སྤྲུལ་སྐུ་མྱུར་བྱོན།
སྤྲུལ་སྐུ་མྱུར་བྱོན། ངེས་དོན་སྙིང་བོའི་བཤད་དང་སྒྲུབ་པའི་བསྟན། །མི་ནུབ་འཛིན་ཞིང་སྤེལ་བའི་བཤེས་གཉེན་ཆེ། །མཚན་ནས་བརྗོད་པར་དཀའ་བའི་བཀའ་དྲིན་ཅན། །འགྲོ་བློ་རྒུད་སེལ་ཐུབ་བསྟན་ཉི་མ་མཆོག ། རེ་ཞིག་དག་པའི་ཞིང་དུ་ཕེབས་ལགས་ཀྱང༌། །སྐྱབས་མེད་བདག་ཅག་སྐྱོབ་པའི་མགོན་པོ་དང༌། །བསྟན་དང་འགྲོ་བའི་རྒུད་པ་འདི་དགོངས་ལ། །སྤྲུལ་བའི་ཟློས་གར་དགེ་ལེགས་འབྱུང་གནས་ཤིག ། མྱུར་དུ་ས་གསུམ་འགྲོ་ལ་འཆར་དུ་གསོལ། །ལྷ་མིའི་རྣམ་འདྲེན་སྟོན་མཆོག་ཟས་གཙང་སྲས། །གཏད་རབས་བདུན་དང་འཕགས་པའི་གནས་བརྟན་དང༌། །རྒྱ་བོད་པཎ་གྲུབ་ཤིང་རྟ་ཆེ་རྣམས་ཀྱིས། །སྨོན་པའི་མཐུན་འགྱུར་རེ་བ་ཇི་བཞིན་མཛོད། །ཅེས་སྤྲུལ་སྐུ་མྱུར་བྱོན་གྱི་གསོལ་འདེབས་འདི་ཡང་བླ་མ་བསམ་གཏན་རྒྱ་མཚོ་དང་སྤྲུལ་དཀོན་མཆོག་བཟང་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །ཡང་སྤྲུལ་མྱུར་བྱོན། བྱམས་བརྩེ་མཐའ་བྲལ་ཀུན་གསལ་མཁའ་ན་ཉ་གང་སྐུ་ཡི་འོད་ལམ་འགྱེད། །ཐོགས་མེད་མཁྱེན་རབ་གློག་གི་དྲྭ་བ་སྡེ་སྣོད་སྤྲིན་རུམ་གསེབ་ནས་ལྡིར། །ལྔ་བདོའི་ཐན་སྐྱ་དགུང་ལ་འཕྱུར་དུས་ལྔ་ཟུང་མཁས་པའི་འོད་སྟོང་བ། །རྒྱལ་ཀུན་མཁྱེན་བརྩེ་གཅིག་ཏུ་བཟླུམས་པ་བླ་མའི་ཞབས་ཀྱི་པདྨོར་འདུད། །ཀུན་ཉོན་སྨག་ཆེན་འཐིབ་པོས་རབ་དཀྲིགས་སྲིད་པའི་མྱ་ངན་ཐང་ཆེན་ན། །ཤེས་རབ་མིག་ལྡོང་ཐབས་ཀྱི་གྲོགས་མེད་འཁོར་བར་ཞགས་པས་རབ་འཆིང་ཚེ། །སྟོབས་བཅུ་རྫོགས་ཤིང་དུས་ལས་ཡོལ་མེད་ལྷུན་འགྲུབ་འཕྲིན་ལས་རབ་སྦྱིན་པ། །མི་ཡི་ཤ་ཚུགས་བཤེས་གཉེན་ཚུལ་བཟུང་གང་འདི་ཡིན་ལ་སོམ་ཉི་ཅི། །འོན་ཏེ་གང་སྐུ་རྟ་བདུན་དབང་པོ་དུས་ཀྱི་འགྲོས་ལ་རབ་བཅིབ་ནས། །དམན་པའི་ཡིད་ཀྱི་སྐྱ་རེངས་སྣང་བ་ད་དུང་འཆར་བར་མ་གྱུར་གོང༌། །བསོད་ནམས་རི་བོའི་ཕག་ཏུ་ཡིབ་པའི་དམུས་ལོང་དག་གི་ལས་སྐལ་འདི། །མགོན་ཁྱེད་གང་ན་ཇི་ལྟར་འཚོ་ཡང་ཐུགས་རྗེས་འདོར་བར་སྲིད་དམ་ལགས། །ཁྱེད་ཞབས་ཆོས་དབྱིངས་མཁའ་ལ་གཤེགས་ཀྱང་གདུལ་བྱའི་དད་པའི་བཀོད་ཆུ་རེར། །ཁྱེད་ཀྱི་གཟུགས་བརྙན་ད་དུང་མ་ཡལ་རེ་བའི་མཆི་མ་བཀུ་བཞིན་དུ། །ཁྱེད་ལ་རེ་ལྟོས་ལོ་ཟླར་འཛད་ན་ཐུགས་རྗེའི་རྩལ་ཆེན་རབ་བསྐྱེད་དེ། །སྤྲུལ་བའི་དཀྱིལ་འཁོར་སླར་ཡང་འཛིན་མའི་ཁམས་ལ་མྱུར་དུ་འཆར་གྲུབ་མཛོད། །བསྐྱངས་པའི་བཀའ་དྲིན་དྲན་པའི་རི་མོ་མི་ཤིགས་ལྕགས་ལ་བཏབས་པ་ལྟར། །གཞལ་མེད་སྙིང་གི་རིན་པོ་ཆེ་དེ་དབུལ་བོའི་ལག་ནས་བོར་གྱུར་ཀྱང༌། །མདོ་སྔགས་རྒྱ་མཚོའི་ངག་ལ་དབང་ཞིང་ལུང་རྟོགས་བསྟན་པ་འཛིན་མཁས་ཤིག ། འཕྲིན་ལས་རྒྱ་མཚོའི་ཟབ་ཡངས་འཁུ་བའི་སྤྲུལ་བའི་ཟློས་གར་ཉེར་འབྱོན་མཛོད། །ཅེས་པ་འདི་ནི་དྲན་པ་དགོན་ཆོས་རིག་དར་རྒྱས་སློབ་གླིང་གི་རྩོམ་རིག་སྡེ་ཚན་གྱིས་བསྐུལ་ངོར་དངོས་གྲུབ་དཔལ་གྱིས་དད་གུས་དང་བཅས་བྲིས་པ་དགེའོ། །