གཉིས་པ་རབ་བྱུང་གི་སྡོམ་པའི་མི་མཐུན་ཕྱོགས་གསུམ་ལས།
གཉིས་པ་རབ་བྱུང་གི་སྡོམ་པའི་མི་མཐུན་ཕྱོགས་གསུམ་ལས།
དང་པོ་དགེ་ཚུལ་གྱི་སྡོམ་པའི་མི་མཐུན་ཕྱོགས་ལ། འདུལ་བ་བདུད་རྩིའི་ཉིང་ཁུ་ལས། སྤང་བྱ་བཅུ་ཇི་སྲིད་འཚོ་བར་བསྲུང་བའི ་དགེ་ཚུལ་ཕ་མའི་སྡོམ་པ་གཉིས། ཞེས་དང༌། བླང་དོར་རབ་གསལ་ལས། སྲོག་གཅོད་མ་བྱིན་ལེན་དང་འཁྲིག་པ་རྫུན། །ཆང་དང་གར་སོགས་ཕྲེང་སོགས་མལ་ཆེན་མཐོ། །དུས་མིན་ཟས་དང་གསེར་དངུལ་ལེན་པ་རྣམས། །ཇི་སྲིད་འཚོ་བར་སྤོང་བ་དགེ་ཚུལ་ལོ། །ཞེས་པ་ལྟར་སློབ་དཔོན་ལས་བླངས་བ་ལས་འདས་པ་བཅུ་དང༌། མཁན་པོ་ལས་བླངས་པ་ལས་འདས་པ་གསུམ་དང་བཅུ་གསུམ་ཡོད་དེ། དང་པོ་སློབ་དཔོན་ལས་བླངས་པའམ་དངོས་བླངས་པ་ལས་འདས་པ་ལ་བཅུ་ལས། དང་པོ་སྲོག་གཅོད་པ་ལ་བཞི་ལས། ༡མི་གསོད་པའི་ཕམ་འདྲའི་ཉེས་བྱས། ༢དུད་འགྲོ་འདེབས་པ། ༣སྲོག་ཆགས་དང་བཅས་པ་ ལ་སྤྱོད་པ། ༤དུད་འགྲོ་གསོད་པའོ། །གཉིས་པ་༥མ་བྱིན་ལེན་གྱི་ཕམ་འདྲའོ། །གསུམ་པ་༦མི་ཚངས་སྤྱོད་ཀྱི་ཕམ་འདྲའོ། །བཞི་བ་རྫུན་སྨྲ་བ་ཡིན་ལ། དེ་ལ་དབྱེ་ན་བཅུ་གསུམ། ༧རྫུན་སྨྲའི་ཕམ་འདྲ། ༨གཞི་མེད་ཕམ་པའི་སྐུར་འདེབས། ༩བག་ཙམ་སྐུར་འདེབས། ༡༠དབྱེན་བྱེད་པ། ༡༡དེ་རྗེས་ཕྱོགས། ༡༢ཁྱིམ་སུན་འབྱིན། ༡༣ཤེས་བཞིན་གྱི་རྫུན། ༡༤བཤེས་ངོར་བྱེད་པ། ༡༥འཕྱ་བ། ༡༦ཟས་ཅུང་ཟད་ཙམ་གྱི་ཕྱིར་སྟོན་པའི་སྐུར་འདེབས་དང༌། ༡༧ལྷག་མ་སོགས་ཀྱི་སྐུར་འདེབས། ༡༨བསླབ་པ་སྤོང་བ། ༡༩འབྲས་ཆན་འགེབས་པ་དང་བཅུ་གསུམ། རྫུན་སྨྲ་འདི་རྣམས་ཡུལ་དུ་མ་ལ་སྨྲས་ན་དེ་སྙེད་ཀྱི་ལྟུང་བར་འགྱུར་བར་གསུངས་སོ། །ལྔ་བ་༢༠ཆང་འཐུང་བའོ། དྲུག་པ་གླུ་གར་ཡིན་ལ། དེ་ལ་གསུམ་༢༡གླུ་ལེན་པ། ༢༢བྲོ་གར་བྱེད་པ། ༢༣དགོས་མེད་དུ་རོལ་མོའི་སྒྲ་འབྱིན་པ་དང་གསུམ་མོ། །བདུན་པ་ཕྲེང་སོགས་ཡིན་ལ། དེ་ལ་བཞི་སྟེ་༢༤རང་དགར་མེ་ཏོག་སོགས་མཛེས་བྱེད་ཀྱི་ཕྲེང་བ་འཆང་བ། ༢༥ལུས་ལ་དྲི་ཞིམ་བྱུག་པ། ༢༦རྣ་རྒྱན་སོགས་རྒྱན་འདོགས་པ། ༢༧ ཚོན་གྱིས་མཆུ་སོགས་ཁ་དོག་བསྒྱུར་བ་དང་བཞིའོ། །བརྒྱད་པ་ཁྲི་སྟན་ཆེ་མཐོའོ། །དེ་ལ་བཞི། ༢༨རིན་ཐང་ཆེ་བའི་ཁྲི་བསྟན་ལ་རང་དགར་འདུག་པའམ་༢༩ཉལ་བ་གཉིས་དང༌། ༣༠ཁྲི་སྟན་ཁྲུ་གང་ལས་མཐོ་བ་ལ་རང་དགར་འདུག་པ་དང་༣༡ཉལ་བ་གཉིས་ཏེ་བཞིའོ། །དགུ་བ་༣༢ཕྱི་དྲོའི་ཁ་ཟས་ཡིན་ནོ། །བཅུ་པ་༣༣གསེར་དངུལ་ལེན་པའོ། །གཉིས་པ་གསུམ་ནི། ༣༤མཁན་པོར་གསོལ་བ་བཏབ་པ་ཉམས་པ་ནི། མཁན་པོར་མ་གུས་པ་དང༌། ཆོས་ལྡན་གྱི་བཀའ་བསྒོས་པ་སྒྲུབ་ནུས་བཞིན་དུ་མི་སྒྲུབ་པ་སོགས་སོ། ། ཕྱོགས་མཐུན་གནས་ཀྱི་བླ་མ་མ་བསྟེན་ པ་སོགས་སོ། །༣༥ཁྱིམ་པའི་རྟགས་སྤོང་བ་ཉམས་པ་ནི། ཕུ་ཐུང་སོགས་ཡན་ལག་སྦུབས་ཅན་ཁྱིམ་པའི་གོས་རིགས་དང༌། གོས་དཀར་བོ་དང༌། ནག་པོ་དང༌། ཁ་ཚར་ཅན་སོགས་གྱོན་པ་སོགས་ལ་བགོ་ཐེབས་རེ་ལ་བླངས་འདས་དང༌། སྐྲ་དང་ཁ་སྤུ་སོར་གཉིས་ལས་ལྷག་འཇོག་པ་ལ་གྲངས་ཇི་སྙེད་ཀྱི་བླངས་འདས་བྱུང་ལ། དེའི་ཕྱོགས་མཐུན་ཚོན་ཆེན་གྱིས་ཁ་བསྒྱུར་བའི་གོས་གྱོན་པ་སོགས་སོ། ། ༦རབ་བྱུང་གི་རྟགས་ཉམས་པ་ནི། བླ་གོས་མཐང་གོས་སོགས་སྒྲུབ་ནུས་བཞིན་དུ་མི་སྒྲུབ་ཅིང་མི་བགོ་བ་དང༌། འུག་སྒྲོ་སོགས་ལས་བྱས་པའི་གོས་གྱོན་པ་སོགས་སྟེ་བླངས་འདས་སོ་དྲུག་གོ །དེ་དག་རྒྱས་པར་དགེ་སློང་གི་མི་མཐུན་ཕྱོགས་བཤད་སྐབས་སུ་གསུངས་པ་ཕལ་ཆེར་དགེ་ཚུལ་ལ་ཕམ་འདྲའི་ཉེས་བྱས་དང་བཤགས་བྱའི་ཉེས་བྱས་དང་བསྡམ་བྱའི་ཉེས་བྱས་ཡིན་པས་སྐབས་དེ་དང་དེར་ཤེས་པར་བྱའོ། །དགེ་སློང་གི་སྡོམ་པའི་མི་མཐུན་ཕྱོགས་དེ་དག་ལས་དགེ་ཚུལ་ལ་ལྟུང་མེད་ཕྱེད་དང་བཅུ་བདུན་ཡོད་དེ། དེའི་སྡོམ་ནི། བྱེ་བྲག་བཤད་མཛོད་ལས། འཆང་༡བ་༢དང་ནི་འབྲལ་བ་༣དང༌། །དེ་བཞིན་ས་ནི་བརྐོ་བ་༤དང༌། །རིན་ཆེན་རེག་༥དང་མེ་ལ་རེག༦ །སྤངས་ནས་ཟ་བར་བྱེད་པ་༧ དང༌། བྱིན་ལེན་མ་བྱས་ཟ་བ་༨དང༌། དེ་བཞིན་གསོག་འཇོག་ཟ་བ་༩དང༌། །ལྗོན་ཤིང་འཛེག་༡༠དང་ཤིང་གཅོད་༡༡དང༌། རྩྭ་སྔོན་མི་གཙང་འདོར་བ་༡༢དང༌། ས་བོན་འཇོམས་༡༡དང་བསླབ་པའི་གཞི །ཞེས་དང༌། ཟླ་འཇོག་༡༣དགོན་པའི་འབྲལ་བ་༡༤དང༌། །གསོག་འཇོག་བྱེད་༡༥དང་དགེ་ཚུལ་ཉལ༡༦། །མི་སྨྲ་འགྲོ་༡༧དང་བཅོ་བརྒྱད་དོ། །ཞེས་གསུངས་ལ། བོད་ན་གྲགས་པའི་སྡོམ་ལྟར་གོས་དང་ལྷུང་བཟེད་ཞག་བཅུ་འཆང་བ་གཉིས་དང༌། ཤིང་གཅོད་ པ་དང་ས་བོན་འཇོམས་པ་དགེ་སློབ་མ་ལ་རིམ་བཞིན་བཤགས་བྱ་དང་ལྟུང་མེད་ཡིན་པས་གཉིས་སུ་བྱས་ནས་བཅོ་བརྒྱད་དང༌། དགེ་སློང་ལ་དེ་གཉིས་བསླབ་གཞི་གཅིག་གིས་བསྡུས་ཤིང༌། ནུབ་ལྷག་དགེ་ཚུལ་དང་ལྷན་ཅིག་ཉལ་བ་ལྟུང་མེད་དང༌། ཁྱིམ་པ་དང་ལྷན་ཅིག་ཉལ་བ་ཕྱོགས་མཐུན་ཡིན་པས་ཕྱེད་དང་བཅུ་བདུན་ཡིན་ནོ། །སྲོག་གཅོད་བཞི། ཕམ་འདྲ་གཉིས། རྫུན་སྨྲ་བཅུ་གསུམ། ཆང༌། ཕྱི་དྲོའི་ཁ་ཟས། ཁ་མ་བསྒྱུར་བའི་གོས་གྱོན་པ་སྟེ་ཉེར་གཉིས་བླངས་འདས་དང༌། དེའི་ལྷག་མ་ཕའི་སྡོམ་བསྡུས་ཉིས་བརྒྱ་ཕྱེད་དང་བཅོ་ལྔ་ལ་ཕྱོགས་མཐུན་བསྡམ་བྱའི་ཉེས་བྱས་འབྱུང་བར་གསུངས་སོ། །དགེ་ཚུལ་མའི་སྡོམ་པའི་མི་མཐུན་ཕྱོགས་ཕར་ཆེར་དེ་དང་འདྲ་བ་ཡིན་ཏེ། བླང་དོར་རབ་གསལ་འགྲེལ་བ་ལས། འདིས་དགེ་ཚུལ་མའི་སྡོམ་པ་ལ་ཡང་ཤེས་པར་བྱ་སྟེ་བུད་མེད་ལ་བརྟེན་པ་མ་གཏོགས་པའི་ཁྱད་པར་གཞན་རྣམས་མཚུངས་པའི་ཕྱིར། ཞེས་གསུངས་སོ། །