རྫོགས་པ་ཆེན་པོའི་རྣལ་འབྱོར་བ་མུན་སེལ་མཆོག་རྗེས་སུ་དྲན་པ།
རྫོགས་པ་ཆེན་པོའི་རྣལ་འབྱོར་བ་མུན་སེལ་མཆོག་རྗེས་སུ་དྲན་པ།
གང་ཐུགས་མཁྱེན་གཉིས་ཆུ་ཤེལ་ཆ་རྫོགས་པ། །རི་བོང་འཛིན་པས་འོད་དཀར་སྤྲོ་བ་ན། །ཡུན་རིང་གབ་པའི་སྙིང་གི་མུན་པ་ཡང༌། །ལྷག་མེད་སེལ་བའི་བཤེས་གཉེན་མཆོག་དེ་རྒྱལ། །གནས་ངན་ཀུན་ཟད་ཟུང་འཇུག་རོལ་བའི་དཀྱིལ་འཁོར་འཁོར་ལོའི་མགོན་པོ་ཁྱེད། །ཐུགས་རྗེས་རབ་བསྐུལ་སྒྱུ་འཕྲུལ་དྲྭ་བས་གང་འདུལ་ཞིང་ལ་སྣ་ཚོགས་གར། །མཐའ་ཡས་ལེགས་སྟོན་རྒྱལ་བའི་གདུང་འཚོབ་བརྟན་ཞིང་མཁས་པའི་ཚངས་སྤྱོད་ཁྱེད། །ཆུ་བུར་མིག་གི་ཕ་རོལ་གཤེགས་ཀྱང་དད་པའི་སེམས་སུ་ལྷམ་མེར་བཞུགས། །རྒྱ་མཚོའི་འཇིངས་ཀྱིས་མི་བསྒྲུན་པའི། །ཁྱེད་ཐུགས་འོ་མའི་ཆུ་གཏེར་ལ། །བཅའ་སྡོད་རེ་བའི་ལུས་ཅན་དག། མྱ་ངན་ཐང་ནས་མཆི་མ་དཀུ། །དད་གདུང་འདུན་པའི་སྐུལ་བྱེད་ཀྱིས་བསྒུལ་ཏེ། །འགྲོ་བའི་མུན་སེལ་བཤེས་གཉེན་ཞཻས་འབོད་པའི། །གྲེ་བ་འགགས་པའི་འོ་དོད་ང་རོ་དེ། །ཁྱེད་སློབ་གདུང་བའི་གཏམ་དུ་མ་དགོངས་སམ། །གངས་ཅན་ལྗོངས་སུ་སྡིག་སྤྱོད་སྤྲིན་གྱིས་རབ་བསྒྲིབས་ཏེ། །ཡིད་ཅན་སེམས་སུ་སྒྱུ་ཐབས་ཐན་གྱིས་འགེངས་བ་ན། །ཁྱེད་ཞབས་འཁོར་ལོ་སླར་ཡང་ཕེབས་པའི་སྨོན་ལམ་ནི། །མྱ་ངན་ཅན་དང་དཔྱོད་ཤེས་དག་གི་འདུན་པ་ལགས། །མང་དུ་ཐོས་པའི་མཁས་པ་ཚངས་པར་སྤྱོད་པའི་བཙུན་པ་མངོན་པར་རྟོགས་པའི་བཟང་བའི་འབྲས་བུ་ཐམས་ཅད་གཅིག་ཏུ་བསྡུས་པ་༧མཁན་མུན་སེལ་རིན་པོ་ཆེའི་རྗེས་དྲན་དུ་ཡིད་ཆེས་སྐྱོ་གདུང་དང་བཅས་ཏེ་དངོས་གྲུབ་དཔལ་གྱིས་གུས་པས་ཕུལ་བའོ། །