གངས་ལྗོངས་རིས་མེད་ལྔ་རིག་མཐོ་སློབ་ཀྱི་ཉིན་གཅིག་གི་ཆོས་སྤྱོད་ཉམས་ལེན།
གངས་ལྗོངས་རིས་མེད་ལྔ་རིག་མཐོ་སློབ་ཀྱི་ཉིན་གཅིག་གི་ཆོས་སྤྱོད་ཉམས་ལེན་གྱི་རིམ་པ།
ཞོགས་ཀ་ཆུ་ཚོད་དྲུག་པ་ཡས་མས་སུ་ཡར་བཞེངས་ནས། འབྱོར་ཚོད་ཀྱི་མཆོད་པ་བསྡུས་ཙམ་བཤམ་པའམ་ཡང་ན་སྤོས་ཙམ་མཆོད་དེ། སངས་རྒྱས་ཆོས་ཚོགས་མ་སོགས་ཁ་ཏོན་ཅི་རིགས་དང་སྦྲགས་ནས། འཁོར་བའི་སྡུག་བསྔལ་ལ་བསམ་གཞིག་ལེགས་པར་བཏང་ནས་འཁོར་བ་ལ་སྐྱོ་བ་ལྷང་ལྷང་བ་བསྐྱེད་ཅིང༌། སྡུག་བསྔལ་དེ་ལས་སྐྱོབ་པའི་ནུས་པ་མཆོག་གསུམ་ལ་ཡོད་པར་ཡིད་ཆེས་པའི་སྒོ་ནས་སེམས་ཅན་རྣམས་སྲིད་ཞིའི་འཇིགས་པ་ལས་བསྐྱབ་པའི་ཕྱིར་མཆོག་གསུམ་ལ་སྐྱབས་འགྲོ་སྙིང་ཐག་པ་ནས་བྱ། དེ་ནས་མར་གྱུར་འགྲོ་བ་ཀུན་རྫོགས་པའི་སངས་རྒྱས་ཐོབ་ཕྱིར་དུ་ཐོས་བསམ་སྒོམ་གསུམ་སོགས་དམ་པའི་ཆོས་ལ་བརྩོན་པར་བྱ་སྙམ་པའི་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་སྦྲགས་ནས་སྐར་བཅུ་ལྷག་ལ་བསྒོམ། དེ་ནས་མ་ལུས་སེམས་ཅན་ཀུན་གྱི་མགོན་གྱུར་ཅིང༌། །ཞེས་སོགས་ཀྱིས་སྤྱན་འདྲེན་བྱས་ཏེ། ས་གཞི་སྤོས་ཀྱི་མ་སོགས་ཅི་རིགས་ཀྱིས་མཆོད་པ་སྐར་གཅིག་གཉིས་ཙམ་བྱ། དེ་ལྟར་གྲུབ་པ་དང་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་རྣམས་ཀྱིས་རྩིས་ཟིན་པར་བྱས་ནས་ཐོས་བསམ་གྱི་ལས་ལ་འཇུག་པ་ཡིན། ཆུ་ཚོད་བདུན་ནས་བཅུ་བར་དཔེ་ཁྲིད་ཡོད་པ་རྣམས་དཔེ་ཁྲིད་ལ་ཕེབས་ཤིང༌། སྐབས་དེར་དཔེ་ཁྲིད་ཁེལ་མེད་པ་རྣམས་ཀྱིས་རང་ཤག་ཏུ་ཐོས་བསམ་སྒོམ་པ་ལ་འབད་པ་ལས། རྣམ་གཡེང་དང་ལོང་གཏམ་སོགས་ཀྱིས་འདའ་བར་མི་བྱེད་པར་ཆོས་སྤྱོད་ལ་བརྩོན་པར་བྱ་དགོས། ཆུ་ཚོད་བཅུ་བ་ནས་དུས་འཁོར་འཛིན་གྲྭ་སོགས་ལ་དཔེ་ཁྲིད་ཡོད་པ་རྣམས་ལས། གྲྭ་མང་ལྷག་མ་རྣམས་ཀྱིས་ཚོགས་ཁང་ནས་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་ཀྱིས་ཀུན་ནས་བསླངས་ཏེ། བསྟན་བཅོས་མངོན་རྟོགས་རྒྱན་འདོན་དགོས། ཆུ་ཚོད་བཅུ་དང་ཕྱེད་ནས་ཀུན་སློང་ཀུན་སྤྱོད་ལེགས་པར་བཅོས་ནས། ཆོས་རར་ཕེབས་ཤིང་རྩོད་ཟླ་བསྒྲིག་རྒྱུ་དང༌། ཆུ་ཚོད་བཅུ་གཅིག་མ་ཟིན་ཙམ་ན་འཛིན་གྲྭ་བཅུ་གསུམ་པོ་སོ་སོར། སྐྱོར་དཔོན་རྣམས་ནས་སྐྱོར་སྦྱང་དང༌། དེ་ནས་ཆུ་ཚོད་བཅུ་གཅིག་དང་སྐར་ཉི་ཤུའི་སྟེང་སླར་ཡང་རྩོད་ཟླ་བསྒྲིགས་ཏེ། བཅུ་གཅིག་དང་ཕྱེད་ཀ་ནས་རིམ་གྱིས་རྩོད་པ་གྲོལ། རྩོད་པ་རྒྱུན་རིང་བྱེད་མི་རྣམས་ཀྱིས་ད་དུང་རྩོད་པ་གནང་རྒྱུ་ཡིན། ཉིན་གུང་ཇ་གསོལ་བ་སོགས་བྱ་བ་ཕྲན་ཚེགས་ཡོད་ན་སྒྲུབ་ཆོག འོན་ཀྱང་གྲྭ་མང་ཕལ་ཆེ་བས་དཔེ་ཁྲིད་དཔེ་ཀློག་སོགས་ལ་འབད་པར་བྱ་བ་ཡིན། ཆུ་ཚོད་གསུམ་པར་ངེས་འབྱུང་གི་བསམ་པ་དང་ཐེག་ཆེན་གྱི་སྐྱབས་འགྲོ་སེམས་བསྐྱེད་སྦྲགས་མ་ཀུན་སློང་གཞི་བྱས་ཏེ། སྡིག་སྒྲིབ་སྦྱོང་བ་ཡིག་བརྒྱ། སྦྱོར་དྲུག་གསོལ་འདེབས། བཟང་སྤྱོད་སྨོན་ལམ། མདོ་གདུགས་སྒྲོལ་གསུམ་སོགས་འདོན་དགོས། ཆུ་ཚོད་གསུམ་དང་སྐར་བཞི་བཅུ་ནས་གྲྭ་མང་འཛིན་གྲྭ་སྤྱི་ལ་ཐུན་མོང་དུ་ལམ་རིམ་བློ་སྦྱོང་གི་ཆོས་ཁྲིད་སྐར་ཉི་ཤུ་ཙམ་ཡོད་པ་ལེགས་པར་གསན་ཞིང༌། ཆུ་ཚོད་བཞི་བ་ཙམ་ནས་ཉི་མ་རེས་མོས་ཀྱིས།བསྡུས་གྲྭ་དང༌། རྟགས་རིགས་སོགས་དཔེ་ཁྲིད་ཡོད། གཞུང་གསར་ཡན་ཆད་ཀྱི་འཛིན་གྲྭ་རྣམས་ཀྱིས། ཆུ་ཚོད་བཞི་དང་སྐར་མ་ལྔ་བཅུ་བར་དཔེ་ཀློག་སོགས་བྱ། དེ་ནས་ཆོས་རར་རྩོད་ཟླ་བསྒྲིགས་ནས་རྩོད་པ་གནང་རྒྱུ་དང༌། ཆུ་ཚོད་ལྔ་དང་སྐར་བཅོ་ལྔ་ནས་འཛིན་གྲྭ་སོ་སོ་སྐོར་ཚོགས་བྱས་ཏེ་སྐྱོར་སྦྱང་བྱེད་རྒྱུ། ཆུ་ཚོད་ལྔ་དང་སྐར་མ་སོ་ལྔ་ནས་འཛིན་གྲྭ་སོ་སོས་དམ་བཅའ་བཙུགས་ནས་རྩོད་པ་གནང་རྒྱུ་དང༌། ཆུ་ཚོད་ལྔ་དང་སྐར་མ་ལྔ་བཅུ་ནས་རྩོད་ཟླ་ཆུ་ཚོད་དྲུག་པར་བྱ་དགོས། དེ་ནས་རྩོད་པ་རྒྱུན་རིང་བྱེད་མི་རྣམས་ལས་ལྷག་རྣམས་གྲོལ། དགོང་ཇ་གསོལ། ཆུ་ཚོད་བརྒྱད་པའི་སྟེང་རང་མོས་ཀྱིས་དགེ་རྒན་སོ་སོའི་ནང་དཔེ་ཁྲིད་ཕེབས་རྒྱུ་དང༌། དགེ་རྒན་སོ་སོས་ཀྱང༌། རྩོད་རྒྱུགས། འཆད་རྒྱུགས། བློ་འཛིན་རྣམས་རེས་མོས་བྱས་ནས་རྒྱུགས་ལེགས་པར་ལེན། ཆུ་ཚོད་དགུ་ལྷག་ནས་བཅུ་ལྷག་བར་བློ་འཛིན་བྱེད་རྒྱུ་ཡིན། དེ་ནས་རང་ཤག་ནས་དཔེ་གཟིགས་དང་ཉིན་དེར་དཔེ་ཁྲིད་གནང་བའི་དོན་དང༌། བློ་ལྡོག་རྣམ་བཞི། བྱམས་སྙིང་རྗེ། སེམས་བསྐྱེད། བདག་མེད་སོགས་བློ་ཚོད་དང་བསྟུན་ནས་སྒོམ་པར་བྱ་དགོས། ཆུ་ཚོད་བཅུ་གཅིག་ནས་གཟིམ་ན་ཡང་སྒྲིག་ལམ་གྱི་ངོས་ནས་མི་ཆོག་པ་མེད། ཉལ་ཁར་ལྟུང་བཤགས་དང་སྤྱི་བཤགས་འདོན་ཞོར་ཕྱག་ཅི་ཐུབ་རེ་འཚལ། བསྔོ་བ་སྨོན་ལམ་བཟང་བོ་བྱ་བ་རྣམས་སོ། །སྤྱིར་བཏང་སློབ་གཉེར་གྱི་བར་གསེང་དུ། སྔོན་བྱོན་སྐྱེས་བུ་དམ་པའི་རྣམ་ཐར་ལ་བལྟ་བར་བྱ་རྒྱུ་དང༌། དཔེ་ཁྲིད་དང༌། དཔེ་ཀློག རྩོད་པ། བློ་འདོན་སོགས་ཀྱི་སྐབས་སུ། ཀུན་སློང་ཡག་པོ་དང༌། རྒྱུན་དུ་རང་སེམས་ལ་བརྟག་པ་ཧ་ཅང་གལ་ཆེ་བ་ཡིན། རིམ་པ་འདི་ནི་ཉིན་བཅོ་ལྔའི་མཚམས་ནས་ངལ་གསོ་ཉིན་གཅིག་ཡོད་པ་མ་གཏོགས་རྒྱུན་གྱི་ཆོས་སྤྱོད་ཀྱི་བྱ་བའི་རིམ་པ་ཡིན་ནོ། །རིས་མེད་སློབ་གླིང་གི་སློབ་མ་རྣམས་ཀྱིས་ཀུན་སློང་ཀུན་སྤྱོད་ཀྱིས་ཐར་བའི་རྒྱུ་ལ་འགྲོ་བའི་ཆོས་ལ་བརྩོན་པར་ཞུ། བཅའ་ཡིག་ཆེན་མོ་ན་གསལ་བའི་འགྲིག་ལམ་གཞིར་བཅས་ནས་སྒེར་སོ་སོས་ཉིན་ཞག་གཅིག་གི་ཆུ་ཚོད་ཉེར་བཞི་ལ་ཆོས་སྤྱོད་སོགས་ཀྱི་རིམ་པ་རེ་མིག་ཞིག་བཟོས་ནས་དུས་ཚོད་དམ་འཛིན་གནང་བར་ཞུ་ཞུ། སློབ་གླིང་འདི་ལ་མཚོན་ན་གྲྭ་བ་ཆེས་མང་བ་མ་ཟད་སློབ་སྦྱོང་ཡར་རྒྱས་འགྲོ་བ་ལ་བསམ་ན་ཕུལ་བྱུང་ཡིན་མོད། དེང་སང་དུས་དབང་གིས་བསྟན་འཛིན་ཡོང་མིན་སེམས་ཁྲེལ་ཆེར་ཡོད་པས་ངག་དབང་དངོས་གྲུབ་དཔལ་གྱིས་སློབ་ཚོགས་ལ་རེ་ཞུ་དང་བཅས་ཏེ་གུས་ཕུལ། དབུས་གཙང་ཕྱོགས་སུ་ཇོ་ནང་གི་དགོན་སྡེ་ཉེར་དགུ་ཙམ་ཡོད་པ་རྣམས་ལ་ཇོ་ནང་གི་བླ་སྤྲུལ་དང་འབྱོར་ལྡན་རྣམས་ཀྱིས་བཤད་སྒྲུབ་ལས་གསུམ་གྱི་བྱ་བ་ལ་རྒྱབ་སྐྱོར་རོགས་རམ་མཛད་པར་ཞུ། མདོ་སྨད་ཀྱི་ཇོ་ནང་གི་དགོན་སྡེ་རྣམས་ལ་མཚོན་ན་ཕལ་ཆེ་བ་བཤད་སྒྲུབ་ལས་རྟེན་བཞེངས་ཀྱི་རྒྱས་སྤྲོས་མང་ཆེ་བའི་སྐྱོན་ལས་ཉུང་བའི་སྐྱོན་མེད་པས་མ་དར་བ་རྣམས་སུ་དར་བར་བྱེད་རྒྱུ་གནད་དམ་པའོ། །ཉེ་ཆར་བདག་དབུས་གཙང་གི་ཇོ་ནང་གི་དགོན་སྡེ་བཅུ་ཕྲག་ལྷག་ལ་ཁོང་རྣམས་ཀྱི་རེ་བ་ལྟར་སོང་བ་ཡིན། བདག་གི་ཚོར་སྣང་ལ་རྟེན་བཞེངས་དང་བཤད་སྒྲུབ་གྲྭ་རྒྱུན་གང་གི་ཕྱོགས་ནས་བསྟན་པ་ལ་ལྷག་བསམ་ལྡན་པ་རྣམས་ཀྱིས་གཟིགས་སྐྱོང་གནང་ན་ཧ་ཅང་ཡག་པོ་འདུག་བསམ་པའི་སེམས་ཚོར་བྱུང་སོང་བས་ཀུན་ལ་ཐོས་པར་དྲྭ་སྟེང་ནས་རེ་བ་ཞུས་པ་ཡིན། བདག་ལྟ་བུ་ལ་མཚོན་ན་ནང་བསྟན་ཐམས་ཅད་ལ་འདྲ་བར་དགའ་དད་ཡོད་མོད་ཧ་ཅང་ཉམ་དམའ་བའི་ཇོ་ནང་འདིའི་བསྟན་པ་སླར་གསོའི་ཆེད་དུ་དྲྭ་སྟེང་ནས་གསར་ཁྱབ་མང་དུ་སྤེལ་བ་ཡིན། དར་རྒྱས་སོང་པའི་ཆོས་བརྒྱུད་སོགས་ཀྱིས་གསར་ཁྱབ་སྤེལ་མི་དགོས་ལ། དངོས་གནས་ཀྱི་ལོ་རྒྱུས་ཡིན་ཡང་གཞན་གྱིས་རང་དོན་ཙམ་ཞེན་པར་དོགས་སྲིད་མོད་དེ་ཙམ་མིན་ལགས། དངོས་གྲུབ་དཔལ་ནས།