དྲང་སྲོང་ཆེན་པོ་ལ་བསྟོད་པ།
དྲང་སྲོང་གི་བསྟོད་པའོ། །དེ་ནས་དྲང་སྲོང་ཆེན་པོ་ལ་བསྟོད་པ་འདི་གསུངས་སོ། །ཧྲཱི༔ ཁྱབ་མཇུག་ཆེན་པོ་སྒྲ་གཅན་འཛིན། །འཇིགས་པའི་ལུས་ལ་འབར་བའི་ཀློང་། །འཇིག་རྟེན་ཁམས་ཀྱི་དྲག་རྩལ་ཅན། །སྤྲུལ་པ་ཆེན་པོ་མི་བསྲུན་པ། །གནམ་ལྕགས་ཐོག་གི་བདག་པོ་སྟེ། །སྐྱིན་ཐོང་སེར་བ་འབེབས་པའི་གཙོ། །དྲང་སྲོང་ཆེན་པོ་རྫུ་འཕྲུལ་ཅན། །རི་རབ་སྟེང་དུ་ལྷ་ཡི་གཙོ། །རྒྱ་མཚོའི་སྟེང་དུ་ཀླུ་ཡི་བདག། བར་སྣང་ཁམས་
སུ་བསྐྱོད་ཙ་ན། །ལྷ་སྲིན་སྡེ་བརྒྱད་རྣམས་དང་བསྡོངས། །ལུས་གཅིག་མགོ་དགུ་སྲིད་གསུམ་གཙོ། །མགོ་གཅིག་ལྷ་སྲིན་ཁྲོས་པའི་ཞལ། །ཉི་མ་ཟླ་བ་གྲིབ་མས་གནོན། །གཅིག་ནི་བཞད་ཅིང་དགོད་པའི་ཞལ། །དགྱེས་པས་བཀའ་ཡི་བྱ་ར་མཛད། །གཅིག་ནི་ཁྲོས་པ་སྲིན་པོའི་གདོང་། །གདུགས་པའི་དགྲ་འགོགས་ཟས་སུ་ཟ། །གཅིག་ནི་རྔམ་ཞིང་ཟ་བྱེད་གདོང་། །གནམ་ལྕགས་མི་ཡི་ཐོག་ཆེན་འབེབས། །གཅིག་ནི་འཇིགས་བྱེད་མ་རུངས་པ། །ཚ་གྲངས་འཐབས་པའི་སྐན་སྒྲ་སྒྲོགས། །གཅིག་ནི་འཁྲུགས་བྱེད་འཇིགས་པའི་ཞལ། །གཡོ་འགུལ་ཆེན་པོའི་སེར་བ་འབེབས། །གཅིག་ནི་གཏུམ་བྱེད་ཡེ་ཤེས་ཞལ། །མངོན་ཤེས་ནུས་མཐུ་ཐོགས་མེད་སྟོན། །གཅིག་ནི་ལས་རྣམས་རྫུ་འཕྲུལ་གདོང་། །སངས་རྒྱས་བསྟན་པ་སྲུང་བར་བྱེད། །གཅིག་ནི་ཞི་བ་ལྷ་ཡི་ཞལ། །སྒྲུབ་པ་པོ་ལ་དངོས་གྲུབ་སྟེར། །ཧྲཱི༔ ཁྱོད་ནི་ཆོས་སྐྱོང་ཆེན་པོ་སྟེ། །སྟེང་གི་ཕྱོགས་ན་བྱ་རོག་ཞལ། །དཀོན་མཆོག་དབུ་འཕང་བསྟོད་པར་བྱེད། །རྭ་ཡི་མདའ་གཞུ་བསྣམས་པ་ནི། །སྡང་བྱེད་དགྲ་བོ་སྒྲོལ་བའི་རྟགས། །ཆུ་སྲིན་ཞགས་པ་བསྣམས་པ་ནི། །ས་བདག་ཀླུ་གཉན་འདུལ་བའི་རྟགས། །སྐུ་ལ་མིག་གིས་གདབ་
ནི། །ཕྱོགས་བཅུར་བསྟན་པ་སྐྱོང་བའི་རྟགས། །ཁྱོད་ནི་བདུད་འདུལ་ཆེན་པོ་སྟེ། །དཔལ་ལྡན་མགོན་པོའི་ལས་མཁན་མཆོག། རེ་མ་ཏི་ཡི་ཕོ་ཉ་ཆེ། །ཨེ་ཀ་ཙ་ཏིའི་བཀའ་སྡོད་དེ། །ཧེ་རུ་ཀ་ཡི་སྤྲུལ་པ་ཉིད། །རྡོ་རྗེ་འཆང་གིས་དབང་བསྐུར་ནས། །དཀྱིལ་འཁོར་བཅུག་ཅིང་དམ་ལ་བཏགས། །སྲིང་མོ་གདོང་མོ་མཆེད་བཞིར་བཅས། །ཀིང་ཀང་རྔམ་པའི་ལས་བྱེད་མ། །ཆོ་འཕྲུལ་འགྱེད་ཅིང་བསྟན་པ་བསྲུངས། །བྷ་ལིང་གཏོར་མ་འདི་བཞེས་ལ། །བསྟན་པ་བཤིག་པའི་དགྲ་བོ་ལ། །ཐོག་སེར་དབབ་པའི་དུས་ལ་བབས། །བསྟན་པ་བསྲུང་བའི་ལས་མཛོད་ཅིག། བཅོལ་པའི་ཕྲིན་ལས་གྲུབ་པར་མཛོད། །ཅེས་གསུངས་སོ། །འདི་ཁྲག་མཚོ་ཁོལ་མའི་རྒྱུད་ནས་དྲང་སྲོང་ཆེན་པོ་ལ་བསྟོད་པ་གསུངས་པ་རྫོགས་སོ།། །།གཟའ་སྒྲུབ་པའི་གནད་ཡིག། རྡོ་རྗེ་འཛིན་ལ་ཕྱག་འཚལ་ལོ། །འདི་སྒྲུབ་པའི་གནད་ཡིག་ནི། །གདམས་ངག་གནད་ཐེམས་ཤིན་ཏུ་གཅེས། །རྫས་གནད་དམིགས་གནད་སྔགས་གནད་དོ། །རྫས་ནི་བླ་རྡོ་མན་ངག་བཞིན། །དམིགས་པ་རང་ཉིད་རཱ་ཧུ་ལ། །འཇིགས་པའི་ཐུགས་ཀར་ཀྵ་ནག་ལས། །འོད་འཕྲོས་ཕྱོགས་བཅུའི་སངས་རྒྱས་ཀྱི། །ཐུགས་ཀ་ཉིད་ནས་ཡེ་ཤེས་ཀྱི། །གཟའ་བདུད་སྤྱན་དྲངས་བདག་ལ་
བསྟིམ། །མདུན་གྱི་ནམ་མཁར་འབྲུབ་ཁུང་དབུས། །གཟའ་བདུད་ཚོན་གང་གཞུང་བཞིན་བསྐྱེད། །འབོད་སྔགས་ཉེར་གཅིག་བཟླས་པ་ཡིས། །རྒྱུ་བའི་ཕྱོགས་ནས་གཟའ་བྱུང་ནས། །དེ་ཉིད་ལ་ནི་ཐིམ་པར་བསམ། །གཏོར་མ་དབུལ་ཞིང་ཐུན་རྫས་མཆོད། །བསྟོད་ནས་འབོད་སྔགས་ཞག་བདུན་བཟླས། །ཧྲཱི་ཤག་རུ་རྃ། ནཱ་ག་ཙིཏྟ་ཏྲཾ། མ་མ་ཡོ་ཟ། འགྲམ་ཧ་ཧི། ཡོ་གི་ཤ་ལ་ཛ་ཛ༔ དེ་ལྟར་བཟླས་པས་དངོས་སུ་འོངས། །གང་འདོད་བཅོལ་ལ་འཇིགས་མི་བྱ། །དེ་ནས་བསད་སྔགས་བཟླས་པ་ནི། །དམིགས་པ་སྔར་བཞིན་འབོད་སྔགས་བཟླས། །གཏོར་མཆོད་བསྟོད་རྗེས་འདི་བཟླས་སོ། །ཨཱོྃ་ཨ་ཀྲོ་ཏེ་ཀ་ཧྲཱི་ཤག་རུ་རྃ། མ་མ་ཡོང་ཟ། འགྲམ་ཧ་ཧི་ཀཱ་ལ་ཛ་ཛ༔ དེ་ལྟར་ཞག་བདུན་བར་དུ་བསྒྲུབ། །དེ་ནས་སྔར་བཞིན་གཏོར་མའི་རྗེས། །བསད་སྔགས་མིང་དང་སྤེལ་ལ་བསྒྲུབ། །དེ་ལྟར་ཞག་གྲངས་ཉི་ཤུ་གཅིག། སོང་རྗེས་ལིང་ག་བསྲེགས་པ་ཡི། །ཐལ་བ་མནན་ལ་གཏོར་ཟོར་འཕངས། །དེས་ནི་ཐེ་ཚོམ་མེད་པ་ཡིན། །ཤིན་ཏུ་གསང་ནས་བསྒྲུབ་པ་གཅེས། །ཀློང་ཆེན་རབ་འབྱམས་བདག་གིས་ནི། །གཏེར་ཁ་དུ་མའི་གནད་མཐོང་ཞིང་། །བླ་མའི་མན་ངག་བཅུད་དྲིལ་
ནས། །སྐལ་ལྡན་དོན་དུ་བྲིས་པ་ཡིན། །གནད་འདི་གཞན་ལ་མ་བསྟན་ཅིག། ཟབ། ཨྠྀིྀ༔ རྒྱ་རྒྱ་རྒྱ༔ །