བསམ་ཡས་ཀྱི་དཀོར་སྲུང་སྤྱན་དྲངས་པའི་ལེའུ།
དེ་ནས་ལྷ་ཁང་ནང་དུ་ཅོང་འདོགས་པཿ མི་མ་ཡིན་གྱིས་འདོགས་སུ་མ་སྟེར་བསཿ སློབ་དཔོན་མཆི་མས་ཕུར་ཡང་དག་སྒྲུབ་པ་མཛདཿ རུ་ལུ་ཚངས་པའི་དབྱངས་གྱི་འདྲེན་སྟངས་བླངསཿ མི་མ་ཡིན་རྣམས་ཡེངས་ལ་བོར་ནས་སུཿ གཞན་རྣམས་གཙུག་ལག་ཁང་དུ་ཅོང་འདོགས་བཅུགཿ སློབ་དཔོན་དགོངས་ལྷ་འདྲེས་བཤིག་མ་ནུསཿ དེ་ནས་གཙུག་ལག་ཁང་གི་དཀོར་སྤུང་ལཿ མཁན་སློབ་རྒྱལ་པོ་ཡོན་མཆོད་བཀའ་བགྲོས་མཛདཿ མཁན་ཆེན་བོ་དྷི་སཏྭའི་ཞལ་ནས་ནིཿ བདུད་ལ་གཏད་ན་གསོད་པའི་རང་བཞིན་ཡིནཿ གཟའ་གཏུམ་ཀླུ་གདུག་བཙན་འཇམ་མ་མོ་འཇིགསཿ སློབ་དཔོན་ཆེན་པོ་པདྨའི་ཞལ་སྔ་ནསཿ རྗེ་ལ་ཞལ་ངོ་བདུད་ཀྱི་སྤྲུལ་པ་འབྱུང་ཿ ཐུགས་ལ་གདོན་གསོལ་མི་འཆམ་སྣ་ཚོགས་
༼༡༤༦བ༽བྱེདཿ ཡུམ་བརྟེན་འོད་སྲུང་ཞེས་བྱ་འཁྲུག་པ་འབྱུང་ཿ དེ་ཚེ་འདྲེ་ཡི་སྤྲུལ་པས་གླགས་རྙེད་ནསཿ གདུང་རབས་བརྒྱ་དང་བཅུ་ལྷག་སོང་ཙ་ནཿ ཧོར་ཡུལ་གནམ་ཐེའུ་དཀར་པོའི་རྒྱལ་པོ་འོང་ཿ བོད་ཁམས་ཐམས་ཅད་ཧོར་གྱི་མངའ་འོག་འཇུགཿ ཧོར་གྱི་ཕོ་ལྷ་གནམ་ལྷ་བྱང་ཆུབ་ཡིནཿ རྒྱལ་པོ་ཤིང་བྱ་ཅན་ནི་སྤྱན་དྲངས་ནསཿ དེ་ལ་གཏད་ན་གཙུག་ལག་ཁང་མི་འཇིགཿ བྷ་ཏ་ཧོར་གྱི་སྒོམ་གྲ་བཅོམ་པ་ནཿ པེ་ཧར་ཀ་ཅིའི་ཕྱི་ལ་འབྲང་ནས་འོང་ཿ ང་ཡིས་པེ་ཀར་གླིང་དུ་རྟེན་འཛུགས་གསུང་ཿ དེ་ནས་བྷ་ཏར་དམག་བརྒྱབ་སྒོམ་གྲ་བཅོམཿ ཟས་ནོར་མང་པོ་དྲངས་ནས་ཡོངས་པ་ལཿ ལ་ལ་སྨྱོར་བཅུག་ལ་ལ་འབོག་ཏུ་བཅུགཿ དེ་ནས་ཨུ་རྒྱན་པདྨ་འབྱུང་གནས་ཀྱིསཿ པེ་ཀར་གླིང་དུ་རྒྱལ་པོའི་རྟེན་བཙུགས་ཏེཿ ཕྱི་རྟེན་སྲོག་ཆགས་དཀར་པོ་རྟེན་དུ་བཙུགསཿ ནང་རྟེན་སྨྱུག་རྒོད་དར་སྣ་རྔ་མས་བརྒྱནཿ གསང་རྟེན་སྐུ་འབག་མདོས་ལ་སོག་པ་བཙུགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བསམ་ཡས་ཀྱི་དཀོར་སྲུང་སྤྱན་དྲངས་པའི་ལེའུ་སྟེ་རེ་གསུམ་པའོཿ ཿཐ་ཐ་ཉྲ་རྒྱ་རྒྱཿ ཿ