ནང་བསྟན་རིག་གཞུང་སྤྱི་ཚོགས་རང་ལུགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ།
ནང་བསྟན་རིག་གཞུང་སྤྱི་ཚོགས་རང་ལུགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ། །
༼༡ནང་བསྟན་ཐོག་མར་བྱུང་རིམ་གྱི་ཡུལ་དུས་ཀྱི་གནས་བབས་བརྗོད་པའི་སྒོ་ནས་སྤྱི་ཚོགས་འདྲ་མཉམ་བསྐྲུན་པ།༽ནང་བསྟན་རིག་གཞུང་ཐོག་མར་བྱུང་རིམ་གྱི་དབང་དུ་བྱས་པ་ཡིན་ན་ཡང་རིགས་རུས་མཐོ་དམན་དང་དྲང་བདེན་མ་ཡིན་པའི་སྤྱི་ཚོགས་ལ་ཁ་གཏད་ཅིང་ངོ་རྒོལ་བྱས་ནས་འོང་བ་ཞིག་རེད། ནང་བསྟན་གྱི་སྟོན་པ་ཁོང་ཐོག་མར་སེར་སྐྱ་གྲོང་ཁྱེར་གྱི་རྒྱལ་བོའི་སྲས་སུ་འཁྲུངས་ཤིང༌། དེའི་སྐབས་ཀྱི་རྒྱ་གར་གྱི་གནས་བབས་ནི་འཆམ་མཐུན་མ་ཡིན་པའི་སྤྱི་ཚོགས་ཤིག་སྟེ། བྲམ་ཟེ་རྣམས་ཚངས་པའི་དབུ་ལས་བྱུང་བས་རིགས་དང་གོ་ས་མཐོན་པོར་བཞག་ནས། རིག་བྱེད་རྣམ་པ་བཞིའི་གཞུང་ལུགས་དག་གི་བདག་དབང་ཁོང་ཅག་ལས་གཞན་ལ་མེད་པ་དང༌། རིགས་རུས་གཞན་པ་རྣམས་ཀྱིས་དེ་ལ་བྲམ་ཟེ་རྣམས་ཀྱི་འགྲེལ་ཚུལ་ལས་ལོག་པ་འགྲེལ་བཤད་མི་ཆོག་པ་རེད། ད་དུང་དབྱར་དགུན་སྟོན་དཔྱིད་ཀྱི་བྱུང་རིམ་ཐམས་ཅད་བྲམ་ཟེ་རྣམས་ཀྱིས་ཆོ་ག་དང་མཆོད་སྦྱིན་སྤེལ་བ་ལྟ་བུའི་མཐུ་ལས་བྱུང་བར་མ་ཟད། དབུལ་བོ་དང་དམན་པ་སུ་ཞིག་ཡིན་ཡང་མི་ཤི་བ་ལྟ་བུའི་སྐབས་སུ་ཅི་ལྟར་བྱས་ཀྱང་བྲམ་ཟེ་རྣམས་ལ་ཡོན་མང་དུ་ཕུལ་དགོས་པའི་གནས་བབས་ཤིན་ཏུ་སྐྱོ་བ་ཞིག་རེད། རྒྱལ་རིགས་ཚངས་པའི་ལག་ལས་བྱུང་བས་ཆབ་སྲིད་ཀྱི་བདག་དབང་ཁོང་ཅག་ལས་གཞན་ལ་མེད། རྒྱལ་རིགས་ལ་བྲམ་ཟེའི་མདུན་ནས་རིག་བྱེད་བསླབ་པའི་བདག་དབང་ཡོད་ཀྱང༌། དེ་ལ་འགྲེལ་བཤད་བྱས་ཏེ་གཞན་ལ་སྟོན་པའི་དབང་མེད་ལ། བྲམ་ཟེ་རྣམས་ལ་རྒྱལ་བོའི་མཆོད་གནས་སུ་བཞུགས་ཏེ་དབུ་བླ་བྱེད་པའི་གོ་ས་ཡོད་ཀྱང་སྲིད་དབང་བདག་འཛུགས་བྱེད་པའི་དབང་ཆ་མེད། རྗེ་རིགས་རྣམས་ནི་ཚངས་བའི་བརླ་གཉིས་ལས་སྐྱེས་པ་ཡིན་པས་ཚོང་ལས་ཚེམ་བཟོ་སོགས་སྤྱི་ཚོགས་ཀྱི་ལས་གཉེར་མཐོ་རིམ་མང་བོ་ཁོང་ཅག་ལ་གཉེར་བའི་དབང་ཆ་ཡོད། དམངས་རིགས་རྣམས་ནི་ཚངས་པའི་རྐང་བ་གཉིས་ལས་སྐྱེས་པ་ཡིན་པས་གོང་གི་རིགས་གསུམ་གྱིས་སྒྲུབ་པར་མི་འདོད་པའི་གད་སྙིགས་བསལ་བ་དང་བ་གླང་འཚོ་སྐྱོང་སོགས་ཀྱི་བྱ་བ་བྱེད་དགོས། ད་དུང་རིགས་བཞི་བོ་གང་དུའང་མ་གཏོགས་པའི་རྡོལ་བའི་རིགས་ལྟ་བུ་རིགས་ཐོར་བུ་འགའ་ཡོད་ལ། དེ་དག་ཀྱང་ཚངས་བའི་རྐང་བ་ལས་བྱུང་བ་ཡིན་ཞིང༌། རིགས་དམན་རྡོལ་བ་དང་ཉ་བའི་རིགས་ལྟ་བུ་རྣམས་ཀྱི་ཁང་བའང་གྲོང་ཁྱེར་དུ་མཉམ་གཅིག་ཏུ་བྱེད་མི་ཆོག་པར་གྲོང་ལས་ཕྱི་རོལ་ཏུ་བྱེད་དགོས་པ་རེད། གལ་སྲིད་རིགས་དམན་པ་ཞིག་གིས་རིགས་མཐོན་པོ་ཞིག་ལ་ལག་པས་འཆང་ཙམ་བྱས་ཚེ། རིགས་མཐོན་པོ་དེས་རང་ལ་གྲིབ་ཕོག་པར་འདོད་ནས་གྲིབ་སེལ་གྱི་ཆོ་ག་འདོན་པ་དང༌། མཚམས་རེར་རིགས་དམན་པ་དེར་གཅར་རྡུང་བཅས་གཏོང་གི་ཡོད། འོན་ཀྱང་རིག་བྱེད་ཀྱི་གཞུང་ལུགས་ཁག་དང༌། ཡུལ་དེའི་མི་བྱིངས་ཀྱི་འདོད་ཚུལ་ལ་རིགས་སོ་སོ་ལ་དང་པོ་ཉིད་ནས་རང་ཉིད་ཀྱི་དབང་ནུས་ལ་ཚད་བཟུང་ཡོད་པ་དང༌། མྀ་སོ་སོའི་ངོས་ནས་ཀྱང་དེ་ལྟར་ངོས་ལེན་ལེགས་པར་བྱས་ཏེ་འཚོ་བ་ནི་བདེ་སྐྱིད་ཅིག་ཡིན་པར་ཤོད་ཀྱིན་ཡོད། དེ་ལྟ་ནའང་མི་ཐམས་ཅད་དང་པོ་ཉིད་ནས་གཞུང་ལུགས་དང་རིག་པའི་གནས་ལ་མཁས་པ་མ་ཡིན་པར། རིམ་གྱིས་སྦྱང་ན་མཁས་པར་འགྱུར་འགྲོ་བ་དང༌། བྱིས་པ་ཆུང་ཆུང་ཞིག་ལ་དང་ཐོག་རང་ཉིད་སྐྱེས་མ་ཐག་པ་ན་ལས་ཀ་གཉེར་བའི་ནུས་པ་མེད་ཀྱང༌། ན་ཚོད་རིམ་གྱིས་སྨིན་པ་ན་ཤེད་ཤུགས་རྒྱས་པ་སོགས་ཆོས་ཉིད་ཀྱིས་གྲུབ་སྟངས་དང་གཏན་ནས་མི་མཐུན་པ་ཞིག་ཡིན་པར་མ་ཟད། རིགས་རུས་ཟེར་བ་དེར་མཐའ་གཅིག་ཏུ་ཡིད་རྟོན་རུང་བ་ཞིག་མ་ཡིན་པར། ཕོ་མོ་དག་གི་འབྲེལ་ལམ་མངོན་ལྐོག་མི་མཐུན་པའི་བྱ་བ་ལ་བརྟེན་ནས། རིགས་དམན་པའི་སྐྱེས་པའི་བརྒྱུད་པ་རིགས་མཐོ་བའི་ཆུང་མ་དག་ལ་སྐྱེ་བ་ཡོད་པར་མ་ཟད། དེ་འདྲའི་བུ་ཕྲུག་དག་རིགས་མཐོན་པོ་ཡིན་པར་བྱས་པའང་གྲངས་ཀ་མང་པོ་བྱུང་མྱོང་ཡོད་པས། རིགས་ཞེས་པ་ལ་མཐའ་གཅིག་ཏུ་ཁ་ཚོན་གཅོད་ནུས་པ་སུ་ཞིག་ལ་ཡོད། འོན་ཀྱང་རིགས་དམན་པར་སྐྱེས་པའི་བུ་ཕྲུག་དག་ལ་སློབ་སྦྱོང་གི་གོ་སྐབས་མེད་པས། རང་གི་རྟོག་པ་སད་དེ་གནས་ལུགས་དང་མཐུན་པའི་སྐད་ཆ་བཤད་ཐུབ་པ་དང་གནས་ལུགས་ལ་འཆམ་པའི་ངོ་རྒོལ་བྱེད་ནུས་པ་བྱུང་ཐུབ་ཀྱིན་མེད་ལ། ལྷག་པར་དུ་རིགས་དམན་པར་བརྩི་བའི་མི་ཞིག་གིས་སྐད་ཆ་བཤད་པ་ལ་ཡིད་རྟོན་བྱེད་མཁན་དཀོན་པར་མ་ཟད། རིགས་དམན་པའི་མི་རྣམས་ཀྱིས་ནང་ཕན་ཚུན་ལ་ཡང་གདེང་འཇོག་མི་བྱེད་པར། རང་གི་གཉའ་ནས་གནོན་མཁན་གྱི་རྒྱལ་བོ་དང་བྲམ་ཟེའི་མི་རྣམས་ལ་སེམས་ནས་ལྷ་བཞིན་དུ་བཀུར་བཞིན་ཡོད། དུས་སྐབས་དེ་ལྟ་བུའི་འདྲ་མཉམ་དང་འཆམ་མཐུན་མ་ཡིན་པའི་གནས་བབས་འོག་བཅོམ་ལྡན་འདས་ཀྱིས་གསུངས་པའི་ཆོས་ནི། སེམས་ཅན་སྤྱི་དང་ལྷག་པར་དུ་འཁོས་དམན་པ་སྡུག་བསྔལ་མནར་གཅོད་འོག་གི་འགྲོ་བ་རྣམས་ལ་གདུང་བ་སེལ་བྱེད་ཀྱི་སྨན་དཀར་བོ་ཆིག་ཐུབ་ལྟ་བུ་ཞིག་ཏུ་བྱུང་བ་རེད། བཅོམ་ལྡན་འདས་ཀྱིས། རིགས་མི་གཙོ། རུས་མི་གཙོ། བསླབ་པ་རིན་པོ་ཆེ་གཙོ་བོ་ཡིན། ཞེས་མཆོད་གནས་དང་ཡོན་ཏན་གྱི་མཐོ་དམན་ཚང་མ་བསླབ་པ་ཤེས་རབ་ཡོད་མེད་དང༌། ཏིང་ངེ་འཛིན་བརྟན་མིན་དང༌། ཚུལ་ཁྲིམས་གཙང་མིན་བཅས་ཀྱིས་མིའི་རིན་ཐང་གི་མཐོ་དམན་ཕྱེ་བའི་སྲོལ་བཞག་པ་དེ། དོན་དངོས་ཐོག་ནས་འཇིག་རྟེན་འདྲ་མཉམ་གྱི་སྤོབ་པ་བསྐྱེད་དུ་བཅུག་པ་རེད་ལ། འདྲ་མཉམ་ལ་བྱ་བ་བྱས་ཤིང་བྱས་རྗེས་བཞག་པའང་རེད། དཻར་མ་ཟད་ཡུལ་དེ་ག་ན་རླབས་ཕྲེང་ལྟར་འཕྱུར་བཞིན་པའི་སྤྱི་ཚོགས་ཀྱི་གོམས་གཤིས་དང་གཞུང་ལུགས་ཀྱི་ཐོག་ལ། འདྲ་མཉམ་གྱི་ལྟ་བ་གཞི་བཟུང་ནས་རྒོལ་བ་ཤུགས་ཆེན་པོ་ཞིག་ཀྱང་བཏབ་རེད། དེས་ན་བསླབ་ན་སུ་ཡིན་ཡང་བཟང་པོར་འགྱུར་ཆོག་པའི་གནས་ལུགས་ནི་རིགས་པ་དང་ཉམས་མྱོང་གིས་གྲུབ་ཆོག་པ་ཞིག་ཡིན་པས། སངས་རྒྱས་ཀྱིས་རིགས་དམན་པ་ཞེས་ཐ་མར་བཅད་དུ་མེད་པའི་འདྲ་མཉམ་གཅིག་བཞག་པའོ། །༢དེར་མ་ཟད་ནང་བསྟན་པས་འགྲོ་བ་སེམས་ཅན་ཡོངས་རྫོགས་ལ་བྱམས་བརྩེས་ཁྱབ་པའི་འདྲ་མཉམ་བཟུང་བ། ད་དུང་འགྲོ་བ་མི་ཙམ་ལས་བརྒལ་བའི་སྲོག་ཆགས་ཆེ་ཕྲ་ཡོད་ཚད་ལའང་འདྲ་མཉམ་གྱི་གནས་ལུགས་རིགས་པ་དང་མཐུན་པའི་འགྲེལ་བཤད་དང༌། རིགས་པ་དང་མཐུན་པའི་ལག་ལེན་བྱས་ཤིང་དེའི་སྲོལ་བཏོད་པ་རེད། སེམས་ཅན་ཆུང་ངུ་དང་ཆེན་པོ་སུ་ཡིན་ཡང་རྣམ་དཔྱོད་ཡོད་མེད་ཀྱི་ཁྱད་འགྱུར་ཙམ་ལས། ལུས་སྟེང་ལ་ན་ཚ་དང་སྡུག་བསྔལ་འབྱུང་བཞིན་ཡོད་པ་དང༌། སེམས་སྟེང་ནས་བདེ་བར་འདོད་བཞིན་ཡོད་པ་གཅིག་མཚུངས་རེད། དཔེར་ན་མི་ཞིག་ལྟོག་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་མཆེད་པ་དང༌། དུད་འགྲོ་ཞིག་ལྟོག་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་སྐྱེ་བ་འདྲ་འདྲ་རེད་ལ། དེ་བཞིན་དུ། མཚོན་གྱིས་བསྣུན་པའམ། ནད་ཀྱིས་གཟིར་བའམ། གཞན་གྱིས་མནར་གཅོད་གཏོང་བ་སོགས་ཆ་གང་ཐད་ནས། མི་དང་སྲོག་ཆགས་གཞན་གྱི་བར་ལ་འདྲ་མཉམ་གྱི་གནས་ལུགས་དེ་དོགས་པ་མེད་པར་གཟིགས་ཏེ། མི་དང་འགྲོ་བ་གཞན་ལ་འདྲ་མཉམ་གྱི་སེམས་པ་སྐྱེ་དགོས་ཚུལ་དང༌། ཉམ་ཆུང་སེམས་ཅན་སུ་ལའང་གནོད་པར་བྱེད་མི་འོས་ཚུལ་གསལ་བར་གསུངས་པར་མ་ཟད། འགྲོ་བ་གཞན་གྱི་བདེ་སྡུག་རང་གི་བདེ་སྡུག་ལ་དཔེ་སྦྱར་ནས་བསམ་དགོས་ཚུལ་དང༌། དེ་ལྟར་བསམ་ན་བརྩེ་བ་དང་འདྲ་མཉམ་གྱི་བསམ་སྤྱོད་སྐྱེ་ཚུལ་བཅས་བསྟན་པ་རེད། དེའང་ཕྱོགས་ཅིག་ནས་བལྟས་ན། དུད་འགྲོ་གསོད་པ་ཆོས་སུ་འཛིན་པ་དང་དགེ་ལས་སུ་ལྟ་བ་ལ་རིགས་པ་ཡང་དག་གི་ཤགས་འགྱེད་ཅིག་ཀྱང་བྱས་པ་རེད། ཉམ་ཆུང་ལ་བརྩེ་བ་དང་འདྲ་མཉམ་གྱི་ལྟ་བ་ནི། སངས་རྒྱས་ཀྱི་གསུང་གང་ཞིག་ལ་མཇལ་ནའང་ཐམས་ཅད་ཀྱི་ནང་དུ་གཞི་རྩའི་ལྟ་གྲུབ་ཁོ་ན་བྱས་ཏེ་མ་གསུངས་པ་གཅིག་ཀྱང་མེད། བཅོམ་ལྡན་འདས་ནི་ཁ་ཙམ་ཚིག་ཙམ་མ་ཡིན་པའི་དོན་དངོས་བདེན་འཚོལ་ཐོག་ནས་བལྟས་ན། གཞན་ཕན་ཁོ་ན་བྱས་ཏེ་རང་ཉིད་ཡལ་བར་དོར་ཞིང༌། རང་ལ་འགྲོ་བ་གཞན་གྱི་ཞབས་ཕྱི་བ་དང་ལམ་སྟོན་བྱེད་མཁན་ཞིག་གི་ཐུགས་དགོངས་བཞག་པ་ལས། སློབ་མ་མང་བོའི་ནང་ནས་ཆེ་ཚུགས་དང་ང་རྒྱལ་བྱས་ཏེ། རང་ཉིད་ཀྱི་ལས་དོན་གཉེར་མཁན་ཞིག་མ་ཡིན་པར་གསལ་བོར་རྟོགས་ཐུབ། ཁོང་གིས་ནམ་ཡང་ལས་ཀ་ཐམས་ཅད་ལ་ཤེས་རབ་དང་ལྡན་པའི་ལྟ་གྲུབ་གཞིར་བཟུང་ནས་བྱེད་པ་ལས། ཟེར་སྲོལ་དང་སྔོན་བྱུང་གི་ལྷ་སྒྲུང་ཙམ་ལ་རྩ་བ་ནས་ཡིད་རྟོན་བྱེད་ཀྱིན་མེད། ཁོང་གི་ལྟ་གྲུབ་ཀྱི་རིགས་ལམ་ནི་སེམས་ཅན་གཞན་ལ་ཕན་བདེ་སྒྲུབ་ཐབས་དང་མ་འབྲེལ་བ་གཅིག་ཀྱང་མེད་པར་མ་ཟད། རང་གི་བདེ་སྐྱིད་ཀྱང་གཞན་ཕན་གྱི་ལས་དོན་ལས་རྙེད་ཐུབ་པའི་རླབས་ཆེན་གྱི་ལས་རིགས་བླ་ན་མེད་པ་དེ་ཡིན། དེས་ན་སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་བརྩེ་བའི་མ། བང་མཛོད་ཆེན་པོ་ཡིན་ལ། གུ་ཡངས་ཀྱི་ལས་གཉེར་བ་ཆེན་པོ་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་མི་ཚེ་གཞན་དོན་དུ་སྐྱེལ་མཁན་ཡིན་ལ། འགྲོ་བ་ལ་ཞི་བདེ་བསྐྲུན་མཁན་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་འཁོས་དམན་ཉམ་ཆུང་རྣམས་ཀྱི་མགོན་དང་དཔུང་གཉེན་ཡིན་ལ། སྤྱི་ཚོགས་ཤེས་རབ་སྩོལ་བའི་སྟོན་པ་བཟང་པོ་ཞིག་ཡིན། ནང་ཆོས་ནི་ཡུལ་གྱི་རྒྱལ་ཁྲིམས་སྲུང་དགོས་པ་སོགས་ཡུལ་ཆོས་དང་བསྟུན་དགོས་པར་འདུལ་བ་ལུང་ན་གསུངས་ཡོད་པས་སྤྱི་ཚོགས་རང་ལུགས་དང་འགལ་བའི་ལྟ་གྲུབ་མེད་པ་དང༌། སྲིད་ལ་ཐེར་གཏོགས་མེད་པར་གང་ཟག་རང་ཉིད་ཆོས་ལ་དད་མོས་ཀྱི་རང་དབང་གཙང་མ་ཡོད་ལ། གང་ཟག་གཞན་ཆོས་ལ་དད་མོས་བྱེད་མིན་ཁོ་རང་ལ་རང་དབང་ལྡན་པར་ནང་ཆོས་ལས་གསུངས་ལ། ཇི་སྐད་དུ། ངས་ནི་ཁྱོད་ལ་ཐར་བའི་ལམ་སྟོན་ནོ། །ཐར་བ་ཐོབ་པ་རང་ལ་རག་ལས་ཀྱིས། །ཞེས་གསུངས་ལ། སེམས་ཅན་སོ་སོ་ཁམས་དབང་མོས་པ་སྣ་ཚོགས་པ་ཡིན་པས་ནང་ཆོས་ལ་དད་མིན་རང་ལ་རང་དབང་ལྡན་པ་ཡིན། འོན་ཀྱང་གང་ཟག་སུ་ཡིན་ཀྱང་རང་ལ་མོས་པ་ཡོད་ན་ནང་ཆོས་ལ་སློབ་སྦྱོང་འགོག་པ་ནམ་ཡང་རིགས་མ་ཡིན། ནང་ཆོས་ལ་སློབ་སྦྱོང་གལ་ཆེ་བ་ཡིན་པ་ནི། སློབ་དཔོན་དབྱིག་གཉེན་གྱིས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱེད་པའི་ཐབས་མེད་ལ། །ཞེས་སོགས་གསུངས་ལ། ནང་ཆོས་དད་པ་དང་ཤེས་རབ་ཟུང་འབྲེལ་དུ་བྱས་ནས་འཛིན་སྐྱོང་གནང་དགོས་པའོ། །༼༣ནང་བསྟན་གྱི་ལྟ་གྲུབ་དང་འདྲ་མཉམ་ལ་ཀྲུང་ཀོ་གུང་ཁྲན་ཏང་གི་རྒྱལ་སྤྱིའི་གཙོ་འཛིན་གྱིས་ཐུགས་གནང་བཟང་བོ་གནང་བ།༽ ཀྲུང་གོ་གུང་ཁྲན་ཏང་གི་རྒྱལ་སྤྱིའི་གཙོ་འཛིན་ཞེས་ཅིན་ཕིན་གྱིས་མཉམ་འགྲེལ་རྒྱལ་ཚོགས་སྟེང་དུ་གསུང་བཤད་གནང་བར་ཡང༌། ཉེ་བའི་ཆར་འདིར་ཀྲུང་གོའི་མང་ཚོགས་ཁྲོད་མི་གང་མང་ཤིག་གིས་སངས་རྒྱས་ཆོས་ལུགས་སློབ་རྒྱུ་ཟེར་ནས་རྨོངས་དད་རྐྱང་བའི་གནས་སུ་ལྷུང་གིན་འདུག འཇིག་རྟེན་པ་དག་མ་ཟད་རབ་བྱུང་གི་སྡེ་མི་ཉུང་བ་ཞིག་ཀྱང་དེ་བཞིན་རྨོངས་ནས་འདུག དེ་འདྲ་ཡིན་ཕྱིན་ཆོས་སློབ་པ་དག་གིས་ཀྱང་སངས་རྒྱས་ཀྱིས་བསྟན་པའི་ཆོས་དང་ཆོས་དེ་ཇི་ལྟར་སློབ་དགོས་མ་ཤེས་པར་མགོ་འཁོར་ནས་རྒྱུན་པར་ར་མིན་ལུག་མིན་ཅིག་མ་གཏོགས་ཤེས་བཞིན་མེད་པའི་རྒྱུ་རྐྱེན་གཙོ་བོ་དེ། སངས་རྒྱས་ཀྱི་གསུང་རབ་ལ་ནན་གྱིས་མ་བཀླགས་པས་སྐྱོན་རེད། གལ་ཏེ་རྡོ་རྗེ་གཅོད་པ་ལྟ་བུའི་གསུང་རིན་ཐང་དང་ལྡན་པ་གཅིག་ལ་ཉམས་ཞིབ་བྱེད་ཐུབ་ན་ད་གདོད་ཆོས་སློབ་པའི་ཉིང་དགོས་སོགས་གནད་འགག་དག་ཡོངས་སུ་རྟོགས་སྲིད། མཱ་ཁེ་སུའི་གུང་ཁྲན་རིང་ལུགས་ཀྱི་ཆེས་གཏིང་ཟབ་པའི་འདུ་ཤེས་འཛིན་སྟངས་ཀྱང་འཛམ་གླིང་ཆ་མཐུན་དང་མི་སོ་སོའི་ལྟོ་གོས་གནས་མལ་སོགས་འདྲ་མཉམ་འཛུགས་རྒྱུ་དེ་རེད། དེ་མིན་དཀོན་མཆོག་དང་འཇིག་རྟེན་བྱེད་པོ་ཁོ་ན་ལ་རེ་ལྟོས་མི་འཛིན་པར། མི་སོ་སོའི་རང་རང་གི་འཇིག་རྟེན་རང་གིས་འབད་པ་དང་གསར་བཏོད་ཀྱི་སྟོབས་ཤུགས་ལ་བརྟེན་ནས་གྲུབ་དགོས་པའི་གནས་ལུགས་ཤིག་ཀྱང་བསྟན་ཡོད་པ་ཡིན། འདི་དག་ནི་སྟོན་པ་ཤཱཀྱ་ཐུབ་པས་ཀྱང་ལོ་སྟོང་ཁ་ཤས་ཀྱི་ཡར་སྔོན་ནས་སེམས་ཅན་རྣམས་ལ་གསལ་བོ་གསུངས་འདུག་པ་ནི། རྒྱུ་ས་བོན་ཅི་ཞིག་བཏབ་པ་ཡིན་ན་འབྲས་བུ་དེ་ལྟར་འབྱུང་རྒྱུ་ཡིན་པ་གསལ་བོ་བརྗོད་འདུག ད་དུང་ལས་དབང་ལ་བསྒྱུར་བཀོད་གཏོང་བ་ནི་གཙོ་བོ་རང་ཉིད་ལ་རག་ལས་ཡོད་པས། རང་ཉིད་ཀྱིས་སྒོམ་སྒྲུབ་སོགས་ལ་ནན་ཏན་བྱ་དགོས། དེ་མིན་སངས་རྒྱས་ཀྱིས་ནི་ཆོས་རྣམས་རང་བཞིན་གྱིས་མ་གྲུབ་པའི་གནས་ལུགས་འདོད་བཞིན་ཡོད་པ་ལས། སྣང་ཚུལ་ཕྱོགས་རེ་ཞིག་ལ་འགྲེལ་བཤད་བརྒྱབ་ན་ཁོང་གི་དགོངས་པ་གཞི་ནས་མ་རྟོགས་པ་རེད། དེ་བས་གུང་ཁྲན་ཏང་མི་ཞིག་ཡིན་ན་སྟོན་པ་ཤཱཀྱ་ཐུབ་པའི་མི་ཆོས་རིག་པ། གཞན་ཕན་སོགས་ལ་བློ་སྦྱོང་ལེགས་པོ་བྱས་ན་མི་ཆོག་པ་གང་ཡང་ཡོད་མ་རེད། ཁོང་གི་གསུང་ལ་ཉན་ནས་རང་རྒྱུད་ན་འདོད་ཆགས་ཞེ་སྡང་གཏི་མུག་སོགས་མེད་པར་བཟོས་ན་དེ་བས་ཀྱང་ཅིའི་མི་ཆོགསྟོན་པ་ཤཱཀྱ་ཐུབ་པའི་གསུང་ལ་ཉན་སློབ་ཡིན་པ་རྒྱུ་མཚན་དུ་བྱས་ནས་ངས་ད་ནས་བཟུང་གུང་ཁྲན་ཏང་གི་ལངས་ཕྱོགས་ལ་རྒྱབ་འགལ་བྱས་སོང་བར་མི་འདོད། ད་དུང་རང་ཉིད་ལྷ་ཡོད་སྨྲ་བར་གྱུར་བ་ན་མཱ་ཁེ་སིའི་ལྷ་མེད་སྨྲ་བ་དང་འགལ་བར་ལྟ་བའི་བསམ་བློ་ནི་ནོར་འཁྲུལ་ཁོ་ན་ཡིན། སྟོན་པ་ཤཱཀྱ་ཐུབ་པའི་གསུང་ལའང་ཕྱོགས་སོ་སོ་ནས་གོ་བ་གཏིང་ཟབ་པ་ལེན་རྒྱུ་ཡོད་པས་བཤད་ཡམས་ཙམ་གྱིས་འགྲེལ་རྒྱག་པ་ནི་གླེན་པའི་ངང་ཚུལ་བཟུང་བ་ཁོ་ན་ལས་མ་འདས། དེའི་ཕྱིར་གུང་ཁྲན་ཏང་མིས་སངས་རྒྱས་ཆོས་ལུགས་སློབ་ཆོག་གམ་ཟེར་ན། དྲང་མོ་བཤད་ན། ཧ་ཅང་སློབ་འོས་པ་ཞིག་ཡིན། ལྷག་ཏུ་ཁོང་གིས་གསུངས་བའི་སྙིང་རྗེ་ཆེན་པོ་དང༌། སྒེར་སེམས་མེད་པ་འདི་དག་ཅིས་ཀྱང་སློབ་དགོས། ཞེས་གཏམ་བཤད་རླབས་ཆེ་ཞིང་ཉིང་དོན་ལྡན་པ་ཞིག་གསུངས་འདུག གསུང་དེས་དཔག་ན། སྲིད་འཛིན་ཁོང་གིས་ད་སྔོན་ལ་ནང་བསྟན་ལ་ཕྱག་སྐོར་ཙམ་མ་ཡིན་པའི་ཡུན་རིང་གི་དུས་ཚོད་སྤྱད་ནས་སློབ་སྦྱོང་བྱས་ཡོད་པར་མ་ཟད། ནང་ཆོས་ཀྱི་ཤེས་རབ་དང་བྱམས་བརྩེས་ཁོང་གི་ཐུགས་རྒྱུད་ལ་སྤྲོ་བ་སྐྱེས་ཡོད་པ་འདྲ། ༼༤ནང་བསྟན་གཞུང་ལུགས་གཞིར་བཟུང་གི་ཀུན་སྤྱོད་ཀྱིས་སྒོ་མང་བོ་ནས་ཕན་པ་རླབས་ཆེན་ལྡན་ཚུལ།༽ ནང་བའི་གཞུང་ལུགས་ནི་མི་ཚེའི་ཁ་ཕྱོགས་སྟོན་པའི་གསུང་རྩོམ་རྐྱང་བ་ལས་གྲུབ་པ་ཞིག་ཡིན་པ་ལས། ལྷས་སྤྲིངས་བའི་བཅའ་ཡིག་དང་སྒྲིག་ཡིག་ལྟ་བུ་གཅིག་ཀྱང་མེད། སྟོན་པ་ཁོང་ཉིད་ཀྱང་བདེ་སྡུག་འདོར་ལེན་གྱི་ཐབས་ཚུལ་མི་ཤེས་མཁན་ལ་ལམ་སྟོན་གྱི་དགེ་རྒན་ནམ་གནས་ལུགས་སྟོན་པ་པོ་ཙམ་ཞིག་ཡིན་པ་ལས། བདེ་བ་དང་སྡུག་བསྔལ་གྱི་བྱེད་པ་པོ་གཏན་ནས་མིན། དེ་འདྲའི་བྱེད་པ་པོ་ཞིག་དོན་ལའང་ཁས་ལེན་པ་མ་ཡིན་པར། མཆོག་སངས་རྒྱས་ནས་དམན་པ་གྲོག་འབུར་ཡན་ཆད་རང་རང་གིས་རང་རང་ཁ་ལོ་བསྒྱུར་ཆོག་པ་དང་བསྒྱུར་བཞིན་པའི་གནས་ལུགས་རྣམ་དག་སྨྲ་ཞིང༌། རང་གིས་རང་ཉིད་ལེགས་པ་དང་ཉེས་པའི་གནས་སུ་ཁྲིད་པ་དང༌། ལེགས་ཉེས་བླང་དོར་གྱི་ནུས་པ་ཡང་རང་རང་སོ་སོ་ལ་ཡོད་པ་འདི་ཡང་ནང་བ་སངས་རྒྱས་པའི་འདྲ་མཉམ་གྱི་གཞི་རྩིའི་ལྟ་གྲུབ་གྱི་རྨང་གཞི་གཅིག་རེད། ཀུན་སྤྱོད་ཀྱི་ཐད་ནས་བསམ་ན་ཡང༌། གལ་ཏེ་འཇིག་རྟེན་འདིར་མི་ཞིག་གིས་འདུལ་བ་ནས་གསུངས་པའི་བསླབ་པའི་སྒོ་ཀུན་ལ་བག་ཟོན་བྱས་ཏེ་བསྲུང་ནུས་ན་ལྟ་ཅི། ཕར་ཆེར་རམ་ཕྱེད་ཉུང་ཤོས་ཤིག་ལེགས་པར་སྤྱོད་ན་ཡང་འཇིག་རྟེན་མི་ཆོས་དཔེ་སྟོན་བྱ་ཡུལ་གྱི་དམ་པ་རྣལ་མ་ཞིག་ཡིན་པར་གདོན་མི་ཟ་སྟེ། ཕམ་པ་བཞི་ལས་ཚུལ་བཞིན་བག་ཡོད་པར་གནས་པའི་གང་ཟག་ཞིག་ལ་མཚོན་ན། མི་ཚངས་སྤྱོད་སྤངས་པས་བཟའ་ཚང་དང་བུ་ཕྲུག་གི་ཆེད་དུ་མདུར་རྒྱུག་གི་ལས་ཀ་སྣ་ཚོགས་ཀྱི་གསེབ་ལས་བྱུང་བའི་ཀུན་སྤྱོད་ཉམས་པའི་སྤྱོད་ལམ་དག་གི་བྱིང་ལས་ཐར་བས་ན། འཇིག་རྟེན་འདིར་ལས་ཀ་ཉོག་འཛིང་ཅན་ཤིན་ཏུ་ཡ་ང་བ་མང་བོ་བུ་ཕྲུག་དང་བཟའ་ཚང་གི་ལས་དོན་ཁོ་ན་ལས་མཆེད་པ་མ་ཡིན་ནམ། མ་བྱིན་ལེན་དང་མི་ཆོས་བླ་མ་སྨྲར་བ་དང་སྲོག་གཅོད་སྤངས་པས་བརྐུ་འཕྲོག་དང་མགོ་སྐོར་གྱི་སྒོ་ནས་ལོངས་སྤྱོད་གཡོ་ལེན་རྩ་བ་ནས་དོར་བ་འདིས་ཀྱང་ཉེས་སྤྱོད་ཀྱི་མ་ཡུམ་མེད་པར་བྱས་པ་ཡིན་ཏེ། དེང་དུས་སུ་མཚོན་ནས་བཤད་ན། མི་རྣམས་དཔལ་འབྱོར་གྱི་རྗེས་སུ་ཁ་གདངས་ཞིང་ལག་བཟེད་དྲགས་པས་གཡོ་འཁྲུལ་གྱི་གར་འཆམ་ཇི་འདྲ་ཞིག་སྤྲུལ་དགོས་ནའང་ཚམ་ཚོམ་མེད་པའི་ཚད་དུ་སླེབས་ཡོད་པས་སོ། །ཁྲ་ཁྲ་འུར་འུར་གྱིས་འགེངས་བའི་ཞིང་ཁམས་འདི་ནས་མི་ཞིག་གིས་ལོངས་སྤྱོད་ཀྱི་ཆེད་དུ་གཡོ་ཁྲམ་མི་བྱེད་ཅིང་བཟའ་ཚང་གི་ཆེད་དུ་བདེན་དོན་མི་འདོར་བ་ཞིག་ཡོང་ན་དེ་ག་ཙམ་ཡང་འཇིག་རྟེན་ཕུལ་བྱུང་གི་སྐྱེས་བུར་འབོད་ན་མི་མཐུན་པ་ཅི་ཞིག་ཡོད་སྲིད་ཨང༌། ད་དུང་རྩ་ཉག་མ་གཅིག་ཀྱང་མི་གཅོད་པར་མ་ཟད་རྩ་སྔོན་དུ་གཤང་གཅིའི་རིགས་ཙམ་ཡང་མི་འདོར་བར་གསུངས་པས་སྐྱེ་དངོས་སྲུང་སྐྱོབ་ལ་ཡང་འདི་ལས་ཕྲ་བ་ཞིག་སུས་ཀྱང་ཁྲིམས་སུ་བྱས་མྱོང་མེད་ལ། རིགས་དང་རུས་ཀྱི་མཐོ་དམན་སོགས་མིང་རྐྱང་གིས་ལམ་ལུགས་ལས་བརྒལ་ཏེ་སོ་སོའི་ཤེས་རབ་དང་ཏིང་འཛིན་སོགས་ནང་གི་ཡོན་ཏན་བསླབ་པས་དབྱེ་བ་འབྱེད་པས་ཕྱིར་ན་འདྲ་མཉམ་ཡང་འདི་ལས་སྔ་ཤོས་སུ་གང་གིས་ཀྱང་ཕྱེས་མེད་ཅིང༌། བསྐོ་བཞག་སོགས་ལ་ཚུལ་ཤིང་འགྲེམ་པ་དང་སྤྲོ་བ་འདྲི་བ་སོགས་ཀྱིས་མང་གཙོ་ཁོ་ནར་མ་ཟད། གསོ་སྦྱོང་གི་གནས་གཏན་ཁེལ་བྱེད་པ་ལྟ་བུར་ཡང་གང་ཟག་གཅིག་གིས་ཐག་གཅོད་རྐྱང་མིན་པར་བློ་མཐུན་བྱ་དགོས་པར་གསུངས་པས་འདི་ལས་སྔ་བའི་མང་གཙོའི་ལམ་ཁ་ཡང་སྤུས་དག་ཅིག་གང་ན་དབྱེ་མྱོང༌། གཞན་ཡང་འགྲོ་འཆག་ཉལ་འདུག་གི་སྤྱོད་ལམ་ཚུལ་མཐུན་བག་ཡོད་པའི་ཞི་དུལ་གྱི་སྤྱོད་ལམ་བྱེད་སྟངས་སྐོར་དང༌། ཆོས་གོས་གསུམ་གྱིས་མཚོན་ཏེ་དགེ་སྦྱོང་གི་གོས་བཅུ་གསུམ་སོགས་གྲ་འགྲིག་དག་གཙང་གི་སྒོ་ནས་ནབ་ཚུལ། ཟས་ཁམ་གང་ངམ་གོས་ལག་མཐིལ་ཙམ་ཡང་སྦྱིན་བདག་གི་རྒྱུ་ཆུད་ཟོན་པར་བྱེད་མི་ཆོག་པ་རྣམས་ཀྱིས་མཚོན་ཏེ་ཆད་ལྷག་དང་མ་འཐུས་པ་ཅུང་ཟད་ཀྱང་མི་མངའ་བ་འདུལ་བ་འདི་ཉིད་ལས་གཞན་སྲིད་པའི་ཁྱོན་ཀུན་ན་ཡོད་རེ་སྐན་ནོ། །དེས་ན་ཀུན་སྤྱོད་ཀྱིས་གཞན་གྱིས་ཡིད་ལ་དང་བ་སྐྱེ་བར་བྱེད་པའོ། །ཆོས་འདུལ་བ་ལ་གནས་པའི་གང་ཟག་རྣམས་ཀྱིས་ཉེས་པ་རང་སེལ་དང་ཡོན་ཏན་རང་ལེན་བྱེད་པའི་ལམ་ལས་མ་བསྐུལ་རང་བཞིན་གྱིས་ཚུལ་མཐུན་དུ་བག་ཡོད་བྱེད་པ་ལས། འདི་ལ་རྒྱལ་བོའི་ཁྲིམས་དང༌། དབྱུག་པའི་སྟེང་མ་གནོན་མཁན་གང་ཡང་མེད་པ་མངོན་གསལ་སྨྲ་མི་དགོས་ཤིང༌། ཀུན་སྤྱོད་དང་ཤེས་རིག་ཡར་རྒྱས་སོགས་ཚད་མཐོ་བའི་མི་རིགས་ཤིག་གི་སྒྲིག་ལམ་དང་གནས་སྟངས་རྣམས་ཀྱང་ཆ་གང་ཐད་ནས་རྒྱལ་ཁྲིམས་དང་དབྱུག་གནོན་ཁོ་ནས་འཇིགས་སྐུལ་འོག་ཏུ་གནས་མི་དགོས་པར་རང་བསམ་རང་ཤེས་ཀྱིས་གནས་ཐུབ་པ་ཡིན་ནོ། །སྤྱིར་བཏང་ནས་བཤད་ན་ཉེས་སྤྱོད་ཡོད་ཚད་ཆོས་ཀྱི་གནས་ཚུལ་དེ་གང་ཡིན་མི་ཤེས་པའི་དབང་གིས་སམ། ཤེས་ཀྱང་སྲེད་པ་ཤུགས་དྲགས་པས་འདོར་ལེན་མི་ནུས་པའམ། འདོད་ཐོག་ཏུ་མ་འཁེལ་བའི་དབང་གིས་སེམས་འཁྲུག་པ་གསུམ་པོ་གང་རུང་ལས་བྱུང་བར་ངེས་པས། འདི་དག་ལ་ནང་ཆོས་སུ་དུག་གསུམ་ལས་ཉེས་ཚོགས་ཀུན་འབྱུང་བར་གསུངས་པ་དེ་ཉིད་ཡིན། འདི་རྣམས་ཐག་གཅོད་དགོས་ཚེ་འཚེ་མེད་ཞི་བདེའི་གན་མཛོད་ནང་བསྟན་སེམས་འདུལ་བའི་གཞུང་ལུགས་དག་ལས་ཁྱད་པར་དུ་འཕགས་པའི་རིན་ཐང་ཅན་ཞིག་སྲིད་ན་དཀོན་པ་ཡིན། ༼༥རྒྱལ་ཁྲིམས་དང་ཡུལ་ཆོས་ལ་བསྟུན་དགོས་པའི་ཚུལ་འདུལ་བ་ལས་གསུང་ཚུལ་མཚོན་ཙམ།༽ ཆོས་འདུལ་བའི་ཤིང་རྟ་ཆེན་པོ་སློབ་དཔོན་ཡོན་ཏན་འོད་ཀྱི་འདུལ་བ་ལས་བརྒྱ་རྩ་གཅིག་པ་ལས། རྒྱལ་པོས་བཀྲབས་པ་ལ་སོགས་པ་མ་ཡིན་ནམ། རྒྱལ་པོས་མ་གནང་བ་མ་ཡིན་ནམ། རྒྱལ་པོས་མ་གནང་བ་ཡུལ་ཐག་མི་རིང་བ་མ་ཡིན་ནམ། ཞེས་རབ་བྱུང་གི་སྔོན་འགྲོ་དགེ་བསྙེན་ཙམ་བྱ་བ་ལ་ཡང་རྒྱལ་པོས་མ་གནང་བ་སོགས་མ་ཡིན་པར་དྲིས་ཏེ་མ་ཡིན་པ་དགོས་པར་གསུངས་པ་དང༌། འདུལ་བ་རྣམ་འབྱེད་ལས། བློན་པོ་རྣམས་ཀྱིས་སྨྲས་པ། འཕགས་པ་བཀའ་སྩལ་པ་ཅི་མཆིས། འདུན་པས་སྨྲས་པ། བཞིན་བཟང་དག་བྲམ་ཟེ་ཞིག་གིས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ན་ས་གཞི་རྒྱལ་པོ་དབང་བས་གང་དུ་གཙུག་ལག་ཁང་བརྩིག་ཏུ་གཞུག་པའི་ས་མེད་ན་དེའི་ཕྱིར་ས་གཞིའི་ཆེད་དུ་ལྷའི་སྙན་དུ་གསོལ་བ་ཞིག་འདོང་ན་དེ་ཁྱེད་ཅག་གིས་གྲོགས་གྱིས་ཤིག །འཕགས་པ་གང་གི་ཚེ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་པ་དེའི་ཚེ་ཁྱོད་སྦྲན་པར་བགྱི་ཡིས་སྤྱོན་ཅིག །ཇི་ཙམ་དུས་གཞན་ཞིག་ན་རྒྱལ་པོ་ཚོགས་ཉུང་ངུ་དང་དབེན་པ་ན་འདུག་པའི་ཚེ་བློན་པོ་དེ་དག་གིས་ཚེ་དང་ལྡན་པ་འདུན་པ་ལ། འཕགས་པ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་ཀྱིས་སྤྱོན་ཅིག་ཅེས་བང་ཆེན་བཏང་བ་དང༌། འདུན་པ་འོངས་ནས་རྒྱལ་པོ་ལ་ཨ་རོག་ཁྱ་ཞེས་བྱས་ཏེ་མཐའ་གཅིག་ཏུ་འདུག་གོ། །བློན་པོ་རྣམས་ཀྱིས་རྒྱལ་པོ་ལ་གསོལ་པ། ལྷ་འདི་ནི་འཕགས་པ་འདུན་པ་ཞེས་བགྱི་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་དང་ལྡན་པ་ལགས་སོ། །རྒྱལ་པོས་སྨྲས་འཕགས་པ་བྱོན་པ་ལེགས་སོ། །ཅིའི་སླད་དུ་བྱོན། འདུན་པས་སྨྲས་པ། ལྷ་བྲམ་ཟེ་ཞིག་གིས་དགེ་འདུན་གྱི་སླད་དུ་གཙུག་ལག་ཁང་བགྱིད་དུ་སྩལ་ན། ས་གཞི་རྒྱལ་པོ་མངའ་བས་དེའི་དོག་ས་མ་མཆིས་ན་ལྷས་དོག་ས་སྩལ་བར་རིགས་སོ། །འཕགས་པ་རྒྱལ་པོའི་ཕོ་བྲང་འབའ་ཤིག་མ་གཏོགས་པ་གང་དུ་བཞེད་པ་དེར་གཙུག་ལག་ཁང་རྩིག་ཏུ་སྩོལ་ཅིག །ཅེས་དགེ་འདུན་པའི་གཙུག་ལག་ཁང་སོགས་བྱ་བ་ལ་ས་གཞི་རྒྱལ་པོ་ལ་དབང་བའི་ས་ནས་རྒྱལ་པོ་ལ་ཞུས་ཏེ། གནང་ན་བྱ་བར་གསུངས་པ་དང༌། མ་བྱིན་ལེན་གྱི་སྐབས་ཀྱི་རྣམ་འབྱེད་ལས་ཀྱང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་གྱོན་ཏེ་དགེ་སློང་ཕྱི་བཞིན་འབྲང་བའི་དགེ་སྦྱོང་ཞིག་དང་སོང་ལ་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་འདུག་ལ། དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས། གྱོད་ལ་སྐྲིན་ཅིང་སྲོག་དང་འབྲལ་བར་བྱེད་ཅེས་དྲིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་འདུག་ནས་དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་སྨྲས་པ། ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བྱེད། དེ་དག་གིས་སྨྲས་པ། བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །དེ་ནས་ཚེ་དང་ལྡན་པ་ཀུན་དགའ་བོ་རྒྱལ་པོའི་ཁབ་ནས་བྱུང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གཟོད་སྣམ་སྦྱར་འཚལ་ཏེ་དགེ་སློང་སླད་བཞིན་འབྲང་བའི་དགེ་སྦྱོང་ཞིག་དང༌། རྒྱལ་པོའི་ཁབ་ཏུ་ཞུགས་ནས་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་མཆིས་ཏེ། དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བགྱིད་ཅེས་སྨྲས་ན། དེ་དག་གི་མཆིད་ནས་བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན། དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང༌། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །ཞེས་པ་ནས། ཇི་ཙམ་མ་བྱིན་པར་བླངས་པས་ཞེས་བྱ་བ་ནི་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །ཞེས་ཕམ་པ་བཞི་ལས་མ་བྱིན་ལེན་གྱི་བཅས་པ་མཛད་པའི་དུས་སུ་རྒྱལ་པོའི་ཆད་པ་ལ་ལྟོས་ཏེ་བཅས་པ་དང༌། གཞན་ཡང་ཤོ་གམ་གཞལ་བ་དང༌། གསོ་སྦྱོང་གི་གནས་སོགས་ལ་ཡང་རྒྱལ་པོ་དང་མཐུན་པར་བྱ་དགོས་པར་གསུངས་པ་མང་ཡང་རེ་ཞིང་མང་དོགས་པས་བཞག་གོ། །༼༦ནང་བསྟན་དངོས་མ་དང་རྫུས་མའི་དབྱེ་འབྱེད་བྱ་དགོས་པ།༽ནང་བསྟན་རང་ངོས་ནས་འཇིག་རྟེན་འདྲ་མཉམ་དང་སྤྱི་ཕན་ཞབས་ཕྱི་སོགས་འཇིག་རྟེན་མི་ཆོས་དང་མིའི་འདོད་བློ་དང་འཚམ་པ། རྒྱལ་ཁབ་ཀྱི་སྲིད་དང་ཚན་རིག་གི་ལྟ་གྲུབ་ལ་འོས་པའི་རིན་ཐང་གཞལ་དུ་མེད་པ་ཞིག་ཡིན་ཡང༌། དེང་སང་ས་ཆ་ག་ས་གང་དུ་བླ་མ་དང་སྤྲུལ་སྐུ་དང་གྲྭ་བ་རྫུན་མ་མང་བོ་ཡོད་པ་དང༌། དེ་དག་གི་སྤྱོད་ལམ་དང་ལས་ཀ་གནོད་འཚེ་ལྡན་པ་མང་བོ་ཡོད་ཀྱང༌། དེ་དག་གིས་ནང་བསྟན་སྤྱི་དང་ནང་བསྟན་པའི་ཀུན་སྤྱོད་ཀྱི་ཚབ་ལྟ་བུར་གཏན་ནས་བྱེད་མི་རུང་ལ། དེ་ནི་ནང་བསྟན་གྱི་འཇིག་རྟེན་ལ་བཞག་པའི་ལས་ཀ་དང་གྲུབ་འབྲས་ཤིག་ཏུ་དེ་བས་ཀྱང་ལྟ་མི་རུང༌། མི་སོ་སོའི་ལས་ཀ་བྱེད་སྟངས་ལ་འདྲ་མཉམ་མ་ཡིན་པ་དང༌། རྒྱུ་འབྱོར་འཚོལ་བའི་ལས་རིམ་དང༌། དད་པ་བེད་སྤྱད་ནས་དམངས་མགོ་སྐོར་བ་སོགས་རྣམ་པ་སྣ་ཚོགས་ཡོད་ཀྱང༌། དེ་དག་ཤཱཀྱ་ཐུབ་པའི་དགོངས་པ་མ་རེད་ལ། ནང་བའི་གཞུང་ལུགས་ཁག་ནས་བཤད་པའི་སྤྱོད་པ་མ་རེད། དེ་བཞིན་དུ་ནང་བའི་བླ་མ་དང་གྲྭ་བ་ཚད་ལྡན་དག་གི་ཚད་འཇལ་བྱེད་དེ་བས་ཀྱང་ལྟ་ག་ལ་ཡིན། དེས་ན་ནང་བསྟན་དངོས་ནི་ཁ་ཞེ་གཉིས་མེད་ཀྱི་གཞན་ཕན་སྒྲུབ་མཁན་ཞིག་དང༌། སྲིད་དང་དམངས་ཀྱི་བདེ་བ་ལ་ནམ་ཡང་གྲོགས་ལས་དགྲ་རུ་མི་འགྱུར་བ་ཞིག་དང༌། རྫུན་དང་རྐུ་འཕྲོག་གི་གཡོ་ཆས་ཐམས་ཅད་རིང་དུ་དོར་བ་དང༌། ཉམ་ཆུང་དང་འཁོས་དམན་རྣམས་ནམ་ཡང་རོགས་སྐྱོར་བྱེད་པའི་གནོད་མེད་ཕན་པའི་རིགས་གཞུང་ཅིག་ཡིན་ལ། ནང་བསྟན་ཆོས་ལུགས་ཉིད་ཀྲུང་གོ་ཅན་དུ་རྒྱུན་སྐྱོང་བྱེད་པ་ལ་བརྩོན་ན་མདུན་ལམ་ལ་འོད་སྟོང་འབར་བ་ཡོད་དོ། །མཚོ་སྔོན་ནང་བསྟན་མཐུན་ཚོགས་ཀྱིས་ལམ་སྟོན་གྱི་འོག་ནས་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ།
ཕྱོགས་མེད་རིས་མེད་རྟོན་པ་བཞི་ལྡན།
ཕྱོགས་མེད་རིས་མེད་རྟོན་པ་བཞི་ལྡན།
རྒྱལ་བས་ཡང་ཡང་མདོ་རྒྱུད་དུ་མ་ནས་ལུང་བསྟན་པའི་ཀུན་མཁྱེན་དོལ་པོ་པ་ཤེས་ རབ་རྒྱལ་མཚན་དཔལ་བཟང་པོ་ནི། རབ་བྱུང་ལྔ་པའི་ཆུ་འབྲུག་ཡེ་ལོ་༡༢༩༢ལོར་མངའ་རིས་དོལ་པོ་པན་ཚང་ཀ་ཡོ་རིའི་ཡབ་ནས་སྟོན་ཡེ་ཤེས་དབང་ཕྱུག་དང༌། ཡུམ་ཚུལ་ཁྲིམས་རྒྱན་གཉིས་ཀྱི་སྲས་སུ་འཁྲུངས། བྱིས་དུས་ཀྱི་མཚན་ལ་ཤེས་རབ་མགོན་ཞེས་གསོལ། གཞོན་དུས་ནས་ཡབ་ཡུམ་གྱི་མདུན་ལས་ཡི་གེའི་འབྲི་ཀློག་སྦྱངས། བཅུ་གསུམ་པར་སྐྱི་སྟེངས་དགོན་དུ་ཕེབས། མཁན་པོ་ཚུལ་ཁྲིམས་སྙིང་པོ་ལས་རབ་ཏུ་བྱུང༌། མཚན་ལ་ཤེས་རབ་རྒྱལ་མཚན་ཞེས་གསོལ། སྐྱི་སྟོན་འཇམ་དབྱངས་ལས་སྔགས་སྡོམ་བླངས། དབང་ལུང་ཡང་མང་པོ་ཞུས། མཁས་ཆེན་བྱང་ཆུབ་སེང་གེ་དང༌། སྟག་ཤམ་པ་ཚུལ་ཁྲིམས་བཟང་པོ་གཉིས་ལས་རྙིང་ཆོས་མང་པོ་གསན། བཅུ་དགུ་པར་གློ་བོ་བསམ་རྫོང་དུ་ཕེབས། སྐྱི་སྟོན་གྲགས་པ་རྒྱལ་མཚན་ལས་གསན་སྦྱོང་ཟླ་གཅིག་རིང་མཛད། ས་སྐྱར་སློབ་དཔོན་ཤེས་རབ་བཟང་པོ་དང༌། ཉི་ཕུ་པ་གཞོན་ནུ་བཟང་པོ་གཉིས་ལས་ཚད་མ་དང༌། མཁན་པོ་བློ་གྲོས་བསྟན་པ་ལས་ཕར་ཕྱིན། བླ་མ་འཇམ་པའི་དབྱངས་ལས་བྱམས་ཆོས་སྡེ་ལྔ། དབུ་མའི་རིགས། བསྟོད་ཚོགས། གཏམ་ཚོགས། དབང་ལུང་རྗེས་གནང་བཅས་ལོ་བཞི་རིང་སྦྱངས། མདོ་སྔགས་གཞུང་ལུགས་མང་པོ་ཐུགས་སུ་ཆུད། གསུམ་པར་དབུས་གཙང་དུ་གྲྭ་སྐོར་ཕེབས། མཁན་པོ་བསོད་ནམས་གྲགས་པ་ལས་བསྙེན་པར་རྫོགས། རྣལ་འབྱོར་པ་ནག་འབུམ་ལས་ཞི་བྱེད་དང༌། གཅོད། རྫོགས་ཆེན་སྙན་བརྒྱུད་སོགས་ཞུས། སོ་གཅིག་པར་ཇོ་ནང་དུ་ཕེབས། ཆོས་རྗེ་ཡོན་ཏན་རྒྱ་མཚོ་ལས་དུས་འཁོར་སོགས་ཟབ་ཆོས་མང་དུ་ཞུས། སོ་བཞི་པར་ཇོ་ནང་པའི་གདན་སར་ཕེབས། མདོ་སྔགས་ཀྱི་འཆད་ཉན་མཛད། ཇོ་ནང་པའི་ལྟ་བའི་གཞི་བཏིངས། སོ་དགུ་པར་མཆོད་རྟེན་ཆེན་པོ་དཔལ་ཡོན་ཅན་རྨང་བཏིངས། ལོ་བཞིའི་རིང་ལེགས་པར་གྲུབ། རབ་གནས་ཀྱང་མཛད། ཞེ་ལྔ་པར་ས་སྐྱ་དང༌། ཆུ་བཟང༌། ལྷ་རྩེ་རྫོང༌། ཤངས། སྣར་ཐང་སོགས་སུ་སྐུ་མཚམས་ལ་བཞུགས། ངོ་མཚར་བའི་རྟེན་མང་པོ་བཞེངས། ང་བདུན་པར་རྟ་ནག་ཏུ་ཕེབས། འཆད་ཉན་ལོ་གཅིག་རིང་མཛད། དབུས་སུ་ཆོས་འཁོར་བསྐོར། རབ་བྱུང་དྲུག་པའི་ལྕགས་གླང་ཕྱི་ལོ ༡༣༦༡ ལོའི་ཟླ་༡༡པའི་ཚེས་༦ལ་སྐུ་གཤེགས། གསུང་འབུམ་ནི་དུས་ཀྱི་འཁོར་ལོའི་སྐོར་ལ་བསྟན་བཅོས་སུམ་ཅུ་སོ་བརྒྱད། རི་ཆོས་ངེས་དོན་རྒྱ་མཚོར་རྒྱ་གཞུང་ཚད་ལྡན་གྱི་ལུང་སྟོང་ཕྲག་གཅིག་དང་གཉིས་བརྒྱ་ལྷག་བཀོད་གནས་གཞན་སྟོང་དབུ་མའི་ལྟ་གྲུབ་གསལ་བར་མཛད། བཀའ་བསྡུ་བཞི་བ་མཛད་སྐབས་དགྲ་བཅོམ་པ་ཆེན་པོ་སངས་རྒྱས་ཀྱི་མདོ་ལྔ་བརྒྱ་དཔང་པོར་བྱས་ནས་རྫོགས་ལྡན་ཆོས་མཆོག་གི་ལུགས་ཀྱི་སྤྲོས་བྲལ་གྱི་གཞན་སྟོང་དབྱིངས་རིག་དབྱེར་མེད་དུ་སྒྲུབ་པ་སོགས་གྲུབ་མཐའི་སྐོར་ལ་བསྟན་བཅོས་བཅུ་དྲུག ཕར་ཕྱིན་སྐོར་ལ་བསྟན་བཅོས་བདུན། གསོལ་འདེབས་སྐོར་ལ་ཉེར་ལྔ། རྡོ་རྗེ་ཕྲེང་བའི་སྐོར་ལ་གསུམ། སྤྲིང་ཡིག་སྐོར་ལ་བརྒྱད། གདམས་ངག་དང་དྲིས་ལན་སྐོར་ལ་བཅུ་གཉིས། རྣམ་ཐར་སོགས་ཀྱི་སྐོར་ལ་བཅུ་དྲུག སྨོན་ལམ་སྐོར་ལ་གསུམ། བཀྲ་ཤིས་སྐོར་ལ་བཞི་བཅས་ཁྱོན་བསྡོམས་བསྟན་བཅོས་ཆིག་བརྒྱ་བདུན་ཅུ་དོན་བཞི་ཡོད་པར་བཤད། སློབ་མ་གྲགས་ཆེ་བ་ནི་ལོ་ཙཱ་བ་བློ་གྲོས་དཔལ་བཟང་དང༌། ས་བཟང་མ་ཏི་པཎ་ཆེན། དཀོན་མཆོག་རྒྱལ་མཚན། ཇོ་ནང་ཕྱོགས་ལས་རྣམ་རྒྱལ། ཉ་དབོན་ཀུན་དགའ་དཔལ། སོགས་བུ་ཆེན་བཅུ་བཞི་སོགས་སློབ་ཚོགས་རྒྱ་ཆེ་བའོ། །དམ་པ་གང་གི་རྣམ་ཐར་ལ་མཇལ་ན་རིས་མེད་པ་ཞིག་ཡིན་པར་གསལ་ལ། དམ་པ་གང་གིས་ཞལ་སྔ་ནས། ཕྱོགས་མེད་རིས་མེད་རྟོན་པ་བཞི་ལྡན་ཞེས་ཡང་ཡང་གསུངས་པ་ལྟར་རོ། །ངག་དབང་དངོས་གྲུབ་དཔལ་ནས།