ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ།
ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ།
ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ། སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཟབ་མོ་མདོ་སྔགས་གཞུང་བརྒྱ་སྨྲ་བ་ལ། །ལུང་རིགས་གད་རྒྱངས་གཞན་ལས་མཐོ་བ་ཅན། །དེ་དོན་བརྩེ་བས་གཞན་ལ་འདོམས་མཁས་པ། །མཉམ་མེད་དགེ་བའི་བཤེས་ཉིད་རྒྱལ་གྱུར་ཅིག ། ཀུན་མཁྱེན་རྒྱལ་བའི་གསུང་རབ་རྒྱ་མཚོ་ལ། །རྣམ་དཔྱོད་བློ་གྲོས་རྩལ་གྱིས་བསྲུབས་པ་ལས། །བྱུང་བའི་གང་གསུང་ཟླ་བ་ནོར་བུའི་འོད། །ཇོ་ནང་བསྟན་པ་གསལ་བའི་རྒྱན་དུ་ཆེ། །ཁྱད་པར་བསྟན་ལ་གཅིག་ཏུ་དད་པ་དང༌། །གཞན་ཕན་འོད་ཟེར་ཕྱོགས་བརྒྱར་འཕྲོ་བ་ཡི། །ཐོས་བསམ་སྒོམ་པའི་ཉི་མ་འོད་པོ་ཆེས། །རྒྱལ་བསྟན་ཉིན་མོར་བྱེད་འདིར་ལྷག་པར་དད། །དཔལ་ལྡན་དུས་ཀྱི་འཁོར་ལོའི་རིམ་གཉིས་ཀྱི། །དངོས་གྲུབ་རྣམ་གཉིས་སྒྲུབ་པའི་ལས་སྨོན་ཅན། །མཁས་བཙུན་བཟང་པོའི་དཔལ་མངའ་ཆོས་ཀྱི་གྲོགས། །སྐུ་ཚེ་བརྟན་ཅིང་མཛད་འཕྲིན་རྒྱས་གྱུར་ཅིག ། ཅེས་ཇོ་ནང་དགེ་བཤེས་དངོས་གྲུབ་དཔལ་མཆོག་གི་མཛད་འཕྲིན་ཕྱོགས་མང་པོ་ལ་རྒྱུན་དུ་ཡི་རང་དཔག་མེད་ཅིག་ཡོད་མུས་ལ། ལྷག་པར་རྒྱལ་བ་ཇོ་ནང་པའི་བསྟན་པ་ལ་ཁ་ཙམ་ཚིག་ཙམ་མིན་པར་གོ་རིམ་ལྡན་པའི་སློབ་གཉེར་གྱི་རྨང་གཞི་བཙུགས་ཤིང༌། འཆད་རྩོད་རྩོམ་གསུམ་གྱི་སྒོ་ནས་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་གནང་སྟེ་རྒྱལ་བ་ཇོ་ནང་བའི་ཡང་དར་བསྟན་པའི་བྱེད་པོ་ཉིད་དུ་བཞེངས་པར་དགའ་གུས་ཡི་རང་ཚད་མེད་ངང༌། ཁོང་གི་སྐུ་ཚེ་བརྟན་ཅིང་མཛད་འཕྲིན་དབྱར་མཚོ་ལྟར་རྒྱས་པའི་སྨོན་འདུན་བཅས།སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཕྱི་ལོ་༢༠༡༧ཟླ་༡༠ཚེས་༢༢ཉིན་ཕུལ་བའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་དང༌། །ཚེ་ཡི་ལྷ་མཆོག་རྣམས་ལ་གསོལ་བ་འདེབས། །བསྟན་འགྲོའི་མགོན་སྐྱབས་བཤེས་གཉེན་དམ་པ་ཡི། །སྐུ་ཚེ་བརྟན་ཅིང་མཛད་འཕྲིན་རྒྱས་པར་སྨོན།¿། མཆོག་གསུམ་ལྷ་དང་ཆོས་ཉིད་བདེན་མཐུ་དང༌། །བདག་ཅག་སློབ་དབང་དད་དང་དམ་ཚིག་དང༌། །དུས་གསུམ་བསགས་པའི་དགེ་བའི་རྩ་བ་ཡིས། །རྗེ་བཙུན་བླ་མའི་ཞབས་པད་བརྟན་གྱུར་ཅིག ། ཅེས་པ་འདི་ནི་དངོས་གྲུབ་དཔལ་གྱིས་རང་གི་ཞབས་བརྟན་སྨོན་ཚིག་ཏུ་བྲིས་པའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་ཀྱིས། །བཤད་སྒྲུབ་བསྟན་པ་གསལ་བའི་སྒྲོན་མེ་ཡི། །སྐུ་ཚེ་མི་འགྱུར་རྡོ་རྗེའི་ཁམས་བརྟན་ཅིང༌། །མཛད་འཕྲིན་འོད་སྟོང་ས་གསུམ་ཁྱབ་པར་ཤོག། མ་གྱུར་འགྲོ་བའི་མུན་སེལ་རིན་པོ་ཆེ། །འགྲོ་བའི་མགོན་དུ་སྐུ་ཚེ་རབ་བརྟན་ཞིང༌། །ཟབ་རྒྱས་ཆོས་ཀྱི་ཆར་བ་བབ་པ་དང༌། །བྱང་ཆུབ་མ་ཐོབ་བར་དུ་བརྩེ་བས་སྐྱོངས། །ཞེས་པ་འདི་ནི་པཱ་ལ་དགོན་གྱི་རྡོ་རྗེ་སློབ་དཔོན་བླ་མ་བསྟན་གསལ་གྱི་ཞབས་བརྟན་གསོལ་འདེབས་སུ་དངོས་གྲུབ་དཔལ་གྱིས་བྲིས་པའོ། །ཨོཾ་སྭ་སྟི། འཆི་མེད་ཚེ་ཡི་དངོས་གྲུབ་སྩོལ་མཛད་པའི། །ཚེ་ལྷ་རྣམ་གསུམ་ཐུགས་རྗེའི་གྲུ་ཆར་གྱིས། །བསམ་གཏན་སྒྲུབ་ལ་མཁས་བཙུན་བཟང་པོ་ཡི། །སྐུ་ཚེ་རྟག་བརྟན་མི་འགྱུར་དཔལ་གནས་ཤོག ། ཆོས་ཉིད་བདེ་བར་གཤེགས་པའི་བདེན་མཐུ་ཡིས། །དཔལ་ལྡན་དུས་ཀྱི་འཁོར་ལོའི་རིམ་གཉིས་ཀྱི། །ལམ་བཟང་སྒྲུབ་ལ་གཅིག་ཏུ་གཞོལ་མཛད་པའི། །དཔལ་ལྡན་བླ་མའི་ངེས་དོན་བསྟན་དར་ཤོག། མཆོག་གསུམ་སྐྱབས་གནས་དབང་གི་རྒྱལ་པོ་ཡིས། །ཆེར་སྙིགས་དུས་མཐར་ཐུགས་བསྐྱེད་བླ་མེད་པ། །འདོད་ཆུང་ཆོག་ཤེས་སྦྱང་བའི་ཡོན་ཏན་ལྡན། །སྐྱེས་བུ་དམ་པའི་ཞབས་པད་བརྟན་པར་ཤོག ། བདག་ཅག་གུས་སློབ་ཀུན་ཀྱིས་བསགས་པ་ཡི། །རྣམ་དཀར་དགེ་ཚོགས་ཇི་སྙེད་མཆིས་པ་ཡིས། །རྒྱལ་བསྟན་འཛིན་ལ་ཟླ་དང་བྲལ་བའི་བཤེས། །སྐུ་ཚེ་བརྟན་ཅིང་མཛད་འཕྲིན་རྒྱས་པར་ཤོག ། ཅེས་པ་འདི་གང་གི་སློབ་བུ་སྦྱིན་པ་དཔལ་ནས་འདོད་ཆུང་ཆོག་ཤེས་ཀྱི་ངང་སྒྲུབ་པ་ཉམས་ལེན་བརྩོན་པ་ལྷོད་མེད་མཛད་པའི་སྐྱེས་བུ་དམ་པ་གཙང་གོང་རྡོ་རྗེ་སློབ་དཔོན་ངག་དབང་བསམ་གཏན་བཟང་པོའི་ཞབས་བརྟན་གསོལ་འདེབས་ཞིག་རྩོམ་བསྐུལ་གནང་བ་ལ་བརྟེན་ནས་དངོས་གྲུབ་དཔལ་གྱིས་དད་གུས་དང་བཅས་བྲིས་པའོ། །སརྦ་མངྒ་ལཾ། ཨོཾ་སྭ་སྟི། སྲིད་གསུམ་མཉམ་མེད་ཤཱཀྱའི་དབང་པོ་དང༌། །ཚེ་ལྷ་རྣམ་གསུམ་སངས་རྒྱས་སྟོང་རྩ་སོགས ། རབ་འབྱམས་ཞིང་གི་འཕགས་ཚོགས་ཐམས་ཅད་ཀྱིས། །དེང་འདིར་སྨོན་པའི་མཐུན་འགྱུར་སྤེལ་བར་མཛོད། །མང་ཐོས་མཁས་པའི་ཡལ་ག་ཡངས་བའི་རྩེར། །སྒྲུབ་པའི་ལོ་འབྲས་ཁུར་གྱིས་ཉེར་དུད་པའི། །འགྲོ་མང་དགེ་ལེགས་འབྱུང་བའི་དཔག་བསམ་ཤིང༌། །ལྔ་བདོའི་ལུས་ཅན་གསོས་སུ་རྟག་བཞུགས་གསོལ། །འདོད་སྡང་རྨོངས་པའི་ནགས་ཀླུང་སྟུག་པོའི་ནང༌། །དབང་མེད་ལས་ཀྱིས་རླུང་གིས་རབ་བདས་པའི། །མགོན་མེད་ཉམ་ཐག་ཀུན་གྱི་སྤྱི་དཔལ་ཆེ། །སེམས་དཔའ་མཆོག་གི་ཞབས་པད་བརྟན་གྱུར་ཅིག ། ནང་དུ་རྡོ་རྗེ་ཐེག་པ་མཆོག་བསྒྲུབས་ཏེ། །ཐུན་མོང་བཀའ་གདམས་ལམ་གྱིས་རྒྱུད་སྦྱངས་པས། །ཀུན་རྟོག་དགྲ་ཆེན་ནང་ནས་རབ་འདུལ་ཁྱེད། །བདག་ཅག་ལྟོས་བཅས་མགོན་དུ་འཚོ་བཞུགས་གསོལ། །ཞེས་མཁན་དཀོན་མཆོག་དཔལ་དང་རིན་དཔལ་གཉིས་ཀྱིས་ཞུ་རྟེན་དང་བཅས་ངེས་དོན་གྱི་བླ་མ་སྤྲུལ་རྡོ་རྗེ་དགྲ་འདུལ་གྱི་ཞབས་བརྟན་གསོལ་འདེབས་ཞུས་པའི་ངོར་དངོས་གྲུབ་དཔལ་གྱིས་དད་གུས་དང་བཅས་བྲིས་པའོ། །མཁན་ཆེན་བསྟན་པ་རབ་རྒྱས་ཀྱི་ཞབས་བརྟན་སྨོན་ཚིག
ཨོཾ་སྭ་སྟི། གང་ཐུགས་འདུལ་བའི་བསླབ་ཁྲིམས་དག་པའི་གཞིར། །གཞན་ཕན་སྤྱོད་པའི་རྒྱལ་སྲས་སེམས་དཔའ་ཆེ། །རིམ་གཉིས་རྣལ་འབྱོར་མཆོག་གིས་རྒྱུད་གྲོལ་བ། །གསུམ་ལྡན་རྡོ་རྗེ་འཛིན་དེར་དད་པས་འདུད། །འགྲོ་བའི་བསོད་ནམས་རིན་ཆེན་སྤུངས་པའི་སྤོར། །ཕན་བདེའི་དྲི་བཞོན་བསིལ་བསིལ་ལྡང་དང་ལྷན། །ལུང་རྟོགས་བསྟན་པ་རབ་ཏུ་རྒྱས་བྱེད་པའི། །མཁས་གྲུབ་བཤེས་གཉེན་དམ་པའི་ཞབས་བརྟན་ཤོག ། རིན་ཆེན་རྣམ་གསུམ་བདེན་པའི་བྱིན་རླབས་དང༌། །བདག་ཅག་སྨོན་འདུན་བཟང་པོའི་ནུས་པ་ཡིས། །བསྟན་པའི་གཉེན་གཅིག་མདོ་སྔགས་བདག་པོ་ཁྱེད། །སྐུ་ཚེ་བསྐལ་བ་རྒྱ་མཚོར་ཞབས་བརྟན་ཤོག ། ཡིད་བྱེད་མཚན་མའི་མདུད་པ་རང་སར་གྲོལ། །འོད་གསལ་སྣང་བའི་གཏུམ་མོ་རབ་འབར་བ། །གནས་ལུགས་ཕྱག་རྒྱ་ཆེན་མོའི་བདེན་མཐུ་ཡིས། །གང་སྐུ་འགྲོ་བའི་མོས་ངོར་རྟག་བརྟན་ཤོག། ཅེས་པ་འདི་ནི་ངག་དབང་དངོས་གྲུབ་དཔལ་གྱིས་མཁན་ཆེན་བསྟན་པ་རབ་རྒྱས་ཀྱི་ཞབས་བརྟན་སྨོན་ཚིག་ཏུ་སྨྲས་པའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་དང༌། །ཚེ་ཡི་ལྷ་མཆོག་རྣམས་ཀྱི་ནུས་མཐུ་ཡིས། །སྐྱེས་བུ་དམ་པའི་སྐུ་ཚེ་རབ་བརྟན་ཅིང༌། །བཀྲ་ཤིས་དཔལ་འབར་སྲིད་གསུམ་མཛེས་པར་ཤོག ། དཔལ་ལྡན་བླ་མའི་ངག་གི་དབང་བསྒྱུར་བའི། །འགྲོ་ལ་ལྷག་བསམ་རྒྱ་མཚོའི་བདུད་རྩི་ཡིས། །སྲིད་པའི་ཚ་གདུང་མ་ལུས་ཞི་མཛད་པའི། །དཔལ་ལྡན་བླ་མའི་ཞབས་པད་རྟག་བརྟན་ཤོག ། ཅེས་བླ་མ་ངག་དབང་ལྷག་བསམ་རྒྱ་མཚོ་མཆོག་ལ་ཞབས་བརྟན་གསོལ་འདེབས་ཞིག་དགོས་ཞེས་གང་གི་ཚ་བོ་ཆོས་འབྱོར་རྒྱ་མཚོས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །ངག་དབང་བསམ་གཏན་བཟང་པོའི་ཞབས་བརྟན་སྨོན་ཚིག ཨོཾ་སྭ་སྟི། དགེ་མཚན་བགྲང་བྱའི་རིན་ཆེན་ལྟེ་བ་རུ། །བཅུ་གཉིས་ཟླ་བའི་རྩིབས་ཀྱི་དྲ་བ་ཅན། །སུམ་བརྒྱ་དྲུག་ཅུའི་མུ་ཁྱུད་ངོམས་པ་འདི། །སྨོན་འདུན་ཤིས་ཚིག་སྒྲོག་བཞིན་བསུ་མ་བྱེད། །ངག་དབང་ལྷ་མོའི་མཁྱེན་གཉིས་འོད་དཀར་དང༌། །པད་དཀར་འཆང་བའི་བརྩེ་བའི་བསམ་གཏན་གཉིས། །བསོད་ནམས་སྐལ་པ་བཟང་པོའི་སྤྱི་དཔལ་དུ། །གཅིག་ཏུ་ཡོངས་བཟླུམས་བླ་མའི་ཞབས་ཟུང་བརྟན། །ཞེས་པ་འདི་གཙང་གོང་སྦྱོར་དྲུག་བའི་ཆོས་ཚན་གཅིག་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་སྒྲུབ་པ་ཉམས་ལེན་ལ་ལོ་བཅུ་ཕྲག་གསུམ་ལ་བརྩོན་པའི་༧ ངག་དབང་བསམ་གཏན་བཟང་པོའི་ཞབས་བརྟན་སྨོན་ཚིག་ཏུ་དད་གུས་དང་བཅས་ཕུལ་བའོ། །དགེའོ། །བླ་མ་ཀུན་དགའ་ཚུལ་ལྡན་གྱི་ཞབས་བརྟན་སྨོན་ཚིག
ཨོཾ་སྭ་སྟི།ཏིང་འཛིན་གཡོ་མེད་ལྷུན་པོའི་དཔལ་ལ་རོལ། །ཐབས་ཤེས་ཉི་ཟླའི་ཟེར་བརྒྱ་ངོམས་པ་ཡི། །རྡོ་རྗེ་འཛིན་པ་ཀུན་དགའ་ཚུལ་ལྡན་གྱི། །ཞབས་ཟུང་འཁོར་ལོ་རྩིབས་སྟོང་དྲྭ་བ་ཅན། །འགྲོ་བའི་བསོད་ནམས་རིན་ཆེན་སྤུངས་པའི་རྩེར། །འགྱུར་མེད་རྡོ་རྗེའི་ཁམས་སུ་བརྟན་པ་ལ། །མཆོག་གསུམ་བདེན་པའི་བྱིན་རླབས་བསྩལ་དུ་གསོལ། །ཞེས་མཁན་ཤེས་རབ་རིན་ཆེན་གྱི་བསྐུལ་ངོར་ངག་དབང་དངོས་གྲུབ་དཔལ་གྱིས་བླ་མ་ཀུན་དགའ་ཚུལ་ལྡན་གྱི་ཞབས་བརྟན་སྨོན་ཚིག་ཏུ་བྲིས་པའོ། །ཞབས་བརྟན་སྨོན་ཚིག
ཨོཾ་སྭ་སྟི། གསང་ཆེན་རྩོལ་བྲལ་གཉུག་མའི་རྣལ་འབྱོར་ལས། །ལྷུན་འགྲུབ་སྤྲོས་བྲལ་དཀྱིལ་འཁོར་རབ་འབྱམས་ཀྱི། །ལྷན་སྐྱེས་དོན་དམ་འཁོར་འདས་སྲོག་ཆེན་དེར། །འོད་གསལ་བསལ་བཞག་མེད་པར་སྐྱབས་སུ་བསྟེན། །ཚེ་དཔག་མེད་མགོན་རྣམ་པར་རྒྱལ་མ་དང༌། །ཡིད་བཞིན་འཁོར་ལོ་རིགས་གསུམ་མགོན་པོ་སོགས། །མ་ལུས་རྒྱལ་དང་སྲས་བཅས་སེམས་དཔའི་ཚོགས། །དེང་འདིར་སྨོན་པའི་མཐུན་འགྱུར་བསྩལ་ཏུ་གསོལ། །སྲིད་གསུམ་སྒྱུ་མའི་གྲོང་ཁྱེར་ཆེན་པོ་རུ། །ཀུན་ཉོན་ལས་དང་རྐྱེན་གྱིས་འཁྱམས་པ་ཡི། །མགོན་མེད་འགྲོ་བ་ཀུན་ཀྱི་མགོན་གཅིག་པུ། །རྣལ་འབྱོར་དབང་ཕྱུག་མཆོག་གི་ཞབས་བརྟན་ཤོག ། འཇིགས་མེད་མི་ཤིགས་བདེ་སྟོང་ཟབ་མོའི་ལམ། །ཚེ་རབས་གོམས་པའི་འབྲས་བཟང་ཕུན་སུམ་ཚོགས། །བསམ་བཞིན་སྤྲུལ་བའི་ཟློས་གར་ཉེར་བཟུང་བའི། །འདྲེན་མཆོག་གང་དེའི་འཕྲིན་ལས་གེགས་མེད་ཤོག ། ཅེས་བསེ་སྤྲུལ་འཇིགས་མེད་ཕུན་ཚོགས་ཀྱི་ཞབས་བརྟན་སྨོན་ཚིག་འདི་དངོས་གྲུབ་དཔལ་གྱིས་གང་གི་སྐུ་ཚེ་བརྟན་ཞིང་མཛད་འཕྲིན་རྒྱས་པའི་སྨོན་འདུན་བཅས་ཕུལ་བ་དགེའོ། །ཞབས་བརྟན་འཕྲིན་ལས་རབ་བརྟན་ཞེས་བྱ་བ་བཞུགས། ཨོཾ་སྭ་སྟི། དོན་དམ་བདེ་གཤེགས་སྙིང་པོའི་བདེན་པའི་མཐུ། །རྨད་བྱུང་མཆོག་གསུམ་བདེན་པའི་ཐུགས་རྗེའི་དཔལ། །ཚེ་ཡི་ལྷ་མཆོག་གསུམ་གྱི་ཐུགས་བསྐྱེད་ཀྱིས། །ཀརྨ་རྡོ་རྗེའི་ཞབས་པད་བརྟན་དུ་གསོལ། །གཞོན་ནུའི་དུས་ནས་སྔོན་སྦྱང་སད་སྟོབས་ཀྱིས། །མཁས་ཤིང་གྲུབ་པའི་རྣམ་ཐར་རྨད་དུ་བྱུང༌། །བཤེས་གཉེན་དམ་པའི་སྐུ་ཚེ་རབ་བརྟན་ཅིང༌། །ས་གསུམ་འགྲོ་བའི་དཔལ་དུ་འགྱུར་བར་ཤོག ། ཅེས་ཞབས་བརྟན་འཕྲིན་ལས་རབ་བརྟན་འདི་ནི་དད་གུས་དང་བཅས་སྟེ་དངོས་གྲུབ་དཔལ་གྱིས་སྨོན་པའོ། །དགེའོ། །ཞབས་བརྟན་གསོལ་འདེབས་འདོད་འཇོའི་བུམ་བཟང་ཞེས་བྱ་བ་བཞུགས་སོ། །ཨོཾ་སྭ་སྟི། དཔལ་ལྡན་སྐུ་བཞིའི་མི་འཇིགས་ལྷུན་པོ་ལ། །འཆི་མེད་ཚེ་ཡི་དཔལ་ན་མངོན་མཐོ་བའི། །ཚེ་ཡི་ལྷ་མཆོག་རྣམས་ཀྱི་དགེ་ལེགས་ཀྱིས། །འགྲོ་བའི་མགོན་པོ་ཞབས་པད་བརྟན་དུ་གསོལ། །གསང་བདག་སྒྱུ་འཕྲུལ་མར་མེ་གཅིག་ཉིད་ལས། །རང་འདྲ་ཆད་པའི་ངུར་སྨྲིག་རྣམ་རོལ་བའི། །དམ་ཆོས་བདུད་རྩིའི་རྩེ་དགའ་འགྱེད་པ་ཡི། །འགྲོ་བའི་དཔལ་གྱུར་ཞབས་པད་བརྟན་དུ་གསོལ། །བསོད་ནམས་འོ་མའི་རྒྱ་མཚོ་འཕྱུར་བ་ལས། །རྒྱལ་བསྟན་རྒྱ་མཚོའི་གསང་མཛོད་འཛིན་པ་ལ། །རླབས་ཆེན་མཛད་པའི་ནོར་བུའི་གཏེར་བརྡོལ་བའི། །དམ་པའི་སྐྱེས་བུའི་ཞབས་པད་བརྟན་དུ་གསོལ། །འཇིགས་མེད་བདེན་གསུང་དམ་ཆོས་ནཱ་དའི་གླུ། །སྙན་དགུར་ལེན་པས་རྒྱལ་བ་རྒྱ་མཚོ་ཡི། །ཟབ་ལམ་རྡོ་རྗེའི་སྙིང་བོ་ཐང་མལ་བརྡལ། །འགྲོ་བའི་མགོན་པོའི་ཞབས་པད་བརྟན་དུ་གསོལ། །དབང་ལུང་མན་ངག་བདུད་རྩིའི་ཆུ་རྒྱུན་གྱིས། །སྐལ་བཟང་གདུལ་བྱའི་རེ་སྐོང་དཔག་བསམ་ཤིང༌། །དགོས་འདོད་ཀུན་འབྱུང་རྗེ་བཙུན་མཁས་གྲུབ་ཀྱི། །སྐུ་ཚེ་མི་འགྱུར་བསྐལ་བརྒྱར་ཞབས་བརྟན་ཤོག ། གདམས་ངག་ཆོས་ཀྱི་དཔལ་ལ་དབང་བསྒྱུར་བ། །འཇིགས་མེད་རྒྱལ་བསྟན་འཛིན་པའི་མངའ་བདག་ཆེ། །གསང་གསུམ་མི་འགྱུར་རྡོ་རྗེའི་ཁམས་བརྟན་ནས། །མཛད་འཕྲིན་འོད་སྣང་ཕྱོགས་བཅུར་རྒྱས་པར་ཤོག ། ཅེས་པ་འདི་བརྟན་ཞུགས་ཆེད་དེབ་རྩོམ་སྒྲིག་ཁང་ནས་འབྲི་བསྐུལ་གནང་བའི་ངོར་དངོས་གྲུབ་དཔལ་གྱིས་བྲིས་པ་དགེའོ།། །།