བཞི་པ་མཐར་ཐུག་གི་ཡན་ལག

བཞི་པ་མཐར་ཐུག་གི་ཡན་ལག་ནི།

རྐུ་བའི་སྦྱོར་བ་དེའི་རྐྱེན་གྱིས་ཐོབ་བློ་སྐྱེས་པ་སྟེ།ཐུབ་པ་དགོངས་རྒྱན་ལས། བརྐུས་ནས་ཐོབ་བོ་སྙམ་སྟེ་རྣམ་པར་དབུགས་ཕྱུང་ནས་གནས་ནའོ། །ཞེས་སོ། །སེལ་བ་ནི་མཐར་ཐུག་གི་མདུན་རོལ་ཏུ་ན་སྨད་དེ། སྡེ་ཚན་དེ་ལ་གལ་ཏེ་དངོས་གཞི་ཡིན་ན་སྦོམ་པོའོ། །ཞེས་སོ། ། གཉིས་པ་ཡན་ལག་འགའ་ཞིག་བྱེ་བྲག་ཏུ་བསྟན་པ་ལ། རྐུ་བ་མུ་དགུ་སོགས་བཤད་པ་དང༌། རིན་ཐང་གི་ཚད་དང༌། རྫས་དེ་གང་ལ་དབང་བ་དང༌། སེལ་བ་དང༌། མ་བྱིན་ལེན་གྱི་མཐར་ཐུག་གཏན་ལ་དབབ་པ་དང༌། ཤོ་གམ་བཤད་པ་དང༌། བརྐུ་བྱའི་རྫས་བདག་ཏུ་བཟུང་བ་དགོས་པ་དང་བདུན་ལས། དང་པོ་ནི། རྐུ་བའམ་བརྐུར་བཅུག་པ་དག་གིས་སོ་ཞེས་པ་ནི་རྣམ་འབྱེད་ལས་རྐུ་བ་མུ་དགུ་གསུངས་ཏེ། བདག་ཉིད་ཀྱིས་བརྐུ་བ་དང༌། བདག་ཉིད་ཀྱིས་བརྐུར་འཇུག་པ་དང༌། བདག་ཉིད་ཀྱིས་གནས་ནས་གནས་སུ་སྦེད་པ་དང་གསུམ་ནི། རྐུ་བའི་སྦྱོར་བ་རང་གིས་བྱེད་པ་དང༌། གཞན་བསྐོས་ནས་སྦྱོར་བ་མངོན་སུམ་དུ་བྱེད་དུ་འཇུག་པ་དང༌། རང་གི་རྫས་སྣང་བའི་གནས་ནས་མི་སྣང་བའི་གནས་སུ་སྤགས་པའོ། །བྱིན་གྱིས་བརླབས་ནས་བརྐུ་བ་དང༌། བྱིན་གྱིས་བརླབས་ནས་བརྐུར་འཇུག་པ་དང༌། བྱིན་གྱིས་བརླབས་ནས་གནས་ནས་གནས་སུ་སྦེད་པ་དང་གསུམ་ནི། བརྙས་པའམ་བཅོལ་བའི་རྫས་དེ་དང་པོར་བྱིན་གྱིས་བརླབས། བར་དུ་བདག་གིར་གཟུང༌། ཐ་མར་བདག་གིར་ཞེན་པར་བྱས་ནས། སྦྱོར་བ་སྙོན་ཅིང་ཁས་མི་ལེན་པ་དེ་བདག་ཉིད་ཀྱིས་བྱེད་པ་དང༌། དེ་ལྟ་བུའི་སྦྱོར་བ་དེ་གཞན་ལ་བཅོལ་ནས་བྱེད་དུ་འཇུག་པ་དང༌། རེ་ཐག་མ་ཆད་པའི་གནས་ནས་ཆད་པའི་གནས་སུ་སྤགས་པའོ། །བང་ཆེན་གྱིས་བརྐུ་བ་དང༌། བང་ཆེན་གྱིས་བརྐུར་འཇུག་པ་དང༌། བང་ཆེན་གྱིས་གནས་ནས་གནས་སུ་སྦེད་པ་དང་གསུམ་ནི། ཐག་རིང་པོར་ཕོ་ཉ་བཏང་ནས་རྐུ་བ་དང༌། ཕོ་ཉ་དེས་ཀྱང་ཕོ་ཉ་གཞན་བཏང་ནས་བརྐུར་འཇུག་པ་དང༌། བང་ཆེན་གྱིས་བརྐུ་བྱའི་རྫས་དེ་གནས་གང་ན་ཡོད་པ་དེ་ནས་གནས་གཞན་དུ་སྤགས་པའོ། །དགུ་པོ་དེ་སྔ་མ་དྲུག་གིས་སྦྱོར་བ་བསྟན་ལ། གནས་ནས་སྤགས་པ་གསུམ་གྱིས་མཐར་ཐུག་བསྟན་པའོ་ཞེས་ཉེར་སྦས་ཀྱིས་བཤད་དོ། ། ཟླ་བ་ནོར་བུས་ནི་སྔ་མ་དྲུག་གིས་སྦྱོར་བ་དང་མཐར་ཐུག་གཉིས་ཀ་བསྟན་ལ། གནས་ནས་སྤགས་པ་གསུམ་གྱིས་མཐར་ཐུག་བསྟན་ཏེ། རྣམ་གྲངས་ཀྱི་ཚིག་ཡིན་ཞེས་བྱའོ། །ཉེར་སྦས་ཀྱི་ཞལ་ནས་བཅོམ་ལྡན་འདས་ཀྱི་གསུང་ཟློས་བུ་ཅན་དུ་འགྱུར་ལ། དེ་ལྟར་ན་མདོ་ལས། སངས་རྒྱས་བཅོམ་ལྡན་འདས་རྣམས་ནི། ཟློས་བུ་མི་མངའ་བར་སྟོན་པ་ཡིན་ནོ་ཞེས་གསུངས་པ་དང་འགལ་ཞེའོ། །དེ་ལ་ཕྱིར་མི་འོང་གློས་མི་འབེབས་ན་རེ་གདུལ་བྱའི་དབང་གིས་ཟློས་ཀྱང་སྐྱོན་དུ་མི་འགྱུར།ཞེས་གསུངས་ཀྱང༌། ཉེར་སྦས་ཀྱི་བཤད་ལུགས་སངས་རྒྱས་ཀྱི་གསུང་ལ་ཟློས་བུ་མེད་པ་དེ་ལེགས་པ་ཡིན་ནོ། །དེ་རྣམས་ཀྱང་བདག་ཉིད་ཀྱིས་རྐུ་བ་དང༌། བྱིན་གྱིས་བརླབས་ནས་རྐུ་བ་གཉིས་ནི་རྐུའམ་ཞེས་པས་བསྡུས་སོ། །བདག་ཉིད་ཀྱིས་བརྐུར་འཇུག་པ་དང༌། བྱིན་གྱིས་བརླབས་ནས་བརྐུར་འཇུག་པ་གཉིས་ནི། བརྐུར་བཅུག་པ་ཞེས་པས་བསྡུས་ལ། བང་ཆེན་གྱིས་རྐུ་བ་དང༌། བརྐུར་འཇུག་པ་གཉིས་ནི། མངགས་པས་ཡང་ངོ་ཞེས་པས་བསྡུས་སོ། །གནས་ནས་གནས་སུ་སྦེད་པ་གསུམ་ནི། མཐར་ཐུག་པའི་སྐབས་ཀྱི་གཞུང་གིས་ཅི་རིགས་པར་བསྡུས་པའོ། །མ་བྱིན་པའོ་ཞེས་པ་ནི། ལུང་རྣམ་འབྱེད་ལས། སྐྱེས་པའམ་བུད་མེད་དམ་མ་ནིང་གིས་མ་བྱིན་པ། ཞེས་གསུངས་སོ། །ཞེས་རྐུ་བ་མུ་དགུ་འདི་ནི་མཚོ་ཊཱིཀ་གི་གསུངས་ཟིན་ལྟར་བྲིས་པའོ། །སྦྱོར་བ་ལ་རྐུ་སེམས་དེ་མེད་ཀྱང་དངོས་གཞིའི་དུས་ན་རྐུ་སེམས་དེ་ཡོད་ན་དངོས་གཞི་དེ་མ་བྱས་པ་ཉིད་མ་ཡིན་ཏེ། ཊཱི་ཀ་ལས། དངོས་གཞིའི་ལྟུང་བ་རྫོགས་པར་འགྱུར་རོ། །ཞེས་སོ། །འདིར་འགྲེལ་ཆུང་ལས། རྐུ་སེམས་མེད་པར་ནོར་ཞིག་བླངས་ནས་འཕྲལ་ལ་རྐུ་སེམས་བྱུང་སྟེ་བརྐུས་ན་ཉེས་བྱས་དང་སྦོམ་པོ་ནི་མེད་ཕམ་པར་ནི་འགྱུར་ཞེས་བཤད་དེ། ཁད་རིང་བའི་སྦྱོར་བ་ལ་རྐུ་སེམས་མེད་ཀྱང་ཁད་ཉེ་བའི་སྦྱོར་བ་སྟེ་མཐར་ཐུག་སྐད་ཅིག་སྔ་ལོགས་ལ་སོགས་པ་ན་རྐུ་སེམས་ཡོད་པས་སྦྱོར་ལྟུང་མེད་པའི་ཕམ་རྐྱང་དེ་མི་རིགས་པར་སེམས་སོ། །ནན་ཁུགས་ནི་དབང་གིས་མནན་ཅིང་ལེན་པ་སྟེ། ཊཱི་ཀ་ལས། ནན་ཁུགས་ནི་མཐུས་རྐུ་བའོ། །དངན་ཐེན་ནི་རྫས་ཁྱེར་བ་མི་སྟེར་བའོ། །ཞེས་སོ། །དངན་ཐེན་ཞེས་པ་འགྲེལ་ཆུང་ལས་གླར་བླངས་ཏེ་ལས་བྱེད་པ་ལས་གླ་མ་བྱིན་ན་ཕམ་པའོ། །ཞེས་སོ། །འདིར་གཞུང་ནི་ཞུ་བ་ལས། བཙུན་པ་རྐུ་བ་རྣམ་པ་དུ་མཆིས། ཉེ་བར་འཁོར་དྲུག་སྟེ། ནན་ཁུགས་ཀྱིས་རྐུ་བ་དང༌། སྒྱུ་ཐབས་ཀྱིས་རྐུ་བ་དང༌། གཏམས་པ་རྐུ་བ་དང༌། ཕྱིར་བསབ་པ་རྐུ་བ་དང༌། དངན་ཐེན་གྱིས་རྐུ་བ་དང༌།ཆོས་རྐུ་བའོ། །དེ་དག་ལས་དུ་ཞིག་གིས་མཐར་འགྱུར། ཆོས་རྐུ་བ་མ་གཏོགས་པ་གཞན་ཐམས་ཅད་ཀྱིས་མཐར་འགྱུར་རོ། །ཞེས་གསུངས་སོ། །ཊཱི་ཀ་ལས། ཆོས་རྐུ་བ་ནི་མདོ་སྡེ་ལ་སོགས་པའི་ཆོས་བློ་ལ་འཛིན་པ་སྟེ། དེ་ལ་ནི་རྐུ་སེམས་ཀྱིས་ཀུན་ཏུ་སྤྱོད་པ་མེད་དོ། །ཞེས་སོ། །ནན་ཁུགས་དང་དངན་ཐེན་གཉིས་འདིར་སྨོས་པ་ནི་འཇིག་རྟེན་ན་རྐུ་བ་ཞེས་མ་གྲགས་པས་བརྐུས་པ་མ་ཡིན་ནམ་སྙམ་དུ་དོགས་པ་བཅད་པའོ། །ཡང་གཅིག་གིས་གཅིག་ལ་རྐུ་བ་དང༌། གཅིག་གིས་དུ་མ་ལ་རྐུ་བ་དང༌། དུ་མས་གཅིག་ལ་རྐུ་བ་དང༌། དུ་མས་དུ་མ་ལ་རྐུ་བ་དང༌། མུ་བཞི་ཡོད་དེ། མུ་དང་པོ་ནི་སྔར་བསྟན་པ་ཕལ་ཆེ་བ་རྣམས་དེའི་དབང་དུ་བྱས་སོ། །མུ་གཉིས་པ་ནི་དབྲལ་བར་བྱ་བ་ཞེས་ཏེ། བགོད་རྫས་ཀྱི་འབྲུའི་ཕུང་པོ་རྐུ་བ་ལྟ་བུ་ལ་དབྲལ་བར་བྱ་བ་རྫས་ཀྱི་བདག་པོ་དུ་མ་ཡིན་ན། རྫས་ཀྱི་བདག་པོ་དུ་མ་དེའི་རིན་ཐང་གི་ཆ་སོ་སོ་ཉིད་དུ་བརྩིའོ། །རིན་ཐང་སྤྱིར་བསྡོམས་ཏེ་མི་བརྩིའོ། །མུ་གསུམ་པ་ནི་རྐུན་པོ་རྣམས་ཀྱང་དུ་མ་ཉིད་ཡིན་ན་དེའི་ཆ་སོ་སོའོ་ཞེས་སྔ་མར་སྦྱར་ཏེ། རིན་ཐང་སྤྱིར་བསྡོམས་ཏེ་མི་བརྩིའོ། །རིན་ཐང་གི་ཆ་སོ་སོར་བརྩི་བ་འདི་ནི་བགོད་རྫས་ལའོ། །འཇོག་རྫས་ལ་ནི་རིན་ཐང་ཚང་བ་གཅིག་གིས་ཆོག་སྟེ། འོད་ལྡན་རྩ་བ་ལས། དགེ་འདུན་ཆེད་བྱས་སྐལ་བ་མི་བརྟག་སྟེ། ཞིང་བགོ་མིན་ཕྱིར། ཞེས་གསུངས་སོ། །མུ་བཞི་པ་ནི། ཊཱི་ཀ་དང་འོད་ལྡན་ལས་དོན་འདི་ལྟར་བཤད་དེ། བདག་པོ་བཅུ་དབང་བའི་བགོད་རྫས་འབྲུའི་ཕུང་པོ་གཅིག་ལ། དགེ་སློང་བཅུས་བགོད་རྫས་སུ་བརྐུས་ན་དགེ་སློང་རེ་རེས་བདག་པོ་རེ་རེ་ལ་ལྟོས་པའི་རིན་ཐང་ཚང་བ་རེ་ཐོབ་ན་ཕམ་པར་འགྱུར་གྱི་སྤྱིར་བསྡོམས་ཏེ་རིན་ཐང་ཚང་བས་ནི་ཕམ་པར་མི་འགྱུར་རོ། །དཔེར་ན་རིན་ཐང་གི་ཚད་ནས་ཁལ་གཅིག་ཡིན་པ་དབང་བཙན་དུ་བྱས་ན། བདག་པོ་བཅུས་བགོད་རྫས་སུ་བྱེད་པའི་ནས་ཀྱི་ཕུང་པོ་གཅིག་ལ་དགེ་སློང་བཅུས་བགོད་རྫས་སུ་བརྐུས་ན་ནས་ཁལ་བརྒྱ་ཐོབ་ན། ཕམ་པ་བརྒྱ་འབྱུང་སྟེ། དགེ་སློང་བཅུ་པོ་རེ་རེས་རིན་ཐང་ཚང་བ་རེ་རེ་ཐོབ་སྟེ། རིན་ཐང་ཚང་ན་དེ་ལ་ཕམ་པ་བཅུ་བཅུ་འབྱུང་ལ་ནས་ཁལ་བརྒྱར་གཅིག་གིས་མ་ཆོག་པར་ཐོབ་ན་སྦོམ་པོ་བརྒྱ་འབྱུང་བ་ལྟ་བུའོ། །རྩ་བར། ཡོངས་སུ་འཛིན་པ་དང་བཅས་པའི་དུར་ཁྲོད་ནས་ལེན་པའོ། །ཞེས་པ་འདི་ལ། འགྲེལ་བ་མཁན་གྱི་བཤད་ལུགས་གཉིས་ལས། འོད་ལྡན་ལྟར་ན། དོན་ལ་བདག་པོ་ཡོད་ཅིང་བསམ་པས་ཡོངས་སུ་འཛིན་པ་དང་བཅས་པའི་དུར་ཁྲོད་ནས་རོ་གོས་ལ་སོགས་པ་དགེ་སློང་གིས་རྐུ་སེམས་ཀྱིས་ལེན་ན་སྦོམ་པོ་བསྐྱེད་པའོ། །འདི་ལ་མ་བྱིན་ལེན་གྱི་ཕམ་པ་མི་བསྐྱེད་དེ། དངོས་པོ་མི་དམན་པའི་ཡན་ལག་མ་ཚང་བའི་ཕྱིར་རོ། །དེ་ཡང་འོད་ལྡན་ལས། འཇིག་རྟེན་ན་དུར་ཁྲོད་པའི་རྫས་ཐ་ཆད་ཡིན་པས་མངོན་པར་ཞེན་པ་ཤིན་ཏུ་ཞན་པའི་ཕྱིར་དམན་པ་སྦོམ་པོར་འགྱུར། ཞེས་དང༌། དེ་དང་འདྲ་བར་སྡོམ་གསུམ་དཔག་བསམ་སྙེ་མ་ལས། དངོས་པོ་ཁ་ཟས་དང་དུར་ཁྲོད་རྫས་སོགས་དམན་པ་མ་ཡིན་པ། ཞེས་དང༌། འདུལ་བ་བདུད་རྩིའི་ཉིང་ཁུ་ལས།དུར་ཁྲོད་ཀྱི་རྫས་ལྟ་བུ་དམན་པ་མིན་པའོ། །ཞེས་གསུངས་སོ། །སློབ་དཔོན་ཡོན་ཏན་འོད་དང་དྷརྨ་མི་ཏྲ་ནི་དེ་ལྟར་མི་བཞེད་དེ་རང་གི་རྣམ་བཤད་ལས། དུར་ཁྲོད་ནས་ལེན་པའོ་ཞེས་བྱ་བ་ནི་འདིར་ལེན་པའི་བདག་ཉིད་ཅན་ཡོངས་སུ་འཛིན་པ་དང་བཅས་པ་ཉིད་ལ་ཕམ་པར་བཅས་པ་ཉིད་དོ། །ཞེས་གསུངས་ཤིང༌། ཊཱི་ཀ་ལས། དུར་ཁྲོད་འདི་ཐམས་ཅད་བདག་གིའོ་ཞེས་བདག་པོས་བདག་གིར་བྱས་པ་གང་ཡིན་པ་དེ་བརྐུས་ན་ནི་ཕམ་པར་འགྱུར་རོ། །ཞེས་སོ། །དེ་དང་མཐུན་པར་འགྲེལ་ཆུང་ལས་ཀྱང༌། དུར་ཁྲོད་ཀྱི་རོའི་རྫས་ལ་རྣམ་པ་བཞི་སྟེ། རྒྱལ་པོས་འཚོ་བ་རོའི་རྫས་ལ་གཏད་པ་དང༌། ལས་བྱེད་པའི་ཕྱིར་རོའི་རྫས་ལ་གཏད་པ་དང༌། དཔྱ་དབུལ་བའི་ཕྱིར་རོའི་རྫས་ལ་གཏད་པ་དང་གསུམ་ལ་བརྐུས་ན་ནི་ཕམ་པའོ། །གསོད་པའི་གཤེད་མར་བཏང་སྟེ་རོའི་རྫས་ལ་བྱིན་པ་ལས་བརྐུས་ན་སྦོམ་པོའོ། །ཞེས་བཤད་དེ་ཐ་མ་ནི་ངའི་འོ་ཞེས་བསམ་པས་ཡོངས་སུ་བཟུང་ཡང་དོན་ལ་མི་དབང་བས་བདག་པོ་མེད་པའི་དབང་དུ་བྱས་ལ་དང་པོ་གསུམ་ནི་དོན་ལ་དབང་བའི་དབང་དུ་བྱས་ཏེ་བརྐུས་ན་ཕམ་པའོ། །འོན་ཀྱང་མདོ་རྩ་བ་ལས་སྦོམ་པོར་བསྟན་པ་འདི་གང་གི་སེལ་བ་ཡིན་ཞེ་ན། བདག་པོའི་སེལ་བ་སྟེ། ཊཱི་ཀ་ལས། དུར་ཁྲོད་ཀྱི་རྫས་དེ་དག་ལ་བདག་པོ་ཉིད་མེད་མོད་ཀྱི། འོན་ཀྱང་བཀྲེན་པ་ལ་སོགས་པས་འདི་བདག་གིས་འཐོབ་སྙམ་དུ་དེ་ལ་བདག་གིར་བྱ་བའི་བློ་སྐྱེ་བ་དེ་གལ་ཏེ་དགེ་སློང་གིས་རྐུ་སེམས་ཀྱིས་ལེན་ན་སྦོམ་པོར་འགྱུར་བའོ། །ཞེས་གསུངས་སོ། །དེ་ལྟར་ན་དོན་ལ་བདག་པོ་མེད་ཅིང་བསམས་པས་ཡོངས་སུ་འཛིན་པ་དང་བཅས་པའི་དུར་ཁྲོད་ནས་རོ་གོས་ལ་སོགས་པ་དགེ་སློང་གིས་རྐུ་སེམས་ཀྱིས་དེ་བླངས་ན་སྦོམ་པོ་བསྐྱེད་པའོ། །འདི་ལ་མ་བྱིན་ལེན་གྱི་ཕམ་པ་མི་བསྐྱེད་དེ། དོན་ལ་བདག་པོ་མེད་པས་བདག་པོའི་ཡན་ལག་མ་ཚང་བའི་ཕྱིར་རོ། ། དེ་ལྟར་བཤད་ལུགས་གཉིས་ལས་བླ་མ་རྣམས་ནི་འོད་ལྡན་གྱི་རྗེས་སུ་འབྲང་ཡང༌། ཁོ་བོ་ནི་མདོ་རྩ་བའི་རང་འགྲེལ་དང་ཊཱི་ཀའི་རྗེས་སུ་འབྲང་སྟེ། དུར་ཁྲོད་ནས་བྱུང་བའི་རྫས་ཡིན་པར་ཤེས་བཞིན་དུ་གསེར་མང་དུ་འཇལ་བ་མཐོང་བས་ན། འདི་བརྐུས་ན་དངོས་པོ་དམན་པའི་ཆ་ནས་ཕམ་པ་མི་བསྐྱེད་པར་འཆད་པ་དེ་མི་རིགས་སོ་སྙམ་མོ། །ཞེས་མཚོ་ཊཱིཀ་ལས་གསུངས་སོ། །དེ་ལྟར་འདུལ་བའི་ལག་ལེན་དོག་མཐའ་ནས་གཟུང་ན་ལེགས་སོ། །ནད་པ་ལ་སོགས་པ་དག་གིས། གཞན་དགེ་འདུན་གྱི་དོན་དུ་བྱིན་པའི་རྫས་དེ་ནད་གཡོག་ལ་སོགས་པས་བགོད་པ་ཡང་སྦོམ་པོའོ། །འདི་ལ་ཕམ་པ་མི་བསྐྱེད་པ་ནི། ཊཱི་ཀ་ལས། དགེ་འདུན་གྱིས་མ་ཚོར་བས་དེ་ལ་བདག་གིར་བྱ་བའི་སེམས་མི་སྐྱེ་བའི་ཕྱིར། ཞེས་སོ། །ཟན་དྲོན་དང་འབྲས་ཆན་དང་ཕྱེ་དང་ཞེས་པ་ནི་ཟན་དྲོན་དང་ཕྱེ་ལ་སོགས་པ་མི་དབང་བའི་བསོད་སྙོམས་ལེན་ན་སྦོམ་པོའོ། །འདི་གང་གི་སེལ་བ་ཡིན་ཞེ་ན། འོད་ལྡན་ལས། ཅིའི་ཕྱིར་མཐར་མི་འགྱུར་ཞེ་ན། ཁ་ཟས་ལ་མངོན་པར་ཞེན་པའི་བསམ་པ་ཞན་པའི་ཕྱིར་ཉེས་པ་སྦོམ་པོ་ཁོ་ནར་མངོན་གྱི། རིན་ཐང་མ་ཚང་བའི་ཕྱིར་ནི་མ་ཡིན་ཏེ། རིན་ཐང་བརྩི་བར་བྱའོ་ཞེས་མ་གསུངས་པའི་ཕྱིར་རོ། །ཞེས་གསུངས་སོ། །འོ་ན་མུ་གེའི་ཚེ་ན་ཟན་དྲོན་དང་འབྲས་ཆན་དང་ཕྱེ་ཁལ་བརྒྱ་བརྐུས་ཀྱང་ཕམ་པ་མི་བསྐྱེད་པར་ཐལ་བར་འགྱུར་ཏེ་ཧ་ཅང་ཐལ་ཆེས་སོ། །དེས་ན་སྐབས་འདིར་སྦོམ་པོར་གསུངས་པ་ནི་མི་དབང་བའི་བསོད་སྙོམས་ཉུང་ཤས་ལེན་པ་དེ་རིན་ཐང་མ་ཚང་བའི་དབང་དུ་བྱས་ནས་ལུང་ལས་སྦོམ་པོར་གསུངས་སོ་ཞེས་རིགས་སོ། །རྙེད་པ་བགོད་པ་ན་དགེ་སློང་རང་གི་སྐལ་བ་གཞན་གྱིས་བླངས་ཟིན་པ་ལ་བླངས་ཟིན་པར་རྒྱུས་མི་ཤེས་པས་སླར་ཡང་རང་སྐལ་རང་གིས་ལེན་པ་དང་སློབ་མ་གཉིས་ཀྱིས་མཁན་པོའི་སྐལ་བ་སོ་སོར་བླངས་པ་ལྟ་བུ་གཞན་གྱི་སྐལ་བ་གཞན་གྱིས་བླངས་ཟིན་པ་ལ་བླངས་ཟིན་པར་རྒྱུས་མི་ཤེས་པར་སླར་ཡང་གཞན་གྱི་སྐལ་བ་ལེན་པ་ནི། ལེན་པ་དེ་ཉེས་མེད་ཀྱི་གཞི་ཡོད་པ་སྟེ། ཉེས་མེད་ཀྱི་གཞི་མེད་པ་ཉིད་མ་ཡིན་པས་ཉེས་པ་མེད་དོ། །འགྲེལ་ཆུང་ལས། སླར་ཕུལ་ན་ཉེས་པ་མེད་དོ། །ཞེས་སོ། །ཁོ་བོའི་སྐལ་བ་ཁྱེད་ཀྱིས་ལོང་ཞིག་ཅེས་མ་བཅོལ་བས་གཞི་མེད་པ་ཉིད་མ་ཡིན་ནོ་ཞེས་པ་ནི་ཊཱི་ཀ་ལས་ཁོ་བོའི་སྐལ་བ་ཁྱོད་ཀྱིས་ལོང་ཞིག་ཅེས་མ་བཅོལ་བར་གཞན་ཞིག་གིས་གཞན་གྱི་སྐལ་བ་མི་དབང་བ་བླངས་ན། བདག་པོར་གྱུར་པ་དེ་ལ་མི་དབང་བ་བླངས་པའི་ཉེས་པ་མེད་དེ། རང་གིས་མ་བླངས་པའི་ཕྱིར་དང༌། གཞན་ལ་ཡང་མ་བཅོལ་བའི་ཕྱིར་རོ། །ཞེས་གསུངས་སོ། ། གཉིས་པ་རིན་ཐང་གི་ཚད་ནི། རྩ་བར། མ་ཤ་ཀ་ལྔ་ལ་སོགས་པའོ་ཞེས་པ་སྟེ། ལུང་རྣམ་འབྱེད་ལས། མ་ཤ་ཀ་ལྔ་བརྐུས་ན་ཕམ་པར་འགྱུར། ཞེས་གསུངས་ཏེ། མགྲོན་བུ་བཞི་བརྒྱ་ཙམ་ཞིག་བརྐུས་ན་ཕམ་པ་བསྐྱེད་པའོ། །ཊཱི་ཀ་ལས། དེང་སང་ནི་པ་ཎ་བཞི་བརྐུས་ན་ཕམ་པར་འགྱུར་ཏེ། ཀར་ཤ་པ་ཎ་གཅིག་ནི་པ་ཎ་བཅུ་དྲུག་གི་ཚད་ཡིན་པའི་ཕྱིར་རོ་ཞེས་གསུངས་ཏེ། མགྲོན་བུ་སུམ་བརྒྱ་དང་ཉི་ཤུ་ཙམ་ཞིག་བརྐུས་ན་ཕམ་པ་བསྐྱེད་པའོ། །དེ་གཉིས་ཀ་ཡང་ཀཱ་རི་ཀ་ལས། ཀར་ཤ་པ་ཎའི་བཞི་ཆ་གཅིག །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་པ་དེ་དང་མཐུན་པ་ཡིན་ནོ། །ཀ་རི་ཀའི་འགྲེལ་བ་སློབ་དཔོན་ཀ་མ་ལ་ཤཱི་ལས་མཛད་པ་ལས། རྒྱ་གར་གྱི་རིན་ཐང་སྦྱོར་ན་དངུལ་ཞོ་གཅིག་ཙམ་བརྐུས་ན་ཕམ་པར་འགྱུར་རོ། །ཞེས་གསུངས་སོ། །འགྲེལ་པ་དེ་ཉིད་དུ་གཞན་འདོད་བཀོད་པ་ལས། ཁ་ཅིག་གིས་ནི་དངུལ་ཞོ་བརྒྱད་ཆ་གཅིག་ལ་བྱ་སྟེ།དེ་ཙམ་གྱིས་རིན་ཐང་བརྩིའོ་ཞེས་བཤད་དོ། །དེ་དང་མཐུན་པར་འགྲེལ་ཆུང་ལས། སངས་རྒྱས་བཞུགས་པའི་ཚེ་ནའང་དངུལ་སྐྱ་ཞོ་གཅིག་གི་བརྒྱད་ཆ་གཅིག་གིས་ཕམ་ཞེས་བཤད་དེ། ཀར་ཤ་པ་ཎ་ནི་དངུལ་ཞོ་ཕྱེད་ལས་བྱས་པའི་དོང་ཙེའི་རྣམ་པ་འདྲ་བ་སྟེ། དེའི་ཆ་བཞིར་བརྩིས་པས་དངུལ་སྐྱ་ཞོ་གཅིག་གི་བརྒྱད་ཆའོ། །ཏཱ་ར་ནཱ་ཐའི་བཤེས་ཕྲིན་རྣམ་བཤད་༢༢༤ལས། རིན་ཐང་ཚང་པའི་དངོས་པོ་མ་ཤ་ཀ་ལྔ་འམ་ཀར་ཤ་པ་ཎི་བཞི་ཆ་སྟེ། ཞེས་སོ། །འོད་ལྡན་ལས། དགེ་སློང་ལ་ནི་ཁལ་བཞི་ལྷག་པར་གྱུར་ན་དེ་དག་གི་རིན་ཐང་གི་ལྟུང་བ་ཡིན་ནོ། །ཞེས་གསུངས་ཏེ། མཚོན་པ་ཙམ་ཡིན་ནོ། །སུམ་བརྒྱ་པའི་འགྲེལ་པ་སློབ་མ་ལ་ཕན་པ་ལས། ཁལ་ཕྱེད་བརྐུས་ན་ཕམ་པར་འགྱུར། ཞེས་སོ། །དེ་ཡང་མཚོན་པ་ཙམ་སྟེ་ངེས་གཟུང་མ་ཡིན་ནོ། །ཞེས་མཚོ་ཊཱིཀ་ལས་སོ། །དེ་ལྟར་གཞུང་རྣམས་ལས་བཤད་ཚུལ་མང་ན། རིན་ཐང་ཇི་ལྟར་བརྩི་ཞེ་ན། མཚོ་ཊཱིཀ་ལྟར་ན་གཞུང་དེ་རྣམས་ཐམས་ཅད་ཀྱང་གསོད་པའི་ཆད་པའི་རིན་ཐང་གི་ཚད་དང་མཉམ་པ་མཚོན་པར་དགོངས་ཏེ། དེ་ལྟར་ན་ཡུལ་དུས་དེ་ན་རྒྱལ་ཁྲིམས་ཡོད་ན་ཚད་ ཇི་ཙམ་ཞིག་བརྐུས་ན་གསོད་པའི་ཉེས་པ་ཡོད་པ ་དེ་ཙམ་གྱིས་ཕམ་པར་འགྱུར་བའོ། །འདི་ལ་ལུང་རིགས་གཉིས་ལས། ལུང་རྣམ་འབྱེད་ལས། མ་ཤ་ཀ་ལྔ་བརྐུས་ན་རྒྱལ་པོ་མ་སྐྱེས་དགྲས་གྱོད་ལ་བཀྲེ་ཞིང་སྲོག་དང་འབྲལ་བར་བྱེད་པ་དེ་བཞིན་དུ་དགེ་སློང་གིས་མ་ཤ་ཀ་ལྔ་བརྐུས་ན་ཕམ་པར་འགྱུར།ཞེས་གསུངས་ཏེ། གསོད་པའི་ཆད་པའི་ཚད་དང་རིན་ཐང་མཉམ་སྟེ་བཅས་པ་མཛད་པ་དེ་ནི་འདིའི་ལུང་ཡིན་ནོ། །རིགས་པས་ཀྱང་སངས་རྒྱས་ཀྱིས་རང་གི་ཉན་ཐོས་རྣམས་ཉེས་པ་ལས་བཟློག་པར་བྱེད་པ་དང༌། རྒྱལ་པོས་རང་གི་མི་སྡེ་རྣམས་ཉེས་པ་ལས་བཟློག་པར་བྱེད་པ་ལ་ཆད་པ་རབ་ཕམ་པའི་ཆད་པ་དང༌། ཆད་པ་རབ་གསོད་པའི་ཆད་པ་སྟེ། རང་རང་གི་ཆད་པ་རབ་ཀྱི་རིན་ཐང་དུ་མཚུངས་པའི་ཕྱིར་རོ། །རྒྱལ་ཁྲིམས་སྔ་ནས་མེད་པ་དང་ཞིག་ནས་མེད་པ་གང་ཡིན་ཡང་རུང་སྟེ། ཡུལ་དུས་དེ་ན་རྒྱལ་ཁྲིམས་མེད་ན་ནི་སངས་རྒྱས་ཀྱི་བསླབ་པ་འཆའ་བའི་ཡུལ་དུས་ཀྱི་རིན་ཐང་གིས་བརྩིས་ཏེ། དེ་ལྟར་ཨ་མི་དེ་བའི་གདམས་ངག་ལས་བྱུང་བ་དང་རིགས་པས་ཀྱང་ལྟུང་བ་ནི་བཅས་པ་ལ་ལྟོས་པའི་ཕྱིར་རོ། །འོ་ན་ཀར་ཤ་པ་ཎའི་བཞི་ཆ་དང་གསོད་པའི་ཆད་པའི་རིན་ཐང་གི་ཚད་གཉིས་གང་གཙོ་སྙམ་ན། སངས་རྒྱས་ཀྱི་བསླབ་པ་འཆའ་བའི་དུས་ན་ནི་གཙོ་མི་གཙོ་མེད་དོ། །ངོ་བོ་གཅིག་ལ་ལྡོག་པ་ཐ་དད་ཡིན་པའི་ཕྱིར་རོ། །འདི་ལྟར་རྫས་ཀྱི་ལྡོག་པ་ནས་ཀར་ཤ་པ་ཎའི་བཞི་ཆ་ཡིན་ལ། ཉེས་དམིགས་ཀྱི་ལྡོག་པ་ནས་བརྐུས་ན་གསོད་པའི་ཆད་པ་འཕོག་པའི་རིན་ཐང་གི་ཚད་ཅེས་བྱ་སྟེ། དེ་གཉིས་ཀྱང་རིན་ཐང་ཚང་བའི་ངོ་བོར་གཅིག་པའོ། །འོ་ན་ཀར་ཤ་པ་ཎ་དེ་ཇི་ལྟ་བུ་ཡིན་ཞེ་ན། ཀར་ཤ་པ་ཎ་མཚན་ཉིད་པ་དང་བཏགས་པ་བ་གཉིས་ལས། དང་པོ་ནི། མཚོ་ཊཱིཀ་ལས། དངུལ་ལས་བྱས་པ་དོང་ཙེའི་རྣམ་པ་འདྲ་བའི་རི་མོའི་ཁྱད་པར་དང་དབྱིབས་སུ་བྱས་པ་སྟེ། ཞུ་འགྲེལ་ལས། ཀར་ཤ་པ་ཎ་ནི་ཟོང་གི་ཁྱད་པར་སྟེ་དངུལ་ལས་བྱས་པ་གཟུགས་དོད་པ་བཙོང་དུ་རུང་བ་ཡིན་ནོ། །ཞེས་གསུངས་ལ། ལུང་ཞུ་བ་ཆེ་ཤོས་ལས། ཀར་ཤ་པ་ཎ་ནི་ཇི་ལྟ་བུ་རྒྱན་ཐམས་ཅད་ཀྱིས་བྱས་པའོ། །ཞེས་དང༌། ཞུ་བའི་འགྲེལ་བ་ལས། ཀར་ཤ་པ་ན་ནི་ཟུང་གི་ཁྱད་པར་ཏེ། དངུལ་ལས་བྱས་པ་གཟུགས་དོད་པ་ཚོངས་སུ་རུང་བའོ། །ཞེས་གསུངས་སོ། །དེའང་སྔོན་རྒྱལ་པོ་རྨ་བྱ་བ་ཞེས་བྱ་བའི་ཁྲིམས་ལུགས་ལས་བྱུང་བ་ཡིན་ཏེ། ལུང་ཞུ་བ་ཆུང་ཤོས་ལས། ཀར་ཤ་པ་ཎ་ཇི་ལྟ་བུ་ལགས། རྒྱལ་པོ་རྨ་བྱ་བས་བྱས་པའོ། །ཞེས་དང༌། དེའི་འགྲེལ་པ་ལས། རྒྱལ་པོའི་མིང་རྨ་བྱ་བ་ཞེས་བྱ་བས་བྱས་པ་སྟེ། འདི་ལྟར་རྒྱལ་པོ་དེས་དང་པོར་ཀར་ཤ་པ་ཎ་སྤྱོད་དུ་བཅུག་པ་སྟེ། དཔལ་ལེགས་བལྟམས་ཀྱིས་བྱས་པའི་དོང་ཙེ་ལྟ་བུའོ། །ཞེས་གསུངས་སོ། །ཀར་ཤ་པ་ཎ་དེའང་དངུལ་ཞོ་ཕྱེད་ཙམ་ལ་བཟོ་བྱས་པ་སྟེ། དེ་ཉིད་ཀྱི་ཕྱིར་ན་འགྲེལ་ཆུང་ལས། སངས་རྒྱས་བཞུགས་པའི་ཚེ་ནའང་དངུལ་སྐྱ་ཞོ་གཅིག་གི་བརྒྱད་ཆ་གཅིག་གིས་ཕམ་ཞེས་གསུངས་སོ། །འོན་ཀྱང་མ་ཤ་ཀ་ལ་གསེར་ལས་བྱས་པ་སོགས་རིགས་བཞི་ཡོད་པར་སྣང་སྟེ། ལུང་ཞུ་བ་ལས། གསེར་གྱི་མ་ཤ་ཀའོ། །དངུལ་གྱི་མ་ཤ་ཀ་བླངས་ན་ཅི་འགྱུར། སྤང་བར་འགྱུར་རོ། །ལྕགས་ཀྱི་མ་ཤ་ཀའམ་ཟངས་ཀྱི་བླངས་སམ་ལེན་དུ་བཅུག་ན་ཉེས་བྱས་སུ་འགྱུར་རོ། །ཞེས་གསུངས་པའི་ཕྱིར་རོ། །སྒོ་མང་ཡིག་ཆར་ཀར་ཤ་པ་ཎ་གསེར་ལས་བྱས་པ་དང་དངུལ་ལས་བྱས་པ་གཉིས་ཡོད་པ་དང༌། དངུལ་ཞོའི་བརྒྱད་ཆ་ཞེས་པ་འཇལ་བྱེད་དངུལ་ཐུར་གྱི་དབང་དུ་བྱས་པ་ལས་འདེག་བྱའི་རྫས་ནི་གསེར་ཡིན་པར་གསུངས་མོད་དཔྱད་པར་བྱའོ། །གཉིས་པ་ཀར་ཤ་པ་ན་བཏགས་པ་བ་ནི་དེ་དང་རིན་མཉམ་པའི་མགྲོན་བུ་ལ་སོགས་པའི་དངོས་པོ་རྣམས་ཡིན་ནོ། ། དེ་ཡང་སངས་རྒྱས་ཞལ་བཞུགས་པའི་ཚེ་ན་ནི། རིན་ཐང་གི་ཚད་ཀར་ཤ་པ་ནའི་བཞི་ཆར་ངེས་ལ་མ་ཤ་ཀ་ལྔར་ནི་མ་ངེས་ཏེ། གཏམ་གྱི་གཞི་ལས། མ་ཤ་ཀ་གསུམ་བརྐུས་ན་ཕམ་པར་འགྱུར་བ་མཆིས་སམ། ཡོད་དེ་གང་ན་མ་ཤ་ཀ་བཅུ་གཉིས་ལ་ཀར་ཤ་པ་ན་གཅིག་ཏུ་འགྱུར་བ་ནའོ། །མ་ཤ་ཀ་ལྔ་བས་ལྷག་པ་བརྐུས་ཀྱང་ཕམ་པར་མི་འགྱུར་བ་མཆིས་སམ། ཡོད་དེ་གང་ན་མ་ཤ་ཀ་བཞི་བཅུ་ལ་ཀར་ཤ་པ་ན་གཅིག་ཏུ་འགྱུར་བ་ནའོ། །ཞེས་གསུངས་སོ། །མ་ཤ་ཀ་ནི་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །དེར་འདུ་ཤེས་པས་སོ་ཞེས་པ་ངེས་པའམ་ཡིད་གཉིས་ཡན་ཆད་ཀྱིས་སོ། །བརྐུ་བྱ་རྫས་ཀྱི་རིན་ཐང་ནི་གང་དུ་བརྐུས་པའི་གནས་དང་གང་གི་ཚེ་བརྐུས་པའི་དུས་ཀྱིས་རྣམ་པར་བཞག་གི་གནས་གཞན་གྱི་རིན་ཐང་གནས་གཞན་དུ་མི་བརྩི། དུས་གཞན་གྱི་རིན་ཐང་དུས་གཞན་དུ་མི་བརྩི་སྟེ། གནས་གཞན་དང་དུས་གཞན་གྱི་རིན་ཐང་བརྩི་ན་ངེས་པ་མེད་པར་འགྱུར་བའི་ཕྱིར་རོ། །འོ་ན་སྦྱོར་བ་ནི་གནས་གཞན་དང་དུས་གཞན་དུ་བྱས་ནས་མཐར་ཐུག་གནས་གཞན་དང་དུས་གཞན་དུ་གྲུབ་ན་ལྟུང་བ་ཇི་ལྟར་བཞག་ཅེ་ན། མཐར་ཐུག་གི་གནས་དང་དུས་ཀྱི་རིན་ཐང་གིས་བཞག་སྟེ། བཤིག་སྟེ་རྐུ་ན་འོད་ལྡན་ལས། ཉམས་པར་བྱས་པའི་ངོ་བོ་ཁོ་ན་རིན་ཐང་བརྩི་ཞེས་གསུངས་པའི་གནད་ཀྱིས་ཤེས་སོ། །འོ་ན་མཐར་ཐུག་གི་དུས་ན་རིན་ཐང་ཚང་ཡང་སྦྱོར་བའི་དུས་ན་མི་ཚང་བས་ཕམ་པ་བསྐྱེད་པར་མི་རིགས་སོ་སྙམ་ན། རིང་བའི་སྦྱོར་བའི་དུས་ན་རིན་ཐང་མ་ཚང་ཡང་ཉེ་བའི་སྦྱོར་བ་དང་མཐར་ཐུག་གི་དུས་ན་ཚང་བས་ཕམ་པ་བསྐྱེད་པ་ལ་མི་རིགས་པ་མེད་དོ། །དེ་ལ་ལེན་པ་པོས་རིན་ཐང་ཚང་བ་ཐོབ་པ་ཡོད་ཀྱང་བདག་པོས་རིན་ཐང་ཤོར་བ་མེད་པས་ཕམ་པ་བསྐྱེད་པར་མི་རིགས་སོ་སྙམ་ན། མཐར་ཐུག་དང་ཉེ་བའི་སྦྱོར་བའི་སྔ་རོལ་ཏུ་བདག་པོའི་བསམ་པས་བཏང་ན་ནི་དེའི་ཚེ་བདག་པོ་མེད་པར་འགྱུར་བ་ཡིན་པས་ཕམ་པ་བསྐྱེད་པར་མི་རིགས་ཀྱང༌། བདག་པོའི་བསམ་པས་མ་བཏང་ན་ནི། རྫས་དང་བདག་པོ་ཡུལ་ཐ་དད་ཐག་རིང་པོ་ན་གནས་ཀྱང་བདག་པོ་དེ་ཉིད་ཀྱི་ནོར་རྫས་ཡིན་པས་རིན་ཐང་ཚང་བ་ཐོབ་པ་བཞིན་དུ་རིན་ཐང་ཚང་བ་ཤོར་བ་ཡང་ཡོད་དོ། །འོ་ན་རིན་ཐང་མེད་པའི་སར་ཐོབ་བློ་སྐྱེས་ན་ཇི་ལྟར་བཞག་ན། བདག་པོའི་གནས་དང་རྐུན་མའི་གནས་གང་ཉེ་བའི་རིན་ཐང་གིས་འཇོག་ལ། ཉེ་རིང་མཉམ་ན་རྐུན་མའི་གནས་ཀྱི་རིན་ཐང་གིས་འཇོག་སྟེ། སྒྲ་མི་སྙན་དུ་རྐུ་ན་རྐུན་མའི་གནས་ཀྱི་རིན་ཐང་གིས་འཇོག་པའི་གནད་ཀྱིས་ཤེས་སོ། །དེ་ཡང་སྒྲ་མི་སྙན་དུ་རྐུ་བའི་སྦོམ་པོ་བསྐྱེད་པ་ལ་ཡང་རིན་ཐང་ཚང་བ་ནི་ཡན་ལག་ཏུ་དགོས་ལ། གླིང་དེ་ན་ཀར་ཤ་པ་ན་ལ་སོགས་པའི་རིན་ཐང་གི་རྣམ་པར་བཞག་པ་མེད་པས། རྐུ་བྱེད་འཛམ་བུ་གླིང་པའི་གནས་ཀྱི་རིན་ཐང་བརྩི་བར་དོན་གྱིས་གྲུབ་སྟེ། འདི་ནི་གནས་གཞན་གྱི་རིན་ཐང་གནས་གཞན་དུ་མི་བརྩི་བའི་དམིགས་བསལ་ཡིན་ནོ་ཞེས་གསུངས་སོ། །རོའི་རྫས་ཞེས་པ་རྐུ་སེམས་ཡོད་ན་མི་མ་ཡིན་ལ་བརྐུས་པའི་སྦོམ་པོ་དང་མེད་ན་བསླབ་བྱའི་ཉེས་བྱས་བསྐྱེད་པའོ། །རོ་མ་རྨས་པ་ལས་བླང་བར་མི་བྱ་ཞེས་པ་ལ་ལུང་ལས་སྲིན་བུ་ཕྲེའུ་དང་གྲོག་མས་ཟོས་ཀྱང་དེའི་ཚེ་བླང་བར་བྱའོ། །ཞེས་གསུངས་སོ། །ཀ་ཀ་ནི་ཞེས་པ་མགྲོན་བུ་ཉི་ཤུའམ་དེའི་རིན་ཐང་གི་མིང་ཡིན་ནོ། །མ་ཤ་ཀ་ཞེས་པ་མགྲོན་བུ་བརྒྱད་ཅུའམ་དེའི་རིན་ཐང་གི་མིང་ཡིན་ནོ། ། མཚོ་ཊཱིཀ་དུ། སཾ་སྐྲྀ་ཏའི་སྐད་དུ་ཀ་ཀ་ནི་དང་ཕལ་སྐད་དུ་པཎ་ཊི་ཀ་མིང་གི་རྣམ་གྲངས་ཡིན་ལ། མ་ཤ་ཀ་དང་པ་ཎ་མིང་གི་རྣམ་གྲངས་སོ། །ཞེས་གསུངས་པ་མི་རིགས་ཏེ། གཞི་འགྲེལ་ལས། ཀརྵ་པ་ཎ་ནི་པ་ནའི་བྱེ་བྲག་སྟེ། མངོན་ཚན་ཅན་ཡིན་ན་དངུལ་ལས་བྱས་པ་ཡིན་ནོ། །ཞེས་གསུངས་པའི་ཕྱིར་ཟེར་ན་དཔྱད། ཡུལ་ཁ་ཅིག་ན་ཀར་ཤ་པ་ན་གཅིག་ལ་མ་ཤ་ཀ་ཉི་ཤུ་བྱེད་ལ། ཡུལ་ཁ་ཅིག་ན་བཅུ་གཉིས་བྱེད་ན་རིན་ཐང་ཇི་ལྟར་བརྩི་ཞེ་ན་གང་དུ་རྐུ་བའི་གནས་དང་གང་གི་ཚེ་ན་རྐུ་བའི་དུས་ཀྱིས་ཀར་ཤ་པ་ན་དེའི་རིན་ཐང་བརྩི། །ཞེས་སོ། །སྔར་རྣམ་འབྱེད་དུ་རིན་ཐང་ནི་བརྐུས་པའི་གནས་དང་དུས་ཀྱིས་སོ་ཞེས་པས་བརྐུ་བྱ་རྫས་ཀྱི་རིན་ཐང་བརྩི་བ་བསྟན་ལ། འདི་ནི་ཀར་ཤ་པ་ནའི་རིན་ཐང་བརྩི་བའོ། །རྐུ་བའི་གནས་དང་བརྐུས་པའི་དུས་ཀྱིས་བརྩི་ཞེས་པ་ནི་སྦྱོར་བའི་དུས་སུ་རིན་ཐང་ཚང་དགོས་པ་དང་མཐར་ཐུག་གི་དུས་སུ་རིན་ཐང་ཚང་དགོས་པ་ཕན་ཚུན་མཚོན་པའི་ཕྱིར་རོ། །ཆེ་བ་ཉིད་ཀྱིས་རིན་ཐང་གདབ་པར་མི་ནུས་པ་ཞེས་པ་དེའི་ཊཱི་ཀ་ལས་ཕམ་པར་མི་འགྱུར་རམ་སྙམ་པའི་དོགས་པ་གཅོད་དོ། །རིན་ཐང་གཞལ་དུ་མེད་པ་བརྐུས་ན་ཕམ་པར་འགྱུར་བ་ཡོད་དེ། ཊཱི་ཀ་ལས། རིན་ཐང་གདབ་པར་མི་ནུས་པ་རྐུ་བ། དེ་ལ་སངས་རྒྱས་ཀྱི་སྐུ་གདུང་ནི་གཞལ་དུ་མེད་པའི་རིན་པོ་ཆེ་ཉིད་ཡིན།ཞེས་དང༌། ཞུ་བ་ལས། རིང་བསྲེལ་བརྐུས་ན་ཅིར་འགྱུར་མཐར་འགྱུར། ཞེས་གསུངས་སོ། །སྒྲ་མི་སྙན་གྱི་རྫས་དེ་ནི་རང་གི་རྫས་བརྐུས་པ་དང་འདྲ་སྟེ་རྐུ་སེམས་ཀྱིས་བརྐུས་ན་སྦོམ་པོའོ། །སྦོམ་པོ་འདི་བསྐྱེད་པ་ལ་ཡང་རིན་ཐང་ཚང་ནི་དགོས་ལ། བྱང་གི་སྒྲ་མི་སྙན་ན་རིན་ཐང་དང༌། བྲེ་སྲང༌། ཀར་ཤ་པ་ཎ་དང༌། མ་ཤ་ཀ་ལ་སོགས་པ་ཚད་རྣམ་པར་བཞག་པ་མེད་པས། འདི་ལ་རིན་ཐང་རྐུན་མའི་གནས་ཀྱིས་འཇོག་པར་དོན་གྱིས་གྲུབ་སྟེ། འདི་ནི་གནས་གཞན་གྱི་རིན་ཐང་གནས་གཞན་དུ་མི་བརྩི་བའི་དམིགས་བསལ་ཡིན་པར་གསུངས་སོ། །