རྗེས་དྲན་སྐོར།
རྗེས་དྲན་སྐོར།
རྒྱལ་བ་བློ་བཟང་གྲགས་པ་རྗེས་སུ་དྲན་པ། ཟབ་མོའི་ལྟ་བ་ཟླ་བ་ཇི་བཞིན་གསལ་བར་འགྲོ་ལ་བཤད། །སྒོམ་པ་བྱིང་རྒོད་བྲལ་བའི་ཞི་ལྷག་ཟུང་དུ་འཇུག་པའི་ལམ། །མདོ་སྔགས་སྤྱོད་པ་འགལ་མེད་གྲོགས་སུ་ལག་ལེན་ཇི་བཞིན་མཛད། །ལྟ་སྒོམ་སྤྱོད་གསུམ་རྣམ་དག་མཉམ་མེད་ཙོང་ཁ་བ་ལ་གུས། །བསྟན་པའི་གནད་ཀུན་མཁྱེན་པའི་ཤེས་རབ་ཉིན་བྱེད་དབང༌། །འགྲོ་ལ་བརྩེ་བས་ལུང་རིགས་འབུམ་གྱིས་ཞིབ་པར་འཆད། །སྐལ་ལྡན་ཡིད་ཀྱི་མུན་པ་སེལ་ནུས་གྲུབ་རྟགས་བསྟན། །བདག་ནི་ཁྱེད་ཀྱི་མཛད་ཀུན་སྙིང་ནས་དད་ཅིང་གུས། །དགའ་ལྡན་ལྔ་མཆོད་ཀྱི་དུས་བཟང་ལ་རིས་མེད་པ་ངག་དབང་དངོས་གྲུབ་དཔལ་ནས་རྗེ་བཙུན་རྒྱལ་བ་བློ་བཟང་གྲགས་པའི་ལྟ་སྒོམ་སྤྱོད་གསུམ་དང་མཁྱེན་བརྩེ་ནུས་གསུམ་ཁྱད་པར་དུ་འཕགས་པ་ལ་རྗེས་སུ་དྲན་པའི་གུས་ཕྱག་བཅས་ཏེ་ཕུལ། གངས་ལྗོངས་ལ་ལྷག་པར་བཀའ་དྲིན་ཆེ་བ་སློབ་དཔོན་རིན་པོ་ཆེ་པདྨ་འབྱུང་གནས་མཆོག་རྗེས་སུ་དྲན་པ་ཏམྦུ་རའི་སྒྲ་དབྱངས། རིག་སྟོང་ཆོས་སྐུའི་ངང་ལས་ཉེར་འཕོས་པ། །མཚན་དཔེའི་ཁོ་ལག་རྫོགས་པ་ཟླ་བྲལ་བ། །ལྷ་སྲིན་འདུལ་ལ་ཐོགས་མེད་རྫུ་འཕྲུལ་མངའ། །པདྨ་སཾ་བྷ་བ་ལ་མགོས་ཕྱག་འཚལ། །དེ་ཡང་གངས་རི་ར་བས་མུ་ཁྱུད་ཀྱིས་ཡོངས་སུ་བསྐོར་བའི་བསིལ་ལྗོངས་འཛིན་མའི་ལྟེ་བར་གཞིས་ཆགས་ཤིང་གནས་འཆའ་བའི་ཁ་བ་བོད་པའི་ལྗོངས་ཞེས་ཡོངས་སུ་གྲགས་པའི་གནས་མཆོག་འདིར་གནའ་ནས་ད་བར་དུ་རིག་གནས་ཀྱི་ཉིང་བཅུད་སྦྲུམ་པའི་མཁས་དང་གྲུབ་པ་བརྙེས་པའི་སྐྱེས་བུ་བགྲང་ལས་འདས་པ་ཞིག་བྱོན་པ་ཡིན། ལྷག་ཏུ་སྔ་འགྱུར་བསྟན་པའི་ཀ་ཆེན་འདེགས་མཁན་རྒྱལ་བའི་ལུང་གིས་མངོན་པར་ཟིན་པ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་༧ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་སྲིད་པ་གསུམ་ན་མངོན་པར་འཕགས་པའི་སྐྱེས་བུ་ཆེན་པོ་གང་ནི་ཨོ་རྒྱན་གྱི་ཡུལ་དུ་མེ་ཏོག་ཕྲེང་བ་འཛིན་ཞེས་བྱ་བའི་སྲས་སུ་མཚན་དཔེའི་མེ་ཏོག་གསར་དུ་བཞད། ཆེར་ལོངས་པ་ན་རིག་པའི་གནས་ཕྲ་མོ་ཐམས་ཅད་ལ་ཚེགས་མེད་པར་བློ་གྲོས་བྱང་བར་གྱུར་ཅིང༌། འདུལ་བ་འཛིན་པ་ཞིག་ལས་སྐྱབས་འགྲོ་དང་བསླབ་པའི་གཞི་ལྔ་བླངས་མངོན་པ་དང་མདོ་སྡེའི་གཞུང་ལུགས་མང་དུ་གསན། སློབ་དཔོན་སྔགས་མཁན་ཤནྟི་རཱུ་པ་ཞེས་པ་ལས་བྱ་སྤྱོད་རྣལ་འབྱོར་རྒྱུད་གསུམ་གྱི་དབང་ཞུས་པ་དང༌། སྤྱན་རས་གཟིགས་དང་གཉིས་སུ་མེད་པ་སུ་ཁ་དེ་བ་ཞེས་པའི་གྲུབ་བརྙེས་སོགས་ཀྱི་མདུན་ནས་གསང་སྔགས་ནང་གི་གདམས་པའང་ཐོབ་པར་བྱས་སོ། །དེ་ནས་ཉམས་ལེན་ལ་རྩེ་གཅིག་ཏུ་གཞོལ་བའི་ཚེ་བདུད་ཀྱིས་བར་ཆད་ཀྱི་ཆོ་འཕྲུལ་སྣ་ཚོགས་བྱས་ཀྱང་འོད་དཔག་མེད་པས་མནལ་ལམ་དུ་ལུང་བསྟན་པ་དང་ཁྲོ་བོའི་རྒྱལ་བོ་རྟ་མགྲིན་ཡང་གཟིགས། མཁའ་འགྲོ་མ་དང་འབྱུང་བོ་མང་བོ་བྲན་དུ་འཁོལ་བ་སོགས་བར་ཆད་མཐའ་དག་དབྱིངས་སུ་ཡལ་ཏེ་ཐུན་མོང་གི་དངོས་གྲུབ་སྣ་ཚོགས་བསྒྲུབས་སོ། །དེ་རྗེས་ཡང་མནལ་ལམ་དུ་འོད་དཔག་མེད་པས་འོན་ཀྱང་འདི་ཙམ་གྱིས་ཕྱག་རྒྱ་ཆེན་པོའི་དངོས་གྲུབ་མི་ཐོབ་པས་ཁྱོད་ཀྱི་ལས་འབྲེལ་ཡོད་པའི་སློབ་དཔོན་སངས་རྒྱས་དཔལ་ཡེ་ཤེས་ཡིན་པས་དེས་བསྟན་པ་བཞིན་དུ་སྒོམས་ཤིག་ཞེས་ལུང་བསྟན་བྱུང༌། མ་ག་དྷར་བྱིན་ནས་གྲུབ་བརྙེས་སློབ་དཔོན་སངས་རྒྱས་ཡེ་ཤེས་ཀྱིས་མཁན་པོ་མཛད་ནས་དགེ་འདུན་ཕལ་ཆེན་སྡེ་པའི་སྡེ་ལ་རབ་ཏུ་བྱུང་ཞིང་བསྙེན་པར་རྫོགས་པར་མཛད་དོ། །དེ་ནས་འདུལ་བ་འཛིན་པ་ཞིག་ལ་འདུལ་བ་འབུམ་སྡེ་ལན་གཅིག་གསན་པས་འདུལ་བའི་དོན་རྣམས་ཐུགས་སུ་ཆུད་པར་མཛད། དུས་དེར་སངས་རྒྱས་ཡེ་ཤེས་ཞབས་ལ་ཤེར་ཕྱིན་གསན་པས་ལྟ་བ་ནམ་མཁའ་དང་མཉམ་པར་གྱུར། ཡང་སངས་རྒྱས་ཡེ་ཤེས་ལ་འདུས་པ་དང༌། སྒྱུ་འཕྲུལ་དྲྭ་བ་དང༌། ཟླ་གསང་ཐིག་ལེ་སོགས་རྒྱུད་དང་མན་ངག་མཐའ་དག་གསན་ནོ། །སངས་རྒྱས་ཡེ་ཤེས་ཀྱིས་ཞལ་བཀོད་མཛད་པ་ལྟར་བསྐྱེད་རྫོགས་ཟུང་འཇུག་གི་སྒྲུབ་པ་ཆེན་པོ་ཉམས་སུ་བླངས་པས་ཕྱོགས་བཅུའི་སངས་རྒྱས་མང་བོ་ཞལ་གཟིགས་ཤིང་གསུང་འདྲི་བར་བྱུང༌། མི་རིང་བ་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ། རྡོ་རྗེའི་སྐུ་མངོན་དུ་བྱས་སོ། །དེ་ལྟར་རང་དོན་ཆོས་སྐུའི་རྟོགས་པ་མངོན་དུ་བྱས་ཏེ་གཞན་དོན་འཕྲིན་ལས་མཛད་ཚུལ་ཡང༌། བཅུད་ལེན་སྨན་སོགས་ཀྱིས་གཞན་གྱི་ཚེ་བསྲིང་བ་དང༌། ལོངས་སྤྱོད་རྒྱས་པར་མཛད་པ་དང༌། ཆུ་མེད་པ་རྣམས་སུ་ཆུ་དབྱུང་བ་དང༌། ཆུ་ཆེ་བ་ས་འོག་ཏུ་འཇུག་པ་སོགས་ཐུན་མོང་སྣང་ངོར་ལ་ཡང་གནས་སྐབས་ཀྱི་ཕན་པ་སྣ་ཚོགས་མཛད་དོ། །མཁན་པོ་བོ་དྷི་ས་ཏྭའམ་ཞི་བ་འཚོའི་ཐུགས་བཀོད་ལྟར་སློབ་དཔོན་རིན་པོ་ཆེ་བོད་ཡུལ་དུ་སྤྱན་དྲངས་ནས་བོད་ཡུལ་འདིར་འདྲེ་གདུག་པ་ཅན་གྱི་གང་བ་ལ་མཐུ་སྟོབས་རྫུ་འཕྲུལ་བསམ་མི་ཁྱབ་ཀྱིས་འདྲེ་སྲིན་ཀུན་བཏུལ་ནས་བོད་ཡུལ་ལ་ཐུགས་རྗེས་འོད་སྟོང་གི་ཉི་མ་ཤར་བར་མཛད་དོ། །དེ་ཡང་སློབ་དཔོན་ཆེན་པོ་འདི་ནི་གཙོ་བོར་མི་མ་ཡིན་འདུལ་བའི་ཕྲིན་ལས་བསམ་མི་ཁྱབ་པ་ཅན་ཡིན་པས་ལམ་བར་དུ་ཡར་ལྷ་ཤམ་པོ་དང་ཐང་ལྷ། བསྟན་མ་བཅུ་གཉིས་སོགས་ལྷ་སྲིན་དཔག་ཏུ་མེད་པ་བཏུལ་ཏེ་བོད་ཡུལ་དུ་ཕེབས། རྒྱལ་བོའི་ལྷ་ཁང་གི་ས་འདུལ་མཛད་པ་དང༌། རྒྱལ་བོ་དང་འབངས་སྐལ་ལྡན་མང་བོ་རྣམས་ལ་ཀྲི་ཡ་དང༌། གསང་སྔགས་ནང་གི་དབང་བསྐུར་བར་མཛད། རྗེ་འབངས་སྐལ་ལྡན་མང་བོ་ལ་མན་ངག་ལྟ་བའི་ཕྲེང་བ་གསུངས། རྡོ་རྗེ་རྣམ་འཇོམས་དང༌། ཕུར་བུ་འབུམ་སྡེ་དང༌། གཞན་ཡང་སྒྲུབ་ཐབས་མན་ངག་ཅི་རིགས་པ་བསྟན་པ་སོགས་ཆོས་སྤྱོད་ཀྱི་བྱ་བ་རྒྱ་ཆེར་བྱས་སོ། །དེ་ནས་ལྷོ་ནུབ་སྲིན་པོའི་ཡུལ་དུ་བྱོན་པར་ཐུགས་དགོངས་བཏང་ནས་རྗེས་འཇུག་གི་སློབ་མ་རྣམས་ལ་ལྟ་སྤྱོད་ཀྱི་ཉམས་ལེན་བྱེད་པར་གདམས་ངག་གནངས་ཏེ་སྨོན་ལམ་རྒྱ་ཆེར་བཏབ། གློ་བུར་དུ་ཡར་ལ་གཤེགས་ཏེ་ཡར་ལམ་རུ་ལག་བརྒྱུད་ནས་ཕེབས། ཆིབས་ཁྲིད་པ། ལོ་སྟེ་དགུ་སྣ་གོང་དང༌། ཞང་ཉང་བཟང་ཞེས་བྱ་བ་བློན་པོ་དད་པ་ཅན་གྱིས་མང་ཡུལ་བར་དུ་སྐྱེལ། དེའི་ཚེ་ལྷོ་ནུབ་མཚམས་སུ་སྲིན་པོ་འདུལ་དུ་འགྲོ་གསུངས་ནས་ཆིབས་ཀྱི་ཁ་ནས་ནམ་མཁའ་ལ་འཕུར་ཏེ་སྤྲིན་གསེབ་ནས། ཡར་ཆོས་གོས་སྤུར་རེ་གསེག་ཤིང་ཁྲོལ་ལེ་བཞུད་པར་ཐམས་ཅད་ཀྱིས་མངོན་སུམ་དུ་མཐོང་བ་སོགས་ངོ་མཚར་མཛད་པ་རྒྱ་མཚོ་ཆེན་པོ་ལས་རེ་ཞིག་དད་པའི་ས་བོན་དང་རྗེས་དྲན་ཙམ་གྱི་ཆེད་དུ་ཉུང་བསྡུས་སུ་བརྗོད་པའོ། །དེ་ལྟར་བརྗོད་པ་ནི་ཐམས་ཅད་མཁྱེན་པ་ཏཱ་ར་ན་ཐས་མཛད་པའི་སློབ་དཔོན་པདྨའི་རྣམ་ཐར་ཡིད་ཆེས་གསུམ་ལྡན་ལྟར་རོ། །དེ་ནས་སྤྲུལ་བ་སྣ་ཚོགས་ཀྱི་སྒོ་ནས་བོད་ཁམས་འདིར་རྒྱལ་བསྟན་སྤེལ་བ་དང་འགྲོ་རྣམས་འཁོར་བའི་འདམ་ལས་དྲང་བར་མཛད་པ་ཡིན་ཏེ། བོད་ཡུལ་དུ་ཕེབས་པའི་ཇོ་བོ་རྗེ་དཔལ་ཨ་ཏི་ཤ་དང༌། ཀརྨ་པ་དང༌། ས་སྐྱ་པཎ་ཆེན་དང༌། ཇོ་ནང་ཀུན་མཁྱེན་དོལ་པོ་པ་དང༌། རྗེ་བློ་བཟང་གྲགས་པ་སོགས་ཀྱི་ངུར་སྨྲིག་གར་གྱི་རྣམ་པར་རོལ་བ་ཡིན་པས་སོ། །དེ་ཡང་བཀའ་བསྡུས་ལས། ཇི་སྐད་དུ། དེ་དུས་ང་ཡི་སྤྲུལ་བ་ས་སྐྱ་ཞེས༔ སྟོད་ཀྱི་ཕྱོགས་སུ་ཡབ་མིང་འཇམ་དཔལ་དང༔ ཡུམ་མིང་སྒྲོལ་མ་ཞེས་བྱའི་སྲས་སུ་འཁྲུངས༔ འགྲོ་མགོན་འཕགས་པ་ཀུན་དགའ་རྒྱལ་མཚན་ཞེས༔ ང་ཡི་ལྷ་ཁང་རྣམས་ལ་ཞིག་གསོས་བྱེད༔ གསང་སྔགས་བསྟན་པ་དར་ཞིང་རྒྱས་པར་བྱེད༔ ཅེས་དང༌། ཀུན་མཁྱེན་ཉ་དབོན་ཀུན་དགའ་དཔལ་གྱི་ཞལ་སྔ་ནས། སྤོས་ངད་ལྡན་ན་ཆོས་འཕགས་སེམས་དཔའ་ཆེ། །ལྷ་ལྡན་གྲོང་དུ་སྲོང་བཙན་སྒམ་པོ་སྟེ། །རྔ་ཡབ་གླིང་ན་པདྨ་འབྱུང་གནས་དཔལ། །ཤེས་རབ་རྒྱལ་མཚན་ཞབས་ལ་ཕྱག་འཚལ་ལོ། །ཞེས་དང༌། བཀའ་བསྡུས་ལས། ཐུབ་པའི་ལུང་བསྟན་མདོ་ཁམས་སྒང་ཞིག་ཏུ༔ ཨ་ཏི་ཤཱ་ཡི་སྤྲུལ་བ་བློ་བཟང་གྲགས༔ སྐྱེས་བུ་དེ་བྱོན་བོད་ལ་བདེ་སྐྱིད་འཆར༔ ཞེས་སོགས་གསུངས་སོ། །བོད་འདིར་བཀའ་དྲིན་ཆེས་ཆེར་ཆེ་བ་སློབ་དཔོན་ཆེན་པོ་པདྨ་འབྱུང་གནས་མཆོག་གི་རྗེས་སུ་དྲན་པ་ཏམྦུ་རའི་སྒྲ་དབྱངས་ཞེས་བྱ་བ་འདི་ནི་མཆོག་སྤྲུལ་ཚེ་རིང་རྡོ་རྗེའི་ཐུགས་བཀོད་ལྟར་ཧི་མ་ལའི་རིག་མཛོད་ཀྱིས་སློབ་དཔོན་པད་མ་འབྱུང་གནས་ཀྱི་རྣམ་ཐར་སྟོང་ཐང་འགྲུབ་པ་ལ་ཉེ་བའི་ཆར་སློབ་དཔོན་རིན་པོ་ཆེའི་རྗེས་དྲན་ཞིག་དགོས་ཞེས་བསྐུལ་བ་ལྟར་ངག་དབང་དངོས་གྲུབ་དཔལ་གྱིས་དད་གུས་ཀྱི་སྒོ་ནས་བྲིས་པའོ། །སརྦ་མངྒ་ལཾ། དཔལ་ལྡན་སྐུ་གསུམ་གསང་བའི་རྒྱ་མཚོ་ཆེ། །སྐལ་ལྡན་འཇུག་ངོགས་ཀླུ་དབང་རོལ་བའི་གནས། །མཐའ་ཡས་ཡོན་ཏན་རིན་ཆེན་གཏེར་དུ་གྲུབ། །གང་གི་མཛད་འཕྲིན་འོད་སྣང་ཆེར་འབར་བ། །ཐུགས་རྗེས་རྣམ་སྤྲུལ་བྱེ་བ་ཕྲག་བརྒྱ་ཡི། །ཞིང་ཁམས་རབ་འབྱམས་ཆུ་ཀླུང་ཟླ་བརྙན་ལྟར། །གང་ལ་གང་འདུལ་སྤྲུལ་བའི་འོད་སྟོང་གསལ། །བསྟན་འགྲོའི་དོན་ཆེན་མཛད་ལ་གུས་ཕྱག་བགྱི། །རྨད་བྱུང་བརྩེ་བས་དུས་ལས་ཡོལ་མེད་པར། །སླར་ཡང་བསམ་འགྲུབ་གླིང་དུ་སྐྱེ་བའི་སྤྲུལ། །མཛད་བཟང་འཆད་རྩོད་རྩོམ་ལ་དབང་འབྱོར་བ། །གཞོན་ནུ་ཉི་མ་གསར་བ་འཆར་བར་སྨོན། །ཞེས་མཁན་ཆེན་དམ་པ་དཔལ་ལྡན་རྒྱ་མཚོའི་རྗེས་དྲན་དུ་གང་གི་ཆོས་གྲོགས་དངོས་གྲུབ་དཔལ་ནས་གུས་ཕུལ།