སྤྲིན་ལྡན་རྒྱལ་ཁམས་བསྟན་པ་གཉིས་ལྡན་གྱིས་བཏུལ་བའི་ལེའུ།
དེ་ནས་མི་ཡུལ་སྤྲུལ་སྐུའི་བསྟན་པ་ནིཿ སྤྲིན་ལྡན་རྒྱལ་པོ་གདུལ་བྱའི་ཞིང་དུ་གཟིགསཿ དེ་དང་དུས་མཚུངས་རྣམ་ཤེས་རྩད་གཅོད་ཅེསཿ བསྐྱེད་རྫོགས་གསུམ་གྱིས་དབང་པོ་རབ་རྣམས་འདུལཿ སྣང་མཛོད་འོག་ཏུ་འཇིག་རྟེན་མགོན་པོའི་དུསཿ གསང་སྔགས་སྐྱོང་བ་ཏགས་སྦྱོར་ཡེ་ཤེས་ཞེསཿ སྤྲུལ་སྐུའི་བསྟན་པ་རིན་ཆེན་གྲགས་དང་ནིཿ ལོངས་སྐུའི་བསྟན་པ་གཏུམ་པོ་ཕུར་འབྱིན་ཞེསཿ ནམ་མཁའི་དབྱིངས་ཀྱིས་སྤྲུལ་སྐུའི་བསྟན་
༼༣༤བ༽པས་འདུལཿ དོན་སྦྱོར་འཇུག་སྲེད་ལོངས་སྐུའི་བསྟན་པས་འདུལཿ སྒྲ་གཅན་ཉི་མས་སྤྲུལ་སྐུའི་བསྟན་པས་འདུལཿ ཚངས་པ་དྲི་མེད་སྤྲུལ་སྐུའི་བསྟན་པས་འདུལཿ བཻ་ཌཱུར་རྒྱལ་པོས་ལོངས་སྐུའི་བསྟན་པས་འདུལཿ བགེགས་བདག་འོད་ཀྱི་མཆོག་ཅེས་བྱ་བ་དང་ཿ བསྟན་གཉིས་དུས་མཚུངས་འགྲོ་བ་འདུལ་བའོཿ སྤྲུལ་སྐུའི་བསྟན་པ་ལུས་ངག་གཙོ་བོར་སྟོནཿ དབང་པོ་ཞི་བ་དུལ་བ་ཐུགས་ཞི་བཿ ཞི་གནས་དམ་པའི་ཕ་རོལ་ཕྱིན་པའོཿ ལོངས་སྐུའི་བསྟན་པ་གསུམ་ག་གཙོ་བོར་སྟོནཿ དུག་ལྔ་མི་སྤང་ཐུག་ཕྲད་ལམ་དུ་འཁྱེརཿ ཕུང་པོ་ལྔ་ནི་རིགས་ལྔ་བརྗོད་པ་སྔགསཿ སེམས་ནི་ཆོས་དབྱིངས་ལྷག་མཐོང་མི་འགྱུར་བཿ རིགས་དྲུག་འདོད་པ་མཚན་ཉིད་ཐེག་པ་ཡིནཿ རིགས་གསུམ་འདོད་པ་གསང་སྔགས་ཕྱི་བའོཿ རིགས་ལྔར་འདོད་པ་སྔགས་ནི་ནང་པ་ཡིནཿ འདི་ཡི་དུས་ན་འགྲོ་བ་འདི་དག་ལཿ བསོད་ནམས་ཉམས་ཏེ་ལོངས་སྤྱོད་མར་མར་བྲིཿ ཕྱི་ལྟར་ས་ཆུ་མེ་རླུང་འབྱུང་བ་བཞིཿ འདོད་པའི་ཁམས་སུ་འདོད་ཆགས་རང་བཞིན་ལྡང་ཿ ཐོག་མར་བལྟས་པས་ཚིམ་པའི་འདོད་ཆགས་བྱུང་ཿ གཅིག་ལ་གཅིག་ལྟ་དེ་ལ་དགའ་བདེ་སྐྱེཿ དེ་ནས་དགོད་པས་ཚིམ་པའི་འདོད་ཆགས་བྱུང་ཿ སྐད་ཆེར་གད་མོ་གཅིག་ལ་གཅིག་དགོད་དོཿ དེ་ནས་ལག་བཅིངས་ཚིམ་པའི་འདོད་ཆགས་བྱུང་ཿ
༼༣༥ན༽གཅིག་ལ་གཅིག་གིས་ལག་པ་བཅངས་ཤིང་འཇུཿ དེ་ནས་རྩ་དང་ཆུ་རྒྱུས་ཐམས་ཅད་གཡོསཿ ཕོ་མོ་འཁྱུད་པས་ཚིམ་པའི་འདོད་ཆགས་བྱུང་ཿ འདོད་ཆགས་བཞི་ལས་འབྱུང་བ་བཞི་འདུས་ནསཿ བལྟས་པས་འབྱུང་བ་ཆུ་ནང་གཟུགས་བརྙས་གསལཿ བྱང་སེམས་བརླན་པས་བརྫུས་སྐྱེས་ཆུ་རུ་སྨིནཿ བརྒད་པས་འབྱུང་བ་རླུང་ལངས་སྒྲ་བསྒྲགས་པསཿ རླུང་སྟོབས་བྱང་སེམས་གཉིས་ཀྱིས་མངལ་སྐྱེས་སོཿ ཿལག་བཅིངས་འབྱུང་བས་འཛིན་གཟུགས་འཛིན་པསཿ ས་ཡི་གཟུགས་ནི་སྒོ་ང་ལས་སྐྱེས་སོཿ གཉིས་གཉིས་འཁྱུད་པས་འབྱུང་བ་མེ་དྲོད་སྐྱེསཿ བྱང་སེམས་བསྐྱོད་པས་དྲོད་གཤེར་ལས་སྐྱེས་སོཿ འདོད་ཆགས་བཞི་ལས་གླིང་བཞིར་གྱེས་པ་ནིཿ ཤར་གྱི་ལུས་འཕགས་འགྲོ་ཀུན་བརྫུས་ནས་སྐྱེཿ ལྷོ་ཡི་ཛམྦྷུ་གླིང་པ་མངལ་ལས་སྐྱེཿ ནུབ་ཀྱི་བ་ལང་སྤྱོད་པ་སྒོང་ལས་སྐྱེཿ བྱང་གི་སྒྲ་མི་སྙན་པ་དྲོད་གཤེར་སྐྱེཿ བལྟས་པས་ཚིམ་པ་ལོ་བརྒྱའི་བར་དུ་བྱུང་ཿ བརྒད་པས་ཚིམ་པ་དྲུག་ཅུའི་བར་དུ་བྱུང་ཿ ལག་བཅིངས་ཚིམ་པ་ལྔ་བཅུའི་བར་དུ་བྱུང་ཿ གཉིས་གཉིས་འཁྱུད་པས་འདོད་ཆགས་བཞི་ག་ཚང་ཿ ཐོག་མར་འདོད་ཆགས་གཡོ་བས་བལྟས་པས་ཚང་ཿ དེ་ནས་དགོད་ཅིང་འཛུམ་པས་བརྒད་པ་ཚང་ཿ དེ་ནས་ལག་པ་འཇུས་པས་ལག་བཅངས་ཚང་ཿ དེ་དག་འཛམ་ནས་དབང་པོའི་སྒོ་སྦྱོར་བཿ འཁྱུད་པས་ཚིམ་པའི་འདོད་
༼༣༥བ༽ཆགས་ཞེས་བྱའོཿ དེ་ལྟར་ཁྱེའུ་དང་ནི་བུ་མོ་རྣམསཿ ཤེས་རབ་ལྡན་པ་ཆོས་ཀྱིས་འདུལ་བའོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྤྲིན་ལྡན་རྒྱལ་ཁམས་བསྟན་པ་གཉིས་ལྡན་གྱིས་བཏུལ་བའི་ལེའུ་སྟེ་བཅུ་པའོཿ ཿཐ་ཉྲ་རྒྱ་རྒྱཿ ཿ