ཇོ་ནང་དགེ་བཤེས་ངག་དབང་དངོས་གྲུབ་དཔལ་ལགས་ཀྱིས་གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པར་གནང་བའི་བཀའ་སློབ།
ཇོ་ནང་དགེ་བཤེས་ངག་དབང་དངོས་གྲུབ་དཔལ་ལགས་ཀྱིས་གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པར་གནང་བའི་བཀའ་སློབ།
ཟིན་བྲིས་པ་སློབ་བུ་ཡེ་ཤེས་རྣམ་རྒྱལ། གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པ་འདིར་ཕེབས་པའི་མཁན་བླ་སྤྲུལ་རྣམས་ཀྱི་གཙོས་སྐྱབས་གནས་འདུས་ཚོགས་རིན་པོ་ཆེའི་སྙན་ལམ་དུ་ཚིག་ཁ་ཤས་ཤིག་ཞུ་རྒྱུ་དེ་ཡིན། ཞུ་དགོས་པའི་རྒྱུ་མཚན་གོང་གི་བཀའ་བརྒྱུད་བགྲོ་གླེང་ཆེན་མོའི་ཚོགས་ཆུང་གིས་གོ་སྒྲིག་དང་རེ་འབོད་བྱས་ནས་དེ་རིང་ཚིག་ཁ་ཤས་ཤིག་ཞུ་རོགས་གྱིས་ཟེར་ནས་རེ་བ་བརྒྱབ་སོང༌། དེའི་རྒྱུ་མཚན་གྱིས་རང་གི་བསམ་ཚུལ་ཟེར་ན་འདྲ་རང་གི་ཚོར་སྣང་གི་སྐད་ཆ་མདོར་བསྡུས་ཤིག་ཞུ་རྒྱུ་དེ་ཡིན། ཡིན་ནའང་ངས་སྐར་མ་ཁ་ཤས་ནང་ལ་ཞུ་རྒྱུ་དེ་དགོས་པ་ཡོད་པས་ཆེད་དུ་ཁྱེད་རྣམ་པ་ཚོས་ཡག་པོ་ཞིག་གསན་རྒྱུ་གལ་ཆེ། མ་གསན་ན་ཁྱེད་རྣམ་པ་ཚོའི་དུས་ཚོད་འཕྲོག་བརླག་དང་ཕན་པ་གང་ཡང་འགྲུབ་རྒྱུ་མ་རེད། ཡིན་ནའང་ང་རང་གང་ཟག་སྒེར་ལ་མཚོན་ན་སྐྱེས་ཐོབ་ཀྱི་ཤེས་རབ་དང་སྦྱང་སྟོབས་ཀྱི་ཡོན་ཏན་ཕྱོགས་གང་གི་ཐད་ནས་ཁྱེད་རྣམ་པ་ཚོ་ལ་བཀའ་སློབ་ལམ་སྟོན་གནང་ནི་ཞིག་མ་རེད། འོན་ཏེ་རང་གི་ལྷག་བསམ་རྣམ་དག་གི་སྒོ་ནས་སྐད་ཆ་ཚིག་ཁ་ཤས་ཤིག་ཞུ་རྒྱུ་དེ་ཡིན། དེ་གང་ཡིན་ཟེར་ན་སྤྱི་ཡོངས་ནས་བཀའ་བརྒྱུད་བགྲོ་གླེང་ཆེན་མོ་འདི་བཙུགས་ནས་ད་ལྟའི་བར་ལོ་ངོ་བཅུ་ཕྲག་ལྷག་གི་རིང་ལ་ཧ་ལས་པའི་ཡར་རྒྱས་ཕུན་སུམ་ཚོགས་པ་འགྲོ་དང་འགྲོ་བཞིན་འདུག རང་གི་ངོས་ནས་ཡིན་ན་དགའ་བ་དང་རྗེས་སུ་ཡི་རང་ཧ་ལས་པ་ཡོད་ཞུ་རྒྱུ་དེ་ཡིན། དེའི་ཐོག་ནས་ཐམས་ཅད་ཀྱི་རིགས་ལམ་ཕྱོགས་ནས་ཡིན་ན་འཕེལ་རྒྱས་ཧ་ལས་པ་འགྲོ་ཡི་འདུག སྤྱིར་བཏང་གཞུང་ཟེར་བ་དེ་རིགས་པའི་རྗེས་སུ་འབྲང་བ་ཡིན་པའི་རྒྱུ་མཚན་གྱིས་རིགས་པ་དེ་ཧ་ཅང་གལ་ཆེན་པོ་ཞིག་ཏུ་ཆགས་འདུག་ཡོད་པ་རེད། ང་ཚོ་བོད་ཁ་བ་གངས་ཅན་པ་ལ་བསམ་བློ་བཏང་ན་སྔོན་མ་འདས་པའི་ལོ་རྒྱུས་སྟེང་ལ་གསང་ཕུའི་ཆོས་གྲྭ་དེ་རྔོག་ལེགས་པའི་ཤེས་རབ་ཀྱིས་བཏབ། དེའི་རྗེས་སུ་རྔོག་ལོ་ཙྪ་བ་བློ་ལྡན་ཤེས་རབ་རྒྱ་གར་འཕགས་པའི་ཡུལ་དུ་བྱོན་ནས་ལོ་ངོ་བཅུ་དྲུག་ལྷག་ལ་རིག་གཞུང་མ་ལུས་པ་སྦྱངས་ནས་ཕྱིས་གསང་ཕུའི་ཆོས་གྲྭར་བྱོན་ནས་རྩོད་གྲྭ་བཙུགས་ཏེ་རྩོད་གྲྭ་དེ་ཧ་ཅང་དར་ཁྱབ་ཏུ་སོང་བ་རེད། དེའི་ཕྱིས་བོད་ཁ་བ་གངས་ཅན་གྱི་ཆོས་བརྒྱུད་གཅིག་ཙམ་མ་ཡིན་པར་ཆོས་བརྒྱུད་མང་ཆེ་བའི་མཁས་དབང་མང་བོ་ཞིག་གསང་ཕུའི་ཆོས་གྲྭ་ཆེན་མོར་བྱོན་ཏེ་རིགས་ལམ་ཧ་ཅང་སྦྱངས་ནས་དར་ཁྱབ་ཏུ་ཕྱིན་པ་རེད། དཔེར་ན་རྒྱལ་བ་བཀའ་བརྒྱུད་པར་མཚོན་ན་བཀའ་བརྒྱུད་པ་རང་གི་མཁས་དབང་མང་པོ་ཞིག་གསང་ཕུའི་ཆོས་གྲྭ་བྱོན་ནས་མཁས་པའི་མཚན་སྙན་ཐོབ་པ་ཞིག་རེད། དེ་ཡིན་ན། དཔལ་ལྡན་བླ་མའི་རྣམ་ཐར། །རྗེས་འཇུག་སློབ་མས་ཉམས་ལེན། །ཟེར་བ་ནང་བཞིན་དུ་ཐམས་ཅད་ཀྱིས་རིགས་ལམ་ཡག་པོ་ཞིག་བསླབ་དགོས་རྒྱུ་དེ་གལ་ཆེན་པོ་རེད། སྤྱིར་བཏང་ཆོས་བརྒྱུད་སོ་སོའི་ནང་ན་ཁ་ཅིག་གིས་ང་ཚོ་ནི་སྒྲུབ་པའི་བཀའ་བབ་ཡིན་གྱི་བཤད་པའི་བཀའ་བབ་མ་ཡིན་ནོ་ཞེས་ཟེར། ཁ་ཅིག་གིས་ང་ཚོ་བཤད་པའི་བསྟན་པ་འཛིན་མཁན་ཡིན་གྱི་སྒྲུབ་པའི་བསྟན་པ་འཛིན་མཁན་མ་ཡིན་ནོ་ཞེས་བཤད་མཁན་ཡོད་པ་རེད། འོན་ཀྱང་བཤད་སྒྲུབ་ཟུང་འབྲེལ་དང་བཀའ་མདོ་རྒྱུད་ཀུན་ལ་ཐོས་བསམ་དང་ཉམས་སུ་ལེན་དགོས་པ་གལ་ཆེན་པོ་རེད། ང་ཚོ་བདག་ཅག་གི་སྟོན་པའི་རྗེས་འཇུག་ཡིན་པའི་ཆ་ནས་བདག་ཅག་གི་སྟོན་པ་ཐུགས་རྗེ་ཅན་གྱིས། ང་ཚོ་བཤད་པའི་བསྟན་པ་དང་སྒྲུབ་པའི་བསྟན་པ་གཉིས་ཀ་བཀའ་བབ་ཡོད་པ་རེད་མ་གཏོགས་རབ་ཏུ་བྱུང་བ་ལ་བྱ་བ་གཅིག་ལས་མེད་མ་གསུངས་ཏེ་སངས་རྒྱས་བཅོམ་ལྡན་འདས་ཀྱིས། རབ་ཏུ་བྱུང་བའི་བྱ་བ་ནི་གཉིས་ཏེ། ཀློག་པ་ཐོས་བསམ་དང༌། སྤོང་བ་བསམ་གཏན་ནོ། །ཞེས་ང་ཚོ་དགེ་འདུན་པ་ཡོངས་སུ་རྫོགས་པ་ལ་སངས་རྒྱས་བཅོམ་ལྡན་འདས་ཀྱིས་ཀློག་པ་ཐོས་བསམ་དང་སྤོང་བ་བསམ་གཏན་བྱེད་དགོས་པའི་བཀའ་སློབ་ཟབ་མོ་གནང་འདུག རྒྱུ་མཚན་དེའི་དབང་གིས་ཐམས་ཅད་ཀྱིས་བཤད་སྒྲུབ་ཟུང་འབྲེལ་ བྱེད་དགོས་པ་དེ་ཧ་ཅང 
་གལ་ཆེན་པོ་རེད། དེའི་ཆ་ནས་དེ་རིང་ཞུ་བསམ་པ་ནི་གང་ཡིན་ཟེར་ན་རིགས་ལམ་ཧ་ཅང་ཡར་རྒྱས་འགྲོ་དང་འགྲོ་བཞིན་པ་རེད། ཡིན་ཡང་ཡར་རྒྱས་ལ་མཐའ་མེད་པས་ད་དུང་ཡར་རྒྱས་ལ་འགྲོ་དགོས་ཀི་རེད། ད་ལྟ་ཡིན་ནའང་གཞུང་རིགས་པའི་རྗེས་འབྲང་ཡིན་པའི་རྒྱུ་མཚན་གྱིས་ངེས་པར་དུ་རིགས་པ་དེ་གོང་ནས་གོང་འཕེལ་དུ་གཏོང་དགོས་པ་གལ་ཆེན་པོ་རེད་ཅེས་ཞུ་རྒྱུ་དེ་རེད། རིགས་པའི་རྒྱབ་རྟེན་ལ་ལུང་དེ་གལ་ཆེན་པོ་དང་ལུང་དེ་རབ་ཡིན་ན་ང་ཚོ་འོ་སྐོལ་གྱི་སྟོན་པ་ཐུགས་རྗེ་ཅན་གྱི་རྗེས་འཇུག་ཡིན་པས་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་ཆོས་ཕུང་བརྒྱད་ཁྲི་བཞི་སྟོང་གསུངས་ཤིང་དེའི་ནང་གི་ང་ཚོ་བོད་ཁ་བ་གངས་ཅན་པའི་བགོ་སྐལ་དུ་གྱུར་བ་བཀའ་པོ་ཏི་བརྒྱ་ལྷག་དང་བསྟན་འགྱུར་པོ་ཏི་ཉིས་བརྒྱ་ལྷག་ཡོད་པས་དེ་ལ་ཐམས་ཅད་ཀྱིས་སྦྱང་བ་ཕུན་སུམ་ཚོགས་པར་
བྱེད་རྒྱུ་ཧ་ཅང་གི་གལ་ཆེན་པོ་རེད། དེའི་ནང་དགོས་སུ་རྒྱལ་བ་བཀའ་བརྒྱུད་པ ་ལ་མཚོན་ན་རང་རང་སོ་སོའི་མེ་ཏོག་ལྷ་བབས་ཀྱི་ལྷ་སྐལ་དེ་རྒྱལ་བ་བཀའ་བརྒྱུད་པའི་སྔོན་བྱོན་མར་མི་དྭགས་གསུམ་ནས་བཟུང་སྟེ་མཁས་དབང་རིམ་བྱོན་རྣམས་ཀྱི་སྐུའི་ཚབ་གསུང་གི་དོད་གསུང་རབ་པོ་ཏི་མང་པོ་བརྩམས་གནང་མཛད་ཡོད་པ་རེད། དེ་ཅིའི་དོན་དུ་མཛད་པ་ཡིན་ཟེར་ན་ཁྱེད་རྒྱལ་བ་བཀའ་བརྒྱུད་པའི་ཕྱི་རབས་པ་དག་གི་གདུལ་བྱ་རྣམས་ཀྱི་དོན་དང་ཆེད་དུ་ཡིན་པ་ཐམས་ཅད་ལ་ཞུ་མི་དགོས་པར་མཁྱེན་གསལ་ལྟར་རེད། དེ་ཡིན་ན་ཁྱེད་རྣམ་པས་རྒྱལ་བ་བཀའ་བརྒྱུད་པའི་མར་མི་དྭགས་གསུམ་གྱི་བསྟན་པ་འདི་འཛིན་སྐྱོང་སྤེལ་གསུམ་བྱེད་པ་རང་རང་སོ་སོའི་ཕྲག་ན་བབས་བའི་ལས་འགན་ཞིག་ཡིན་པ་ངེས་པར་དུ་ངོས་འཛིན་གསལ་བོར་ཐོབ་དགོས། དེང་སང་དུས་རབས་ཉེར་གཅིག་གི་ནང་དུ་མི་མང་བོ་ཞིག་གིས་འགན་འཁྲི་ཟེར་བའི་ཐ་སྙད་དེ་གླེང་གིན་འདུག དེས་ན་ཁྱེད་རྣམ་པའི་འགན་ཁྲི་གཙོ་བོ་དེ་གང་ཡིན་ཟེར་ན་རང་རང་སོ་སོའི་རང་གཞུང་དེ་སྦྱང་རྒྱུ་དེ་གལ་ཆེན་ནང་གི་དོན་སྙིང་ཅན་ཞིག་ཡིན་ལ་གྲུབ་འབྲས་ཡོད་པ་ཞིག་དང་རང་རང་སོ་སོའི་ལས་འགན་ཞིག་ཏུ་ཆགས་འདུག་ཡོད་པ་དེ་འདྲ་ཞིག་རེད།སྔོན་བྱོན་རྒྱལ་བ་བཀའ་བརྒྱུད་པའི་མཁས་དབང་རྣམ་པ་ཚོ་དང་དངོས་སུ་ཞལ་མཇལ་བ་ཡིན་ནའང་ཁོང་རྣམས་ཀྱིས་བརྩམས་གནང་མཛད་པའི་གསུང་པོད་དེར་ལེགས་བཤད་དག་གི་བརྗོད་བྱའི་དོན་གྱི་སྙིང་བོ་དག་དྲིལ་ནས་གསུངས་པ་ལས་ལྷག་གི་དཔེ་མཁྱུད་བྱས་ཏེ་མ་གསུངས་པ་གཅིག་ཀྱང་ཡོད་པ་མ་རེད། ཁོང་རྣམས་དངོས་སུ་མཇལ་ན་ཡང་གདུལ་བྱ་ལམ་སྟོན་བྱེད་ཚུལ་ལ་ཉིད་ཀྱི་རྟོགས་པ་གཞན་ལ་འཕོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་ཆོས་ཀྱི་གནས་ཚུལ་ཚུལ་བཞིན་དུ་བསྟན་ནས་འཁོར་བའི་སྡུག་བསྔལ་དང་ངན་སོང་ལས་གྲོལ་དགོས་པ་ཞིག་རེད། དེ་ནང་བཞིན་སངས་རྒྱས་གཉིས་པ་སློབ་དཔོན་དབྱིག་གཉེན་གྱིས། འཁོར་བའི་འདམ་ལས་འགྲོ་བ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ། །ཞེས་གསུངས་པ་ནང་བཞིན་ཆོས་ཀྱི་གནས་ཚུལ་ཇི་བཞིན་དུ་བསྟན་ནས་འགྲོ་བ་སེམས་ཅན་རྣམས་འཁོར་བ་སྡུག་བསྔལ་གྱི་རྒྱ་མཚོ་ལས་དྲངས་དགོས་པ་རེད། དེས་ན་ཆོས་ཀྱི་གནས་ཚུལ་བཞིན་དུ་བསྟན་ཡོད་པ་དེ་སྔོན་བྱོན་རྒྱལ་བ་བཀའ་བརྒྱུད་པའི་མཁས་དབང་གོང་མ་རིམ་བྱོན་གྱིས་གསུང་པོད་ལས་བསྟན་ཡོད་པ་ལས་ལྷག་གི་ཁོང་རྣམ་པ་དངོས་སུ་ཞལ་མཇལ་ཡང་དེ་ལས་ལྷག་པའི་ང་ཚོར་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པའི་ཐབས་གཞན་མེད་པ་ཞིག་རེད། སངས་རྒྱས་དང་བྱང་ཆུབ་སེམས་དཔའ་གང་དང་གང་གི་མཛད་པ་རྣམས་ཀྱི་ནང་གི་མཆོག་ཏུ་གྱུར་བ་ནི་གསུང་གི་མཛད་པ་ཉིད་ཡིན་པར་རྗེ་བདག་ཉིད་ཆེན་པོས་གསུངས་ཡོད་པ་རེད། དེ་ནང་བཞིན་དུ་སྔོན་བྱོན་སྐྱེས་བུ་དམ་པ་རྣམས་ཀྱིས་མཛད་པའི་ཡང་སྙིང་ངམ་མཆོག་ཏུ་གྱུར་པ་ནི་གསུང་གི་མཛད་ པ་ཡིན། དེ་ལ་ཁྱེད་རྣམས་ཀྱིས་ཐོས་བསམ་སྒོམ་གསུམ་བྱེད་རྒྱུ་དེ་ཧ་ཅང ་གལ་ཆེན་པོ་རེད། ཕུན་སུམ་ཚོགས་པ་ཡིན་ན་རང་རང་གི་རང་ལུགས་གཞིར་བཞག་ནས་དེ་མ་ནོར་བར་ཤེས་པའི་ཐོག་ནས་གཞན་ཕྱོགས་ཀྱི་ཆོས་བརྒྱུད་རིས་སུ་མ་ཆད་པའི་མཁས་དབང་རྣམས་ཀྱིས་གསུངས་པའི་གཞུང་ལུགས་ལ་ཐོས་བསམ་སྒོམ་གསུམ་བྱེད་ཐུབ་ན་ད་གཟོད་ཕུན་སུམ་ཚོགས་པའི་རྒྱུ་རེད། དེ་ཡིན་ན་རང་རང་སོ་སོའི་གཞུང་ལུགས་དེ་མ་ཤེས་ནས་ཁོ་རྒྱལ་བ་བཀའ་བརྒྱུད་པ་ཡིན་ཟེར་ན་མིང་ཙམ་མ་གཏོགས་པའི་དོན་གྱི་ཐོག་ནས་རྒྱལ་བ་བཀའ་བརྒྱུད་པ་མ་ཡིན་པར་ཆགས་འགྲོ་བ་རེད། ཐམས་ཅད་ཀྱིས་བསམ་བློ་ཐོངས་དང༌། དཔེར་ན་ཡེ་ཤུ་མ་ཤུ་ཀའི་ཆོས་ལུགས་ཡིན་ན་འདྲ་ཕྱི་རོལ་བའི་གཞུང་ལུགས་རྐྱང་རྐྱང་སྦྱངས་ནས་གང་ཟག་ཅིག་གིས་ཁོ་ནང་པ་སངས་རྒྱས་པ་ཡིན་ཟེར་བ་ཙམ་ཞིག་གིས་ནང་པ་སངས་རྒྱས་པ་འགྱུར་རྒྱུ་མ་རེད། ནང་པ་སངས་རྒྱས་པའི་ལྟ་སྒོམ་སྤྱོད་གསུམ་གཞི་ལམ་འབྲས་གསུམ་གང་ཡང་མི་ཤེས་མཁན་ཞིག་གིས་ནང་པ་སངས་རྒྱས་པའི་གྲུབ་མཐའ་སྨྲ་བ་ཡིན་ཟེར་ན་ད་དཀའ་མོའི་གནས་ཤིག་ཏུ་ཆགས་འགྲོ་ཡི་འདུག དེ་ནང་བཞིན་ཁྱེད་རྣམ་པ་རྒྱལ་བ་བཀའ་བརྒྱུད་པ་ཡིན་ཟེར་ན་རྒྱལ་བ་བཀའ་བརྒྱུད་པའི་གཞི་ལམ་འབྲས་གསུམ་ལྟ་སྒོམ་སྤྱོད་གསུམ་དེ་ངེས་པར་ཤེས་དགོས་པ་ཧ་ཅང་གལ་ཆེན་ནང་གི་རྩ་ཆེན་དོན་གྱི་སྙིང་པོ་ཞིག་རེད་རང་གིས་བསམ་སོང༌། ནང་དགོས་སུ་རྒྱལ་བ་བཀའ་བརྒྱུད་པ་ལ་ནང་གསེས་ཀྱི་གྲུབ་མཐའ་ཟེར་ན་ཆོས་བརྒྱུད་མང་པོ་ཞིག་ཡོད་པ་རེད། དཔེར་ན་བཀའ་བརྒྱུད་ཆེ་བཞི་ཆུང་བརྒྱད་ཟེར་བ་ཞིག་ཡོང་གི་འདུག་དེ་དག་ཐམས་ཅད་རང་རང་སོ་སོའི་གཞུང་ལུགས་ཁ་མ་ཚང་བ་ཡིན་ན་གཅིག་གི་གཅིག་ལ་ཕན་ཚུན་ཁ་སྐོང་བྱས་ནས། མདོར་ན་ཐམས་ཅད་ཀྱིས་མིང་ཙམ་ལ་མ་ཞེན་པའི་སྒོ་ནས་རྒྱལ་བ་བཀའ་བརྒྱུད་པ་ཐམས་ཅད་ཀྱིས་ཕན་ཚུན་གཅིག་གི་འདུ་ཤེས་ཡོད་ན་རྒྱལ་བ་བཀའ་བརྒྱུད་པའི་ནང་ལ་མཐུན་འབྲེལ་ཟབ་རྒྱས་ཡོང་བ་དང་ཡར་རྒྱས་ཚད་མེད་པ་ཡོང་ཐུབ་པས་དེ་ནང་བཞིན་ཨེ་ཡོང་ལྟ་རྒྱུ་ཐུགས་ངེས་མཛད་དགོས་པ་རེད་མ་གཏོགས། དེ་མིན་སོ་སོས་རང་རང་གི་མིང་ཙམ་ལ་ཞེན་ནས་རིས་སུ་བཅད་སོང་བ་ཡིན་ན་ཆགས་སྡང་དབང་དུ་འགྲོ་བ་རེད། ཆགས་སྡང་གི་དབང་གིས་བསྟན་པ་འཛིན་ཐུབ་ཀི་མ་རེད། དེའི་རྒྱུ་མཚན་གང་ཞེ་ན་བསྟན་པ་ཟེར་བ་དེ་ཆགས་སྡང་གི་གཉེན་པོ་ཡིན་པ་ལས་བསྟན་པ་ཟེར་བ་དེ་ཆགས་སྡང་དར་སྤེལ་འགྲོ་བའི་རྐྱེན་མ་རེད། དེའི་ཕྱིར་ན་ཁྱོད་དང་ང་ཟེར་ནས་ཕྱོགས་རིས་ཆགས་སྡང་བྱས་ན་བསྟན་པ་དེ་འགྲིབ་ཀི་རེད་མ་གཏོགས་བསྟན་པ་འཕེལ་རྒྱས་ལ་འགྲོ་ཐུབ་པ་མ་རེད། རྒྱུ་མཚན་དེའི་དབང་གིས་མདོར་ན་ཕྱོགས་རིས་འཐེན་འཁྱེར་མེད་པའི་ཐོག་ནས་ཐམས་ཅད་ཀྱིས་མར་མི་དྭགས་གསུམ་གྱི་བསྟན་པ་འཛིན་སྐྱོང་སྤེལ་གསུམ་བྱེད་རྒྱུ་དེ་ཁྱེད་རྣམ་པའི་ཕྲག་ཏུ་བབས་པའི་འོས་འགན་དང་འགན་ཁྲི་ཞིག་རེད་བསམ་གྱིན་ཡོད། རྒྱུ་མཚན་དེ་བས་ན་ཐམས་ཅད་ཀྱིས་རང་གཞུང་དེ་སྦྱང་རྒྱུ་ཧ་ཅང་གལ་ཆེན་རེད། ཡིན་ནའང་རང་རང་སོ་སོས་གཞུང་སྦྱངས་དུས་སུ་ཆོས་རའི་ནང་དུ་ཡོང་ནས་ལུང་དྲངས་པ་ཡིན་ན་མ་ཁྱབ་རྐྱང་རྐྱང་ལབ་ནས་ཁྱབ་ཟེར་བ་གཅིག་ཀྱང་མེད་པ་ཡིན་ན་གཞུང་ལ་སྒྲོ་འདོགས་དང་སྐུར་འདེབས་བྱས་པའི་ཉེས་པ་བསགས་པ་མ་གཏོགས་ཚོགས་བསགས་ཐུབ་པ་མ་རེད། དེས་ན་ཐམས་ཅད་ཀྱིས་གཞུང་ལུགས་ལ་བརྟགས་དཔྱད་ཡག་པོ་བྱས་ནས་ཞིབ་པར་ཐག་གཅོད་པར་འདོད་ན་ཆོས་ཚུལ་ཟབ་པའི་ཐག་གཅོད་མི་སྔ་བར། །ཞེས་གསུངས་པ་ནང་བཞིན་ཐམས་ཅད་ཀྱིས་མ་ཁྱབ་རྐྱང་རྐྱང་ཟེར་ནས་ལུང་ཞིག་ལ་ཁྱོན་ནས་ནུས་པ་མེད་ནི་བྱས་ན་ལུང་ཞིག་ལ་སྒྲོ་འདོགས་རྐྱང་རྐྱང་བྱས་ནས་ཅིག་ཅིག་ལ་དགོངས་པ་རེད་ཉུག་ཉུག་ལ་དགོངས་པ་རེད་ཟེར་ནས་གསུང་བ་བོ་ཁོ་རང་གི་དགོངས་པ་མ་ཡིན་པ་ཞིག་དགོངས་པ་རེད་ཟེར་ན་སྒྲོ་འདོགས་དང༌། ཁོའི་དགོངས་པ་ཡིན་པ་ཞིག་མ་ཡིན་ཞེས་ལབ་སོང་བ་ཡིན་ན་སྐུར་འདེབས་སུ་ཆགས་འགྲོ་བ་རེད། སྐུར་འདེབས་དང་སྒྲོ་འདོགས་བྱས་ན་ཚོགས་བསགས་མི་ནུས་པར་ཚོགས་ངན་བསགས་ཀི་རེད། སྤྱིར་ན་ང་ཚོས་དཔེ་ཆ་ལྟ་སྐབས་སུ་ཚོགས་གསོག་གིན་ཡོད་པ་རེད། དེ་ཡང་གཙོ་བོ་ཐོས་བསམ་སྒོམ་གསུམ་དེ་ཡེ་ཤེས་ཀྱི་ཚོགས་ཡིན་པས་ཡེ་ཤེས་ཀྱི་ཚོགས་བསགས་ས་ནས་རང་གིས་ཚོགས་ངན་བསགས་ན་ཡག་པོ་ཡོང་གི་མ་རེད། དེའི་ཕྱིར་ན་རང་རང་སོ་སོས་གཞུང་ལུགས་ལ་ཡིད་ཆེས་ནས་ཚིག་ཟིན་ལྟར་ཁས་ལེན་ཨེ་ཐུབ་ལྟ་རྒྱུ་དེ་རིགས་པའི་སྒོ་སྣ་ཚོགས་ཀྱིས་དཔྱད་པ་བཏང་ན་སྔོན་བྱོན་སྐྱེས་བུ་དམ་པ་རྣམས་ཀྱིས་དཔྱད་པ་མཐར་ཕྱིན་ཏེ་བརྩམས་བཞག་པ་ཞིག་ཡིན་རྒྱུ་རེད། རང་རང་སོ་སོས་ཁས་ལེན་གྱི་འཛིན་མཚམས་དང་ཐུགས་དགོངས་གཏད་ས་གཞུང་གི་ཁུངས་བཅོལ་ས་ལུང་རིགས་ཀྱི་རྒྱབ་རྟེན་འཚོལ་ས་དེ་གང་ཡིན་པ་ཞིབ་པར་དཔྱད་ན་ལུང་དོན་མང་པོ་བཞག་དགོས་ཀི་མ་རེད། དེའི་དབང་གིས་ཐམས་ཅད་ཀྱིས་རང་གཞུང་དེ་རྩ་ཆེན་པོ་དང་མཐོང་ཆེན་བྱེད་རྒྱུ་ཧ་ཅང་གལ་ཆེན་པོ་ཞིག་རེད་བསམ་འདུག །དེ་མ་ཡིན་ན་རྒྱལ་བ་བཀའ་བརྒྱུད་པའི་རང་གི་བསྟན་པ་དེ་འཛིན་སྐྱོང་སྤེལ་གསུམ་བྱེད་ཐུབ་རྒྱུ་མ་རཻད། སྔར་འདས་པའི་རྒྱབ་ལྗོངས་ཟེར་ན་འདྲ་འདས་པའི་ལོ་རྒྱུས་ཐོག་ཡར་བལྟས་ན་དགོན་སྡེ་ཟེར་ན་འདྲ་ཆོས་བརྒྱུད་སོ་སོ་ཉམས་ཆག་ཏུ་སོང་བ་དེ་རྐྱེན་གང་གི་རེད་ཅེ་ན། གཅིག་ཕྱོགས་ནས་ཆབ་སྲིད་ཀྱི་དབང་གིས་བསྟན་པ་དེ་ཆབ་སྲིད་ལ་བསྲེས་ནས་ཉམས་ཆག་ལ་སོང་བ་དང༌། གཅིག་ཕྱོགས་ནས་གཡོ་སྒྱུའི་དབང་གིས་དགེ་རྒན་དང་དཔེ་ཁྲིད་ཡིག་ཆ་གཞན་དང་གཞན་བཙུགས་ནས་བསྒྱུར་སོང་བ་རེད་འདས་པའི་ལོ་རྒྱུས་ནང་ལ་ཧ་ཅང་རྙོག་འཛིང་རེད། དེ་འདྲ་ཡིན་ན་རང་རང་སོ་སོའི་རང་ཚུགས་བཟུང་དགོས་པ་དེ་ཧ་ཅང་གལ་ཆེན་པོ་ཞིག་རེད། མི་སུ་དང་སུ་ཡིན་ན་གཞན་དང་བསྟུན་དགོས་པ་དང་རང་ལ་རང་ཚུགས་ཡོད་དགོས་པ་ཧ་ཅང་གལ་ཆེན་རེད་བསམ་རྒྱུའི་རང་གི་ཚོར་སྣང་གི་སྐད་ཆ་ཞིག་རྣམ་པ་ཚོ་ལ་ཞུས་པ་ཡིན། དེ་མ་གཏོགས་དམིགས་གསལ་གྱི་ཞུ་བྱ་མེད། ང་ལ་མཚོན་ན་གོ་ཆེ་དགོན་པ་ལ་སྔོན་ནས་དགེ་རྒན་དུ་ཐེངས་ཁ་ཤས་ལ་ཡོང་བ་ཡིན། དེའི་འབྲེལ་བའི་དབང་གིས་ད་རེབ་ཡོང་རོགས་ཀྱིས་ཟེར་ནས་ཐེངས་ཁ་ཤས་ཞུ་བ་བྱས་ནས་ད་ཐེངས་ཡོང་པ་ཡིན། ཡིན་ནའང་སྐད་ཆ་ཞུ་རྒྱུའི་འཆར་གཞི་མེད་ད་དེ་རིང་ཁོང་རྣམ་པས་སྐད་ཆ་ཞིག་བཤད་རོགས་ཀྱིས་གསུངས་སོང༌། དེའི་དབང་གིས་གོང་དུ་ས་བཅད་མ་སྟོང་བ་ཙམ་ཞིག་ཞུས་པ་ཡིན། མ་འོངས་པ་ཡིན་ན་འདྲ་འདས་པའི་ལོ་རྒྱུས་ཐོག་ལ་ང་ཚོ་དཔལ་ལྡན་རྒྱལ་བ་ཇོ་ནང་པ་དང་རྒྱལ་བ་བཀའ་བརྒྱུད་གཉིས་ཀར་མཚོན་ན་གཅིག་གཅིག་ལ་ཕན་ཚུན་ཉམས་རྒུད་གང་གི་སྐབས་སུ་ཡིན་ན་གདུང་སེམས་མཉམ་བསྐྱེད་བྱས་ནས་ཡོང་བཞག་པ་ཞིག་ཡིན་པ་ཁྱེད་རྣམ་པ་ཚང་མས་འདས་པའི་ལོ་རྒྱུས་ནང་ལ་ཡོད་པ་མཁས་དབང་རྣམ་པའི་ཐུགས་ལ་ཡོད་པ་ནང་བཞིན་རེད། བསྟན་པ་འཛིན་སྐྱོང་སྤེལ་གསུམ་ཕྱོགས་ནས་ཡིན་ན་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་བོའི་སྐུ་དུས་སུ་ཀརྨ་བ་རང་བྱུང་རྡོ་རྗེ་དང་ཁོང་རྣམ་པ་གཉིས་ནས་བཟུང་ད་བར་དུ་ཆོས་བརྒྱུད་ཕན་ཚུན་གཅིག་གིས་གཅིག་ལ་དབང་ལུང་ཁྲིད་གསུམ་གྱི་བརྒྱུད་པ་སྤེལ་ནས་ཡོང་བ་ཞིག་རེད། རྗེ་ཐམས་ཅད་མཁྱེན་པ་ཏཱ་ར་ནཱ་ཐའི་གསུང་འབུམ་གྱི་མཇུག་བྱང་ནང་དུ་ཤངས་པ་བཀའ་བརྒྱུད་པའི་ཆོས་བརྒྱུད་དུ་གཏོགས་པ་ཞེས་ཁོང་ཤངས་པ་བཀའ་བརྒྱུད་ཡིན་ཞེས་གསུངས་འདུག །དེའི་རྒྱུ་མཚན་གྱིས་ང་ཚོ་ཡིན་ན་གཅིག་གི་གཅིག་ལ་ཆོས་དམ་ཚིག་དང་དགོན་སྡེ་སྤྱི་དང་བྱེ་བྲག་གང་ཡིན་ཡང་ཕན་ཚུན་དམ་ཚིག་ལ་སེལ་བྱུང་མ་མྱོང་བ་དང་གཅིག་གི་གཅིག་ལ་མཐུན་འབྲེལ་ཟབ་མོ་དང་རྒྱ་ཆེ་བ་ཡིན་ན། ད་ལྟ་ང་ཚོའི་དུས་སུ་ཕན་ཚུན་གཅིག་གི་གཅིག་བར་ལ་མཐུན་འབྲེལ་དང་རྒྱབ་སྐྱོར་རོགས་རམ་བྱེད་རྒྱུ་ངས་འདི་ནས་ཁྱེད་རྣམ་པ་ཚོ་ལ་གསོལ་བ་འདེབས་པ་དང་རེ་བ་ཞུས་པ་ཡིན། དེ་མ་གཏོགས་དེ་རིང་གི་ཆ་ལ་ཞུ་རྒྱུ་མེད། མཇུག་མཐར་ཐམས་ཅད་ཀྱིས་ང་ཚོ་སངས་རྒྱས་ཀྱི་བསྟན་པ་སྤྱི་དང་བྱེ་བྲག་ངེས་དོན་གྱི་རྒྱལ་བ་བཀའ་བརྒྱུད་པའི་བསྟན་པ་འདི་དར་ཞིང་རྒྱས་ལ་ཡུན་རིང་དུ་གནས་པའི་བཀྲ་ཤིས་སྨོན་འདུན་ཞུ། ཐལ་མོ་རྡེབ་སྒྲ།