ་ཁོ་ན་གསལ་ཀྱང་ཆོག །ལྟེ་སོགས་ལྔ་ལ་རྩ་འདབ་བཞི་བཞི་ཡིན། །གསང་གནས་དྲུག་སྟེ་ལྟེ་བའི་བུམ་ཅན་ནི། །ལྟེ་བ་སྤྲུལ་འཁོར་སེར་པོ་རྩ་འདབ་བཞི། །ལྟེ་བར་དབུ་མའི་ནང་དུ་ཟླ་བ་ལ། །ཨོཾ་དཀར་གསལ་བཏབ་དེ་ལ་གཡས་གཡོན་གྱི། །སྲོག་ཐུར་ཐིམ་པར་མོས་ལ་དེ་བཞིན་དུ། །སྙིང་འཁོར་དཀར་པོ་མགྲིན་འཁོར་དམར་པོ་དང༌། །སྤྱི་བོའི་འཁོར་ལོ་ནག་པོ་གཙུག་ཏོར་གྱི། །འཁོར་ལོ་ལྗང་ཁུ་གསང་འཁོར་སྔཽ་མ་གཏོགས། །བུམ་ཅན་གཞན་རྣམས་དམིགས་པ་སྔ་མས་འགྲེ། །ཐིག་ལེའི་རྣལ་འབྱོར་དྲུག་པོ་དེ་རྣམས་ཀུན། །ཟླ་གཅིག་སྒོམ་པ་དམིགས་བསྐོར་སོ་བཞི་པའོ། །འཛིན་པའི་ཁྲིད་རྣམས་རྫོགས་པར་བཤད་ཟིན་ཏོ། །

༈ གསུམ་པ་ཐ་མར་དགེ་ལ་རྗེས་དྲན་དང༌། །ཏིང་འཛིན་རྣམ་གཉིས་རྗེས་དྲན་དངོས་སྒོམ་ཚུལ། །ལུས་སྦྱོར་རླུང་གི་རྩོལ་སོགས་མ་ལྟོས་ཏེ། །འཁོར་ལོ་དྲུག་གི་རྩ་མདུད་གྲོལ་བ་དང༌། །བདེ་བའི་རླུང་ལ་དབང་ཐོབ་གཏུམ་མོ་ལ། །ཅི་དགར་སྤྱོད་པའི་སྐབས་ཡིན་རྒྱུད་གསུངས་བཞིན། །ཉམས་སུ་བླངས་པས་ཆོག་མོད་སྐབས་འདིར་ནི། །རྗེས་མཐུན་དབང་བྱས་ཉམས་ལེན་དམིགས་འཁྲིད་ལ། དངོས་དང་ཡན་ལག་དང་པོ་སོར་བསམ་ལ། །མྱོང་བ་ཅི་རིགས་ཐོན་པ་སྲོག་འཛིན་གྱི། །བུམ་ཅན་ཕལ་པ་ཡན་ཆད་ལེགས་འབྱོངས་པ། །སྲོག་ཐུར་བསྲེ་ལ་མྱོང་བ་ཐོན་དབང་བྱས། །དེ་ལ་སྔོན་འགྲོ་རླུང་སྦྱང་དངོས་གཞི་ཡང༌། །ཇི་ལྟར་སྒོམ་ཚུལ་གཉིས་ལས་དང་པོར་གསུམ། །དང་པོ་ཁྲོ་བོ་སེང་གེའི་འདུག་སྟངས་ནི། །རྐང་པ་བཤང་སྒོར་སྣོལ་ལ་པུས་མོ་བསྲངས། །ཙོག་པུ་སྒལ་ཚིགས་བསྲངས་ཏེ་ལག་པ་ནི། །ཐབ་འགལ་བྱ་ཞིང་ཡང་ན་པུས་བཙུགས་ནས། །སྐེད་པ་བསྲངས་ཏེ་ལག་གཉིས་བརླ་སྤོམ་ཕྲའི། །མཚམས་སུ་གཏད་ཅེས་གཞན་བཤད་གང་ལྟར་ཡང༌། །མཇིང་པ་བསྟུང་ཞིང་གཙུག་ཏོར་འཁོར་བསྒྱུར་གྱི། །ལྟ་སྟངས་བྱ་ལ་མདུན་རྩ་གནད་བསྣུན་ཡིན། །གཞན་ཡང་པུས་མོ་གྲུ་མོ་ས་ལ་འཛུགས། །ཡང་ན་སྐྱིལ་ཀྲུང་སྐེད་བསྲངས་ལག་པ་གཉིས། །དཔྱི་མགོའི་ཐད་ཀྱི་སར་འཛུགས་ལུས་སྒྱེད་ཅིང༌། །མགྲིན་དགུག་རྒྱབ་ཀྱི་རྩ་ལ་གནད་བསྣུན་ཡིན། །ཞི་ཁྲོ་གླང་པོ་ཆེ་ཡི་འདུག་སྟངས་ནི། །པུས་བཙུགས་ལག་གཉིས་ཁུ་ཚུར་འགྲམ་པ་སྐྱོར། །གྲུ་མོ་སྟེགས་བཙུགས་ཡང་ན་རྐང་པ་བརྐྱང༌། །མཉམ་པའི་རླུང་སྦྱོར་སྟེང་ནས་ཐུར་སེལ་ནི། །སྟེང་དུ་འགྲོ་བར་བྱེད་དོ་ཡང་སྐྱིལ་ཀྲུང༌། །ལུས་ལྟག་སྒྱེད་དུ་བྱེད་ལ་ལག་གཉིས་ཀྱི། །རྡོ་རྗེ་ཁུ་ཚུར་སྐེད་པའི་རྒྱབ་ནས་བརྟེན། །ཡང་ན་གན་རྐྱལ་རྐང་གཉིས་ཅུང་ཟད་བརྐྱང༌། །པདྨའི་ཁ་སྦྱོར་ཁུ་ཚུར་སྙིང་གར་བསྣོལ། །སྲོག་ཐུར་འདྲེན་ལ་ལྟ་སྟངས་བདུད་རྩི་འཁྱིལ། །ཞི་བ་དྲང་སྲོང་འདུག་སྟངས་སེང་གེ་ཡི། །འདུག་སྟངས་འདྲ་བ་ཁུ་ཚུར་སྙིང་ཁར་བསྣོལ། །ཡང་ན་ཙོག་པུ་རྟིང་བཏེག་ཁུ་ཚུར་བསྣོལ། །རྣ་བཟུང་གཞན་ཡང་བུས་མོ་སར་འཛུགས་ནས། །ལག་གཉིས་ཁུ་ཚུར་སྙིང་ཁར་བསྙོལ། །ཡང་ན་ཟླུམ་པོའི་རྐང་སྟབས་ཁུ་ཚུར་ནི། །བརླ་རྩ་བཙུགས་ལ་ལྟ་སྟངས་ཐུར་དུ་བལྟ། །འདུག་སྟངས་བཅུ་གཉིས་ཉི་མ་བཅུ་གཉིས་སོང༌། །མཉམ་བཞག་རེ་རེ་ལྟ་སྟངས་རེས་མོས་སུ། །ཞག་བཅུ་སྒོམ་ཞིང་དམིགས་བསྐོར་སོ་ལྔ་པ། །ངག་འདྲེན་འོག་རླུང་འཐེན་ཅིང་ཧཱུཾ་རིང་གིས། །སྟེང་རླུང་ཕྱིར་བསལ་ཛཿཧཱུཾ་བཾ་ཧོཿཧི། །ཞེས་པས་འཁོར་ལོ་ལྔ་ལ་རིམ་པས་དམིགས། །སྟེང་རླུང་དྲག་མནན་ལཱྀ་ཨཱུ་རཱྀ་ཨཱི་ཨཱ། །ཞེས་པས་ཁོང་སྒྲ་བཅས་ཏེ་འཁོར་ལོ་ལྔར། །རིམ་དམིགས་གསང་རླུང་སྟེང་དུ་དྲག་ཏུ་དྲངས། །ཁ་སྦྱོར་ལྟེ་བར་བཟུང་ལ་ཕྱིར་བསྐྱེད་ནས། །འོག་སྒོ་བསྡམས་ཤིང་ཤེས་པ་དཔྲལ་པར་གཏད། །སྔར་ཀྱི་ལུས་གནད་དྲུག་པོ་སོ་སོའི་སྟེང༌། །རླུང་སྦྱོར་འབད་ལ་ཞག་ནི་ཉི་ཤུར་སྒོམ། །དམིགས་བསྐོར་སོ་དྲུག་གཞན་ཡང་སྒོམ་སྟེགས་དང༌། །པུས་འཁྱུད་བཅུག་སྟེ་མེ་ཐབ་དྲུག་ཆིངས་བྱ། །ཧཱ་རིང་དང་བསྟུན་ལག་པ་ཁུ་ཚུར་བཅིང༌། །གྲུ་མོ་པུས་མོ་ཐུག་བར་ལག་པ་བརྐྱང༌། །རླུང་འབུད་དེ་ལྟར་ལན་བདུན་སོང་བ་ན། །ལག་པ་ཐབ་འགལ་བྱ་ལ་འཇམ་རླུང་བཟུང༌། །ངལ་གསོ་ལན་རེ་དེ་ལྟར་ཡང་ཡང་སྒོམ། །ཞག་བཅུ་སྒོམ་ལ་དམིགས་བསྐོར་སོ་བདུན་པ། །གཉིས་པ་དེ་ཡི་ཡན་ལག་བཟུང་བཟློག་སོགས། །སྦྱང་བ་བྱེད་བཅིང་ཙོག་པུ་འཕོང་སྟེགས་བཅུག །ལག་པ་བརླ་ནང་ནས་འཁྱུད་ངར་གདོང་བཟུང༌། །ཁ་ནས་རླུང་ཕྱིར་དྲག་བུས་འོག་སྒོ་གློད། ། རྔུབ་སྟེ་ལྟོ་བ་ཕྱིར་བསྐྱེད་འོག་སྒོ་གློད། །གང་ཐུབ་བཟུང་བ་རླུང་གནད་དང་པོ་ཡིན། །འོག་ལ་བསྲེ་འཛིན་དབྱེ་སྡུད་ཅེས་བྱའོ། །དེ་འདྲ་བ་ལས་དགང་གཏོང་གཉིས་ཀའི་སྐབས། །ལྟོ་བ་ཚིགས་པ་བཅར་ཞིང་ཐུར་སེལ་དྲངས། །རོ་སྟོད་འཐེན་ལ་ངར་གདོང་མནན་པའོ། །རླུང་གནད་གཉིས་པ་སྒོ་གླེག་ཅེས་བྱའོ། །ལུས་གནད་དེའི་ངང་ཐུར་སེལ་དྲག་ཏུ་བསྣོལ། །རྗེས་ཕྱིར་བུས་ཏེ་སྟོང་འདྲེན་དྲག་ཏུ་བྱ། །རྔུབ་སྟེ་ཁ་སྦྱོར་དགང་འཐེན་ལྟོ་བ་བསྐྱོད། །སྐེད་པ་སྐྱོག་སྟེ་རོ་སྟོད་གཅུ་བ་དང༌། །ལག་བརྐྱང་སོར་གཅུད་མགྲིན་གཅུ་མགོ་སྤྲུག་ནས། །རླུང་འབུད་ཕྱིར་བཟུང་ཀ་བ་བཙུགས་ནས་ནི། །མགོ་དགུག་བསྐྱོད་དེ་མགྲིན་པ་རོ་སྟོད་དང༌། །ལྟེ་བར་སྔར་བཞིན་བྱ་ལ་དེ་ཀུན་ལ། །འདར་སྤྲུག་མཇུག་ཏུ་འབེབས་བྱ་རླུང་གནད་ནི། །གསུམ་པ་ཡིན་ལ་ཀུན་འདུས་ཞེས་བྱའོ། །སྐྱིལ་ཀྲུང་ལག་གཉིས་ཁུ་ཚུར་བརླ་གནོན་བྱ། །ཅུང་ཟད་སྒུར་ནས་ཧཱུཾ་ཞེས་ཐུར་སེལ་འཐེན། །སྟོང་འདྲེན་གཡས་གཡོན་དབུས་གསུམ་རླུང་ཁ་སྦྱོར། །གྱེན་འཐེན་མགོ་སྒྱེད་སྤྲུག་པ་ཡང་གཡས་གཡོན། །དབུས་གསུམ་བྱ་བ་རླུང་གནད་བཞི་པ་ཡིན། །འདུས་པ་ཞེས་བྱ་དེ་གཉིས་འདྲེན་ཁྱབ་བོ། །དེ་རྣམས་གཅིག་སྟེང་གཅིག་བྱ་ལུས་སྦྱོང་ལ། །འབད་པར་བྱ་སྟེ་ཞག་བཅུ་སྒོམ་པ་ནི། །ཕྱག་ལེན་ཡིན་ལ་དམིགས་བསྐོར་སོ་བརྒྱད་པའོ། །གསུམ་པ་ལུས་ཀྱི་འཁྲུལ་འཁོར་འདིར་མ་སྤྲོས། །ནང་ནུབ་འདུག་སྟངས་བཅུ་གཉིས་གང་རུང་གིས། །ངག་འདྲེན་རླུང་སྦྱོར་བཞི་པོ་གཙོ་བོར་སྒོམ། །སྔ་དྲོ་ཕྱི་དྲོར་རླུང་གནད་བཞི་སོང་ནས། །ཡན་ལག་ལྔ་སྦྱོང་ལ་སོགས་དྲུགརེ་རེ། །ཉི་མ་ལྔ་ལྔ་སྔོན་འགྲོ་ཉི་ཤུ་པ། །ཟླ་གཅིག་རྗེས་དྲན་སྔོན་འགྲོ་ཟླ་་བ་བཞི། །གཉིས་པ་དངོས་གཞི་རྗེས་དྲན་རྗེས་མཐུན་པའི། །དབང་བྱས་ཕྱག་ཆེན་སྦྱོར་བ་མོས་ཡུལ་བཞག །འདི་ལ་གསུམ་སྟེ་སྒོམ་པ་ཡེ་ཤེས་ཀྱི། །ཕྱག་རྒྱ་བསླབ་པ་ལུས་གནད་སྤྱི་དང་འདྲ། །ཁུ་ཚུར་སྙིང་གར་བསྣོལ་ནས་ལྟ་སྟངས་ནི། །ཐད་ཀར་གཡོ་མེད་ལྟ་ལ་རང་ཉིད་ནི། །དུས་འཁོར་ལྷན་སྐྱེས་ལ་སོགས་གསལ་གདབ་ལ། །དེ་ཡི་ཤུལ་དུ་སྟོང་གཟུགས་སྣང་བ་དྲངས། །ལྷ་སྐུར་སྣང་བ་སྟོང་གཟུགས་ཁྱབ་བྱས་ལ། །དེ་ལ་ཡིད་མི་གཡོ་བར་ཅུང་ཟད་བཞག །སྟོང་གཟུགས་སྣང་བ་འདྲེན་མི་ཐུབ་པ་ན། །ལྷ་སྐུ་གསལ་སྟོང་དམིགས་ཏེ་ཅུང་ཟད་བཞག །དཔྲལ་པར་ཨོཾ་དཀར་མགྲིན་པར་ཨཱཿདམར་པོ། །ཐུགས་ཀར་ཧཱུཾ་ནག་ལྟེ་བར་ཧོཿསེར་པོ། །གསང་བར་སྭཱ་སྔོན་གཙུག་ཏོར་ཧཾ་ལྗང་ཁུ། །ཡུམ་མཁའ་ཨཱཿལས་པདྨ་དམར་པོ་ཡི། །འདབ་བརྒྱད་ལྟེ་བར་ཧཱུཾ་ལས་བྱུང་བ་ཡི། །རྡོ་རྗེ་སྔོན་པོ་ཕྲ་མོས་མཚན་པ་དང༌། །ཡབ་ཀྱི་གསང་གནས་ཧཱུཾ་ལས་རྡོ་རྗེ་ཡི། །སྔོན་པོ་རྩེ་ལྔ་ལྟེ་ནང་ཨཱཿལས་བྱུང༌། །པད་དམར་འདབ་བརྒྱད་ཕྲ་མོས་མཚན་པ་གསལ། །འཁྱུད་པ་ལ་སོགས་རྗེས་ཆགས་སྤྱོད་མཛད་པས། །གཙུག་ཏོར་ཐིག་ལེ་ཞུ་ནས་དཔྲལ་འཁོར་བར། །གང་བར་མོས་ལ་སྟོང་གཟུགས་བསྲེ་བར་བྱ། ། ལུས་གནད་དེ་ཀ་གཙུག་ཏོར་དཔྲལ་པ་ཡི། །བུམ་ཅན་ཡུན་ཐུང་དགའ་བ་སྐད་ཅིག་མ། །རྡོ་རྗེ་པདྨར་སྦྱར་བས་ཐིག་ལེའི་རྒྱུན། །ཆེར་རྒྱས་ཞུ་སྟེ་མགྲིན་སྙིང་འཁོར་ལོ་བར། །གང་བར་མོས་ཏེ་སྟོང་གཟུགས་བསྲེ་བར་བྱ། །མགྲིན་སྙིང་བུམ་ཅན་ཚར་རེ་སྔ་མ་ལས། །ཡུན་རིང་བཟུང་ལ་མཆོག་དགའ་སྐད་ཅིག་མ། །དབང་པོ་གཉིས་སྲུབ་སྦྱོར་ལས་བྱང་ཆུབ་ཀྱི། །སྔ་མའི་རྒྱུན་ལས་ཆེར་རྒྱས་ཞུ་བ་ལས། །ལྟེ་གསང་འཁོར་ལོ་ཡན་ཆད་གང་བར་བསམ། །ལྟེ་གསང་བུམ་ཅན་ཡུན་རིང་སྒོམ་བྱས་ནས། །ཁྱད་པར་དགའ་བའི་སྐད་ཅིག་སླར་ཡང་ནི། །དྲག་སྲུབ་གསང་ནས་རྡོ་རྗེ་ནོར་བུའི་བར། །བྱང་ཆུབ་སེམས་ཀྱིས་གང་མོས་སྟོང་གཟུགས་ལ། །རིང་དུ་མཉམ་པར་འཇོག་བཞིན་བུམ་ཅན་གྱི། །སྦྱོར་བ་གཅིག་དང་སྦྱོར་བ་དྲུག་པ་ཞེས། །འཁྲུལ་འཁོར་བཅས་པས་རྡོ་རྗེ་ནོར་བུ་ལ། །འཕོ་མེད་བྱང་ཆུབ་སེམས་འཁྱིལ་གང་བར་བསམ། །ལྷན་སྐྱེས་དགའ་བ་ཡོངས་འཛིན་འཁྲུལ་འཁོར་གྱིས། །བྱང་ཆུབ་སེམས་བརྟན་དེ་ཡི་རྗེས་སུ་ནི། །ཁོང་འདྲེན་འདྲེན་ཆེན་སྦགས་འདྲེན་སྟག་མོ་དང༌། །གླང་ཆེན་ཝ་སྣོམ་གཙུག་ཏོར་བར་དུ་བཟློག །པྲེ་ཏ་ཀ་དང་རྣམ་གྲོལ་གཡང་སྤྲུགས་དང༌། །འཕར་གཡོ་ཕུར་འདོན་རབ་བརྐྱང་རྣམས་ཀྱིས་ནི། །ལུས་ཀུན་ཁྱབ་པར་བྱས་ལ་སེང་གེའི་རྩལ། །གཅུད་འཐེན་གསུམ་འགྲེམས་སེང་གེ་འགྱིང་བ་དང༌། །རྨ་བྱའི་འགྱུར་རྣམས་ཀྱིས་ནི་བཟུང་བཟློག་འགྲེམས། །གསུམ་ཀར་བྱས་ལ་སྤྱིར་ནི་བཟུང་ཞིང་བཟློག །བཟློག་ཅིང་འགྲེམས་ལ་འགྲེམས་ཤིང་རླུང་དང་བསྲེ། །བསྲེ་ཞིང་ཡེ་ཤེས་ཆེན་པོར་བསྐྱལ་བ་ཡིན། །དམིགས་པ་གསལ་བས་ཞུ་བདེ་བསྐྱེད་ཐུབ་ན། །སྦྱོར་བ་དྲུག་པོས་བཟུང་མ་ཐག་ཏུ་ནི། །འཁྲུལ་འཁོར་སྤང་པའི་རླུང་སྦྱོར་རྣམས་ཀྱིས་བཟུང༌། །བཟློག་ཁྱབ་སྦྱངས་ལ་དེ་རྗེས་འཁྲུལ་འཁོར་བྱ། །ཐོག་མར་ཞུ་བདེ་བསྐྱེད་ཐུབ་མི་ཐུབ་རུང༌། །དེ་ཀུན་རྫོགས་པར་བྱ་དགོས་ཕྱིས་བྱང་ནས། །བཟློག་བགྲམ་གནད་ཆེ་ཙམ་གྱིས་ཆོག་པར་གསུངས། །མཐར་ནི་རླུང་བསྲེ་ཕྱིར་དུ་བུམ་ཅན་ནི། །ལན་མང་སྒོམ་ཞིང་ཡེ་ཤེས་ཆེན་པོ་ལ། །སྐྱེལ་ཕྱིར་ཞུ་བདེའི་ཉམས་དང་འོད་གསལ་རྟགས། །དམིགས་ནས་མི་གཡོ་གསུམ་ལྡན་བསྐྱང་བར་བྱ། །དངོས་གཞི་ཉི་ཤུའི་འཁྲུལ་འཁོར་ཞག་བཞི་བཅུར། །སྒོམ་པ་འདི་ནི་དམིགས་བསྐོར་ཞེ་གཅིག་པ། །དེ་ཡན་འཁྲུལ་འཁོར་ཕྱི་མ་ཞག་བརྒྱ་སོང༌། །ཞག་བརྒྱད་སྟན་ཐོག་གཅིག་མའི་རླུང་སྦྱོར་དང༌། །འཁྲུལ་འཁོར་བྱ་གསུངས་ཏིང་ངེ་འཛིན་གྱི་ནི། །རྗེས་སུ་སྟན་ཐོག་གཅིག་མ་བྱ་བའང་ཡོད། །རང་ལུས་ལག་པའི་ཕྱག་རྒྱ་བསླབ་པ་དང༌། །གཞན་ལུས་ལས་ཀྱི་ཕྱག་རྒྱ་བསླབ་པ་གཉིས། །དེང་སྐབས་ལག་ལེན་མི་བྱེད་འདིར་མ་སྤྲོས། །

གཉིས་པ་ཡན་ལག་དམིགས་པ་གཏུམ་མོ། །

གཉིས་པ་ཡན་ལག་དམིགས་པ་གཏུམ་མོ་ནི། །

མདོར་བསྡུས་རྩ་གསུམ་འཁོར་ལོ་དྲུག་གསལ་ནས། །གཙུག་ཏོར་དབུ་མའི་ཐིག་ལེ་དཀར་པོ་ནི། །ནུ་མ་ལྟ་བུ་རིང་ཐུང་སོར་བཞི་ཙམ། །ལྟེ་བར་གཏུམ་མོ་དབྱུག་པའི་གཟུགས་ཅན་ལ། །ཁ་དོག་དམར་པོ་སོར་བཞི་གསལ་བཏབ་ལ། །བུམ་ཅན་བཟུང་བས་གཏུམ་མོའི་མེ་འོད་རྒྱས། །རྩ་འཁོར་དྲུག་སོགས་ལུས་ནང་ཐམས་ཅད་ལ། །ཁ་དོག་དམར་ལམ་དྲོད་ཀྱིས་གང་བར་མོས། ། སྤྱི་བོའི་ཐིག་ལེ་ཞུ་བས་དབུ་མར་བབས། །དེ་ཡི་འོད་ཀྱིས་ལུས་ཀུན་དཀར་ལམ་པ། །བདེ་བས་གང་ནས་ཐིག་ལེ་གཏུམ་མོར་ཐིམ། །རྣམ་པར་མི་རྟོག་ཅུང་ཟད་ཉམས་པར་བཞག །དམིགས་བསྐོར་ཞེ་ལྔ་རྗེས་དྲན་འཁྲིད་རྫོགས་སོ། །

གཉིས་པ་ཏིང་འཛིན་ཉམས་ལེན་དམིགས་གནད།

གཉིས་པ་ཏིང་འཛིན་ཉམས་ལེན་དམིགས་གནད་ནི། །

ཏིང་འཛིན་ཡན་ལག་དངོས་ཀྱི་དབང་བྱས་ན། །ཕྱག་ཆེན་ཁོ་ནའི་རྗེས་དྲན་ཕལ་ཆེར་འདྲ། །སྤོགས་ཆོག་ལས་ཀྱི་ཕྱག་རྒྱ་ཐ་དད་མང༌། །འདིར་ནི་མོས་པ་ལམ་བྱེད་ཙམ་སྒོམ་ན། །རྗེས་དྲན་རྗེས་མཐུན་པ་དང་འདྲ་བ་ལས། །ལག་པ་མཉམ་བཞག་ལྟ་སྟངས་སྣ་རྩེར་དབབ། །དམིགས་པའི་སྐབས་སུ་ཡས་བརྟན་དགའ་བཞི་ནི། །རྗེས་དྲན་དང་འདྲ་མས་བརྟན་རྩ་འཁོར་ནི། །སོ་སོར་བུམ་ཅན་ཡུན་རིང་སྒོམ་བྱ་ཞིང༌། །སྟོང་གཟུགས་བདེ་བར་མཉམ་པར་འཇོག་བྱས་ཏེ། །ཏིང་ངེ་འཛིན་གྱི་ས་ལམ་བཅུ་གཉིས་ནི། །ཐོབ་པར་མོས་ལ་བག་ཆགས་འཇོག་པའི་ཕྱིར། །ཞག་བདུན་སྒོམ་པ་དམིགས་བསྐོར་ཞེ་དྲུག་པའོ། །སྲོག་རྩོལ་མན་ཆད་སྒོམ་དོན་མ་བཀོད་དོ། །སྦྱོར་དྲུག་དངོས་གཞིའི་དམིགས་གནད་བསྟན་ཟིན་ཏོ། །གསུམ་པ་རྗེས་གྱི་ཡན་ལག་འདའ་ཁ་ཡི། །འཕོ་བའི་གདམས་ངག་ཀུན་སྤངས་གསུངས་ཇི་བཞིན། །དབུའི་ནང་ས་བོན་རང་སེམས་ཧཾ་ཨཱཿཧཱུཾ། །ཟླ་ཉི་ནམ་མཁའི་མདོག་ཅན་གཙུག་གསང་སྙིང༌། །སྲོག་རྩོལ་བསུ་སྐྱེལ་གཅིག་ཏུ་བསྡུས་བྱས་ནས། །འདུན་པ་རྩེ་གཅིག་གང་འདོད་གནས་སུ་འཕོ། །རྗེས་ཀྱི་ཡན་ལག་གཞན་རྣམས་འདིར་མ་སྤྲོས། །རྒྱལ་ཀུན་བགྲོད་ལམ་རྣལ་འབྱོར་ཡན་ལག་དྲུག །ཆོས་ཀྱི་སྙིང་པོ་རྡོ་རྗེ་འཛིན་པའི་གསང༌། །རྟོགས་པར་དཀའ་བས་བདག་ལྟའི་ཡུལ་མིན་མོད། །སྐལ་མཉམ་གཞན་ལ་ཕན་སྙམ་རྩོལ་བ་བྱས། །དེ་ལྟར་བླ་མ་དམ་པའི་མན་ངག་དང༌། །སྔོན་བྱོན་གྲུབ་པའི་རིང་ལུགས་ལས་བརྩམས་ནས། །རྡོ་རྗེའི་རྣལ་འབྱོར་ངེས་དོན་ཉམས་ལེན་ཚུལ། །ས་བཅུའི་དབང་ཕྱུག་རྣམས་ཀྱི་གསུང་བཞིན་བཤད། །ཟབ་དོན་ཡིད་བཞིན་ནོར་བུའི་ཕུང་པོ་དག །མཁས་གྲུབ་གོང་མའི་ཐུགས་མཚོར་སྦས་པ་ལས། །ཆ་ཙམ་མངོན་དུ་ཕྱུང་ནས་འདིར་སྤེལ་གྱི། །དེ་ཡི་དགེ་བ་འགྲོ་བའི་དོན་དུ་བསྔོ། །སྲིད་པའི་གནས་འདིར་ཁྱབ་བདག་རྡོ་རྗེ་སེམས། །བརྟན་གཡོ་ཀུན་གྱི་མགོན་དུ་བཞུགས་པ་ཡང༌། །གཟུང་འཛིན་དྲི་མའི་དཔུང་ཚོགས་ཀུན་བཅོམ་སྟེ། །རང་གནས་རྟག་བདེའི་རྒྱལ་སྲིད་སྤྱོད་པར་ཤོག ཅེས་ཟབ་ལམ་རྡོ་རྗེའི་རྣལ་འབྱོར་གྱི་ཁྲིད་ཡིག་མཐོང་བ་དོན་ལྡན་གྱི་སྡོམ་ཚིག་གྲུབ་པའི་དགོངས་རྒྱན་ཞེས་བྱ་བ་འདི་ནི། བསྟན་ལ་ལྷག་བསམ་དཀར་བའི་མཁན་སྤྲུལ་དུ་མས་དངོས་རྫས་དར་བཅས་སྦྱོར་དྲུག་བ་རྣམས་ལ་བློ་འཛིན་གྱི་ཕྱིར་སྦྱོར་དྲུག་གི་སྡོམ་ཚིག་ཞིག་དགོས་ཞེས་བསྐུལ་ངོར་ངག་དབང་དངོས་གྲུབ་དཔལ་གྱིས་ཚིག་སྦྱོར་གྱིས་མ་རྒྱན་པར་གོ་སླ་བར་རབ་གནས་ས་བྱི་ལོའི་རྒྱལ་ཟླའི་ཚེས་གཅིག་ལ་ཛ་འགོའི་རི་ཁྲོད་བྱང་ཆུབ་ཆོས་རྫོང་ནས་སྡོམ་གསུམ་དང་ཚད་མའི་དཔེ་ཁྲིད་ཀྱི་ཞར་ལ་རྫོགས་པར་བྲིས་པའོ། །འདིས་ཀྱང་ཟབ་ལམ་རྡོ་རྗེའི་རྣལ་འབྱོར་འདི་ཉིད་ཕྱོགས་བཅུ་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག ། །།སརྦ་མངྒ་མཾ།།