མཁན་ཆེན་རྡོ་རྗེ་འཆང་ངག་དབང་བློ་བཟང་འཕྲིན་ལས་རྗེས་སུ་དྲན་པ།།
མཁན་ཆེན་རྡོ་རྗེ་འཆང་ངག་དབང་བློ་བཟང་འཕྲིན་ལས་རྗེས་སུ་དྲན་པ།
ཡོན་ཏན་ཀུན་གྱི་གཞིར་གྱུར་ཞིང༌། །བྱིན་རླབས་དངོས་གྲུབ་རྩ་བ་སྟེ། །བླ་མ་མཆོག་དེར་གུས་བཏུད་ནས། །གང་ཞིག་རྗེས་སུ་དྲན་པར་བྱ། །བསྟན་པའི་གཞི་མ་སོ་སོར་ཐར་བ་ཡི། །གནང་བཀག་སྒྲུབ་པའི་བཅས་མཚམས་མ་ལུས་ལ། །ཞི་དུལ་བག་ཡོད་ཁྲིམས་ཀྱིས་ལེགས་བསྡམས་པ། །འདུལ་བ་འབུམ་སྡེའི་བདག་པོ་གནས་བརྟན་ཆེ། །མི་རྟག་ཕྲ་རགས་འཁོར་བའི་ཉེས་དམིགས་དང༌། །ལས་འབྲས་བསླུ་མེད་དགེ་སྡིག་བླང་དོར་རྣམས། །རྟག་ཏུ་འདོམས་ཤིང་ཚེ་འདིའི་འདུན་མ་ལ། །ཐུགས་ཡིད་གཏིང་ནས་ཞེན་པའི་འཁྲི་བ་བྲལ། །བཞེངས་བཞུགས་གཟིམ་ཕེབས་སྤྱོད་ལམ་རྣམ་བཞི་ལ། །དྲན་ཤེས་བརྟན་པོ་ལན་གཅིག་ཙམ་མིན་པར། །ཤུགས་འབྱུང་ཟིན་པའི་རྣམ་པ་དེ་ཉིད་ཀྱིས། །གཟུར་གནས་དཔྱོད་ལྡན་མོས་པ་འཕེལ་བར་འགྱུར། །བྱེ་མདོ་རྣམ་རིག་ཐལ་རང་ལ་སོགས་ཀྱི། །དགག་བྱའི་ཚུལ་ལ་གོ་བབ་ཙམ་མིན་པར། །ཡིན་མིན་ངེས་ཐག་སོམ་ཉི་བྲལ་བ་ཡི། །སྟོང་ཉིད་ཚུལ་ལ་མཁས་པའི་མཁས་པ་མཆོག ། གང་ཞིག་སྟོང་དང་རྟེན་འབྱུང་ཟབ་མོ་ཡི། །ཟུང་འཇུག་སྒྱུ་མར་ཤེས་པའི་རྣལ་འབྱོར་བ། །འདི་ཡིན་ཞེས་བྱར་སུ་ལ་སྨྲ་དགོས་ན། །དེ་ནི་ཐེ་ཚོམ་བྲལ་བར་ཁྱེད་ཉིད་འོས། །ཐ་མལ་སྣང་ཞེན་དྲི་མ་སྦྱོང་བའི་ལམ། །ལྷ་སྔགས་དཀྱིལ་འཁོར་ཏིང་འཛིན་གཡོ་མེད་ཀྱི། །བསྐྱེད་པའི་རིམ་པར་གོམས་མྱོང་རྩེར་སོན་ཞིང༌། །གྲུབ་པའི་མཚན་མ་ཐོགས་མེད་མངའ་བ་ཅན། །མ་བཅོས་རང་བབ་སེམས་ཀྱི་རང་མདངས་ལས། །སྣང་ཆ་འོད་གསལ་གཟུགས་སྐུ་འབྱམས་ཀླས་ཤིང༌། །བདེ་ཆེན་ཉམས་བརྒྱའི་སྣང་བ་རབ་འབར་བ། །རྡོ་རྗེ་འཆང་ཆེན་མི་ཡི་ཤ་ཚུགས་ཅན། །ཡི་དམ་ལྷ་ཡི་ཞལ་མཇལ་བྱིན་རླབས་གནང༌། །སྣང་སྲིད་ལྷ་འདྲེས་བྲན་དུ་ཁས་བླངས་བྱས། །ཆོས་སྲུང་རྣམས་ཀྱིས་འཕྲིན་ལས་མངོན་སུམ་སྒྲུབ། །གསང་གསུམ་ཡོན་ཏན་འཛད་པ་མེད་པའི་བདག ། མི་ནག་ཁྱིམ་པར་སྡིག་སྤངས་དགེ་སྒྲུབ་དང༌། །སྣང་མཐའ་ཡས་པའི་ཞིང་ཁམས་སྒྲུབ་པ་ཡི། །འཕྲིན་ལས་སྤེལ་བའི་ཐུགས་རྗེའི་རང་གཟུགས་ཁྱེད། །སྐལ་དམན་རྣམས་ཀྱི་གཉེན་དང་དཔུང་གཅིག་ཉིད། །བསྟན་པའི་མེ་རོ་སླར་ཡང་གསལ་བ་ན། །གཞུང་ཆེན་གླེགས་ཐག་ཁྱེད་ཀྱིས་དཀྲོལ་མིན་ན། །ཉན་བཤད་སློབ་པའི་རྣམ་པ་ཙམ་ཞིག་ཀྱང༌། །ཆེན་པོར་རློམས་པ་ཕལ་གྱིས་བྱས་པ་མེད། །སྐུ་ལ་འདོད་ཆུང་ཞི་བའི་རང་རྟགས་དོད། །གསུང་ལ་སྡེ་སྣོད་གསུམ་གྱི་ཆོས་སྒྲ་གྲགས། །ཐུགས་ལ་ཐུན་མོངས་ཐུན་མིན་ལམ་གྱིས་ཕྱུག ། དམ་པའི་ནང་གི་དམ་པ་ཟླ་བྲལ་བ། །སྡུག་བསྔལ་འགྲོ་འདི་བརྩེ་བའི་རབ་བཟུང་ནས། །ཁྱེད་ཞབས་འགྲོ་དོན་དུས་སུ་སྨིན་པ་ན། །བདག་ཀྱང་ཐུགས་རྗེའི་གྲིབ་བསིལ་ལ་བརྟེན་འདིས། །ཡིད་ལ་འཚེངས་བའི་བསམ་པ་རྟག་ཏུ་འབྱུང༌། །ཆོས་མིན་སྤྱོད་པའི་ས་འདི་རབ་གཙེས་ཤིང༌། །སྐྱབས་སུ་རེ་རྣམས་སྐྱབས་མིན་འདི་མཐོང་ཚེ། །ཁྱེད་ཀྱི་སྒོ་གསུམ་རྣམ་པར་ཐར་བ་ལ། །དྲན་གདུང་དད་པ་འགོག་མེད་ལྷག་ཏུ་མཆེད། །རྡོ་རྗེ་འཆང་དང་བསྟན་འགྲོའི་གཉེན་གཅིག་དང༌། །སངས་རྒྱས་ཀུན་དངོས་རིགས་ཀྱི་བདག་པོ་སོགས། །མཚན་གྱི་ཐོག་ཏུ་དད་པའི་རབ་སྦྱར་ཏེ། །བློ་བཟང་འཕྲིན་ལས་ཞེས་སུ་འབོད་ཀྱིན་ཡོད། །ཡིད་ཀྱི་མཁའ་ལ་ཁྱེད་སྐུ་ཤར་ནས་ཡོན་ཏན་དྲན་པའི་ཆུ་འཛིན་ལས། །གསོལ་འདེབས་སྦྲང་ཆར་ཤག་ཤག་འབབ་པས་རྟག་ཏུ་འབུས་པའི་དད་དམ་ལ། །གཡོ་ཟོར་བཅོས་མས་བསླད་པ་མེད་པར་ཉིན་མཚན་ལྟོས་མེད་རྗེས་དྲན་ན། །ཞབས་ཟུང་འཁོར་ལོ་ཚེ་རབས་ཕྲེང་བར་གཙུག་གི་ཏོག་ཏུ་ཐོབ་པར་ཤོག ། ཅེས་དཔལ་ལྡན་བླ་མ་དམ་པ་མཁས་བཙུན་བཟང་པོའི་ཡོན་ཏན་མ་ལུས་པའི་བདག་ཉིད་ལམ་རིམ་པ་གཉིས་ཀྱི་རྣལ་འབྱོར་ལ་རང་བྱན་ཆུད་པ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་བཀའ་དྲིན་འཁོར་མཐའ་དང་བྲལ་བ་རྗེ་མཁན་ཆེན་༧བློ་བཟང་འཕྲིན་ལས་དཔལ་བཟང་པོའི་སྡེ་གང་ཉིད་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་རྗེས་དྲན་དུ་ཚིག་དོན་གཉིས་ཅར་ལ་བཅོས་མའི་མ་བསླད་པར་གང་ཤར་ཡོན་ཏན་རྣམས་ཤར་མར་དད་གུས་ཆེན་པོས་ཆོས་སྨྲ་བ་དངོས་གྲུབ་དཔལ་གྱིས་ཕྲལ་དུ་བྲིས་པའོ། །དགེའོ། །ཚོགས་གཉིས་རབ་རྫོགས་དོན་གཉིས་མཐར་ཕྱིན་ཅིང༌། །བདེན་གཉིས་ཀུན་མཁྱེན་འཕྲིན་ལས་རྣམ་གཉིས་ཀྱིས། །མཐའ་གཉིས་རབ་བསལ་ཆོས་སྒོ་གྲངས་མེད་ཀྱིས། །འགྲོ་འདི་རྗེས་འཛིན་ཐུབ་དབང་ཉི་མ་རྒྱལ། །གང་ཞིག་དད་པའི་དྲི་བཞོན་ལྡང་བ་ཡིས། །སེམས་ཀྱི་དྲིལ་ཆུང་སྙན་པར་དཀྲོལ་གྱུར་ན། །ལྷད་མེད་དགེ་དེས་ལུས་ཅན་ཡིད་ངོགས་སུ། །དམ་པའི་རྣམ་ཐར་ལམ་མེར་གསལ་བྱེད་ཤོག ། ཚུལ་ཁྲིམས་བསིལ་སྦྱིན་བཅུ་དྲུག་ཆ་ཡི་དཀྱིལ་འཁོར་ཟླུམ་པོ་ཡོངས་སུ་རྫོགས། །ཞི་ཞིང་དུལ་ལ་འདོད་ཆུང་ཆོག་ཤེས་རྟུལ་ཞུགས་གཙང་མའི་རྒྱན་སྤྲས་པ། །གཞན་ངོར་མ་བཅོས་རང་རྒྱུད་མ་བསླད་ཀུན་ནས་དག་པའི་རྣལ་འབྱོར་མཆོག ། ཆོས་དབྱིངས་ལྷུན་འགྲུབ་ཁྱབ་པར་བརྡལ་བའི་བླ་མ་མཆོག་དེ་སྲིད་འདིའི་མགོན། །མང་དུ་ཐོས་པས་གཞུང་བརྒྱ་འབྱེད་ལ་ཆགས་ཐོགས་དྲི་མ་མི་མངའ་ཞིང༌། །བྱེ་མདོ་དབུ་སེམས་གྲུབ་པའི་མཐའ་ལ་ལུང་རིགས་སེང་གེའི་བསྒྱིང་འགྲོས་ཅན། །ནང་གི་རྣལ་འབྱོར་རིམ་གཉིས་ལམ་ལ་ཚུལ་བཞིན་བརྩོན་པ་གཅིག་པུ་རུ། །རིས་སུ་མ་ཆད་གངས་རིའི་ལྗོངས་སུ་མགྲིན་གཅིག་བསྟོད་པའི་དབྱར་རྔ་ལྡིར། །རྣམ་དག་ཞིང་གི་ཆོས་ཀྱི་སྒྲ་དབྱངས་དེར། །ཐུགས་ཡིད་བརྟན་པ་འཕྲོག་པའི་དོན་ལྡན་ཡང༌། །སྲིད་པའི་ཐང་དུ་སྡུག་བསྔལ་ཉམ་ཐག་འགྲོས། །མྱ་ངན་ང་རོ་སྒྲོག་པ་གསན་ལགས་སམ། །ཀུན་རྨོངས་འཐིབ་པོས་ཕྱོགས་ནས་རབ་གཏམས་པའི། །འགྲོ་ལྔའི་འཇིག་རྟེན་བརྩེ་བས་རྗེས་དགོངས་ཏེ། །གང་འདུལ་སྤྲུལ་བསྒྱུར་ཡ་མཚན་ལྟད་མོ་ཡིས། །ལྗོངས་འདིར་གཟུགས་སྐུའི་རོལ་བ་ངོམ་དུ་གསོལ། །ཆོས་བརྒྱད་ཆུ་འཛིན་ལང་ལོང་ལྡང་བའི་དབུས། །ཐུབ་བསྟན་ཉིན་བྱེད་ནུབ་རིར་ཉེ་བ་ཡི། །སྙིགས་མའི་ཡང་མཐའ་དུས་ཀྱི་མར་གཤམ་འདིར། །བསྟན་འཛིན་རྣལ་མ་ཁྱེད་འདྲ་ལྷག་ཏུ་དྲན། །དམ་ཆོས་ཁ་རུ་ཁྱེར་བའི་དིང་གི་ཆ་འདིར། །ཆོས་གཟུགས་བཅོས་མའི་རྫུ་བག་ཕྱི་རུ་མངོན་ཚེ། །ཁྱེད་སྐུ་གཤེགས་པའི་ཤུལ་གྱི་གཟུགས་བརྙན་ཕྲ་མོས། །ད་དུང་འགྲོ་བའི་སེམས་ལ་དགེ་བློ་སྤེལ་བཞིན། །ང་མཐོ་ང་ཆེ་མ་བརྩད་དམན་པའི་ས་ནས། །ཞིམ་ལྟོ་ཕྱི་རྫིག་མེད་པའི་གཉོམ་ཆུང་སྤྱོད་པས། །རྒྱལ་སྲས་རྣམ་ཐར་སྐྱོང་བའི་དམ་པ་ཁྱེད་འདྲ། །རྗེས་སུ་དྲན་སྐལ་འདི་ཡང་བསོད་ནམས་ཆེའོ། །ཞེས་མཁན་ཤེས་བྱ་ནས་བསྐུལ་ངོར་དངོས་གྲུབ་དཔལ་གྱིས་ཀུན་སྤངས་པ་མཁན་ཆོས་ཁྱབ་ཀྱི་རྗེས་དྲན་དུ་བྲིས་པ་དགེའོ། །