ནུས་ལྡན་རྡོ་རྗེས་སངས་རྒྱས་སྟོང་རྩ་གཉིས་ལ་དབང་བསྐུར་ལུང་བསྟན་པའི་ལེའུ།
དེ་ནས་སྤྲུལ་སྐུའི་བསྟན་པ་གངས་ཆེན་མཚོཿ སངས་རྒྱས་སྟོང་རྩར་དབང་བཅུ་བསྐུར་ཚུལ་ནིཿ འཇིག་རྟེན་ཞིང་ཁམས་རྣམ་པར་བརྒྱན་པ་ཞེསཿ རབ་ཏུ་དགའ་བ་མཛེས་པའི་གླིང་བཞི་པཿ འབྱོར་པ་ལེགས་པ་ཡངས་ཤིང་ཐ་གྲུ་ཆེཿ གླིང་བཞི་རེ་རེ་ལ་ཡང་དཔག་ཚད་ནིཿ བརྒྱད་ཁྲི་བཞི་སྟོང་ཡོད་པའི་ཞིང་ཁམས་ནཿ དེ་དབུས་བསོད་ནམས་ཕུང་པའི་ཕོ་བྲང་ནིཿ རྣམ་པར་དག་པ་ཅན་ཞེས་བྱ་བ་ཡོདཿ ཡངས་ཤིང་རྒྱ་ཆེ་སྐྱེད་མོས་ཚལ་ཁྲིས་བརྒྱནཿ དེ་ན་འཁོར་ལོ་སྒྱུར་བའི་རྒྱལ་པོ་ནིཿ ཡུལ་འཁོར་སྲུང་ཞེས་བྱ་བ་བདེ་བར་བཞུགསཿ རྒྱལ་སྲིད་རིན་ཆེན་སྣ་བདུན་དག་དང་ལྡནཿ གླིང་བཞིར་དབང་སྒྱུར་བཙུན་མོ་བདུན་འབུམ་ཡོདཿ བཙུན་མོ་རྣམས་ལ་བུ་ནི་སྟོང་ཚོ་གཅིགཿ མཚན་ནི་བཟང་པོ་སུམ་ཅུ་གཉིས་ཀྱིས་བརྒྱནཿ དེ་ནས་རྒྱལ་པོ་ཆེན་པོ་ཡུལ་འཁོར་སྲུང་ཿ ཟླ་བ་ཉ་ཚེ་མེ་ཏོག་སྣ་ཚོགས་ཀྱིསཿ གང་བའི་སྐྱེད་མོས་ཚལ་གྱི་སར་སོང་ནསཿ རབ་ཏུ་རྩེ་ཞིང་དགའ་མགུར་སྤྱོད་པར་གྱུརཿ བཙུན་མོའི་དམ་པ་མ་སྨད་མ་ཞེས་དང་ཿ བཙུན་མོ་དཔེ་མེད་མ་ཞེས་བྱ་བ་གཉིསཿ རྫིང་བུ་དགའ་བ་ཞེས་བྱར་ཁྲུས་བྱས་ཏེཿ ལུས་ལ་སྤོས་ཆུས་བགོས་ནས་སེང་གེའི་ཁྲིཿ པདྨའི་འབྱུང་གནས་བཟང་པོ་ལ་འདུག་སྟེཿ དེ་དག་གཉིས་ཀྱི་པང་དུ་རྒྱལ་བུ་ནིཿ གཞོན་ནུ་གཟུགས་བཟང་མཛེས་པ་ལྟ་ན་སྡུགཿ ཁ་དོག་བཟང་པོ་རྒྱས་པ་ཆོག་མི་ཤེསཿ
༼༢༥ན༽གཉིས་ནི་སྐྱིལ་མོ་ཀྲུང་བཅས་བརྫུས་ཏེ་ཕྱུང་ཿ དེ་ནས་སྐད་ཅིག་སྟེང་གི་བར་སྣང་ལསཿ ཁྱེའུ་འདི་ཉིད་ཆོས་ཀྱི་སེམས་དཔའ་འོཿ དཔེ་མེད་མ་བུ་ཆོས་ཀྱི་བློ་གྲོས་སོཿ ཞེས་པ་ལྷ་རྣམས་དུས་གཅིག་སྒྲ་འབྱིན་ཏོཿ དེ་ནས་ཁྱེའུ་གཉིས་ཀྱིས་ཚིགས་བཅད་པཿ གང་དག་བྱང་ཆུབ་ཏུ་ནི་སེམས་བསྐྱེད་ཅིང་ཿ འཇིག་རྟེན་མགོན་པོ་ཡུལ་དུ་བྱུང་བ་ལཿ རབ་ཏུ་དད་པའི་སེམས་ཀྱིས་ཕྱག་འཚལ་བཿ དེ་དག་རྙེད་པ་རབ་རྙེད་གྲོས་པོ་དགཿ དགེ་བའི་རྩ་བ་བསྐྱེད་ནས་འཛམ་གླིང་བདེཿ སེམས་ཅན་ཀུན་ལ་ཕན་བྱེད་ཚན་པོ་ཆེཿ མཐོ་རིས་དག་ན་རིན་ཆེན་མཆོག་ཡོད་པཿ མི་ཡི་མཆོག་དང་འདིར་ནི་མཚུངས་པ་མེདཿ ཅེས་པ་ལ་སོགས་ཚིག་བཅད་མང་གསུངས་ནསཿ དེ་ནས་མ་ཡི་པང་ནས་བབས་ནས་སུཿ རྒྱལ་པོ་ཡུལ་འཁོར་སྲུང་གི་དྲུང་སོང་སྟེཿ རྐང་པར་ཕྱག་བྱས་ཐལ་མོ་སྦྱར་ནས་འདུགཿ ཡབ་གཅིག་བདག་གི་མཆིང་འདི་གསན་དུ་གསོལཿ བསྐལ་པ་བྱེ་བར་ཆོས་རྙེད་རབ་ཏུ་དཀའཿ དེ་རྙེད་ནས་ནི་བྱང་ཆུབ་མ་ཐོབ་པརཿ མཁས་པ་དག་ནི་གཞར་ཡང་མི་གཏོང་ངོ་ཿ བདུད་རྩི་ཞི་བ་འདུས་མ་བྱས་པ་ཡིཿ ཆོས་དེ་དང་ནི་གང་ཡང་མཚུངས་པ་མེདཿ སེམས་ཅན་ཐམས་ཅད་རབ་ཏུ་དགའ་བར་འགྱུརཿ དེ་བས་དམ་ཆོས་རིན་ཆེན་མཆོག་ཏུ་གསུངསཿ ཞེས་
༼༢༥བ༽པ་ལ་སོགས་ཚིགས་བཅད་མང་དུ་གསུངསཿ དེ་ནས་ཆོས་ཀྱི་རྒྱལ་པོ་ཡུལ་འཁོར་སྲུང་ཿ དབེན་པར་སོང་སྟེ་གསང་སྔགས་རྣལ་འབྱོར་པཿ ནུས་ལྡན་རྡོ་རྗེ་ཞེས་བྱའི་བླ་མའི་དྲུང་ཿ རྒྱལ་པོས་ཐལ་མོ་སྦྱར་བྱས་འདུག་ནས་སུཿ ཆོས་ཀྱི་ཤུགས་ཀྱིས་མིག་ནས་མཆི་མ་ཕྱུང་ཿ སྐྱེ་དགུ་རྣམས་ལ་རྟག་ཏུ་བྱམས་བྱེད་པཿ བཙུན་མོའི་ཕག་ན་ལྷ་ཕྲུག་བརྫུས་སྐྱེས་པའིཿ འཇིགས་པ་ཐམས་ཅད་བདག་ལ་མེད་པར་གྱིསཿ ཚིགས་སུ་བཅད་པ་དེ་དག་གསོལ་པ་དང་ཿ ནུས་ལྡན་རྡོ་རྗེས་རྒྱལ་པོའི་སྙན་གསོལ་པཿ ཆོས་བསྟན་རྣམ་པ་སྣ་ཚོགས་རྒྱ་ཆེ་བཿ ཇི་ལྟར་སངས་རྒྱས་སྟོང་སྐུ་མང་པོ་ཡིཿ རྟགས་དང་མཚན་མ་ཤིན་ཏུ་བཀྲ་ཤིས་པཿ རིན་ཆེན་བུམ་པར་ཁྱེའུའི་མིང་བཅུག་སྟེཿ དཀྱིལ་འཁོར་དབུས་བཞུགས་བསྒྲུབས་པས་ཐམས་ཅད་འགྲུབཿ ཅེས་གསུངས་དེ་ནས་རྒྱལ་པོ་ཡུལ་འཁོར་སྲུང་ཿ བཀོད་པ་ཆེན་པོའི་ཁང་པ་བརྩེགས་པའི་དབུསཿ སེང་ཁྲི་པདྨའི་འབྱུང་གནས་བཟང་པོར་འདུགཿ ནང་དུ་ཡང་དག་འཇོག་ཅིང་འདི་ལྟར་བསམཿ བདག་གི་གཞོན་ནུ་འདི་དག་ཐམས་ཅད་ནིཿ བླ་མེད་ཡང་དག་ཞུགས་པ་ཤ་སྟག་སྟེཿ གཞོན་ནུ་འདི་དག་ཐམས་ཅད་ནང་ནས་ནིཿ ཐོག་མར་སངས་རྒྱས་གང་འགྲོ་བ་རྟག་གོ་སྙམཿ རིན་ཆེན་སྣ་བདུན་བུམ་པ་བྱེད་དུ་
༼༢༦ན༽བཅུགཿ བྱི་དོར་ལེགས་པར་བྱས་ཤིང་འོ་མ་དང་ཿ རཏྣ་འབྲུ་དང་མེ་ཏོག་དྲི་བཟང་བླུགཿ གཞོན་ནུ་དེ་དག་མིང་བྲིས་བུམ་པར་བཅུགཿ ཁ་རྒྱན་མགུལ་ཆིངས་རིན་ཆེན་སྣ་ཚོགས་དང་ཿ པདྨ་སྣ་ཚོགས་ཡིད་བཞིན་ནོར་བུས་བརྒྱནཿ བལྟ་ན་སྡུག་བྱས་པདྨའི་སྟེང་དུ་བཞགཿ བཀའ་རྣམས་འདུས་པའི་དཀྱིལ་འཁོར་ཞལ་ཕྱེ་ནསཿ ནུས་ལྡན་རྡོ་རྗེས་ཞག་བདུན་བར་དུ་བསྒྲུབསཿ ལྷ་ཡི་མེ་ཏོག་སྤོས་དང་ཕྱེ་མ་དང་ཿ བདུག་པ་དང་ནི་བྱུག་པའི་རིགས་རྣམས་དང་ཿ རོལ་མོ་སིལ་སྙན་རྣམས་ཀྱིས་ཞག་བདུན་མཆོདཿ རྒྱལ་པོ་བཙུན་མོ་བུ་སྟོང་འཁོར་དང་བཅསཿ རྫུས་སྐྱེས་གཉིས་ཀྱི་མདུན་དུ་བུམ་པ་བཞགཿ དེ་ནས་ནུས་ལྡན་རྡོ་རྗེས་དབང་བསྐུར་བཿ སྤྱི་དབང་ཉེར་ལྔ་བྱེ་བྲག་དབང་བཅུ་དང་ཿ སྒོས་དབང་དབང་གི་ཆུ་བོ་བཞི་ཕབ་བསྐུརཿ ལུང་བསྟན་བུམ་པའི་ནང་ནས་མིང་ཕྱུང་སྟེཿ ཐོག་མར་གཞོན་ནུ་རྣམ་དག་བློ་གྲོས་བྱུང་ཿ མིང་དེ་བྱུང་མ་ཐག་ཏུ་ས་ཆེན་གཡོསཿ བཙུན་མོའི་འཁོར་གྱི་ལག་གི་སིལ་སྙན་དང་ཿ རོལ་མོ་ཐམས་ཅད་མ་དཀྲོལ་སྒྲ་འབྱིན་གྱུརཿ དེ་ནས་ནུས་ལྡན་ཐོག་མར་མིད་བྱུང་བའིཿ གཞོན་ནུ་རྣམ་དག་བློ་གྲོས་བྱ་བ་དེཿ སངས་རྒྱས་འཁོར་བ་འཇིག་ཏུ་ལུང་བསྟན་གྱུརཿ
༼༢༦བ༽དེ་འོག་གཞོན་ནུ་རྣམ་དག་རྒྱལ་ཞེས་བྱུང་ཿ དེ་ནི་སངས་རྒྱས་གསེར་ཐུབ་ལུང་ཡང་བསྟནཿ དེ་འོག་དབང་པོ་ཞི་བ་ཞེས་བྱ་བྱུང་ཿ སངས་རྒྱས་འོད་སྲུངས་ཞེས་བྱར་ལུང་ནི་བསྟནཿ དེ་འོག་གཞོན་ནུ་དོན་ནི་གྲུབ་པ་བྱུང་ཿ སངས་རྒྱས་ཤཱཀྱ་ཐུབ་པར་ལུང་ཡང་བསྟནཿ དེ་འོག་གཞོན་ནུ་སྐ་རགས་ཅན་ཞེས་བྱུང་ཿ དེ་ནི་བྱམས་པ་ཞེས་བྱར་ལུང་ཡང་བསྟནཿ དེ་འོག་གཞོན་ནུ་མཆོག་གི་བློ་གྲོས་བྱུང་ཿ དེ་ནི་སངས་རྒྱས་སེང་གེར་ལུང་ཡང་བསྟནཿ དེ་ནས་ཐ་ཆུང་བློ་མཐའ་ཡས་མིང་བྱུང་ཿ དེ་ནི་མོས་པ་ཞེས་བྱར་ལུང་ཡང་བསྟནཿ དེར་ནི་སྣག་གི་གཉན་མཚམས་སྤུན་ན་རེཿ བདག་ཅག་རྣམས་ཀྱིས་སེམས་ཅན་ཡོངས་སྨིན་བྱསཿ དེ་ཡི་འོག་ཏུ་ཁྱོད་ཀྱིས་ཅི་བྱར་ཡོདཿ ཅེས་བརྗོད་བློ་མཐའ་ཡས་ཀྱིས་ལན་སྨྲས་པཿ སངས་རྒྱས་རྣམས་ནི་ནམ་མཁའ་མཚུངས་ཤིང་འདྲཿ བདག་ཡིད་སེམས་ཅན་ཟད་པ་མེད་སྙམ་བགྱིདཿ ཚུལ་ཁྲིམས་དག་པས་སྨོན་ལམ་འདི་དག་འགྱུརཿ བདག་གི་སྨོན་ལམ་ཅི་འདྲ་འདིར་གསོལ་ཅིགཿ ཁྱོད་ཀྱི་ཚེ་ཚད་ཅི་ཙམ་བདག་ལ་བསྡོམསཿ ཆོས་ཀྱི་རྒྱལ་པོ་ཇི་སྙེད་ཀུན་བསྡོམས་པཿ ཐམས་ཅད་བསྡོམས་པ་དེ་དག་བདག་ཆེར་གྱུརཿ ཅེས་པ་སྨྲས་མ་ཐག་ཏུ་ལྷ་རྣམས་ཀྱིསཿ ཁྱོད་ཀྱི་བསམ་པ་རྫོགས་པར་གྱུར་
༼༢༧ན༽ཅིག་བརྗོདཿ སངས་རྒྱས་སྟོང་དུ་གཅིག་གིས་མ་ཚད་པཿ དེ་བཞིན་གཤེགས་པ་མོས་པས་བྱེད་པར་འགྱུརཿ དེ་ནས་རྫུས་སྐྱེས་གཉིས་ཀྱི་མིང་མ་བྱུང་ཿ ཁོང་རང་གཉིས་ལ་ཇི་ལྟར་ཡིན་ཞེས་དྲིསཿ གཞོན་ནུ་ཆོས་ཀྱི་སེམས་དཔའི་ཞལ་ན་རེཿ ཕུ་བོ་སྟོང་གི་བར་ཆད་བསྲུང་བ་ཡིཿ སྡུད་པ་པོ་ནི་ལག་ན་རྡོ་རྗེ་ཡིནཿ གཞོན་ནུ་ཆོས་ཀྱི་བློ་གྲོས་ཞལ་ན་རེཿ ཕུ་བོ་སྟོང་གི་ཞུ་བ་པོ་བྱེད་པཿ ཚངས་པའི་དབང་པོ་ཡིད་བཞིན་དེ་ཡིན་ནོཿ དེ་ནས་གཞོན་ནུ་སྟོང་པོ་དེ་དག་གིསཿ ཆོས་ཀྱི་སེམས་དཔའ་ཆོས་ཀྱི་བློ་གྲོས་ལཿ རིགས་ཀྱི་བུ་གཉིས་སྨོན་ལམ་ཇི་ལྟར་བཏབཿ དེ་ལན་ཆོས་ཀྱི་སེམས་དཔས་སྨྲས་པ་ནིཿ བདག་གིས་ཁྱོད་རྣམས་བར་ཆད་བསྲུང་བ་དང་ཿ ཕྱི་ནང་སངས་རྒྱས་ཆོས་རྣམས་ཉན་པ་དང་ཿ ལག་ན་རྡོ་རྗེར་སྟོན་པར་སྨོན་ལམ་བཏབཿ དེ་ནས་ཆོས་ཀྱི་བློ་གྲོས་ཀྱིས་སྨྲས་པཿ བདག་གིས་ཁྱོད་རྣམས་བྱང་ཆུབ་ཐོབ་པའི་ཚེཿ ཆོས་ཀྱི་འཁོར་ལོ་བསྐོར་བར་བསྐུལ་བ་སྟེཿ ཆོས་བསྐུལ་ཆོས་ཉན་བྱེད་པར་སྨོན་ལམ་བཏབཿ ཅེས་སྨྲས་སོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྣལ་འབྱོར་པ་ནུས་ལྡན་རྡོ་རྗེས་སངས་རྒྱས་སྟོང་རྩ་གཉིས་ལ་དབང་བསྐུར་ལུང་བསྟན་པའི་ལེའུ་སྟེ་བདུན་པའོཿ ཿཐ་ཐ་ཉ་རྒྱ་རྒྱཿ ཿ