བསང་མཆོད་འདོད་དོན་ཀུན་འགྲུབ།
བསང་མཆོད་འདོད་དོན་ཀུན་འགྲུབ་བཞུགས་སོ། །རཾ་ཡཾ་ཁཾ༌། ཨོཾ་ཨཱཿཧཱུྃ་ལན་གསུམ།མཆོད་མགོ་གཅིག གཉིས་སུམ་སོགས་ནས། བཅུ་གསུམ་བར་བྱ། ཡང་ན་བསང་འབུམ་རྩི་བར་བྱ། དེ་ནས་མཆོད་དང་པོ་ལྷ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡུལ་ལྷ་གཞི་བདག་ནོར་ལྷ་གཏེར་བདག དྲིན་ཅན་རྩ་བའི་བླ་མ་མི་མངོན་ཆོས་ཀྱི་དབྱིངས་ན་བཞུགས་པའི་ཆོས་སྐུ་རྡོ་རྗེ་འཆང་ཆེན། ལོངས་སྐུ་དུས་ཀྱི་འཁོར་ལོ། སྤྲུལ་སྐུ་ཤཱཀྱ་ཐུབ་པ། ཆོས་རྒྱལ་སུམ་ཅུ་རྩ་ལྔ། རྒྱ་གར་གྲུབ་ཆེན་བརྒྱད་ཅུ། སློབ་དཔོན་པདྨ་འབྱུང་གནས། བོད་ཀྱི་རྗེ་འབངས་ཉེར་ལྔ། རྗེ་བཙུན་འཕགས་མ་སྒྲོལ་མ། ལྷ་མོ་འོད་ཟེར་ཅན་མ། རིགས་གསུམ་མགོན་པོ། ཇོ་ནང་ཡབ་སྲས་བཅོ་ལྔ། སྐུ་གསང་བ་འདུས་པ། གསུང་མ་ཧཱ་མ་ཡ། ཐུགས་དགྱེས་མཛད་རྡོ་རྗེ། ཡོན་ཏན་འཁོར་ལོ་བདེ་མཆོག འཕྲིན་ལས་རྡོ་རྗེ་འཇིག་བྱེད། ཁྲོ་རྒྱལ་རྡོ་རྗེ་ཤུགས་འཁོར། གསང་བདག་འབྱོང་བོ་འདུལ་བྱེད། ཡི་དམ་རྟ་མཆོག་རོལ་བ། ཕུར་བ་རྡོ་རྗེ་གཞོན་ནུ། ཆོས་སྐྱོང་གི་གཙོ་བོ་དཔལ་ལྡན་གུར་གྱི་མགོན་པོ། ཡུམ་ཆེན་ཨེ་ཀ་ཙ་ཏི། དཔལ་ལྡན་ལྷ་མོ། གནོད་བཞིན་ཡབ་ཡུམ། པུ་ཊ་མིང་སྲིང༌། རུ་འདྲེན་སྡེ་བཞི་ལས་མགོན་ཟངས་གྲི་བེར་ནག་མྱུར་མཛད་ཕྱག་དྲུག་མགོན་པོ། ངེས་དོན་གྱི་བསྟན་སྲུང་བདུད་མགོན་དྲཀྴད་ནག་པོ།རྒྱལ་བོ་ཆེན་པོ་རྣམ་ཐོས་སྲས་འཁོར་གནོད་བཞིན་རྟ་བདག་བརྒྱད་དང་བཅས་པ་དང༌། ནོར་བདག་གི་རྒྱལ་བོ་རྣམ་སྲས་མདུང་མར་ཅན། ཞིང་སྐྱོང་གདོང་བཞི་ཡབ་ཡུམ། ཕུར་སྲུང་དམ་ཅན་བཅུ་གཉིས། དཔལ་ལྡན་དམག་ཟོར་རྒྱལ་མོ། སྨན་བཙུན་ཚེ་རིང་མཆེད་ལྔ། གཟའ་རྒོད་ཁྱབ་འཇུག་ཆེན་པོ། ཡབ་རྡོ་རྗེ་སྲིན་པོ། ཡུམ་རྡོ་རྗེ་གློག་འགྱུ། ཕྱིའི་གཟའ་ཆེན་བརྒྱད། ནང་གི་གདོང་མོ་བཞི། རྒྱུ་སྐར་ཉེར་བརྒྱད། བོད་གངས་ཅན་གྱི་སྟོད་མངའ་རི་སྐོར་གསུམ་བར་དབུས་གཙང་རི་བཞི་སྨད་ཀྱི་མདོ་ཁམས་སྒང་དྲུག་ལ་གནས་པའི་མགུར་ལྷ་བཅུུ་གསུམ་སྲིད་པ་ཆགས་པའི་ལྷ་དགུ། བོད་ཀྱི་བསྟན་མ་བཅུ་གཉིས། དགེ་བསྙེན་ཉེར་གཅིག་སོགས་དང་ཨ་མྱེ་རྨ་ཆེན་སྤོམ་ར་རྨ་རིགས་སུམ་བརྒྱ་དྲུག་ཅུ་རྨ་འཁོར་སྟོང་དང་དགུ་བརྒྱ་སོགས་དང༌། ཤར་སྟོད་ཀྱི་གཉན་པོ་གཡུ་རྩེ། ཤར་གྱི་སྒོ་སྲུང་ལྷ་ཡི་ཐོད་དཀར། ལྷོ་ཡི་སྒོ་སྲུང་ཥེ་རྩེ་གཉན་ཅན༌། ནུབ་ཀྱི་སྒོ་སྲུང་རྫ་ཡི་གསེར་ཁྲབ། བྱང་གི་སྒོ་སྲུང་ཕ་འོང་གྲུ་བཞི། སྒོ་ཟུར་གཡས་ན་ལྷ་གཡག་དཀར་བོ། སྒོ་ཟུར་གཡོན་ན་རྒྱ་སྟག་དམར་བོ་གཉན་དམག་བརྒྱད་ཁྲི་བཞི་སྟོང་མཚོ་སྨན་སུམ་བརྒྱ་དྲུག་ཅུ་ཡང་སྨན་དགུ་ཁྲི་དགུ་འབུམ་དང་བཅས་པ་དང༌། ཡང་དགོས་སུ་རང་ཡུལ་གྱི་གཞི་བདག་༼ཙོང་ཡི་རི་རྒྱལ་ཕྱུག་མོ་ཡུལ་ལྷ་བཀྲ་ཤིས་དཀར་འཛོམ་བྲག་ནག་ཤན་པ་འབུམ་སྡེ། གཙོ་ཆེན་གཡང་རི་དཀར་བོ༽་སོགས་ཕ་རི་གཡས་ལ་གནས་པ། ཚུར་རི་གཡོན་ལ་གནས་པ་འབབ་པ་ཆུ་ལ་གནས་པ་སྐྱེས་པ་ཤིང་ལ་གནས་པ་སོགས་ལྷ་ཀླུ་གཞི་བདག་འཁོར་དང་བཅས་པ་ཁྱེད་རྣམས་ལ་བསང་མཆོད་འདོད་དགུ་རྒྱ་ཆེན་པོ་འདི་འབུལ་ལོ། །དེ་ལ་བརྟེན་ནས་བྱིན་རླབས་ན་བུན་འཐིབ་འཐིབ་ཀྱིས། དངོས་གྲུབ་ཆར་བ་འབབ་འབབ་ཀྱིས། འཕྲིན་ལས་གློག་དམར་འཁྱུག་འཁྱུག་ཀྱིས། དྲག་རྩལ་ཐོག་རྒོད་ཡར་ཡར་ཀྱིས། མགོ་མི་འཕྱུག་གི་རྨོག་དཀར་གྱི་ཏོག་འཕྲུ་མཛོད། ལུས་མི་འཕྱུག་ཁྲབ་དཀར་གྱི་རྒྱུན་ཐག་མཛོད། བསམ་པ་ལམ་ལ་འགྲོ་དགོས། འདོད་པ་ལག་ཏུ་འོང་དགོས། མང་བོའི་ནང་ནས་དགེ་དང་སྤྲོད། ཉུང་ཉུང་ནང་ནས་དོན་དང་སྤྲོད། ཨ་མཁྱེན་པའི་ཡེ་ཤེས་ཅན་བརྩེ་བའི་ཐུགས་རྗེ་ཅན་མཛད་པའི་འཕྲིན་ལས་ཅན་སྐྱོབས་པའི་ནུས་མཐུ་ཅན། ཁྱེད་རྣམས་ཀྱིས་བདག་ཅག་གི་རྐང་གཉིས་མི་ལ་ན་ཙ་མ་བཏང༌། རྐང་བཞི་ཕྱུགས་ལ་གོད་ཁ་མ་བཏང། ཞིང་གི་ས་ལ་བཙའ་སད་སེར་གསུམ་མ་བཏང༌། དགྲ་ཁ་དྲག་ཡོད་ན་དགྲ་མགོ་བཅག་གི་ཐོ་བ་ཀྱིས། གདོན་དངོས་དྲག་ཡོད་ན་གདོན་སྙིང་ཕུད་ཀྱི་ལྕགས་ཀྱུ་ཀྱིས། འདྲེ་ཁ་ཞུགས་ཡོད་ན་འདྲེ་མཆུ་བཅིང་གི་ཞགས་པ་ཀྱིས། རྐུས་ལག་ཞུགས་ཡོད་ན་རྐུན་ལག་བཅད་ཀྱི་རལ་གྲི་ཀྱིས། མཁས་པའི་ལྕེ་འོག་མ་བཏང༌། དཔའ་བོའི་མཚོན་འོག་མ་བཏང༌། བཙན་པོའི་ཁྲིམས་འོག་ཏུ་མ་བཏང༌།སྔགས་པའི་མཐུ་འོག་ཏུ་མ་བཏང༌། མགྱོགས་པའི་བང་འོག་ཏུ་མ་བཏང༌། བསོད་ནམས་མར་གྱི་རི་བོ་མ་ཞུ། ཁ་རྗེ་འོ་མའི་རྒྱ་མཚོ་མ་སྐམ། དབུ་འཕང་རིན་ཆེན་གདུག་དཀར་གྱི་ཡུ་བ་མ་ཐུང༌། ཤེས་དཔྱོད་གསེར་གྱི་ཉ་མོའི་གཤོག་རྩལ་མ་ཞན། བསོད་ནམས་གཏེར་ཆེན་བུམ་པའི་ལྟོ་བ་མ་རལ། དབང་ཐང་པདྨའི་ཡལ་ག་མ་འཐོར། སྙན་གྲགས་དུང་དཀར་གཡས་འཁྱིལ་གྱི་རྒྱང་སྐད་མ་ཐུང༌། མཛད་འཕྲིན་དཔལ་གྱི་བེའུའི་མདུད་པ་མ་ཞན། ལེགས་ཚོགས་གསེར་གྱི་རྒྱལ་མཚན་གྱི་གཟི་འོད་མ་ཡལ། དགེ་མཚན་འཁོར་ལོ་རྩིབ་སྟོང་གི་མུ་འཁྱུད་མ་ལྷོད། ཁྲ་གྱི་ལས་ཚོགས་ས་ནས་གས་ཅན་དང་དོན་ཅན་གྱིས། སྨུག་ཤིག་སེ་སྒར་ས་ནས་ཁ་ཅན་དང་ངོ་ཅན་གྱིས། ཁྲ་ཆུང་མིག་གི་གཟི་མ་གྱིས། དམར་ཆུང་སྲོག་གི་ཁེབ་མ་གྱིས། གཞི་ལ་འདུག་ན་ཁ་འཛིན་གྱི། ཕྱིས་སུ་འགྲོ་ན་བསུ་བསྐྱལ་མཛོད། ཉིན་གསུམ་གྱི་བྱ་ར་རྒྱང་ནས་ཀྱིས། མཚན་གསུམ་གྱི་མེལ་ཚེ་དྲུང་ནས་མཛོད། དཔའ་སྙིང་རྒྱ་སྟག་གི་རི་མོ་ཀུན་ནས་གསལ་དགོས། གཟི་བརྗིད་སེང་ཆེན་གྱི་ལུས་རྩལ་ཁོང་ནས་རྒྱས་དགོས། སྙན་གྲགས་གཡུ་འབྲུག་གི་ངར་སྐད་ཕྱོགས་བཅུ་བསྒྲག་དགོས། དགྲ་འོང་ན་བྱ་ཐོང་ཅིག དུག་འོང་ན་སྨན་ཐོངས་བ་སོགས་མདོར་ན་བདག་ཅག་མི་ནོར་འཁོར་དང་བཅས་པ་ཐམས་ཅད་ལ་ཚེ་རིང་ནད་མེད་བདེ་སྐྱིད་ཕུན་སུམ་ཚོགས་པར་གྱུར་ཅིག་ལྷ་རྒྱལ་ལོ། །ལེགས་བཤད་དགེ་ལེགས་ཉིན་བྱེད་དབང་པོ་ཡིས། །གཟུར་གནས་མཁས་གྲུབ་བྱེ་བའི་བཞིན་རས་འཛུམ། །འཛམ་གླིང་ཞི་བདེའི་དཔལ་འཛིན་བླ་མེད་པ། །མཉམ་མེད་ཐུབ་པའི་བསྟན་འདི་གནས་གྱུར་ཅིག །
དངོས་གྲུབ་དཔལ་གྱིས་ཕྱོགས་བསྒྲིགས་བྱས་པའོ། །སརྦ་མངྒ་ལམ།།།།