གདུང་འབོད་གསོལ་འདེབས།
གདུང་འབོད་གསོལ་འདེབས།
གང་ཐུགས་སྤྲོས་བྲལ་དག་པའི་ནམ་མཁའ་ལས། །འགྲོ་འདུལ་གར་དུ་ཤར་བའི་རྟ་བདུན་དབང༌། །བསིལ་སྦྱིན་འོད་ཀྱིས་བསྐྱངས་པའི་གུས་འབངས་རྣམས། །ནམ་ཡང་བརྩེ་ཆེན་ཀློང་ལས་མ་འདའ་ཞིག ། ཁྱེད་ཐུགས་ར་རིའི་དྲི་མ་ཀུན་དག་ཀྱང༌། །བདག་ཅག་སེམས་རྒྱུད་མུན་པའི་རབ་འགེངས་བས། །ཁྱོད་སྐུ་གཟུགས་སྐུ་དབྱིངས་སུ་ཡལ་བ་དེས། །མི་བཟད་མྱ་ངན་འཐིབ་པ་གཟིགས་ལགས་སམ། །ཉིན་དང་མཚན་དུ་གདུང་བས་ཤུགས་ཕྱུང་སྟེ། །དུས་ཀུན་སྐྱབས་ཀྱི་རེ་ལྟོས་འཆའ་བ་རྣམས། །རྒྱ་མཚོར་གྲུ་ཞིག་ལྟ་བུ་འདི་དགོངས་ལ། །བྱིན་རླབས་ནུས་པའི་རྩལ་ཆེན་འབྱིན་དུ་གསོལ། །རང་དོན་མཐར་ཕྱིན་ཆོས་སྐུའི་རྒྱལ་ས་ལས། །གཞན་དོན་ལྷུན་གྲུབ་གཟུགས་སྐུའི་དཔལ་བསྐྱེད་དེ། །སྐལ་དམན་བདག་ཅག་ལོག་པར་མི་གཏོང་བར། །སྣ་ཚོགས་ཚུལ་གྱིས་རྗེས་སུ་འཛིན་པར་གསོལ། །ཞེས་པ་འདི་ནི་གང་གི་སློབ་བུ་རྣམས་ཀྱི་ངོར་དངོས་གྲུབ་དཔལ་གྱིས་བྲིས་པ་དགེའོ། །གདུང་འབོད། ན་མ་ཤྲཱི་ཀཱ་ལ་ཙཀྲ་ཡ། ཀུན་ཉོན་མུན་པས་འགྲོ་བློའི་མིག་ལྡོངས་ཤིང༌། །རྒྱལ་བསྟན་ཉི་མ་ནུབ་རིར་ཉེ་བ་ན། །ཁྱེད་སྐུ་བསྟན་དང་འགྲོ་བའི་སྤྱི་དཔལ་ཆེ། །དག་པའི་ཞིང་མཆོག་གང་དུ་བཞུད་ལགས་ཀྱང༌། །མཁའ་ཁྱབ་བརྩེ་བ་ཆེན་པོའི་ཀློང་ཡངས་ནས། །གདུང་ཤུགས་ང་རོས་འབོད་པ་འདི་གསན་མཛོད། །ཐུབ་བསྟན་གསལ་བའི་ཉི་མ་ཁྱེད་ཉིད་ཀྱི། །ཐུགས་རྗེའི་གཟུགས་སྐུ་དབྱིངས་སུ་བསྡུ་བ་ན། །བདག་ཅག་དམུས་ལོངས་ལས་ངན་འཁྱམས་པོ་རྣམས། །སྐྱབས་མེད་གྲུ་ཞིག་ལྟ་བུ་འདི་གཟིགས་སམ། །ལོང་བ་ཐང་དཀྱིལ་ལྷག་པ་ལྟ་བུ་ཡི། །གདུང་བའི་ཉིན་མཚན་འདའ་བ་འདི་དགོངས་ལ། །ཉམ་ཐག་འོ་དོད་འབོད་པའི་བདག་ཅག་ལ། །སླར་ཡང་བྱམས་པའི་ཏིང་འཛིན་ཡིད་མཁའ་ལས། །གཟུགས་སྐུའི་མཚན་དཔེ་མྱུར་དུ་འཆར་བར་ཤོག ། དེ་ལྟར་གདུང་བའི་དབྱངས་ཀྱིས་སྐུལ་བ་ན། །མི་མངོན་དབྱིངས་ཀྱི་འགྲོ་བའི་སྒྲོན་མེ་ཡིས། །ལེགས་པར་གསན་ཞིང་སྨོན་པ་ཇི་བཞིན་དུ། །འགྲུབ་པའི་སྡོངས་གྲོགས་མཆོག་གསུམ་སྲུང་མས་མཛོད། །ཅེས་རྒྱ་བླ་མ་ཐུབ་བསྟན་ཉི་མའི་གདུང་འབོད་འདི་ཡང་བླ་མ་བསམ་གཏན་རྒྱ་མཚོ་དང་སྤྲུལ་དཀོན་མཆོག་བཟང་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་མཆོག་གསུམ་ལ་གསོལ་བ་བཏབ་ནས་བྲིས་པའོ། །