གྲུབ་དབང་ལུང་རྟོགས་རྒྱལ་མཚན་སླད་དྲན།
གྲུབ་དབང་ལུང་རྟོགས་རྒྱལ་མཚན་སླད་དྲན་ཞུ།
འགྲོ་བ་མཐའ་དག་གི་མཛའ་བཤེས་དམ་པ་རྣམ་འདྲེན་སྟོབས་བཅུ་མངའ་བ་ཐུབ་མཆོག་ཤཱཀྱའི་རྒྱལ་པོ་དེ་ཉིད་ཀྱིས་གང་འདུལ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་མདོ་སྔགས་ཐེག་པ་གོང་འོག་གི་ཆོས་སྒོ་ཇི་སྙེད་ཅིག་བཀའ་བསྩལ་པ་ལས། སྤྱིར་ཐེག་པ་ཆེན་པོ་དང་ཡང་དགོས་གསང་ཆེན་རྡོ་རྗེ་ཐེག་པའི་བསྟན་པ་གསེར་སྦྱངས་བཙོ་མ་ལྟ་བུ་འདི་ཉིད་ཐུན་མོང་མིའི་འཇིག་རྟེན་འདིར་ད་ལྟའི་ཆར་མ་ནུབ་པར་གནས་པ་ནི་གངས་ཅན་ཁ་བ་བོད་ཀྱི་ཡུལ་ལུང་ཙམ་ཞིག་ཏུ་སྨྲས་ནའང་ཧ་ལམ་སྨྲ་ཆོག་པའི་དུས་སུ་སླེབས་ཡོད་པ་ཀུན་ཀྱིས་ཐུགས་ངེས་ལྟར་ལགས་ལ། གསང་ཆེན་རྡོ་རྗེ་ཐེག་པའི་བསྟན་པ་འདི་ཉིད་ཀྱི་ཉམས་བཞེས་འཁྲུལ་མེད་ཀྱི་ལམ་ནས་བྱིན་རླབས་ཀྱི་བརྒྱུད་པ་མ་ཆད་པར་གྲུབ་པའི་སར་གཤེགས་པའི་དམ་པ་རེ་རེ་ནི་ཐུབ་བསྟན་གྱི་སྲོག་ཤིང་འཛིན་པའི་ནང་ནོམ་ངོ་མ་དེ་ཡིན། དེ་ཡང་ཉེ་བའི་ཆར་བྱོན་པའི་མཚན་བརྗོད་པར་དཀའ་བ་རྟོགས་པའི་དབང་ཕྱུག་ཆེན་པོ་གྲུབ་དབང་ལུང་རྟོགས་རྒྱལ་མཚན་ནམ་བླ་མ་ཨ་ཁྱུག་རིན་པོ་ཆེར་མཚོན་ན། རྒྱུ་སྐར་གྱི་དབུས་ན་རི་བོང་འཛིན་པ་དང༌། རི་དྭགས་ཀྱི་གསེབ་ན་སེང་གེ་དང་འདྲ་བ་དམ་པ་ལས་ཀྱང་དམ་པ་ཡིད་བཞིན་གྱི་ནོར་བུ་ལྟ་བུ་ཞིག་ཡིན་ཏེ། ཁོང་ནི་རང་རྒྱུད་གྲོལ་བའི་ཡོན་ཏན་ཙམ་མ་ཟད་འགྲོ་དོན་དུས་སུ་བབ་ཅིང་ཐུགས་རྗེ་དང་སྨོན་ལམ་ཡོངས་སུ་རྫོགས་པས་མཛད་པ་འཕྲིན་ལས་འགྲན་ཟླ་དང་བྲལ་བའི་སྐྱེ་འགྲོ་སྤྱི་ལ་ཕན་པའི་ཕྱི་རྗེས་ཀྱི་རི་མོ་ཀུན་ནས་མཛེས་ཤིང་བཀྲ་བའི་བླ་མ་ཞིག་རེད། དེས་ན་ཁོང་གི་མཛད་པ་དང་རྣམ་ཐར་སྤྱི་བམ་ཙམ་ནི་སུ་ལ་བསྙད་མི་དགོས་པར་ཀུན་ཀྱིས་གསལ་མཁྱེན་ལགས་པ་ལྟར་ཡིན་པས་འདིར་གླེང་དགོས་དོན་མི་སྣང༌། ཕྱི་ཚུལ་ཙམ་མ་ཡིན་པར་བླ་མ་གང་ཉིད་ཀྱི་གསང་གསུམ་གྱི་ཡོན་ཏན་ལ་དད་པ་དང་མཛད་པ་འཕྲིན་ལས་ཀྱི་རྒྱུན་བཟང་པོ་ལ་རྗེས་སུ་ཡི་རང་ཞིང་བཀའ་དྲིན་དྲན་པའི་སྒོ་ནས། ཚིག་གིས་མི་མཚོན་པའི་རྗེས་དྲན་ཟབ་མོ་སེམས་སུ་རྟག་པར་ཉལ་བ་ཡིན། དེ་ལྟ་མོད་དེ་ད་ལན་བླ་མ་གང་ཉིད་རྗེས་དྲན་ཞིག་གི་དོད་དུ་ཚིག་དུམ་ཁ་ཤས་ཤིག་སུག་ལས་བགྱིས་པ་འདི་ཉིད་ཀྱང་འཇིག་རྟེན་མཐུན་འཇུག་གི་རྟོག་ངན་ཙམ་གྱིས་རྐྱེན་པ་མིན་པར། རིང་ནས་མོས་ཤིང་རྟག་པར་དད་པའི་དབང་གིས་བྱས་པ་ཡིན། བླ་མ་དཀོན་མཆོག་རྒྱ་མཚོའི་ཐུགས་བསྐྱེད་སྨོན་ལམ་གྱི་མཐུ་དང༌། དཀར་ཕྱོགས་ཆོས་ལ་མོས་པའི་བསྟན་སྲུང་ནུས་རྩལ་ཅན་ཐམས་ཅད་ཀྱི་ནུས་སྟོབས་དང༌། ཆོས་ཅན་རྟེན་འབྲེལ་བསླུ་བ་མེད་པའི་བདེན་མཐུ་ཟབ་མོའི་སྟོབས་ཀྱིས། རང་ཅག་ཁ་བ་གངས་ཅན་པའི་སྐྱེ་འགྲོ་རྣམ་གྱི་གཙོས། འཛམ་གླིང་རྐང་གཉིས་མཆིས་སོ་ཅོག་དང༌། ཕྱོགས་མེད་ནམ་མཁའ་ལྟར་མཐའ་ཀླས་པའི་ལུས་ཅན་རྣམས་ཀྱི་བསོད་ནམས་ཀྱི་བགོ་སྐལ་དུ། བླ་མ་གང་གི་མཛད་བཟང་འཕྲིན་ལས་ཀྱི་རྣམ་དཀར་ཉམས་པ་མེད་ཅིང༌། སློབ་བརྒྱུད་ཆོས་བཞིན་དུ་སྤྱོད་པ་ཐམས་ཅད་ཀྱི་སྐུ་ལས་གང་ལ་ཡང་བར་ཆད་ཀྱི་མིང་ཙམ་ཡང་མི་འབྱུང་བར། ཡངས་པའི་ས་ཆེན་ཀུན་ན་ཕན་བདེའི་ལེགས་ཚོགས་ཀྱི་འབྲས་བུ་སྲིད་པ་མ་སྟོང་གི་བར་དུ་ཆད་པ་མེད་པའི་སྨོན་ལམ་ལན་བརྒྱ་སྟོང་དུ་ཕུལ་བ་ལགས་སོ། །རྡོ་གྲུབ་གཏེར་ལུང་ལས། ཤར་ཕྱོགས་བློ་བཟང་བསྟན་པ་ལ། །བྱང་ཆུབ་སེམས་དཔའ་མེ་ཏྲི་ནི། །བློ་བཟང་འཕྲིན་ལས་ཞེས་པ་ཡིས། །འཇམ་དབྱངས་བསྟན་པ་གསལ་བར་བྱེད། །ཅེས་དང༌། དཔལ་ཕྱག་ན་རྡོ་རྗེའི་བྱིན་རླབས་པའི། །ཁོང་ཀརྨ་དཔའ་བོ་ཧེ་རུ་ཀས། །གནས་འདི་ལ་རྒྱན་གྱིས་བརྒྱན་གྱུར་ན། །ཡུལ་འདི་ཀས་བདེ་སྐྱིད་བོས་པ་བཞིན། །ལྷ་ཚེ་དཔག་མེད་ཀྱི་དཔལ་བྱིན་པ། །ཁོང་ཆོས་ལ་དབང་ཐོབ་དམ་པར་འགྱུར། །ཞེས་གསུངས་པ་ལྟར་གང་ཐུགས་སྡོམ་པ་གསུམ་གྱིས་ལེགས་པར་བསྡམས་ཤིང༌། གཞན་ཕན་བྱམས་བརྩེ་བྱང་ཆུབ་ཀྱི་སེམས་རིན་པོ་ཆེའི་རང་བཞིན་ལྷན་སྐྱེས་སུ་མངའ་བ། ལམ་བསྐྱེད་རྫོགས་རིམ་པ་གཉིས་ལ་མངའ་དབང་འབྱོར་བའི་ཁྱབ་བདག་རྡོ་རྗེ་འཆང་ཆེན་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། མཁན་ཆེན་ངག་དབང་༧བློ་བཟང་འཕྲིན་ལས་མཚུངས་པ་མེད་པའི་སྡེ་གང་ཉིད་ཀྱི་ཞལ་གསུང༌། ད་ལྟ་རང་རེ་དག་གི་དད་གུས་བསོད་ནམས་ཀྱི་བགོ་སྐལ་དུ་བཞག་པའི་མདོ་སྔགས་ཞལ་གདམས་སོགས་ཀྱི་གསུང་སྒྲ་འདི་བསྐྲུན་པ་ཡིན་ལ། དེ་ཡང་འཕགས་པ་ཀུན་ཏུ་བཟང་པོའི་སྨོན་ལམ་ལས། འཆང་བ་དང་ནི་སྟོན་ཏམ་ཀློག་ན་ཡང༌། །དེ་ཡི་རྣམ་པར་སྨིན་པའང་སངས་རྒྱས་མཁྱེན། །ཞེས་དང༌། གཞན་ཡང་མདོ་སྡེ་རྣམས་སུ་མདོ་སྡེ་དང་སངས་རྒྱས་དང་བྱང་ཆུབ་སེམས་དཔའ་དག་གི་མཚན་སྒྲོག་པ་དང་ཐོས་པ་ཙམ་གྱི་ཕན་ཡོན་ཡང༌། བསམ་གྱིས་མི་ཁྱབ་པ་མང་པོ་རྒྱ་ཆེར་གསུངས་པ་ལྟར། ད་ལན་མགོན་པོ་གང་ཉིད་ཀྱི་གསུང་འཇིགས་པ་མེད་ཅིང་བག་ཚ་བ་ཐམས་ཅད་ལས་གྲོལ་བ། ཆོས་རྔ་ཆེན་པོ་སེངྒེའི་སྒྲ་ལྟ་བུ་འདི་ཉིད། དགོན་གྲོང་ཡུལ་ཁམས་རི་ལུང་སོགས་གང་དུ་གྲག་པ་དཻར། རྐྱེན་ངན་གདོན་བགེགས་ཀྱི་བར་ཆད་ཞི་བ་དང༌། སེམས་ཅན་གང་གི་རྣ་ལམ་དུ་ཐོས་པ་ཙམ་གྱི་ཕན་ཡོན་ཡང་བསོད་ནམས་མི་བཟད་པའི་རྒྱུར་དམིགས་ཤིང༌། ལྷག་པར་དུ། སངས་རྒྱས་ཀྱི་མཛད་པ་ཐམས་ཅད་ཀྱི་གསུང་གི་མཛད་པ་མཆོག་ལགས་ཏེ། དེས་ན། གདུལ་བྱ་རྣམས་སྡུག་བསྔལ་མཐའ་མེད་པ་ལས་སྒྲོལ་བ་ཡང༌། ལེགས་ཉེས་བླང་དོར་མ་ནོར་བར་སྟོན་པའི་གསུང་གིས་རྗེས་སུ་འཛིན་པ་འདི་ཁོ་ན་གཙོ་བོར་ལགས་པས། མདོ་སྔགས་ལམ་རིམ་པ་གཉིས་ཀྱི་ཟབ་གསུང་འདི་དག་གི་ཚིག་དོན་ཚུལ་བཞིན་དུ་མཉན་ནས། དོན་ལེགས་པར་སེམས་ཏེ། ཡང་དག་པར་སྒྲུབ་པ་ན། ཁོང་རིན་པོ་ཆེ་དང་དངོས་སུ་མཇལ་ཡང་འདི་ལས་ལྷག་པ་ཞིག་གསུང་རྒྱུ་མེད་པ་ཡིན་པས། རྗེ་བདག་ཉིད་ཆེན་པོས། མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན་དེ་ཡང་ནི། །འདི་ཉིད་ཡིན་ཕྱིར་མཁས་པ་ཡིས། །འདི་ལས་སངས་རྒྱས་རྗེས་དྲན་བྱོས། །ཞེས་གསུངས་པ་ལྟར། རྗེས་དྲན་དང་མཆོད་པ་ཐམས་ཅད་ཀྱི་རྒྱལ་པོ་ཡང་གསུང་ལ་རྗེས་སུ་སློབ་པ་ཉིད་ཡིན་པར་ངེས་ཏེ། དད་གུས་དང་ལྡན་པ་རྣམས་ཀྱིས་བླ་མའི་རྗེས་དྲན་དེ་ལྟར་ལག་ལེན་ལ་ཅི་ནུས་སུ་བསྟར་ནས་ཡང་ཡང་གསན་པར་ཞུའོ། །